အိန္ဒိယ အရှေ့မြောက်ပိုင်းတွင် ရေအားလျှပ်စစ် လိုဏ်ဂူ ပေါက်ကွဲပြိုကျမှုကြောင့် ၁၀ ဦး သေဆုံး
သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဇူလိုင်လ ၂၂ ရက်။
အိန္ဒိယနိုင်ငံ အရှေ့မြောက်ပိုင်း ဆစ်ကင်း (Sikkim) ပြည်နယ်ရှိ တည်ဆောက်ဆဲ ရေအားလျှပ်စစ် စီမံကိန်း လိုဏ်ဂူတစ်ခုအတွင်း ဓာတ်ငွေ့ ပေါက်ကွဲမှုဖြစ်ပွားပြီး ပြိုကျခဲ့သဖြင့် အနည်းဆုံး လူ ၁၀ ဦး သေဆုံးကာ ၁၇ ဦး ပိတ်မိပျောက်ဆုံးနေသည်။
အဆိုပါ ဖြစ်စဉ်သည် ဇူလိုင်လ ၂၀ ရက်နေ့က တိဘက်နှင့် ဘူတန် နယ်စပ်အနီး၊ ဟိမဝန္တာဒေသတွင် တည်ဆောက်နေသည့် မဂ္ဂါဝပ် ၅၀၀ ထွက် ရေအားလျှပ်စစ် စီမံကိန်းတွင် ဖြစ်ပွားခဲ့ခြင်းဖြစ်သည်။
ဆောက်လုပ်ရေး လုပ်ငန်းခွင်အတွင်း လုပ်ကိုင်နေစဉ် ကျောက်ဆောင်များကြား ပိတ်မိနေသည့် မီသိန်းဓာတ်ငွေ့ ပေါက်ကွဲခဲ့ခြင်းဖြစ်ကြောင်း၊ ပေါက်ကွဲသံ အကျယ်ကြီး ထွက်ပေါ်လာပြီးနောက် လိုဏ်ဂူအတွင်း ကျောက်တုံးနှင့် အပျက်အစီးများ ပြိုကျလာခဲ့ခြင်းဖြစ်ကြောင်း လွတ်မြောက်လာသူများက သတင်းထောက်များကို ပြောကြားသည်။
မတော်တဆမှု ဖြစ်ပွားပြီးနောက် ကူညီကယ်ဆယ်ရေးအတွက် ဝင်ရောက်သွားသည့် အမျိုးသား ရေအားလျှပ်စစ် ကော်ပိုရေးရှင်း (NHPC) မှ တာဝန်ရှိသူ ၆ ဦးလည်း လိုဏ်ဂူအတွင်း ထပ်မံ ပိတ်မိသွားခဲ့သည်။
လက်ရှိတွင် အမျိုးသား သဘာဝဘေးအန္တရာယ် တုံ့ပြန်ရေးတပ်ဖွဲ့ (NDRF) အပါအဝင် ကယ်ဆယ်ရေးအဖွဲ့များက ပိတ်မိနေသူများကို ကယ်ထုတ်ရန် ကြိုးပမ်းနေကြသည်။
သို့သော် လိုဏ်ဂူအတွင်း မီသိန်း၊ ကာဘွန်မိုနောက်ဆိုက်နှင့် ဟိုက်ဒရိုဂျင် ဆာလဖိုက်စသည့် အဆိပ်ငွေ့များ ပြည့်နှက်နေသဖြင့် ကယ်ဆယ်ရေးလုပ်ငန်းများတွင် အခက်အခဲများစွာ ရင်ဆိုင်နေရသည်။
