နိုင်ငံတကာသတင်း

ပထမဆုံး FIFA အာဆီယံ ဖလား အင်ဒိုနီးရှား ဆွတ်ခူး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၇ ရက်။ ပထမဦးဆုံးအကြိမ် ကျင်းပသည့် ဖီဖာ အာဆီယံဖလား (FIFA ASEAN Cup) ဗိုလ်လုပွဲတွင် အိမ်ရှင် အင်ဒိုနီးရှားအသင်းသည် ပြိုင်ဘက် ထိုင်းအသင်းကို ပင်နယ်တီ အဆုံးအဖြတ်၌ ၄ ဂိုး - ၂ ဂိုးဖြင့် အနိုင်ရရှိကာ သမိုင်းဝင် ချန်ပီယံဆုကို ဆွတ်ခူးသွားခဲ့သည်။ ဂျကာတာမြို့၌ ကျင်းပသည့် အဆိုပါ ဗိုလ်လုပွဲစဉ်တွင် မိနစ် ၉၀ နှင့် အချိန်ပို ပွဲချိန်အထိ တစ်ဖက် ၂ ဂိုးစီ သရေကျနေသဖြင့် ပင်နယ်တီ အဆုံးအဖြတ် ခံယူခဲ့ကြခြင်းဖြစ်သည်။ ပင်နယ်တီ ကန်သွင်းမှုတွင် အင်ဒိုနီးရှားအသင်းက ပိုမိုတည်ငြိမ်စွာ ကန်သွင်းနိုင်ခဲ့သည့်အပြင် ဂိုးသမား၏ လက်စွမ်းပြ ကာကွယ်မှုများကြောင့် အနိုင်ရရှိခဲ့ခြင်းဖြစ်သည်။ ယခုအောင်ပွဲသည် အင်ဒိုနီးရှား အမျိုးသား ဘောလုံးအသင်းအတွက် အာဆီယံဒေသတွင်း ပြိုင်ပွဲကြီးများတွင် နှစ်ပေါင်းများစွာ ကြုံတွေ့ခဲ့ရသည့် ဆုဖလားငတ်မွတ်မှုကို အဆုံးသတ်နိုင်ခဲ့သည့် သမိုင်းဝင် အမှတ်တရ ဖြစ်ခဲ့သည်။

ပထမဆုံး FIFA အာဆီယံ ဖလား အင်ဒိုနီးရှား ဆွတ်ခူး

ပထမဆုံး FIFA အာဆီယံ ဖလား အင်ဒိုနီးရှား ဆွတ်ခူး သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ ၇ ရက်။ ပထမဦးဆုံးအကြိမ် ကျင်းပသည့် ဖီဖာ အာဆီယံဖ…

  • October 7, 2026
AI ဖြင့် ဈေးနှုန်းညှိနှိုင်းမှု လုပ်သည်ဆိုက မက်ဒေါ်နယ်ကို တရားစွဲ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၇ ရက်။ မက်ဒေါ်နယ် (McDonald's) အမြန်စားသောက်ဆိုင်များတွင် အစားအသောက်ဈေးနှုန်း သတ်မှတ်ရာ၌ AI စနစ်ကို အသုံးပြု၍ ပြိုင်ဆိုင်မှုပျက်ပြားအောင် ဈေးနှုန်းညှိနှိုင်းခဲ့သည် (Price-Fixing) ဆိုသည့် စွပ်စွဲချက်ဖြင့် စားသုံးသူများက အမေရိကန် ဖက်ဒရယ်တရားရုံးတွင် တရားစွဲဆိုလိုက်သည်။ တရားစွဲဆိုချက်အရ မက်ဒေါ်နယ်သည် နီးစပ်ရာနယ်မြေတစ်ခုတည်းရှိ ဆိုင်ခွဲများ၏ မမျှဝေသင့်သည့် ရောင်းအားအချက်အလက်များကို AI ဖြင့် စုဆောင်းကာ အပြိုင်ဆိုင် ဆိုင်ခွဲများအကြား ဈေးနှုန်းတူညီစေရန် သို့မဟုတ် မြင့်မားသည့် ဈေးနှုန်းတစ်ခုတွင် ငြိမ်နေစေရန် နောက်ကွယ်မှ ညှိနှိုင်းပေးခဲ့ကြောင်း၊ ယင်းသည် လွတ်လပ်သည့် စီးပွားပြိုင်ဆိုင်မှုကို ထိခိုက်စေကြောင်း ဖော်ပြထားသည်။ မက်ဒေါ်နယ်ဘက်ကမူ AI စနစ်သည် ဆိုင်ခွဲပိုင်ရှင်များ (Franchisees) စီးပွားရေး ဆုံးဖြတ်ချက်မှန်ကန်စေရန် အကူအညီပေးသည့် ကိရိယာမျှသာဖြစ်ပြီး အပြီးသတ် ဈေးနှုန်းသတ်မှတ်ပိုင်ခွင့်မှာ ဆိုင်ခွဲပိုင်ရှင်များထံ၌သာ ရှိကြောင်း ငြင်းဆိုထားသည်။ လက်ရှိတွင် မက်ဒေါ်နယ်က တရားရုံး၌ အပြည့်အဝ တုံ့ပြန်ရင်ဆိုင်ရန် ပြင်ဆင်နေပြီး စားသုံးသူများဘက်ကလည်း နစ်နာကြေးရရှိရေး တောင်းဆိုထားသည်။

AI ဖြင့် ဈေးနှုန်းညှိနှိုင်းမှု လုပ်သည်ဆိုက မက်ဒေါ်နယ်ကို တရားစွဲ

AI ဖြင့် ဈေးနှုန်းညှိနှိုင်းမှု လုပ်သည်ဆိုက မက်ဒေါ်နယ်ကို တရားစွဲ သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ ၇ ရက်။ မက်ဒေါ်နယ် (McDonald…

  • October 7, 2026
လာအိုတွင် မလေးရှားလေယာဉ်ပေါ်တင်သည့် မူးယစ်ဆေးများ ဖမ်းမိ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၇ ရက်။ လာအိုနိုင်ငံ၊ လွမ်ပရာဘန် (Luang Prabang) နိုင်ငံတကာလေဆိပ်၌ မလေးရှားမှ ပျံသန်းလာသည့် Learjet အမျိုးအစား ကိုယ်ပိုင်လေယာဉ်ပေါ်သို့ မူးယစ်ဆေးဝါးများ တင်ဆောင်နေစဉ် လာအိုရဲတပ်ဖွဲ့က ဝင်ရောက်စီးနင်းရာ အိုက်စ် (ခရစ္စတယ် မက်သဖက်တမင်း) ၅၂၁ ကီလိုဂရမ် ဖမ်းဆီးရမိခဲ့သည်။ ကြိုတင်သတင်းရရှိမှုအရ အာဏာပိုင်များက စောင့်ဆိုင်းစိစစ်ခဲ့ခြင်းဖြစ်သည်။ လေယာဉ်ဆိုက်ရောက်ပြီးနောက် လာအိုနိုင်ငံဘက်မှ မော်တော်ယာဉ်ဖြင့် သယ်ဆောင်လာသည့် ခရီးဆောင်အိတ် ၂၃ အိတ်အနက် ၂၁ အိတ်အတွင်းမှ အိုက်စ် မူးယစ်ဆေးဝါးများကို ရှာဖွေတွေ့ရှိခဲ့ခြင်းဖြစ်သည်။ အဆိုပါဖြစ်စဉ်နှင့် ပတ်သက်၍ မလေးရှားနိုင်ငံသား တစ်ဦးအပါအဝင် လေယာဉ်မှူး၊ တွဲဖက်လေယာဉ်မှူးနှင့် လေဆိပ်ဝန်ထမ်း ၇ ဦး အပါအဝင် စုစုပေါင်း ၁၃ ဦးကို ထိန်းသိမ်းထားသည်။ သက်သေခံ ကိုယ်ပိုင်လေယာဉ်နှင့် ပစ်ကပ်ကားတစ်စီးကို သိမ်းဆည်းထားပြီး မှောင်ခိုကူးသန်းမှု ကွန်ရက်တစ်ခုလုံးကို ပါဝင်ပတ်သက်သူများအား လာအိုအာဏာပိုင်များက ဆက်လက်စုံစမ်းစစ်ဆေးလျက်ရှိသည်။ Photo: LAO SECURITY NEWSPAPER/VIENTIANE TIMES

လာအိုတွင် မလေးရှားလေယာဉ်ပေါ်တင်သည့် မူးယစ်ဆေးများ ဖမ်းမိ

လာအိုတွင် မလေးရှားလေယာဉ်ပေါ်တင်သည့် မူးယစ်ဆေးများ ဖမ်းမိ သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ ၇ ရက်။ လာအိုနိုင်ငံ၊ လွမ်ပရာဘန် (Lua…

  • October 7, 2026
စစ်အုပ်စုခေါင်းဆောင်၏ မလေးရှားခရီးစဉ်ကို လူ့အခွင့်အရေး အဖွဲ့များ ကန့်ကွက် သတင်းနှင့် မီဒီယာ ကွန်ရက်။ ၂၀၂၆ ခုနှစ် အောက်တိုဘာလ ၇ ရက်။ မြန်မာစစ်အုပ်စုခေါင်းဆောင် မင်းအောင်လှိုင်သည် အောက်တိုဘာ ၇ ရက်မှ ၈ ရက်အထိ မလေးရှားနိုင်ငံသို့ နှစ်ရက်ကြာ တရားဝင် ခရီးစဉ်သွားရောက်မည်ဖြစ်ကြောင်း မလေးရှား နိုင်ငံခြားရေးဝန်ကြီးဌာနက သတင်းထုတ်ပြန်သည်။ အဆိုပါ ခရီးစဉ်အတွင်း မလေးရှား ဝန်ကြီးချုပ် အန်ဝါ အီဘရာဟင်မ်နှင့် တွေ့ဆုံကာ မလေးရှား၌ တရားမဝင် ရောက်ရှိနေသည့် မြန်မာနိုင်ငံသားများအား ဘေးကင်းလုံခြုံစွာ ပြန်လည်လွှဲပြောင်းရေးနှင့် ဒေသတွင်း ငြိမ်းချမ်းရေးဆိုင်ရာ ကိစ္စရပ်များကို ဆွေးနွေးမည်ဖြစ်သည်။ ပြီးခဲ့သည့် စက်တင်ဘာလကုန်ပိုင်းက မလေးရှားရောက် မြန်မာနိုင်ငံသား ၁,၄၀၀ ထက်မနည်းကို စစ်သင်္ဘောများဖြင့် ပြန်လည်ပို့ဆောင်ခဲ့ပြီးဖြစ်ကာ ဒုတိယအသုတ်အဖြစ် လူ ၃,၅၀၀ ကျော်ကို ထပ်မံလွှဲပြောင်းရန် စီစဉ်နေသည်ဟု ဆိုသည်။ သို့သော်လည်း အဆိုပါခရီးစဉ်နှင့် ပတ်သက်၍ Fortify Rights အဖွဲ့နှင့် မလေးရှား နိုင်ငံခြားရေးဝန်ကြီးဟောင်း အပါအဝင် အဖွဲ့ဝင် ၁၈ ဦးက မလေးရှားဝန်ကြီးချုပ်ထံ အရေးပေါ် အဓိက ကန့်ကွက်စာ ပေးပို့ထားသည်။ မြန်မာနိုင်ငံတွင် အဓမ္မ စစ်မှုထမ်းခိုင်းမှု နှင့် စစ်တပ်၏ ဖိနှိပ်မှုများ ဆက်လက်ဖြစ်ပွားနေသဖြင့် ဒုက္ခသည်များကို အဓမ္မ ပြန်မပို့ရန်၊ စစ်ခေါင်းဆောင်၏ ခရီးစဉ်ကို ချက်ချင်းဖျက်သိမ်းရန်နှင့် ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံး (UNHCR) အား ထိန်းသိမ်းရေးစခန်းများအတွင်း လွတ်လပ်စွာ ဝင်ရောက်စစ်ဆေးခွင့်ပြုရန် ၎င်းတို့က တိုက်တွန်းထားသည်။

စစ်အုပ်စုခေါင်းဆောင်၏ မလေးရှားခရီးစဉ်ကို လူ့အခွင့်အရေး အဖွဲ့များ ကန့်ကွက်

စစ်အုပ်စုခေါင်းဆောင်၏ မလေးရှားခရီးစဉ်ကို လူ့အခွင့်အရေး အဖွဲ့များ ကန့်ကွက် သတင်းနှင့် မီဒီယာ ကွန်ရက်။၂၀၂၆ ခုနှစ် အောက်တိုဘာလ ၇ ရက်။ မြန်မာစစ်အုပ်…

  • October 7, 2026
တူရဂီနှင့် ပါကစ္စတန်တို့ ဆော်ဒီကို စစ်ရေး အကူအညီများ စတင်ပေးအပ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၆ ရက်။ ဆော်ဒီအာရေဗျ၊ တူရကီနှင့် ပါကစ္စတန် သုံးနိုင်ငံသည် မက္ကာ ပူးတွဲကာကွယ်ရေး သဘောတူညီချက် (Mecca Joint Defense Agreement) အရ မဟာမိတ် ကာကွယ်ရေး မူဝါဒများကို စတင်ကျင့်သုံးလိုက်ပြီဖြစ်သည်။ အောက်တိုဘာ ၅ ရက်က ပြုလုပ်ခဲ့သော အရေးပေါ် အစည်းအဝေးအပြီးတွင် ဆော်ဒီနိုင်ငံအတွင်းသို့ တပ်အင်အားနှင့် စစ်ရေး အကူအညီများ အလျင်အမြန် စေလွှတ်တပ်ဖြန့်သွားမည်ဟု သုံးနိုင်ငံ စစ်ရေးကော်မတီက ပူးတွဲ ကြေညာခဲ့သည်။ တစ်ချိန်တည်းမှာပင် ဆော်ဒီ ကျောထောက်နောက်ခံပြု ယီမင်အစိုးရတပ်များသည် ပင်လယ်နီ ကမ်းရိုးတန်းတစ်လျှောက် မဟာဗျူဟာမြောက် ရေလက်ကြားဒေသဖြစ်သော ဘက်ဘ် အယ်လ် မန်ဒက် (Bab al-Mandeb) နှင့် မိုခါ (Mokha) ဆိပ်ကမ်းမြို့တို့ကို ဟူသီသောင်းကျန်းသူများ လက်အောက်မှ ပြန်လည်သိမ်းပိုက်ရရှိခဲ့သည်။ ယီမင်အစိုးရတပ်သည် ဟူသီများ ထိန်းချုပ်ထားသည့် မြို့တော် ဆာနား (Sanaa) ကို ပြန်လည်သိမ်းပိုက်ရန် စစ်ဆင်ရေး စတင်နေပြီဟု ကြေညာထားသည်။ ဆော်ဒီ ဦးဆောင်သော မဟာမိတ်တပ်များကလည်း "Yemen Dawn" စစ်ဆင်ရေးအဖြစ် တိုက်လေယာဉ် အစီး ၁၀၀ ဖြင့် ပစ်ကူပေးလျက်ရှိသည်။ အမေရိကန်ပြည်ထောင်စုဘက်ကမူ ဆော်ဒီအာရေဗျနိုင်ငံ၏ ကိုယ့်ကိုယ်ကို ကာကွယ်ပိုင်ခွင့်ကို အပြည့်အဝ ထောက်ခံကြောင်း ထုတ်ဖော်ပြောကြားထားသည်။

တူရဂီနှင့် ပါကစ္စတန်တို့ ဆော်ဒီကို စစ်ရေး အကူအညီများ စတင်ပေးအပ်

တူရဂီနှင့် ပါကစ္စတန်တို့ ဆော်ဒီကို စစ်ရေး အကူအညီများ စတင်ပေးအပ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၆ ရက်။ ဆော်ဒီအာရေဗျ၊ တူရကီ…

  • October 6, 2026
ရေနံ ကုမ္ပဏီကြီးများအပေါ် တရားစွဲဆိုမှုကို ကြားနာမှု ပြုမပြု အမေရိကန် တရားရုံးချုပ် အငြင်းပွား သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၆ ရက်။ တရားရုံး ပြန်လည်ဖွင့်လှစ်သည့် ပထမဆုံးနေ့တွင် အမေရိကန် ပြည်ထောင်စု တရားရုံးချုပ် တရားသူကြီးများသည် ရာသီဥတု ပြောင်းလဲမှု ထိခိုက်နစ်နာကြေးအတွက် ရေနံကုမ္ပဏီကြီးများအား တရားစွဲဆိုထားသည့် အမှုကို ဆက်လက်ကြားနာရန် သင့်၊ မသင့် ငြင်းခုန်ဆွေးနွေးခဲ့ကြသည်။ အဆိုပါအမှုသည် ကော်လိုရာဒိုပြည်နယ်၊ ဘိုးဒါ (Boulder) မြို့နယ်အစိုးရက ရာသီဥတုပြောင်းလဲမှုကြောင့် ဖြစ်ပေါ်လာသည့် တောမီးလောင်ကျွမ်းမှုနှင့် သဘာဝဘေးအန္တရာယ် ထိခိုက်မှုများအတွက် Exxon Mobil နှင့် Suncor Energy ရေနံကုမ္ပဏီကြီးများ၌ တာဝန်ရှိသည်ဟု ဆိုကာ စွဲဆိုထားခြင်းဖြစ်သည်။ ရေနံကုမ္ပဏီများဘက်ကမူ ရာသီဥတုပြောင်းလဲမှုသည် ပြည်နယ်အဆင့် မဟုတ်ဘဲ အမျိုးသားအဆင့်နှင့် နိုင်ငံတကာအဆင့် ကိစ္စရပ်ဖြစ်သဖြင့် ပြည်နယ်တရားရုံးများတွင် တရားစွဲဆိုခွင့် မရှိသင့်ကြောင်း၊ ထို့ကြောင့် အဆိုပါအမှုကို ပယ်ဖျက်ပေးရန် တရားရုံးချုပ်၌ လျှောက်လဲခဲ့သည်။ ယခုအမှုတွင် တရားသူကြီး ဆာမူအယ်လ် အလီတို (Samuel Alito) သည် ရေနံကုမ္ပဏီများ၌ ရှယ်ယာပါဝင်မှု ရှိနေခြင်းကြောင့် အမှုစစ်ဆေးရေးတွင် မပါဝင်ဘဲ နုတ်ထွက်ခဲ့သည်။ သို့ဖြစ်ရာ ကျန်ရှိသော တရားသူကြီး ၈ ဦးက မဲခွဲဆုံးဖြတ်ရမည်ဖြစ်ပြီး၊ မဲရလဒ် ၄ မဲ - ၄ မဲ သရေကျပါက အခြေခံဥပဒေဆိုင်ရာ အငြင်းပွားမှုကို အပြီးသတ် မဆုံးဖြတ်နိုင်ဘဲ အောက်ခြေတရားရုံး၏ စွဲဆိုမှုကို ဆက်လက် စစ်ဆေးခွင့် ပြုရမည်ဖြစ်သည်။ ထရမ့်အစိုးရအဖွဲ့၏ ပတ်ဝန်းကျင် ထိန်းသိမ်းရေး အေဂျင်စီ (EPA) ကလည်း ရေနံကုမ္ပဏီများဘက်မှ ရပ်တည်ပေးထားသည်။ ယခုအမှု၏ အဆုံးအဖြတ်သည် အမေရိကန်တစ်ဝန်းရှိ မြို့နယ်နှင့် ပြည်နယ်ပေါင်း ၂၀ ကျော်က ရေနံကုမ္ပဏီများကို စွဲဆိုထားသည့် အလားတူ ရာသီဥတုဆိုင်ရာ တရားစွဲဆိုမှုများအတွက် အရေးပါသော အပြောင်းအလဲ ဖြစ်လာနိုင်သည်။

ရေနံ ကုမ္ပဏီကြီးများအပေါ် တရားစွဲဆိုမှုကို ကြားနာမှု ပြုမပြု အမေရိကန် တရားရုံးချုပ်  အငြင်းပွား

ရေနံ ကုမ္ပဏီကြီးများအပေါ် တရားစွဲဆိုမှုကို ကြားနာမှု ပြုမပြု အမေရိကန် တရားရုံးချုပ်  အငြင်းပွား သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာ…

  • October 6, 2026
မတရား ကုန်သွယ်မှုပြုသည့် နိုင်ငံများကို အရေးယူရန် ပြင်သစ်နှင့် ဂျာမနီ EU အား တောင်းဆို သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၆ ရက်။ ဥရောပသမဂ္ဂ (EU) အတွင်း မတရား ကုန်သွယ်မှု ပြုလုပ်နေသည့် ပြည်ပနိုင်ငံများကို ပိုမိုပြင်းထန်စွာ အရေးယူနိုင်ရန်နှင့် ဥရောပ ဘုံဈေးကွက်အတွင်းမှ အလျင်အမြန် ပိတ်ပင်ဖယ်ရှားနိုင်ရန် ဂျာမနီနှင့် ပြင်သစ် ခေါင်းဆောင်နှစ်ဦးက တောင်းဆိုလိုက်သည်။ ဂျာမနီဝန်ကြီးချုပ် ဖရီးဒရစ်ချ် မာဇ် (Friedrich Merz) နှင့် ပြင်သစ်သမ္မတ အီမန်နျူအယ်လ် မက်ခရွန် (Emmanuel Macron) တို့သည် ဥရောပကော်မရှင် ဥက္ကဋ္ဌ အာဆူလာ ဖွန်ဒါ လေယင် (Ursula von der Leyen) ထံ ပူးတွဲ အဆိုပြုလွှာတစ်စောင် တင်သွင်းခဲ့ခြင်းဖြစ်သည်။ အဆိုပါ တောင်းဆိုချက်၌ မည်သည့်နိုင်ငံကိုမျှ အမည်တိုက်ရိုက် ဖော်ပြထားခြင်း မရှိသော်လည်း၊ ဥရောပသမဂ္ဂနှင့် မကြာခဏ ကုန်သွယ်ရေး အငြင်းပွားလေ့ရှိသော တရုတ်နိုင်ငံနှင့် အမေရိကန် သမ္မတ ဒေါ်နယ်ထရမ့်၏ သွင်းကုန်ခွန် မူဝါဒများကို ရည်ရွယ်ခြင်းဖြစ်ကြောင်း ထင်ရှားသည်။ ခေါင်းဆောင်နှစ်ဦးက EU ကုမ္ပဏီများအနေဖြင့် နိုင်ငံတစ်နိုင်ငံတည်း သို့မဟုတ် ပံ့ပိုးသူ တစ်ဦးတည်းအပေါ် လွန်လွန်ကဲကဲ မှီခိုနေရခြင်းကို လျှော့ချရန် အဆိုပြုထားသည်။ ထို့ပြင် ပြည်ပနိုင်ငံတစ်ခုခုက မတရားသော စီးပွားရေး သို့မဟုတ် နိုင်ငံရေး နည်းလမ်းများ အသုံးပြု၍ EU ၏ ဘုံဈေးကွက်ကို ထိခိုက်အောင် ဆောင်ရွက်လာပါက အဆိုပါနိုင်ငံ၏ ကုန်သွယ်ခွင့်ကို ဥရောပကော်မရှင်က အရေးပေါ် လုပ်ထုံးလုပ်နည်းဖြင့် အမြန်ဆုံး ပိတ်ပင်နိုင်သည့် လုပ်ပိုင်ခွင့်အသစ် ပေးအပ်ရန်လည်း တောင်းဆိုထားသည်။ လက်ရှိတွင် ဥရောပသမဂ္ဂသည် တရုတ်နိုင်ငံနှင့် အမေရိကန်ဒေါ်လာ ဘီလီယံ ၄၀၀ နီးပါးအထိ ကုန်သွယ်ရေး လိုငွေပြလျက်ရှိပြီး၊ အရေးပါသော ကုန်ကြမ်းများနှင့် နည်းပညာပိုင်းတွင် တရုတ်နှင့် အမေရိကန်တို့အပေါ် မှီခိုနေရခြင်းကြောင့် စီးပွားရေးနှင့် ပထဝီနိုင်ငံရေးဆိုင်ရာ စိန်ခေါ်မှုများနှင့် ရင်ဆိုင်နေရသည်။

မတရား ကုန်သွယ်မှုပြုသည့် နိုင်ငံများကို အရေးယူရန် ပြင်သစ်နှင့် ဂျာမနီ EU အား တောင်းဆို

မတရား ကုန်သွယ်မှုပြုသည့် နိုင်ငံများကို အရေးယူရန် ပြင်သစ်နှင့် ဂျာမနီ EU အား တောင်းဆို သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ ၆ ရက်။ …

  • October 6, 2026
ရုရှားဓာတ်ခွဲခန်း ဝန်ထမ်းတစ်ဦး ပလိပ်ရောဂါဖြင့် သေဆုံးမှု အမေရိကန် စောင့်ကြည့် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၆ ရက်။ ရုရှားနိုင်ငံ၊ ဆိုင်ဘီးရီးယားဒေသရှိ သုတေသန ဓာတ်ခွဲခန်းတစ်ခုမှ ဝန်ထမ်းတစ်ဦး အဆုတ်ရောင် ပလိပ်ရောဂါ (Pneumonic Plague) ဖြင့် သေဆုံးခဲ့သည်ဆိုသည့် သတင်းများ ထွက်ပေါ်လာပြီးနောက် အမေရိကန်အစိုးရက အဆိုပါ အခြေအနေကို စောင့်ကြည့်လေ့လာနေသည်ဟု ဆိုသည်။ အသက် ၂၈ နှစ်အရွယ် အမျိုးသမီး ဓာတ်ခွဲခန်း နည်းပညာရှင်တစ်ဦးသည် အကြောင်းအရင်း မသိရသေးသည့် အဆုတ်ရောင်ရောဂါဖြင့် သေဆုံးခဲ့ခြင်းဖြစ်ပြီး၊ အဆိုပါဒေသရှိ ထိတွေ့သူ လူပေါင်းများစွာကို ရုရှားအာဏာပိုင်များက သီးသန့်ခွဲခြား စောင့်ကြည့်လျက်ရှိကြောင်း ဒေသတွင်း သတင်းများက ဖော်ပြသည်။ အဆိုပါ ဖြစ်စဉ်နှင့် ပတ်သက်၍ အမေရိကန် နိုင်ငံခြားရေးဝန်ကြီး မာကို ရူဘီယို (Marco Rubio) က စိုးရိမ်ထိတ်လန့်စရာ မလိုသော်လည်း ဂရုတစိုက် သတိထား စောင့်ကြည့်ရမည့် ကိစ္စဖြစ်ကြောင်း ပြောကြားခဲ့သည်။ အဆုတ်ပလိပ်ရောဂါသည် ဗက်တီးရီးယားကြောင့် ဖြစ်ပွားခြင်းဖြစ်ပြီး၊ လူတစ်ဦးမှတစ်ဦးသို့ အသက်ရှူလမ်းကြောင်းမှတစ်ဆင့် ကူးစက်နိုင်သည်။ ရောဂါကူးစက်ခံရပါက အသက်ရှူရခက်ခဲခြင်း၊ ရင်ဘတ်အောင့်ခြင်းနှင့် သွေးပါသော သလိပ်ထွက်ခြင်းစသည့် လက္ခဏာများကို ၂၄ နာရီအတွင်း အလျင်အမြန် ခံစားရလေ့ရှိသည်။ အချိန်မီ ပဋိဇီဝဆေး (Antibiotic) ဖြင့် ကုသမှု မခံယူပါက အသက်အန္တရာယ် စိုးရိမ်ရသော်လည်း ထိတွေ့မိသူများကိုမူ ဆေးဝါး ကြိုတင်တိုက်ကျွေး၍ ကာကွယ်နိုင်သည်။ ဘော့စတွန်မြို့ Tufts ဆေးရုံကြီးမှ ကူးစက်ရောဂါ ကာကွယ်ရေးဆိုင်ရာ ညွှန်ကြားရေးမှူး အဲလီးစ် ဖရစ်ချာလ် (Elyse Fritschel) က အဆုတ်ပလိပ်ရောဂါသည် COVID-19 ကဲ့သို့ ရောဂါလက္ခဏာ မပြမီ ကူးစက်နိုင်ခြေ မရှိသည့်အတွက် ကမ္ဘာ့ကပ်ရောဂါအဖြစ် ပြန့်ပွားနိုင်ခြေ နည်းပါးကြောင်း သုံးသပ်ထားသည်။ #PneumonicPlague

ရုရှားဓာတ်ခွဲခန်း ဝန်ထမ်းတစ်ဦး ပလိပ်ရောဂါဖြင့် သေဆုံးမှု အမေရိကန် စောင့်ကြည့်

ရုရှားဓာတ်ခွဲခန်း ဝန်ထမ်းတစ်ဦး ပလိပ်ရောဂါဖြင့် သေဆုံးမှု အမေရိကန် စောင့်ကြည့် သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ ၆ ရက်။ ရုရှားန…

  • October 6, 2026
ဂေးဘားကို ဝင်ရောက်ဖမ်းဆီးမှုကြောင့် ထိုင်ဝမ်တွင် LGBTQ+ များ ဆန္ဒပြ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၅ ရက်။ ထိုင်ဝမ်နိုင်ငံ၊ ထိုင်ပေမြို့ရှိ နာမည်ကျော် LGBTQ+ ဘားတစ်ခုဖြစ်သည့် "Commander D" ကို ရဲတပ်ဖွဲ့က တရားရုံး ရှာဖွေဝရမ်းဖြင့် ရုတ်တရက် ဝင်ရောက်စီးနင်းခဲ့ပြီး ဆိုင်ပိုင်ရှင်နှင့် လာရောက်အပန်းဖြေသူ ၅၁ ဦးကို ခေတ္တထိန်းသိမ်း စစ်ဆေးခဲ့သည့်အပေါ် LGBTQi+ အသိုင်းအဝိုင်းဝင် ၁၀၀ နီးပါးက ရဲစခန်းရှေ့တွင် ငြိမ်းချမ်းစွာ ဆန္ဒထုတ်ဖော်ခဲ့ကြသည်။ ပြည်သူ့ကျင့်ဝတ်ဆိုင်ရာ စည်းကမ်းဖောက်ဖျက်မှု အတိုင်ခံရခြင်းကြောင့် စစ်ဆေးခြင်းဖြစ်ကြောင်း ရဲတပ်ဖွဲ့က သတင်းထုတ်ပြန်ထားသည်။ အရှေ့အာရှတွင် အကြီးမားဆုံးဖြစ်သည့် ထိုင်ပေ ပရိုဒ် (Taipei Pride) ပွဲတော် မကျင်းပမီ ရက်ပိုင်းအလိုတွင် ယခုစီးနင်းမှု ဖြစ်ပွားခဲ့ခြင်း ဖြစ်သည်။ ထိုင်ဝမ်သည် ၂၀၁၉ ခုနှစ်တွင် အာရှ၌ လိင်တူလက်ထပ်ခွင့်ကို ပထမဆုံး တရားဝင် ခွင့်ပြုခဲ့သော နယ်မြေဖြစ်သည်။

ဂေးဘားကို ဝင်ရောက်ဖမ်းဆီးမှုကြောင့် ထိုင်ဝမ်တွင် LGBTQ+ များ ဆန္ဒပြ

ဂေးဘားကို ဝင်ရောက်ဖမ်းဆီးမှုကြောင့် ထိုင်ဝမ်တွင် LGBTQ+ များ ဆန္ဒပြ သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ ၅ ရက်။ ထိုင်ဝမ်နိုင်ငံ၊ ထ…

  • October 5, 2026
×Close