နိုင်ငံတကာသတင်း

ဘန်ကောက်နှင့် ထိုင်းနိုင်ငံ ခရိုင်ပေါင်း ၂၇ ခရိုင်တွင် ရေကြီး ရေလျှံမှု ကြုံနေရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၅ ရက်။ ထိုင်းနိုင်ငံတစ်ဝန်း မြို့တော်ဘန်ကောက် အပါအဝင် ခရိုင် ၂၇ ခုတွင် ရေကြီးရေလျှံမှုများ ဆက်လက်ဖြစ်ပွားနေပြီး အိမ်ထောင်စု ၁ ဒသမ ၁၇ သန်းကျော် (လူဦးရေ ၃ ဒသမ ၂ သန်းကျော်) အခက်အခဲနှင့် ရင်ဆိုင်နေရကြောင်း ထိုင်းနိုင်ငံ ဘေးအန္တရာယ်ဆိုင်ရာ စီမံခန့်ခွဲရေးနှင့် ကာကွယ်ရေးဌာန (DDPM) က အောက်တိုဘာလ ၄ ရက်နေ့တွင် ထုတ်ပြန်သည်။ မိုးသည်းထန်စွာ ရွာသွန်းမှုနှင့် မြောက်ပိုင်းဒေသများမှ စီးဆင်းလာသော ရေထုကြောင့် အလယ်ပိုင်းနှင့် အရှေ့ပိုင်း လွင်ပြင်ဒေသ အများအပြားတွင် ရေကြီးနေခြင်းဖြစ်ပြီး၊ မြို့တော်ဘန်ကောက်တွင်လည်း အိမ်ထောင်စုပေါင်း ၃၂၉,၀၀၀ ထိခိုက်ကာ သေဆုံးသူ ၄ ဦးအထိ ရှိလာခဲ့သည်။ အရှေ့ပိုင်း ပရာချင်းဘူရီ (Prachin Buri) ခရိုင်တွင်မူ မြို့နယ် ၇ ခုစလုံး ရေမြှုပ်နေပြီး ရေအနက် ၁ မီတာခန့်အထိ မြင့်တက်နေသဖြင့် ခရိုင်တစ်ခုလုံးကို "ရေဘေးအန္တရာယ်ဇုန်" အဖြစ် ကြေညာထားရသည်။ ပရာချင်း ဘူရီတွင် သေဆုံးသူ ၉ ဦး ရှိသွားပြီ ဖြစ်သည်။ ထိုင်းမိုးလေဝသဌာနက အောက်တိုဘာ ၈ ရက်မှ ၁၃ ရက်နေ့အထိ မိုးထပ်မံသည်းထန်နိုင်သဖြင့် ရုတ်တရက် ရေကြီးရေလျှံမှုများကို သတိပြုကြရန် ထပ်မံသတိပေးထားသည်။

ဘန်ကောက်နှင့် ထိုင်းနိုင်ငံ ခရိုင်ပေါင်း ၂၇ ခရိုင်တွင် ရေကြီး ရေလျှံမှု ကြုံနေရ

ဘန်ကောက်နှင့် ထိုင်းနိုင်ငံ ခရိုင်ပေါင်း ၂၇ ခရိုင်တွင် ရေကြီး ရေလျှံမှု ကြုံနေရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ ၅ ရက်။ ထိုင်း…

  • October 5, 2026
စစ်သတင်းထောက် သေဆုံးမှု သတင်းဌာနနဲ့ လုပ်ဖော်ကိုင်ဖက်ကို တရားစွဲ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၅ ရက်။ ယူကရိန်းစစ်မြေပြင်တွင် သတင်းထောက် သေဆုံးခဲ့ရသည့် ဖြစ်စဉ်နှင့် ပတ်သက်၍ နာမည်ကျော် Fox သတင်းဌာနနှင့် အန္တရာယ် နယ်မြေကို အတင်း သွားခဲ့သည့် လုပ်ဖော်ကိုင်ဖက် သတင်းသမား တစ်ဦးကို သေဆုံးသူ သတင်းထောက်၏ မိသားစုက တရားစွဲလိုက်သည်။ ၂၀၂၂ ခုနှစ် ယူကရိန်စစ်ပွဲ အစောပိုင်းကာလက ကိယက်ဗ် (Kyiv) မြို့ပြင်၌ Fox News သတင်းအဖွဲ့ စီးနင်းလာသော မော်တော်ယာဉ် တိုက်ခိုက်ခံရမှုကြောင့် အသက် ၂၄ နှစ်အရွယ် ယူကရိန်လူမျိုး သတင်းထုတ်လုပ်သူ Oleksandra Kuvshynova (ခေါ်) Sasha သေဆုံးခဲ့ရသည်။ Sasha ၏ မိဘများသည် Fox News ရုပ်သံဌာနနှင့် ဒဏ်ရာရရှိခဲ့သူ နာမည်ကျော် သတင်းထောက် Benjamin Hall တို့အား တရားစွဲဆိုလိုက်သည်။ သတင်းထောက် Benjamin Hall သည် နာမည်ရလိုမှုနှင့် စွန့်စားချင်စိတ်ကြောင့် လုံခြုံရေးအကြံပေးများ၏ "အန္တရာယ်ရှိသဖြင့် မသွားရောက်ရန်" အကြိမ်ကြိမ် သတိပေးချက်များကို လျစ်လျူရှုကာ အန္တရာယ်ဇုန်အတွင်းသို့ အတင်းအဓမ္မ ထွက်ခွာခဲ့သဖြင့် အဆိုပါ ဖြစ်စဉ်ဆိုး ဖြစ်ပွားခဲ့ရခြင်းဖြစ်ကြောင်း ပေါ့ဆမှု၊ တာဝန်မဲ့မှုတို့ဖြင့် စွဲဆိုထားသည်။ Fox News ဌာနဘက်ကမူ ယင်းဖြစ်ရပ်အတွက် ဝမ်းနည်းရပါကြောင်း ထုတ်ပြန်ထားပြီး ဥပဒေကြောင်းအရ ဆက်လက်ရင်ဆိုင်သွားမည်ဟု အသိပေးထားသည်။

စစ်သတင်းထောက် သေဆုံးမှု သတင်းဌာနနဲ့ လုပ်ဖော်ကိုင်ဖက်ကို တရားစွဲ

စစ်သတင်းထောက် သေဆုံးမှု သတင်းဌာနနဲ့ လုပ်ဖော်ကိုင်ဖက်ကို တရားစွဲ သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ ၅ ရက်။ ယူကရိန်းစစ်မြေပြင်တွင်…

  • October 5, 2026
မြောက်ကိုရီးယားက လေကြောင်းကာကွယ်ရေး ရှောင်နိုင်သော ပဲ့ထိန်း ဒုံး စမ်းသပ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၅ ရက်။ မြောက်ကိုရီးယားနိုင်ငံသည် လေကြောင်းရန် ကာကွယ်ရေးစနစ်များကို ရှောင်ကွင်းနိုင်စွမ်းရှိသည့် အလတ်စား ပဲ့ထိန်းဒုံးကျည် (Intermediate-Range Ballistic Missile) သစ်တစ်စင်းကို စမ်းသပ်ပစ်လွှတ်ခဲ့သည်ဟု ကြေညာသည်။ ပြီးခဲ့သည့် စနေနေ့က ဝမ်ဆန် (Wonsan) ကမ်းရိုးတန်းဒေသမှ ပစ်ခတ်ခဲ့ခြင်းဖြစ်ပြီး၊ အဆိုပါစမ်းသပ်မှုကို ခေါင်းဆောင် ကင်ဂျုံအန်း ၏ညီမဖြစ်သူ ကင်ယိုဂျွန်ကိုယ်တိုင် ကြီးကြပ်ခဲ့သည်။ ဒုံးကျည် ပျံသန်းစဉ် လမ်းကြောင်း ပြောင်းလဲနိုင်စွမ်းနှင့် AI နည်းပညာများ ပါဝင်သောကြောင့် တောင်ကိုရီးယားနှင့် ဂျပန်တို့၏ ဒုံးကျည်ကာကွယ်ရေးစနစ်များအနေဖြင့် ကြားဖြတ်ဟန့်တားရန် ခက်ခဲလိမ့်မည်ဟု မြောက်ကိုရီးယားဘက်က ဆိုသည်။ တောင်ကိုရီးယား စစ်ဘက်က အဆိုပါဒုံးကျည်သည် ကီလိုမီတာ ၇၀၀ ကျော် (မိုင် ၄၃၀ ကျော်) ပျံသန်းခဲ့သည်ဟု ထုတ်ပြန်ထားပြီး၊ ဂျပန်ကာကွယ်ရေးဝန်ကြီးဌာနကမူ ပျံသန်းမှုအကွာအဝေး ကီလိုမီတာ ၆၈၀ ခန့်ရှိကာ ဂျပန်၏ သီးသန့်စီးပွားရေးဇုန် (EEZ) အပြင်ဘက် ပင်လယ်ပြင်အတွင်း ကျရောက်ခဲ့ကြောင်း ထုတ်ပြန်ထားသည်။

မြောက်ကိုရီးယားက လေကြောင်းကာကွယ်ရေး ရှောင်နိုင်သော ပဲ့ထိန်း ဒုံး စမ်းသပ်

မြောက်ကိုရီးယားက လေကြောင်းကာကွယ်ရေး ရှောင်နိုင်သော ပဲ့ထိန်း ဒုံး စမ်းသပ် သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ ၅ ရက်။ မြောက်ကိုရီးယ…

  • October 5, 2026
အင်ဒိုနီးရှားအကျဉ်းထောင်မှ ဇိမ်ခံအဆောင်များကို အာဏာပိုင်များ စတင်ဖြိုဖျက် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၂ ရက်။ အင်ဒိုနီးရှားနိုင်ငံ၊ မြို့တော်ဂျကာတာအနီးရှိ အကျဉ်းထောင်တစ်ခုအတွင်း ငွေကြေးနှင့် အာဏာရှိသူ အကျဉ်းသားများအတွက် သီးသန့်ဖန်တီးပေးထားသည့် ဇိမ်ခံအဆောင်များကို အာဏာပိုင်များက စက်တင်ဘာလ ၃၀ ရက်နေ့မှစတင်၍ ဖျက်ဆီးရှင်းလင်းလျက်ရှိကြောင်း သိရသည်။ ဖြစ်စဉ်မှာ စက်တင်ဘာလ ၂၃ ရက်နေ့က အင်ဒိုနီးရှားအစိုးရ စုံစမ်းရေးအဖွဲ့သည် အဆိုပါအကျဉ်းထောင်သို့ ရှောင်တခင် ဝင်ရောက်စစ်ဆေးခဲ့သည်။ ထိုသို့ စစ်ဆေးရာတွင် သီးသန့်အခန်းများအတွင်း မျက်နှာပြင်ကျယ် တီဗီများ၊ လေအေးပေးစက်များ၊ ကြံ့ခိုင်ရေးလေ့ကျင့်ခန်းသုံး ပစ္စည်းများ၊ ဆိုဖာများ၊ ရေခဲသေတ္တာများနှင့် အရက်ပုလင်းများကို ဟိုတယ်ခန်းများသဖွယ် ခင်းကျင်းပြင်ဆင်ထားသည်ကို စစ်ဆေးတွေ့ရှိခဲ့ခြင်းဖြစ်သည်။ အဆိုပါ မသမာမှုများ ပေါ်ပေါက်လာပြီးနောက် စက်တင်ဘာလ ၃၀ ရက်နေ့တွင် လွှတ်တော်အမတ်များ ကိုယ်တိုင် သွားရောက်စစ်ဆေးခဲ့ကြပြီး နောက်နောင် ယခုကဲ့သို့ မသမာမှုများ ထပ်မံမဖြစ်ပွားစေရေး အတွက် အဆိုပါ ဇိမ်ခံအဆောင်များကို ချက်ချင်းဖြိုဖျက်ရန်နှင့် ပရိဘောဂများကို ရုပ်သိမ်းရှင်းလင်းရန် အမိန့်ပေးညွှန်ကြားခဲ့ခြင်း ဖြစ်သည်။

အင်ဒိုနီးရှားအကျဉ်းထောင်မှ ဇိမ်ခံအဆောင်များကို အာဏာပိုင်များ စတင်ဖြိုဖျက်

အင်ဒိုနီးရှားအကျဉ်းထောင်မှ ဇိမ်ခံအဆောင်များကို အာဏာပိုင်များ စတင်ဖြိုဖျက် သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ ၂ ရက်။ အင်ဒိုနီးရှာ…

  • October 2, 2026
ယူကရိန်းနှင့် ရုရှားတို့ ဗျူဟာမြောက် ဒရုန်းအသစ်များ တိုးမြှင့် အသုံးပြုလာ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၂ ရက်။ ယူကရိန်းစစ်ပွဲအတွင်း နှစ်ဖက်စလုံးမှ ပိုမိုအားကောင်းပြီး ထိရောက်မှုရှိသော ဒရုန်းနှင့် ဒုံးကျည်နည်းပညာသစ်များကို တိုးမြှင့်ထုတ်လုပ် တပ်ဆင်အသုံးပြုလျက်ရှိကြောင်း နိုင်ငံတကာ သတင်းများတွင် ဖော်ပြသည်။ ယူကရိန်းသမ္မတ ဗိုလိုဒီမီယာ ဇယ်လန်းစကီး၏ ထုတ်ပြန်ချက်အရ ယူကရိန်းစစ်တပ်သည် အမေရိကန်ပြုလုပ် ATACMS မြေပြင်မှ မြေပြင်ပစ် ဗျူဟာမြောက် ပဲ့ထိန်းဒုံးကျည်နှင့် စွမ်းဆောင်ရည် ဆင်တူပြီး ထုတ်လုပ်မှုစရိတ် သက်သာသော ကိုယ်ပိုင် FP-7 နည်းဗျူဟာမြောက် ပဲ့ထိန်းဒုံးကျည်ကို စစ်ဆင်ရေးအတွင်း ပထမဆုံးအကြိမ် စတင်အသုံးပြုခဲ့သည်။ ပစ်ခတ်မှုအကွာအဝေး ကီလိုမီတာ ၂၀၀ အထိ ရောက်ရှိနိုင်သော အဆိုပါ FP-7 ဒုံးကျည်များကို အမြောက်အမြား ထုတ်လုပ်သွားမည်ဖြစ်ကာ၊ အကွာအဝေး ပိုမိုဝေးလံစွာ ပစ်ခတ်နိုင်သည့် FP-9 ဒုံးကျည်ကိုလည်း ယခုနှစ်ကုန်ပိုင်းတွင် အပြီးသတ် ထုတ်လုပ်နိုင်ရေး ပြင်ဆင်လျက်ရှိသည်။ အခြားတစ်ဖက်တွင်လည်း ရုရှားစစ်တပ်က ပိုမိုမြန်ဆန်သည့် ဂျက်အင်ဂျင်တပ် Geran-4 နှင့် Geran-5 အမျိုးအစား ဒရုန်းသစ်များကို ပြောင်းလဲအသုံးပြုလာခြင်းကြောင့် ယူကရိန်းဘက်မှ ကြားဖြတ်ပစ်ခတ်နိုင်စွမ်း ပမာဏသည် ၅၇ ရာခိုင်နှုန်းအထိ ကျဆင်းသွားခဲ့သည်။ ရုရှားသည် လွန်ခဲ့သည့်လအတွင်း အဆိုပါ ဒရုန်းအစင်းရေ ၂,၀၀၀ နီးပါး ထုတ်လုပ်စုဆောင်းထားရှိပြီး လာမည့်ဆောင်းရာသီကာလ၌ ယူကရိန်း၏ စွမ်းအင်နှင့် အခြေခံအဆောက်အအုံများကို ပစ်မှတ်ထား၍ အရှိန်အဟုန်မြှင့် တိုက်ခိုက်လာနိုင်ကြောင်း စစ်ရေးလေ့လာသူများက သတိပေးသုံးသပ်ထားသည်။

ယူကရိန်းနှင့် ရုရှားတို့ ဗျူဟာမြောက် ဒရုန်းအသစ်များ တိုးမြှင့် အသုံးပြုလာ

ယူကရိန်းနှင့် ရုရှားတို့ ဗျူဟာမြောက် ဒရုန်းအသစ်များ တိုးမြှင့် အသုံးပြုလာ သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ ၂ ရက်။ ယူကရိန်းစစ်ပ…

  • October 2, 2026
အမေရိကန်၌ ဆေးထိုးကွပ်မျက်ရန် နှစ်ကြိမ်ကြိုးစားသော်လည်း မအောင်မြင် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၂ ရက်။ အမေရိကန်ပြည်ထောင်စု၊ တန်နက်ဆီပြည်နယ်တွင် သေဒဏ်ကျခံနေရသည့် အမျိုးသမီးအကျဉ်းသားတစ်ဦးအား ဆေးထိုးကွပ်မျက်ရန် နှစ်ကြိမ်တိုင် ကြိုးပမ်းခဲ့သော်လည်း မအောင်မြင်ဘဲ အသက်ရှင်ကျန်ရစ်သည့် ဖြစ်စဉ်တစ်ခု ဖြစ်ပွားခဲ့သည်။ လွန်ခဲ့သည့် နှစ်ပေါင်း ၃၀ က ကျောင်းနေဖက်အား သတ်ဖြတ်မှုဖြင့် သေဒဏ်ကျခံနေရသူ ခရစ်စတာ ပိုက်ခ် (Christa Pike) ဆိုသူ အမျိုးသမီးအား အကြောဆေးပိုက်သွင်း၍ သေဒဏ်စီရင်ရန် ကြိုးပမ်းခဲ့ခြင်းဖြစ်သည်။ ယင်းစီရင်မှုသည် တန်နက်ဆီပြည်နယ်အတွင်း နှစ်ပေါင်း ၂၀၀ ကာလအတွင်း ပထမဆုံး အမျိုးသမီးသေဒဏ် စီရင်မှုလည်း ဖြစ်သည်။ အကြောဆေးပိုက်ထည့်သွင်း၍ သေဒဏ်စီရင်မှု မအောင်မြင်ခဲ့သည့်အတွက် ပြည်နယ်အုပ်ချုပ်ရေးမှူး ဘီလ် လီး (Bill Lee) က ပြည်နယ်အတွင်း သေဒဏ်စီရင်မှု အားလုံးကို ခေတ္တဆိုင်းငံ့လိုက်ပြီး သီးခြားစုံစမ်းစစ်ဆေးရေးအဖွဲ့ ဖွဲ့စည်းကာ အသေးစိတ် စုံစမ်းစစ်ဆေးရန် အမိန့်ထုတ်ပြန်ခဲ့သည်။ အမေရိကန်ပြည်ထောင်စု၌ ၁၉၇၆ ခုနှစ်မှစ၍ စီရင်ခဲ့သော သေဒဏ် ၁,၆၈၃ မှုအနက် ၈၉ ရာခိုင်နှုန်းခန့်ကို ဆေးထိုးကွပ်မျက်သည့် နည်းလမ်းဖြင့် ဆောင်ရွက်ခဲ့ခြင်းဖြစ်သည်။ သို့သော်လည်း စီရင်မှု၏ ၇ ရာခိုင်နှုန်းခန့်တွင် အကြောဆေးပိုက် ထည့်သွင်းရခက်ခဲခြင်းနှင့် အဆုတ်အတွင်း ရေဝင်ရောက်ကာ ဝေဒနာပြင်းထန်စွာ ခံစားရခြင်းတို့ ဖြစ်ပွားလေ့ရှိရာ၊ အဆိုပါ ဆေးထိုးကွပ်မျက်သည့် နည်းလမ်းသည် နာကျင်မှုမရှိဘဲ လူသားဆန်သည့် နည်းလမ်း ဟုတ်၊ မဟုတ် ဆိုသည့်အပေါ် ဝေဖန်ငြင်းခုံမှုများ တစ်ကျော့ပြန် မြင့်တက်လျက်ရှိသည်။

အမေရိကန်၌ ဆေးထိုးကွပ်မျက်ရန် နှစ်ကြိမ်ကြိုးစားသော်လည်း မအောင်မြင်

အမေရိကန်၌ ဆေးထိုးကွပ်မျက်ရန် နှစ်ကြိမ်ကြိုးစားသော်လည်း မအောင်မြင် သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ ၂ ရက်။ အမေရိကန်ပြည်ထောင်စု၊…

  • October 2, 2026
တရုတ်က ရေနံ တင်ပို့မှု ရပ်ဆိုင်းလိုက်ပြီး ရေနံဈေးများ ပြန်တက် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၂ ရက်။ တရုတ်နိုင်ငံက အောက်တိုဘာလအတွင်း ပြည်ပသို့ စက်သုံးဆီ တင်ပို့မှုများကို ရပ်ဆိုင်းလိုက်ခြင်းနှင့် အမေရိကန်က အရှေ့အလယ်ပိုင်းသို့ တပ်အင်အား ထပ်မံတိုးမြှင့်လိုက်ခြင်းတို့ကြောင့် ကမ္ဘာ့ရေနံစိမ်းဈေးနှုန်းများ ၄ ရာခိုင်နှုန်းကျော် မြင့်တက်သွားခဲ့သည်။ ဘရန့် (Brent) ရေနံစိမ်းဈေးသည် တစ်စည်လျှင် ၁၀၂ ဒေါ်လာကျော်အထိ စံချိန်တင် မြင့်တက်သွားခဲ့ပြီး အမေရိကန် WTI ရေနံစိမ်းဈေးသည်လည်း ၂.၇ ရာခိုင်နှုန်း မြင့်တက်ကာ တစ်စည်လျှင် ၉၂ ဒသမ ၈၇ ဒေါ်လာသို့ ရောက်ရှိခဲ့သည်။ တရုတ်နိုင်ငံ၏ အဓိက ရေနံချက်စက်ရုံများဖြစ်သည့် PetroChina နှင့် Zhejiang Petrochemical တို့သည် အောက်တိုဘာလအတွင်း ဒီဇယ်၊ ဓာတ်ဆီနှင့် လေယာဉ်ဆီ ပြည်ပတင်ပို့မှု အများစုကို ရပ်ဆိုင်းလိုက်သည်။ တရုတ်နိုင်ငံအတွင်း ဒီဇယ် လက်ကျန်ပမာဏသည် စည်ပေါင်း သန်း ၂၀ ခန့်နှင့် ဓာတ်ဆီ လက်ကျန်မှာ စည် ၉ သန်းခန့် ပုံမှန်ထက် လျော့နည်းနေသဖြင့် ပြည်တွင်း လိုအပ်ချက် လုံခြုံရေးအတွက် အစိုးရက ဟောင်ကောင်နှင့် မကာအို အထူးဒေသများမှလွဲ၍ ကျန်နိုင်ငံများသို့ စက်သုံးဆီ တင်ပို့ခွင့်ကို အောက်တိုဘာ ၇ ရက်နေ့အထိ ပိတ်ပင်ထားခြင်း ဖြစ်သည်။ ဤသည်မှာ ရုရှားနှင့် အရှေ့အလယ်ပိုင်း ပဋိပက္ခများကြောင့် ကြပ်တည်းနေသည့် ကမ္ဘာ့ စက်သုံးဆီ ဈေးကွက်ကို ပိုမို ရိုက်ခတ်သွားစေခဲ့သည်။ တစ်ပြိုင်နက်တည်းမှာပင် အမေရိကန် သမ္မတ ဒေါ်နယ်ထရမ့်သည် အီရန်နိုင်ငံအပေါ် စစ်ရေးအရ ပြန်လည်တိုက်ခိုက်ရန် စဉ်းစားနေပြီး အရှေ့အလယ်ပိုင်းဒေသသို့ တတိယမြောက် လေယာဉ်တင်သင်္ဘောနှင့် တပ်အင်အား ၁၀,၀၀၀ ခန့် ထပ်မံစေလွှတ်လိုက်ကြောင်း သတင်းများ ထွက်ပေါ်လာခဲ့သည်။ သမ္မတ ထရမ့်က အီရန်အနေဖြင့် မျှတသော သဘောတူညီချက် ရေးထိုးရမည် သို့မဟုတ်ပါက ပြိုလဲသွားလိမ့်မည်ဟု သတိပေးလိုက်သလို၊ ဟော်မုဇ် ရေလက်ကြားအတွင်း၌လည်း ရေနံတင်သင်္ဘောများ တိုက်ခိုက်ခံရမှုများ ဆက်လက် ဖြစ်ပွားနေသည်။ လက်ရှိတွင် ရုရှားနိုင်ငံကလည်း ပိတ်ဆို့အရေးယူမှုများ မရုပ်သိမ်းသရွေ့ အောက်တိုဘာလအတွင်း ကမ္ဘာ့ဈေးကွက်သို့ ဒီဇယ်ဆီ ရောင်းချမည်မဟုတ်ကြောင်း ကြေညာထားသဖြင့် ကမ္ဘာတစ်ဝန်း ဒီဇယ်ဆီ ပြတ်လပ်မှုမှာ ပိုမိုဆိုးရွားလျက်ရှိသည်။ အခြေအနေကို ထိန်းသိမ်းရန်အတွက် ဥရောပသမဂ္ဂ (EU) က အရေးပေါ် ဒီဇယ်ဆီ လက်ကျန်များ ထုတ်ယူရန် စီစဉ်နေပြီး၊ အမေရိကန်ကလည်း ဥရောပနိုင်ငံများ အရေးပေါ် စက်သုံးဆီ ထုတ်မသုံးပါက အမေရိကန်၏ ဒီဇယ် တင်ပို့မှုကိုပါ ပိတ်ပင်မည်ဟု သတိပေးထားသည်။ ယခုကဲ့သို့ စက်သုံးဆီ တင်ပို့မှု ပိတ်ဆို့မှုများနှင့် စစ်ရေးတင်းမာမှုများကြောင့် သုတေသီများက ၂၀၂၆ ခုနှစ်လက်ကျန်ကာလအတွက် ပျမ်းမျှ ရေနံဈေး ခန့်မှန်းချက်များကို ပြန်လည်မြှင့်တင်လိုက်ကြသည်။

တရုတ်က ရေနံ တင်ပို့မှု ရပ်ဆိုင်းလိုက်ပြီး ရေနံဈေးများ ပြန်တက်

တရုတ်က ရေနံ တင်ပို့မှု ရပ်ဆိုင်းလိုက်ပြီး ရေနံဈေးများ ပြန်တက် သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ ၂ ရက်။ တရုတ်နိုင်ငံက အောက်တိုဘ…

  • October 2, 2026
ဂျပန်နိုင်ငံက အမြဲတမ်းနေထိုင်ခွင့် လျှောက်ထားခအား အဆ ၂၀ ထိ တိုးမြှင့် သတင်းနှင့် မီဒီယာ ကွန်ရက်. ၂၀၂၆ ခုနှစ်၊ အောက်တိုဘာလ ၁ ရက်။ ဂျပန်အစိုးရသည် နိုင်ငံအတွင်း လာရောက်နေထိုင်ကြသည့် နိုင်ငံခြားသားများ၏ အမြဲတမ်းနေထိုင်ခွင့် (PR) လျှောက်ထားခအား ယခင် ယန်း ၁၀,၀၀၀ မှ ယန်း ၂၀၀,၀၀၀ (အမေရိကန်ဒေါ်လာ ၁,၂၇၀ ကျော်) ထိ အဆ ၂၀ ခန့် အထိ တိုးမြှင့်လိုက်ကြောင်း ထုတ်ပြန်သည်။ ထို့အပြင် အမြဲတမ်းနေထိုင်ခွင့် လျှောက်ထားသူများအနေဖြင့် ဂျပန်နိုင်ငံ၏ ပျမ်းမျှဝင်ငွေထက် မနည်းသော ခိုင်မာသည့် ဝင်ငွေရှိကြောင်း သက်သေပြနိုင်ရမည်ဖြစ်သည်။ ထိုမျှသာမက ပင်စင်ထည့်ဝင်မှုနှင့် ဂျပန်ဘာသာစကား ကျွမ်းကျင်မှုဆိုင်ရာ သတ်မှတ်ချက်အသစ်များ ကိုပါ ပြည့်မီရမည်ဖြစ်သည်။ ဝန်ကြီးချုပ် Sanae Takaichi ဦးဆောင်သည့် ဂျပန်အစိုးရသည် တိုးပွားလာနေသော နိုင်ငံခြားသား လူဦးရေအား ထိန်းချုပ်ရေးနှင့် လုံခြုံရေးအတွက် လူဝင်မှုကြီးကြပ်ရေး မူဝါဒများကို တင်းကြပ်လိုက်ခြင်း ဖြစ်သည်။ ဂျပန်နိုင်ငံ၌ မွေးဖွားနှုန်းကျဆင်းမှုနှင့် လုပ်သားအင်အား လိုအပ်ချက်ကြောင့် နိုင်ငံခြားသား ရွှေ့ပြောင်းလုပ်သား ၄ သန်းကျော်အထိ တိုးတက်လာနေသော်လည်း အဆိုပါ ကန့်သတ်ချက်များကြောင့် ရေရှည်နေထိုင် အလုပ်လုပ်ကိုင်လိုသည့် ပညာရှင်များနှင့် ရွှေ့ပြောင်းလုပ်သားများအတွက် စိန်ခေါ်မှုများ ရှိလာနေသည်။

ဂျပန်နိုင်ငံက အမြဲတမ်းနေထိုင်ခွင့် လျှောက်ထားခအား အဆ ၂၀ ထိ တိုးမြှင့်

ဂျပန်နိုင်ငံက အမြဲတမ်းနေထိုင်ခွင့် လျှောက်ထားခအား အဆ ၂၀ ထိ တိုးမြှင့် သတင်းနှင့် မီဒီယာ ကွန်ရက်.၂၀၂၆ ခုနှစ်၊ အောက်တိုဘာလ ၁ ရက်။ ဂျပန်အစိုးရသည် န…

  • October 1, 2026
လာအိုနိုင်ငံတွင် တရုတ်စစ်တပ်က စစ်ရေးအထောက်အကူပြု လေကြောင်းစခန်းသစ် ဖွင့်လှစ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၁ ရက်။ တရုတ်နိုင်ငံသည် အရှေ့တောင်အာရှ အိမ်နီးချင်း လာအိုနိုင်ငံ၌ စစ်ရေးခြေကုပ်ယူမှု တိုးချဲ့သည့်အနေဖြင့် မြို့တော် ဗီယင်ကျန်း၏ မြောက်ဘက် ကီလိုမီတာ ၅၀ အကွာ ဘန်ကွန်း (Ban Keun) လေဆိပ်တွင် စစ်ရေးအထောက်အကူပြု လေကြောင်းသင်တန်းစခန်းတစ်ခုအား စတင်ဖွင့်လှစ်လိုက်သည်။ ယခင်က လယ်ကွင်းပြင်ဖြစ်ခဲ့သော အဆိုပါနေရာတွင် လေယာဉ်ပြေးလမ်း၊ လေယာဉ်ရပ်နားစခန်းနှင့် အဆောက်အအုံသစ်များ တည်ဆောက်ထားသည်ကို ဂြိုဟ်တုဓာတ်ပုံများမှတစ်ဆင့် မြင်တွေ့ရသည်။ တရုတ်ကာကွယ်ရေးဝန်ကြီးဌာနက အဆိုပါစခန်းသည် လေတပ်လေသူရဲများအား လေ့ကျင့်ပေးရန်နှင့် စစ်ရေးအကူအညီပေးရန်အတွက်သာဖြစ်ပြီး မည်သည့် တတိယနိုင်ငံကိုမျှ ရည်ရွယ်ခြင်းမရှိကြောင်း ထုတ်ပြန်ထားသည်။ သို့သော် စစ်ရေးလေ့လာသူအချို့က အဆိုပါစခန်းသည် အရှေ့တောင်အာရှ၌ တရုတ်၏ ပထမဆုံး ပြည့်စုံသည့် ပို့ဆောင်ဆက်သွယ်ရေး စစ်အခြေစိုက်စခန်း တစ်ခုဖြစ်လာနိုင်ကြောင်း သုံးသပ်ကြသည်။ အမေရိကန်၏ မဟာမိတ်ဖြစ်သူ အိမ်နီးချင်း ထိုင်းနိုင်ငံကမူ လာအို၏ ပိုင်နက်နယ်မြေဆိုင်ရာ ဆုံးဖြတ်ပိုင်ခွင့်ကို လေးစားသော်လည်း အခြေအနေများအား အနီးကပ် ဆက်လက်စောင့်ကြည့်သွားမည်ဟု တုံ့ပြန်ထားသည်။

လာအိုနိုင်ငံတွင် တရုတ်စစ်တပ်က စစ်ရေးအထောက်အကူပြု လေကြောင်းစခန်းသစ် ဖွင့်လှစ်

လာအိုနိုင်ငံတွင် တရုတ်စစ်တပ်က စစ်ရေးအထောက်အကူပြု လေကြောင်းစခန်းသစ် ဖွင့်လှစ် သတင်းနှင့် မီဒီယာ ကွန်ရက်။၂၀၂၆ ခုနှစ်၊ အောက်တိုဘာလ ၁ ရက်။ တရုတ်နိုင…

  • October 1, 2026
×Close