စစ်ကောင်စီ – Page 7 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Tag Archive

Tag: စစ်ကောင်စီ

မြစ်ရေအတက်တွင် ချင်းတွင်း မြစ်ကြောင်းအတိုင်း စစ်ကောင်စီ သင်္ဘော ၃၀ ကျော် ဆန်တက်လာ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၁၀ ရက်။ မြစ်ရေတက်သည်ကို အခွင့်ကောင်းယူ၍ ချင်းတွင်းမြစ်ကြောင်း အတိုင်း ဆန်တက်လာသည့် စစ်သင်္ဘောနှင့် ဖလပ်ရေယာဥ် အစီးရေ ၃၀ ကျော်ရှိနေသည်ဟု အခြေအနေကို စောင့်ကြည့်နေသည့် သတင်းအရင်းအမြစ် များက ပြောသည်။ မန္တလေးမြို့မှ ချင်းတွင်းမြစ်ကြောင်း အတိုင်း အထက်ကို ဦးတည်ကာ ဆန်တက်လာသည့် စစ်သင်္ဘောနှင့် ဖလပ်ရေယာဥ် စုစုပေါင်း ၃၀ ကျော်ရှိသည်ဟု ဆိုကြသည်။ စစ်ကောင်စီတပ်သည် ချင်းတွင်းမြစ်ရေတက်သည်ကို အခွင့်ကောင်းယူကာ မြစ်ကြောင်းတစ်လျှောက်တွင် ရှိသည့် စစ်ကောင်စီတပ်၏ စခန်းများနှင့် အထက်ဘက် ဟုမ္မလင်းမြို့နယ်အထိ စစ်အင်အားနှင့် ရိက္ခာများ ဖြည့်တင်းလေ့ရှိသည်။ ချောင်းဦးမြို့နယ်မှ ကာကွယ်ရေးတပ်ဖွဲ့ဝင် အမျိုးသားတစ်ဦးက “စုစုပေါင်း အစီးရေက ၃၀ ကျော်တယ်။ သူတို့ က ကြေးနီတွေ တင်တာရှိတယ်။ ဆားလင်းကြီး ဝမ်ပေါင်ကပေါ့။ ဖလပ်ခွံ အရေအတွက်က တော်တော်လေး များတယ်။ ဒီနှစ်တော့ အစီးရေ ပိုသုံးတာပေါ့လေ။ ၃၀ ကျော်ကြီး ဆန်လာတာဆိုတော့လေ။ အရင်နှစ်တွေက ၁၀ စီး ၁၅ စီးပဲ တွေ့ရတာ။ အရင်နှစ်တွေကတော့ ဒီလောက်မရှိဘူးပေါ့လေ” ဟု ပြောသည်။ ယခုတစ်ကြိမ် ဆန်တက်လာသော ရေယာဥ်များထဲတွင် စစ်သင်္ဘော ၄ စီးနှင့် အတူ ဖလပ်ရေယာဥ် များစွာ ပါဝင်ပြီး စုစုပေါင်း ရေယာဥ် ၃၀ ကျော်ရှိသည့် အတွက် ယခင်နှစ်များကထက် ပိုများပြားသည့် အင်အား ဖြစ် သည်ဟု ချောင်းဦးမြို့နယ်ထဲက ကာကွယ်ရေးတပ်ဖွဲ့ဝင် အမျိုးသားက ပြောသည်။ ထို့အပြင် ရေယာဥ်များ ဆန်တက်လာချိန်၌လည်း မြစ်ကမ်းဘေး တစ်လျှောက် လက်နက်ကြီး လက်နက်ငယ် များဖြင့် ရမ်းသမ်း ပစ်ခတ်မှုများရှိသည့် အပြင် လုံခြုံရေးယူ ပစ်ခတ်ပေးသည့် ပါရာမော်တာ ပစ်ခတ်မှုကြောင့် ဆားလင်းကြီးမြို့နယ်က အရပ်သား ၄ ဦး သေဆုံးခဲ့ရသည်ဟု အညာ ပစ်တိုင်းထောင်လေးများ အဖွဲ့က ဇွန်လ ၂၈ ရက်နေ့ ထုတ်ပြန်ထားသည်။ လက်ရှိတွင် အဆိုပါ ရေယာဥ်များသည် ပဇူလိုင်လ ၈ ရက်နေ့က မုံရွာမြို့နယ်ရှိ အုံးပင်ဆိပ်နှင့် အလုံမင်းဒေါင့် ဆိပ်ကမ်းတို့တွင် ခွဲ၍ ယနေ့အထိ ဆိုက်ကပ်ရန် ပြင်ဆင်မှုများ လုပ်နေကြောင်း မြေပြင် သတင်းအရင်းအမြစ် များက ပြောသည်။ အညာပစ်တိုင်းထောင်လေးများ အဖွဲ့က တာဝန်ရှိသူ အမျိုးသမီးတစ်ဦးက “အခုတက်လာတာက အစီးရေ စုစုပေါင်း ၃၀ ကျော်ရှိပြီး အရင်ရှိနေတဲ့ ရေယာဥ်တွေပါ ပေါင်းရင် ၅၀ နီးပါးလောက် ရှိတယ်။ စစ်သင်္ဘော ကတော့ နည်းမှာပေါ့နော်။ သူတို့က လုံခြုံရေးအနေနဲ့ လိုက်တာ ကုန်တင်သင်္ဘောတွေက ပိုများတယ်” ဟု ပြောသည်။ ထိုသို့ စစ်သင်္ဘောနှင့် ကုန်တင်သင်္ဘော ဖလပ်ရေယာဥ်များစွာ အသုံးပြုနေခြင်းသည် အထက်ဘက်၌ တံတား ပြုပြင်ရန်နှင့် ဆားလင်းကြီးမြို့နယ်မှ ဝမ်ပေါင်ကုမ္ပဏီရှိ ကြေးနီများ သယ်ယူရန် အပြင် မြစ်ကြောင်း တစ်လျှောက်ရှိ စစ်စခန်းများကို စစ်အင်အားနှင့် ရိက္ခာများ တင်ပို့ရန် ဖြစ်သည်ဟု အထက်ပါ အမျိုးသမီးက ဆိုသည်။ တစ်ဖက်တွင် ဆန်တက်လာသည့် မြစ်ကြောင်းတစ်လျှောက် ဆားလင်းကြီးမြို့နယ်နှင့် ချောင်းဦးမြို့နယ် အကြား တွင် ကာကွယ်ရေးတပ်များနှင့် တိုက်ပွဲများ ပြင်းထန်ခဲ့သည်ဟု ချောင်းဦး မြို့နယ်က ကာကွယ်ရေး တပ်ဖွဲ့ဝင်က ဆက်ပြောသည်။ “သူတို့ အရင်နှစ်တွေက ပစ်ခတ်ခံရလေ့ရှိတဲ့ နေရာတွေကို လက်နက်ကြီးတွေ လက်နက်ငယ်တွေနဲ့ ရမ်းသမ်း ပစ်လေ့ရှိတယ်။ ပါရာမော်တာနှစ်စီးနဲ့ ချသွားသေးတယ် ဆားလင်းကြီး မြို့နားပေါ့လေ။ ချောင်းဦးနယ်က ကံကြီး ကုန်းပျူရွာ နားမှာလည်း တိုက်ပွဲ ဖြစ်သေးတယ်။ သူတို့က ရိက္ခာပို့တဲ့ အချိန်ဖြစ်တာပေါ့။” စစ်ကောင်စီတပ်သည် ဇူလိုင်လ ၄ ရက်နေ့က စတင်၍ မန္တလေးမြို့ ရွှေကြက်ယက်ဆိပ်ကမ်းမှ ဧရာဝတီ မြစ်ကြောင်းကနေ စုန်ဆင်းလာပြီး ချင်းတွင်းမြစ်ကြောင်း အတိုင်း အထက်ကို ဆန်တက်ရန် ကြိုးစားလာခြင်း ဖြစ်သည်။ ဓာတ်ပုံ - ချင်းတွင်းမြစ်ကြောင်းပေါ်တွင် တွေ့ရသည့် စစ်သင်္ဘောနှင့် ဖလပ်ရေယာဥ်များ (အညာ ပစ်တိုင်းထောင် လေးများ)

မြစ်ရေအတက်တွင် ချင်းတွင်း မြစ်ကြောင်းအတိုင်း စစ်ကောင်စီ သင်္ဘော ၃၀ ကျော် ဆန်တက်လာ

လေကြောင်း တိုက်ခိုက်မှုကြောင့် အသက် ၄ နှစ် အရွယ်ကလေး အပါအဝင် မိသားတစ်စုလုံး သေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၈ ရက်။ ရှမ်းပြည်တောင်ပိုင်း၊ ကရင်နီပြည်အစပ်၊ ဖယ်ခုံမြို့နယ်တွင် စစ်ကောင်စီ လေကြောင်း တိုက်ခိုက်မှုကြောင့် အသက် ၄ နှစ်အရွယ် သမီးငယ်လေးတစ်ဦး အပါအဝင် မိသားစု ၃ ဦး သေဆုံးသည်ဟု စစ်ဘေးရှောင်ကူညီရေး အဖွဲ့အစည်း တာဝန်ခံများက ပြော သည်။ ဖယ်ခုံမြို့ အနောက်ဘက်ရှိ စစ်ဘေးရှောင်စခန်းအား စစ်ကောင်စီက ယမန်နေ့ (ဇူလိုင် ၇) ည ၁၁ နာရီ ဝန်းကျင် ခန့်တွင် ပေါင် ၂၀၀ ဗုံးဖြင့် ကြဲချတိုက်ခိုက်ခဲ့ခြင်း ဖြစ်သည်။ စစ်ဘေးရှောင်စခန်းရှိ တာဝန်ရှိသူ တစ်ဦးက “တစ်မိသားစုလုံး ပွဲချင်းပြီးတယ်။ အိပ်နေတုန်း ကြဲတာဆိုတော့ ရှောင်ချိန်တောင် မရလိုက်ဘူး။ အခုက ကင်းပတ်လေယာဉ် အရင်လာဝဲတာမျိုး မရှိတော့ဘူး။ တိုက်ရိုက်ပျံလာ ပြီး လာကြဲတာ” ဟု ပြောသည်။ ဗုံးကြဲ တိုက်ခိုက်မှုကြောင့် အသက် ၄ နှစ်အရွယ် ကလေးငယ် တစ်ဦး၊ အသက်၂၈ နှစ်အရွယ် အမျိုးသား တစ်ဦး နှင့် အသက် ၂၆ နှစ်အရွယ် အမျိုးသမီး တစ်ဦးတို့မှာ ပွဲချင်းပြီး သေဆုံးခဲ့သည်ဟု စစ်ဘေးရှောင်စခန်း တာဝန်ရှိ သူများက ပြောသည်။ ထို့အပြင် အခင်း ဖြစ်ပွားစဉ်အတွင်း ၂ နှစ်အရွယ် ကလေးတစ်ဦး၊ ၁၄ နှစ်အရွယ် ကျောင်းသူ တစ်ဦး၊ အသက် ၅၀ အရွယ် အမျိုးသမီး တစ်ဦးနှင့် ကိုယ်ဝန်ဆောင်တစ်ဦးတို့မှာလည်း ပြင်းထန်ဒဏ်ရာရခဲ့သည်ဟု ဆိုကြသည်။ အလားတူ ဇူလိုင်လ ၇ ရက်နေ့၊ ညနေ ၄ နာရီဝန်းကျင် အချိန်ခန့်၌လည်း ဖယ်ခုံမြို့နယ် အနောက်ဘက်ခြမ်းအား ပေါင် ၂၀၀ ဗုံးဖြင့် လေကြောင်း တိုက်ခိုက်ခဲ့ရာ စစ်ဘေးရှောင် အမျိုးသားတစ်ဦး ပြင်းထန်ဒဏ်ရာ ရရှိခဲ့သေး သည်။ ထိခိုက်ဒဏ်ရာရသူနှင့် နီးစပ်သူ တစ်ဦးက “တစ်ယောက် ထိတာနဲ့ အကုန်လုံး တန်းပြေးကြတာ။ ဗုံးက ၂ လုံး ကြဲတာ။ တစ်လုံးက မကွဲဘူး။ တော်လှန်ရေးတပ်တွေ လာသယ်သွားတယ်” ဟု ပြောသည်။ ရှမ်း - ကရင်နီ နယ်စပ်ရှိ ဖယ်ခုံမြို့နယ်၊ မိုးဗြဲမြို့ရှိ လမ်းမကြီးအား စစ်ကောင်စီ ထိန်းချုပ်ထားပြီး တိုက်ပွဲများ လည်း ဆက်လက် ပြင်းထန်နေသည်ဖြစ်ရာ စစ်ကောင်စီက လေကြောင်းပစ်ကူ အမြောက်အမြား အသုံးပြုလာ ခြင်း ဖြစ်သည်။ ဇူလိုင်လ ၂ ရက်နေ့တွင်လည်း ဒီးမော့ဆိုမြို့နယ် အနောက်ဘက်ခြမ်းရှိ စစ်ဘေးရှောင်စခန်းများအား စစ်ကောင်စီ က ပေါင် ၂၀၀ ဗုံးဖြင့် ကြဲချတိုက်ခိုက်ခဲ့သေးသည်။ သို့သော် အဆိုပါ ဗုံးကြဲမှုထဲ လူထိခိုက်မှု မရှိဟု စစ်ဘေးရှောင် ကူညီရေး ဆောင်ရွက်နေသူများက ပြောသည်။

လေကြောင်း တိုက်ခိုက်မှုကြောင့် အသက် ၄ နှစ် အရွယ်ကလေး အပါအဝင် မိသားတစ်စုလုံး သေဆုံး

တရုတ်က TNLA နှင့် စစ်ကောင်စီကို သီးခြားစီ တွေ့ဆုံ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၈ ရက်။ နှစ်ဖက်ကြား တိုက်ပွဲများ ဖြစ်ပွားနေသည့် စစ်ကောင်စီတပ်နှင့် တအာင်းအမျိုးသား လွတ်မြောက်ရေး တပ်မ တော် TNLA တို့သည် ဇူလိုင်လအတွင်း တရုတ်နှင့် သီးသန့်စီ တွေ့ဆုံဆွေးနွေးမှုများ လုပ်ခဲ့ကြသည်။ စစ်ကောင်စီနှင့် တအာင်းတပ် (PSLF/TNLA) တို့ အကြား လာမည့်သြဂုတ်လတွင် ပြုလုပ်မည့် တွေ့ဆုံဆွေးနွေးမှု မတိုင်ခင် တရုတ်နှင့် တွေ့ဆုံခဲ့ခြင်း ဖြစ်သည်ဟု PSLF/TNLA ပြောရေးဆိုခွင့်ရှိသူ လွေးယေဦးက ဇူလိုင်လ ၅ ရက်နေ့တွင် လုပ်ခဲ့သည့် အွန်လိုင်း သတင်းစာရှင်းလင်းပွဲတွင် ပြောသည်။ “ဒီကြားမှာတော့ ဒီတိုက်ပွဲတွေ ရပ်ဖို့၊ တစ်ဖက်နဲ့ တစ်ဖက် ထိုးစစ်ဆင်မှုတွေ မလုပ်ဖို့ တရုတ်အစိုးရကနေ တစ်ဆင့် ကြားဝင်ပြီးတော့မှ စေ့စပ်ဆောင်ရွက်တာမျိုးတွေ ရှိပါတယ်။ ပြီးခဲ့တဲ့ ဒီရက်အတွင်းမှာပဲ ကျမတို့ PSLF/TNLA ကို တွေ့ဆုံ ခေါ်ယူပြီးတော့မှ ကျမတို့ ဒီအပစ်ရပ်တွေ၊ အပစ်တွေ ရပ်ကြဖို့၊ ထိုးစစ်ဆင်မှုတွေ မလုပ်ကြဖို့ပေါ့နော်။” အဆိုပါ တွေ့ဆုံမှုသည် မြေပြင်တွင် တိုက်ပွဲများ ဆက်လက် ပြင်းထန်နေချိန်တွင် တွေ့ဆုံခဲ့ခြင်း ဖြစ်ပြီး နှစ်ဖက် အကြား တင်းမာမှုများ လျှော့ချနိုင်ရေးအတွက် အရေးပါသော ခြေလှမ်းတစ်ရပ်အဖြစ် လွေးယေဦးက ပြော သည်။ “တရုတ် အစိုးရရဲ့ ကြားဝင်စေ့စပ်မှုကတော့ အတော်လေး ခရီးရောက်ပါတယ်။ ကျမတို့ တစ်ဖက်နဲ့တစ်ဖက် ဒီအပစ်ရပ်နိုင်ဖို့လည်း ကြိုးပမ်းဆောင်ရွက် နေတာမျိုးတွေ ရှိပါတယ်။” ပြီးခဲ့သည့် ရက်ပိုင်းအတွင်း တရုတ်အစိုးရသည် PSLF/TNLA ၏ ဗဟိုကိုယ်စားလှယ်များကို ခေါ်ယူတွေ့ဆုံခဲ့ပြီး အဓိက အားဖြင့် အပစ်အခတ်ရပ်စဲရေး၊ အရပ်သား ပြည်သူများ၏ လုံခြုံရေးနှင့် နယ်စပ်ဒေသ တည်ငြိမ်ရေး တို့ကို ဆွေးနွေးခဲ့ကြောင်း လွေးယေဦးက ပြောသည်။ ထို့အပြင် တရုတ်အစိုးရသည် စစ်ကောင်စီနှင့်လည်း အလားတူ တွေ့ဆုံမှုမျိုး ပြုလုပ်ခဲ့ကြောင်း ပြောဆိုခဲ့သော် လည်း စစ်ကောင်စီဘက်မှ တစ်စုံတစ်ရာ ထုတ်ဖော်ပြောဆိုမှုများ မရှိသေးပေ။ အထက်ပါ တွေ့ဆုံမှုများသည် PSLF/TNLA နှင့် စစ်ကောင်စီတို့ကြား တိုက်ရိုက် တွေ့ဆုံဆွေးနွေးခဲ့ခြင်း မဟုတ် ဘူးဟု ဆိုသည်။  လက်ရှိ စစ်ရေး၊ နိုင်ငံရေး အခြေအနေ အရပ်ရပ်အား လာမည့် သြဂုတ်လတွင် ပြုလုပ်ရန် စီစဉ်ထားသော တအာင်းတပ် PSLF/TNLA နှင့် စစ်ကောင်စီတို့ အကြား တရားဝင် တွေ့ဆုံဆွေးနွေးပွဲ အပေါ်သာ မူတည်နေသည် ဟု လွေးယေဦးက ဆိုသည်။ “လာမယ့် သြဂုတ်လမှာ ဒီတွေ့ဆုံဆွေးနွေးမှုကတော့ ဒီသက်ရောက်မှုကတော့ ဘယ်လို ရှိနိုင်မလဲဆိုတာ ကျမတို့ မပြောတတ်သေးဘူး ပေါ့နော်။ အားလုံးကတော့ ဒီစောင့်ကြည့်နေတဲ့ အခြေအနေမျိုး ဖြစ်တယ်။” မြေပြင်တွင် တိုက်ပွဲများ ဆက်လက် ဖြစ်ပွားနေခြင်းသည် တွေ့ဆုံဆွေးနွေးရေး လုပ်ငန်းစဉ်အတွက် အဓိက စိန် ခေါ်မှု တစ်ရပ်ဖြစ်နေပြီး နှစ်ဖက်အကြား ယုံကြည်မှု တည်ဆောက်နိုင်ရေး အတွက် စိန်ခေါ်မှုအဖြစ် ရှိနေသည်ဟု ဆိုသည်။ တရုတ်နိုင်ငံ၏ ကြားဝင်စေ့စပ်မှုသည် ရှမ်းပြည် မြောက်ပိုင်းရှိ ပဋိပက္ခများကို ဖြေရှင်းရာတွင် အရေးပါသော အခန်းကဏ္ဍမှ ပါဝင်နေပြီး နယ်စပ်ဒေသ တည်ငြိမ်ရေးနှင့် ကုန်သွယ်ရေး လမ်းကြောင်းများ ပုံမှန် ပြန်လည်ပတ် နိုင်ရေးအတွက် ကြိုးပမ်းနေသည်ဟု လွေးယေဦးက ပြောသည်။ လက်ရှိတွင် PSLF/TNLA အနေဖြင့် တွေ့ဆုံဆွေးနွေးရေး လမ်းကြောင်းကို ဆက်လက် ကိုင်စွဲထားသော်လည်း မြေပြင်တွင် လိုအပ်သော စစ်ရေး ပြင်ဆင်မှုများကိုလည်း ပြုလုပ်ထားကြောင်း ဆိုသည်။ လာမည့် တွေ့ဆုံဆွေးနွေးပွဲတွင် နှစ်ဖက်အကြား သဘောတူညီမှုများ ရရှိနိုင်ရေးမှာ မြေပြင် အခြေအနေများနှင့် သံတမန်ရေးရာ ကြိုးပမ်းမှုများ အပေါ်တွင် များစွာ မူတည်နေပြီး တရုတ်နိုင်ငံ၏ ဆက်လက် ကြားဝင်စေ့စပ်မှုမှာ အဆုံးအဖြတ်ပေးနိုင်သော အခန်းကဏ္ဍမှ ပါဝင်နေမည် ဖြစ်သည်ဟု TNLA က ပြောသည်။

တရုတ်က TNLA နှင့် စစ်ကောင်စီကို သီးခြားစီ တွေ့ဆုံ

နောင်ချို ဗုံးကြဲ၊ အရပ်သား ၃ ဦးသေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၃ ရက်။ ရှမ်းမြောက် နောင်ချိုမြို့နယ်ထဲက သုံးဆယ်ကျေးရွာကို စစ်တပ်က လေကြောင်းမှ ဗုံးကြဲတိုက်ခိုက်ခဲ့ရာ ဒေသခံ အရပ်သား ၃ ဦး သေဆုံးပြီး ၁ ဦး ဒဏ်ရာရရှိခဲ့သည်။ ဇူလိုင်လ ၁ ရက်နေ့ မွန်းလွှဲပိုင်း ၃ နာရီကျော်အချိန်ခန့်တွင် စစ်ကောင်စီတပ်သည် လေကြောင်းမှ ဗုံးကြဲခဲ့ခြင်း ဖြစ်သည်ဟု နောင်ချို ဒေသခံ အမျိုးသားတစ်ဦးက ပြောသည်။ “သုံးဆယ်ရွာကို လေကြောင်း ဗုံးကြဲတဲ့သတင်းက ဟုတ်ပါတယ်ဗျာ။ စစ်တပ်က လေကြောင်းကနေ ဗုံးကြဲ သွားတာ၊ လာကြဲတာတော့ လေးခေါက်ပေါ့နော်။ အဲ့မှာ ပြည်သူ ၃ ယောက်သေတယ်။ တစ်ယောက် ဒဏ်ရာ ရတယ်။ ၁ ရက်နေ့ ၃ နာရီကျော်ကျော်လောက်မှာ လာတာပါ လေယာဉ်က။ လေးခေါက်လုံး ဆက်တိုက်ပေါ့ ဗျာ။ ပြောရမယ်ဆိုရင် အခြေအနေက အမြဲစိုးရိမ်နေရတဲ့ အခြေအနေပါဗျ။” စစ်ကောင်စီက ဦးဆောင်ပြီး ငြိမ်းချမ်းရေး ဆွေးနွေးပွဲ ကျင်းပနေသော်လည်း တဖက်တွင် နိုင်ငံတဝှမ်း လေကြောင်း ဗုံးကြဲမှုများမှာ ရပ်တန့်မသွားခဲ့ပေ။ နောင်ချိုမြို့နယ်ထဲက သုံးဆယ်ကျေးရွာအား လေယာဉ်ဖြင့် လေးကြိမ်ဆက်တိုက် ဗုံးကြဲခဲ့ခြင်းဖြစ်ပြီး ဗုံး ၁၁ လုံးကြဲချ တိုက်ခိုက်ခဲ့သည်ဟု တအာင်းတပ်မတော် TNLA က ထုတ်ပြန်ထားသည်။ လေကြောင်း ဗုံးကြဲမှုထဲ ထိမှန်သေဆုံးသူ ၃ ဦးမှာ အမျိုးသားများ ဖြစ်သည့်အပြင် ထိခိုက်ဒဏ်ရာ ရထားသူ တစ်ဦးမှာလည်း အမျိုးသားဖြစ်သည်ဟု ဆိုသည်။ အရပ်သားများ ထိခိုက် သေဆုံးမှုများအပြင် သုံးဆယ်ကျေးရွာအတွင်းက အိမ်နှစ်လုံးနှင့် ဘုန်းကြီးကျောင်း နှစ်ကျောင်းလည်း ထိမှန်ပျက်စီးခဲ့သည်။ နောင်ချိုမြို့နယ်ထဲတွင် စစ်ကောင်စီတပ်၏ လေကြောင်း တိုက်ခိုက်မှုများအပြင် မြေပြင်၌လည်း စစ်တပ်နှင့် တအာင်းတပ်မတော် TNLA တို့အကြား တိုက်ပွဲများ ပြင်းထန်စွာ ဖြစ်ပွားနေကြသည်။ နောင်ချိုမြို့တွင်း တိုက်ပွဲ အခြေအနေနှင့် ပတ်သက်၍လည်း ဒေသခံတစ်ဦးက “နောင်ချိုမြို့နယ်ထဲက အုမ္မခါး၊ မျက်ချီးနု၊ လုံစံနဲ့ ကျောက်တောရွာတွေမှာတော့ တိုက်ပွဲက ဆက်တိုက် ဖြစ်နေတယ်။ ဒီနေ့အထိလည်း ဖြစ် တုန်းပဲ။ မြို့နဲ့ နီးလားဆိုတော့ နီးတယ်လို့ပဲ ပြောရမှာပေါ့ဗျာနော်။ စစ်တပ်ကလည်း အင်အားတွေ ထပ်တိုးတာ ရော၊ ဒီဘက် TNLA ကလည်း ဆက်တိုက်နေတာရော ဆိုတော့ တိုက်ပွဲကတော့ မရပ်ပါဘူး။ ဒီအတိုင်းပဲ ဆက် ဖြစ်နေတာဗျ” ဟု ပြောသည်။ စစ်ကောင်စီတပ်က တအာင်းတပ်မတော် TNLA က ထိန်းချုပ်ထားသည့် မြို့ရွာများထဲ လေကြောင်းမှ ဗုံးကြဲ တိုက်ခိုက်မှုများ လုပ်လျှက်ရှိရာ ဇွန်လ ၂၉ ရက်နေ့ကလည်း ကျောက်မဲမြို့အား ဂျက်ဖိုက်တာဖြင့် ဗုံးကြဲမှုကြောင့် အမျိုးသမီး ၂ ဦးနှင့် အမျိုးသား ၄ ဦး ထိမှန်ဒဏ်ရာရရှိခဲ့သေးသည်။ ထိုကြောင့် မိဘပြည်သူများ အနေဖြင့် စစ်ကောင်စီတပ်၏ လေ ကြောင်း တိုက်ခိုက်မှုများကို ရှောင်ရှားနိုင်ရန် စစ်ရေးသတိ အမြဲရှိကြဖို့နှင့် လေကြောင်းရန် ကာကွယ်ရေးဆိုင်ရာ နည်းလမ်းများ လိုက်နာဆောင်ရွက်ရန်လည်း လိုအပ်ကြောင်း TNLA က သတိပေးထားသည်။

နောင်ချို ဗုံးကြဲ၊ အရပ်သား ၃ ဦးသေဆုံး

ထားဝယ်ရှိ စစ်ကောင်စီစခန်းတစ်ခုကို KNLA သိမ်းပိုက် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇွန်လ ၂၇ ရက်။ တနင်္သာရီတိုင်း၊ ထားဝယ်ခရိုင်၊ သရက်ချောင်းမြို့နယ်တွင် တပ်စွဲထားသည့် စစ်ကောင်စီ တပ်စခန်း တစ်ခုကို KNLA နှင့် ပူးပေါင်းတပ်များက ဝင်ရောက်တိုက်ခိုက်ခဲ့ရာ စစ်ကောင်စီ တပ်ဖွဲ့ဝင် ၅ ဦး သေဆုံးပြီး လက်နက်ခဲယမ်းများလည်း သိမ်းဆည်းရရှိခဲ့သည်။ သရက်ချောင်းမြို့နယ် မင်းဒပ်ရွာ ဘုန်းကြီးကျောင်းတွင် တပ်စွဲအထိုင်ချထားသည့် စစ်ကောင်စီတပ်ကို KNLA တပ်ရင်း ၁၂ လက်အောက်ခံ တပ်ခွဲ ၂ နှင့် တော်လှန်ရေး ပူးပေါင်းတပ်များက ဇွန်လ ၂၆ ရက်နေ့ (ယမန်နေ့) က ဝင်ရောက်တိုက်ခိုက်ခဲ့သည်ဟု KNU တပ်မဟာမ ၄ မြိတ်-ထားဝယ်ခရိုင်က ဇွန်လ ၂၇ ရက်နေ့ (ယနေ့)တွင် ထုတ်ပြန်သည်။ နေ့လယ် ၁ နာရီတွင် ဝင်ရောက်တိုက်ခိုက်ခဲ့ပြီး ၃ နာရီတွင် အဆိုပါ တပ်စခန်းကို ထိန်းချုပ်နိုင်ခဲ့သည်ဟု KNU တပ်မဟာ ၄ မြိတ်-ထားဝယ်ခရိုင်က ပြောသည်။ မင်းဒပ်တပ်စခန်းမှ ကျန်စစ်ကောင်စီတပ်ဖွဲ့ဝင်များသည် ဝင်းဝတပ်စခန်းသို့ ပြန်လည်ဆုတ်ခွာခဲ့သည်ဟု KNU တပ်မဟာ မြိတ် - ထားဝယ်ခရိုင်က ဆိုသည်။ Photo - KNU

ထားဝယ်ရှိ စစ်ကောင်စီစခန်းတစ်ခုကို KNLA သိမ်းပိုက်

နောင်ချိုရှိ နေရာငါးနေရာတွင် တိုက်ပွဲ ပြင်းထန်စွာ ဖြစ်ပွား သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇွန်လ ၂၇ ရက်။ ရှမ်းပြည်နယ် မြောက်ပိုင်း နောင်ချိုမြို့နယ်အတွင်း နေရာ ငါးနေရာတွင် စစ်ကောင်စီတပ်နှင့် တအာင်းအမျိုးသား လွတ်မြောက်ရေး တပ်မတော် TNLA တို့ တိုက်ပွဲ ပြင်းထန်စွာ ဖြစ်ပွားနေသည်။ နောင်ချိုမြို့နယ်အတွင်းက နောင်ဖာ၊ ဉာဏ်တော၊ လုံစံ၊ အုမ္မခါးနှင့် နောင်လင်ကျေးရွာများတွင် တိုက်ပွဲ ပြင်းထန်စွာ ဖြစ်ပွားနေသည်ဟု TNLA က ဇွန်လ ၂၇ ရက်နေ့(ယနေ့) တွင် ထုတ်ပြန်သည်။ တိုက်ပွဲအတွင်း စစ်ကောင်စီဘက်က လက်နက်ကြီး ပစ်ကူ အများအပြား အသုံးပြုသည့်အပြင် ဒရုန်းဖြင့် ဗုံးကြဲတိုက်ခိုက်မှုများကိုလည်း လုပ်ဆောင်သည်ဟု TNLA က ဆိုသည်။ လက်နက်ကြီး အလုံး ၇၀ နဲ့ ဒရုန်းနဲ့ ဗုံး ၃၂ လုံးကို ပစ်ကူပေးခဲ့သည်ဟု TNLA က ပြောသည်။ နောင်ချိုမြို့နယ်ရှိ နောင်လင်၊ နောင်အော၊ လုံစံနှင့် နောင်ဖာကျေးရွာတို့တွင် ဇွန်လ (၂၅)ရက်နေ့ တိုက်ပွဲဖြစ်ပွားနေချိန်အတွင်း စစ်ကောင်စီတပ်မှ ဒရုန်းဖြင့် ဗုံး (၂၈)လုံး၊ လက်နက်ကြီး (၆၈)လုံး ပစ်ကူတိုက်ခိုက်ခဲ့သည်ဟု TNLA က ဆိုသည်။ ညီနောင်မဟာမိတ် ၃ ဖွဲ့၏ အပစ်ရပ်ကြေညာထားမှုကို စစ်ကောင်စီက အခွင့်ကောင်းယူပြီး ထိုးစစ်ဆင် တိုက်ခိုက်မှုများကို အဆက်မပြတ် လုပ်ဆောင်လာသည့်အတွက် နောင်ချိုမြို့နယ်ထဲတွင် တိုက်ပွဲ ပြင်းထန်စွာ ဖြစ်ပွားရခြင်းဖြစ်သည်ဟု TNLA က ပြောသည်။ Photo - TNLA

နောင်ချိုရှိ နေရာငါးနေရာတွင် တိုက်ပွဲ ပြင်းထန်စွာ ဖြစ်ပွား

ဆီဆိုင်ရှိ စစ်ရှောင်များအား ပအိုဝ်း ပြည်သူ့စစ်က နေရပ်ပြန်ခိုင်း သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇွန်လ ၂၆ ရက်။ ရှမ်းပြည်တောင်ပိုင်း၊ ဆီဆိုင်မြို့နယ်ထဲကို ရောက်ရှိနေသည့် စစ်ဘေးရှောင်များကို ပအိုဝ်းပြည်သူ့စစ်အဖွဲ့ PNO က ဖိအားပေးပြီး နေရပ်ပြန်ခိုင်းနေသည် ဟု စစ်ရှောင်များက ပြောသည်။ ပအိုဝ်းကိုယ်ပိုင်အုပ်ချုပ်ခွင့်ရဒေသ၊ ဆီဆိုင်မြို့နယ်၊ နောင်ပါရင်ကျေးရွာရောက် စစ်ဘေးရှောင်များကို ပအိုဝ်း ပြည်သူ့စစ်အဖွဲ့ (PNO) က ဖိအားပေး နေရပ်ပြန်ခိုင်းနေသည်ဟု ဒေသတွင်း သတင်းအရင်းအမြစ်များက ပြော သည်။ နောင်ပါရင်ကျေးရွာတွင် တိမ်းရှောင်နေသည့် တောင်ပို့ကွဲ ရွာခံတစ်ဦးက “သူတို့ (PNA) ပြောတာတော့ မကြာ ခင် ဆီဆိုင်မှာလည်း တိုက်ပွဲဖြစ်တော့မယ်ပေါ့။ ကျနော်တို့ကလည်း တင်ပြတာပေါ့။ ရွာမှာက စစ်ဖြစ်နေသေး တယ်။ ဒီမှာတော့ လောလောဆယ် နေလို့ရသေးတယ်လေနော်။ အဲ့ဒါကို လက်မခံဘူး။ အခု တော်တော်များများ တော့ ပြောင်းကြပြီ” ဟု ပြောသည်။ နောင်ပါရင်ကျေးရွာတွင် နေထိုင်ရန်မသင့်ဟု ဆိုကာ နေရပ်ပြန်ခိုင်းနေခြင်းဖြစ်ပြီး လက်ရှိတွင် စစ်ဘေးရှောင် ၈၀၀ ခန့်မှာ ထပ်မံတိမ်းရှောင်ရန်အတွက် အခက်အခဲများနှင့် ကြုံနေကြရသည်ဟု ဆိုသည်။ PNO က ဇွန်လ ၂၀ ရက်နေ့တွင် နေရပ်ပြန်ရန် အမိန့်ပေးခဲ့ခြင်းဖြစ်ပြီး လက်ရှိ နောင်ပါရင်ကျေးရွာတွင် ခိုလှုံ နေကြသူများမှာ ပင်လောင်းမြို့နယ်၊ ဆောင်းပြောင်း၊ လင်ခန်၊ ဟိုဝိုးနှင့် ဖယ်ခုံအင်း အရှေ့ဘက်ကမ်းက တိုက်ပွဲ များကြောင့် ဖယ်ခုံမြို့နယ်၊ လွယ်ပေါကျေးရွာနှင့် ညောင်ရွှေမြို့နယ်၊ တောင်ပို့ကျေးကွဲရွာမှ တိမ်းရှောင်လာကြသူ များ ဖြစ်သည်။ ၎င်းတို့မှာ ဇွန်လ ၁၂ ရက်နေ့ ဝန်းကျင်ကတည်းက နောင်ပါရင်ကျေးရွာသို့ ရောက်ရှိနေကြပြီး လက်ရှိတွင် ၎င်းတို့ ၏ ဒေသအား ပြန်ရန် မဖြစ်နိုင်သေးသဖြင့် ညောင်ရွှေမြို့နယ်၊ မှော်ဘီကျေးရွာနှင့် နီးစပ်ရာ တောတောင် နေရာ များတွင် ထပ်မံ တိမ်းရှောင်နေရသည်ဟု ဆိုသည်။ နောင်ပါရင်ကျေးရွာတွင် တိမ်းရှောင်နေသည့် လွယ်ပေါရွာခံ တစ်ဦးက “ကျမတို့က အဆင့်ဆင့် ရှောင်လာရတော့ ထပ်ရှောင်ဖို့က တော်တော်စဉ်းစားရတယ်လေနော်။ ပိုက်ဆံတအား ကုန်တယ်။ အခုဆို ပြန်ရင်လည်း အိမ်က ရှိ/မရှိ တောင် မသိရသေးဘူး။ ရွာမှာလည်း တယောက်မှ မကျန်ဘူးလေ။ သူတို့နေဆိုလည်းနေပေါ့။ ပြန်ဆို လည်း ပြန်ပေါ့။ ဆွေမျိုးရှိတဲ့သူတွေတော့ ဆီဆိုင်မြို့ပေါ် ပြောင်းကြတယ်” ဟု ပြောသည်။ အဆိုပါ စစ်ဘေးရှောင်များအား ဇွန်လ ၁၅ ရက်နေ့ ဝန်းကျင်ခန့်၌လည်း ပအိုဝ်း ပြည်သူ့စစ်အဖွဲ့ PNO က နောင်ပါရင်ကျေးရွာအတွင်းမှ ရွာပြင်သို့ သွားလာခွင့် ပိတ်ထားခဲ့သေးသည်ဟု ဆိုကြသည်။ အလားတူ ဇွန်လ ၆ ရက်နေ့မှ ဇွန်လ ၁၅ ရက်နေ့အတွင်း၌လည်း ဆီဆိုင်မြို့နယ်ရှိ နောင်ကျောနှင့် တောင်ရှေ့ ကျေးရွာတွင် ခိုလှုံနေသည့် စစ်ဘေးရှောင် ၆ ထောင်ကျော်ကိုလည်း ပအိုဝ်းပြည်သူ့စစ်အဖွဲ့ PNO က မောင်း ထုတ်ခဲ့သေးသည်ဟု စစ်ဘေးရှောင် ကူညီရေးအဖွဲ့ တာဝန်ရှိသူများက ပြောသည်။

ဆီဆိုင်ရှိ စစ်ရှောင်များအား ပအိုဝ်း ပြည်သူ့စစ်က နေရပ်ပြန်ခိုင်း

လေကြောင်းတိုက်ခိုက်မှုကြောင့် ကျောက်မဲတွင် အရပ်သား ၄ ဦးသေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇွန်လ ၂၄ ရက်။ စစ်ကောင်စီတပ်၏ လေကြောင်းတိုက်ခိုက်မှုကြောင့် ကျောက်မဲမြို့တွင် အရပ်သား ၄ ဦး သေဆုံးပြီး ၄ ဦး ထိခိုက်ဒစ်ရာ ရရှိခဲ့သည်။ စစ်ကောင်စီတပ်က ကျောက်မဲမြို့ရှိ ရပ်ကွက် ၃ နှင့် ရပ်ကွက် ၇ ထဲကို တိုက်ပွဲ ဖြစ်ပွားမှု မရှိဘဲ ဂျက်ဖိုက်တာ ဖြင့် ပေါင် ၅၀၀ ဗုံး ၂ လုံး လာရောက်ကြဲချရာမှ ယခုကဲ့သို့ အရပ်သား ပြည်သူများ ထိခိုက်သေဆုံးခဲ့ရသည်ဟု PSLF/TNLA က ဇွန်လ ၂၄ ရက်နေ့ (ယနေ့) ညတွင် ထုတ်ပြန်သည်။ တအာင်းအမျိုးသား လွတ်မြောက်ရေး တပ်မတော် PSLF/TNLA က "ဖြစ်စဉ်တွင် ယနေ့ ညနေပိုင်းအချိန်တွင် စစ်ကောင်စီတပ်မှ လေကြောင်းဖြင့် (၂)ကြိမ် ဗုံးလာရောက်ကြဲချမှုကြောင့် အမျိုးသား (၂)ဦးနှင့် အမျိုးသမီး (၂)ဦး သေဆုံးခဲ့ရပြီး အမျိုးသား (၂)ဦးနှင့် အမျိုးသမီး (၂)ဦးတို့ ထိခိုက်ဒဏ်ရာရရှိခဲ့သည့်အပြင် ပြည်သူလူထု များ၏ နေအိမ် (၁၀)လုံးလည် ထိခိုက်ပျက်စီးသွားခဲ့သည်" ဟု ထုတ်ပြန်ထားသည်။ လူထိခိုက် သေဆုံး ဒဏ်ရာ ရရှိခဲ့သည့်အပြင် အရပ်သား ပြည်သူများ၏ နေအိမ် ၁၀ လုံး ထိမှန် ပျက်စီးခဲ့သည်ဟု ဆိုသည်။ ထို့ကြောင့် ပြည်သူများအနေဖြင့် စစ်ရေး သတိရှိကြရန်နှင့် လေကြောင်းရန် ကာကွယ်ရေးဆိုင်ရာ နည်းလမ်းများ လိုက်နာဆောင်ရွက်ကြရန် PSLF/TNLA က သတိပေးပြောဆိုထားသည်။ ပြီးခဲ့သည့် ဇွန်လ ၁၂ ရက်နေ့ကလည်း စစ်ကောင်စီတပ်သည် နမ္မတူမြို့နယ်၊ မန်လီကျေးရွာထဲကို ဂျက်ဖိုက်တာ ဖြင့် ပေါင် ၅၀၀ ဗုံး ၂လုံး လာရောက်ကြဲချတိုက်ခိုက်ခဲ့သောကြောင့် ဘုန်းကြီးကျောင်း၊ စာသင်ကျောင်းနှင့် ပြည်သူလူထုများ၏ နေအိမ်တစ်ချို့ ထိခိုက်ပျက်စီးသွားခဲ့သည်ဟု PSLF/TNLA က ပြောသည်။ Photo – PSLF/TNLA

လေကြောင်းတိုက်ခိုက်မှုကြောင့် ကျောက်မဲတွင် အရပ်သား ၄ ဦးသေဆုံး

မောတောင်လမ်းပိုင်း တစ်လတာအတွင်း အသွားအလာမရှိ သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ ဇွန်လ ၂၁ ရက်။ တနင်္သာရီမှ နယ်စပ်ရှိ မောတောင် လမ်းပိုင်းရှိ နယ်စပ် ကုန်သွယ်ရေးလမ်းကို ပြန်လည်ဖွင့်လှစ်ထားသည့် တစ်လတာ ကာလအတွင်း အသွားအလာ မရှိခဲ့ဘူးဟု ဒေသတွင်း တာဝန်ရှိသူများက ပြောသည်။ နယ်စပ် ကုန်သွယ်ရေး လမ်းပိုင်းဖြစ်သည့် တနင်္သာရီ - မောတောင်သွား ကားလမ်းကို စစ်ကောင်စီနှင့် ကရင်အမျိုးသား အစည်းအရုံး KNU နှစ်ဘက်စလုံးမှ ဖြတ်သန်း သွားလာခွင့် ပြုထားခဲ့သော်လည်း တစ်လနီးပါးကြာသည့် အချိန်အထိ သွားလာကြသော ခရီးသွားများ မရှိသေးကြောင်း ကော်သူးလေအာမီ (ထီးဆဲ့မဲရွာ တပ်ရင်း) တာဝန်ရှိသူတစ်ဦးက ပြောသည်။ ထီးဆဲ့မဲ့ရွာ တပ်ရင်း ပြန်ကြားရေးတာဝန်ရှိသူက “လက်ရှိမှာ စစ်ကောင်စီတပ်နဲ့ ပြည်သူ့ကာကွယ်ရေး ပူးပေါင်းတပ်ဖွဲ့တွေ အကြား စစ်ရေးတင်းမာနေကြပြီး စစ်ကောင်စီဘက်က နယ်မြေတွေကို ထိန်းချုပ် စိုးမိုး နိုင်ဖို့အတွက် အင်အားဖြည့်တာ၊ ရှေ့ဆက်တိုး ထိုးစစ်ဆင် နေတာမျိုး တွေ့နေရတယ်။ ပူးပေါင်းတပ်ဖွဲ့တွေ ဘက် ကလည်း နယ်မြေတွေ မပေးရရေး ခံစစ် ခုခံပြင်ဆင်မှုတွေ လုပ်နေကြတယ်” ဟု ပြောသည်။ ပြီးခဲ့သည့်နှစ် ဒီဇင်ဘာလ ၁၆ ရက်နေ့မှ စတင်ပြီး မောတောင်လမ်းပိုင်းတွင် တိုက်ပွဲများ ဖြစ်ပွားနေကာ နယ်စပ် ကုန်သွယ်ရေး လမ်းပိုင်းဖြစ်သည့် တနင်္သာရီ - မောတောင် လမ်းအား ခရီးသွားလာဖြတ်သန်းခွင့် ပိတ်လိုက် ခြင်း ဖြစ်သည်။ ယခုနှစ် မေလအလယ်ပိုင်းတွင် ပြန်လည်ဖြတ်သန်းခွင့် ပေးလိုက်သော်လည်း သွားလာနေကြသည့် ခရီးသည် ကားနှင့် ကုန်ကားများ မရှိသေးကြောင်း မောတောင် အမှတ် ၉ ရပ်ကွက်သား တစ်ဦးက ဆိုသည်။ တနင်္သာရီ - မောတောင် ကားလမ်းကို စစ်ကောင်စီတပ်အပြင် ပြည်သူ့ကာကွယ်ရေး တပ်ဖွဲ့များဘက်ကပါ ယခင်ကကဲ့သို့ နံနက် ၆ နာရီမှ ညနေ ၆ နာရီအချိန်ထိ နေ့ဘက်တွင် ဖွင့်လှစ်သွားလာခွင့် ပေးထားခြင်း ဖြစ်သည်။ ထိုသို့ လမ်းဖွင့်လိုက်သည့် နောက်ပိုင်းတွင် စစ်ရေးအရ နှစ်ဦးနှစ်ဘက် ထိပ်တိုက်ရင်ဆိုင်မှု မဖြစ်အောင် ပြည်သူ့ ကာကွယ်ရေး ပူးပေါင်းအဖွဲ့များမှ သတိထား စောင့်စည်းရကြကြောင်း ထီးဆဲ့မဲ့ရွာ တပ်ရင်း ပြန်ကြားရေး တာဝန်ရှိသူက ဆိုသည်။ လက်ရှိ ကားလမ်းပိုင်း တလျောက်၌ စစ်ကောင်စီတပ် နှင့် ပြည်သူ့ကာကွယ် ရေးပူးပေါင်းတပ်ဖွဲ့များမှ ကြီးစိုး ထားပြီး ရုတ်တရက် တိုက်ပွဲဖြစ်လာနိုင်သည့် အခြေအနေ ဖြစ်နေသောကြောင့် တိုက်ပွဲများကြားတွင် ညှပ်၍ ပိတ်မိနိုင်သည့်အတွက် ခရီးသွားလာရန် အစီအစဥ် မရှိသေးကြောင်း ကုန်ကားမောင်းတစ်ဦးက ပြောသည်။ တိုက်ပွဲ ဖြစ်ပွားခဲ့သည့် ၆ လတာ ကာလအတွင်း စစ်ကောင်စီဘက်မှ လေကြောင်းတိုက်ခိုက်မှု အကြိမ်ရေ ၄၀ ထက်မနည်း လုပ်ခဲ့ခြင်းဖြစ်ပြီး တိုက်ပွဲများကြောင့် သိန်ခွန်းကျေးရွာ အုပ်စုအတွင်း စစ်ရှောင်နေရသူပေါင်း သောင်းနှင့်ချီ၍ ရှိနေကြောင်း မြေပြင် သတင်းအရင်းအမြစ်များက ဆိုသည်။

မောတောင်လမ်းပိုင်း တစ်လတာအတွင်း အသွားအလာမရှိ

« Prev 1 … 5 6 7 8 9 … 15 Next »

သောကြာနေ့ည ရုပ်သံသတင်း (၁၀-၁၀-၂၅)

သောကြာနေ့ည ရုပ်သံသတင်း (၁၀-၁၀-၂၅)

ဒီကနေ့ အစီအစဉ်ထဲမှာတော့ … မိုးမိတ်မှာ ဗုံးကြဲတိုက်ခိုက်ခဲ့လို့ ကလေးတွေ အပါအဝင် အရပ်သားတွေ အသက်ဆုံးရှုံးခဲ့ရပါတယ်။ မွန်နဲ့ တနင်္သာရီမှာလည်း အရပ်သားတွေ လေကြောင်းတိုက်ခိုက်မှု ခံရပါတယ်။ ဖားကန့်မှာ စစ်ကော်မရှင်က ဘာကြောင့် ညမထွက်ရ အမိန့်ထုတ်လိုက်တာပါလဲ

ထိုင်းရောက် အလုပ်သမားတွေအတွက် ပန်းရောင်ကတ် ပြုလုပ်ရမယ့် နေရာတွေက ဘယ်နေရာတွေလဲ၊ ဘယ်လိုလုပ်ရမှာလဲ။ ယူကရိန်းတိုက်ပွဲမှာ လောင်စာ အရင်းအမြစ်တွေကို ဘာလို့ အပြန်အလှန် တိုက်ခိုက်နေကြတာလဲ။ ယူကေက အိန္ဒိယ နိုင်ငံကို အပေါ့စား ဒုံးကျည်တွေ ရောင်းပေးလိုက်ပါတယ်။

ကမ္ဘာကျော် မုဒိမ်းမှုတစ်ခုမှာ အယူခံဝင်တဲ့သူကို တရားရုံးက ဘယ်လို အမိန့်ချမှတ်လိုက်သလဲ … စတာတွေတင်ဆက်ထားပါတယ်။

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

KNU ၏ ကော်သူးလေ ကောင်စီများ အရှိန်မြှင့်တင် ဆောင်ရွက်နေ
တော်လှန်ရေး အစုအဖွဲ့များအကြား သွေးကွဲမှုများ ရှောင်ကျဉ်ရန် KNDF ခေါင်းဆောင်ပြော
ထားဝယ် ဗဟိုသင်္ကြန်မဏ္ဍာပ် အနီး ဒရုန်း တိုက်ခိုက်မှုတွင် အမျိုးသမီးတစ်ဦး ဒဏ်ရာရ
စစ်အသွင်ပြောင်း သမ္မတက နိုင်ငံတော် သမ္မတအား လွတ်ငြိမ်းချမ်းသာခွင့်ပေး
အမေရိကန်က ဟော်မုဇ်ရေလက်ကြားတွင် အီရန်ကို ပိတ်ဆို့

Archives

Archives

×Close