ဒူးရင်းသီး လိုက်ကောက်သူ မိုင်းနင်းမိ၍ ခြေထောက်ပြတ်
သတင်းနှင့် မီဒီယာ ကွန်ရက်။
၂၀၂၅ ခုနှစ်၊ မတ်လ ၁၇ ရက်။
မြိတ်ခရိုင်၊ ပုလောမြို့နယ်၊ ဆင်ထိုးကြီးကျေးရွာသား တစ်ဦး နေအိမ်အနီးတွင် ဒူးရင်းသီး လိုက်ကောက်ရင်း မြေမြုပ်မိုင်း နင်းမိပြီး ဘယ်ဘက်ခြေထောက် ပြတ်တောက်သွားခဲ့သည်ဟု ရွာသားများက ပြောသည်။
အသက် ၃၀ နှစ်အရွယ် ကိုပြုံးဆန်းအောင်သည် နေအိမ်ခြံဝင်း အတွင်း မတ်လ ၁၅ ရက်နေ့ နံနက် ၁၁ နာရီခွဲခန့်က ဒူးရင်းသီး ကောက်သွားချိန်၌ မိုင်းနင်းမိခဲ့ခြင်း ဖြစ်သည်။
အသက် ၅၀ ခန့်အရွယ် ရွာသားတစ်ဦးက “သူ့အိမ်ခြံဝန်းထဲက ဒူးရင်းပင်နားမှာ ကြွေကျနေတဲ့ အသီး ရှာရင်း နင်းမိတာ။ ခြေကျင်းဝတ်ကနေ ပြတ်ထွက် သွားတယ်။ ဘယ်သူထောင်ထားတဲ့ မိုင်းလည်းဆိုတာတော့ မသိပါ ဘူး၊ အခုလက်ရှိတော့ ထားဝယ်ဆေးရုံကြီးကို ပို့ထားတယ်” ဟု ပြောသည်။
ရွာသားများ ဆင်ထိုးကြီးကျေးရွာတွင် ယခုမတ်လ အစောပိုင်းမှ ပြန်လည်ဝင်ရောက်ထိုင်ခဲ့ကြသည်။
၂၀၂၄ ခုနှစ် ဩဂုတ်လ ၁ ရက်မှ နှစ်ကုန်ပိုင်းအထိ နှစ်ဖက်တိုက်ပွဲများ ဖြစ်ပွားခဲ့ပြီးနောက် ဆင်ထိုးကြီးကျေးရွာ ထဲတွင် KNLA နှင့် PDF ပူးပေါင်းတပ်များ တပ်စွဲနေထိုင်ခဲ့ ကြပြီး KNLA တပ်ဖွဲ့မှ စစ်ဘေးရှောင်များကို ကျေးရွာ ထဲတွင် ဝင်ရောက်နေထိုင်ခွင့်မပြုသဖြင့် ရွာသားများ နေရပ်မပြန်နိုင်ခဲ့ကြခြင်း ဖြစ်သည်။
ထို့နောက် KNLA တပ်ရင်း ၁၂ တပ်ရင်းမှူးမှ ရွာသားများ၏ တောင်းဆိုမှုများအရ စစ်ဘေးရှောင်များကို ၂၀၂၅ ခုနှစ်၊ မတ်လ ၃ ရက်နေ့မှစ၍ ရွာထဲသို့ ပြန်လည်ဝင်ရောက် နေထိုင်ခွင့်ပြုခဲ့သဖြင့် ကိုပြုံးဆန်းအောင် အပါအဝင် စစ်ဘေးရှောင်အချို့ ရွာထဲတွင် ပြန်နေထိုင်ကြခြင်း ဖြစ်သည်။
စစ်ဘေးရှောင်နေကြရသူ အများစုမှာ ကိုပြုံးဆန်းအောင် မိုင်းနင်းမိသည်ကို ကြားကြရသည်နှင့် ရွာထဲသို့ ပြန်ဝင်ရန် မရဲဘဲရှိနေကြသည်။
ပလောက်မြို့တွင် အမှတ် ၁၂ တန်းမြင့် တပ်မတော် လေ့ကျင့်ရေး စစ်သင်တန်းကျောင်းရှိပြီး စစ်ကောင်စီတပ်ဖွဲ့ က မြို့လုံခြုံရေးအတွက် ဘုရင်တောင်ကျေးရွာတွင် တပ်စွဲထားသည်။
