NMG Doh – Page 6 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
နိုင်ငံတကာသတင်း
NMG အကြောင်း
Contact

Home
Author Archive

NMG Doh

Author: NMG Doh

Sep 25

ကျောက်တော်ကို စစ်အုပ်စုမှ ဗုံးကြဲသဖြင့် ကလေးငယ်များအပါအဝင် ၇ ဦး ဒဏ်ရာရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၅ ရက်။ ရခိုင်ပြည်၊ ကျောက်တော်မြို့ကို စစ်အုပ်စုက Y-12 လေယာဉ်ဖြင့် ဗုံးကြဲတိုက်ခိုက်ခဲ့သဖြင့် အသက် ၁ နှစ်အရွယ် ကလေးငယ် အပါအဝင် ဒေသခံ အရပ်သား ၇ ဦး ထိခိုက်ဒဏ်ရာရရှိခဲ့ကြောင်း ဒေသတွင်း သတင်းအရင်းအမြစ်များက ပြောသည်။ စက်တင်ဘာလ ၂၅ ရက်နေ့၊ နံနက်အစောပိုင်း ၂ နာရီကျော်အချိန်တွင် စစ်အုပ်စုက Y-12 လေယာဉ်ဖြင့် ကျောက် တော်မြို့ အတွင်းရှိ ပြည်တော်သာ ရပ်ကွက် (၇ လမ်း)၊ ပိုက်သည်ကျေးရွာနှင့် နိဒင်ကျေးရွာတို့သို့ ဒရော့ဗုံး (Drop Bomb) အလုံး ၃၀ နီးပါး ကြဲချတိုက်ခိုက်ခဲ့ခြင်း ဖြစ်သည်။ ဒေသခံ ပရဟိတ လုပ်အားပေး အမျိုးသားတစ်ဦးက “အသက်တစ်နှစ်အရွယ် မူဆလင်ကလေးငယ် တစ်ယောက် လည်း ဒဏ်ရာရတယ်။ ညလူအိပ်ချိန်ဆိုတော့ ရှောင်ချိန် မရလိုက်ပါဘူး။ ဒဏ်ရာရသူတွေကို ကုသပေးနေပါ တယ်။ ကျောက်တော် အပါအဝင် တစ်ပြည်လုံးကို စစ်တပ်က ရက်ရက်စက်စက် လုပ်နေတာပါ၊ သတိထားကြ ရမှာပါ။ ကျောက်တော်ဘက်မှာတော့ AA က လေကြောင်း အသိပေးတာတွေလည်း ရှိပါတယ်” ဟု ပြောသည်။ လေကြောင်းမှ ဗုံးကြဲတိုက်ခိုက်မှုကြောင့် ပြည်တော်သာရပ်ကွက်မှ အသက် ၅၅ နှစ်အရွယ် ဦးစိန်သန်းနှင့် အသက် ၅၄ နှစ်အရွယ် ဒေါ်ရွှေရီ၊ ပိုက်သည်ကျေးရွာမှ အသက် ၃၅ နှစ်အရွယ် ဦးအဘူကလစ်၊ နိဒင်ကျေးရွာမှ အသက် ၁ နှစ်အရွယ် ဘီဘီဆာနေးယား၊ အသက် ၈ နှစ်အရွယ် ဘီဘီဆာခါရာ၊ အသက် ၁၈ နှစ်အရွယ် ဆော် လိမ်း၊ အသက် ၃၇ နှစ်အရွယ် ရိုဟီမာကာတူနှင့် အသက် ၄၃ နှစ်အရွယ် ဂျာဘဲရိတို့ စုစုပေါင်း ၇ ဦး ထိခိုက် ဒဏ်ရာ ရရှိခဲ့ကြသည်။ ဒဏ်ရာရရှိသူများအနက် အသက် ၅၄ နှစ်အရွယ် ဒေါ်ရွှေရီမှာ ဘယ်ဘက်ဝမ်းဗိုက် ဗုံးစထိမှန်ကာ ပြင်းထန် ဒဏ်ရာ ရရှိထားပြီး အသက် ၁ နှစ်အရွယ် ကလေးငယ် ဘီဘီဆာနေးယားမှာ နဖူးတွင်လည်းကောင်း၊ ၈ နှစ် အရွယ် ဘီဘီဆာခါရာမှာ ညာဘက်ခြေထောက်တွင်လည်းကောင်း အသီးသီး ဒဏ်ရာရရှိခဲ့ကြကာ နေအိမ် အချို့လည်း ထိမှန်ပျက်စီးခဲ့သည်။ အလားတူ စက်တင်ဘာလ ၂၄ ရက်နေ့၊ ညနေ ၅ နာရီကျော်ကလည်း စစ်တပ်က ရသေ့တောင်မြို့နယ်၊ ဇီးကိုင်းကျေးရွာကို လေကြောင်းမှ ဗုံးကြဲတိုက်ခိုက်ခဲ့သည်။ စစ်အုပ်စုသည် စက်တင်ဘာလ ၄ ရက်နေ့မှစတင်၍ ပုဏ္ဏားကျွန်းမြို့နယ်အတွင်းသို့ စစ်အင်အား ၁,၀၀၀ ကျော်ဖြင့် စစ်ကြောင်းများခွဲ၍ စစ်ကြောင်းထိုးနေပြီး အရပ်သားများနေထိုင်ရာ ကျေးရွာများသို့ လေကြောင်း တိုက်ခိုက်မှုများနှင့် လက်နက်ကြီးများဖြင့် ပစ်ခတ်မှုများကို ဆက်တိုက် ပြုလုပ်လျက်ရှိသည်။ #ကျောက်တော်မြို့

ကျောက်တော်ကို စစ်အုပ်စုမှ ဗုံးကြဲသဖြင့် ကလေးငယ်များအပါအဝင် ၇ ဦး ဒဏ်ရာရ

Sep 25

ရခိုင်-အိန္ဒိယ နယ်စပ်လမ်းကြောင်း ပြန်ဖွင့် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၅ ရက်။ အိန္ဒိယ-ရခိုင် နယ်စပ် ကုန်သွယ်ရေးလမ်းကြောင်းများကို ပြန်လည်ဖွင့်လှစ်ရန် မာရာလူငယ်အဖွဲ့ (MTP) နှင့် ရက္ခိုင်အမျိုးသားအဖွဲ့ချုပ် (ULA/AA) တို့ သဘောတူညီခဲ့ကြကြောင်း ဒေသတွင်း ကုန်သည်များက ပြောသည်။ မာရာလူငယ်အဖွဲ့ (MTP) နှင့် ရက္ခိုင်အမျိုးသားအဖွဲ့ချုပ်/အာရက္ခတပ်တော် (ULA/AA) တို့ ပူးပေါင်း အစည်း အဝေး ပြုလုပ်ခဲ့ပြီးနောက် အိန္ဒိယ-ရခိုင် နယ်စပ်ကုန်သွယ်ရေး လမ်းကြောင်းများကို ပြန်လည်ဖွင့်လှစ်ရန် စက်တင်ဘာလ ၂၄ ရက်နေ့တွင် သဘောတူညီခဲ့ကြခြင်း ဖြစ်သည်။ ပြီးခဲ့သည့် စက်တင်ဘာလ ၁၆ ရက်နေ့မှ စတင်၍ ယာယီပိတ်ထားခဲ့သည့် လိုဒေါ (Lodaw)၊ လိုမာဆူ (Lomasu) နှင့် ခယ်ခုံ/ခိုင်ခီ (Khaikhy) ကုန်သွယ်ရေး လမ်းကြောင်းများကို စက်တင်ဘာလ ၂၄ ရက်နေ့၊ နံနက်ပိုင်းတွင် MTP ဌာနချုပ် တည်ရှိရာ ဆိုင်းဟားမြို့၌ နှစ်ဖက်တာဝန်ရှိသူများ တွေ့ဆုံဆွေးနွေးအပြီး ပြန်လည်ဖွင့်လှစ်ခဲ့ခြင်း ဖြစ်သည်။ ဒေသခံ ကုန်သည်တစ်ဦးက “စက်တင်ဘာ ၂၄ ရက် မနက် ၆ နာရီခွဲလောက်မှာ MTP ဌာနချုပ် ဆိုင်းဟားမှာ တွေ့ဆုံကြပါတယ်။ ULA/AA ဘက်က နယ်စပ်ဆက်ဆံရေးအရာရှိ (Border Relation Officer) နဲ့ မြို့နယ် အုပ်ချုပ်ရေးမှူး (County Administrator) တို့ တက်ရောက်ပါတယ်။ MTP ဘက်က တာဝန်ရှိသူတွေ တက် ရောက်ကြပြီး နှစ်ဖက်တွေ့ဆုံမှုကနေ ရခိုင်နဲ့ မရာကြား ချစ်ကြည်ရေး ပိုမိုတိုးမြှင့်ဖို့နဲ့ ပူးပေါင်းလက်တွဲဖို့ သဘောတူကြပါတယ်။ အဓိကအရေးကြီးတဲ့ နယ်စပ်ကုန်သွယ်ရေးကို ယာယီရပ်ဆိုင်းရာကနေ ပြန်လည် ဖွင့် လှစ်ဖို့ သဘောတူလိုက်ပါပြီ” ဟု ပြောသည်။ အဆိုပါ နယ်စပ်ကုန်သွယ်ရေးလမ်းကြောင်းသည် မီဇိုရမ်ပြည်နယ်တောင်ပိုင်း ခယ်ခုံ/ခိုင်ခီကျေးရွာ ကုန်သွယ် ရေးဂိတ်၌ စက်တင်ဘာလ ၁၄ ရက်နေ့က ကုန်တင်စက်လှေ ဦးစားပေး အလှည့်ကျစနစ်နှင့် ပတ်သက်၍ အငြင်း ပွားမှု ဖြစ်ပွားကာ ဂိတ်ရုံး မီးရှို့ခံရသည့် ဖြစ်စဉ်ကြောင့် စက်တင်ဘာလ ၁၆ ရက်နေ့မှ စတင်၍ MTP ဘက်က ယာယီ ပိတ်ထားခဲ့ခြင်း ဖြစ်သည်။ အဆိုပါ မီးရှို့ဖျက်ဆီးမှုဖြစ်စဉ်တွင် ပါဝင်သူများကို ULA/AA ၏ တရားဥပဒေစိုးမိုးရေးနှင့် တရားစီရင်ရေးဌာန (ဒီလပ်) က ဖမ်းဆီးထိန်းသိမ်းထားပြီး ဥပဒေအတိုင်း အရေးယူဆောင်ရွက်လျက်ရှိကြောင်း ULA/AA ပြောရေး ဆိုခွင့်ရှိသူ ဦးခိုင်သုခက ဒေသတွင်း သတင်းမီဒီယာများကို ပြောဆိုထားသည်။ ရခိုင်ကုန်သည်တစ်ဦးက “အခုတော့ နယ်စပ်လမ်းကြောင်းက ပုံမှန်အတိုင်း ပြန်ဖြစ်သွားပါပြီ။ သွားလာလို့ ရသလို ကုန်ပစ္စည်းတွေလည်း ပုံမှန်ချလို့ ရနေပါပြီ။ လမ်းပိတ်သွားတဲ့ ရက်ပိုင်းအတွင်းမှာတင် ကုန်စည်စီးဆင်း မှု တော်တော်လေး နှောင့်နှေးသွားခဲ့ပါတယ်။ အခုလို နှစ်ဖက် အမြန်ဆုံး ညှိနှိုင်းပြီး လမ်းပြန်ဖွင့်ပေးလိုက်တာ ဟာ ဒေသခံ ပြည်သူအကုန်လုံးအတွက် အရမ်းကောင်းပါတယ်” ဟု ပြောသည်။ အိန္ဒိယ-အာရက္ခ နယ်စပ်ကုန်သွယ်ရေးလမ်းကြောင်းသည် စစ်အာဏာသိမ်းပြီးနောက် စစ်အုပ်စုတပ်၏ လမ်းပန်း ဆက်သွယ်ရေး ပိတ်ဆို့ခံထားရသည့် ရခိုင်ပြည်နှင့် ချင်းပြည်တောင်ပိုင်း (ပလက်ဝ) ဒေသတို့အတွက် စက်သုံး ဆီ၊ ဆေးဝါးနှင့် စားသောက်ကုန်များကို အဓိက တင်သွင်းနေရသည့် တစ်ခုတည်းသော အသက်ရှူပေါက် ဖြစ် သည်။ လမ်းကြောင်း ပိတ်ထားသည့် ရက်ပိုင်းအတွင်း ကုန်စည်စီးဆင်းမှု နှောင့်နှေးခဲ့ရုံသာမက ကုန်တင်ကုန်ချ လုပ်ကိုင် နေရသည့် ဒေသခံ ရာနှင့်ချီ စားဝတ်နေရေး ခက်ခဲခဲ့ရကြောင်း ဒေသခံများက ပြောသည်။ လက်ရှိတွင် အိန္ဒိယ-အာရက္ခ နယ်စပ်ဒေသအများစုကို ULA/AA က ထိန်းချုပ်ထားပြီး ကုန်သွယ်ရေးဆိုင်ရာ စည်းမျဉ်းများ ချမှတ်ကာ အကောက်ခွန် ကောက်ခံခြင်းများ ပြုလုပ်လျက်ရှိရာ၊ ယခုကဲ့သို့ လမ်းကြောင်း ပြန် လည်ဖွင့်လှစ်နိုင်ခြင်းက ဒေသခံ ပြည်သူများ၏ စားဝတ်နေရေးနှင့် ဒေသတွင်း စီးပွားရေးအတွက် ကြီးမားသည့် အထောက်အကူ ဖြစ်လာမည် ဖြစ်သည်။ #ULA #AA #မာရာလူငယ် #MTP

ရခိုင်-အိန္ဒိယ နယ်စပ်လမ်းကြောင်း ပြန်ဖွင့်

Sep 25

ကျဆုံးမှုများနေသည့် စစ်တပ်က ဒဏ်ရာရစစ်သားများကို ညဉ့်နက်အချိန် မီးမှောင်ချကာ ပုသိမ်သို့ သယ်ဆောင် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၅ ရက်။ ရခိုင်နှင့် ဧရာဝတီအစပ် တိုက်ပွဲများတွင် ထိခိုက်ကျဆုံးမှု များပြားနေသည့် စစ်အုပ်စုတပ်သည် ဒဏ်ရာရစစ်သား များနှင့် ရုပ်အလောင်းများကို ညအချိန် မီးမှောင်ချကာ ပုသိမ်မြို့သို့ နေ့စဉ် သယ်ဆောင်နေကြရသည်။ ဧရာဝတီတိုင်း၊ သာပေါင်းမြို့နယ်၊ ကြက်သွန်ကွင်းကျေးရွာ စစ်ဆေးရေးဂိတ်သို့ ရှေ့တန်းစခန်းများဖြစ်ကြသည့် သဲဖြူ၊ သာပေါင်းလေးနှင့် ကင်မွန်းချဉ် စသည့်နေရာများမှ ထိခိုက်သေဆုံးသူများကို ည ၁၀ နာရီကျော်အချိန်တွင် လာရောက်ပို့ဆောင်လေ့ရှိပြီး၊ အဆိုပါဂိတ်၌ မော်တော်ယာဉ် ပြောင်းလဲကာ ပုသိမ်မြို့သို့ သယ်ဆောင်နေခြင်း ဖြစ်သည်။ အသက် ၅၀ ကျော်အရွယ် ကြက်သွန်ကွင်း ရွာသားတစ်ဦးက “သဲဖြူဘက်ကနေ လူနာနဲ့ သေဆုံးသူတွေ သယ် လာတဲ့ကားတွေ ရောက်မလာခင် မိနစ် ၃၀ လောက်အလိုမှာတင် ရွာကို မီးဖြတ်လိုက်တယ်။ လမ်းပေါ်မှာ လူတွေမရှိအောင်လည်း လုံခြုံရေးတွေ ယူပြီး စောင့်ကြပ်နေတာ” ဟု ပြောသည်။ စစ်ဆေးရေးဂိတ်နှင့် နီးစပ်သူတစ်ဦးကလည်း “လွန်ခဲ့တဲ့ ၅ ရက်လောက်ကတည်းက သဲဖြူဘက်ကနေ ကားနဲ့ သယ်လာတာပါ။ ဒီဂိတ်ကို ရောက်မှ ကားချင်းကပ်ပြောင်းပြီး ပုသိမ်ကို ပို့တာ။ ဒဏ်ရာရလူနာတွေနဲ့ အလောင်း တွေပါတယ်။ ပုံမှန်တော့ မဟုတ်ဘူး၊ တစ်စီးတည်း လာတာ ရှိသလို ၂ စီး - ၃ စီး လာတဲ့နေ့တွေလည်း ရှိတယ်” ဟု ပြောသည်။ လက်ရှိတွင် သာပေါင်းမြို့နယ်အစပ် ကျေးရွာများ၌ အာရက္ခတပ်တော် (AA) နှင့် ပူးပေါင်းတပ်ဖွဲ့များ၏ တိုက်ခိုက် မှုကြောင့် စစ်အုပ်စုတပ်ဘက်မှ ထိခိုက်သေဆုံးသူ များပြားလျက်ရှိသည်။ ပုသိမ်မြို့ရှိ အနောက်တောင်တိုင်းစစ်ဌာနချုပ် (နတခ) အတွင်းရှိ မဆရ (၄) ဆေးတပ်ရင်း၌ ဒဏ်ရာရစစ်သား များဖြင့် ပြည့်နှက်နေပြီး နေ့စဉ် သေဆုံးမှုများလည်း ရှိနေကြောင်း နတခ အတွင်းရှိ စစ်တပ်မိသားစုဝင်များနှင့် နီးစပ်သူများ၏ ပြောပြချက်အရ သိရသည်။ စစ်အုပ်စုတပ်၏ လုံခြုံရေးဂိတ် တပ်ဖွဲ့ဝင်များနှင့် နီးစပ်သူတစ်ဦးက “ကားချင်းကပ်ပြီး ပစ်တင်နေတာ ထင်းတုံး တွေ တင်နေသလား မှတ်ရတယ်။ ရွာကို အမှောင်ကြိုချထားတယ်၊ လူသွားလူလာ မရှိအောင်လည်း ရှင်းထား တာ။ ပုသိမ်က ကားကတော့ ကြိုလာစောင့်နေတာပေါ့” ဟု ပြောသည်။ လွန်ခဲ့သော ၄ ရက်ခန့်က စစ်အုပ်စုတပ်မှ ဗျူဟာမှူးတစ်ဦးနှင့် ဗိုလ်မှူးတစ်ဦး တိုက်ပွဲအတွင်း ကျဆုံးသွားသည် ဟူသော သတင်းများ ထွက်ပေါ်ခဲ့ပြီးနောက် ကြက်သွန်ကွင်း-သဲဖြူ လမ်းပိုင်းတွင် စစ်အုပ်စုတပ်က ကင်းပုန်း များ စိပ်စိပ်ချထားပြီး လမ်းသွားလမ်းလာများကို တင်းကျပ်စွာ စစ်ဆေးလျက်ရှိကြောင်း ခြံစိုက်လုပ်သားတစ်ဦး ၏ ပြောပြချက်အရ သိရသည်။ ထို့ပြင် ရေကြည်မြို့နယ်ရှိ အမြှောက်တပ်ရင်း (အမတ-၃၄၄) အနီး ၁ မိုင်ခန့်အကွာအထိ အာရက္ခတပ်တော် (AA) နှင့် ပူးပေါင်းတပ်များ ရောက်ရှိလာပြီး တိုက်ပွဲများ ဆက်လက်ပြင်းထန်နေသဖြင့် ဒဏ်ရာရရှိသူများနှင့် သေဆုံး စစ်သားများကို စက်ဒေါင့်ကြီးဘက်မှတစ်ဆင့် ပုသိမ်မြို့သို့ ပြန်လည်သယ်ဆောင်နေရကြောင်း ဒေသခံများက ပြောသည်။ ဓာတ်ပုံ - (တိုက်ပွဲအတွင်း သေဆုံးခဲ့သည့် စစ်အုပ်စုတပ်ဖွဲ့ဝင်တစ်ဦး၏ ရုပ်အလောင်းကို တွေ့ရစဉ်။ / AA) #ဧရာဝတီတိုင်း #ရခိုင်

ကျဆုံးမှုများနေသည့် စစ်တပ်က ဒဏ်ရာရစစ်သားများကို ညဉ့်နက်အချိန် မီးမှောင်ချကာ ပုသိမ်သို့ သယ်ဆောင်

Sep 25

စစ်တွေ - ပုဏ္ဏားကျွန်းအစပ်တွင် တိုက်ပွဲပြင်းထန်နေပြီး စစ်တပ်က လေကြောင်းမှ ဆက်တိုက်ဗုံးကြဲ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၅ ရက်။ ရခိုင်ပြည်၊ စစ်တွေမြို့နယ်နှင့် ပုဏ္ဏားကျွန်းမြို့နယ် အစပ်နေရာများတွင် အာရက္ခတပ်တော် (AA) နှင့် စစ်အုပ်စု တို့အကြား မြေပြင်တိုက်ပွဲများ ပြင်းထန်နေပြီး စစ်အုပ်စုတပ်က ဂျက်ဖိုက်တာနှင့် Y-12 ထောက်ပို့လေယာဉ်များ ဖြင့် လေကြောင်းမှ ဆက်တိုက် ဗုံးကြဲတိုက်ခိုက်လျက်ရှိကြောင်း ဒေသတွင်း သတင်းအရင်းအမြစ်များက ပြောသည်။ စက်တင်ဘာလ ၂၃ ရက်နေ့ ညနေ ၇ နာရီခန့်မှစ၍ စစ်တွေ-ပုဏ္ဏားကျွန်း နယ်စပ်တစ်လျှောက်ကို စစ်အုပ်စုက လေကြောင်းမှ ဗုံးကြဲတိုက်ခိုက်ခဲ့ခြင်းဖြစ်ပြီး စက်တင်ဘာလ ၂၄ ရက်နေ့တွင်လည်း မြေပြင်၌လည်း ထိတွေ့ တိုက်ပွဲများ ဆက်လက်ပြင်းထန်ခဲ့သည်။ အဆိုပါ နယ်စပ်စစ်မျက်နှာတွင် စစ်အုပ်စုဘက်မှ အထိနာလျက်ရှိပြီး ကွမ်းတောင်ကျေးရွာအနီး စစ်ကြောင်းများ ဖြန့်ကျက်ထားသော်လည်း မင်းချောင်းတံတား တစ်ဘက်ကမ်းအထိ AA က ပြန်လည်နေရာယူထိန်းချုပ်ထားပြီ ဖြစ်သည်။ ထို့ပြင် စစ်တွေဘက်ခြမ်း စစ်မျက်နှာရှိ ရွှေမင်းဂံရေတပ်စခန်း၏ ကာကင်းအချို့အပါအဝင် ဝါဘို၊ စပါးထားနှင့် ကံ့ကော်ကျွန်း ကျေးရွာများအထိ AA က ထိန်းချုပ်ထားပြီး စစ်အုပ်စုကလည်း အင်အားဖြည့်တင်းကာ စစ်ကြောင်း ဖြန့်ကျက်ထားသည်။ ဒေသခံ စစ်ရေးသတင်းအရင်းအမြစ် အမျိုးသားတစ်ဦးက “လက်ရှိ စစ်တွေနဲ့ ပုဏ္ဏားကျွန်းနယ်စပ်နေရာတွေကို မနေ့ညက ဗုံးကြဲတာတွေ ရှိသလို မနက်ဘက်လည်း လေယာဉ်တွေ ကင်းထောက်တာတွေ ရှိပါတယ်။ လက်ရှိ ဒေသခံတွေလည်း စိုးရိမ်ပြီး စစ်ရှောင်နေတာတွေ ရှိပါတယ်၊ ကွမ်းတောင် အနီးတဝိုက်ကို ဗုံးကြဲခဲ့တဲ့အပြင် မြေပြင် အခြေအနေတွေလည်း တိုက်ပွဲရှိနေပါတယ်” ဟု ပြောသည်။ လက်ရှိတွင် စစ်တွေမြို့၌ ရေစကြို၊ ပခုက္ကူနှင့် စလင်းမြို့နယ်များရှိ တပ်နယ်လက်အောက်ခံ တပ်ရင်း ၁၀ ရင်း လုံး ရောက်ရှိနေသော်လည်း AA ဘက်ကလည်း ဆတ်ရိုးကျချောင်း တစ်ဖက်ကမ်းရှိ ခမောင်းတောကျေးရွာ ဘက်သို့ စစ်အင်အားဖြည့်တင်းထားသည်။ စစ်အုပ်စုသည် ပုဏ္ဏားကျွန်းမြို့နယ်အတွင်းရှိ ကျေးရွာများအပါအဝင် နေရာအနှံ့အပြားသို့ ဂျက်တိုက်လေယာဉ်၊ Y-12 စစ်ထောက်ပို့ယာဉ်၊ အထိုင်တပ်ရင်းများနှင့် စစ်သင်္ဘောများမှ လက်နက်ကြီးများဖြင့် ပစ်ခတ်တိုက်ခိုက် လျက်ရှိသည်။ “စစ်တွေ-ပုဏ္ဏားကျွန်း အစပ်မှာ အရေးနိမ့်နေတဲ့ စစ်တပ်က (AA) ထိန်းချုပ်ထားတဲ့ မြို့နယ်တွေကို လေ ကြောင်းကနေ ဆက်တိုက် ဗုံးကြဲတိုက်ခိုက်နေတာကြောင့် အရပ်သား ထိခိုက်သေဆုံးမှုတွေ နေ့စဉ် မြင့်တက်နေ ပါတယ်။ ပုဏ္ဏားကျွန်းက စစ်တွေမြို့ကနေ ထွက်ပြေးတိမ်းရှောင်လာတဲ့ စစ်ဘေးရှောင် ပြည်သူအများဆုံး ခိုလှုံတဲ့ နေရာ ဖြစ်ပြီး ပြီးခဲ့တဲ့ စက်တင်ဘာလ ၁၇ ရက်နေ့ကလည်း ဖက်ကျရွာကို စစ်တပ်က လေကြောင်း ကနေ ဗုံးကြဲခဲ့တာကြောင့် အရပ်သားတစ်ယောကf ဒဏ်ရာရရှိခဲ့သေးတယ်” မြေပြင်၌ အကူအညီပေးနေသူ တစ်ဦးက ပြောသည်။ စစ်အုပ်စု၏ လေကြောင်းနှင့် လက်နက်ကြီး တိုက်ခိုက်မှုများကြောင့် ပုဏ္ဏားကျွန်းမြို့နယ် ဖက်ကျကျေးရွာတွင် စက်တင်ဘာလ ၁၇ ရက်နှင့် ၂၃ ရက်တို့၌ အရပ်သား ၂ ဦး သေဆုံးကာ ၁ ဦး ဒဏ်ရာရရှိခဲ့ပြီး၊ ရသေ့တောင်မြို့ နယ် ဇီးကိုင်းကျေးရွာတွင် စက်တင်ဘာလ ၂၀ ရက်က မိခင်နှင့် ကလေး သေဆုံးခဲ့ရသည်။ ထို့ပြင် ဂွမြို့နယ် ဆပ်သွားကျေးရွာတွင်လည်း စက်တင်ဘာလ ၂၁ ရက်က လေကြောင်းမှ ဗုံးကြဲမှုကြောင့် ဆယ် ကျော်သက် ကျောင်းသားတစ်ဦးအပါအဝင် အရပ်သား ၂ ဦး ဒဏ်ရာရရှိခဲ့သေးသည်။ ဓါတ်ပုံ - (ယခုလအတွင်း အာရက္ခတပ်တော် AA က ဖမ်းဆီးရမိထားသော စစ်သုံ့ပန်းများ / AA) #စစ်တွေမြို့နယ် #ပုဏ္ဏားကျွန်းမြို့နယ်

စစ်တွေ – ပုဏ္ဏားကျွန်းအစပ်တွင် တိုက်ပွဲပြင်းထန်နေပြီး စစ်တပ်က လေကြောင်းမှ ဆက်တိုက်ဗုံးကြဲ

Sep 25

တရားရုံးအမိန့်ထုတ်သော်လည်း သတင်းသမားများကို အိမ်ဖြူတော်ဝင်ခွင့် ဆက်လက်တားမြစ်ထား သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၅ ရက်။ သတင်းဌာနများကို ပြန်လည်ဝင်ရောက်ခွင့်ပြုရန် ဖက်ဒရယ်တရားသူကြီးက အမိန့်ထုတ်ပြန် ခဲ့သော်လည်း POLITICO သတင်းထောက်တစ်ဦး၏ အိမ်ဖြူတော် သတင်းထောက်ကတ်ကို သောက်ကြာနေ့ နံနက်ပိုင်းတွင် လျှို့ဝှက် ထောက်လှမ်းရေး (Secret Service) အဖွဲ့က သိမ်းဆည်းလိုက်သည်။ MS NOW နှင့် CNN သတင်းဌာနများ၏ သတင်းထောက်များကိုလည်း ဝင်ရောက်ခွင့် ငြင်းပယ်ခဲ့သည်။ အဆိုပါ သတင်းဌာန သုံးခုသည် "သတင်းအမှားများ" ထုတ်လွှင့်နေသည်ဟုဆိုကာ သမ္မတ ဒေါ်နယ်ထရမ့်၏ အမိန့်ဖြင့် လွန်ခဲ့သည့် စနေနေ့ကတည်းက တားမြစ်ခံထားရခြင်း ဖြစ်သည်။ အမေရိကန် ဖက်ဒရယ် တရားသူကြီး တိမိုသီ ကယ်လီ (Timothy Kelly) က အဆိုပါ သတင်းဌာနများကို အိမ်ဖြူတော်အတွင်း အနည်းဆုံး နှစ်သီတင်းခန့် ပြန်လည်ဝင်ရောက်ခွင့်ပြုရန် ကြားဖြတ်အမိန့်တစ်ရပ် ထုတ်ပြန်ခဲ့သည်။ သတင်းဌာနများ၏ ရှေ့နေဖြစ်သူ တက်ဒ် ဘားထရပ်စ် (Ted Boutrous Jr.) က အစိုးရ၏ တရားရုံးအမိန့်ကို မလိုက်နာမှုနှင့် ပတ်သက်၍ အရေးပေါ် ကြားနာပွဲပြုလုပ်ပေးရန် တရားသူကြီးထံ တောင်းဆိုခဲ့သည်။ သတင်းထောက်များက တရားရုံးအမိန့်အရ ဝင်ရောက်ခွင့်ရရှိထားကြောင်း ရှင်းပြခဲ့သော်လည်း လျှို့ဝှက် အေးဂျင့်များက အထက်မှ ခွင့်ပြုချက်မရသေးဘဲ ကတ်များကို ပိတ်ထားဆဲဖြစ်ကြောင်း ပြောကြားခဲ့သည်။ အမေရိကန်အစိုးရ တရားရေးဌာနကမူ တရုတ်သမ္မတ ရှီကျင့်ဖိန်၏ ခရီးစဉ်အတွင်း အမျိုးသားလုံခြုံရေး အကြောင်းပြချက်ဖြင့် အဆိုပါ သတင်းဌာနများ၏ ဝင်ရောက်ခွင့်ကို ဆက်လက်ပိတ်ပင်ထားရန် တရားရုံးတွင် လျှောက်လဲခဲ့သည်။ သို့သော် တရားသူကြီး ကယ်လီက သမ္မတ ထရမ့်၏ တားမြစ်မှုသည် လုံခြုံရေးကြောင့် မဟုတ်ဘဲ သတင်းဖော်ပြချက်များကို မကျေနပ်၍ ဖြစ်ကြောင်းနှင့် သတင်းထောက်များ၏ အခွင့်အရေးကို ချိုးဖောက်ထားကြောင်း ထောက်ပြခဲ့သည်။ အိမ်ဖြူတော်၏ ယခုကဲ့သို့ မီဒီယာများအပေါ် တားမြစ်မှုအပေါ် ပူးပေါင်းဆန့်ကျင်သည့်အနေဖြင့် အမေရိကန် နာမည်ကြီး သတင်းဌာနအချို့သည်လည်း အိမ်ဖြူတော် သတင်းများကို သပိတ်မှောက်သည့်အနေဖြင့် သတင်းယူခြင်းနှင့် သတင်းဓာတ်ပုံများ ဖြန့်ဝေခြင်းကို ငြင်းဆန်ထားကြသည်။ #POLITICO

တရားရုံးအမိန့်ထုတ်သော်လည်း သတင်းသမားများကို အိမ်ဖြူတော်ဝင်ခွင့် ဆက်လက်တားမြစ်ထား

Sep 25

ရိုဟင်ဂျာ ဒုက္ခသည်များပြန်ပို့မည့် အစီအစဉ် ရပ်ဆိုင်းရန် အရပ်ဘက်အဖွဲ့ ၁၆၆ ဖွဲ့ တောင်းဆို သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၅ ရက်။ မလေးရှားနိုင်ငံ၌ ရောက်ရှိနေသည့် ရိုဟင်ဂျာ ဒုက္ခသည်များအား မြန်မာနိုင်ငံသို့ ပြန်လည်လွှဲပြောင်းပေးမည့် အစီအစဉ်ကို အမြန်ဆုံး ရပ်ဆိုင်းရန် အရပ်ဘက် အဖွဲ့အစည်း ၁၆၆ ဖွဲ့က မလေးရှား ဝန်ကြီးချုပ် အန်ဝါ အီဘရာဟင် (Anwar Ibrahim) ထံ တောင်းဆိုလိုက်သည်။ အကူအညီပေးရေး အဖွဲ့အစည်းများ၏ ပူးတွဲထုတ်ပြန်ချက်တွင် မြန်မာနိုင်ငံသို့ ပြန်လည်ပို့ဆောင်ခံရပါက ဒုက္ခသည်များအနေဖြင့် အကြမ်းဖက် ဖိနှိပ်မှုများနှင့် ရင်ဆိုင်ရမည့်အပြင် စစ်အုပ်စုနှင့် ရက္ခိုင့်တပ်တော် (AA) တို့၏ အတင်းအဓမ္မ စစ်မှုထမ်းခိုင်းစေခြင်းကိုပါ ခံရနိုင်ကြောင်း သတိပေးထားသည်။ မလေးရှားအစိုးရသည် ထိန်းသိမ်းရေးစခန်းများရှိ ဒုက္ခသည် ၅,၀၀၀ နီးပါးအား ပြန်လည်ပို့ဆောင်ရန် စစ်အုပ်စုနှင့် သဘောတူညီထားပြီး၊ ပထမအသုတ်အဖြစ် လူ ၁,၄၀၀ ကျော်အား စက်တင်ဘာ ၂၉ ရက်တွင် မြန်မာစစ်သင်္ဘောများဖြင့် စတင်ပြန်ပို့ရန် စီစဉ်နေခြင်းဖြစ်သည်။ ထို့ပြင် ဝန်ကြီးချုပ် အန်ဝါ အီဘရာဟင်က ဒုက္ခသည်အရေး ဆွေးနွေးရန် စစ်ကောင်စီခေါင်းဆောင် မင်းအောင်လှိုင်အား မလေးရှားသို့ ဖိတ်ခေါ်မည်ဟုပါ ပြောကြားခဲ့သည်။ မလေးရှား အရပ်ဘက် အဖွဲ့အစည်းများကမူ စစ်အုပ်စု ခေါင်းဆောင်အား ဖိတ်ခေါ်ခြင်းနှင့် ဒုက္ခသည်များအား အတင်းအဓမ္မ ပြန်လည်ပို့ဆောင်ခြင်းတို့သည် မလေးရှား၏ နိုင်ငံတကာ ဂုဏ်သိက္ခာကို ထိခိုက်စေပြီး မြန်မာစစ်တပ်၏ လူမျိုးတုံး သတ်ဖြတ်မှုများတွင် ပူးပေါင်းဆောင်ရွက်ရာ ရောက်နေကြောင်း ပြင်းပြင်းထန်ထန် ဝေဖန်ထားသည်။ သို့ဖြစ်ပါ၍ မြန်မာနိုင်ငံအတွင်းရှိ အခြေအနေများကို ဘက်စုံစိစစ် သုံးသပ်ခြင်း မပြုမီ ဒုက္ခသည် ပြန်လည်ပို့ဆောင်ရေး အစီအစဉ် အားလုံးကို ချက်ချင်း ရပ်ဆိုင်းထားရန် အဆိုပါ အဖွဲ့အစည်းများက တောင်းဆိုထားကြသည်။

ရိုဟင်ဂျာ ဒုက္ခသည်များပြန်ပို့မည့် အစီအစဉ် ရပ်ဆိုင်းရန် အရပ်ဘက်အဖွဲ့ ၁၆၆ ဖွဲ့ တောင်းဆို

Sep 25

ဆော်ဒီ ရေနံဆိပ်ကမ်း ကာကွယ်ရန် ပြင်သစ်က စစ်ရေးအရ ကူညီမည် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၅ ရက်။ ဆော်ဒီအာရေးဗီးယားနိုင်ငံ၊ ပင်လယ်နီကမ်းခြေရှိ အဓိက ရေနံတင်ပို့ရာ ရန်ဘူး (Yanbu) ဆိပ်ကမ်းကို အကာအကွယ်ပေးရန် စစ်ရေးအကူအညီများ ပေးပို့သွားမည်ဟု ပြင်သစ်သမ္မတ အီမန်နုအယ်လ် မက်ခရွန် (Emmanuel Macron) က စက်တင်ဘာ ၂၄ ရက်တွင် ကျင်းပသည့် ရုပ်သံအင်တာဗျူးတစ်ခု၌ အတည်ပြု ပြောကြားလိုက်သည်။ ယီမင် ဟူသီလက်နက်ကိုင်တို့၏ တိုက်ခိုက်မှုကြောင့် အကြီးအကျယ် ထိခိုက်ပျက်စီးခဲ့သည့် အဆိုပါ ရေနံဆိပ်ကမ်း လုံခြုံရေးအတွက် ပြင်သစ်စစ်သည်များ၊ ရေဒါစနစ်များနှင့် လေကြောင်းရန်ကာကွယ်ရေး စနစ်များကို စေလွှတ်မည် ဖြစ်သည်။ အဆိုပါ စေလွှတ်မှုနဲ့ ပတ်သက်လို့ ဆော်ဒီအာဏာပိုင်တွေနဲ့ သဘောတူညီချက် ရယူထားခြင်းဖြစ်ပြီး ပြင်သစ်စစ်တပ်အနေနဲ့ ဘယ်လို တိုက်ပွဲမှာမှ ပါဝင်မှာ မဟုတ်ဘူးလို့ ပြောပါတယ်။ ဆိပ်ကမ်းလုံခြုံရေးကိုသာ အဓိကထား ဆောင်ရွက်မည်ဟု သမ္မတ မက်ခရွန်က အလေးအနက် ပြောကြားခဲ့သည်။ ဒါ့အပြင် ဟောမုဇ် ရေလက်ကြား (Strait of Hormuz) ပြန်လည်ဖွင့်လှစ်နိုင်ရေးအတွက် အီရန်၊ အိုမန်နိုင်ငံတို့နှင့် သံတမန်ရေးအရ ဆက်လက်ညှိနှိုင်းလျက်ရှိသည်ဟု ဆိုသည်။ #Yanbu #Emmanuel_Macron

ဆော်ဒီ ရေနံဆိပ်ကမ်း ကာကွယ်ရန် ပြင်သစ်က စစ်ရေးအရ ကူညီမည်

Sep 25

ထရမ့်နှင့် ရှီကျင့်ပင် အိမ်ဖြူတော်တွင် တွေ့ဆုံ၊ လွှတ်တော် အရှေ့တွင် လူအချို့ ဆန္ဒပြ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၅ ရက်။ အမေရိကန်သမ္မတ ဒေါ်နယ်ထရမ့် (Donald Trump) သည် အိမ်ဖြူတော်သို့ လာရောက်သည့် တရုတ်သမ္မတ ရှီကျင့်ပင် (Xi Jinping) အား စက်တင်ဘာ ၂၄ ရက်တွင် ဂုဏ်ပြုညစာစားပွဲဖြင့် တည်ခင်းဧည့်ခံပြီး နှစ်နိုင်ငံ မဟာဗျူဟာမြောက် နည်းပညာနှင့် စီးပွားရေး ပူးပေါင်းဆောင်ရွက် မှုဆိုင်ရာ ကိစ္စရပ်များကို ဆွေးနွေးခဲ့ကြသည်။ အဆိုပါ ညစာစားပွဲသို့ Tesla နည်းပညာကုမ္ပဏီ၏ အမှုဆောင်အရာရှိချုပ် (CEO) အီလွန်မတ်စ် (Elon Musk)၊ OpenAI အမှုဆောင်အရာရှိချုပ် ဆမ်အာမန်း (Sam Altman) တို့အပါအဝင် နာမည်ကျော် ဆီမီးကွန်ဒက်တာ ထုတ်လုပ်ရေး ကုမ္ပဏီများဖြစ်ကြသည့် Nvidia နှင့် AMD တို့၏ ထိပ်သီးအရာရှိများ တက်ရောက်ခဲ့ကြသည်။ တွေ့ဆုံပွဲတွင် သမ္မတ ထရမ့်က အမေရိကန်နှင့် တရုတ် ပြည်သူများအကြား ကုန်သွယ်ရေးနှင့် အယူအဆ ဖလှယ်မှုဆိုင်ရာ သမိုင်းဝင် ဆက်ဆံရေးကို မီးမောင်းထိုးပြခဲ့ပြီး ခေါင်းဆောင်နှစ်ဦးအကြား ရင်းနှီးသော ဆက်ဆံရေး ရှိကြောင်း ပြောကြားခဲ့သည်။ တရုတ်သမ္မတ ရှီကျင့်ပင်ကလည်း နှစ်နိုင်ငံ ချစ်ကြည်ရေးသည် ပိုမိုကောင်းမွန်သော အနာဂတ်ကို ဦးတည်နေပြီး အမေရိကန်နှင့် တရုတ်နိုင်ငံတို့အနေဖြင့် တာဝန်ယူမှုရှိသော နိုင်ငံကြီးများအဖြစ် အတူတကွ ပူးပေါင်းဆောင်ရွက်သွားရန် လိုအပ်ကြောင်း ထည့်သွင်းပြောဆိုခဲ့သည်။ တစ်ဖက်တွင်လည်း အိမ်ဖြူတော်နှင့် အမေရိကန် လွှတ်တော်အဆောက်အအုံ ပြင်ပ၌ သမ္မတ ရှီကျင့်ဖိန်၏ မူဝါဒများကို ဆန့်ကျင်သည့် ဆန္ဒပြပွဲများ အပြင်းအထန် ဖြစ်ပွားခဲ့သည်။ တိဘက်၊ ဟောင်ကောင်၊ ရှင်ကျန်းနှင့် ထိုင်ဝမ်ဒေသ အရေးလှုပ်ရှားသူ ရာပေါင်းများစွာသည် အိမ်ဖြူတော်အနီး၌ စုဝေးကာ လွတ်လပ်ခွင့်၊ လူ့အခွင့်အရေးနှင့် ဘာသာရေး လွတ်လပ်ခွင့်များကို တောင်းဆိုဆန္ဒပြခဲ့ကြသည်။ တစ်ချိန်တည်းမှာပင် တရုတ်အစိုးရ လိုလားသူ ၂၀၀ ခန့်ကလည်း သမ္မတ ရှီကျင့်ဖိန် တည်းခိုရာ ဟိုတယ်ပြင်ပ၌ အမျိုးသားအလံများ ဝှေ့ယမ်း၍ ကြိုဆိုပွဲ ပြုလုပ်ခဲ့ကြသည်။ #Trump #XiJinping

ထရမ့်နှင့် ရှီကျင့်ပင် အိမ်ဖြူတော်တွင် တွေ့ဆုံ၊ လွှတ်တော် အရှေ့တွင် လူအချို့ ဆန္ဒပြ

Sep 24

ကုလသမဂ္ဂ ပဋိညာဉ်ရှိ "ရန်သူနိုင်ငံ" စာသားပါ ပုဒ်မများ ဖျက်သိမ်းရန် ဂျပန်ဝန်ကြီးချုပ် တောင်းဆို သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၄ ရက်။ ကုလသမဂ္ဂ ပဋိညာဉ်စာချုပ်ပါ "ရန်သူနိုင်ငံ" အဖြစ် သုံးနှုန်းထားသည့် ပုဒ်မများကို ဖျက်သိမ်းရန်နှင့် လုံခြုံရေးကောင်စီ ပြုပြင်ပြောင်းလဲရန် ဂျပန်ဝန်ကြီးချုပ် စနိုင်း တာကာအိချိ (Sanae Takaichi) က ကုလသမဂ္ဂ အထွေထွေညီလာခံတွင် တောင်းဆိုလိုက်သည်။ ဂျပန်ဝန်ကြီးချုပ် တာကာအိချိ သည် ကုလသမဂ္ဂ အထွေထွေညီလာခံ ပထမဆုံးအကြိမ် မိန့်ခွန်းပြောကြားစဉ် ဒုတိယကမ္ဘာစစ်အပြီး ရေးဆွဲခဲ့သည့် ကုလသမဂ္ဂ ပဋိညာဉ်စာချုပ်၌ ဂျပန်၊ ဂျာမနီနှင့် အီတလီနိုင်ငံများကို "ရန်သူနိုင်ငံ" (Enemy State) အဖြစ် သတ်မှတ်ထားသည့် ခေတ်မမီတော့သော ပုဒ်မများကို အပြီးသတ် ပယ်ဖျက်ပေးရန် တောင်းဆိုခဲ့ခြင်း ဖြစ်သည်။ ထို့အပြင် လုံခြုံရေးကောင်စီ၏ တရားဝင်မှုနှင့် ကိုယ်စားပြုမှုကို မြှင့်တင်ရန်အတွက် အဖွဲ့ဝင်နိုင်ငံ အရေအတွက်ကို တိုးမြှင့်ပေးရန်လည်း တိုက်တွန်းခဲ့သည်။ မိန့်ခွန်းမပြောကြားမီ ဝန်ကြီးချုပ် တာကာအိချိ သည် အမေရိကန်သမ္မတ ဒေါ်နယ်ထရန့်နှင့် မိနစ် ၃၅ ကြာ သီးသန့်တွေ့ဆုံခဲ့သည်။ တရုတ်အရေး၊ ထိုင်ဝမ်ရေလက်ကြား တည်ငြိမ်ရေး၊ ဆီမီကွန်ဒတ်တာ၊ AI နည်းပညာနှင့် စီးပွားရေး လုံခြုံရေးဆိုင်ရာ ပူးပေါင်းဆောင်ရွက်မှုများကို အဓိကထား ဆွေးနွေးခဲ့ကြသည်ဟု ဆိုသည်။

ကုလသမဂ္ဂ ပဋိညာဉ်ရှိ “ရန်သူနိုင်ငံ” စာသားပါ ပုဒ်မများ ဖျက်သိမ်းရန် ဂျပန်ဝန်ကြီးချုပ် တောင်းဆို

« Prev 1 … 4 5 6 7 8 … 1,148 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

ဂျပန်နိုင်ငံက အမြဲတမ်းနေထိုင်ခွင့် လျှောက်ထားခအား အဆ ၂၀ ထိ တိုးမြှင့် — October 1, 2026 6:37 pm
လာအိုနိုင်ငံတွင် တရုတ်စစ်တပ်က စစ်ရေးအထောက်အကူပြု လေကြောင်းစခန်းသစ် ဖွင့်လှစ် — October 1, 2026 6:35 pm
ဗြိတိန် သုတေသနများအား တရုတ်ထောက်လှမ်းရေးများက အသုံးချနေကြောင်း MI5 သတိပေး — October 1, 2026 6:35 pm

Recent Posts

ကချင်နှင့် ရှမ်း-ကချင်အစပ် မြို့နယ် ၆ ခုတွင် KIA နှင့် စစ်အုပ်စုတပ်တို့ တိုက်ပွဲများ ဆက်လက်ပြင်းထန်
ဂျပန်နိုင်ငံက အမြဲတမ်းနေထိုင်ခွင့် လျှောက်ထားခအား အဆ ၂၀ ထိ တိုးမြှင့်
လာအိုနိုင်ငံတွင် တရုတ်စစ်တပ်က စစ်ရေးအထောက်အကူပြု လေကြောင်းစခန်းသစ် ဖွင့်လှစ်
ဗြိတိန် သုတေသနများအား တရုတ်ထောက်လှမ်းရေးများက အသုံးချနေကြောင်း MI5 သတိပေး
ကာလင်နင်ဂရက်ဒေသအား ပိတ်ဆို့ပါက နျူကလီးယားလက်နက်ဖြင့် တုံ့ပြန်မည်ဟု ရုရှား သတိပေး

Archives

Archives

×Close