NMG Doh – Page 2 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
နိုင်ငံတကာသတင်း
NMG အကြောင်း
Contact

Home
Author Archive

NMG Doh

Author: NMG Doh

Oct 1

ထားဝယ်တွင် ရေကြီးမြေပြိုမှုအကြား စစ်အုပ်စုတပ် လေကြောင်းဗုံးကြဲ၍ စစ်ကြောင်းပါထိုးနေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၁ ရက်။ တနင်္သာရီတိုင်း၊ ထားဝယ်ခရိုင်အတွင်း မိုးဆက်တိုက်ရွာသွန်းပြီး ရေကြီးမြေပြိုမှုများကြောင့် ပြည်သူ ၃၀ ကျော် သေဆုံးကာ အရေးပေါ် ကူညီကယ်ဆယ်ရေးများ လိုအပ်နေချိန်တွင် စစ်အုပ်စုတပ်က မကူညီသည့်အပြင် လေ ကြောင်းမှ ဗုံးကြဲတိုက်ခိုက်ခြင်းနှင့် မြေပြင်စစ်ကြောင်းထိုးမှုများကို ဆက်တိုက် ပြုလုပ်လျက်ရှိသည်။ စက်တင်ဘာလ ၃၀ ရက်နေ့ ညနေ ၃ နာရီခန့်တွင် ထားဝယ်အရှေ့တောဒေသ ပကာရီကျေးရွာအုပ်စု ရေဝိုင်း ကျေးရွာနှင့် နဘုလယ်ဒေသဘက်သို့ စစ်အုပ်စုတပ်က ဂျက်ဖိုက်တာဖြင့် ဗုံးကြဲတိုက်ခိုက်ခဲ့သည့်အပြင် ဒေသ အတွင်း ဖုန်းလိုင်းများကိုလည်း ကြိုတင်ဖြတ်တောက်ထားခဲ့ကြောင်း ဒေသခံများနှင့် တော်လှန်ရေးတပ်ဖွဲ့ တာ ဝန်ရှိသူများက ပြောသည်။ ထားဝယ်အရှေ့တောဒေသတွင် စစ်ရေးလှုပ်ရှားနေသည့် တော်လှန်ရေးတပ်ဖွဲ့ တာဝန်ရှိသူတစ်ဦးက “ဒီမှာက ရေတွေကကြီး၊ မြေတွေကပြိုနဲ့ အားလုံးက ဒုက္ခရောက်နေကြတာပါ။ ဘာတိုက်ပွဲမှ မရှိဘဲကို လာကြဲသွားတာ။ ဒီဗုံးကြဲမှုထဲမှာ လူအထိအခိုက်တော့ မရှိဘူးဆိုပေမယ့် လူတွေကတော့ စိုးရိမ်ထိတ်လန့်ရတာပေါ့။ ရွာဝန်းကျင် ကိုပဲ ကြဲချသွားတာပါ” ဟု ပြောသည်။ လက်ရှိတွင် ထိုင်းနိုင်ငံဘက်မှ လေဖိအားနည်းရပ်ဝန်း အရှိန်ကြောင့် စက်တင်ဘာလ ၂၆ ရက်မှစ၍ ထားဝယ်၊ လောင်းလုံး၊ သရက်ချောင်း၊ ရေဖြူနှင့် မြိတ်မြို့နယ်တို့၌ ရေကြီးမြေပြိုမှုများ ကြုံတွေ့နေရခြင်းဖြစ်သည်။ ထားဝယ်အမျိုးသားအဖွဲ့ချုပ်၏ ထုတ်ပြန်ချက်အရ ထားဝယ်ဒေသတစ်ခုလုံး၌ တောင်ပြိုမှုနှင့် ရေကြီးမှုများ ကြောင့် စုစုပေါင်း ၃၂ ဦး သေဆုံးကြောင်း အတည်ပြုထားနိုင်ပြီး ပျောက်ဆုံးနေသူ ဆယ်ဂဏန်းအထိ ရှိနေကာ နေအိမ်နှင့် အဆောက်အအုံ ၃၀၀ ဝန်းကျင် ပျက်စီးသွားခဲ့သည်။ အဆိုးဝါးဆုံး ရေဘေးကြုံတွေ့နေရသည့် လောင်းလုံးမြို့နယ် ကျောက်ဆင်ကျေးရွာဘက်သို့ စက်တင်ဘာလ ၂၈ ရက်က အင်အား ၁၀၀ ခန့်ပါ စစ်အုပ်စုတပ် စစ်ကြောင်းသည် သဘာဝဘေး ကူညီပေးမည်ဟု အကြောင်းပြကာ ဝင်ရောက်လာခဲ့သော်လည်း ရေဘေးသင့်ကျေးရွာများသို့ မသွားဘဲ ရွာအတွင်း အထိုင်ချ တပ်စွဲထားကြောင်း ဆိုသည်။ “ဖုန်းလိုင်းတွေ ဖြတ်ထားတော့ ရေဘေးသင့်နေတဲ့ ရွာက ဆွေမျိုးတွေကို စိတ်ပူနေရတာ။ အခု ကယ်ဆယ်ရေး လာမယ်ဆိုတဲ့ စစ်အုပ်စုတပ်ကလည်း ရွာထဲမှာပဲ တပ်စွဲပြီး ပေါ်တာဆွဲ ဖမ်းမှာစိုးလို့ လူငယ်တွေ ပုန်းပြေးနေရ တယ်” ဟု ထားဝယ်မြို့ခံတစ်ဦးက ပြောသည်။ စက်တင်ဘာလ ၂၈ ရက်ကလည်း ထားဝယ်မြို့ပေါ် ကြက်စားပြင်ရပ်ကွက်၌ လူငယ်တစ်ဦးကို စစ်အုပ်စုတပ်က ပေါ်တာဆွဲ ဖမ်းဆီးသွားခဲ့သည့်အပြင် ရေဖြူမြို့နယ် သစ်တိုထောင့်ကျေးရွာနှင့် ထားဝယ်အထူးစီးပွားရေးဇုန် အနီးတို့တွင်လည်း စစ်ကြောင်းများ ဝင်ရောက်လာသဖြင့် တော်လှန်ရေးတပ်ဖွဲ့များနှင့် ထိတွေ့တိုက်ပွဲများ ဆက် တိုက် ဖြစ်ပွားလျက်ရှိသည်။ လက်ရှိတွင် ထားဝယ်ဘက်မှ စီးဆင်းလာသော ရေများကြောင့် တနင်္သာရီမြစ်ရေသည် စိုးရိမ်ရေမှတ်ထက် ၂ ပေ ကျော်အထိ မြင့်တက်လာပြီး အနီးဝန်းကျင် ကျေးရွာ ၂၀၀ အထက် ရေကြီးနစ်မြုပ်မှုများ ကြုံတွေ့နေရသဖြင့် စစ်ဘေးနှင့် သဘာဝဘေး နှစ်ထပ်ကွမ်း ရင်ဆိုင်နေရသော ဒေသခံများအတွက် အရေးပေါ် အကူအညီများ လိုအပ်လျက်ရှိသည်။ #တနင်္သာရီတိုင်း # ထားဝယ်ခရိုင်

ထားဝယ်တွင် ရေကြီးမြေပြိုမှုအကြား စစ်အုပ်စုတပ် လေကြောင်းဗုံးကြဲ၍ စစ်ကြောင်းပါထိုးနေ

Sep 30

စစ်ကြောင်းထိုးလာ၍ ကန်ပက်လက်တွင် အရပ်သား ၁,၀၀၀ ကျော် စစ်ဘေးရှောင်နေရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၃၀ ရက်။ ချင်းပြည်တောင်ပိုင်း၊ ကန်ပက်လက်မြို့နယ်၊ လောင်းရှည်-ကျင်ဒွေး လမ်းပိုင်းရှိ ကျေးရွာများအတွင်းသို့ စစ်အုပ်စုတပ် စစ်ကြောင်း ထိုးဝင်ရောက်လာသောကြောင့် မဆာတွီကျေးရွာ အပါအဝင် အနီးဝန်းကျင်ရှိ ကျေးရွာ ၇ ရွာမှ ဒေသခံပြည်သူ ၁,၀၀၀ ကျော် စစ်ဘေးလွတ်ရာသို့ တိမ်းရှောင်နေကြရသည်။ အဆိုပါ စစ်ကြောင်းမှာ အင်အား ၅၀၀ ကျော်ပါဝင်ပြီး တပ်မ ၇၇ ဗျူဟာမှူး ကိုယ်တိုင် ဦးစီးကာ ယောဒေသနယ် အနောက်တောင်ပိုင်းမှ ချင်းပြည်နယ်တောင်ပိုင်း ထိစပ်နယ်မြေများသို့ ထိုးစစ်ဆင်လာခြင်းဖြစ်သည်။ စက်တင်ဘာလ ၂၈ ရက်နေ့ မွန်းလွဲပိုင်းတွင် ကန်ပက်လက်မြို့နယ်အတွင်း အင်အား ၂၀၀ ကျော် ဝင်ရောက်လာ ပြီး မဆာတွီကျေးရွာတွင် တပ်စွဲထားကြောင်း ဒေသခံက ပြောသည်။ စစ်ကြောင်း ထိုးစစ်ဆင်မှု အခြေအနေနှင့် ပတ်သက်၍ ဒေသခံ တော်လှန်ရေး သတင်းအရင်းအမြစ် တစ်ဦးက “စစ်အုပ်စုတပ်က အင်အားတချို့ကို လောင်းရှည်မြို့နယ် ဆွဲလွဲကျင်းရွာ လမ်းဘက်မှာ ချန်ထားခဲ့တယ်။ အင် ဘူး၊ ဆွဲလွဲကျင်း၊ မဆာတွီ စတဲ့ ကျေးရွာတွေက ဒေသခံတွေ ထွက်ပြေးနေရပြီ။ စစ်ကြောင်းက လူတချို့ကို လည်း ဖမ်းဆီးထားတာမျိုးတွေ ရှိတယ်” ဟု ပြောသည်။ ထို့ပြင် စစ်အုပ်စုတပ်သည် ကျင်ဒွေးမြို့ဘက်မှ ဆင်းလာသည့် ဆိုင်ကယ် ၂ စီးနှင့် ပြည်သူ ၄ ဦးကို အင်ဘူး ကျေးရွာတွင် ဖမ်းဆီးထိန်းသိမ်းခဲ့ပြီး စစ်ကြောင်းနှင့်အတူ ခေါ်ဆောင်သွားသည့်အပြင် နောက်ထပ် ဒေသခံ ပြည်သူ အချို့ကိုလည်း ဆက်လက် ဖမ်းဆီးထားကြောင်း အဆိုပါ စစ်ရေးသတင်းရင်းမြစ်က ပြောသည်။ မြေပြင်စစ်ကြောင်း ထိုးလာမှုနှင့်အတူ စစ်အုပ်စုတပ်သည် ကန်ပက်လက်မြို့နယ်၊ အမှတ် (၆) ရှိ မဆာတွီကျေး ရွာသို့ လေကြောင်းမှပါ ၃ ရက်ဆက်တိုက် ဗုံးကြဲတိုက်ခိုက်ခဲ့ကြောင်း ဒေသတွင်းသတင်းဌာန အချို့က ဖော်ပြထားသည်။ စက်တင်ဘာလ ၂၆ ရက် မွန်းလွဲ ၁၂ နာရီဝန်းကျင်၊ စက်တင်ဘာလ ၂၇ ရက် မွန်းလွဲ ၁ နာရီဝန်းကျင်နှင့် စက်တင် ဘာလ ၂၈ ရက် ညနေ ၆ နာရီဝန်းကျင်တို့တွင် မကွေးလေတပ်မှ တက်လာသည့် ဖိုက်တာဂျက် ၁ စီးဖြင့် ကျေးရွာ အတွင်းသို့ ဆက်တိုက် ဗုံးကြဲခဲ့ခြင်းဖြစ်သည်။ ထိုသို့ လေကြောင်းမှ အကြိမ်ကြိမ် ဗုံးကြဲတိုက်ခိုက်ခံရမှုကြောင့် မဆာတွီကျေးရွာအတွင်း ထိခိုက်ပျက်စီးမှု အခြေအနေများကို အသေးစိတ် မသိရသေးသော်လည်း ကျေးရွာနေ ပြည်သူများမှာ ဆက်လက်နေထိုင်ရန် မဖြစ်နိုင်တော့ဘဲ ဘေးလွတ်ရာသို့ အလုံးအရင်းဖြင့် ထွက်ပြေးတိမ်းရှောင်နေကြရသည်။ လက်ရှိတွင် မဆာတွီကျေးရွာ အပါအဝင် အနီးဝန်းကျင်ရှိ အင်ဘူး၊ ဆွဲလွဲကျင်း၊ မကွေ့၊ ဆွေလွဲ၊ ပါးအောင်းနှင့် တဲဇင်း ကျေးရွာတို့မှ ဒေသခံ ၁,၀၀၀ ကျော် စစ်ဘေးလွတ်ရာသို့ တိမ်းရှောင်နေကြရပြီး စစ်အုပ်စုတပ်ဘက်မှ လေကြောင်း တိုက်ခိုက်မှုအချို့ပါ ပြုလုပ်လျက်ရှိသည်။ အဆိုပါ တပ်မ ၇၇ စစ်ကြောင်းသည် စက်တင်ဘာလ ၂၄ ရက်က အင်ဘူးကျေးရွာသို့ ရောက်ရှိနေသည့် အင်အား ၁၀၀ ကျော်ပါ စစ်ကြောင်းနှင့် စက်တင်ဘာလ ၂၆ ရက်နေ့တွင် ဆွဲလွဲကျင်းကျေးရွာဘက်သို့ ဝင်ရောက်လာသည့် အင်အား ၄၀၀ ပါ စစ်ကြောင်းတို့ ပူးပေါင်းထားခြင်း ဖြစ်ပြီး လက်ရှိတွင် အင်ဘူး၊ ဆွဲလွဲကျင်းနှင့် မဆာတွီ ကျေးရွာ ထိစပ်နယ်မြေများတွင် ဖြန့်ကျက် နေရာယူထားသည်။ ထိုစစ်ကြောင်းသည် မကင်းမီ ရက်ပိုင်းကလည်း ယောဒေသ ဆောမြို့နယ်၊ တောင်ဘို့ကြီးကျေးရွာအတွင်းသို့ ဝင်ရောက်ကာ လူနေအိမ်များကို မီးရှို့ဖျက်ဆီးခဲ့သဖြင့် ပြည်သူလူနေအိမ် ၁၀ လုံးထက်မနည်း မီးလောင်ကျွမ်း ပျက်စီးခဲ့ကြောင်း ဒေသခံများက ပြောသည်။ ဓာတ်ပုံ - (ပေးပို့ / စက်တင်ဘာလ ၂၆ ရက်က စစ်အုပ်စုတပ်၏ လေကြောင်းမှ ဗုံးကြဲတိုက်ခိုက်မှုကြောင့် မဆာတွီကျေးရွာအတွင်းက အပျက်အစီးများ) #ကန်ပက်လက်

စစ်ကြောင်းထိုးလာ၍ ကန်ပက်လက်တွင် အရပ်သား ၁,၀၀၀ ကျော် စစ်ဘေးရှောင်နေရ

Sep 30

မိုးမိတ်၊ ဗန်းမော်နှင့် မိုးညှင်းရှိ စစ်တပ်စခန်းများကို KIA ပူးပေါင်းတပ်များ တိုက်ခိုက်သိမ်းပိုက် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၃၀ ရက်။ ရှမ်းပြည်မြောက်ပိုင်း မိုးမိတ်မြို့အနီးရှိ စစ်အုပ်စုတပ်၏ ဗျူဟာကျအရေးပါသည့် ရွှေမင်းတင်စေတီကုန်း စခန်း အပါအဝင် ကချင်ပြည် မိုးညှင်းမြို့နယ်ရှိ တပ်စခန်းတစ်ခုကို ကချင်လွတ်လပ်ရေးတပ်မတော် (KIA) ပူးပေါင်း တပ်တို့က တိုက်ခိုက်သိမ်းပိုက်လိုက်သည်။ KIA ပူးပေါင်းတပ်များသည် ကချင်ပြည်၊ ဗန်းမော်၊ ရွှေကူနှင့် မိုးညှင်းမြို့နယ်တို့တွင် ထိုးစစ်များ ဆက်တိုက်ဖော် ဆောင်နေစဉ် စက်တင်ဘာလကုန်ပိုင်း၌ ရှမ်းပြည်မြောက်ပိုင်း မိုးမိတ်ဒေသအထိ စစ်ရှိန်မြှင့်တင် တိုက်ခိုက်လာ ခြင်း ဖြစ်သည်။ စက်တင်ဘာလ ၂၈ ရက် နံနက် ၇ နာရီခွဲခန့်တွင် မိုးမိတ်မြို့အနီးရှိ အရေးပါသော ရွှေမင်းတင်စေတီကုန်း စခန်းကို KIA ပူးပေါင်းတပ်က တိုက်ခိုက်သိမ်းပိုက်ခဲ့ပြီး လက်နက်ခဲယမ်းအများအပြား သိမ်းဆည်းရရှိခဲ့ကြောင်း စစ်ရေး သတင်းရင်းမြစ်များက ဆိုသည်။ အဆိုပါ စခန်းသိမ်းတိုက်ပွဲနှင့် ပတ်သက်၍ ကချင်စစ်ရေးသတင်းရင်းမြစ်တစ်ဦးက “မိုးမိတ်က အရေးကြီးတဲ့ ဗျူဟာကျတဲ့ စခန်းကုန်းဖြစ်တဲ့ ရွှေမင်းတင်စေတီကုန်းမှာ စစ်အုပ်စုတပ်တွေ နေရာယူထားတာကို ကျနော်တို့ ဒီမနက်မှာ သိမ်းလိုက်တာပါ။ လက်နက်ခဲယမ်းတွေတော့ အများကြီးရရှိခဲ့ပါတယ်” ဟု ပြောသည်။ အဆိုပါ တိုက်ပွဲဖြစ်ပွားမှုအခြေအနေနှင့် ပတ်သက်၍ မိုးမိတ်ဒေသခံတစ်ဦးကလည်း “မနက်ပိုင်း လက်နက်ကြီး သံတွေ ကြားရပြီးနောက် လက်နက်ငယ်သံတွေနဲ့ တိုက်ပွဲစဖြစ်တာပါ။ ၁၁ နာရီခွဲလောက်ကျတော့ စစ်အုပ်စု တပ်က ရဟတ်ယာဉ်နဲ့ လာရောက်ကင်းထောက် ပစ်ခတ်ခဲ့သလို ညနေစောင်းအထိ တိုက်လေယာဉ်၊ ရဟတ် ယာဉ်၊ ဒရုန်းနဲ့ လက်နက်ကြီးတွေသုံးပြီး ပြင်းပြင်းထန်ထန် ပြန်လည်တုံ့ပြန်ခဲ့တယ်” ဟု ပြောသည်။ မိုးမိတ်မြို့နယ် ညောင်နီကျေးရွာအနီး မိုးမိတ်-မန်တုံ လမ်းပိုင်းတွင် ပြီးခဲ့သည့် ဩဂုတ်လကတည်းက စစ်အုပ်စု တပ် စစ်ကြောင်းထိုးမှုကြောင့် ထိတွေ့တိုက်ပွဲများ ဖြစ်ပွားခဲ့ပြီး လမ်းပိုင်းအား ယာယီပိတ်ပင်ခဲ့ရသည်။ မိုးမိတ်မြို့သည် ယခင်က တအာင်း အမျိုးသားလွတ်မြောက်ရေး တပ်မတော် (TNLA) ထိန်းချုပ်ခဲ့ဖူးပြီး ၂၀၂၅ ခုနှစ်ကုန်ပိုင်းတွင် စစ်အုပ်စုတပ်ထံ ပြန်လည်လွှဲပြောင်းပေးခဲ့သည့် မြို့ဖြစ်သော်လည်း KIA ပူးပေါင်းတပ်များက ဒေသတွင်း စစ်ရေးလှုပ်ရှားမှုများကို ဆက်လက်ဖော်ဆောင်နေခြင်းဖြစ်သည်။ အလားတူ စက်တင်ဘာလ ၂၈ ရက် နံနက်ပိုင်းတွင်လည်း ကချင်ပြည်၊ မိုးညှင်းမြို့နယ်၊ နမ့်မွန်းကျေးရွာအနီးရှိ စစ်အုပ်စုတပ်နှင့် ရှမ်းနီအမျိုးသားများ တပ်မတော် (SNA) ပူးပေါင်းတပ်စခန်းတစ်ခုကို KIA ပူးပေါင်းတပ်က ထပ်မံတိုက်ခိုက်သိမ်းပိုက်ခဲ့သည်။ အဆိုပါစခန်းသည် ယခင်က KIA တပ်စခန်းတစ်ခုဖြစ်ပြီး ပြန်လည်သိမ်းပိုက်နိုင်ခဲ့ခြင်းဖြစ်ကာ SNA ဘက်မှ အထိနာခဲ့သည်ဟု စစ်မြေပြင်နှင့် နီးစပ်သည့် သတင်းရင်းမြစ်များက ဆိုသည်။ ထိုတိုက်ပွဲအခြေအနေနှင့် ပတ်သက်၍ စစ်မြေပြင် သတင်းရင်းမြစ်တစ်ဦးက “SNA ဘက်ကတော့ တော်တော် အထိနာသွားပါတယ်။ စစ်အုပ်စုတပ်ဘက်ကလည်း လေကြောင်းကနေ ဗုံးအများကြီး လာကြဲသွားခဲ့တယ်။ အဲဒီစခန်းမှာ ဘုရားကျောင်းအတွင်း စစ်သင်တန်းဆင်းခဲ့တဲ့ SNA တပ်ဖွဲ့ဝင်တွေ ပါဝင်တိုက်ခိုက်ခဲ့ကြတာ ဖြစ်ပါတယ်” ဟု ပြောသည်။ အဆိုပါ နမ့်မွန်းကျေးရွာရှိ ကချင်နှစ်ခြင်းခရစ်ယာန် ဘုရားကျောင်းဝင်းအတွင်း SNA တပ်က စစ်သင်တန်းဆင်းပွဲ ကျင်းပခဲ့သည့်နေရာ ဖြစ်သည်။ အလားတူ ကချင်ပြည်၊ ဗန်းမော်မြို့နယ် နမ့်ဖားကျေးရွာတွင် တပ်စွဲထားသည့် စစ်အုပ်စုတပ်စခန်းကိုလည်း စက် တင်ဘာလ ၂၆ ရက်တွင် KIA ပူးပေါင်းတပ်များက သိမ်းပိုက်နိုင်ခဲ့ပြီး စက်တင်ဘာလ ၂၇ ရက်တွင် ဗန်းမော်မြို့ ပေါ်၌ တိုက်ပွဲများ ဆက်လက်ပြင်းထန်နေသည်။ KIA ပူးပေါင်းတပ်များသည် ဗန်းမော်မြို့သိမ်းစစ်ဆင်ရေးကို ၂၀၂၄ ခုနှစ် ဒီဇင်ဘာလမှ စတင်ကာ ဖော်ဆောင်ခဲ့ ခြင်းဖြစ်ပြီး စစ်အုပ်စုတပ်၏ သံချပ်ကာတပ်ရင်း၊ တင့်ကားတပ်ရင်း အပါအဝင် တပ်စခန်းအများအပြားကို သိမ်း ပိုက်ထိန်းချုပ်ထားကာ လေကြောင်းနှင့် လက်နက်ကြီး ပစ်ခတ်မှုများအကြား စစ်ရေးအရ အသာစီးရ ယူထား ကြောင်း မြေပြင်သတင်းရင်းမြစ်အချို့က အတည်ပြုပြောသည်။ #KIA #ဗန်းမော် #မိုးမိတ် #မိုးညှင်း

မိုးမိတ်၊ ဗန်းမော်နှင့် မိုးညှင်းရှိ စစ်တပ်စခန်းများကို KIA ပူးပေါင်းတပ်များ တိုက်ခိုက်သိမ်းပိုက်

Sep 30

ဘူးသီးတောင်နှင့် မောင်တောတွင် အေအေနှင့် ARSA တို့ တိုက်ပွဲများ ဆက်တိုက်ဖြစ်ပွား သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၃၀ ရက်။ ရခိုင်ပြည်၊ မောင်တောမြို့နယ် ရခိုင်-ဘင်္ဂလားဒေ့ရှ် နယ်စပ်နှင့် ဘူးသီးတောင်မြို့နယ်တို့တွင် အာရက္ခတပ်တော် (AA) နှင့် ARSA မွတ်ဆလင် လက်နက်ကိုင်အဖွဲ့တို့အကြား တိုက်ပွဲများ ဆက်တိုက်ဖြစ်ပွားလျက်ရှိကြောင်း ဒေသတွင်း စစ်ရေးသတင်းအရင်းအမြစ်များက ပြောသည်။ မောင်တောမြို့နယ်မြောက်ပိုင်း မိုင်တိုင် (၅၆) အနီးရှိ Y Hlan Zone နှင့် မီးဇင်ဖာရား အကြားတွင် တိုက်ပွဲပြင်း ထန်ခဲ့ပြီး စက်တင်ဘာ ၂၈ ရက်အထိ ထိတွေ့တိုက်ပွဲအချို့ ဆက်လက်ဖြစ်ပွားခဲ့သည်။ ထို့ပြင် မောင်တောတောင်ပိုင်း မွတ်ဆလင်ကျေးရွာများဖြစ်သည့် ဂိုရာခါလီရွာ၊ ဘူးသီးတောင်မြို့နယ် ဂူတာပြင် ကျေးရွာနှင့် တောင်ဘဇားကျေးရွာတို့အပါအဝင် မေယုတောင်တန်းဘက်တွင်ပါ တိုက်ပွဲများ ဖြစ်ပွားခဲ့ခြင်း ဖြစ်သည်။ ဒေသခံ စစ်ရေးသတင်းအရင်းအမြစ် အမျိုးသားတစ်ဦးက “မောင်တောတောင်ပိုင်း မွတ်ဆလင်ရွာတွေဖြစ်တဲ့ ဂိုရာခါလီရွာ၊ ဘူးသီးတောင်၊ ဂူတာပြင်ရွာတွေမှာဖြစ်တာပါ။ မေယုတောင်တန်းဘက်လည်း တိုက်ပွဲရှိတယ်။ အေအေကလည်း လုံခြုံရေးအရ ကင်းလှည့်တာတွေရှိသလို ARSA ဘက်က ကျေးရွာတွေကို ဝင်လာတာတွေ ရှိနေတယ်။ မွတ်ဆလင် လက်နက်ကိုင်တွေက ဘင်္ဂလားဒေ့ရှ်ဘက်ကို ဝင်လိုက် ရခိုင်ဘက် ပြန်လာလိုက် ဒီလိုတွေ လုပ်နေတယ်။ နယ်စပ်က ရွာတွေက ဒေသခံတွေကတော့ စိုးရိမ်ပါတယ်” ဟု ပြောသည်။ ပြီးခဲ့သည့် စက်တင်ဘာလ ၂ ရက်နေ့တွင် မောင်တောတောင်ပိုင်း ဂိုရာခါလီရွာ၌ လည်းကောင်း၊ စက်တင်ဘာ ၁၅ ရက်တွင် ဘူးသီးတောင်မြို့နယ် ဂူတာပြင်ရွာ၌ လည်းကောင်း၊ စက်တင်ဘာ ၂၁ ရက်တွင် ဘူးသီးတောင်မြို့နယ် တောင်ဘဇားရွာ၌ လည်းကောင်း ARSA နှင့် AA တို့ တိုက်ပွဲဖြစ်ပွားခဲ့ပြီး နှစ်ဖက် ထိခိုက်ကျဆုံးမှုများ ရှိခဲ့သည်။ ထို့ပြင် မောင်တောမြို့နယ်မြောက်ပိုင်း မိုင်တိုင် (၅၆) အနီး၌ ARSA အဖွဲ့က အာရက္ခတပ်တော် (AA) တပ်စခန်း ကို လာရောက်တိုက်ခိုက်သဖြင့် ထိတွေ့တိုက်ပွဲ ဖြစ်ပွားခဲ့ပြီး AA ဘက်က နယ်မြေရှင်းလင်းရေးများ ဆက် လက်ဆောင်ရွက်နေကြောင်း ဒေသတွင်း သတင်းဌာနတစ်ခုဖြစ်သည့် DMG ၏ ဖော်ပြချက်အရ သိရသည်။ ယခုကဲ့သို့ ARSA ၏ တိုက်ခိုက်မှုသည် လက်ရှိဖြစ်ပွားနေသည့် စစ်တွေတိုက်ပွဲနှင့်လည်း ဆက်စပ်နိုင်ကြောင်း စစ်ရေးအကဲခတ်များက သုံးသပ်ကြသည်။ စစ်တွေတိုက်ပွဲတွင် စစ်ကော်မရှင်တပ်များ နောက်ဆုတ်နေရချိန်၌ ARSA နှင့် စစ်ကော်မရှင်တပ်တို့ ပူးပေါင်းကာ အဘက်ဘက်မှ ထိုးစစ်ဆင် တိုက်ခိုက်လာခြင်းဖြစ်နိုင်ကြောင်း ရခိုင်စစ်ရေးလေ့လာစောင့်ကြည့်သူတစ်ဦး၏ ပြောကြားချက်ကို ကိုးကား၍ DMG က ဖော်ပြထားသည်။ မွတ်ဆလင် လက်နက်ကိုင်အဖွဲ့များဖြစ်ကြသည့် ARSA၊ ARA နှင့် RSO တို့သည် ဘင်္ဂလားဒေ့ရှ်နယ်စပ်မှ တစ်ဆင့် ရခိုင်ပြည်အတွင်းသို့ စိမ့်ဝင်လှုပ်ရှားကာ AA တပ်စခန်းများကို တိုက်ခိုက်ခြင်း၊ ဒေသခံများကို ဖမ်းဆီး သတ်ဖြတ်ခြင်း၊ ခြုံခိုတိုက်ခိုက်ခြင်းများအပြင် ပြန်ပေးဆွဲခြင်းများကို လုပ်ဆောင်လျက်ရှိကြောင်း ဒေသခံများက ပြောသည်။ မေယုတောင်တန်းအတွင်း ARSA အဖွဲ့ စိမ့်ဝင်လှုပ်ရှားနေသည့် သတင်းများကြောင့် AA ဘက်က ရပ်ရွာ လုံခြုံရေးအတွက် အလှည့်ကျ ကင်းစောင့်ခိုင်းမှုများ ပြုလုပ်ထားသည်။ ထို့ပြင် မောင်တောခရိုင်အတွင်း မွတ်ဆလင်လက်နက်ကိုင်အဖွဲ့များ၏ အန္တရာယ်ကို ကာကွယ်ရန်နှင့် လုံခြုံရေး တိုးမြှင့်ရန်အတွက် AA က ဩဂုတ်လ ၉ ရက်နေ့မှ စတင်၍ ည ၁၀ နာရီမှ နံနက် ၄ နာရီအတွင်း ညမထွက်ရ အမိန့် ထုတ်ပြန်ထားသည်။ #ARSA #AA

ဘူးသီးတောင်နှင့် မောင်တောတွင် အေအေနှင့် ARSA တို့ တိုက်ပွဲများ ဆက်တိုက်ဖြစ်ပွား

Sep 30

ယူဂန်ဒါနိုင်ငံတွင် သတင်းသမား တစ်ဦး ဘုရင်အဖြစ် ဘိသိက်မြှောက်ခံရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၃၀ ရက်။ ယူဂန်ဒါနိုင်ငံ အစိုးရရုပ်သံလိုင်း (UBC) ၏ သတင်းတင်ဆက်သူနှင့် အယ်ဒီတာဟောင်း အသက် ၅၆ နှစ်အရွယ် အက်ဒ်ဝပ် ရူကီဒီ ကီဂျာနန်ဂိုမာ (Edward Rukidi Kijanangoma) သည် ယူဂန်ဒါနိုင်ငံ၏ အဓိက ရှေးဟောင်းတိုင်းပြည် ၄ ခုအနက် တစ်ခုဖြစ်သည့် ထူးရိုး (Tooro) တိုင်းပြည်၏ ဘုရင်အဖြစ် တရားဝင် ဘိသိက်မြှောက်ခံခဲ့ရသည်ဟု BBC ကမ္ဘာတဝှမ်း အစီအစဉ်တွင် ဖော်ပြထားသည်။ အသက် ၃ နှစ်အရွယ်မှစ၍ နှစ်ပေါင်း ၃၁ နှစ်ကြာ ထူးရိုးတိုင်းပြည်ကို အုပ်ချုပ်ခဲ့သည့် ဘုရင် အိုယို (King Oyo) သည် ပြီးခဲ့သည့်လက အသက် ၃၄ နှစ်အရွယ်တွင် ကင်ဆာရောဂါဖြင့် ကွယ်လွန်သွားခဲ့ခြင်းဖြစ်သည်။ ဘုရင် အိုယို ကွယ်လွန်ပြီးနောက် နန်းမွေဆက်ခံမှုတွင် အငြင်းပွားမှုများ ရှိခဲ့သည်။ ဘုရင်ဟောင်း၏ မယ်တော် Queen Best Kemigisa က ဘုရင်ဟောင်းတွင် အမေရိကန်၌ ရောက်ရှိနေသည့် သားငယ်တစ်ဦးရှိပြီး အရိုက်အရာ ဆက်ခံရန် သေတမ်းစာ ထားရှိခဲ့သည်ဟု အခိုင်အမာ ဆိုခဲ့သည်။ သို့သော် ဘုရင် ရွေးချယ်ရေး အဖွဲ့ဝင် ၂၁ ဦးပါ ဘာဘီးတို (Babiito) တော်ဝင်ဆွေမျိုးစု ကောင်စီက အဆိုပါ ကလေးငယ်အား တရားဝင် တင်ပြထားခြင်း မရှိဟုဆိုကာ ယင်းတောင်းဆိုမှုကို ပယ်ချပြီး ဘုရင်ဟောင်း၏ ဝမ်းကွဲညီအစ်ကို တော်စပ်သူ သတင်းထောက်ဟောင်း ကီဂျာနန်ဂိုမာကို ဘုရင်အဖြစ် ရွေးချယ်ခဲ့ခြင်း ဖြစ်သည်။ ယူဂန်ဒါနိုင်ငံတွင် ရိုးရာဘုရင်များသည် နိုင်ငံရေး အာဏာ မရှိသော်လည်း ယဉ်ကျေးမှုနှင့် လူထုအပေါ် ဩဇာတိက္ကမ ကြီးမားသည်။ သမ္မတ ယိုဝေရီ မူဆီဗီနီ (Yoweri Museveni) အစိုးရနှင့် တပ်မတော် အကြီးအကဲတို့က ကီဂျာနန်ဂိုမာ ဘုရင်ဖြစ်လာမှုကို တရားဝင် ထောက်ခံခဲ့ပြီး သမ္မတကိုယ်တိုင် နန်းတက်ပွဲ အခမ်းအနားသို့ တက်ရောက်ခဲ့သည်။ ဘုရင်သစ် ကီဂျာနန်ဂိုမာသည် သတင်းထောက်အဖြစ် ၂၁ နှစ်ကျော် လုပ်ကိုင်ခဲ့သည့် အတွေ့အကြုံနှင့် အဆက်အသွယ်များကို အသုံးပြုကာ ပြည်သူများ စည်းလုံးညီညွတ်ရေးနှင့် တိုင်းပြည် ဖွံ့ဖြိုးတိုးတက်ရေးအတွက် အဓိကထား ဆောင်ရွက်သွားမည်ဟု ကတိပြုပြောကြားခဲ့သည်။ #Edward_Rukidi_Kijanangoma #King_Oyo

ယူဂန်ဒါနိုင်ငံတွင် သတင်းသမား တစ်ဦး ဘုရင်အဖြစ် ဘိသိက်မြှောက်ခံရ

Sep 30

အမေရိကန် ရေတပ်သား ၅,၀၀၀ ကျော် ဖူးကက်သို့ အပန်းဖြေလာရောက်မည် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာ ၃၀ ရက်။ အမေရိကန် ရေတပ်၏ စစ်သင်္ဘော နှစ်စီးဖြစ်သည့် USS George H.W. Bush နှင့် USS Delbert D. Black တို့သည် တပ်ဖွဲ့ဝင် ၅,၁၀၀ ကျော်နှင့်အတူ လာမည့် အောက်တိုဘာ ၅ ရက်မှ ၁၀ ရက်နေ့အထိ ထိုင်းနိုင်ငံ ဖူးကက် Phukhet ရေနက်ဆိပ်ကမ်းသို့ လာရောက် ဆိုက်ကပ်မည်ဖြစ်ကြောင်း ထိုင်းသတင်းများတွင် ဖော်ပြပါရှိသည်။ အဆိုပါ စစ်သင်္ဘောများအနက် လေယာဉ်တင်သင်္ဘော USS George H.W. Bush (CVN-77) တွင် တပ်ဖွဲ့ဝင် ၄,၈၀၀ ခန့်နှင့် ဒုံးကျည်တင် စဖျက်သင်္ဘော USS Delbert D. Black (DDG-119) တွင် တပ်ဖွဲ့ဝင် ၃၂၀ ခန့် ပါဝင်မည်ဖြစ်သည်။ လာရောက်မည့် အမေရိကန် စစ်သည်များ၏ လုံခြုံရေး၊ မြေပြင် တရားဥပဒေ စိုးမိုးရေးနှင့် ထိုင်းနိုင်ငံ၏ ဒေသတွင်း ဥပဒေများအား စနစ်တကျ လိုက်နာဆောင်ရွက်ရေးတို့အတွက် ထိုင်းရဲတပ်ဖွဲ့နှင့် ထိုင်းနိုင်ငံဆိုင်ရာ အမေရိကန်သံရုံးမှ တာဝန်ရှိသူများ (Force Protection Detachment) တို့သည် စက်တင်ဘာ ၂၉ ရက်နေ့က ဖူးကက်ပြည်နယ် ပါတောင်း ရဲစခန်းတွင် အရေးပေါ် တွေ့ဆုံ ညှိနှိုင်းခဲ့ကြသည်။ စက်တင်ဘာလ ဆန်းပိုင်းကလည်း အီရန် စစ်ပွဲတွင် တာဝန်ထမ်းဆောင်ခဲ့သည့် USS Abraham Lincoln နှင့် အခြား သင်္ဘောများမှ ရေတပ်သား ၅,၀၀၀ ကျော်တို့ ထိုင်းနိုင်ငံ ပတ္တယား ကမ်းခြေတွင် အနားယူ အပန်းဖြေ လာရောက်ခဲ့ကြသေးသည်။ #USSGeorgeH_W_Bush

အမေရိကန် ရေတပ်သား ၅,၀၀၀ ကျော် ဖူးကက်သို့ အပန်းဖြေလာရောက်မည်

Sep 30

ပြင်သစ်တွင် ဘတ်ဂျက် လျှော့မှု အပေါ် အစိုးရဝန်ထမ်းများနှင့် ကျောင်းသားများ ဆန္ဒပြ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၃၀ ရက်။ ပြင်သစ်နိုင်ငံတွင် သမ္မတ အီမန်နုအဲလ် မက်ခရွန် အစိုးရ၏ အများပြည်သူဆိုင်ရာ အသုံးစရိတ် ဖြတ်တောက်မည့် ဘတ်ဂျက်မူကြမ်း ထွက်ရှိမလာမီ အစိုးရဝန်ထမ်းများနှင့် အထက်တန်းကျောင်းသားများ ဦးဆောင်၍ စက်တင်ဘာ ၂၉ ရက်နေ့က နိုင်ငံတဝှမ်း အစုလိုက်အပြုံလိုက် ဆန္ဒပြ သပိတ်မှောက်ခဲ့ကြပါသည်။ ၂၀၂၇ ဘတ်ဂျက်မူကြမ်း ထွက်ရှိရန် နှစ်ရက်အလိုတွင် ဖြစ်ပွားခဲ့သည့် အဆိုပါ ဆန္ဒပြပွဲများတွင် ပညာရေးဝန်ထမ်းများ၊ မီးသတ်သမားများနှင့် ကျန်းမာရေးဝန်ထမ်းများအပြင်၊ နိုင်ငံတဝှမ်းရှိ အထက်တန်းကျောင်းပေါင်း ၃၃၀ ကျော် ပါဝင်ခဲ့ကြပါသည်။ ကျောင်းသားများသည် စာသင်ခန်းများ ပြည့်ကျပ်နေမှု၊ ဆရာ/ဆရာမ မလုံလောက်မှုနှင့် ရဲတပ်ဖွဲ့၏ ဖိနှိပ်မှုများကို ဆန့်ကျင်သည့်အနေဖြင့် ကျောင်းအဝင်ဝများကို အမှိုက်ပုံးများနှင့် အတားအဆီးများ ပိတ်ဆို့ ဆန္ဒပြခဲ့ကြပါသည်။ ပြင်သစ်အစိုးရသည် ဘတ်ဂျက်လိုငွေပြမှုကို ထိန်းချုပ်ရန် စုစုပေါင်း ယူရို ၅၄ ဘီလီယံအထိ အသုံးစရိတ် ချွေတာရန် စီစဉ်နေခြင်း ဖြစ်သည်။ အဆိုပါ အစီအစဉ်တွင် အစိုးရဝန်ထမ်းများ၏ အခြေခံလစာကို ၂၀၂၇ ခုနှစ်တွင် ထပ်မံ ဆိုင်းငံ့ထားခြင်းဖြင့် ယူရို ၂ ဘီလီယံ လျှော့ချရန် ကြိုးပမ်းမှု ပါဝင်သည်။ ဒါဟာ သမ္မတ မက်ခရွန် အစိုးရသက်တမ်းအတွင်း ၈ ကြိမ်မြောက် လစာဆိုင်းငံ့ခြင်းဖြစ်ပြီး ဝန်ထမ်းများ၏ ဝယ်ယူနိုင်စွမ်းအားကို အကြီးအကျယ် ထိခိုက်စေသည်ဟု အလုပ်သမားသမဂ္ဂများက ပြင်းပြင်းထန်ထန် ဝေဖန်ထားကြသည်။ အလုပ်သမားသမဂ္ဂ (CGT) ကမူ အဆိုပါ အစီအစဉ်ကို ၄၈ နာရီအတွင်း ပြန်လည်ရုတ်သိမ်းပေးရန် အစိုးရထံ တောင်းဆိုထားပါသည်။ လာမည့် သမ္မတရွေးကောက်ပွဲ ကျင်းပရန် ၇ လခန့်အလိုတွင် ဖြစ်ပွားခဲ့သည့် ယခု သပိတ်မှောက်မှုသည် သမ္မတ မက်ခရွန်အပေါ် လူထုထောက်ခံမှု ကျဆင်းနေချိန်နှင့် တိုက်ဆိုင်လျက်ရှိနေသည်။

ပြင်သစ်တွင် ဘတ်ဂျက် လျှော့မှု အပေါ် အစိုးရဝန်ထမ်းများနှင့် ကျောင်းသားများ ဆန္ဒပြ

Sep 30

စစ်မဲ့ဇုန် မိုင်းကွဲမှုမှာ မြောက်ကိုရီးယားမိုင်း ဖြစ်ဟု တောင်ကိုရီးယား ထုတ်ပြန်

စစ်မဲ့ဇုန် မိုင်းကွဲမှုမှာ မြောက်ကိုရီးယားမိုင်း ဖြစ်ဟု တောင်ကိုရီးယား ထုတ်ပြန်

Sep 30

EU က တရုတ်ထုတ်ကုန်များအပေါ် ကန့်သတ်ပါက ပြင်းပြင်းထန်ထန် တုံ့ပြန်မည်ဟု ပေကျင်း သတိပေး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၃၀ ရက်။ ဥရောပသမဂ္ဂ (EU) အနေဖြင့် တရုတ် စီးပွားရေးလုပ်ငန်းများနှင့် ထုတ်ကုန်များအပေါ် ကန့်သတ်ပိတ်ပင်မှုများ ပြုလုပ်လာပါက ပြင်းပြင်းထန်ထန် တုံ့ပြန်ဆောင်ရွက်သွားမည်ဖြစ်ကြောင်း တရုတ် စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနက စက်တင်ဘာ ၂၉ ရက်နေ့တွင် သတိပေး ထုတ်ပြန်လိုက်ပါသည်။ အီးယူနှင့် တရုတ်နိုင်ငံတို့အကြား ဖြစ်ပွားနေသော ကုန်သွယ်ရေး အငြင်းပွားမှုများနှင့် ပတ်သက်၍ လာမည့်သီတင်းပတ်အတွင်း ထိပ်သီး ဆွေးနွေးပွဲများ မကျင်းပမီ တရုတ်ဘက်က ယခုကဲ့သို့ သတိပေးလိုက်ခြင်း ဖြစ်ပါသည်။ ဥရောပသမဂ္ဂသည် တရုတ်နှင့် ကုန်သွယ်မှုတွင် စံချိန်တင် လိုငွေပြနေမှုကို လာမည့် အောက်တိုဘာလအတွင်း လျှော့ချနိုင်ရန် ကြိုးပမ်းနေခြင်း ဖြစ်သည်။ အီးယူ ကုန်သွယ်ရေး ကော်မရှင်နာက တရုတ်ဘက်မှ ခိုင်မာသည့် ရလဒ်များ မပြသနိုင်ပါက ပိုမိုပြင်းထန်သည့် အရေးယူမှုများနှင့် ရင်ဆိုင်ရမည်ဟု သတိပေးထားပါသည်။ သတင်းများအရ ဂျာမနီနှင့် ပြင်သစ်နိုင်ငံတို့သည် တရုတ်ကုန်ပစ္စည်းများကို ဥရောပဈေးကွက်အတွင်းသို့ မဝင်ရောက်နိုင်အောင် နာရီ ၂၄ နာရီအတွင်း ပိတ်ပင်နိုင်သည့် ကန့်သတ်အရေးယူမှုများ လုပ်ဆောင်ရန် စီစဉ်နေသည်။ တရုတ် စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနကမူ နှစ်ဖက် ကုန်သွယ်ရေး ဆွေးနွေးမှုများ ပြုလုပ်နေစဉ် ယခုကဲ့သို့ ဆောင်ရွက်ခြင်းသည် ဆွေးနွေးပွဲများကို အဟန့်အတား ဖြစ်စေသည်ဟု ထုတ်ပြန်ထားသည်။ လက်ရှိတွင် EU နှင့် တရုတ်နိုင်ငံအကြား နှစ်စဉ် ကုန်သွယ်မှု ပမာဏသည် ယူရို ၈၈၀ ဘီလီယံ (အမေရိကန်ဒေါ်လာ ၁ ထရီလီယံနီးပါး) ရှိနေသော်လည်း၊ အီးယူဘက်တွင် စံချိန်တင် ကုန်သွယ်ရေး လိုငွေပြမှုနှင့် ရင်ဆိုင်နေရသဖြင့် အောက်တိုဘာလအတွင်း နှစ်ဖက် သဘောတူညီချက် ရရှိရန် ကြိုးပမ်းနေခြင်း ဖြစ်သည်။

EU က တရုတ်ထုတ်ကုန်များအပေါ် ကန့်သတ်ပါက ပြင်းပြင်းထန်ထန် တုံ့ပြန်မည်ဟု ပေကျင်း သတိပေး

« Prev 1 2 3 4 … 1,148 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

ဂျပန်နိုင်ငံက အမြဲတမ်းနေထိုင်ခွင့် လျှောက်ထားခအား အဆ ၂၀ ထိ တိုးမြှင့် — October 1, 2026 6:37 pm
လာအိုနိုင်ငံတွင် တရုတ်စစ်တပ်က စစ်ရေးအထောက်အကူပြု လေကြောင်းစခန်းသစ် ဖွင့်လှစ် — October 1, 2026 6:35 pm
ဗြိတိန် သုတေသနများအား တရုတ်ထောက်လှမ်းရေးများက အသုံးချနေကြောင်း MI5 သတိပေး — October 1, 2026 6:35 pm

Recent Posts

ကချင်နှင့် ရှမ်း-ကချင်အစပ် မြို့နယ် ၆ ခုတွင် KIA နှင့် စစ်အုပ်စုတပ်တို့ တိုက်ပွဲများ ဆက်လက်ပြင်းထန်
ဂျပန်နိုင်ငံက အမြဲတမ်းနေထိုင်ခွင့် လျှောက်ထားခအား အဆ ၂၀ ထိ တိုးမြှင့်
လာအိုနိုင်ငံတွင် တရုတ်စစ်တပ်က စစ်ရေးအထောက်အကူပြု လေကြောင်းစခန်းသစ် ဖွင့်လှစ်
ဗြိတိန် သုတေသနများအား တရုတ်ထောက်လှမ်းရေးများက အသုံးချနေကြောင်း MI5 သတိပေး
ကာလင်နင်ဂရက်ဒေသအား ပိတ်ဆို့ပါက နျူကလီးယားလက်နက်ဖြင့် တုံ့ပြန်မည်ဟု ရုရှား သတိပေး

Archives

Archives

×Close