ရွေးကောက်ပွဲ – Page 3 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Tag Archive

Tag: ရွေးကောက်ပွဲ

မန္တလေးတွင် ခြိမ်းခြောက် မဲထည့်ခိုင်းမှုများ ရှိ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၁၁ ရက်။ မန္တလေးတွင် ခြိမ်းခြောက် ဖိအားပေးမှုများကြားမှ ရွေးကောက်ပွဲ ဒုတိယပိုင်းပြုလုပ်ခဲ့ရာ မဲပေးသူနည်းပါးသဖြင့် အသံချဲ့စက်ဖြင့် လိုက်လံနှိုးဆော်နေကြသည်ဟု မြို့ခံများက ပြောသည်။ စစ်ကော်မရှင်က ကျင်းပသည့် ရွေးကောက်ပွဲ ဒုတိယပိုင်းကို ယနေ့ ဇန်နဝါရီလ ၁၁ ရက်နေ့တွင် မန္တလေးမြို့ပေါ် ရှိ မဟာအောင်မြေ၊ ပြည်ကြီးတံခွန်နှင့် အမရပူရမြို့နယ်တို့ အပါအဝင် မန္တလေးတိုင်းအတွင်းရှိ မြို့နယ် ၉ ခု၌ ပြုလုပ်ခဲ့သော်လည်း မဲပေးသူ အလွန်နည်းပါးနေကြောင်း မြို့ခံများနှင့် မဲရုံစောင့်ကြည့်သူများက ပြောသည်။ မန္တလေးတိုင်း ဝန်ကြီးချုပ်က တပ်နှင့် ရဲတပ်ဖွဲ့ဝင်များကို အသုံးပြုကာ လုံခြုံရေးအပြည့်ယူထားသည်ဟု ဆိုသော် လည်း မြေပြင်တွင်မူ မဲပေးသူ နည်းပါးလှသဖြင့် ရပ်ကွက်အုပ်ချုပ်ရေးမှူးများနှင့် ပျူစောထီးအဖွဲ့ဝင်များက ကားများ၊ အသံချဲ့စက်များဖြင့် ရပ်ကွက်အတွင်း လှည့်လည်ကာ ‘မဲမပေးရသေးသူများ မဲလာပေးကြရန်’ တိုက်တွန်း နှိုးဆော်မှုများ ရှိခဲ့သည်ဟု ဆိုသည်။ မဟာအောင်မြေမြို့နယ်တွင်မူ မဲမပေးလျှင် စစ်မှုထမ်းစာရင်းထဲ ထည့်မည်ဟု ခြိမ်းခြောက်မှုများရှိနေကြောင်း ဒေသခံတစ်ဦးဖြစ်သူ ဦးမောင်မောင် (အမည်လွှဲ) က ယခုကဲ့သို့ ပြောသည်။ “ဒေသခံတွေအနေနဲ့ မဲပေးဖို့ စိတ်ဝင်စားမှု မရှိပေမဲ့လည်း ဖိအားတွေ၊ ခြိမ်းခြောက်မှုတွေကြောင့် မဲပေးကြရတဲ့ သူတွေ ရှိတယ်။ မဟာအောင်မြေမှာဆိုရင် အသက်ပြည့်ပြီးသူတိုင်း မဲမထည့်ရင် စစ်မှုထမ်းခေါ်မယ်ဆိုပြီး အုပ်ချုပ်ရေးမှူးတွေက လိုက်ခြိမ်းခြောက်နေတာ။” ယနေ့နံနက်ပိုင်း လူအစည်ကားဆုံးအချိန်ဟု ဆိုနိုင်သည့် မနက် ၆ နာရီမှ ၈ နာရီအတွင်း၌ပင် မဲရုံအများစုတွင် လူ ၅၀ မှ ၁၀၀ ဝန်းကျင်သာ တန်းစီစောင့်ဆိုင်းနေသည်ကို တွေ့ရပြီး မွန်းလွဲပိုင်းတွင်မူ လူ ၂၀ ခန့်သာ ရှိတော့သည် အထိ ကျဲပါးသွားခဲ့သည်။ မန္တလေးမြို့ပေါ်ရှိ မဲရုံအချို့ကို လှည့်ပတ်ကြည့်ရှုခဲ့သူတစ်ဦးက “မနက်ပိုင်း မဲရုံဖွင့်စမှာတောင် လူ ၁၀၀ လောက် တန်းစီနေတဲ့ မဲရုံက အတော်လေး နည်းပါတယ်။ မွန်းလွဲ ၁၂ နာရီ နောက်ပိုင်းမှာတော့ အချိန်စောင့်စရာတောင် မလိုဘဲ မဲပေးလို့ရတဲ့အထိ လူမရှိတော့တာ” ဟု ပြောသည်။ စစ်ကော်မရှင်သည် မဲရုံများတွင် လူစည်ကားဟန်ပြနိုင်ရန် မဟာအောင်မြေ ကျောက်ဝိုင်းကိုပင် ဖွင့်လှစ်ထားရန် ညွှန်ကြားခဲ့ပြီး မဲပေးပြီးအပြန်တွင် အချိုရည်၊ မုန့်နှင့် ရေသန့်ဘူးများ ပေးဝေကာ စည်းရုံးမှုများ ပြုလုပ်ခဲ့သည်။ သို့သော်လည်း လမ်းဘေးဈေးသည်များကိုမူ ရွေးကောက်ပွဲကာလအတွင်း ဈေးရောင်းချခွင့် ပိတ်ပင်ထားခဲ့သည်။ မန္တလေးတိုင်းအတွင်းရှိ စဉ့်ကိုင်၊ ကျောက်ပန်းတောင်း၊ သာစည်၊ ဝမ်းတွင်း၊ တံတားဦးနှင့် မတ္တရာမြို့နယ်တို့ တွင်လည်း ရွေးကောက်ပွဲ ကျင်းပခဲ့သော်လည်း မတ္တရာမြို့နယ်ကဲ့သို့ တိုက်ပွဲများကြောင့် ပြည်သူများ စစ်ဘေးရှောင်နေရသည့် ဒေသများတွင်လည်း အယောင်ပြကျင်းပမှုများသာ ရှိခဲ့သည်ဟု စောင့်ကြည့်နေသူ အချို့က ဆိုသည်။ စစ်ကော်မရှင်၏ ရွေးကောက်ပွဲ တတိယပိုင်းကို လာမည့် ဇန်နဝါရီ ၂၅ ရက်တွင် ဆက်လက်ပြုလုပ်မည် ဖြစ်ပြီး ယင်းအကြိမ်တွင် တိုက်ပွဲများ ပြင်းထန်နေသည့် သပိတ်ကျင်းမြို့နယ် အပါအဝင် မန္တလေးမှ ကျန်ရှိသည့် ၈ မြို့နယ် ပါဝင်မည်ဖြစ်ကြောင်း စစ်ကော်မရှင်က ထုတ်ပြန်ထားသည်။ ဓါတ်ပုံ - MOI

မန္တလေးတွင် ခြိမ်းခြောက် မဲထည့်ခိုင်းမှုများ ရှိ

ရန်ကုန်တွင် မဲပေးသူနည်း၊ မဲမပေးက စစ်မှု ထမ်းရမည်ဟု ခြိမ်းခြောက် သတင်းနှင့် မီဒီယာ ကွန်ရက်။ ၂၀၂၆ ခုနှစ် ဇန္နဝါရီလ ၁၁ ရက်။ ရန်ကုန်တွင် မဲပေးသူနည်းပါးခဲ့ပြီး မဲမပေးလျှင် စစ်မှုထမ်းခိုင်းမည်ဟု ခြိမ်းခြောက်၍ အတင်းအကျပ် မဲထည့်ခိုင်းနေသည်ဟု မြို့ခံများက ပြောသည်။ စစ်ကော်မရှင်၏ ရွေးကောက်ပွဲ ဒုတိယပိုင်းကို ရန်ကုန်မြို့ရှိ မြို့နယ် ၁၆ ခုတွင် ယနေ့ ဇန်နဝါရီလ ၁၁ ရက်နေ့၌ ကျင်းပရာတွင် စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင် ကိုယ်တိုင် မဲရုံများ လိုက်ကြည့်သော်လည်း မဲပေးသူ အလွန်နည်းပါးနေခဲ့သည်ဟု ဆိုသည်။ တပ်မတော် ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင် ကိုယ်တိုင် မဲရုံများသို့ လာရောက် ကြည့်ရှုချိန်၌ လုံခြုံရေး အထပ်ထပ် တင်းကျပ်ထားသလို ပြည်သူများကိုလည်း အမျိုးမျိုးသော ဖိအားပေး ခြိမ်းခြောက်မှုများဖြင့် မဲရုံသို့ အတင်းအကျပ် ခေါ်ဆောင်နေကြောင်းဆိုသည်။ ရန်ကုန်မြို့လယ်ရှိ လသာမြို့နယ်က အခြေအနေနှင့် ပတ်သက်၍ “မဲပေးဖို့ လုံးဝစိတ်မဝင်စားဘူး။ ဒါပေမဲ့ မဲမပေးရင် မှတ်ပုံတင်လုပ်ပေးမှာ မဟုတ်ဘူး၊ ပြည်ပထွက်ခွင့် ပိတ်ပင်မယ်ဆိုတဲ့ နိုင်ငံသားအခွင့်အရေးတွေနဲ့ ခြိမ်းခြောက်နေတော့ မတတ်သာလို့ သွားပေးရတာ” ဟု လှိုင်မြို့နယ်မှ လူငယ်တစ်ဦးက ပြောသည်။ ယနေ့ ကျင်းပသည့် ရွေးကောက်ပွဲတွင် ရန်ကုန်တိုင်းအတွင်းရှိ လသာ၊ ပန်းဘဲတန်း၊ လှိုင်၊ အင်းစိန်၊ ဗဟန်း၊ ပုဇွန်တောင်၊ ဒဂုံမြို့သစ် အပါအဝင် မြို့နယ် ၁၆ ခု ပါဝင်ပြီး ဗိုလ်ချုပ်မှူးကြီး မင်းအောင်လှိုင် ကိုယ်တိုင် လသာ၊ လှိုင်နှင့် အင်းစိန်မြို့နယ်ရှိ မဲရုံအချို့သို့ လာရောက်စစ်ဆေးခဲ့သည်။ စစ်ခေါင်းဆောင် လာရောက်မည့် လမ်းကြောင်း တစ်လျှောက်နှင့် မဲရုံများတွင် ပထမပိုင်းထက် ပိုမိုတင်းကျပ် သည့် လုံခြုံရေးများ ချထားကြောင်း မြို့ခံများက ဆိုသည်။ မဲပေးသူနည်းပါးလှသဖြင့် ရပ်ကွက်အုပ်ချုပ်ရေးအဖွဲ့များက အသံချဲ့စက်ဖြင့် လိုက်လံနှိုးဆော်နေရသလို၊ မဲမပေး ပါက ဈေးသည်များကို ဈေးရောင်းခွင့်ပိတ်မည်ဟု ခြိမ်းခြောက်ခြင်း၊ လူငယ်များကို စစ်မှုထမ်းစာရင်းထဲ ထည့်မည်ဟု ကြောက်လန့်အောင် ပြောဆိုခြင်းများ ပြုလုပ်နေသည်။ အင်းစိန်က အခြေအနေနှင့် ပတ်သက်၍လည်း “အင်းစိန်ဘက်မှာတော့ မဲရုံရှေ့တင် မဟုတ်ဘူး၊ လမ်းထိပ်တွေ မှာပါ စစ်သားတွေရော ရဲတွေရော အပြည့်ပဲ။ အုပ်ချုပ်ရေးပိုင်းကလည်း မဲမပေးရင် အိမ်ထောင်စုစာရင်းထဲက စစ်မှုထမ်းရမယ့် လူစာရင်းကို အရင်ဆွဲထုတ်မယ်ဆိုပြီး လာပြောတော့ အိမ်ကလူငယ်တွေအတွက် စိုးရိမ်ပြီး သွားပေးခဲ့ရတာပါ။ မဲရုံထဲရောက်တော့လည်း ဘယ်ပါတီကို ပေးပေးဆိုတဲ့ ပုံစံမျိုးနဲ့ လုပ်ကြတာ” ဟု ပြော သည်။ ရန်ကုန်မြို့လယ်က မဲရုံများတွင်လည်း မဲပေးသူမရှိသဖြင့် မဲရုံဝန်ထမ်းများသာ ငူငူငိုင်ငိုင် ထိုင်နေရကြောင်း ပြောသည်။ ပုဇွန်တောင်မြို့နယ်တွင်မူ မဲလာပေးသူအချို့မှာ မဲစာရင်းနံပါတ် မသိရှိခြင်းကြောင့် မဲပေးခွင့်မရဘဲ ပြန်လွှတ် ခံရသည့် ဖြစ်စဉ်များလည်း ရှိနေသည်။ မဲပေးခဲ့သူ ပြည်သူအချို့ကို မေးမြန်းရာတွင် စစ်ကော်မရှင်၏ ဖိအားပေး ခြိမ်းခြောက်မှုများကြောင့်သာ ကြောက်လန့်ပြီး မဲလာပေးခဲ့ရခြင်း ဖြစ်ကြောင်း ပြောဆိုကြသည်။ ရပ်ကွက်ဥက္ကဋ္ဌများက အသံချဲ့စက်ဖြင့် မဲလာပေးရန် အော်ဟစ်နေသော်လည်း မွန်းလွဲပိုင်းတွင် မဲရုံများမှာ လူသူကင်းမဲ့နေသည်ကို တွေ့ရသည်ဟု ဆိုကြသည်။ စစ်ကော်မရှင်သည် ရွေးကောက်ပွဲ ဒုတိယပိုင်းအဖြစ် တစ်နိုင်ငံလုံးရှိ မြို့နယ်ပေါင်း ၁၀၀ တွင် ရွေးကောက်ပွဲ ကျင်းပနေခြင်းဖြစ်ပြီး၊ တတိယပိုင်းကို ဇန်နဝါရီ ၂၅ ရက်တွင် ကျန်ရှိသည့် မြို့နယ် ၆၃ ခု၌ ဆက်လက်ကျင်းပရန် စီစဉ်ထားသည်။ သို့သော်လည်း အမျိုးသားညီညွတ်ရေးအစိုးရ (NUG) နှင့် တော်လှန်ရေးအင်အားစုများကမူ ဤရွေးကောက်ပွဲကို အတုအယောင်အဖြစ် သတ်မှတ်ထားသလို၊ ကုလသမဂ္ဂအပါအဝင် နိုင်ငံတကာကလည်း တရားမျှတမှုမရှိသည့် ရွေးကောက်ပွဲအဖြစ် ကန့်ကွက်ထားကြသည်။   ဓါတ်ပုံ - MOI

ရန်ကုန်တွင် မဲပေးသူနည်း၊ မဲမပေးက စစ်မှု ထမ်းရမည်ဟု ခြိမ်းခြောက်

ရွေးကောက်ပွဲ နှောက်ယှက်သည်ဆိုကာ လူ ၃၃၀ ကျော် ဖမ်းဆီးထား သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၈ ရက်။ ရွေးကောက်ပွဲကို ဆန့်ကျင်နှောင့်ယှက်သည်ဟု ဆိုကာ ဇန်နဝါရီလ ၅ ရက်နေ့အထိ ပြည်သူ ၃၃၅ ဦးကို ဖမ်းဆီးအရေးယူထားကြောင်း စစ်ကော်မရှင်၏ ရွေးကောက်ပွဲကာလ လုံခြုံရေးဆိုင်ရာ ကြီးကြပ်မှု ဗဟိုကော်မတီက ထုတ်ပြန်လိုက်သည်။ ဖမ်းဆီးခံရသူများတွင် အမျိုးသမီး ၆၀ ဦးအထိ ပါဝင်နေပြီး ၎င်းတို့ကို သေဒဏ်အထိ ချမှတ်နိုင်သည့် ပြင်းထန် သော ဥပဒေများဖြင့် အမှုဖွင့်ထားခြင်း ဖြစ်သည်။ အဆိုပါ ဖမ်းဆီးမှုများနှင့် ပတ်သက်၍ လုံခြုံရေးအရ အမည်မဖော်လိုသည့် ရန်ကုန်မြို့ခံတစ်ဦးက အခြေအနေကို ယခုကဲ့သို့ ပြောသည်။ “အခုက အွန်လိုင်းမှာ တစ်ခုခုရေးတာနဲ့တင် အဖမ်းခံနေရတာ။ ရွေးကောက်ပွဲကို မကြိုက်လို့ ဆန့်ကျင်တာက ပြည်သူ့အခွင့်အရေးပဲလေ။ ဒါကို သေဒဏ်အထိပေးနိုင်တဲ့ ဥပဒေတွေနဲ့ ခြိမ်းခြောက်ပြီး အတင်းမဲပေးခိုင်းဖို့ လုပ်နေတာကတော့ တရားမျှတမှု လုံးဝမရှိတဲ့ လုပ်ရပ်ပဲ။” စစ်ကော်မရှင်၏ ပြည်ထဲရေးဝန်ကြီး ဒုတိယဗိုလ်ချုပ်ကြီး ထွန်းထွန်းနောင်က ဇန်နဝါရီလ ၆ ရက်နေ့ အစည်း အဝေးတွင် ၂၀၂၅ ခုနှစ်၊ ဇူလိုင်လတွင် ပြဋ္ဌာန်းခဲ့သည့် ‘ပါတီစုံဒီမိုကရေစီ အထွေထွေ ရွေးကောက်ပွဲများကို နှောင့်ယှက်ဟန့်တားဖျက်ဆီးခြင်းမှ ကာကွယ်ပေးရေးဥပဒေ’ ဖြင့် အမှုပေါင်း ၂၄၀ ဖွင့်လှစ်ခဲ့သည်ဟု ပြောသည်။ မြန်မာအမျိုးသမီး သမဂ္ဂ BWU ၏ မူဝါဒရေးရာ ဦးဆောင်အဖွဲ့ဝင် တင်တင်ညိုက “အခုလိုမျိုး အွန်ုလိုင်းခေတ် မှာ ရွေးကောက်ပွဲနဲ့ ပတ်သက်တာကို reaction ပေးတာတောင် မရတဲ့ခေတ် ဖြစ်နေတယ်။ ရွေးကောက် ပွဲ ကာကွယ်ပေးတဲ့ ဥပဒေဆိုတာက ခိုင်ခိုင်မာမာနဲ့ကို ထုတ်ပြန်ပေးခဲ့တာ။ ရွေးကောက်ပွဲကို ဘယ်လိုနည်းနဲ့ပဲ ဆန့်ကျင် ဆန့်ကျင် ဖမ်းမယ်။ ထောင်ချမယ်ဆိုတဲ့ဟာမျိုး အကြီးလေးဆုံး အပြစ်တွေလည်း ပေးလို့ရတယ်။ သေဒဏ်လည်း ပေးလို့တယ်။ တရားစီရင်ရေး စနစ်ကလည်း စစ်တပ်အောက်မှာပဲ ရှိနေတာ” ဟု ပြောသည်။ ဖမ်းဆီးခံရသူများသည် လူမှုကွန်ရက်စာမျက်နှာပေါ်တွင် ရွေးကောက်ပွဲ ဆန့်ကျင်ရေး ရေးသားခြင်း၊ စည်းရုံးလှုံ့ဆော်ခြင်းနှင့် ရွေးကောက်ပွဲဆိုင်ရာ ဆိုင်းဘုတ်များကို ဖျက်ဆီးခြင်းတို့ကြောင့် ဖြစ်သည်ဟု ဆိုသည်။ ဧရာဝတီသတင်းဌာန အမှုဆောင်အယ်ဒီတာ ဦးရဲနည်က “ကန့်ကွက်ပိုင်ခွင့် ဝေဖန်ပိုင်ခွင့် မရှိဘူး ဆိုကတည်းက အဲ့ဒါ ခြိမ်းခြောက်တာပေါ့။ ခြိမ်းခြောက်ရုံတင် မကဘူး။ အဲ့လိုမျိုး ကန့်ကွက်တဲ့ ဝေဖန်တဲ့ လူတွေပါ ထောင်ချ ဖမ်းဆီးမယ် ဆိုတဲ့ဟာက ဖိနှိပ်တာပေါ့။ ဆိုတော့ ဒီဟာက ကာကွယ်ရေး ဥပဒေလို့သာ ပြောပေမယ့် ဥပဒေ မဟုတ်ဘဲနဲ့ အဲ့လိုမျိုး ဖိနှိပ်ရေးယန္တရား တစ်ခုပဲ ဖြစ်တယ်လို့ပဲ ပြောရမှာပေါ့” ဟု ပြောသည်။ စစ်ကော်မရှင်သည် ဒီဇင်ဘာလ ၂၈ ရက်က ရွေးကောက်ပွဲ အပိုင်း (၁) ကို ကျင်းပခဲ့ပြီးဖြစ်ကာ ကျန်ရှိနေသည့် အပိုင်း (၂) နှင့် (၃) ကို လာမည့် ဇန်နဝါရီ ၁၁ ရက်နှင့် ၂၅ ရက်တို့တွင် ဆက်လက်လုပ်ဆောင်ရန် ပြင်ဆင်နေ သည်။ သို့သော်လည်း အမျိုးသားညီညွတ်ရေးအစိုးရ (NUG) အပါအဝင် တော်လှန်ရေးအင်အားစုများကမူ ဤရွေး ကောက်ပွဲကို ‘အတုအယောင်’ အဖြစ် သတ်မှတ်ထားပြီး အသိအမှတ်မပြုကြောင်းနှင့် နည်းမျိုးစုံဖြင့် ဆက်လက် ဆန့်ကျင်သွားမည်ဖြစ်ကြောင်း အတိအလင်း ကြေညာထားသည်။ နိုင်ငံရေးလေ့လာသူများကမူ စစ်ကော်မရှင်သည် ရွေးကောက်ပွဲကို လူထုထောက်ခံမှုရရှိရန်ထက် ၎င်းတို့၏ အာဏာတည်မြဲရေးအတွက် တရားဝင်မှုရှာဖွေသည့် နည်းလမ်းတစ်ခုအဖြစ်သာ အသုံးချနေခြင်းဖြစ်ပြီး၊ ပြည်သူများကို အကြောက်တရားဖြင့် ဖိနှိပ်ဖမ်းဆီးနေခြင်းမှာ ရွေးကောက်ပွဲ၏ ဂုဏ်သိက္ခာကို ပိုမိုပျက်ပြား စေကြောင်း သုံးသပ်နေကြသည်။

ရွေးကောက်ပွဲ နှောက်ယှက်သည်ဆိုကာ လူ ၃၃၀ ကျော် ဖမ်းဆီးထား

ပြည်ထောင်စု ရွေး/ကော် ယာဉ်တန်း တိုက်ခံရ၊ ရဲမှူး အပါအဝင် ၈ ဦးသေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၇ ရက်။ မကွေးတိုင်းဒေသကြီးအတွင်း ပြည်ထောင်စု ရွေးကောက်ပွဲ ကော်မရှင် ယာဉ်တန်း ကြားဖြတ်တိုက်ခံရပြီး မြို့နယ်ရဲမှူး အပါအဝင် ၈ ဦး သေဆုံးသွားသည်ဟု နေပြည်တော် ပြည်သူ့ ကာကွယ်ရေး တပ်ဖွဲ့က ထုတ်ပြန်သည်။ ဇန်နဝါရီလ ၆ ရက် နေ့လယ်ပိုင်းတွင် နေပြည်တော်မှ မကွေးတိုင်းသို့ ရွေးကောက်ပွဲအပိုင်း (၂) ကျင်းပနိုင်ရေးနှင့် ကြိုတင်မဲကိစ္စများ ဆွေးနွေးရန်လာသည့် ကား ၄ စီးပါ ယာဉ်တန်းကို မြို့သစ်-ကန်ပြားလမ်းပိုင်း၊ ရွှေပန်းကျေးရွာ အနီးတွင် တော်လှန်ရေးပူးပေါင်းတပ်ဖွဲ့များက ပြောက်ကျားစနစ်ဖြင့် ကြားဖြတ်တိုက်ခိုက်ခဲ့ခြင်း ဖြစ်သည်။ အဆိုပါတိုက်ခိုက်မှုကြောင့် ယာဉ်တန်းတွင်ပါဝင်သည့် ကား ၃ စီးမှာ လမ်းဘေးသို့ တိမ်းမှောက်ပျက်စီးခဲ့ပြီး မြို့သစ်မြို့နယ်ရဲမှူး ထွန်းလင်းအောင်၊ မြို့နယ်စခန်းမှူးနှင့် ကော်မရှင်အဖွဲ့ဝင် ဦးအောင်လွင်ဦး၏ ကိုယ်ရေးအရာရှိ အပါအဝင် ယာဉ်တန်းလုံခြုံရေးလိုက်ပါလာသူ ၈ ဦး သေဆုံးခဲ့သည်။ ဖြစ်စဉ်နှင့်ပတ်သက်၍ မြေပြင်သတင်းရင်းမြစ်တစ်ဦးက “ကား ၄ စီး လာတာမှာ ၃ စီးကတော့ မှောက်သွားပြီး တစင်းပဲ လွတ်သွားတယ်။ ပစ်ခတ်မှုက တော်တော်ပြင်းထန်တယ်။ ရဲမှူးရော၊ စခန်းမှူးရော နေရာမှာတင် ဆုံး သွားတာ။ တိုက်ပွဲပြီးတော့ G3 သေနတ် ၂ လက်နဲ့ ကျည်ဆံတွေပါ သိမ်းဆည်းရမိတယ်လို့ သိရတယ်” ဟု ပြော သည်။ ယာဉ်တန်းပေါ်တွင် လိုက်ပါလာသည့် မကွေးတိုင်းတာဝန်ခံ ပြည်ထောင်စု ရွေးကောက်ပွဲ ကော်မရှင် UEC အဖွဲ့ဝင် ဦးအောင်လွင်ဦးမှာမူ ထိခိုက်ဒဏ်ရာ ရရှိမှု မရှိဘဲ စစ်တပ်အကူအညီဖြင့် နေပြည်တော်သို့ ချက်ချင်းပြန်လည် ထွက်ခွာသွားခဲ့ကြောင်း ဒေသတွင်း သတင်းရင်းမြစ်များက ဆိုသည်။ နေပြည်တော်ပြည်သူ့ကာကွယ်ရေးတပ်ဖွဲ့၊ ဗျူဟာအမှတ် (၁၇) ကမူ စစ်ကော်မရှင်၏ အတုအယောင် ရွေးကောက်ပွဲကို နေရာပေါင်းစုံမှ ဟန့်တားသွားမည်ဟု ကြေညာထားသည်။ မြို့သစ်ဒေသခံတစ်ဦးကလည်း “ဒီလမ်းပိုင်းမှာ အခုလို အကြီးအကဲတွေပါတဲ့ ယာဉ်တန်း တိုက်ခိုက်ခံရတာ ကြောင့် စစ်တပ်ဘက်က လမ်းပိုင်းလုံခြုံရေးတွေ ပိုတင်းကြပ်လာနိုင်တယ်။ အစည်းအဝေးပျက်သွားလို့ ဦးအောင်လွင်ဦးလည်း ကြောက်ကြောက်လန့်လန့်နဲ့ ပြန်ပြေးသွားရတယ်လို့ ကြားတယ်” ဟု ပြောသည်။ ယခုတိုက်ခိုက်မှုနှင့် ပတ်သက်၍ စစ်ကော်မရှင် ဘက်ကမူ တစ်စုံတစ်ရာ ထုတ်ပြန်ပြောဆိုခြင်း မရှိသေးပေ။ ဦးအောင်လွင်ဦးသည် ပြီးခဲ့သည့် ဒီဇင်ဘာ ၃၁ ရက်ကလည်း မကွေးတိုင်းအစိုးရအဖွဲ့ရုံး၌ ရွေးကောက်ပွဲ ကျင်းပ ရေး အစည်းအဝေးသို့ တက်ရောက်ခဲ့သူ ဖြစ်သည်။

ပြည်ထောင်စု ရွေး/ကော် ယာဉ်တန်း တိုက်ခံရ၊ ရဲမှူး အပါအဝင် ၈ ဦးသေဆုံး

ကချင်တွင် မဲစာရင်းမှားယွင်းမှုနှင့် တင်းမာမှုများကြောင့် မဲပေးသူ နည်းပါး သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၂၈ ရက်။ စစ်ရေးတင်းမာမှုကြား ကချင်တွင် ဟန်ပြမဲရုံများဖွင့်ထားပြီး မဲစာရင်းမှားယွင်းမှုနှင့် ခြိမ်းခြောက်မှုများကြောင့် ပြည်သူများစိုးရိမ်နေကြသည်။ ကချင်ပြည် အတွင်းရှိ မြို့နယ်အချို့ကို ကချင်လွတ်လပ်ရေး တပ်မတော် (KIA) နှင့် ပူးပေါင်းတပ်ဖွဲ့များက ထိန်းချုပ်ထားချိန်တွင် စစ်ကော်မရှင်သည် မြစ်ကြီးနားနှင့် ပူတာအိုကဲ့သို့သော မြို့ပေါ်ရပ်ကွက်အချို့၌သာ ရွေးကောက်ပွဲကို အတင်းအကျပ် ကျင်းပနေသည်ဟု မြို့ခံများက ပြောသည်။ သို့သော် မဲစာရင်းမှားယွင်းမှုများနှင့် စစ်ရေးတင်းမာမှုများကြောင့် မဲရုံများတွင် လူသူကင်းမဲ့ နေကြောင်း မြို့ခံများက ပြောသည်။ ယနေ့ (ဒီဇင်ဘာ ၂၈ ရက်) ကျင်းပသည့် ရွေးကောက်ပွဲအပိုင်း (၁) တွင် ကချင်ပြည်နယ်မှ မြစ်ကြီးနား၊ တနိုင်း၊ ခေါင်လန်ဖူး၊ နောင်မွန်၊ ပူတာအိုနှင့် မိုးညှင်းမြို့နယ်တို့ ပါဝင်သည်။ သို့သော် ရွေးကောက်ပွဲမတိုင်မီ တစ်ရက်အလိုအထိ ဒေသခံအများစုမှာ သတင်းအချက်အလက် ရရှိမှုအားနည်း နေပြီး ပါဝင်ယှဉ်ပြိုင်မည့် ကိုယ်စားလှယ်များကိုပင် မသိရှိကြကြောင်း မြစ်ကြီးနားမြို့ခံများက ဆိုသည်။ မြစ်ကြီးနားမြို့၊ မြို့သစ်ကြီးရပ်ကွက်နေ ပြည်သူတစ်ဦးက “မနက်ဖြန်လုပ်မှန်းတောင် မသိဘူး။ ရပ်ကွက်၊ အိမ်မှာလည်း ဘယ်သူမှ ဘာမှ လာမပြောကြဘူး။ ဘယ်မှာ သွားထည့်ရမှန်းလည်း မသိဘူး" ဟု မြေပြင် အခြေအနေကို ပြောသည်။ ထို့အပြင် မဲစာရင်းများတွင် နာမည်စာရင်းမပါဝင်သူများ ရှိနေသည့်အပြင် သေဆုံးပြီးသူများ၏ နာမည်များ ပါဝင်နေခြင်းကြောင့် မဲစာရင်းသွားရောက်ကြည့်ရှုသူများအကြား ဝေဖန်မှုများ ထွက်ပေါ်နေသည်။ အလားတူ ပူတာအိုမြို့နယ်တွင်လည်း အုပ်ချုပ်ရေးအဖွဲ့များက အိမ်ထောင်စုစာရင်းများ လိုက်လံကောက်ယူကာ ဓာတ်ပုံရိုက်ယူမှုများ ပြုလုပ်ခဲ့သဖြင့် ဒေသခံများမှာ ဖမ်းဆီးခံရမည်ကို စိုးရိမ်နေကြသည်။ ပူတာအိုဒေသခံတစ်ဦးက “ဒီအိမ်ထောင်စုစာရင်းက စစ်တပ်ကလူတွေဆီမှာ ရှိတယ်။ ဆိုတော့ မဲသွားမထည့်ရင် သိမှာစိုးရိမ်တယ်။ အဲ့ဒါကြောက်တယ်လေနော်။ စိုးရိမ်လို့ မဲထည့်တဲ့ဘက်ပဲ ဖြစ်မှာ” ဟု ပြောသည်။ စစ်ကော်မရှင်သည် မြစ်ကြီးနားမြို့ပေါ်ရှိ သီတာ၊ မင်းရပ်နှင့် အောင်နန်းရိပ်သာရပ်ကွက်များတွင် မဲရုံများ ပြင်ဆင်ကာ ပြည်နယ်ဝန်ကြီးချုပ် ဦးခက်ထိန်နန်နှင့် တိုင်းမှူး ဗိုလ်ချုပ်အောင်ဇော်ထွေးတို့က ကွင်းဆင်းစစ်ဆေး မှုများ ပြုလုပ်ခဲ့သော်လည်း၊ ဖားကန့်၊ ဝိုင်းမော်နှင့် ကျန်မြို့နယ်အများစုတွင်မူ ရွေးကောက်ပွဲ လုံးဝကျင်းပနိုင်ခြင်း မရှိပေ။ ယနေ့တွင်ပင် ဖားကန့်မြို့၌ ပေါက်ကွဲမှုဖြစ်ပွားကာ ဒေသခံတစ်ဦး သေဆုံးခဲ့သဖြင့် လုံခြုံရေးအခြေအနေမှာ ပိုမိုစိုးရိမ်စရာ ဖြစ်နေသည်။ ကချင်သတင်းဌာန (KNG) ၏ အယ်ဒီတာချုပ် ကိုဆမ်နော်ကလည်း ယခုရွေးကောက်ပွဲသည် ယခင်ရွေးကောက်ပွဲများနှင့် လုံးဝမတူဘဲ ပြည်သူများ သိရှိမှုပင် မရှိကြောင်း သုံးသပ်သည်။ “ဒီနေ့မှာ မဲမထည့်ကြဘူး။ မဲရုံတွေက တော်တော်လေး ခြောက်ကပ်နေတယ်။ သတ်မှတ်ထားတဲ့ မြို့နယ်တွေဆိုတာထက် မြို့ပေါ်တွေမှာပဲ လုပ်နေတယ်ဆိုတဲ့ သတင်းမျိုး ရရှိထားတယ်” ဟု ၎င်းက ပြောသည်။ ထို့အပြင် ယခုရွေးကောက်ပွဲအပြီးတွင်လည်း စစ်တပ်နှင့် မဟာမိတ်ဖြစ်သည့် USDP ကဲ့သို့သော ပါတီများသာ အစိုးရဖြစ်လာမည်ဟု ပြည်သူများက ကြိုတင်မှတ်ချက်ပြုထားကြကြောင်းလည်း ကိုဆမ်နော်က ဆက်လက် ပြောဆိုသည်။ လက်ရှိတွင် တနိုင်းမြို့နယ်နှင့် မြစ်ကြီးနား-မြစ်ဆုံလမ်းပေါ်ရှိ အောင်မြင်သာကျေးရွာတို့တွင်လည်း စစ်ကော် မရှင်တပ်များက မဲရုံများ၌ လုံခြုံရေးယူထားသော်လည်း အနီးတစ်ဝိုက်တွင် စစ်ကြောင်းထိုးမှုများရှိနေသဖြင့် စစ်ရေးတင်းမာနေသည်။ ကချင်လွတ်လပ်ရေးတပ်မတော် (KIA) ဘက်ကလည်း ယခုရွေးကောက်ပွဲသည် တရားမဝင်ကြောင်း ကြိုတင် သတိပေးထားသဖြင့် ကချင်ပြည်အတွင်းရှိ စစ်ကော်မရှင်၏ ရွေးကောက်ပွဲမှာ မြေပြင်တွင် နယ်မြေစိုးမိုးမှု ကင်းမဲ့နေပြီး ကျရှုံးနေသည့် အခြေအနေသာ ဖြစ်ကြောင်း နိုင်ငံရေးလေ့လာသူများက သုံးသပ်ကြသည်။ ဓါတ်ပုံ - MOI

ကချင်တွင် မဲစာရင်းမှားယွင်းမှုနှင့် တင်းမာမှုများကြောင့် မဲပေးသူ နည်းပါး

ပုသိမ်၌ မဲပေးသူ နည်းပါး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၂၈ ရက်။ စစ်ကော်မရှင်က ကြီးမှူးကျင်းပသည့် အထွေထွေ ရွေးကောက်ပွဲတွင် ဧရာဝတီတိုင်း၊ ပုသိမ်မြို့၌ အုပ်ချုပ်ရေး အဖွဲ့များက ပြည်သူများကို နည်းမျိုးစုံဖြင့် ဖိအားပေး ခြိမ်းခြောက်နေသော်လည်း မဲရုံသို့ လာရောက်သူ အလွန် နည်းပါးနေကြောင်း ဒေသခံများနှင့် မဲရုံဝန်ထမ်းများက ပြောသည်။ ပုသိမ်မြို့တွင် ယနေ့ပြုလုပ်သည့် ရွေးကောက်ပွဲ၌ အုပ်ချုပ်ရေးမှူးများနှင့် ရာအိမ်မှူးများက အသက် ၁၈ နှစ် ပြည့်ပြီးသူတိုင်း မှတ်ပုံတင်ရှိရှိမရှိရှိ မဲလာပေးရန်၊ မလာပါက ဒဏ်ငွေ ကျပ် ၂၀,၀၀၀ ရိုက်မည်ဖြစ်ကြောင်းနှင့် အိမ်ပေါ်အထိတက်၍ ပေါ်တာဆွဲ စစ်မှုထမ်းခိုင်းမည်ဟု လိုက်လံခြိမ်းခြောက်ခဲ့ကြောင်း မြို့ခံများက ဆိုသည်။ အသက် ၃၀ ကျော်အရွယ် အမျိုးသမီးတစ်ဦးက “ပုသိမ်ဇာတိဖြစ်ပြီး မဲရုံသွားပြီး မဲမပေးရင် အိမ်ပေါ်အထိ တက်ပြီး ပေါ်တာဆွဲမယ်လို့ ခြိမ်းခြောက်တာမျိုးတွေ ရှိပါတယ်။ ဒါကြောင့် ကြောက်လို့ သွားရတဲ့သူတွေလည်း ရှိတယ်” ဟု ပြောသည်။ သို့သော် ယနေ့မြေပြင်အခြေအနေတွင် မဲရုံအများစု၌ မဲပေးသူ အလွန်နည်းပါးနေပြီး နံနက်ပိုင်းတွင်သာ လူ ၃၀ မှ ၅၀ ခန့်အထိ ရှိခဲ့သော်လည်း နံနက် ၁၁ နာရီနောက်ပိုင်းတွင် မဲရုံတစ်ရုံလျှင် ၅ ဦးထက်မပိုသော လူအရေအတွက်သာ ရှိတော့ကြောင်း မြို့ခံများက ပြောသည်။ ပုသိမ်မြို့ခံတစ်ဦးက “မဲပေးဖို့ လာကြတဲ့သူက ရှိလှရင် ၃၀ လောက်ပဲ တန်းစီနေကြတာ။ စိတ်ဝင်စားမှု အတော် နည်းပါတယ်။ ၂၀၂၀ တုန်းက အုန်းအုန်းထနေတာနဲ့ အခုနဲ့ကတော့ တခြားစီပါပဲ” ဟု နှိုင်းယှဉ်ပြောဆိုသည်။ မဲရုံအတွင်း၌လည်း လွတ်လပ်စွာ ဆန္ဒမဲပေးခွင့်မရဘဲ စောင့်ကြည့်စစ်ဆေးမှုများ ကြုံတွေ့နေရကြောင်း မဲပေးခဲ့သူတစ်ဦးက ယခုကဲ့သို့ ပြောသည်။ “မဲပေးတာကို မဲရုံစောင့်တစ်ဦးက စောင့်ကြည့်နေတယ်။ ဘယ်ပါတီကို ပေးတယ်၊ အမှားမလုပ်နိုင်အောင် စောင့်ကြည့်တာမျိုးပေါ့။ ပယ်မဲဖြစ်အောင် နှစ်နေရာ၊ သုံးနေရာ နှိပ်လို့မရအောင် စောင့်ကြည့်နေတာဗျ။ လုံခြုံလွတ်လပ်တယ်လို့ မခံစားရဘူး” ဟု ၎င်းက ပြောသည်။ ပုသိမ်မြို့တွင် အရပ်ဘက် ရပ်/ကျေးမဲရုံ ၁၉၃ ရုံနှင့် တပ်တွင်းမဲရုံ ၂၁ ရုံ၊ စုစုပေါင်း ၂၁၄ ရုံ ရှိသော်လည်း အရပ်ဘက် မဲရုံများထက် တပ်တွင်းမဲရုံများတွင်သာ မဲပေးသူ ပိုမိုများပြားနေသည်ကို တွေ့ရကြောင်း တပ်ဝန်း အတွင်း နေထိုင်သူတစ်ဦးက ဆိုသည်။ နိုင်ငံရေး လေ့လာသူများကမူ ယခုရွေးကောက်ပွဲသည် ၂၀၂၀ ရွေးကောက်ပွဲကဲ့သို့ သက်သေခံလက်မှတ်များဖြင့် ပွင့်လင်းမြင်သာစွာ ရေတွက်မည်မဟုတ်သဖြင့် မတရားမှုများနှင့် အမှားများကြီးစိုးမည်မှာ သေချာနေကြောင်း ဝေဖန်ထောက်ပြလျက်ရှိသည်။ စစ်ကော်မရှင်သည် မဲမပေးသူများပြားလေလေ ၎င်းတို့စိတ်ကြိုက် ရလဒ်များကို ဖန်တီးခွင့်ရလေလေ ဖြစ်နိုင်သည်ဟုလည်း ၈၈ မျိုးဆက် တစ်ဦးက သုံးသပ်ပြောဆိုသည်။

ပုသိမ်၌ မဲပေးသူ နည်းပါး

ရှမ်းမြောက် မြို့သုံးမြို့၊ မြို့ပေါ်ရပ်ကွက် အချို့တွင်သာ ရွေးကောက်ပွဲလုပ် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၂၈ ရက်။ ရှမ်းပြည် မြောက်ပိုင်းရှိ မြို့နယ်အများစုကို တော်လှန်ရေးတပ်ဖွဲ့များက ထိန်းချုပ်ထားချိန်တွင် စစ်ကော်မရှင် က လားရှိုး၊ မူဆယ်နှင့် နောင်ချိုမြို့ပေါ် ရပ်ကွက်အချို့၌သာ ရွေးကောက်ပွဲကို အတင်းအကျပ် ကျင်းပနေသည်ဟု မြို့ခံများက ပြောသည်။ ဒေသတွင်း စစ်ရေးပဋိပက္ခနှင့် လုံခြုံရေးစိုးရိမ်မှုများကြောင့် မဲပေးသူ အလွန်နည်းပါးနေကြောင်း ဒေသခံများက ပြောသည်။ ယနေ့ (ဒီဇင်ဘာ ၂၈ ရက်) တွင် စတင်သည့် စစ်ကော်မရှင်၏ ရွေးကောက်ပွဲ ပထမပိုင်းတွင် ရှမ်းမြောက်ဒေသ၌ နောင်ချို၊ လားရှိုးနှင့် မူဆယ်မြို့နယ် (၃) ခုသာ ပါဝင်ပြီး မြို့ပေါ်ရပ်ကွက်များ၌သာ ကွက်၍ ပြုလုပ်နိုင်ခြင်း ဖြစ်သည်။ သို့သော် မြို့ပေါ်၌ပင် လုံခြုံရေးအတွက် စစ်သားနှင့် ရဲများက လက်နက်အပြည့်အစုံဖြင့် ကင်းစောင့်နေပြီး လမ်းများကိုလည်း ပိတ်ဆို့ထားသည့်အတွက် လူအသွားအလာမှာ ပုံမှန်ထက် သိသိသာသာ နည်းပါးနေသည်။ နောင်ချိုမြို့နယ်မှ ဒေသခံတစ်ဦးက "မဲရုံတွေကတော့ ဖွင့်ထားတာပဲ၊ ဒါပေမဲ့ သွားတဲ့သူက လက်ချိုးရေလို့ ရတယ်။ စစ်တပ်နဲ့ နီးစပ်တဲ့သူတွေရယ်၊ မသွားရင် အရေးယူခံရမှာ ကြောက်တဲ့ ဝန်ထမ်းတချို့ရယ်ပဲ တွေ့ တယ်။ တခြားမြို့တွေမှာလည်း ပေါက်ကွဲမှုတွေ ဖြစ်နေတော့ ဒီကလူတွေလည်း အိမ်ထဲက အိမ်ပြင်တောင် မထွက်ကြဘူး" ဟု ပြောသည်။ မူဆယ်မြို့တွင် မြို့ပေါ်ရပ်ကွက် ၉ ခု၌ မဲရုံ ၁၈ ရုံသာ ဖွင့်လှစ်နိုင်ပြီး ကိုးကန့်တပ် MNDAA က ထိန်းချုပ်ထား သည့် ပန်ဆိုင်း၊ မုန်းကိုးနှင့် မန့်ဟီးရိုးဒေသရှိ ကျေးရွာအုပ်စု ၆၂ အုပ်စုတွင်မူ ရွေးကောက်ပွဲ ကျင်းပနိုင်ခြင်း မရှိပေ။ မူဆယ်မြို့ခံတစ်ဦးက "မူဆယ်မှာတော့ မဲရုံတွေ ဖွင့်တယ်။ ဒါပေမဲ့ လူထုက စိတ်မဝင်စားသလို သွားပေးတဲ့ သူလည်း မရှိသလောက်ပါပဲ။ စစ်တပ်နဲ့ ပြည်သူ့စစ်တွေကပဲ မဲရုံနားမှာ သေနတ်ကိုင်ပြီး စောင့်နေတာ။ မဲမပေး ရင် စာရင်းမှတ်မယ်လို့ ခြိမ်းခြောက်ထားတာလည်း ရှိတယ်။ ဒါပေမယ့် မသွားတဲ့လူက များပါတယ်။ သွားတဲ့ လူတွေကလည်း သူတို့လူတွေပဲလေ။ ဒီဝန်ထမ်းတချို့နဲ့ သူတို့မိသားစုတွေပဲ သွားကြတာမျိုး တွေ့တယ်" ဟု ပြောသည်။ လားရှိုးမြို့တွင်လည်း စစ်ကော်မရှင်က လုံခြုံရေး အလွန်အမင်း တင်းကျပ်ထားပြီး ရွေးကောက်ပွဲမတိုင်မီ ရက်ပိုင်းအတွင်း ဒီဇင်ဘာလ ၂၁ ရက်နေ့က ပေါက်ကွဲမှုများ ဖြစ်ပွားခဲ့ခြင်းကြောင့် မြို့တွင်းစစ်ဆေးမှုများ ပိုမိုလုပ်ဆောင်နေသည်။ လားရှိုးမြို့ခံ အမျိုးသားတစ်ဦးက "မဖြစ်မနေ မဲလာပေးဖို့ အုပ်ချုပ်ရေးအဖွဲ့တွေက လိုက်ပြောသွားတယ်။ မဲရုံသွားရင်လည်း ဖုန်းယူမလာရဘူးဆိုပြီး တားမြစ်ထားတာတွေ ရှိတယ်။ မဲရုံတိုင်းမှာ ဂျမ်မာတွေလည်း တပ်ထားတယ်" ဟု ပြောသည်။ လားရှိုးနှင့် မူဆယ်မြို့များရှိ ရွေးကောက်ပွဲတွင် စစ်ကော်မရှင် လက်အောက်ခံ ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီ (USDP)၊ ပြည်သူ့ရှေ့ဆောင်ပါတီ (PPP) နှင့် ရှမ်းနှင့် တိုင်းရင်းသားများ ဒီမိုကရက်တစ်ပါတီ (SNDP) တို့သာ ဝင်ရောက်ယှဉ်ပြိုင်ကြသည်။ သို့သော် မြို့နယ်ပေါင်း ၂၀ ကျော်ရှိသည့် ရှမ်းမြောက်ဒေသတွင် မြို့နယ် ၃ ခု၏ မြို့ပေါ်၌သာ ဟန်ပြလုပ်ဆောင် နိုင်ခြင်းသည် စစ်ကော်မရှင်၏ နယ်မြေစိုးမိုးမှု လုံးဝကျဆင်းနေခြင်းကို ပြသနေကြောင်း နိုင်ငံရေးလေ့လာသူများ က ထောက်ပြနေကြသည်။ ဓါတ်ပုံ - MOI

ရှမ်းမြောက် မြို့သုံးမြို့၊ မြို့ပေါ်ရပ်ကွက် အချို့တွင်သာ ရွေးကောက်ပွဲလုပ်

နိုင်ငံ ၆ နိုင်ငံမှ ရွေးကောက်ပွဲ စောင့်ကြည့်သူများ ရောက်ရှိ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၂၈ ရက်။ စစ်ကော်မရှင်က ကြီးမှူး ကျင်းပသည့် ရွေးကောက်ပွဲကို နိုင်ငံအများအပြားက စောင့်ကြည့်သူ စေလွှတ်ခြင်း မရှိခဲ့ပဲ နိုင်ငံ ၆ နိုင်ငံကသာ ရွေးကောက်ပွဲ စောင့်ကြည့်သူများ စေလွှတ်ခဲ့သည်ဟု ပြည်တွင်း သတင်းမီဒီယာ များက ထုတ်ပြန်သည်။ စောင့်ကြည့်သူ စေလွှတ်ခဲ့သည့် နိုင်ငံများမှာ တရုတ်၊ အိန္ဒိယ၊ ရုရှား၊ ဘယ်လာရုစ်၊ ကာဇက်စတန်နှင့် ကမ္ဘောဒီးယား နိုင်ငံများ ဖြစ်သည်။ ဘီလာရုစ် နိုင်ငံမှ စောင့်ကြည့်ရေး အဖွဲ့သည် ၂၅ ရက်နေ့ကတည်းက မြန်မာနိုင်ငံတွင် ရောက်ရှိနေခဲ့သည်။ အနောက်နိုင်ငံများနှင့် အဓိက နိုင်ငံတကာ ရွေးကောက်ပွဲ စောင့်ကြည့်ရေးအဖွဲ့ကြီးများမှာမူ ယနေ့ရွေးကောက်ပွဲကို "လွတ်လပ်ပြီး တရားမျှတသည့် အခြေအနေမရှိ" ဟု ယူဆသဖြင့် စောင့်ကြည့်သူများ စေလွှတ်ခြင်း မပြုခဲ့ကြပါ။ ယင်းတို့တွင် ဥရောပသမဂ္ဂ (EU)၊ The Carter Center၊ ကုလသမဂ္ဂ (UN)နှင့် အာဆီယံ (ASEAN) အသင်းကြီး တို့ ပါဝင်သည်။ အာဆီယံ အသင်းကြီးက မကြာသေးမီက ကျင်းပခဲ့သည့် ထိပ်သီး အစည်းအဝေးတွင် မြန်မာ့ ရွေးကောက်ပွဲကို တရားဝင် စောင့်ကြည့်သူ စေလွှတ်ခြင်း ပြုမည်မဟုတ်ကြောင်း ကြေညာခဲ့သည်။ အဖွဲ့ဝင် တစ်နိုင်ငံချင်းလာရောက်မှုကိုမူ တားမြစ်မည်မဟုတ်ကြောင်းလည်း ဖော်ပြခဲ့သည်။ မြန်မာ စစ်ကော်မရှင်က ဖိတ်ကြားထားပြီး လာရောက်မည်ဟု အကြောင်းပြန်ထားသော နိုင်ငံ ပေါင်း ၁၀ နိုင်ငံရှိပြီး ရောက်ရှိနေသော နိုင်ငံများအပြင် ထိုင်း၊ လာအို၊ ပါကစ္စတန်နှင့် ဖိလစ်ပိုင်နိုင်ငံများ ပါဝင်သည်ဟု စစ်ကော်မရှင် သတင်းရင်းမြစ်များက ပြောသည်။ ယနေ့ကျင်းပနေသော ရွေးကောက်ပွဲသည် နိုင်ငံတစ်ဝန်းလုံးရှိ နယ်မြေအားလုံးတွင် ကျင်းပနိုင်ခြင်း မရှိဘဲ လုံခြုံရေးအရ ကန့်သတ်ချက်များ ရှိနေသည့်အတွက် နိုင်ငံတကာ စောင့်ကြည့်သူများ၏ လှုပ်ရှားမှုမှာလည်း အစိုးရမှ သတ်မှတ်ပေးထားသည့် နေရာအချို့ (အထူးသဖြင့် နေပြည်တော်နှင့် ရန်ကုန်) တွင်သာ အဓိက သွားရောက် ကြည့်ရှုနိုင်မည် ဖြစ်သည်။ မြန်မာနိုင်ငံရှိ မြို့နယ် ၃၃၀ တွင် ယနေ့ရွေးကောက်ပွဲ ကျင်းပခြင်း လုံးဝ မပြုလုပ်နိုင်သော မြို့နယ် ၆၅ မြို့နယ် ရှိသည်။

နိုင်ငံ ၆ နိုင်ငံမှ ရွေးကောက်ပွဲ စောင့်ကြည့်သူများ ရောက်ရှိ

စစ်ကော်မရှင်၏ ဝါဒဖြန့်မှုများ နားမယောင်ရန် နိုင်ငံတကာကို တိုက်တွန်း သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၂၈ ရက်။ စစ်ကော်မရှင်၏ ဝါဒဖြန့်မှုများအပေါ် အခြေခံ၍ မြန်မာ့အရေးကို အဆုံးအဖြတ်မပေးရန် နိုင်ငံတကာ အသိုင်း အဝိုင်းကို တော်လှန်ရေးအင်အားစုများ တိုက်တွန်းလိုက်သည်။ စစ်ကော်မရှင်က ကျင်းပရန် ပြင်ဆင်နေသည့် ရွေးကောက်ပွဲသည် ၎င်းတို့၏ ရာဇဝတ်မှုများကို ဖုံးကွယ်ရန် လုပ်ဆောင်သည့် ဝါဒဖြန့်မှုသာဖြစ်ပြီး ယင်းအချက်အပေါ် အခြေခံ၍ မြန်မာ့အရေးကို အဆုံးအဖြတ်မပေးရန် တော်လှန်ရေး အင်အားစုများက နိုင်ငံတကာအသိုင်းအဝိုင်းသို့ တိုက်တွန်းပြောဆိုလိုက်သည်။ စစ်ကော်မရှင်၏ ရွေးကောက်ပွဲ ကော်မရှင်သည် ဒီဇင်ဘာလ ၂၈ ရက်နေ့မှ စတင်ကာ အပိုင်း ၃ ပိုင်းခွဲ၍ ရွေး ကောက်ပွဲ ကျင်းပမည်ဟု ထုတ်ပြန်ထားချိန်တွင် တော်လှန်ရေး အင်အားစုများက မြေပြင်ပကတိ အခြေအနေကို ရှုမြင်ပေးရန် ယခုကဲ့သို့ တုံ့ပြန်လိုက်ခြင်း ဖြစ်သည်။ ကရင်နီပြည်နယ် အင်အားစုကိုယ်စားလှယ် ခွန်းသောမတ်စ်က “နိုင်ငံတကာ အသိုင်းအဝိုင်းတွေကလည်း ကျနော် တို့ရဲ့ ပကတိ အခြေအနေကို မျှော်ကြည့်ပေးဖို့ လိုပါမယ်။ ကျနော်တို့ လူထုတွေရဲ့ အခြေအနေကို မျှော်ကြည့် ပေးဖို့ လိုမယ်ပေါ့နော်။ စစ်ကောင်စီရဲ့ မဟုတ်မမှန် ဝါဒဖြန့်မှုတွေကို ကြည့်ပြီးတော့ ကျနော်တို့ရဲ့ နိုင်ငံကို ဆုံးဖြတ်လိုက်တာမျိုး၊ အဆုံးအဖြတ်တွေ ပေးတာမျိုးကတော့ မလုပ်သင့်ဘူးလို့ ကျနော်ယူဆတယ်” ဟု ပြော သည်။ လက်ရှိတွင် စစ်ကော်မရှင်သည် ရွေးကောက်ပွဲတွင် မဲပေးရန် ပြည်သူများကို နည်းမျိုးစုံဖြင့် ခြိမ်းခြောက်နေ ခြင်း ဖြစ်သည်။ ကရင်နီပြည်တွင် စစ်ဘေးရှောင်များ ပြန်မလာပါက နေအိမ်များကို ချိတ်ပိတ်မည်ဟု အကျပ်ကိုင်နေသည့်အပြင်၊ တက္ကသိုလ် ကျောင်းသားများကိုလည်း ကြိုတင်မဲမပေးပါက ကျောင်းတက်ခွင့်မပေးဟု ဆိုကာ လူ့အခွင့်အရေး ချိုးဖောက်လျက်ရှိသည်။ ကျေးလက်မြေအဖွဲ့ ဒါရိုက်တာ ဒေါ်မူစဲက “ကရင်နီမှာ ကြည့်မယ်ဆိုလို့ရှိရင် စစ်ဘေးရှောင်တွေကို ပြန်မလာလို့ ရှိရင် နေအိမ်တွေ ချိတ်ပိတ်မယ်၊ ပြီးတော့မှ တော်လှန်ရေးအဖွဲ့နဲ့ တစ်ဖွဲ့တည်းလို့ သတ်မှတ်မယ်ဆိုတဲ့ အရာ တွေက ဒါက ခြိမ်းခြောက်မှု ဖြစ်တယ်။ ဒါသည် လူ့အခွင့်အရေးနဲ့ လုံးဝဆန့်ကျင်တယ်။ ဒီအတွက်ကြောင့်မို့လို့ ဒီရွေးကောက်ပွဲ အတုအယောင်ကို နိုင်ငံတကာက လက်မခံဖို့ လိုအပ်တယ်” ဟု ထောက်ပြသည်။ စစ်ကော်မရှင်၏ ရွေးကောက်ပွဲသည် လက်ရှိမြန်မာ့နိုင်ငံရေး အကျပ်အတည်းအတွက် အဖြေမဟုတ်ကြောင်း KNU-NUG (တပ်မဟာ ၄ ပူးပေါင်းညှိနှိုင်းရေးအဖွဲ့) – BCT-4 ပြောရေးဆိုခွင့်ရှိသူ ဦးဟိန်းထက်ကလည်း သတိပေးထားသည်။ “အကြမ်းဖက် စစ်အုပ်စုရဲ့ အတုအယောင် ရွေးကောက်ပွဲဟာ တိုင်းပြည်ရဲ့ လက်ရှိ ဖြစ်ပျက်နေတဲ့ ဒီအကြမ်း ဖက် လုပ်ရပ်တွေ၊ ဒီမငြိမ်းချမ်းမှုတွေကို ဖြေရှင်းဆောင်ရွက်နိုင်လိမ့်မယ်လို့ ဒါ ယုံကြည်နေကြတဲ့ နိုင်ငံတကာ အစိုးရတွေ၊ နိုင်ငံတကာ အသိုင်းအဝန်းကိုလည်း ဒါက အကြမ်းဖက်စစ်အုပ်စုရဲ့ သူ့ရဲ့ အကြမ်းဖက်လုပ်ရပ်တွေ ကို ဖုံးဖိနိုင်ဖို့အတွက် ဒီလှည့်ဖျားတဲ့ လုပ်ရပ်တစ်ခုသာ ဖြစ်တယ်။ ဒီငြိမ်းချမ်းတဲ့ မြန်မာနိုင်ငံရဲ့ လူ့ဘောင် အဖွဲ့ အစည်းကို တည်ဆောက်ဖို့တဲ့နေရာမှာ ဘယ်လိုမှ ဒီရွေးကောက်ပွဲက အဖြေမဟုတ်ဘူး ဆိုတာကို ကောင်းစွာ သိရှိနားလည်စေချင်တယ်။” စစ်ကော်မရှင်သည် ရွေးကောက်ပွဲအတွက် ပြင်ဆင်နေစဉ်အတွင်း၌ပင် အရပ်သားပစ်မှတ်များကို လေကြောင်းမှ ဗုံးကြဲခြင်း၊ ကျေးရွာများကို မီးရှို့ခြင်းနှင့် ပြည်သူများကို သတ်ဖြတ်ခြင်းများကို ဆက်တိုက်ကျူးလွန်နေကြောင်း လူ့အခွင့်အရေး လှုပ်ရှားသူများက ပြောသည်။ ဦးဟိန်းထက်က “ဒီအကြမ်းဖက် စစ်အုပ်စုအနေနဲ့ သူ့ရဲ့ ဒီအကြမ်းဖက် သတ်ဖြတ်မှုတွေ အပါအဝင် သူ့ရဲ့ ရပ် တည်မှုအတွက်၊ သူ့ရဲ့ ကိုယ်ကျိုးအတွက်ဆိုရင် သေချာတာတစ်ခုကတော့ ဒီလိုမျိုး ဒီရွေးကောက်ပွဲကနေ တစ်ဆင့် အဖြေဟုတ်မနေဘဲနဲ့ ပြည်သူတွေကို ဆက်လက်ပြီးတော့ သတ်ဖြတ်မှုတွေကို လုပ်ဆောင်နေဦးမယ် ဆိုတဲ့ဟာကိုလည်း ကျနော်တို့ လက်ခံယုံကြည်ထားတယ်” ဟု ဆက်ပြောသည်။ တော်လှန်ရေး အင်အားစုများက နိုင်ငံတကာ အသိုင်းအဝိုင်းအနေဖြင့် စစ်ကော်မရှင်၏ လုပ်ရပ်များကို အသိ အမှတ် မပြုရန်နှင့် လက်ရှိ တော်လှန်ရေး အင်အားစုများ ဖော်ဆောင်နေသည့် အုပ်ချုပ်ရေးဆိုင်ရာ ကိစ္စရပ်များ ကိုသာ အမြန်ဆုံး အသိအမှတ်ပြု ကူညီပေးကြရန် တောင်းဆိုထားသည်။

စစ်ကော်မရှင်၏ ဝါဒဖြန့်မှုများ နားမယောင်ရန် နိုင်ငံတကာကို တိုက်တွန်း

« Prev 1 2 3 4 5 6 Next »

သောကြာနေ့ည ရုပ်သံသတင်း (၁၀-၁၀-၂၅)

သောကြာနေ့ည ရုပ်သံသတင်း (၁၀-၁၀-၂၅)

ဒီကနေ့ အစီအစဉ်ထဲမှာတော့ … မိုးမိတ်မှာ ဗုံးကြဲတိုက်ခိုက်ခဲ့လို့ ကလေးတွေ အပါအဝင် အရပ်သားတွေ အသက်ဆုံးရှုံးခဲ့ရပါတယ်။ မွန်နဲ့ တနင်္သာရီမှာလည်း အရပ်သားတွေ လေကြောင်းတိုက်ခိုက်မှု ခံရပါတယ်။ ဖားကန့်မှာ စစ်ကော်မရှင်က ဘာကြောင့် ညမထွက်ရ အမိန့်ထုတ်လိုက်တာပါလဲ

ထိုင်းရောက် အလုပ်သမားတွေအတွက် ပန်းရောင်ကတ် ပြုလုပ်ရမယ့် နေရာတွေက ဘယ်နေရာတွေလဲ၊ ဘယ်လိုလုပ်ရမှာလဲ။ ယူကရိန်းတိုက်ပွဲမှာ လောင်စာ အရင်းအမြစ်တွေကို ဘာလို့ အပြန်အလှန် တိုက်ခိုက်နေကြတာလဲ။ ယူကေက အိန္ဒိယ နိုင်ငံကို အပေါ့စား ဒုံးကျည်တွေ ရောင်းပေးလိုက်ပါတယ်။

ကမ္ဘာကျော် မုဒိမ်းမှုတစ်ခုမှာ အယူခံဝင်တဲ့သူကို တရားရုံးက ဘယ်လို အမိန့်ချမှတ်လိုက်သလဲ … စတာတွေတင်ဆက်ထားပါတယ်။

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

KNU ၏ ကော်သူးလေ ကောင်စီများ အရှိန်မြှင့်တင် ဆောင်ရွက်နေ
တော်လှန်ရေး အစုအဖွဲ့များအကြား သွေးကွဲမှုများ ရှောင်ကျဉ်ရန် KNDF ခေါင်းဆောင်ပြော
ထားဝယ် ဗဟိုသင်္ကြန်မဏ္ဍာပ် အနီး ဒရုန်း တိုက်ခိုက်မှုတွင် အမျိုးသမီးတစ်ဦး ဒဏ်ရာရ
စစ်အသွင်ပြောင်း သမ္မတက နိုင်ငံတော် သမ္မတအား လွတ်ငြိမ်းချမ်းသာခွင့်ပေး
အမေရိကန်က ဟော်မုဇ်ရေလက်ကြားတွင် အီရန်ကို ပိတ်ဆို့

Archives

Archives

×Close