NMG Doh – Page 4 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
နိုင်ငံတကာသတင်း
NMG အကြောင်း
Contact

Home
Author Archive

NMG Doh

Author: NMG Doh

Sep 28

ချင်းမိုင်တွင် ကရင်နီရိုးရာ ဒီးကူပွဲတော် ကျင်းပ၊ စစ်ဘေးရှောင်နှင့် ပညာရေးအတွက် ရန်ပုံငွေ ရှာဖွေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၈ ရက်။ ထိုင်းနိုင်ငံ၊ ချင်းမိုင်မြို့တွင် ကျင်းပသည့် ကရင်နီရိုးရာ အဲဒိုပေါမီ (ဒီးကူ) ပွဲတော်သည် ၅ နှစ်တာအတွင်း လူထောင်နှင့်ချီ တက်ရောက်ခဲ့ပြီး အစည်ကားဆုံးနှင့် အခမ်းနားဆုံးအဖြစ် အောင်မြင်စွာ ကျင်းပနိုင်ခဲ့ကြောင်း ပွဲစီစဉ်သူများက ပြောသည်။ အဆိုပါ ရိုးရာဒီးကူပွဲတော်ကို ချင်းမိုင်မြို့အနီး၊ ဒွယ်စကဲပ် (Doi Saket) မြို့နယ်ရှိ ရာဇမင်္ဂလ နည်းပညာတက္ကသိုလ် (RMUTL) ကျောင်းပရိဝုဏ်အတွင်း ကျင်းပခဲ့ခြင်းဖြစ်သည်။ ယခင်နှစ်များက မြို့တွင်း၌ ကျင်းပစဉ် ကြုံတွေ့ခဲ့ရသည့် နေရာကျဉ်းကျပ်မှုနှင့် အခက်အခဲများကို ကျော်လွှား ကာ ယခုနှစ်တွင် လွတ်လပ်စွာ ကျင်းပခွင့် ရရှိခဲ့ခြင်း ဖြစ်သည်။ ပွဲစီစဉ် ဦးဆောင်သူတစ်ဦးဖြစ်သည့် Karenni Community Chiangmai Thailand (KCCT) မှ တာဝန်ရှိသူ ဦးဗယ်လင်တိုင်းက “ဒီနေ့ကျင်းပတဲ့ အဲဒိုပေါမီ ဒီးကူပွဲကတော့ အရင်နှစ်တွေထက်တော့ တော်တော်လေး ထူး ခြားတာ ရှိပါတယ်။ အခု ဒီနှစ်မှာကျတော့ ဒီတောင်ပေါ် မြို့ပြင်နေရာမှာ ကျနော်တို့ နေရာရတဲ့အခါမှာ လွတ် လပ်စွာပဲ ဒီနေရာကို ပိုင်ဆိုင်တဲ့ တာဝန်ရှိသူတွေကလည်း ကျွန်တော်တို့ကို ၁၀၀ ရာခိုင်နှုန်း လွတ်လပ်ခွင့် ပေး ထားတယ်။ ‘စိတ်ကြိုက်ဆွဲပါ’ ဆိုတဲ့ ဟာမျိုးပေါ့။ ဒီနေ့ကတော့ အင်မတန်မှ ကြည်နူးစရာလည်း ရလိုက်တယ်၊ နောက် ပရိသတ်တွေလည်း ထောင်နဲ့ချီ လာတာပေါ့နော်။ အင်မတန်မှ အောင်မြင်တဲ့ နေ့တစ်နေ့ ဖြစ်လာပါ တယ်” ဟု ပြောသည်။ ၎င်းပွဲတော်သို့ ကရင်နီပြည် ကြားကာလအုပ်ချုပ်ရေးကောင်စီ (IEC) တာဝန်ရှိသူအချို့ တက်ရောက်ခဲ့ကြသည့် အပြင် နေရာပေးသည့် ထိုင်းတက္ကသိုလ်ဝင်း၏ ဥက္ကဋ္ဌနှင့် အကြီးဆုံး ကျောင်းထိုင် ဆရာတော်ကြီးများပါ တက် ရောက်ကာ အသိအမှတ်ပြု ပံ့ပိုးပေးခဲ့ကြသည်။ ထို့ပြင် ယခုပွဲတော်မှတစ်ဆင့် စစ်ဘေးဒဏ်သင့် ကရင်နီပြည်တွင်းရှိ စစ်ဘေးရှောင်များနှင့် ပညာရေးကဏ္ဍ အတွက် ရန်ပုံငွေများ ကောက်ခံသည့် အစီအစဉ်များလည်း ပြုလုပ်ခဲ့ကြပြီး ရရှိသည့် ရန်ပုံငွေများကို ကရင်နီ ပြည်တွင်းရှိ စစ်ဘေးရှောင်များထံသို့ တိုက်ရိုက် ကူညီပံ့ပိုးပေးသွားမည် ဟု ဆိုသည်။ တစ်ဖက်တွင်လည်း ပြည်ပရောက် ကရင်နီတက္ကသိုလ် ကျောင်းသူ/ကျောင်းသားများအဖွဲ့က ကရင်နီပြည်တွင်းရှိ အခြေခံပညာကျောင်းများအတွက် ရည်ရွယ်ကာ ရန်ပုံငွေ ရှာဖွေခဲ့ကြသည်။ ရန်ပုံငွေ အသုံးပြုမည့် အစီအစဉ်နှင့် ပတ်သက်၍ ပြည်ပရောက် ကရင်နီတက္ကသိုလ် ကျောင်းသူ/သားများ အဖွဲ့ဝင် မမော်လျားမြာက “ဒီနေ့ လာရတဲ့ အဓိက ရည်ရွယ်ချက်ကတော့ ကရင်နီပြည် လွိုင်ကော် အရှေ့ဘက် ခြမ်းက ကျောင်းတစ်ကျောင်းအတွက် အဓိက ရည်ရွယ်ပြီးတော့ လုပ်ထားတာ ဖြစ်တယ်။ ဘာဖြစ်လို့လဲဆို တော့ ဒီကျောင်းက လောလောလတ်လတ် ဒီ ဩဂုတ်လမှာ စစ်အုပ်စုတပ်ရဲ့ ဒရုန်းကြောင့် အရေးပေါ် အခြေ အနေကြောင့် တခြား လုံခြုံတဲ့နေရာကို ပြောင်းရွှေ့ရတယ်၊ အဲ့ဒါကြောင့်မို့ သူတို့ရဲ့ လိုအပ်ချက်တွေ အများကြီး ရှိနေတယ်ပေါ့နော်။ အဲ့ဒါကြောင့် ဒီရရှိလာတဲ့ ရန်ပုံငွေတွေကို အဲ့ဒီကျောင်းအတွက် အရင် စီစဉ်အသုံးချသွားမှာ ဖြစ်ပါတယ်” ဟု ပြောသည်။ ကရင်နီပြည်တွင်း၌ ကျောင်းပေါင်း ၄၀၀ ကျော်နှင့် ကျောင်းသား ၅ သောင်းကျော် ရှိနေပြီး စာရေးကိရိယာ၊ ပရိဘောဂနှင့် လုံခြုံရေးဆိုင်ရာ အရေးပေါ် လိုအပ်ချက်များစွာ ကြုံတွေ့နေရသည့်အတွက် ယခုကဲ့သို့ တစ်ဖက် တစ်လှမ်းမှ ကူညီဆောင်ရွက်နေခြင်း ဖြစ်သည်။ ချင်းမိုင်မြို့တွင် ၅ နှစ်တာအတွင်း အခမ်းနားဆုံးအဖြစ် ကျင်းပနိုင်ခဲ့သည့် အဆိုပါ ကရင်နီရိုးရာ ဒီးကူပွဲတော် သည် ရိုးရာဓလေ့ကို ထိန်းသိမ်းရုံသာမက ပြည်ပရောက် လူငယ်များနှင့် ပြည်တွင်းမှ စစ်ဘေးဒဏ်ခံ ပြည်သူများ အကြား စည်းလုံးညီညွတ်မှုနှင့် အပြန်အလှန် ချိတ်ဆက်ကူညီနိုင်မှုကို ထင်ဟပ်စေခဲ့သည်။ #ဒီးကူပွဲ

ချင်းမိုင်တွင် ကရင်နီရိုးရာ ဒီးကူပွဲတော် ကျင်းပ၊ စစ်ဘေးရှောင်နှင့် ပညာရေးအတွက် ရန်ပုံငွေ ရှာဖွေ

Sep 28

ထားဝယ်ဒေသတွင် မိုးဆက်တိုက်ရွာပြီး ရေကြီးမြေပြိုမှုကြောင့် လူသေဆုံးမှုများ ရှိနေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၈ ရက်။ တနင်္သာရီတိုင်း၊ ထားဝယ်ခရိုင်အတွင်း အဆက်မပြတ် မိုးရွာသွန်းမှုကြောင့် ရွာပေါင်း ၆၀ ကျော် ရေကြီးမြေပြိုမှု အပြင်းအထန် ခံရပြီး ကလေးနှင့် အမျိုးသမီးများ အပါအဝင် ပြည်သူ ၁၃ ဦးထက်မနည်း သေဆုံးကာ ၃၀ ထက် မနည်း ပျောက်ဆုံးနေကြောင်း မြေပြင် ကူညီကယ်ဆယ်ရေး အဖွဲ့များက ပြောသည်။ ပြီးခဲ့သည့် စက်တင်ဘာလ ၂၆ ရက်နေ့ကတည်းက စတင်ကာ မိုးဆက်တိုက် ရွာသွန်းခဲ့ခြင်းဖြစ်ပြီး လောင်းလုံးမြို့ နယ်တွင် ၁၀ ဦး၊ ထားဝယ်မြို့နယ်တွင် ၂ ဦးနှင့် သရက်ချောင်းမြို့နယ်တွင် ၁ ဦး သေဆုံးခဲ့ရာ သေဆုံးသူနှင့် ပျောက်ဆုံးသူ အရေအတွက်မှာ ထက်မက ပိုမိုများပြားလာနိုင်ကြောင်း ဒေသခံများက ဆိုသည်။ မိုင် ၅၀ ကျော် ရှည်လျားသည့် လောင်းလုံးတောင်တန်း တစ်လျှောက်တွင် တောင်ပြိုမှုများ ဆက်တိုက် ဖြစ်ပွား နေသဖြင့် နေအိမ် ၅၀ ကျော်နှင့် တံတား ၁၀ စင်းထက်မနည်း ပျက်စီးသွားသည့်အပြင် လောင်းလုံး-ရှင်မော် ကားလမ်းပေါ်ရှိ တောကျဲ၊ သကျက်တော၊ သဝင်၊ ရဘဲ၊ ဇလွတ် စသည့် ကျေးရွာများတွင် တောင်ပြိုကျမှု ကြောင့် လူသေဆုံးမှုနှင့် ပျောက်ဆုံးမှုများ ဆိုးရွားစွာ ကြုံတွေ့နေရသည်။ ဒေသခံ ပရဟိတ အမျိုးသားတစ်ဦးက “မောင်းမကန်နားကနေ တောင်ကြောအဆုံး ရှင်မော်အထိ တောင်တန်း တောက်လျှောက် မြေပြိုနေတာပါ။ အောက်ရေဖြူ၊ ကဒက်ငယ်ထိန် အပါအဝင် လောင်းလုံးအောက်ဘက် ခြမ်းက ရေဘေးသင့်ရွာတွေ အားလုံးမှာ ဖုန်းလိုင်းတွေပါ လုံးဝ ပြတ်တောက်သွားလို့ တတ်နိုင်သလောက်တော့ ကူညီနေကြပေမဲ့ သတင်းအချက်အလက် ရဖို့ရော သွားဖို့လာဖို့ပါ တကယ့်ကို အခက်တွေ့နေရတယ်” ဟု ပြောသည်။ လက်ရှိတွင် လောင်းလုံးမြို့နယ် တောင်ဘက်ခြမ်းရှိ ကျောက်နီမော်၊ ကရင်ကြီး၊ သဗျာ၊ ပဉ္စသီမော် စသည့် ကျေးရွာ ၂၀ ကျော် ရေနစ်မြုပ်နေပြီး စွန်းကြီး၊ ဝဲမကိုက်၊ ကျောက်တွင်းနှင့် ညောပြင် စသည့် ကျေးရွာများတွင် ဖုန်းနှင့် အင်တာနက်လိုင်းများ လုံးဝပြတ်တောက်လျက် ရှိသည်။ ဒေသခံ အများစုမှာ ရေဘေးလွတ်ရာ အထပ် မြင့် အဆောက်အအုံများ၊ စာသင်ကျောင်းများနှင့် ဘုန်းကြီးကျောင်းများတွင် စုပေါင်း ခိုလှုံနေကြရသည်။ ထားဝယ်မြို့ပေါ် ရပ်ကွက်များတွင်လည်း တစ်ထပ်အိမ်များ ရေမြုပ်သည်အထိ ရေကြီးနေကာ ထားဝယ်-မြိတ် ပြည်ထောင်စု လမ်းပိုင်းရှိ ကညင်ချောင်းတံတား ပျက်စီးသွားသဖြင့် လမ်းပန်းဆက်သွယ်ရေး ပြတ်တောက်နေ သည်။ သရက်ချောင်းမြို့နယ်တွင်လည်း တီတွတ်ပြင်၊ ပဲဒက်၊ ရှင်မုတ္ထီး၊ ကြာအင်း စသည့် ကျေးရွာများအတွင်း ရေဝင်ရောက်နေပြီး မြိတ်-ထားဝယ် ကားလမ်းမပေါ် ရေဖုံးလွှမ်းနေသဖြင့် သွားလာ၍ မရတော့ပေ။ လောင်းလုံးမြို့နယ် ပြည်သူ့အုပ်ချုပ်ရေးအဖွဲ့ (ပအဖ) မှ တာဝန်ရှိသူတစ်ဦးက “အဓိက စိန်ခေါ်မှုကတော့ စစ်အုပ်စုတပ်က စားနပ်ရိက္ခာနဲ့ ဆေးဝါး သယ်ယူခွင့်ကို အရင်ကတည်းက ကန့်သတ်ထားတဲ့ တောင်ပျောက် တိုက်နယ်လို ဒေသတွေမှာ ရေဘေးပါ ထပ်ကြုံရတော့ ကူညီရတာ ပိုခက်သွားတာပဲ။ ကျနော်တို့ ပအဖ နယ်မြေခံ အဖွဲ့တွေအနေနဲ့ အန္တရာယ်ရှိတဲ့ ရွာတွေက ပြည်သူတွေကို ဘေးကင်းရာ ရွှေ့ပေးနေသလို၊ အမျိုးသား ဒီမိုကရေစီ အဖွဲ့ချုပ်နဲ့ နည်းဗျူဟာ (၃၃) အောက်က တော်လှန်ရေး တပ်ဖွဲ့တွေ၊ ကယ်ဆယ်ရေး အဖွဲ့တွေ အားလုံး ပူးပေါင်းပြီး ရေဘေးကူညီရေးကို အစွမ်းကုန် လုပ်ဆောင်ပေးနေပါတယ်” ဟု ပြောသည်။ လောင်းလုံးမြို့ပေါ် ရပ်ကွက် ၄ ခုမှ ရေဘေးသင့်ပြည်သူ ၈,၄၀ဝ ကျော်ကို ပန်တောဝ ဘုန်းကြီးကျောင်းသို့ ရွှေ့ပြောင်းပေးထားကြောင်း စစ်အုပ်စုတပ်က ထုတ်ပြန်ထားသော်လည်း မြေပြင်တွင်မူ ကယ်ဆယ်ရေးနှင့် ထောက်ပံ့ရေး အကူအညီများစွာ လိုအပ်နေဆဲ ဖြစ်သည်။ မိုးလေဝသနှင့် ဇလဗေဒ ညွှန်ကြားမှုဦးစီးဌာန၏ ထုတ်ပြန်ချက်အရ တနင်္သာရီ ကမ်းရိုးတန်းတွင် ဖြစ်ပေါ်နေ သည့် လေဖိအားနည်းရပ်ဝန်းသည် မုန်တိုင်းငယ်အဖြစ် ပိုမိုအားကောင်းလာနိုင်သဖြင့် ဒေသခံ ပြည်သူများအနေ ဖြင့် မိုးကြီးခြင်း၊ ရေကြီးခြင်းနှင့် မြေပြိုမှု အန္တရာယ်များကို အထူးသတိပြုကြရန် နှိုးဆော်ထားသည်။ #ထားဝယ် #သရက်ချောင်းမြို့နယ်

ထားဝယ်ဒေသတွင် မိုးဆက်တိုက်ရွာပြီး ရေကြီးမြေပြိုမှုကြောင့် လူသေဆုံးမှုများ ရှိနေ

Sep 28

ဆောမြို့နယ်တွင် တိုက်ပွဲမရှိဘဲ ဗုံးကြဲခံရ၍ စစ်ဘေးရှောင် အမျိုးသမီး ၂ ဦး သေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၈ ရက်။ မကွေးတိုင်း၊ ဂန့်ဂေါခရိုင်၊ ဆောမြို့နယ် အရှေ့မြောက်ပိုင်းရှိ ကျေးရွာများကို စစ်အုပ်စုက လေကြောင်းမှ ဗုံးကြဲ တိုက်ခိုက်ခဲ့သဖြင့် စစ်ဘေးရှောင် အမျိုးသမီး ၂ ဦး သေဆုံးပြီး ကလေးတစ်ဦး အပါအဝင် ၅ ဦး ထိခိုက် ဒဏ်ရာ ရရှိခဲ့ကြောင်း ဒေသခံ စစ်ရေးသတင်းရင်းမြစ်များက ပြောသည်။ စက်တင်ဘာလ ၂၇ ရက်နေ့၊ ညနေ ၄ နာရီခန့်တွင် တိုက်ပွဲဖြစ်ပွားခြင်းမရှိဘဲ ဆောမြို့နယ်မြောက်ပိုင်း ငှက်ချောင်းကျေးရွာနှင့် အနီးဝန်းကျင်သို့ စစ်အုပ်စုက ဂျက်ဖိုက်တာ ၁ စီးဖြင့် ဗုံး ၃ လုံး ကြဲချတိုက်ခိုက်ခဲ့ခြင်း ဖြစ်သည်။ ဆောဒေသခံ ကျန်းမာရေးဝန်ထမ်းတစ်ဦးက “ယောဒေသ ဆောမြို့နယ် အရှေ့မြောက်ပိုင်းရှိ ငှက်ချောင်းရွာနဲ့ အနီးဝန်းကျင် ကျေးရွာတွေကို ဗုံးကျတယ်။ ငှက်ချောင်းက စစ်ရှောင်တွေနေတာလေ။ လူနေအိမ်တွေလဲ ပျက်စီးတယ်၊ လူတွေပျောက်လို့ ရှာနေတာတွေ ရှိတယ်” ဟု ပြောသည်။ လေကြောင်းတိုက်ခိုက်မှုကြောင့် ငှက်ချောင်းကျေးရွာတွင် ခေတ္တခိုလှုံနေသည့် စစ်ဘေးရှောင်များဖြစ်ကြသော အသက် ၅၀ ဝန်းကျင် ဒေါ်သီတာဝင်းနှင့် အသက် ၂၀ ဝန်းကျင် မချောစုခင်တို့ သေဆုံးခဲ့ပြီး၊ ၁၀ နှစ်အရွယ် ကလေးတစ်ဦး အပါအဝင် ၅ ဦး ဒဏ်ရာရရှိခဲ့သည့်အပြင် လူနေအိမ် ၃ လုံးထက်မနည်း ပျက်စီးခဲ့သည်။ စစ်အုပ်စုသည် ယောဒေသမှတစ်ဆင့် ရခိုင်နှင့် ချင်းပြည်တောင်ပိုင်းသို့ နယ်မြေစိုးမိုးနိုင်ရန် တပ်အင်အား ဖြည့် တင်းကာ ပြန်လည်ထိုးစစ်ဆင်ရန် ပြင်ဆင်နေပြီး ဆောမြို့နယ်နှင့် လောင်းရှည်မြို့နယ်အတွင်း နေရာအများ အပြား၌ အထိုင်ချတပ်စွဲလျက် လေကြောင်းတိုက်ခိုက်မှုများ ဆက်တိုက်ပြုလုပ်နေခြင်းဖြစ်သည်။ ပြီးခဲ့သည့် စက်တင်ဘာလ ၂၆ ရက်နေ့ကလည်း ယောဒေသရှိ ကျောက်ထုနှင့် ထီးလင်းမြို့နယ် အစပ်အပြင် ချင်းပြည်နယ်တောင်ပိုင်း မင်းတပ်၊ ကန်ပက်လက်နှင့် ကျင်ဒွေးမြို့နယ်များကို စစ်အုပ်စုက ဂျက်ဖိုက်တာနှင့် Y-12 လေယာဉ်များဖြင့် လေကြောင်းတိုက်ခိုက်မှုများ အကြိမ်ကြိမ် ပြုလုပ်ခဲ့သည်။ ယောဒေသမှတစ်ဆင့် ချင်းတောင်ပိုင်းသို့ လွန်ခဲ့သည့် ၄ လကျော်မှစ၍ စစ်အင်အား ၄,၅၀၀ ခန့်အထိ ပို့ဆောင် ထားပြီး မြေပြင်ထိုးစစ်ရော လေကြောင်းပါ အရှိန်မြှင့်ဆောင်ရွက်နေသဖြင့် ဒေသခံပြည်သူများအနေဖြင့် လေကြောင်းရန်၊ လက်နက်ကြီးရန်နှင့် စစ်ကြောင်းများကို အထူးသတိပြုနေထိုင်ကြရန် တော်လှန်ရေးအင်အားစု များက သတိပေးထားသည်။ #ဆောမြို့နယ်

ဆောမြို့နယ်တွင် တိုက်ပွဲမရှိဘဲ ဗုံးကြဲခံရ၍ စစ်ဘေးရှောင် အမျိုးသမီး ၂ ဦး သေဆုံး

Sep 28

ကျောက်တော်တွင် စစ်အုပ်စုက ဗုံးကြဲ၍ အရပ်သား ၃၃ ဦးထက်မနည်း သေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၈ ရက်။ အာရက္ခတပ်တော် (AA) ထိန်းချုပ်ထားသည့် ရခိုင်ပြည်၊ ကျောက်တော်မြို့ပေါ်ရှိ လူစည်ကားရာ အိန္ဒိယဈေးနှင့် ကစ္ဆပနဒီတံတား အနီးဝန်းကျင်တို့ကို စစ်အုပ်စုက ဂျက်တိုက်လေယာဉ်ဖြင့် လေကြောင်းမှ ဗုံးကြဲတိုက်ခိုက်ခဲ့ သဖြင့် အရပ်သားပြည်သူ ၃၃ ဦးထက်မနည်း အစုလိုက်အပြုံလိုက် သေဆုံးကာ ၃၆ ဦး ထိခိုက်ဒဏ်ရာ ရရှိခဲ့သည်။ စက်တင်ဘာလ ၂၈ ရက်၊ မွန်းလွဲ ၁၂ နာရီ ၁၀ မိနစ်နှင့် ၁၂ နာရီ ၁၄ မိနစ်တို့တွင် တိုက်ပွဲဖြစ်ပွားခြင်းမရှိဘဲ စစ်အုပ်စု၏ ဂျက်တိုက်လေယာဉ် ၁ စီးက မြို့ပေါ်ရှိ လူစည်ကားရာ နေရာများကို ပစ်မှတ်ထား၍ ဗုံးကြဲတိုက် ခိုက်ခဲ့ခြင်း ဖြစ်သည်ဟု အာရက္ခတပ်တော် (AA) နှင့် ဒေသခံ သတင်းရင်းမြစ်များက ပြောသည်။ အခင်းဖြစ်ပွားရာ မြေပြင်တွင် ကူညီပေးနေသည့် ကျောက်တော်ဒေသခံ သတင်းရင်းမြစ်တစ်ဦးက “ဈေးထဲကို လာကြဲတာပါ။ စုထားတဲ့ အလောင်းတင် ၃၂ လောင်းလောက် ရှိပြီ။ မီးလောင်နေတဲ့ နေရာတွေမှာရော၊ လမ်းမ ပေါ်မှာပါ ထပ်တွေ့နေရတုန်းဆိုတော့ သေဆုံးသူ အရေအတွက်က ၄၀ နီးပါးအထိ တိုးလာနိုင်တယ်။ ဈေးသည် တွေနဲ့ လမ်းသွားလမ်းလာတွေ တော်တော်များများ ပါသွားတာ” ဟု ပြောသည်။ လေကြောင်းမှ ဗုံးကြဲတိုက်ခိုက်ခံရမှုကြောင့် ကစ္ဆပနဒီတံတားပေါ်တွင် သွားလာနေသည့် ပြည်သူများ ထိခိုက် သေဆုံးခဲ့သည့်အပြင် တံတားအဆောက်အအုံလည်း ထိခိုက်ပျက်စီးခဲ့သည်။ ထို့ပြင် အိန္ဒိယဈေးကြီးအတွင်း ရပ်နားထားသည့် ပြည်သူများ၏ သုံးဘီးတုတ်တုတ်များ၊ ဆိုင်ကယ်များ၊ မော်တော်ယာဉ်များနှင့် ထော်လာဂျီများလည်း မီးလောင်ပျက်စီးခဲ့သည်။ ယခုဖြစ်စဉ်သည် မြောက်ဦး ပြည်သူ့ဆေးရုံကြီး လေကြောင်းတိုက်ခိုက်ခံရမှုဖြစ်စဉ် နောက်ပိုင်း ရခိုင်ဒေသ အတွင်း အရပ်သားပြည်သူများ အစုလိုက်အပြုံလိုက် သေဆုံးမှု အများဆုံးနှင့် အဆိုးရွားဆုံး ဖြစ်စဉ်တစ်ခု ဖြစ်လာခဲ့သည်။ အလားတူ ယနေ့ မွန်းလွဲ ၁၂ နာရီ ၃၅ မိနစ်ခန့်တွင်လည်း သံတွဲမြို့နယ်၊ ငပလီမြို့ရှိ ဂျိတ္တောနှင့် လင်းသာကျေးရွာ ဝန်းကျင်သို့ စစ်အုပ်စု၏ ဂျက်တိုက်လေယာဉ် ၁ စီးက ဗုံး ၂ လုံး လာရောက်ကြဲချတိုက်ခိုက်ခဲ့သည်။ သံတွဲဒေသခံတစ်ဦးက “ပထမတစ်လုံးက ၁၂ နာရီခွဲလောက်မှာ ပစ်သံကြားရတယ်။ နောက်မိနစ်ပိုင်းမှာပဲ နောက် တစ်လုံး ထပ်ကြဲတာ။ ဂျိတ္တောနဲ့ လင်းသာဘက်မှာ ဗုံးကျတာလို့ သိရပြီး ထိခိုက်ပျက်စီးမှု အခြေအနေ ကိုတော့ အသေးစိတ် စုံစမ်းနေတုန်းပဲ” ဟု ပြောသည်။ အာရက္ခတပ်တော် (AA) ၏ ထုတ်ပြန်ချက်အရ ပြီးခဲ့သည့် စက်တင်ဘာ ၁၇ ရက်မှ ၂၇ ရက်အထိ ၁၁ ရက် အတွင်း စစ်အုပ်စုတပ်က ရခိုင်ဒေသအတွင်း လေကြောင်းနှင့် လက်နက်ကြီးများဖြင့် တိုက်ခိုက်ခဲ့မှုကြောင့် အရပ်သားပြည်သူ ၂၂ ဦး သေဆုံး၊ ဒဏ်ရာရရှိခဲ့ပြီး လူနေအိမ် ၅၅ လုံး ပျက်စီးခဲ့သည်။ ယခု ကျောက်တော်နှင့် ငပလီ လေကြောင်းတိုက်ခိုက်ခံရမှုများနှင့် ပတ်သက်သည့် နောက်ဆက်တွဲ ထိခိုက် သေဆုံးမှု အသေးစိတ် အချက်အလက်များကို ဆက်လက် ထုတ်ပြန်ပေးသွားမည်ဟု AA ၏ သတင်းနှင့် ပြန်ကြားရေးဌာနက အသိပေးထားသည်။ #ကျောက်တော်

ကျောက်တော်တွင် စစ်အုပ်စုက ဗုံးကြဲ၍ အရပ်သား ၃၃ ဦးထက်မနည်း သေဆုံး

Sep 28

နာမကျန်းအကျဉ်းသား ၈၀ ခန့် ပြင်ပဆေးရုံကုသခွင့် ပိတ်ပင်ခံရ သတင်းနှင့်မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၈ ရက်။ စစ်ကိုင်းတိုင်း၊ ကလေးအကျဉ်းထောင်တွင် နိုင်ငံရေးအကျဉ်းသား ၅၀ အပါအဝင် အရေးပေါ် ပြင်ပဆေးရုံကုသမှု လိုအပ်နေသည့် အကျဉ်းသား ၈၀ ခန့်သည် ဆေးကုသခွင့် ငြင်းပယ်ခံထားရပြီး အသက်အန္တရာယ်စိုးရိမ်ရသည့် အခြေအနေနှင့် ရင်ဆိုင်နေကြရသည်ဟု မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် (PPNM) က ထုတ်ပြန်သည်။ PPNM ၏ ထုတ်ပြန်ချက်အရ ပြီးခဲ့သည့် ဇူလိုင်လ အတွင်း ကလေးမြို့ပြည်သူ့ဆေးရုံကြီးမှ အထူးကုဆရာဝန်များ ထောင်အတွင်းလာရောက်စစ်ဆေးစဉ် အဆိုပါ အကျဉ်းသား ၈၀ ခန့်မှာ ပြင်ပဆေးရုံသို့တက်ရောက်၍ အရေးပေါ်ကုသမှုခံယူရန် လိုအပ်ကြောင်း အတည်ပြုခဲ့ ခြင်း ဖြစ်သည်။ သို့သော်လည်း လက်ရှိအချိန်အထိ ၉ ဦးသာ ပြင်ပဆေးရုံတက်ခွင့်ရရှိခဲ့ပြီး ၎င်းတို့အနက် နိုင်ငံရေးအကျဉ်းသား ၄ ဦးသာ ပါဝင်သည်ဟု ဆိုသည်။ PPNM ပြောရေးဆိုခွင့်ရှိသူ မရောင်နီလင်းက “ဒီကလေးအကျဉ်းထောင်မှာက လက်ရှိအချိန်အထိ အရေးပေါ် ပေါ့နော် ကျန်းမာရေးကုသမှု ပြီးမှ ဆေးရုံကို ပို့ဖို့အတွက် လိုအပ်နေတဲ့သူတွေက အကျဉ်းသား ၈၀ လောက်ကို ရှိနေပါသေးတယ်။ ဒါကလည်း ပြည်သူ့ဆေးရုံကြီးကပေါ့နော။ အထူးကုဆရာဝန်တွေ ကိုယ်တိုင်ပေါ့နော်။ အတည်ပြုသွားခဲ့တာမျိုး ဖြစ်ပါတယ်။ ဒါကြောင့်မို့လို့ ဒီအထဲထဲမှာရှိကြတဲ့ ကလေးအကျဉ်းထောင်တွေမှာ ရှိကြတဲ့ အကျဉ်းသားတွေ အပါအဝင် ဒီနိုင်ငံရေးအကျဉ်းသားတွေရောပေါ့နော်။ ဆိုးရွားတဲ့ အသက်အန္တရာယ် ကို ရင်ဆိုင်နေရတယ်လို့ ပြောချင်ပါတယ်” ဟု ပြောသည်။ နာမကျန်းအကျဉ်းသားများ ပြင်ပဆေးရုံတက်ရောက်ခွင့်ရရှိရန် ထောင်ပိုင်၊ ဒု-ထောင်ပိုင်နှင့် ထောင်ဆေးရုံအုပ် စသည့် အဆင့်ဆင့်သော အာဏာပိုင်များကို ငွေကျပ် ၁၀ သိန်းမှ ၁၅ သိန်းအထိ လာဘ်ငွေပေးဆောင်နေရ ကြောင်း PPNM က ဆိုသည်။ ငွေကြေးတတ်နိုင်သည့် မူးယစ်ဆေးဝါးမှုဖြင့် ကျခံနေရသူအချို့မှာ ရောဂါမရှိဘဲ လာဘ်ငွေပေး၍ ပြင်ပဆေးရုံ တွင် သွားရောက်နေထိုင်ခွင့်ရရှိနေသော်လည်း ငွေကြေးမတတ်နိုင်သည့် နိုင်ငံရေးအကျဉ်းသားများမှာမူ ဆေး ကုသခွင့်မရဘဲ နှစ်နှင့်ချီ၍ စောင့်ဆိုင်းနေကြရသည်။ မရောင်နီလင်းက ဆက်လက်၍ “ဒီလိုမျိုး ဆေးဝါးစောင့်ရှောက်မှု မလုံလောက်တာဟာ ဆေးရုံ ထောင်ဆေးရုံ ကနေမှတစ်ဆင့် ပြင်ပဆေးရုံကို ပေါ့နော်။ ကုသခွင့်မပေးတာတွေက ဒီလိုမျိုးတွေကြောင့် သေဆုံးတယ်ဆိုလို့ ရှိရင်တော့ အဆင့်ဆင့်အတိုင်းပေါ့နော် တာဝန်ယူ တာဝန်ခံရမှာ ဖြစ်ပါတယ်။ ထောင်ဝန်ထမ်းတွေကမှ စလို့ သက်ဆိုင်ရာ ညွှန်မှူးတွေအထိ ဒီလိုကျဆုံးမှုတွေမှာ တာဝန်အပြည့်ရှိပါတယ်။ ဒီလိုမျိုးလေ ကျန်းမာရေးအရ ပြင်ပဆေးရုံကို သွားချင်တယ်။ သို့မဟုတ် ထောင်ဆေးရုံတက်ချင်တယ်ဆိုလို့ရှိရင် ဘယ်လောက်ကနေ ဘယ်လောက်ပေးရမယ်ဆိုတဲ့ သတ်မှတ်ချက်တွေ ရှိနေပါတယ်” ဟု ပြောသည်။ ကလေးထောင်အတွင်း ဆေးဝါးနှင့် ကုသရေးအထောက်အကူပြုပစ္စည်းများ ကင်းမဲ့နေပြီး အကျဉ်းသား ၁,၀၀၀ ခန့်အတွက် တစ်လလျှင် ဆေးဝါးဘတ်ဂျက် ကျပ် ၁၀ သိန်းခန့်သာ ခွဲဝေထားသဖြင့် ပါရာစီတမောကဲ့သို့ အခြေခံဆေးဝါးများသာရှိပြီး အောက်ဆီဂျင်နှင့် အခြားအထောက်အကူပြုပစ္စည်းများ လုံးဝမရှိသလောက် နည်းပါးနေသည်။ နှလုံးရောဂါ၊ သွေးအန်ရောဂါ၊ သွေးတိုးနှင့် ဆီးချိုရောဂါ ခံစားနေရသူများ၏ ဆေးကုသစရိတ်နှင့် ဆေးဝါး ဝယ်ယူစရိတ်များကို မိသားစုများကသာ စိုက်ထုတ်ပေးနေရသည်။ ထို့ပြင် နယ်ဝေးမှ ပြောင်းရွှေ့လာရသည့် နိုင်ငံရေးအကျဉ်းသားအချို့မှာ မိသားစုနှင့် အဆက်အသွယ်ပြတ် တောက် နေသဖြင့် ပြင်ပဆေးရုံတက်ရောက်ခွင့်ရရှိလျှင်ပင် စားသောက်စရိတ်နှင့် ဆေးဝါးစရိတ်များအတွက် ပိုမိုကြီးမားသည့် အခက်အခဲများနှင့် ရင်ဆိုင်နေရကြောင်း PPNM က ဆိုသည်။ #PPNM #ကလေးအကျဉ်းထောင်

နာမကျန်းအကျဉ်းသား ၈၀ ခန့် ပြင်ပဆေးရုံကုသခွင့် ပိတ်ပင်ခံရ

Sep 28

အင်းလေးတွင် မိုးသက်လေပြင်းကြောင့် အိမ်ခြေ ၃၀ ကျော် ပျက်စီး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၈ ရက်။ ရှမ်းပြည်တောင်ပိုင်း၊ ညောင်ရွှေမြို့နယ် အင်းလေးဒေသတွင် မိုးသက်လေပြင်း တိုက်ခိုက်မှုကြောင့် အိမ်ခြေ ၃၀ ကျော် ထိခိုက်ပျက်စီးခဲ့ကြောင်း ဒေသခံများက ပြောသည်။ စက်တင်ဘာလ ၂၇ ရက်နေ့၊ ညနေ ၃ နာရီခန့်တွင် အင်းလေးဒေသ၊ ငါးဖယ်ချောင်းကျေးရွာအုပ်စု၊ ပျားပင်တောင် ကျေးရွာသို့ မိုးသက်လေပြင်း ရုတ်တရက် ကျရောက်ခဲ့ခြင်းဖြစ်ပြီး သစ်နှင့် ဝါးတို့ဖြင့် ဆောက်လုပ်ထားသည့် သွပ်မိုး၊ သက်ကယ်မိုး လူနေအိမ်များ အမိုး၊ အကာနှင့် အိမ်တွင်းပစ္စည်းများ လွင့်စင်ပျက်စီးခဲ့ရသည်။ ဒေသခံ အမျိုးသားတစ်ဦးက “လေက တော်တော်ပြင်းတယ်။ တအိမ်လုံး ဟိုဖက်ဒီဖက် ယိမ်းထိုးနေတာ ကျနော် ဆို ပြိုမလားတောင် ထင်နေတာ။ နောက်အကုန်ငြိမ်သွားတော့မှ တစ်ရွာလုံး ဖုန်းဆက်လိုဆက်၊ စာပို့ကြနဲ့ နည်း နည်း စိတ်အေးသွားရတာ။ ပြိုတာတော့ ရှိတယ်။ ဝါးအိမ်တွေပေါ့” ဟု ပြောသည်။ ဖြစ်စဉ်အတွင်း လူထိခိုက်ဒဏ်ရာရရှိမှု မရှိသော်လည်း စက်တင်ဘာလ ၂၈ ရက် နံနက်ပိုင်းတွင် စစ်အုပ်စု၏ လက်အောက်ခံ ဌာနဆိုင်ရာ ဝန်ထမ်းများက ပျက်စီးဆုံးရှုံးမှု စာရင်းများ လာရောက်ကောက်ယူသွားခဲ့ပြီး လတ်တလောအတွက် ကူညီထောက်ပံ့မှုများ အရေးပေါ် လိုအပ်နေသည်။ ဒေသတွင်း ကူညီကယ်ဆယ်ရေး ဆောင်ရွက်ပေးနေသူတစ်ဦးက “အထက်ကတော့ ကြာဦးမှာပါ။ ကျနော်တို့ ငလျင်တုန်းက အိမ်တွေတောင် ရွာတိုင်း ဆောက်လို့ မပြီးသေးဘူး။ အခုလောလောဆယ်ကတော့ ဝါးအိမ်နဲ့ နေတဲ့လူပေါ့နော်။ ယာယီသဘော လိုတာပေါ့။ ရွာကဝိုင်းဝန်းပြီးတော့ ဘယ်လိုစီစဉ်ကြမလဲတော့ မသိဘူး။ အလှူရှင်တွေတော့ လိုတာပေါ့။ မနေ့ကမှဖြစ်တာဆိုတော့ သတင်းလည်း မတက်သေးတော့လေ” ဟု ပြော သည်။ ငါးဖယ်ချောင်းကျေးရွာအုပ်စုသည် ၂၀၂၅ ခုနှစ်ကလည်း ငလျင်ဒဏ်သင့်ခဲ့သည့် ဒေသဖြစ်ပြီး ထိုစဉ်က ပျက်စီး သွားသည့် လူနေအိမ်များကိုပင် အကုန်အစင် ပြန်လည်မဆောက်လုပ်နိုင်သေးမီ ယခုကဲ့သို့ လေဘေးဒဏ် ထပ်မံ ကြုံတွေ့ရခြင်း ဖြစ်သည်။ အင်းလေးဒေသသည် စစ်ဘေးဒဏ် မကြုံတွေ့ရသော်လည်း ၂၀၂၄ ခုနှစ်တွင် ရေဘေး၊ ၂၀၂၅ ခုနှစ်တွင် ငလျင် ဘေးနှင့် ယခု ၂၀၂၆ ခုနှစ်တွင် သဘာဝဘေးအန္တရာယ်များ ဆက်တိုက် ကြုံတွေ့နေရသဖြင့် ဒေသခံများအနေဖြင့် စိုးရိမ်ပူပန်လျက်ရှိသည်။ အလားတူ အခြားကျေးရွာများတွင်လည်း မိုးသက်လေပြင်းကြောင့် ပျက်စီးမှုများ ရှိနေပြီး ထိခိုက်မှု အခြေအနေ အသေးစိတ်ကို သတင်းနှင့် မီဒီယာ ကွန်ရက် (NMG) က ဆက်လက် စုံစမ်းလျက်ရှိသည်။ #အင်းလေး

အင်းလေးတွင် မိုးသက်လေပြင်းကြောင့် အိမ်ခြေ ၃၀ ကျော် ပျက်စီး

Sep 28

ပွင့်လင်းကာလတွင် တိုက်ပွဲများ ပိုပြင်းထန်လာနိုင်ကြောင်း AA သတိပေး သတင်းနှင့် မီဒီယာ ကွန်ရက် ၂၀၂၆ ခုနှစ်၊ စက်တင်ဘာလ ၂၈ ရက်။ ရှေ့လာမည့် ပွင့်လင်းကာလ မိုးအကုန်ဆောင်းအစတွင် စစ်အုပ်စုတပ်က အင်အားသုံး၍ ကြည်း၊ ရေ၊ လေ ထိုးစစ်ကြီးများ ပြုလုပ်လာနိုင်သဖြင့် ရခိုင်ဒေသနှင့် နယ်စပ်စစ်မျက်နှာပြင်များ၌ တိုက်ပွဲများ ပိုမိုပြင်းထန် လာနိုင်ကြောင်း အာရက္ခတပ်တော် (AA) ဒုစစ်ဦးစီးချုပ် ဒေါက်တာညိုထွန်းအောင်က သတိပေး ပြောဆိုလိုက်သည်။ ရက္ခိုင်အမျိုးသားအဖွဲ့ချုပ် (ULA/AA) က ပထမဦးဆုံးအကြိမ် ထုတ်ဝေသည့် ပါတီစာဆောင်၏ အယ်ဒီတာ့ အာဘော်မှတစ်ဆင့် စက်တင်ဘာလ ၂၇ ရက်တွင် ဒေါက်တာညိုထွန်းအောင်က လက်ရှိစစ်ရေး အခြေအနေများ ကို အသိပေးပြောဆိုလိုက်ခြင်း ဖြစ်သည်။ စစ်တွေနှင့် ကျောက်ဖြူ စစ်မျက်နှာပြင်များအပြင် နယ်စပ်ဒေသများဖြစ်သည့် အာရက္ခ-မကွေး၊ အာရက္ခ-ပဲခူး၊ အာရက္ခ-ဧရာဝတီတိုင်း အစပ်များနှင့် ချင်းပြည်နယ်-ပလက်ဝနယ်စပ်၊ အာရက္ခကမ်းရိုးတန်းတစ်လျှောက်တို့တွင် စစ်အုပ်စုတပ်က အင်အားဖြည့်တင်းလျက်ရှိသည်ဟု ဆိုသည်။ ဒေါက်တာညိုထွန်းအောင်က “စစ်တွေ၊ ကျောက်ဖြူ စစ်မျက်နှာပြင်၊ အာရက္ခ-မကွေးအစပ်၊ အာရက္ခ-ပဲခူး အစပ်၊ အာရက္ခ-ဧရာဝတီတိုင်းအစပ်တို့ အပြင် ချင်းပြည်-ပလက်ဝ-အာရက္ခအစပ်နဲ့ အာရက္ခကမ်းရိုးတန်းဖက် ကပါ လက်ရှိအသုံးပြုနေတဲ့ စစ်အင်အားထက် နှစ်ဆ၊ သုံးဆတိုးပြီး ကြည်း၊ ရေ၊ လေ ထိုးစစ်ကြီးကို တပြိုင် နက်တည်းလုပ်လာနေလို့ စစ်ရိပ်စစ်သန်းတွေကို တွေ့နေရပြီး မိုးအကုန် ဆောင်းအစကာလ တိုက်ပွဲတွေပိုပြီး ပြင်းထန်လာနိုင်တဲ့ အနေအထားကိုလည်း တွေ့နေရတယ်” ဟု ပြောသည်။ ထို့ပြင် ရခိုင်ဒေသအတွင်း တိုက်ပွဲများ မပြီးဆုံးသေးဘဲ တိုက်ပွဲများ ဆက်လက်တိုက်ခိုက်နေရသည့် နယ်မြေ ရှင်းလင်းရေးနှင့် စစ်ရေးတာဝန်များ ရှိနေသကဲ့သို့ တစ်ဖက်တွင်လည်း အာရက္ခတိုင်းပြည် တည်ဆောက်ရေး လုပ်ငန်းများကို အာရက္ခပြည်သူ့အစိုးရအနေဖြင့် တစ်ပြိုင်နက်တည်း အကောင်အထည်ဖော် ဆောင်ရွက်နေ ကြောင်းလည်း ထည့်သွင်းပြောဆိုထားသည်။ ဒေသတွင်းတွင် တိုက်ပွဲများနေ့စဉ်ဖြစ်ပွားနေပြီး စစ်ရေးအခြေအနေ ပြင်းထန်နေသော်လည်း ဒေသဖွံ့ဖြိုးရေးနှင့် အုပ်ချုပ်ရေးယန္တရားဆိုင်ရာ ဌာနများအား ဖွဲ့စည်းပုံနှင့်အညီ တိုးချဲ့ပြင်ဆင်ခြင်းများကို ဆောင်ရွက်လျက်ရှိ ကြောင်း ဆိုသည်။ အာရက္ခပြည်သူတစ်ရပ်လုံး မျှော်လင့်နေသည့် အမျိုးသားအောင်ပွဲရက်မြတ်သည် လက်တစ်ကမ်းအလိုသို့ ရောက်ရှိနေပြီဖြစ်ပြီး တော်လှန်ရေး၏ သဘောသဘာဝအတိုင်း ခက်ခဲကြမ်းတမ်းသော ကာလတစ်ခုကို မလွဲ မသွေ ရင်ဆိုင်ဖြတ်သန်းနေရကြောင်းလည်း ဒေါက်တာညိုထွန်းအောင်က ဆိုသည်။ လက်ရှိတွင် ရခိုင်ပြည်အတွင်းရှိ စစ်တွေနှင့် ကျောက်ဖြူမြို့နယ်များ အပါအဝင် မကွေး၊ ပဲခူး၊ ဧရာဝတီတိုင်း နယ်စပ်အစပ်များနှင့် ချင်းပြည် ပလက်ဝဒေသတို့တွင် စစ်အုပ်စုတပ်နှင့် အာရက္ခတပ်တော် (AA) တို့အကြား တိုက်ပွဲများ ဆက်လက်ပြင်းထန်နေပြီး စစ်အုပ်စုတပ်က လေကြောင်းမှ ဆက်တိုက် ဗုံးကြဲတိုက်ခိုက်မှုများ ပြုလုပ်လျက်ရှိသည်။ #AA #ရခိုင်တိုက်ပွဲ

ပွင့်လင်းကာလတွင် တိုက်ပွဲများ ပိုပြင်းထန်လာနိုင်ကြောင်း AA သတိပေး

Sep 28

ရခိုင် မင်းပြားကို စစ်အုပ်စု လေကြောင်းမှ ဗုံးကြဲ၊ ပြည်သူ ၈ ဦး ဒဏ်ရာရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၈ ရက်။ ရခိုင်ပြည်၊ အဉ္ဇနပူရ (မင်းပြား) မြို့နယ်ရှိ ကျေးရွာတစ်ရွာကို စက်တင်ဘာလ ၂၈ ရက် နံနက်ပိုင်းတွင် စစ်အုပ်စုတပ်က ဗုံးကြဲတိုက်ခိုက်ခဲ့သဖြင့် ကလေးငယ်တစ်ဦး အပါအဝင် ဒေသခံ ၈ ဦး ထိခိုက်ဒဏ်ရာရ ရှိခဲ့သည်။ စက်တင်ဘာလ ၂၈ ရက် နံနက် ၇ နာရီခန့်တွင် စစ်အုပ်စု၏ မကွေးလေတပ်မှ Y-12 စစ်ထောက်ပို့လေယာဉ်ဖြင့် စွန်ရဲရွာအတွင်းသို့ ဒရော့ဗုံး (Drop Bomb) ၃ လုံး ကြဲချခဲ့ခြင်းဖြစ်သည်။ အဆိုပါ ဗုံးကြဲတိုက်ခိုက်မှုကြောင့် အသက် ၁၃ နှစ်မှ ၇၀ နှစ်အရွယ်အတွင်းရှိ ဒေသခံအမျိုးသား၊ အမျိုးသမီး ၈ ဦး ထိခိုက်ဒဏ်ရာရရှိခဲ့ပြီး၊ ထိုအထဲမှ အမျိုးသမီးတစ်ဦးမှာ လည်ပင်းတွင် ဗုံးစထိမှန်ကာ အသက် ၁၆ နှစ်အရွယ် လူငယ်တစ်ဦးမှာလည်း ခြေသလုံးတွင် ပြင်းထန်ဒဏ်ရာများ ရရှိခဲ့ကြသည်။ ရခိုင်မြောက်ပိုင်း ဒေသခံအမျိုးသားတစ်ဦးက “စက်တင်ဘာ ၂၇ ရက်နေ့ကလည်း မင်းပြားကို ဗုံးကြဲတယ်။ အခု ၂၈ ရက်နေ့ မနက်ပိုင်းလည်း ကြဲတယ်။ လက်ရှိကတော့ ဒဏ်ရာရရှိသွားသူတွေကို ဆေးကုသဖို့ ပို့ထားတယ်။ လေကြောင်းအန္တရာယ်က ကျွန်တော်တို့ဆီမှာ ကြီးမားလာပါတယ်။ တပ်တော်ရဲ့ လေကြောင်းအန္တရာယ် အသိပေးချက်တွေ လိုအပ်သလို ပြည်သူကလည်း လိုက်နာဖို့ လိုပါတယ်” ဟု ပြောသည်။ စက်တင်ဘာလ ၁၇ ရက်မှ ၂၇ ရက်အထိ ၁၀ ရက်အတွင်း စစ်အုပ်စုတပ်သည် အမ်း၊ မင်းပြား၊ ဂွ၊ ကျောက်တော်၊ ပုဏ္ဏားကျွန်း၊ ပေါက်တော၊ ရသေ့တောင်၊ သံတွဲနှင့် မြောက်ဦး စသည့် မြို့နယ် ၉ ခုကို လေကြောင်းမှ ရက်ဆက် ဗုံးကြဲတိုက်ခိုက်ခဲ့ရာ အရပ်သား ၆ ဦး သေဆုံးပြီး ၁၆ ဦး ဒဏ်ရာရရှိခဲ့ကြောင်း ဒေသတွင်း သတင်းအရင်း အမြစ်များနှင့် အာရက္ခတပ်တော် (AA) က ပြောဆို ထုတ်ပြန်သည်။ တောင်ကုတ်ဒေသခံ ပရဟိတသမား အမျိုးသားတစ်ဦးက “သံတွဲ၊ ဂွမြို့တွေကို စစ်တပ်က ပြန်ယူဖို့ လုပ်နေတာ၊ စစ်ကြောင်းတွေ ဧရာဝတီတိုင်း နယ်စပ်တစ်လျှောက် ထိုးနေတာ တိုက်ပွဲတွေ ဆက်တိုက်ဖြစ်နေတယ်။ မြေပြင် က မရတော့ လေကြောင်း၊ ရေကြောင်းတွေကပါ ပြည်သူကို ဗုံးကြဲတာတွေ လုပ်တယ်။ အဲလိုပဲ ရခိုင်မြောက် ပိုင်း ကျောက်တော်၊ ပုဏ္ဏားကျွန်း၊ ရသေ့တောင် အဲဒီနေရာတွေကိုလည်း ဆက်တိုက်ကြဲနေတာ။ ကျနော်တို့ ပရဟိတသမားတွေ ချိတ်ဆက်ဆောင်ရွက်တာတွေ ရှိသလို တပ်တော်ကလည်း ဗုံးခိုကျင်းတွေမှာနေဖို့ သတိပေး တာတွေ လုပ်နေပါတယ်။ ဆေးဝါးကုသမှုပိုင်းကတော့ လိုအပ်ချက်တွေ ရှိနေပါတယ်။ ဆေးရုံ၊ ဆေးခန်းတွေ ကိုလည်း ဗုံးကြဲတော့ ကုသရေးတွေ ခက်ခဲပါတယ်” ဟု ပြောသည်။ စစ်အုပ်စုတပ်သည် မြေပြင်တွင် စစ်ရေးအရ အရှုံးနှင့် ရင်ဆိုင်နေရသဖြင့် အရပ်သားများ နေထိုင်ရာ ကျေးရွာ များ၊ စာသင်ကျောင်း၊ ဘာသာရေး အဆောက်အအုံနှင့် ဆေးရုံများပါမကျန် လေကြောင်းမှ နေ့ရောညပါ ဗုံးကြဲ တိုက်ခိုက်နေကြောင်း စက်တင်ဘာ ၂၇ ရက်စွဲဖြင့် AA က ထုတ်ပြန်ထားသည်။ စစ်အုပ်စု၏ လေကြောင်းနှင့် လက်နက်ကြီး အန္တရာယ်များမှ ကင်းဝေးစေရန်အတွက် ဒေသခံပြည်သူများ အနေဖြင့် လေကြောင်းသတိပေးချက်များကို အထူးဂရုစိုက်ရန်၊ လူစုလူဝေးပြုလုပ်ခြင်းမှ ရှောင်ကြဉ်ရန်နှင့် မိသားစုအလိုက် ဗုံးခိုကျင်းများ စနစ်တကျ တူးဖော်နေထိုင်ကြရန် AA က အသိပေးနှိုးဆော်ထားသည်။ လက်ရှိတွင် လေကြောင်းတိုက်ခိုက်မှုကြောင့် ထိခိုက်ဒဏ်ရာရရှိခဲ့သူများကို ဒေသတွင်း ပရဟိတအဖွဲ့များနှင့် ဆေးဝါးကုသရေးအဖွဲ့များက ကူညီစောင့်ရှောက်ပေးလျက်ရှိသော်လည်း စစ်အုပ်စု၏ လမ်းပန်းဆက်သွယ်ရေး ပိတ်ဆို့ထားမှုနှင့် ဆေးရုံ၊ ဆေးခန်းများပါမကျန် ပစ်မှတ်ထား ဗုံးကြဲခံနေရမှုတို့ကြောင့် အရေးပေါ်ဆေးဝါးနှင့် ကူညီကယ်ဆယ်ရေး ပစ္စည်းများ ပြတ်လပ်မှုနှင့် ရင်ဆိုင်နေကြရသည်။ #မင်းပြား

ရခိုင် မင်းပြားကို စစ်အုပ်စု လေကြောင်းမှ ဗုံးကြဲ၊ ပြည်သူ ၈ ဦး ဒဏ်ရာရ

Sep 28

အိန္ဒိယနှင့် နီပေါတွင် ရေကြီးမြေပြိုမှုများကြောင့် လူ ၇၀ ထက်မနည်း သေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၈ ရက်။ အိန္ဒိယနှင့် နီပေါနိုင်ငံတို့တွင် မိုးသည်းထန်စွာ ရွာသွန်းမှုကြောင့် ရေကြီးရေလျှံခြင်းနှင့် မြေပြိုမှုများ ဖြစ်ပွားခဲ့ရာ အနည်းဆုံး လူ ၇၀ သေဆုံးခဲ့ကြောင်း အာဏာပိုင်များက သတင်းထုတ်ပြန်သည်။ အိန္ဒိယနိုင်ငံ မြောက်ပိုင်း အုတာပဒေ့ရှ် (Uttar Pradesh) ပြည်နယ်တွင် နာရီ ၆၀ အတွင်း မိုးသည်းထန်စွာ ရွာသွန်းခဲ့မှုကြောင့် အနည်းဆုံး လူ ၅၆ ဦး သေဆုံး၊ ၄၆ ဦး ဒဏ်ရာရရှိကာ နေအိမ် ၁,၀၀၀ ကျော် ပျက်စီးခဲ့ရသည်။ ဂင်္ဂါမြစ် အပါအဝင် အဓိက မြစ်ကြီးများ၏ ရေအမှတ်မှာလည်း စိုးရိမ်ရေမှတ်ထက် ကျော်လွန်နေကြောင်း အိန္ဒိယ ဗဟိုရေအရင်းအမြစ် ကော်မရှင်က သတိပေးထားသည်။ တစ်ဖက်တွင်လည်း အိမ်နီးချင်း နီပေါနိုင်ငံ၌ အနည်းဆုံး လူ ၁၄ ဦး သေဆုံးပြီး ၁၁ ဦး ပျောက်ဆုံးနေသည်။ နီပေါနိုင်ငံတစ်ဝှမ်းရှိ ခရိုင် ၇၇ ခုအနက် ၄၉ ခုတွင် ရုတ်တရက် ရေကြီးရေလျှံမှုများ ထပ်မံဖြစ်ပွားနိုင်ကြောင်း သဘာဝဘေးအန္တရာယ် စီမံခန့်ခွဲရေး အာဏာပိုင်များက သတိပေးချက် ထုတ်ပြန်ထားသည်။ အဆိုပါ ရေကြီးရေလျှံမှုများကြောင့် နှစ်နိုင်ငံလုံးတွင် လျှပ်စစ်ဓာတ်အားလိုင်းများ ပြတ်တောက်ခြင်း၊ ဆက်သွယ်ရေး ကွန်ရက်များ ပျက်စီးခြင်းနှင့် ရေအားလျှပ်စစ် စီမံကိန်းအချို့ ထိခိုက်မှုများ ကြုံတွေ့နေရသဖြင့် သက်ဆိုင်ရာ အာဏာပိုင်များက အရေးပေါ် ကယ်ဆယ်ရေးနှင့် ထောက်ပံ့ရေး လုပ်ငန်းများကို လုပ်ဆောင်လျက်ရှိသည်။

အိန္ဒိယနှင့် နီပေါတွင် ရေကြီးမြေပြိုမှုများကြောင့် လူ ၇၀ ထက်မနည်း သေဆုံး

« Prev 1 2 3 4 5 6 … 1,148 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

ဂျပန်နိုင်ငံက အမြဲတမ်းနေထိုင်ခွင့် လျှောက်ထားခအား အဆ ၂၀ ထိ တိုးမြှင့် — October 1, 2026 6:37 pm
လာအိုနိုင်ငံတွင် တရုတ်စစ်တပ်က စစ်ရေးအထောက်အကူပြု လေကြောင်းစခန်းသစ် ဖွင့်လှစ် — October 1, 2026 6:35 pm
ဗြိတိန် သုတေသနများအား တရုတ်ထောက်လှမ်းရေးများက အသုံးချနေကြောင်း MI5 သတိပေး — October 1, 2026 6:35 pm

Recent Posts

ကချင်နှင့် ရှမ်း-ကချင်အစပ် မြို့နယ် ၆ ခုတွင် KIA နှင့် စစ်အုပ်စုတပ်တို့ တိုက်ပွဲများ ဆက်လက်ပြင်းထန်
ဂျပန်နိုင်ငံက အမြဲတမ်းနေထိုင်ခွင့် လျှောက်ထားခအား အဆ ၂၀ ထိ တိုးမြှင့်
လာအိုနိုင်ငံတွင် တရုတ်စစ်တပ်က စစ်ရေးအထောက်အကူပြု လေကြောင်းစခန်းသစ် ဖွင့်လှစ်
ဗြိတိန် သုတေသနများအား တရုတ်ထောက်လှမ်းရေးများက အသုံးချနေကြောင်း MI5 သတိပေး
ကာလင်နင်ဂရက်ဒေသအား ပိတ်ဆို့ပါက နျူကလီးယားလက်နက်ဖြင့် တုံ့ပြန်မည်ဟု ရုရှား သတိပေး

Archives

Archives

×Close