အလုံ Mytel ရုံးခွဲ ပေါက်ကွဲ မီးလောင်မှုဖြစ်

သတင်းနှင့် မီဒီယာ ကွန်ရက်။
၂၀၂၂ ခုနှစ်၊ ဖေဖော်ဝါရီလ ၂ ရက်။

အလုံမြို့နယ်ရှိ Mytel ရုံးခွဲတွင် ယနေ့နံနက်အစောပိုင်းက ပေါက်ကွဲမှုကြောင့် မီးလောင်မှု ဖြစ်ပွားခဲ့ပြီးနောက် ထိုရုံးအနီးက ၆ ထပ်တိုက်တလုံးကို စစ်ကောင်စီက ချိပ်ပိတ်လိုက်သည်ဟု သိရသည်။

ဖေဖော်ဝါရီလ ၂ ရက်နေ့၊ နံနက်အစောပိုင်းက ကွင်းကျောင်းလမ်းအတွင်းရှိ Mytel ရုံးတွင် ပေါက်ကွဲမှုဖြစ်ကာ မီးလောင်ခဲ့ခြင်းဖြစ်သည်ဟု ဆင်မင်းရပ်ကွက်အတွင်းနေ ထိုင်သူများ က ပြောသည်။

“တိုက်က ဟိုဖက်ဒီဖက်ဆို ၁၄ ခန်းရှိတာပေါ့။ မြေပိုင်ရှင်ပိုင်တဲ့ဖက် အခြမ်းက ၇ ခန်းကို ချိပ်ပိတ်လိုက်တာ။ အကုန်ဖယ်ခိုင်းပြီး စာကပ် သွားတာ” ဟု ဆင်မင်းရပ်ကွက်အတွင်းက အသက် ၃၀ ကျော် အရွယ် အမျိုးသား တစ်ဦးက ပြောသည်။

ချိပ်ပိတ်ခံခဲ့ရသည့်တိုက်၏ မြေပိုင်ရှင်မိသားစုဝင် လူငယ်တစ်ဦးက ပြည်သူ့ကာကွယ်ရေးတပ်ဖွဲ့ PDF အတွင်းသို့ ဝင်ရောက်သွားသည်ဟု ဆိုကာ ချိတ်ပိတ်ခဲ့ခြင်းဖြစ်ပြီး အဆိုပါတိုက်မှ အမျိုးသား ၃ ဦး အပါအဝင် အလုံမြို့နယ် NLD ပါတီအဖွဲ့ဝင် အမျိုးသမီးတစ်ဦးကိုလည်း စစ်ကောင်စီက ဖမ်းဆီးသွားသည်ဟု ဆင်မင်းရပ်ကွက်က ဒေသခံ တစ်ယောက်က ပြောသည်။

ချိပ်ပိတ်ခံလိုက်ရသည့် တိုက်သည် ဆင်ရေကန်လမ်း အတွင်းတည်ရှိပြီး ပေါက်ကွဲမီးလောင်မှု ဖြစ်ပွားခဲ့သည့် Mytel ရုံးခွဲ၏ အနီးတွင်ရှိသည်ဟု ဆင်မင်းရပ်ကွက်အတွင်းနေထိုင်သူများက ဆိုသည်။

အဆိုပါရပ်ကွက်သည် စစ်ကောင်စီကို ဆန့်ကျင်သူ အများစုနေထိုင်သည့် ရပ်ကွက်ဖြစ်ပြီး ဦးတေဇ ပိုင်ဆိုင်သည့် ထူးဓာတ်ဆီဆိုင် ပေါက်ကွဲ မီးလောင်မှု ဖြစ်ပွားပြီး နောက်ပိုင်း စစ်ကောင်စီက အညှိုးအတေးထားကာ စစ်ဆေးမှု များ မကြာခဏ ပြုလုပ်လေ့ရှိသည်ဟုလည်း ရပ်ကွက်သူရပ်ကွက်သားများ က ဆိုသည်။

ပြီးခဲ့သည့် ဇန္နဝါရီလအတွင်းက အလုံမြို့နယ်အတွင်းရှိ ဦးတေဇ ပိုင် ထူးဇာတ်ဆီဆိုင်နှင့် အေးနေဝင်းပိုင် YBS-56 ယာဉ်လိုင်းတို့ ၃ ရက်ခြားကာ ဗုံးဖောက်ခွဲခံခဲ့ရပြီး ထူးဓာတ်ဆီဆိုင် တစ်ဆိုင်လုံး နီးပါး မီးလောင် ပျက်စီးသွား ခဲ့သည်။