NMG Doh – Page 4 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Author Archive

NMG Doh

Author: NMG Doh

May 11

ထိုင်းဝန်ကြီးချုပ်ဟောင်း တာ့က်ဆင် ထောင်မှ လွတ်မြောက် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မေလ ၁၁ ရက်။ ထိုင်းဝန်ကြီးချုပ်ဟောင်း တာ့က်ဆင် ရှင်နာဝပ်သည် ဘန်ကောက်မြို့ရှိ ကလောင်ပရမ် ဗဟိုအကျဉ်းထောင်မှ ယနေ့မနက် ၇ နာရီ ၄၄ မိနစ်တွင် ခံဝန်ချက်ဖြင့် ပြန်လည်လွတ်မြောက်လာခဲ့သည်။ အသက် ၇၆ နှစ်အရွယ်ရှိ ဝန်ကြီးချုပ်ဟောင်း တာ့က်ဆင်သည် အင်္ကျီအဖြူ၊ ဘောင်းဘီအပြာ ဝတ်ဆင်၍ အကျဉ်းထောင်ဂိတ်ဝတွင် စောင့်ကြိုနေသော မိသားစုဝင်များနှင့် ရှပ်နီဝတ်ထောက်ခံသူများကို နှုတ်ဆက်ခဲ့ပြီး၊ မာစီးဒီးကားဖြင့် ထောင်အတွင်းမှ ထွက်ခွာသွားခဲ့သည်ဟု ဘန်ကောက်ပို့စ် သတင်းတွင် ဖော်ပြသည်။ တာ့က်ဆင်သည် ခံဝန်ဖြင့် လွတ်မြောက်လာသော်လည်း လိုက်နာရမည့် စည်းကမ်းချက်များရှိနေပြီး၊ လာမည့် စက်တင်ဘာလ ၉ ရက်နေ့အထိ EM (Electronic Monitoring) ဟုခေါ်သော အီလက်ထရောနစ်စောင့်ကြည့်ခြေချင်းဝတ်ကို ဝတ်ဆင်ထားရမည် ဖြစ်သလို၊ ၃ ရက်အတွင်း ခံဝန်စောင့်ကြည့်ရေးရုံးသို့ သွားရောက်သတင်းပို့ရမည်ဖြစ်သည်။ တာ့က်ဆင်သည် ၂၀၂၅ ခုနှစ်၊ စက်တင်ဘာလ ၉ ရက်နေ့မှစ၍ အာဏာအလွဲသုံးစားမှုနှင့် အကျိုးစီးပွားပဋိပက္ခမှုများဖြင့် ထောင်ဒဏ်တစ်နှစ် ကျခံရန် တရားရုံးက အမိန့်ချမှတ်ခဲ့ခြင်းဖြစ်သည်။ ယခင်က ရဲဆေးရုံတွင် တက်ရောက်ခဲ့သော ကာလများကို ထောင်ဒဏ်အဖြစ် တရားရုံးက အသိအမှတ်မပြုခဲ့ခြင်းကြောင့် ဆေးရုံတက်သည့် ကာလ ၁ နှစ်စာအတွက် ထောင်ဒဏ် ၃ ပုံ ၂ ပုံ ကျခံပြီးမှသာ ခံဝန်ဖြင့် လွတ်မြောက်ခွင့်ရရှိခဲ့ခြင်း ဖြစ်သည်။ Photo:Bangkok Post #ThaksinShinawatra #Thaksin

ထိုင်းဝန်ကြီးချုပ်ဟောင်း တာ့က်ဆင် ထောင်မှ လွတ်မြောက်

May 9

ငြိမ်းချမ်းရေး ဆွေးနွေးမှုအတွက် အချို့အဖွဲ့များနှင့် အလွတ်တွေ့ဆုံမှုများ စတင် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မေလ ၉ ရက်။ မြန်မာနိုင်ငံအနှံ့အပြားတွင် လေကြောင်းတိုက်ခိုက်မှုများနှင့် စစ်ရေးပဋိပက္ခများ ပြင်းထန်နေချိန်တွင် စစ်အုပ်စုက တိုင်းရင်းသား လက်နက်ကိုင်အဖွဲ့အစည်းများနှင့် ငြိမ်းချမ်းရေးဆွေးနွေးမှုများ ပြုလုပ်နိုင်ရန်အတွက် အလွတ် သဘော တွေ့ဆုံဆွေးနွေးမှုများကို စတင်လုပ်ဆောင်နေပြီ ဖြစ်သည်။ စစ်အုပ်စုသည် တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောစာချုပ် (NCA) လက်မှတ်ရေးထိုးထားသည့် အဖွဲ့များ၊ လက်မှတ်မရေးထိုးထားသည့် အဖွဲ့များသာမက NCA လက်မှတ်ထိုးထားပြီး လက်ရှိတွင် ၎င်းတို့နှင့် တိုက်ပွဲဖြစ်ပွားနေသည့် အဖွဲ့များကိုပါ တွေ့ဆုံဆွေးနွေးရန် စာပို့ဖိတ်ခေါ်ထားခြင်း ဖြစ်သည်။ NCA အပစ်ရပ် ၇ ဖွဲ့၏ ငြိမ်းချမ်းရေးလုပ်ငန်းစဉ် ဦးဆောင်အဖွဲ့ (PPST) အဖွဲ့ဝင် ဗိုလ်မှူးကြီး ခွန်ဥက္ကာက စစ်အုပ်စု၏ ဖိတ်ခေါ်စာကို ဧပြီလ ၂၄ ရက်နေ့ကတည်းက ရရှိထားသည်ဟု အတည်ပြုသည်။ ၎င်းက “တစ်ဖွဲ့ချင်းကိုလည်း ဖိတ်တယ်၊ ၇ ဖွဲ့စုပေါင်းပြီးတော့ တစ်ပေါင်းတည်း ဖိတ်တယ်ဆိုတော့ သူက ပုံစံ ၂ မျိုးဖြစ်တယ်။ ဒါကြောင့် တစ်ဖွဲ့ချင်းကလည်းပဲ ကိုယ့်အခြေအနေပေးတဲ့အပေါ်မှာ သွားရောက်တွေ့ဆုံ ဆွေး နွေး၊ တစ်ဖက်ကလည်း တစ်စုတစ်စည်းတည်းလည်း သွားပေါ့လေ။ အဲဒီအတွက် ပြင်ဆင်ကြတာဖြစ်ပါတယ်” ဟု ပြောသည်။ ထို့ပြင် လက်ရှိတွင် စစ်အုပ်စုသည် တိုင်းရင်းသားလက်နက်ကိုင်အဖွဲ့အချို့နှင့် အလွတ်သဘောတွေ့ဆုံမှုများကို စတင်လုပ်ဆောင်နေပြီဟု ဆိုသည်။ ဗိုလ်မှူးကြီးခွန်ဥက္ကာက “စတွေ့နေပါပြီခင်ဗျာ။ တရားဝင်မပြောတာ ဆိုပေမယ့် အလွတ်သဘောလည်း ဖြစ်တာ ကိုး။ နောက် ပဏာမ ဖိတ်ခေါ်ချက်တွေ၊ ရှင်းလင်းချက်တွေ၊ ကမ်းလှမ်းချက်တွေ ဖြစ်နေတော့ တွေ့နေကြ ပါပြီ။ ကျနော်ကတော့ တွေ့ပြီးပြီခင်ဗျာ။ လွန်ခဲ့တဲ့ သုံးလေးရက်ကပဲ ကျနော်တို့ တွေ့ပါတယ်။ နောက်ပိုင်း ကျတော့ မော်လမြိုင်မှာ တောင်ပိုင်းအဖွဲ့တွေ တချို့နဲ့တွေ့လိမ့်မယ်။ အဲဒါပြီးရင်တော့ မြောက်ပိုင်းမှာ တချို့ အဖွဲ့တွေ တွေ့လိမ့်မယ်” ဟု လက်ရှိအခြေအနေကို ရှင်းပြသည်။ သို့သော်လည်း စစ်အုပ်စု၏ ဤဖိတ်ခေါ်မှုသည် မြေပြင်တွင် အရပ်သားများကို ပစ်မှတ်ထားတိုက်ခိုက်နေသည့် အခြေအနေများနှင့် များစွာကင်းကွာနေသည်ဟု ကရင်နီအမျိုးသားတိုးတက်ရေး ပါတီ (KNPP) အထွေထွေ အတွင်းရေးမှူး ဦးအောင်ဆန်းမြင့်က ပြောသည်။ “ငြိမ်းချမ်းရေးကို ခေါ်တယ်ပြောပြီးတော့မှ ဒီနေ့အချိန်အထိ ကျနော်တို့ ပြည်နယ်ထဲမှာ နောက်တစ်ခြား ဒေသတွေမှာ နေ့စဉ် လေယာဉ်နဲ့ ဗုံးကြဲ၊ ဒရုန်းနဲ့ပစ်၊ အမြောက်နဲ့ပစ် ဒါတွေကို မရပ်စဲဘဲနဲ့ ကျနော်တို့က ဘယ်လိုလုပ် စားပွဲပေါ်မှာ တင်ပြီးမှ နိုင်ငံရေး ဆွေးနွေးရမှာလဲ။ အပြောတစ်မျိုး အလုပ်တစ်မျိုးနဲ့ကတော့ ကျနော်တို့ အလုပ်မဖြစ်ဘူး။” PPST ပြောရေးဆိုခွင့်ရှိသူ ဗိုလ်မှူးကြီးစောကျော်ညွှန့်ကလည်း ၎င်းတို့အနေဖြင့် ဖိတ်ခေါ်စာရရှိထားပြီး ဆွေးနွေးရန် ပြင်ဆင်နေသော်လည်း စစ်ရေးနှင့် နိုင်ငံရေးအခင်းအကျင်း ကွဲပြားနေသည့် စိန်ခေါ်မှုများစွာ ရှိနေသည်ဟု ပြောသည်။ ၎င်းက “ငြိမ်းချမ်းရေးအတွက် အာသီသရှိနေရက်သားနဲ့ ကျနော်တို့ရဲ့ လုပ်နည်းလုပ်ဟန်တွေ၊ ကျနော်တို့ သွားနည်းသွားဟန်က ကွဲပြားမှုရှိနေမယ်ဆိုတာ ဘယ်လိုမှ လွန်ဆန်လို့မရတဲ့ အရှိတရားပါ။ ဒါပေမဲ့ ကျနော် တို့အနေနဲ့ တတ်နိုင်တဲ့အဆင့်ကနေ စပြီးတော့ တစ်ဖြည်းဖြည်းပေါ့လေ သက်ဆိုင်သူတွေအားလုံးပါဝင်တဲ့ ငြိမ်းချမ်းရေးတွေ့ဆုံဆွေးနွေးပွဲ ဖြစ်မြောက်ဖို့ဆိုတာက အခက်အနေတွေ၊ စိန်ခေါ်မှုတွေ အများကြီးကြားကနေ ကျနော်တို့ ဆက်လက်ရုန်းကန် ကြိုးပမ်းရမယ့် လုပ်ငန်းတွေကလည်း တော်တော်လေး အများကြီးရှိတယ်” ဟု ပြောသည်။ စစ်အုပ်စုသည် အလွတ်သဘော တွေ့ဆုံမှုများကို ထိုင်းနိုင်ငံအပြင် ပြည်တွင်းရှိ မော်လမြိုင်၊ ကျိုင်းတုံနှင့် မိုင်းလားဒေသများတွင် ပြုလုပ်ရန် စီစဉ်နေပြီး အစုအဖွဲ့အားလုံးကို နေပြည်တော်၌ တွေ့ဆုံရန် ရည်ရွယ်ထား ဟု ဆိုသည်။ သို့သော်လည်း NCA လက်မှတ်မထိုးထားသည့် အဖွဲ့များနှင့် လက်ရှိ တိုက်ပွဲဖြစ်ပွားနေသည့် အဖွဲ့များအနေဖြင့် ဤဖိတ်ခေါ်စာကို လက်ခံရရှိခြင်း ရှိ၊ မရှိကိုမူ သတင်းနှင့်မီဒီယာ ကွန်ရက် ( NMG) သတင်းဌာန အနေဖြင့် သီးခြား အတည်မပြုနိုင်သေးပေ။ မြေပြင်တွင် လေကြောင်းဗုံးကြဲမှုများကြောင့် အရပ်သားသေဆုံးမှုများ မြင့်တက်နေချိန်တွင် စစ်အုပ်စု၏ ငြိမ်းချမ်းရေး ကမ်းလှမ်းမှုသည် နိုင်ငံရေးအရ အကျပ်အတည်းမှ လွတ်မြောက်ရန် ကြိုးပမ်းမှုတစ်ခုသာ ဖြစ်နိုင်သည်ဟု လေ့လာစောင့်ကြည့်သူများက သုံးသပ်မှုများ ရှိနေသည်။ ဓါတ်ပုံ - ပုံဟောင်း #myanmarpacetalk #Paceprocess #ငြိမ်းချမ်းရေးဆွေးနွေးပွဲ #NCA #EAOs #EROs

ငြိမ်းချမ်းရေး ဆွေးနွေးမှုအတွက် အချို့အဖွဲ့များနှင့် အလွတ်တွေ့ဆုံမှုများ စတင်

May 9

စစ်တပ်က ရခိုင်တွင် လေယာဉ် အုပ်စုလိုက် တိုက်ခိုက်နေ သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ မေလ ၉ ရက်။ ရခိုင်ပြည်အတွင်း စစ်ရေးအရ ရှုံးနိမ့်နေသည့် စစ်တပ်သည် အာရက္ခတပ်တော် (AA) ထိန်းချုပ်ရာ မြို့ရွာများကို နေ့ရောညပါ လေကြောင်းမှ အပြင်းအထန် ဗုံးကြဲတိုက်ခိုက်နေပြီး မင်းပြားနှင့် ကျောက်တော်မြို့နယ်တို့ကို လေယာဉ်အုပ်စုလိုက်ဖြင့် တိုက်ခိုက်ခဲ့သည်။ မေလ ၇ ရက်နေ့၊ နေ့လယ်ပိုင်းတွင် မင်းပြားမြို့နယ်၊ ကျောက်ခုတ်ကျေးရွာအနီးရှိ တောင်တန်းများကို စစ်တပ်၏ ဂျက်ဖိုက်တာ ၅ စီးနှင့် Y-12 လေယာဉ် ၂ စီးတို့ဖြင့် တစ်စီးပြီးတစ်စီး ပတ်၍ ဗုံးကြဲခဲ့ပြီး၊ ညပိုင်း ၁၀ နာရီကျော် တွင်လည်း နေပြည်တော်နှင့် တံတားဦးလေတပ်မှ တက်လာသည့် လေယာဉ်များက ကျောက်တော်မြို့နယ်၊ အာကာတောင်ခြေရင်းကို အဆမပြတ် ဗုံးကြဲတိုက်ခိုက်ခဲ့သည်။ လက်ရှိတွင် ဂွမြို့နယ်အပါအဝင် ရခိုင်တောင်ပိုင်း မြို့နယ်များ၌ပါ ညဘက်တွင် Y-12 လေယာဉ်များ ပတ်ပျံ နေသဖြင့် ဒေသခံများမှာ ဘေးလွတ်ရာသို့ တိမ်းရှောင်နေကြရသည်။ ဂွမြို့နယ်မှ ဒေသခံတစ်ဦးက “ညဆိုရင် အင်ဂျင်သံကြားတာနဲ့ အိမ်ထဲမှာ မနေရဲတော့ဘူး။ ကလေးတွေနဲ့ ဆိုတော့ ပိုသတိထားရတယ်။ အသံကြားတဲ့ ကလေးကိုဆွဲပြီး နီးစပ်ရာ ဗုံးခိုကျင်းထဲ ပြေးရတာပဲ။ ဘယ်အချိန် ကိုယ့်ခေါင်းပေါ် ဗုံးကျလာမလဲဆိုတာ မသိရတော့ ညတိုင်း ရင်တထိတ်ထိတ်ပဲ” ဟု ပြောသည်။ စစ်တပ်သည် ပြီးခဲ့သည့် ဧပြီလအတွင်းကလည်း ပုဏ္ဏားကျွန်း၊ မြောက်ဦးနှင့် သံတွဲမြို့နယ်တို့တွင် လေကြောင်းမှ ဗုံးကြဲခဲ့သဖြင့် ကလေးငယ်များအပါအဝင် အရပ်သားသေဆုံးမှုများ ရှိခဲ့သည်။ ဤကဲ့သို့ အရပ်သားများကို ပစ်မှတ်ထားနေသည့် လုပ်ရပ်နှင့် ပတ်သက်၍ အာရက္ခတပ်တော် (AA) စစ်ဦးစီးချုပ် ဗိုလ်ချုပ်ထွန်းမြတ်နိုင်က The Diplomat သတင်းဌာနှင့် အင်တာဗျူးတွင် ယခုကဲ့သို့ သတိပေးပြောဆို ထားသည်။ “စစ်တပ်က အရပ်သားတွေကို ဆက်ပြီး ဗုံးကြဲနေသရွေ့ ကျနော်တို့အတွက် နိုင်ငံရေးအရ အဖြေရှာဖို့ဆိုတာ အလွန်ခက်ခဲပါလိမ့်မယ်။ သူတို့ဟာ အသာစီးရတဲ့ အနေအထားကနေ ဆွေးနွေးချင်နေတာပါ။ ဒါပေမဲ့ ကျနော်တို့ကတော့ အဲဒီလို ဖိအားပေးမှုတွေအောက်မှာ အရှုံးပေး ဒူးထောက်သွားမှာ မဟုတ်ပါဘူး” ဟု ၎င်းက ပြောသည်။ စစ်တပ်ဘက်ကမူ မြေပြင်တိုက်ပွဲများတွင် အထိနာနေခြင်းကြောင့် လေကြောင်းအားကိုးဖြင့် အရပ်သား ပြည်သူများကို ပစ်မှတ်ထား ခြိမ်းခြောက်နေခြင်းဖြစ်ပြီး၊ ပြည်သူများအနေဖြင့် လေကြောင်းအန္တရာယ်ကို အထူးသတိထားကြရန် အာရက္ခတပ်တော် (AA) က သတိပေးထားသည်။ စစ်တပ်၏ ယခုကဲ့သို့ အရပ်သားပြည်သူများ အပေါ် လေကြောင်းမှ ပစ်မှတ်ထား တိုက်ခိုက်နေမှုများသည် စစ်ရာဇဝတ်မှု ကျူးလွန်နေခြင်းဖြစ်သည်ဟု လူ့အခွင့်အရေးအဖွဲ့အစည်းများက ထောက်ပြနေကြပြီး နိုင်ငံတကာအနေဖြင့် စစ်အုပ်စုထံသို့ လေယာဉ်ဆီနှင့် လက်နက်ခဲယမ်းများ စီးဆင်းရာလမ်းကြောင်းကို ပိုမိုတင်းကျပ်စွာ ပိတ်ဆို့ပေးရန် တောင်းဆိုမှုများလည်း ကျယ်ကျယ်လောင်လောင် ထွက်ပေါ်နေသည်။ သို့သော်လည်း မြေပြင်တွင်မူ စစ်တပ်သည် လေကြောင်းအင်အားကို အလွဲသုံးစားပြုကာ ပြည်သူများအား ထိတ်လန့်တုန်လှုပ်စေရန် ဆက်လက်လုပ်ဆောင်နေဆဲ ဖြစ်သည်ဟု လေ့လာစောင့်ကြည့်သူများက သုံးသပ်ထားသည်။ #RakhineAirstrike #ရခိုင်တိုက်ပွဲ

စစ်တပ်က ရခိုင်တွင် လေယာဉ် အုပ်စုလိုက် တိုက်ခိုက်နေ

May 9

တော်လှန်ရေး အဖွဲ့အချင်းချင်း ပစ်ခတ်မှု အချက်အလက်များ ထုတ်ပြန်မည်ဟု IEC ပြော သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မေလ ၉ ရက်။ ရှမ်း-ကရင်နီအစပ်၊ မိုးဗြဲဒေသတွင် တော်လှန်ရေးအဖွဲ့ အချင်းချင်းကြား ဖြစ်ပွားခဲ့သည့် ပစ်ခတ်မှုနှင့်ပတ်သက်၍ စုံစမ်းစစ်ဆေးမှုများ လုပ်ဆောင်နေပြီး၊ တာဝန်ယူမှု၊ တာဝန်ခံမှုရှိစွာဖြင့် လူထုထံ အချက်အလက်များ ထုတ်ပြန် သွားမည်ဟု ကရင်နီကြားကာလအုပ်ချုပ်ရေးကောင်စီ (IEC) က ပြောသည်။ ပြီးခဲ့သည့် ဧပြီလ ၂၄ ရက်နေ့က မိုးဗြဲအနောက်ဘက်ခြမ်းတွင် အမှတ် (၁) အယ်ဖာစစ်ဒေသနှင့် မိုးဗြဲဒေသခံ Local PDF အဖွဲ့တို့အကြား ပစ်ခတ်မှုဖြစ်ပွားခဲ့ရာ ဦးအောင်မင်း အပါအဝင် ဒေသခံ PDF ၉ ဦး သေဆုံးခဲ့သည်။ အဆိုပါဖြစ်စဉ်ကို စစ်ဆေးရန် IEC က အဖွဲ့ဝင် ၉ ဦးပါဝင်သော စုံစမ်းစစ်ဆေးရေး ကော်မရှင်တစ်ရပ်ကို အရေးပေါ်ဖွဲ့စည်းခဲ့ခြင်းဖြစ်သည်။ IEC အထွေထွေအတွင်းရေးမှူး ဦးဗညားက “လောလောဆယ်ကတော့ စိစစ်ကာလဖြစ်တဲ့အတွက် ကျနော်တို့ ဘာမှ အသေးစိတ် ပြောလို့မရသေးပါဘူး။ ဒီဖြစ်စဉ်မှာ တာဝန်ယူမှု၊ တာဝန်ခံမှုအပိုင်းတွေကို ကျနော်တို့ ဆက် သွားမှာ ဖြစ်ပါတယ်။ လူထုကို အသိပေးထုတ်ပြန်ဖို့ကတော့ အခြေအနေနဲ့ အချိန်အခါပေါ် မူတည်ပြီး ထုတ်ပြန် သင့်တဲ့ အချိန်မှာ ထုတ်ပြန်ပေးသွားမှာပါ” ဟု ပြောသည်။ ပစ်ခတ်မှုမဖြစ်ပွားမီ ဧပြီလ ၁၆ ရက်နေ့တွင် ဖယ်ခုံမြို့နယ် ပူးပေါင်းအုပ်ချုပ်ရေး ကောင်စီနှင့် ကျေးရွာအုပ်စု (၉) စုက ဦးအောင်မင်း ဦးဆောင်သည့် မိုးဗြဲ Local PDF သည် သံဃာတော်များနှင့် သုံ့ပန်းများကို သတ်ဖြတ်ခြင်း၊ ပြည်သူအပေါ် လက်နက်အားကိုး ဖိနှိပ်ခြင်းများ ကျူးလွန်သည်ဟုဆိုကာ အဖွဲ့ကို အပြီးတိုင်ဖျက်သိမ်းရန်နှင့် လက်နက်အပ်နှံရန် သဘောထား ထုတ်ပြန်ခဲ့သည်။ ဧပြီလ ၂၄ ရက်နေ့တွင် ညှိနှိုင်းရန် သွားရောက်စဉ် အပြန်အလှန် ငြင်းခုံရာမှ ဦးအောင်မင်းဘက်က စတင် ပစ်ခတ်သဖြင့် နှစ်ဖက် ပစ်ခတ်မှု ကြီးကြီးမားမား ဖြစ်ပွားခဲ့ခြင်းဖြစ်သည်ဟု အမှတ် (၁) အယ်ဖာစစ်ဒေသ ဘက်က ထုတ်ပြန်ထားသည်။ တော်လှန်ရေး အင်အားစုများအကြား ဤဖြစ်စဉ်အပေါ် စိုးရိမ်ပူပန်မှုများ ရှိနေပြီး ကရင်နီတော်လှန်ရေးအဖွဲ့နှင့် နီးစပ်သူတစ်ဦးက “တော်လှန်ရေးကာလမှာ ဒီလိုမျိုး အချင်းချင်း သေနတ်နဲ့ ဖြေရှင်းကြတာတော့ မကောင်း ဘူးပေါ့နော်။ တော်လှန်ရေးပုံရိပ် ထိခိုက်တယ်။ ဒါ့အပြင် ကရင်နီမှာ တပ်တစ်ခုတည်း ဖြစ်လာဖို့အတွက် အချင်းချင်းကြားမှာ ယုံကြည်မှုတွေ တည်ဆောက်ဖို့ ပိုပြီးခက်သွားနိုင်တယ်” ဟု ပြောသည်။ လက်ရှိတွင် ပါဝင်ပတ်သက်ခဲ့သည့် မိုးဗြဲ Local PDF ကို IEC က အပြီးတိုင် ဖျက်သိမ်းလိုက်ပြီဖြစ်ပြီး၊ ဖမ်းဆီး ရမိထားသည့် အဖွဲ့ဝင်အချို့ကိုလည်း စစ်ခုံရုံးမှတစ်ဆင့် တရားရင်ဆိုင်စေရန် စီစဉ်နေသည်။ ကရင်နီတပ်ပေါင်းစုံ စစ်ဦးစီးအဖွဲ့ (JCS) နှင့် ဗဟိုစစ်ဦးစီးအဖွဲ့ (COC) တို့ ပူးပေါင်းဖွဲ့စည်းထားသည့် စုံစမ်းရေး ကော်မရှင်အနေဖြင့် မြေပြင်အခြေအနေကို အသေးစိတ် စိစစ်လျက်ရှိပြီး၊ တရားမျှတမှု ဖော်ဆောင်နိုင်ရေး အတွက် သက်ဆိုင်သူများ ပူးပေါင်းဆောင်ရွက်ရန် တိုက်တွန်းထားသည်။ #IEC #အယ်လ်ဖာစစ်ဒေသ #မိုးဗြဲပြည်သူ့ကာကွယ်ရေးတပ် #mobyelocalpdf

တော်လှန်ရေး အဖွဲ့အချင်းချင်း ပစ်ခတ်မှု အချက်အလက်များ ထုတ်ပြန်မည်ဟု IEC ပြော

May 9

ဘားတွင် ရိုက်နှက် သတ်ဖြတ်ခံရသည့် အမျိုးသမီးငယ်အတွက် တရားမျှတမှု ဖော်ထုတ်မည် သတင်းနှင့် မီဒီယာ ကွန်ရက်။ ၂၀၂၆ ခုနှစ် မေလ ၉ ရက်။ ရှမ်းပြည် တောင်ပိုင်း၊ တောင်ကြီးမြို့ရှိ ပီတာဘား (Peter Bar) ပိုင်ရှင်၏ ရိုက်နှက်သတ်ဖြတ်မှုကြောင့် သေဆုံးခဲ့ ရသည့် အသက် ၁၆ နှစ်အရွယ် အင်းလေးဒေသခံ အမျိုးသမီးငယ် မဖူးပွင့်ဝေအတွက် တရားမျှတမှုရရှိသည် အထိ အဆုံးတိုင် ကြိုးပမ်းသွားမည်ဟု အင်းလေးအမျိုးသမီးသမဂ္ဂ (IWU) က ထုတ်ပြန်ကြေညာလိုက်သည်။ မိသားစု၏ စားဝတ်နေရေးကို တစ်ဖက်တစ်လမ်းမှ ကူညီရန်အတွက် နွေရာသီကျောင်းပိတ်ရက်အတွင်း အလုပ်ဝင်ရောက်လုပ်ကိုင်နေသည့် Grade 8 ကျောင်းသူ မဖူးပွင့်ဝေသည် မေလဆန်းပိုင်းက အဆိုပါ ဘားဆိုင် ပိုင်ရှင် ကိုပီတာ (ခ) အောင်မျိုးသူ၏ ရိုက်နှက်မှုကို ခံခဲ့ရခြင်းဖြစ်သည်။ ကျူးလွန်သူသည် လူကုံထံအသိုင်းအဝိုင်းနှင့် အာဏာပိုင်များအကြား ဝင်ဆန့်သူဖြစ်သဖြင့် လက်ရှိပျက်စီးနေ သည့် တရားစီရင်ရေးစနစ်အောက်တွင် အမှုပျောက်ကွယ်သွားမည်ကို IWU အနေဖြင့် စိုးရိမ်နေသည်။ IWU အထွေထွေအတွင်းရေးမှူး မကြိုးကြာက “ကြက်ကလေး၊ ငှက်ကလေး တကောင် ဆုံးရှုံးသွားတာ မဟုတ် ပါဘူး။ လူတိုင်းရဲ့ အသက်က တန်ဖိုးကြီးပါတယ်။ ဒါက လွယ်လွယ်နဲ့ အမှုလျှော့ပေါ့ပေးလို့ မရဘူး။ သေဆုံး သူနဲ့ ထိုက်တန်တဲ့ တရားမျှမှု ရမှ ရမှာပါ။ ရအောင်လည်း အဆုံးထိသွားမှာပါ” ဟု ပြောသည်။ ထို့ပြင် တရားခံသည် စိတ်ကျန်းမာရေးမကောင်းဟု အကြောင်းပြကာ ပြစ်ဒဏ်မှ ကင်းလွတ်ခွင့်ရရန် ကြိုးပမ်း လာနိုင်သည့်အပေါ် မကြိုးကြာက ဆက်လက်၍ “တရားခံက စိတ်နှံတာမနှံတာ မဆိုင်ဘူး။ ဘားတစ်ခုလုံးတောင် ဖွင့်နိုင်သေးတာပဲ။ လူတယောက် အသက်ဆုံးရှုံးသွားတာပါ” ဟု ဝေဖန်ထောက်ပြသည်။ သေဆုံးသူ မဖူးပွင့်ဝေသည် ဖခင်ကွယ်လွန်ပြီးနောက် မိခင်ဖြစ်သူနှင့်အတူ ဆင်းရဲနွမ်းပါးစွာ နေထိုင်ခဲ့ရသူဖြစ်ပြီး ယခုဖြစ်ရပ်သည် မြန်မာနိုင်ငံရှိ အမျိုးသမီးငယ်များ အလုပ်အကိုင်ရှာဖွေရာတွင် ရင်ဆိုင်နေရသည့် လုံခြုံမှုမရှိခြင်းနှင့် အကာအကွယ်မဲ့ခြင်းများကို မီးမောင်းထိုးပြနေသည်။ မကြိုးကြာက “ကျမတို့ မြန်မာနိုင်ငံမှာ စားဝတ်နေရေး အဆင်ပြေဖို့အတွက် မိဘတွေကို တဘက်တလမ်းကနေ ဝင်ငွေကူရှာပေးရင်းနဲ့ လူကုန်ကူးတာတွေ ခံရတယ်၊ နှိပ်စက်မှုဒဏ်တွေ ခံရတယ်။ ဒါကြောင့်မိုလို့ ကျမတို့ အမျိုးသမီးတွေအနေနဲ့ အလုပ်လုပ်တော့မယ်ဆိုရင် အစစအရာ သတိထားပြီး လုပ်ကြပါလို့ ပြောချင် ပါတယ် ရှင့်” ဟု ပြောသည်။ ကျူးလွန်သူ ကိုပီတာကို မေလ ၆ ရက်နေ့က ရှမ်းပြည် အရှေ့ပိုင်း၊ မိုင်းပြင်းမြို့နယ်၊ တုံတာမြို့တွင် ဖမ်းဆီး ရမိခဲ့ ပြီး လက်ရှိတွင် တောင်ကြီးမြို့မရဲစခန်းသို့ လွှဲပြောင်းပေးထားပြီဖြစ်သည်။ အဆိုပါအမှုနှင့် ပတ်သက်၍ ထိရောက်သည့် ပြစ်ဒဏ်ချမှတ်နိုင်ရေးအတွက် ရှမ်းပြည်အတွင်းရှိ အမျိုးသမီး အဖွဲ့အစည်းများနှင့် အရပ်ဘက်အဖွဲ့အစည်းများအားလုံး ဝိုင်းဝန်းအသံထုတ်ဖော်ပေးကြရန်လည်း IWU က မေတ္တာရပ်ခံထားသည်။ အင်းလေးအမျိုးသမီးသမဂ္ဂ အနေဖြင့် မဖူးပွင့်ဝေအတွက် မှန်ကန်သည့် တရားစီရင်မှု ပေါ်ပေါက်လာစေရန်နှင့် အမျိုးသမီးများအပေါ် အကြမ်းဖက်မှုပုံစံအမျိုးမျိုးကို ဆန့်ကျင်တိုက်ဖျက်သွားရန် အဆုံးတိုင် ရပ်တည် ဆောင် ရွက်သွားမည်ဟု မေလ ၇ ရက်နေ့က ထုတ်ပြန်ထားသည်။ #PeterBar #တောင်ကြီးမြို့ #IWU #အင်းလေးအမျိုးသမီးသမဂ္ဂ

ဘားတွင် ရိုက်နှက် သတ်ဖြတ်ခံရသည့် အမျိုးသမီးငယ်အတွက် တရားမျှတမှု ဖော်ထုတ်မည်

May 8

EU က တရုတ်အင်ဗာတာများအား ကန့်သတ်ချက်အပေါ် တရုတ် ကန့်ကွက် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မေလ ၈ ရက်။ ဥရောပသမဂ္ဂ (EU) ရန်ပုံငွေဖြင့် ဆောင်ရွက်သည့် စီမံကိန်းများတွင် တရုတ်နိုင်ငံထုတ် ပါဝါအင်ဗာတာ (Power Inverters) များ အသုံးမပြုရန် ကန့်သတ်ချက်အပေါ် တရုတ်အစိုးရက မေလ ၇ ရက်နေ့တွင် ပြင်းပြင်းထန်ထန် ကန့်ကွက်ကြောင်း ထုတ်ပြန်ခဲ့သည်။ ဥရောပကော်မရှင်က တရုတ်ထုတ် အင်ဗာတာများရှိ ဆော့ဖ်ဝဲလ်များမှတစ်ဆင့် ဥရောပလျှပ်စစ်ဓာတ်အားစနစ်ကို အဝေးမှ ထိန်းချုပ်ခြင်း သို့မဟုတ် အချက်အလက် ခိုးယူခြင်းများ ပြုလုပ်နိုင်သည်ဟူသော "လုံခြုံရေးစိုးရိမ်ချက်" ကြောင့် ယခုကဲ့သို့ ကန့်သတ်ရန် ကြိုးပမ်းခြင်းဖြစ်သည်။ လက်ရှိတွင် ဥရောပ၌ အသုံးပြုနေသော နေရောင်ခြည်စွမ်းအင်သုံး အင်ဗာတာ ၈၀ ရာခိုင်နှုန်းကျော်မှာ တရုတ်နိုင်ငံထုတ်များ ဖြစ်သည်။ တရုတ်စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနက ၎င်းတို့နိုင်ငံကို "အန္တရာယ်မြင့်မားသော နိုင်ငံ" အဖြစ် နာမည်ဖျက်နေမှုကို ချက်ချင်းရပ်တန့်ရန်နှင့် ခွဲခြားဆက်ဆံသည့် လုပ်ရပ်များကို စွန့်လွှတ်ရန် တိုက်တွန်းထားသည်။ #တရုတ်အင်ဗာတာ #PowerInverters #EU

EU က တရုတ်အင်ဗာတာများအား ကန့်သတ်ချက်အပေါ် တရုတ် ကန့်ကွက်

May 8

အာဆီယံထိပ်သီးညီလာခံတွင် မြန်မာကိုယ်စားလှယ်အဖြစ် အဆင့်မြင့်အရာရှိသာ တက်ရောက်ခွင့်ရ သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ မေလ ၈ ရက်။ ဖိလစ်ပိုင်နိုင်ငံ၊ စီဘူးမြို့၌ ကျင်းပနေသည့် အာဆီယံထိပ်သီးညီလာခံသို့ အဖွဲ့ဝင် (၁၀) နိုင်ငံမှ နိုင်ငံအဆင့် အမြင့်ဆုံးခေါင်းဆောင်များ တက်ရောက်လျက်ရှိသော်လည်း မြန်မာနိုင်ငံမှ နိုင်ငံခြားရေးဝန်ကြီးဌာန အမြဲတမ်းအတွင်းဝန် ဦးဟောက်ခန်ဆွမ် သာ တက်ရောက်ခွင့်ရရှိခဲ့သည်။ မြန်မာနိုင်ငံသည် အာဆီယံ၏ ဘုံသဘောတူညီချက် (၅) ရပ်ကို လိုက်နာရန် ပျက်ကွက်ခြင်းကြောင့် နိုင်ငံရေးအရ ကိုယ်စားပြုသူ တက်ရောက်ခွင့် မရခြင်းဖြစ်သည်။ ညီလာခံတွင် မြန်မာ့အရေးနှင့် ပတ်သက်၍ ထိုင်း၊ ကမ္ဘောဒီးယား၊ လာအိုနှင့် ဗီယက်နမ်တို့က ထိတွေ့ဆက်ဆံလိုသော်လည်း စင်ကာပူ၊ မလေးရှားနှင့် အင်ဒိုနီးရှားတို့က သိသာသော တိုးတက်မှုမရှိမချင်း စစ်ကောင်စီကို အသိအမှတ်ပြုရန် လက်မခံသေးကြောင်း သုံးသပ်ချက်များ ထွက်ပေါ်နေသည်။ အလားတူ မေလ ၉ ရက်နေ့တွင် ကျင်းပမည့် ရုရှားနိုင်ငံ၏ ဒုတိယကမ္ဘာစစ် အောင်ပွဲနေ့ အခမ်းအနားတွင်လည်း မြန်မာနိုင်ငံမှ နိုင်ငံရေးခေါင်းဆောင်များ တက်ရောက်မည့် စာရင်းတွင် ပါဝင်ခြင်း မရှိကြောင်း သိရသည်။ #အာဆီယံ #aseansummit2026

အာဆီယံထိပ်သီးညီလာခံတွင် မြန်မာကိုယ်စားလှယ်အဖြစ် အဆင့်မြင့်အရာရှိသာ တက်ရောက်ခွင့်ရ

May 8

ဟန်တာဗိုင်းရပ်စ် ကူးစက်မှုသည် ကမ္ဘာလုံးဆိုင်ရာ ကပ်ရောဂါ ဖြစ်လာနိုင်ခြေမရှိဟု WHO အာမခံ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မေလ ၈ ရက်။ အာဂျင်တီးနားမှ စပိန်သို့ ခုတ်မောင်းနေသည့် MV Hondius အပျော်စီးသင်္ဘောပေါ်တွင် ဖြစ်ပွားခဲ့သော ဟန်တာဗိုင်းရပ်စ် (Hantavirus) ကူးစက်မှုသည် ကမ္ဘာလုံးဆိုင်ရာ ကပ်ရောဂါ (Pandemic) ဖြစ်လာနိုင်ခြေ မရှိကြောင်း ကမ္ဘာ့ကျန်းမာရေးအဖွဲ့ (WHO) က ပြောကြားခဲ့သည်။ အဆိုပါ ဖြစ်စဉ်တွင် သံသယရှိလူနာ (၈) ဦးအနက် (၅) ဦးတွင် ပိုးတွေ့ရှိပြီး (၃) ဦး သေဆုံးခဲ့သည်။ ပုံမှန်အားဖြင့် ကြွက်များမှတစ်ဆင့် ကူးစက်တတ်သော်လည်း ယခုဖြစ်စဉ်တွင် "လူအချင်းချင်း ကူးစက်မှု" ကို ပထမဆုံးအကြိမ် တွေ့ရှိခဲ့ခြင်းဖြစ်သည်။ သို့ရာတွင် WHO ကျွမ်းကျင်သူ မာရီယာ ဗန် ကာခိုးဗ်က အဆိုပါဗိုင်းရပ်စ်သည် လေထဲမှတစ်ဆင့် အလွယ်တကူ ကူးစက်ခြင်းမျိုးမဟုတ်ဘဲ အလွန်နီးကပ်သော ထိတွေ့မှုမှသာ ကူးစက်နိုင်သဖြင့် စိုးရိမ်စရာ နည်းပါးကြောင်း ရှင်းလင်းခဲ့သည်။ လက်ရှိတွင် ခရီးသည်များနှင့် အမှုထမ်းများကို Mask တပ်ဆင်စေကာ ရောဂါပျိုးချိန် (၆) ပတ်အတွင်း နောက်ထပ်ကူးစက်မှု ရှိမရှိကို စောင့်ကြည့်လျက်ရှိသည်။ #Hantavirus #WHO #Pandemic

ဟန်တာဗိုင်းရပ်စ် ကူးစက်မှုသည် ကမ္ဘာလုံးဆိုင်ရာ ကပ်ရောဂါ ဖြစ်လာနိုင်ခြေမရှိဟု WHO အာမခံ

May 8

ကာကွယ်ရေး ဝန်ကြီးဟောင်း ၂ ဦးကို တရုတ် သေဒဏ်ပေး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မေလ ၈ ရက်။ တရုတ်နိုင်ငံ၏ ကာကွယ်ရေးဝန်ကြီးဟောင်းများဖြစ်ကြသည့် ဝေဖုန်းဟေ (Wei Fenghe) နှင့် လီရှန်းဖူး (Li Shangfu) တို့ကို စစ်ခုံရုံးက အဂတိလိုက်စားမှုဖြင့် ယနေ့တွင် သေဒဏ်အမိန့် ချမှတ်လိုက်ကြောင်း အစိုးရပိုင် ဆင်ဟွာသတင်းဌာနက ထုတ်ပြန်သည်။ အဆိုပါ သေဒဏ်အမိန့်သည် (၂) နှစ် ဆိုင်းငံ့သေဒဏ် (Suspended Death Sentence) ဖြစ်ပြီး၊ ပြစ်ဒဏ်ကာလအတွင်း ကောင်းမွန်စွာ နေထိုင်ပါက တစ်သက်တစ်ကျွန်း ပြစ်ဒဏ်သို့ လျှော့ပေါ့ ပြောင်းလဲပေးမည်ဖြစ်သည်။ သို့ရာတွင် တစ်သက်တစ်ကျွန်း ပြစ်ဒဏ်သို့ ပြောင်းလဲသွားစေကာမူ ထောင်ဒဏ်လျှော့ပေါ့ခွင့် သို့မဟုတ် ခံဝန်ဖြင့် လွတ်မြောက်ခွင့် (Parole) လုံးဝရရှိမည်မဟုတ်ကြောင်း စစ်ခုံရုံး၏ အမိန့်တွင် ဖော်ပြထားသည်။ ၎င်းတို့ နှစ်ဦးစလုံးသည် လာဘ်ပေးလာဘ်ယူမှုများတွင် အပြစ်ရှိကြောင်း တွေ့ရှိရသဖြင့် ပိုင်ဆိုင်သမျှ ပစ္စည်းအားလုံးကိုလည်း ပြည်သူ့ဘဏ္ဍာအဖြစ် သိမ်းဆည်းရန် အမိန့်ချမှတ်ခဲ့သည်။ ဝေဖုန်းဟေသည် ၂၀၁၈ ခုနှစ်မှ ၂၀၂၃ ခုနှစ်အထိ ကာကွယ်ရေးဝန်ကြီး တာဝန်ယူခဲ့ပြီး၊ လီရှန်းဖူးက ၂၀၂၃ ခုနှစ် မတ်လတွင် ဆက်ခံခဲ့သော်လည်း (၇) လအကြာတွင် ရာထူးမှ ထုတ်ပယ်ခံခဲ့ရခြင်းဖြစ်သည်။ သမ္မတ ရှီကျင့်ဖျင်၏ အဂတိလိုက်စားမှု တိုက်ဖျက်ရေး စီမံချက်အောက်တွင် ထိပ်တန်းစစ်ဘက်အရာရှိကြီးများ ဆက်တိုက် ဖယ်ရှားခံနေရမှုအပေါ် ဝေဖန်မှုများလည်း ထွက်ပေါ်လျက်ရှိသည်။ #WeiFenghe #LiShangfu #ရှီကျင့်ဖျင် #လီရှန်းဖူး #ဝေဖုန်းဟေ

ကာကွယ်ရေး ဝန်ကြီးဟောင်း ၂ ဦးကို တရုတ် သေဒဏ်ပေး

« Prev 1 2 3 4 5 6 … 1,047 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

ဒေါ်နယ်ထရန့်ကို ရှီကျင့်ဖျင် ကော်ဇောနီဖြင့် ကြိုဆို
ထိုင်းနိုင်ငံတွင် အရက် သောက်သုံးရောင်းချမှု အပေါ် ထပ်မံတင်းကြပ်
ဖိလစ်ပိုင် လွှတ်တော်အတွင်းမှ ပစ်ခတ်သံများ ကြားရ
မြစ်ဆုံစီမံကိန်း ပြန်လည် စတင်ခြင်းသည် ဒေသခံများ အတွက် အကျိုး မဖြစ်နိုင်
အဆက်မပြတ်မိုးကြောင့် ရှမ်းအရှေ့ ရော်ဘာခြံလုပ်သားများ အခက်တွေ့

Archives

Archives

×Close