NMG Doh – Page 21 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
နိုင်ငံတကာသတင်း
NMG အကြောင်း
Contact

Home
Author Archive

NMG Doh

Author: NMG Doh

Sep 7

ဗီယက်နမ်နှင့် မြန်မာ စစ်အုပ်စုတို့ ကာကွယ်ရေးနှင့် စီးပွားရေး ပူးပေါင်းဆောင်ရွက်ရန် သဘောတူ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၇ ရက်။ စစ်အုပ်စုခေါင်းဆောင် ဦးမင်းအောင်လှိုင်၏ ဗီယက်နမ်ခရီးစဉ်အတွင်း နှစ်နိုင်ငံအကြား လုံခြုံရေး၊ ကာကွယ်ရေး၊ စီးပွားရေး၊ နည်းပညာနှင့် သံတမန်ရေးရာ ပူးပေါင်းဆောင်ရွက်မှုများ တိုးမြှင့်ရန် သဘောတူညီခဲ့ကြောင်း ထိုင်းအခြေစိုက် The Nation သတင်းစာက ဖော်ပြသည်။ စက်တင်ဘာ ၅ ရက်က ဟာနွိုင်မြို့၌ ပြုလုပ်သည့် ထိပ်သီးတွေ့ဆုံပွဲတွင် ကာကွယ်ရေးနှင့် လုံခြုံရေးကဏ္ဍကို အဓိကမဏ္ဍိုင်အဖြစ် ထားရှိရန်သဘောတူညီခဲ့သည်။ ထို့အပြင် တစ်နိုင်ငံ၏ ပိုင်နက်ကို အသုံးပြု၍ အခြားတစ်နိုင်ငံအား ဆန့်ကျင်လှုပ်ရှားမှုများ ပြုလုပ်ခွင့်မ ပြုရန် ပြန်လည်ကတိပြုခဲ့ကြသည်။ အဆိုပါတွေ့ဆုံပွဲ၌ နည်းပညာ၊ တယ်လီဖုန်းဆက်သွယ်ရေး၊ အဆင့်မြင့်စိုက်ပျိုးရေးနှင့် စွမ်းအင်ကဏ္ဍတို့တွင် ပူးပေါင်းဆောင်ရွက်ရန် သဘောတူခဲ့ကြသည်။ ၏စစ်ကောင်စီခေါင်းဆောင်သည် Viettel တယ်လီကွန်းကုမ္ပဏီနှင့် VinFast လျှပ်စစ်ကားစက်ရုံတို့သို့ သွားရောက်လေ့လာခဲ့သည်။ ဗီယက်နမ်ဘက်က အမျိုးသားဖွံ့ဖြိုးတိုးတက်ရေး အတွေ့အကြုံများကို မျှဝေပေးရန် အသင့်ရှိကြောင်း ပြောကြားခဲ့သည်။ #Viettel #mytel

ဗီယက်နမ်နှင့် မြန်မာ စစ်အုပ်စုတို့ ကာကွယ်ရေးနှင့် စီးပွားရေး ပူးပေါင်းဆောင်ရွက်ရန် သဘောတူ

Sep 7

ချင်းပြည်နယ် မြို့အချို့ကို ပြန်ရသော်လည်း စစ်အုပ်စု စိုးမိုးနိုင်ခြင်းမရှိဟု ဆို သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၇ ရက်။ စစ်အုပ်စုက ချင်းပြည်ရှိ မြို့အချို့ကို ပြန်လည် ထိန်းချုပ်ထားနိုင်သော်လည်း ၎င်းတို့၏ အုပ်ချုပ်ရေး သက် ရောက်မှုသည် ဒေသတစ်ခုလုံးကို လွှမ်းခြုံနိုင်ခြင်း မရှိဘဲ ချင်းတော်လှန်ရေး အဖွဲ့အစည်းများကသာ နေရာ အတော်များများကို ထိန်းချုပ်ထားဆဲ ဖြစ်သည်ဟု ချင်းပြည် ချင်းလဲန်းကောင်စီက ပြောဆိုလိုက်သည်။ ဩဂုတ်လ ၂၈ ရက်နေ့က ပြုလုပ်သည့် “ချင်းပြည်သူတို့၏ ကိုယ်ပိုင်ပြဋ္ဌာန်းခွင့်ကို ကျင့်သုံးပြီး နှစ်နှစ်ခွဲကာလ အတွင်း အုပ်ချုပ်ရေးဖော်ဆောင်မှု အစီရင်ခံစာ” သတင်းရှင်းလင်းပွဲတွင် ချင်းပြည် ချင်းလဲန်းကောင်စီ တာဝန်ရှိ သူများက ထိုသို့ ထည့်သွင်း ပြောဆိုခဲ့ခြင်းဖြစ်သည်။ ချင်းပြည် ချင်းလဲန်းအစိုးရ နိုင်ငံခြားရေးဝန်ကြီး ဒေါက်တာရွှေခါးရ်က “အရင်ကတည်းကနေ တချို့မြို့တွေမှ အပ ရွာတွေမှာက နေပြည်တော်ရဲ့ ဩဇာသက်ရောက်မှုက နတ္တိလုံးဝကို မရှိဘူး။ ရုံးသွားရုံးလာ ရုံးစာ တစ်ခုမှ မရှိဘူး။ ပြောချင်တာက သူတို့ ဩဇာ အာဏာသက်ရောက်မှု မရှိဘူး။ ဆိုတော့ ဒီနေ့လည်း ဥပမာ တွန်းဇံ ဖလမ်းမြို့ကိုသာ ယူတာ။ နယ်မှာ သူတို့ ဩဇာ သက်ရောက်မှုက တစ်ခုမှ မရှိဘူး။ အဲဒီ မြို့တောင်မှ ပြည့်ပြည့် စုံစုံထိန်းချုပ်နိုင်တာ မဟုတ်သေးဘူး။ ဘာလဲဆိုတော့ အခုက သူတို့ ဟိုင်းဝေး ဥပမာ ကလေးကနေ ဟားခါး ကလေးကနေ တီးတိန် အဲ့ဒါတွေကို သူတို့က ထိန်းချုပ်နိုင်တယ်လို့ ပြောတယ်။ ဒါပေမယ့် အဲ့ဒါ ၁၀၀ ရာခိုင်နှုန်း ထိန်းချုပ်တာ မဟုတ်ဘူး” ဟု ပြောသည်။ ထို့ပြင် စစ်အုပ်စုက ကလေး-ဟားခါး လမ်းပိုင်းနှင့် ကလေး-တီးတိန် လမ်းပိုင်းကို ထိန်းချုပ်ထားနိုင်ပြီဟု ပြောဆို ထားသော်လည်း ယခင်က မရှိဖူးသည့် စစ်စခန်းပေါင်း ၃၀ ကျော် တည်ဆောက်ပြီးမှ ထိန်းချုပ်ထားခြင်း ဖြစ်သည့်အတွက် အပြည့်အဝ စိုးမိုးနိုင်ခြင်း မဟုတ်ကြောင်းလည်း ဒေါက်တာရွှေခါးရ်က ထောက်ပြသည်။ စစ်အုပ်စုသည် ချင်းပြည်အတွင်း လက်လွှတ်ခဲ့ရသည့် ဖလမ်း၊ တွန်းဇံနှင့် ထန်တလန်မြို့ရှိ နယ်မြေအများစုကို ပြန်လည်သိမ်းပိုက်ထားနိုင်သော်လည်း ထိန်းချုပ်နိုင်မှုနှင့် အုပ်ချုပ်ရေး ယန္တရား လည်ပတ်နိုင်မှုမှာ အကန့် အသတ်ဖြင့်သာ ရှိနေဆဲဖြစ်သည်။ ချင်းပြည် ချင်းလဲန်းကောင်စီ အတွင်းရေးမှူး ဆလိုင်းကဲပ်ချင်းထန်းက “ဘယ်လောက်အထိ သူတို့ရဲ့ အုပ်ချုပ် ရေး အာဏာသက်ရောက်မှု ရှိတယ်ဆိုတာက တကယ့်မြေပြင်မှာက အဲဒါကသူတို့လုပ်တဲ့ ရွေးကောက်ပွဲကပဲ သက်သေပြနေတယ်။ ဆိုတော့ အဲဒီမြို့ပေါ်တွေကိုလည်း သူတို့က Fully Control ဆိုတာ မဟုတ်သေးဘူး။ ကျနော် ဘယ်အချိန်ပဲ ဖြစ်ဖြစ် စစ်ရေးအရရော တခြားအရေရော ကျနော်တို့ ခြိမ်းခြောက် နိုင်တဲ့ အနေအထား ရှိတဲ့အခါကျတော့ အဲဒီ မြို့ပေါ်တွေကိုလည်း နှစ်ဖွဲ့က ပြိုင်ပြီးတော့ ထိန်းချုပ်ဖို့ ဩဇာ သက်ရောက်ဖို့ ကျနော် တို့ ကြိုးစားနေတဲ့ဟာဖြစ်တယ်။ ဆိုတော့ ကျနော်တို့ ဩဇာသက်ရောက်ဖို့ ဆိုတာက စစ်ရေးလည်းဖြစ်နိုင် တယ်။ အုပ်ချုပ်ရေးအရလည်း ဖြစ်နိုင်တယ်။ အဲလိုမျိုး ပေါ့” ဟု ပြောသည်။ ချင်းပြည်အတွင်း စစ်အုပ်စု၏ အုပ်ချုပ်ရေးယန္တရား လည်ပတ်နိုင်သည့် ဧရိယာမှာ မြို့ပေါ်အချို့သာ ကျန်ရှိပြီး နယ်မြေအများစုနှင့် ကျေးရွာများတွင် ချင်းတော်လှန်ရေး အဖွဲ့အစည်းများက ဦးဆောင်၍ အုပ်ချုပ်ရေး ယန္တရား များကို လည်ပတ် ဆောင်ရွက်လျက်ရှိသည်။ ဒေါက်တာ ရွှေခါးရ်က “ချင်းလဲန်း ချင်းပြည်မှာလည်း ဒီမြို့တွေ တချို့မြို့တွေကတော့ ဒီနေပြည်တော်ကနေ သူရဲ့ ဩဇာသက်ရောက်မှု ဩဇာအာဏာ သက်ရောက်မှု ရှိပေမဲ့ တော်တော်များများ မြို့အပါအဝင် ကျေးရွာ အကုန်လုံးမှာတော့ နေပြည်တော်ရဲ့ ဩဇာ သက်ရောက်မှုဟာ လုံးဝ မရှိပါဘူး။ အဲဒီမှာကို ကျနော်တို့ ချင်းလဲန်း ချင်းပြည် ချင်းလဲန်း ကောင်စီကနေ ဦးဆောင်ပြီးတော့ ကျနော်တို့ အုပ်ချုပ်ရေး အကောင်အထည်ဖော် ဆောင် ရွက်နေတာ ရှိပါတယ်” ဟု ဆက် ပြောသည်။ စစ်အာဏာသိမ်းပြီးနောက် ချင်းပြည်အတွင်းရှိ နယ်စပ်ဒေသများနှင့် မြို့အများအပြားကို ချင်းတော်လှန်ရေး အဖွဲ့အစည်းများက သိမ်းပိုက်ကာ ကိုယ်ပိုင် အုပ်ချုပ်ရေးစနစ် အကောင်အထည်ဖော်ခဲ့ခြင်း ဖြစ်သည်။ စစ်အုပ်စုကလည်း အရေးပါသည့် စစ်ရေးဗျူဟာ နယ်မြေများကို ပြန်လည်ရရှိရန် ပြင်းထန်သော ထိုးစစ်များ ဆက်တိုက် ပြုလုပ်ခဲ့သော်လည်း နယ်မြေအများစုမှာ တော်လှန်ရေး တပ်ဖွဲ့များ၏ ထိန်းချုပ်မှုအောက်၌ ဆက်လက် တည်ရှိနေဆဲဖြစ်သည်။ ဓာတ်ပုံ - (ချင်းတော်လှန်ရေး တပ်ဖွဲ့ဝင်အချို့အား တွေ့ရစဉ် / Crd - ပုံဟောင်း) #ချင်းပြည်နယ်

ချင်းပြည်နယ် မြို့အချို့ကို ပြန်ရသော်လည်း စစ်အုပ်စု စိုးမိုးနိုင်ခြင်းမရှိဟု ဆို

Sep 6

ကျောက်ဖြူ ရေနက်ဆိပ်ကမ်း စီမံကိန်းအနီး စစ်တပ်နှင့် AA တိုက်ပွဲပြင်းထန် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၆ ရက်။ ရခိုင်ပြည်၊ ကျောက်ဖြူမြို့နယ် ရေနက်ဆိပ်ကမ်း စီမံကိန်း ဧရိယာအနီး အဝတောင်-စနဲ လမ်းပိုင်းပေါ်သို့ စစ်အုပ်စုတပ်က စစ်ကြောင်းထိုးဝင်ရောက်လာသဖြင့် အာရက္ခတပ်တော် (AA) နှင့် တိုက်ပွဲများ ပြင်းထန်စွာ ဖြစ်ပွားနေကြောင်း ဒေသတွင်း စစ်ရေးသတင်းရင်းမြစ်များက ပြောသည်။ စစ်အုပ်စုသည် အဝတောင်စခန်းမှ အင်အားစုဖွဲ့ပြီး စက်တင်ဘာလ ၃ ရက် နံနက်ပိုင်းမှစ၍ စနဲဘက်သို့ အင်အား ၁၀၀ ကျော်ဖြင့် စစ်ကြောင်းထိုးလာခြင်းဖြစ်ပြီး၊ ကျောက်ဖြူ-စနဲ-ရမ်းဗြဲ လမ်းပိုင်းကို ထိန်းချုပ်ရန် ကြိုးပမ်းနေ ခြင်းလည်း ဖြစ်သည်။ ကျောက်ဖြူဒေသခံ စစ်ရေးသတင်းရင်းမြစ်တစ်ဦးက “ဒီအဝတောင် စနဲလမ်းပိုင်းက ရေနက်ဆိပ်ကမ်း ဧရိယာ ထဲပါတော့ စစ်တပ်က အေအေလွှမ်းမိုးလာတာကို ထိန်းချုပ်ဖို့လုပ်လာတာပါ။ အဝတောင်ရွာဟာ ကျောက်ဖြူ ရေနက်ဆိပ်ကမ်း အခြေစိုက်ရာ တောင်မော်ဦး ရေတပ်စခန်းနဲ့ အနီးဝန်းကျင် မှာရှိတာပါ။ သူ့ဧရိယာ တချို့ကို အေအေက ထိန်းထားတော့ အဲ့ဒီစခန်းမှတင် သိပ်မလုံခြုံတော့ဘူး” ဟု ပြောသည်။ ထို့ကြောင့် စက်တင်ဘာလ ၄ ရက်နေ့မှစတင်၍ နှစ်ဖက်ကြား တိုက်ပွဲများ ပြန်လည်ပြင်းထန်စွာ ဖြစ်ပွားနေခြင်း ဖြစ်သည်။ တစ်ချိန်တည်းမှာပင် ကျောက်ဖြူမြို့နယ် တောင်ပိုင်းရှိ သိုင်းချောင်းနှင့် မင်းပြင်ကျေးရွာတို့၌လည်း တိုက်ပွဲများ ဖြစ်ပွားလျက်ရှိသည်။ အေအေနှင့်နီးစပ်သူ စစ်ရေးသတင်းရင်းမြစ်က “အေအေက စနဲလမ်းပိုင်းကိုပါ အခု ထိန်း ချုပ်ဖို့ လုပ်လာတော့ အင်းအာစုပြီး စစ်တပ်ကထိုးတာ။ ကျောက်ဖြူမှာ ဩဂုတ်လ ၂၀ ရက်နေ့ နောက်ပိုင်း အင်အားဖြည့်နေတာ။ စစ်မဖြစ်ဘူး။အခုမှ စဖြစ်တာ။ နောက်တစ်ခုက ကျောက်ဖြူမြို့နယ် တောင်ပိုင်း သိုင်းချောင်း၊ မင်းပြင်ရွာတွေ မှာလည်း တိုက်ပွဲရှိတယ်” ဟု ပြောသည်။ အဝတောင်ကျေးရွာသည် ကျောက်ဖြူ ရေနက်ဆိပ်ကမ်း အခြေစိုက်ရာ တောင်မော်ဦး ရေတပ်စခန်းနှင့် အနီးဝန်းကျင်တွင် တည်ရှိပြီး စနဲ-အဝတောင် လမ်းပိုင်းမှာ ကျောက်ဖြူမြို့နှင့် ကျောက်ဖြူ ရေနက်ဆိပ်ကမ်း/ အထူးစီးပွားရေးဇုန် (SEZ) ဧရိယာသို့ ဆက်သွယ်ပေးထားသည့် အဓိက ကုန်းလမ်းကြောင်း တစ်ခုဖြစ်သည်။ စစ်ရေးမဟာဗျူဟာအရ ရေနက်ဆိပ်ကမ်း လုံခြုံရေးအတွက် အရေးပါသည့် တောင်မော်ဦး ရေတပ်စခန်း၏ စစ်ရေးစိုးမိုးနယ်မြေနှင့် စနဲမြို့အကြားတွင် အဝတောင် တည်ရှိနေခြင်းကြောင့် ရေနက်ဆိပ်ကမ်း ဧရိယာသို့ ဝင်ရောက်ရာ တံခါးပေါက်သဖွယ် ဖြစ်နေသည်။ ယခုရက်ပိုင်းအတွင်း ကျောက်ဖြူမြို့နယ်တွင် တိုက်ပွဲများ ပြန်လည်ဖြစ်ပွားလာပြီး အဝတောင်-စနဲ လမ်းပိုင်း ပေါ်သို့ ရောက်ရှိလာသည့် စစ်အုပ်စု၏ ရှေ့ပြေးတပ်စိတ် နှစ်ခုနှင့် AA တပ်ဖွဲ့တို့ ထိတွေ့တိုက်ပွဲဖြစ်ပွားခဲ့ခြင်း ဖြစ်သည်။ လက်ရှိတွင် ကျောက်ဖြူ တောင်မော်ဦး ရေတပ်ဘက်မှ စစ်အုပ်စု စစ်ကြောင်း နှစ်ကြောင်းသည် စနဲ-အဝတောင် လမ်းပိုင်းပေါ်၌ ရှိနေဆဲဖြစ်ပြီး အဝတောင်-မျှောချောင်းဘက်မှလည်း ခြေလျှင်စစ်ကြောင်း တစ်ခု ထပ်မံ တက် လာနေသည်။ ထို့ပြင် ပင်လယ်အတွင်းရှိ စစ်အုပ်စု စစ်ရေယာဉ်များကလည်း တိုက်ပွဲဖြစ်ပွားရာ အနီးဝန်းကျင်သို့ လက်နက် ကြီးနှင့် ဒရုန်းများဖြင့် ဆက်တိုက် ပစ်ကူပေးလျက်ရှိသည်။ ဓာတ်ပုံ - (ပုံဟောင်း / CJ) #ကျောက်ဖြူရေနက်ဆိပ်ကမ်းစီမံကိန်း

ကျောက်ဖြူ ရေနက်ဆိပ်ကမ်း စီမံကိန်းအနီး စစ်တပ်နှင့် AA တိုက်ပွဲပြင်းထန်

Sep 6

နတ်ရေကန် ဗျူဟာစခန်းသို့ ထိုးစစ်ဆင်သည့် စစ်ကြောင်းကို AA ကြားဖြတ်တိုက်ခိုက် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၆ ရက်။ မကွေးတိုင်း၊ ငဖဲမြို့နယ်ရှိ နတ်ရေကန် လေကြောင်းရန် ကာကွယ်ရေး ဗျူဟာစခန်းသို့ စစ်အုပ်စုတပ်က စစ်ကြောင်းထပ်မံ ထိုးလာသဖြင့် ပဇီနှင့် ဂုတ်စီးရိုးကျေးရွာ အနီးတို့တွင် အာရက္ခတပ်တော် (AA) နှင့် တိုက်ပွဲများ ပြင်းထန်စွာ ဖြစ်ပွားနေကြောင်း ဒေသခံ စစ်ရေးသတင်းရင်းမြစ်များက ပြောသည်။ မင်းဘူး-အမ်း ကားလမ်းမကြီး အနီးဝန်းကျင်၌ တည်ရှိသည့် အဆိုပါ ကျေးရွာနှစ်ရွာလုံးမှ ဖြတ်ကာ နတ်ရေကန် ဗျူဟာစခန်းသို့ စစ်ကြောင်းထိုးလာသည့် စစ်တပ်ကို AA ဘက်က ကြားဖြတ်တိုက်ခိုက်ခဲ့ခြင်းဖြစ်သည်။ ဒေသခံ စစ်ရေးသတင်းရင်းမြစ် အမျိုးသားတစ်ဦးက “မင်းဘူး-အမ်း ကားလမ်းမကြီး အနီးအနားက အေအေ စိုးမိုးနယ်မြေတွေမှာ စစ်တပ်စစ်ကြောင်း ဖြန့်ထိုးနေတာ အေအေက အထိုင်တိုက်နေရတဲ့ သဘောပါ။ ဂုတ်စီးရိုး ကျေးရွာနဲ့ ပဇီကျေးရွာက ဆယ်မိုင်နီးပါးဝေးတယ်။ ဒါပေမဲ့ စစ်ကြောင်းတွေက ကားလမ်းအတိုင်းလာတာ မဟုတ်ဘူး။ ပစ်လိုက် ပေးလိုက်နဲ့ စစ်တပ်က ပြန်ဆုတ်ထားတယ်လို့ ကြားတယ်။ နှစ်ရွာစလုံးမှာ အခုအထိ စစ်တပ်က စစ်ကြောင်းတက်ထိုးလိုက် အေအေကတိုက်လိုက် ပြန်ဆုတ်လိုက်နဲ့ဖြစ်နေတာ” ဟု ပြောသည်။ စက်တင်ဘာလ ၃ ရက်နေ့တွင် ပဇီကျေးရွာ အနီး၌လည်းကောင်း၊ စက်တင်ဘာလ ၄ ရက် နံနက်ပိုင်းတွင် ဂုတ်စီးရိုးကျေးရွာ အနီး၌လည်းကောင်း ထိတွေ့တိုက်ပွဲများ အသီးသီး ပြင်းထန်ခဲ့သည်။ အဆိုပါ စစ်ရေးသတင်းရင်းမြစ်က “အမ်းတောင်ကြား ပဒါန်း-အမ်း လမ်းပိုင်းနဲ့ ဂုတ်စီးရိုးကျေးရွာက နီးတယ်။ ပဇီကျေးရွာကျတော့ မင်းဘူး-အမ်း ကားလမ်းမကြီးရဲ့ အရှေ့ဘက်ခြမ်း ရိုးမတောင်ခြေနဲ့ပိုနီးတယ်” ဟု ဆက် ပြောသည်။ လက်ရှိတွင် နတ်ရေကန် ဗျူဟာကုန်းကို AA နှင့် မဟာမိတ်တပ်ဖွဲ့ဝင်များက ဝိုင်းပတ် ပိတ်ဆို့ထားသဖြင့် စစ်အုပ် စုတပ်က ပဒါန်းဘက်မှတစ်ဆင့် စစ်မှုထမ်းသစ်များ ပါဝင်သည့် စစ်ကြောင်းဖြင့် အင်အားဖြည့်တင်းရန် ကြိုးပမ်း နေခြင်း ဖြစ်သည်။ နတ်ရေကန် ဗျူဟာကုန်းနှင့် ၃ မိုင်ခန့်အကွာ ပဇီရွာအနီးတွင် စစ်ကြောင်း ထိခိုက်တိုက်ခိုက်ခံရစဉ် စစ်အုပ်စု တပ်ဖွဲ့ဝင်အချို့ ထွက်ပြေးခြင်း၊ ဖမ်းဆီးခံရခြင်းနှင့် အလင်းဝင်လာခြင်းများလည်း ရှိခဲ့သည်။ ထို့ပြင် AA ထိန်းချုပ်ထားသည့် ဂုတ်စီးရိုးကျေးရွာ စခန်းကို ပြန်လည်သိမ်းပိုက်ရန် စစ်အုပ်စုတပ်က စစ်ကြောင်း ထိုးလာရာ ရှေ့ပြေးတပ်စိတ်များနှင့် တိုက်ပွဲများ ဖြစ်ပွားခဲ့ပြီး စစ်အုပ်စုဘက်က ဂုတ်စီးရိုး၊ ကမြင်းကန်နှင့် နတ် ရေကန်အနီးရှိ ကျေးရွာများကို လေယာဉ်များဖြင့် ဗုံးကြဲတိုက်ခိုက်လျက်ရှိသည်။ ပြီးခဲ့သည့် ဩဂုတ်လ ၃၁ ရက်နေ့ကလည်း ပဇီကျေးရွာ လမ်းဟောင်းအနီး တက်လာသည့် စစ်အုပ်စု စစ်ကြောင်းကို AA က လက်နက်ကြီး၊ ဒရုန်းတို့ဖြင့် ပိတ်ဆို့တိုက်ခိုက်ခဲ့သဖြင့် စစ်အုပ်စုဘက်မှ သေဆုံးထိခိုက်မှု များပြားခဲ့ သလို၊ ဩဂုတ်လ ၆ ရက်နေ့ကလည်း ဂုတ်စီးရိုးကျေးရွာ ထိုးစစ်အတွင်း အထိနာ၍ တပ်ပြန်ဆုတ်ခဲ့ရ သည်။ စက်တင်ဘာလ ၁ ရက်နေ့ နံနက်ပိုင်းက နတ်ရေကန် တောင်ကြောရှိ စစ်ကူစခန်းများသို့ စစ်အုပ်စုက ရိက္ခာကား ၃ စီးဖြင့် လက်နက်ခဲယမ်းများ ဖြည့်တင်းခဲ့ပြီး၊ ရခိုင်-မကွေး ရိုးမပေါ်တွင် နတ်ရေကန် ဗျူဟာစခန်းကို အကြောင်းပြု၍ တိုက်ပွဲများ ဖြစ်ပွားနေသည်မှာ ၂ နှစ်ကျော် ကြာမြင့်လာပြီ ဖြစ်သည်။ ဓာတ်ပုံ - (ပုံဟောင်း - Crd) #နတ်ရေကန်ဗျူဟာစခန်း

နတ်ရေကန် ဗျူဟာစခန်းသို့ ထိုးစစ်ဆင်သည့် စစ်ကြောင်းကို AA ကြားဖြတ်တိုက်ခိုက်

Sep 6

မြိတ်တွင် ဆိုင်ကယ်ဖမ်းဆီးရာမှ လူငယ်များကို စစ်အုပ်စုက အဓမ္မ စစ်မှုထမ်းခိုင်း သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၆ ရက်။ တနင်္သာရီတိုင်းဒေသကြီး၊ မြိတ်ခရိုင်၊ မြိတ်မြို့ပေါ်တွင် စစ်အုပ်စုတပ်က ယာဉ်ထိန်းရဲ၊ အရန်မီးသတ်တပ်ဖွဲ့နှင့် ပျူစောထီး ပြည်သူ့စစ်အဖွဲ့ဝင်များဖြင့် လိုင်စင်မဲ့ မော်တော်ဆိုင်ကယ် ဖမ်းဆီးမှု ပြုလုပ်သည်ဟု အကြောင်း ပြကာ လူငယ်များကို အဓမ္မ စစ်မှုထမ်းရန် လူသစ်စုဆောင်း ဖမ်းဆီးမှုများ ပြုလုပ်ခဲ့ကြောင်း မြို့ခံများက ပြော သည်။ စက်တင်ဘာလ ၂ ရက်နေ့ နံနက် ၈ နာရီကျော်မှ မွန်းတည့် ၁၂ နာရီအထိ တစ်ကြိမ်၊ မွန်းလွဲ ၁ နာရီမှ ညနေ ၄ နာရီ အထိ တစ်ကြိမ် စုစုပေါင်း နှစ်ကြိမ်တိုင် စစ်အုပ်စုက လိုင်စင်မဲ့ မော်တော်ဆိုင်ကယ်များကို မြို့ပေါ်တွင် ပိတ်ဆို့ ဖမ်းဆီးခဲ့ခြင်းဖြစ်သည်။ စစ်အုပ်စုတပ်သည် မြိတ်မြို့ရှိ တောရကျောင်းလမ်းဆုံ၊ လေယာဉ်ကွင်းလမ်းဆုံ၊ မြို့သစ်လမ်းဆုံ၊ ဘုရားကိုင် လမ်းဆုံနှင့် ကန်ဖျားလမ်းဆုံ အစရှိသည့် အချက်အချာကျသော နေရာအတော်များများတွင် တားဆီး စစ်ဆေး ဖမ်းဆီးမှုများ ပြုလုပ်ခဲ့သည်။ စက်ဝင်းရပ်ကွက်တွင် နေထိုင်သည့် အသက် ၄၀ အရွယ် မြို့ခံတစ်ဦးက “မျက်စိရှေ့တင် ဖမ်းနေတာတွေ့တာ လိုင်စင်မဲ့ဘီးတွေရော မှန်ကိုင်းမတပ်တာတွေ၊ အိပ်ဇောတွေ၊ နံပါတ်ပြားတွေ၊ ယောင်္ကျားလေး နှစ်ယောက်စီး တာ တွေရောပဲ။ မိန်းကလေးရော ယောင်္ကျားလေးပါ အကုန်လုံးစစ်တာ။ အဆိုးဆုံးက ယောင်္ကျား နှစ်ယောက် စီးတာပေါ့။ ဖမ်းမိတာနဲ့ နှစ်ယောက်စလုံး စစ်ကားကြီးပေါ်တခါတည်း ခေါ်တင်လိုက်တော့တာ။ ဘာမှဖြေရှင်း ခွင့်လည်း မပေးဘူး။ ဘုရားကိုင်ရှေ့မှာ မြင်လိုက်တာတောင် အယောက် ၂၀ လောက်ရှိတယ် တမြို့လုံးဆို နည်းမှာမဟုတ်ဘူး” ဟု ပြောသည်။ မြို့၏ နေရာ ၅ နေရာထက်မနည်း ပိတ်ဆို့ စစ်ဆေး ဖမ်းဆီးခဲ့ခြင်းဖြစ်ရာ ဖမ်းဆီးခံရသည့် လူငယ် အရေအတွက် မှာ အနည်းဆုံး ရာဂဏန်းအထိ ရှိနိုင်ကြောင်း ဒေသခံများက ခန့်မှန်းထားကြပြီး၊ အချက်အချာကျသည့် လမ်းဆုံ များတွင် တစ်ပြိုင်နက်တည်း ဖမ်းဆီးမှုများ ပြုလုပ်ခဲ့ခြင်းကြောင့် မြို့ပေါ်လူငယ်များအကြား စိုးရိမ်ထိတ်လန့်မှု များ ပိုမို မြင့်မားနေသည်။ မြိတ်မြို့ပေါ်တွင် နေထိုင်ကြသည့် ပြည်သူအများစုမှာ လုပ်ငန်းခွင်သွားလာရန်နှင့် လူမှုရေး၊ စီးပွားရေး အရေး ကိစ္စများအတွက် မော်တော်ဆိုင်ကယ်ကိုသာ အဓိက အသုံးပြုနေကြရခြင်း ဖြစ်သည်။ စက်တင်ဘာလ ၂ ရက်နေ့ကတည်းက လိုင်စင်မဲ့ ဆိုင်ကယ် ဖမ်းဆီးသည်ဟု ဆိုကာ ခေါ်ဆောင်သွားခြင်းခံရသည့် လူငယ်များသည် ယနေ့ စက်တင်ဘာလ ၆ ရက်နေ့အထိ မိသားစုများနှင့် လုံးဝ အဆက်အသွယ် မရရှိသေးပေ။ စစ်အုပ်စုတပ်က မည်သည့်နေရာသို့ ဖမ်းဆီးထိန်းသိမ်းထားသည်ကို ထုတ်ပြန်ခြင်း မရှိသလို၊ အဓမ္မ စစ်မှုထမ်း သင်တန်းကျောင်းများသို့ ပို့ဆောင်ခံရမည်ကိုလည်း ဖမ်းဆီးခံ လူငယ်များ၏ မိသားစုဝင်များက စိုးရိမ်ပူပင်နေ ကြသည်။ #မြိတ်ခရိုင်

မြိတ်တွင် ဆိုင်ကယ်ဖမ်းဆီးရာမှ လူငယ်များကို စစ်အုပ်စုက အဓမ္မ စစ်မှုထမ်းခိုင်း

Sep 5

တရုတ်-နီပေါ ရေဘေးတွင် တရုတ်၏ သတင်းအချက်အလက် ထိန်းချုပ်မှုအပေါ် ဝေဖန်မှုများ ရှိနေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၅ ရက်။ တရုတ်-နီပေါ နယ်စပ်ဒေသတွင် လူပေါင်း ရာနှင့်ချီ သေဆုံးခဲ့သည့် ရေကြီးရေလျှံမှုတွင် တရုတ်နိုင်ငံဘက်ခြမ်းမှ ထိခိုက်ခံစားရသူများနှင့် ပတ်သက်သည့် သတင်းအချက်အလက်များကို တရုတ်အစိုးရက တင်းကျပ်စွာ ထိန်းချုပ်ထားဆဲ ဖြစ်သည်ဟု AP သတင်း တပုဒ်တွင် ဖော်ပြထားသည်။ နှစ်နိုင်ငံပေါင်းစပ် စာရင်းများအရ သေဆုံးသူ ၁,၀၀၀ ကျော်နှင့် ပျောက်ဆုံးသူ ၄,၅၀၀ ထက်မနည်း ရှိနေသည့် အဆိုပါ ဘေးအန္တရာယ်တွင် တရုတ်အစိုးရသည် သဘာဝဘေးဖြစ်စဉ်များနှင့် ပတ်သက်၍ သတင်းအချက်အလက် စီးဆင်းမှုကို စိစစ်ကန့်သတ်လေ့ရှိသည့် အလေ့အထကို ထပ်မံပြသလိုက်ခြင်းလည်း ဖြစ်သည်ဟု AP သတင်းက ဆိုသည်။ တရုတ်အစိုးရသည် သေဆုံး၊ ပျောက်ဆုံးစာရင်းများကို ရက်ပေါင်းများစွာ အကြာမှတစ်ကြိမ် သတင်းထုတ်ပြန်လေ့ရှိသည်။ ရေဘေးသင့် ဒေသများသို့ သွားရောက်သတင်းယူခွင့်ကိုလည်း ထိပ်တန်း အစိုးရပိုင် မီဒီယာများ ဖြစ်သော ဆင်ဟွာနှင့် CCTV တို့ကိုသာ ခွင့်ပြုထားသည်။ ထို့ပြင် အဆိုပါ ထိပ်တန်း မီဒီယာများသည် ပျောက်ဆုံးနေသူများ သို့မဟုတ် ၎င်းတို့၏ ကျန်ရစ်သူ မိသားစုများ၏ အမည်နှင့် မျက်နှာများကို ဖော်ပြခြင်း မရှိဘဲ အကူအညီပေးရေးနှင့် ကယ်ဆယ်ရေးလုပ်ငန်းစဉ် အခြေအနေများကိုသာ အဓိကထား ထုတ်လွှင့်နေကြသည်။ အခြားတစ်ဖက်တွင်မူ အစိုးရ၏ တရားဝင် ထုတ်ပြန်ချက်များအပေါ် မေးခွန်းထုတ်သည့် လူမှုကွန်ရက် ပို့စ်များရေးသားခဲ့သူ အနည်းဆုံး ၁၀ ဦးထက်မနည်းကို တရုတ်နိုင်ငံတစ်ဝှမ်းတွင် ဖမ်းဆီးထိန်းသိမ်းခြင်း သို့မဟုတ် ဒဏ်ငွေရိုက်ခြင်းများ ပြုလုပ်ခဲ့ကြောင်း သတင်းများ ထွက်ပေါ်ခဲ့သည်။ ယင်းအခြေအနေသည် နီပေါနိုင်ငံဘက်ခြမ်းနှင့် များစွာ ကွဲပြားခြားနားနေသည်။ နီပေါအစိုးရသည် သေဆုံး/ပျောက်ဆုံးသူ စာရင်းများကို ပုံမှန် အသိပေးထုတ်ပြန်လျက်ရှိပြီး၊ သတင်းထောက်များနှင့် လူမှုကွန်ရက် အသုံးပြုသူများအား ကယ်ဆယ်ရေး လုပ်ငန်းစဉ်များကို လွတ်လပ်စွာ ရိုက်ကူးဖော်ပြခွင့် ပေးထားသည်။ တိဘက်ဒေသအတွင်း သေဆုံးသူ ၂၁ ဦးနှင့် ပျောက်ဆုံးသူ ၅၄၁ ဦး (နိုင်ငံခြားသား ၂၆၁ ဦး အပါအဝင်) ရှိကြောင်း အနီးစပ်ဆုံး တနင်္ဂနွေနေ့က ထုတ်ပြန်ခဲ့ပြီးနောက် တရုတ်အစိုးရသည် သေဆုံးသူ စာရင်းကို ဗုဒ္ဓဟူးနေ့အထိ ထပ်မံပြင်ဆင်ခြင်း မရှိခဲ့ပေ။ နောက်ဆုံး ရရှိသော သောကြာနေ့ညပိုင်း ထုတ်ပြန်ချက်တွင်မူ သေဆုံးသူ ၃၁ ဦးအထိ မြင့်တက်လာပြီး ၅၃၁ ဦး ပျောက်ဆုံးနေဆဲဖြစ်ကြောင်း ဖော်ပြထားသည်။ နီပေါအစိုးရသည် ကယ်ဆယ်ရရှိသူများ၏ အမည်စာရင်း ပါဝင်သော ဝဘ်ဆိုက်တစ်ခုကို ထူထောင်ပေးထားပြီး ကယ်ဆယ်ရေးလုပ်ငန်းစဉ်များကို အချိန်နှင့်အမျှ ထုတ်ပြန်ပေးနေသည်။ နီပေါနှင့် နိုင်ငံခြားသတင်းထောက်များအား ရေဘေးသင့်ဒေသများ၊ ကယ်ဆယ်ရေး စခန်းများနှင့် အစုလိုက်သဂြိုဟ်သည့် နေရာများသို့ သွားရောက်သတင်းယူခွင့် ပြုထားသည်။ သို့သော် တရုတ်ဘက်ခြမ်းတွင်မူ ဆင်ဟွာ (Xinhua) နှင့် CCTV အစိုးရပိုင် မီဒီယာနှစ်ခုမှ သတင်းထောက် အနည်းငယ်မှလွဲ၍ ကျန်သူများအား ဝင်ရောက်ခွင့် ပိတ်ပင်ထားသည်။ Associated Press (AP) သတင်းဌာနက သွားရောက်သတင်းယူခွင့် တောင်းခံခဲ့သော်လည်း ခွင့်ပြုမိန့် မရရှိခဲ့ဟု ဆိုသည်။ အထူးသဖြင့် တိဘက်ဒေသသည် သတင်းအချက်အလက် အဆက်အသွယ်နှင့် ခရီးသွားလာခွင့်များကို တင်းကျပ်စွာ ထိန်းချုပ်ထားလေ့ရှိသည့် ဒေသတစ်ခု ဖြစ်သည်။ ဂြိုဟ်တုနှင့် ဒရုန်းများသုံး၍ ကယ်ဆယ်ရေးဆောင်ရွက်မှုများ၊ ရဲတပ်ဖွဲ့၏ ကူညီပေးမှုများကိုသာ CCTV က အဓိကပုံဖော် ထုတ်လွှင့်နေသည်။ အချို့သော တရုတ်သတင်းထောက်များသည် သေဆုံးသူများ၏ မိသားစုဝင်များကို တွေ့ဆုံမေးမြန်းခြင်း မပြုရန်နှင့် ဆင်းဟွာသတင်းဌာနမှ အချက်အလက်များကိုသာ အသုံးပြုရန် ညွှန်ကြားခံထားရ သည်ဟု လူ့အခွင့်အရေး စောင့်ကြည့်လေ့လာရေးအဖွဲ့ (HRW) က ပြောသည်။ #နီပေါ

တရုတ်-နီပေါ ရေဘေးတွင် တရုတ်၏ သတင်းအချက်အလက် ထိန်းချုပ်မှုအပေါ် ဝေဖန်မှုများ ရှိနေ

Sep 5

ဂျာမနီနှင့် ယူကရိန်း ပူးပေါင်း၍ တာဝေးပစ် ဒရုန်း ၅,၀၀၀ ကျော် ထုတ်လုပ်မည် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာ ၅ ရက်။ ဂျာမနီနှင့် ယူကရိန်းတို့ ပူးပေါင်း၍ မိုင်ပေါင်း ၉၀၀ ကျော် (ကီလိုမီတာ ၁,၅၀၀) အထိ ပစ်ခတ်နိုင်သော အဝေးပစ် ခေတ်မီတိုက်ခိုက်ရေးဒရုန်း အစင်းရေ ၅,၀၀၀ ကျော်ကို စတင်ထုတ်လုပ်နေပြီဖြစ်ကြောင်း ဂျာမန်သတင်းမီဒီယာ Handelsblatt တွင် ဖော်ပြထားသည်။ ယူရို သန်း ၃၀၀ တန်ဖိုးရှိ အဆိုပါ စီမံကိန်းသည် ဂျာမန်-အမေရိကန် နည်းပညာကုမ္ပဏီ Auterion နှင့် ယူကရိန်း ဒရုန်းထုတ်လုပ်ရေးကုမ္ပဏီ Airlogix တို့၏ ပူးပေါင်းဆောင်ရွက်မှု ဖြစ်သည်။ စီမံကိန်းအရ ဂျာမနီဘက်မှ ရုရှား၏ လျှပ်စစ်လှိုင်း နှောင့်ယှက်ဖျက်ဆီးမှုများကို ကြံ့ကြံ့ခံနိုင်သည့် AI နည်းပညာသုံး ဆော့ဖ်ဝဲလ်စနစ်များကို တာဝန်ယူမည်ဖြစ်သည်။ ယူကရိန်းဘက်မှ ဒရုန်း၏ ရုပ်ပိုင်းဆိုင်ရာ အစိတ်အပိုင်းများကို ထုတ်လုပ်သွားမည် ဖြစ်သည်။ အဆိုပါ ဒရုန်းများကို ယခုနှစ်အတွင်း စတင်ပေးပို့သွားမည်ဖြစ်ပြီး ရုရှားနိုင်ငံအတွင်းရှိ စစ်ရေးနှင့် စွမ်းအင်ဆိုင်ရာ အခြေခံအဆောက်အအုံများကို နေ့စဉ် ဒရုန်းစင်းရေ ၁,၀၀၀ ဖြင့် တိုက်ခိုက်သွားရန် လျာထားကြောင်း ယူကရိန်းသမ္မတ ဗိုလိုဒီမီယာ ဇယ်လန်စကီးက ကြေညာခဲ့ပြီးနောက် ယခုသတင်း ထွက်ပေါ်လာခြင်းဖြစ်သည်။ အခြားတစ်ဖက်တွင်လည်း ရုရှား၏ သတင်းတုလွှင့်ခြင်းနှင့် ဆိုက်ဘာတိုက်ခိုက်ခြင်း အပါအဝင် ပေါင်းစပ်စစ်ဆင်ရေး (Hybrid Warfare) လုပ်ရပ်များနှင့် ပတ်သက်၍ အစောပိုင်းက တိုက်ရိုက်စွပ်စွဲရန် ဝန်လေးခဲ့သော ဂျာမနီအစိုးရသည် ယခုအခါ ပြင်းထန်စွာ တုံ့ပြန်လိုက်ပြီ ဖြစ်သည်။ လွန်ခဲ့သော လအတွင်း Leipzig လေဆိပ်အနီး၌ ယူကရိန်း ကုန်တင်လေယာဉ်ကို ပစ်မှတ်ထား ကြံစည်ထားသည့် ဖောက်ခွဲရေးပစ္စည်းပါ ဒရုန်း နှစ်စင်းကို တွေ့ရှိခဲ့ရပြီးနောက် ဂျာမနီ၏ သဘောထား ပြောင်းလဲသွားခြင်းဖြစ်သည်။ အဆိုပါ ဖြစ်စဉ်၏ နောက်ကွယ်တွင် ရုရှားနိုင်ငံ ပါဝင်ပတ်သက်နေကြောင်း ဂျာမနီအစိုးရက ဗုဒ္ဓဟူးနေ့တွင် ပွင့်လင်းစွာ တိုက်ရိုက်စွပ်စွဲလိုက်ပြီး မိမိတို့နိုင်ငံ၏ လုံခြုံရေးကို အပြည့်အဝ ကာကွယ်သွားမည်ဟု သတိပေး ထုတ်ပြန်ခဲ့သည်။ #တာဝေးပစ်ဒရုန်း

ဂျာမနီနှင့် ယူကရိန်း ပူးပေါင်း၍ တာဝေးပစ် ဒရုန်း ၅,၀၀၀ ကျော် ထုတ်လုပ်မည်

Sep 4

ရခိုင်ရိုးမခြေရင်း မင်းတုန်းမြို့နယ်၌ တိုက်ပွဲဖြစ်၊ စစ်အုပ်စုတပ် ထိခိုက်ဒဏ်ရာရသူ များပြား သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၄ ရက်။ မကွေးတိုင်းဒေသကြီး၊ မင်းတုန်းမြို့နယ် အနောက်ဘက် ရခိုင်ရိုးမအစပ်ရှိ ငပျင်းကျေးရွာနှင့် ပြောင်းကျေးရွာ တို့တွင် စက်တင်ဘာလ ၂ ရက်နှင့် ၃ ရက်နေ့များ၌ တိုက်ပွဲများ ဆက်လက်ဖြစ်ပွားနေပြီး စစ်အုပ်စုတပ်ဘက်မှ ထိခိုက်ကျဆုံးသူ များပြားနေကြောင်း ဒေသတွင်း စစ်ရေးသတင်းရင်းမြစ်များက ပြောသည်။ အဆိုပါ တိုက်ပွဲများအတွင်း စစ်အုပ်စုတပ်ဘက်မှ ၄၀ နီးပါး ထိခိုက်ဒဏ်ရာရရှိခဲ့ပြီး ဒဏ်ရာပြင်းထန်သူ ၂၀ ကျော်ကို ဧရာဝတီမြစ် တစ်ဖက်ကမ်း ပဲခူးတိုင်းဒေသကြီး၊ ပြည်မြို့ရှိ စစ်ဆေးရုံသို့ ပို့ဆောင်ထားကာ အချို့ကို သရက်ခရိုင် ဆေးရုံ၌ ကုသပေးနေရသည်။ သရက်မြို့တွင် ကုတင် (၁၀၀) ဆံ့ ဆေးရုံနှင့် တပ်မတော် ဆေးရုံများ ရှိသော်လည်း ဒဏ်ရာပြင်းထန်သူများပြား သဖြင့် ပြည်မြို့သို့ ပို့ဆောင်နေရခြင်း ဖြစ်သည်။ ဒေသခံ သတင်းရင်းမြစ်တစ်ဦးက “ကျဆုံးဒဏ်ရာရတွေတော့ အတိအကျပြောဖို့ခက်တယ် ဒဏ်ရာရတဲ့ ပြည်သူ့ စစ်တွေကို သရက်မှာကုတယ်၊ အရာရှိနဲ့ပြင်းထန်တဲ့သူကို ပြည်ကိုပို့တာ၊ ဟိုတလောက ပြည်မဘက်က ရိုးပေါ် တက်လာတဲ့ စစ်ကြောင်းပေါ့အခု ပြောင်ရွာဘက်ဆင်းလိုက်ရိုးပေါ်ပြန်တက်လိုက်နဲ့ ဖြစ်နေတာပါ” ဟု ပြောသည်။ ငပျင်းကျေးရွာနှင့် ပြောင်းကျေးရွာတို့သည် ရခိုင်ပြည်နယ် အမ်းမြို့နယ်နှင့် မြောက်ဦးမြို့နယ်တို့နှင့် အဓိက ဆက်စပ်နေသည့် နယ်မြေများ ဖြစ်သည်။ ဩဂုတ်လ ၃၀ ရက်နေ့က အင်အား ၂၀၀ ခန့်ပါသည့် စစ်အုပ်စု စစ်ကြောင်းသည် ရခိုင်ရိုးမပေါ်သို့ ထိုးစစ်ဆင် ရာမှ ပြန်လည် တပ်ဆုတ်လာပြီးနောက် မင်းတုန်းမြို့နယ် အနောက်ဘက်ခြမ်း ကျေးရွာများသို့ ရောက်ရှိလာကာ တိုက်ပွဲများ ပြန်လည်ဖြစ်ပွားခဲ့ခြင်း ဖြစ်သည်။ ထို့ပြင် ဩဂုတ်လ ၃၀ ရက်ကလည်း မင်းတုန်းမြို့နယ်၊ သဖန်ရောင်ကျေးရွာဘက်မှ အမ်းမြို့နယ် တလိုင်းတောင် လမ်းပိုင်းသို့ ချီတက်လာသည့် စစ်အုပ်စု စစ်ကြောင်းကို အာရက္ခတပ်တော် (AA) က ကြားဖြတ်တိုက်ခိုက်ခဲ့ သဖြင့် စစ်အုပ်စုတပ်ဘက်မှ ထိခိုက်သေဆုံးမှုများ ရှိခဲ့သည်။ မင်းတုန်းမြို့နယ်နှင့် အမ်းမြို့နယ်ကို ဆက်သွယ်ထားသည့် ရခိုင်ရိုးမ လမ်းကြောင်းသည် မကွေး-မင်းဘူး-အမ်း-စစ်တွေ လမ်းမကြီး (ပဒါန်း-အမ်း လမ်းကြောင်း) နှင့် စေတုတ္တရာ-ပုဏ္ဏားကျွန်း/မြောက်ဦး တောင်ကြို တောင် ကြား တောလမ်းများနှင့် တိုက်ရိုက် ဆက်စပ်နေသည်။ စစ်အုပ်စုတပ်သည် အဆိုပါ ရိုးမလမ်းကြောင်းအတိုင်း စစ်ကြောင်းများဖြင့် ချီတက်ရန် ကြိုးပမ်းနေသဖြင့် AA နှင့် ထိတွေ့တိုက်ပွဲများ ဆက်တိုက် ဖြစ်ပွားနေခြင်း ဖြစ်သည်။ မင်းတုန်းမြို့နယ်အတွင်း မေလနှောင်းပိုင်းမှစတင်၍ စစ်အုပ်စုတပ် စစ်ကြောင်း လှုပ်ရှားလာပြီးနောက် AA နှင့် ပူးပေါင်းတပ်ဖွဲ့များအကြား တိုက်ပွဲများ ဆက်လက်ပြင်းထန်နေသဖြင့် ဒေသခံများ ဘေးလွတ်ရာသို့ ထွက်ပြေး နေရသည်။ ဩဂုတ်လကုန်ပိုင်း စာရင်းများအရ မင်းတုန်းမြို့နယ်အတွင်းရှိ ကျေးရွာ ၁၅ ရွာမှ ဒေသခံ ၅,၀၀၀ ခန့် စစ်ဘေး လွတ်ရာသို့ ထွက်ပြေးတိမ်းရှောင်နေရသည်။ #မင်းတုန်းမြို့နယ်တိုက်ပွဲ

ရခိုင်ရိုးမခြေရင်း မင်းတုန်းမြို့နယ်၌ တိုက်ပွဲဖြစ်၊ စစ်အုပ်စုတပ် ထိခိုက်ဒဏ်ရာရသူ များပြား

Sep 4

စစ်တွေအနီး နှစ်နေရာ၌ AA နှင့် စစ်တပ် တိုက်ပွဲဖြစ်၊ လေကြောင်းနှင့် လက်နက်ကြီး ပစ်ကူပေးနေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၄ ရက်။ ရခိုင်ပြည်၊ စစ်တွေမြို့စွန် အမြင့်ကျွန်းကျေးရွာအနီးနှင့် စစ်တွေ-ပုဏ္ဏားကျွန်း အစပ် ကွမ်းတောင်ရွာတို့တွင် စစ်အုပ်စုတပ်နှင့် အာရက္ခတပ်တော် (AA) တို့ တိုက်ပွဲဖြစ်ပွားနေပြီး စစ်အုပ်စုတပ်ဘက်မှ လေကြောင်းနှင့် လက်နက်ကြီး ပစ်ကူများ ပေးနေကြောင်း ဒေသခံ စစ်ရေးသတင်းရင်းမြစ်များက ပြောသည်။ အာရက္ခတပ်တော် (AA) သည် စစ်တွေမြို့နှင့် ကုန်းလမ်း၊ ရေလမ်း ထိစပ်နေသည့် ပုဏ္ဏားကျွန်းမြို့နယ် ကွမ်းတောင်ကျေးရွာဘက်မှ တစ်ဆင့် စစ်တွေမြို့သို့ စစ်ရေးအရ တဖြည်းဖြည်း ချဉ်းကပ်လာနေသဖြင့် စစ်တပ် က လေကြောင်းမှ ဗုံးကြဲခြင်း၊ လက်နက်ကြီးများဖြင့် ပစ်ခတ်ခြင်းများ ပြုလုပ်နေသကဲ့သို့ စစ်တွေမြို့စွန် အမြင့်ကျွန်းကျေးရွာအနီးတွင်လည်း တိုက်ပွဲများ ဆက်လက်ဖြစ်ပွားနေသည်။ ဒေသခံ စစ်ရေးသတင်းရင်းမြစ် အမျိုးသားတစ်ဦးက “စက်တင်ဘာ ၃ ရက်နေ့က ကွမ်းတောင်ကျေးရွာနဲ့ ပုဏ္ဏား ကျွန်း၊ စစ်တွေ နယ်စပ်တွေကို ဗုံးကြဲတယ်။ စက်တင်ဘာ ၄ ရက်နေ့မှာ ကွမ်းတောင်ကို လက်နက်ကြီးနဲ့ ပစ် တယ်။ ရွှေမင်းဂံစခန်းနားနဲ့ အမြင့်ကျွန်းနားကို လက်နက်ကြီးတွေ ပစ်နေတယ်။ သတင်းအရ အေအေက တော် တော်နီးလာပြီး မြို့ထဲအထိကို စစ်ရေးဖိအားပေးနေပြီ။ ကွမ်းတောင်ကဆို ချောင်းလက်တက်တွေအတိုင်း တက် လာတာ။ အမြင့်ကျွန်းကတော့ တက်လိုက်ဆင်းလိုက်ပဲ။ အမြင့်ကျွန်းနဲ့က စစ်တွေမြို့ထဲ နာရီဝက်ပဲ၊ ကွမ်းတောင်ကတော့ ၂ နာရီခွဲလောက် သွားရတယ်၊ အရင် စစ်မဖြစ်ခင်ကပေါ့။ အခုကတော့ သွားရေးလာရေး မလွယ်ဘူး” ဟု ပြောသည်။ အမြင့်ကျွန်းကျေးရွာသည် စစ်တွေမြို့၏ မြောက်ဘက် မြို့စွန်အစပ်၌ တည်ရှိပြီး မည်သည့် မြစ်ချောင်းမှ ပိုင်း ခြားထားခြင်း မရှိဘဲ စစ်တွေမြို့နှင့် ကုန်းလမ်းအတိုင်း တိုက်ရိုက် ထိစပ်နေသည့် နေရာဖြစ်သည်။ ကွမ်းတောင်ကျေးရွာမှာမူ စစ်တွေ-ရန်ကုန် ပြည်ထောင်စု လမ်းမကြီးပေါ် ပုဏ္ဏားကျွန်းမြို့နယ် နယ်စပ်တွင် တည်ရှိပြီး ကုလားတန်မြစ်၏ အရှေ့ဘက်နှင့် အနောက်ဘက် ကမ်းတစ်လျှောက် စစ်တွေ၊ အမြင့်ကျွန်းတို့နှင့် ဆက်စပ်လျက်ရှိသည်။ အလားတူ စစ်တွေမြို့ပေါ်ရှိ တပ်ရင်းများနှင့် ကုလားတန်မြစ်ဝတွင် တပ်စွဲထားသည့် စစ်သင်္ဘောများသည်လည်း ပုဏ္ဏားကျွန်း၊ ရသေ့တောင်နှင့် ပေါက်တောမြို့နယ်ဘက်သို့ စက်တင်ဘာလ ၄ ရက်နေ့တွင် လက်နက်ကြီးများဖြင့် ရမ်းသမ်း ပစ်ခတ်နေကြောင်း ဆိုသည်။ အခြား ဒေသခံ စစ်ရေးသတင်းရင်းမြစ်တစ်ဦးက “မနေ့က ကွမ်းတောင်ကျေးရွာဘက်က တောတန်းတွေ၊ ချောင်းလက်တက်တွေဘက်ကို ပစ်နေတာ။ အေအေက ကုန်းလမ်းရော ရေလမ်းရော တက်လာနေတယ်လို့ သိရတယ်။ စစ်တွေမြို့ အနီးတစ်ဝိုက်က မင်းဂံဆိပ်နဲ့ အမြင့်ကျွန်းအထိ အေအေ စိုးမိုးဖို့ လုပ်လာတယ်။ စစ်တပ် ထွက်ပေါက်ပိတ်နေတယ်” ဟု ပြောသည်။ လက်ရှိတွင် စစ်အုပ်စုတပ်သည် စစ်တွေမြို့၌ တပ်ရင်းများ အင်အားဖြည့်တင်းကာ မြို့အစပ်နေရာများတွင် ခံစစ်တပ်ဖြန့်ထားသော်လည်း ကွမ်းတောင်ကျေးရွာနှင့် ပုဏ္ဏားကျွန်း ဝန်းကျင်သည် မြို့နှင့် တိုက်ရိုက် ထိစပ်နေသည့် အချက်အချာကျသော ဒေသဖြစ်သဖြင့် အာရက္ခတပ်တော် (AA) အနေဖြင့် မြို့အတွင်းသို့ စိမ့်ဝင်လာနိုင်သည့် အခြေအနေဖြစ်ကြောင်း သတင်းရင်းမြစ်များက ဆိုသည်။ #စစ်တွေ

စစ်တွေအနီး နှစ်နေရာ၌ AA နှင့် စစ်တပ် တိုက်ပွဲဖြစ်၊ လေကြောင်းနှင့် လက်နက်ကြီး ပစ်ကူပေးနေ

« Prev 1 … 19 20 21 22 23 … 1,148 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

အင်ဒိုနီးရှားအကျဉ်းထောင်မှ ဇိမ်ခံအဆောင်များကို အာဏာပိုင်များ စတင်ဖြိုဖျက် — October 2, 2026 5:33 pm
ယူကရိန်းနှင့် ရုရှားတို့ ဗျူဟာမြောက် ဒရုန်းအသစ်များ တိုးမြှင့် အသုံးပြုလာ — October 2, 2026 5:30 pm
အမေရိကန်၌ ဆေးထိုးကွပ်မျက်ရန် နှစ်ကြိမ်ကြိုးစားသော်လည်း မအောင်မြင် — October 2, 2026 5:29 pm

Recent Posts

အင်ဒိုနီးရှားအကျဉ်းထောင်မှ ဇိမ်ခံအဆောင်များကို အာဏာပိုင်များ စတင်ဖြိုဖျက်
ယူကရိန်းနှင့် ရုရှားတို့ ဗျူဟာမြောက် ဒရုန်းအသစ်များ တိုးမြှင့် အသုံးပြုလာ
အမေရိကန်၌ ဆေးထိုးကွပ်မျက်ရန် နှစ်ကြိမ်ကြိုးစားသော်လည်း မအောင်မြင်
တရုတ်က ရေနံ တင်ပို့မှု ရပ်ဆိုင်းလိုက်ပြီး ရေနံဈေးများ ပြန်တက်
ကချင်နှင့် ရှမ်း-ကချင်အစပ် မြို့နယ် ၆ ခုတွင် KIA နှင့် စစ်အုပ်စုတပ်တို့ တိုက်ပွဲများ ဆက်လက်ပြင်းထန်

Archives

Archives

×Close