NMG Doh – Page 6 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
နိုင်ငံတကာသတင်း
NMG အကြောင်း
Contact

Home
Author Archive

NMG Doh

Author: NMG Doh

Aug 10

သံတွဲ ကျောက်ကြီးရွာကို စစ်တပ် လေယာဉ်ဖြင့် ဗုံးကြဲ၍ ပြည်သူ ၁၀ ဦးထက်မနည်း သေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဩဂုတ်လ ၁၀ ရက်။ ရခိုင်ပြည်၊ သံတွဲမြို့နယ်၊ ကျောက်ကြီးကျေးရွာကို စစ်တပ်က လေကြောင်းမှ ဗုံးကြဲတိုက်ခိုက်ခဲ့ရာ အရပ်သား ပြည်သူ ၁၀ ဦးထက်မနည်း အစုလိုက်အပြုံလိုက် သေဆုံးခဲ့ရသည်ဟု အာရက္ခတပ်တော် AA နှင့် ပြည်သူများက ပြောသည်။ ဩဂုတ်လ ၁၀ ရက်နေ့၊ နေ့လယ် ၁ နာရီခန့်တွင် ဂျက်တိုက်လေယာဉ်တစ်စီးဖြင့် မိနစ် ၂၀ ခန့် လှည့်ပတ်ကာ ပေါင် ၃၀၀ ဟု ယူဆရသည့် ဖျက်အားပြင်းဗုံးများ ကြဲချခဲ့သဖြင့် အရပ်သားပြည်သူ ၁၀ ဦးထက်မနည်း အစုလိုက်အပြုံလိုက် သေဆုံးခဲ့ကြောင်း အာရက္ခတပ်တော်က ထုတ်ပြန်ထားသည်။ အဆိုပါ ဗုံးသီးများသည် ကျောက်ကြီးကျေးရွာ ဓမ္မရောင်ခြည် ဘုန်းကြီးကျောင်း အနီးပတ်ဝန်းကျင်သို့ ကျရောက်ပေါက်ကွဲခဲ့ခြင်းဖြစ်ပြီး သေဆုံးသူများအပြင် ဒေသခံ ၈ ဦး ဒဏ်ရာရရှိကာ ၂ ဦး ပျောက်ဆုံးနေဆဲ ဖြစ် သည်။ ထို့ပြင် ပတ်ဝန်းကျင်ရှိ အရပ်သား နေအိမ် အဆောက်အအုံ ၂၀ ခန့်လည်း လုံးဝနီးပါး ပျက်စီးသွားခဲ့သည်။ သံတွဲမြို့နယ် ဒေသခံတစ်ဦးက “လေယာဉ်သံ ကြားတော့ ကျောင်းနားက ဗုံးခိုကျင်းဘက် ပြေးကြတာပါ။ ဂျက် ဖိုက်တာက ဝဲနေပြီးတော့ ဝုန်းဆို ပေါက်ကွဲသံကြီး ၃ ချက် ဆက်တိုက် ကြားလိုက်ရတယ်။ ခနနေတော့ ဘုန်း ကြီး ကျောင်းဘေးက အိမ်တွေ အကုန်လုံးလည်း ပျက်စီးကုန်တယ်။ အကုန် ကြေမွသွားတာပဲ။ လူတွေလည်း ပြန့်ကျဲပြီး သေကုန်ကြတယ်၊ ဒဏ်ရာ ရတဲ့သူ တွေလည်း များတယ်။ အကုန်လုံး ငို၊ အော်ပြီး အကူအညီ တောင်းနေကြရတယ်” ဟု ပြောသည်။ သံတွဲမြို့နယ်အတွင်းရှိ ကျေးရွာများကို စစ်တပ်က လေကြောင်းမှ ဆက်တိုက် ပစ်မှတ်ထား တိုက်ခိုက်နေခြင်း ဖြစ်သည်။ ပြီးခဲ့သည့် ဩဂုတ်လ ၃ ရက်နေ့ကလည်း ငပလီမြို့၊ ဂျိတ္တော (၉) ရပ်ကွက်ရှိ ပြည်သူများ နေထိုင်ရာ နေရာများကို တိုက်လေယာဉ် အုပ်စုလိုက်ဖြင့် ဗုံးအလုံးရေ ၆၀ နီးပါး ကြဲချခဲ့သေးသည်။ ထို့ပြင် ပြီးခဲ့သည့် ဇူလိုင်လ ၁၉ ရက်၊ ၂၃ ရက်၊ ၂၄ ရက်၊ ၂၇ ရက်နှင့် ၃၁ ရက်နေ့တို့တွင်လည်း သံတွဲမြို့နယ် အတွင်းရှိ ကျေးရွာများကို စစ်တပ်က နေ့ရော ညပါ လေကြောင်းမှ အကြိမ်ကြိမ် ဗုံးကြဲခဲ့သဖြင့် အရပ်သား သေဆုံး ဒဏ်ရာရရှိသူ များပြားခဲ့ပြီး အဆောက်အအုံ အများအပြား ပျက်စီးခဲ့ရသည်။ သံတွဲရှိ ဒေသခံ စစ်ဘေးရှောင် အမျိုးသားတစ်ဦးက “အခုက ရွာထဲမှာ တိုက်ပွဲဖြစ်နေတာလည်း မဟုတ်ဘူး။ ရွာတွေကို လေယာဉ်နဲ့ တမင် လိုက်ကြဲနေတာ။ ပြည်သူတွေမှာ ဘယ်အချိန် လေယာဉ်လာမလဲဆိုပြီး ကြောက် လန့်နေရတယ်။ ညဘက်လည်း သတိထား အိပ်နေကြရတာပဲ။ လေယာဉ်သံ ကြားတာနဲ့ တောထဲပြေး ပုန်း အဲ့လိုမျိုးနေကြရတာ” ဟု ပြောသည်။ လက်ရှိတွင် အာရက္ခတပ်တော် (AA) က မိဘပြည်သူများအနေဖြင့် စစ်တပ်၏ လေကြောင်းနှင့် ရေကြောင်း အန္တရာယ်များကို ယခင်ထက် ပိုမိုဂရုစိုက်ကြရန် အသိပေး တိုက်တွန်းထားပြီး ယနေ့ ကျောက်ကြီးကျေးရွာ လေကြောင်း တိုက်ခိုက်ခံရမှုတွင် သေဆုံး၊ ထိခိုက်ဒဏ်ရာရသည့် စာရင်းအသေးစိတ်ကို ထပ်မံ ထုတ်ပြန်ပေး သွားမည်ဟု ဆိုသည်။ #သံတွဲ #ကျောက်ကြီးရွာ

သံတွဲ ကျောက်ကြီးရွာကို စစ်တပ် လေယာဉ်ဖြင့် ဗုံးကြဲ၍ ပြည်သူ ၁၀ ဦးထက်မနည်း သေဆုံး

Aug 10

အမျိုးသမီးတစ်ဦး စလော့ငါးပစ်ဂိမ်းရှုံး၍ ၆ နှစ်ရွယ်ကလေးကို သတ်ဖြတ်ခဲ့ကြောင်း ဝန်ခံ သတင်းနှင့်မီဒီယာ ကွန်ရက်။ ၂၀၂၆ ခုနှစ်၊ ဩဂုတ်လ ၁၀ ရက်။ ရှမ်းပြည် တောင်ပိုင်း၊ ကလောမြို့နယ်၊ အောင်ပန်းမြို့အနီးတွင် စလော့ငါးပစ်ဂိမ်း ရှုံးနိမ့်သဖြင့် ၆ နှစ်အရွယ် သူငယ်တန်း (KG) ကျောင်းသူ မဆောင်းနှင်းအား သွေးဆောင်ဖြားယောင်း ခေါ်ဆောင်သွားပြီးနောက် သတ်ဖြတ် ၍ နားကပ်လုယက်ယူဆောင်ခဲ့ကြောင်း တရားခံဖြစ်သူက ဝန်ခံထွက်ဆိုလိုက်သည်။ ပြစ်မှုကျူးလွန်သူမှာ နောင်ရဲကျေးရွာနေ အသက် ၁၉ နှစ်အရွယ် မမိုးမိုးထွေး (ခေါ်) မိုးစက် ဆိုသူဖြစ်ပြီး ဩဂုတ် လ ၆ ရက်နေ့ ညနေပိုင်းတွင် စလော့ဂိမ်း ရှုံးလာသဖြင့် ယခုကဲ့သို့ ကြံစည်ခဲ့ခြင်းဖြစ်ကြောင်း ဝန်ခံထားသည်။ ၎င်းသည် ကလေးငယ်အား သတ်ဖြတ်၍ နားကပ်လုယူခဲ့ပြီးနောက် အလောင်းကို အောင်ပန်းမြို့အနီး ဘုရားတောင်ကျေးရွာရှိ ရေတွင်းပျက်တစ်ခုအတွင်း ပစ်ချစွန့်ပစ်ခဲ့ရာ မိသားစုဝင်များနှင့် လူမှုကူညီရေးအသင်း များက ဝိုင်းဝန်းရှာဖွေခဲ့ကြသဖြင့် အခင်းဖြစ်ပွားသည့်နေ့ ည ၁၁ နာရီခန့်တွင် ပြန်လည်တွေ့ရှိခဲ့ရခြင်း ဖြစ်သည်။ ကလေးအား ခေါ်ဆောင်သွားရာ၌ တွေ့ရှိခဲ့သည့် မျက်မြင်သက်သေ အချို့၏ သတင်းပေးမှု၊ သဲလွန်စများအရ ဩဂုတ်လ ၈ ရက်နေ့ ည ၆ နာရီကျော်ခန့်တွင် တရားခံကို လက်ရဖမ်းဆီးနိုင်ခဲ့သည်။ ကလေးနှင့် နီးစပ်သူ တစ်ဦးက “နားကပ်က သူ့ဆီမှာတွေ့တယ်လို့ လာပြောတာလည်း ပါတယ်။ နောက်ပြီးတော့ ကလေးကို သူချီခေါ်သွားတာလည်း တွေ့တဲ့လူရှိတယ်။ အဲဒါနဲ့ ခေါ်စစ်တော့ သူလည်း ကလေးဆိုတော့ ကြောက် ကြောက်နဲ့ ဝန်ခံတယ်။ တကယ်တော့လည်း ကလေးချင်းချင်း ဖြစ်ကြတာပါ။ နိုင်ငံရေးမကောင်းတော့ ကလေး တွေလည်း စိတ်လေ၊ အာရုံတွေများ လုပ်မိလုပ်ရာ လုပ်နေကြတာ။ မိဘတွေလည်း မနိုင်တော့ဘူး” ဟု ပြော သည်။ လက်ရှိတွင် အသက် ၁၉ နှစ်အရွယ် တရားခံ မမိုးမိုးထွေး (ခေါ်) မိုးစက်ကို အောင်ပန်းမြို့ နယ်မြေရဲစခန်းမှ ရာဇသတ်ကြီး ဥပဒေပုဒ်မ ၃၀၂ (လူသတ်မှု)၊ ပုဒ်မ ၃၉၄ (လုယက်မှုတွင် နာကျင်စေမှု) တို့ဖြင့် အမှုဖွင့် တရားစွဲ ဆိုထားပြီး မြို့နယ်အဆင့် ရဲစခန်းသို့ ရွှေ့ပြောင်း ပို့ဆောင်သွားမည်ဟု သိရသည်။ အမှုလေ့လာစောင့်ကြည့်နေသည့် ဒေသခံ တစ်ဦးက “အခုကတော့ ဥပဒေအတိုင်း သွားကြမယ် ထင်ပါတယ်။ ဒီဖက်ကလည်း ကလေးတစ်ယောက်လုံး သေထားတာဆိုတော့ ကျေအေးမယ့်ပုံ မပေါ်ဘူး။ ဟိုဖက်ကလည်း ကလေးဆိုပေမယ့် ၁၉ နှစ်ဆိုတော့ အသက်ပြည့်ပြီလေ။ စလော့ဂိမ်းလည်း ဆော့တာဆိုတော့ အမှုထပ်တိုးမယ် ထင်တယ်” ဟု ပြောသည်။ အလားတူ ကလောမြို့နယ်နှင့် နီးစပ်သည့် ပင်းတယမြို့နယ်၊ ဘုရားဖြူကျေးရွာတွင်လည်း လွန်ခဲ့သည့် မေလ ၁၉ ရက်နေ့ ညပိုင်းခန့်က စလော့ဂိမ်းစွဲနေသည့် မူလတန်းပြ ကျောင်းဆရာမတစ်ဦးမှ တစ်ရွာတည်းနေ သားအမိ နှစ်ဦးအား ဓားဖြင့်ခုတ်သတ်ကာ ငွေကြေးလုယက်မှု ဖြစ်ပွားခဲ့ဖူးသည်။ ရှမ်းပြည်နယ်တောင်ပိုင်းရှိ ကလော၊ ပင်းတယ၊ ရွာငံ၊ ရပ်စောက်နှင့် ညောင်ရွှေ စသည့် မြို့နယ်များတွင် စလော့ ဂိမ်းစွဲလမ်းသူများ နေ့စဉ်နှင့်အမျှ တိုးပွားလာနေပြီး ယင်းနှင့်ဆက်စပ်သည့် ဒုစရိုက်မှုများလည်း ဖြစ်ပွားလျက်ရှိသည်ဟု စုံစမ်းသိရသည်။ #စလော့ဂိမ်း

အမျိုးသမီးတစ်ဦး စလော့ငါးပစ်ဂိမ်းရှုံး၍ ၆ နှစ်ရွယ်ကလေးကို သတ်ဖြတ်ခဲ့ကြောင်း ဝန်ခံ

Aug 10

ထိုင်းနိုင်ငံ နွန်ထဘူရီ၌ နောက်တကြိမ် သေနတ်ပစ်မှု ဖြစ်ပွား သတင်းနှင့် မီဒီယာ ကွန်ရက်။ ၂၀၂၆ ခုနှစ် ဩဂုတ်လ ၁၀ ရက်။ စစ်အုပ်စု ခေါင်းဆောင် မင်းအောင်လှိုင် ထိုင်းနိုင်ငံတွင်ရှိနေစဉ် သေနတ်ပစ်မှု ဖြစ်ပွားခဲ့သည့် နွန်ထဘူရီ Nonthaburi မြို့တွင် ယနေ့ နံနက်ပိုင်းက သေနတ်ပစ်ခတ်မှု နောက်တကြိမ် ထပ်မံ ဖြစ်ပွားခဲ့သည်။ ထိုင်းနိုင်ငံ၊ နွန်ထဘူရီခရိုင် အစိုးရရုံးဝင်းအတွင်းရှိ ခရိုင်အုပ်ချုပ်ရေးအဖွဲ့ (PAO) ရုံးရှေ့၌ ယနေ့ ဩဂုတ်လ ၁၀ ရက်၊ နံနက် ၁၀ နာရီ ၂၀ မိနစ်အချိန်ခန့်က သေနတ်ဖြင့် ပစ်ခတ်မှုတစ်ရပ် ဖြစ်ပွားခဲ့ခြင်း ဖြစ်သည်။ နွန်ထဘူရီခရိုင် PAO ဥက္ကဋ္ဌ ရဲမှူးကြီး ထောင်ချိုင်း ယန်ပရာဆတ် (Pol Col Thongchai Yenprasert) နှင့် ၎င်း၏ ယာဉ်မောင်းဖြစ်သူတို့ ဒဏ်ရာပြင်းထန်စွာ ရရှိခဲ့သည်ဟု Khaosod သတင်းတွင် ဖော်ပြသည်။ ဖြစ်စဉ်မှာ PAO ဥက္ကဋ္ဌ ရဲမှူးကြီး ထောင်ချိုင်းသည် ရုံးဝင်းအတွင်းမှ မော်တော်ယာဉ်ဖြင့် ထွက်ခွာရန် ပြင်ဆင်နေစဉ် နွန်သဘူရီခရိုင် လွှတ်တော်အမတ်ဟောင်း ဖြစ်သူ ချလောင် ရီယောင်ဝမ် (Chalong Riaowrang) က မော်တော်ယာဉ်အနီးသို့ လာရောက်၍ မှန်တံခါးကို ခေါက်ခဲ့ခြင်းဖြစ်သည်။ ၎င်းနောက် စကားပြောဆိုရန် မှန်တံခါးအောက်သို့ လျှော့ချပေးစဉ် လွှတ်တော်အမတ်ဟောင်း ချလောင်မှ သေနတ်ဖြင့် အနီးကပ် စတင်ပစ်ခတ်ခဲ့ခြင်း ဖြစ်သည်။ အဆိုပါ ပစ်ခတ်မှုကြောင့် PAO ဥက္ကဋ္ဌ ရဲမှူးကြီး ထောင်ချိုင်းတွင် အသက်အန္တရာယ် ရှိနိုင်သော နေရာ ၄ ခုတွင် သေနတ်ဒဏ်ရာများ ရခဲ့ပြီး ယာဉ်မောင်းဖြစ်သူမှာလည်း ကျည်ထိမှန်ဒဏ်ရာ ရရှိခဲ့သည်။ ဖြစ်စဉ်ဖြစ်ပွားပြီးသည်နှင့် အနီးစပ်ဆုံး ကယ်ဆယ်ရေးအဖွဲ့များက အရေးပေါ် ရှေးဦးပြုစုခြင်း (CPR) များ ဆောင်ရွက်ပေးခဲ့ပြီး ဒဏ်ရာရရှိသူ နှစ်ဦးလုံးအား ဖြာနန်းကလောင်း (Phra Nang Klao) ဆေးရုံသို့ အရေးပေါ် ပို့ဆောင်ဆေးကုသမှု ပေးခဲ့သည်။ ကျူးလွန်သူ လွှတ်တော်အမတ်ဟောင်း ချလောင်သည် ပစ်ခတ်ပြီးနောက် လက်နက်အား ခါးကြားသို့ ထိုးထည့်ကာ အခင်းဖြစ်ပွားရာမှ ထွက်ခွာသွားပုံကို အနီးရှိ ပြည်သူ့ကျန်းမာရေးရုံး ဝန်ထမ်းများ၏ ဗီဒီယိုမှတ်တမ်းတွင် တွေ့ရှိရသည်။ ၎င်းနောက် ရဲစခန်းသို့ သွားရောက်ကာ အသုံးပြုခဲ့သည့် လက်နက်နှင့်တကွ ကိုယ်တိုင် လာရောက် အပ်နှံခဲ့သည်။ ပြစ်မှုကျူးလွန်ရသည့် အကြောင်းအရင်းနှင့် ပတ်သက်၍ ကျူးလွန်သူ ချလောင်သည် ပစ်ခတ်မှုအပြီးတွင် ၎င်းတို့၏ ရုပ်သံအစီအစဉ်သို့ ဖုန်းဆက်သွယ်ခဲ့သည်ဟု သတင်းမီဒီယာ တင်ဆက်သူ အန်ဂျလီ "ဂျဲဖုန်း" ပိုင်ရီရက်ခ် (Anjalee "Jae Pong" Pairirak) က ပြောသည်။ ထိုသို့ ဆက်သွယ်ရာ၌ ဘတ် ၁၁ သန်း ငွေကြေးအငြင်းပွားမှုနှင့် လွှတ်တော်အမတ်လောင်း ရွေးချယ်မှုဆိုင်ရာ နိုင်ငံရေး မပြေလည်မှုများကြောင့် ယခုကဲ့သို့ ပြုလုပ်ခဲ့ခြင်းဖြစ်ကြောင်း ပြောဆိုခဲ့သည်ဟုဆိုသည်။ သို့သော်လည်း အဆိုပါ ငွေကြေးနှင့် နိုင်ငံရေးဆိုင်ရာ စွပ်စွဲချက်များအား သီးခြား အတည်ပြုနိုင်ခြင်း မရှိသေးဘဲ၊ သက်ဆိုင်ရာ ရဲတပ်ဖွဲ့ကလည်း ဖြစ်စဉ်ဖြစ်ပွားရသည့် အကြောင်းအရင်းမှန်ကို အတည်ပြုနိုင်ရေးအတွက် ဆက်လက် စုံစမ်းစစ်ဆေးလျက် ရှိသည်။ လက်ရှိတွင် နွန်ထဘူရီခရိုင် အုပ်ချုပ်ရေးမှူး ချက်ထာ မိုဆီကာရတ် (Chettha Mosikarat) နှင့် သက်ဆိုင်ရာ ရဲတပ်ဖွဲ့ တာဝန်ရှိသူများက အခင်းဖြစ်ပွားရာ နေရာသို့ သွားရောက် စစ်ဆေးပြီး သက်သေအထောက်အထားများ ကောက်ယူခြင်း၊ မျက်မြင်သက်သေများအား စစ်ဆေးမေးမြန်းခြင်းတို့ကို ဆောင်ရွက်လျက်ရှိကြောင်း Khaosod သတင်းတွင် ဖော်ပြသည်။ Photo: Police/ Wassayos Ngamkham   #PolColThongchaiYenprasert

ထိုင်းနိုင်ငံနွန်ထဘူရီ၌ နောက်တကြိမ် သေနတ်ပစ်မှု ဖြစ်ပွား

Aug 10

စစ်တွေတွင် စစ်တပ်က ရေရှည်ခံစစ်အတွက် ပြင်ဆင်ပြီး ခံစစ်စခန်းများ တိုးချဲ့ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဩဂုတ်လ ၁၀ ရက်။ ရခိုင်ပြည်၊ စစ်တွေမြို့တွင်း၌ စစ်တပ်က ရေရှည်မြို့စောင့် ခံစစ်အတွက် ပြင်ဆင်လျက်ရှိပြီး ဆတ်ရိုးကျချောင်း အနီး ကုန်းမြေနှင့် ရေပြင် နှစ်ခုစလုံးတွင် ခံစစ်စခန်းအချို့ တိုးချဲ့တည်ဆောက်နေကြောင်း စစ်ရေးသတင်း အရင်း အမြစ်များက ပြောသည်။ လက်ရှိတွင် ကုလားတန်မြစ်ဝနှင့် စစ်တွေကမ်းလွန် ပင်လယ်ပြင်တို့၌ စစ်ရေယာဉ်များကို ပိတ်ဆို့တပ်စွဲထား သည့် အပြင် ဆတ်ရိုးကျတံတားအနီး အဆောက်အအုံအချို့၌ စခန်းချထားကာ ဆတ်ရိုးကျချောင်းအတွင်း၌ လည်း ခံစစ်အဆောက်အအုံ အသေးစားတစ်ခုကို တည်ဆောက်လျက်ရှိသည်။ စစ်တွေမြို့ စစ်ရေးသတင်းအရင်းအမြစ်က “စစ်တွေမြို့က စစ်တပ်လုံခြုံရေးကို ခန့်မှန်းဖို့ ခက်တယ်၊ သေချာ တာကတော့ ခံစစ်ကို အသေတည်ဆောက်တဲ့ပုံစံ၊ ဆတ်ရိုးကျ တဘက်ကမ်းက ရွာတွေကို မီးရှို့ဖြိုဖျက်ပြီးလို့ တော်တော်ကြာတဲ့အထိ ချောင်းထဲမှာရော ကမ်းမှာရော အသွားအလာ အဆုတ်အတက်ပဲ လုံခြုံရေးများတယ်” ဟု ပြောသည်။ ဆတ်ရိုးကျချောင်းအနီးရှိ ဒေသခံနေအိမ်အချို့နှင့် ဆိုင်ခန်းများကို စစ်တပ်က ပြောင်းရွှေ့ခိုင်းသည်ဟု ဒေသ တွင်းသတင်းများ၌ ဖော်ပြထားသော်လည်း ယင်းအချက်ကို သတင်းနှင့် မီဒီယာ ကွန်ရက် အနေဖြင့် သီးခြား အတည် မပြုနိုင်သေးပေ။ စစ်တပ်သည် စစ်တွေမြို့၌ ခံစစ်အတွက် အဆင့်မြှင့်တင် ပြင်ဆင်လျက်ရှိရာ စစ်တွေလေဆိပ်နှင့် တပ်ရင်း/တပ်ဖွဲ့ စခန်းများ ပတ်လည်တွင် လက်နက်ကြီးများ ပစ်ကူပေးနိုင်ရန် အသင့်ပြင်ထားပြီး မြို့တွင်း လူနေအိမ်အချို့၌ လည်း တစ်ခါတရံ တပ်စွဲနေထိုင်မှုများ ရှိနေသည်ဟု ဒေသခံများက ပြောသည်။ စစ်တွေဒေသခံက “အခုရက်ပိုင်းမှာတော့ ဆတ်ရိုးကျချောင်းကမ်းနားက အဆောက်အအုံတွေမှာ တပ်စွဲထားပြီ။ ချောင်းထဲမှာလည်း အဆောက်အအုံ အသေးတစ်ခု ဆောက်နေတယ်။ ဆတ်ရိုးကျဘက်ကနေ အေအေ ဝင်လာနိုင်တယ်လို့ ယူဆပုံ ပါပဲ” ဟု ပြောသည်။ ထို့ပြင် စစ်တွေ-ရန်ကုန် လမ်းမကြီး အပါအဝင် မြို့ဝင်လမ်းကြောင်းများနှင့် တံတားများကို ဘာရိယာ (Barrier) များ (ကွန်ကရင်တုံးများ၊ သံဆူးကြိုး တားတုံးများ)၊ သဲအိတ်များနှင့် ဆူးကြိုးခွေများဖြင့် ပိတ်ဆို့ထားကာ စစ်ဆေးရေးဂိတ်များကို တိုးမြှင့်ထားသည်။ မြို့ပေါ်ရပ်ကွက်များ၊ စုပေါင်းရုံးအနီး၊ လမ်းဆုံလမ်းခွများနှင့် အစိုးရရုံးစိုက်ရာ နယ်မြေများ၌လည်း ဘန်ကာ အသစ်များ ဆောက်လုပ်ခြင်း၊ ကင်းစခန်း အင်အား ပိုမိုချထားခြင်းများ ဆောင်ရွက်ထားသည်။ လက်ရှိတွင် စစ်တွေမြို့ကို အာရက္ခတပ်တော် (AA) က ဝန်းရံပိတ်ဆို့ထားခြင်း ဖြစ်ပြီး ရေချမ်းပြင်ကျေးရွာအနီး၊ ဝါဘိုကျေးရွာအနီးနှင့် စစ်တွေ-ရသေ့တောင် နယ်စပ်နေရာများကို စစ်တပ်နှင့် AA တို့ နယ်မြေစိုးမိုးနိုင်ရေး အပြိုင်အဆိုင် ကြိုးပမ်းလျက်ရှိသည်။ ဓါတ်ပုံ - RFA #စစ်တွေမြို့

စစ်တွေတွင် စစ်တပ်က ရေရှည်ခံစစ်အတွက် ပြင်ဆင်ပြီး ခံစစ်စခန်းများ တိုးချဲ့

Aug 10

မကွေး-ရခိုင်အစပ် တိုက်ပွဲပြင်းထန်၊ လေကြောင်းတိုက်ခိုက်မှုကြောင့် ၂ ဦးသေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဩဂုတ်လ ၁၀ ရက်။ မကွေးတိုင်း ငဖဲမြို့နယ် နတ်ရေကန်နှင့် ရခိုင်ပြည် နယ်စပ်တွင် တိုက်ပွဲများ ပြင်းထန်လျက်ရှိပြီး စစ်တပ် က အမ်းမြို့နယ်အတွင်းသို့ လေကြောင်းမှ ဗုံးကြဲတိုက်ခိုက်ခဲ့သလို ထိုးစစ်စတင်သည့် လှုပ်ရှားမှုအချို့ ရှိလာကြောင်း ဒေသခံ စစ်ရေးသတင်း အရင်းအမြစ်များက ပြောသည်။ ဩဂုတ်လ ၆ ရက်နေ့မှ ၉ ရက်နေ့အထိ အဆိုပါ နယ်စပ်တစ်လျှောက် တိုက်ပွဲအချို့ ဖြစ်ပွားခဲ့ကာ နတ်ရေကန် တောင် ပတ်ဝန်းကျင်နေရာများကို စစ်တပ်က ဗုံးကြဲတိုက်ခိုက်ခဲ့သည်။ ထို့ပြင် အာရက္ခတပ်တော် (AA) ထိန်းချုပ်ထားသည့် အမ်းမြို့နယ်၊ တလိုင်းတောင်ကျေးရွာရှိ ပြည်သူများနေထိုင် ရာ နေရာသို့ ဩဂုတ်လ ၈ ရက် ည ၉ နာရီခွဲခန့်တွင် စစ်တပ်က ညအချိန် ဗုံး ၂ လုံး ကြဲချခဲ့သည်။ လေကြောင်းမှ ဗုံးကြဲချမှုကြောင့် တလိုင်းတောင်ကျေးရွာရှိ ကိုအောင်ပိုင် မိသားစုပိုင်ဆိုင်သည့် နေအိမ်နှင့် ကား ဝပ်ရှော့ အလုပ်ရုံအဆောင်တို့ လုံးဝပျက်စီးသွားခဲ့ပြီး အိမ်အတွင်းရှိ ကိုအောင်ပိုင်၏ မိခင်ဖြစ်သူ ဒေါ်မလေးငယ် (၆၇ နှစ်) နှင့် ကားဝပ်ရှော့အလုပ်သမား မောင်မောင်ဉာဏ် (၂၃ နှစ်) တို့ ၂ ဦးမှာ ဗုံးစထိမှန်၍ သေဆုံးသွားခဲ့သည်။ ဖြစ်စဉ်ကို သိရှိသည့် ဒေသခံတစ်ဦးက “ညဘက်ပိုင်းကို ဂျက်ဖိုက်တာနဲ့ ဗုံးကြဲလိုက်တာဆိုတော့ ကိုအောင်ပိုင် တို့ မိသားစု အိမ်နဲ့ ကားဝပ်ရှော့ပါ လုံးဝ ပျက်စီးသွားတယ်။ အိမ်ထဲမှာရှိတဲ့ မိခင်ဖြစ်သူနဲ့ ဝပ်ရှော့အလုပ်သမား မောင်မောင်ဉာဏ်တို့ ၂ ယောက်ကတော့ ဗုံးစထိပြီး နေရာမှာတင် ပွဲချင်းပြီး သေဆုံးခဲ့ရတယ်” ဟု ပြောသည်။ ထို့ပြင် ကိုအောင်ပိုင်၏ ဇနီး၊ သမီးနှင့် ဝပ်ရှော့အလုပ်သမား မောင်ထွန်းထွန်းဝင်းတို့ ၃ ဦးမှာလည်း ထိခိုက် ဒဏ်ရာများ ရရှိခဲ့ပြီး ကား ၅ စီး ပျက်စီးခဲ့သည်။ နတ်ရေကန်သည် မကွေးတိုင်းဒေသကြီး (ငဖဲမြို့နယ်) နှင့် ရခိုင်ပြည် (အမ်းမြို့နယ်) နယ်နိမိတ် ထိစပ်နေသည့် မင်းဘူး - အမ်း ကားလမ်းပေါ်ရှိ တောင်ကြားနယ်မြေ ဖြစ်ပြီး မကွေးတိုင်းအတွင်းသို့ စစ်ရေးအရ ဝင်ရောက်နိုင် သည့် မဟာဗျူဟာမြောက် နယ်မြေဖြစ်သောကြောင့် နှစ်ဖက်စလုံးက အရေးပါသော စစ်မျက်နှာအဖြစ် တိုက်ပွဲ များ ပြင်းထန်နေခြင်း ဖြစ်သည်။ ငဖဲမြို့နယ်ရှိ စစ်ရေးသတင်းအရင်းအမြစ်က “စစ်တပ်ဘက်က ပဒါန်း ကပစ - ၁၄ ဘက်က စစ်မှုထမ်း သင်တန်း ဆင်းတွေ စစ်အင်အား ရာနဲ့ချီ စစ်ကြောင်းတွေ ခွဲပြီး နတ်ရေကန် စစ်မျက်နှာကို ဆက်တိုက် ပို့ဆောင်နေတယ်။ AA က မဟာမိတ် ပူးပေါင်းတပ်တွေက လမ်းခုလတ်က ကြားဖြတ် တိုက်တယ်။ ပိတ်ဆို့ ဟန့်တားတယ် မနိုင် တော့ စစ်တပ်ကဗုံးကြဲတယ်။ တကယ်တော့ နတ်ရေကန်ကမ္ဘာလုံး စခန်းကို အေအေလည်း မထိန်းချုပ်နိုင်သေး ဘူး။ အဲ့တော့ အမ်းကိုပါ အခု ထိုးစစ်ဆင်နေတယ်လို့ အပြကောင်းအောင် စစ်တပ်ကလုပ်လာတာပါ” ဟု ပြော သည်။ စစ်တပ်သည် AA ပိတ်ဆို့ထားသည့် နတ်ရေကန်သို့ ထိုးဖောက်ရန် အပြင်းအထန် ကြိုးစားနေပြီး ပဇီနှင့် ဂုတ်ကြီး ကျေးရွာများတွင် အင်အားဖြည့်တင်း၍ ထိုးစစ်စတင်နေသည့်အပြင် Y-8 လေယာဉ်ဖြင့် လက်နက်ခဲယမ်းနှင့် စားနပ်ရိက္ခာများကို နတ်ရေကန်သို့ ဖြည့်တင်းထားကြောင်း မြေပြင်သတင်းရင်းမြစ်များက ပြောသည်။ #နတ်ရေကန်တိုက်ပွဲ #ငဖဲမြို့နယ်

မကွေး-ရခိုင်အစပ် တိုက်ပွဲပြင်းထန်၊ လေကြောင်းတိုက်ခိုက်မှုကြောင့် ၂ ဦးသေဆုံး

Aug 10

ထိုင်းမြောက်ပိုင်း ခရိုင် ၅ ခု၌ ရေကြီးရေလျှံ၊ ၂၄ နာရီ စောင့်ကြည့်ရန် ညွှန်ကြား သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဩဂုတ်လ ၁၀ ရက်။ ထိုင်းနိုင်ငံ မြောက်ပိုင်း ခရိုင်များ၌ ရေကြီးရေလျှံမှုများ ဖြစ်ပွားနေသဖြင့် ထိုင်းအစိုးရက ၂၄ နာရီ အနီးကပ် စောင့်ကြည့်ရန် ညွှန်ကြားထားသည်။ ချင်းရိုင်၊ ချင်းမိုင်၊ မယ်ဟောင်ဆောင်၊ နန့် နှင့် လန်းပန်း ခရိုင် ၅ ခုတွင် ရေကြီးရေလျှံမှုများ ကြုံတွေ့နေရခြင်း ဖြစ်သည်။ ချင်းရိုင်ခရိုင်၊ ဝီယံပါပေါင်း (Wiang Pa Pao) မြို့နယ်၊ ချင်းရိုင်-ချင်းမိုင် လမ်းမကြီးပေါ်တွင် ရုတ်တရက် ရေကြီးရေလျှံမှု ဖြစ်ပွားခဲ့သည်။ လတ်တလောတွင် ရေပြန်ကျသွားပြီဖြစ်၍ ယာဉ်များ ပုံမှန်သွားလာနိုင်သော်လည်း သတိထားမောင်းနှင်ကြရန် အသိပေးထားသည်။ မယ်ဟောင်ဆောင်ခရိုင်အတွင်းရှိ ဗန့်ခါ့ဟန် (Ban Khahan) ကျေးရွာတွင်လည်း ရုတ်တရက် တောင်ကျရေဆင်းလာသဖြင့် ဒေသခံများ အရေးပေါ် ပစ္စည်းရွှေ့ပြောင်းခဲ့ကြရသည်။ ချင်းမိုင်မြို့တွင်း ဖြတ်သန်းစီးဆင်းသည့် ပင်းမြစ် (Ping River) ရေလျှံတက်လာရာ ဝပ်ခက် (Wat Ket) ရပ်ကွက်ရှိ မြစ်ကမ်းဘေးဆိုင်များနှင့် စားသောက်ဆိုင်များအတွင်း ရေဝင်ရောက်ခဲ့သဖြင့် ဆိုင်အချို့ ခေတ္တပိတ်ထားရသည်။ ချင်းမိုင်နှင့် တစ်နာရီကျော်ခန့် ကွာဝေးသည့် လန်းပန်းခရိုင်၊ ဟန်ချတ် (Hang Chat) မြို့နယ်ရှိ မီးရထားသံလမ်းအောက် လမ်းကူးတွင် တောင်ကျရေကြောင့် ရေအမြင့် ၁ မီတာခန့်အထိ မြင့်တက်ခဲ့ပြီး ကျေးရွာအချို့သို့ သွားသည့် လမ်းများ ရေနစ်မြုပ်ကာ လျှပ်စစ်နှင့် လမ်းပန်းဆက်သွယ်ရေး အခက်အခဲများ ကြုံတွေ့နေရသည်။ နန့်ခရိုင်အတွင်း၌လည်း မြစ်ရေ လျှံတက်လာသဖြင့် မြစ်ကမ်းဘေး ကျေးရွာများရှိ နေအိမ် ၃၀ ထက်မက ရေဝင်ရောက်နေသည်။ လိုင်နန့် (Lai Nan) ကျောင်းတိုက်ရှေ့လမ်းတွင် ၁ မီတာကျော် ရေမြုပ်နေသဖြင့် ယာဉ်ငယ်များ သွားလာ၍ မရတော့ဘဲ သံဃာတော်များနှင့် ဒေသခံများ စုပေါင်းကာ သဲအိတ်တားဆီးမှုများ ပြုလုပ်နေကြရသည်။ ဘေးအန္တရာယ် တားဆီးကာကွယ်ရေး ဦးစီးဌာန (DDPM) က မိုးကြီးနိုင်သည့် ဒေသများနှင့် မြစ်ကမ်းဘေး နေထိုင်သူများအနေဖြင့် တောင်ပြိုမှု၊ ရုတ်တရက် ရေကြီးမှုများကို သတိပြုကြရန်နှင့် အဓိက ပစ္စည်းများနှင့် မော်တော်ယာဉ်များကို ဘေးလွတ်ရာ ကုန်းမြင့်များသို့ ကြိုတင်ရွှေ့ပြောင်းထားကြရန် အရေးပေါ် သတိပေးချက်များ ထုတ်ပြန်ထားသည်။ #ထိုင်းနိုင်ငံမြောက်ပိုင်း #ရေကြီးရေလျှံ #ချင်းမိုင် #မယ်ဟောင်ဆောင် #ချင်းရိုင်း

ထိုင်းမြောက်ပိုင်း ခရိုင် ၅ ခု၌ ရေကြီးရေလျှံ၊ ၂၄ နာရီ စောင့်ကြည့်ရန် ညွှန်ကြား

Aug 10

တိုင်ဖုန်း ဒေါလ်ဖင် တရုတ်သို့ ဝင်ရောက်၊ ပစိဖိတ်တွင် မုန်တိုင်း ၃ ခု ပြိုင်တည်း ဖြစ်ပေါ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဩဂုတ်လ ၁၀ ရက်။ တိုင်ဖုန်းမုန်တိုင်း ဒေါလ်ဖင် (Dolphin) သည် တရုတ်နိုင်ငံ ကုန်းတွင်းပိုင်းသို့ ဝင်ရောက်သွားသည့် အချိန်၌ပင် ပစိဖိတ်သမုဒ္ဒရာတွင် နောက်ထပ် မုန်တိုင်း ၂ ခု ဖြစ်ပေါ်နေသဖြင့် လောလောဆယ်တွင် တိုင်ဖုန်းမုန်တိုင်း ၃ ခု တစ်ပြိုင်တည်း ဖြစ်ပေါ်နေသည်။ တိုင်ဖုန်း ဒေါလ်ဖင်သည် တနင်္ဂနွေနေ့ ညနေပိုင်းက တရုတ်နိုင်ငံ အရှေ့ပိုင်း ကျဲ့ကျန်းပြည်နယ်သို့ ဝင်ရောက်ခဲ့သည်။ တရုတ်အစိုးရက အနီရောင်အဆင့် သတိပေးချက် ထုတ်ပြန်ခဲ့ရပြီး လေတိုက်နှုန်းမှာ တစ်နာရီလျှင် ကီလိုမီတာ ၁၅၀ ကျော်အထိ ပြင်းထန်ခဲ့သည်။ အဆိုပါ မုန်တိုင်းကြောင့် လူဦးရေ အများဆုံးဖြစ်သည့် ရှန်ဟိုင်းနှင့် ဟန်ကျိုး လေဆိပ်များတွင် လေယာဉ်ခရီးစဉ် ၁,၆၀၀ ကျော် ဖျက်သိမ်းခဲ့ရကာ၊ လူပေါင်း ၁ သန်းကျော်ကိုလည်း ဘေးလွတ်ရာသို့ ရွှေ့ပြောင်းပေးခဲ့ရသည်။ တရုတ်ပြည်သို့ မဝင်မီ ဂျပန်နှင့် ထိုင်ဝမ်တို့ကို ဖြတ်သန်းခဲ့ရာ အိုကီနာဝါကျွန်းတွင် အပျက်အစီးများ ရှိခဲ့ပြီး လျှပ်စစ်မီးများ ပြတ်တောက်ခဲ့သည်။ ထို့ပြင် ပစိဖိတ်သမုဒ္ဒရာ အနောက်မြောက်ပိုင်း၌ မုန်တိုင်း ၃ ခု တစ်ပြိုင်တည်း ဖြစ်ပေါ်နေခြင်းဖြစ်ပြီး၊ အဆိုပါ မုန်တိုင်းများမှာ တရုတ်သို့ ဝင်ရောက်သွားသည့် "ဒေါလ်ဖင်"၊ "ချန်ဟွန်း" (Chan-hom) နှင့် အသစ်ဖြစ်ပေါ်လာသည့် "ပေလူး" (Peilou) တို့ ဖြစ်ကြသည်။ တိုင်ဖန်း ပေလူး မှာ ဒီနှစ်၏ ၁၆ ခုမြောက် မုန်တိုင်းဖြစ်ပြီး ဂူအမ်ကျွန်းအနီးတွင် စတင်ဖြစ်ပေါ်နေကာ အရှေ့ဘက်သို့ ဆက်လက်ရွေ့လျားရင်း ပိုမိုအားကောင်းလာနိုင်ကြောင်း တရုတ် မိုးလေဝသဌာနက ခန့်မှန်းထားသည်။ Photo:AP #TyphoonDolphin #Typhoon #Dolphin

တိုင်ဖုန်း ဒေါလ်ဖင် တရုတ်သို့ ဝင်ရောက်၊ ပစိဖိတ်တွင် မုန်တိုင်း ၃ ခု ပြိုင်တည်း ဖြစ်ပေါ်

Aug 10

ယူကရိန်းကို တိုက်ခိုက်ရန် မြောက်ကိုရီးယား ဒုံးပျံတပ်ဖွဲ့ ရုရှား၌ စတင်တပ်စွဲ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဩဂုတ်လ ၁၀ ရက်။ ယူကရိန်းနိုင်ငံအား တိုက်ခိုက်ရန်အတွက် မြောက်ကိုရီးယား ဒုံးပျံတပ်ဖွဲ့ဝင်များသည် ရုရှားနိုင်ငံ အနောက်ပိုင်းသို့ စတင်ရောက်ရှိ တပ်စွဲနေပြီဖြစ်ကြောင်း ယူကရိန်း စစ်ဘက်ဆိုင်ရာ ထောက်လှမ်းရေးအဖွဲ့က ထုတ်ပြန်လိုက်သည်။ ရုရှားနိုင်ငံ အနောက်ပိုင်း ဗိုရိုနက်ချ် (Voronezh) ဒေသတွင် မြောက်ကိုရီးယား တပ်ဖွဲ့ဝင် ၉၀ ခန့်ပါဝင်သည့် ဒုံးပျံတပ်ဖွဲ့ကို အခြေစိုက်ထားပြီး၊ ပဲ့ထိန်းဒုံးကျည် (Ballistic Missiles) ၁၂၀ နှင့် ဒုံးပစ်စင် ၆ ခု ပါဝင်လာမည်ဟု ဆိုသည်။ မြောက်ကိုရီးယားသည် ၎င်းတို့ထုတ်လုပ်သည့် KN-23 နှင့် KN-24 ဒုံးကျည် ၄၀ အသစ်အပါအဝင် နည်းပညာရှင်များကို ရုရှားထံ ပေးပို့ထားပြီး ဖြစ်သည်။ ယူကရိန်းဘက်တွင် လေကြောင်းရန်ကာကွယ်ရေး စနစ်များ အလွန်နည်းပါးနေချိန်၌ ရုရှားက ပဲ့ထိန်းဒုံးကျည်များကို ပိုမိုသုံးစွဲလာနေခြင်း ဖြစ်သည်။ မြောက်ကိုရီးယား၏ KN-23 ဒုံးကျည်များသည် ရုရှား၏ အစ္စကန်ဒါ (Iskander) ဒုံးကျည်များထက် ပစ်ခတ်နိုင်စွမ်း ပိုဝေးပြီး ဖောက်ခွဲရေးပစ္စည်း ပိုမိုပါဝင်သော်လည်း တိကျမှု အားနည်းသည့်အတွက် ပြည်သူအများအပြား ထိခိုက်သေဆုံးရမှုများ ဖြစ်ပေါ်နေသည်ဟု ယူကရိန်းက ဆိုသည်။ လက်ရှိတွင် ရုရှားနိုင်ငံ ကာစ်ခ် (Kursk) ဒေသ၌ မြောက်ကိုရီးယား စစ်သည် ၉,၅၀၀ ခန့် ရောက်ရှိနေပြီး၊ နောက်ထပ် စစ်သည် ၃၀,၀၀၀ အထိ ထပ်မံစေလွှတ်ရန် ရုရှားဘက်က ပြင်ဆင်နေကြောင်း ယူကရိန်းသမ္မတ ဇယ်လန်းစကီးက ပြောကြားခဲ့သည်။ #မြောက်ကိုရီးယားဒုံပျံတပ်ဖွဲ့

ယူကရိန်းကို တိုက်ခိုက်ရန် မြောက်ကိုရီးယား ဒုံးပျံတပ်ဖွဲ့ ရုရှား၌ စတင်တပ်စွဲ

Aug 10

အမေရိကန်ရောက် မြန်မာ ၄,၀၀၀ ခန့် TPS အကာအကွယ် ရုပ်သိမ်းခံရမည့်အလားအလာရှိ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဩဂုတ်လ ၁၀ ရက်။ အမေရိကန်ပြည်ထောင်စု၌ ရောက်ရှိနေသည့် မြန်မာနိုင်ငံသားများ၏ ယာယီခိုလှုံခွင့် အကာအကွယ် (TPS) ကို ရုပ်သိမ်းမည့် အစိုးရ၏ ဆောင်ရွက်ချက်အား ဖက်ဒရယ်တရားသူကြီးများက ခွင့်ပြုလိုက်သည်။ ဩဂုတ်လ ၇ ရက်နေ့တွင် ဘော့စတန်နှင့် ချီကာဂိုမြို့တို့မှ ဖက်ဒရယ်တရားသူကြီး နှစ်ဦးက လူဝင်မှုကြီးကြပ်ရေး ရှေ့နေများ၏ TPS မရုပ်သိမ်းရေး နောက်ဆုံးအယူခံကို ပယ်ချခဲ့ခြင်းဖြစ်သည်။ အဆိုပါ ဆုံးဖြတ်ချက်ကြောင့် အမေရိကန်တွင် TPS အကာအကွယ်ဖြင့် နေထိုင်အလုပ်လုပ်ကိုင် နေကြသည့် မြန်မာနိုင်ငံသား ၄,၀၀၀ နီးပါးနှင့် တောင်ဆူဒန်နိုင်ငံသား ၂၃၂ ဦးတို့၏ ယာယီနေထိုင်ခွင့်နှင့် အလုပ်လုပ်ခွင့် အကာအကွယ်များ ရပ်ဆိုင်းသွားမည့် အန္တရာယ်နှင့် ရင်ဆိုင်လာရခြင်း ဖြစ်သည်။ ၂၀၂၁ ခုနှစ် စစ်အာဏာသိမ်းပြီးနောက် အမေရိကန် ပြည်တွင်းလုံခြုံရေးဝန်ကြီးဌာန (DHS) က မြန်မာနိုင်ငံသားများကို TPS အကာအကွယ် ပေးခဲ့ခြင်းဖြစ်သည်။ နောက်ပိုင်းတွင် ထိုအကာအကွယ်ကို ရုပ်သိမ်းရန် DHS က ကြိုးပမ်းခဲ့ရာမှ တရားရုံး၌ ဥပဒေကြောင်းအရ အငြင်းပွားမှုများ ဖြစ်ပေါ်ခဲ့သည်။ ပြီးခဲ့သည့် ဇွန်လက အမေရိကန် တရားလွှတ်တော်ချုပ် (Supreme Court) က ဟေတီနှင့် ဆီးရီးယား နိုင်ငံသားများ၏ TPS ရုပ်သိမ်းခွင့်ကို ခွင့်ပြုခဲ့ပြီးနောက်၊ အောက်တရားရုံး ဖက်ဒရယ် တရားသူကြီးများ ကပါ အစိုးရဘက်မှ ရုပ်သိမ်းခွင့်ရှိကြောင်း အလားတူ လိုက်ပါ ဆုံးဖြတ်ခဲ့ခြင်းဖြစ်သည်။ အမေရိကန်ရောက် မြန်မာများအနေဖြင့် တစ်စုံတစ်ရာ အန္တရာယ်ရှိလာနိုင်သည်ဟု ယူဆပါက ဗီဇာနှင့် နေထိုင်ခွင့် အခြေအနေများ၊ ရှေ့ဆက်ဆောင်ရွက်ရမည့် ဥပဒေကြောင်းဆိုင်ရာ ကိစ္စများကို သက်ဆိုင်ရာ လူဝင်မှုကြီးကြပ်ရေး ရှေ့နေများ၊ ကျွမ်းကျင်သူများနှင့် အမြန်ဆုံး တိုင်ပင်ဆွေးနွေးကြရန် ကျွမ်းကျင်သူများက တိုက်တွန်းထားသည်။ #TPS #myanmar

အမေရိကန်ရောက် မြန်မာ ၄,၀၀၀ ခန့် TPS အကာအကွယ် ရုပ်သိမ်းခံရမည့်အလားအလာရှိ

« Prev 1 … 4 5 6 7 8 … 1,110 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

အိမ်ဟောင်းနံရံတွင် ဝှက်သိမ်းထားသည့် ယူရို ၉ သန်းတန်ဖိုး ရွှေများ တွေ့ရှိ — August 15, 2026 10:32 pm
လင်ကွန်းကို ဂျော့ဝါရှင်တန်ဖြင့် အစားထိုးမည် — August 14, 2026 4:38 pm
ဘရူးနိုင်းဘုရင်ကချွေးမဖြစ်သူ၏ တော်ဝင်ဘွဲ့တံဆိပ်များရုပ်သိမ်း — August 14, 2026 1:32 pm

Recent Posts

အိမ်ဟောင်းနံရံတွင် ဝှက်သိမ်းထားသည့် ယူရို ၉ သန်းတန်ဖိုး ရွှေများ တွေ့ရှိ
ထောင်တွင်း ကင်ဆာဖြစ်နေသည့် နိုင်ငံရေး အကျဉ်းသူ ၈ ဦး အသက်အန္တရာယ်ရှိနေ
မြစ်ဆုံစီမံကိန်း ပြန်စရန် စစ်အုပ်စုက လူထုစည်းရုံးမှုများ အရှိန်မြှင့်လုပ်ဆောင်နေဟု KHRW ပြော
ရခိုင်တောင်ပိုင်း စစ်အုပ်စု လေကြောင်းမှ ဗုံးကြဲမှုကြောင့် မိသားစုဝင်များအပါအဝင် ၈ ဦး သေဆုံး
လင်ကွန်းကို ဂျော့ဝါရှင်တန်ဖြင့် အစားထိုးမည်

Archives

Archives

×Close