NMG Doh – Page 5 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
နိုင်ငံတကာသတင်း
NMG အကြောင်း
Contact

Home
Author Archive

NMG Doh

Author: NMG Doh

Aug 11

မြစ်ကြီးနား-မန္တလေးလမ်းတွင် ကားများ ပိတ်မိနေဆဲဖြစ်၍ ခရီးမသွားကြရန် သတိပေး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဩဂုတ်လ ၁၁ ရက်။ ကချင်ပြည်နှင့် စစ်ကိုင်းတိုင်းကို ဆက်သွယ်ထားသည့် မြစ်ကြီးနား - မန္တလေး ကားလမ်းပိုင်းတွင် မိုးရွာသွန်းမှုနှင့် စစ်ရေး အခြေအနေများကြောင့် ခရီးစဉ်များ ကြန့်ကြာနေပြီး အချို့ယာဉ်များမှာ ၁၁ ရက်ကျော်ကြာ ပိတ်မိနေ သဖြင့် လက်ရှိတွင် ခရီးမသွားသင့်သေးကြောင်း လမ်းကြောင်းပြေးဆွဲနေသည့် ကားသမားများက ပြောသည်။ အင်းတော်မြို့နယ်အတွင်းရှိ ကွင်းလမ်းများမှာ မိုးရွာသွန်းချိန် ကားများ ဖြတ်သန်းသွားလာခဲ့ခြင်းကြောင့် ဗွက်ထူ နေဆဲဖြစ်ပြီး လမ်းအခြေအနေ ပိုမိုဆိုးရွားလာမည်ကို စိုးရိမ်သဖြင့် နန့်သဲနှင့် မင်းကုန်းကျေးရွာထိပ်တို့တွင် ယာဉ်သွားလာမှုကို ပိတ်ပင်ထားသည်။ အဆိုပါ လမ်းကြောင်း၌ ပြေးဆွဲနေသည့် ကားသမားတစ်ဦးက “နောက်ဆုံးအခြေအနေကတော့ လမ်းက ရေ ကျော်တာတွေဘာတွေတော့ မိုးမရွာတော့လို့ မရှိတော့ဘူး။ မိုးရွာ တုန်းက အင်းတော်ကွင်းလမ်းထဲမှာ ရောက် နေတဲ့ကားတွေ ရုန်းထားတော့ ဗွက်တွေက ရှိနေတုန်းပဲ။ အဲတော့ အရမ်းဆိုးသွားမှာစိုးလို့ အဖွဲ့အစည်းတွေက တစ်ဖြတ်တစ်ဖြတ် ပိတ်ထားတာရှိတယ်။ နမ့်သဲမှာတစ်ဖြတ်၊ မင်းကုန်းရွာထိပ်မှာတစ်ဖြတ် ပိတ်ထားကြတယ်” ဟု ပြောသည်။ မိုးရွာသွန်းမှုကြောင့် ရေကျော်သည့်နေရာများမှာ ယခုအခါ ရေပြန်ကျသွားပြီ ဖြစ်သော်လည်း ကွင်းလမ်းများတွင် ဗွက်များကျန်ရှိနေသေးသည့်အတွက် ခရီးသည်တင်ကားများနှင့် ကုန်တင်ကားများ ပုံမှန်အတိုင်း သွားလာနိုင်ခြင်း မရှိသေးပေ။ ထို့ပြင် လမ်းခရီး ကြာမြင့်နေသည့် အခြေအနေမှာ ယခင်ထက်ပင် ပိုမိုဆိုးရွားလာပြီး ဇူလိုင်လ ၃၀ ရက်နေ့က မန္တလေးမှ မြစ်ကြီးနားသို့ ထွက်ခွာလာသည့် ကားအချို့မှာ ယနေ့အချိန်အထိ မြစ်ကြီးနားသို့ မရောက်ရှိသေး ကြောင်း ဆိုသည်။ အခြား ကားသမားတစ်ဦးကလည်း “အခုအချိန်ကတော့ အရင်အခြေအနေထက်ကို လုံးဝမသွားသင့်ဘူး ဖြစ်နေ တာ။ ဘယ်လောက်ခရီးစဉ်က ကြာလဲဆိုရင် ၇ လပိုင်း ၃၀ ရက်နေ့က ထွက်သွားတဲ့ကားတွေ မြစ်ကြီးနားကို မဝင်သေးဘူး။ အခုဆို ၁၁ ရက်ရှိနေပြီ။ တချို့ကားတွေဆို အဲထက် ကြာနိုင်တယ်” ဟု ဆက်ပြောသည်။ မြစ်ကြီးနား - မန္တလေး လမ်းကြောင်းပေါ်ရှိ မော်လူး၊ နဘားလမ်းဆုံ၊ နဘားရွာနှင့် အင်းတော်မြို့တို့တွင် စစ်တပ် က အထိုင်ချတပ်စွဲထားပြီး တော်လှန်ရေးတပ်ဖွဲ့များနှင့် မကြာခဏ ထိတွေ့တိုက်ပွဲများ ဖြစ်ပွားနေသဖြင့် ခရီးသွားပြည်သူများသည် အဓိက ကားလမ်းမကြီးကို မသုံးကြဘဲ ကွင်းလမ်းများကိုသာ အသုံးပြုနေကြရခြင်း ဖြစ်သည်။ ထို့ပြင် အင်းတော်မြို့နယ်အတွင်း မိုးအဆက်မပြတ် ရွာသွန်းမှုကြောင့် မဲဇာချောင်း၊ လေးတန်ချောင်းနှင့် နမီး ချောင်းတို့ ရေကြီးရေလျှံမှုဖြစ်ကာ စစ်ဘေးရှောင်စခန်းများနှင့် ကျေးရွာများ ရေဘေးဒုက္ခ ရင်ဆိုင်နေရသလို လမ်းတံတားများလည်း ပျက်စီးခဲ့သည်။ လမ်း၊ တံတားများ လွန်စွာ ပျက်စီးနေသည့်အတွက် ခရီးသွားပြည်သူများ ဘေးအန္တရာယ် ကင်းရှင်းစေရန် ရွှေဘို-မြစ်ကြီးနား လမ်းမပေါ်ရှိ အင်းတော်မြို့နယ် ကားလမ်းနှင့် ကွင်းလမ်းအားလုံးကို ရက်အကန့်အသတ်မရှိ ပိတ် ထားမည်ဟု အင်းတော်မြို့နယ် ပြည်သူ့အုပ်ချုပ်ရေးအဖွဲ့ (ပအဖ) က ဩဂုတ်လ ၅ ရက်နေ့တွင် ထုတ်ပြန်ထား သည်။ မြစ်ကြီးနား - မန္တလေး လမ်းပိုင်းတွင် လမ်းပိတ်ဆို့မှုကြောင့် ကားများ ရက်ရှည်ပိတ်မိနေခြင်းမှာ ယခုတစ်ကြိမ် တည်း မဟုတ်ဘဲ ပြီးခဲ့သည့် ဇူလိုင်လအတွင်းကလည်း နဘား - ကသာ လမ်းပိုင်းနှင့် ကွင်းလမ်းများတွင် ယာဉ် များ ရက်ပေါင်းများစွာ ပိတ်မိခဲ့ပြီး ကုန်စည်အချို့ ပျက်စီးဆုံးရှုံးခဲ့ဖူးသည်။ လက်ရှိတွင် တိုက်ပွဲများနှင့် မိုးရွာသွန်းမှုကြောင့် ကွင်းလမ်းများပါ သွားလာခွင့် ပိတ်ထားရသည့်အတွက် ကချင်ပြည်အတွင်း ကုန်စည်ပြတ်လပ်မှုများနှင့် ကုန်ဈေးနှုန်း မြင့်တက်သည့် အခြေအနေများ ဖြစ်ပေါ်လျက် ရှိသည်။ #မြစ်ကြီးနားမန္တလေးလမ်း

မြစ်ကြီးနား-မန္တလေးလမ်းတွင် ကားများ ပိတ်မိနေဆဲဖြစ်၍ ခရီးမသွားကြရန် သတိပေး

Aug 11

အိန္ဒိယနိုင်ငံ၊ အာသံပြည်နယ် ရေကြီးမှုကြောင့် သေဆုံးသူ ၁၀၀ ကျော်သွားပြီ သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဩဂုတ်လ ၁၁ ရက်။ အိန္ဒိယနိုင်ငံမြောက်ပိုင်း အာသံပြည်နယ် (Assam) တွင် ရေကြီးရေလျှံမှုများကြောင့် သေဆုံးသူ အရေအတွက် ၁၀၀ အထိ စံချိန်တင် မြင့်တက်လာကြောင်း အာသံပြည်နယ် ဘေးအန္တရာယ်ဆိုင်ရာ စီမံခန့်ခွဲမှုအာဏာပိုင်အဖွဲ့ (ASDMA) က သတင်းထုတ်ပြန်သည်။ လက်ရှိတွင် ခရိုင် ၇ ခု၌ ရေဘေးသင့်ပြည်သူ ၁ သိန်း ၄ သောင်းနီးပါး (၁,၃၇,၅၀၀ ကျော်) ရှိနေပြီး အစိုးရက ခရိုင် ၆ ခုတွင် ကယ်ဆယ်ရေးနှင့် ထောက်ပံ့ရေးစခန်း ၁၂၅ ခု ဖွင့်လှစ်ကာ ရေဘေးသင့်ပြည်သူ ၄၉,၀၀၀ ကျော်ကို ခိုလှုံခွင့်ပေးထားသည်။ လွန်ခဲ့သော ၂၄ နာရီအတွင်း ဆန်၊ ပဲ၊ ဆားနှင့် မုန်ညင်းဆီ အပါအဝင် အရေးပေါ် စားနပ်ရိက္ခာများကို အာဏာပိုင်များက လိုက်လံဖြန့်ဝေပေးလျက် ရှိသည်။ တစ်ပြည်နယ်လုံးအတိုင်းအတာဖြင့် ကျေးရွာပေါင်း ၄၅၆ ရွာ ရေနစ်မြုပ်နေဆဲဖြစ်ပြီး၊ စိုက်ပျိုးမြေ ဧက ၃၀,၀၀၀ နီးပါး (ဟက်တာ ၁၁,၉၀၀ ကျော်) ပျက်စီးခဲ့သည်။ ထို့ပြင် တာတမံများ၊ လမ်းတံတားများနှင့် အခြေခံအဆောက်အအုံများ ပျက်စီးခဲ့သည့်အပြင် မွေးမြူရေးတိရစ္ဆာန်နှင့် ကြက်ငှက် ၄ သောင်း ၃ ထောင်ကျော်လည်း ထိခိုက်မှုရှိခဲ့သည်ဟု ဆိုသည်။ Photo:Biju BORO/AFP #indiaflood

အိန္ဒိယနိုင်ငံ၊ အာသံပြည်နယ် ရေကြီးမှုကြောင့် သေဆုံးသူ ၁၀၀ ကျော်သွားပြီ

Aug 11

ကိုလံဘီယာ၌ ပြင်းအား ၇.၄ မဂ္ဂနီကျုရှိ ငလျင်လှုပ်၊ ၁၃၂ ဦးထက်မနည်း သေဆုံး သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဩဂုတ်လ ၁၁ ရက်။ ကိုလံဘီယာနိုင်ငံတွင် ပြင်းအား ၇.၄ မဂ္ဂနီကျုရှိ အင်အားပြင်းငလျင် လှုပ်ခတ်ခဲ့မှုကြောင့် အဆောက်အအုံများ ပြိုကျပျက်စီးခဲ့ပြီး လက်ရှိအချိန်အထိ အနည်းဆုံး လူ ၁၃၂ ဦး သေဆုံးကာ ရာပေါင်းများစွာ ဒဏ်ရာရရှိခဲ့သည်။ ယခုငလျင်သည် ကိုလံဘီယာနိုင်ငံတွင် ၂၁ ရာစုအတွင်း အပြင်းထန်ဆုံး ငလျင်အဖြစ် သတ်မှတ်ခံထားရသည်။ ငလျင်၏ ပြင်းအားကြောင့် အနောက်ပိုင်း မြို့ကြီး ၃ မြို့နှင့် ခရိုင်တစ်ခုအတွင်းရှိ အဆောက်အအုံများ၊ ဆေးရုံများ၊ ဘုရားကျောင်းများနှင့် လမ်းတံတားများ အပျက်အစီးများပြားခဲ့ပြီး ပိတ်မိနေသူများစွာ ရှိနေဆဲဖြစ်သည်။ ကိုလံဘီယာ သမ္မတသစ်က နိုင်ငံတော်အရေးပေါ်အခြေအနေ ကြေညာခဲ့ပြီး အပျက်အစီးများအောက်မှ ပြည်သူများကို အသက်ရှင်လျက် ကယ်ဆယ်ရေးကို နံပါတ်တစ် ဦးစားပေးအဖြစ် ဆောင်ရွက်လျက်ရှိသည်။ သက်ဆိုင်ရာ မြို့ကြီးများတွင် ညမထွက်ရအမိန့် ထုတ်ပြန်ထားပြီး၊ ဒေသတွင်း လေဆိပ် ၆ ခုကိုလည်း အဆောက်အအုံ ကြံ့ခိုင်ရေး စစ်ဆေးရန်အတွက် ယာယီပိတ်သိမ်းထားသည်။ ကိုလံဘီယာ ဘူမိဗေဒဌာန၏ ထုတ်ပြန်ချက်အရ နောက်ဆက်တွဲငလျင် (Aftershocks) ပေါင်း ၂၁ ကြိမ်ထက်မနည်း လှုပ်ခတ်ခဲ့ပြီး ထပ်မံလှုပ်ခတ်နိုင်ခြေရှိကြောင်း သတိပေးထားသည်။ Photo:Jean Arriaga/EPA #Earthquake #colombiaearthquake

ကိုလံဘီယာ၌ ပြင်းအား ၇.၄ မဂ္ဂနီကျုရှိ ငလျင်လှုပ်၊ ၁၃၂ ဦးထက်မနည်း သေဆုံး

Aug 11

ဆော်ဒီ၊ တူရကီနှင့် ပါကစ္စတန်တို့ ပူးတွဲစစ်ရေးမဟာမိတ်စာချုပ် လက်မှတ်ရေးထိုး သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဩဂုတ်လ ၁၁ ရက်။ ဆော်ဒီအာရေဗျနိုင်ငံ၊ မက္ကာမြို့တော်တွင် ဆော်ဒီအိမ်ရှေ့မင်းသား၊ တူရကီနှင့် ပါကစ္စတန် ဝန်ကြီးချုပ်တို့သည် သမိုင်းဝင် ပူးတွဲစစ်ရေးမဟာမိတ် စာချုပ်ကို လက်မှတ်ရေးထိုးခဲ့ကြသည်။ အဆိုပါ သဘောတူညီချက်တွင် "အဖွဲ့ဝင် သုံးနိုင်ငံအနက် မည်သည့်တစ်နိုင်ငံကိုမဆို လက်နက်ကိုင်တိုက်ခိုက်လာပါက ကျန်နိုင်ငံအားလုံးကို တိုက်ခိုက်ခြင်းဟု သတ်မှတ်မည်" ဟူသော စုပေါင်းဟန့်တားရေး (Collective Deterrence) မူဝါဒကို ချမှတ်ထားသည်။ အကဲခတ်များ၏ သုံးသပ်ချက်အရ ယခုစာချုပ်သည် ဆော်ဒီအာရေဗျ၏ ဘဏ္ဍာရေးနှင့် ရေနံအရင်းအမြစ်၊ ပါကစ္စတန်၏ စစ်ရေးအတွေ့အကြုံနှင့် နျူကလီးယားစွမ်းရည်၊ တူရကီ၏ နာတိုးအဖွဲ့ဝင် စစ်အင်အားနှင့် နည်းပညာများကို ပေါင်းစပ်လိုက်ခြင်းဖြစ်သည်။ စစ်ရေးလေ့လာသူအချို့က ယခုလုပ်ဆောင်ချက်သည် စစ်ရေးအရ အမေရိကန်အပေါ် မှီခိုနေရမှုကို လျှော့ချရန် ဆော်ဒီအာရေဗျ၏ ကြိုးပမ်းမှုဖြစ်ကြောင်း သုံးသပ်ကြပြီး၊ အီရန်နိုင်ငံကမူ အဆိုပါသဘောတူညီချက်သည် စက္ကူကျားမျှသာဖြစ်ပြီး လက်တွေ့တွင် ထိရောက်မှုရှိမည်မဟုတ်ဟု ဝေဖန်ထားသည်။ သို့သော် ဆော်ဒီနှင့် တူရကီ အစိုးရတာဝန်ရှိသူများက အဆိုပါ စာချုပ်သည် မည်သည့်နိုင်ငံကိုမျှ ဦးတည်တိုက်ခိုက်ခြင်း မဟုတ်ဘဲ ဒေသတွင်း လုံခြုံရေးနှင့် အကြမ်းဖက်မှု တိုက်ဖျက်ရေးအတွက်သာ ဖြစ်ကြောင်း ငြင်းချက်ထုတ်ထားသည်။ Photo:Reuters #CollectiveDeterrence

ဆော်ဒီ၊ တူရကီနှင့် ပါကစ္စတန်တို့ ပူးတွဲစစ်ရေးမဟာမိတ်စာချုပ် လက်မှတ်ရေးထိုး

Aug 11

ရန်ကုန်ရှိ ဆွီဒင်သံရုံး-ရုံးခွဲ အပြီးသတ်ပိတ်သိမ်း သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဩဂုတ်လ ၁၁ ရက်။ ရန်ကုန်မြို့ရှိ ဆွီဒင်သံရုံး-ရုံးခွဲ (Embassy Section Office) ကို အပြီးသတ် ပိတ်သိမ်းလိုက်ပြီ ဖြစ်ကြောင်း အဆိုပါ သံရုံး-ရုံးခွဲ၏ တရားဝင် လူမှုကွန်ရက်စာမျက်နှာမှတစ်ဆင့် ဩဂုတ်လ ၉ ရက်နေ့က သတင်းထုတ်ပြန်ခဲ့သည်။ ထို့ပြင် သံရုံး-ရုံးခွဲ၏ ဖေ့စ်ဘုတ်စာမျက်နှာကိုပါ အပြီးသတ် ပိတ်သိမ်းသွားမည်ဟု ကြေညာထားသည်။ အဆိုပါ ပိတ်သိမ်းမှုကြောင့် ယခုအချိန်မှစ၍ မြန်မာနိုင်ငံဆိုင်ရာ ဆွီဒင်နိုင်ငံ၏ သံတမန်ရေးရာနှင့် အထွေထွေ ကိစ္စရပ်များကို ထိုင်းနိုင်ငံ၊ ဘန်ကောက်မြို့ရှိ ဆွီဒင်သံရုံးက တာဝန်ယူ ဆောင်ရွက်သွားမည်ဖြစ်သည်။ သံရုံး-ရုံးခွဲ ရုတ်တရက် ပိတ်သိမ်းရသည့် အကြောင်းအရင်း အတိအကျကို ဆွီဒင်အစိုးရဘက်က ထုတ်ပြန်ထားခြင်း မရှိသေးပေ။ ယခုပိတ်သိမ်းမှုသည် သံရုံး-ရုံးခွဲ (Section Office) တစ်ခုတည်းကိုသာ သက်ရောက်ခြင်းဖြစ်ပြီး၊ ရန်ကုန်မြို့တွင် ဖွင့်လှစ်ထားသည့် ဆွီဒင် စေတနာ့ဝန်ထမ်း ကောင်စစ်ဝန်ရုံး (Honorary Consulate) ကိုမူ ပိတ်သိမ်းခြင်းမရှိဘဲ ဆွီဒင်နိုင်ငံခြားရေးဝန်ဆောင်မှု ဝဘ်ဆိုက်တွင် ဆက်လက်ဖော်ပြထားသည်။ ဥရောပသမဂ္ဂဝင် နိုင်ငံအချို့သည် မြန်မာစစ်ကောင်စီနှင့် သံတမန်ဆက်ဆံရေး လျှော့ချလျက်ရှိရာ လွန်ခဲ့သော ဖေဖော်ဝါရီလကုန်ပိုင်းတွင်လည်း ဖင်လန်နိုင်ငံက ရန်ကုန်ရှိ သံရုံးကို ပိတ်သိမ်းခဲ့သည်။ #ရန်ကုန် #ဆွီဒင်သံရုံး

ရန်ကုန်ရှိ ဆွီဒင်သံရုံး-ရုံးခွဲ အပြီးသတ်ပိတ်သိမ်း

Aug 11

မြောက်ဦးရှိ ရှေးဟောင်းအမွေအနှစ် နေရာများကို AA တားမြစ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဩဂုတ်လ ၁၁ ရက်။ ရခိုင်ပြည်၊ မြောက်ဦး ရှေးဟောင်းယဉ်ကျေးမှုနယ်မြေ အတွင်းရှိ နှစ်ပေါင်း ၅၀၀ ကျော် သက်တမ်းရှိသော ရင်တားပါ တံတိုင်းနှင့် လက်ဆည်ကန်၊ အနူမကန် ဧရိယာများကို မပျက်စီးဘဲ ရေရှည်တည်တံ့စေရန်အတွက် အာရက္ခတပ်တော် (AA) က ဝင်ထွက်သွားလာခွင့် တားမြစ်လိုက်သည်။ အဆိုပါ ရင်တားပါတံတိုင်းနှင့် ရေကန်များမှာ လွန်ခဲ့သော နှစ်ပေါင်း ၅၀၀ ကျော်က ရခိုင်ဘုရင်များ လက်ထက် တွင် နိုင်ငံတော် ကာကွယ်ရေးအတွက် အဓိက အသုံးပြု တည်ဆောက်ခဲ့သည့် ရှေးဟောင်း သမိုင်းဝင် နေရာများ ဖြစ်သည်။ ယခုအခါ အဆိုပါ တံတိုင်းမှာ သက်တမ်း ကြာမြင့်လာပြီဖြစ်၍ ဟောင်းနွမ်းနေပြီဖြစ်သဖြင့် လူ၊ ကျွဲ၊ နွား၊ တိရိစ္ဆာန်များ တံတိုင်းပေါ်သို့ လုံးဝ မတက်ရောက်ရန်၊ ကန်အတွင်း လှေများဖြင့် ငါးဖမ်းခြင်း၊ ရေကူးခြင်း၊ ဟင်းရှာခြင်းနှင့် ကျွဲ၊ နွား လွှတ်ကျောင်းခြင်းများကို လုံးဝ မပြုလုပ်ကြရန် AA က ကြေညာထားသည်။ ဒေသခံ အမျိုးသမီးတစ်ဦးက “လွန်ခဲ့တဲ့ ဇူလိုင်ကတည်းက ရင်တားပါတံတိုင်းနဲ့ လက်ဆည်ကန်၊ အနူမကန် ဧရိယာတွေကို ဝင်ထွက်ခွင့် တားမြစ်မယ်လို့ ကြားတာ။ အခု စက္ကူကပ်ထားပြီ” ဟု ပြောသည်။ ထို့ပြင် ရေကန်အတွင်း ရေမချိုးရန်၊ ဝိုင်းဖွဲ့ စားသောက်ခြင်း၊ အဝတ်လျှော်ဖွတ်ခြင်းနှင့် အညစ်အကြေး စွန့်ပစ် ခြင်းများ လုံးဝ မပြုလုပ်ကြရန်လည်း တားမြစ်ထားသည်။ သံတွဲမြို့နှင့် မြောက်ဦးမြို့အကြား သွားလာ ကုန်ကူးနေသည့် အမျိုးသမီးတစ်ဦးက “ဒီလထဲလည်း ကျမ ရောက် ပါတယ်။ ဆေးတွေ၊ ဖိနပ်တွေ ဝယ်ဖို့ ရောက်ရင်း သွားကြည့်ဖြစ် တော့ နွားတွေက စည်းကမ်းမဲ့ ဝင်နေတယ်၊ လူတွေလည်း အချင်းချင်း ကိုယ့်အသိနဲ့ကိုယ် ထိန်းသိမ်းဖို့ လိုတယ်” ဟု ပြောသည်။ မည်သူမျှ ခွင့်ပြုချက် တစုံတရာ မရရှိဘဲ အဆိုပါ ဧရိယာအတွင်းသို့ ဝင်ထွက်သွားလာခြင်း မပြုရဟု ထုတ်ပြန် ထားပြီး ထိုတားမြစ်ချက်များကို ဖောက်ဖျက် ကျူးလွန်ပါက တည်ဆဲ ဥပဒေများနှင့်အညီ ထိရောက်စွာ အရေး ယူ ဆောင်ရွက်သွားမည်ဖြစ်ကြောင်း AA က အသိပေးထားသည်။ #AA #မြောက်ဦးရှေးဟောင်းအမွေအနှစ်

မြောက်ဦးရှိ ရှေးဟောင်းအမွေအနှစ် နေရာများကို AA တားမြစ်

Aug 11

ရေဘေးဒဏ်ခံနေရသော ဧရာဝတီတွင် စစ်တပ် ဗုံးကြဲ၍ ဂွမှ စစ်ရှောင် ညီအစ်ကို ၂ ဦး သေဆုံး သတင်းနှင့် မီဒီယာ ကွန်ရက် ၂၀၂၆ ခုနှစ်၊ ဩဂုတ်လ ၁၀ ရက်။ ဧရာဝတီတိုင်းအတွင်း ပြည်သူများ ရေဘေးဒဏ်ကို ဆိုးဝါးစွာ ရင်ဆိုင်နေရချိန်တွင် ရေကြည်နှင့် သာပေါင်း မြို့နယ်အစပ်၌ တိုက်ပွဲများ ဆက်လက် ပြင်းထန်နေပြီး စစ်တပ်၏ လေကြောင်းမှ ဗုံးကြဲတိုက်ခိုက်မှုကြောင့် ရခိုင်ပြည်၊ ဂွမြို့နယ်မှ လာရောက် စစ်ဘေးရှောင်နေသည့် ညီအစ်ကို ၂ ဦး သေဆုံးသွားခဲ့ကြောင်း ဒေသတွင်း စစ်ရေး သတင်းအရင်းအမြစ်များက ပြောသည်။ ဖြစ်စဉ်မှာ ရေကြည်-သာပေါင်းအစပ် တောတန်းများ၊ သာပေါင်းမြို့နယ်၊ သာပေါင်းကလေးကျေးရွာ အနီးဝန်း ကျင်နှင့် သဲဖြူကျေးရွာအနီးတို့တွင် အာရက္ခတပ်တော် (AA) နှင့် စစ်တပ်တို့အကြား ဩဂုတ်လ ၅ ရက်နေ့မှ ၉ ရက်နေ့အထိ တိုက်ပွဲများ ပြင်းထန်စွာ ဖြစ်ပွားခဲ့ခြင်းဖြစ်သည်။ အဆိုပါ တိုက်ပွဲများအတွင်း စစ်တပ်၏ လေကြောင်းမှ ဗုံးကြဲတိုက်ခိုက်မှုကြောင့် သာပေါင်းမြို့နယ်၊ သဲဖြူကျေး ရွာတွင် လာရောက် စစ်ဘေးရှောင်နေသည့် ရခိုင်ပြည်၊ ဂွမြို့နယ်မှ အသက် ၃၀ အရွယ် ကိုလှထွေးနှင့် အသက် ၄၀ အရွယ် ကိုငစိုးတို့ ညီအစ်ကို ၂ ဦး သေဆုံးခဲ့ပြီး လူနေအိမ်အချို့လည်း ပျက်စီးခဲ့ရသည်။ ရေကြည်ဒေသခံ စစ်ရေးသတင်းအရင်းအမြစ် အမျိုးသားတစ်ဦးက “၅ ရက်နေ့က စစ်တပ်ဗုံးကြဲတာမှာ သဲဖြူ ရွာမှာနေတဲ့ ရခိုင်က ဂွမြို့စစ်ရှောင် ညီအစ်ကိုနှစ်ယောက်သေပြီး အိမ်တွေလည်း ပျက်စီးတယ်။ နောက်ရက် တွေမှာလည်း ရေကြည်-သာပေါင်းအစပ် တောတန်းတွေမှာ ဗုံးကြဲတာတွေ တိုက်ပွဲဖြစ်တာတွေဆက်တိုက်ပဲ။ ရိုးမအစပ်ရွာတွေကိုလည်း ကြဲနေတာ” ဟု ပြောသည်။ သဲဖြူကျေးရွာသည် သာပေါင်းမြို့နယ်အတွင်း ပါဝင်ပြီး ရေကြည်မြို့နယ်ပိုင် ကမ္ဘားကြီးကျေးရွာနှင့် နီးကပ်စွာ တည်ရှိသည်။ ယခုရက်ပိုင်းအတွင်း အဆိုပါ နေရာများ၌ တိုက်ပွဲများ ဖြစ်ပွားရာတွင် စစ်တပ်ဘက်မှ အထိနာနေသည့်အတွက် လူနေကျေးရွာများကိုပါ လေကြောင်းမှ ဗုံးကြဲတိုက်ခိုက်နေခြင်းဖြစ်သည်။ ထို့ပြင် ဩဂုတ်လဆန်းပိုင်းက သာပေါင်းမြို့နယ်၊ သာပေါင်းကလေးကျေးရွာအနီး တိုက်ပွဲတွင် AA ဘက်က လက်နက်ခဲယမ်းများ သိမ်းဆည်းရရှိခဲ့ပြီးနောက် ယခုရက်ပိုင်းအတွင်း သာပေါင်းကလေးကျေးရွာ အနီးဝန်းကျင် ၌ တိုက်ပွဲအချို့ ဆက်လက်ဖြစ်ပွားနေကာ စစ်တပ်က ရွာအနီးဝန်းကျင်သို့ ဗုံးကြဲတိုက်ခိုက်မှုများ ပြုလုပ်လျက် ရှိသည်။ သာပေါင်းဒေသခံ အမျိုးသားတစ်ဦးက “သာပေါင်းလေး၊ သဲဖြူရွာနားတွေကို စစ်တပ်ကထပ်ကြဲတာတွေ ရှိ သလို လက်နက်ကြီးတွေလဲပစ်ကူနေတယ်၊ အေအေက ကြားဖြတ်တိုက်တော့ ရှေ့တိုးလို့မရဘူး” ဟု ပြောသည်။ စစ်တပ်သည် ရခိုင်ရိုးမ တောင်ခြေတစ်လျှောက်ရှိ အင်္ဂပူ၊ လေးမျက်နှာ၊ ရေကြည်နှင့် သာပေါင်းမြို့နယ်များမှ တစ်ဆင့် ရခိုင်ပြည် တောင်ပိုင်းသို့ စစ်ကြောင်းထိုးရန်နှင့် တန်ပြန်ထိုးစစ်ဆင်ရန် ကြိုးပမ်းလျက်ရှိသည်။ လက်ရှိတွင် ရေကြည်နှင့် သာပေါင်းမြို့နယ်အတွင်းရှိ ရှေ့တန်းစစ်မျက်နှာများသို့ အနောက်လတ်ပိုင်းတိုင်း စစ်ဌာနချုပ် (နတခ) ထံမှတစ်ဆင့် တပ်မ (၆၆) လက်အောက်ခံ ခလရ (၁)၊ ခလရ (၁၁) တပ်ရင်းများ အင်အား ဖြည့်တင်းကာ ထိုးစစ်ဆင်နေခြင်းဖြစ်သည်။ ဧရာဝတီတိုင်းရှိ လေးမျက်နှာ၊ ရေကြည်နှင့် သာပေါင်းမြို့နယ်များအတွင်း စစ်ရေးအရ အရေးပါသည့် စခန်းအချို့ ကို AA က ဆက်တိုက် သိမ်းပိုက်ထားသဖြင့် စစ်တပ်က ရိုးမတောင်ခြေတစ်လျှောက်ရှိ ကျေးရွာများကို လေကြောင်းမှ ဗုံးကြဲတိုက်ခိုက်နေခြင်း ဖြစ်သည်။ အခြားတစ်ဖက်တွင်လည်း စစ်အုပ်စု ဒုတိယခေါင်းဆောင် ဦးညိုစောသည် ဩဂုတ်လ ၅ ရက်နေ့က ပုသိမ်မြို့သို့ သွားရောက်ခဲ့သလို စစ်အုပ်စုခေါင်းဆောင် ဦးမင်းအောင်လှိုင်သည်လည်း ဩဂုတ်လ ၈ ရက်နေ့တွင် ပုသိမ်၊ ဟင်္သာတနှင့် မအူပင်မြို့များသို့ သွားရောက်ကာ ရေဘေးသင့် မြို့နယ်အချို့ကို ရဟတ်ယာဉ်ဖြင့် လိုက်လံကြည့်ရှု ခဲ့သည်။ #ရခိုင်စစ်ရှောင် #IDPs

ရေဘေးဒဏ်ခံနေရသော ဧရာဝတီတွင် စစ်တပ် ဗုံးကြဲ၍ ဂွမှ စစ်ရှောင် ညီအစ်ကို ၂ ဦး သေဆုံး

Aug 11

တနိုင်းတွင် သင်တန်းကျောင်း တိုက်ခိုက်ခံရသော ပြည်သူ့စစ်များက ဖားကန့်တွင် အရပ်သား ၄ ဦးကို သတ်ဖြတ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဩဂုတ်လ ၁၀ ရက်။ ကချင်ပြည်၊ တနိုင်းမြို့နယ်ရှိ မင်းဇေသန့် ပြည်သူ့စစ်သင်တန်းကွင်း တိုက်ခိုက်ခံရပြီးနောက် ဖားကန့်မြို့နယ်တွင် အရပ်သား ၄ ဦးကို အဆိုပါ ပြည်သူ့စစ်အဖွဲ့က ဖမ်းဆီးသတ်ဖြတ်ခဲ့သည်။ ဖြစ်စဉ်မှာ ဩဂုတ်လ ၈ ရက်နေ့ ညနေ ၅ နာရီခွဲခန့်တွင် တနိုင်းမြို့နယ်၊ ရှဒူးဇွပ်ကျေးရွာ၌ ပြုလုပ်နေသည့် စစ်အုပ်စုတပ်၊ မင်းဇေသန့်ပြည်သူ့စစ်၊ လီဆူပြည်သူ့စစ်၊ ကချင်အထူးဒေသ (၁) နှင့် ရှမ်းနီပြည်သူ့စစ် ပူးပေါင်း အဖွဲ့များ၏ ပြည်သူ့စစ် သင်တန်းဆင်းပွဲကို KIA တပ်မဟာ (၂) လက်အောက်ခံ တပ်ဖွဲ့များက ဒရုန်း ၁၀ စီး အပါ အဝင် ၁၀၇ မီလီမီတာ လက်နက်ကြီးများဖြင့် ပစ်ခတ်တိုက်ခိုက်ခဲ့ခြင်း ဖြစ်သည်။ အဆိုပါ တိုက်ခိုက်မှုကြောင့် မင်းဇေသန့် ပြည်သူ့စစ်အဖွဲ့ဝင် ၅ ဦး ပွဲချင်းပြီး သေဆုံးကာ ၁၀ ဦး ပြင်းထန်ဒဏ်ရာ ရရှိခဲ့သဖြင့် စစ်တပ်နှင့် ပြည်သူ့စစ် ပူးပေါင်းအဖွဲ့များသည် အနီးဝန်းကျင်ရှိ အရပ်သားများကို အတင်းအဓမ္မ ဖမ်းဆီးစစ်ဆေးမှုများ ပြုလုပ်ခဲ့ပြီး ဝါရာဇွပ်ရွာသား ဦးပေါင်ဆမ်နော်လော့ကိုလည်း ဖမ်းဆီးရိုက်နှက်ခဲ့သည်။ ထိုသို့ ထိခိုက်သေဆုံးမှု များပြားခဲ့သည့်အတွက် လက်တုံ့ပြန်သည့်အနေဖြင့် မင်းဇေသန့် ပြည်သူ့စစ်အဖွဲ့သည် ဩဂုတ်လ ၉ ရက်နေ့တွင် တနိုင်း-ဖားကန့်လမ်းပိုင်း (လီဒိုလမ်းမကြီး) ပေါ်ရှိ ဖားကန့်မြို့နယ်၊ နောင်းမီကျေးရွာ အတွင်းသို့ ဝင်ရောက်ကာ နေအိမ်များ၌ ရှိနေသည့် အရပ်သား ၄ ဦးကို သတ်ဖြတ်ခဲ့ခြင်း ဖြစ်သည်။ နောင်းမီကျေးရွာမှ ကိုလမိုင်ဂွမ်းမိုင်၊ ကိုဒေါင်လွမ်း၊ ကိုထွယ်ဆန်အောင်နှင့် ကိုဆွတ်အောင်တို့ကို မင်းဇေသန့် ပြည်သူ့စစ်အဖွဲ့က ဖမ်းဆီး၍ ပစ်ခတ်သတ်ဖြတ်ခဲ့ခြင်း ဖြစ်သည်။ KIA နှင့် နီးစပ်သူတစ်ဦးက “သင်တန်းကွင်း တိုက်ခံရပြီး အထိနာသွားတော့ မင်းဇေသန့်တပ်ဖွဲ့တွေက ရွာထဲဝင် လာပြီးနောက် မသင်္ကာလို့ဆိုပြီး ရမ်းသမ်းဖမ်းတာ။ အပြစ်မရှိတဲ့ လူငယ် ၄ ဦးကို အိမ်ထဲအထိ ဝင်ဆွဲပြီး ပစ်သတ်သွားတာပါ။ အခုဆို လီဒိုလမ်းမကြီးတစ်လျှောက်လည်း ကချင်လူငယ်တွေရှိတဲ့ အိမ်တွေကို ပစ်မှတ် ထားပြီး အတင်းဝင် စစ်နေတော့ ရွာသားတွေ စိုးရိမ်ထိတ်လန့်နေရတယ်” ဟု ပြောသည်။ ထို့ပြင် မင်းဇေသန့် ပြည်သူ့စစ်အဖွဲ့ဝင်များသည် လီဒိုလမ်းမတစ်လျှောက်ရှိ ပြည်သူများ၏ နေအိမ်များသို့ ဝင်ရောက် စစ်ဆေးခြင်းများ ဆက်တိုက် ပြုလုပ်နေပြီး အထူးသဖြင့် ကချင်လူငယ်များရှိသည့် နေအိမ်များကို အဓိကထား ဝင်ရောက်မေးမြန်းလျက်ရှိကြောင်း KIA စစ်ရေးသတင်းရင်းမြစ်က ဆိုသည်။ အလားတူ လပူခ ပယင်းမှော်ဘက်သို့ စစ်ကြောင်းထိုးလာသည့် စစ်တပ်ကိုလည်း KIA တပ်ရင်း (၁၄) က ကြိုတင်စောင့်ကြို တိုက်ခိုက်ခဲ့သဖြင့် စစ်တပ်ဘက်မှ ထိခိုက်သေဆုံးမှု များပြားစွာဖြင့် ပြန်လည်ဆုတ်ခွာ သွားခဲ့ရသည်။ အဆိုပါ နယ်မြေအတွင်းရှိ ဒေသခံ အမျိုးသားတစ်ဦးက “စစ်တပ်ဘက်က ပယင်းမှော်ဘက်ကို စစ်ကြောင်း ထိုး လာလို့ KIA ဘက်က ကြိုတင်စောင့်ပြီး တိုက်လိုက်တာ။ စစ်တပ်ဘက်က အထိအမိများပြီး ပြန်ဆုတ်သွားရ တယ်။ ဒီနယ်မြေမှာ စစ်တပ်ရော မင်းဇေသန့်အဖွဲ့ပါ ပူးပေါင်းပြီး ပြည်သူတွေရဲ့ လယ်ယာမြေတွေကို သိမ်း၊ ရွှေတူး၊ အိမ်တွေကို မီးရှို့နဲ့ ဒုစရိုက်မျိုးစုံ လုပ်နေတာ ကြာပြီ” ဟု ပြောသည်။ မင်းဇေသန့် ပြည်သူ့စစ်အဖွဲ့သည် စစ်အုပ်စုတပ်၏ လက်အောက်ခံအဖြစ် လီဒိုလမ်းမကြီးတစ်လျှောက်တွင် ပြည်သူများ၏ လယ်ယာမြေများကို သိမ်းပိုက်၍ ရွှေတူးဖော်ခြင်း၊ နေအိမ်များ မီးရှို့ဖျက်ဆီးခြင်းနှင့် အရပ်သား ပြည်သူများကို ဖမ်းဆီးသတ်ဖြတ်ခြင်းများကို ကျူးလွန်လျက်ရှိသည်။ #တနိုင်းမြို့ #လီဒိုလမ်းမကြီး #မင်းဇေသန့်ပြည်သူ့စစ်

တနိုင်းတွင် သင်တန်းကျောင်း တိုက်ခိုက်ခံရသော ပြည်သူ့စစ်များက ဖားကန့်တွင် အရပ်သား ၄ ဦးကို သတ်ဖြတ်

Aug 11

ချင်းမိုင်တွင် တောင်ကိုရီးယားအမျိုးသမီးနှင့် မြန်မာအမျိုးသားတို့ လိုက်ပါလာသည့် ကား မီးလောင် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဩဂုတ်လ ၁၁ ရက်။ ထိုင်းနိုင်ငံ၊ ချင်းမိုင်ခရိုင်၊ ဒွိုင်စခက် (Doi Saket) မြို့နယ်တွင် တနင်္လာနေ့ညနေပိုင်းက တောင်ကိုရီးယားအမျိုးသမီးတစ်ဦးနှင့် မြန်မာအမျိုးသားတစ်ဦး လိုက်ပါလာသည့် မော်တော်ယာဉ် မီးလောင်ကျွမ်းမှုဖြစ်ပွားခဲ့သည်။ ၎င်းတို့နှစ်ဦးလုံး အချိန်မီ ထွက်ပြေးနိုင်ခဲ့သဖြင့် အသက်အန္တရာယ်မှ ကင်းလွတ်ခဲ့သည်ဟု Khaosod သတင်းတွင် ဖော်ပြထားသည်။ ရဲမှတ်တမ်းအရ တနင်္လာနေ့ ညနေ ၆ နာရီ ၅၂ မိနစ်အချိန်တွင် ဒွိုင်စခက် စူပါမားကက် တစ်ခု ရှေ့တွင် မော်တော်ယာဉ်တစ်စီး မီးလောင်နေကြောင်း သတင်းပေးပို့ခဲ့ခြင်း ဖြစ်သည်။ မီးသတ်တပ်ဖွဲ့ဝင်များ လာရောက်မီးငြှိမ်းသတ်ခဲ့သော်လည်း မော်တော်ယာဉ်မှာ လုံးဝ ပြာကျပျက်စီးသွားခဲ့သည်။ ယာဉ်ပေါ်ပါလာသူ နှစ်ဦး၏ ပြောကြားချက်အရ ၎င်းတို့သည် ဆန်ခမ်းဖဲင်း (San Kamphaeng) မြို့နယ်ဘက်မှ မောင်းနှင်လာစဉ် အင်ဂျင်ခန်းအတွင်းမှ အနက်ရောင်ခိုးငွေ့များ အများအပြား ထွက်ပေါ်လာသည်ကို သတိပြုမိခဲ့ကြခြင်းဖြစ်သည်။ ယာဉ်မောင်းနှင်သူ မြန်မာအမျိုးသားသည် ကားကို ချက်ချင်းရပ်တန့်ခဲ့ပြီး နှစ်ဦးလုံး ကားပေါ်မှ အမြန်ထွက်ပြေးခဲ့ကြရာ ခဏအကြာတွင် ကားတစ်စီးလုံး မီးဟုန်းဟုန်းတောက် လောင်ကျွမ်းသွားခဲ့ခြင်း ဖြစ်သည်။ #ChiangMai #DoiSaket

ချင်းမိုင်တွင် တောင်ကိုရီးယားအမျိုးသမီးနှင့် မြန်မာအမျိုးသားတို့ လိုက်ပါလာသည့် ကား မီးလောင်

« Prev 1 … 3 4 5 6 7 … 1,110 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

အိမ်ဟောင်းနံရံတွင် ဝှက်သိမ်းထားသည့် ယူရို ၉ သန်းတန်ဖိုး ရွှေများ တွေ့ရှိ — August 15, 2026 10:32 pm
လင်ကွန်းကို ဂျော့ဝါရှင်တန်ဖြင့် အစားထိုးမည် — August 14, 2026 4:38 pm
ဘရူးနိုင်းဘုရင်ကချွေးမဖြစ်သူ၏ တော်ဝင်ဘွဲ့တံဆိပ်များရုပ်သိမ်း — August 14, 2026 1:32 pm

Recent Posts

အိမ်ဟောင်းနံရံတွင် ဝှက်သိမ်းထားသည့် ယူရို ၉ သန်းတန်ဖိုး ရွှေများ တွေ့ရှိ
ထောင်တွင်း ကင်ဆာဖြစ်နေသည့် နိုင်ငံရေး အကျဉ်းသူ ၈ ဦး အသက်အန္တရာယ်ရှိနေ
မြစ်ဆုံစီမံကိန်း ပြန်စရန် စစ်အုပ်စုက လူထုစည်းရုံးမှုများ အရှိန်မြှင့်လုပ်ဆောင်နေဟု KHRW ပြော
ရခိုင်တောင်ပိုင်း စစ်အုပ်စု လေကြောင်းမှ ဗုံးကြဲမှုကြောင့် မိသားစုဝင်များအပါအဝင် ၈ ဦး သေဆုံး
လင်ကွန်းကို ဂျော့ဝါရှင်တန်ဖြင့် အစားထိုးမည်

Archives

Archives

×Close