NMG Doh – Page 3 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
နိုင်ငံတကာသတင်း
NMG အကြောင်း
Contact

Home
Author Archive

NMG Doh

Author: NMG Doh

Aug 13

ဆမီးမြို့ လေကြောင်းမှ ဗုံးကြဲခံရ၊ ၁၆ နှစ်ရွယ် မိန်းကလေးသေဆုံးပြီး ၈ ဦးဒဏ်ရာရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဩဂုတ်လ ၁၃ ရက်။ အာရက္ခတပ်တော် (AA) ထိန်းချုပ်ထားသည့် ချင်းပြည်၊ ပလက်ဝခရိုင်၊ ဆမီးမြို့ပေါ်ကို ညနက်ပိုင်းအချိန်တွင် စစ်အုပ်စုတပ်က လေကြောင်းမှ ဗုံးကြဲတိုက်ခိုက်ခဲ့သဖြင့် အသက် ၁၆ နှစ်အရွယ် အမျိုးသမီးငယ်တစ်ဦး သေဆုံးပြီး ကလေးသူငယ်များ အပါအဝင် ၈ ဦး ထိခိုက်ဒဏ်ရာ ရရှိသွားခဲ့သည်။ ဩဂုတ်လ ၁၂ ရက်နေ့၊ ည ၁၁ နာရီခွဲခန့်တွင် စစ်အုပ်စုတပ်၏ ဂျက်ဖိုက်တာ အမျိုးအစား တိုက်လေယာဉ် တစ်စီးသည် ဆမီးမြို့အဝင်နှင့် ဗျူဟာစခန်းဟောင်း နေရာများကို ပန်းတိုင်ထား၍ ဗုံး ၄ လုံး ကြဲချတိုက်ခိုက်ခဲ့ ခြင်း ဖြစ်သည်။ အဆိုပါ ဗုံးသီးများအနက် အချို့သည် အရပ်သားများ နေထိုင်ရာ အမှတ် (၂) ရပ်ကွက်အတွင်းသို့ ကျရောက် ပေါက်ကွဲခဲ့သဖြင့် အပြစ်မဲ့ ပြည်သူများ ထိခိုက်သေဆုံးခဲ့ရခြင်း ဖြစ်သည်ဟု ဒေသခံများက ပြောသည်။ ဆမီးမြို့မှ ဒေသခံတစ်ဦးက “လူတွေ အိပ်ပျော်နေတဲ့အချိန် ရုတ်တရက် လေယာဉ်သံကြားပြီး ဗုံးတွေ ဆက် တိုက် ကျပေါက်တာပါ။ အမှတ် (၂) ရပ်ကွက်ထဲ စက်ဝိုင်းလို ကျကွဲတော့ အိမ်တွေလည်း ပျက်စီးပြီး မိသားစု လိုက် ထိကြတာ။ အသက် ၅ နှစ်၊ ၈ နှစ်အရွယ် ကလေးတွေပါ ဒဏ်ရာရကုန်ကြတယ်” ဟု ပြောသည်။ ယခု တိုက်ခိုက်မှုကြောင့် အသက် ၁၆ နှစ်အရွယ် အမျိုးသမီးငယ်တစ်ဦး သေဆုံးခဲ့သည့်အပြင် ၎င်း၏ မိဘနှစ်ပါး နှင့် မောင်ငယ် ၃ ဦး၊ အသက် ၅ နှစ်နှင့် ၈ နှစ်အရွယ် ကလေးသူငယ်များ အပါအဝင် စုစုပေါင်း ၈ ဦး ဒဏ်ရာရရှိခဲ့ သည်။ လက်ရှိတွင် ဒဏ်ရာရရှိသူများကို ဘေးလွတ်ရာသို့ ရွှေ့ပြောင်းပေးထားပြီး အရေးပေါ် ဆေးကုသမှုများ ဆောင်ရွက်ပေးလျက် ရှိသည်။ စစ်အုပ်စုတပ်သည် ဩဂုတ်လ ၁၁ ရက်နေ့ကလည်း ပလက်ဝမြို့အဝင်ကို လေကြောင်းမှ ဗုံးကြဲတိုက်ခိုက်ခဲ့ သဖြင့် ကျောင်းသူ ၂ ဦး ဒဏ်ရာရရှိခဲ့သေးသည်။ ဒေသတွင်း သတင်းရင်းမြစ်တစ်ဦးက “မြေပြင်တိုက်ပွဲတွေမှာ အထိနာလာရင် စစ်အုပ်စုတပ်က AA ထိန်းချုပ် ထားတဲ့ နယ်မြေတွေထဲက ပြည်သူတွေကိုပဲ ပစ်မှတ်ထားပြီး လေကြောင်းကနေ ဒေါသထွက်ထွက်နဲ့ လာကြဲ တာပါ။ ဆမီးတင်မကဘူး၊ ပလက်ဝရော၊ သံတွဲ၊ အမ်း စတဲ့ မြို့တွေမှာပါ ပြည်သူတွေရဲ့ အသက်အန္တရာယ်က နေ့ရောညပါ စိုးရိမ်နေရတယ်” ဟု နယ်မြေတွင်း အခြေအနေကို မှတ်ချက်ပြုသည်။ ထို့ပြင် ရခိုင်ပြည်နှင့် ပလက်ဝဒေသအတွင်း စစ်အုပ်စုတပ်၏ ပစ်မှတ်ထား တိုက်ခိုက်မှုများကြောင့် ၂၀၂၆ ခုနှစ် ဩဂုတ်လ ၁ ရက်မှ ၁၁ ရက်နေ့အထိ ကာလအတွင်း အရပ်သား ၁၉ ဦး သေဆုံးပြီး ၂၆ ဦး ထိခိုက်ဒဏ်ရာရရှိခဲ့ပြီး အရပ်ဘက် အဆောက်အအုံများနှင့် ဘာသာရေး အဆောက်အအုံများ ပျက်စီးခဲ့ကြောင်း လူသားချင်းစာနာ ထောက်ထားမှုနှင့် ဖွံ့ဖြိုးရေးပူးပေါင်းဆောင်ရွက်ရေးရုံး (HDCO) က ဩဂုတ်လ ၁၂ ရက်နေ့တွင် ထုတ်ပြန်ထား သည်။ HDCO ၏ မှတ်တမ်းများအရ သံတွဲ၊ အမ်း၊ မြောက်ဦးနှင့် ပလက်ဝမြို့နယ်များအတွင်း စစ်အုပ်စုတပ်က လေ ကြောင်းမှ ပစ်မှတ်ထား တိုက်ခိုက်နေမှုများကြောင့် အရပ်သား ပြည်သူများ၏ ဘေးအန္တရာယ်မှာ အထူးစိုးရိမ် ဖွယ်ရာ အခြေအနေသို့ ရောက်ရှိနေကြောင်း သတိပေးထားသည်။ #ဆမီးမြို့ #ချင်းပြည် #ပလက်ဝ #AA

ဆမီးမြို့ လေကြောင်းမှ ဗုံးကြဲခံရ၊ ၁၆ နှစ်ရွယ် မိန်းကလေးသေဆုံးပြီး ၈ ဦးဒဏ်ရာရ

Aug 13

ထိုင်း-တရုတ် လေတပ် ပူးတွဲ စစ်လေ့ကျင့်ရေး ပြုလုပ် သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဩဂုတ်လ ၁၃ ရက်။ ထိုင်းနှင့် တရုတ် လေတပ်တို့ "Falcon Strike 2026" (စွန်ရဲသုတ် ၂၀၂၆) ပူးတွဲစစ်ရေးလေ့ကျင့်မှုကို ထိုင်းနိုင်ငံ ဥဒွန်ဌာနီ အမှတ် ၂၃ လေတပ်စခန်းတွင် စတင် လုပ်ဆောင်လျက်ရှိသည်ဟု Khaosod သတင်းတွင် ဖော်ပြသည်။ အဆိုပါ စစ်ရေးလေ့ကျင့်မှုတွင် တရုတ်နိုင်ငံဘက်မှ J-10C နှင့် J-11 တိုက်လေယာဉ်များအပြင် AWACS ကြိုတင်သတိပေးစနစ်ပါ လေယာဉ်များကို စေလွှတ်ပါဝင်စေခဲ့သည်။ ထိုင်းနိုင်ငံဘက်မှ ဆွီဒင်နိုင်ငံထုတ် Gripen တိုက်လေယာဉ်များနှင့် Alpha Jet လေယာဉ်များဖြင့် ပူးပေါင်းပါဝင်လေ့ကျင့်လျက်ရှိသည်။ ယခုလေ့ကျင့်ခန်းတွင် လေကြောင်း နည်းဗျူဟာမြောက် စစ်ဆင်ရေးများ၊ ဝေဟင် ပျံသန်းစဉ် စက်သုံးဆီ ဖြည့်တင်းခြင်းနှင့် ပူးတွဲစစ်ဆင်ရေး တာဝန်များ ပါဝင်သည်။ ထို့ပြင် အကြီးစား ရေကြီးရေလျှံမှု ဖြစ်စဉ်ကို အခြေခံထားသည့် လူသားချင်းစာနာထောက်ထားမှု အကူအညီပေးရေးနှင့် သဘာဝဘေးအန္တရာယ် ကယ်ဆယ်ရေး (HADR) လေ့ကျင့်မှုများကိုပါ ထည့်သွင်းပြုလုပ်သွားမည်ဖြစ်ကြောင်း သိရသည်။ #Falcon_Strike_2026

ထိုင်း-တရုတ် လေတပ် ပူးတွဲ စစ်လေ့ကျင့်ရေး ပြုလုပ်

Aug 13

ဟာဝိုင်ယီ မီးတောင်ပေါက်၊ ချော်ရည်များ အမြင့်ပေ ၄၀၀ ထိ ပန်းထွက် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဩဂုတ်လ ၁၃ ရက်။ ဟာဝိုင်ယီရှိ ကီလာအွေးယာ (Kīlauea) မီးတောင် ပေါက်ကွဲအား ပြင်းထန်နေပြီး ချော်ရည်များ အမြင့်ပေ ၄၀၀ အမြင့်အထိ ပန်းထွက်ခဲ့သည်။ ၂၀၂၆ ခုနှစ်၊ သြဂုတ် ၁၂ ရက် (ဗုဒ္ဓဟူးနေ့) မွန်းလွဲ ၃:၄၅ နာရီတွင် ဟာလီမောင်မောင် Halemaumau မီးတောင်ဝ၌ အကြိမ် ၅၃ မြောက် ပေါက်ကွဲမှု စတင်ခဲ့သည်။ ပေါက်ကွဲမှု ပြင်းအား လျှင်မြန်စွာ မြင့်တက်လာခဲ့ပြီး မြောက်ဘက်အပေါက်မှ ချော်ရည်များ ပေ ၄၀၀ အထိ အမြင့်သို့ ပန်းထွက်ခဲ့သည်။ မီးတောင်ပြာခိုး တိမ်တိုက်သည် ပေ ၁၆,၀၀၀ အထိ မြင့်တက်ခဲ့ကာ ညဘက်တွင် မီးတောင်ဝ ကြမ်းပြင်၏ ၃၀% မှ ၄၀% အထိ ချော်ရည်များ ဖုံးလွှမ်းသွားခဲ့သည်။ လေတိုက်ခတ်မှုကြောင့် မီးတောင်ပြာနှင့် ဓာတ်ငွေ့များသည် အနောက်တောင်နှင့် အနောက်ဘက်ရှိ Hawaii Volcanoes အမျိုးသားဥယျာဉ်အတွင်းသို့ လွင့်ပါးသွားနိုင်သည်ဟု ခန့်မှန်းထားသော်လည်း ဒေသခံလူထုအပေါ် သက်ရောက်မှု နည်းပါးမည်ဟု ဆိုသည်။ #Kīlauea #Halemaumau #HawaiiVolcanoes

ဟာဝိုင်ယီ မီးတောင်ပေါက်၊ ချော်ရည်များ အမြင့်ပေ ၄၀၀ ထိ ပန်းထွက်

Aug 13

အမေရိကန်-တောင်ကိုရီးယား စစ်ရေးလေ့ကျင့်မှုမတိုင်မီ မြောက်ကိုရီးယား ဒုံးကျည်ပစ်လွှတ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဩဂုတ်လ ၁၃ ရက်။ အမေရိကန်နှင့် တောင်ကိုရီးယားတို့၏ ပူးတွဲစစ်ရေးလေ့ကျင့်မှု မစတင်မီ ရက်ပိုင်းအလို ဩဂုတ်လ ၁၂ ရက်နေ့က မြောက်ကိုရီးယားနိုင်ငံသည် ပဲ့ထိန်းဒုံးကျည်တစ်စင်းကို ထပ်မံပစ်လွှတ်လိုက်သည်။ အဆိုပါ ဒုံးကျည်ကို ဝမ်ဆန် (Wonsan) ဒေသမှ ကိုရီးယားကျွန်းဆွယ် အရှေ့ဘက် ပင်လယ်ပြင်သို့ ပစ်လွှတ်ခဲ့ခြင်းဖြစ်ပြီး ကီလိုမီတာ ၇၀၀ ခန့် (မိုင် ၄၃၀) အထိ ပျံသန်းခဲ့ကြောင်း တောင်ကိုရီးယားနှင့် ဂျပန်အာဏာပိုင်များက အတည်ပြုသည်။ ယင်းသည် ၂၀၂၆ ခုနှစ်အတွင်း မြောက်ကိုရီးယား၏ (၁၁) ကြိမ်မြောက် ပဲ့ထိန်းဒုံးကျည် စမ်းသပ်မှုဖြစ်ပြီး ပြီးခဲ့သည့် ဩဂုတ်လ ၆ ရက်ကလည်း အဆိုပါဒေသမှပင် ဒုံးကျည်တစ်စင်း ပစ်လွှတ်ခဲ့သေးသည်။ မြောက်ကိုရီးယား၏ လုပ်ရပ်အပေါ် ဂျပန်အစိုးရက ပေကျင်းရှိ ဂျပန်သံရုံးမှတစ်ဆင့် ပြင်းထန်စွာ ကန့်ကွက်ရှုတ်ချခဲ့သည်။ တောင်ကိုရီးယားကလည်း အမျိုးသားလုံခြုံရေးကောင်စီ အရေးပေါ်အစည်းအဝေးကို ချက်ချင်းခေါ်ယူကာ ကုလသမဂ္ဂ လုံခြုံရေးကောင်စီ၏ ဆုံးဖြတ်ချက်များကို ချိုးဖောက်သည့် ရန်စမှုများ ရပ်တန့်ရန် တောင်းဆိုခဲ့သည်။ စစ်ရေးလေ့လာသူများကမူ ယခုပစ်လွှတ်လိုက်သည့် ဒုံးကျည်မှာ အသံထက်မြန်သော (Hypersonic) ဒုံးကျည် သို့မဟုတ် ရေငုပ်သင်္ဘောမှ ပစ်လွှတ်သည့် ဒုံးကျည်အမျိုးအစား ဖြစ်နိုင်ကြောင်း ခန့်မှန်းထားကြသည်။ #မြောက်ကိုရီးယားပဲ့ထိန်းဒုံးကျည်

အမေရိကန်-တောင်ကိုရီးယား စစ်ရေးလေ့ကျင့်မှုမတိုင်မီ မြောက်ကိုရီးယား ဒုံးကျည်ပစ်လွှတ်

Aug 13

တရုတ်ထုတ် C919 လေယာဉ် နိုင်ငံတကာခရီးစဉ် စတင်ပြေးဆွဲ သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဩဂုတ်လ ၁၃ ရက်။ တရုတ်နိုင်ငံက ပြည်တွင်း၌ ကိုယ်တိုင်ဒီဇိုင်းဆွဲ ထုတ်လုပ်ထားသည့် C919 အမျိုးအစား ခရီးသည်တင်လေယာဉ်သည် ၎င်း၏ ပထမဆုံးသော နိုင်ငံတကာ အရပ်ဘက် စီးပွားဖြစ်ခရီးစဉ်ကို အောင်မြင်စွာ ပြေးဆွဲနိုင်ခဲ့ပြီဖြစ်သည်။ ဩဂုတ်လ ၁၂ ရက်နေ့ မွန်းလွဲပိုင်းက ဘေဂျင်းအပြည်ပြည်ဆိုင်ရာလေဆိပ်မှ ထွက်ခွာလာသည့် အဆိုပါလေယာဉ်သည် မွန်ဂိုလီးယားနိုင်ငံ၊ အူလန်ဘာတာ (Ulaanbaatar) မြို့ရှိ လေဆိပ်သစ်သို့ ချောမွေ့စွာ ဆင်းသက်နိုင်ခဲ့သည်။ အဆိုပါ နိုင်ငံတကာခရီးစဉ်ကို လေယာဉ်အမှတ်စဉ် CA723 နှင့် CA724 တို့ဖြင့် ဘေဂျင်းနှင့် အူလန်ဘာတာအကြား နေ့စဉ် ပုံမှန်ပြေးဆွဲသွားမည်ဖြစ်ကြောင်း တရုတ်အစိုးရ မီဒီယာများက ဖော်ပြသည်။ ယင်းသည် C919 လေယာဉ်များအတွက် ပထမဆုံး တိုးချဲ့လိုက်သည့် နိုင်ငံတကာခရီးစဉ်ဖြစ်ပြီး တရုတ်နိုင်ငံထုတ် ခရီးသည်တင် လေယာဉ်ကြီးများ နိုင်ငံတကာ ကောင်းကင်ယံတွင် ပုံမှန်ပြေးဆွဲနိုင်မည့် ခေတ်သစ်တစ်ရပ်ကို ဖွင့်လှစ်လိုက်ခြင်းလည်း ဖြစ်သည်။ ယခုကဲ့သို့ အောင်မြင်စွာ ပြေးဆွဲနိုင်ခြင်းက C919 လေယာဉ်ကြီးအနေဖြင့် နိုင်ငံတကာ မြို့ပြလေကြောင်းပျံသန်းမှု စံချိန်စံညွှန်းများကို အပြည့်အဝ ကိုက်ညီဖြတ်ကျော်နိုင်ပြီဖြစ်ကြောင်း သက်သေပြလိုက်ခြင်းဖြစ်သည်။ အမေရိကန် ဘိုးရင်းနှင့် ဥရောပ၏ အဲဘတ်စ် လေယာဉ်ကြီးများ ကြီးစိုးထားသော ခရီးသည်တင် ဂျက်လေယာဉ် ဈေးကွက်ကို တရုတ်က ပထမဆုံး ဝင်ရောက်လာခြင်းလည်း ဖြစ်သည်။ #C919

တရုတ်ထုတ် C919 လေယာဉ် နိုင်ငံတကာခရီးစဉ် စတင်ပြေးဆွဲ

Aug 13

နေကြတ်သည့်ဖြစ်စဉ်ကြောင့် ဥရောပတွင် ဟိုတယ်ဈေးနှုန်းများ စံချိန်တင်မြင့်တက် သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဩဂုတ်လ ၁၃ ရက်။ ဥရောပနိုင်ငံအချို့တွင် နေကြတ်သည့်ဖြစ်စဉ်ကို လာရောက်ကြည့်ရှုသူ များပြားသည့်အတွက် ဒေသတွင်း ဟိုတယ်ဈေးနှုန်းများ တစ်ညလျှင် ကန်ဒေါ်လာ ၁,၀၀၀ ကျော်အထိ စံချိန်တင် မြင့်တက်သွားခဲ့သည်။ ယူကေ၊ အိုက်စလန်၊ စပိန်မြောက်ပိုင်း၊ ဂရင်းလန်းနှင့် ပေါ်တူဂီနိုင်ငံတို့တွင် နေအပြည့်ကြတ်သည့် ဖြစ်စဉ်ကို မြင်တွေ့ရမည်ဖြစ်ရာ ဒေသတွင်း တည်းခိုခန်းနှင့် ဟိုတယ်လုပ်ငန်းရှင်များအတွက် ကြီးမားသည့် စီးပွားရေးအခွင့်အလမ်းတစ်ရပ် ဖြစ်လာခဲ့သည်။ အထူးသဖြင့် နေကြတ်ခြင်းကို အထင်ရှားဆုံး မြင်တွေ့ရမည့် အိုက်စလန်နိုင်ငံ မြို့တော် ရေဂျာဗစ် (Reykjavik) နှင့် စပိန်နိုင်ငံရှိ မြို့များတွင် ဟိုတယ်နှင့် ကာလတို တည်းခိုခန်းဈေးနှုန်းများ အဆမတန် မြင့်တက်ခဲ့သည်။ ရေဂျာဗစ်မြို့တွင် နေကြတ်မည့်သီတင်းပတ်အတွင်း ဟိုတယ်တစ်ညလျှင် ပျမ်းမျှ ကန်ဒေါ်လာ ၁,၀၁၂ နှင့် ကာလတို တည်းခိုခန်းများတွင် ၁,၁၇၂ ဒေါ်လာအထိ ပေါက်ဈေးရှိခဲ့သည်။ AirDNA ၏ အချက်အလက်များအရ အိုက်စလန်ရှိ တည်းခိုခန်းများ၏ ၆၄ ရာခိုင်နှုန်းနှင့် စပိန်ရှိ တည်းခိုခန်း ၂၁ ရာခိုင်နှုန်းမှာ နေကြတ်မည့် လမ်းကြောင်းပေါ်တွင် တည်ရှိနေပြီး အဆိုပါဒေသများ၌ ခရီးသွားဝင်ရောက်မှုမှာ ပြီးခဲ့သည့်နှစ်ကထက် ၄၀ ရာခိုင်နှုန်းအထိ မြင့်တက်လာသည်ဟု ဆိုသည်။ သို့သော် လေ့လာဆန်းစစ်သူများကမူ ယင်းသည် ဟိုတယ်လုပ်ငန်းများအတွက် ရက်အနည်းငယ်သာ အကျိုးအမြတ်ရရှိစေမည့် "ခဏတာ အခွင့်အရေး" သာဖြစ်ကြောင်း သုံးသပ်ထားသည်။ #SolarEclipse #နေကြတ်

နေကြတ်သည့်ဖြစ်စဉ်ကြောင့် ဥရောပတွင် ဟိုတယ်ဈေးနှုန်းများ စံချိန်တင်မြင့်တက်

Aug 12

စာသင်ကျောင်းအတွင်း ကြေးနီများ ခိုးရန် ကြံစည်မှုဖြင့် မြန်မာရွှေ့ပြောင်းသူ ၃ ဦး အဖမ်းခံရ သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဩဂုတ်လ ၁၃ ရက်။ အမေရိကန်ပြည်ထောင်စု၊ ဝစ်စကွန်ဆင်ပြည်နယ်၊ မီလ်ဝေါကီ (Milwaukee) မြို့တွင် မီးလောင်ကျွမ်းခဲ့၍ ပျက်စီးသွားသော လင်ကွန်းအက်ဗင်နူး စာသင်ကျောင်း (Lincoln Avenue School) အတွင်းသို့ ကြေးနီနှင့် တန်ဖိုးရှိ ပစ္စည်းများ ခိုးယူရန် ခိုးဝင်ခဲ့သည့် မြန်မာနိုင်ငံမှ ရွှေ့ပြောင်းအခြေချလာသည့် အမျိုးသား ၃ ဦးကို ရဲတပ်ဖွဲ့က ဖမ်းဆီး တရားစွဲဆိုလိုက်သည်။ ဖမ်းဆီးခံရသူ ၃ ဦးမှာ စိုးလှ (၂၄)၊ အယ်ပူကျော် (Eh Pu Jaw) (၃၀) နှင့် လာတာ (Lah Tah) (၃၄) တို့ ဖြစ်ကြသည်။ ဩဂုတ် ၆ ရက် နံနက် ၄ နာရီခန့်တွင် စာသင်ကျောင်းအတွင်း မီးလင်းအိမ်အလင်းရောင်များ တွေ့ရှိကြောင်း လုံခြုံရေးဝန်ထမ်းများ၏ သတင်းပေးပို့ချက်အရ ရဲတပ်ဖွဲ့က သွားရောက်စစ်ဆေးခဲ့ရာ သိုလှောင်ခန်းအတွင်း ပုန်းအောင်းနေသူ လာတာ (Lah Tah) နှင့် လှေကားအောက်တွင် ပုန်းနေသူ စိုးလှ (Soe Hla) တို့ကို သော့ဖွင့်ကိရိယာများ၊ လက်ဆွဲလွှများ၊ ဝှက်ဝါယာကြိုးများနှင့်အတူ ဖမ်းဆီးရမိခဲ့သည်။ ထို့ပြင် စာသင်ကျောင်းနှင့် တစ်ကွက်ကျော်အကွာရှိ မော်တော်ယာဉ်အတွင်း အိပ်ပျော်နေသူ အယ်ပုကျော် (Eh Pu Jaw) ကိုလည်း သေနတ်တစ်လက်၊ မူးယစ်ဆေးဝါးများနှင့်အတူ တွေ့ရှိခဲ့သည်။ စိုးလှ၏ ထွက်ဆိုချက်အရ ကြေးနီခိုးယူရန် အခြားတစ်ဦးနှင့်အတူ ကျောင်းအတွင်း ဝင်ရောက်ခဲ့ခြင်းဖြစ်ပြီး တတိယမြောက်လူက မော်တော်ယာဉ်ဖြင့် လိုက်ပို့ပေးခဲ့ခြင်းဖြစ်သည်ဟု ဆိုသည်။ လာတာကလည်း ရောင်းချရန် ပစ္စည်းများ ရှာဖွေခဲ့ခြင်းဖြစ်ကြောင်း ဝန်ခံထားသည်။ ၎င်းတို့ ၃ ဦးလုံးကို ပိုင်နက်ကျူးလွန်မှု၊ ခိုးယူမှုဆိုင်ရာ ကိရိယာများ လက်ဝယ်တွေ့ရှိမှုနှင့် ပြစ်ဒဏ် ထပ်မံကျူးလွန်မှု အပါအဝင် ရာဇဝတ်မှုများဖြင့် တရားစွဲဆိုထားသည်။ အဆိုပါ လင်ကွန်းအက်ဗင်နူး စာသင်ကျောင်းသည် ပြီးခဲ့သည့် ဇွန်လ ၃၀ ရက်က ဓာတုဗေဒဆေးရည်များ ပေကျံနေသည့် အဝတ်စများမှတစ်ဆင့် အမှတ်မထင် မီးစတင်လောင်ကျွမ်းခဲ့ခြင်းဖြစ်သည်။ #Milwaukee #Lincoln_Avenue_School #Eh_Pu_Jaw #Lah_Tah #Soe_Hla

စာသင်ကျောင်းအတွင်းကြေးနီများခိုးရန် ကြံစည်မှုဖြင့် မြန်မာရွှေ့ပြောင်းသူ ၃ ဦး အဖမ်းခံရ

Aug 12

စစ်အုပ်စု၏ တစ်ဖွဲ့ချင်းစီခွဲ၍ ဆွေးနွေးပွဲ ဖိတ်ခေါ်မှုကို KIO လက်ခံမည်မဟုတ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဩဂုတ်လ ၁၂ ရက်။ တရုတ်၏ ဖိအားပေးမှုကြောင့် မြန်မာ - တရုတ် နယ်စပ်အခြေစိုက် လက်နက်ကိုင် အဖွဲ့အစည်းများနှင့် စစ်အုပ်စု တို့ တွေ့ဆုံဆွေးနွေးမှုများ ရှိလာနေသော်လည်း ကချင်လွတ်လပ်ရေးအဖွဲ့ (KIO/KIA) အနေဖြင့် အားလုံးပါဝင် သည့် တွေ့ဆုံဆွေးနွေးရေးမူကိုသာ ဆက်လက်ကိုင်စွဲထားသည်ဟု ပြောသည်။ စစ်အုပ်စုသည် တရုတ်-မြန်မာနယ်စပ်ရှိ အင်အားကြီး လက်နက်ကိုင် တော်လှန်ရေး အဖွဲ့အစည်းများဖြစ်သည့် “ဝ” ပြည်သွေးစည်းညီညွတ်ရေး ပါတီ (UWSP/UWSA)၊ တအာင်း အမျိုးသား လွတ်မြောက်ရေး တပ်မတော် (PSLF/TNLA)၊ အမျိုးသား ဒီမိုကရက်တစ် မဟာမိတ် တပ်မတော် - မိုင်းလားအဖွဲ့ (NDAA) နှင့် ရှမ်းပြည်တိုး တက်ရေးပါတီ (SSPP/SSA) စသည့် အဖွဲ့များနှင့် တစ်ဖွဲ့ချင်းစီ သီးခြားတွေ့ဆုံ ဆွေးနွေးမှုများ ဆက်တိုက် ပြုလုပ်လာခဲ့သည်။ ထိုသို့ တစ်ဖွဲ့ချင်းစီ ဖိတ်ခေါ်သည့် တွေ့ဆုံဆွေးနွေးမှုမျိုးတွင် KIO အနေဖြင့် ပါဝင်မည်မဟုတ်ဘဲ အားလုံးပါဝင် နိုင်သည့် အခင်းအကျင်းမျိုးမှသာ တွေ့ဆုံမည်ဟု KIO ၏ ပြောရေးဆိုခွင့်ရှိသူ ဗိုလ်မှူးကြီးနော်ဘူက အတည်ပြု ပြောဆိုသည်။ ဗိုလ်မှူးကြီးနော်ဘူက “ကျနော်တို့ အမြဲတမ်းပြောနေတဲ့ အားလုံးပါဝင်နိုင်တဲ့ အနေအထားမှာပဲ ကျနော်တို့ တွေ့ ဆုံမှု ရှိမှာပါ။ တစ်ဖွဲ့ချင်း တစ်ဖွဲ့ချင်းနဲ့ ဖိတ်ပြီးမှ တွေ့ဆုံတဲ့ တွေ့ဆုံမှုမှာတော့ ကျနော်တို့ KIO အနေနဲ့တော့ တွေ့ဆုံမှာတော့ မဟုတ်ပါဘူး” ဟု ပြောသည်။ ထို့ပြင် စစ်အုပ်စုနှင့် တွေ့ဆုံဆွေးနွေးရန် တရုတ်ဘက်မှ ဖိအားပေး ပြောဆိုခြင်း မရှိသကဲ့သို့ စစ်တပ်ဘက်မှ လည်း တွေ့ဆုံရန် ပြောဆိုလာခြင်း မရှိသေးကြောင်း ၎င်းက ဆက်ပြောသည်။ တစ်ဖွဲ့ချင်းစီ တွေ့ဆုံဆွေးနွေးသည့် နည်းလမ်းသည် တော်လှန်ရေး အဖွဲ့အစည်းများအကြား သပ်လျှိုသွေးခွဲသည့် လုပ်ရပ်ဖြစ်ပြီး တစ်နိုင်ငံလုံး အတိုင်းအတာဖြင့် အပြောင်းအလဲဖြစ်စေမည် မဟုတ်ကြောင်း KIO ဘက်က ထောက်ပြသည်။ “အားလုံး တစ်နိုင်ငံလုံး အတိုင်းအတာ ပါဝင်ပြီးမှ တစ်နိုင်ငံလုံး အတိုင်းအတာ အပြောင်းအလဲ ဖြစ်နိုင်ခြေရှိတဲ့ တွေ့ဆုံဆွေးနွေးပွဲမှာပဲ ကျနော်တို့က ဆွေးနွေးဖို့ ဖြစ်ပါတယ်” ဟု ဗိုလ်မှူးကြီးနော်ဘူက ပြောသည်။ စစ်အုပ်စုတပ်၏ အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ (NSPNC) သည် မိုင်းလားအဖွဲ့ (NDAA) နှင့် ဩဂုတ်လ ၁၀ ရက်မှ ၁၁ ရက်နေ့အထိ တွေ့ဆုံခဲ့ပြီး အဆင့်မြင့် ကိုယ်ပိုင် အုပ်ချုပ်ခွင့်ရရေးနှင့် ဒေသဖွံ့ဖြိုးရေးကိစ္စများကို ဆွေးနွေးခဲ့ကြသည်။ အလားတူ ဩဂုတ်လ ၃ ရက်နှင့် ၄ ရက်နေ့များတွင် “ဝ” တပ်ဖွဲ့ (UWSP/UWSA) နှင့် တွေ့ဆုံကာ ပြည်နယ် ရရှိရေး တောင်းဆိုချက်များကို ဆွေးနွေးခဲ့သလို၊ ဩဂုတ်လ ၇ ရက်နေ့က SSPP/SSA နှင့် တွေ့ဆုံ၍ ငြိမ်းချမ်း ရေး၊ အွန်လိုင်းလိမ်လည်မှု (ကျားဖြန့်) နှင့် လောင်းကစားတိုက်ဖျက်ရေး အပါအဝင် ဒေသဖွံ့ဖြိုးရေးဆိုင်ရာများ ကို ဆွေးနွေးခဲ့ကြသည်ဟု ထုတ်ပြန်ထားသည်။ ထို့ပြင် PSLF/TNLA နှင့်လည်း ဇူလိုင်လ ၁၉ ရက်နေ့က စစ်တပ်တို့ တွေ့ဆုံကာ နိုင်ငံရေးနည်းလမ်းဖြင့် ဖြေရှင်း ရေးနှင့် ဒေသတွင်း ပညာရေး၊ ကျန်းမာရေး၊ လမ်းပန်းဆက်သွယ်ရေး ကိစ္စများ ဆွေးနွေးခဲ့ကြသည်။ စစ်အုပ်စုနှင့် ဆွေးနွေးခဲ့သည့် အဆိုပါအဖွဲ့များသည် KIO/KIA အပါအဝင် မြောက်ပိုင်း လက်နက်ကိုင်များဖြင့် ဖွဲ့စည်းထားသည့် ပြည်ထောင်စု နိုင်ငံရေး ဆွေးနွေးညှိနှိုင်းရေးကော်မတီ (FPNCC) ၏ အဖွဲ့ဝင်များ ဖြစ်ကြသည်။ လက်ရှိတွင် စစ်အုပ်စုနှင့် တွေ့ဆုံဆွေးနွေးနေသည့် အဖွဲ့များမှာ နယ်မြေအတွင်း တိုက်ပွဲဖြစ်ပွားခြင်း မရှိသော် လည်း၊ အားလုံးပါဝင်ရေးမူကို ဆုပ်ကိုင်ထားသည့် KIO/KIA မှာမူ ကချင်ပြည်ရှိ မြို့နယ်အများအပြားတွင် စစ်တပ်နှင့် စစ်ရေးတင်းမာလျက်ရှိပြီး တိုက်ပွဲများ ဆက်လက်ဖြစ်ပွားနေသည်။ ဓါတ်ပုံ - Crd (ပုံဟောင်း) #KIO #KIA #Peaceprocess

စစ်အုပ်စု၏ တစ်ဖွဲ့ချင်းစီခွဲ၍ ဆွေးနွေးပွဲ ဖိတ်ခေါ်မှုကို KIO လက်ခံမည်မဟုတ်

Aug 12

ရခိုင်တွင် ၁၁ ရက်အတွင်း အရပ်သား ၁၉ ဦး သေဆုံးဟု HDCO ထုတ်ပြန် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဩဂုတ်လ ၁၂ ရက်။ ရခိုင်ပြည်အတွင်း စစ်တပ်၏ ပစ်မှတ်ထား တိုက်ခိုက်မှုများကြောင့် ၂၀၂၆ ခုနှစ် ဩဂုတ်လအတွင်း အရပ်သား ၁၉ ဦး သေဆုံးပြီး ၂၆ ဦး ထိခိုက်ဒဏ်ရာရရှိခဲ့ကာ အထူးစိုးရိမ်ဖွယ်ရာ အခြေအနေသို့ ရောက်ရှိနေကြောင်း Humanitarian and Development Coordination Office (HDCO) က ဩဂုတ်လ ၁၂ ရက်နေ့တွင် သတိပေး ထုတ်ပြန်လိုက်သည်။ ဩဂုတ်လ ၁ ရက်နေ့မှ ၁၁ ရက်နေ့အထိ ကာလအတွင်း ရခိုင်ပြည်ရှိ အရပ်သားပြည်သူများ နေထိုင်ရာ ဒေသ များကို စစ်တပ်က ပစ်မှတ်ထား တိုက်ခိုက်ခဲ့သဖြင့် လူနေအိမ်များ၊ ဘာသာရေး အဆောက်အအုံများနှင့် အခြား အရပ်ဘက် အဆောက်အအုံများ ထိခိုက်ပျက်စီးခဲ့ရသည်။ HDCO နှင့် နီးစပ်သည့် ရခိုင်မြောက်ပိုင်းမှ အမျိုးသမီးတစ်ဦးက “ကျမတို့ စာရင်းတွေအရ တော်တော် ထိခိုက် လာတဲ့ အနေအထားပါ။ သံတွဲမြို့ဆိုရင် အငြိုးနဲ့လုပ်သလိုပါပဲ။ အခု ဆိုင်ကယ်မောင်းရင်တောင် ကောင်းကင် မော့ကြည့်နေရတယ်။ ဩဂုတ်လ ပထမ ၁၁ ရက်မှာတင် စစ်တပ် လေကြောင်းတိုက်လို့ သေဆုံးတာ ၁၉ ယောက်ရှိတယ်။ ထိခိုက်ဒဏ်ရာရတာ ၂၆ ယောက်ဆိုတော့ တော်တော်များတာ။ လူ့အသက်က တော်တော် ပေးနေရတာပါ” ဟု ပြောသည်။ HDCO က မှတ်တမ်းတင်ထားသည့် ဖြစ်စဉ်များတွင် သံတွဲ၊ အမ်း၊ မြောက်ဦးနှင့် ပလက်ဝ ဒေသရှိ အရပ်သား များ နေထိုင်ရာ နေရာများအပေါ် လေကြောင်းမှ ပစ်ခတ်တိုက်ခိုက်မှုများ ပါဝင်သည်။ ထို့ပြင် ရသေ့တောင်မြို့နယ်၊ နံ့သာကျွန်းတွင် ငါးဖမ်းနေသည့် စစ်ဘေးရှောင် အရပ်သားများကို အရပ်ဘက် ဝတ်စုံ ဝတ်ဆင်ထားသော စစ်အုပ်စု တပ်ဖွဲ့ဝင်များနှင့် လက်နက်ကိုင် မွတ်ဆလင်များက သေနတ်ဖြင့် ပစ်ခတ်ခဲ့ သည့် ဖြစ်စဉ်လည်း ပါဝင်သည်။ သံတွဲမြို့ လေကြောင်းတိုက်ခိုက်ခံရမှုတွင် အကူအညီပေးခဲ့သူ ဒေသခံတစ်ဦးက “နေရာတင် သေသွားတဲ့သူတွေ ရှိသလို ချက်ချင်းရှာမတွေ့တာ လည်း ရှိတယ်။ ဒဏ်ရာရသူတွေလည်း အရမ်းများတယ်။ ဒဏ်ရာရတဲ့သူတွေ ကိုလည်း ရွာထဲက ရနိုင်တဲ့နည်းနဲ့ အရေးပေါ် ကူညီပေးနေရတယ်။ အသေအပျောက်ကတော့ တဖြည်းဖြည်း ထပ်တိုးလာတာမျိုးလို့ ပြောလို့ရ တယ်” ဟု သတင်းနှင့်မီဒီယာ ကွန်ရက်သတင်းဌာနကို ပြောသည်။ စစ်တပ်က အရပ်သားများအပေါ် ယခုကဲ့သို့ ပစ်မှတ်ထား တိုက်ခိုက်နေခြင်းကြောင့် ထိခိုက်သေဆုံးမှုများ ဆက်တိုက် ဖြစ်ပေါ်နေခြင်းသည် အထူးစိုးရိမ်ဖွယ်ရာဖြစ်ကြောင်းနှင့် အရပ်သား ပြည်သူများနှင့် အရပ်ဘက် နေရာများကို တိုက်ခိုက်မှုများအပေါ် ပြင်းထန်စွာ ကန့်ကွက်ရှုတ်ချကြောင်း HDCO က ထုတ်ပြန်ထားသည်။ အရပ်သားပြည်သူများသည် စစ်ရေးပစ်မှတ်များ မဟုတ်သည့်အတွက် အရပ်သားများ၏ အသက်အိုးအိမ် စည်း စိမ်၊ လူနေအိမ်များ၊ ဘာသာရေး အဆောက်အအုံများနှင့် အခြား အရပ်ဘက် အဆောက်အအုံများကို အကာအကွယ် ပေးရမည်ဟု HDCO က ထောက်ပြထားသည်။ သို့ဖြစ်ပါ၍ ရခိုင်ပြည်အတွင်း ဆက်လက် မြင့်တက်နေသည့် အရပ်သား ထိခိုက်သေဆုံးမှုများအပေါ် နိုင်ငံတကာ အသိုင်းအဝိုင်းအနေဖြင့် အရေးတကြီး အာရုံစိုက်ရန်၊ အရပ်သားများ ကာကွယ်ရေးအတွက် ကြိုးပမ်းဆောင်ရွက် မှုများကို ပိုမိုအားကောင်းစေရန်နှင့် နိုင်ငံတကာ လူသားချင်းစာနာထောက်ထားမှု ဥပဒေ ချိုးဖောက်မှုများအတွက် အမှန်တကယ် တာဝန်ခံမှုရှိစေရေး ဆောင်ရွက်ကြရန် HDCO က တိုက်တွန်းထားသည်။ #HDCO #Humanitarian_and_Development_Coordination_Office #AA

ရခိုင်တွင် ၁၁ ရက်အတွင်း အရပ်သား ၁၉ ဦး သေဆုံးဟု HDCO ထုတ်ပြန်

« Prev 1 2 3 4 5 … 1,110 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

အိမ်ဟောင်းနံရံတွင် ဝှက်သိမ်းထားသည့် ယူရို ၉ သန်းတန်ဖိုး ရွှေများ တွေ့ရှိ — August 15, 2026 10:32 pm
လင်ကွန်းကို ဂျော့ဝါရှင်တန်ဖြင့် အစားထိုးမည် — August 14, 2026 4:38 pm
ဘရူးနိုင်းဘုရင်ကချွေးမဖြစ်သူ၏ တော်ဝင်ဘွဲ့တံဆိပ်များရုပ်သိမ်း — August 14, 2026 1:32 pm

Recent Posts

အိမ်ဟောင်းနံရံတွင် ဝှက်သိမ်းထားသည့် ယူရို ၉ သန်းတန်ဖိုး ရွှေများ တွေ့ရှိ
ထောင်တွင်း ကင်ဆာဖြစ်နေသည့် နိုင်ငံရေး အကျဉ်းသူ ၈ ဦး အသက်အန္တရာယ်ရှိနေ
မြစ်ဆုံစီမံကိန်း ပြန်စရန် စစ်အုပ်စုက လူထုစည်းရုံးမှုများ အရှိန်မြှင့်လုပ်ဆောင်နေဟု KHRW ပြော
ရခိုင်တောင်ပိုင်း စစ်အုပ်စု လေကြောင်းမှ ဗုံးကြဲမှုကြောင့် မိသားစုဝင်များအပါအဝင် ၈ ဦး သေဆုံး
လင်ကွန်းကို ဂျော့ဝါရှင်တန်ဖြင့် အစားထိုးမည်

Archives

Archives

×Close