NMG Doh – Page 8 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
နိုင်ငံတကာသတင်း
NMG အကြောင်း
Contact

Home
Author Archive

NMG Doh

Author: NMG Doh

Aug 6

မြောက်ဦးကို စစ်တပ်က လေယာဉ်အုပ်စုဖြင့် ဗုံးအလုံး ၃၀ ကျော် ကြဲချတိုက်ခိုက် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဩဂုတ်လ ၆ ရက်။ ရခိုင်ပြည်၏ ရှေးဟောင်းယဉ်ကျေးမှု အမွေအနှစ်များ တည်ရှိရာ သမိုင်းဝင်မြောက်ဦးမြို့ပေါ်သို့ စစ်တပ်က ဂျက် ဖိုက်တာ ၆ စီးနှင့် Y-12 ၂ စီးတို့ဖြင့် အုပ်စုလိုက် အပြင်းအထန် လေကြောင်းကနေ ဗုံးကြဲတိုက်ခိုက်ခဲ့ခြင်း ကြောင့် အပြစ်မဲ့ပြည်သူများ ထိခိုက်ဒဏ်ရာရရှိခဲ့သည်။ ပြီးခဲ့သည့် ဩဂုတ်လ ၄ ရက်နေ့၊ ည ၉ နာရီကျော်မှ ၁၀ နာရီကျော်အထိ တစ်နာရီကျော်ကြာမြင့်ခဲ့သော အဆိုပါ တိုက်ခိုက်မှုအတွင်း မြောက်ဦးမြို့ပေါ်ရှိ စစ်တပ်၏ တပ်ရင်းဟောင်းများဖြစ်ကြသည့် အမှတ် (၅၄၀) တပ်ရင်း နှင့် အမှတ် (၃၁) ရဲတပ်ရင်းနေရာတို့ကို ဗုံးကြဲခဲ့ခြင်း ဖြစ်သည်။ ထို့အပြင် စစ်ဘေးရှောင်များနှင့် ရေဘေးရှောင်များ ခိုလှုံနေထိုင်ရာ နေရာများကိုပါ ပစ်မှတ်ထားကာ ဗုံးအလုံးရေ ၃၀ ကျော်အထိ မရပ်မနား ကြဲချတိုက်ခိုက်ခဲ့ခြင်း ဖြစ်သည်။ ထိုကဲ့သို့ လေကြောင်းမှ ဗုံးကြဲတိုက်ခိုက်ခဲ့မှုကြောင့် စစ်ဘေးရှောင်နှင့် ရေဘေးရှောင် အပြစ်မဲ့ပြည်သူ ၄ ဦး ထိခိုက်ဒဏ်ရာရရှိခဲ့ပြီး၊ ဒေသခံပြည်သူများ ပိုင်ဆိုင်သည့် နွား ၃ ကောင် သေဆုံးကာ ၅ ကောင်မှာလည်း ထိခိုက် ဒဏ်ရာရရှိခဲ့သည်။ ဒေသခံ တစ်ဦးက “ညအချိန်ကြီးမှာ လေယာဉ်သံတွေရော ဗုံးပေါက်ကွဲသံတွေရော တစ်လုံးပြီး တစ်လုံးပဲ။ ရမ်းသမ်းကြဲချနေတာ။ အားလုံးက ဘယ်ကိုပြေးရမလဲ မသိဘူး အဲ့လိုဖြစ်ကုန်တာ” ဟု ပြောသည်။ လက်ရှိ မိုးရာသီကာလအတွင်းတွင်ပင် စစ်တပ်အနေဖြင့် အရပ်သားပြည်သူများ နေထိုင်ရာနေရာများကို ရည် ရွယ်ချက်ရှိရှိဖြင့် လေကြောင်းတိုက်ခိုက်မှုများကို ဆက်တိုက် လုပ်ဆောင်နေခြင်းကြောင့် ဒေသခံပြည်သူများ အနေဖြင့် လေကြောင်းအန္တရာယ်ကို အထူးသတိထား ကြိုတင်ပြင်ဆင်နေထိုင်ကြရန် အာရက္ခတပ်တော် (AA) က တိုက်တွန်းထားသည်။ စစ်ရှောင်များကို အကူအညီပေးနေသူ ရခိုင်လူငယ်တစ်ဦးကလည်း “အခုလို မိုးတွင်းကာလမှာတောင် အရပ်သား တွေနဲ့ စစ်ဘေးရှောင်တွေ ခိုလှုံတဲ့နေရာတွေကို ပစ်မှတ်ထားပြီး အခုလို ရည်ရွယ်ချက်ရှိရှိ ဗုံးကြဲတိုက်ခိုက် နေ တာဟာ လူသားချင်းစာနာမှုဆိုင်ရာ ဥပဒေတွေကို ဖောက်ဖျက်နေတာပါပဲ။ ပြည်သူတွေအနေနဲ့ လေကြောင်း ရန်ကို အထူးသတိထားကြဖို့နဲ့ လုံခြုံတဲ့နေရာတွေမှာ တိမ်းရှောင်ကြဖို့ တိုက်တွန်းချင်ပါတယ်” ဟု ပြောသည်။ သမိုင်းဝင် ယဉ်ကျေးမှုနယ်မြေ တစ်ခုဖြစ်သည့် မြောက်ဦးမြို့တွင် ယခုကဲ့သို့ စစ်ရေးပစ်မှတ်မဟုတ်သည့် အရပ် သားများ ခိုလှုံရာနေရာများကို လေကြောင်းဖြင့် အကြိမ်ကြိမ် ဗုံးကြဲတိုက်ခိုက်မှုများကြောင့် ဒေသခံ ပြည်သူများ မှာ စိုးရိမ်ပူပန်မှုများ မြင့်တက်နေဆဲဖြစ်သည်။ ထိုပြင် စစ်ရှောင်ပြည်သူများအတွက် အရေးပေါ် အကူအညီများနှင့် လုံခြုံရေးဆိုင်ရာ အကာအကွယ်များကို အထူးလို အပ်လျက်ရှိနေကြောင်း အကူအညီပေးနေသူများက ပြောသည်။ #မြောက်ဦး

မြောက်ဦးကို စစ်တပ်က လေယာဉ်အုပ်စုဖြင့် ဗုံးအလုံး ၃၀ ကျော် ကြဲချတိုက်ခိုက်

Aug 6

ကချင်မြောက်ဖျားပိုင်းတွင် စစ်အုပ်စုက အင်အားဖြည့်တင်းကာ စစ်ရေးပြင်ဆင်မှုများ လုပ်ဆောင်နေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဩဂုတ်လ ၆ ရက်။ ကချင်ပြည်မြောက်ဖျားပိုင်း ခေါင်လန်ဖူးမြို့နယ်အတွင်း၌ စစ်အုပ်စုတပ်က အင်အားဖြည့်တင်းမှုများ ပြုလုပ်လျက်ရှိပြီး စစ်ရေး ပြင်ဆင်မှုများကို အရှိန်အဟုန်မြှင့် လုပ်ဆောင်နေကြောင်း ကချင်လွတ်လပ်ရေးအဖွဲ့ (KIO/KIA) က ပြောသည်။ လက်ရှိတွင် ကချင်ပြည်အတွင်းရှိ မြို့နယ် တော်တော်များများတွင် စစ်ရေးတင်းမာမှုများနှင့်အတူ တိုက်ပွဲများ ဖြစ်ပွားနေသည့်နည်းတူ ခေါင်လန်ဖူးမြို့နယ်ထဲတွင်လည်း စစ်အုပ်စုက စစ်ရေးပြင်ဆင်မှုများကို ယခင်ကထက် ပိုမိုလုပ်ဆောင်လာနေကြောင်း KIO/KIA ပြောရေးဆိုခွင့်ရှိသူ ဗိုလ်မှူးကြီး နော်ဘူက ပြောဆိုသည်။ “ခေါင်လန်ဖူးဘက်မှာကတော့ ဒီလိုပါ။ သူတို့လည်း အင်အားတွေ ဖြည့်နေတာ၊ ထိုးစစ်အင်အားတွေ ဖြည့်တာ တွေရှိတယ်။ စားနပ်ရိက္ခာတွေ စီစဉ်ထားတာပေါ့ကွာ၊ ပြည်သူ့စစ်တွေလည်း အဲဒီနေရာမှာ နေရာယူထားတာ တွေရှိတယ်။ အဲလိုအနေအထားဖြစ်ပါတယ်” ဟု ဗိုလ်မှူးကြီးနော်ဘူ က ပြောသည်။ အဆိုပါ စစ်ရေးပြင်ဆင်မှုများတွင် စစ်အုပ်စုတပ်နှင့်အတူ ဒေသတွင်းရှိ ပြည်သူ့စစ်အဖွဲ့များလည်း ပါဝင် ပတ်သက်နေကြောင်း ဆိုသည်။ ထိုကဲ့သို့ စစ်ရေးပြင်ဆင်မှုများနှင့်အတူ KIO/KIA လှုပ်ရှားရာဒေသများဘက်သို့ စစ်ကြောင်းထိုး ဝင်ရောက် လာမှုများကြောင့် နှစ်ဖက် ထိတွေ့တိုက်ပွဲများလည်း ဖြစ်ပွားနေသည်ဟု ဗိုလ်မှူးကြီး နော်ဘူက ဆက် ပြောသည်။ “တိုက်ပွဲလည်း ဖြစ်ပါတယ်။ တိုက်ပွဲဖြစ်တာကတော့ တောမှာ၊ တောင်မှာ သူတို့စစ်ကြောင်းထိုးတဲ့နေရာတွေမှာ ဖြစ်ပါတယ်။ ရွာတွေ၊ သူတို့အထိုင်စခန်းတွေ သိမ်းတဲ့ဟာတွေကတော့ မရှိသေးဘူး။ သူတို့ထိုးစစ်ဆင်လာလို့ ကျနော်တို့က ခုခံလို့ တိုက်ပွဲဖြစ်တာ။ ကြိုကြားကြိုကြား တိုက်ပွဲတွေရှိပါတယ်။ တင်းမာတဲ့အနေအထား ဖြစ် ပါတယ်။” တိုက်ပွဲများ ဆက်လက်ဖြစ်ပွားနေခြင်းကြောင့် ခေါင်လန်ဖူးဒေသခံများအနေဖြင့် စစ်ဘေးလွတ်ရာ ဒေသများနှင့် ပူတာအိုမြို့ဘက်သို့ ထွက်ပြေးတိမ်းရှောင်နေကြရပြီး အရေးပေါ် အကူအညီများ လိုအပ်လျက်ရှိနေသည်။ လက်ရှိတွင် ကချင်ပြည် အတွင်းရှိ ရွှေကူမြို့နယ်၊ ဗန်းမော်မြို့နယ်၊ ဝိုင်းမော်မြို့နယ်နှင့် မိုးညှင်းမြို့နယ်၊ အင်းတော် ကြီးဒေသတို့တွင်လည်း စစ်အုပ်စုတပ်၏ စစ်ကြောင်းထိုးဝင်ရောက်မှုများကြောင့် တိုက်ပွဲများ ပြင်းထန်စွာ ဖြစ်ပွားနေဆဲဖြစ်သည်။ အဆိုပါ မြို့နယ်များအနက် ရွှေကူမြို့နယ်တွင် တိုက်ပွဲအပြင်းထန်ဆုံးဖြစ်နေပြီး စစ်အုပ်စုတပ်က အင်အား ၅၀၀ နီးပါးခန့်ဖြင့် စစ်ကြောင်း ၄ ကြောင်းခွဲကာ ထိုးစစ်ဆင် တိုက်ခိုက်နေကြောင်း KIO/KIA က ပြောသည်။ အတုအယောင် ရွေးကောက်ပွဲမှ တစ်ဆင့် သမ္မတဖြစ်လာသည့် စစ်အုပ်စုခေါင်းဆောင် ဦးမင်းအောင်လှိုင်က ပြည်နယ်နှင့် တိုင်းဒေသကြီးများရှိ ၎င်းတို့ ရှုံးဆုံးထားသည့် နယ်မြေများကို ပြန်လည်ရယူရန် ပြင်းပြင်းထန်ထန် ထိုးစစ်ဆင် တိုက်ခိုက်နေသည့် ဒေသများထဲတွင် ကချင်ပြည်လည်း အပါအဝင် ဖြစ်နေသည်။ ဓာတ်ပုံ - NMG (ပုံဟောင်း) #ခေါင်လန်ဖူးတိုက်ပွဲ #ပူတာအိုခရိုင် #ကချင်တိုက်ပွဲ

ကချင်မြောက်ဖျားပိုင်းတွင် စစ်အုပ်စုက အင်အားဖြည့်တင်းကာ စစ်ရေးပြင်ဆင်မှုများ လုပ်ဆောင်နေ

Aug 6

ရခိုင်ပြည် မြေပုံတွင် မိုးဆက်တိုက်ရွာသွန်းမှုကြောင့် ကျေးရွာအချို့ ရေကြီးနစ်မြုပ် သတင်းနှင့် မီဒီယာကွန်ရက်။ ၂၀၂၆ ခုနှစ်၊ ဩဂုတ်လ ၆ ရက်။ မိုးအဆက်မပြတ် ရွာသွန်းမှုနှင့် တောင်ကျရေများ စီးဆင်းမှုတို့ကြောင့် ရခိုင်ပြည်၊ မြေပုံမြို့နယ် အတွင်းရှိ ကျေးရွာ အချို့တွင် ရေကြီးနစ်မြုပ်မှုများ ဖြစ်ပေါ်လျက်ရှိကြောင်း ဒေသခံများက ပြောသည်။ ဩဂုတ်လ ၄ ရက်နေ့မှစတင်ကာ ယနေ့ ဩဂုတ်လ ၆ ရက်နေ့အထိ မိုးအဆက်မပြတ် ရွာသွန်းခဲ့ခြင်းကြောင့် မြေပုံမြို့နယ်၊ ရက်ချောင်းကျေးရွာအုပ်စုရှိ ကျေးရွာအချို့နှင့် လေတောင်ကျေးရွာတို့တွင် ရေကြီးရေလျှံမှုများ ဖြစ်ပေါ်လာခြင်း ဖြစ်သည်။ ဒေသခံများနှင့် အဆက်အသွယ်ရှိသည့် ပရဟိတသမားတစ်ဦးက “တောင်ကျရေတွေ အဆက်မပြတ်စီးဆင်း တာ၊ မိုးများတာကြောင့် ဟုတ်ပါတယ်။ လေတောင်မှာ ရေတက်လာတယ်၊ ပြင်ဆင်စရာတွေလည်း ပြင်ဆင်နေ ပါတယ်။ အရမ်းတော့ မများသေးဘူး။ မြေပုံ ရေကြီးနေတယ်။ ဇူလိုင်လရေကြီးခဲ့တဲ့အထဲမှာ ဒီမြို့မပါခဲ့ဘူး၊ အခုရေကြီးလာတာပါ” ဟု ပြောသည်။ မြေပုံမြို့နယ်အတွင်းရှိ ကျေးရွာအချို့တွင် ယနေ့၊ နံနက်အစောပိုင်း ၃ နာရီခွဲအချိန်မှ စတင်ကာ တောင်ကျရေများ အဆက်မပြတ် စီးဝင်ခြင်းနှင့် မိုးဆက်တိုက်ရွာသွန်းခြင်းတို့ကြောင့် ရေလွှမ်းမိုးမှုဒဏ်ကို ဆိုးရွားစွာ ခံစားနေကြ ရပြီး နေအိမ်တစ်လုံးလည်း ရေစီးနှင့်အတူ ပြိုကျ ပျက်စီးသွားခဲ့သည်။ လက်ရှိတွင် ရေလွှမ်းမိုးမှုဒဏ်ကို ခံနေရသည့် ကျေးရွာများမှာ မြေပုံမြို့နယ်၊ ရက်ချောင်းကျေးရွာအုပ်စုရှိ လမ်း မတော်စု၊ ကယုချောင်းစုနှင့် လေတောင်ကျေးရွာတို့ ဖြစ်ကြပြီး၊ အထူးသဖြင့် ကယုချောင်းစုတွင် တောင်ကျ ရေစီးသန်မြန်မှုကြောင့် လူနေအိမ်တစ်လုံး ရေထဲသို့ ပြိုကျပျက်စီးသွားခဲ့ခြင်း ဖြစ်သည်။ ဩဂုတ်လ ၄ ရက်နေ့ ညနေပိုင်းကတည်းက မြေပုံမြို့နယ်တွင် မိုးအဆက်မပြတ် ရွာသွန်းခဲ့ရာ ယနေ့နံနက် ၃ နာရီခွဲအချိန်တွင် ရေအမှတ်သည် အမြင့်ပိုင်းကျေးရွာများ၌ ၄ ပေခွဲအထိနှင့် အနိမ့်ပိုင်းဒေသများတွင် ၅ ပေအထိ မြင့်တက်လာခဲ့ခြင်း ဖြစ်သည်။ ကပ္ပလီပင်လယ်ပြင်နှင့် ဘင်္ဂလားပင်လယ်အော် တောင်ပိုင်းတို့တွင် မုတ်သုံလေ အားကောင်းလျက်ရှိခြင်းကြောင့် ရခိုင်ပြည်နယ်အတွင်း လာမည့် ဩဂုတ်လ ၁၁ ရက်နေ့အထိ မိုးဆက်တိုက် ရွာသွန်းနိုင်ပြီး လေပြင်းများ တိုက်ခတ်နိုင်ကြောင်း မိုးလေဝသဌာနက ခန့်မှန်းထားသည်။ လက်ရှိတွင် ရေဘေးသင့်ဒေသခံ ပြည်သူများမှာ အရေးပေါ်စားဝတ်နေရေးအပြင် ဆေးဝါးအကူအညီများကိုပါ အထူးလိုအပ်နေကြဆဲ ဖြစ်သည်။ ပြီးခဲ့သည့် ဇူလိုင်လအစောပိုင်းကလည်း အာရက္ခဒေသအတွင်းရှိ မြို့နယ် ၈ ခုတွင် မိုးသည်းထန်စွာ ရွာသွန်းမှု ကြောင့် ကုလားတန်မြစ်ရေနှင့် လေးမြို့မြစ်ရေများ မြင့်တက်လာခြင်း၊ တောင်ကျရေများ စီးဆင်းလာခြင်း တို့ကြောင့် ရေကြီးရေလျှံမှုများ ဖြစ်ပွားခဲ့ဖူးသည်။ ရခိုင်ဒေသ အနှံ့အပြားတွင် မိုးသည်းထန်စွာ အဆက်မပြတ် ရွာသွန်းနေခြင်းကြောင့် မြေဆီလွှာများတွင် ရေဝင် ရောက်မှု အလွန်များပြားနေကာ တောင်ပြိုခြင်း၊ မြေပြိုခြင်းများနှင့် မြေနိမ့်ပိုင်းဒေသများတွင် လျှပ်တစ်ပြက် ရေကြီးရေလျှံမှုများ ဖြစ်ပေါ်လာနိုင်သဖြင့် ပြည်သူများအနေဖြင့် အထူးသတိပြုနေထိုင်ကြရန်နှင့် အန္တရာယ်ရှိ နိုင်သည့် နေရာများတွင် မနေထိုင်ကြရန် တိုက်တွန်းထားသည်။ ထို့ပြင် ရေစီးသန်နေချိန်အတွင်း မြစ်နား၊ ချောင်းနားများတွင် ထင်းလိုက်မကောက်ကြရန်လည်း သတိပေး တား မြစ်ထားသည်။ #မြေပုံ #မိုးရွာသွန်း

ရခိုင်ပြည် မြေပုံတွင် မိုးဆက်တိုက်ရွာသွန်းမှုကြောင့် ကျေးရွာအချို့ ရေကြီးနစ်မြုပ်

Aug 6

ကချင်ပြည် မြို့နယ် ၅ ခုတွင် စစ်ရေးတင်းမာနေပြီး တိုက်ပွဲများ ဆက်လက်ပြင်းထန်နေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဩဂုတ်လ ၆ ရက်။ ကချင်ပြည် အတွင်းရှိ မြို့နယ် ၅ ခုတွင် စစ်တပ်နှင့် ကချင်လွတ်လပ်ရေးတပ်မတော် (KIA) တို့အကြား စစ်ရေး တင်းမာလျက်ရှိပြီး တိုက်ပွဲများ ပြင်းထန်စွာ ဆက်လက်ဖြစ်ပွားနေကြောင်း KIO/KIA ပြောရေးဆိုခွင့်ရှိသူက ပြောသည်။ တိုက်ပွဲပြင်းထန်နေသည့် ရွှေကူမြို့နယ် အပါအဝင် ဗန်းမော်၊ မိုးညှင်း (အင်းတော်ကြီး)၊ ဝိုင်းမော်နှင့် ခေါင်လန်းဖူး မြို့နယ်များတွင် စစ်ရေးတင်းမာမှုများ ဆက်လက်ရှိနေပြီး တိုက်ပွဲများလည်း ဖြစ်ပွားနေသည်ဟု ဆိုသည်။ လက်ရှိ ကချင်ပြည်အတွင်းရှိ စစ်ရေးအခြေအနေများနှင့် ပတ်သက်၍ ကချင်လွတ်လပ်ရေးအဖွဲ့ KIO/KIA ပြောရေးဆိုခွင့်ရှိသူ ဗိုလ်မှူးကြီး နော်ဘူက ယခုကဲ့သို့ ပြောသည်။ “တိုက်ပွဲဖြစ်တဲ့နေရာကတော့ ရွှေကူဘက်မှာ ရှိပါတယ်။ နေ့တိုင်းလို ဖြစ်ပါတယ်။ နောက် ဗန်းမော်မှာလည်း ကြိုကြားကြိုကြားဖြစ်ပါတယ်။ အင်းတော်ကြီးဘက်မှာလည်း တိုက်ပွဲတွေရှိပါတယ်။ ဝိုင်းမော်မှာကတော့ သိပ်ပြီးမှ မြေပြင်တိုက်ပွဲကတော့ မရှိဘူး။ ဒါပေမဲ့ တင်းမာတဲ့ အနေအထားတော့ ဖြစ်ပါတယ်။ ခေါင်လန်ဖူး ဖက်မှာလည်း ကြိုကြားကြိုကြား တိုက်ပွဲတွေ ရှိပါတယ်။ တင်းမာတဲ့ အနေအထားဖြစ်ပါတယ်။” အဆိုပါ မြို့နယ် ၅ ခုအနက် ရွှေကူမြို့နယ်တွင် တိုက်ပွဲအပြင်းထန်ဆုံးဖြစ်နေပြီး စစ်တပ်က အင်အား ၅၀၀ နီးပါး ခန့်ဖြင့် ငါးအိုးမှတစ်ဆင့် ရွှေကူသို့ တက်လာသည့် လမ်းကြောင်းမှတစ်ဆင့် စစ်ကြောင်း ၄ ကြောင်းခန့်ဖြင့် ထိုးစစ်ဆင် တိုက်ခိုက်နေကြောင်း KIO/KIA က ဆိုသည်။ ဗိုလ်မှူးကြီး နော်ဘူက “ငါးအိုးဖက်ကနေ ရွှေကူဖက်ကို တက်သွားတဲ့ အဲဒီလမ်းတစ်ကြောမှာပါ တိုက်ပွဲတွေ ရှိတာပါ။ သူတို့ကတော့ ပြန်တက်လိုက် ကျနော်တို့နဲ့ ပြန်ဖြစ်လိုက်၊ သူတို့ပြန်ထပ်ဖြည့်လိုက် အဲလိုပါ။ ဆိုတော့ ငါးရာဝန်းကျင်လောက်တော့ ရှိမှာပါ။ သူတို့စစ်ကြောင်း သုံးကြောင်း လေးကြောင်းလောက် ရှိတယ်လို့နော်၊ ဆိုတော့ ငါးရာလောက်တော့ ရှိတယ်” ဟု ဆက် ပြောသည်။ ရွှေကူတိုက်ပွဲအတွင်း KIO/KIA နှင့် ပူးပေါင်းတပ်ဖွဲ့တို့က စစ်တပ်၏ ရှေ့တန်းလှုပ်ရှားစခန်း တစ်ခုကိုလည်း ဝင်ရောက်တိုက်ခိုက် သိမ်းပိုက်နိုင်ခဲ့သည်။ ဗိုလ်မှူးကြီး နော်ဘူက “၃၁ ရက်နေ့မှာ သိမ်းတဲ့ဟာကတော့ သူရဲ့အခိုင်အမာစခန်းတော့ မဟုတ်ဘူး။ ရှေ့တန်း တွေ သူတို့လှုပ်ရှားနယ်မြေ ဖြစ်ပြီးမှ ထိန်းချုပ်ထားတဲ့ စခန်းဖြစ်ပါတယ်။ အင်အားတွေ ၃၀၊ ၅၀ လောက်ရှိတဲ့ သူတို့ခြေကုတ်စခန်းတွေကို KIA နဲ့ ပူးပေါင်းတပ်တွေ ဝင်တိုက်ပြီးမှ သူတို့ဆုတ်ခွာသွားတာ ဖြစ်ပါတယ်” ဟု ပြောသည်။ တော်လှန်ရေး အင်အားစုများနှင့် တက်ကြွလှုပ်ရှားသူများက အတုအယောင်ဟု သတ်မှတ်ထားသော ရွေး ကောက်ပွဲမှ တစ်ဆင့် သမ္မတ ဖြစ်လာသူ စစ်အုပ်စု ခေါင်းဆောင် ဦးမင်းအောင်လှိုင်က ပြည်နယ်နှင့် တိုင်းဒေသ ကြီးများရှိ ၎င်းတို့ ရှုံးဆုံးထားသည့် နယ်မြေများကို ပြန်လည်ရယူရန် ပြင်းပြင်းထန်ထန် ထိုးစစ်ဆင် တိုက်ခိုက်နေ သည့် ဒေသများထဲတွင် ကချင်ပြည်လည်း အပါအဝင် ဖြစ်နေသည်။ ထိုသို့ ထိုးစစ်ဆင်မှုများကြောင့် စစ်ရေးပဋိပက္ခဒေသများရှိ အရပ်သားပြည်သူလူထုမှာ ဖမ်းဆီးနှိပ်စက်ခံရခြင်း၊ လူသားဒိုင်းအဖြစ် အသုံးပြုခံရခြင်း၊ လက်နက်ကြီး၊ လေကြောင်းနှင့် ဒရုန်းပစ်ခတ်မှုများကြောင့် သေဆုံးခြင်းနှင့် နေအိမ်များ မီးရှို့ဖျက်ဆီးခံရခြင်းစသည့် လူ့အခွင့်အရေးချိုးဖောက်မှုဒဏ်များကို ပိုမိုဆိုးရွားစွာ ခံစားနေကြရ ကြောင်း စစ်ရေးပဋိပက္ခဒေသခံများနှင့် လူ့အခွင့်အရေး လှုပ်ရှားသူများက ပြောဆိုကြသည်။ ဓာတ်ပုံ - AFP (ပုံဟောင်း) #ရွှေကူတိုက်ပွဲ #Kachin #ကချင်တိုက်ပွဲ

ကချင်ပြည် မြို့နယ် ၅ ခုတွင် စစ်ရေးတင်းမာနေပြီး တိုက်ပွဲများ ဆက်လက်ပြင်းထန်နေ

Aug 6

ရေကာတာ ကျိုးပေါက်မှုကြောင့် လေးမျက်နှာမြို့တွင် ပြည်သူသုံးသောင်းကျော် ရေဘေးသင့် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဩဂုတ်လ ၆ ရက် ငဝန်မြစ်ရေကာတာ ကျိုးပေါက်မှုကြောင့် ဧရာဝတီတိုင်းဒေသကြီး၊ လေးမျက်နှာမြို့နယ်တွင် မြို့ပေါ်ရပ်ကွက်များ နှင့် ကျေးရွာ ၁၀၆ ရွာတို့၌ ရေဆက်လက်ကြီးနေပြီး ဖုန်းလိုင်းတချို့ ပြတ်တောက်ကာ လူသေဆုံးမှုများ အထိ ရှိလာကြောင်း ဒေသခံများက ပြောသည်။ လေးမျက်နှာမြို့နယ်အတွင်း MPT မိုဘိုင်းစခန်း ၁၃ ခုရှိရာမှ ၁၁ ခုမှာ ပြတ်တောက်နေပြီး နင်းကြမ်းနှင့် ခမောက် စုကျေးရွာ စခန်းတို့တွင်သာ လိုင်းပြန်လည်ရရှိနေကာ ဆက်သွယ်ရေးဝန်ဆောင်မှုမှာ ၁၆ ဒသမ ၁၈ ရာခိုင်နှုန်း သာ ရှိတော့ကြောင်း ဆိုသည်။ ဇူလိုင် ၃၀ ရက် ညပိုင်းက မိုးသည်းထန်စွာရွာသွန်းမှုနှင့် မြစ်ရေတိုက်စားမှုကြောင့် ငဝန်မြစ်ရေကာတာ ကျိုး ပေါက်မှု ဖြစ်ပွားခဲ့ခြင်း ဖြစ်ရာမှ ဩဂုတ်လ ၆ ရက်အထိ လေးမျက်နှာမြို့ပေါ်ရပ်ကွက် ၅ ခုနှင့် ပတ်ဝန်းကျင် ကျေးရွာ ၇၂ ရွာ၊ ဟင်္သာတမြို့နယ် ၂၆ ရွာ၊ ရေကြည်မြို့နယ် ၆ ရွာနှင့် ကျုံပျော်မြို့နယ် ၂ ရွာ စုစုပေါင်း ကျေးရွာ ၁၀၆ ရွာသို့ ရေဝင်ရောက်လျက်ရှိသည်။ အိမ်ခြေ ၇,၇၃၄ အိမ်၊ အိမ်ထောင်စု ၇,၅၈၅ စုမှ လူဦးရေ ၃၂,၆၀၇ ဦးတို့မှာ ကယ်ဆယ်ရေးစခန်းများတွင် နေထိုင်နေကြရကြောင်း စစ်တပ်ကလည်း ထုတ်ပြန်ထားသည်။ လေးမျက်နှာမြို့နယ်အတွင်း ဆက်သွယ်ရေးအခက်အခဲများနှင့် ပတ်သက်၍ ဒေသခံကုန်သည် အမျိုးသမီး တစ်ဦးက “လေးမျက်နှာမြို့နယ်ထဲက တချို့နေရာတွေ ဖုန်းလိုင်းတွေ ပြတ်တောက်နေတဲ့အတွက် ဘယ် နေရာမှာ ဘယ်လိုအခြေအနေရှိတယ်ဆိုတာကို သွားကယ်ဖို့က ဆက်သွယ်ရေးခက်ခဲတယ်။ တချို့နေရာတွေက လှောင်ထားတဲ့ကုန်တွေ တစ်ဝက်လောက် ဆုံးရှုံးတာရှိတယ်” ဟု ပြောသည်။ ဩဂုတ် ၄ ရက် ညနေပိုင်းတွင် လေးမျက်နှာမြို့၊ အမှတ် (၃) ရပ်ကွက်ရှိ ရေမြုပ်နေသော နေအိမ်တစ်လုံးထဲတွင် အသက် ၆၉ နှစ်အရွယ် စိတ်ကျန်းမာရေးမကောင်းသူ အမျိုးသမီးကြီးတစ်ဦး သေဆုံးခဲ့သည်။ ထို့ပြင် ဩဂုတ် ၅ ရက်တွင်လည်း အိုင်သပြုကျေးရွာ၊ အောင်မင်္ဂလာရပ်ကွက်အတွင်း ရေစီးနှင့်မျောပါသွားသည့် အသက် ၂၀ ကျော်အရွယ် အမျိုးသားတစ်ဦး၏ ရုပ်အလောင်းကို လူမှုကယ်ဆယ်ရေးအဖွဲ့များက လိုက်လံရှာဖွေတွေ့ရှိခဲ့ပြီး ဟင်္သာတမြို့နယ်ဆေးရုံသို့ ပို့ဆောင်ပေးခဲ့ကြသည်။ ဒေသခံ အမျိုးသမီးတစ်ဦးက “သေတာ လောလောဆယ် နှစ်ယောက်။ တစ်ယောက်က စိတ်မနှံ့ဘူး၊ တစ် ယောက်ကတော့ ရေဘေးသင့်တဲ့သူတွေကို ထမင်းထုတ်သွားပို့တာမှာ ရေစီးနဲ့မျောသွားတာပါ” ဟု ပြောသည်။ ထို့ပြင် ဩဂုတ် ၆ ရက်နေ့ မွန်းလွဲ ၁၂ နာရီခွဲအချိန်ကလည်း လေးမျက်နှာမြို့နယ်၊ သခွပ်ချောင်းကျေးရွာအုပ်စု၊ ဂျမ်းကုန်းကျေးရွာရှိ နေအိမ်အပေါ်ထပ်တွင် နေထိုင်သူ အမျိုးသားတစ်ဦး အစာအိမ် သွေးကြောပေါက်သည့် ဝေဒနာ ခံစားနေရသဖြင့် ပရဟိတအဖွဲ့များက ဟင်္သာတမြို့ ပြည်သူ့ဆေးရုံသို့ အရေးပေါ် ကူညီပို့ဆောင်ပေးခဲ့ ရသည်။ ငဝန်တာတမံ၏ မြေအောက်ပိုင်းမှ ရေစိမ့်ထွက်ကာ တာတမံနိမ့်ကျပြီး ရေကျော်စီးဝင်မှုများ ဖြစ်ပေါ်ခဲ့ခြင်း ဖြစ်သည်။ အဆိုပါ တာတမံပျက်စီးမှုကို ထိန်းချုပ်နိုင်ရေးနှင့် ရေဆက်လက်မတိုးစေရန်အတွက် အထူးပြုလုပ်ထားသည့် သဲအိတ်များ (Geo Bag) ကို အသုံးပြုကာ ပြန်လည်ပြုပြင် တာဆို့ခြင်းလုပ်ငန်းများကို နေ့ရောညပါ အရေးပေါ် အရှိန်အဟုန်မြှင့် ဆောင်ရွက်လျက်ရှိကြောင်း စစ်တပ်ဘက်က ထုတ်ပြန်ထားသည်။ #လေးမျက်နှာ

ရေကာတာ ကျိုးပေါက်မှုကြောင့် လေးမျက်နှာမြို့တွင် ပြည်သူသုံးသောင်းကျော် ရေဘေးသင့်

Aug 6

သံတွဲကို စစ်တပ်က လေကြောင်းမှ ဆက်တိုက်ဗုံးကြဲပြီး စစ်သင်္ဘောများဖြင့် ကမ်းတက်ရန် ကြိုးပမ်းနေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဩဂုတ်လ ၅ ရက်။ ရခိုင်ပြည်၊ ဂွမြို့နယ်မှတစ်ဆင့် ရခိုင်ဒေသကို ပြန်လည်သိမ်းပိုက်ရန် ကြိုးပမ်းနေသည့် စစ်တပ်သည် သံတွဲမြို့ကို လေကြောင်းမှ ဆက်တိုက်ဗုံးကြဲတိုက်ခိုက်နေသည့်အပြင် ရေပြင်ဘက်မှလည်း ရေတပ် (နေဗီ) စစ်သင်္ဘောများ ဖြင့် ကမ်းတက်ရန် ကြိုးပမ်းလာနေကြောင်း ဒေသခံများက ပြောသည်။ သံတွဲမြို့နယ်ကို စစ်တပ်က ဇူလိုင်လ ၁၉ ရက်မှ ဩဂုတ်လ ၃ ရက်အထိ ၁၅ ရက်အတွင်း လေကြောင်းဖြင့် ဆက်တိုက် ဗုံးကြဲတိုက်ခိုက်ခဲ့ရာ အရပ်သား ၇ ဦး သေဆုံးကာ ၃၆ ဦး ထိခိုက်ဒဏ်ရာရရှိခဲ့သည်။ သံတွဲ ဒေသခံတစ်ဦးက “ဩဂုတ် ၃ ရက်နေ့က စစ်တပ်က ဂျက်ဖိုက်တာ ၃ စီး၊ Y-12 ၁ စီးနဲ့ ဗုံးအလုံးရေ ၆၀ နီးပါး ကြဲချတိုက်ခိုက်ခဲ့လို့ အရပ်သား ၂ ယောက် ထိခိုက်ဒဏ်ရာရရှိခဲ့ပြီး အိမ်နဲ့ ဘန်ဂလို အလုံး ၂၀ လောက် ပျက်စီးတာ ရှိတယ်။ အခုဆို လေယာဉ်က လာရင် အုပ်စုလိုက်လာတာ” ဟု ပြောသည်။ ထိုသို့ တိုက်ခိုက်နေသည့် ကာလအတွင်း ငပလီကမ်းခြေတစ်လျှောက်တွင်လည်း ရေတပ် (နေဗီ) စစ်သင်္ဘောများ သည် ကမ်းနှင့် အနီးဆုံးနေရာများအထိ ရောက်ရှိလာခဲ့သည်။ ဗုံးကြဲတိုက်ခိုက်နေသည့် ရက်ပိုင်းအတွင်း ရေတပ်သည် မောင်ရွှေလေးကမ်းခြေ၊ ဂျိတ်တော်ဖောင်ဆိပ်၊ ဂေါ့ကမ်း ခြေနှင့် ကျွဲသောက်ကမ်းခြေတို့တွင် အသွားအလာပြုလုပ်ခဲ့ပြီး ယခင်ကထက် ကမ်းနှင့်အနီးကပ်ဆုံး အနေ အထားသို့ ရောက်ရှိလာခဲ့သည်။ ဒေသခံ ပရဟိတလုပ်ဆောင်သူနေ အမျိုးသားတစ်ဦးက “စစ်တပ်နေဗီက သံတွဲကို ဗုံးကြဲတဲ့ရက်ပိုင်းမှာ တောက် လျှောက် အသွားအလာလုပ်နေတယ်။ ကမ်းနဲ့နီးတဲ့အထိလာတယ်၊ တပ်တော်ကလည်း စောင့်ကြည့်ထားတယ်။ မောင်ရွှေလေးနဲ့ မရိုးဘေးဆိပ်ကမ်းကို အဓိကစောင့်ကြည့်တာပေါ့။ အားနည်းရင် နည်းသလို ကမ်းတပ်ဖို့ သဘောပါ။ အခုလေကြောင်းက သံတွဲကို အာဇာနည်နေ့ကတည်းက ဒီလအထိ ဆက်တိုက်ကြဲခဲ့တာပါ၊ လက်ရှိ စစ်လေယာဉ် အုပ်စုလိုက်ပြန်တာတွေ ကင်းထောက်တာတွေ ရှိနေသေးတယ်” ဟု ပြောသည်။ ရခိုင်ပြည်၊ သံတွဲမြို့နယ်ကောင်းကင်ယံတွင် စစ်တပ်၏ လေယာဉ်များသည် ဩဂုတ်လ ၅ ရက်နေ့အထိ အဆက် မပြတ် ပျံဝဲနေခဲ့ပြီး ဒေသခံအချို့မှာ စစ်ဘေးတိမ်းရှောင်နေကြရသလို နေဗီများ ကပ်လာမှုကြောင့် ကမ်းခြေ ကျေးရွာများမှ ဒေသခံများလည်း အရေးပေါ် တိမ်းရှောင်နေကြရသည်။ ဇူလိုင်လ ၂၄ ရက်က သံတွဲမြို့ပေါ်ရှိ လူနေရပ်ကွက်များကို စစ်တပ်က လေကြောင်းမှ တိုက်ခိုက်ခဲ့၍ အရပ်သား ၃ ဦး သေဆုံးကာ ၂၁ ဦးအထိ ထိခိုက်ဒဏ်ရာရရှိခဲ့သည်။ ထို့အတူ ဇူလိုင်လ ၂၃ ရက်ကလည်း ငပလီမြို့၊ ဂျိတ္တောရပ်ကွက်နှင့် လင်းသာကမ်းခြေရှိ ပြည်သူများ နေထိုင်ရာ နေရာများကို လေကြောင်းမှ ဗုံးကြဲတိုက်ခိုက်ခဲ့ရာ အရပ်သား ၇ ဦး ထိခိုက်ဒဏ်ရာရရှိပြီး နေအိမ်များနှင့် အဆောက်အအုံများ ပျက်စီးခဲ့ရသည်။ အလားတူ ဇူလိုင်လ ၃၁ ရက်ကလည်း ရွှေလှေကျေးရွာကို လေကြောင်းတိုက်ခိုက်မှုကြောင့် အရပ်သား ၄ ဦး သေဆုံးကာ ၂ ဦး ဒဏ်ရာရရှိခဲ့ပြီး၊ ဇူလိုင်လ ၁၉ ရက်က သံတွဲမြို့အတွင်း လေကြောင်းတိုက်ခိုက်ခံရမှုကြောင့် အရပ်သား ၄ ဦး ဒဏ်ရာရရှိခဲ့သည်။ ထို့ပြင် ဩဂုတ်လ ၃ ရက်နေ့တွင်လည်း ငပလီမြို့၊ ဂျိတ္တော (၉) ရပ်ကွက်ကို ဂျက်ဖိုက်တာ ၃ စီးနှင့် Y-12 လေယာဉ် ၁ စီးတို့ဖြင့် ဗုံးကြဲတိုက်ခိုက်ခဲ့ရာ အရပ်သား ၂ ဦး ဒဏ်ရာရရှိခဲ့သည်။ ဩဂုတ်လ ၃ ရက် တစ်ရက်တည်းတွင်ပင် စစ်တပ်က ဗုံးအလုံးရေ ၆၀ ခန့် ကြဲချတိုက်ခိုက်ခဲ့ရာ နေအိမ်၊ အဆောက်အအုံနှင့် ဘန်ဂလို ၂၀ ခန့် ပျက်စီးခဲ့ပြီး ကျပ်သိန်း ၃,၀၀၀ ကျော် ဆုံးရှုံးခဲ့ကြောင်း အာရက္ခတပ်တော် (AA) က ထုတ်ပြန်ထားသည်။ အဆိုပါ လေကြောင်းတိုက်ခိုက်မှုများသည် သံတွဲမြို့ပေါ်ရှိ လူနေရပ်ကွက်များအပြင် ငပလီမြို့၊ ရွှေလှေ ကျေးရွာနှင့် အခြားနေရာများသို့ပါ သက်ရောက်ခဲ့ပြီး စာသင်ကျောင်း၊ ဘုန်းကြီးကျောင်း၊ နေအိမ်နှင့် ဈေးဆိုင် များပါ ပျက်စီးဆုံးရှုံးခဲ့ရသည်။ ရခိုင်ပြည်အပါအဝင် မြန်မာနိုင်ငံတစ်ဝန်း စစ်ရေးပဋိပက္ခ ပြင်းထန်နေသည့်နေရာများတွင် စစ်တပ်၏ လေကြောင်း၊ ဒရုန်းနှင့် အမြောက်ပစ်ခတ်မှုများအပါအဝင် အဝေးမှ တိုက်ခိုက်မှုများ မြင့်တက်လာကြောင်း ပဋိပက္ခနှင့် နိုင်ငံရေးအကြမ်းဖက်မှုဆိုင်ရာ အချက်အလက်များ စောင့်ကြည့်လေ့လာသည့် ACLED ၏ ဇူလိုင်လ ၂၇ ရက်နေ့ထုတ် အစီရင်ခံစာတွင် ဖော်ပြထားသည်။ လက်ရှိတွင် သံတွဲ၊ ဂွနှင့် ကျိန္တလီမြို့တို့ရှိ အရပ်သားပြည်သူများ နေထိုင်ရာ မြို့၊ ရွာ၊ ဆေးရုံ၊ စာသင်ကျောင်းနှင့် သာသနိကအဆောက်အအုံများအား လေကြောင်းမှ အုပ်စုလိုက် နေ့ညအချိန်မရွေး ဗုံးကြဲတိုက်ခိုက်ခြင်းနှင့် ပင်လယ်ပြင်၌ တပ်စွဲထားသော စစ်သင်္ဘောများပေါ်မှ လက်နက်ကြီးများဖြင့် ပစ်ခတ်တိုက်ခိုက်ခြင်းများကို စစ်တပ်က ဆက်တိုက်ပြုလုပ်လျက်ရှိနေသည်။ #သံတွဲမြို့ #AA #စစ်တပ်

သံတွဲကို စစ်တပ်က လေကြောင်းမှ ဆက်တိုက်ဗုံးကြဲပြီး စစ်သင်္ဘောများဖြင့် ကမ်းတက်ရန် ကြိုးပမ်းနေ

Aug 6

အီလွန်မာ့စ်ခ်၏ SpaceX Falcon 9 ဒုံးပျံ အစိတ်အပိုင်း လကမ္ဘာပေါ်သို့ ဝင်ဆောင့်မိဟု ယူဆရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဩဂုတ်လ ၆ ရက်။ အမေရိကန် စပေ့စ်အိက်စ် (SpaceX) ကုမ္ပဏီ၏ ဒုံးပျံအပျက်အစီး အစိတ်အပိုင်းတစ်ခုသည် လကမ္ဘာပေါ်သို့ အရှိန်ပြင်းစွာ သွားရောက်ဆောင့်မိခဲ့ပြီဟု ပညာရှင်များက ယူဆထားကြသည်။ အဆိုပါ အစိတ်အပိုင်းမှာ ၂၀၂၅ ခုနှစ် ဇန်နဝါရီလတွင် လကမ္ဘာပေါ် ဆင်းသက်မည့် ယာဉ်နှစ်စီးကို တင်ဆောင်လွှတ်တင်ခဲ့သည့် Falcon 9 ဒုံးပျံ၏ အထက်ပိုင်း (Upper Stage) ဖြစ်သည်။ ၆ ဘီး ကုန်တင်ကားတစ်စီးစာမျှရှိပြီး အလေးချိန် ၅ တန်ခန့်ရှိသော အဆိုပါ အစိတ်အပိုင်းသည် အာကာသထဲတွင် လွင့်မျောနေရာမှ လကမ္ဘာပေါ်သို့ တစ်နာရီလျှင် မိုင်ပေါင်း ၅,၄၀၀ (တစ်နာရီ ၈,၆၉၀ ကီလိုမီတာ) အရှိန်ဖြင့် လကမ္ဘာ၏ အနောက်ဘက်အစွန်းရှိ "အိုင်စတိုင်း" (Einstein) ကျင်းကြီးအနီးသို့ သွားရောက်ဆောင့်မိခဲ့ခြင်းဖြစ်သည်။ အမေရိကန် အမျိုးသား လေကြောင်းနှင့် အာကာသ အုပ်ချုပ်ရေးအဖွဲ့ (NASA) ၏ ပြောရေးဆိုခွင့်ရှိသူက အဆိုပါ ဝင်ဆောင့်မှုကြောင့် ကမ္ဘာမြေပေါ်ရှိ ပြည်သူများအတွက် ဘေးအန္တရာယ် တစ်စုံတစ်ရာမရှိကြောင်း အတည်ပြုပြောကြားထားသည်။ ဒုံးပျံ ဝင်ဆောင့်မှုကြောင့် အကျယ် ၁၈ မီတာနှင့် အနက် ၄ မီတာရှိသော ကျင်းသစ်တစ်ခု ဖြစ်ပေါ်သွားမည်ဟု ခန့်မှန်းထားသည်။ မိုင်ပေါင်းများစွာ ကျယ်ပြန့်သည့် လကမ္ဘာမှ ဖုန်မှုန့်နှင့် အပျက်အစီး စိမ့်လှိုင်း (Plume) များ ထွက်ပေါ်လာမည်ဖြစ်သည်။ ယခုဖြစ်စဉ်သည် မတော်တဆမှုတစ်ခု ဖြစ်သော်လည်း ဒုံးပျံ၏ အရှိန်နှင့် အလေးချိန်ကို အတိအကျ သိရှိထားသဖြင့် သဘာဝ ဥက္ကာခဲများ ကျရောက်မှုကို တိုင်းတာသည့် စံချိန်စံညွှန်းများ ညှိယူရန် (Calibration) အတွက် လည်းကောင်း၊ ထွက်ပေါ်လာသည့် ဖုန်မှုန့်များကို လေ့လာ၍ လကမ္ဘာ၏ ပါဝင်ပစ္စည်း ဖွဲ့စည်းပုံကို သိရှိနိုင်ရန်အတွက် လည်းကောင်း၊ အနာဂတ်တွင် လကမ္ဘာပေါ် အခြေစိုက်စခန်း ဆောက်လုပ်မည့် အာကာသယာဉ်မှူးများအတွက် အာကာသ အပျက်အစီးများ၏ ဘေးအန္တရာယ်ကို ကြိုတင်တွက်ချက်နိုင်ရန်အတွက် လည်းကောင်း သိပ္ပံပညာရှင်များအတွက် များစွာ အသုံးဝင်မည်ဖြစ်ဟု ပညာရှင်တွေက ဆိုပါတယ်။ #SpaceX #SpaceXFalcon9

အီလွန်မာ့စ်ခ်၏ SpaceX Falcon 9 ဒုံးပျံ အစိတ်အပိုင်း လကမ္ဘာပေါ်သို့ ဝင်ဆောင့်မိဟု ယူဆရ

Aug 6

ရုရှားနှင့် ယူကရိန်းတို့အကြား ဒရုန်းထုတ်လုပ်ရေးဆိုင်ရာ ပစ်မှတ်များကို အပြန်အလှန် တိုက်ခိုက် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဩဂုတ်လ ၆ ရက်။ ရုရှားနှင့် ယူကရိန်း စစ်ပွဲအတွင်း နည်းပညာနှင့် ဒရုန်းထုတ်လုပ်ရေး ကဏ္ဍများကို ပစ်မှတ်ထားသည့် နှစ်ဖက်တိုက်ခိုက်မှုများ သိသိသာသာ ပြင်းထန်လာနေသည်။ ဩဂုတ်လ ၄ ရက် အင်္ဂါနေ့က ရုရှားနိုင်ငံအတွင်း မြို့တစ်မြို့၌ ကားဗုံးပေါက်ကွဲမှုဖြစ်ပွားခဲ့ရာ "ဗင်မ်ပိုင်ယာ" (Vampire) ဒရုန်းများ ထုတ်လုပ်ပေးနေသည့် စက်ရုံမှူး ဗလာဒီမီယာ ထကာချက် ပြင်းထန်စွာ ဒဏ်ရာရရှိခဲ့ပြီး ၎င်း၏ ယာဉ်မောင်းဖြစ်သူ သေဆုံးသွားခဲ့သည်။ ယင်းသည် ပြီးခဲ့သည့်သီတင်းပတ်အတွင်း ရုရှား ဒရုန်းထုတ်လုပ်သူများ ပစ်မှတ်ထားခံရသည့် ဒုတိယမြောက် ဖြစ်စဉ်ဖြစ်သည်။ ပထမဖြစ်စဉ်မှာ ဇူလိုင်လကုန်ပိုင်းက ဖြစ်ပွားခဲ့ပြီး "ဂက်ဒ်ဖလိုင်း" (Gadfly) ဒရုန်းအမျိုးအစားကို တီထွင်ထုတ်လုပ်သူ သေနတ်ဖြင့် ပစ်ခတ်တိုက်ခိုက်ခံခဲ့ရခြင်းဖြစ်သည်။ တစ်ချိန်တည်းမှာပင် ရုရှားတပ်ဖွဲ့များဘက်ကလည်း ယူကရိန်းမြို့တော် ကီးယက်ဖ် (Kyiv) တွင် တည်ရှိသော အမေရိကန်ကုမ္ပဏီပိုင် ဒရုန်းထုတ်လုပ်ရေးစက်ရုံကို ဒုံးကျည်ဖြင့် ပထမဆုံးအကြိမ် ပစ်ခတ်တိုက်ခိုက်ခဲ့သည်။ အဆိုပါစက်ရုံသည် ရုရှား၏ လျှပ်စစ်သံလိုက် လှိုင်းနှောင့်ယှက်မှု (Jamming) များကို ခံနိုင်ရည်ရှိသော အဝေးပစ်ဒရုန်းများကို တစ်လလျှင် အစီးရေ ၁,၀၀၀ အထိ ထုတ်လုပ်ပေးနေသည့် စက်ရုံဖြစ်သည်။ စစ်ပွဲကြာရှည်လာသည်နှင့်အမျှ နှစ်ဖက်စလုံးက စစ်မြေပြင်တွင် အရေးပါသည့် ဒရုန်းထုတ်လုပ်မှုနှင့် ကွပ်ကဲမှုကွန်ရက်များကို အဓိကထား ပစ်မှတ်ထားလာကြသည်။ #VampireDrone

ရုရှားနှင့် ယူကရိန်းတို့အကြား ဒရုန်းထုတ်လုပ်ရေးဆိုင်ရာ ပစ်မှတ်များကို အပြန်အလှန် တိုက်ခိုက်

Aug 6

စစ်မက်ဖြစ်ပွားချိန် အကျပ်အတည်းများကို ရင်ဆိုင်နိုင်ရန် ထိုင်ဝမ်ပြင်ဆင် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဩဂုတ်လ ၆ ရက်။ ထိုင်ဝမ်နိုင်ငံတွင် စစ်ပွဲဖြစ်ပွားလာပါက ကြုံတွေ့ရမည့် စိန်ခေါ်မှုများကို တုံ့ပြန်ရန် အဓိကဦးတည်သည့် ၁၀ ရက်ကြာ "ဟန်ကွမ်း" (Han Kuang) စစ်ရေးလေ့ကျင့်မှုကို ဗုဒ္ဓဟူးနေ့တွင် စတင်လိုက်ပြီဖြစ်သည်။ နှစ်စဉ် ကျင်းပမြဲဖြစ်သော ယခုစစ်ရေးလေ့ကျင့်မှုတွင် ယခင်နှင့်မတူဘဲ မျှော်လင့်မထားသည့် ရန်သူ့လှုပ်ရှားမှုများအပေါ် စစ်သေနာပတိများ၏ လက်ငင်းတုံ့ပြန် ကွပ်ကဲနိုင်စွမ်းကို အဓိကထား စမ်းသပ်သွားမည်ဖြစ်သည်။ စစ်ရေးလေ့ကျင့်မှု၏ ထူးခြားချက်များမှာ - ၁။ စစ်ပွဲအတွင်း ဆက်သွယ်ရေး လှိုင်းနှုန်း အကန့်အသတ်ရှိချိန်၌ ပြည်သူများ၏ ဆက်သွယ်ဆောင်ရွက်နိုင်စွမ်းကို စမ်းသပ်ရန် အင်တာနက် လှိုင်းနှုန်းများကို လျှော့ချထားမည်ဖြစ်သည်။ ၂။ အမေရိကန်စစ်တပ်၏ နည်းဗျူဟာများကို ပြောင်းလဲကျင့်သုံးသွားမည်ဖြစ်သည်။ ၃။ ရှေ့တန်းသတင်းထုတ်ပြန်မှုနှင့် ရန်သူ့သတင်းတုများကို တုံ့ပြန်နိုင်ရေးအတွက် သတင်းထောက်များ ပူးတွဲလိုက်ပါသည့် သတင်းတု တုံ့ပြန်ရေးစနစ်ကို စမ်းသပ်သွားမည်ဖြစ်သည်။ ယခု စစ်ရေးလေ့ကျင့်မှုတွင် အရန်တပ်ဖွဲ့ဝင် ၂၀,၀၀၀ ကျော် ပါဝင်ပြီး တိုက်လေယာဉ်များနှင့် စစ်သင်္ဘောများ အရေးပေါ် နေရာချထားမှု၊ စစ်လက်နက်ပစ္စည်းများ ရွှေ့ပြောင်းမှုနှင့် ပစိဖိတ်ကမ်းလွန် ထောက်ပံ့ရေးလမ်းကြောင်း ကာကွယ်ရေး စစ်ဆင်ရေးများကိုပါ စိစစ်စမ်းသပ်သွားမည်ဖြစ်ကြောင်း ထိုင်ဝမ်စစ်တပ်က ထုတ်ပြန်ထားသည်။ Photo:AFP #Taiawn #HanKuang

စစ်မက်ဖြစ်ပွားချိန် အကျပ်အတည်းများကို ရင်ဆိုင်နိုင်ရန် ထိုင်ဝမ်ပြင်ဆင်

« Prev 1 … 6 7 8 9 10 … 1,110 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

အိမ်ဟောင်းနံရံတွင် ဝှက်သိမ်းထားသည့် ယူရို ၉ သန်းတန်ဖိုး ရွှေများ တွေ့ရှိ — August 15, 2026 10:32 pm
လင်ကွန်းကို ဂျော့ဝါရှင်တန်ဖြင့် အစားထိုးမည် — August 14, 2026 4:38 pm
ဘရူးနိုင်းဘုရင်ကချွေးမဖြစ်သူ၏ တော်ဝင်ဘွဲ့တံဆိပ်များရုပ်သိမ်း — August 14, 2026 1:32 pm

Recent Posts

အိမ်ဟောင်းနံရံတွင် ဝှက်သိမ်းထားသည့် ယူရို ၉ သန်းတန်ဖိုး ရွှေများ တွေ့ရှိ
ထောင်တွင်း ကင်ဆာဖြစ်နေသည့် နိုင်ငံရေး အကျဉ်းသူ ၈ ဦး အသက်အန္တရာယ်ရှိနေ
မြစ်ဆုံစီမံကိန်း ပြန်စရန် စစ်အုပ်စုက လူထုစည်းရုံးမှုများ အရှိန်မြှင့်လုပ်ဆောင်နေဟု KHRW ပြော
ရခိုင်တောင်ပိုင်း စစ်အုပ်စု လေကြောင်းမှ ဗုံးကြဲမှုကြောင့် မိသားစုဝင်များအပါအဝင် ၈ ဦး သေဆုံး
လင်ကွန်းကို ဂျော့ဝါရှင်တန်ဖြင့် အစားထိုးမည်

Archives

Archives

×Close