NMG Doh – Page 7 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
နိုင်ငံတကာသတင်း
NMG အကြောင်း
Contact

Home
Author Archive

NMG Doh

Author: NMG Doh

Sep 24

AI နည်းပညာ၏ ဘေးအန္တရာယ်များကို ကုလသမဂ္ဂတွင် ထိပ်သီး ကုမ္ပဏီများ သတိပေး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၄ ရက်။ အတုပြုဖန်တီးထားသော ဉာဏ်ရည်တု (AI) နည်းပညာ မြန်ဆန်စွာ တိုးတက်လာမှုသည် လူသားမျိုးနွယ်တစ်ခုလုံးအတွက် အန္တရာယ် ဖြစ်လာနိုင်ကြောင်း ထိပ်သီး AI ကုမ္ပဏီ ခေါင်းဆောင်များက ကုလသမဂ္ဂ အစည်းအဝေးတွင် သတိပေးပြောကြားလိုက်သည်။ နယူးယောက်မြို့ ကုလသမဂ္ဂ အထွေထွေညီလာခံ ကာလအတွင်း ကျင်းပသည့် လုံခြုံရေးကောင်စီ အစည်းအဝေးတွင် Anthropic ကုမ္ပဏီ၏ အမှုဆောင်အရာရှိချုပ်က AI နည်းပညာကို စနစ်တကျ မထိန်းချုပ်နိုင်ပါက လူသားမျိုးနွယ်အတွက် ကြီးမားသည့် အန္တရာယ်ဖြစ်လာနိုင်ပြီး၊ မည်သည့်နိုင်ငံ သို့မဟုတ် ကုမ္ပဏီတစ်ခုတည်းကမျှ တစ်ဦးတည်း မဖြေရှင်းနိုင်ကြောင်း ထောက်ပြခဲ့သည်။ ထို့တူ OpenAI ကုမ္ပဏီ၏ အမှုဆောင်အရာရှိချုပ် ဆမ် အော့လ်မန်း ကလည်း AI ဆိုင်ရာ အရေးကြီး ဆုံးဖြတ်ချက်များကို ဆန်ဖရန်စစ္စကိုရှိ ဓာတ်ခွဲခန်းများ၌တင် မဆုံးဖြတ်သင့်ဘဲ ခိုင်မာသည့် နိုင်ငံတကာ ပူးပေါင်းဆောင်ရွက်မှု လိုအပ်ကြောင်း ပြောကြားခဲ့သည်။ ထို့ပြင် Hugging Face ပူးတွဲတည်ထောင်သူ ကလီးမန့် ဒီလန်းဂ် (Clément Delangue) က ၎င်းတို့၏ ကွန်ရက်စနစ်ကို OpenAI ၏ AI အေးဂျင့်များက ကျူးကျော်တိုက်ခိုက်ခဲ့သော်လည်း တရုတ် AI မော်ဒယ်ကို အသုံးပြု၍ ပြန်လည်ကာကွယ်နိုင်ခဲ့ကြောင်း ထုတ်ဖော်ပြောကြားခဲ့သည်။ အမေရိကန် အစိုးရကမူ AI နည်းပညာအပေါ် ကမ္ဘာလုံးဆိုင်ရာ ထိန်းချုပ်မှုစနစ်များ ဖန်တီးရေးကို လက်မခံဘဲ အိမ်ဖြူတော် နည်းပညာအကြံပေးက "နားမလည်သည့် နည်းပညာကို စည်းမျဉ်းဖြင့် ထိန်းချုပ်၍ မရနိုင်ကြောင်း" တုံ့ပြန်ခဲ့သည်။ တရုတ်နိုင်ငံကမူ AI လုံခြုံရေးနှင့် ဖွံ့ဖြိုးတိုးတက်ရေးကို ညီမျှစွာ ဆောင်ရွက်ကာ နိုင်ငံတကာ စည်းမျဉ်းများ ရေးဆွဲရန် တိုက်တွန်းခဲ့သည်။ ကုလသမဂ္ဂ အထွေထွေ အတွင်းရေးမှူးချုပ် အန်တိုနီယို ဂူတာရက်စ် ကလည်း ကမ္ဘာလုံးဆိုင်ရာ AI ထိန်းချုပ်မှုစနစ် လိုအပ်ကြောင်း ဆက်လက် တိုက်တွန်းထားသည်။

AI နည်းပညာ၏ ဘေးအန္တရာယ်များကို ကုလသမဂ္ဂတွင် ထိပ်သီး ကုမ္ပဏီများ သတိပေး

Sep 24

မြောက်ကိုရီးယား စစ်သုံ့ပန်း ၂ ဦးအား ယူကရိန်းက တောင်ကိုရီးယားသို့ လွှဲပြောင်းပေး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၄ ရက်။ ရုရှား-ယူကရိန်း စစ်ပွဲအတွင်း အရှင်ဖမ်းဆီးရမိခဲ့သည့် မြောက်ကိုရီးယား စစ်သုံ့ပန်း နှစ်ဦးကို တောင်ကိုရီးယားနိုင်ငံသို့ လွှဲပြောင်းပေးလိုက်ပြီဖြစ်ကြောင်း ယူကရိန်း သမ္မတ ဗိုလိုဒီမီယာ ဇယ်လန်းစကီး က ထုတ်ဖော်ပြောကြားလိုက်သည်။ နယူးယောက်မြို့၌ ကျင်းပလျက်ရှိသည့် ကုလသမဂ္ဂ အထွေထွေညီလာခံ မိန့်ခွန်းတွင် သမ္မတ ဇယ်လန်းစကီး က ယူကရိန်းစစ်တပ်က ဖမ်းဆီးထားသည့် မြောက်ကိုရီးယား စစ်သုံ့ပန်း နှစ်ဦးကို တောင်ကိုရီးယားနိုင်ငံသို့ လွှဲပြောင်းပေးပို့ခဲ့ပြီးဖြစ်ကြောင်း တရားဝင် အတည်ပြုခဲ့ခြင်း ဖြစ်သည်။ ၎င်း စစ်သားနှစ်ဦးသည် လွန်ခဲ့သည့်နှစ် ဇန်နဝါရီလအတွင်း ရုရှားနိုင်ငံ ကာ့စ်ခ် (Kursk) ဒေသ တိုက်ပွဲများ၌ ဖမ်းဆီးခံခဲ့ရသူများ ဖြစ်သည်။ ဖမ်းဆီးခံရစဉ်အတွင်း စစ်သားတစ်ဦးမှာ မိမိကိုယ်ကို အဆုံးစီရင်ရန်အထိ ကြိုးပမ်းခဲ့သည်ဟု ဆိုသည်။ မူလက အဆိုပါ စစ်သုံ့ပန်းများကို ရုရှားထံ ရောက်ရှိနေသည့် ယူကရိန်း စစ်သုံ့ပန်းများနှင့် လဲလှယ်ရန် စဉ်းစားခဲ့သော်လည်း၊ လူ့အခွင့်အရေး အဖွဲ့အစည်းများ၏ သတိပေးမှုများနှင့် အဆိုပါ စစ်သားများ၏ တောင်ကိုရီးယားတွင် ခိုလှုံလိုသည့် ဆန္ဒအရ တောင်ကိုရီးယားနိုင်ငံသို့ လွှဲပြောင်းပေးခဲ့ခြင်း ဖြစ်သည်။ တောင်ကိုရီးယား အစိုးရကလည်း ရုရှားဘက်မှ ဝင်ရောက်တိုက်ခိုက်ပေးခဲ့သည့် မြောက်ကိုရီးယား စစ်သုံ့ပန်းများကို လက်ခံသွားမည်ဖြစ်ပြီး မြောက်ကိုရီးယားသို့ ပြန်လည်လွှဲပြောင်းပေးမည် မဟုတ်ကြောင်း လွန်ခဲ့သည့် ဇွန်လအတွင်းက ထုတ်ပြန်ထားခဲ့သည်။ ယူကရိန်းနှင့် တောင်ကိုရီးယား သတင်းရင်းမြစ်များ၏ ခန့်မှန်းချက်အရ မြောက်ကိုရီးယားသည် ၂၀၂၄ ခုနှစ်မှစ၍ ရုရှားအား ကူညီရန် စစ်သည်အင်အား ၁၄,၀၀၀ မှ ၁၅,၀၀၀ ဝန်းကျင်နှင့် လက်နက်ခဲယမ်း အမြောက်အမြား ပံ့ပိုးပေးထားသည်။

မြောက်ကိုရီးယား စစ်သုံ့ပန်း ၂ ဦးအား ယူကရိန်းက တောင်ကိုရီးယားသို့ လွှဲပြောင်းပေး

Sep 24

ရှီကျင့်ပင်ကို ဒေါ်နယ်ထရန့်က လေဆိပ်ထိသွားရောက်ကြိုဆို၊ ကုန်သွယ်စစ်ရပ်စဲမှု သက်တမ်းတိုး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၄ ရက်။ အမေရိကန်နိုင်ငံသို့ ရောက်ရှိလာသည့် တရုတ်သမ္မတ ရှီကျင်းပင်ကို သမ္မတ ဒေါ်နယ်ထရန့်က လေယာဉ်ပြေးလမ်းအထိ ကိုယ်တိုင်သွားရောက် ကြိုဆိုခဲ့ပြီး နှစ်နိုင်ငံ ကုန်သွယ်ရေးစစ်ပွဲ ရပ်စဲထားမှုကို လာမည့် ဇန်နဝါရီလအထိ သက်တမ်းတိုးမြှင့်လိုက်သည်။ တရုတ်သမ္မတ ရှီကျင်းပင်သည် သုံးရက်ကြာ တရားဝင် ချစ်ကြည်ရေး ခရီးစဉ်အဖြစ် ဝါရှင်တန်ဒီစီမြို့အနီးရှိ အင်ဒရူးစ် လေတပ်စခန်းသို့ ရောက်ရှိလာခြင်း ဖြစ်သည်။ အဆိုပါ ကြိုဆိုပွဲ အခမ်းအနားတွင် အမေရိကန် သမ္မတ ဒေါ်နယ်ထရန့်နှင့် ဇနီး မီလာနီယာ ထရန့်တို့က တရုတ်သမ္မတ ရှီကျင်းပင်နှင့် ဇနီး ပုန့်လီးယွမ် တို့ကို ကော်ဇောနီ ခင်းကျင်း၍ ခမ်းခမ်းနားနား ကြိုဆိုခဲ့ကြသည်။ ထို့ပြင် ဂုဏ်ပြုတပ်ဖွဲ့များ၊ အမြောက် ၂၁ ချက် ပစ်ဖောက် ဂုဏ်ပြုမှုများနှင့် B-1 ဗုံးကြဲလေယာဉ်များဖြင့် ဝေဟင်မှ ပျံသန်း ဂုဏ်ပြုခဲ့ကြသည်။ အမေရိကန် ဘဏ္ဍာရေးဝန်ကြီး စကော့ ဘက်ဆန့် (Scott Bessent) က နိုဝင်ဘာလတွင် သက်တမ်းကုန်ဆုံးမည်ဖြစ်သော နှစ်နိုင်ငံ ကုန်သွယ်ရေးစစ်ပွဲ ရပ်စဲထားမှုကို လာမည့် ဇန်နဝါရီလ ၁၀ ရက်နေ့အထိ သက်တမ်းတိုးမြှင့်လိုက်ကြောင်း ထုတ်ဖော်ပြောကြားခဲ့သည်။ အဆိုပါ သဘောတူညီချက်အရ နှစ်နိုင်ငံစလုံးက အပြန်အလှန် အခွန်တိုးမြှင့်ကောက်ခံမှုများကို လျှော့ချထားပြီး ကုန်သွယ်ရေး ကန့်သတ်ချက်အသစ်များ မပြုလုပ်ရန် သဘောတူထားကြသည်။ ခရီးစဉ်အတွင်း နှစ်နိုင်ငံ ခေါင်းဆောင်များသည် အိမ်ဖြူတော်၌ တွေ့ဆုံဆွေးနွေးပွဲများနှင့် ဂုဏ်ပြုညစာစားပွဲများ ကျင်းပမည်ဖြစ်ကာ အန်ဗီးဒီးယား (Nvidia) ဥက္ကဋ္ဌ ဂျင်ဆန်ဟောင်းနှင့် စပေ့စ်အိက်စ် (SpaceX) ပိုင်ရှင် အီလွန်မတ်စ်ခ် အပါအဝင် နည်းပညာ ထိပ်သီး စီးပွားရေးလုပ်ငန်းရှင်များလည်း တက်ရောက်ကြမည် ဖြစ်သည်။ အမေရိကန် အထက်လွှတ်တော်အမတ်အချို့က တရုတ်ခေါင်းဆောင်အပေါ် အထူးတလည် ကြိုဆိုမှုအပေါ် ဝေဖန်မှုများ ရှိနေသော်လည်း အမေရိကန် နိုင်ငံခြားရေးဝန်ကြီး မာကို ရူးဘီယို ကမူ ကမ္ဘာ့စီးပွားရေးနှင့် စစ်ရေး အင်အားအကြီးဆုံး နှစ်နိုင်ငံကြား ထိပ်သီးအဆင့် ထိတွေ့ဆက်ဆံမှုသည် မရှိမဖြစ် လိုအပ်ကြောင်း ပြန်လည်တုံ့ပြန်ခဲ့သည်။ #Trump #XiJinping

ရှီကျင့်ပင်ကို ဒေါ်နယ်ထရန့်က လေဆိပ်ထိသွားရောက်ကြိုဆို၊ ကုန်သွယ်စစ်ရပ်စဲမှု သက်တမ်းတိုး

Sep 24

Super-sized El Niño

အင်အားပြင်း အယ်လ်နီညိုကြောင့် လူပေါင်း ၄၅၀,၀၀၀ သေဆုံးနိုင်ကြောင်း သတိပေး

Sep 23

ရခိုင်တွင် စစ်တပ်၏ လေကြောင်းတိုက်ခိုက်မှုများကြောင့် အမျိုးသမီး သေဆုံးသူ မြင့်တက်လာ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၃ ရက်။ ရခိုင်ပြည်အတွင်း မြေပြင်တိုက်ပွဲများတွင် အာရက္ခတပ်တော် (AA) နှင့် စစ်အုပ်စုတပ်တို့ တိုက်ပွဲများ ပြင်းထန် လျက်ရှိပြီး စစ်အုပ်စုတပ်ဘက်မှ လေကြောင်းနှင့် လက်နက်ကြီးများဖြင့် ဆက်တိုက် ပစ်ခတ်တိုက်ခိုက်နေခြင်း တို့ကြောင့် ဒေသခံ အမျိုးသမီးများ ထိခိုက်သေဆုံးမှု သိသိသာသာ မြင့်တက်လာနေကြောင်း ဒေသခံများနှင့် ပရဟိတဆောင်ရွက်နေသူများက ပြောသည်။ လက်ရှိတွင် ရခိုင်ပြည် မြောက်ပိုင်းနှင့် တောင်ပိုင်းရှိ မြို့နယ်များအပြင် နယ်စပ်ဒေသ ၄ နေရာထက်မက၌ တိုက်ပွဲများ ပြင်းထန်နေပြီး စစ်အုပ်စုတပ်ဘက်မှ စစ်ရေးအရ အရေးနိမ့်လာချိန်တွင် အရပ်သားများ လှုပ်ရှား သွားလာသည့် နေရာများနှင့် ကျေးရွာများကို လေကြောင်းမှ ပစ်မှတ်ထား ဗုံးကြဲနေသည်ဟု ဆိုသည်။ ပရဟိတဆောင်ရွက်နေသူ အမျိုးသားတစ်ဦးက “ဩဂုတ်လနဲ့ စက်တင်ဘာလမှာ ရခိုင်ကို ဗုံးကြဲတာ ပိုများလာ တယ်။ ရခိုင်တောင်ပိုင်း ဂွ၊ သံတွဲ၊ တောင်ကုတ်အပြင် မြောက်ပိုင်းက မြို့တွေမှာလည်း အမျိုးသမီး သေဆုံးတာ တွေ များတယ်။ သံတွဲ ကျောက်ကြီးက ဘုန်းကြီးကျောင်းနားကို စစ်တပ် ဗုံးကြဲတာမှာ သေဆုံးတာ အမျိုးသမီး တွေ ပိုများတယ်။ အခု ပုဏ္ဏားကျွန်း၊ ရသေ့တောင်၊ စစ်တွေ နယ်စပ် အပါအဝင် ရခိုင်တစ်ပြည်လုံးကို ကြဲနေ တာပါ” ဟု လက်ရှိ မြေပြင်အခြေအနေကို ပြောသည်။ ပြီးခဲ့သည့် ဩဂုတ်လ ၁၀ ရက်နေ့ကလည်း သံတွဲမြို့နယ်၊ ကျောက်ကြီးကျေးရွာ ဘုန်းကြီးကျောင်း အနီးပတ်ဝန်း ကျင်သို့ စစ်အုပ်စုတပ်က လေကြောင်းမှ ဗုံးကြဲတိုက်ခိုက်ခဲ့သဖြင့် အမျိုးသမီး ၁၁ ဦး အပါအဝင် ဒေသခံ ၁၆ ဦး ဗုံးစထိမှန် သေဆုံးခဲ့ပြီး ပြည်သူအများအပြား ဒဏ်ရာရရှိခဲ့သည်။ နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) ၏ စက်တင်ဘာလ ၂၂ ရက်နေ့ ထုတ်ပြန်ချက် အရ ပြီးခဲ့သည့် ဇူလိုင်လ ၁ ရက်မှ စက်တင်ဘာလ ၂၂ ရက်အထိ သုံးလနီးပါး ကာလအတွင်း နိုင်ငံတစ်ဝန်း စစ်အုပ်စုတပ်ကြောင့် အမျိုးသမီး စုစုပေါင်း ၈၉ ဦး သေဆုံးခဲ့ရာတွင် ရခိုင်ပြည်မှ အယောက် ၃၀ ပါဝင်သဖြင့် အမျိုးသမီး သေဆုံးမှု အများဆုံး ဒေသဖြစ်ခဲ့ကြောင်း ဖော်ပြထားသည်။ AAPP ၏ စာရင်းများအရ အဆိုပါ သုံးလတာအတွင်း သေဆုံးခဲ့ရသည့် အမျိုးသမီး ၈၉ ဦးအနက် ၇၆ ဦးမှာ လေကြောင်းမှ တိုက်ခိုက်ခံရမှုကြောင့် သေဆုံးခဲ့ရခြင်းဖြစ်ပြီး အသက် ၁၈ နှစ်အောက် မိန်းကလေး ၁၂ ဦး ပါဝင်သည် ဟု ဆိုသည်။ AAPP က “သေဆုံးရသည့် အကြောင်းအရင်းအနေဖြင့် (၇၆) ဦးမှာ လေကြောင်းဖြင့် တိုက်ခိုက်မှု ကြောင့် အများဆုံး သေဆုံးခဲ့ပြီး သေဆုံးသူများအနက် ရခိုင်ပြည်နယ်၌ (၃၀) ဦးဖြင့် အများဆုံး သေဆုံးခဲ့သည်” ဟု သတင်းထုတ်ပြန်ချက်တွင် ထည့်သွင်းဖော်ပြထားသည်။ ၂၀၂၁ ခုနှစ် ဖေဖော်ဝါရီလ ၁ ရက် စစ်အာဏာသိမ်းချိန်မှ ၂၀၂၆ ခုနှစ် စက်တင်ဘာလ ၂၂ ရက်နေ့အထိ စစ်အုပ်စု တပ်နှင့် ၎င်း၏ လက်ပါးစေများကြောင့် နွေဦးတော်လှန်ရေးကာလအတွင်း သေဆုံးခဲ့ရသည့် ပြည်သူ စုစုပေါင်း ၈,၄၁၈ ဦး ရှိပြီဖြစ်ကြောင်းလည်း AAPP ၏ စာရင်းများတွင် ဖော်ပြထားသည်။ ဓါတ်ပုံ - (စစ်တပ်၏ လေကြောင်းတိုက်ခိုက်မှုကြောင့် သေဆုံးခဲ့ရသည့် ပလက်ဝ၊ စိမ်းညှင်းဝကျေးရွာမှ မူလတန်းကျောင်းသားနှင့် ဒေသခံများ။ / AA) #ရခိုင်ပြည်နယ် #AA #စစ်အုပ်စု

ရခိုင်တွင် စစ်တပ်၏ လေကြောင်းတိုက်ခိုက်မှုများကြောင့် အမျိုးသမီး သေဆုံးသူ မြင့်တက်လာ

Sep 23

စစ်ကိုင်း၊ ရှမ်းနှင့် ကချင်တွင် စစ်အုပ်စုက လေကြောင်းမှ ဆက်တိုက် ဗုံးကြဲ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၃ ရက်။ စစ်ကိုင်းတိုင်း အင်းတော်မြို့နှင့် ရှမ်းပြည် မဘိမ်းမြို့တို့ကို စစ်အုပ်စုတပ်က လေကြောင်းမှ ဆက်တိုက် ဗုံးကြဲ တိုက်ခိုက်ခဲ့သလို KIO ထိန်းချုပ်နယ်မြေများ၌လည်း လေကြောင်းအန္တရာယ် သတိပေးချက်များ ထုတ်ပြန်ထား သည်။ စက်တင်ဘာလ ၂၃ ရက် ယနေ့နံနက် ၁၁ နာရီခွဲခန့်တွင် တိုက်ပွဲဖြစ်ပွားခြင်းမရှိဘဲ အင်းတော်မြို့နယ်ထဲက နေရာ အချို့နှင့် ကျေးရွာများကို စစ်အုပ်စုတပ်က လေကြောင်းမှ ဗုံးကြဲခဲ့သဖြင့် မီးလောင်ကျွမ်းမှုများ ဖြစ်ပွားခဲ့သည်။ ထို့ပြင် ရှမ်းပြည် မြောက်ပိုင်း မဘိမ်းမြို့နယ်အတွင်းသို့လည်း စက်တင်ဘာလ ၂၂ ရက်နေ့က ဗုံးအလုံးရေ ၄၀ ခန့် ကြဲချခဲ့သည့်အပြင် ယနေ့နံနက်ပိုင်းတွင်လည်း ထပ်မံတိုက်ခိုက်ခဲ့ကြောင်း မြေပြင်ရှိ တော်လှန်ရေးတပ်ဖွဲ့ဝင် တစ်ဦးက ပြောသည်။ “မနေ့ကလည်း အလုံး ၄၀ ကျော်လောက် လာကြဲသွားတာ။ ဒီနေ့မနက်မှာလည်း လေယာဉ်သံတွေကြားရပြီး ထပ်ကြဲသွားတယ်။ အိမ်ထဲက ဗုံးခိုကျင်းထဲမှာပဲ ပုန်းနေရတော့ အပြင်မှာ ထိခိုက်ပျက်စီးမှု အခြေအနေ ဘယ် လောက်ရှိလဲဆိုတာ သေချာ မသိရသေးဘူး” ဟု လက်ရှိအခြေအနေကို ပြောသည်။ စစ်အုပ်စုတပ်သည် စစ်ရေးအရ အထိနာရှုံးနိမ့်ချိန်တိုင်း အရပ်သားပစ်မှတ်များကို လေကြောင်းမှ ဦးတည် တိုက် ခိုက်လေ့ရှိသဖြင့် ဖားကန့်၊ မိုင်ဂျာယန်၊ လိုင်ဇာနှင့် လွယ်ဂျယ် စသည့် KIO ထိန်းချုပ်နယ်မြေများတွင် ပြည်သူ များ ဗုံးခိုကျင်းများ ပြုလုပ်ထားကြရန်နှင့် ညအချိန် မီးမထွန်းကြရန် ဒေသတွင်း အုပ်ချုပ်ရေးအဖွဲ့များက ညွှန်ကြားထားသည်။ ဖားကန့်ဒေသရှိ KIO အုပ်ချုပ်ရေးနှင့် နီးစပ်သူတစ်ဦးက “ဆိုင်းတောင်နဲ့ ယူမာဘက်တကြောမှာ ပြည်သူတွေကို ညအချိန် မီးမထွန်းကြဖို့နဲ့ ဗုံးခိုကျင်းတွေထဲမှာပဲ အိပ်ကြဖို့ သတိပေးထားတယ်။ အထူးသဖြင့် မိုးကုန် ပွင့်လင်း ရာသီကူးတော့မှာဆိုတော့ တိုက်ပွဲတွေ ပိုပြင်းထန်လာပြီး လေကြောင်းနဲ့ လက်နက်ကြီး အန္တရာယ် ပိုဆိုးလာမှာ ကို ပြည်သူတွေရော အားလုံးက စိုးရိမ်နေကြတာပါ။ မနေ့ညကလည်း သေနတ်သံတွေ လက်နက်ကြီးသံတွေ ကြားလိုက်ရသေးတယ်” ဟု ပြောသည်။ ဗန်းမော်နှင့် နန့်ဖားကျေးရွာဘက်တွင် စစ်အုပ်စုတပ်က စစ်ကြောင်းထိုးလာသဖြင့် စက်တင်ဘာလ ၁၉ ရက်နှင့် ၂၀ ရက်နေ့တို့တွင် KIO/KIA တပ်များနှင့် တိုက်ပွဲများ ပြင်းထန်ခဲ့ပြီး မိုင်ဂျာယန်မြို့ပေါ်သို့လည်း စစ်တပ်၏ လေယာဉ်များ ဝဲပျံခဲ့သည်ဟု ဒေသခံများက ပြောသည်။ ထို့ကြောင့် လက်ရှိတွင် ကချင်လွတ်လပ်ရေးအဖွဲ့ KIO က မိုင်ဂျာယန်မြို့ရှိ ကျောင်းများကို လုံခြုံရေးအရ ပိတ်ထားလိုက်ပြီဟု လွယ်ဂျယ်ဒေသခံတစ်ဦးက ပြောသည်။ စစ်ကိုင်းတိုင်း အင်းတော်မြို့နယ်တွင်လည်း ကချင်လွတ်လပ်ရေးတပ်မတော် (KIA)၊ ကျောင်းသားတပ်မတော် (ABSDF) နှင့် PDF ပူးပေါင်းတပ်များ၏ ပြန်လည်ထိုးစစ်ကြောင့် စစ်အုပ်စုတပ်များ ဆုတ်ခွာခဲ့ရသည်။ ထို့ပြင် ဧရာဝတီ မြစ်ကြောင်းအတိုင်း တက်လာသည့် စစ်အုပ်စု စစ်သင်္ဘောများကို တော်လှန်ရေးတပ်များက တိုက်ခိုက်ခဲ့သည့် မိုးမောက်၊ ရွှေကူနှင့် ဗန်းမော်ဒေသတို့တွင်လည်း စစ်အုပ်စုတပ်က ရွာများကို ပစ်မှတ်ထား၍ လေကြောင်းမှ အကြိမ်များစွာ ဗုံးကြဲတိုက်ခိုက်လျက်ရှိကြောင်း မြေပြင်သတင်းရင်းမြစ်အချို့က ပြောသည်။ #အင်းတော်မြို့ #မဘိမ်းမြို့

စစ်ကိုင်း၊ ရှမ်းနှင့် ကချင်တွင် စစ်အုပ်စုက လေကြောင်းမှ ဆက်တိုက် ဗုံးကြဲ

Sep 23

မောင်တော ဟိန္ဒူဘုရားကျောင်းအနီး စစ်တပ် ထောင်ထားသည့် မိုင်းများကို AA ရှင်းလင်း သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၃ ရက်။ ရခိုင်ပြည်၊ မောင်တောမြို့နယ်ရှိ ဟိန္ဒူဘုရားကျောင်းဝန်းအတွင်း စစ်အုပ်စုတပ် ထောင်ထားခဲ့သည့် မြေမြှုပ်မိုင်း များကို အာရက္ခတပ်တော် (AA) က ရှာဖွေရှင်းလင်းခဲ့ကြောင်း ဒေသခံများက ပြောသည်။ မောင်တောမြို့နယ်တောင်ပိုင်း၊ ကျောက်ပန္ဒူကမ်းခြေအနီးရှိ ဟိန္ဒူဘာသာဝင်များ ကိုးကွယ်သည့် “မဟာရာမယ ဏ ဟရိနာမ ရာမ” ဟိန္ဒူဘုရားကျောင်း ကွင်းပြင်နှင့် အနီးဝန်းကျင်တွင် စစ်အုပ်စုတပ် ထောင်ထားခဲ့သည့် M-14 မြေမြှုပ်မိုင်း ၄ လုံးကို စက်တင်ဘာလ ၁၈ ရက် နံနက်ပိုင်းတွင် AA မိုင်းရှင်းလင်းရေး တပ်ဖွဲ့က ရှာဖွေတွေ့ရှိ၍ ရှင်းလင်းခဲ့ခြင်း ဖြစ်သည်။ လက်ရှိတွင် အဆိုပါ ဘုရားကျောင်း အဝင်အထွက် လမ်းကြောင်းများ၌ မိုင်းရှင်းလင်းရေး လုပ်ငန်းများကို ဆက် လက် ဆောင်ရွက်လျက် ရှိသည်။ ဒေသခံ ရခိုင်ပြည်မြောက်ပိုင်း အာရက္ခတပ်တော်နှင့် နီးစပ်သူ အမျိုးသားတစ်ဦးက “မောင်တောမှာ စစ်တပ် ထောင်ထားခဲ့တဲ့ မိုင်းတွေကို လူမျိုးဘာသာမရွေး နေထိုင်တဲ့ နေရာတွေမှာ ရှင်းလင်းနေတာ။ အခုနှစ်ပိုင်းတွေမှာ ပိုပြီး လုပ်လာတယ်။ မွတ်ဆလင်ရွာတွေ ဟိန္ဒူရွာတွေကလည်း တောင်းဆိုတာတွေ ရှိတယ်။ မောင်တောက စစ်တပ် တပ်စွဲခဲ့တဲ့ နေရာတွေကို အဓိက ရှင်းတယ်။ လမ်းမကြီးတွေ၊ ကျေးရွာတွေကိုလည်း မိုင်းရှင်းလင်း ပေးနေတယ်” ဟု ပြောသည်။ မောင်တောမြို့နယ်အတွင်း စစ်အုပ်စုတပ် စခန်းချ တပ်စွဲခဲ့သည့် နေရာများ၌ မြေမြှုပ်မိုင်းများနှင့် မပေါက်ကွဲ သေးသည့် စစ်လက်နက်ပစ္စည်းများ ကျန်ရှိနေဆဲဖြစ်ရာ ၂၀၂၆ ခုနှစ် ဇန်နဝါရီလမှ စက်တင်ဘာလအထိ ၉ လ တာကာလအတွင်း AA မိုင်းရှင်းလင်းရေးတပ်ဖွဲ့က မိုင်းစုစုပေါင်း ၁၁၉ လုံးအထိ ရှင်းလင်းခဲ့ကြောင်း ထုတ်ပြန် ချက်များအရ သိရသည်။ တပ်စခန်းဟောင်းများ၊ ဘာသာရေးကျောင်းများ၊ လမ်းပိုင်းများ၊ တောင်တန်း၊ စိုက်ပျိုးရေး ဧရိယာများနှင့် လူသွားနည်းသည့် လမ်းကြောင်းများတွင် မိုင်းရှင်းလင်းရေး ဆောင်ရွက်နေသော်လည်း မိုင်းအန္တရာယ် ကျန်ရှိ နေသေးသဖြင့် သွားလာရေး အထူးသတိပြုကြရန် ဒေသခံများကို အသိပေးထားသည်။ ထို့ပြင် AA ထိန်းချုပ်ရာ ဒေသများ၌ မိုင်းအန္တရာယ် အသိပညာပေးခြင်း၊ လက်ကမ်းစာစောင်များ ဖြန့်ဝေခြင်းနှင့် အန္တရာယ်ရှိနိုင်သည့် နေရာများ၌ သတိပေးဆိုင်းဘုတ်များ တပ်ဆင်ခြင်းတို့ကိုလည်း ပြုလုပ်လျက် ရှိသည်။ #မောင်တောမြို့နယ်

မောင်တော ဟိန္ဒူဘုရားကျောင်းအနီး စစ်တပ် ထောင်ထားသည့် မိုင်းများကို AA ရှင်းလင်း

Sep 23

ကရင်နီတွင် စစ်တပ်က အရပ်သားများကို ဒရုန်းဖြင့် ပစ်မှတ်ထား သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၃ ရက်။ ရှမ်း-ကရင်နီအစပ်နှင့် ကရင်နီပြည်တွင် စစ်အုပ်စုတပ်သည် စစ်ဘေးရှောင်စခန်းများ၊ ကျေးရွာများ၊ စာသင် ကျောင်းများနှင့် စိုက်ပျိုးရေးခင်းများကို အသေခံဒရုန်းနှင့် လေကြောင်းသုံး၍ ပစ်မှတ်ထား ဆက်တိုက် တိုက်ခိုက် နေသည်ဟု ဒေသခံများနှင့် စစ်ရှောင်များက ပြောသည်။ မိုးဗြဲ-နန်းမယ်ခုံ-ဒီးမော့ဆို လမ်းမကြီးအား ပြန်လည်ထိန်းချုပ်နိုင်ရန် ကြိုးပမ်းနေသည့် စစ်အုပ်စုတပ်သည် မြေပြင်၌ ရှေ့မတိုးနိုင်ဘဲ အထိနာနေသောကြောင့် လေကြောင်းနှင့် ဒရုန်းအသုံးပြု တိုက်ခိုက်မှုများကို ပိုမို ခပ်စိပ် စိပ် ပြုလုပ်လာခြင်းဖြစ်သည်။ စက်တင်ဘာလ ၂၂ ရက် နံနက်ပိုင်းတွင်လည်း ကရင်နီပြည်၊ ဖရူဆိုမြို့နယ် အရှေ့ဘက်ခြမ်း (ကေးလျားမြို့နယ်) ရှိ ကျေးရွာတစ်ရွာသို့ စစ်အုပ်စုတပ်က ဒရုန်းဖြင့် ဗုံးကြဲတိုက်ခိုက်ခဲ့သဖြင့် အမျိုးသားတစ်ဦး ဦးခေါင်းနှင့် နောက်ကျောတို့တွင် ဒရုန်းဗုံးစ ထိမှန်ဒဏ်ရာ ရရှိခဲ့သည်။ စစ်ရှောင်များကို အကူအညီပေးနေသူ တစ်ဦးက “စစ်အုပ်စုတပ်က နေသာတဲ့ရက်ဆို နေ့စဉ်ရက်ဆက် ဒရုန်းနဲ့ ကင်းထောက်တာတွေ၊ တောင်ယာလုပ်ငန်းခွင်တွေကို ပစ်မှတ်ထား တိုက်ခိုက်တာတွေ လုပ်နေတာပါ။ အခု ရက်က တောင်ယာပေါင်းရှင်းရမယ့် ရာသီဖြစ်ပေမဲ့ လုံခြုံရေးအရ ခင်းထဲမသွားရဲကြတော့ သီးနှံတွေ ပျက်စီး မှာ သေချာနေသလို ရှေ့ဆက် စားနပ်ရိက္ခာ အခက်အခဲတွေပါ ကြုံလာရနိုင်ပါတယ်” ပြောသည်။ ထို့ပြင် ရှမ်း-ကရင်နီနယ်စပ်၊ မိုးဗြဲမြို့ရှိ ဝါရီဆူးပလိုင်ကျေးရွာ၌ စက်တင်ဘာလ ၂၁ ရက်နေ့၊ ညနေ ၄ နာရီ အချိန်ခန့်တွင် စစ်ဘေးရှောင်စခန်းမှ ထင်းသယ်ရန် ရွာအတွင်းသို့ ခဏပြန်လာသည့် အသက် ၅၀ ဝန်းကျင် အမျိုးသမီးတစ်ဦးမှာ စစ်အုပ်စုတပ် ပစ်ခတ်လိုက်သည့် လက်နက်ကြီး ကျရောက်ပေါက်ကွဲမှုကြောင့် သေဆုံးခဲ့ ရသည်။ မိုးဗြဲဒေသခံတစ်ဦးက “ဝါရီဆူးပလိုင်ရွာနားထိ စစ်တပ်စစ်ကြောင်း မရောက်သေးပေမဲ့ လက်နက်ကြီးနဲ့ အဝေး ကနေ ခကြာခဏ လှမ်းပစ်နေတာပါ။ ဒရုန်းတွေလည်း နေ့တိုင်း ဝဲနေတော့ ရွာထဲ ခဏပြန်တာတောင် အသက် အန္တရာယ် ရှိနေတယ်” ဟု ပြောသည်။ ပြီးခဲ့သည့် စက်တင်ဘာလ ၁၆ ရက်ကလည်း ဒီးမော့ဆိုမြို့နယ် အနောက်ဘက်ခြမ်းရှိ မိဘမဲ့ကလေးကျောင်းကို စစ်အုပ်စုတပ်က အသေခံဒရုန်းဖြင့် တိုက်ခိုက်ခဲ့ရာ ကစားနေသည့် အသက် ၉ နှစ်အရွယ် ကလေးငယ်တစ်ဦး သေဆုံးခဲ့ရသည့်အပြင်၊ ဖရူဆိုမြို့နယ် မိုဆိုရွာအနီး ဒရုန်းကျရောက်မှုကြောင့် KNDF တပ်ဖွဲ့ဝင် ၅ ဦး ကျဆုံးခဲ့ ရသည်။ စက်တင်ဘာလဆန်းပိုင်းမှစ၍ ဒီးမော့ဆို၊ လွိုင်ကော်၊ မိုးဗြဲနှင့် ဖရူဆိုမြို့နယ်တို့တွင် စစ်အုပ်စုတပ်၏ ဒရုန်းနှင့် လေကြောင်းတိုက်ခိုက်မှုများကြောင့် ကလေးငယ်များ အပါအဝင် အရပ်သား ၂၀ ထက်မနည်း သေဆုံးခဲ့ပြီး ဖြစ်သည်။ စစ်ရေးတင်းမာမှုနှင့် စစ်အုပ်စုတပ်၏ လေကြောင်းတိုက်ခိုက်မှုများကြောင့် လွိုင်ကော်အရှေ့ဘက်ခြမ်းရှိ စစ်ဘေးရှောင် ပြည်သူများသည်လည်း ဘေးလွတ်ရာသို့ ထပ်မံ ထွက်ပြေးတိမ်းရှောင်နေကြရသည်။ လက်ရှိတွင် စစ်အုပ်စုတပ်၏ ကင်းထောက်ဒရုန်းနှင့် အသေခံဒရုန်းများ အသုံးပြုမှု ခပ်စိပ်စိပ် ရှိနေသဖြင့် ဒေသခံပြည်သူများနှင့် စစ်ဘေးရှောင်များအနေဖြင့် လူစုလူဝေးပွဲများ ပြုလုပ်ခြင်းကို ရှောင်ရှားကြရန်နှင့် လေကြောင်းအန္တရာယ် သတိထားကြရန် တော်လှန်ရေးအဖွဲ့အစည်းများက နှိုးဆော်ထားသည်။ ထို့ပြင် မိုးဗြဲ PDF ကလည်း လုံခြုံရေးအခြေအနေအရ မိုးဗြဲမြို့အနောက်ဘက်ခြမ်းရှိ လွယ်ဝိုင်း၊ လွယ်ယင်း တောင်ခြေ၊ ခေါင်းစံလမ်းနှင့် သွားလာခွင့် ပိတ်ပင်ထားသည့် လမ်းကြောင်းများသို့ ဖြတ်သန်းသွားလာခြင်း မပြုကြရန် အသိပေး ထုတ်ပြန်ထားသည်။ ဓါတ်ပုံ - Crd #ကရင်နီ

ကရင်နီတွင် စစ်တပ်က အရပ်သားများကို ဒရုန်းဖြင့် ပစ်မှတ်ထား

Sep 23

ပုဏ္ဏားကျွန်းကို စစ်အုပ်စု လေကြောင်းမှ ဗုံးကြဲ၍ ပြည်သူ ၂ ဦး သေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၃ ရက်။ ရခိုင်ပြည်၊ ပုဏ္ဏားကျွန်းမြို့နယ်၊ ဖက်ကျကျေးရွာကို စစ်အုပ်စုတပ်က လေကြောင်းမှ ဗုံးကြဲတိုက်ခိုက်ခဲ့သဖြင့် စစ်ဘေးရှောင် အပါအဝင် ဒေသခံ အမျိုးသား နှစ်ဦး သေဆုံးခဲ့ကြောင်း ဒေသတွင်း သတင်းအရင်းအမြစ်များ က ပြောသည်။ ပုဏ္ဏားကျွန်းမြို့နယ်၊ ဖက်ကျကျေးရွာသို့ စက်တင်ဘာလ ၂၃ ရက်နေ့၊ နံနက်အစောပိုင်း ၁၂ နာရီ ၄၀ မိနစ်ခန့်တွင် စစ်အုပ်စုတပ်က ဂျက်ဖိုက်တာ အမျိုးအစား တိုက်လေယာဉ် နှစ်စီးနှင့် Y-12 လေယာဉ်တို့ကို အသုံးပြုကာ ဗုံးအလုံးရေ ၂၀ နီးပါး ကြဲချတိုက်ခိုက်ခဲ့ခြင်းဖြစ်သည်။ အဆိုပါ ဗုံးသီးများသည် ကျေးရွာ စာသင်ကျောင်း အနီးဝန်းကျင်နှင့် ဒေသခံများ နေထိုင်ရာ ရပ်ကွက်များ အတွင်းသို့ ကျရောက်ပေါက်ကွဲခဲ့သည်။ အဆိုပါ လေကြောင်းတိုက်ခိုက်မှုကြောင့် ပုဏ္ဏားကျွန်းမြို့၊ စံပြရပ်ကွက်မှ ဖက်ကျကျေးရွာသို့ လာရောက် စစ်ဘေးရှောင်နေသူ အသက် ၅၇ နှစ်အရွယ် ဦးမောင်မြကြည် နှင့် ဖက်ကျကျေးရွာ ဒေသခံ အသက် ၇၆ နှစ်အရွယ် ဦးအောင်သန်းမောင် တို့မှာ ဗုံးစထိမှန်ကာ ပြင်းထန်ဒဏ်ရာများ ရရှိပြီး သေဆုံးသွားခဲ့ရသည်။ ဒေသခံ ပရဟိတသမား အမျိုးသားတစ်ဦးက “ဟိုရက်ကပဲ ကုလားချောင်းကျေးရွာကို ကြဲလို့ တစ်ယောက် သေတယ်။ အခု ဖက်ကျကို ကြဲလို့ ၂ ယောက်သေတယ်။ တော်တော်ဆိုးနေတာပါ” ဟု ပြောသည်။ ပုဏ္ဏားကျွန်းမြို့နယ်ကို အခု စစ်ကြောင်းထိုးပြီး တိုက်ပွဲတွေဖြစ်နေတယ်၊ ပြည်သူတွေလည်း ရှောင်ကြရတယ်၊ တော်တော်ဆိုးနေတာပါ။ လက်ရှိ စစ်တွေ-ပုဏ္ဏားကျွန်းမြို့နယ်အစပ်မှာ တိုက်ပွဲများ ပြင်းထန်နေတာပါ။ အရပ်သားပြည်သူတွေ နေထိုင်ရာ ရပ်ရွာတွေကို လေကြောင်းဗုံးကြဲတာ၊ လက်နက်ကြီးပစ်ခတ်တာတွေ ဆက်တိုက် ပြုလုပ်နေတယ်။ ပုဏ္ဏားကျွန်းမြို့နယ်က ကွမ်းတောင်၊ စပါးထား၊ ဖက်ကျနဲ့ ဒီပါရုံ အပါအဝင် ကျေးရွာ ၂၀ ကျော်က ဒေသခံ ထောင်နဲ့ချီ ဘေးလွတ်ရာ တိမ်းရှောင်နေကြရတယ်” ဟု ပြောသည်။ ဖက်ကျကျေးရွာသည် ပြီးခဲ့သည့် စက်တင်ဘာလ ၁၇ ရက် ညဉ့် ၁၁ နာရီခွဲခန့်ကလည်း စစ်အုပ်စုတပ်၏ မီးလောင်ဗုံး ကြဲချတိုက်ခိုက်မှု ခဲ့ရဖူးပြီး ဒေသခံ နေအိမ်တစ်လုံး တည့်တည့်ထိမှန် မီးလောင်ပြာကျခဲ့သည့်အပြင် ဒေသခံတစ်ဦး ဒဏ်ရာပြင်းထန်စွာ ရရှိခဲ့သည်။ ထို့အပြင် စက်တင်ဘာလ ၂၀ ရက် ညနေပိုင်းကလည်း ပုဏ္ဏားကျွန်းမြို့နယ်၊ ကုလားချောင်းကျေးရွာအတွင်းသို့ စစ်အုပ်စုတပ်က ဂျက်ဖိုက်တာဖြင့် ဗုံးသီး ၂ လုံး ကြဲချခဲ့သဖြင့် အသက် ၅၅ နှစ်အရွယ် ဦးစောသိန်း သေဆုံးခဲ့ရသေးသည်။ ဒေသခံ အမျိုးသားတစ်ဦးက “ပုဏ္ဏားကျွန်းမြို့နယ်ကို အခု စစ်ကြောင်းထိုးပြီး တိုက်ပွဲတွေ ဖြစ်နေတယ်။ ပြည် သူတွေလည်း ရှောင်ကြရတယ်၊ တော်တော်ဆိုးနေတာပါ။ လက်ရှိ စစ်တွေ-ပုဏ္ဏားကျွန်းမြို့နယ်အစပ်မှာ တိုက် ပွဲတွေ ပြင်းထန်နေတာပါ။ အရပ်သားပြည်သူတွေ နေထိုင်ရာ ရပ်ရွာတွေကို လေကြောင်းဗုံးကြဲတာ၊ လက်နက် ကြီး ပစ်ခတ်တာတွေ ဆက်တိုက် ပြုလုပ်နေတယ်။ ပုဏ္ဏားကျွန်းမြို့နယ်က ကွမ်းတောင်၊ စပါးထား၊ ဖက်ကျနဲ့ ဒီပါရုံ အပါအဝင် ကျေးရွာ ၂၀ ကျော်က ဒေသခံ ထောင်နဲ့ချီ ဘေးလွတ်ရာ တိမ်းရှောင်နေကြရတယ်” ဟု ပြော သည်။ လက်ရှိတွင် စစ်အုပ်စုတပ်သည် စက်တင်ဘာလ ၄ ရက်နေ့မှစ၍ ပုဏ္ဏားကျွန်းမြို့နယ်အတွင်းသို့ စစ်အင်အား ၁,၀၀၀ ကျော်ဖြင့် စစ်ကြောင်းများခွဲကာ ထိုးစစ်ဆင်တိုက်ခိုက်လျက်ရှိပြီး စစ်တွေ-ပုဏ္ဏားကျွန်း နယ်စပ်အနီး တိုက်ပွဲများ ပြင်းထန်နေသည်။ စစ်အုပ်စုတပ်ဘက်မှ စစ်ရေးနှင့် မသက်ဆိုင်သည့် အရပ်သား ပြည်သူများ နေထိုင်ရာ ကျေးရွာများသို့ လေကြောင်းဗုံးကြဲခြင်းနှင့် လက်နက်ကြီးများဖြင့် ဆက်တိုက် ပစ်ခတ်တိုက်ခိုက်နေသဖြင့် ကွမ်းတောင်၊ စပါး ထား၊ ဖက်ကျ နှင့် ဒီပါရုံ ကျေးရွာ အပါအဝင် ရွာပေါင်း ၂၀ ကျော်မှ ဒေသခံ ထောင်ပေါင်းများစွာ ဘေးလွတ်ရာ သို့ အရေးပေါ် တိမ်းရှောင်နေကြရသည်။ ဓါတ်ပုံ - Crd #ပုဏ္ဏားကျွန်းမြို့နယ်

ပုဏ္ဏားကျွန်းကို စစ်အုပ်စု လေကြောင်းမှ ဗုံးကြဲ၍ ပြည်သူ ၂ ဦး သေဆုံး

« Prev 1 … 5 6 7 8 9 … 1,148 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

ဂျပန်နိုင်ငံက အမြဲတမ်းနေထိုင်ခွင့် လျှောက်ထားခအား အဆ ၂၀ ထိ တိုးမြှင့် — October 1, 2026 6:37 pm
လာအိုနိုင်ငံတွင် တရုတ်စစ်တပ်က စစ်ရေးအထောက်အကူပြု လေကြောင်းစခန်းသစ် ဖွင့်လှစ် — October 1, 2026 6:35 pm
ဗြိတိန် သုတေသနများအား တရုတ်ထောက်လှမ်းရေးများက အသုံးချနေကြောင်း MI5 သတိပေး — October 1, 2026 6:35 pm

Recent Posts

ကချင်နှင့် ရှမ်း-ကချင်အစပ် မြို့နယ် ၆ ခုတွင် KIA နှင့် စစ်အုပ်စုတပ်တို့ တိုက်ပွဲများ ဆက်လက်ပြင်းထန်
ဂျပန်နိုင်ငံက အမြဲတမ်းနေထိုင်ခွင့် လျှောက်ထားခအား အဆ ၂၀ ထိ တိုးမြှင့်
လာအိုနိုင်ငံတွင် တရုတ်စစ်တပ်က စစ်ရေးအထောက်အကူပြု လေကြောင်းစခန်းသစ် ဖွင့်လှစ်
ဗြိတိန် သုတေသနများအား တရုတ်ထောက်လှမ်းရေးများက အသုံးချနေကြောင်း MI5 သတိပေး
ကာလင်နင်ဂရက်ဒေသအား ပိတ်ဆို့ပါက နျူကလီးယားလက်နက်ဖြင့် တုံ့ပြန်မည်ဟု ရုရှား သတိပေး

Archives

Archives

×Close