မိုးကုတ်-မန္တလေးလမ်း ကြန့်ကြာမှုများ ကြုံနေရ
သတင်းနှင့် မီဒီယာ ကွန်ရက်။
၂၀၂၄ ခုနှစ်၊ နိုဝင်ဘာလ ၆ ရက်။
မိုးကုတ် – မန္တလေးလမ်းလွှဲကို ယနေ့အချိန်ထိ ပိတ်ဆို့ထားမှုကြောင့် အခြားလမ်းလွှဲများမှ သွားလာနေရသည်ဟု ယာဉ်မောင်းများနှင့် ခရီးသည်များက ပြောသည်။
မန္တလေးတိုင်း၊ မိုးကုတ် – မန္တလေးလမ်းမကြီးအား တိုက်ပွဲများကြောင့် ပြီးခဲ့သည့် ဩဂုတ်လ ကတည်းက ယနေ့အချိန်ထိ နှစ်ဖက်တပ်များက ပိတ်ဆို့ထားခြင်း ဖြစ်သည်ဟု ယာဉ်မောင်းနှင့် ခရီးသည်များကပြောသည်။
လမ်းပိတ်ထားသည့် ကာလများအတွင်း စစ်ကိုင်း – သစ်ဆိပ် – ရွှေပြည် – လက်ပံလှ လမ်းလွှဲမှ သွားလာခဲ့ရပြီး နိုဝင်ဘာလ ၃ ရက်နေ့တွင် ထိုလမ်းကိုပါ ရက်အကန့်အသတ်မရှိ ထပ်မံပိတ်ဆို့လိုက်ခြင်း ဖြစ်သည်။
လက်ရှိတွင် မိုးကုတ်မှ ဆင်းလာသည့်ကားများမှာ ရွှေဘို – ကျောက်တန်း – မောင်းကုန်း – တကောင်း – သျှားတော လမ်းလွှဲမှ သွားလာနေရပြီး အခက်ခဲများစွာ ကြုံနေရသည်ဟု ယာဉ်မောင်း တစ်ဦးက ပြောသည်။
မိုးကုတ်သို့ဝင်မည့် ယာဉ်မောင်းတစ်ဦးက “လမ်းက မြင်သာအောင် ပြောရရင် ရွှေဘိုဘက်ကလာတဲ့လမ်း တစ်ခု ပဲ ကျန်တာ။ မေမြို့ကနေ လာတဲ့ လမ်းတွေကျတော့ ဖြတ်လို့မရတော့ဘူး။ ရွှေဘိုကနေ ကောလင်းလမ်းဆုံ အဲဒီကနေ မြစ်ကြီးနားသွားလည်း ရတယ်လေ။ အဲဒီကနေ ပြီးတော့မှတစ်ခါ အပေါ်ပြန်တက်ပြီးမှ ဒီဘက်ကို ပြန်ဆင်းလာရတယ်ဆိုတော့ အဲ့ဒီ လမ်းတစ်လမ်းပဲ လောလောဆယ်ရှိတာ” ပြောသည်။
ပိတ်ဆို့ထားသည့် စစ်ကိုင်း လမ်းလွှဲမှာ မန္တလေးသို့ နေ့ချင်းပြန် သွားနိုင်သော်လည်း လက်ရှိ အသုံးပြုရသည့် ရွှေဘိုလမ်းလွှဲတွင် ၈ နာရီခန့် ပိုကြာခြင်း၊ ကမ်းကူးရာတွင် ၃ ရက်အထိ စောင့်ဆိုင်းရခြင်းများ ကြုံတွေ့နေရပြီး နှေ့နှေးကြန့်ကြာမှု များစွာရှိနေသည်ဟု ဆိုကြသည်။
ထို့အပြင် လမ်းခရီးရှည်ကြာသည့်အတွက် ဂိတ်ကြေး၊ များပိုပေးရပြီး ကမ်းကူးခ အနေဖြင့်လည်း ယခင် ကားသေး ၂ သိန်း၊ ကားလတ် ၄ သိန်း၊ ကားကြီး ၈ သိန်းခန့်သာ ကုန်ကျခဲ့ရက လက်ရှိလမ်းပိုင်း ကသာဆိပ်ကမ်း တွင် ကားသေး ၄ သိန်း၊ ကားလတ် ၆ သိန်း၊ ကားကြီး ၁၂ သိန်းအထိ ၂ ဆနီးပါး ပိုကုန်ကျသည်ဟု မိုးကုတ်သို့ ဝင်မည့် ယာဉ်မောင်းတစ်ဦးက ဆက်ပြောသည်။
“ပစ္စည်းတွေ အခွန်ကောက်တာ တိုးလာတယ်။ ရွှေဘိုပတ်လည်မှာရှိတဲ့ တော်လှန်ရေးဂိတ်တွေ။ ဆိုတော့ ဘီယာ တစ်ဖာ၊ ကုန်ဖာတစ်ဖာကို ဘယ်လောက်တို့ အခွန်ထပ်တိုးကောက်တာတွေ ရှိတယ်။ နောက်တစ်ခုကြတော့ အပေါ်လမ်းကနေ သွားရတာ ဖြစ်တဲ့အတွက် မန္တလေးလမ်းကနေ မြစ်ကြီးနားလမ်းကို သွားရတာ။ ကသာနား ရောက်ခါနီးမှ ဧရာဝတီမြစ်ကို ပြန်ကူးပြီးတော့လေ ဗန်းမော်လမ်းကို ပြန်ယူရတာ။ အဲဒီကနေ နောက်ပြန်ဆုတ် လာပြီးတော့ မိုးမိတ်ကို ပြန်ဝင်ရတာဆိုတော့ အဲဒီမြစ်ကူးတဲ့ကူးတို့ခက တော်တော်ဈေးကြီးတယ်။”
စစ်ကိုင်းလမ်းလွှဲမှ သွားရောက်ကြသည့် ယာဉ်လိုင်းများမှာ ကုန်ကျစရိတ်ပိုများလာသဖြင့် ကားခများမှာလည်း ဈေးတက်လာပြီး ယခင် နောက်ခန်း ၂ သိန်း၊ ရှေ့ခန်း ၃ သိန်း၊ အံစာတုံး တစ်သိန်းခွဲခန့်သာ ကုန်ကျခဲ့ရာက လက်ရှိတွင် နောက်ခန်း ၃ သိန်းခွဲ၊ ရှေ့ခန်း ၄ သိန်းခွဲ၊ အံစာတုံး ၂ သိန်းခွဲအထိ ဈေးတက်လာသည်ဟု ဆိုသည်။
မန္တလေး – မိုးကုတ် လမ်းလွှဲတစ်ခု ဖြစ်သည့် မိုးကုတ် – အင်းဝိုင်း – ဘန်ဘွေး – ပြင်ဦးလွင် လမ်းပိုင်းကိုလည်း အောက်တိုဘာလ ၁၇ ရက်နေကလည်းက ၂ ဖက်တပ်များ ပိတ်ဆို့ထားပြီး ရံဖန်ရံခါ ရက်များမှသာ ဆိုင်ကယ် သီးသန့် သွားလာခွင့်ပြုသည်ဟု ယာဉ်မောင်းများက ပြောသည်။
အဝေးပြး ယာဉ်လိုင်းအချို့မှာ မန္တလေး -ကျောက်ဆည် – ရွာငံ – ရပ်စောက် – ကျောက်ဂူ – နမ့်လန် ကျောက်မဲ လမ်းနှင့် မန္တလေး – ရွှေဘို – ကသာ – ငါးအိုး – မဘိမ်းလမ်းပိုင်း ၂ ခုမှလည်း သွားလာကြပြီး လက်ရှိ သွားလာကြ သည့် လမ်းလွှဲ ၃ ခုလုံးမှာ အခက်အခဲများစွာ ကြုံတွေ့နေရသဖြင့် မိုးကုတ် – ပြင်ဦးလွင် – မန္တလေး လမ်းမကြီး အား အမြန်ဆုံးဖွင့်ပေးနိုင်ရန် မျှော်လင့်စောင့်ဆိုင်း နေကြသည်။
