NMG Doh – Page 19 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
နိုင်ငံတကာသတင်း
NMG အကြောင်း
Contact

Home
Author Archive

NMG Doh

Author: NMG Doh

Sep 9

မြန်မာ့အရေး ICC သို့ လွှဲပြောင်းရန် ကုလသမဂ္ဂ လူ့အခွင့်အရေး မဟာမင်းကြီး တိုက်တွန်း သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၉ ရက်။ မြန်မာနိုင်ငံ၏ အခြေအနေများကို အပြည်ပြည်ဆိုင်ရာ ရာဇဝတ်တရားရုံး (ICC) သို့ လွှဲပြောင်းပေးရန် ကုလသမဂ္ဂ လူ့အခွင့်အရေးဆိုင်ရာ မဟာမင်းကြီး ဗိုလ်ခါ တာ့ခ် (Volker Turk) က ကုလသမဂ္ဂ အဖွဲ့ဝင်နိုင်ငံများအား တနင်္လာနေ့တွင် တိုက်တွန်းတောင်းဆိုလိုက်သည်။ နှစ်ပေါင်းများစွာ လုပ်ဆောင်ခဲ့သည့် သံတမန်ရေး ကြိုးပမ်းမှုများသည် အကြမ်းဖက် ကျူးလွန်မှုများကို တားဆီးနိုင်ခြင်း မရှိသည့်အပြင်၊ ရိုဟင်ဂျာများ အပါအဝင် အရပ်သားများအပေါ် ကျူးလွန်ခဲ့သည့် ရာဇဝတ်မှုများအတွက်လည်း အပြစ်ပေး အရေးယူနိုင်ခဲ့ခြင်း မရှိကြောင်း ဂျနီဗာမြို့တွင် ကျင်းပသည့် (၆၃) ကြိမ်မြောက် ကုလသမဂ္ဂ လူ့အခွင့်အရေး ကောင်စီ အစည်းအဝေးတွင် မဟာမင်းကြီးက ပြောကြားခဲ့သည်။ မြန်မာနိုင်ငံတွင် လေကြောင်းတိုက်ခိုက်မှုများကြောင့် အရပ်သား သေဆုံးမှု အများဆုံး ဖြစ်ပွားနေပြီး အတည်ပြုနိုင်သည့် အရပ်သား သေဆုံးသူ ၁,၂၀၀ ကျော်နှင့် သတင်းရင်းမြစ်များ၏ ဖော်ပြချက်အရ ၃,၀၀၀ ကျော်အထိ ရှိနိုင်သည်ဟု ဆိုသည်။ ထို့ကြောင့် အပြည်ပြည်ဆိုင်ရာ ဥပဒေ ချိုးဖောက်မှုများကို အားပေးရာရောက်နေသည့် လက်နက်၊ ခဲယမ်း၊ လေယာဉ်ဆီနှင့် စစ်ဘက်သုံး ပစ္စည်းများ မြန်မာနိုင်ငံသို့ တင်ပို့နေခြင်းကို တားဆီးပေးကြရန်လည်း မဟာမင်းကြီးက တောင်းဆိုထားသည်။ ထို့အပြင် ရခိုင်ပြည်နယ်အတွင်းရှိ ရိုဟင်ဂျာများသည် မတရားဖမ်းဆီးမှု၊ ညှဉ်းပန်းနှိပ်စက်မှု၊ လိင်ပိုင်းဆိုင်ရာ အကြမ်းဖက်မှုနှင့် အဓမ္မ လုပ်အားပေး ခိုင်းစေမှု အစရှိသည့် စနစ်တကျ ကျူးလွန်သည့် လူ့အခွင့်အရေး ချိုးဖောက်မှုများနှင့် ရင်ဆိုင်နေရကြောင်း ထောက်ပြခဲ့သည်။ လက်ရှိ လုံခြုံရေး မရှိသေးသည့် အခြေအနေတွင် ဒုက္ခသည်များကို ပြန်လည် စေလွှတ်ခြင်းသည် နိုင်ငံတကာ၏ ဘေးအန္တရာယ်ရှိရာသို့ ပြန်မပို့ရေး မူဝါဒ (non-refoulement principle) ကို အကြီးအကျယ် ချိုးဖောက်ရာ ရောက်နိုင်ကြောင်းလည်း သတိပေးခဲ့သည်။ #ICC #မြန်မာ့အရေး #Volker_Turk

မြန်မာ့အရေး ICC သို့ လွှဲပြောင်းရန် ကုလသမဂ္ဂ လူ့အခွင့်အရေး မဟာမင်းကြီး တိုက်တွန်း

Sep 8

မြဝတီတွင် စစ်ဘေးရှောင်စခန်း ဒရုန်းဖြင့် ဗုံးကြဲခံရ၍ ကလေးတစ်ဦးအပါအဝင် ၂ ဦး သေဆုံး သတင်းနှင့် မီဒီယာကွန်ရက်။ ၂၀၂၆ ခုနှစ်၊ စက်တင်ဘာလ ၈ ရက်။ ကရင်ပြည်၊ မြဝတီမြို့နယ်တောင်ပိုင်း၊ ဖလူးဒေသရှိ ပလောတပို့ (အမိုးပြာ) စစ်ဘေးရှောင်စခန်းကို စစ်အုပ်စု တပ်က ဒရုန်းဖြင့် ဗုံးကြဲတိုက်ခိုက်ခဲ့သဖြင့် အသက် ၄ နှစ်အရွယ် ကလေးငယ်တစ်ဦးနှင့် အမျိုးသမီးတစ်ဦး သေဆုံးခဲ့ကြောင်း လူ့အခွင့်အရေး အဖွဲ့အစည်းများ တာဝန်ရှိသူများနှင့် စခန်းတာဝန်ခံက ပြောသည်။ မြေပြင်တိုက်ပွဲဖြစ်ပွားခြင်း မရှိဘဲ စစ်ဘေးရှောင်များ နေ့လယ်စာ သုံးဆောင်နေချိန်၌ စစ်အုပ်စုတပ်က အဆိုပါ စစ်ဘေးရှောင်စခန်း တည့်တည့်ကို ဒရုန်းဖြင့် ပြီးခဲ့သည့် စက်တင်ဘာလ ၄ ရက် မွန်းလွဲ ၁ နာရီခန့်တွင် ဗုံးကြဲ တိုက်ခိုက်ခဲ့ခြင်းဖြစ်သည်။ မွန်ပြည်လူ့အခွင့်အရေး ဖောင်ဒေးရှင်း (Human Rights Foundation of MonLand) မှ ပရိုဂရမ် ဒါရိုက်တာ နိုင်အဲမွန်က “စစ်အုပ်စုရဲ့ ဒရုန်းဗုံးထိတာပါ။ ပလောတပို့စခန်းအနီး လမ်းမတန်းပေါ်ကို ကြဲချတာပါ။ ပထမတလုံးက လမ်းမတန်းဘေး အိမ်တအိမ်နားကျတယ်၊ နေအိမ်ထဲက ကလေး အစမှန်ပြီး နေရာမှာပဲ ဆုံးတယ်။ လည်ပင်းထိတာ။ နောက် အမျိုးသမီးတဦးက ဒုတိယကြဲတဲ့အလုံးကို ထိတယ်။ ကေ့စ်နှစ်ခုပေ့ါ။ နေရာနှစ်နေရာ။ နှစ်ဦးစလုံးက မိသားစု နှစ်စုက လာတာဖြစ်တယ်” ဟု ပြောသည်။ ဒရုန်းဖြင့် ဗုံးကြဲတိုက်ခိုက်ခံရမှုကြောင့် မင်းလက်ပံကျေးရွာမှ ပလောတပို့စခန်းသို့ စစ်ဘေးတိမ်းရှောင်လာသည့် အသက် ၄ နှစ်အရွယ် ကလေးငယ်မှာ အခင်းဖြစ်နေရာတွင် ပွဲချင်းပြီး သေဆုံးခဲ့ရသည်။ ထို့ပြင် နေအိမ်သို့ ပြေးဝင်ခိုလှုံသည့် အသက် ၄၀ အရွယ် အမျိုးသမီးတစ်ဦးလည်း ထပ်မံ ထိမှန်ခဲ့ပြီး မဲဆောက် ဆေးရုံသို့ ပို့ဆောင်ကုသစဉ် ထိုည ၇ နာရီခန့်တွင် သေဆုံးသွားခဲ့ကြောင်း သိရသည်။ စစ်အုပ်စုတပ်၏ လေကြောင်းနှင့် ဒရုန်းအန္တရာယ် စိန်ခေါ်မှုများနှင့် ပတ်သက်၍ မနိုင်အဲမွန်က ယခုကဲ့သို့ ဆက်ပြောသည်။ “နောက်ပိုင်း စွမ်းဆောင်ရည်မြင့် ဒရုန်းတွေနဲ့ လှည့်တိုက်တာ ပိုများလာတယ်။ အရင်လို လေယာဉ်နဲ့က တစ်ခါ တစ်လေပဲ ကင်းထောက်ပုံစံ ကြားတော့တယ်။ လက်နက်ကြီးနဲ့ အဝေးက နေလှမ်းပစ်တာတွေလည်း တချို့ ရှိတယ်။ စခန်းတိုင်းနဲ့ ရွာတွေမှာတော့ အခုနောက်ပိုင်း လုံခြုံရေးနဲ့ ကာကွယ်ရေး အစီအမံတွေ ပြင်ဆင်မှုတွေ ရှိလာခဲ့တာ တွေ့ရတယ်။ သို့သော် နေ့တဓူဝ လှုပ်ရှားမှုတွေကြား ရှောင်တခင် တိုက်ခိုက်မှုတွေကိုတော့ တုံပြန်နိုင်စွမ်းနည်းကြတယ်။ ဒါကြောင့်လည်း ထိခိုက်တာတွေ တိမ်းပါးတာတွေ ဖြစ်နေဆဲပါပဲ” ဟု ၎င်းက သုံးသပ်ပြောဆိုသည်။ အဆိုပါ ပလောတပို့ (အမိုးပြာ) စစ်ဘေးရှောင်စခန်းသည် ပြီးခဲ့သည့် ၂၀၂၁ ခုနှစ် ဒီဇဇင်ဘာလ တတိယအပတ် လေးကေ့ကော်မြို့သစ် တိုက်ပွဲအပြီးတွင် ယာယီစစ်ရှောင်တဲများအဖြစ်မှ စခန်းအဖြစ် တည်ထောင်လာခဲ့ခြင်း ဖြစ်သည်။ ပြီးခဲ့သည့် မတ်လ ၁၄ ရက်နေ့ကလည်း အဆိုပါ စစ်ဘေးရှောင်စခန်းကို စစ်အုပ်စုတပ်က ဒရုန်းဖြင့် တိုက်ခိုက်ခဲ့ သဖြင့် အမျိုးသားတစ်ဦး သေဆုံးပြီး ၂ ဦး ပြင်းထန်ဒဏ်ရာ ရရှိခဲ့သေးသည်။ လက်ရှိတွင် အဆိုပါ စခန်း၌ ကော့ကရိတ်မြို့နယ်အတွင်းရှိ နန်းရွှေမိတ်၊ မိဖာလဲ့၊ ထီဖိုးစံ၊ နောင်ကိုင်း၊ နောင်တပ္ပံ၊ မြပတိုင်၊ နောင်တပွဲနှင့် နောင်မိ စသည့် ကျေးရွာများမှ စစ်ဘေးရှောင် ပြည်သူများ လာရောက်ခိုလှုံလျက်ရှိ ကြောင်း စခန်းတာဝန်ခံများထံမှ သိရသည်။ ဓာတ်ပုံ – (Human Rights Foundation of MonLand) #မြဝတီ #HURFOM

မြဝတီတွင် စစ်ဘေးရှောင်စခန်း ဒရုန်းဖြင့် ဗုံးကြဲခံရ၍ ကလေးတစ်ဦးအပါအဝင် ၂ ဦး သေဆုံး

Sep 8

စစ်ကိုင်းတိုင်း ရေဦးတွင် တိုက်ပွဲမရှိဘဲ လေကြောင်းမှ ဗုံးကြဲခံရ၍ အရပ်သား ၇ ဦး သေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၈ ရက်။ စစ်ကိုင်းတိုင်း၊ ရေဦးမြို့နယ်အတွင်း မြေပြင်တိုက်ပွဲဖြစ်ပွားခြင်း မရှိဘဲ စစ်အုပ်စုတပ်က လေကြောင်းမှ ရည် ရွယ်ချက်ရှိရှိ ဗုံးကြဲပစ်ခတ်ခဲ့သဖြင့် အမျိုးသမီးတစ်ဦး အပါအဝင် ဒေသခံ အရပ်သားပြည်သူ ၇ ဦး ထက်မနည်း ပွဲချင်းပြီး သေဆုံးခဲ့ကြောင်း ဒေသခံ ပြည်သူ့ကာကွယ်ရေးတပ်ဖွဲ့ (ပကဖ)နှင့် ဒေသခံများက ပြောသည်။ စက်တင်ဘာလ ၇ ရက် ညနေ ၅ နာရီခန့်တွင် မုံရွာမြို့ အနောက်မြောက်တိုင်းစစ်ဌာနချုပ် (နမခ) မှ တက်လာ သည့် ဂျိုင်ရိုကော်ပတာ (Gyrocopter) များနှင့် Mi-35P တိုက်ခိုက်ရေး ရဟတ်ယာဉ်တို့သည် ရေဦးမြို့ နယ်၊ တင်းတိမ်ရံကျေးရွာရှိ ဈေးနှင့် ကပ်လျက်တည်ရှိသော ကားဝပ်ရှော့သို့ တည့်တည့် ဗုံးကြဲချခဲ့ခြင်း ဖြစ်သည်။ အဆိုပါ လေကြောင်း တိုက်ခိုက်မှုကြောင့် အသက် ၂၀ မှ ၅၀ နှစ်ကြားရှိ အမျိုးသမီးတစ်ဦးနှင့် အမျိုးသား ၆ ဦး နေရာတွင်ပင် သေဆုံးခဲ့ရပြီး နောက်ထပ် အမျိုးသား ၃ ဦး ဒဏ်ရာရရှိကာ ကားဝပ်ရှော့နှင့် ဈေးဆိုင်ခန်းအချို့ ပျက်စီးခဲ့ရသည်။ အလားတူ ကား ၁၀ ထက်မနည်းလည်း ပျက်စီးသွားခဲ့သည်။ ရေဦးမြို့နယ် ဒေသခံတစ်ဦးက “ဗုံးကြဲတာက ညနေ ၅ နာရီကျော်လောက်မှာ ဖြစ်တာပါ။ အရပ်သားတွေရှိတဲ့ ကားအလုပ်ရုံကို ဝပ်ရှော့နေရာကို ဂျိုင်ရိုကော်ပတာနိမ့်နိမ့်နဲ့ တည့်တည့်ကို လာကြဲသွားတာ။ ၇ ယောက် သေသွားတယ်။ လေယာဉ်ပေါ်ကနေ စက်သေနတ်တွေနဲ့ပါ လိုက်ပစ်တော့ ဘေးက အိမ်တွေလည်း မှန်တယ်။ ကြောက်လန့်ပြီး အရပ်သားတွေလည်း ဘေးလွတ်ရာကို ထွက်ပြေးနေကြရတယ်” ဟု ပြောသည်။ ထို့ပြင် အဆိုပါ လေကြောင်း တိုက်ခိုက်မှုအတွင်း လေယာဉ်ပေါ်မှပါ စက်လတ်များဖြင့် လိုက်လံပစ်ခတ်ခဲ့သဖြင့် ဒေသခံများ ဘေးလွတ်ရာသို့ ရွှေ့ပြောင်းတိမ်းရှောင်နေကြရသည်။ ရေဦးမြို့နယ် ပကဖ တာဝန်ရှိသူတစ်ဦးက “ကျနော်တို့ နယ်ဘက်မှာ စစ်တပ်က မြို့ပေါ်ကိုပဲ ထိန်းချုပ်ထားနိုင် တာ။ မြို့ ပတ်ဝန်းကျင် ရွာတွေကို စစ်တပ်က ထိန်းချုပ်နိုင်စွမ်း မရှိဘူး။ မြေပြင်မှာ တိုက်ပွဲမရှိ၊ တော်လှန်ရေး တပ်ဖွဲ့တွေ မရှိဘဲနဲ့ အခုလို အရပ်သားပစ်မှတ်တွေကို ရည်ရွယ်ချက်ရှိရှိ လေကြောင်းကနေ ဆက်တိုက် တိုက် ခိုက်နေတာပါ။ ပြည်သူတွေအနေနဲ့ လေကြောင်းသတင်းတွေကို အမြဲနားစိုပြီး ပုန်းခိုကျင်းတွေထဲ ကြိုတင် ဝင်ရောက်နေထိုင်ကြဖို့ သတိပေးချင်ပါတယ်” ဟု ပြောသည်။ တင်းတိမ်ရံကျေးရွာသည် စစ်အာဏာသိမ်းပြီးချိန်မှစ၍ စစ်အုပ်စုတပ် စစ်ကြောင်းများ၏ အကြိမ်ကြိမ် မီးရှို့ ဖျက်ဆီးခြင်း ခံခဲ့ရသလို စာသင်ကျောင်း အပါအဝင် ကျေးရွာအတွင်းသို့ လေကြောင်းမှ ဗုံးကြဲခံနေရသည့် ကျေးရွာလည်း ဖြစ်သည်။ စစ်အုပ်စုတပ်သည် စက်တင်ဘာလ ၇ ရက်နေ့၌ ရေဦးမြို့နယ် တင်းတိမ်ရံကျေးရွာအပြင် ချောင်းဦးမြို့နယ် အတွင်းသို့ပါ ဂျိုင်ရိုကော်ပတာများဖြင့် လေကြောင်းတိုက်ခိုက်မှု ပြုလုပ်ခဲ့သည်။ အလားတူ စက်တင်ဘာလ ၆ ရက်နေ့ကလည်း အနီးဝန်းကျင်ရှိ ကနီမြို့နယ်၊ ယာကြီးကျေးရွာအနီးတွင် စစ်အုပ်စု တပ်နှင့် ပြည်သူ့ကာကွယ်ရေးတပ်တို့ ထိတွေ့တိုက်ပွဲများ ဖြစ်ပွားခဲ့သည်။ စစ်အုပ်စုတပ်သည် မုံရွာ-ယာကြီး-ကလေး လမ်းပိုင်းကို အင်အား ၈၀၀ နီးပါးဖြင့် စစ်ကြောင်းထိုးနေသဖြင့် မုံရွာ-ယာကြီး-ကလေး ကားလမ်းဘေးဝဲယာရှိ ချောင်းမ၊ အောင်မင်္ဂလာ၊ သင့်ငံနှင့် ယာကြီးအုပ်စုအတွင်းရှိ ကျေးရွာ ၄ ရွာမှ ဒေသခံများ ဘေးလွတ်ရာသို့ ထွက်ပြေးတိမ်းရှောင်နေကြရသည်။ အဆိုပါ စစ်ကြောင်းသည် ယာကြီးကျေးရွာအုပ်စုအတွင်းရှိ ရွာမကျေးရွာနှင့် ရေဖြူကျေးရွာတို့တွင် တပ်စွဲကာ ဒဏ်ရာရ စစ်သည်များကို ဆေးကုသမှု ပေးနေပြီး အနီးနား ပတ်ဝန်းကျင်သို့ လက်နက်ကြီး၊ လက်နက်ငယ်များ ဖြင့် ရမ်းသန်းပစ်ခတ်လျက်ရှိသည်။ ဓာတ်ပုံ - (ဗုံးကြဲပစ်ခတ်မှုကြောင့် ပျက်စီးသွားသည့် အခြေအနေ မြင်ကွင်း / Crd) #စစ်ကိုင်းတိုင်း

စစ်ကိုင်းတိုင်း ရေဦးတွင် တိုက်ပွဲမရှိဘဲ လေကြောင်းမှ ဗုံးကြဲခံရ၍ အရပ်သား ၇ ဦး သေဆုံး

Sep 8

ဂျာမနီ ကောင်စစ်ဝန်ရုံးကို ရုရှား မောင်းထုတ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၈ ရက်။ ရုရှားနိုင်ငံ၊ စိန့်ပီတာစဘတ်မြို့တွင် တည်ရှိသည့် ဂျာမန် ကောင်စစ်ဝန်ချုပ်ရုံးကို လာမည့် စက်တင်ဘာလ ၁၈ ရက်နေ့ထက် နောက်မကျစေဘဲ ပိတ်သိမ်းရန် ရုရှားနိုင်ငံခြားရေးဝန်ကြီးဌာနက အမိန့်ထုတ်ပြန်လိုက်သည်။ ထို့ပြင် ရုရှားနိုင်ငံအတွင်း စိုက်ထူထားသည့် ဂျာမန်ဘာသာစကားနှင့် ယဉ်ကျေးမှု ပြန့်ပွားရေး အဖွဲ့အစည်း၏ ဗဟိုဌာနခွဲ အားလုံးကိုလည်း ပိတ်သိမ်းရန်နှင့် ဝန်ထမ်းများအနေဖြင့် စက်တင်ဘာလ ၁၃ ရက်နေ့ နောက်ဆုံးထား၍ နိုင်ငံအတွင်းမှ ထွက်ခွာသွားရန် ရုရှားဘက်က သတိပေးထားသည်။ ယခု လုပ်ဆောင်ချက်သည် ဘုန်းမြို့ရှိ ရုရှားကောင်စစ်ဝန်ရုံးနှင့် ဘာလင်မြို့ရှိ ရုရှားယဉ်ကျေးမှုဗဟိုဌာနတို့ကို ပိတ်သိမ်းရန် ဂျာမနီဘက်က အစောပိုင်းတွင် ဆုံးဖြတ်ခဲ့မှုအပေါ် ရုရှားက တုံ့ပြန်ဆောင်ရွက်ခြင်းဖြစ်သည်။ ဂျာမနီနိုင်ငံ၊ လိုက်ပ်ဇစ် (Leipzig) လေဆိပ်တွင် ပြုလုပ်ခဲ့သည့် ဒရုန်းတိုက်ခိုက်မှု ကြိုးပမ်းမှုနောက်ကွယ်၌ ရုရှားနိုင်ငံ ပါဝင်နေသည်ဟု ဂျာမနီဘက်က စွပ်စွဲခဲ့ပြီးနောက်ပိုင်း နှစ်နိုင်ငံအကြား ပဋိပက္ခများ စတင်ခဲ့ခြင်းဖြစ်သည်။ ယင်းလေဆိပ်သည် ယူကရိန်းနိုင်ငံသို့ အကူအညီများ ပေးပို့ရာတွင် အဓိက အသုံးပြုနေသည့် အရေးပါသော လေကြောင်းကွန်လိုင်းတစ်ခု ဖြစ်သည်။ ဥရောပသမဂ္ဂ (EU) ကလည်း အဆိုပါဖြစ်စဉ်သည် ရုရှားက နောက်ကွယ်မှ ကူညီပေးခဲ့သည့် အကြမ်းဖက်မှုဖြစ်ကြောင်း မှတ်ချက်ပြုထားသည်။ သ သို့သော် ရုရှားနိုင်ငံခြားရေးဝန်ကြီးကမူ ဂျာမနီ၏ စွပ်စွဲချက်များကို ငြင်းဆိုလိုက်ပြီး ယင်းစွပ်စွဲချက်များသည် စစ်ပွဲတစ်ခု စတင်ရန် ပြင်ဆင်ခြင်းဖြစ်ကြောင်း တုံ့ပြန်ပြောကြားခဲ့သည်။ #ဂျာမနီ

ဂျာမနီ ကောင်စစ်ဝန်ရုံးကို ရုရှား မောင်းထုတ်

Sep 8

ရုပ်ရှင် လုပ်ငန်း ကျဆုံးမသွားစေရန် ပြင်သစ်နှင့် တောင်ကိုရီးယား ပူးပေါင်းကြိုးပမ်းမည် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၈ ရက်။ ပြင်သစ်နှင့် တောင်ကိုရီးယားနိုင်ငံတို့သည် ကမ္ဘာ့ရုပ်ရှင်နှင့် ရုပ်သံဖျော်ဖြေရေးကဏ္ဍ မြှင့်တင်ရန်အတွက် ယူရို ၁ ဘီလီယံ ပူးတွဲရင်းနှီးမြှုပ်နှံမည့် ၅ နှစ်တာ စီမံကိန်းကြီးကို ပူးတွဲ ထုတ်ပြန်လိုက်သည်။ ပြင်သစ်သမ္မတ အီမန်နူအဲလ် မက်ခရွန် နှင့် တောင်ကိုရီးယားသမ္မတ လီဂျေမြောင်း တို့သည် ပြင်သစ်နိုင်ငံတောင်ပိုင်းတွင် ကျင်းပခဲ့သည့် လူမီယာ (Lumière) ထိပ်သီးအစည်းအဝေး၌ ယခုကဲ့သို့ ကြေညာခဲ့ကြခြင်းဖြစ်သည်။ နှစ်နိုင်ငံလုံးက ယူရို သန်း ၅၀၀ စီ အချိုးကျ ထည့်ဝင်ကာ ၂၀၂၇ မှ ၂၀၃၁ အထိ ရန်ပုံငွေများ စတင်မတည်ပေးသွားမည်ဖြစ်သည်။ အဆိုပါ ရန်ပုံငွေများကို နိုင်ငံတကာ ရုပ်ရှင်ကုမ္ပဏီများ၊ နည်းပညာ သုတေသန လုပ်ငန်းများနှင့် ရုပ်ရှင်ပူးတွဲ ထုတ်လုပ်မှုများတွင် ထောက်ပံ့ပေးသွားမည်ဖြစ်သည်။ တောင်ကိုရီးယားသမ္မတ လီဂျေမြောင်း ကလည်း တောင်ကိုရီးယားအနေဖြင့် ယခင် အောင်မြင်ခဲ့သည့် အတွေ့အကြုံများကို အခြေခံ၍ ဘာသာစကား အတားအဆီးများကို ကျော်လွန်နိုင်မည့် ကမ္ဘာ့အဆင့်မီ ရုပ်ရှင်များကို ပိုမို ဦးဆောင်ထုတ်လုပ်သွားမည်ဟု ပြောကြားခဲ့သည်။ ယင်းမှာ စကားပြောကို အဓိက မထားဘဲ အမူအရာနှင့် ရုပ်ပုံများဖြင့် ဖော်ပြသည့် ရုပ်ရှင်ဇာတ်လမ်းများကို ထုတ်လုပ်သွားမည်ဟု ဆိုလိုခြင်းဖြစ်သည်။ ထို့ပြင် ပြင်သစ်သမ္မတ မက်ခရွန် က ဖန်တီးထားသည့် ဉာဏ်ရည်တု (AI) နည်းပညာများနှင့် ပတ်သက်၍ သတိပေးခဲ့သည်။ AI ကို အသုံးပြု၍ စာရေးဆရာများ၊ ရုပ်ရှင်ဖန်တီးရှင်များနှင့် အသံသရုပ်ဆောင်များ၏ နေရာတွင် အစားထိုးခြင်းသည် ကြီးမားသည့် အမှားအယွင်း ဖြစ်လာနိုင်ကြောင်းနှင့် မူပိုင်ခွင့်ဆိုင်ရာ ဥပဒေများကို ပိုမို တင်းကျပ်ရန် တောင်းဆိုခဲ့သည်။ ယင်းထိပ်သီးအစည်းအဝေးသို့ Netflix နှင့် NBCUniversal တို့ကဲ့သို့ ကမ္ဘာ့ရုပ်ရှင်လုပ်ငန်း ထိပ်သီးခေါင်းဆောင်များအပြင်၊ ဟောလိဝုဒ် မင်းသားကြီး ဂျော့ချ် ကလူနီ (George Clooney) အပါအဝင် နိုင်ငံပေါင်း ၅၅ နိုင်ငံမှ အနုပညာရှင်နှင့် စတူဒီယို အကြီးအကဲ ၂၀၀ ကျော် တက်ရောက်ခဲ့ကြသည်။ #Lumière

ရုပ်ရှင် လုပ်ငန်း ကျဆုံးမသွားစေရန် ပြင်သစ်နှင့် တောင်ကိုရီးယား ပူးပေါင်းကြိုးပမ်းမည်

Sep 8

မက္ကစီကိုတွင် မီးရှုးမီးပန်းများကြောင့် လူ ၁၀ ဦးသေ၊ ၆၀ ကျော် ဒဏ်ရာရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၈ ရက်။ မက္ကဆီကိုနိုင်ငံ အလယ်ပိုင်း၌ ကျင်းပသည့် ဘာသာရေးပွဲတော်တစ်ခုအတွင်း မီးရှူးမီးပန်းများ ပြင်းထန်စွာ ပေါက်ကွဲခဲ့မှုကြောင့် အနည်းဆုံး လူ ၁၀ ဦး သေဆုံးပြီး ၆၄ ဦး ဒဏ်ရာရရှိသွားကြောင်း သက်ဆိုင်ရာ တာဝန်ရှိသူများက ထုတ်ပြန်လိုက်သည်။ အဆိုပါ ပေါက်ကွဲမှုသည် မက္ကဆီကိုစီးတီးမြို့အနီးရှိ ဘုရားကျောင်းတစ်ခုဘေးတွင် စနေနေ့ညက ဖြစ်ပွားခဲ့ခြင်းဖြစ်သည်။ ရာနှင့်ချီသည့် ဒေသခံများ မီးရှူးမီးပန်း ပစ်ဖောက်သည်ကို ကြည့်ရှုရန် စုဝေးနေချိန်တွင် ပေါက်ကွဲမှုဖြစ်ပွားခဲ့ပြီး အုတ်တံတိုင်းတစ်ခုပါ ပြိုကျခဲ့သည်။ ဒဏ်ရာရရှိသူများထဲတွင် ဒေသခံ ခရစ်ယာန်ဘုန်းတော်ကြီး ၂ ဦးလည်း ပါဝင်ကြောင်း သိရသည်။ လူမှုကွန်ရက်တွင် ပျံ့နှံ့နေသည့် ဗီဒီယိုဖိုင်များတွင် ပေါက်ကွဲမှုအပြီး မီးခိုးများနှင့် အပျက်အစီးများကြား ပိတ်မိနေသူများကို ကယ်ဆယ်ရေးသမားများနှင့် လွတ်မြောက်လာသူများက လိုက်လံရှာဖွေနေကြသည်။ လက်ရှိတွင် ပေါက်ကွဲရသည့် အကြောင်းရင်းကို မက္ကဆီကိုပြည်နယ် ရှေ့နေချုပ်ရုံးက စုံစမ်းစစ်ဆေးလျက် ရှိသည်။ #မက္ကဆီကို

မက္ကစီကိုတွင် မီးရှုးမီးပန်းများကြောင့် လူ ၁၀ ဦးသေ၊ ၆၀ ကျော် ဒဏ်ရာရ

Sep 7

ဗန်းမော်-ရွှေကူ အစပ် ဧရာဝတီမြစ်ကူးတံတားကို စစ်တပ် ဗုံးကြဲ၍ ရထားလမ်းနှင့် ကားလမ်း ပျက်စီး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၇ ရက်။ ကချင်ပြည်၊ ဗန်းမော်မြို့နယ်နှင့် ရွှေကူမြို့နယ်အစပ်ရှိ လမ်းပန်းဆက်သွယ်ရေးနှင့် စစ်ရေးအရ အရေးပါသော စင်းခန်း ဧရာဝတီမြစ်ကူး သံမဏိသံဘောင်တံတားကို စစ်အုပ်စုတပ်က လေကြောင်းမှ ပေါင် ၅၀၀ ဗုံးများဖြင့် ကြဲချဖျက်ဆီးခဲ့သဖြင့် တံတားပေါ်ရှိ ရထားလမ်းနှင့် ကားလမ်းများ ထိခိုက်ပျက်စီးသွားခဲ့သည်။ ဗန်းမော်မြို့သို့ ရေကြောင်းမှ စစ်ကူနှင့် လက်နက်ရိက္ခာ ပို့ဆောင်သည့် စစ်အုပ်စု၏ စစ်သင်္ဘောတန်းများမှာ စင်းခန်းတံတားအနီး၌ တိုက်ခိုက်ခံရပြီး တပ်ဖွဲ့ဝင်အချို့ အလံဖြူထောင် အလင်းဝင်ခဲ့ပြီးနောက် စစ်အုပ်စုတပ်က အဆိုပါ မြစ်ကူးတံတားကို ဂျက်ဖိုက်တာဖြင့် ပေါင် ၅၀၀ ဗုံးနှစ်လုံး ကြဲချဖျက်ဆီးခဲ့ခြင်းဖြစ်သည်။ လေကြောင်းတိုက်ခိုက်မှုကြောင့် တံတား၏ အရှေ့ဘက်ခြေရင်းပိုင်းရှိ သံဘောင်များ ပျက်စီးသွားပြီး ကားတစ်စီး စာခန့် တံတားကြမ်းပြင် ပေါက်ထွက်သွားသည့်အပြင် ရထားသံလမ်းပါ လုံးဝအသုံးပြု၍ မရတော့သည်အထိ ထိခိုက်ပျက်စီးခဲ့ရသည်။ လက်ရှိ မြေပြင်အခြေအနေနှင့် ပတ်သက်၍ ဗန်းမော်ဒေသခံတစ်ဦးက ”စင်းခန်းတံတားဆိုတာ ကသာ၊ ဗန်းမော် နဲ့ စစ်ကိုင်း၊ ရှမ်းမြောက်ဘက်ကို ဆက်ထားတဲ့ အဓိက သွေးကြောပဲ။ ရထားရော ကားပါ သွားလို့ရတဲ့ တံတား ကို အခုလို ဖျက်ဆီးလိုက်တော့ စစ်အုပ်စုထက် စားဝတ်နေရေးနဲ့ ခရီးသွားလာရေးအတွက် ဒေသခံ ပြည်သူတွေ ပဲ ပိုဒုက္ခရောက်ကုန်တာ။ အခုလည်း အနားမှာ တိုက်ပွဲတွေ ဆက်ဖြစ်နေတော့ မြေပြင်မှာ သွားကြည့်ဖို့တောင် မလွယ်ဘူး” ဟု ပြောသည်။ စင်းခန်းဒေသသည် ဧရာဝတီမြစ်ကြောင်းအတိုင်း မန္တလေးမှ ဗန်းမော်သို့ ဆန်တက်လာသည့် ရေယာဉ်များ ဖြတ် သန်းရသော ဒုတိယမြစ်ကျဉ်းအနီးတွင် တည်ရှိသဖြင့် ကုန်းလမ်းရော ရေလမ်းပါ စစ်ရေးအရ အလွန်အရေးပါ သည့် နေရာတစ်ခု ဖြစ်သည်။ စင်းခန်းဒေသ စစ်ရေးအခြေအနေနှင့် ပတ်သက်၍ ဗန်းမော်ဒေသ အခြေစိုက် တော်လှန်ရေးတပ်ဖွဲ့ဝင်တစ်ဦးက ”စင်းခန်းနားမှာ တိုက်ခိုက်ခံရလို့ ကျန်ခဲ့တဲ့ စစ်သားတွေအပြင် ဝဲမ၊ ဆင်စခန်းနဲ့ နောင်မိုဘက်က ဒီကောင် (စစ်အုပ်စုတပ်) တွေဘက်က တပ်မဟာ ၈ နယ်မြေမှာ နယ်မြေရှင်းလင်းရေး ဆက်လုပ်နေတာပါ။ သူတို့ဘက် က ရေကြောင်း စစ်ကူတွေ တိုက်ခိုက်ခံရပြီး အလင်းဝင်တာတွေ ရှိလာတော့မှ ဒီအဓိက တံတားကို လေယာဉ်နဲ့ ဗုံးကြဲဖျက်ဆီး သွားတာ ဖြစ်ပါတယ်” ဟု သုံးသပ်ပြောဆိုသည်။ လက်ရှိတွင် မန္တလေးဘက်မှ ဗန်းမော်သို့ စစ်အုပ်စု၏ ရေယာဉ်တန်းများ ထပ်မံဆန်တက်လာနေသလို ရွှေကူနှင့် ဗန်းမော်မြို့နယ်အကြားတွင် ကချင်လွတ်လပ်ရေးတပ်မတော် (KIA) ပူးပေါင်းတပ်များနှင့် စစ်အုပ်စုတပ်တို့ အကြား တိုက်ပွဲများ ဆက်လက် ပြင်းထန်လျက်ရှိသည်။ #ရွှေကူ #ဗန်းမော် #ဧရာဝတီမြစ်ကူးတံတား

ဗန်းမော်-ရွှေကူ အစပ် ဧရာဝတီမြစ်ကူးတံတားကို စစ်တပ် ဗုံးကြဲ၍ ရထားလမ်းနှင့် ကားလမ်း ပျက်စီး

Sep 7

မကွေးတိုင်း မင်းတုန်းတွင် တိုက်ပွဲမရှိဘဲ စစ်တပ် ဗုံးကြဲ၍ စစ်ဘေးရှောင်တစ်ဦး သေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၇ ရက်။ မကွေးတိုင်း၊ မင်းတုန်းမြို့နယ်၊ မဲဇလီကျေးရွာရှိ လူနေအိမ်များကို စစ်အုပ်စုတပ်က တိုက်ပွဲဖြစ်ပွားခြင်းမရှိဘဲ လေကြောင်းနှင့် ပါရာမော်တာများအသုံးပြုကာ ဗုံးကြဲပစ်ခတ်ခဲ့သဖြင့် စစ်ဘေးရှောင် အမျိုးသမီးတစ်ဦး သေဆုံးပြီး နောက်ထပ် အမျိုးသမီးတစ်ဦး ပြင်းထန်ဒဏ်ရာရရှိခဲ့သည်။ စက်တင်ဘာ ၆ ရက်နေ့၊ မွန်းလွဲ ၂ နာရီခွဲခန့်တွင် မဲဇလီတံတား မြောက်ဘက် ပုသိမ်-မုံရွာ လမ်းဘေးရှိ နေအိမ် များကို လေယာဉ်ဖြင့် ဗုံးကြဲခဲ့ပြီး မိနစ် ၃၀ အကြာတွင် ပါရာမော်တာ ၂ စီးဖြင့် ထပ်မံဗုံးကြဲကာ စက်သေနတ်ဖြင့် ပစ်ခတ်ခဲ့ခြင်းဖြစ်သည်။ အဆိုပါ လေကြောင်းတိုက်ခိုက်မှုကြောင့် ပန်းတောင်းမြို့နယ်၊ အာရက္ခတပ်တော် (AA) ထိန်းချုပ်ထားသည့် ညောင်ကျိုးကျေးရွာမှ မဲဇလီရွာသို့ စစ်ဘေးရှောင်လာပြီး အိမ်ငှားနေထိုင်သည့် အမျိုးသမီးတစ်ဦး ပြင်းထန် ဒဏ်ရာရရှိကာ ညနေပိုင်းတွင် သေဆုံးသွားခဲ့ပြီး အခြားအမျိုးသမီးတစ်ဦးလည်း ဒဏ်ရာပြင်းထန်စွာ ရရှိခဲ့သည်။ လေကြောင်းမှ လာရောက်တိုက်ခိုက်သည့် အခြေအနေနှင့် ပတ်သက်၍ အသက် ၄၀ အရွယ် ဒေသခံအမျိုး သမီး တစ်ဦးက ”ပထမလေယာဥ်နဲ့ဗုံးတလုံးချတော့ တံတားထိပ်က ရဲအုပ်ပိုင်ဆိုင်ခဲ့တဲ့ အိမ်ကိုကျတယ်။ လမ်းတစ် ဘက် မျက်နှာချင်းဆိုင်က အိမ်တွေပါ ပျက်စီးတယ်။ လမ်းတလျှော က်အိမ်တွေ သေနတ်မှန်တယ်” ဟု ပြော သည်။ ထို့ပြင် အဆိုပါ တိုက်ခိုက်မှုတွင် အသုံးပြုခဲ့သည့် ပါရာမော်တာများနှင့် ပတ်သက်၍ အသက် ၅၀ အရွယ် မြို့ခံ တစ်ဦးက ”ပါရာမော်တာတွေက နတ်မောက်တောင်ဘက်က လာတာဆိုတော့ သရက် ကပစ - ၁၂ က တက်လာ တာဖြစ်ဖို့ များတယ်။ မင်းတုန်းမြို့ကို ပါရာမော်တာ ရောက်တာ မကြားမိသေးဘူး” ဟု ပြောသည်။ အဆိုပါ တိုက်ခိုက်မှုသည် မဲဇလီရွာမကြီးကို ထိခိုက်မှုမရှိဘဲ တော်လှန်ရေး တပ်ဖွဲ့ဝင်များ သွားလာတတ်သည့် မြောက်ဘက်ခြမ်းကို ပစ်မှတ်ထားခြင်းဖြစ်ကြောင်း ဒေသခံများက သုံးသပ်ကြသည်။ လေကြောင်းတိုက်ခိုက်မှု အပြီးတွင် စစ်အုပ်စု၏ မြေပြင်စစ်ကြောင်း ဝင်ရောက်လာမည်ဟူသော သတင်းများ ကြောင့် မဲဇလီနှင့် တဆက်တစပ်တည်းရှိသည့် သရက်အုပ်၊ ဒါးလည်ပြင်၊ မဲဇလီရွာမကြီးတို့မှ အမျိုးသမီးများ၊ သက်ကြီးရွယ်အိုများနှင့် ကလေးသူငယ်များသည် ဘေးလွတ်ရာသို့ တိမ်းရှောင်နေကြရသည်။ မကွေးတိုင်း၊ သရက်ခရိုင်အတွင်းရှိ ကံမ၊ မင်းတုန်းနှင့် မင်းလှ မြို့နယ်များကို ဖြတ်သန်းသွားသည့် ပုသိမ်-မုံရွာ လမ်းမကြီးကို တော်လှန်ရေးတပ်ဖွဲ့များက နေရာအများစုတွင် စိုးမိုးထားပြီး စစ်အုပ်စုတပ်ဘက်က နေရာအနည်း ငယ်၌သာ စိုးမိုးနိုင်တော့ကြောင်း ဒေသခံများက ပြောသည်။ ဓါတ်ပုံ - (ပုံဟောင်း / လေကြောင်းတိုက်ခိုက်မှုအပြီး ပျက်စီးသွားသော ပတ်ဝန်းကျင်ကို ၂၀၂၆ ခုနှစ်၊ မတ်လ ၁ ရက်က တွေ့ရစဉ်။) #မင်းတုန်းမြို့နယ် #မဲဇလီကျေးရွာ

မကွေးတိုင်း မင်းတုန်းတွင် တိုက်ပွဲမရှိဘဲ စစ်တပ် ဗုံးကြဲ၍ စစ်ဘေးရှောင်တစ်ဦး သေဆုံး

Sep 7

တရားမဝင် ပြည်ပလူပို့ဆောင်သည့် အမျိုးသမီး ၂ ဦးကို AA ဖမ်းဆီးအရေးယူ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၇ ရက်။ ရခိုင်ပြည်အတွင်း ပြည်ပသို့ သွားရောက်အလုပ်လုပ်ရန် အကျိုးဆောင်လိုင်စင်မရှိဘဲ တရားမဝင် ဆောင်ရွက် ပေးနေသူများကို AA က လိုက်လံဖမ်းဆီးလျက်ရှိရာ မြောက်ဦးနှင့် ပလက်ဝမြို့နယ်တို့တွင် အမျိုးသမီး ၂ ဦးကို ဖမ်းဆီးအရေးယူထားသည်။ မြောက်ဦးမြို့နယ်နှင့် ပလက်ဝမြို့နယ်တို့တွင် အကျိုးဆောင်လိုင်စင်မရှိဘဲ ပြည်ပ၌ အလုပ်လုပ်ရန် တရားမဝင် လူပို့ဆောင်နေသည့် အမျိုးသမီး ၂ ဦးအား ပြည်ပအလုပ်အကိုင်ဆိုင်ရာ ဥပဒေပုဒ်မ (၂၆) ဖြင့် ဒီလပ် (မြို့မ ရဲစခန်း) က ဩဂုတ်လ ၃၀ ရက်တွင် အမှုဖွင့် အရေးယူထားခြင်း ဖြစ်သည်။ အဆိုပါ တရားခံများကို ဩဂုတ်လ ၁၀ ရက်နှင့် ၁၄ ရက်တို့တွင် ချင်းပြည်နယ်၊ ကျင်ဒွေးမြို့နှင့် မြောက်ဦးမြို့ နယ်၊ အိုးထိမ်းရွာတို့၌ အသီးသီး ဖမ်းဆီးရမိခဲ့ခြင်းဖြစ်သည်။ မြောက်ဦးမြို့နယ်၊ အိုးထိမ်းရွာနေ အသက် ၃၀ နှစ်အရွယ်၊ မယဉ်ယဉ်ဝင်း နှင့် ပလက်ဝမြို့နယ်၊ ဟုန်းရွာနေ အသက် ၂၀ အရွယ် မခိုင်မြတ်မွန်တို့သည် ပြည်ပသို့ လူပို့ဆောင်သည့် အလုပ်ကို လုပ်ကိုင်ရန် နှစ်ဦးသဘောတူ ညီချက်ဖြင့် ပြည်ပနိုင်ငံများနှင့် ရန်ကုန်မြို့သို့ သွားလိုသူများကို ရှာဖွေပေးနေစဉ် ဩဂုတ်လ ၁၀ ရက် ညပိုင်းတွင် ကျင်ဒွေးမြို့ရှိ နေအိမ်တစ်အိမ်၌ အာရက္ခတပ်တော် ထောက်လှမ်းရေးဌာနက ဖမ်းဆီးခဲ့ခြင်းဖြစ်သည်။ ထိုသို့ ဖမ်းဆီးထိန်းသိမ်းပြီးနောက် ဥပဒေအရ အရေးယူဆောင်ရွက်နိုင်ရန် မြောက်ဦးမြို့မ ဒီလပ်စခန်းသို့ လွှဲပြောင်းအပ်နှံခဲ့ပြီး အကျိုးဆောင်လိုင်စင်မရှိဘဲ ငွေကြေးရယူကာ ပြည်ပသို့ ပို့ဆောင်သူများကို ပြည်ပ အလုပ်အကိုင်ဆိုင်ရာ ဥပဒေပုဒ်မ (၂၆) ဖြင့် အမှုဖွင့် အရေးယူခဲ့သည်။ ဒေသခံ ကုန်သည်အမျိုးသမီးတစ်ဦးက “ကျမတို့ကြားပါတယ် အခုကုန်သည်တွေကိုပါ စစ်ဆေးတာတွေ လုပ် မယ်လို့ ကြားထားတယ်။ အကျိုးဆောင် လိုင်စင်လုပ်ဖို့ သူတို့သက်ဆိုင်ရာနဲ့ စကားပြောရမယ်လို့ သိထား တယ်။ အခုက ရှင်းရှင်းလင်းလင်းသိဖို့လည်း လိုပါတယ်။ အေအေဘက်ကလည်း ပြည်တွင်းက ထွက်ခွာသူတွေ ကို စိစစ်နေတဲ့ ကာလဆိုတော့ သတိထားရပါတယ်။ ကုန်သည်တွေနဲ့ လိုက်ပြီး ပြည်မကို ဒါမှမဟုတ် နိုင်ငံခြား ကို ပလက်ဝက တဆင့် ထွက်တဲ့သူတွေ ရှိနေပါတယ်” ဟု ပြောသည်။ လက်ရှိတွင် စုစုပေါင်း ဖမ်းဆီးခံရသူ အမျိုးသမီး ၆ ဦးရှိပြီး ၎င်းတို့အနက် အလုပ်အကိုင်ရှာဖွေရေး လိုင်စင် မရှိဘဲ အခကြေးငွေယူ၍ ရခိုင်ပြည်ပြင်ပသို့ သယ်ယူပို့ဆောင်ပေးသူ အမျိုးသမီး ၂ ဦးကို ပြည်ပ အလုပ်အကိုင် ဆိုင်ရာ ဥပဒေပုဒ်မဖြင့် တရားစွဲဆိုထားသည်။ ရခိုင်ပြည်ပြင်ပသို့ ထွက်ခွာရန် ကြိုးစားသူ အမျိုးသမီး ၄ ဦးအနက် ၂ ဦးမှာ မလေးရှားနိုင်ငံသို့ သွားရောက်မည် ဖြစ်ပြီး တစ်ဦးလျှင် ပွဲစားခ သိန်း ၅၀ ပေးအပ်ထားရသူများဖြစ်ကာ ကျန် ၂ ဦးမှာ ရန်ကုန်မြို့သို့ သွားရောက်မည် ဖြစ်ပြီး ပွဲစားလုပ်သူနှင့် အမျိုးတော်စပ်သည့်အတွက် ငွေကြေးပေးရန် မလိုဘဲ လိုက်ပါလာသူများဖြစ်ကြောင်း စက်တင်ဘာ ၆ ရက်နေ့တွင် AA က ထုတ်ပြန်ထားသည်။ ပြည်ပအလုပ်အကိုင် ရှာဖွေသူများ အလုပ်ရရှိရေးအတွက် သတ်မှတ်သည့် ဝန်ဆောင်ခရယူ၍ ကိုယ်စားလှယ် အဖြစ် ဆောင်ရွက်ပေးသည့် ပုဂ္ဂိုလ် သို့မဟုတ် အဖွဲ့အစည်းများအနေဖြင့် အကျိုးဆောင်လုပ်ငန်း လုပ်ကိုင်လိုပါ က လိုင်စင်ထုတ်ပေးရန် သက်ဆိုင်ရာ ဦးစီးဌာနသို့ သတ်မှတ်ချက်များနှင့်အညီ လျှောက်ထားရမည်ဟုလည်း AA က ထုတ်ပြန်ထားသည်။ #မြောက်ဦးမြို့နယ် #

တရားမဝင် ပြည်ပလူပို့ဆောင်သည့် အမျိုးသမီး ၂ ဦးကို AA ဖမ်းဆီးအရေးယူ

« Prev 1 … 17 18 19 20 21 … 1,148 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

တရုတ်က ရေနံ တင်ပို့မှု ရပ်ဆိုင်းလိုက်ပြီး ရေနံဈေးများ ပြန်တက် — October 2, 2026 2:58 pm
ဂျပန်နိုင်ငံက အမြဲတမ်းနေထိုင်ခွင့် လျှောက်ထားခအား အဆ ၂၀ ထိ တိုးမြှင့် — October 1, 2026 6:37 pm
လာအိုနိုင်ငံတွင် တရုတ်စစ်တပ်က စစ်ရေးအထောက်အကူပြု လေကြောင်းစခန်းသစ် ဖွင့်လှစ် — October 1, 2026 6:35 pm

Recent Posts

တရုတ်က ရေနံ တင်ပို့မှု ရပ်ဆိုင်းလိုက်ပြီး ရေနံဈေးများ ပြန်တက်
ကချင်နှင့် ရှမ်း-ကချင်အစပ် မြို့နယ် ၆ ခုတွင် KIA နှင့် စစ်အုပ်စုတပ်တို့ တိုက်ပွဲများ ဆက်လက်ပြင်းထန်
ဂျပန်နိုင်ငံက အမြဲတမ်းနေထိုင်ခွင့် လျှောက်ထားခအား အဆ ၂၀ ထိ တိုးမြှင့်
လာအိုနိုင်ငံတွင် တရုတ်စစ်တပ်က စစ်ရေးအထောက်အကူပြု လေကြောင်းစခန်းသစ် ဖွင့်လှစ်
ဗြိတိန် သုတေသနများအား တရုတ်ထောက်လှမ်းရေးများက အသုံးချနေကြောင်း MI5 သတိပေး

Archives

Archives

×Close