ရွေးကောက်ပွဲ – Page 4 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Tag Archive

Tag: ရွေးကောက်ပွဲ

ရွေးကောက်ပွဲမှာ စစ်ကော်မရှင်၏ လှည့်ကွက်သာ ဖြစ် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၂၈ ရက်။ စစ်ကော်မရှင် ရွေးကောက်ပွဲသည် ချောင်ပိတ်မိနေသည့် စစ်အုပ်စုအတွက် နိုင်ငံရေးထွက်ပေါက်ရှာသည့် လှည့် ကွက်သာ ဖြစ်ကြောင်း တနင်္သာရီတော်လှန်ရေး အင်အားစုများက သတိပေးလိုက်သည်။ စစ်ကော်မရှင်က ကျင်းပရန် ကြံစည်နေသည့် ရွေးကောက်ပွဲသည် နိုင်ငံရေးအရ ချောင်ပိတ်မိနေသည့် စစ်အုပ်စု အတွက် အသက်ရှူပေါက်ရရန်နှင့် ၎င်းတို့၏ ရာဇဝတ်မှုများကို ဖုံးကွယ်ရန် ကြိုတင်ပြင်ဆင်ထားသည့် လှည့် ကွက်တစ်ခုသာ ဖြစ်ကြောင်း တနင်္သာရီတိုင်းအတွင်းရှိ တော်လှန်ရေးအင်အားစုများက နိုင်ငံတကာသို့ အသိပေး ပြောဆိုလိုက်သည်။ KNU တပ်မဟာ (၄) အပါအဝင် တနင်္သာရီတိုင်းရှိ တော်လှန်ရေးအဖွဲ့အစည်း ၁၅ ဖွဲ့ဖြင့် ဖွဲ့စည်းထားသည့် KNU-NUG (တပ်မဟာ ၄ ပူးပေါင်းညှိနှိုင်းရေးအဖွဲ့) BCT- 4 က ဒီဇင်ဘာလ ၂၃ ရက်နေ့တွင် ပူးတွဲသဘောထား ထုတ် ပြန်ချက်တစ်ရပ် ထုတ်ပြန်ကာ ထိုသို့ ပြောဆိုလိုက်ခြင်း ဖြစ်သည်။ အဆိုပါ ပူးတွဲထုတ်ပြန်ချက်နှင့် ပတ်သက်၍ အဖွဲ့အားလုံး၏ ပြောရေးဆိုခွင့်ရှိသူ ဦးဟိန်းထက်က “နိုင်ငံတကာ အစိုးရတွေ နိုင်ငံတကာအသိုင်းအဝန်းကိုလည်း ဒါက အကြမ်းဖက်စစ်အုပ်စုရဲ့ သူ့ရဲ့ အကြမ်းဖက်လုပ်ရပ်တွေကို ဖုံးဖိနိုင်ဖို့အတွက် ဒီလှည့်ဖျားတဲ့ လုပ်ရပ်တစ်ခုသာ ဖြစ်တယ်ဆိုတဲ့ဟာရယ်။ တစ်ဆက်တည်းမှာပဲ ဒီရွေး ကောက်ပွဲက ဒီအတုအယောင် ရွေးကောက်ပွဲကလေပေါ့နော် ဆိုတော့ တိုင်းပြည်ရဲ့ လက်ရှိရှိနေတဲ့ ဒီအကြပ် အတည်းတွေ၊ အကြမ်းဖက်စစ်အုပ်စုရဲ့ ဒီသတ်ဖြတ်မှုတွေ အပါအဝင် ဒီငြိမ်းချမ်းတဲ့ ဒီမြန်မာနိုင်ငံရဲ့ ဒီလူ့ဘောင် အဖွဲ့ အစည်းကို တည်ဆောက်ဖို့တဲ့ နေရာမှာ ဘယ်လိုမှ ဒီရွေးကောက်ပွဲက အဖြေမဟုတ်ဘူးဆိုတဲ့ဟာကိုလည်း ကျနော်တို့ ကောင်းစွာ သိရှိနားလည် သဘောပေါက်စေချင်တယ်ပေါ့” ဟု ပြောသည်။ စစ်ကော်မရှင်သည် ဒီဇင်ဘာလ ၂၈ ရက်နေ့တွင် ပြုလုပ်မည့် အဆိုပါ တရားမဝင် ရွေးကောက်ပွဲကို ဒီမိုကရေစီ အရေခြုံပြယုဂ်အဖြစ် အသုံးချကာ နိုင်ငံတကာ၏ အသိအမှတ်ပြုမှု ရရှိစေရန် အငမ်းမရ ကြိုးပမ်းနေခြင်း ဖြစ် သည်ဟု BCT-4 က ထောက်ပြထားသည်။ ပူးတွဲထုတ်ပြန်ချက်တွင် ပါဝင်သည့် ကော့သောင်းခရိုင် နိုင်ငံရေးအင်အားစု ကိုယ်စားလှယ် ဒေါ်ထိပ်ထားက လည်း စစ်အုပ်စု၏ ဖိနှိပ်မှုများကြားမှ ပြုလုပ်မည့် ရွေးကောက်ပွဲ၏ သဘာဝကို အခုလို မေးခွန်းထုတ်ထားသည်။ “အရပ်သားပြည်သူတွေကို နေ့စဉ်နဲ့အမျှ ပစ်မှတ်ထားပြီး ဖမ်းဆီးထောင်ချခြင်း၊ မတရားသတ်ဖြတ်ခြင်း၊ မတရားပေါ်တာဆွဲ စစ်မှုထမ်းခိုင်းစေခြင်း၊ လေယာဉ်နဲ့ ဗုံးကြဲသတ်ဖြတ်ခြင်း၊ လက်နက်ပစ်ခတ်သတ်ဖြတ်ခြင်း စသည့် ဖိနှိပ်မှုပေါင်းများစွာနဲ့ ခြိမ်းခြောက်ပြီး ပြုလုပ်တဲ့ ဒီမိုကရေစီခံယူတဲ့ ရွေးကောက်ပွဲက စစ်မှန်တဲ့ ဒီမို ကရေစီလို့၊ စစ်မှန်တဲ့ရွေးကောက်ပွဲလို့ ပြောနိုင်ပါသလား။ ဒါကြောင့် ဒီရွေးကောက်ပွဲက အာဏာရှင်အဓွန့်ရှည် တည်တံ့ဖို့၊ အာဏာရှင်ကောင်းစားဖို့လုပ်တဲ့ အတုအယောင်ရွေးကောက်ပွဲသာ ဖြစ်တယ်” ဟု ၎င်းက ပြောသည်။ BCT-4 ၏ ထုတ်ပြန်ချက်တွင် စစ်ကော်မရှင်သည် ၎င်းတို့အလိုကျ ရေးဆွဲထားသည့် ၂၀၀၈ အခြေခံဥပဒေကို ကိုင်စွဲ၍ ရွေးကောက်ပွဲ ကျင်းပရန် ကြိုးပမ်းခြင်းမှာ နိုင်ငံရေး အကျပ်အတည်း၏ အဖြေမဟုတ်ဘဲ တိုင်းပြည်ကို ပိုမိုဆိုးရွားသည့် အခြေအနေသို့သာ တွန်းပို့နေခြင်းဖြစ်ကြောင်း ဖော်ပြထားသည်။ ဦးဟိန်းထက်ကလည်း “ဒီရွေးကောက်ပွဲကနေ တစ်ဆင့်ပေါ့လေနော် ဆိုတော့ နိုင်ငံရေးအရ ချောင်ပိတ်မိနေတဲ့ အကြမ်းဖက်စစ်အုပ်စုအတွက် နိုင်ငံရေးအရ အသက်ရှူပေါက်ရဖို့အတွက်ကို ကြိုးစားလုပ်ဆောင်တဲ့ဟာမျိုး ဖြစ်တယ်ပေါ့လေနော်။ ဒီရွေးကောက်ပွဲကနေတစ်ဆင့် ဒီနိုင်ငံတကာရဲ့ အသိအမှတ်ပြုမှုကို ရယူပြီးတော့ သူ့ရဲ့ အကြမ်းဖက်လုပ်ရပ်တွေ၊ အကြမ်းဖက်မှုတွေ အားလုံးကို ဒါပြည်ဖုံးကားချနိုင်ဖို့အတွက် ဆောင်ရွက်နေတဲ့ လုပ်ရပ်တစ်ခုသာ ဖြစ်တယ်ပေါ့” ဟု စစ်ကောင်စီ၏ ရည်ရွယ်ချက်ကို ထပ်လောင်းရှင်းပြသည်။ ပြည်သူများအား အဓမ္မခြိမ်းခြောက်၍ ပြုလုပ်မည့် အဆိုပါ “သွေးစွန်းသော ရွေးကောက်ပွဲ” သည် ဖက်ဒရယ် ဒီမိုကရေစီ အနှစ်သာရနှင့် ကင်းကွာနေသည့်အတွက် BCT-4 အနေဖြင့် လုံးဝလက်ခံမည် မဟုတ်ဘဲ ပြင်းပြင်း ထန်ထန် ရှုတ်ချကြောင်းနှင့် ရွေးကောက်ပွဲကို အထောက်အပံ့ဖြစ်စေမည့် မည်သည့် ပူးပေါင်းပါဝင်မှုမျိုးကို မဆို ခွင့်ပြုမည်မဟုတ်ကြောင်း အတိအလင်း ကြေညာထားသည်။ လက်ရှိတွင် တနင်္သာရီတိုင်း အတွင်း၌ စစ်ကော်မရှင်က ရွေးကောက်ပွဲ အတွက် ပြင်ဆင်မှုများ ရှိနေသော်လည်း ဒေသခံ တော်လှန်ရေး အဖွဲ့အစည်းများ၏ စစ်ရေးလှုပ်ရှားမှုများကြောင့် နယ်မြေအများအပြားတွင် စိုးမိုးမှု ကင်းမဲ့နေသည့် အခြေအနေဖြစ်ကြောင်း မြေပြင် သတင်းရင်းမြစ်များက ပြောသည်။

ရွေးကောက်ပွဲမှာ စစ်ကော်မရှင်၏ လှည့်ကွက်သာ ဖြစ်

ရွေးကောက်ပွဲနေ့တွင် မကျင်းပနိုင်သည့် မြို့နယ် ၉ ခု ထပ်တိုး သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၂၈ ရက်။ ရွေးကောက်ပွဲ ကျင်းပသည့် ယနေ့ ဒီဇင်ဘာလ ၂၈ ရက်နေ့တွင် ရွေးကောက်ပွဲ မကျင်းပနိုင်သည့် မြို့နယ် ၉ ခုကို ထပ်မံ ဖြည့်စွက်ခဲ့သည်။ စစ်ကော်မရှင် ရွေးကောက်ပွဲ မကျင်းပနိုင်သည့် မြို့နယ် ၆၅ ခုအထိ ရှိလာပြီး စံချိန်တင်နယ်မြေများ ဆုံးရှုံးနေ သည်။ စစ်ကော်မရှင်က အတင်းအကျပ် ကျင်းပရန် ကြိုးပမ်းနေသည့် ရွေးကောက်ပွဲကို ယနေ့တွင် စတင်လိုက်သော် လည်း ရွေးကောက်ပွဲကျင်းပရန် နာရီပိုင်းအလိုအထိ မကျင်းပနိုင်သည့် မြို့နယ်စာရင်းကို ထပ်မံတိုးမြှင့် ကြေညာခဲ့သည်။ ထို့ကြောင့် တစ်နိုင်ငံလုံးအတိုင်းအတာဖြင့် မြို့နယ် ၆၅ ခုအထိ ရှိလာပြီး ရွေးကောက်ပွဲ သမိုင်းတစ်လျှောက် မကျင်းပနိုင်သည့် နယ်မြေအရေအတွက် အများဆုံးအဖြစ် စံချိန်တင်သွားခဲ့သည်။ စစ်ကော်မရှင် လက်အောက်ခံ ပြည်ထောင်စု ရွေးကောက်ပွဲကော်မရှင် (UEC) သည် ရွေးကောက်ပွဲ ကျင်းပရန် နာရီပိုင်းအလိုတွင် ချင်းပြည်မှ ၃ မြို့နယ်၊ စစ်ကိုင်းတိုင်းမှ ၂ မြို့နယ်နှင့် ရခိုင်ပြည်မှ ၄ မြို့နယ်၊ စုစုပေါင်း မြို့နယ် ၉ ခုကို ရွေးကောက်ပွဲ မကျင်းပနိုင်သည့် မြို့နယ်စာရင်းထဲသို့ ထပ်မံဖြည့်စွက်ခဲ့ခြင်း ဖြစ်သည်။ ယခင်က ရွေးကောက်ပွဲ မကျင်းပနိုင်ဟု ကြေညာထားသည့် မြို့နယ် ၅၆ မြို့နယ်ရှိရာမှ ယခုထပ်တိုးစာရင်းအရ မြန်မာနိုင်ငံရှိ မြို့နယ်ပေါင်း ၃၃၀ အနက် မြို့နယ် ၆၅ ခုတွင် ရွေးကောက်ပွဲ လုံးဝကျင်းပနိုင်ခြင်း မရှိတော့ကြောင်း စစ်ကော်မရှင်က တရားဝင်ဝန်ခံလိုက်ရခြင်းလည်း ဖြစ်သည်။ အဆိုပါ ထပ်တိုးမြို့နယ်များမှာ ချင်းပြည်ရှိ တွန်းဇံ၊ ဖလမ်းနှင့် ထန်တလန်၊ စစ်ကိုင်းတိုင်းရှိ ကောလင်းနှင့် ဗန်းမောက်၊ ရခိုင်ပြည်ရှိ အမ်း၊ သံတွဲ၊ ဂွနှင့် တောင်ကုတ်မြို့နယ်တို့ ဖြစ်သည်။ မြို့နယ်အဆင့်သာမက ရပ်ကွက် နှင့် ကျေးရွာအုပ်စုအဆင့်တွင်လည်း မကျင်းပနိုင်သည့် နေရာများစွာ ရှိနေသည်။ ဒီဇင်ဘာလ ၂၇ ရက်နေ့ ထုတ်ပြန်ချက်အရ ရွေးကောက်ပွဲ အပိုင်း (၃) တွင် မကျင်းပနိုင်သည့် ရပ်ကွက်နှင့် ကျေးရွာ အုပ်စုပေါင်း ၁,၀၆၄ ခု ရှိနေပြီး ယခင်အပိုင်း (၁) နှင့် (၂) တို့ရှိ မကျင်းပနိုင်သည့် နေရာ ၂,၉၃၁ ခုနှင့် ပေါင်းစပ်လိုက်ပါက တစ်နိုင်ငံလုံးတွင် ရွေးကောက်ပွဲ တစ်စိတ်တစ်ပိုင်း မကျင်းပနိုင်သည့် ရပ်ကွက်၊ ကျေးရွာအုပ်စု ၄,၀၀၀ နီးပါးအထိ ရှိလာသည်။ ယခုကဲ့သို့ စစ်ကော်မရှင်က မကျင်းပနိုင်သည့် နယ်မြေစာရင်းကို နောက်ဆုံးအချိန်အထိ ထုတ်ပြန်နေရခြင်းမှာ မြေပြင်တွင် တော်လှန်ရေးအင်အားစုများ၏ စိုးမိုးမှုနှင့် တိုက်ပွဲများကြောင့်ဖြစ်ကြောင်း ဒေသခံများက သုံးသပ်ကြသည်။ စစ်ကိုင်းတိုင်းမှ ဒေသခံတစ်ဦးက "သူတို့ ဘယ်လိုပဲ အတင်းလုပ်ချင်လုပ်၊ ကျနော်တို့ဆီမှာတော့ ဘယ်သူမှ မဲမပေးသလို သူတို့လည်း ရုံးမဖွင့်နိုင်ဘူး။ မဲစာရင်းကပ်တဲ့ရက်ကတည်းက မြို့ထဲမှာ ပေါက်ကွဲသံတွေ ကြားနေရတာ။ မနေ့ညကဆိုရင်လည်း ဗန်းမောက်ဘက်မှာ အသံတွေ ကြားနေရတယ်။ ဒီရွေးကောက်ပွဲက စာရွက်ပေါ်မှာပဲ ရှိတာပါ” ဟု မြေပြင်အခြေအနေကို ပြောပြသည်။ ထို့အပြင် ရွေးကောက်ပွဲကျင်းပသည့် မြို့ကြီးများတွင်လည်း မဲရုံများအနီး ပေါက်ကွဲမှုများ ဖြစ်ပွားနေသဖြင့် ပြည်သူများမှာ စိုးရိမ်ထိတ်လန့်နေကြသည်။ ဧရာဝတီတိုင်းမှ ဝန်ထမ်းမိသားစုဝင်တစ်ဦးက "မနက်ပိုင်းကစပြီး မဲရုံတွေ ဖွင့်တယ်ဆိုပေမယ့် လမ်းပေါ်မှာ လူသူသိပ်မရှိဘူး။ စစ်တပ်နဲ့ ပျူစောထီးတွေတော့ ရှိတယ်။ မဲမပေးရင် အိမ်တွေကို ချိပ်ပိတ်မယ်၊ တော်လှန် ရေး အဖွဲ့တွေနဲ့ ပတ်သက်တယ်လို့ သတ်မှတ်မယ်ဆိုပြီး ခြိမ်းခြောက်ထားလို့သာ လူတချို့ ထွက်လာကြတာ" ဟု ပြောသည်။ စစ်ကော်မရှင်၏ ၂၀၂၅ ရွေးကောက်ပွဲသည် နိုင်ငံတကာ၏ အသိအမှတ်ပြုမှုရရန်နှင့် နိုင်ငံရေးထွက်ပေါက်ရှာရန် ကြိုးပမ်းခြင်းဖြစ်သော်လည်း၊ မြေပြင်တွင် နယ်မြေ အများအပြား ဆုံးရှုံးနေခြင်းနှင့် ပြည်သူလူထု၏ သပိတ်မှောက် ဆန့်ကျင်မှုများကြောင့် ရွေးကောက်ပွဲမှာ တရားဝင်မှု ကင်းမဲ့နေကြောင်း နိုင်ငံရေးလေ့လာသူများ က သုံးသပ်နေကြသည်။

ရွေးကောက်ပွဲနေ့တွင် မကျင်းပနိုင်သည့် မြို့နယ် ၉ ခု ထပ်တိုး

ရွေးကောက်ပွဲမတိုင်မီ အကြမ်းဖက်မှုနှင့် ဖိနှိပ်မှုများ အရှိန်မြင့်လာကြောင်း ကုလသမဂ္ဂ သတိပေး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၂၃ ရက်။ မကြာမီကျင်းပတော့မည့် စစ်ကောင်စီ၏ ရွေးကောက်ပွဲ မတိုင်မီ အကြမ်းဖက်မှုများ၊ ဖိနှိပ်မှုများနှင့် ခြိမ်းခြောက်မှုများ ပိုမိုပြင်းထန်လာကြောင်း ကုလသမဂ္ဂ လူ့အခွင့်အရေးဆိုင်ရာ မဟာမင်းကြီးရုံးက ယနေ့ (အင်္ဂါနေ့) တွင် ထုတ်ပြန် သတိပေးလိုက်သည်။ ကုလသမဂ္ဂ လူ့အခွင့်အရေးဆိုင်ရာ မဟာမင်းကြီး ဗော့လ်ကာ တာ့ခ် (Volker Türk) က "မြန်မာစစ်အာဏာပိုင်တွေအနေနဲ့ လူထုကို မဲပေးဖို့အတွက် ရက်စက်တဲ့ အကြမ်းဖက်မှုတွေနဲ့ ဖိအားပေးတာတွေကို ရပ်တန့်ရမှာဖြစ်သလို၊ သဘောထားကွဲလွဲမှုကို ဖော်ပြသူတွေကို ဖမ်းဆီးနေတာတွေကိုလည်း အဆုံးသတ်ရမယ်" ဟု တိုက်တွန်း ပြောကြားခဲ့သည်။ အဆိုပါ ထုတ်ပြန် ကြေညာချက်တွင် ဒီဇင်ဘာ ၂၈ ရက်တွင် ကျင်းပတော့မည့် ရွေးကောက်ပွဲနှင့် ပတ်သက်၍ လွတ်လပ်စွာ ထုတ်ဖော်ပြောဆိုခွင့်ကို ပိတ်ပင်ထားကြောင်း ထောက်ပြထားသည်။ လွတ်လပ်စွာ ထုတ်ဖော်ခွင့် ကျင့်သုံးသူ အမြောက်အမြားသည် "ရွေးကောက်ပွဲ ကာကွယ်ရေးဥပဒေ" ဖြင့် ဖမ်းဆီးခံနေရကြောင်း သိရသည်ဟု ဖော်ပြထားသည်။ ရန်ကုန်တိုင်း၊ လှိုင်သာယာမြို့နယ်အတွင်း ရွေးကောက်ပွဲ ဆန့်ကျင်ရေး ပိုစတာများ ကပ်ခဲ့သည့် လူငယ် ၃ ဦးကို ထောင်ဒဏ် ၄၂ နှစ်မှ ၄၉ နှစ်အထိ ပြင်းထန်သော ပြစ်ဒဏ်များ ချမှတ်ခဲ့သည့် ဖြစ်စဉ်များကိုလည်း ထောက်ပြထားသည်။ ထို့အပြင် ရွေးကောက်ပွဲ ဝါဒဖြန့်ရုပ်ရှင်ကို ဝေဖန်ခဲ့သည့် ရုပ်ရှင်ဒါရိုက်တာ မိုက်တီး၊ သရုပ်ဆောင် ကျော်ဝင်းထွဋ်နှင့် လူရွှင်တော် အုန်းဒိုင်တို့အား ပြည်သူလူထု၏ ယုံကြည်မှု ပျက်ပြားအောင် လုပ်ဆောင်သည်ဟုဆိုကာ ထောင်ဒဏ် ၇ နှစ်စီ ချမှတ်ခဲ့ကြောင်းလည်း ထောက်ပြထားသည်။ မန္တလေးတိုင်း အပါအဝင် ဒေသအသီးသီးရှိ စစ်ဘေးရှောင် ပြည်သူများသည် မဲပြန်ပေးရန် ပျက်ကွက်ပါက တိုက်ခိုက်ခံရမည် သို့မဟုတ် နေအိမ်များ သိမ်းဆည်းခံရမည်ဟု ခြိမ်းခြောက်ခံနေရကြောင်း ကုလသမဂ္ဂက ဆိုသည်။ "မဲပြန်ပေးဖို့ မြို့ကိုပြန်လာကြ၊ ပြန်မလာရင် ဆက်ပြီး ဗုံးကြဲမယ်" ဟု ခြိမ်းခြောက်ပြောဆိုမှုများ ရှိနေကြောင်း သတင်းရင်းမြစ်များကို ကိုးကား၍ ဖော်ပြထားသည်။ မဟာမင်းကြီး တာ့ခ်က စစ်ဘေးရှောင်များအား ၎င်းတို့၏ ဆန္ဒမပါဘဲ ဘေးကင်းမှုမရှိသော နေရာများသို့ အဓမ္မပြန်ခိုင်းခြင်းသည် လူ့အခွင့်အရေး ချိုးဖောက်မှုဖြစ်ကြောင်း ပြောကြားခဲ့သည်။ တစ်ဖက်တွင်လည်း စစ်ကောင်စီကို ဆန့်ကျင်သည့် လက်နက်ကိုင် အဖွဲ့အစည်းများထံမှ ခြိမ်းခြောက်မှုများ ရှိနေကြောင်း ကြေညာချက်တွင် ပါရှိသည်။ ပြီးခဲ့သည့် နိုဝင်ဘာလက ကျိုက်ထိုမြို့နယ်၌ မဲပေးရန် သင်တန်းတက်ရောက်မည့် ဆရာမ ၉ ဦး ဖမ်းဆီးခံရပြီး သတိပေးချက်များဖြင့် ပြန်လည်လွတ်မြောက်ခဲ့သည့် ဖြစ်စဉ်နှင့် ရန်ကုန်ရှိ လှည်းကူးနှင့် မြောက်ဥက္ကလာပ အုပ်ချုပ်ရေးရုံးများတွင် ဗုံးပေါက်ကွဲမှုများကြောင့် ရွေးကောက်ပွဲ ဝန်ထမ်းအချို့ ဒဏ်ရာရရှိခဲ့သည့် ဖြစ်စဉ်များကို ထောက်ပြထားသည်။ "အခုကျင်းပမယ့် ရွေးကောက်ပွဲဟာ အကြမ်းဖက်မှုနဲ့ ဖိနှိပ်မှုတွေကြားမှာ ကျင်းပနေတာ ဖြစ်ကြောင်း သိသာထင်ရှားနေပါတယ်" ဟု လူ့အခွင့်အရေးဆိုင်ရာ မဟာမင်းကြီး က ဆိုသည်။ လက်ရှိ အခြေအနေတွင် လွတ်လပ်စွာ ဖော်ပြခွင့်၊ သင်းပင်းဖွဲ့စည်းခွင့်နှင့် ငြိမ်းချမ်းစွာ စုဝေးခွင့်များ မရှိသည့်အတွက် ပြည်သူများအနေဖြင့် အနှစ်သာရရှိရှိ လွတ်လပ်စွာ ပါဝင်နိုင်သည့် အခြေအနေ မရှိကြောင်း ၎င်းက ကောက်ချက်ချ ပြောကြားခဲ့ပါသည်။

ရွေးကောက်ပွဲမတိုင်မီ အကြမ်းဖက်မှုနှင့် ဖိနှိပ်မှုများ အရှိန်မြင့်လာကြောင်း ကုလသမဂ္ဂ သတိပေး

ရွေးကောက်ပွဲကျင်းပရန် ၁၀ ရက်အလို လားရှိုးမြို့တွင် တစ်ရက်တည်း ဗုံး ၃ ကြိမ်ပေါက်ကွဲ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၂၂ ရက်။ စစ်ကော်မရှင်က ကြီးမှူးကျင်းပမည့် ရွေးကောက်ပွဲ အတွက် ပြင်ဆင်မှုများ ပြုလုပ်နေသည့် ရှမ်းပြည် မြောက်ပိုင်း၊ လားရှိုးမြို့ပေါ်တွင် တစ်ရက်တည်း၌ပင် ဗုံးပေါက်ကွဲမှု သုံးကြိမ် ထက်မနည်း ဖြစ်ပွားခဲ့ရာ မြို့ခံများ ထိတ်လန့်စိုးရိမ်နေကြသည်။ ရွေးကောက်ပွဲကျင်းပရန် ၁၀ ရက်ခန့်သာ လိုတော့သည့်အချိန်တွင် ဖြစ်ပွားခဲ့သော အဆိုပါပေါက်ကွဲမှုများသည် ဒီဇင်ဘာလ ၂၁ ရက်နေ့၊ နံနက် ၉ နာရီကျော်တွင် အမှတ် (၁၂) ရပ်ကွက်၌ တစ်ကြိမ်၊ ညနေ ၅ နာရီနှင့် ၆ နာရီ ဝန်းကျင်တို့တွင် အမှတ် (၂) အုပ်ချုပ်ရေးမှူးရုံးအနီးနှင့် အမှတ် (၅) ရပ်ကွက်တို့တွင် တစ်ကြိမ်စီ ဖြစ်ပွားခဲ့ခြင်း ဖြစ်သည်။ ပေါက်ကွဲမှု ဖြစ်ပွားခဲ့သည့် အခြေအနေနှင့် ပတ်သက်၍ လားရှိုးမြို့ခံတစ်ဦးက “မနက်ပိုင်း တစ်ခါကြားရပြီး ညနေပိုင်းမှာ နှစ်ခါဆင့်တိုက်သံ ကြားလိုက်ရတာ။ ရပ်ကွက်ရုံးနားဆိုတော့ ပိုလန့် သွားတယ်” ဟု ပြောသည်။ လားရှိုးမြို့ကို စစ်ကော်မရှင်တပ်က ယခုနှစ် ဧပြီလအတွင်း တရုတ်အစိုးရ၏ ကြားဝင်ညှိနှိုင်းမှုဖြင့် ကိုးကန့်တပ် (MNDAA) ထံမှ ပြန်လည်လွှဲပြောင်းရယူခဲ့ခြင်းဖြစ်သော်လည်း မြို့ပတ်ပတ်လည်ရှိ ကျေးရွာအုပ်စု ၇၅ အုပ်စု ခန့်ကိုမူ MNDAA က ဆက်လက် ထိန်းချုပ်ထားဆဲ ဖြစ်သည်။ စစ်ကော်မရှင်တပ်သည် လားရှိုးမြို့ပေါ် ရပ်ကွက် (၁၂) ခုအပြင် MNDAA ထိန်းချုပ်နယ်မြေအချို့တွင်ပါ ရွေးကောက်ပွဲ ကျင်းပရန် ကြိုးပမ်းနေသော်လည်း MNDAA ဘက်ကမူ ၎င်းတို့နယ်မြေအတွင်း မဲပုံးချခွင့် ပေးမည်မဟုတ်ကြောင်း ပြောဆိုထားသည်။ လက်ရှိ အခြေအနေအပေါ် လားရှိုးမြို့မှ ရှမ်းလူငယ်တစ်ဦးက “ဒီပေါက်ကွဲမှုတွေဟာ ရွေးကောက်ပွဲကို ဆန့် ကျင်တဲ့ နိုင်ငံရေး သတိပေးချက်လို့ မြင်ပါတယ်။ မြို့ပေါ်ကို စစ်တပ်က ထိန်းထားတယ်ဆိုပေမဲ့ ပတ်ပတ်လည် မှာ တော်လှန်ရေး အင်အားစုတွေ ရှိနေကြတယ်။ အခု အခြေအနေကို ပြောရမယ်ဆိုရင်လည်း လုံခြုံရေးက ဘယ်လိုမှ စိတ်မချရဘူး။ အခုလို အခြေအနေမျိုးမှာ ကျင်းပမယ့် ရွေးကောက်ပွဲက ပြည်သူတွေအတွက်တော့ အန္တရာယ်ကြားက ပွဲတစ်ခုလို ဖြစ်နေတယ်” ဟု ပြောသည်။ စစ်ကော်မရှင်၏ အစီအစဉ်အရ လာမည့် ဒီဇင်ဘာ ၂၈ ရက်နေ့မှ စတင်ကာ ရွေးကောက်ပွဲကို အပိုင်း ၃ ပိုင်းခွဲ၍ နှစ်ပတ်စီခြား ကျင်းပသွားရန် ရည်ရွယ်ထားသော်လည်း ယခုကဲ့သို့ မြို့ပြပြောက်ကျား တိုက်ခိုက်မှုများနှင့် နယ်မြေ မတည်ငြိမ်မှုများကြောင့် ရွေးကောက်ပွဲ ဖြစ်မြောက်နိုင်စွမ်းအပေါ် မေးခွန်းထုတ်မှုများ ရှိနေသည်။  ဓါတ်ပုံ - Wa News Land

ရွေးကောက်ပွဲကျင်းပရန် ၁၀ ရက်အလို လားရှိုးမြို့တွင် တစ်ရက်တည်း ဗုံး ၃ ကြိမ်ပေါက်ကွဲ

ရွေးကောက်ပွဲမှာ စစ်တပ် အကျိုးစီးပွားသာဖြစ်ဟု KNU ဥက္ကဌ ပြော သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၂၀ ရက်။ စစ်ကော်မရှင်က ပြုလုပ်ရန် ပြင်ဆင်နေသည့် ရွေးကောက်ပွဲသည် စစ်တပ်နှင့် အပေါင်းအပါတစ်စု၏ အကျိုး စီးပွား အတွက်သာ ဖြစ်ပြီး အာဏာရှင်စနစ် ထာဝရတည်မြဲရေးကို ရည်ရွယ်ခြင်းဖြစ်ကြောင်း ကရင်အမျိုးသား အစည်းအရုံး (KNU) ဥက္ကဋ္ဌ ပဒိုစောကွယ်ထူးဝင်းက ပြောဆိုလိုက်သည်။ ဒီဇင်ဘာလ ၁၉ ရက်တွင် ကျရောက်သည့် ၂၇၆၅ ခုနှစ်၊ ကရင်အမျိုးသားနှစ်သစ်ကူးနေ့သို့ ပေးပို့သည့် သဝဏ်လွှာ၌ ဥက္ကဋ္ဌက ထိုသို့ ထည့်သွင်းပြောဆိုခဲ့ခြင်းဖြစ်သည်။ စစ်အုပ်စုသည် ၎င်းတို့၏ အာဏာကို ၂၀၀၈ ဖွဲ့စည်းပုံအခြေခံ ဥပဒေအတိုင်း ဆက်လက် ထိန်းချုပ်နိုင်ရန်အတွက် အတုအယောင်ရွေးကောက်ပွဲကို နည်းလမ်းမျိုးစုံဖြင့် ပြင်ဆင်နေခြင်းဖြစ်သည်ဟု ဆိုသည်။ ပဒိုစောကွယ်ထူးဝင်းက “အခုအချိန်မှာ ဗမာစစ်အာဏာရှင်အုပ်စုဟာ သူတို့ရဲ့ အာဏာ ထာဝရ တည်တံ့ခိုင်မြဲ နိုင်ဖို့အတွက် ကြိုးပမ်းဆောင်ရွက်နေရာမှာ အတုအယောင်ရွေးကောက်ပွဲတစ်ရပ်ကို ၂၀၀၈ ဖွဲ့စည်းပုံ အခြေခံ ဥပဒေအတိုင်း ကျင်းပနိုင်ရန် ပြင်ဆင်ဆောင်ရွက်နေပါတယ်။ အဓိကရည်ရွယ်ချက်ကတော့ စစ်တပ်ဟာ ဒီနိုင်ငံ ရဲ့ နိုင်ငံရေးကို အမြဲတမ်းချုပ်ကိုင်ချယ်လှယ်ပြီး ထာဝရအာဏာတည်တံ့ခိုင်မြဲနေစေဖို့အတွက်ပဲ ဖြစ်ပါတယ်” ဟု ပြောသည်။ ထို့အပြင် ယခုရွေးကောက်ပွဲသည် စစ်ခေါင်းဆောင်များ၏ ဆွေမျိုးသားချင်းများနှင့် မိတ်ဖက်အစုအဖွဲ့များ ကြီးပွားချမ်းသာရေးအတွက် အခြေခံထားသည့် လုပ်ရပ်ဖြစ်ကြောင်းလည်း ၎င်းက ဆက်လက်ပြောဆိုသည်။ “ဒီအတုအယောင်ရွေးကောက်ပွဲမှာ သေချာပေါက် အနိုင်ရဖို့အတွက်ကို ပြင်ဆင်စီမံနေပြီး စစ်ခေါင်းဆောင် အများအပြားဟာ ရွေးကောက်ပွဲမှာ ပါဝင်အရွေးခံပြီး အနိုင်ရဖို့ နည်းလမ်းမျိုးစုံသုံးနေတာ ဖြစ်ပါတယ်။ စစ်အာဏာရှင်အုပ်စုဟာ စစ်တပ်ထဲမှာရှိနေတဲ့ ဗမာလူမျိုးတွေနဲ့ မိတ်ဖက်ဆွေမျိုးများ အာဏာရရှိရေးနဲ့ ကြီးပွားတိုးတက်ရေးအတွက်ကို လုပ်ဆောင်နေတာ ဖြစ်ပါတယ်” ဟု KNU ဥက္ကဋ္ဌက ပြောသည်။ မြန်မာနိုင်ငံတွင် ၁၉၆၂ ခုနှစ် အာဏာသိမ်းချိန်မှစ၍ စစ်အုပ်ချုပ်ရေးပုံစံအမျိုးမျိုး ပြောင်းလဲခဲ့သော်လည်း မဟာ လူမျိုးကြီး ဝါဒကိုမူ စွန့်လွှတ်ခြင်းမရှိကြောင်း၊ ၂၀၂၁ ခုနှစ် ဖေဖော်ဝါရီလတွင် ထပ်မံ အာဏာသိမ်း လိုက်ခြင်း သည် ပြည်သူများလိုလားသည့် ဖက်ဒရယ် ဒီမိုကရေစီ ပြည်ထောင်စု တည်ဆောက်ရေးကို စစ်တပ်က လုံးဝ လက်မခံနိုင်ကြောင်း ပြသလိုက်ခြင်းပင် ဖြစ်သည်ဟု KNU က သုံးသပ်သည်။ ပဒိုစောကွယ်ထူးဝင်းက “ဗမာစစ်တပ်အနေနဲ့ ဒီလိုအဓမ္မ အာဏာသိမ်းမှုဟာ လူမျိုးစုတွေနဲ့ ပြည်သူလူထုတွေ လိုလားတဲ့ ဒီနိုင်ငံကို ဖက်ဒရယ်ဒီမိုကရေစီပြည်ထောင်စုအနေနဲ့ တည်ထောင်ဖို့ဆိုတာကို လုံးဝလက်မခံနိုင်ဘူး ဆိုတာ ရှင်းရှင်းလင်းလင်း ဖော်ပြတာပဲ ဖြစ်ပါတယ်။ ဗမာစစ်တပ်အနေနဲ့ ၂၀၀၈ ဖွဲ့စည်းပုံအခြေခံဥပဒေက ရေးသားထားတဲ့ အခွင့်အာဏာပေးထားတဲ့အတိုင်းပဲ စစ်တပ်ကနေ ကြီးစိုးချုပ်ကိုင်လိုတဲ့ ဆန္ဒပဲ ရှိပါတယ်” ဟု ပြောသည်။ KNU ၏ တော်လှန်ရေး ရည်မှန်းချက်သည် အာဏာရှင်စနစ် ပုံသဏ္ဍာန် အမျိုးမျိုးကို ဖြိုချဖျက်ဆီးပြီး တန်းတူရေးနှင့် ကိုယ်ပိုင်ပြဋ္ဌာန်းခွင့်ရှိသည့် ဖက်ဒရယ်ဒီမိုကရေစီ ပြည်ထောင်စု တည်ဆောက်ရေး ဖြစ်ကြောင်း၊ ယင်းရည်မှန်းချက် အောင်မြင်ရန် နိုင်ငံရေးနည်းလမ်း တစ်ခုတည်းနှင့် မလုံလောက်ဘဲ စစ်ရေးနည်းလမ်းဖြင့် လည်း အကောင်အထည် ဖော်ဆောင်ရွက်သွားမည် ဖြစ်ကြောင်း KNU ဥက္ကဋ္ဌက ပြောသည်။

ရွေးကောက်ပွဲမှာ စစ်တပ် အကျိုးစီးပွားသာဖြစ်ဟု KNU ဥက္ကဋ္ဌ ပြော

လွိုင်ကော်တွင် မထည့်မနေရ မဲထည့်ရန် စစ်တပ်က ဖိအားပေး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၂၀ ရက်။ ကရင်နီ (ကယား) ပြည်၊ လွိုင်ကော်မြို့တွင် စစ်ကော်မရှင်တပ်က မဲမထည့်မနေရ ဖိအားပေးနေပြီး အတုအယောင် ရွေးကောက်ပွဲအတွက် မြို့တွင်းလုံခြုံရေး အတင်းအကျပ် တင်းကြပ်ထားသည်ဟု မြို့ခံများက ပြောသည်။ လွိုင်ကော်မြို့တွင် စစ်ကော်မရှင်က ကျင်းပရန်ပြင်ဆင်နေသည့် အတုအယောင် ရွေးကောက်ပွဲရက် နီးကပ်လာသည်နှင့် အမျှ မြို့တွင်းသွားလာ လှုပ်ရှားမှုများကို ယခင်ကထက် ပိုမိုတင်းကြပ်ထားပြီး ပြည်သူများ အား မဲမထည့်မနေရ ဖိအားပေးမှုများ ဆက်တိုက်လုပ်ဆောင်နေကြောင်း မြို့ခံများက ပြောသည်။ လက်ရှိတွင် လွိုင်ကော်မြို့အတွင်း လမ်းများပိတ်ဆို့ကာ စစ်ဆေးရေးဂိတ်များ တိုးချဲ့ထားပြီး ဆိုင်ကယ်၊ ကားနှင့် လူလိုင်စင်များအား အသေးစိတ်စစ်ဆေးမှုများ လုပ်ဆောင်နေသည်။ လွိုင်ကော်မြို့ခံ အမျိုးသမီးတစ်ဦးက “ကိုယ့်အိမ်ကိုယ်အိုးနဲ့ တိုးတိုးတိတ်တိတ်ပဲ နေကြရတယ်။ ညဆို ဘယ်သူ မှ အပြင်မထွက်ရဲတော့ဘူး။ သွားရင်လည်း ၇ နာရီ၊ ၈ နာရီလောက်အထိပဲ။ အခုက ကားတွေ၊ ဆိုင်ကယ်တွေကို တအား Check လုပ်တယ်။ ဖမ်းတယ်၊ လိုင်စင်တွေရော လူလိုင်စင်တွေပါ အကုန်စစ်နေတာ” ဟု ပြောသည်။ စစ်ကော်မရှင် လက်အောက်ခံ ရွေးကောက်ပွဲကော်မရှင် (UEC) က ရွေးကောက်ပွဲကို အပိုင်းနှစ်ပိုင်းခွဲ၍ ယခုနှစ် ဒီဇင်ဘာလ ၂၈ ရက်တွင် အပိုင်း (၁)၊ လာမည့် ဇန်နဝါရီလ ၁၁ ရက်နေ့တွင် အပိုင်း (၂) နှင့် ဇန်နဝါရီလ ၂၅ ရက်နေ့တွင် အပိုင်း (၃) အဖြစ် ကျင်းပမည်ဟု ထုတ်ပြန်ထားသည်။ လွိုင်ကော်မြို့နယ် အတွင်းရှိ ပါလောင်းနှင့် တီးလုံကျေးရွာအုပ်စုတို့မှလွဲ၍ ကျန်သည့် ကျေးရွာအုပ်စုအားလုံးတွင် မဖြစ်မနေ ကျင်းပသွားရန် စစ်ကော်မရှင်က စီစဉ်နေခြင်းဖြစ်သည်။ စစ်ကော်မရှင်တပ်သည် မဲဆွယ်စည်းရုံးရေးကာလအတွင်း ရပ်ကွက်များ၌ ဆန်နှင့် ဆီများဝေငှကာ လူစုဆောင်း ခြင်း၊ မဲစာရင်းတွင် အမည်သွားရောက်ရှာဖွေရန် အတင်းအကျပ်ခိုင်းစေခြင်းများ ပြုလုပ်နေသည်။ အခြားမြို့ခံ အမျိုးသမီးတစ်ဦးကလည်း “ရပ်ကွက်မှာ စည်းရုံးရေးတွေ ဆင်းတယ်လေ။ ဆီတွေ၊ ဆန်တွေ ပေး ပြီးတော့ ခေါ်တယ်။ မသွားမနေရပဲ။ နာမည်တောင် သွားရှာရပြီ။ ဒီမှာနေတော့လည်း ဒီအတိုင်းပဲ လိုက်သွား ရမှာပေါ့” ဟု ၎င်းတို့ ကြုံတွေ့နေရသည့် ပြောပြသည်။ တစ်ဖက်တွင်လည်း စစ်ကော်မရှင်တပ်သည် လွိုင်ကော်မြို့အနီးရှိ စစ်ဘေးရှောင်ပြည်သူများကို မြို့ထဲသို့ ပြန်ဝင်လာစေရန် စစ်ရေးအရ ဖိအားပေးနေသည်။ ပြန်မဝင်လာသည့် ဒေသများသို့ လက်နက်ကြီးနှင့် လေကြောင်းဖြင့် တိုက်ခိုက်ခြင်းများ ပြုလုပ်နေသဖြင့် စစ်ဘေးရှောင်များမှာ မြို့ထဲသို့ ပြန်လည်ဝင်ရောက်နေရပြီး ယင်းသို့ ပြန်ဝင်လာပါက မဲမဖြစ်မနေ ပေးရမည့် အခြေအနေရှိနေကြောင်း ကရင်နီပြည်လူငယ်များသမဂ္ဂ (UKSY) က ထောက်ပြသည်။ UKSY ပြောရေးဆိုခွင့်ရှိသူက “လွိုင်ကော်မြို့အရှေ့ခြမ်းကို စစ်ကြောင်းထိုးတာတွေ သူတို့ ဆောင်ရွက်နေတာ ရှိတယ်။ စစ်ရှောင်တွေက စစ်ရေးအချိန်မရွေး ထဖြစ်နိုင်တဲ့အတွက် မြို့ပေါ်ကို ပြန်ဝင်လာရတယ်။ ဒါဟာ စစ် ရေးအရ ပြည်သူလူထုအပေါ် ဖိအားပေးတဲ့ အနေအထားပါ။ မြို့ထဲရောက်ပြီဆိုရင်တော့ မဲကတော့ မဖြစ်မနေ ပေးရမယ့် အခြေအနေ ဖြစ်သွားပါလိမ့်မယ်” ဟု သုံးသပ်ပြောဆိုသည်။ လွိုင်ကော်မြို့ပေါ် ရပ်ကွက်များတွင် နေထိုင်သူများ၏ အမည်စာရင်းကို စစ်ကော်မရှင်က အတိအကျကောက်ခံ ထားပြီးဖြစ်၍ ဒေသခံအများစုမှာ မိမိတို့ ဆန္ဒမပါဘဲ မဖြစ်မနေ မဲသွားပေးရမည့် အခြေအနေဖြစ်ကြောင်း ဒေသခံများက ပြောသည်။ ယခုကဲ့သို့ စစ်ကော်မရှင်တပ်က နည်းပညာသုံး ခြေရာခံစောင့်ကြည့်မှုများ၊ CCTV ကင်မရာများနှင့် AI မျက်နှာ မှတ်သားစနစ်များကို အသုံးပြုကာ ပြည်သူများကို ခြိမ်းခြောက်နေသည့် အပေါ် သံအမတ်ကြီး ဦးကျော်မိုးထွန်း ကလည်း ကုလသမဂ္ဂတွင် သတိပေးခဲ့ပြီးဖြစ်သည်။ ပြည်သူလူထု၏ ဆန္ဒမပါဘဲ အတင်းအကျပ် ဖိအားပေး ကျင်းပမည့် ဤရွေးကောက်ပွဲသည် လွတ်လပ်မှုနှင့် တရားမျှတမှု လုံးဝမရှိနိုင်ကြောင်း လူ့အခွင့်အရေး လှုပ်ရှားသူများနှင့် စောင့်ကြည့်လေ့လာသူများက ဝေဖန် ရှုတ်ချနေကြသည်။ ဓာတ်ပုံ - INFORMATION AND PUBLIC RELATIONS DEPARTMENT

လွိုင်ကော်တွင် မထည့်မနေရ မဲထည့်ရန် စစ်တပ်က ဖိအားပေး

“အကြောက်တရားနဲ့ မဲပေးရတော့မယ့် စစ်ကော်မရှင်ထိန်းချုပ်မှုအောက်က ကရင်နီဒေသခံများ…” By Kantarawaddy Times ကရင်နီပြည်၊ လွိုင်ကော်မြို့ “မဲပေးခြင်းက ပြောင်းလဲမှုကို ကြုံမယ်လို့ မယုံကြည်ဘူး။ အခုတောင်မှ အရင်ခေတ်ကလိုမျိုး အာဏာရှင်စနစ်တွေကို ပြန်ခံစားနေရပြီ အကောင်ကြီးကြီး (ရာထူးကြီးသူ၊ အာဏာရှိသူ ) မြင်ရင် ကြောက်နေရတယ်။” လို့ အသက် ၂၇ နှစ်အရွယ် လွိုင်ကော်မြို့ခံ အမျိုးသမီးတစ်ဦးက မဲပေးရမယ့် အခြေအနေနဲ့ ပတ်သက်ပြီး ပြောပါတယ်။ သူမကတော့ လွိုင်ကော်မြို့တွင်းမှာ ဈေးရောင်းတဲ့ အလုပ်နဲ့ အသက်မွေးဝမ်းကြောင်းပြုနေပြီး ရွေးကောက်ပွဲက နေ့စဉ်စားဝတ်နေရေးလောက် အရေးမကြီးဘူးလို့ ပြောပါတယ်။ ဒါ့အပြင် ကိုယ်ပေးလိုက်တဲ့ မဲတပြားကြောင့် လက်ရှိဖြစ်ပွားနေတဲ့ ပဋိပက္ခတွေကို ကျော်လွှားပေးနိုင်မယ်၊ ဒါမှမဟုတ် အမှန်တကယ်ကောင်းမွန်တဲ့ နိုင်ငံရေးအပြောင်းအလဲ တခုခု ရှိလာမယ်ဆိုတာကိုတော့ အယုံကြည်မရှိဘူးလို့ ဆက်ပြောပါတယ်။ ရွေးကောက်ပွဲကျင်းပမယ့်ရက် နီးကပ်လာပေမယ့် ကရင်နီဒေသခံ လူထုတွေကတော့ စစ်ကော်မရှင် ပြုလုပ်မယ့် ရွေးကောက်ပွဲကို စိတ်ဝင်စားမှု မရှိကြပါဘူး။ စစ်ကော်မရှင် လက်လှမ်းမမီတဲ့ နေရာဒေသက ပြည်သူတွေက ရွေးကောက်ပွဲကို စိတ်မဝင်စားကြပေမယ့် ၊ စစ်ကော်မရှင် ထိန်းချုပ်တဲ့ လွိုင်ကော်မြို့နေ လူထုတွေကတော့ အမျိုးမျိုးသော ဖိအားတွေကြောင့် မဖြစ်မနေ မဲ ပေးရမယ့် အခြေအနေ ဖြစ်လာပါတယ်။ လွိုင်ကော်မြို့မှာ စစ်ရဲ့အကျိုးဆက်ကြောင့် ပစ္စည်းဥစ္စာ၊ နေအိမ် အားလုံးပျက်စီးဆုံးရှုံးသွားတဲ့ သူတွေရှိပြီး သူတို့ဟာ ရရာအလုပ် လုပ်ကိုင်ရင်း အသက်ရှင်သန်နိုင်ဖို့ ရုန်းကန်ရပါတယ်။ လွိုင်ကော်မြို့ဟာ ကရင်နီပြည်ရဲ့ မြို့တော်ဖြစ်ပြီး စစ်ကော်မရှင် အုပ်ချုပ်ရေးစနစ် လည်ပတ်တဲ့ မြို့တမြို့ပါ။ မြို့တွင်းမှာတော့ မြို့အင်္ဂါရပ်နဲ့ ကိုက်ညီတဲ့ တက္ကသိုလ်တွေ ၊ အခြေခံကျောင်းတွေ ၊ မြို့မဈေး နဲ့ အထင်ကရ လည်ပတ်စရာ နေရာတွေကို စစ်ကော်မရှင်ရဲ့ ဌာနဆိုင်ရာတွေကနေ ဆောင်ရွက်နေပေမယ့်လည်း မြို့အဝင်အထွက်က စစ်ဆေးရေးဂိတ်တွေမှာ တင်းကြပ်မှု ပိုများလာတယ်လို့ မြို့ခံတွေက ပြောပါတယ်။ ပြီးခဲ့တဲ့နှစ်တွေက ဖြစ်ပွားတဲ့ တိုက်ပွဲတွေကြောင့် တိမ်းရှောင်သွားကြတဲ့ လူထုတွေဟာ လွိုင်ကော်မြို့တွင်းကို ပြန်လာနေထိုင်ကြသူတွေလည်း များလာပါတယ်။ ၂၀၂၅ ခုနှစ် မတ်လမှာ စစ်ကော်မရှင် ထိန်းချုပ်ထားတဲ့နေရာတွေမှာ သူတို့ ကောက်ယူထားတဲ့စာရင်းအရ လွိုင်ကော်မြို့နယ်မှာ လူဦးရေ နှစ်သောင်းကျော် ( ၂၃၈၄၈ ) ဦး ရှိပါတယ်။ ရွေးကောက်ပွဲအပေါ် လွိုင်ကော်မြို့ခံတွေရဲ့ သဘောထားများ စစ်ကော်မရှင် ပြုလုပ်တဲ့ ရွေးကောက်ပွဲမှာ ဆန္ဒမပါပဲ မဲထည့်ရမှာ စိုးရိမ်တဲ့အပြင် စစ်တပ်အုပ်ချုပ်ရေးအောက်မှာ မနေလိုတဲ့အတွက် လွိုင်ကော်မြို့ကို မပြန်သေးဘူးလို့ ဒီးမော့ဆိုအနောက်ခြမ်းမှာ စစ်ရှောင်နေတဲ့ အသက် ၃၀ အရွယ် လွိုင်ကော်မြို့ခံ အမျိုးသမီးတစ်ဦးက ပြောပါတယ်။ “ပြည်သူလူထု တစ်ယောက်အနေနဲ့ ဒီရွေးကောက်ပွဲကို အယုံကြည်မရှိသလို လွိုင်ကော်ပြန်ပြီး မဲပြန်ထည့်မှာလည်း မဟုတ်ပါဘူး။” လို့ သူမက ပြောပါတယ်။ ဝင်ရောက်ယှဉ်ပြိုင်ကြတဲ့ ပါတီတချို့က ပြီးခဲ့တဲ့ နိုဝင်ဘာလ မှာ ရွေးကောက်ပွဲ မဲဆွယ်စည်းရုံးရေးကို ကျယ်ကျယ်ပြန့်ပြန့် ကြိုးစားလုပ်ဆောင်နေကြပေမယ့် မြို့ခံအများစုဟာ ရွေးကောက်ပွဲအပေါ် စိတ်ဝင်စားမှု မရှိကြဘူးလို့ မြို့ခံအမျိုးသားတစ်ဦးက ပြောပါတယ်။ “သွားတဲ့သူတွေကိုတော့ ဆန်၊ဆီ ဝေတယ်။ အင်္ကျီတွေ ဝေတယ်တဲ့။ သူတို့က ရပ်ကွက်တွေရဲ့ မူကြိုကျောင်းတွေမှာ ဟောပြောပွဲလုပ်တာ လူစုလူဝေးလုပ်လို့ရတဲ့ ဖူဆယ်ဘောလုံးကွင်းတို့ အိမ်အောက်ထပ်တို့ပေါ့။ ကြံ့ဖွတ်(ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ) ကပဲ ပိုလုပ်တာ တွေ့တယ်။” လို့ သူက ပြောပါတယ်။ မဲဆွယ်စည်းရုံးရေးလုပ်တဲ့ မှတ်တမ်းပုံတွေအရ လာရောက်သူတွေက စစ်တပ်အသိုင်းအဝန်း ၊ တပ်မိသားစု ၊ ဝန်ထမ်းတချို့တွေ ဖြစ်ပြီး လူဦးရေ အများဆုံး (၅၀) ဝန်းကျင်သာ ရှိတာကို တွေ့ရပါတယ်။ မဲဆွယ်ပွဲ လာရောက်သူတွေကို ဆန် ၊ ဆီ ၊ အင်္ကျီပေးဝေတာ က ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP ) နဲ့ ပြည်သူ့ရှေ့ဆောင်ပါတီ (PPP ) ဖြစ်တယ်လို့ သွားရောက်ပါဝင်ခဲ့သူတွေက ပြောပါတယ်။ မဲမထည့်သူကို စစ်ကော်မရှင်က ဘယ်လိုအရေးယူမလဲ စစ်ကော်မရှင် ထိန်းချုပ်ထားတဲ့ မြို့ပေါ်မှာတော့ လက်နက်ကိုင်ခြိမ်းခြောက်ပြီး ပြည်သူလူထုတွေကို ဖိအားပေးမဲထည့်ဖို့ လုပ်ဆောင်တာ မရှိပေမယ့် တခြားနည်းလမ်းတွေနဲ့ ဖိအားပေးနေတယ်လို့ နောက်ထပ်မြို့ခံတစ်ဦးကလည်း အခုလို ပြောပါတယ်။ ”မပေးပဲတော့ မနေရဲဘူး။ ထောင်သုံးနှစ်ချမယ်လို့ ပြောနေကြတာပဲ။ ဘယ်ပါတီပေးပေး သိပ်ထူးစရာတော့ မရှိပါဘူး။” လို့ အဆိုပါ မြို့ခံတစ်ဦးက ပြောပါတယ်။ ရွေးကောက်ပွဲကျင်းပမယ့်ရက်မှာ မဲလာမပေးပါက ရွေးကောက်ပွဲ ဟန့်တားနှောက်ယှက်တဲ့ ဥပဒေနဲ့ ဖမ်းဆီးအရေးယူမယ်လို့ ခြိမ်းခြောက်ပြောဆိုမှုတချို့လည်း ကြားနေရတယ်လို့ အဆိုပါ မြို့ခံက ဆက်ပြောပါတယ်။ ဒါကတော့ ပြည်သူတွေကြား ကောလဟာလတွေအဖြစ် ပြန့်နှံ့နေတဲ့ ရွေးကောက်ပွဲနဲ့ ပတ်သက်ပြီး ဖိအားပေးခြိမ်းခြောက်မှုတွေပါ။ တဖက်မှာလည်း ရွေးကောက်ပွဲ ဖြစ်မြောက်နိုင်ရေး ဟန့်တားမယ့်သူတွေ မရှိစေဖို့ ပြီးခဲ့တဲ့ စက်တင်ဘာလအတွင်းမှာ အသက်မပြည့်သေးတဲ့ ကလေး ၃ ဦးအပါအဝင် ၅ ဦးကို စစ်မကော်ရှင်က ရွေးကောက်ပွဲကို နှောင့်ယှက်ဟန့်တားခြင်းမှ ကာကွယ်ပေးရေးဥပဒေပုဒ်မ ၂၃ ( က ) နဲ့ အမှုဖွင့်ပြီး ဖမ်းဆီးအရေးယူခဲ့ပါတယ်။ “ဖမ်းခံရတဲ့ ကောင်လေးတွေက ထောင် ၈ နှစ်ကျသွားတယ်။ ပိုက်ဆံလိုက်ရတယ် မလိုက်ရင် ပိုဆိုးနိုင်တယ်ဆိုလို့ ညစ်လိုက်တာပေါ့။ ဖမ်းခံရတဲ့သူတွေကို ဆွဲစိလိုက်တယ်။ ပိုက်ဆံလိုက်တဲ့ ကလေးကိုတော့ တပ်ထဲမပို့ဘူး ထောင်ချလိုက်တယ်။” လို့ ဖမ်းဆီးခံရသူတွေနဲ့ နီးစပ်သူတစ်ဦးက ပြောပါတယ်။ လက်ရှိ လွိုင်ကော်မြို့တွင်းမှာ ပြည်သူ့စစ်မှုထမ်းဥပဒေအရ အတင်းအဓမ္မ စစ်မှုထမ်းဖို့ ခေါ်ဆောင်ခံရမှာကို ကြောက်လန့်နေကြတဲ့အပြင် ရွေးကောက်ပွဲနဲ့ပတ်သက်ပြီး ပြောဆိုဖို့ကို မဝံ့ရဲကြပါဘူး။ ဒါ့အပြင် အသွားအလာကို သတိထားနေရသလို အပြောအဆိုကိုလည်း ဆင်ခြင်ရတယ်လို့ လွိုင်ကော်မြို့ခံတွေက ပြောပါတယ်။ မြို့ခံမဟုတ်သူတွေဆီက မဲ ရဖို့ စစ်ကော်မရှင် ဘယ်လိုလုပ်နေသလဲ။ လက်ရှိမှာတော့ လွိုင်ကော်မြို့တွင်းမှာ မြို့ခံအပြင် တခြားမြို့နယ်တွေကနေ လာရောက်တိမ်းရှောင် ကြသူတွေကိုလည်း မဲပေးရမယ့် စာရင်းထဲ ထည့်သွင်းထားပါတယ်။ ဖားဆောင်း ၊ ဘောလခဲ ၊ မော်ချီး ၊ ရှားတော စတဲ့ မြို့နယ်တွေကနေ လာရောက် စစ်ဘေးရှောင်ကြတဲ့ ပြည်သူတွေဆီက မဲရရှိဖို့အတွက် လွိုင်ကော်မြို့မှာ နေထိုင်ပါက ယာယီနေထိုင်ခွင့်လျှောက်ခိုင်းသလို မိမိဆန္ဒနဲ့ မဲပေးလိုကြောင်းကိုလည်း စာရင်းဖြည့်စေပြီးမှ နေထိုင်ခွင့်ရတယ်လို့ ဆိုပါတယ်။ “ပြန်ဝင်တဲ့ သူအကုန်လုံးက သူတို့က အဆင်သင့် မဲနာမည်ပါပြီးသား။ လာတဲ့သူဆို နာမည်စာရင်းတွေ ကောက်တယ်။ မိသားစု လူဦးရေတွေ သူတို့ ကောက်တယ်။ ဓာတ်ပုံမှတ်တမ်းတွေ ယူပြီးတော့ တခါတည်း မဲအတွက် သူတို့ ဆွယ်ထားပြီးသား။ ယာယီနေထိုင်ခွင့် မလျှောက်ရင်လည်း နေလို့မရဘူး” လို့ ဖားဆောင်းမြို့နယ်ကနေ လွိုင်ကော်မြို့ကို လာရောက်စစ်ရှောင်နေသူတစ်ဦးက ပြောပါတယ်။ ရွေးကောက်ပွဲကာလမှာ ပဋိပက္ခတွေ ပိုတိုးလာနိုင် ရွေးကောက်ပွဲကျင်းပမယ့် ဒီဇင်ဘာလအတွင်း လူ့အခွင့်အရေးချိုးဖောက်မှု ပိုများလာနိုင်တယ်လို့ ဒေသခံတွေက ပြောဆိုနေကြပါတယ်။ ယခု ရွေးကောက်ပွဲပြုလုပ်မယ့် လအတွင်းမှာပဲ စစ်ကော်မရှင်တပ်က လေကြောင်းကနေ တော်လှန်ရေးတပ်ဖွဲ့တွေ ထိန်းချုပ်ထားတဲ့ နယ်မြေတွေက အရပ်သားတွေကို ဗုံးကြဲတိုက်ခိုက်ခဲ့ပါတယ်။ ဒီဇင်ဘာလ ၆ ရက်နေ့က လွိုင်ကော်မြို့နယ် ပါလောင်းကျေးရွာအုပ်စုက စစ်ရှောင်စခန်းတစ်နေရာကို စစ်ကော်မရှင်က လေကြောင်းကနေ ဗုံးကြဲတိုက်ခိုက်ခဲ့ပါတယ်။ အလားတူ ဒီဇင်ဘာ ၇ ရက်နေ့ ညပိုင်းမှာ ဒီးမော့ဆိုအနောက်ခြမ်းက နေရာ ၃ ခုကို ဗုံးကြဲတိုက်ခိုက်ခဲ့တာပါ။ အဲ့ဒီနေရာတွေဟာ တိုက်ပွဲဖြစ်ပွားတဲ့ ဧရိယာမဟုတ်သလို စစ်ဘေးတိမ်းရှောင်ကြတဲ့ နေရာတွေသာ ဖြစ်ပြီး စစ်ကော်မရှင်က အကြောင်းမဲ့တိုက်ခိုက်ခဲ့တာပါ။ အဆိုပါ နေရာတွေဟာ လွိုင်ကော်မြို့နဲ့ ထိစပ်နေတဲ့ မြို့နယ်တွေ ဖြစ်ပါတယ်။ “လေယာဉ်က စစ်ရှောင်တဲ့နေရာတွေဖက်ကို ဗုံးလာကြဲတယ် ခနခဏကြုံတွေ့နေရတယ်။ မထူးဆန်းတော့ဘူး။ မကြောက်ဘူးလားဆိုတော့ ကြောက်တာပဲလေ။ ဗုံးခိုကျင်းထဲပဲ အားကိုးရတာပေါ့” လို့ ဒီးမော့ဆိုဒေသခံ အမျိုးသမီးတစ်ဦးက ပြောပါတယ်။ ဒါ့အပြင် ဒီးမော့ဆိုမြို့၊ ငွေတောင်အခြေစိုက် ခလရ ( ၁၀၂ ) တပ်က လက်နက်ကြီးတွေနဲ့ နေ့စဉ်ရက်ဆက် ပစ်ခတ်နေတာကြောင့် လူထုတွေဟာ စိုးရိမ်ထိတ်လန့်နေရတယ်လို့ ပြောပါတယ်။ တပ်မြို့လို့တင်စားကြတဲ့ ဘောလခဲမြို့ က ရွေးကောက်ပွဲ အခြေအနေ လွိုင်ကော်မြို့နယ်ရဲ့ တောင်ဘက်ခြမ်းမှာရှိပြီး စစ်တပ်မြို့လို့ ဒေသအခေါ်ရှိတဲ့ ဘောလခဲမြို့ကိုလည်း စစ်ကော်မရှင်တပ်က ထိန်းချုပ်ထားပါတယ်။ လွိုင်ကော်မြို့နဲ့ မိုင် ၃၀ ကျော် အကွာအဝေးမှာရှိပြီး ၂၀၁၄ ခုနှစ် သန်းခေါင်စာရင်းအရ ဘောလခဲမြို့နယ်မှာ လူဦးရေ ( ၈၄၈၀ ) ရှိပြီး အိမ်ခြေ ၁, ၅၀၀ ကျော် ရှိပါတယ်။ ဘောလခဲမြို့နယ်မှာ စစ်တပ်ရဲ့ ဗျုဟာတပ်ရှိပြီး တပ်စခန်းတွေလည်း များပြားတာကြောင့် စစ်တပ်နဲ့ ပတ်သက်နေတဲ့ မိသားစုအသိုင်းအဝန်း ၊ ထောက်ခံသူအုပ်စု ၊ ဌာနဆိုင်ရာဝန်ထမ်း တွေက အများဆုံး နေထိုင်ကြပါတယ်။ ဒေသတွင်း တိုက်ပွဲတွေအပြင် ကုန်စည်လမ်းကြောင်းမရောက်ရှိသလို စားဝတ်နေရေးကို ရုန်းကန် ရှာဖွေစားသောက်နေရတဲ့ ဘောလခဲမြို့ခံအများစုက နေရပ်ကိုစွန့်ခွာပြီး တခြားနေရာတွေမှာ တိမ်းရှောင်နေထိုင်ကြပါတယ်။ လက်ရှိ မြို့ပေါ်မှာ လူဦးရေ ၂၀၀ ဝန်းကျင် ကျန်ရစ်ပြီး စစ်တပ်မိသားစုဝင်၊ တပ်အသိုင်းအဝိုင်း ၊ ဝန်ထမ်း နဲ့ ဒေသခံ တချို့သာရှိတယ်လို့ တိမ်းရှောင်လာတဲ့ မြို့ခံအမျိုးသားတစ်ဦးက ပြောပြပါတယ်။ လူဦးရေ ရာဂဏန်းသာ ရှိတဲ့ မြို့မှာ ဒီဇင်ဘာလ ၂၈ ရက်နေ့မှာ ပြုလုပ်မယ့် ရွေးကောက်ပွဲအပိုင်း ( ၁ ) အတွက် ဘောလခဲမြို့က ပါဝင်နေတာပါ။ တရားမျှတပြီး လွတ်လပ်တဲ့ ပါတီစုံဒီမိုကရေစီ ရွေးကောက်ပွဲလို့ စစ်ကော်မရှင်က ကြေညာနေပေမယ့် ဒါဟာ နိုင်ငံရေးလှည့်ကွက်ဖြစ်သလို အတုအယောင် ရွေးကောက်ပွဲဖြစ်တယ်လို့ ဘောလခဲ မြို့ခံ လူငယ် အမျိုးသမီးတစ်ဦးက အခုလို သုံးသပ်ပါတယ်။ “ဘောလခဲမှာ ဘယ်သူတွေများ ကျန်ရှိနေအုံးမလဲပေါ့ တော်တော်များများက စစ်ဘေးတိမ်းရှောင် နေကြရတယ်လေး။ သူတို့တွေ ဘယ်လို မဲပေးလို့ ရမလဲပေါ့။ ဒါက လုပ်ကွက်တစ်ခုပဲ။ နိုင်ငံရေးကို တရားဝင်ပုံစံနဲ့ အကွက်ရွေ့ ကစားနေတယ်လို့ မြင်တယ်။”လို့ သူမက ပြောပါတယ်။ ဘောလခဲမြို့ပေါ်မှာ တစ်ကြိမ်တစ်ခါမျှ တိုက်ပွဲမဖြစ်ဖူးပေမယ့် စစ်တပ်ရဲ့အုပ်ချုပ်မှုမှာ မလုံခြုံဘူးလို့ ခံစားရသလို အကြောက်တရားနဲ့ပဲ ရှင်သန်ရတာကြောင့် တိမ်းရှောင်ဖို့ ရွေးချယ်ခဲ့တယ်လို့ အသက် ၄၀ အရွယ် မြို့ခံအမျိုးသားတစ်ဦးက ပြောပါတယ်။ ဒီလိုအခြေအနေမှာ လူထုအသံကို ကိုယ်စားပြုတဲ့ ရွေးကောက်ပွဲလို့ ခေါင်းစဉ်တပ်တာဟာ မှန်ကန်မှု မရှိသလို နိုင်ငံတကာမှာ အသိအမှတ်ပြုခံရအောင် ဟန်ပြတစ်ခုသာ ဖြစ်တယ်လို့ အဆိုပါ အမျိုးသားက ဆိုပါတယ်။ ဘောလခဲမြို့တွင်းမှာတော့ မည်သည့်ပါတီကမှ မဲဆွယ်စည်းရုံးတာ မရှိသလို မဲပေးတာဖြစ်စေ ၊ မဲမပေးတာဖြစ်စေ လူထုတွေအပေါ် တစ်စုံတစ်ရာ ပြောင်းလဲသွားမှာ မဟုတ်လို့ ပုံမှန်အနေအထား တခုလို ဖြစ်နေပြီလို့ ဒေသခံတွေက ပြောပါတယ်။ စစ်ကော်မရှင် ရွေးကောက်ပွဲကျင်းပမဲ့ နေရာများ.. စစ်ကော်မရှင်က ကရင်နီပြည်ရဲ့ မြို့နယ် ၄ မြို့နယ်မှာ ရွေးကောက်ပွဲ ကျင်းပမှာဖြစ်လို့ ဒါဟာ ကရင်နီပြည် မြို့နယ်ရဲ့ ထက်ဝက် ဖြစ်ပါတယ်။ စစ်ကော်မရှင် အပြည့်အဝ ထိန်းချုပ်ထားနိုင်တယ်လို့ ဆိုနိုင်တဲ့ လွိုင်ကော် နဲ့ ဘောလခဲ မြို့နဲ့ မြို့တွင်းနေရာအနည်းအကျဉ်းကိုသာ ထိန်းချုပ်ထားနိုင်တဲ့ ဖရူဆိုမြို့ပေါ်နဲ့ ဒီးမော့ဆိုမြို့ပေါ် တွေ ဖြစ်ပါတယ်။ စစ်ကော်မရှင်က ဒီဇင်ဘာလ ၂၈ ရက်နေ့မှာ ပြုလုပ်မယ့် ရွေးကောက်ပွဲ အပိုင်း ( ၁ ) အတွက် လွိုင်ကော် ၊ ဘောလခဲ ၊ ၂၀၂၆ ခုနှစ် ဇန်နဝါရီလ ၁၁ ရက်နေ့မှာ ပြုလုပ်မယ့် အပိုင်း ( ၂ ) အတွက် ဖရူဆို ၊ ဒီးမော့ဆို စတဲ့ မဲဆန္ဒနယ်တွေကို ထုတ်ပြန်ကြေညာပြီး ဖြစ်ပါတယ်။ ရွေးကောက်ပွဲကျင်းပမယ်လို့ ကြေညာထားပေမယ့် မြို့နယ်တစ်ခုလုံးမှာ လုပ်နိုင်တာမဟုတ်ဘဲ စစ်တပ်အခြေစိုက်ရာ စခန်း ၊ ထိန်းချုပ်နိုင်တဲ့ ဧရိယာအတွင်းမှာသာ ပြုလုပ်နိုင်မှာပါ။ ပြည်ထောင်စုရွေးကောက်ပွဲကော်မရှင် UEC ရဲ့ ဒီဇင်ဘာလ ၅ ရက်နေ့ ထုတ်ပြန်စာအရ ကရင်နီက ကျေးရွာအုပ်စု ( ၅၁ ) ခုမှာ ရွေးကောက်ပွဲပြုလုပ်နိုင်မှာ မဟုတ်ပါဘူး။ လွိုင်ကော်မြို့နယ်မှာဆိုရင် တော်လှန်ရေးတပ်ဖွဲ့တွေ ထိန်းချုပ်ထားတဲ့ ပါလောင်း နဲ့ တီးလုံကျေးရွာ အုပ်စုကလွဲလို့ ကျန်တဲ့နေရာအားလုံးမှာ ပြုလုပ်သွားမှာဖြစ်ပါတယ်။ ဒီးမော့ဆိုမြို့နယ်မှာ ၂၆ အုပ်စု ၊ ဖရူဆိုမြို့နယ်မှာ ၂၃ အုပ်စု ၊ ဘောလခဲမြို့နယ်မှာ (၁၀) အုပ်စု မှာ ရွေးကောက်ပွဲပြုလုပ်နိုင်မှာ မဟုတ်ပါဘူး။ ၂၀၂၄ခုနှစ် လူဦးရေ သန်းခေါင်စာရင်းအရ ကရင်နီပြည်မှာ လူဦးရေ ၃ သိန်း ဝန်းကျင်ရှိပြီး အဲ့ဒီထဲ ၁၂.၉ ရာခိုင်နှုန်းဖြစ်တဲ့ လူဦးရေ သုံးသောင်းကျော်စာရင်းကို ကောက်ယူထားပါတယ်။ ကရင်နီပြည်မှာ မြို့နယ် ၇ မြို့ ရှိတဲ့အထဲ တော်လှန်ရေးအင်အားစုတွေ အလုံးစုံထိန်းချုပ်ထားတဲ့ ရှားတော ၊ မယ်စဲ့မြို့နယ် နဲ့ နောက်ဆုံး စစ်ကော်မရှင်တပ်ရဲ့ လက်ကျန်တပ်ရင်း ခလရ (၁၃၄ )တစ်ခုသာ ကျန်တော့တဲ့ ဖားဆောင်းမြို့နယ်မှာတော့ ရွေးကောက်ပွဲပြုလုပ်နိုင်ခြင်း မရှိပါဘူး။ ရွေးကောက်ပွဲပြုလုပ်မယ့် ကရင်နီပြည်က မဲဆန္ဒနယ်အသီးသီးကနေ ဝင်ရောက်ယှဉ်ပြိုင်မယ့် ပါတီ ၄ ခုရှိပြီး ရွေးကောက်ခံမယ့် ကိုယ်စားလှယ်လောင်း (၈၇) ဦး ရှိပါတယ်။ ပါတီ ၄ ခုကတော့ တစ်နိုင်ငံလုံးအတိုင်းအတာနဲ့ ဝင်ရောက်ရွေးကောက်ခံမယ့် နိုင်ငံရေးပါတီတွေအဖြစ် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP)၊ တိုင်းရင်းသား စည်းလုံးညီညွတ်ရေးပါတီ (NUP) ၊ ပြည်သူ့ရှေ့ဆောင်ပါတီ (PPP ) နဲ့ ပြည်နယ်အခြေစိုက် ကယားပြည်နယ်ပြည်သူ့ပါတီ (KySPP) ဖြစ်ပါတယ်။ လက်ရှိ ရွေးကောက်ပွဲ ပြုလုပ်မယ့် မြို့နယ် ၄ ခု အပြင် ရှမ်း – ကရင်နီနယ်စပ်မှာလည်း ပြီးခဲ့တဲ့ ဩဂုတ်လအစောပိုင်းကတည်းက စစ်ကော်မရှင်က စစ်ကြောင်းထိုးလာပြီးနောက် လက်ရှိမှာ စစ်မျက်နှာ (၅) ခုဖြစ်တဲ့ ပင်လောင်း-ဖယ်ခုံ နယ်စပ် စစ်မျက်နှာ၊ လွိုင်ကော်အရှေ့ခြမ်း စစ်မျက်နှာ၊ မိုးဗြဲ-နန်းမယ်ခုံစစ်မျက်နှာ၊ ဒီးမော့ဆို-ဖရူဆို စစ်မျက်နှာ၊ ဘောလခဲစစ်မျက်နှာတို့မှာ စစ်ကောင်စီတပ်တွေ စစ်ကြောင်းထိုးနေတာကြောင့် တော်လှန်ရေးတပ်ဖွဲ့တွေနဲ့ တိုက်ပွဲဖြစ်ပွားနေဆဲ ဖြစ်ပါတယ်။ စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်က တရားမျှတပြီး သိက္ခာရှိတဲ့ ပါတီစုံဒီမိုကရေစီရွေးကောက်ပွဲ လို့ ခေါ်ဆိုနေပေမယ့် လူထုတွေရဲ့ လွတ်လပ်စွာပြောဆိုခွင့် ၊ အရပ်သားရှိရာ နေရာတွေကို လေယာဉ်ကြဲတာ ၊ လက်နက်ကြီးပစ်ခတ်တာတွေကို လုပ်ဆောင်နေဆဲ ဖြစ်ပြီး စစ်ကော်မရှင်လက်အောက်က လူထုတွေကတော့ ရွေးကောက်ပွဲဆန္ဒမဲအတွက် မဖြစ်မနေ မဲပေးရတော့မှာပါ။

“အကြောက်တရားနဲ့ မဲပေးရတော့မယ့် စစ်ကော်မရှင်ထိန်းချုပ်မှုအောက်က ကရင်နီဒေသခံများ…”

ရွေးကောက်ပွဲမှာ စစ်အုပ်စုအား လူသတ်လိုင်စင် ပေးမည့် လုပ်ရပ်ဖြစ်ဟု တက်ကြွလှုပ်ရှားသူများ ထောက်ပြ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၁၇ ရက်။ စစ်ကော်မရှင်က ကျင်းပရန် ပြင်ဆင်နေသည့် ရွေးကောက်ပွဲသည် လူ့အခွင့်အရေး ချိုးဖောက်မှုများကို ဆက် လက် ကျူးလွန်ရန်နှင့် စစ်အုပ်စုအတွက် ‘လူသတ်လိုင်စင်’ တရားဝင်ရရှိအောင် ပြုလုပ်ပေးမည့် လုပ်ရပ်သာ ဖြစ်ကြောင်း တက်ကြွလှုပ်ရှားသူများက ဝေဖန်ထောက်ပြလိုက်သည်။ အဆိုပါ ရွေးကောက်ပွဲသည် လူ့အခွင့်အရေး ချိုးဖောက်မှုများကို တရားဝင် ကျူးလွန်နိုင်အောင် ဖန်တီးမည့် အခင်းအကျင်း ဖြစ်သောကြောင့် ပြည်သူများအနေဖြင့် ဆန့်ကျင်ကြရန်နှင့် နိုင်ငံတကာကလည်း လက်မခံဘဲ ကန့်ကွက်ပေးရန် လိုအပ်ကြောင်း ကျေးလက်မြေအဖွဲ့ ဒါရိုက်တာ ဒေါ်မူစဲက တိုက်တွန်းပြောဆိုသည်။ မတရားမှုများကို နှုတ်ဆိတ်မနေဘဲ ထုတ်ဖော်ပြောဆိုရန် အရေးကြီးပုံနှင့် ပတ်သက်၍ ဒေါ်မူစဲက “လူ့အခွင့် အရေး ချိုးဖောက်မှုနဲ့ ပတ်သက်ပြီးတော့ မြန်မာပြည်သား တစ်ဦးချင်းစီရော၊ နိုင်ငံတကာကရောပေါ့နော်။ ချိုး ဖောက် ခံရမှုတွေကို တွေ့ရှိတဲ့အခါ ခံရတဲ့အခါမှာ ဆိတ်ဆိတ် မနေပဲနဲ့ ဖွင့်ပြောရမယ်ပေါ့နော်။ ထုတ်ဖော်ရ မယ်။ ကျမ တို့က တိတ်ဆိတ်နေမယ် နှုတ်ဆိတ်နေမယ် ဆိုလို့ရှိ ရင်တော့ ဒီစစ်အုပ်စုကို လူသတ်လိုင်စင်တွေ သူတို့လက်ထဲ ပေးလိုက်သလို ဖြစ်မှာပဲပေါ့” ဟု ပြောသည်။ လက်ရှိတွင် စစ်ကော်မရှင်တပ်သည် ၎င်းတို့၏ ရွေးကောက်ပွဲကို ဝေဖန်သူများအား ဖမ်းဆီးနှိပ်စက်ခြင်း၊ ပြည်သူ များအား မဲထည့်ရန် အကျပ်ကိုင် ခြိမ်းခြောက်ခြင်းနှင့် ကြိုတင်မဲမထည့်ပါက တက္ကသိုလ်တက်ခွင့် မပေးခြင်း စသည့် လူ့အခွင့်အရေး ချိုးဖောက်မှုများကို ဗြောင်ကျကျ ကျူးလွန်နေသည်ဟု လူ့အခွင့်အရေး လှုပ်ရှားသူ များက ဆိုသည်။ လွတ်လပ်စွာ ဆန္ဒမဲပေးပိုင်ခွင့် ချိုးဖောက်ခံနေရသည့် အခြေအနေနှင့် ပတ်သက်၍ ရှမ်းလူ့အခွင့်အရေးမဏ္ဍိုင် (SHRF) ၏ ပြောရေးဆိုခွင့်ရှိသူ ယိင်းလျန်းဟန်က ယခုကဲ့သို့ ထောက်ပြသည်။ “အဓိကကတော့ ရွေးကောက်ပွဲဆိုတာ ဒီမိုကရေစီနည်းလမ်း ကျကျနဲ့ပေါ့နော် ဖိအားပေးပြီး မဲပေးတာမျိုး မရှိရဘူး။ ကိုယ်မဲပေးချင်တဲ့လူ ပေးလို့ရတယ်။ မဲမပေးချင်တဲ့သူ မပေးရဘူး။ ဒီလိုပြည်သူတွေ လွတ်လပ်စွာ ဆန္ဒမဲပေးပိုင်ခွင့် ရှိတယ်။ ဒါပေမဲ့ အခုလိုမျိုး ဖိအားပေးတာက ဒါကလွတ်လပ်စွာ မဲပေးပိုင်ခွင့်ကို ချိုးဖောက် ရာ ကျနေတယ်ရှင့်။” ဤကဲ့သို့ လွတ်လပ်စွာ ရွေးချယ်ပိုင်ခွင့်ကို ပိတ်ပင်တားဆီးနေသည့်အပြင် စစ်ကော်မရှင်သည် ၎င်းတို့၏ ရွေးကောက်ပွဲ အောင်မြင်ရေးအတွက် ပြည်သူများအား နည်းလမ်းမျိုးစုံဖြင့် အကျပ်ကိုင်လျက်ရှိသည်။ မဲပေးပိုင်ခွင့်ကို ခြိမ်းခြောက်ခံနေရသည့် အခြေအနေနှင့် ပတ်သက်၍လည်း ဒေါ်မူစဲက “ပြည်သူတွေကနေပြီး တော့မှ အခုက ပြည်သူတွေမှာ ဆုပ်လည်း စူး စားလည်းရူး သူတို့က အမျိုးမျိုး ဒီရွေးကောက်ပွဲမှာ အတု အယောင် ရွေးကောက်ပွဲမှာ သူတို့က မဲထည့်ခိုင်းမယ်။ ဖိအားပေးတယ်။ တကယ်က ဆိုလို့ရှိရင် ဒီဟာက ပြည် သူတွေက နိုင်ငံသားတိုင်း နိုင်ငံရေး အခွင့်အရေးကို ချိုးဖောက်ခံနေရတာ ဖြစ်တယ်။ ပြည်သူတွေသည် သူတို့ မဲပေးချင်ပေးမယ်။ မပေးချင်မပေးဘူး။ ဒါပေမယ့် အခုက ခြိမ်းခြောက်တယ်။ မပေးလို့ရှိရင် ဘယ်လို ဆိုပြီး တော့ ခြိမ်းခြောက်တယ်” ဟု ပြောသည်။ ထို့အပြင် မွန်ပြည်လူ့အခွင့်အရေးဖောင်ဒေးရှင်း (HURFOM) ဒါရိုက်တာ နိုင်အဲမွန်ကလည်း ရွေးကောက်ပွဲ ကာ လနှင့် နီးကပ်လာချိန်တွင် လေကြောင်းတိုက်ခိုက်မှုနှင့် ရွာမီးရှို့မှုများ ပိုမိုများပြားလာပုံကို ယခုကဲ့သို့ ပြောသည်။ “တော်တော်များများက ရွေးကောက်ပွဲနဲ့ ဆက်စပ်ပြီးတော့ကို ချိုးဖောက်မှုတွေ ပြန်ပြီးတော့ တိုးပွားနေတာ တွေ ရှိတယ်။ Airstrike တွေက အများကြီး တိုးလာတာတွေ့ရတယ်။ နောက်တစ်ခုက ခုနကလိုမျိုး အမျိုး သမီးတွေ ကလေးတွေ နောက်တစ်ခါ ရွာတွေ မီးရှို့ခံရတာတွေပိုများလာတယ်။ အခုလိုမျိုး ရွေးကောက်ပွဲ ကာလနဲ့ နီးလာလေ ချိုးဖောက်မှုတွေက များလာလေဆိုတဲ့ အနေအထားကို ပြနေပါတယ်။” စစ်ကော်မရှင်၏ အစီအစဉ်အရ ရွေးကောက်ပွဲကို အပိုင်း ၃ ပိုင်း ခွဲ၍ ကျင်းပသွားမည်ဖြစ်ပြီး၊ ပထမပိုင်းကို လာမည့် ဒီဇင်ဘာလ ၂၈ ရက်နေ့တွင် လည်းကောင်း၊ ဒုတိယပိုင်းကို ၂၀၂၆ ခုနှစ် ဇန်နဝါရီလ ၁၁ ရက်နေ့တွင် လည်းကောင်း ကျင်းပသွားရန် သတ်မှတ်ထားသည်။ အပိုင်း ၃ ကိုမူ ဇန်နဝါရီလ ၂၅ ရက်နေ့တွင် ကျင်းပမည်ဟု ကြေညာထားသည်။ သို့သော်လည်း ဤရွေးကောက်ပွဲသည် စစ်တပ်၏ အကျိုးစီးပွားအတွက်သာဖြစ်ပြီး ပြည်သူများ စစ်ကျွန်ဘဝမှ ရုန်းထွက်၍ မရအောင် အစီအစဉ်တကျ ပြုလုပ်ခြင်းသာ ဖြစ်သည်ဟု တက်ကြွလှုပ်ရှားသူများက ရှုမြင်ကြ သည်။ ပြည်သူတို့၏ လူ့အခွင့်အရေး ဆုံးရှုံးနေရမှုများကို အဆုံးသတ်နိုင်ရန် စစ်အာဏာရှင် အမြစ်ပြတ်ရေးအတွက် အားသွန်ခွန်စိုက် လုပ်ဆောင်ကြရန် NUG ယာယီသမ္မတ ဒူဝါလရှီးက ၇၇ နှစ်မြောက် အပြည်ပြည်ဆိုင်ရာ လူ့အခွင့်အရေးနေ့တွင် တိုက်တွန်းထားသည်။ အလားတူ သြစတြေးလျ၊ ယူကေ၊ ကနေဒါနှင့် ဥရောပသမဂ္ဂ (EU) တို့ကလည်း စစ်ကော်မရှင်၏ ရွေးကောက်ပွဲ သည် အကြမ်းဖက်မှုများကို ပိုမိုဆိုးရွားစေပြီး စစ်မှန်သည့် ဖြေရှင်းနည်းနှင့် ပိုမိုဝေးကွာစေနိုင်ကြောင်း ပူးတွဲသတိပေး ထုတ်ပြန်ထားကြသည်။

ရွေးကောက်ပွဲမှာ စစ်အုပ်စုအား လူသတ်လိုင်စင် ပေးမည့် လုပ်ရပ်ဖြစ်ဟု တက်ကြွလှုပ်ရှားသူများ ထောက်ပြ

ရွေးကောက်ပွဲ ကာကွယ်သည့် ဥပဒေဖြင့် တော်လှန်ရေး အင်အားစုများအား အမှုဖွင့် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၁၇ ရက်။ ယခုလအတွင်း ကျင်းပရန်ပြင်ဆင်နေသည့် စစ်ကော်မရှင် စီစဉ်သည့် ရွေးကောက်ပွဲကို ဆန့်ကျင်ကန့်ကွက်သည့် တော်လှန် ရေး အင်အားစုများနှင့် လူငယ်များကို စစ်ကော်မရှင်က ရွေးကောက်ပွဲ ဥပဒေများ အသုံးပြု၍ အရှိန်မြှင့် ဖမ်းဆီး အရေးယူမှုများ ပြုလုပ်လာနေသည်။ အထူးသဖြင့် ကရင်နီပြည်အတွင်း ရွေးကောက်ပွဲ ဆန့်ကျင်ဆန္ဒပြမှုကြောင့် ကရင်နီပြည်လူငယ်များသမဂ္ဂ (UKSY) မှ တာဝန်ရှိသူများကို ရွေးကောက်ပွဲနှောင့်ယှက်မှု ပုဒ်မဖြင့် အမှုဖွင့်လိုက်ကြောင်း စစ်ကော်မရှင်က ဒီဇင်ဘာလ ၁၆ ရက်နေ့တွင် ထုတ်ပြန်ခဲ့သည်။ UKSY မှ တာဝန်ရှိသူများကို ဒီဇင်ဘာလ ၁၀ ရက်နေ့က လွိုင်ကော်မြို့မ ရဲစခန်းတွင် ရွေးကောက်ပွဲများကို နှောင့် ယှက်ဟန့်တား ဖျက်ဆီးခြင်းမှ ကာကွယ်ပေးရေးဥပဒေပုဒ်မ ၂၃ (က) ဖြင့် အမှုဖွင့်ခဲ့ခြင်းဖြစ်သည်။ ဤအခြေအနေနှင့်ပတ်သက်၍ UKSY သတင်းနှင့်ပြန်ကြားရေးတာဝန်ရှိသူက “ဒါက ပြည်သူလူထု ရွေးကောက် ပွဲကို ဆန့်ကျင်တဲ့သူတွေအားလုံး ဖမ်းဆီးအရေးယူမယ့် ကိစ္စမျိုးတော့ သူတို့ ထုတ်ပြန်ထားတယ်။ လက်ရှိ အနေ အထားအရတော့ ကျနော်တို့ UKSY အပေါ် အကျိုးသက်ရောက်မှုတော့မရှိဘူး။ ဒါက သူတို့ ခြိမ်းခြောက်ထား တဲ့ဟာပဲ ဖြစ်တယ်” ဟု ပြောသည်။ စစ်ကော်မရှင် ဝါဒဖြန့်သတင်းစာများ၏ ဖော်ပြချက်အရ မဲရုံမဖွင့်ရန် ဖုန်းဆက်ပြောဆိုခဲ့သည့် ကချင်လွတ်လပ် ရေး အဖွဲ့ KIO အရာရှိ ဇော်မိုင် အပါအဝင် ရန်ကုန်၊ ကရင်နီ၊ ကချင်နှင့် ရှမ်းပြည်တို့မှ တော်လှန်ရေးအဖွဲ့ဝင် ၁၂ ဦးကိုလည်း အမှုဖွင့်ထားသည်။ ၎င်းတို့အထဲတွင် မြောက်ဥက္ကလာပမြို့နယ်မှ ကိုယ်စားလှယ်လောင်းကို ခြိမ်းခြောက်ခဲ့သည်ဆိုသော ‘ကောင်းကင် ပြာ’ အမည်ရှိ Facebook အကောင့်ပိုင်ရှင်နှင့် ကျောင်းဆရာမများကို ခြိမ်းခြောက်သည်ဟု စွပ်စွဲခံရ သည့် PDF တပ်ဖွဲ့ဝင်များလည်း ပါဝင်နေသည်။ လွတ်လပ်သော မြန်မာသတင်းမီဒီယာကောင်စီ (IPCM) ဥက္ကဋ္ဌ နန်းဖော့ဂေက “စစ်အုပ်စုအနေနဲ့က သူတို့ ရွေး ကောက်ပွဲ မအောင်မြင်မှာ စိုးရိမ်တာပေါ့နော်။ အများပြည်သူကလည်း သူတို့လည်းသိပါတယ်။ သူတို့ရဲ့ ရွေး ကောက်ပွဲ မအောင်မြင်အောင် အခက်အခဲ ဟန့်တားတွေ ဖြစ်စေမယ့် အန္တရာယ်မျိုးတွေကို ရှင်းထားတဲ့အနေနဲ့ လွတ်လပ်စွာ ရေးသားထုတ်ဖော်ခွင့်ကိုပါ ခြိမ်းခြောက်တဲ့ ပုံစံမျိုးဖြစ်တာပေါ့” ဟု သုံးသပ်ပြောဆိုသည်။ မြန်မာအင်တာနက်ပရောဂျက် (MIP) ၏ အချက်အလက်များအရ ယခုနှစ် နိုဝင်ဘာလအထိ နိုင်ငံတစ်ဝန်းတွင် ရွေးကောက်ပွဲ ကာကွယ်ရေး ဥပဒေဖြင့် ဖမ်းဆီးခံရသူ ၃၂ ဦးရှိနေပြီး အခြားစစ်ဆေးဆဲနှင့် ဖမ်းဆီးခံရသူ စုစုပေါင်းမှာ အယောက် ၁၀၀ ထက်မနည်း ရှိနေပြီဖြစ်သည်။ ဇူလိုင်လကုန်ပိုင်းတွင် ပြဋ္ဌာန်းခဲ့သည့် အဆိုပါဥပဒေသည် အနည်းဆုံး ထောင်ဒဏ် ၃ နှစ်မှ အမြင့်ဆုံး သေဒဏ် အထိ ပြစ်ဒဏ်ချမှတ်နိုင် သဖြင့် ပြည်သူများအား ပြင်းထန်စွာ ခြိမ်းခြောက်သည့် ဥပဒေဖြစ်သည်ဟု တက်ကြွ လှုပ်ရှားသူများက ထောက်ပြနေကြသည်။ ဥရောပသမဂ္ဂ (EU) အပါအဝင် နိုင်ငံတကာ အဖွဲ့အစည်းများကလည်း ဒီဇင်ဘာလ ၂၈ ရက်နေ့တွင် မြို့နယ် ၁၀၂ မြို့နယ်၌ စတင်ရန်စီစဉ်နေသည့် ဤရွေးကောက်ပွဲသည် လွတ်လပ်ပြီး တရားမျှတမှုရှိမည်မဟုတ်ကြောင်း ကြေညာထားသော်လည်း စစ်ကော်မရှင်ကမူ ၎င်းတို့၏ ရွေးကောက်ပွဲ လုပ်ငန်းစဉ်ကို နှောင့်ယှက်သူမှန်သမျှအား ပြင်းထန်စွာ အရေးယူမည်ဟု ဆက်လက်ခြိမ်းခြောက်နေဆဲ ဖြစ်သည်။ ဓာတ်ပုံ - ကရင်နီပြည် လူငယ်များသမဂ္ဂ (UKSY)

ရွေးကောက်ပွဲ ကာကွယ်သည့် ဥပဒေဖြင့် တော်လှန်ရေး အင်အားစုများအား အမှုဖွင့်

« Prev 1 2 3 4 5 6 Next »

သောကြာနေ့ည ရုပ်သံသတင်း (၁၀-၁၀-၂၅)

သောကြာနေ့ည ရုပ်သံသတင်း (၁၀-၁၀-၂၅)

ဒီကနေ့ အစီအစဉ်ထဲမှာတော့ … မိုးမိတ်မှာ ဗုံးကြဲတိုက်ခိုက်ခဲ့လို့ ကလေးတွေ အပါအဝင် အရပ်သားတွေ အသက်ဆုံးရှုံးခဲ့ရပါတယ်။ မွန်နဲ့ တနင်္သာရီမှာလည်း အရပ်သားတွေ လေကြောင်းတိုက်ခိုက်မှု ခံရပါတယ်။ ဖားကန့်မှာ စစ်ကော်မရှင်က ဘာကြောင့် ညမထွက်ရ အမိန့်ထုတ်လိုက်တာပါလဲ

ထိုင်းရောက် အလုပ်သမားတွေအတွက် ပန်းရောင်ကတ် ပြုလုပ်ရမယ့် နေရာတွေက ဘယ်နေရာတွေလဲ၊ ဘယ်လိုလုပ်ရမှာလဲ။ ယူကရိန်းတိုက်ပွဲမှာ လောင်စာ အရင်းအမြစ်တွေကို ဘာလို့ အပြန်အလှန် တိုက်ခိုက်နေကြတာလဲ။ ယူကေက အိန္ဒိယ နိုင်ငံကို အပေါ့စား ဒုံးကျည်တွေ ရောင်းပေးလိုက်ပါတယ်။

ကမ္ဘာကျော် မုဒိမ်းမှုတစ်ခုမှာ အယူခံဝင်တဲ့သူကို တရားရုံးက ဘယ်လို အမိန့်ချမှတ်လိုက်သလဲ … စတာတွေတင်ဆက်ထားပါတယ်။

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

KNU ၏ ကော်သူးလေ ကောင်စီများ အရှိန်မြှင့်တင် ဆောင်ရွက်နေ
တော်လှန်ရေး အစုအဖွဲ့များအကြား သွေးကွဲမှုများ ရှောင်ကျဉ်ရန် KNDF ခေါင်းဆောင်ပြော
ထားဝယ် ဗဟိုသင်္ကြန်မဏ္ဍာပ် အနီး ဒရုန်း တိုက်ခိုက်မှုတွင် အမျိုးသမီးတစ်ဦး ဒဏ်ရာရ
စစ်အသွင်ပြောင်း သမ္မတက နိုင်ငံတော် သမ္မတအား လွတ်ငြိမ်းချမ်းသာခွင့်ပေး
အမေရိကန်က ဟော်မုဇ်ရေလက်ကြားတွင် အီရန်ကို ပိတ်ဆို့

Archives

Archives

×Close