NMG Doh – Page 5 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
နိုင်ငံတကာသတင်း
NMG အကြောင်း
Contact

Home
Author Archive

NMG Doh

Author: NMG Doh

Sep 28

ရေကြီး ရေလျှံမှုတွေကြောင့် ဘန်ကောက်နှင့် ခရိုင်အချို့တွင် ရုံးပိတ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၈ ရက်။ ထိုင်းနိုင်ငံတွင် မိုးသည်းထန်စွာ ရွာသွန်းပြီး ရေကြီးရေလျှံမှုများ ဖြစ်ပွားနေသဖြင့် မြို့တော် ဘန်ကောက် အပါအဝင် အိမ်နီးချင်း ခရိုင် သုံးခုရှိ အစိုးရ ဝန်ထမ်းများအတွက် စက်တင်ဘာလ ၂၈ ရက်နှင့် ၂၉ ရက်နေ့များကို အထူးရုံးပိတ်ရက်အဖြစ် ထိုင်းအစိုးရအဖွဲ့က အတည်ပြု ကြေညာလိုက်သည်။ အဆိုပါ အထူးရုံးပိတ်ရက် သတ်မှတ်ချက်သည် ပြည်သူများ၏ သွားလာရေး အခက်အခဲကို လျှော့ချပေးရန်နှင့် လမ်းပန်းဆက်သွယ်ရေး ပိတ်ဆို့မှုများကို သက်သာစေရန် ရည်ရွယ်ကြောင်း ထိုင်းအစိုးရ ထုတ်ပြန်ချက်တွင် ဖော်ပြထားသည်။ ဘန်ကောက်မြို့တွင် ၄၈ နာရီအတွင်း မိုးရေချိန် ၁၂ လက်မနီးပါး ရွာသွန်းခဲ့ခြင်းကြောင့် အဓိက လမ်းမကြီးများပေါ်တွင် ရေကြီးရေလျှံမှုများ ဖြစ်ပွားခဲ့ပြီး ယာဉ်ကြော ပိတ်ဆို့မှုများ ကြုံတွေ့ခဲ့ရသည်။ ထို့ကြောင့် ဘန်ကောက်မြို့တော် အုပ်ချုပ်ရေးအဖွဲ့ (BMA) က ဘန်ကောက်အား ဘေးအန္တရာယ် ကျရောက်သော ဒေသအဖြစ် စနေနေ့တွင် တရားဝင် ထုတ်ပြန်ခဲ့သည်။ တနင်္ဂနွေနေ့တွင် မိုးရွာသွန်းမှု လျော့နည်းသွားသဖြင့် ရေပြန်လည် ကျဆင်းသွားခဲ့သော်လည်း အချို့သော နိမ့်ပါးဒေသများတွင် မကြာမီ ရေဘေးပိတ်မိနေသူများ ရှိနေဆဲဖြစ်သည်။

ရေကြီး ရေလျှံမှုတွေကြောင့် ဘန်ကောက်နှင့် ခရိုင်အချို့တွင် ရုံးပိတ်

Sep 28

ကက်သလစ် သာသနာတွင်း လိင်ပိုင်းဆိုင်ရာ ကျူးလွန်မှုများ စုံစမ်းရန် ပုပ်ရဟန်းမင်းကြီး တိုက်တွန်း သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၈ ရက်။ ပြင်သစ်နိုင်ငံသို့ ရောက်ရှိနေသည့် ပုပ်ရဟန်းမင်းကြီး လီယို (Pope Leo) က ရိုမန်ကက်သလစ် သာသနာတော်အတွင်း ဖြစ်ပွားခဲ့သည့် လိင်ပိုင်းဆိုင်ရာ အလွဲသုံးစားပြုမှု အရှုပ်တော်ပုံများကို အမြစ်ပြတ် တူးဖော်ဖျက်ဆီးကြရန် ပြင်သစ် ကက်သလစ် ဆရာတော်များအား တိုက်တွန်း နှိုးဆော်လိုက်သည်။ လေးရက်ကြာ ပြင်သစ် တရားဝင် ခရီးစဉ်၏ တတိယမြောက်နေ့တွင် ဆရာတော်များနှင့် သီးသန့် တွေ့ဆုံဆွေးနွေးစဉ် ပုပ်ရဟန်းမင်းကြီးက အဆိုပါအတိုင်း မိန့်ကြားခဲ့ခြင်းဖြစ်သည်။ ကလေးသူငယ်များအပေါ် လိင်ပိုင်းဆိုင်ရာ အလွဲသုံးစားပြုမှု ပပျောက်ရေးအတွက် လွတ်လပ်သော စုံစမ်းစစ်ဆေးမှုများကို ဆက်လက် ဆောင်ရွက်ရန်နှင့် အမြင့်ဆုံး သတိဝီရိယ ထားရှိကြရန်လည်း မှာကြားခဲ့သည်။ ၂၀၂၁ ခုနှစ်က ထုတ်ပြန်ခဲ့သည့် သီးခြား စုံစမ်းစစ်ဆေးမှု အစီရင်ခံစာအရ လွန်ခဲ့သည့် နှစ်ပေါင်း ၇၀ အတွင်း ပြင်သစ်နိုင်ငံ၌ ကက်သလစ် ဘုန်းတော်ကြီးများနှင့် သာသနာ့ ဝန်ထမ်းများ၏ လိင်ပိုင်းဆိုင်ရာ ကျူးလွန်မှု ခံခဲ့ရသည့် ကလေးသူငယ် ဦးရေ စာရင်းမှာ ၃ သိန်း ၃ သောင်းကျော် ရှိခဲ့သည်။

ကက်သလစ် သာသနာတွင်း လိင်ပိုင်းဆိုင်ရာ ကျူးလွန်မှုများ စုံစမ်းရန် ပုပ်ရဟန်းမင်းကြီး တိုက်တွန်း

Sep 28

ကမ္ဘာကျော် ထိုင်း K-Pop အဆိုတော် Lisa ၂၀၂၆ MTV ဗီဒီယို တေးဂီတ ဆုရရှိ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၈ ရက်။ ကမ္ဘာကျော် ထိုင်းအနုပညာရှင်နှင့် BLACKPINK အဖွဲ့ဝင် LISA သည် ပြီးခဲ့သည့် တနင်္ဂနွေနေ့က လော့စ်အိန်ဂျယ်လစ်မြို့၌ ကျင်းပခဲ့သော ၂၀၂၆ MTV Video Music Awards (VMAs) ပွဲတွင် 'Best Pop' ဆုကို ဆွတ်ခူးခဲ့သည်။ Lisa သည် အဆိုပါဆုကို ပထမဆုံး ရရှိခဲ့သည့် K-pop တစ်ကိုယ်တော် အနုပညာရှင် ဖြစ်လာခဲ့သည်။ ဂျပန်မင်းသား Kentaro Sakaguchi နှင့်အတူ သရုပ်ဆောင်ထားသည့် ရုပ်ရှင်ဆန်ဆန် သီချင်းဗီဒီယို 'Dream' ဖြင့် Taylor Swift၊ Ariana Grande၊ Olivia Rodrigo နှင့် Sabrina Carpenter ကဲ့သို့သော ကမ္ဘာ့ထိပ်တန်း အနုပညာရှင်များကို ကျော်လွန်ကာ အနိုင်ရရှိခဲ့ခြင်း ဖြစ်သည်။ ထို့အပြင် 'Dream' သီချင်းသည် Best K-Pop၊ Best Cinematography နှင့် Best Editing အပါအဝင် စုစုပေါင်း ဆုဆန်ခါတင် ၄ ခုအထိ ပါဝင်ခဲ့သည်။ LISA သည် အနက်ရောင်ဝတ်စုံဖြင့် စင်ပေါ်တက်ရောက် ဆုယူခဲ့ပြီး "ပရိသတ်တွေ မရှိရင် ဒီနေရာကို ရောက်လာမှာ မဟုတ်ပါဘူး၊ အချစ်တွေနဲ့ အားပေးမှုတွေအတွက် အများကြီး ကျေးဇူးတင်ပါတယ်" ဟု မျက်ရည်ကျကာ ကျေးဇူးတင်စကား ပြောကြားခဲ့သည်။ Photo:The Nation #LISA

ကမ္ဘာကျော် ထိုင်း K-Pop အဆိုတော် Lisa ၂၀၂၆ MTV ဗီဒီယို တေးဂီတ ဆုရရှိ

Sep 28

လူမှုနှင့်ဘာသာရေး အဖွဲ့များမှ တဆင့် ဒေါ်လာ ၂ ဘီလီယံ ထောက်ပံ့မှုရမည့် နိုင်ငံများတွင် မြန်မာပါဝင် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၈ ရက်။ ဘာသာရေးနှင့် လူမှု အဖွဲ့အစည်းများ မှ တဆင့် ကမ္ဘာတဝှမ်း ထောက်ပံ့ငွေ ဒေါ်လာ ၂ ဘီလီယံ ပေးအပ်ရာတွင် မြန်မာနိုင်ငံလည်း ပါဝင်မည် ဖြစ်ကြောင်း ရန်ကုန် အမေရိကန်သံရုံးက သတင်း ထုတ်ပြန်သည်။ ယုံကြည်စိတ်ချရသော ဘာသာရေးအခြေပြုနှင့် လူမှုအသိုက်အဝန်း အဖွဲ့အစည်းများမှတစ်ဆင့် အမေရိကန်ဒေါ်လာ ၂ ဘီလီယံနီးပါးရှိ ကမ္ဘာ့ကျန်းမာရေးနှင့် လူသားချင်းစာနာထောက်ထားမှုဆိုင်ရာ အကူအညီအသစ်များကို ပေးအပ်သွားမည်ဖြစ်ရာ အဆိုပါအကူအညီများ လက်ခံရရှိမည့် နိုင်ငံများတွင် မြန်မာနိုင်ငံလည်း ပါဝင်ကြောင်း မြန်မာနိုင်ငံဆိုင်ရာ အမေရိကန်သံရုံးက သတင်းထုတ်ပြန်လိုက်ခြင်း ဖြစ်သည်။ မြေပြင်တွင် အကူအညီပေးအပ်လျက်ရှိသည့် လူပုဂ္ဂိုလ်များနှင့် အဖွဲ့အစည်းများမှတစ်ဆင့် မြန်မာပြည်သူများအတွက် လိုအပ်သော အကူအညီများကို ပေးအပ်ခြင်းဖြင့် လူ့အသက်များကို ကယ်တင်နိုင်မည်ဖြစ်ရုံမျှမက အမေရိကန်ပြည်ထောင်စုအတွက်ပါ ဘေးကင်းလုံခြုံမှုရှိစေမည့် ရေရှည်တည်ငြိမ်ရေးကို အားကောင်းလာစေမည်ဖြစ်ကြောင်း သံရုံး၏ ထုတ်ပြန်ချက်တွင် ဖော်ပြထားသည်။ ဆိုလိုသည်မှာ အစိုးရမှ တဆင့်မဟုတ်ပဲ အကူအညီများကို ဘာသာရေးနှင့် လူမှုရေး အဖွဲ့များမှ တဆင့် ပေးအပ်မည်ဟု ကြေညာခဲ့ခြင်း ဖြစ်သည်။ ထို့အပြင် ရလဒ်ကောင်းများရှိပြီးသား အကူအညီပေးရေး အဖွဲ့အစည်းများနှင့် ပူးပေါင်းဆောင်ရွက်ခြင်း အားဖြင့် အမေရိကန်နိုင်ငံသည် အရင်းအမြစ်များကို အမှန်တကယ် လိုအပ်နေသည့် ဒေသများသို့ ပိုမိုရောက်ရှိစေရေး ဆောင်ရွက်နေပြီး တိုင်းတာနိုင်သည့် ရလဒ်ကောင်းများ ရရှိရေးနှင့် အမေရိကန် အခွန်ထမ်းပြည်သူများ၏ ငွေကြေးများကို တာဝန်ယူမှုရှိရှိ စီမံခန့်ခွဲကာ မြန်မာပြည်သူများ အရေးတကြီး လိုအပ်နေချိန်တွင် ထောက်ပံ့ပေးနေခြင်းဖြစ်ကြောင်း အမေရိကန် သံရုံးက ဆိုသည်။

လူမှုနှင့်ဘာသာရေး အဖွဲ့များမှ တဆင့် ဒေါ်လာ ၂ ဘီလီယံ ထောက်ပံ့မှုရမည့် နိုင်ငံများတွင် မြန်မာပါဝင်

Sep 28

တရားဝင် တောင်းပန်ရန် ယူကရိန်းကို တောင်ကိုရီးယား တောင်းဆို သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၈ ရက်။ တောင်ကိုရီးယားနှင့် ယူကရိန်း နှစ်နိုင်ငံကြား ထားရှိသော လျှို့ဝှက်ရေး မူဝါဒနှင့် သဘောတူညီချက်များကို ဖောက်ဖျက်ခဲ့သည့်အတွက် ယူကရိန်းအစိုးရအနေဖြင့် တရားဝင် ရှင်းလင်းချက်နှင့် တောင်းပန်စာ ပေးပို့ရန် တောင်ကိုရီးယားအစိုးရက တောင်းဆိုလိုက်သည်။ ရုရှား-ယူကရိန်း စစ်ပွဲအတွင်း ရုရှားဘက်မှ ဝင်ရောက် တိုက်ခိုက်ပေးစဉ် ဖမ်းဆီးရမိခဲ့သည့် မြောက်ကိုရီးယား စစ်သုံ့ပန်း နှစ်ဦးအား တောင်ကိုရီးယားထံ လွှဲပြောင်းပေးခဲ့ကြောင်း ယူကရိန်းသမ္မတ ဗိုလိုဒီမား ဇယ်လန်းစကီးက လူသိရှင်ကြား ထုတ်ဖော် ပြောဆိုခဲ့သည်။ အဆိုပါ စစ်သုံ့ပန်း လွှဲပြောင်းမှု ဖြစ်စဉ်အား လျှို့ဝှက် ထိန်းသိမ်းထားရန် နှစ်နိုင်ငံကြား ကြိုတင် သဘောတူထားခဲ့သော်လည်း ယူကရိန်းဘက်မှ စည်းကမ်း ပျက်ကွက်ခဲ့သည့်အတွက် တောင်ကိုရီးယား သမ္မတ လီဂျေမြောင်က ယုံကြည်မှု ပျက်ပြားကြောင်း ဝေဖန်ခဲ့သည်။ မြောက်ကိုရီးယား စစ်သုံ့ပန်းများ တောင်ကိုရီးယားသို့ ရောက်ရှိသွားသည့် အချက်အလက် ပေါက်ကြားသွားခြင်းကြောင့် မြောက်ကိုရီးယားနှင့် စာချုပ်ပါ စစ်ရေး တင်းမာမှုများ ပိုမို မြင့်မားလာမည်ကို တောင်ကိုရီးယား အာဏာပိုင်များက စိုးရိမ်လျက်ရှိသည်။

တရားဝင် တောင်းပန်ရန် ယူကရိန်းကို တောင်ကိုရီးယား တောင်းဆို

Sep 28

ကမ္ဘာ့သတင်းများနေ့တွင် သတင်းဌာနများ ပူးပေါင်းဆောင်ရွက်ကြရန် တိုက်တွန်း သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၈ ရက်။ စက်တင်ဘာလ ၂၈ ရက်နေ့တွင် ကျရောက်သည့် ကမ္ဘာ့သတင်းများနေ့ (World News Day) ၌ New York Times၊ Reuters နှင့် Kyiv Independent အပါအဝင် ကမ္ဘာတစ်ဝန်းရှိ သတင်းဌာနပေါင်း ၁,၀၀၀ ကျော် ပူးပေါင်းပါဝင်ခဲ့ကြသည်ဟု BBC သတင်းတစ်ပုဒ်တွင် ဖော်ပြသည်။ မီဒီယာလုပ်ငန်းစနစ်သည် ကြီးမားသည့် စိန်ခေါ်မှုများနှင့် ရင်ဆိုင်နေရချိန်တွင် ယုံကြည်စိတ်ချရသော သတင်းစာပညာ၏ တန်ဖိုးကို မီးမောင်းထိုးပြရန် ရည်ရွယ်၍ အဆိုပါနေ့ကို ကျင်းပခြင်းဖြစ်သည်။ ၂၀၂၆ ခုနှစ် Reuters Institute ၏ အစီရင်ခံစာအရ သတင်းမီဒီယာများအပေါ် လူထု၏ ယုံကြည်မှုသည် စံချိန်တင် လျော့နည်းသွားခဲ့ပြီး လူအများစုသည် လူမှုကွန်ရက်များ၊ YouTube နှင့် AI Chatbot များကို သတင်းရယူရန် ပိုမိုအသုံးပြုလာကြသည်။ သို့သော်လည်း အွန်လိုင်း ပလက်ဖောင်းများထက် သမားရိုးကျ သတင်းဌာနများကိုသာ ပိုမိုယုံကြည်စိတ်ချနေကြဆဲ ဖြစ်ကြောင်း လေ့လာမှုများက ထောက်ပြထားသည်။ ကမ္ဘာ့သတင်းများနေ့ကို ပူးတွဲစီစဉ်သူ Branko Brkic က သတင်းဌာနများအနေဖြင့် အတိတ်က အခြေအနေအတိုင်း သီးခြားစီ ရပ်တည်နေ၍ မရတော့ဘဲ အချင်းချင်း အင်အားချင်း ပူးပေါင်းကာ ခေတ်နှင့်အညီ အပြောင်းအလဲ မလုပ်ဆောင်နိုင်ပါက ရေရှည်တွင် ပျောက်ကွယ်သွားနိုင်ကြောင်း သတိပေးခဲ့သည်။ မီဒီယာများတွင် အမှားအယွင်းများ ရှိနိုင်သော်လည်း သတင်းအချက်အလက်ကို အဓိကအခြေခံသည့် ယနေ့ခေတ် လူ့အသိုက်အဝန်းတွင် အမှန်တရားနှင့် အချက်အလက်များကို တင်ဆက်ပေးနေသည့် မီဒီယာများ မရှိပါက အဆိုပါ လူ့အသိုက်အဝန်းကြီးပါ ထိခိုက်ရုန်းကန်ရမည်ဖြစ်ကြောင်းလည်း ထောက်ပြထားသည်။ #World_News_Day

ကမ္ဘာ့သတင်းများနေ့တွင် သတင်းဌာနများ ပူးပေါင်းဆောင်ရွက်ကြရန် တိုက်တွန်း

Sep 25

NUG အထူးတိုင်းစစ်ဌာနချုပ် လေကြောင်းမှ ဗုံးကြဲခံရပြီး CDM အရာရှိနှင့် ရဲဘော်အချို့ ကျဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၅ ရက်။ ပဲခူးတိုင်း ရွှေကျင်မြို့နယ်နှင့် မွန်ပြည်၊ ကျိုက်ထိုမြို့နယ်အစပ်ရှိ အမျိုးသားညီညွတ်ရေးအစိုးရ (NUG) ကာကွယ် ရေးဝန်ကြီးဌာန၊ အထူးတိုင်းစစ်ဌာနချုပ် အခြေစိုက်နေရာကို စစ်အုပ်စုတပ်က လေကြောင်းမှ ဗုံးကြဲတိုက်ခိုက်ခဲ့ သဖြင့် CDM လေတပ်အရာရှိတစ်ဦးနှင့် ပြည်သူ့ကာကွယ်ရေးတပ်ဖွဲ့ (PDF) ရဲဘော်များ ကျဆုံးကာ ကွပ်ကဲရေး မှူး အပါအဝင် ထိပ်ပိုင်းခေါင်းဆောင်အချို့ ဒဏ်ရာရရှိခဲ့ကြသည်။ စက်တင်ဘာလ ၂၄ ရက်နေ့၊ နံနက် ၁၁ နာရီခန့်တွင် စစ်ဘက်ဆိုင်ရာ သင်တန်းတစ်ခု ပြုလုပ်နေသည့် NUG အထူးတိုင်းစစ်ဌာန၏ စခန်းနေရာကို စစ်အုပ်စုတပ်က တိုက်လေယာဉ်များအပြင် Y-12 ထောက်ပံ့ရေး လေယာဉ်များပါ အသုံးပြု၍ ဗုံး ၆ လုံးထက်မနည်း ကြဲချတိုက်ခိုက်ခဲ့ခြင်းဖြစ်သည်။ မြေပြင် စစ်ရေးသတင်းရင်းမြစ်တစ်ဦးက “လေယာဉ်နဲ့ ဗုံး ကြဲပြီးတာနဲ့ သိမ်ဇရပ် အမှတ် (၃၁၀) အမြောက် တပ်ရင်းကပါ လက်နက်ကြီးတွေနဲ့ ဆက်တိုက် ပစ်ခတ်ခဲ့တာပါ။ လေကြောင်းနဲ့ လက်နက်ကြီး တိုက်ခိုက်မှုတွေ ကြောင့် CDM လေတပ်တပ်ကြပ်ကြီး နေဝင်းအောင်အပါအဝင် ရဲဘော်တွေ ကျဆုံးခဲ့ရတာပါ။ ကျနော်တို့ရတဲ့ အချက်အလက်ကတော့ ၄ ယောက်လို့တော့ ရထားတယ်။ အသေးစိတ်ဆက်မသိရသေးဘူး” ဟု ပြောသည်။ လေကြောင်းတိုက်ခိုက်မှုကြောင့် အကြမ်းမဖက် အာဏာဖီဆန်ရေးလှုပ်ရှားမှု (CDM) တွင် ပါဝင်လာသည့် လေတပ်တပ်ကြပ်ကြီး နေဝင်းအောင်နှင့် PDF ရဲဘော်အနည်းဆုံး ၄ ဦးခန့် ကျဆုံးခဲ့ပြီး အထူးတိုင်းစစ်ဌာန ကွပ်ကဲရေးမှူး ကိုအောင်စံရှားအပါအဝင် ၄ ဦးခန့် ဒဏ်ရာရရှိခဲ့သည်။ သို့သော် မြေပြင်စစ်ကြောင်းများ အနီးဝန်းကျင်သို့ ထိုးစစ်ဆင်လာနေသဖြင့် သေဆုံး/ဒဏ်ရာရ စာရင်း အတိအကျကို အတည်မပြုနိုင်သေးဘဲ ကျဆုံးသူ အရေအတွက် ပိုမိုမြင့်တက်လာနိုင်ကြောင်း နယ်မြေခံများက ဆိုသည်။ အဆိုပါ စစ်ရေးသတင်းရင်းမြစ်က “တိုက်ခိုက်မှုအပြီးမှာလည်း အနားက တပ်ရင်းတွေကနေ လက်နက်ကြီးနဲ့ တောက်လျှောက် ပစ်နေသလို မြေပြင်စစ်ကြောင်း ၂ ကြောင်းပါ ထိုးလာတယ်။ ဒဏ်ရာရသူတွေကို ဆေးကုသ ပေးဖို့အတွက် မြေပြင်မှာ အခက်အခဲအများကြီး ကြုံနေရတုန်းပဲ” ဟု ပြောသည်။ အဆိုပါ NUG အထူးတိုင်းစစ်ဌာနသည် ပဲခူးတိုင်း၊ မွန်ပြည်နှင့် ကရင်ပြည် နယ်စပ် စစ်တောင်းမြစ်ဝှမ်းဒေသ များတွင် အဓိက စစ်ရေးလှုပ်ရှားနေသည့် တပ်ဖွဲ့ဖြစ်သည်။ ယခုဖြစ်စဉ်နှင့် ပတ်သက်၍ NUG ကာကွယ်ရေးဝန်ကြီးဌာနဘက်မှ တစ်စုံတစ်ရာ တရားဝင် ထုတ်ပြန်ထားခြင်း မရှိသေးသော်လည်း တော်လှန်ရေး အင်အားစုများနှင့် နီးစပ်သူများကမူ လူမှုကွန်ရက်ပေါ်တွင် ကျဆုံးသွားသည့် ရဲဘော်များအတွက် ဝမ်းနည်းကြောင်း စာလွှာများ ရေးသားဖော်ပြနေကြသည်။ ဓာတ်ပုံ- (အထူးတိုင်းစစ်ဌာန / ယခုနှစ်အတွင်း အထူးတိုင်းစစ်ဌာန အစည်းအဝေးတစ်ခုတွင် တွေ့ရသည့် တပ်မှူးများ။) #အထူးတိုင်းစစ်ဌာန

NUG အထူးတိုင်းစစ်ဌာနချုပ် လေကြောင်းမှ ဗုံးကြဲခံရပြီး CDM အရာရှိနှင့် ရဲဘော်အချို့ ကျဆုံး

Sep 25

ကချင်တွင် စစ်အုပ်စု ဗုံးကြဲ၊ လိုင်ဇာတွင် လေယာဉ်များ ပျံဝဲ၍ တရုတ် သတိပေး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၅ ရက်။ ကချင်-တရုတ်နယ်စပ်ရှိ ကချင်လွတ်လပ်ရေးအဖွဲ့ KIO ဌာနချုပ် လိုင်ဇာမြို့ အပါအဝင် ဖားကန့်နှင့် ဆယ်ဇင်း ဒေသများကို စစ်အုပ်စုတပ်က လေကြောင်းမှ ဆက်တိုက် ကင်းထောက်ခြင်းနှင့် ဗုံးကြဲတိုက်ခိုက်ခြင်းများ ပြုလုပ်ခဲ့ကြောင်း ဒေသခံများက ပြောသည်။ စက်တင်ဘာလ ၂၄ ရက်နေ့ မွန်းလွဲ ၃ နာရီခွဲခန့်တွင် ဖားကန့်မြို့နယ်၊ KIA တပ်မဟာ (၉)၊ တပ်ရင်း (၆) နေရာများ နှင့် ကချင်-စစ်ကိုင်းအစပ် ဟုမ္မလင်းနှင့် ဆယ်ဇင်းကျေးရွာအနီးရှိ KIA တပ်ရင်း (၃၁) နေရာတို့ကို စစ်အုပ်စုတပ် က ဂျက်ဖိုက်တာ ၂ စီးနှင့် Y-12 လေယာဉ် ၁ စီးတို့ဖြင့် ဗုံးအလုံး ၃၀ နီးပါး ကြဲချခဲ့သည်။ ဖားကန့် ဒေသခံ အမျိုးသားတစ်ဦးက “မွန်းလွဲပိုင်းမှာ ဖိုက်တာ ၂ စီးနဲ့ Y-12 လေယာဉ်တွေ လာပြီး ဗုံးအလုံး ၃၀ ကျော်မက ကြဲသွားတာ။ တပ်မကုန်းဘက်ကလည်း လက်နက်ကြီးတွေနဲ့ ပစ်တာတွေ ရှိတယ်။ ၂၃ ရက်နေ့ ည ကတည်းကနေ အသံတွေ ပြန်ကြားနေရပြီ။ ဒီမှာက အချင်းချင်းလည်း သတိထားကြဖို့ သတိပေးထားပြီးသား ဗျ။ ဗန်းမော်ဘက်မှာ စစ်သင်္ဘောတွေ တိုက်ခိုက်ခံထားရတော့ ဒီဘက်ပိုင်းတွေ လေကြောင်းရန် သတိထားဖို့ ဆိုတာမျိုးတွေ ပြောထားပါတယ်” ဟု ပြောသည်။ ထို့ပြင် စက်တင်ဘာလ ၂၄ ရက် မွန်းလွဲ ၁ နာရီဝန်းကျင်ကလည်း KIO ဌာနချုပ် လိုင်ဇာမြို့ အနောက်ဘက်ခြမ်း နှင့် တရုတ်-မြန်မာ နယ်စပ်တစ်လျှောက်သို့ စစ်အုပ်စု၏ Y-12 နှင့် ဂျက်ဖိုက်တာ လေယာဉ်များ မိနစ် ၂၀ နီးပါး ပျံဝဲကင်းထောက်ခဲ့သဖြင့် တရုတ်နိုင်ငံဘက်မှ လေကြောင်းအချက်ပြ မီးကျည်များ ပစ်လွှတ်ကာ သတိပေး ပေါက်ကွဲသံများ ထွက်ပေါ်ခဲ့သည်။ လိုင်ဇာမြို့ခံ အမျိုးသားတစ်ဦးက “လိုင်ဇာမှာ လေယာဉ်တွေ လာပျံဝဲတာ နှစ်ရက်ဆက်တိုက် ရှိပြီ။ တရုတ်ဘက် ကလည်း လေကြောင်း သတိပေး မီးကျည်တွေ ပစ်လွှတ်တာမျိုး လုပ်တယ်။ မြို့ထဲမှာတော့ ကြိုတင်ကာကွယ် တဲ့ အနေနဲ့ ကျောင်းတွေ ယာယီပိတ်ထားရတယ်။ ဒီလိုင်ဇာရော၊ နောက်ပြီး မိုင်ဂျာယန်မှာရော ကျောင်းတွေ တော့ ပိတ်ထားပါတယ်” ဟု ပြောသည်။ ပြီးခဲ့သည့် ဩဂုတ်လ ၂၁ ရက်မှ စက်တင်ဘာလ ဒုတိယပတ်အထိ မန္တလေးမှ ဗန်းမော်ဘက်သို့ ဧရာဝတီ မြစ်ကြောင်းအတိုင်း ဆန်တက်လာသည့် စစ်အုပ်စု၏ စစ်ရေယာဉ် ၂၀ ဝန်းကျင်ကို KIA နှင့် ပူးပေါင်းတပ်ဖွဲ့များ က ကြားဖြတ်တိုက်ခိုက်ခဲ့ရာ စစ်အုပ်စုဘက်မှ အထိနာခဲ့ပြီးနောက် လေကြောင်းတိုက်ခိုက်မှုများကို ပိုမိုပြုလုပ် လာခြင်း ဖြစ်သည်။ KIO သတင်းနှင့် ပြန်ကြားရေးတာဝန်ခံ ဗိုလ်မှူးကြီး နော်ဘူက စစ်အုပ်စုသည် ဗန်းမော်အပါအဝင် နယ်မြေ အသီးသီးတွင် စစ်ရေးအရ ဖိအားများလာသဖြင့် လေကြောင်းနှင့် ဒရုန်းများကို အသုံးပြု၍ အရပ်သား ပစ်မှတ် များကို ပြန်လည်တိုက်ခိုက်လာနိုင်ကြောင်း ပြောဆိုထားသည်။ လက်ရှိတွင် KIO/KIA ဗဟိုက လိုင်ဇာ၊ မိုင်ဂျာယန်၊ လွယ်ဂျယ်နှင့် ကန်ပိုက်တည် စသည့် မြို့များနှင့် ကျေးရွာများ ရှိ ပြည်သူများအား လေကြောင်းရန်အတွက် ကတုတ်ကျင်းများ တူးထားကြရန်၊ လူစုလူဝေး မလုပ်ကြရန်နှင့် လေကြောင်းအန္တရာယ်ကို အထူးသတိပြုကြရန် အသိပေး ထုတ်ပြန်ထားပြီး စာသင်ကျောင်းများကိုလည်း ယာယီပိတ်ထားကြောင်း ဒေသခံပြည်သူများက ပြောသည်။ #လိုင်ဇာမြို့

ကချင်တွင် စစ်အုပ်စု ဗုံးကြဲ၊ လိုင်ဇာတွင် လေယာဉ်များ ပျံဝဲ၍ တရုတ် သတိပေး

Sep 25

စစ်ကိုင်းတွင် စစ်အုပ်စု ဗုံးကြဲ၍ ထိခိုက်သေဆုံးမှုရှိ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၅ ရက်။ စစ်ကိုင်းတိုင်းအတွင်း စစ်ဘေးရှောင်များ နေထိုင်ရာ ကျေးရွာများနှင့် ကုန်သွယ်ရေး လမ်းကြောင်းများကို စစ်အုပ်စုတပ်က လေကြောင်းမှ ရက်ဆက် ဗုံးကြဲတိုက်ခိုက်နေ၍ ကလေးငယ်များနှင့် သီလရှင် ၁ ပါး အပါအဝင် အရပ်သား ထိခိုက်သေဆုံးမှု မြင့်တက်နေသည်။ စက်တင်ဘာလ ၂၄ ရက်နေ့၊ ညနေ ၅ နာရီ ၂၀ မိနစ်ခန့်တွင် ကောလင်းမြို့နယ်၊ ကုက္ကိုလ်ကုန်းကျေးရွာရှိ စစ်ဘေး ရှောင်များ ရှိရာနေရာကို စစ်အုပ်စုက တံတားဦးလေတပ်မှ ဂျက်ဖိုက်တာဖြင့် ဗုံး နှစ်ကြိမ် ကြဲချခဲ့ရာ အမျိုးသား ၃ ဦး သေဆုံးပြီး ၈ ဦး ဒဏ်ရာရရှိခဲ့ကာ နေအိမ် ၁၀ လုံးခန့် ပျက်စီးခဲ့သည်။ ကောလင်း ဒေသခံတစ်ဦးက “ဖိုက်တာနဲ့ ပေါင် ၃၀၀၊ ပေါင် ၅၀၀ ဗုံးတွေ ကြဲသွားတာ။ ညနေပိုင်းမှာ ဗုံးကြဲခံရ တော့ ပြည်သူတွေ အကုန် ထိတ်လန့်ပြီး ရွာထဲမှာ မနေရဲကြတော့ဘဲ အမှောင်ထဲမှာတင် နီးစပ်ရာ တောတောင် တွေဆီ တိမ်းရှောင်ခဲ့ကြရတယ်” ဟု ပြောသည်။ ထို့ပြင် စက်တင်ဘာလ ၂၃ ရက်နေ့ကလည်း အင်းတော်မြို့နယ်၊ မန္တလေး-မြစ်ကြီးနား ကားလမ်းပိုင်းရှိ ဆီကား တန်းနှင့် ဆီဆိုင်များကို စစ်အုပ်စုက Y-12 လေယာဉ်ဖြင့် ဗုံး ၁၈ လုံး ကြဲချခဲ့ရာ ယာဉ်မောင်းနှင့် ယာဉ်နောက် လိုက် တစ်ဦး သေဆုံးပြီး ကုန်သည် ၈ ဦးခန့် ဒဏ်ရာရရှိခဲ့သည်။ ထိုနေ့ ညနေပိုင်းတွင် တံခွန်တိုင်ရွာသစ်နှင့် ကသာမြို့နယ် ညောင်ခြေထောက် ဘုန်းကြီးကျောင်းတို့အား ဆက် တိုက် ဗုံးကြဲခဲ့သဖြင့် သီလရှင် ၁ ပါး ပွဲချင်းပြီး ပျံလွန်တော်မူသွားသည်။ အင်းတော် ဒေသခံတစ်ဦးက “တိုက်ပွဲဖြစ်တာလည်း မရှိဘူး၊ တော်လှန်ရေးတပ်တွေ မရှိဘဲနဲ့ စစ်အုပ်စုက ဆီဆိုင်တွေနဲ့ ကားလမ်းမကို ရည်ရွယ်ချက်ရှိရှိ ဗုံးကြဲသွားတာ။ ဆီကားတချို့ မီးလောင် ပျက်စီးခဲ့ရသလို ဒဏ်ရာရသူတွေထဲမှာလည်း စိုးရိမ်ရတဲ့သူတွေ အများကြီး ပါနေတယ်” ဟု ပြောသည်။ အလားတူ ဟုမ္မလင်းမြို့နယ်တွင် ပြည်သူ့ကာကွယ်ရေး ပူးပေါင်းတပ်များနှင့် စစ်တပ်လက်အောက်ခံ ရှမ်းနီ အမျိုးသားများတပ်မတော် (SNA) တို့ စစ်ရေးတင်းမာနေပြီးနောက် တော်လှန်ရေးတပ်များ ထိန်းချုပ်ထားသည့် ရွှေပြည်အေးမြို့ကို စစ်အုပ်စုက Gyrocopter ၂ စီးဖြင့် ဗုံး ၄ လုံး ကြဲချခဲ့သည်။ စစ်အုပ်စုတပ်သည် ကချင်ပြည်၊ ရွှေကူမြို့နယ်နှင့် ရှမ်းမြောက် မဘိမ်းမြို့နယ်တို့တွင် စစ်ရေးအထိနာချိန်တိုင်း အရပ်သား ပစ်မှတ်များကို ဦးတည်၍ လေကြောင်းဆိုင်ရာ စစ်ရာဇဝတ်မှုများ ဆက်တိုက် ကျူးလွန်နေခြင်း ဖြစ်သည်။ အင်းတော်မြို့နယ် ပြည်သူ့ကာကွယ်ရေးအဖွဲ့က စစ်အုပ်စု၏ အရပ်သားများအပေါ် ဦးတည်တိုက်ခိုက်မှုကို ပြင်း ထန်စွာ ပြန်လည်တိုက်ခိုက်သွားမည်ဟု စက်တင်ဘာလ ၂၅ ရက်နေ့တွင် သတင်းထုတ်ပြန်ထားပြီး၊ စစ်ကိုင်း တိုင်းအတွင်းရှိ တော်လှန်ရေး အင်အားစုများကလည်း ပြည်သူများအနေဖြင့် လေကြောင်းအန္တရာယ်ကို အထူးသတိပြုကြရန် အသိပေး နှိုးဆော်ထားသည်။ #စစ်ကိုင်းတိုင်း

စစ်ကိုင်းတွင် စစ်အုပ်စု ဗုံးကြဲ၍ ထိခိုက်သေဆုံးမှုရှိ

« Prev 1 … 3 4 5 6 7 … 1,148 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

ဂျပန်နိုင်ငံက အမြဲတမ်းနေထိုင်ခွင့် လျှောက်ထားခအား အဆ ၂၀ ထိ တိုးမြှင့် — October 1, 2026 6:37 pm
လာအိုနိုင်ငံတွင် တရုတ်စစ်တပ်က စစ်ရေးအထောက်အကူပြု လေကြောင်းစခန်းသစ် ဖွင့်လှစ် — October 1, 2026 6:35 pm
ဗြိတိန် သုတေသနများအား တရုတ်ထောက်လှမ်းရေးများက အသုံးချနေကြောင်း MI5 သတိပေး — October 1, 2026 6:35 pm

Recent Posts

ကချင်နှင့် ရှမ်း-ကချင်အစပ် မြို့နယ် ၆ ခုတွင် KIA နှင့် စစ်အုပ်စုတပ်တို့ တိုက်ပွဲများ ဆက်လက်ပြင်းထန်
ဂျပန်နိုင်ငံက အမြဲတမ်းနေထိုင်ခွင့် လျှောက်ထားခအား အဆ ၂၀ ထိ တိုးမြှင့်
လာအိုနိုင်ငံတွင် တရုတ်စစ်တပ်က စစ်ရေးအထောက်အကူပြု လေကြောင်းစခန်းသစ် ဖွင့်လှစ်
ဗြိတိန် သုတေသနများအား တရုတ်ထောက်လှမ်းရေးများက အသုံးချနေကြောင်း MI5 သတိပေး
ကာလင်နင်ဂရက်ဒေသအား ပိတ်ဆို့ပါက နျူကလီးယားလက်နက်ဖြင့် တုံ့ပြန်မည်ဟု ရုရှား သတိပေး

Archives

Archives

×Close