NMG Doh – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
နိုင်ငံတကာသတင်း
NMG အကြောင်း
Contact

Home
Author Archive

NMG Doh

Author: NMG Doh

Oct 1

ကချင်နှင့် ရှမ်း-ကချင်အစပ် မြို့နယ် ၆ ခုတွင် KIA နှင့် စစ်အုပ်စုတပ်တို့ တိုက်ပွဲများ ဆက်လက်ပြင်းထန် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၁ ရက်။ ကချင်ပြည်အတွင်းရှိ မြို့နယ် ၅ ခုနှင့် ရှမ်း-ကချင် အစပ်ဒေသများတွင် ကချင်လွတ်လပ်ရေးတပ်မတော် (KIA) ပူးပေါင်းတပ်များနှင့် စစ်အုပ်စုတပ်တို့အကြား စစ်ရေးတင်းမာနေပြီး တိုက်ပွဲများ ဆက်လက်ပြင်းထန်လျက် ရှိသည်။ ကချင်ပြည် ဗန်းမော်၊ ဖားကန့်၊ မိုးညှင်း၊ ခေါင်လန်ဖူး၊ ဝိုင်းမော် မြို့နယ်များနှင့် ရှမ်း-ကချင် အစပ်ရှိ မိုးမိတ်မြို့နယ် အတွင်း၌ စစ်ရေးတင်းမာလျက်ရှိပြီး တိုက်ပွဲများ ဆက်လက်ဖြစ်ပွားနေကြောင်း ကချင်လွတ်လပ်ရေးအဖွဲ့ (KIO/KIA) က ပြောသည်။ လက်ရှိ တိုက်ပွဲဖြစ်ပွားနေသည့် အခြေအနေနှင့် ပတ်သက်၍ KIO/KIA သတင်းနှင့် ပြန်ကြားရေးတာဝန်ခံ ဗိုလ်မှူးကြီး နော်ဘူက ယခုကဲ့သို့ ပြောသည်။ ဗိုလ်မှူးကြီးနော်ဘူက “ကချင်ပြည်နယ်မှာကတော့ တိုက်ပွဲကတော့ ဗန်းမော်မြို့ဝန်းကျင်မှာ နေ့တိုင်းလို တိုက် ပွဲရှိပါတယ်။ နောက် ရှမ်းမြောက် အစပ်ဖြစ်နေတဲ့ မဘိမ်း မိုးမိတ်ဘက်မှာလည်း တိုက်ပွဲတွေရှိပါတယ်။ နောက် ခေါင်လန်ဖူးဘက်မှာလည်း တိုက်ပွဲကတော့ ကြိုကြား ကြိုကြားဖြစ်နေပါတယ်။ နောက် အင်းတော်ကြီး အဲဒီ ဖက်မှာလည်း တိုက်ပွဲတွေရှိပါတယ်။ တခြားနေရာမှာကတော့ တိုက်ပွဲတွေ အဲလောက်အထိ မရှိပါဘူး။ တင်းမာ မှုတွေကတော့ ဝိုင်းမော်ဘက်မှာ ရှိပြီးမှ ဖားကန့်မှာလည်း လက်နက်ကြီးနဲ့ ဒရုန်းတွေနဲ့ အပြန်အလှန် ပစ်ခတ် တာတွေတော့ ရှိပါတယ်” ဟု ပြောသည်။ စစ်အုပ်စုတပ်သည် သင်္ဘောများဖြင့် ဗန်းမော်မြို့သို့ စစ်အင်အား ဖြည့်တင်းခဲ့ပြီးနောက် ဆုံးရှုံးထားသည့် ရပ်ကွက်များကို ပြန်လည်ရယူရန် စစ်ကြောင်းထိုး ဝင်ရောက်လာခြင်း၊ ဒရုန်းနှင့် လေကြောင်းတိုက်ခိုက်မှုများ ပြုလုပ်နေခြင်းတို့ကြောင့် ဗန်းမော်မြို့နယ်အတွင်း၌ တိုက်ပွဲများ နေ့စဉ် ဖြစ်ပွားနေခြင်းဖြစ်သည်။ ထို့အတူ ရှမ်း-ကချင်အစပ် မိုးမိတ်မြို့နယ်အတွင်း၌လည်း တိုက်ပွဲများ ပြင်းထန်နေပြီး စက်တင်ဘာလ ၂၈ ရက် နေ့တွင် မိုးမိတ်မြို့နယ် ညောင်နီကျေးရွာအနီးရှိ စစ်အုပ်စုတပ်၏ ရွှေမြင်တင်ဘုရား ဗျူဟာကုန်းစခန်းကို တိုက်ခိုက်သိမ်းပိုက်နိုင်ခဲ့ကြောင်း ဗိုလ်မှူးကြီး နော်ဘူက ပြောသည်။ အလားတူ မိုးညှင်းမြို့နယ် အင်းတော်ကြီးဒေသ ဟဲပါးကျေးရွာရှိ ရှမ်းနီနဂါးတပ်မတော် (SNA) စခန်းတစ်ခုကို လည်း KIA နှင့် ပူးပေါင်းတပ်များက တိုက်ခိုက်သိမ်းပိုက်ခဲ့သည်။ ဖားကန့်နှင့် ဝိုင်းမော်မြို့နယ်များ၌ လက်နက်ကြီးနှင့် ဒရုန်းဖြင့် အပြန်အလှန် ပစ်ခတ်မှုများ ဆက်လက်ရှိနေ သကဲ့သို့ ခေါင်လန်ဖူးမြို့နယ်အတွင်း၌လည်း တိုက်ပွဲများ ကြိုကြားကြိုကြား ဖြစ်ပွားလျက်ရှိသည်။ တစ်ဖက်တွင်လည်း ကချင်ပြည်တိုက်ပွဲများ၌ အထိနာနေသည့် စစ်အုပ်စုတပ်သည် ပုံမှန် စစ်အင်အား ဖြည့်တင်း နိုင်ခြင်း မရှိတော့ဘဲ ဒေသတွင်းမှ လူငယ်များကို ဖမ်းဆီးကာ ပြည်သူ့စစ်အဖြစ် အတင်းအဓမ္မ စုဆောင်းခြင်း၊ ပေါ်တာထမ်းခိုင်းခြင်းများကို ပြုလုပ်လျက်ရှိကြောင်း ဒေသခံများနှင့် KIO/KIA တို့က ပြောပြ ထုတ်ပြန်သည်။ ပြည်သူ့စစ် စုဆောင်းနေသည့် အခြေအနေနှင့် ပတ်သက်၍ ဗိုလ်မှူးကြီး နော်ဘူက “ဖားကန့်မှာကတော့ သူတို့က အဲဒီ ပြည်သူ့စစ်အဖွဲ့ တပ်ဖွဲ့မယ်ဆိုပြီးမှ သတင်းတွေထွက်နေပါတယ်။ အဲဒီ အကောင်အထည်ဖော်တာတော့ မတွေ့ရသေးဘူး။ နောက် ခေါင်လန်ဖူး မြေပြင်မှာကတော့ သူတို့ ပြည်သူ့စစ်တွေ တော်တော်များများ ရှိတယ်။ ပူတာအိုတို့ မချမ်းဘောတို့မှာကတော့ ပြည်သူ့စစ် စုဆောင်းရေးတွေ လုပ်တယ်။ နောက် သူတို့ရဲ့ ပစ္စည်းတွေကို ထမ်းပေးဖို့ ချောဆွဲတာပေါ့ ရွာသားတွေကို ချောဆွဲတာတွေ ရှိပါတယ်။ ကျန်တဲ့ နေရာမှာကတော့ အသစ်ဝင် လာတာတော့ မတွေ့ရသေးဘူး” ဟု ပြောသည်။ စစ်အုပ်စုတပ်သည် ကချင်ပြည်အတွင်း ဆုံးရှုံးထားသည့် နယ်မြေများကို ပြန်လည်ရယူရန် ထိုးစစ်ဆင် တိုက်ခိုက်လျက်ရှိရာ စစ်ရေးပဋိပက္ခ ဒေသများရှိ အရပ်သား ပြည်သူများမှာ ဖမ်းဆီးစစ်ဆေးခံရခြင်း၊ လက်နက်ကြီး၊ လေကြောင်းနှင့် ဒရုန်း ပစ်ခတ်မှုများကြောင့် သေဆုံးရခြင်းနှင့် နေအိမ်များ မီးရှို့ဖျက်ဆီးခံရခြင်း စသည့် ဒဏ်များကို ခံစားနေကြရကြောင်း စစ်ဘေးရှောင် ပြည်သူများနှင့် လူ့အခွင့်အရေး လှုပ်ရှားသူများက ပြောဆိုသည်။ ဓါတ်ပုံ - (AFP / ပုံဟောင်း)

ကချင်နှင့် ရှမ်း-ကချင်အစပ် မြို့နယ် ၆ ခုတွင် KIA နှင့် စစ်အုပ်စုတပ်တို့ တိုက်ပွဲများ ဆက်လက်ပြင်းထန်

Oct 1

ဂျပန်နိုင်ငံက အမြဲတမ်းနေထိုင်ခွင့် လျှောက်ထားခအား အဆ ၂၀ ထိ တိုးမြှင့် သတင်းနှင့် မီဒီယာ ကွန်ရက်. ၂၀၂၆ ခုနှစ်၊ အောက်တိုဘာလ ၁ ရက်။ ဂျပန်အစိုးရသည် နိုင်ငံအတွင်း လာရောက်နေထိုင်ကြသည့် နိုင်ငံခြားသားများ၏ အမြဲတမ်းနေထိုင်ခွင့် (PR) လျှောက်ထားခအား ယခင် ယန်း ၁၀,၀၀၀ မှ ယန်း ၂၀၀,၀၀၀ (အမေရိကန်ဒေါ်လာ ၁,၂၇၀ ကျော်) ထိ အဆ ၂၀ ခန့် အထိ တိုးမြှင့်လိုက်ကြောင်း ထုတ်ပြန်သည်။ ထို့အပြင် အမြဲတမ်းနေထိုင်ခွင့် လျှောက်ထားသူများအနေဖြင့် ဂျပန်နိုင်ငံ၏ ပျမ်းမျှဝင်ငွေထက် မနည်းသော ခိုင်မာသည့် ဝင်ငွေရှိကြောင်း သက်သေပြနိုင်ရမည်ဖြစ်သည်။ ထိုမျှသာမက ပင်စင်ထည့်ဝင်မှုနှင့် ဂျပန်ဘာသာစကား ကျွမ်းကျင်မှုဆိုင်ရာ သတ်မှတ်ချက်အသစ်များ ကိုပါ ပြည့်မီရမည်ဖြစ်သည်။ ဝန်ကြီးချုပ် Sanae Takaichi ဦးဆောင်သည့် ဂျပန်အစိုးရသည် တိုးပွားလာနေသော နိုင်ငံခြားသား လူဦးရေအား ထိန်းချုပ်ရေးနှင့် လုံခြုံရေးအတွက် လူဝင်မှုကြီးကြပ်ရေး မူဝါဒများကို တင်းကြပ်လိုက်ခြင်း ဖြစ်သည်။ ဂျပန်နိုင်ငံ၌ မွေးဖွားနှုန်းကျဆင်းမှုနှင့် လုပ်သားအင်အား လိုအပ်ချက်ကြောင့် နိုင်ငံခြားသား ရွှေ့ပြောင်းလုပ်သား ၄ သန်းကျော်အထိ တိုးတက်လာနေသော်လည်း အဆိုပါ ကန့်သတ်ချက်များကြောင့် ရေရှည်နေထိုင် အလုပ်လုပ်ကိုင်လိုသည့် ပညာရှင်များနှင့် ရွှေ့ပြောင်းလုပ်သားများအတွက် စိန်ခေါ်မှုများ ရှိလာနေသည်။

ဂျပန်နိုင်ငံက အမြဲတမ်းနေထိုင်ခွင့် လျှောက်ထားခအား အဆ ၂၀ ထိ တိုးမြှင့်

Oct 1

လာအိုနိုင်ငံတွင် တရုတ်စစ်တပ်က စစ်ရေးအထောက်အကူပြု လေကြောင်းစခန်းသစ် ဖွင့်လှစ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၁ ရက်။ တရုတ်နိုင်ငံသည် အရှေ့တောင်အာရှ အိမ်နီးချင်း လာအိုနိုင်ငံ၌ စစ်ရေးခြေကုပ်ယူမှု တိုးချဲ့သည့်အနေဖြင့် မြို့တော် ဗီယင်ကျန်း၏ မြောက်ဘက် ကီလိုမီတာ ၅၀ အကွာ ဘန်ကွန်း (Ban Keun) လေဆိပ်တွင် စစ်ရေးအထောက်အကူပြု လေကြောင်းသင်တန်းစခန်းတစ်ခုအား စတင်ဖွင့်လှစ်လိုက်သည်။ ယခင်က လယ်ကွင်းပြင်ဖြစ်ခဲ့သော အဆိုပါနေရာတွင် လေယာဉ်ပြေးလမ်း၊ လေယာဉ်ရပ်နားစခန်းနှင့် အဆောက်အအုံသစ်များ တည်ဆောက်ထားသည်ကို ဂြိုဟ်တုဓာတ်ပုံများမှတစ်ဆင့် မြင်တွေ့ရသည်။ တရုတ်ကာကွယ်ရေးဝန်ကြီးဌာနက အဆိုပါစခန်းသည် လေတပ်လေသူရဲများအား လေ့ကျင့်ပေးရန်နှင့် စစ်ရေးအကူအညီပေးရန်အတွက်သာဖြစ်ပြီး မည်သည့် တတိယနိုင်ငံကိုမျှ ရည်ရွယ်ခြင်းမရှိကြောင်း ထုတ်ပြန်ထားသည်။ သို့သော် စစ်ရေးလေ့လာသူအချို့က အဆိုပါစခန်းသည် အရှေ့တောင်အာရှ၌ တရုတ်၏ ပထမဆုံး ပြည့်စုံသည့် ပို့ဆောင်ဆက်သွယ်ရေး စစ်အခြေစိုက်စခန်း တစ်ခုဖြစ်လာနိုင်ကြောင်း သုံးသပ်ကြသည်။ အမေရိကန်၏ မဟာမိတ်ဖြစ်သူ အိမ်နီးချင်း ထိုင်းနိုင်ငံကမူ လာအို၏ ပိုင်နက်နယ်မြေဆိုင်ရာ ဆုံးဖြတ်ပိုင်ခွင့်ကို လေးစားသော်လည်း အခြေအနေများအား အနီးကပ် ဆက်လက်စောင့်ကြည့်သွားမည်ဟု တုံ့ပြန်ထားသည်။

လာအိုနိုင်ငံတွင် တရုတ်စစ်တပ်က စစ်ရေးအထောက်အကူပြု လေကြောင်းစခန်းသစ် ဖွင့်လှစ်

Oct 1

ဗြိတိန် သုတေသနများအား တရုတ်ထောက်လှမ်းရေးများက အသုံးချနေကြောင်း MI5 သတိပေး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၁ ရက်။ ဗြိတိန်နိုင်ငံရှိ တက္ကသိုလ်များနှင့် သုတေသနပညာရှင် ၁၀၀ ကျော်သည် တရုတ်နိုင်ငံ၏ ထောက်လှမ်းရေးလုပ်ငန်းများအတွက် မသိမသာ ကူညီပေးမိလျက်သား ဖြစ်နေကြောင်း ဗြိတိန် ပြည်တွင်းလုံခြုံရေးဌာန (MI5) က အများပြည်သူသို့ အရေးပေါ် သတိပေးချက် ထုတ်ပြန်လိုက်သည်။ တရုတ်နိုင်ငံ၏ CGTRI နည်းပညာသုတေသနအဖွဲ့သည် တရုတ် နိုင်ငံတော်လုံခြုံရေးဝန်ကြီးဌာန၏ ရှေ့ထွက်အဖွဲ့အစည်းတစ်ခုဖြစ်ပြီး ဗြိတိန်ပညာရှင်များ၏ AI နည်းပညာ၊ ဆိုင်ဘာလုံခြုံရေးနှင့် လျှို့ဝှက်ဆက်သွယ်ရေးဆိုင်ရာ သုတေသနများကို ငွေကြေးထောက်ပံ့ကာ တရုတ်ထောက်လှမ်းရေး၏ နည်းပညာစွမ်းရည် မြှင့်တင်ရေးအတွက် အသုံးချနေခြင်းဖြစ်ကြောင်း MI5 က ဆိုသည်။ ဗြိတိန် လုံခြုံရေးဆိုင်ရာဝန်ကြီး Dan Jarvis က တက္ကသိုလ်ပါမောက္ခချုပ်များထံ စာရေးသားပေးပို့၍ အဆိုပါ တရုတ်အဖွဲ့အစည်းနှင့် ဆက်နွှယ်မှုများအား ချက်ချင်းရပ်ဆိုင်းရန် တောင်းဆိုထားသည်။ လန်ဒန်မြို့အခြေစိုက် တရုတ်သံရုံး ပြောရေးဆိုခွင့်ရှိသူကမူ အဆိုပါစွပ်စွဲချက်များမှာ အခြေအမြစ်မရှိဘဲ လုပ်ကြံဖန်တီးထားခြင်းဖြစ်ကြောင်း ငြင်းဆိုထားသည်။

ဗြိတိန် သုတေသနများအား တရုတ်ထောက်လှမ်းရေးများက အသုံးချနေကြောင်း MI5 သတိပေး

Oct 1

ကာလင်နင်ဂရက်ဒေသအား ပိတ်ဆို့ပါက နျူကလီးယားလက်နက်ဖြင့် တုံ့ပြန်မည်ဟု ရုရှား သတိပေး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၁ ရက်။ ရုရှားနိုင်ငံသည် မိမိတို့၏ အနောက်ဘက်စွန်းနယ်မြေဖြစ်သော ကာလင်နင်ဂရက် (Kaliningrad) ဒေသအား နေးတိုး (NATO) အဖွဲ့ဝင်နိုင်ငံများက ပိတ်ဆို့ရန် ကြိုးပမ်းပါက နျူကလီးယားလက်နက် အပါအဝင် လက်နက်အင်အား အပြည့်အဝအသုံးပြု၍ ကာကွယ်သွားမည်ဖြစ်ကြောင်း သတိပေးလိုက်သည်။ နေးတိုးအဖွဲ့က ကာလင်နင်ဂရက်ဒေသအား လေကြောင်းနှင့် ရေကြောင်းမှ ပိတ်ဆို့ရန် ပြင်ဆင်နေသည့် သတင်းအချက်အလက်များ ရရှိထားကြောင်း ဥရောပနိုင်ငံများရှိ ရုရှားသံရုံးများက ထုတ်ပြန်ခဲ့ခြင်း ဖြစ်သည်။ သို့သော် နေးတိုးအဖွဲ့ ပြောရေးဆိုခွင့်ရှိသူ အယ်လီဆင် ဟပ်ထ် (Allison Hart) က နေးတိုးသည် ခုခံကာကွယ်ရေး အဖွဲ့အစည်းတစ်ခုသာဖြစ်ပြီး ရုရှားပိုင်နက်အား ခြိမ်းခြောက်ခြင်းမရှိကြောင်းနှင့် ရုရှား၏ နျူကလီးယားဖြင့် ခြိမ်းခြောက်ပြောဆိုမှုများအား ပြင်းထန်စွာ ရှုတ်ချကြောင်း တုံ့ပြန်ခဲ့သည်။ ပိုလန်နှင့် လစ်သူရေးနီးယား နိုင်ငံတို့ကြား တည်ရှိသည့် ကာလင်နင်ဂရက်ဒေသသည် ရုရှား၏ ဘောလ်တစ် ရေတပ်စခန်းနှင့် နျူကလီးယားထိပ်ဖူး တပ်ဆင်နိုင်သည့် ဒုံးကျည်များ တပ်ဆင်ထားသော အရေးပါသည့် စစ်ရေးနယ်မြေတစ်ခု ဖြစ်သည်။

ကာလင်နင်ဂရက်ဒေသအား ပိတ်ဆို့ပါက နျူကလီးယားလက်နက်ဖြင့် တုံ့ပြန်မည်ဟု ရုရှား သတိပေး

Oct 1

ခရီးသည်တင်လေယာဉ် ပျက်ကျအောင် လေယာဉ်မှူးကို ဓါးနဲ့ထိုးသည့် တွဲဖက် လေယာဉ်မှူးအား ခရီးသည်များ ဝိုင်းဝန်းဖမ်းဆီး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၁ ရက်။ ဒူဘိုင်းမှ အစ္စရေးနိုင်ငံသို့ ပျံသန်းလာသည့် Flydubai လေကြောင်းလိုင်းပိုင် ခရီးသည်တင် လေယာဉ်ပေါ်တွင် စက်တင်ဘာလ ၃၀ ရက်နေ့က အိုမန်နိုင်ငံသား တွဲဖက်လေယာဉ်မှူးက လေယာဉ်မှူးကြီး စမစ် မက်ချာ (Smit Machchhar) အား ဓားဖြင့်ထိုးနှက်၍ လေယာဉ်ကို ပျက်ကျအောင် ပြုလုပ်ရန် ကြိုးပမ်းသည့် ဖြစ်စဉ်တစ်ခု ဖြစ်ပွားခဲ့သည်ဟု နိုင်ငံတကာ သတင်းများတွင် ဖော်ပြသည်။ ခရီးသည် ၁၇၄ ဦး တင်ဆောင်လာသည့် အဆိုပါ လေယာဉ်သည် အမြင့်ပေ ၃၃,၀၀၀ မှ ပေ ၁၇,၀၀၀ သို့ နှစ်မိနစ်ခန့်အတွင်း အရှိန်ဟုန်ဖြင့် ထိုးစိုက်ကျဆင်းခဲ့သဖြင့် လေယာဉ်အမြှီးပိုင်း ထိန်းချုပ်ယက်မ (Rudder) ပျက်စီးသည်အထိ အခြေအနေ ဆိုးရွားခဲ့သည်။ အိန္ဒိယနိုင်ငံသား လေယာဉ်မှူးကြီးသည် ပြင်းထန်စွာ ဒဏ်ရာရရှိခဲ့သော်လည်း အစွမ်းကုန် ပြန်လည်ခုခံကာ လေယာဉ်မှူးခန်း တံခါးကို ဖွင့်ပေးနိုင်ခဲ့သည်။ ထို့နောက် အစ္စရေး ခရီးသည်တစ်ဦးဖြစ်သူ ယာနစ်ဗ် ဟာယွန် (Yaniv Hayoun) နှင့် အခြားခရီးသည်များသည် လေယာဉ်မှူးခန်းအတွင်း ဝင်ရောက်ကာ တိုက်ခိုက်သူအား ချုပ်နှောင်ဆွဲထုတ်၍ ကြိုးတုပ်ဖမ်းဆီးခဲ့ကြသည်။ ခရီးသည် ယာနစ်ဗ် ဟာယွန် သည် လေယာဉ်ထိန်းချုပ်မောင်းတံများအား ပြန်လည်ဆွဲတင်၍ ပျံသန်းမှုကို ပုံမှန်အခြေအနေသို့ ရောက်ရှိစေရန် ဆောင်ရွက်ခဲ့ပြီး လေယာဉ်ပေါ်ပါ အရန်လေယာဉ်မှူးများက ဆက်လက်ထိန်းချုပ် မောင်းနှင်ကာ ဆော်ဒီအာရေးဘီးယားနိုင်ငံ၌ အရေးပေါ် ဘေးကင်းစွာ ဆင်းသက်နိုင်ခဲ့သည်။ ပြစ်မှုကျူးလွန်သူ တွဲဖက်လေယာဉ်မှူးအား ဆော်ဒီ အာဏာပိုင်များက ဖမ်းဆီးစစ်ဆေးလျက်ရှိပြီး အစ္စရေးနိုင်ငံကလည်း စုံစမ်းစစ်ဆေးမှုများတွင် ပူးပေါင်းပါဝင်သွားမည်ဖြစ်သည်။ အစ္စရေး ကာကွယ်ရေးဝန်ကြီးက အဆိုပါ ဖြစ်စဉ်အား အကြမ်းဖက်တိုက်ခိုက်မှုအဖြစ် သတ်မှတ်ထားပြီး သက်ဆိုင်ရာ အာဏာပိုင်များက အသေးစိတ် ဆက်လက်စုံစမ်း စစ်ဆေးလျက်ရှိသည်။

ခရီးသည်တင်လေယာဉ် ပျက်ကျအောင် လေယာဉ်မှူးကို ဓါးနဲ့ထိုးသည့် တွဲဖက် လေယာဉ်မှူးအား ခရီးသည်များ ဝိုင်းဝန်းဖမ်းဆီး

Oct 1

အထိနာလာသော စစ်တပ်က စစ်တွေ-ပုဏ္ဏားကျွန်း စစ်မျက်နှာတွင် လေကြောင်းနှင့် လက်နက်ကြီး အားပြုလာ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၁ ရက်။ ရခိုင်ပြည်၊ စစ်တွေ-ပုဏ္ဏားကျွန်း စစ်မျက်နှာတွင် အာရက္ခတပ်တော် (AA) ၏ တန်ပြန်ထိုးစစ်ကြောင့် မြေပြင်၌ အထိနာနေသည့် စစ်အုပ်စုသည် စစ်တွေမြို့အနီးဝန်းကျင်ရှိ ကျေးရွာများကို လေကြောင်းနှင့် လက်နက်ကြီး များ အသုံးပြုကာ ဆက်တိုက် တိုက်ခိုက်လာနေကြောင်း ဒေသခံ စစ်ရေးသတင်းရင်းမြစ်များက ပြောသည်။ စက်တင်ဘာလ ၄ ရက်နေ့မှစတင်၍ စစ်အုပ်စုတပ်သည် ပုဏ္ဏားကျွန်းမြို့နယ်အတွင်းသို့ အင်အား ၁,၀၀၀ ကျော် ဖြင့် စစ်ကြောင်းများခွဲကာ ထိုးစစ်ဆင်ခဲ့သော်လည်း AA ဘက်က ဝါဘိုနှင့် စပါးထားကျေးရွာများကို ပြန်လည် ခြေကုပ်ယူနိုင်ခဲ့သည့်အပြင် စစ်တွေဒေသကွပ်ကဲမှုစစ်ဌာနချုပ် (ဒကစ) လက်အောက်ခံ ကံကော်ကျွန်းအထိ ဆက်လက် ထိုးစစ်ဆင်လာသဖြင့် စစ်အုပ်စုတပ် စစ်ကြောင်းများ အထိနာကာ ဆုတ်ခွာခဲ့ရခြင်း ဖြစ်သည်။ ဒေသခံ စစ်ရေးသတင်းရင်းမြစ် အမျိုးသားတစ်ဦးက “စစ်တွေ-ပုဏ္ဏားကျွန်း နယ်စပ်မှာ စစ်တပ်ရဲ့ စစ်ကြောင်း တွေ အကျအဆုံးများတယ်။ ပြန်ဆုတ်နိုင်ခဲ့တာရှိသလို တချို့က နေရာတွေမှာ ပိတ်မိပြီး စစ်တွေဘက် ပြန် မဆုတ်နိုင်တာတွေရှိတယ်။ AA က နယ်စပ်ကပိတ်ပြီး စစ်ဆိုင်ထားတော့ ပိတ်မိတဲ့ စစ်သားတွေ ပြန်ထွက်လို့ မရဘူး။ အခု စစ်တပ်က လေကြောင်းကိုပဲ အားပြုနေရတယ်” ဟု ပြောဆိုသည်။ မြေပြင်တွင် အကျအဆုံးများနေသည့် စစ်အုပ်စုတပ်သည် စက်တင်ဘာလ ၃၀ ရက်နေ့၊ ည ၉ နာရီခန့်က ပုဏ္ဏားကျွန်းမြို့အနီး စစ်ဘေးရှောင်များ ခိုလှုံနေသည့် ကျောက်ဆိပ်ကျေးရွာကို လေကြောင်းမှ ဗုံးကြဲခဲ့သဖြင့် ပုဏ္ဏားကျွန်းမြို့ပေါ်မှ စစ်ဘေးရှောင်လာသူ အသက် ၄ နှစ်အရွယ် မောင်နေကျော်လင်းနှင့် ကျောက်ဆိပ်ရွာသူ အသက် ၂၆ နှစ်အရွယ် မခင်ခင်သန်းတို့ ဒဏ်ရာရရှိခဲ့သည်။ အခြား ဒေသခံ စစ်ရေးသတင်းရင်းမြစ် အမျိုးသားတစ်ဦးကလည်း “စစ်တွေ-ပုဏ္ဏားကျွန်း နယ်စပ်မှာ စစ် ကြောင်းထိုးတာတွေက အကျအဆုံးတွေနဲ့ ရင်ဆိုင်ရတော့ လေကြောင်းနဲ့ လက်နက်ကြီးပစ်တာတွေ လုပ်ဆောင် နေပါတယ်။ ပုဏ္ဏားကျွန်းမြို့ပေါ် အထိ ဗုံးကြဲတာ ၂ ယောက် ဒဏ်ရာရတယ်။ စစ်တွေ-ပုဏ္ဏားကျွန်း-ရသေ့ တောင် လမ်းပေါ်က တံဘက်လှမ်းရွာကိုလည်း လက်နက်ကြီးတွေနဲ့ လှမ်းပစ်နေပါတယ်။ ဒေသခံတွေကတော့ တိမ်းရှောင်ပေမဲ့ တချို့က ပြေးဖို့နေရာမရှိသလို ဖြစ်နေတယ်” ဟု ပြောသည်။ စစ်အုပ်စုတပ်သည် စက်တင်ဘာလ ၂၈ ရက်က စစ်တွေ-ပုဏ္ဏားကျွန်း နယ်စပ်တောင်တန်းများကို ကင်းထောက် လေယာဉ်များဖြင့် ပျံသန်းထောက်လှမ်းကာ ဒရုန်းဖြင့် ပစ်ခတ်မှုများ ပြုလုပ်ခဲ့ပြီး စက်တင်ဘာလ ၂၉ ရက်နှင့် ၃၀ ရက်တို့တွင်လည်း ကံကော်ကျွန်း၊ ဝါဘို၊ စပါးထားနှင့် တံဘက်လှမ်းကျေးရွာများအတွင်းသို့ လက်နက်ကြီးများ ဆက်တိုက် ပစ်ခတ်ခဲ့သည်။ ထို့ပြင် စက်တင်ဘာလ ၂၃ ရက်ကလည်း ပုဏ္ဏားကျွန်းမြို့နယ် ဖက်ကျကျေးရွာကို စစ်အုပ်စုတပ်က Y-12 လေယာဉ်တစ်စီး၊ ဂျက်တိုက်လေယာဉ်နှစ်စီးတို့ဖြင့် နာရီဝက်ခန့် ဗုံးကြဲခဲ့၍ အရပ်သား ၂ ဦး သေဆုံးကာ နေအိမ် ၂၅ လုံး ပျက်စီးခဲ့သည့်အပြင် စက်တင်ဘာလ ၂၀ ရက်ကလည်း ကုလားချောင်းကျေးရွာကို ဂျက်တိုက်လေယာဉ် ဖြင့် ဗုံးကြဲခဲ့သဖြင့် အရပ်သား ၁ ဦး သေဆုံးခဲ့ရသည်။ လက်ရှိတွင် စစ်တွေ-ပုဏ္ဏားကျွန်း နယ်စပ်ရှိ ကြက်တောရာ၊ ပါဒလိပ်၊ မံစီ၊ အမ်ဘာရီနှင့် ကျောက်တန်းကျေးရွာ တို့၌ စစ်အုပ်စုတပ်၏ စစ်ရေးလှုပ်ရှားမှုများ ရှိနေပြီး စစ်တွေ-ပုဏ္ဏားကျွန်း-ရသေ့တောင် လမ်းမကြီး အနီးဝန်း ကျင်သို့ ထပ်မံစစ်ကြောင်းထိုးရန် ပြင်ဆင်လျက်ရှိသည်။ ဓါတ်ပုံ - (စက်တင်ဘာ ၁၃ ရက်နေ့က ပုဏ္ဏားကျွန်းမြို့၊ ဦးရာဇ်တော်ဘုရား တောင်ခြေ ကြိုးတံတားအနီး စစ်အုပ်စုတပ်၏ လေကြောင်းမှ ဗုံးကြဲတိုက်ခိုက်ခံရမှု မြင်ကွင်း။ / AA Info Desk) #စစ်တွေ #ပုဏ္ဏာကျွန်း

အထိနာလာသော စစ်တပ်က စစ်တွေ-ပုဏ္ဏားကျွန်း စစ်မျက်နှာတွင် လေကြောင်းနှင့် လက်နက်ကြီး အားပြုလာ

Oct 1

စခန်းသိမ်းတိုက်ပွဲ အပြီး မိုးမိတ်တွင် စစ်ရေးတင်းမာနေ၍ ဒေသခံများ စိုးရိမ်နေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၃၀ ရက်။ ရှမ်းပြည်မြောက်ပိုင်း၊ မိုးမိတ်မြို့အနီးတွင် စစ်အုပ်စုတပ်၏ စခန်းတစ်ခုကို တော်လှန်ရေး ပူးပေါင်းတပ်များက တိုက်ခိုက်သိမ်းပိုက်လိုက်ပြီးနောက် စက်တင်ဘာလ ၃၀ ရက်အထိ စစ်ရေး ဆက်လက်တင်းမာနေသဖြင့် မြို့ခံနှင့် ကျေးရွာနေ ပြည်သူများ စိုးရိမ်ထိတ်လန့်ကာ ဘေးလွတ်ရာသို့ ထွက်ပြေးတိမ်းရှောင်နေကြရသည်။ စက်တင်ဘာလ ၂၈ ရက်နေ့ နံနက်ပိုင်းမှစ၍ မိုးမိတ်မြို့နှင့် ၃ မိုင်ခန့်အကွာရှိ ညောင်နီကျေးရွာအထက် ရွှေမြင် တင် စေတီကုန်းပေါ်တွင် တပ်စွဲထားသည့် စစ်အုပ်စုတပ် ဗျူဟာစခန်းကို ကချင်လွတ်လပ်ရေးတပ်မတော် (KIA) နှင့် PDF ပူးပေါင်းတပ်များက တိုက်ခိုက်သိမ်းပိုက်ခဲ့သည်။ အဆိုပါ တိုက်ပွဲအတွင်း စစ်အုပ်စုတပ်ဖွဲ့ဝင် အလောင်းအချို့၊ လက်နက်ခဲယမ်းများနှင့် တပ်ဖွဲ့ဝင် ၅ ဦးထက် မနည်း ဖမ်းဆီးရမိခဲ့ကြောင်း မြေပြင်သတင်းရင်းမြစ်များက ပြောသည်။ စခန်းလက်လွှတ်လိုက်ရပြီးနောက် စစ်အုပ်စုတပ်က Y-12 လေယာဉ်၊ ဂျက်ဖိုက်တာများနှင့် တိုက်ခိုက်ရေး ရဟတ်ယာဉ်များ အသုံးပြုကာ ညောင်နီနှင့် မိုးမိတ်မြို့ပြင် အနီးဝန်းကျင်သို့ မပြတ် ဗုံးကြဲတိုက်ခိုက်လျက်ရှိရာ စက်တင်ဘာလ ၃၀ ရက်အထိ စစ်ရေးတင်းမာမှု ဆက်လက်ရှိနေသည်။ “အခုက လူထုကတော့ စစ်ရှောင်ပေါ့ဗျာနော်။ တစ်ညလုံး ပစ်နေကြတာကိုး။ ၂၉ ရက်နေ့ မနက်ပိုင်းမှာလည်း Y-12 ရော ဂျက်ဖိုက်တာရော လာပြီး ဗုံးကြဲနေ တော့ ညောင်နီ နားကရော ရွှေမြင်တင် ဘုရားကုန်းဘက်က ရော လူတွေ အကုန်လုံးနီးပါး ဘေးလွတ်ရာကို ပြေးနေကြရပြီ” ဟု မိုးမိတ်မြို့ခံ အမျိုးသားတစ်ဦးက ပြော သည်။ ထို့ပြင် စစ်အုပ်စုတပ်က မန္တလေးတိုင်း မိုးကုတ်မြို့ဘက်မှစ၍ စစ်အင်အား ဖြည့်တင်းမှုများ ပြုလုပ်နေသလို စက်တင်ဘာလ ၂၈ ရက်နေ့ ညနေပိုင်းမှစ၍ မိုးမိတ်-မိုးကုတ် လမ်းပိုင်းကိုလည်း သွားလာခွင့် လုံးဝပိတ်ဆို့ထား သဖြင့် ဒေသခံများမှာ ကျန်းမာရေးနှင့် လူမှုရေးကိစ္စများအတွက် သွားလာရန် အခက်အခဲနှင့် ကြုံတွေ့နေရသည်။ တော်လှန်ရေးတပ်ဖွဲ့နှင့် နီးစပ်သည့် မြေပြင် စစ်ရေးအခြေအနေကို သိရှိသူ ဒေသခံတစ်ဦးက “တော်လှန်ရေး တပ်ဖွဲ့တွေဘက်က စကစ စခန်းအရင်သိမ်းလိုက်တယ်။ အဲ့မှာ စတာပဲ။ နဂိုကတည်းကတော့ အမြဲအသင့်အနေ ထားပဲ။ အခုဆိုရင် တိုက်ပွဲက မိုးမိတ်မြို့အဝင် ရွှေဇာလီတံတားနားထိတောင် ရောက်နေပြီ။ စစ်အုပ်စုဘက်က အထိနာတော့ မိုးကုတ်ဘက်ကနေ ခြေလျင်စစ်ကြောင်းတွေနဲ့ပါ အင်အား ထိပ်ဖြည့်တယ်လို့လည်း ကြားတယ်။ မြို့ပေါ်အထိ တိုက်ပွဲကူးလာမှာကို အကုန်လုံး စိုးရိမ်နေကြတာ။ လမ်းပိုင်းတချို့လည်း စစ်တပ်က ပိတ်ထား တယ်လို့ ကြားထားတယ်” ဟု ပြောသည်။ မိုးမိတ်မြို့နှင့် မဘိမ်းမြို့နယ်အစပ် မြစ်ဆုံကျေးရွာဘက်တွင်လည်း လေကြောင်းမှ ဗုံးကြဲမှုများ ရှိနေပြီး စစ်အုပ်စုတပ်သည် မိုးမိတ်မှ မြစ်ဆုံနှင့် မဘိမ်းဘက်သို့ ထိန်းချုပ်နိုင်ရန် ကြိုးပမ်းနေသကဲ့သို့ တော်လှန်ရေး ပူးပေါင်းတပ်များကလည်း ရွှေလီမြစ်ဝှမ်း အထက်ဘက်သို့ စစ်အုပ်စု စစ်ကြောင်းမထိုးနိုင်စေရန် မြို့ပြင်မှ ပိတ်ဆို့တိုက်ခိုက်နေ၍ တိုက်ပွဲများ မနီးမဝေးသို့ ကူးစက်လာမည်ကို ဒေသခံများက စိုးရိမ်နေကြသည်။ မိုးမိတ်မြို့သည် 1027 စစ်ဆင်ရေးအတွင်း တအာင်းအမျိုးသားလွှတ်မြောက်ရေးတပ်မတော် (TNLA) က သိမ်းပိုက်ခဲ့သော်လည်း ၂၀၂၅ ခုနှစ် အောက်တိုဘာလတွင် စစ်အုပ်စုထံ ပြန်လည်လွှဲပြောင်းပေးခဲ့ရသည့် မြို့ဖြစ် သည်။ ထို့နောက် မြို့တွင်း၌ စစ်အုပ်စုတပ်က တပ်စွဲထားပြီး မြို့ပြင်ကျေးရွာများတွင် ကချင်လွတ်လပ်ရေး တပ်မတော် KIA၊ PDF နှင့် ရှမ်းပြည်တိုးတက်ရေးပါတီ (SSPP/SSA) စသည့် တပ်ပေါင်းစုများ အင်အားဖြည့်ထားသဖြင့် စစ်ရေး အမြဲမပြတ် တင်းမာနေသည့် ဒေသတစ်ခု ဖြစ်သည်။ ဓါတ်ပုံ - (ပုံဟောင်း / မိုးမိတ်မြို့အဝင်၌ PDF ရဲဘော်များအား တွေ့ရစဉ် - MDY PDF) #မိုးမိတ်

စခန်းသိမ်းတိုက်ပွဲ အပြီး မိုးမိတ်တွင် စစ်ရေးတင်းမာနေ၍ ဒေသခံများ စိုးရိမ်နေ

Oct 1

ရခိုင်က မြို့နယ် ၃ ခုကို စစ်အုပ်စုတပ် လေကြောင်းမှကြဲ၊ အရပ်သား ၁ ဦး သေ၊ ၈ ဦး ဒဏ်ရာရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၁ ရက်။ ရခိုင်ပြည် စစ်တွေမြို့အနီး တိုက်ပွဲများတွင် အကျအဆုံးများနေသည့် စစ်အုပ်စုတပ်သည် အာရက္ခ တပ်တော် (AA) ထိန်းချုပ်ထားသည့် စစ်တွေမြို့ အနီးဝန်းကျင် မြို့နယ် ၃ ခုကို လေကြောင်းမှ ဆက်တိုက် ဗုံးကြဲတိုက်ခိုက်ခဲ့သဖြင့် ၄ နှစ်အရွယ် ကလေးငယ်တစ်ဦး အပါအဝင် အရပ်သား ၈ ဦး ထိခိုက်ဒဏ်ရာရရှိခဲ့ပြီး အမျိုးသားတစ်ဦး သေဆုံးသွားခဲ့သည်။ လူပေါင်း ၅၀ ဦးထက်မနည်း သေဆုံးခဲ့ရသည့် ကျောက်တော်မြို့ အိန္ဒိယဈေး လေကြောင်းဗုံးကြဲခံရမှု ဖြစ်ပွားပြီး ရက်ပိုင်းအကြာမှာပင် စစ်အုပ်စုတပ်သည် ပုဏ္ဏားကျွန်း၊ ရသေ့တောင်နှင့် ပေါက်တော (ဝီရဋ္ဌာနီ) မြို့နယ်များ အတွင်းရှိ အရပ်သားကျေးရွာများကို ဂျက်ဖိုက်တာများဖြင့် ရမ်းသန်း ဗုံးကြဲတိုက်ခိုက်ခဲ့ခြင်းဖြစ်သည်။ စက်တင်ဘာလ ၃၀ ရက်နေ့ ည ၉ နာရီကျော်တွင် ပုဏ္ဏားကျွန်းမြို့အနီး စစ်ဘေးရှောင်များ ခိုလှုံနေသည့် ကျောက်ဆိပ်ကျေးရွာကို ဂျက်ဖိုက်တာဖြင့် ဗုံးကြဲခဲ့သဖြင့် ပုဏ္ဏားကျွန်းမြို့ပေါ်မှ စစ်ဘေးရှောင်လာသည့် အသက် ၄ နှစ်အရွယ် မောင်နေကျော်လင်း၏ ဘယ်ဘက်ခြေထောက် ထိမှန်ခဲ့ပြီး အသက် ၂၆ နှစ်အရွယ် အမျိုးသမီး တစ်ဦးလည်း ခန္ဓာကိုယ်အနှံ့ ပြင်းထန်စွာ ဒဏ်ရာရရှိခဲ့သည်။ ပုဏ္ဏားကျွန်း ဒေသခံတစ်ဦးက “စစ်တွေဘက်မှာ မြေပြင်တိုက်ပွဲဖြစ်ပြီး စစ်အုပ်စုတပ် အကျအဆုံးများသွားရင် ဒီဘက်ကို လေယာဉ်နဲ့ တန်းလာကြဲတော့တာပဲ။ စစ်ဘေးရှောင်တွေ ဒုက္ခရောက်နေတာကို ကြည့်မရလို့ တမင် ရမ်းသန်းပစ်တာ။ တစ်ညလုံး ပုဏ္ဏားကျွန်း ပတ်ဝန်းကျင်မှာ လေယာဉ်သံ လက်နက်ကြီးသံတွေ ဆူညံပြီး ဗုံးတွေ ဆက်တိုက် ကြဲနေတာပါ” ဟု ပြောသည်။ အလားတူ ရသေ့တောင်မြို့နယ် မူစဲကျွန်းဒေသ ကူတောင်ကျေးရွာကိုလည်း ည ၁၀ နာရီခန့်တွင် စစ်အုပ်စုတပ်က ပေါက်ကွဲအားပြင်း ဗုံး နှစ်လုံး ကြဲချခဲ့ရာ နေအိမ်အတွင်း ရှိနေသည့် လင်မယား နှစ်ဦး ထိမှန်ခဲ့သည်။ ထိုတိုက်ခိုက်မှုကြောင့် အသက် ၅၁ နှစ်အရွယ် ဦးအောင်ထွန်းသိန်း သေဆုံးခဲ့ပြီး ဇနီးဖြစ်သူ ထိမှန် ဒဏ်ရာရခဲ့ သည့်အပြင် အနီးအနားရှိ နေအိမ်များပါ ပျက်စီးသွားခဲ့သည်။ ရသေ့တောင် ဒေသခံတစ်ဦးက “နေအိမ်ပေါ် တည့်တည့်ကျသွားတော့ လင်မယား နှစ်ဦးလုံး ဗုံးစထိမှန်တာ။ ယောက်ျားဖြစ်သူကတော့ သေသွားတယ်။ သူ့မိန်းမ ဒေါ်ဝင်းနုကတော့ ဒဏ်ရာရသွားတယ်။ အနားက အိမ်တွေပါ ပျက်စီးသွားတော့ အခု ရွာသားတွေ စစ်ဘေး ထပ်ရှောင်နေကြရတယ်” ဟု ပြောသည်။ ထို့ပြင် ပေါက်တောမြို့နယ်ကိုလည်း ညသန်းခေါင် ၁၂ နာရီကျော်တွင် လေယာဉ်ဖြင့် ဗုံးများ ဆက်တိုက် ကြဲချခဲ့ သဖြင့် အရပ်သား ၅ ဦး ဒဏ်ရာရရှိခဲ့သည်။ ကုလသမဂ္ဂ၏ မြန်မာနိုင်ငံဆိုင်ရာ လွတ်လပ်သော စုံစမ်းစစ်ဆေးရေးယန္တရား (IIMM) က စက်တင်ဘာလ ၃၀ ရက်နေ့တွင် ထုတ်ပြန်ရာ၌ စစ်အုပ်စုတပ်သည် ဈေးကဲ့သို့သော အများပြည်သူဆိုင်ရာ အခြေခံအဆောက်အအုံ များကို ပစ်မှတ်ထား တိုက်ခိုက်နေပြီး၊ အရပ်သားများအပေါ် ပစ်မှတ်မခွဲခြားဘဲ လေကြောင်းမှ တိုက်ခိုက်ခြင်း သည် လူသားမျိုးနွယ်အပေါ် ကျူးလွန်သည့် စစ်ရာဇဝတ်မှုဖြစ်ကြောင်း ထောက်ပြထားသည်။ လက်ရှိတွင် စစ်တွေမြို့ပေါ်အထိ ပစ်ခတ်သံများ ကြားနေရပြီး စစ်အုပ်စုတပ်သည် မြေပြင်တိုက်ပွဲများတွင် အကျ အဆုံးများပြားလာသည့် အခါ AA ထိန်းချုပ်ထားသည့် အနီးဝန်းကျင် အရပ်သားကျေးရွာများကို လေကြောင်းမှ ပစ်မှတ်ထား တိုက်ခိုက်လျက်ရှိသည်။ #စစ်တွေမြို့

ရခိုင်က မြို့နယ် ၃ ခုကို စစ်အုပ်စုတပ် လေကြောင်းမှကြဲ၊ အရပ်သား ၁ ဦး သေ၊ ၈ ဦး ဒဏ်

1 2 3 … 1,148 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

ဂျပန်နိုင်ငံက အမြဲတမ်းနေထိုင်ခွင့် လျှောက်ထားခအား အဆ ၂၀ ထိ တိုးမြှင့် — October 1, 2026 6:37 pm
လာအိုနိုင်ငံတွင် တရုတ်စစ်တပ်က စစ်ရေးအထောက်အကူပြု လေကြောင်းစခန်းသစ် ဖွင့်လှစ် — October 1, 2026 6:35 pm
ဗြိတိန် သုတေသနများအား တရုတ်ထောက်လှမ်းရေးများက အသုံးချနေကြောင်း MI5 သတိပေး — October 1, 2026 6:35 pm

Recent Posts

ကချင်နှင့် ရှမ်း-ကချင်အစပ် မြို့နယ် ၆ ခုတွင် KIA နှင့် စစ်အုပ်စုတပ်တို့ တိုက်ပွဲများ ဆက်လက်ပြင်းထန်
ဂျပန်နိုင်ငံက အမြဲတမ်းနေထိုင်ခွင့် လျှောက်ထားခအား အဆ ၂၀ ထိ တိုးမြှင့်
လာအိုနိုင်ငံတွင် တရုတ်စစ်တပ်က စစ်ရေးအထောက်အကူပြု လေကြောင်းစခန်းသစ် ဖွင့်လှစ်
ဗြိတိန် သုတေသနများအား တရုတ်ထောက်လှမ်းရေးများက အသုံးချနေကြောင်း MI5 သတိပေး
ကာလင်နင်ဂရက်ဒေသအား ပိတ်ဆို့ပါက နျူကလီးယားလက်နက်ဖြင့် တုံ့ပြန်မည်ဟု ရုရှား သတိပေး

Archives

Archives

×Close