စစ်ကော်မရှင် – Page 2 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Tag Archive

Tag: စစ်ကော်မရှင်

ဗန်းမော်-ရွှေကူအကြား မြစ်ကြောင်းရှိ ရွှေဖောင်များကို စစ်ကော်မရှင်ဗုံးကြဲရာ အရပ်သား အချို့ သေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၁၂ ရက်။ ကချင်ပြည်၊ ဗန်းမော်မြို့နယ်နှင့် ရွှေကူမြို့နယ်ကြားရှိ ဧရာဝတီမြစ်ကြောင်းတစ်လျှောက် ရွှေတူးဖော်နေသည့် ရွှေဖောင်များကို စစ်ကော်မရှင်တပ်က ဂျက်လေယာဉ်များဖြင့် အပြင်းအထန် ဗုံးကြဲတိုက်ခိုက်ခဲ့ရာ ရွှေလုပ်သား အချို့ ထိခိုက်သေဆုံးခဲ့သည်။ အဆိုပါ ဖြစ်စဉ်မှာ မတ်လ ၁၀ ရက်နေ့ ညနေပိုင်းက ဖြစ်ပွားခဲ့ခြင်း ဖြစ်သည်။ ဗန်းမော်မြို့နယ် စင်းခန်းတံတားအထက်ဘက်ရှိ နန့်ခုတ်၊ ဘိုတောင်းနှင့် မြလယ်ကျေးရွာများအနီး မြစ်ကြောင်း တစ်လျှောက်တွင် ရွှေတူးဖော်နေသည့် ရွှေဖောင်များကို တံတားဦးလေတပ်မှ တက်လာသည့် ဂျက်လေယာဉ် ၃ စင်းက လိုက်လံ ဗုံးကြဲခဲ့ခြင်းဖြစ်သည်။ လေကြောင်းတိုက်ခိုက်မှုကြောင့် ရွှေဖောင်များနှင့်အတူ ဆီပေပါများပါ မီးလောင်ပေါက်ကွဲခဲ့ပြီး မြစ်အတွင်းရှိ ရွှေဖောင်အစီးရေများစွာ မီးဟုန်းဟုန်းတောက်လောင် ပျက်စီးခဲ့ရသည်။ ဖြစ်စဉ်ကို သိသူ တစ်ဆင့်ခံသတင်းရင်းမြစ် တစ်ဦးက “ကျနော်တို့ ရတဲ့သတင်း အချက်အလက်ကတော့ ၁၀ ရက်နေ့ ညနေမှာ တိုက်လေယာဉ်တွေနဲ့ လာပြီး ဗုံးကြဲသွားတာ။ မျှောဖောင်စက်လှေတွေ မီးလောင်ကုန်ပြီး စက်လှေပေါ်က လူတွေလည်း သေတာတွေများတယ်။ အတိအကျ လူသေစာရင်း မရဘူး။ ပထမအခေါက်မှာ တင် ၃ ယောက်လောက် သေတယ်။ ၈ ယောက်ဒဏ်ရာ ရတယ်။ နောက်ပိုင်းထပ်လာကြဲတာက အခုထိ အချက် အလက် မရဘူးဗျ” ဟု ပြောသည်။ လက်ရှိတွင် သေဆုံးသူ အရေအတွက်ကို အတည်ပြုရန် ကြိုးပမ်းနေဆဲဖြစ်သော်လည်း မြေပြင်သတင်းရင်းမြစ် အချို့၏ အဆိုအရ အနည်းဆုံး ရွှေလုပ်သား ၃၀ ခန့် ထိခိုက်သေဆုံးမှု ရှိခဲ့သည်ဟု ဆိုကြသည်။ ရုပ်အလောင်းများမှာ မီးလောင်ကျွမ်းသွားခြင်းနှင့် ရေထဲမျောပါသွားခြင်းတို့လည်း ရှိနေသည်ဟု တစ်ဆင့်ခံ သတင်းရင်းမြစ်များက ပြောသည်။ အဆိုပါ ကိစ္စနှင့် ပတ်သက်၍ ကချင်လွတ်လပ်ရေးအဖွဲ့ KIO/KIA သတင်းနှင့် ပြန်ကြားရေး တာဝန်ခံ ဗိုလ်မှူးကြီး နော်ဘူကလည်း “နန့်ခုတ်ရွာနဲ့ ဘိုတောင်းရွာကြားမှာ မတ်လ ၁၀ ရက်နေ့ ညနေ ၃ နာရီနဲ့ ၄ နာရီ ဝန်းကျင် လောက်မှာ ဗုံးကြဲတာရှိပါတယ်။ အဲ့ဒီဗုံးကြဲတာက ရွှေတူးဖော်တဲ့နေရာမှာ ကျတာ။ အဲ့ဒီက ရွှေဖောင်တွေ ပျက် စီးသွားတယ်။ သူတို့ရဲ့ ဆီပုံးတွေပေါ့ ဆီပေပါတွေ အကုန်လုံး မီးလောင် ပျက်စီးသွားတယ်။ နောက်ပြည်သူ လူထု ၈ ယောက်အဲ့မှာ ထိခိုက်ဒဏ်ရာ ရပြီးမှ ၂ ယောက်ကတော့ သေဆုံးသွားတယ်” ဟု ပြောသည်။ တိုက်ပွဲဖြစ်ပွားမှု မရှိသည့်အပြင် စစ်ကော်မရှင်စခန်းများလည်း မရှိသလို အဆိုပါနေရာမှာ အရပ်သားများသည် ရွှေတူးဖော်နေသည့် နေရာ ဖြစ်သည်ဟု ဆိုသည်။ ဗန်းမော်မြို့နယ် စင်းခန်းတံတားအထက်ဘက်ရှိ နန့်ခုတ်၊ ဘိုတောင်းနှင့် မြလယ်ကျေးရွာများအနီး မြစ်ကြောင်း တစ်လျှောက်တွင် ရွှေတူးဖော်နေသည့် ရွှေဖောင်များကို ညနေ ၄ နာရီခန့်တွင်တစ်ကြိမ်၊ ညနေပိုင်း ၅ နာရီနှင့် ၆ နာရီကြားတွင် တစ်ကြိမ် လေကြောင်းမှ ဗုံးကြဲခဲ့ခြင်း ဖြစ်သည်။ ဗိုလ်မှူးကြီးနော်ဘူက “နောက် ညနေပိုင်း ၅ နာရီနဲ့ ၅ နာရီကြားမှာလည်း စင်းခန်းအထက်ပေါ့ အဲ့မှာလည်း Y12 နဲ့ ထပ်ပြီး ဗုံးကြဲတာပေါ့နော်။ ဗုံး ၅ လုံးနဲ့ ကြဲတယ်တဲ့။ အဲ့မှာ သေဆုံးတဲ့ဟာတွေတော့ မသိရသေးပါဘူး။ အဲ့မှာက တိုက်ပွဲလည်း မဖြစ်ဘူး။ တိုက်ပွဲ ဖြစ်စရာအကြောင်းလည်း မရှိဘူး။ သူတို့ စစ်ကော်မရှင်တပ်လည်း မရှိဘူး။ စခန်းတွေလည်း အနီးအနားမှာလည်း မရှိဘူး။ KIO/KIA ကို နာမည်တပ်ပြီးမှ ဘာမှမဆိုင်တဲ့ ပြည်သူ လူထုကို ဗုံးကြဲတယ်ဆိုတာကတော့ စစ်ရာဇဝတ်မှုပေါ့နော် မြောက်တဲ့ ကိစ္စပဲ ဖြစ်ပါတယ်” ဟု ဆက် ပြော သည်။ အဆိုပါ ရွှေတူးဖော်ရေးလုပ်ကွက်များမှာ KIA တပ်မဟာ ၁၁ နယ်မြေအတွင်း တည်ရှိပြီး၊ စစ်ကော်မရှင်က KIA ၏ ဝင်ငွေရလမ်းကို ဖြတ်တောက်ရန် ရည်ရွယ်ချက်ရှိရှိ အရပ်သားပစ်မှတ်ကို တိုက်ခိုက်ခြင်းဖြစ်နိုင်ကြောင်း ဒေသခံများက သုံးသပ်ကြသည်။ စစ်ကော်မရှင်သည် ပြီးခဲ့သည့် ဇန်နဝါရီလကလည်း ဗန်းမော်မြို့နယ်ရှိ နာရေးဆုတောင်းပွဲတစ်ခုကို လေကြောင်း မှ ဗုံးကြဲခဲ့ရာ ပြည်သူ ၂၃ ဦးထက်မနည်း သေဆုံးခဲ့ဖူးသည်။ လက်ရှိတွင်လည်း နိုင်ငံတစ်ဝန်း စစ်ရေးအရ အထိနာနေသည့် စစ်ကော်မရှင်တပ်သည် အရပ်သားများရှိရာ နေရာများကို လေကြောင်းမှတစ်ဆင့် အစုလိုက်အပြုံလိုက် သတ်ဖြတ်မှုများကို ဆက်တိုက်လုပ်ဆောင်နေခြင်း ကြောင့် ဒေသခံပြည်သူများမှာ အသက်ဘေးအတွက် စိုးရိမ် ထိတ်လန့်နေကြရသည်။ #ရွှေဖောင်ဗုံးကြဲ #စစ်ကော်မရှင် #လေကြောင်းတိုက်ခိုက်

ဗန်းမော်-ရွှေကူအကြား မြစ်ကြောင်းရှိ ရွှေဖောင်များကို စစ်ကော်မရှင်ဗုံးကြဲရာ အရပ်သား အချို့ သေဆုံး

စစ်မှန်သည့် ဆွေးနွေးပွဲများ ပေါ်ပေါက်မှသာ ဆွေးနွေးမည်ဟု KIO ပြော၊ စစ်ပွဲများ ရပ်ရန်၊ စစ်ကော်မရှင်နှင့် ဆွေးနွေးရန် တရုတ် တိုက်တွန်း သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၁၂ ရက်။ မြန်မာ့ပြည်တွင်းစစ်ကို အမှန်တကယ် အဆုံးသတ်နိုင်မည့် နိုင်ငံရေးဆွေးနွေးပွဲများ ဖြစ်လာမှသာ စစ်ကော်မရှင် နှင့် တွေ့ဆုံမည်ဖြစ်ကြောင်း ကချင်လွတ်လပ်ရေးအဖွဲ့ (KIO/KIA) က တရုတ်အစိုးရ၏ တိုက်တွန်းမှုကို တုံ့ပြန် လိုက်သည်။ ပြီးခဲ့သည့် ဖေဖော်ဝါရီလကုန်ပိုင်းက တရုတ်နိုင်ငံတွင် ပြုလုပ်ခဲ့သည့် KIO ဥက္ကဋ္ဌ ဗိုလ်ချုပ်ကြီး အင်ဘန်လ ဦးဆောင်သည့်အဖွဲ့နှင့် တရုတ်နိုင်ငံ ယူနန်ပြည်နယ် တာဝန်ရှိသူများ၏ တွေ့ဆုံပွဲတွင် တရုတ်ဘက်က စစ်ကော်မရှင်နှင့် နိုင်ငံရေးအရ ဆွေးနွေးရန် အကြံပြုခဲ့ခြင်းဖြစ်သည်။ သို့သော် လက်ရှိအခြေအနေတွင် စစ်ကော်မရှင်ဘက်က ပြည်တွင်းစစ်အဆုံးသတ်ရန် အားထုတ်မှု မရှိသဖြင့် ဆွေးနွေးရန် အဆင်မပြေသေးကြောင်း KIO ဘက်က တုံ့ပြန်ခဲ့သည်။ KIO/KIA သတင်းနှင့် ပြန်ကြားရေးတာဝန်ခံ ဗိုလ်မှူးကြီးနော်ဘူက “အခုလောလောဆယ် အချိန် ကာလမှာက တော့ စစ်ကော်မရှင်ဘက်ကနေ နိုင်ငံရေးဆွေးနွေး တကယ့်မြန်မာနိုင်ငံလုံးနဲ့ဆိုင်တဲ့ မြန်မာ့ပြည်တွင်းစစ် အဆုံး သတ်နိုင်တဲ့ နိုင်ငံရေးဆွေးနွေးပွဲကတော့ အခုချိန်မှာ စစ်ကော်မရှင်ဘက် ကနေ လုပ်မယ့်အလားအလာ ကျနော် တို့လည်း မတွေ့ဘူး။ သူတို့လည်း အဲဒါကို မပြောဘူး။ ဒါကြောင့် ကျနော်တို့လည်း ဆွေးနွေးဖို့ အဆင်မပြေတာ” ဟု ပြောသည်။ KIO ၏ သဘောထားနှင့် ပတ်သက်၍ ဒုတိယ ဗိုလ်ချုပ်ကြီးဂွန်မော်ကလည်း ၎င်း၏ မိန့်ခွန်းတစ်ခုတွင် KIO အနေဖြင့် တစ်ဖွဲ့ချင်းစီ တွေ့ဆုံမှုကို လက်ခံမည်မဟုတ်ကြောင်းနှင့် စစ်ကော်မရှင်အနေဖြင့် အမျိုးသား ညီညွတ် ရေးအစိုးရ (NUG) နှင့် စကားပြောလိုသည့် ဆန္ဒ ရှိ၊ မရှိကိုသာ နေပြည်တော်သို့ မေးမြန်းထားကြောင်း ထည့်သွင်းပြောဆိုထားသည်။ KIO/KIA ၏ သဘောထားကို ကချင်လွတ် လပ်ရေးကောင်စီ (KIC) ဒုဥက္ကဋ္ဌ - ၁ ဒုတိယ ဗိုလ်ချုပ်ကြီး ဂွန်မော်က ပြီးခဲ့သည့် ဖေဖော်ဝါရီလ ၈ ရက်နေ့တွင် အမေရိကန်နိုင်ငံ၊ တက္ကဆက်ပြည်နယ်၌ ကျင်းပသည့် ၆၅ နှစ်မြောက် ကချင်တော်လှန်ရေးနေ့ အခမ်းအနား ဗီဒီယို မိန့်ခွန်းတွင် ထည့်သွင်းပြောဆိုခဲ့ခြင်း ဖြစ်သည်။ လက်ရှိ အနေအထားများအရ စစ်ကော်မရှင်နှင့် တွေ့ဆုံဆွေးနွေးရန် မဖြစ်နိုင်သေးသော်လည်း နိုင်ငံရေးပြောင်း လဲမှုများကို ဖြစ်ပေါ်စေနိုင်သည့် ဆွေးနွေးပွဲများအတွက် KIO/KIA အနေဖြင့် အသင့်ရှိကြောင်း တရုတ်ကိုယ် စားလှယ်များအား ပြောဆိုခဲ့သည်ဟု ဗိုလ်မှူးကြီးနော်ဘူ က ဆက်ပြောသည်။ ဗိုလ်မှူးကြီးနော်ဘူကလည်း “တကယ်လို့ နိုင်ငံရေးအပြောင်းအလဲ ရှိနိုင်လောက်တဲ့ ဆွေးနွေးပွဲဆိုလို့ ရှိရင်တော့ ကျနော်တို့ တက်ဖို့ အဆင်သင့်ဖြစ်ပါတယ်” ဟု ပြောသည်။ တရုတ်အစိုးရက ငြိမ်းချမ်းရေးအတွက် တိုက်တွန်းနေသော်လည်း မြေပြင်တွင်မူ ကချင်ပြည် အတွင်းရှိ မြို့နယ် အများအပြား၌ စစ်ကော်မရှင်၏ လေကြောင်းဗုံးကြဲမှုနှင့် လက်နက်ကြီးပစ်ခတ်မှုများကြောင့် တိုက်ပွဲများမှာ တစ်နေ့ထက်တစ်နေ့ ပိုမိုပြင်းထန်နေဆဲဖြစ်သည်။ စစ်ရေးလေ့လာသူများကမူ စစ်ကော်မရှင်သည် စစ်ရေးအရ အထိနာနေချိန်တွင် တရုတ်ကို ကြားခံ အသုံးချ၍ ထွက်ပေါက်ရှာရန် ကြိုးပမ်းနေခြင်းဖြစ်ကြောင်း သုံးသပ်မှုများလည်း ရှိသည်။ ဓါတ်ပုံ - AFP (ပုံဟောင်း) #KIA #KIO #နိုင်ငံရေးဆွေးနွေးပွဲ #ကချင်လွတ်လပ်ရေးအဖွဲ့ #ကချင်လွတ်လပ်ရေးတပ်မတော်

စစ်မှန်သည့် ဆွေးနွေးပွဲများ ပေါ်ပေါက်မှသာ ဆွေးနွေးမည်ဟု KIO ပြော၊ စစ်ပွဲများ ရပ်ရန်၊ စစ်ကော်မရှင်နှင့် ဆွေးနွေးရန် တရုတ် တိုက်တွန်း

ညောင်လေးပင် ခရိုင်တွင် လူသားဒိုင်းအဖြစ် ဖမ်းခံထားသူ အားလုံး ကယ်ထုတ်နိုင်ခဲ့ပြီ၊ ကယ်တင်ရေး စစ်ဆင်ရေးအတွင်း တော်လှန်ရေး ရဲဘော် ၁၁ ဦး ကျဆုံး။ သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ မတ်လ ၁၀ ရက်။ ပဲခူးတိုင်း၊ ညောင်လေးပင်တွင် ဓားစာခံအဖြစ် ဖမ်းဆီးခံထားရသည့် ပြည်သူ ၃၀၀ ကျော်ကို PDF နှင့် KNLA ပူးပေါင်းအဖွဲ့ ကယ်ထုတ်နိုင်ပြီဟု အမျိုးသားညီညွတ်ရေး အစိုးရ NUG ကာကွယ်ရေးဝန်ကြီးဌာန နှင့် ပဲခူးတိုင်း စစ်ဌာနချုပ်က ထုတ်ပြန်သည်။ အဆိုပါ ကယ်ဆယ်ရေးစစ်ဆင်ရေးအတွင်း တော်လှန်ရေးတပ်ဖွဲ့များဘက်မှ ရဲဘော် ၁၁ ဦး ကျဆုံးခဲ့ပြီး စစ်ကော်မရှင်ဘက်မှလည်း ၁၀ ဦးထက်မနည်း သေဆုံးကာ၊ အယောက် ၂၀ ကျော် ဒဏ်ရာအပြင်းအထန် ရရှိခဲ့သည်ဟု NUG က ထုတ်ပြန်ထားသည်။ ညောင်လေးပင်မြို့နယ် အတွင်းရှိ ကျေးရွာများတွင် စစ်ကော်မရှင်တပ်က လူသားဒိုင်းအဖြစ် ဖမ်းဆီးထားသည့် ဓားစာခံပြည်သူ ၃၀၀ ကျော်ကို ပြည်သူ့ကာကွယ်ရေးတပ်မတော် (PDF) နှင့် ကရင်အမျိုးသား လွတ်မြောက် ရေး တပ်မတော် (KNLA) ပူးပေါင်းတပ်ဖွဲ့များက ကယ်ထုတ်နိုင်ခဲ့ခြင်း ဖြစ်သည်။ ရွာသားများ ဖမ်းဆီးခံခဲ့ရသည့် အခြေအနေနှင့် ပတ်သက်၍ ကျောက်ကြီးမြို့နယ်၊ ကရင်အရေးပေါ် ကူညီ ကယ်ဆယ်ရေး ကော်မတီ ပြောရေးဆိုခွင့်ရှိသူ တစ်ဦးက ယခုကဲ့သို့ ရှင်းပြသည်။    “အဲ့နားတစ်ဝိုက်မှာ အဲဒီကျေးရွာတွေကို တပ်က ဝင်စီးပြီးတော့ ရွာသားတွေကို ဖမ်းတယ်။ စစ်တောင်းမြစ် အနောက်ဖက် အဲဒီရေတွင်းကျေးရွာ ကျောင်းကုန်းကျေးရွာ အဲဒီနားတစ် ဝိုက်စသဖြင့် အဲဒီနားတစ်ကြောကရွာ တွေ စစ်ကောင်စီ ဖက်က ရွာသားတွေကို ထိုးစစ်ဆင်ပြီးတော့ ပစ်ခတ်တိုက်ခိုက်မှု ဖြစ်တယ်။ ဖြစ်တဲ့အခါကျ တော့ သူတို့ အဲဒီရွာကို ဝင်စီးလို့ ရတဲ့အခါ ရွာသားတွေကို သူတို့ ဖမ်းဆီးထားတယ်။ လူဦးရေ ၃၀၀ ဝန်းကျင် ခန့်မှန်းခြေပေါ့နော်” ဟု ပြောသည်။ ပြီးခဲ့သည့် မတ်လ ၅ ရက်နေ့မှ စတင်ကာ စစ်ကော်မရှင်၏ တပ်မ (၇၇) ဦးဆောင်သော အင်အား (၄၀၀) ခန့်ရှိ စစ်ကြောင်း ၄ ကြောင်းသည် လက်နက်ကြီး၊ ဒရုန်းနှင့် လေကြောင်းပစ်ကူများအသုံးပြု၍ ညောင်လေးပင်မြို့နယ် ရှိ ရေတွင်းကုန်း၊ ခရုကုန်းနှင့် ကျောင်းကုန်းကျေးရွာများသို့ ဝင်ရောက်စီးနင်းခဲ့ခြင်း ဖြစ်သည်။ ထိုသို့စီးနင်းစဉ်အတွင်း စစ်ကော်မရှင်တပ်သည် ရွာသား ၃၀၀ ကျော်ကို ဓားစာခံအဖြစ် ဖမ်းဆီးခဲ့သည့်အပြင် ကလေးငယ် ၃ ဦးနှင့် ကိုယ်ဝန်ဆောင်အမျိုးသမီး ၁ ဦး အပါအဝင် အပြစ်မဲ့ပြည်သူ ၄၀ ကျော်ကို ရက်စက်စွာ သတ်ဖြတ်ခြင်း၊ ညှဉ်းပန်းနှိပ်စက်ခြင်းများဖြင့် စစ်ရာဇဝတ်မှုများကို ကျူးလွန်ခဲ့သည်။ ယမန်နေ့က အနည်းငယ် လွတ်မြောက်ခဲ့သော်လည်း ကျန်ရှိနေဆဲ ဖြစ်သည်ဟု ကရင်အရေးပေါ် ကူညီ ကယ်ဆယ်ရေး ကော်မတီ ပြောရေးဆိုခွင့်ရှိသူ က ပြောသည်။ “တချို့က ပိတ်မိနေ ဆဲပဲ ပြီးခဲ့တဲ့ မနေ့က ၇ ရက်နေ့ ညကတော့ အသစ်တဖန်ပြန်ပြီးတော့မှ ပစ်ခတ်တိုက်ခိုက်မှု ပြန်စတဲ့နေရာမှာ ဒီဖက် KNU ဖက်က သွားပြီးတော့ ပစ်ခတ်မှု လုပ်ပေးတဲ့အခါ ပြည်သူတွေက ၂၀ ကျော် ၃၀ ကျော် ပြန်လွတ် မြောက်လာတယ်” ဟု ပြောသည်။ မတ်လ ၇ ရက်နေ့တွင် ရွာသားအချို့မှာ ထွက်ပြေးလွတ်မြောက်လာခဲ့ပြီး မတ်လ ၈ ရက်နေ့တွင်မူ ပဲခူးခရိုင် တပ်ရင်း (၂) နှင့် မဟာမိတ်အဖွဲ့တို့က ဖမ်းဆီးခံထားရသူများထဲ အယောက် ၁၅၀ ခန့်ကို ကနဦး ကယ်ထုတ်နိုင်ခဲ့ ပြီး ယနေ့တွင်မူ ပြည်သူ ၃၀၀ ကျော်လုံးကို ကယ်ထုတ်နိုင်ခဲ့ပြီဖြစ်ကြောင်း ထပ်မံ ထုတ်ပြန်လာခြင်း ဖြစ်သည်။ ဖမ်းဆီးခံထားရသည့် ပြည်သူများကို ကယ်တင်ရန်အတွက် အမျိုးသားညီညွတ်ရေး အစိုးရ၊ ပဲခူးတိုင်းစစ်ဌာန ကွပ်ကဲမှုအောက်ရှိ တပ်ရင်းတပ်ဖွဲ့များနှင့် KNLA တပ်မဟာ (၃) တို့ ပူးပေါင်းကာ စစ်ဆင်ရေးဖော်ဆောင်ခဲ့ခြင်း ဖြစ်သည်။ အမျိုးသားညီညွတ်ရေးအစိုးရ (NUG) ၏ ထုတ်ပြန်ချက်အရ ကယ်ထုတ်နိုင်ခဲ့သည့် ပြည်သူ ၃၀၀ ကျော်ကို ဘေးကင်းလုံခြုံရာ ဒေသများသို့ ကူညီပို့ဆောင်ပေးထားပြီး ဖြစ်ကြောင်း သိရသည်။ စစ်ကော်မရှင်တပ်သည် စစ်ရေးအရ အရေးနိမ့်လာချိန်တွင် အရပ်သားပြည်သူများကို လူသားဒိုင်းအဖြစ် အသုံးပြုကာ အကြောက်တရားဖြင့် အုပ်ချုပ်ရန် ကြိုးပမ်းနေခြင်း ဖြစ်ကြောင်းနှင့် ယခုဖြစ်စဉ်သည် ပဲခူးတိုင်း အတွင်း စစ်ကော်မရှင်၏ အဆိုးရွားဆုံး လူ့အခွင့်အရေး ချိုးဖောက်မှုများထဲမှ တစ်ခုဖြစ်ကြောင်း မြေပြင်တွင် ကူညီကယ်ဆယ်ရေး လုပ်ဆောင်နေသူများက သုံးသပ် ပြောဆိုနေကြသည်။ #ညောင်လေးပင်ခရိုင် #ပဲခူးတိုင်း #KNLA #KNDO #PDF #NUG #လူသားဒိုင်းကာ #စစ်ကော်မရှင်တပ် #ကျောက်ကြီးမြို့နယ်

ညောင်လေးပင် ခရိုင်တွင် လူသားဒိုင်းအဖြစ် ဖမ်းခံထားသူ အားလုံး ကယ်ထုတ်နိုင်ခဲ့ပြီ၊ ကယ်တင်ရေး စစ်ဆင်ရေးအတွင်း တော်လှန်ရေး ရဲဘော် ၁၁ ဦး ကျဆုံး။

KIO သတင်းနှင့် ပြန်ကြားရေးတာဝန်ခံ ဗိုလ်မှူးကြီးနော်ဘူနှင့် အထူးအင်တာဗျူး ကချင်ပြည်အတွင်းက စစ်ရေးအခြေအနေတွေဟာ မြေပြင်မှာ ခဏတာ ငြိမ်သက်နေသလို ထင်ရပေမယ့် တစ်ဖက်မှာတော့ နိုင်ငံတကာ ဖိအားတွေနဲ့ စစ်ရေးတင်းမာမှုတွေက ပိုပြီး မြင့်တက်လာနေပါတယ်။ အင်တာဗျူး အပိုင်း (၁) မြစ်ကြီးနားမှာ လေယာဉ်ကို ဘယ်သူ ပစ်တာလဲ၊ မကြာသေးခင်ကပဲ တရုတ်အစိုးရကိုယ်စားလှယ်အဖွဲ့တစ်ဖွဲ့နဲ့ ကချင် လွတ်လပ်ရေး အဖွဲ့ KIO ဥက္ကဌ ဗိုလ်ချုပ်ကြီး အင်ဘန်လ ခေါင်းဆောင်တဲ့ အဖွဲ့ တို့ တွေ့ဆုံခဲ့ပါတယ်။ တွေ့ဆုံမှုမှာ တရုတ်ဘက်က ဘာတွေ ပြောခဲ့တယ်ဆိုတာကို KIO သတင်းနှင့် ပြန်ကြားရေး တာဝန်ခံ ဗိုလ်မှူးကြီး နော်ဘူက အခုလို ပြောပြပါတယ်။  ဗိုလ်မှူးကြီးနော်ဘူ - ဖေဖော်ဝါရီလ နောက်ဆုံးအပတ်လောက်မှာ ကျနော်တို့ KIA ဥက္ကဋ္ဌ နဲ့ ဒု-ဥက္ကဋ္ဌ တို့အဖွဲ့နဲ့ တရုတ်က လူကြီးတွေနဲ့ တွေ့တာရှိပါတယ်။ သူတို့မေးတာကတော့ ဖေဖော်ဝါရီလ ၂၀ ရက်နေ့မှာ မြစ်ကြီးနား ပြည်သူလူထု စီးနင်းနေတဲ့ လေယာဉ်ပစ်တာကို KIO/KIA အဖွဲ့အစည်းကနေ ပစ်တာ ဖြစ်ပါတယ်ဆိုပြီးမှ စစ်ကော်မရှင်ကနေ စွပ်စွဲထားတာ ရှိတယ်။ တရုတ်အစိုးရကလည်း အဲ့ဒါကို ကြားလို့ ကျနော်တို့နဲ့ တွေ့တဲ့ အချိန် မှာ ‘ခင်ဗျားတို့ ပစ်တာဟုတ်ပါသလား’ ဆိုပြီးမှ မေးတယ်။ ဒါတစ်ချက်။ မေး - ဟုတ်ကဲ့ လေယာဉ်ပစ်ခတ်မှုနဲ့ ပတ်သက်ပြီး KIO ဘက်က ဘယ်လို ပြန်လည်တုံ့ပြန်ခဲ့လဲဗျ။   ဗိုလ်မှူးကြီးနော်ဘူ - ကျနော်တို့ကတော့ ဘာတုန့်ပြန်မှု ပေးရမှာလဲ။ လေယာဉ်ပစ်တာက ကျနော်တို့ မဟုတ်ဘူး လို့ ပြောပြီး အဲဒါ တုန့်ပြန်တာပဲ။ ကျနော်တို့ ပစ်တာမဟုတ်ဘူး ကျနော်တို့ ဒါမျိုးပေါ်လစီ မရှိဘူး။ ညွှန်ကြား တာလည်း မရှိဘူး။ ဘယ်အဖွဲ့အစည်းကနေ ပစ်တာလည်း ကျနော်တို့ မသိဘူး လို့ ဖြေထားတယ်။ မေး - တခြားရော ဘာတွေ ပြောလာတာ ရှိသေးလဲ။ စစ်ကော်မရှင်နဲ့ နိုင်ငံရေးဆွေးနွေးဖို့ တရုတ်ရဲ့ အကြံပြုချက်အပေါ် KIO ရဲ့ သဘောထားကရော ဘယ်လိုရှိပါသလဲ။  ဗိုလ်မှူးကြီးနော်ဘူ - ဒုတိယအချက်ကတော့ သူတို့အကြံပြုတာကတော့ ခင်ဗျားတို့လည်း စစ်ကော်မရှင်နဲ့ နိုင်ငံရေး ဆွေးနွေးဖို့ အကြံပြု လိုပါတယ် ဆိုပြီးမှ ပြောတာ အဲဒါ နှစ်ချက်။ သုံးချက်ကတော့ တရုတ်ပြည်ရဲ့ နှစ်သစ်ကူးအချိန်ကာလ လည်းဖြစ်နေလို့ ကျနော်တို့ကို နှစ်သစ်ကူးအချိန်ကာလမှာ လာတွေ့ဆုံတာ အဲဒါ သုံးချက် ဖြစ်ပါတယ်။ အဲဒီ ဖေဖော်ဝါရီလ နောက်ဆုံးအပတ်မှာ တွေ့တာ။ နိုင်ငံရေး ဆွေးနွေးပါဆိုတာက ဒါက အမြဲတမ်းပြောနေတဲ့ စကားဖြစ်ပါတယ်။ ကျနော်တို့ ဆွေးနွေးပွဲ လုပ်မယ် ဆိုလို့ရှိရင်တော့ ကျနော်တို့ ဆွေးနွေးဖို့ အဆင့်သင့် ဖြစ်ပါတယ်။ အခုလောလောဆယ် အချိန်ကာလမှာကတော့ စစ်ကော်မရှင်ဖက်ကနေ နိုင်ငံရေးဆွေးနွေး တကယ့် မြန်မာနိုင်ငံလုံးနဲ့ ဆိုင်တဲ့ မြန်မာ့ ပြည်တွင်းစစ် အဆုံးသတ် နိုင်တဲ့ နိုင်ငံရေးဆွေးနွေးပွဲကတော့ အခုချိန်မှာ စစ်ကော်မရှင်ဖက်ကနေ လုပ်မယ့် အလားအလာ ကျနော်တို့လည်း မတွေ့ဘူး။ သူတို့လည်း အဲဒါကို မပြောဘူး။ ဒါကြောင့် ကျနော်တို့လည်း ဆွေးနွေးဖို့ အဆင်မပြေတာ။ တကယ် လို့ နိုင်ငံရေးအပြောင်းအလဲ ရှိနိုင်လောက်တဲ့ ဆွေးနွေးပွဲဆိုလို့ရှိရင်တော့ ကျနော်တို့ တက်ဖို့ အဆင်သင့် ဖြစ်ပါတယ်ဆိုပြီးမှ ကျနော်တို့ ပြောတာ။ အင်တာဗျူး အပိုင်း (၂) ကချင်ပြည်အတွင်းက စစ်ရေး အခြေအနေတွေ ဘယ်လို ရှိသလဲ။ ပြီးခဲ့တဲ့ ရက်ပိုင်းက ရဟတ်ယာဉ်တစ်စီး ပစ်ချ ခဲ့တယ် ဆိုတာနဲ့ ကချင်ပြည်က စစ်ရေး အခြေအနေတွေကိုတော့ ဗိုလ်မှူးကြီး နော်ဘူက အခုလို ဆက်ပြောပါတယ်။  ဗိုလ်မှူးကြီးနော်ဘူ - "ဗန်းမော်ဘက်မှာ တိုက်ပွဲက သိပ်ပြင်းထန်တာတော့ မရှိပေမဲ့ လေကြောင်းကနေ ပစ်တာ တွေ ရှိပါတယ်။ ရဟတ်ယာဉ်တစ်စီး ပစ်ချလိုက်တယ်ဆိုတာကတော့ ပစ်လို့ ထိတော့ထိတယ်လို့ ပြောပါတယ်။ အဲဒီ Mi-17 ရဟတ်ယာဉ်ဟာ ရွှေကူမှာ ခဏဆင်းပြီးမှ ပြန်သွားတယ်လို့ သိရပါတယ်။ လူကြီးပိုင်းတွေ လဲတာ လား၊ ဒါမှမဟုတ် လူနာတွေကို ကယ်ထုတ်တာလားလို့တော့ သုံးသပ်နေကြပါတယ်။ မေး- ကချင်ပြည်တွင်းက တခြားမြို့နယ်တွေရဲ့ မြေပြင် စစ်ရေးအခြေအနေကရော ဘယ်လိုရှိနေလဲ ဗျ။   ဗိုလ်မှူးကြီးနော်ဘူ - လက်ရှိမှာတော့ ဖားကန့်ဘက်မှာ တိုက်ပွဲငယ်လေးတွေ ရှိပါတယ်။ ဝိုင်းမော်ဘက်မှာတော့ တစ်ပတ်လောက်ရှိပြီ မြေပြင်တိုက်ပွဲ မရှိဘူး။ ဒါပေမဲ့ စစ်ကောင်စီက ဗျူဟာကုန်းတွေကနေ လက်နက်ကြီးနဲ့ လှမ်းပစ်တာကြောင့် တစ်လပ်ကုန်းရပ်ကွက်က ပြည်သူ ၃ ယောက်လောက် ထိခိုက်တာရှိပါတယ်။ ဆွမ်ပရာဘွမ်၊ ခေါင်လန်ဖူးနဲ့ အင်းတော်ကြီးဘက်တွေမှာတော့ မြေပြင်တိုက်ပွဲ မရှိဘဲ ငြိမ်နေပါတယ်။ တချို့နေရာတွေမှာ စခန်းသိမ်းတယ်ဆိုတာကတော့ လော်ဘီတွေ ရေးတာပဲ ဖြစ်မှာပါ။ အမှန်က စစ်ကောင်စီဘက်က ရောက်လာတဲ့ နေရာတွေကို ကျနော်တို့က ပြန်ဆုတ်ခိုင်းတဲ့ ပုံစံလောက်ပဲ ရှိပါတယ်။ မေး - စစ်ကော်မရှင်ရဲ့ လေကြောင်းတိုက်ခိုက်မှုတွေရော ရှိလားဗျ။   ဗိုလ်မှူးကြီးနော်ဘူ - လေကြောင်းကတော့ တိုက်ပွဲဖြစ်တဲ့နေရာတွေမှာ လာတတ်ပါတယ်။ ဒါပေမဲ့ အဆိုးဆုံးက တော့ တိုက်ပွဲမရှိဘဲနဲ့ ပြည်သူတွေရှိတဲ့နေရာကို ဗုံးကြဲတာပါ။ ဥပမာ ဝိုင်းမော်မြို့နယ် ဆမ်ပိုင်ရွာဆိုရင် တိုက်ပွဲ လည်းမရှိ၊ စခန်းလည်းမရှိဘဲနဲ့ ညသန်းခေါင်ယံအချိန်မှာ လေယာဉ်နဲ့လာပြီး ဗုံးကြဲသွားပါတယ်။ ဒါမျိုး ပြည်သူ လူထု သက်သက်ကို ပစ်မှတ်ထားတာတွေ ရှိနေပါတယ်။ မေး- တခြား ဘယ်နေရာတွေမှာကော စစ်ရေးတင်းမာမှုတွေ ရှိနေပါသလဲ။  ဗိုလ်မှူးကြီးနော်ဘူ - ဗန်းမော်၊ ဝိုင်းမော်၊ ဖားကန့်၊ အင်းတော်ကြီးနဲ့ ခေါင်လန်ဖူးတို့မှာတော့ အချိန်မရွေး တိုက်ပွဲ ဖြစ်နိုင်တဲ့အထိ စစ်ရေးတင်းမာနေတဲ့ အနေအထားမှာ ရှိနေပါတယ်ခင်ဗျ။ #ဗိုလ်မှူးကြီးနော်ဘူ #ကချင်လွတ်လပ်ရေးအဖွဲ့ #KIO #KIA #တရုတ်ကိုယ်စားလှယ်တွေ့ဆုံမှု #နိုင်ငံရေးတွေ့ဆုံဆွေးနွေးပွဲ

KIO သတင်းနှင့် ပြန်ကြားရေးတာဝန်ခံ ဗိုလ်မှူးကြီးနော်ဘူနှင့် အထူးအင်တာဗျူး

ကျေးရွာဈေးတန်း ဗုံးကြဲ တိုက်ခိုက်ခံရ၊ ကလေးနှင့် အမျိုးသမီးများ အပါအဝင် အရပ်သား ၁၇ ဦးသေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၂၄ ရခိုင်ပြည် ပုဏ္ဏားကျွန်း မြို့နယ်အတွင်းရှိ ကျေးရွာဈေးတန်းတစ်ခုကို ဖေဖော်ဝါရီ ၂၄ ရက် မွန်းလွဲပိုင်းတွင် စစ်တပ်က လေကြောင်းမှ ဗုံးကြဲတိုက်ခိုက်ခဲ့ခြင်းကြောင့် ကလေးငယ်များနှင့် အမျိုးသမီးများအပါအဝင် အရပ်သားပြည်သူ ၁၇ ဦး အစုလိုက်အပြုံလိုက် သေဆုံးမှု ဖြစ်ပွားခဲ့သည်။ ယနေ့ မွန်းလွဲ ၂ နာရီ ၇ မိနစ်အချိန်ခန့်တွင် စစ်ကော်မရှင်တပ်၏ ဂျက်ဖိုက်တာတစ်စီးက ပေါင် ၅၀၀ ဗုံး နှစ်လုံးအား ပုဏ္ဏားကျွန်းမြို့နယ်ရှိ လူစည်ကားရာ ယိုးငူကျေးရွာဈေးတန်းကို ၏ကြဲချခဲ့ခြင်းဖြစ်ကြောင်း အာရက္ခတပ်တော် (AA) က အတည်ပြု ထုတ်ပြန်ထားသည်။ ထိုတိုက်ခိုက်မှုကြောင့် ဈေးရောင်းဈေးဝယ်လုပ်နေသူများနှင့် စစ်ဘေးရှောင်များအကြား သေဆုံးသူ ၁၇ ဦးအပြင် နောက်ထပ် ၁၄ ဦးမှာလည်း ဒဏ်ရာပြင်းထန်စွာ ရရှိခဲ့ကြသည်။ မြေပြင်တွင် ကူညီကယ်ဆယ်ရေးလုပ်ဆောင်နေသည့် ဒေသခံတစ်ဦးက “ဈေးတန်းကတော့ ပျက်စီးသွားတာပဲ။ ဗုံးက ဈေးထဲကို ကျတာပေါ့နော်။ သေတဲ့သူတွေထဲမှာ ကလေးတွေနဲ့ အမျိုးသမီးတွေက အများဆုံးပဲ။ ဒဏ်ရာရတဲ့သူတွေလည်း များတယ်” ဟု ပြောသည်။ ယခု ၂၀၂၆ ခုနှစ်အတွင်း စစ်ကော်မရှင်တပ်သည် ရခိုင်ပြည်အနှံ့ စစ်ရေးရှုံးနိမ့်မှုများကို တုံ့ပြန်သည့်အနေဖြင့် ပုဏ္ဏားကျွန်း၊ ကျောက်တော်၊ မြောက်ဦး၊ မင်းပြား၊ ဘူးသီးတောင်နှင့် ကျောက်ဖြူမြို့နယ် တို့ရှိ လူနေရပ်ကွက်နှင့် ကျေးရွာများကို လေကြောင်းမှ ဆက်တိုက်တိုက်ခိုက်နေခြင်းဖြစ်သည်။ တိုက်ပွဲမရှိသည့် နေရာများကိုပါ ပစ်မှတ်ထားလာခြင်းကြောင့် ရခိုင်ပြည်သူများမှာ လေကြောင်းအန္တရာယ်ကို အကြီးအကျယ် စိုးရိမ်ထိတ်လန့်နေကြရသည်။ ယနေ့ လေကြောင်းဗုံးကြဲမှုထဲတွင် လူနေအိမ်နှင့် ဈေးဆိုင်ခန်း အချို့လည်း မီးလောင်ပြာကျသွားခဲ့ရသည်။ ပုဏ္ဏားကျွန်းမြို့နယ်မှ ပရဟိတလုပ်ဆောင်နေသူ ကိုဝေဟင်အောင်က “သေဆုံး ဦး ရေ တိုးလာတယ်။ ၁၇ ဦးရှိသွားပြီ။ ပုဏ္ဏားကျွန်းမြို့နယ်၊ ယိုးငူ ကျေးရွာကို အကြမ်းဖက် စစ် ကော်မရှင်က ၂း၀၆ နာရီခန့် လေယဥ်နဲ့ ပစ်ခတ်တဲ့အတွက် သေဆုံးသူ ၁၂ဦးနဲ့ ဒဏ်ရာရသူ ၂၀ဦးထက်မနည်း ရှိဟု ကနဦးသိရ” ဟု ၎င်း၏ လူမှုကွန်ရက်စာမျက်နှာတွင် ရုပ်သံဖိုင်နှင့်အတူ တင်ထားသည်။ ယခုဖြစ်ရပ်သည် အာရက္ခတပ်တော် (AA) ထိန်းချုပ်ထားသည့် နယ်မြေအတွင်း လတ်တလောကာလ၌ လူအသေအပျောက် အများဆုံး ဖြစ်ရပ်တစ်ခု ဖြစ်လာခဲ့သည်။ စစ်ကော်မရှင်တပ်သည် ယမန်နေ့ညပိုင်းကလည်း စစ်ကိုင်းတိုင်း၊ မြင်းမူမြို့နယ်ကို လေကြောင်းမှ ဗုံးကြဲခဲ့သဖြင့် ကလေးငယ်တစ်ဦးအပါအဝင် ၁၀ ဦး သေဆုံးခဲ့သေးသည်။ အာရက္ခတပ်တော်က အုပ်ချုပ်ရေးယန္တရား ဖော်ဆောင်နေသည့် ဒေသများကို စစ်ကော်မရှင်တပ်က ပစ်မှတ်ထား ကာ လေကြောင်းဖြင့် ဆက်တိုက် တိုက်ခိုက်နေသဖြင့် အရပ်သားသေဆုံးမှုမှာ တစ်နေ့ထက်တစ်နေ့ မြင့်တက် လျက်ရှိသည်။ #ပုဏ္ဏားကျွန်းလေကြောင်းတိုက်ခိုက်မှု #ရခိုင်ပြည်နယ် #ကျေးရွာစျေးတန်း #ဂျက်ဖိုက်တာ

ကျေးရွာဈေးတန်း ဗုံးကြဲ တိုက်ခိုက်ခံရ၊ ကလေးနှင့် အမျိုးသမီးများ အပါအဝင် အရပ်သား ၁၇ ဦးသေဆုံး

စစ်ကော်မရှင် လေကြောင်းနှင့် လက်နက်ကြီး တိုက်ခိုက်မှုကြောင့် ကလေးများအပါအဝင် အရပ်သားများ သေဆုံး သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဖေဖော်ဝါရီလ ၁၇ ရက်။ ဖားကန့်တွင် လေကြောင်းနှင့် လက်နက်ကြီး ပစ်ခတ်မှုကြောင့် ကလေးငယ်များ အပါအဝင် အရပ်သား ထိခိုက်သေဆုံးမှုများ ဆက်တိုက်ဖြစ်ပွားနေသည်။ ကချင်ပြည်၊ ဖားကန့်ရတနာမြေတွင် တိုက်ပွဲများ ပြင်းထန်နေသည်မှာ နှစ်ပတ်ကျော်ကြာမြင့်လာပြီ ဖြစ်ကာ လုံးခင်းနယ်မြေရဲစခန်း စီးနင်းတိုက်ခိုက်ခံရမှုနှင့်အတူ စစ်ကော်မရှင်တပ်၏ လေကြောင်းနှင့် လက်နက်ကြီးဖြင့် ပစ်ခတ်မှုများကြောင့် ကလေးငယ်များအပါအဝင် အရပ်သားထိခိုက်သေဆုံးမှုများ ဆက်တိုက်ဖြစ်ပွားနေသည်။ ပြီးခဲ့သည့် ဖေဖော်ဝါရီလ ၁၄ ရက်နေ့ နံနက်အစောပိုင်း ၂ နာရီခန့်မှစတင်၍ လုံးခင်းကျေးရွာအုပ်စု၊ ငြိမ်းချမ်းသာယာ (ခေါ်) ခွန်ဆာကုန်းရှိ လုံးခင်းနယ်မြေရဲစခန်းကို ကချင်လွတ်လပ်ရေးတပ်မတော် (KIA/KPDF) ပူးပေါင်းတပ်များက ဝင်ရောက်တိုက်ခိုက်ခဲ့ခြင်းဖြစ်သည်။ အဆိုပါတိုက်ပွဲအတွင်း လုံးခင်းရဲစခန်းကို တော်လှန်ရေးအင်အားစုများက အလုံးစုံရှင်းလင်းနိုင်ခဲ့သော်လည်း စစ်ကော်မရှင်တပ်ဘက်မှ လက်နက်ကြီးနှင့် လေကြောင်းပစ်ကူများကို ကျေးရွာများအတွင်းသို့ ရည်ရွယ်ချက်ရှိရှိ ပစ်ခတ်ခဲ့ခြင်းကြောင့် ပြည်သူများ သေဆုံးဒဏ်ရာရခဲ့ကြသည်။ ဖေဖော်ဝါရီ ၁၄ ရက်နေ့ ညနေပိုင်းတွင် လုံးခင်းရဲစခန်းအနီးရှိ ‘ပြည့်စုံကောင်း’ ထမင်းဆိုင်နောက်ကျော အိမ်ငှားဆောင်ပေါ်သို့ လက်နက်ကြီးကျည် တည့်တည့်ကျရောက်ခဲ့သည့် ဖြစ်စဉ်နှင့် ပတ်သက်၍ ဒေသခံတစ်ဦး က ယခုကဲ့သို့ ပြောသည်။ “ဒီ ၁၄ ရက်နေ့ ညနေ ၄ နာရီခွဲလောက်က လုံးခင်းရွာထဲက အိမ်ခန်းငှားနေတဲ့ အဆောင်ပေါ် စကစ လက်နက် ကြီး ကျတာပါ။ အဲဒီအချိန်က မိသားစုတွေ ထမင်းစားနေကြတဲ့အချိန်၊ ကလေး လေးယောက်နဲ့ လူကြီးနှစ် ယောက် ထိခိုက်ဒဏ်ရာ ရခဲ့ပါတယ်။ လုံးခင်းကို တော်လှန်ရေး အင်အားစုက စီးမိထားချိန် စကစဘက်က ပြည်သူ့တွေ နေအိမ်ကြားထဲကို လက်နက်ကြီးနဲ့ ပစ်ခတ်ခဲ့တာ ဖြစ်ပါတယ်။” တိုက်ပွဲသည် ဖေဖော်ဝါရီလ ၁၅ ရက်နေ့အထိ ဆက်လက်ပြင်းထန်ခဲ့ပြီး ဂျက်လေယာဉ်ဖြင့် တိုက်ခိုက်မှုကြောင့် ဆိုင်းတောင် ရွာဟောင်းလမ်းရှိ RC ဘုရားကျောင်း ထိမှန်ကာ အမျိုးသားတစ်ဦး သေဆုံးခဲ့ရသည်။ ထို့ပြင် ငြိမ်းချမ်းသာယာ အပိုင်း(၂) အတွင်းရှိ နေအိမ်တစ်လုံး လက်နက်ကြီးထိမှန်ကာ အမျိုးသားတစ်ဦး သေဆုံးပြီး သုံးဦး ဒဏ်ရာရရှိခဲ့သည့်အပြင် မီးလောင်ကျွမ်းမှုများလည်း ဖြစ်ပွားခဲ့သည်။ မြေပြင်တွင် တိုက်ပွဲဖြစ်ပွားနေသည့် အခြေအနေကို ဒေသခံ အမျိုးသားတစ်ဦးက ဆက်လက်ပြောပြသည်။ “လုံးခင်းနယ်မြေ ရဲစခန်းအနီး ငြိမ်းချမ်းသာယာ အပိုင်း (၂) က အိမ်တစ်လုံး လက်နက်ကြီးကျည်ကျပြီး မီးလောင်သွားတာလည်း ရှိတယ်။ အခုတော့ ပြည်သူအများစု စစ်ဘေးရှောင်နေကြရပြီ။ ပစ္စည်းဥစ္စာထက် အသက်က အရေးကြီးတာမို့ အကုန်လုံး ဂရုစိုက်ကြဖို့၊ ဘေးကင်းဖို့က အဓိကပေါ့ဗျာနော်” ဟု ပြောသည်။ လက်ရှိတွင် KIA ပူးပေါင်းတပ်များက လုံးခင်းရဲစခန်းကို ဖျက်ဆီးပြီးနောက် ပြန်လည်ဆုတ်ခွာသွားချိန်တွင် စစ်ကော်မရှင်ဘက်မှ ရှမ်းနီတပ် (SNA) ပါဝင်သော စစ်ကူများ ရောက်ရှိလာပြီး ကျေးရွာအတွင်း နေရာယူ ထားသဖြင့် တော်လှန်ရေးတပ်များက ဒရုန်းဖြင့် ပြန်လည်ဗုံးကြဲတိုက်ခိုက်နေကြောင်း ဒေသခံများက ပြောသည်။ ဖားကန့်တွင် ဇန်နဝါရီလ ၃၀ ရက်နေ့ခန့်မှ စတင်ကာ စစ်ကြောင်းထိုးလာသည့် စစ်ကော်မရှင်တပ်နှင့် KIA တို့ အကြား နှစ်ပတ်ကျော်ကြာ ဖြစ်ပွားနေသည့် တိုက်ပွဲများကြောင့် မရှီကထောင်၊ ထုံးဘို နှင့် ဂျန်ကပ် ကျေးရွာတို့မှ ဒေသခံများ တိမ်းရှောင်နေရသည်။ #ဖားကန့်တိုက်ပွဲ #လက်နက်ကြီးပစ်ခတ်မှု #KIA #စစ်ကော်မရှင် #SNA

စစ်ကော်မရှင် လေကြောင်းနှင့် လက်နက်ကြီး တိုက်ခိုက်မှုကြောင့် ကလေးများအပါအဝင် အရပ်သားများ သေဆုံး

ရွေးကောက်ပွဲသည် စစ်ရာဇဝတ်မှုများ ကျူးလွန်ရန် လမ်းဖွင့်ပေးလိုက်သည်ဟု အမျိုးသမီးအဖွဲ့ချုပ် ပြော သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဖေဖော်ဝါရီလ ၁၀ ရက်။ စစ်ကော်မရှင်၏ အတုအယောင်ရွေးကောက်ပွဲသည် စစ်ရာဇဝတ်မှုများ ဆက်လက်ကျူးလွန်ရန် လမ်းဖွင့်ပေး လိုက်ခြင်းသာ ဖြစ်သည်ဟု အမျိုးသမီးများအဖွဲ့ချုပ် (မြန်မာနိုင်ငံ) - WLB က သတိပေးလိုက်သည်။ စစ်ကော်မရှင်က ၎င်းတို့ကိုယ်တိုင် တရားဝင်မှုရရှိရန် ကြိုးပမ်းမှုဖြစ်ပြီး တစ်နိုင်ငံလုံးတွင် စစ်ရေးထိုးစစ်များ၊ စစ်ရာဇဝတ်မှုများနှင့် လူ့အခွင့်အရေး ချိုးဖောက်မှုများကို ဆက်လက်ကျူးလွန်ရန် အခွင့်အရေး ဖန်တီးပေးခြင်း သာ ဖြစ်ကြောင်း ပြောဆိုလိုက်သည်။ WLB က ဖေဖော်ဝါရီလ ၁ ရက်နေ့တွင် ထုတ်ပြန်သည့် ‘၂၀၂၅ ခုနှစ်ကို လည်ပြန်ကြည့်ခြင်း’ အစီရင်ခံစာအရ စစ်ကော်မရှင်သည် ၎င်းတို့ အာဏာတည်မြဲရေး အတွက် ရွေးကောက်ပွဲကို အသုံးချနေခြင်းဖြစ်ကြောင်း ဆိုသည်။ WLB ၏ မူဝါဒရေးရာ ဦးဆောင်အဖွဲ့ဝင် မမိငယ်က “အမျိုးသမီး လူ့အခွင့်အရေး လှုပ်ရှားသူတွေကို အရင်က ထက် ပိုမိုဖမ်းဆီးတာ ကျမတို့ ကြုံတွေ့ရတယ်။ လုံခြုံရေးက ပိုမိုခက်ခဲလာတယ်။ လမ်းတွေမှာ စစ်ဆေးရေး ဂိတ်တွေ ထားပြီးမှ အဆမတန်တွေ့တာ အကုန်လုံး ပေါ်တာဆွဲပေါ့နော်။ ဒီလိုပဲ အပြစ်မဲ့ ပြည်သူတွေကို နေ့စဉ် သတ်ဖြတ်တယ်။ စစ်ရာဇဝတ်မှု၊ လူမျိုးတုန်းသတ်ဖြတ်မှုတွေ စစ်တပ်က ဆက်လက်ပြီးမှ ကျူးလွန်နေတာ တွေ့ရတယ်” ဟု ပြောသည်။ အစီရင်ခံစာ မှတ်တမ်းများအရ ၂၀၂၅ ခုနှစ်အတွင်း လိင်နှင့်ဂျင်ဒါအခြေပြု အကြမ်းဖက်မှုပေါင်း ၂၀၉ မှု ဖြစ်ပွားခဲ့ ပြီး လိင်ပိုင်းဆိုင်ရာ အကြမ်းဖက်မှုမှ ရှင်သန်လွတ်မြောက်လာသူ အမျိုးသမီး ၁,၂၁၂ ဦးအထိ ရှိခဲ့သည်။ အထူးသဖြင့် စစ်ကိုင်းတိုင်းနှင့် ချင်းပြည်တို့တွင် စစ်ကော်မရှင်တပ်သည် မုဒိမ်းကျင့်မှုကို စစ်လက်နက်သဖွယ် ဗျူဟာကျကျ အသုံးပြုနေကြောင်း မမိငယ်က ထောက်ပြသည်။ “မုဒိမ်းကျင့်မှုကို လက်နက်သဖွယ် အသုံးပြုတာကို ဗျူဟာကျကျ ပေါ့နော်။ ပြည်သူလူထုက မတုံ့ပြန်နိုင် အောင် အကြောက်တရားနဲ့ အရှက်တရားကို အသုံးချပြီးမှ ပြုလုပ်နေတာ ကျမတို့ တွေ့ရတယ်။ အမျိုးသား ဆိုရင်လည်း ပေါ်တာဆွဲတယ်၊ စစ်မှုထမ်းခိုင်းတယ်၊ နှိပ်စက်ရိုက်နှက်ခြင်းတွေ အဲ့လိုမျိုး ဗျူဟာတွေကို သုံး တယ်။” ထို့အပြင် ရွေးကောက်ပွဲအတွက် လူထုအား အကျပ်ကိုင်မှုများ ရှိခဲ့ကြောင်း ကျေးလက်မြေအဖွဲ့ ဒါရိုက်တာ ဒေါ်မူစဲက ပြောသည်။ “အတုအယောင် ရွေးကောက်ပွဲမှာ မဲထည့်ခိုင်းတယ်၊ ဖိအားပေးတယ်။ ကရင်နီမှာ ကြည့်မယ်ဆိုလို့ရှိရင် စစ်ဘေးရှောင်တွေကို ပြန်လာ၊ မပြန်လာလို့ရှိရင် အိမ်ယာတွေ ချိတ်ပိတ်မယ်။ တော်လှန်ရေးအဖွဲ့နဲ့ တစ်ဖွဲ့တည်းလို့ သတ်မှတ်မယ်ဆိုတဲ့ အရာတွေက ခြိမ်းခြောက်မှုဖြစ်တယ်။ ဒါသည် လူ့အခွင့်အရေးနဲ့ လုံးဝ ဆန့်ကျင်ဘက် ဖြစ်တယ်။” မြေပြင်တွင် ဘေးအန္တရာယ်များ ရှိနေသော်လည်း WLB အနေဖြင့် ပြီးခဲ့သည့်နှစ်အတွင်း နေရပ်စွန့်ခွာရသူ (IDPs) ၅၄,၃၁၁ ဦး၊ CDM အမျိုးသမီး ၁၀၈ ဦးနှင့် အမျိုးသမီးလူ့အခွင့်အရေး ကာကွယ်စောင့်ရှောက်သူ ၃၁၀ ဦးကို ကူညီပံ့ပိုးပေးနိုင်ခဲ့သည်။ WLB သည် အမျိုးသမီးများနှင့် မိန်းကလေးငယ်များ အပေါ် အကြမ်းဖက်မှုများ အတွက် ပြစ်ဒဏ်ကင်းလွတ်ခွင့် (Impunity) ကို အဆုံးသတ်ရန်နှင့် နိုင်ငံရေးအရ ဆုံးဖြတ်ချက်ချသည့် အဆင့်တိုင်းတွင် အမျိုးသမီးများ အဓိပ္ပာယ်ပြည့်ဝစွာ ပါဝင်ခွင့်ရရှိရန် တောင်းဆိုထားသည်။ နိုင်ငံတကာ အသိုက်အဝန်းအနေဖြင့် စစ်ကော်မရှင်၏ အတုအယောင် ရွေးကောက်ပွဲကို ငြင်းပယ်ရန်နှင့် လက်နက် ရောင်းချပေးနေမှုများ ရပ်တန့်ရန် လိုအပ်ကြောင်း၊ ခိုင်မာသော လုပ်ဆောင်မှု မရှိပါက ပြည်သူများ အနေဖြင့် ပိုမိုပြင်းထန်သည့် ဆိုးကျိုးများ ဆက်လက်ခံစားရမည် ဖြစ်ကြောင်း WLB မူဝါဒရေးရာ ဦးဆောင်အဖွဲ့ ဝင် မဖိုးဒါးက သတိပေး ပြောဆိုထားသည်။ ဓာတ်ပုံ - ပုံဟောင်း (Women Alliance Burma - အမျိုးသမီးမဟာမိတ်အင်အားစု) #စစ်ကော်မရှင် #ရွေးကောက်ပွဲ #စစ်ရာဇဝတ်မှု #လူ့အခွင့်အရေးချိုးဖောက်မှု #WLB

ရွေးကောက်ပွဲသည် စစ်ရာဇဝတ်မှုများ ကျူးလွန်ရန် လမ်းဖွင့်ပေးလိုက်သည်ဟု အမျိုးသမီးအဖွဲ့ချုပ် ပြော

သံတွဲမြို့ကို စစ်ကော်မရှင် လေကြောင်းမှ ဗုံးကြဲ၊ အရပ်သား ၂ ဦး ဒဏ်ရာရပြီး နေအိမ်များ ပျက်စီး   သတင်းနှင့်မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၉ ရက်။ အာရက္ခတပ်တော် (AA) ထိန်းချုပ်ထားသည့် ရခိုင်ပြည်၊ သံတွဲမြို့ပေါ်ရှိ လူနေရပ်ကွက်တစ်ခု အတွင်းသို့ စစ်ကော်မရှင်တပ်က လေကြောင်းမှ ဗုံးကြဲတိုက်ခိုက်ခဲ့ရာ အရပ်သား ၂ ဦး ထိခိုက်ဒဏ်ရာရရှိပြီး နေအိမ် ၉ လုံး ပျက်စီးဆုံးရှုံးခဲ့သည်ဟု ဒေသခံများက ပြောသည်။ ဖေဖော်ဝါရီလ ၈ ရက်နေ့၊ နေ့လယ် ၁ နာရီခွဲခန့်တွင် စစ်ကော်မရှင်၏ ဂျက်ဖိုက်တာတစ်စီးသည် သံတွဲမြို့၊ အမှတ် (၃) ရပ်ကွက်အတွင်းသို့ ဗုံးကြဲချခဲ့ခြင်းဖြစ်သည်။ အဆိုပါ တိုက်ခိုက်မှုကြောင့် အသက် ၅၀ ဝန်းကျင်အရွယ်ရှိ ဦးအောင်သန်းလင်းနှင့် ဦးသက်အောင်တို့ ဒဏ်ရာရ ရှိခဲ့ပြီး၊ ဦးသက်အောင်မှာ ဦးခေါင်းတွင် ပြင်းထန်ဒဏ်ရာရရှိခဲ့သဖြင့် အရေးပေါ်ဆေးကုသမှု ခံယူနေရသည်။ သံတွဲမြို့ခံတစ်ဦးက “ဗုံးက ဗိုလ်ချုပ်လမ်းနားက အိမ်တွေပေါ် တည့်တည့်ကျတာ။ အိမ်တွေတော်တော်ကို ပျက်စီးသွားတယ်။ ဒီနေ့က လေယာဉ်နဲ့ပါ ဝဲပြီးပစ်တာဆိုတော့ မြို့ခံတွေလည်း တော်တော်လေးကိုမှ လန့်သွား ကြတယ်။ မြို့ထဲမှာ လူတွေမနေရဲအောင် တမင်တကာ ခြောက်လှန့်နေတဲ့သဘောပဲ” ဟု ပြောသည်။ သံတွဲမြို့နယ်အတွင်းရှိ ငပလီမြို့တွင်လည်း ပြီးခဲ့သည့် ဒီဇင်ဘာလကုန်ပိုင်းက လေကြောင်းတိုက်ခိုက်ခံရမှု ကြောင့် ကလေးငယ်များ အပါအဝင် ၉ ဦး သေဆုံးခဲ့ရပြီး၊ ရာစုနှစ်နှင့်ချီ သက်တမ်းရှိသည့် ရှေးဟောင်း နေအိမ် အချို့လည်း ပျက်စီးဆုံးရှုံးခဲ့ရဖူးသည်။ လက်ရှိတွင် စစ်ကော်မရှင်သည် ရခိုင်ပြည်အတွင်းက လက်လွှတ်လိုက်ရသည့် မြို့ရွာများကို ပြန်လည် သိမ်းပိုက် နိုင်ရန် လေကြောင်း အင်အားသာမက ရေတပ်သင်္ဘောများပေါ်မှပါ လက်နက်ကြီးများဖြင့် မကြာခဏ ပစ်ခတ်နေသည်ဟု ဒေသခံများက ပြောသည်။ သံတွဲဒေသခံတစ်ဦးက “သူတို့က မြေပြင်မှာ စစ်ရှုံးနေတော့ လေယာဉ်နဲ့ရော၊ သင်္ဘောနဲ့ရော ပတ်ရမ်းနေတာ။ ဘယ်အချိန် ဗုံးကျလာမလဲဆိုတာကိုပဲ ထိုင်စောင့်နေရသလို ဖြစ်နေတယ်” ဟု ပြောသည်။ ယခုကဲ့သို့ သံတွဲမြို့ကို ပစ်မှတ်ထား တိုက်ခိုက်နေချိန်မှာပင် စစ်ကော်မရှင်တပ်သည် ရခိုင်ပြည် အတွင်းရှိ အခြား သော မြို့နယ်များကိုလည်း လေကြောင်းနှင့် ရေတပ်အင်အား အသုံးပြုကာ ထိုးစစ်ဆင်ရန် ပြင်ဆင်လျက်ရှိ သည်။  ထို့ကြောင့် ရခိုင်တစ်ပြည်နယ်လုံးရှိ အရပ်သားပြည်သူများ အနေဖြင့် လုံခြုံရေးသတိ အမြဲရှိကြရန် အာရက္ခတပ် တော် (AA) က အထူးသတိပေး နှိုးဆော်ထားသည်။  ဓါတ်ပုံ - Arakan Princess Media

သံတွဲမြို့ကို စစ်ကော်မရှင် လေကြောင်းမှ ဗုံးကြဲ၊ အရပ်သား ၂ ဦး ဒဏ်ရာရပြီး နေအိမ်များ ပျက်စီး  

တအာင်းဒေသတွင် ၃ နှစ်အတွင်း အရပ်သား ၉၀၀ နီးပါး ထိခိုက်နစ်နာဟု TWO ပြော   သတင်းနှင့်မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၉ ရက်။ ရှမ်းပြည်မြောက်ပိုင်း၊ တအာင်းဒေသအတွင်း စစ်ကော်မရှင်၏ ရည်ရွယ်ချက်ရှိရှိ ပစ်မှတ်ထား တိုက်ခိုက်မှုများ ကြောင့် အမျိုးသမီးနှင့် ကလေးငယ်များ အပါအဝင် အရပ်သား ၉၀၀ နီးပါး ထိခိုက်နစ်နာခဲ့ရကြောင်း တအာင်း အမျိုးသမီးအဖွဲ့အစည်း (TWO) က ပြောသည်။ ‘လုံခြုံမှု ကင်းမဲ့သော ဘဝများ’ အမည်ရှိ အစီရင်ခံစာတစ်ရပ် ထုတ်ပြန်ကာ သတိပေးပြောဆိုလိုက်ခြင်း ဖြစ်သည်။ ပြီးခဲ့သည့် ၂၀၂၁ ခုနှစ်မှ ၂၀၂၄ ခုနှစ်အထိ ၃ နှစ်တာအတွင်း စစ်ကော်မရှင်တပ်သည် လေကြောင်းမှ ဗုံးကြဲခြင်း၊ လက်နက်ကြီးဖြင့် အဆင်အခြင်မဲ့ ပစ်ခတ်ခြင်း အပါအဝင် လူ့အခွင့်အရေး ချိုးဖောက်မှုပေါင်း ၂၈၀ ကျော် ကျူးလွန်ခဲ့ကြောင်း TWO ၏ မှတ်တမ်းများအရ သိရသည်။ အဆိုပါ ဖြစ်စဉ်များအနက် လက်နက်ကြီးကြောင့် ထိခိုက်ရသူ ၂၆၀ ကျော်နှင့် လေကြောင်းတိုက်ခိုက်မှုကြောင့် ထိခိုက်ရသူ ၂၇၀ ကျော်အထိ ရှိခဲ့သည်။ ကွက်ခိုင်မြို့ခံ အမျိုးသမီးတစ်ဦးက “အာဏာသိမ်းပြီး နောက်ပိုင်း အခြေအနေကို ပြောရမယ်ဆိုရင် ကျမတို့ ရွာထဲကို လက်နက်ကြီးတွေ ကျလာတာက တိုက်ပွဲဖြစ်နေလို့ မဟုတ်ဘူး။ ရည်ရွယ်ချက်ရှိရှိ ပစ်နေတာ။ အိမ်ထဲမှာ ထိုင်နေရင်းနဲ့တင် ဗုံးစထိပြီး သေတဲ့သူသေ၊ ဒဏ်ရာရတဲ့သူရနဲ့။ ကလေးတွေဆိုရင် လေယာဉ်သံ ကြားတာနဲ့တင် တုန်နေကြပြီ။ ဘယ်အချိန် ကိုယ့်အလှည့် ရောက်မလဲဆိုတာပဲ ကြောက်နေရတာ” ဟု ပြောသည်။ စစ်ကော်မရှင်တပ်သည် အရပ်သားများကို လူသားဒိုင်းအဖြစ် အသုံးပြုခြင်း၊ မတရား ဖမ်းဆီးညှဉ်းပန်းခြင်းနှင့် အမျိုးသမီးများအပေါ် လိင်ပိုင်းဆိုင်ရာ အကြမ်းဖက်မှုများကိုပါ စနစ်တကျ ကျူးလွန်နေကြောင်း အစီရင်ခံစာက ထောက်ပြထားသည်။ လက်ရှိတွင် တိုက်ပွဲများကြောင့် တအာင်းဒေသ၌ စစ်ဘေးရှောင်ဦးရေ ၁ သိန်းကျော်အထိ ရှိလာနေပြီး အရေး ပေါ် လူသားချင်းစာနာမှု အကူအညီများ ပြတ်လပ်နေသည့် အခြေအနေဖြစ်ကြောင်း ထောက်ပြထားသည်။ “အခုက စားဖို့သောက်ဖို့ထက် လုံခြုံရေးက အဓိက ဖြစ်နေတာ။ တိုက်ပွဲတွေ ရပ်သွားရင်လည်း လူက အမြဲ စိတ်ခြောက်ခြားနေတာ။ ညဘက်ဆိုလည်း ကောင်းကောင်းမအိပ်ရဘူး။ လေယာဉ်လာမလား၊ လက်နက် ကြီးကျမလားနဲ့။ ဒဏ်ရာရတဲ့သူတွေဆိုလည်း ဆေးကုဖို့က အရမ်းခက်ခဲတယ်။ လမ်းတွေပိတ်ထားတော့ မြို့ပေါ်တက်ဖို့က မလွယ်ဘူး” ဟု မိုးကုတ်မြို့က စစ်ရှောင်တစ်ဦးက ဟု ပြောသည်။ တအာင်းအမျိုးသမီးအဖွဲ့အစည်း (TWO) က နိုင်ငံတကာ အသိုက်အဝန်းအနေဖြင့် စစ်ကော်မရှင်ထံသို့ လေယာဉ် ဆီ တင်ပို့ရောင်းချမှုများကို အမြန်ဆုံး ရပ်တန့်ရန်နှင့် ကျူးလွန်ထားသည့် စစ်ရာဇဝတ်မှုများအတွက် ထိရောက် စွာ အရေးယူပေးရန် အလေးအနက် တောင်းဆိုထားသည်။ ၎င်းတို့၏ အစီရင်ခံစာအရ ပြီးခဲ့သည့် ၃ နှစ်အတွင်း တအာင်းဒေသရှိ အရပ်သားများ၏ ဘဝမှာ လုံခြုံမှု ကင်းမဲ့နေပြီး နိုင်ငံတကာ၏ အရေးယူဆောင်ရွက်မှုမှာ အရေးတကြီး လိုအပ်နေကြောင်း ဖော်ပြထားသည်။

တအာင်းဒေသတွင် ၃ နှစ်အတွင်း အရပ်သား ၉၀၀ နီးပါး ထိခိုက်နစ်နာဟု TWO ပြော  

« Prev 1 2 3 4 … 10 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

ရေးဘီလူးဌာနချုပ် ညသန်းခေါင်ဗုံးကြဲခံရ၊ ရဲဘော် ၁၀ ဦး သေဆုံး
ရေး-ထားဝယ်လမ်းပေါ်က ကျေးရွာတစ်ရွာကို တိုက်ပွဲမရှိဘဲ စစ်တပ် ဗုံးကြဲ
ရက် ၁၀၀ စီမံချက်အတွင်း စစ်တပ်က ကချင်ရှိ မြေရှားသတ္တုဒေသများကို ထိုးစစ်ဆင်နေ
Quad အဖွဲ့က ဖီဂျီတွင် ဆိပ်ကမ်းတည်ဆောက်ရန်နှင့် မြေရှားသတ္တုဆိုင်ရာ မူဘောင်များကိုသဘောတူ
မြောက်ကိုရီးယားကပဲ့ထိန်းဒုံးနှင့် အခြား ဒုံးကျည်များ အတွဲလိုက်ပစ်ခတ်

Archives

Archives

×Close