NMG Doh – Page 22 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
နိုင်ငံတကာသတင်း
NMG အကြောင်း
Contact

Home
Author Archive

NMG Doh

Author: NMG Doh

Sep 4

ပဲခူးအနောက်ခြမ်း AA ထိန်းချုပ်နယ်မြေကို လေကြောင်းတိုက်ခိုက်မှု အပါအဝင် တိုက်ပွဲများ ပြင်းထန်နေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၄ ရက်။ ပဲခူးတိုင်းဒေသကြီး အနောက်ခြမ်း၊ ပြည်ခရိုင်၊ ပန်းတောင်းမြို့နယ်၊ ညောင်ကျိုးအဆင်းရှိ အာရက္ခတပ်တော် (AA) ထိန်းချုပ်ထားသည့် နားနေစခန်းကို စစ်အုပ်စုတပ်က လေကြောင်းပစ်ကူများဖြင့် ထိုးစစ်ဆင် တိုက်ခိုက် နေသဖြင့် ဒေသခံများ စိုးရိမ်နေကြသည်။ စက်တင်ဘာလ ၄ ရက်နေ့၊ နံနက် ၆ နာရီမှ ညနေ ၃ နာရီဝန်းကျင်အထိ လေယာဉ်ဖြင့် ဆက်တိုက် ဗုံးကြဲနေပြီး မြေပြင်စစ်အုပ်စုတပ်များကလည်း မြို့နယ်အတွင်းရှိ လူမှုရေးအသင်း ကားများကို ချောဆွဲထားကြောင်း မြို့ခံ များက ဆိုသည်။ ညောင်ကျိုးဒေသဘက်မှ အသက် ၅၀ အရွယ် စစ်ဘေးရှောင်တစ်ဦးက “ကားတွေ ခေါ်ထားလား မေးရင် မခေါ် ထားဘူးပဲ ပြောရမှာပဲ။ ကိုယ့်သဘော မရှိဘူး၊ သူတို့သဘောပဲလေ။ သူတို့ စစ်တပ် အထိနာရင် ကြဲတာပဲ။ အခုက ဟိုက စမတိုက်ဘူး၊ ဒီကသွားရင် ငှက်ကြီးတောင် ဆွဲထွက်တဲ့ ဘကြီးလိုပဲပေါ့” ဟု ပြောသည်။ ပြီးခဲ့သည့် ဩဂုတ်လ ၂၆ ရက်နေ့က တရုတ်နိုင်ငံထုတ် Sinotruk စစ်ကား ၆၅ စီး ဥသျှစ်ပင်သို့ ရောက်ရှိလာပြီး ၎င်းတို့အနက် ၄ စီးမှာ စစ်သားများ ပါဝင်ခြင်းမရှိဘဲ အလွတ် (ခါလီ) ဖြစ်ကြောင်း ဆိုသည်။ အဆိုပါနေ့ ည ၈ နာရီခန့်တွင်လည်း စစ်ကား ၃၀ ကျော် ထပ်မံဝင်ရောက်လာပြီး ကပစ (၁၆) မသုန်နှင့် ကပစ (၆) ညောင်ခြေထောက်တို့တွင် ရပ်နားခဲ့ကြောင်း ဒေသခံများက ဆိုသည်။ ဥသျှစ်ပင် ဒေသခံတစ်ဦးက “အနားယူပြီးပြီ ထင်တယ်၊ ဒီနေ့ စတိုက်တာနေမယ်၊ တော်တော်ကြမ်းနေတယ်။ အသံတွေကတော့ ကျနော်တို့ မြို့ကွင်းဘက်တန်း နေအိမ်တွေ အသံလှိုင်းကြောင့် တုန်တယ်” ဟု ပြောသည်။ ထို့ပြင် လက်နက်ကျွမ်းကျင်သူ စစ်ထွက်တစ်ဦး၏ ပြောပြချက်အရ တိုက်ပွဲအတွင်း ဒုံးကျည်သံ၊ ပေါင် ၅၀၀ ဗုံးကြဲသံ၊ ခြေလျှင်တပ်ရင်းသုံး လက်နက်ကြီးသံနှင့် ဟောင်ဝစ်ဇာ အမြောက်သံများ ဆက်တိုက် ထွက်ပေါ်နေ ကြောင်း သိရသည်။ စစ်အုပ်စုတပ်သည် မီးဖြတ်ပြီးပါက အလောင်းနှင့် လူနာများ သယ်ယူလေ့ရှိသဖြင့် တစ်မြို့လုံး မီးဖြတ်မည့် အချိန်ကို သတိထား စောင့်ကြည့်နေကြကြောင်း အသက် ၄၀ အရွယ် ဒေသခံ အမျိုးသားတစ်ဦးကလည်း မှတ် ချက်ပြုသည်။ “မီးဖြတ်ပြီးရင် အလောင်း လူနာ သယ်တတ်တယ်” ဟု ၎င်းက ပြောသည်။ ညောင်ကျိုးနှင့် မိုးထိတောင်စခန်းများ ကျဆုံးပြီးနောက် AA နှင့် မဟာမိတ်တပ်များ၏ ထိုးစစ်သည် ကာကွယ် ရေးပစ္စည်းစက်ရုံ (ကပစ) များအနီးအထိ နီးကပ်လာသဖြင့် စစ်အုပ်စုတပ်က ဥသျှစ်ပင်နှင့် ကပစ ဝန်းကျင်တွင် အပြင်းအထန် ခံစစ်ပြင်ဆင်နေခြင်း ဖြစ်ကြောင်း ကပစ ဝန်ထမ်းတစ်ဦးက ဆိုသည်။ ကပစ ဝန်ထမ်းတစ်ဦးက “ကပစ (၆) နဲ့ ကပစ (၁၆) က ရိုးမနားမှာပဲ ရှိတာလေ” ဟု ပြောသည်။ ညောင်ကျိုးစခန်းသည် ရခိုင်ပြည်တောင်ပိုင်း တောင်ကုတ်မြို့နှင့် ပဲခူးတိုင်း ပန်းတောင်း (ဥသျှစ်ပင်) ကို ဆက် သွယ်ထားသည့် ရခိုင်ရိုးမဖြတ်လမ်းပေါ်တွင် တည်ရှိသည့် မဟာဗျူဟာမြောက် စခန်းတစ်ခုဖြစ်သည်။ ဓါတ်ပုံ - Crd #ပန်းတောင်းမြို့နယ် #ပဲခူးတိုင်း

ပဲခူးအနောက်ခြမ်း AA ထိန်းချုပ်နယ်မြေကို လေကြောင်းတိုက်ခိုက်မှု အပါအဝင် တိုက်ပွဲများ ပြင်းထန်နေ

Sep 4

တောင်ကြီးတွင် စည်ပင်ဝန်ထမ်းနှင့် ဈေးဝယ်သူ ထိုးကြိတ်ကြရာမှ သွေးထွက်သံယိုဖြစ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၄ ရက်။ ရှမ်းပြည်တောင်ပိုင်း၊ တောင်ကြီးမြို့၊ ဗိုလ်ချုပ်လမ်းမပေါ်ရှိ City Square အနီး ပျံကျဈေးတွင် စည်ပင်ဝန်ထမ်း နှင့် ဈေးဝယ်သူ အမျိုးသမီးတို့အကြား စကားများရန်ဖြစ်ရာမှ သွေးထွက်သံယိုဖြစ်သည့်အထိ အပြန်အလှန် ထိုးကြိတ် တိုက်ခိုက်မှု ဖြစ်ပွားခဲ့ကြသည်။ ဖြစ်စဉ်မှာ စက်တင်ဘာလ ၃ ရက် နံနက် ၇ နာရီခန့်တွင် ဒေါ်အိလှိုင် ဆိုသူသည် သူငယ်ချင်းဖြစ်သူနှင့်အတူ မဟာသုခလမ်းဘက်မှ ပျံကျဈေးအတွင်းသို့ ဆိုင်ကယ်ဖြင့် မောင်းဝင်စဉ် စိန်တောင်တန်း စားသောက်ဆိုင်ရှေ့၌ စည်ပင်ဝန်ထမ်း ဦးတင်ဝင်းအောင်က ဝင်ရောက်ခွင့် မပြုရာမှ စကားများရန်ဖြစ်မှု စတင်ခဲ့ခြင်း ဖြစ်သည်။ ဈေးသည်တစ်ဦးက “ကျမတို့လည်း မြင်နေတယ်။ ကောင်မလေးကလည်း အပြောရင့်တယ်။ စည်ပင်ကလည်း ပြေပြေလည်လည် မပြောတတ်ဘူး။ နှစ်ဖက်လုံးတင်းပြီး ဖြစ်ကြတာ။ ဒီကာလ လူတိုင်း စိတ်ဆတ်တော့ သတိထားပြောဆိုရမှာ။ ဒီလို ဖြစ်တော့ နှစ်ဖက်လုံးအတွက် မကောင်းဘူး” ဟု ပြောသည်။ ဒေါ်အိလှိုင်သည် ထွက်ခွာသွားပြီးနောက် တက်ခေတ်လမ်းဘက်မှ ပြန်လည်ဝင်ရောက်ရာတွင် ထပ်မံ တားဆီးခံ ရသဖြင့် အပြန်အလှန် ဆဲဆိုကြရာမှ ရန်ပွဲ စတင်ခဲ့သည်။ ရန်ပွဲအတွင်း ဒေါ်အိလှိုင်ဘက်မှ ဓားချွန်ဖြင့် တိုက်ခိုက်ခဲ့သဖြင့် ဦးတင်ဝင်းအောင်တွင် ပါး၊ မေးစေ့၊ လည်ပင်း၊ ရင်အုံနှင့် ဝမ်းဗိုက်တို့၌ ပြတ်ရှဒဏ်ရာများ ရရှိခဲ့ကြောင်း မျက်မြင်တွေ့ရှိသည့် ဈေးသည်များက ဆိုသည်။ ထို့နောက် ဦးတင်ဝင်းအောင်ကလည်း ပြန်လည် ထိုးကြိတ်ခဲ့သဖြင့် ဒေါ်အိလှိုင်တွင် ခေါင်း၊ ဝဲဘက်မျက်လုံး၊ ရင်ဘတ်နှင့် လက်မောင်းတို့၌ ဖူးယောင်ဒဏ်ရာများနှင့်အတူ နှုတ်ခမ်း၊ မေးစေ့တို့တွင် ပြတ်ရှဒဏ်ရာများ ရရှိခဲ့ သည်။ ပျံကျဈေးတွင် နေ့စဉ် ဈေးဝယ်သည့် အိမ်ရှင်မတစ်ဦးက “ဘယ်သူမှား မှန်လဲတော့ မသိဘူးပေါ့နော်။ စည်ပင် တွေ ကြိုက်သလို လုပ်နေတာကတော့ မြင်နေတွေ့နေတာပဲ။ မဝင်ရ လမ်းတွေ သူတို့ စိတ်ကြိုက်သတ်မှတ် တယ်။ ရပ်ကွက်လူတွေနဲ့ ဘာမှ ညှိနှိုင်းမှု မရှိဘူး။ ပိုက်ဆံပေးရင် ရောင်းရမယ်။ နောက်နေ့ ဖမ်းချင်ဖမ်းမယ်။ အပြောဆို ရင့်တယ်။ စည်ပင် အလုပ်ကျ မလုပ်ချင်ဘူး။ ဈေးသည်တွေ ဈေးဝယ်တွေလည်း ရိုင်းတာပါပဲ။ ထစ်ခနဲရှိဆို ဖအေ၊ နှမ ကိုင်တုတ်ဆဲကြတော့ သည်းမခံနိုင်ကြတော့တာ” ဟု ပြောသည်။ အဆိုပါ ဖြစ်စဉ်နှင့် ပတ်သက်၍ ဦးတင်ဝင်းအောင်က တောင်ကြီး မြို့မရဲစခန်းတွင် တိုင်ကြားခဲ့သဖြင့် ဒေါ်အိလှိုင် အား ဆဲဆိုမှု၊ ဝတ္တရားနှောက်ယှက်မှု၊ အနာတရဖြစ်စေမှု ရာဇသတ်ကြီးပုဒ်မ ၂၉၄/ ၃၅၃/ ၃၃၂ တို့ဖြင့် အမှုဖွင့်ထားသည်။ အလားတူ ဒေါ်အိလှိုင် ဘက်ကလည်း ပြန်လည် တိုင်တန်းခဲ့သည့်အတွက် ဦးတင်ဝင်းအောင်ကိုလည်း ရဲစခန်းက ဆဲဆိုမှု၊ နာကျင်စေမှု၊ ကာယိန္ဒြေပျက်စီးစေမှု ပုဒ်မ ၂၉၄/ ၃၂၃/ ၃၅၄ တို့ဖြင့် အမှုဖွင့်ထားသည်။ တောင်ကြီးမြို့တွင် ဈေးသည်နှင့် စည်ပင်ဝန်ထမ်းများအကြား မကြာခဏ စကားများလေ့ရှိသော်လည်း ယခုကဲ့ သို့ ဈေးဝယ်သူနှင့် စည်ပင်ဝန်ထမ်းတို့အကြား သွေးထွက်သံယိုဖြစ်သည်အထိ ခိုက်ရန်ဖြစ်ပွားမှုမှာ ပထမဆုံး အကြိမ် ဖြစ်ကြောင်း ဒေသခံများက ပြောသည်။ #တောင်ကြီးမြို့

တောင်ကြီးတွင် စည်ပင်ဝန်ထမ်းနှင့် ဈေးဝယ်သူ ထိုးကြိတ်ကြရာမှ သွေးထွက်သံယိုဖြစ်

Sep 4

နော်ဝေက ရုရှားသုတေသနသင်္ဘောကို တရားရုံးအမိန့်ဖြင့် သိမ်းဆည်း သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၄ ရက်။ ယူကရိန်းအမျိုးသားစွမ်းအင်ကုမ္ပဏီ နက်ဖ်တိုဂက်စ် (Naftogaz) ၏ လျော်ကြေးငွေ ရပိုင်ခွင့်အတိုင်း အကောင်အထည်ဖော်ရန်အတွက် နော်ဝေနိုင်ငံက အာတိတ်စက်ဝိုင်းအတွင်း ရောက်ရှိနေသည့် ရုရှားပိုင် သုတေသနနှင့် ခရီးသွားသင်္ဘော ပါမောက္ခ မိုလ်ချာနော့ဗ် (Professor Molchanov) ကို အရေးယူထိန်းသိမ်းလိုက်သည်။ ၂၀၁၄ ခုနှစ်တွင် ခရိုင်းမီးယားကျွန်းဆွယ်ကို ရုရှားက ထိန်းချုပ်ခဲ့စဉ် Naftogaz ၏ ပိုင်ဆိုင်မှုများ သိမ်းယူခံခဲ့ရမှုအတွက် အမေရိကန်ဒေါ်လာ ၄ ဒသမ ၂၂ ဘီလီယံ လျော်ကြေးပေးရန် ၂၀၂၃ ခုနှစ်တွင် နယ်သာလန်နိုင်ငံ၊ သည်ဟိဂ် အက္ခရာတင် တရားရုံးက အမိန့်ဒီကရီ ချမှတ်ခဲ့ခြင်းဖြစ်သည်။ ရုရှားဘက်က ပေးလျော်ရန် ပျက်ကွက်ခဲ့သဖြင့် Naftogaz ၏ ဥပဒေအကြံပေးများက ခြေရာခံစောင့်ကြည့်ကာ နော်ဝေပိုင် စဗားဘတ် (Svalbard) ကျွန်းစုအနီး ဆိုက်ကပ်ချိန်တွင် တရားရုံးအမိန့်ဖြင့် ထိန်းသိမ်းခဲ့ခြင်းဖြစ်သည်။ နော်ဝေအစိုးရကမူ ယင်းဖြစ်စဉ်သည် ပုဂ္ဂလိက ကုမ္ပဏီနှင့် ရုရှားနိုင်ငံအကြား တရားဥပဒေကြောင်းအရ ရပိုင်ခွင့် ကိစ္စသာဖြစ်ကြောင်း ထုတ်ပြန်သည်။ ရုရှားသံအမတ်ကမူ ယင်းလုပ်ရပ်ကို ကန့်ကွက်ပြီး သင်္ဘောနှင့် တာဝန်ရှိသူများကို ချက်ချင်းပြန်လွှတ်ပေးရန် တောင်းဆိုထားသည်။ #Professor_Molchanov

နော်ဝေက ရုရှားသုတေသနသင်္ဘောကို တရားရုံးအမိန့်ဖြင့် သိမ်းဆည်း

Sep 4

တရုတ် ဒုံးကျည် စမ်းသပ်မှု ရှုတ်ချရေး ပစိဖိတ် ကျွန်းစုနိုင်ငံများ အစည်းအဝေးတွင် တောင်းဆို သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၄ ရက်။ ပစိဖိတ်ကျွန်းစုများ ဖိုရမ် (PIF) ထိပ်သီးအစည်းအဝေး၏ အိမ်ရှင် ပလောင်းနိုင်ငံက တရုတ်၏ ဘာလစ်စတစ်ဒုံးကျည် စမ်းသပ်မှုကို ဘူးသီးတောင် ပူးတွဲကြေညာချက်တွင် ထည့်သွင်းရှုတ်ချရန် တောင်းဆိုခဲ့မှုအပေါ် တရုတ်အစိုးရက ကိစ္စရပ်ကို ပုံကြီးချဲ့ လှုံ့ဆော်ခြင်းဟု ပြန်လည်စွပ်စွဲလိုက်သည်။ ပလောင်းသမ္မတ Surangel Whipps Jr. က တရုတ်အနေဖြင့် အခြားနိုင်ငံများ၏ အချုပ်အခြာအာဏာကို လေးစားရန်နှင့် ဒေသတွင်း ခြိမ်းခြောက်မှုများ မပြုလုပ်ရန် ပြောကြားခဲ့သည်။ တရုတ်သည် ပြီးခဲ့သည့် ဇူလိုင်လအတွင်း ပစိဖိတ်သမုဒ္ဒရာအတွင်း ဘာလစ်စတစ်ဒုံးကျည် စမ်းသပ်ခဲ့ခြင်းဖြစ်သည်။ တရုတ်နိုင်ငံခြားရေးဝန်ကြီးဌာနကမူ စမ်းသပ်မှုမှာ လုံခြုံရေးစံနှုန်းများနှင့်အညီ ပြုလုပ်ခဲ့ခြင်းဖြစ်ပြီး အဖွဲ့ဝင်နိုင်ငံများကို စည်းရုံးလှုံ့ဆော်မှုများ အောင်မြင်မည်မဟုတ်ကြောင်း တုံ့ပြန်သည်။ အဆိုပါ ထိပ်သီးအစည်းအဝေးတွင် ထိုင်ဝမ်၏ တက်ရောက်ခွင့်နှင့် ပတ်သက်၍လည်း တရုတ်နှင့် အိမ်ရှင်ပလောင်းနိုင်ငံတို့အကြား သံတမန်ရေး တင်းမာမှုများ ပေါ်ပေါက်ခဲ့သည်။ #PIF

တရုတ် ဒုံးကျည် စမ်းသပ်မှု ရှုတ်ချရေး ပစိဖိတ် ကျွန်းစုနိုင်ငံများ အစည်းအဝေးတွင် တောင်းဆို

Sep 4

စုံစမ်းဖော်ထုတ်ရေး သတင်းထောက် လုပ်ကြံခံရမှုဆိုင်ရာ သံသယရှိသူ လုပ်ငန်းရှင် လွတ်မြောက် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၄ ရက်။ မော်တာနိုင်ငံမှ စုံစမ်းထောက်လှမ်းရေး သတင်းထောက် Daphne Caruana Galizia ကို လုပ်ကြံသတ်ဖြတ်မှုတွင် အဓိက စေခိုင်းသူအဖြစ် စွပ်စွဲခံထားရသည့် စီးပွားရေးလုပ်ငန်းရှင် Yorgen Fenech ကို တရားရုံး ဂျူရီလူကြီးအဖွဲ့က အပြစ်မရှိကြောင်း ဆုံးဖြတ်၍ ပြန်လွှတ်ပေးခဲ့သည်။ ၂၀၁၇ ခုနှစ် အောက်တိုဘာလက အစိုးရအဖွဲ့အတွင်း အဂတိလိုက်စားမှုများနှင့် ပနားမားစာရွက်စာတမ်း (Panama Papers) လျှို့ဝှက်ချက်များကို ဖော်ထုတ်ခဲ့သူ သတင်းထောက် Galizia သည် မော်တော်ယာဉ် ဗုံးခွဲခံရပြီး သေဆုံးခဲ့ရခြင်းဖြစ်သည်။ ယင်းအမှုတွင် ပါဝင်သည့် တိုက်ရိုက်ကျူးလွန်သူများကို ထောင်ဒဏ်များ ချမှတ်ခဲ့သော်လည်း နောက်ကွယ်မှ စေခိုင်းသူဟု စွပ်စွဲခံရသူ လွတ်မြောက်သွားခြင်း ဖြစ်သည်။ ယင်းဆုံးဖြတ်ချက်အပေါ် သေဆုံးသူ၏ မိသားစုက စနစ်ပိုင်းဆိုင်ရာ ပျက်ကွက်မှုဟု ဝေဖန်ခဲ့ပြီး သတင်းထောက်များ ကာကွယ်စောင့်ရှောက်ရေး ကော်မတီ (CPJ) ကလည်း ကမ္ဘာတစ်ဝှမ်းရှိ မီဒီယာသမားများအတွက် အန္တရာယ်ရှိသော စံနမူနာဆိုးဖြစ်ကြောင်း ထုတ်ပြန်သည်။ နယ်စည်းမခြား သတင်းထောက်များအဖွဲ့ (RSF) ကလည်း မော်တာနိုင်ငံ၏ ပြစ်ဒဏ်မှ ကင်းလွတ်ခွင့်ရနေသည့် အလေ့အထကို ပြင်းပြင်းထန်ထန် ထောက်ပြဝေဖန်ထားသည်။ #Daphne_Caruana_Galizia #Yorgen_Fenech

စုံစမ်းဖော်ထုတ်ရေး သတင်းထောက် လုပ်ကြံခံရမှုဆိုင်ရာ သံသယရှိသူ လုပ်ငန်းရှင် လွတ်မြောက်

Sep 4

မကွေးတိုင်း ဆောမြို့နယ် အတွင်း စစ်အုပ်စုတပ်က ဒေသခံ ၂၀ ကျော်ကို ဖမ်းဆီးထား သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၃ ရက်။ မကွေးတိုင်း၊ ယောဒေသ ဆောမြို့နယ်၊ သီးကုန်းကျေးရွာအတွင်းသို့ စစ်အုပ်စုတပ် စစ်ကြောင်း ရုတ်တရက် ဝင်ရောက်တပ်စွဲကာ ဖမ်းဆီးထားသည့် ဒေသခံ အရပ်သား ၂၀ ကျော်ကို လက်ရှိအချိန်အထိ လူသားဒိုင်းနှင့် ဓားစာခံအဖြစ် ဆက်လက် ထိန်းသိမ်းထားကြောင်း ဒေသတွင်း စစ်ရေးသတင်းရင်းမြစ်များက ပြောသည်။ အဆိုပါ အင်အား ၁၂၀ ခန့်ပါ စစ်ကြောင်းသည် ဩဂုတ်လ ၃၀ ရက် နံနက်ပိုင်းတွင် မင်းလယ်ကျေးရွာ ဘက်မှ သီးကုန်းရွာအတွင်းသို့ တိတ်တဆိတ် ရုတ်တရက် ဝင်ရောက်လာခြင်းဖြစ်ပြီး လမ်းခရီးတွင် တွေ့ရှိသည့် ဒေသခံများကို ဆက်တိုက် ဖမ်းဆီးခဲ့ခြင်း ဖြစ်သည်။ အရပ်သားများကို စက်တင်ဘာလ ၃ ရက်နေ့အထိ ၅ ရက်ကြာသည့် တိုင် ပြန်မလွတ်သေးဘဲ လူသားဒိုင်းနှင့် ဓားစာခံအဖြစ် ဆက်လက် ထိန်းသိမ်းထားကြောင်း ဒေသတွင်း စစ်ရေး သတင်းရင်းမြစ်များက ပြောသည်။ ယောဒေသ စစ်ရေးသတင်းရင်းမြစ်တစ်ဦးက “စစ်ကြောင်းက မင်းလယ်ရွာဘက်က တိတ်တဆိတ် ရုတ်တရက် ဝင်ရောက်လာပြီး လမ်းခရီးမှာ တွေ့တဲ့ အရပ်သားတွေကို ဆက်တိုက် ဖမ်းသွားတာ။ အခု ၂ ယောက်ပဲ ပြန်လွတ် သေးတယ်။ အများစုက မလွတ်ဘူး။ သူတို့အတွက် ထမင်းချက်ခိုင်းတာနဲ့ ခိုင်းတာတွေ လုပ်ပေးနေရတယ်။ ရွာအနီးဝန်းကျင်မှာလည်း တပ်ဖြန့်ထားတယ်” ဟု ပြောသည်။ ဖမ်းဆီးခံထားရသူများအနက် ၂ ဦးသာ ပြန်လည် လွတ်မြောက်လာသေးပြီး ကျန်သူများကို စက်တင်ဘာလ ၃ ရက်နေ့အထိ ရွာအတွင်း တပ်စွဲထားရင်း ဓားစာခံအဖြစ် ခိုင်းစေထားခြင်း ဖြစ်သည်။ ထို့ပြင် စစ်အုပ်စုသည် ဆောမြို့ပေါ်တွင် သွားလာလှုပ်ရှားမှုများ ပြုလုပ်လျက်ရှိပြီး မြို့တောင်ဘက်ရှိ ရင်းခေါ် ကျေးရွာနှင့် မင်းလယ်ကျေးရွာတို့သို့ တပ်ဖွဲ့ဝင်များ ထပ်မံ စေလွှတ်ထားသည်ဟု ဆိုသည်။ အဆိုပါ ရင်းခေါ်ကျေးရွာ၌ စစ်အုပ်စု၏ ဒရုန်းတပ်ဖွဲ့ တပ်စွဲထားခြင်းဖြစ်ပြီး ထိုမှတစ်ဆင့် သီးကုန်းကျေးရွာ ဘက်သို့ ခရီးဆက်လာခြင်း ဖြစ်သည်။ စစ်အုပ်စုတပ်အနေဖြင့် ယခုကဲ့သို့ အင်အားဖြည့်တင်း စေလွှတ်နေခြင်းမှာ ဆော-ရင်းခေါ်-မင်းလယ်-သီးကုန်း လမ်းပိုင်းကို အပြည့်အဝ ထိန်းချုပ်နိုင်ရေး ဆောင်ရွက်နေခြင်းဖြစ်ပြီး သီးကုန်းကျေးရွာတွင် ရောက်ရှိနေသည့် စစ်ကြောင်းသည် ထိုရွာ၌ အထိုင်ချ တပ်စွဲမည့် အခြေအနေရှိကြောင်း ဒေသခံများက သုံးသပ်ပြောဆိုနေကြ သည်။ လက်ရှိတွင် ဆော-သီးကုန်း-လောင်းရှည် လမ်းပိုင်း၌ စစ်အုပ်စုတပ်နှင့် ပြည်သူ့တော်လှန်ရေးတပ်ဖွဲ့များကြား စစ်ရေး တင်းမာလျက်ရှိသောကြောင့် ဒေသခံ ပြည်သူများအနေဖြင့် အသွားအလာ အနေအထိုင်များကို အထူး သတိထားကြရန် တော်လှန်ရေးအဖွဲ့များက ကြိုတင် သတိပေးထားသည်။ #ဆောမြို့နယ်

မကွေးတိုင်း ဆောမြို့နယ် အတွင်း စစ်အုပ်စုတပ်က ဒေသခံ ၂၀ ကျော်ကို ဖမ်းဆီးထား

Sep 4

မွန်၊ ကရင်နှင့် တနင်္သာရီတွင် စစ်ဘေးရှောင် ၁၆ သိန်းကျော်လာ၊ ကူညီရေးအဖွဲ့များ အခက်ကြုံနေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၃ ရက်။ မွန်ပြည်၊ ကရင်ပြည်နှင့် တနင်္သာရီတိုင်းတို့တွင် စစ်အုပ်စုတပ်၏ စစ်ကြောင်းထိုးမှုနှင့် လေကြောင်း တိုက်ခိုက် မှုများကြောင့် နေရပ်စွန့်ခွာ ထွက်ပြေးရသည့် စစ်ဘေးရှောင် ဦးရေ ၁၆ သိန်းကျော်အထိ အဆမတန် တိုးလာနေ ပြီး အခြေခံ စားနပ်ရိက္ခာ၊ ဆေးဝါးနှင့် မိုးကာများ အရေးပေါ် လိုအပ်နေကြောင်း ဒေသခံ ကူညီကယ်ဆယ်ရေး အဖွဲ့များက ပြောသည်။ ဒေသတွင်း တိုက်ပွဲများအပြင် စစ်အုပ်စုတပ်၏ လက်နက်ကြီး ပစ်ခတ်မှု၊ ဒရုန်းနှင့် လေကြောင်း တိုက်ခိုက်မှုများ ကြောင့် ဒေသခံများသည် ဘေးလွတ်ရာ တောတောင်များနှင့် ရာဘာခြံများအတွင်းသို့ လအတော်ကြာ ထွက်ပြေး တိမ်းရှောင်နေကြရခြင်း ဖြစ်သည်။ မွန်ပြည် လူ့အခွင့်အရေး ဖောင်ဒေးရှင်း (HURFOM) ပရိုဂရမ် ဒါရိုက်တာ နိုင်အဲမွန်က “ဩဂုတ် ဒေတာအရ မွန်မှာ စုစုပေါင်း ၂၉၉,၇၂၉ ကျော်၊ ကရင်မှာ ၇၉၉,၇၀၀ ကျော်နဲ့ တနင်္သာရီမှာ ၅၁၆,၂၄၀ ကျော် ဆိုတော့ နေရပ်ရင်းက စွန့်ခွာ ထွက်ပြေးနေရတဲ့ အခြေအနေရှိတယ်နော်။ တစ်ပတ်ထဲမှာပဲ ကရင်မှာ ၂,၅၀၀၊ မွန်မှာ ၁,၂၀၀ နဲ့ တနင်္သာ ရီမှာ ၂,၁၀၀ တိုးလာတာကို အတည်ပြုနိုင်ခဲ့တာဖြစ်ပြီး မြေပြင်မှာ ဒီထက်ပိုများနိုင်ပါတယ်” ဟု ပြောသည်။ ထိုအရေအတွက်သည် မွန်ပြည်လူ့အခွင့်အရေး ဖောင်ဒေးရှင်း HURFOM က လက်လှမ်းမှီးသလောက် ကောက် ယူထားသည့် အရေအတွက်များသာဖြစ်ပြီး မြေပြင်တွင် ယခုအရေအတွက်ထက် ပိုများနိုင်သည်ဟု ဆိုသည်။ လက်ရှိတွင် စစ်ဘေးရှောင်များမှာ စားနပ်ရိက္ခာအပြင် မိုးကာ၊ သန့်ရှင်းသည့် သောက်သုံးရေနှင့် တစ်ကိုယ်ရည် သန့်ရှင်းရေး ပစ္စည်းများ လိုအပ်နေသည့်အပြင် စခန်းများ၌ ငှက်ဖျားနှင့် တုပ်ကွေးရောဂါများ ကူးစက်ဖြစ်ပွားနေ သဖြင့် ဆေးဝါးနှင့် ခြင်ထောင်များ အရေးပေါ် လိုအပ်လျက်ရှိသည်။ တနင်္သာရီတိုင်းမှ ကူညီကယ်ဆယ်ရေး ဆောင်ရွက်နေသူတစ်ဦးက “မြို့နယ်တိုင်းလိုလိုမှာ စစ်ဘေးရှောင်တွေ ရှိနေတယ်။ ဆေးလိုမယ်။ တာလပတ်၊ မိုးကာ၊ ရိက္ခာတွေ လိုတာပေါ့။ အခုက ငှက်ဖျားပေါတယ်။ ငှက်ဖျား တော်တော် ထိတယ်။ ဟိုတလောမှာတောင် ငှက်ဖျားကြောင့် ၂ ယောက်၊ ၃ ယောက် သေတယ်” ဟု ပြောသည်။ ထို့ပြင် တောတောင်နှင့် ရာဘာခြံများအတွင်း လပေါင်းများစွာ ခိုလှုံနေကြရသည့် စစ်ဘေးရှောင် မိသားစုများ တွင် ကလေးသူငယ်များ၏ ပညာရေးနှင့် ကျန်းမာရေးအတွက် အထူး စိုးရိမ်စရာ ဖြစ်နေသည်။ မိုးရာသီ ကာလဖြစ်သည့်အတွက် ယာယီတဲ shelter မလုံလောက်မှုကြောင့် တုပ်ကွေးနှင့် ဝမ်းပျက်ဝမ်းလျှော ရောဂါများ ကူးစက်ဖြစ်ပွားနေသည့်အပြင် ကလေးငယ်များအတွက် အာဟာရပြည့်ဝသည့် စားနပ်ရိက္ခာများနှင့် အခြေခံ ပညာသင်ကြားနိုင်ရေးအတွက်ပါ အခက်အခဲပေါင်းများစွာ ကြုံတွေ့နေကြရသည်။ တစ်ဖက်တွင်လည်း စစ်အုပ်စုတပ်၏ စစ်ကြောင်းထိုးမှုများအတွင်း ကျေးရွာများအနီး မြေမြှုပ်မိုင်းများ ထောင်ထားခဲ့ခြင်းနှင့် ဆက်သွယ်ရေး လိုင်းများ ဖြတ်တောက်ထားခြင်းတို့ကြောင့် ကူညီရေးအဖွဲ့များအနေဖြင့် စစ်ဘေးရှောင်များထံ အချိန်မီ သတင်းအချက်အလက် ပေးပို့နိုင်ရေးနှင့် ရိက္ခာဝေငှနိုင်ရေးအတွက် ကြီးမားသည့် စိန်ခေါ်မှုများနှင့် ရင်ဆိုင်နေရသည်။ ကူညီရေးအဖွဲ့များအနေဖြင့် စစ်ဘေးရှောင်များထံ သွားရောက် ကူညီရာ၌ စစ်အုပ်စုတပ်၏ လမ်းပိတ်ဆို့မှုများ၊ စစ်ဆေးရေးဂိတ်များ၊ လေကြောင်းနှောင့်ယှက်မှုများနှင့် ဆက်သွယ်ရေး ပြတ်တောက်မှုများကြောင့် အကူအညီ များ ပေးပို့ရန် ခက်ခဲနေကြသည်။ ထိုအခြေအနေနှင့် ပတ်သက်၍ HURFOM မှ နိုင်အဲမွန်က “အဓိက အခက်အခဲက သွားရေးလာရေး အခက်အခဲ တွေ ရှိတယ်။ လမ်းပိတ်တာတို့၊ Check point တိုးတာတို့ပေါ့နော်။ လက်နက်ကြီးနဲ့ ရမ်းသမ်းပစ်တဲ့ကိစ္စ၊ နောက်တစ်ခါ ဒရုန်းတို့ လန်းမိုင်းစစ်ကြောင်းတွေ၊ ဆက်သွယ်ရေး ပြတ်တောက်တာတွေကြောင့် relief team တွေ သွားရေးလာရေး ခက်လာတာတွေ ရှိတယ်။ ညဘက်ပဲ သွားရတာတွေရှိတယ်။ တစ်ဖက်မှာလည်း Funding တွေ လျှော့လာတယ်။ အကူအညီတွေက ကစဉ့်ကလျား ဖြစ်နေရတယ်” ဟု ဆက်ပြောသည်။ စစ်အုပ်စုတပ်သည် ၎င်းတို့ ဆုံးရှုံးလိုက်ရသည့် နယ်မြေများ၊ နယ်စပ်ကုန်သွယ်ရေးနှင့် မဟာဗျူဟာကျသည့် နေရာများကို ပြန်လည်ရယူရန် မြေပြင် ထိုးစစ်များအပြင် လေကြောင်းမှပါ အပြင်းအထန် တိုက်ခိုက်နေသဖြင့် ဒေသခံများ၏ လူသားချင်းစာနာမှု အကူအညီ လိုအပ်ချက်များမှာ ပိုမို ကြီးမားလာလျက်ရှိသည်။ (ဓာတ်ပုံ - ဒေါနတနင်္သာရီ - စစ်ဘေးရှောင်များ အထောက်အကူပြုရေးအဖွဲ့) #IDPs #စစ်ဘေးရှောင်

မွန်၊ ကရင်နှင့် တနင်္သာရီတွင် စစ်ဘေးရှောင် ၁၆ သိန်းကျော်လာ၊ ကူညီရေးအဖွဲ့များ အခက်ကြုံနေ

Sep 4

စစ်တွေနှင့် ပတ်ပတ်လည် ဒေသများကို စစ်တပ် လေကြောင်းမှ မိနစ် ၃၀ အတွင်း အကြိမ် ၃၀ ဗုံးကြဲ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၃ ရက်။ ရခိုင်ပြည်အတွင်း စစ်ရေးအရ အထိနာနေသည့် စစ်အုပ်စုတပ်သည် ပုဏ္ဏားကျွန်း၊ စစ်တွေနှင့် ရသေ့တောင် မြို့နယ်တို့ရှိ ကျေးရွာများကို စက်တင်ဘာလ ၃ ရက် မွန်းလွဲပိုင်းတွင် ဂျက်ဖိုက်တာ ၄ စီးဖြင့် မိနစ် ၃၀ အတွင်း အကြိမ်ရေ ၃၀ ခန့် လှည့်ပတ် ဗုံးကြဲတိုက်ခိုက်ခဲ့ကြောင်း အာရက္ခတပ်တော် (AA) နှင့် ဒေသခံများက ပြောသည်။ လေကြောင်းမှ ဗုံးကြဲတိုက်ခိုက်ခံရသည့် နေရာများမှာ ပုဏ္ဏားကျွန်း-စစ်တွေ နယ်စပ်ရှိ ကွမ်းတောင်၊ ကုန်းတန်း ကြိမ်ချောင်း၊ မက္ကလာကျ၊ ညိုရောင်၊ မင်းလှ၊ ပဒေသာ ကျေးရွာများနှင့် ရသေ့တောင်မြို့နယ်၊ မိုးစဲကျွန်းရှိ ကြက်ရိုးဆိပ်၊ ညောင်ပင်ကြီး စသည့် ကျေးရွာများ ဖြစ်ကြသည်။ ပုဏ္ဏားကျွန်းမြို့နယ်မှ စစ်ဘေးရှောင် ဒေသခံတစ်ဦးက “ဂျက်ဖိုက်တာတွေ ရောက်လာပြီး မွန်းလွဲ ၁ နာရီခွဲ လောက်ကတည်းက တဆက်တည်းကို ဗုံးကြဲတော့တာ။ ပေါက်ကွဲသံတွေက ဆက်တိုက်ကြားနေရတယ်။ ကွမ်း တောင်နဲ့ ပဒေသာဘက်မှာ လယ်ထဲ ဆင်းနေကြတဲ့ ရွာသားတွေလည်း ပါသွားမလားဆိုပြီး အတော်လေး စိုးရိမ် နေရတယ်။ အားလုံးလည်း ဗုံးခိုကျင်းတွေထဲမှာ ပုန်းနေကြရတာ” ဟု ပြောသည်။ ထို့အပြင် ပေါက်တောမြို့နယ်မှ မြစ်အရှေ့ဘက်ကမ်း ဒေသခံတစ်ဦးကလည်း “တိုက်လေယာဉ် ပျံနေတာရော၊ ဗုံးသံတွေပါ ပုဏ္ဏားကျွန်းဘက်ကနေ ဆက်တိုက် ကြားနေရတာ။ အရင်ကထက် ဗုံးကြဲသံတွေ ပိုပြင်းတယ်။ မြို့ နဲ့ နီးတဲ့ရွာတွေကိုပါ ပစ်မှတ်ထား လာကြဲတာဆိုတော့ ဘယ်သူမှ အပြင်မထွက်ရဲကြတော့ဘူး။ ဗုံးခိုကျင်းထဲ အကုန်ဝင်နေရတာ” ဟု ပြောသည်။ ထိုသို့ လေကြောင်းမှ ပြင်းပြင်းထန်ထန် တိုက်ခိုက်သည့်အပြင် စစ်အုပ်စုတပ်သည် ယနေ့ နံနက် ၁၁ နာရီခန့်မှ စ၍ ရခိုင်တောင်ပိုင်း ပင်လယ်ပြင်တွင် တပ်စွဲထားသည့် စစ်သင်္ဘောများပေါ်မှတစ်ဆင့် ဂွမြို့နယ်၊ ကျိန္တလီမြို့နှင့် သံတွဲမြို့နယ် ဂျိတ္တော အနီးပတ်ဝန်းကျင်ရှိ ကျေးရွာများကိုလည်း ရေကြောင်းမှပါ အဆက်မပြတ် ပစ်ခတ် တိုက်ခိုက်ခဲ့သေးသည်။ အဆိုပါ လေကြောင်းနှင့် ရေကြောင်း တိုက်ခိုက်မှုများကြောင့် ထိခိုက်သေဆုံးမှု အခြေအနေကို မသိရသေးဘဲ စစ်အုပ်စုတပ်၏ လက်နက်ကြီး၊ လေကြောင်းနှင့် ရေကြောင်း အန္တရာယ်များကို ပြည်သူများအနေဖြင့် အထူး သတိထားကြရန် အာရက္ခတပ်တော် (AA) က သတိပေး ထုတ်ပြန်ထားသည်။ လက်ရှိတွင် အာရက္ခတပ်တော် (AA) သည် စစ်တွေမြို့နယ် ပတ်လည်ရှိ ရသေ့တောင်၊ ပုဏ္ဏားကျွန်း၊ ပေါက်တော မြို့နယ်များကို သိမ်းပိုက် ထိန်းချုပ်ထားပြီး စစ်တွေမြို့ပေါ်ရှိ စစ်အုပ်စု စခန်းများကို ဝန်းရံ ပိတ်ဆို့ထားသည်။ စစ်အုပ်စုတပ်ကမူ ဆုံးရှုံးသွားသည့် နယ်မြေများကို တန်ပြန်ထိုးစစ်ဆင်ရန်အတွက် ပဲခူး၊ မကွေးနှင့် ဧရာဝတီ တိုင်းတို့မှတစ်ဆင့် စစ်ကြောင်းထိုးရန် ပြင်ဆင်နေသည့်အပြင် လေကြောင်း တိုက်ခိုက်မှုများကိုလည်း ဆက် တိုက် ပြုလုပ်လျက်ရှိသည်။ ဓါတ်ပုံ - (ပုံဟောင်း / Crd) #စစ်တွေ

စစ်တွေနှင့် ပတ်ပတ်လည် ဒေသများကို စစ်တပ် လေကြောင်းမှ မိနစ် ၃၀ အတွင်း အကြိမ် ၃၀ ဗုံးကြဲ

Sep 3

စစ်သင်္ဘောများကို တိုက်ခိုက်ပြီး စစ်သုံ့ပန်း ၁၀၀ ကျော် KIA ဖမ်းဆီး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၃ ရက်။ မန္တလေးမှ ဗန်းမော်သို့ ဧရာဝတီမြစ်ကြောင်းအတိုင်း ဆန်တက်လာသည့် စစ်အုပ်စုတပ် စစ်သင်္ဘောများကို ကချင်လွတ်လပ်ရေး တပ်မတော် KIA နှင့် ပူးပေါင်းတပ်များက ကြားဖြတ်တိုက်ခိုက်ခဲ့ရာ စစ်သင်္ဘောအချို့ နစ်မြုပ်၊ မီးလောင်ပျက်စီးခဲ့ပြီး စစ်သုံ့ပန်း ၁၀၀ ကျော်ကို လက်နက်နှင့်တကွ ဖမ်းဆီးရမိခဲ့သည်။ အဆိုပါ ရေယာဉ်အုပ်စုသည် မန္တလေး ဂေါဝိန်ဆိပ်ကမ်းမှ ဩဂုတ်လ ၂၁ ရက်တွင် ထွက်ခွာလာပြီး ရွှေကူမြို့နယ် ဇင်းဘုံကျေးရွာနှင့် ဗန်းမော်မြို့နယ် စင်းခန်းတံတားအကြား စက်တင်ဘာလ ၂ ရက်၌ ဆန်တက်စဉ် တိုက်ခိုက်ခံ ခဲ့ရခြင်း ဖြစ်သည်။ တိုက်ပွဲအတွင်း စစ်သင်္ဘော ၁ စီး ရေထဲမြုပ်ကာ ၁ စီး မီးလောင်ပျက်စီးခဲ့ပြီး စင်းခန်းတံတားအောက်တွင် အခြား ၁ စီး ထပ်မံ တိုက်ခိုက်ခံခဲ့ရသည်။ ထို့ပြင် ကမ်းစပ်သို့ ကပ်လာသည့် စစ်သင်္ဘော ၂ စီးမှာ အလံဖြူထောင်၍ လက်နက်ချခဲ့သလို လုံခြုံရေးယူပေး သည့် စပိဘုတ် ၂ စီးကိုလည်း ပူးပေါင်းတပ်များက လိုက်လံပစ်ခတ် တိုက်ခိုက်ခဲ့ကြောင်း KIO သတင်းပြန်ကြား ရေးဌာနက ဖော်ပြသည်။ မြေပြင်တွင် ပါဝင်နေသည့် တော်လှန်ရေး ရဲဘော်တစ်ဦးက “ရေထဲမှာ စစ်သားတွေ ရေစီးနဲ့ မျောလာတော့ ကမ်းကို ရအောင်ကူးခဲ့ဖို့ အော်ပြောရတယ်။ မကူးတတ်လို့ ရေအောက် မြုပ်သွားသူတွေလည်း မနည်းလောက် ဘူး” ဟု ပြောသည်။ ဖမ်းဆီးရမိသည့် စစ်သုံ့ပန်း ၁၀၀ ကျော်တွင် စစ်အုပ်စုတပ်ဖွဲ့ဝင်များအပြင် ဗန်းမော်၌ အုပ်ချုပ်ရေးယန္တရား ပြန်လည် လည်ပတ်ရန် လိုက်ပါလာသည့် ဌာနဆိုင်ရာ ဝန်ထမ်းများ၊ ရဲတပ်ဖွဲ့ဝင်များနှင့် တပ်မိသားစုဝင်များ၊ ကလေးသူငယ်များလည်း ပါဝင်သည်။ အဆိုပါ လက်နက်ချသူများကို လေကြောင်းအန္တရာယ်မှ ကင်းဝေးစေရန် KIA ပူးပေါင်းတပ်များက ဘေးကင်းရာ သို့ ရွှေ့ပြောင်း ထိန်းသိမ်းပေးထားသည်။ မြေပြင်တွင် တိုက်ပွဲဝင်နေသည့် ရွှေကူနယ်မြေခံ တော်လှန်ရေး ရဲဘော်တစ်ဦးက “လက်နက်ချလာတဲ့ စစ်သား တွေရော၊ သူတို့နဲ့အတူ ပါလာတဲ့ ဝန်ထမ်းတွေနဲ့ မိသားစုဝင်တွေပါ ပါတာပါ။ အရာရှိတွေလည်းပါတယ်။ စစ် ဆေးနေတုန်းပဲ။ အကုန်လုံးကို ဘေးကင်းနိုင်မယ့် နေရာကို အရင်ရွှေ့ရတာပေါ့။ လေယာဉ်က နေ့တိုင်းလာ ချနေတော့ မလွယ်ဘူး ထိကုန်မှာစိုးရတယ်။ ဖမ်းမိထားတဲ့ စစ်သုံ့ပန်းတွေကို KIA ရဲ့ စစ်ရုံးချုပ်ကနေ တိုက် ရိုက်ကွပ်ကဲပြီး လုံခြုံတဲ့နေရာမှာ ထိန်းသိမ်း စစ်ဆေးသွားမှာပါ” ဟု ပြောသည်။ စစ်အုပ်စုတပ်သည် သင်္ဘောလမ်းကြောင်း ပွင့်ရေးနှင့် စင်းခန်းတံတားကို ထိန်းချုပ်နိုင်ရေးအတွက် ဒုတိယမြစ် ကျဉ်း အရှေ့ဘက်နှင့် အနောက်ဘက် မြစ်ကမ်းဘေးတလျှောက်ကို လေကြောင်းမှ ဗုံး ၂၈ ကြိမ်ထက်မနည်း ကြဲချခဲ့သလို စက်တင်ဘာလ ၃ ရက်တွင်လည်း ဇင်းဘုံကျေးရွာဘက်သို့ မြေပြင်ထိုးစစ်များ ဆက်လက် ပြုလုပ်နေသဖြင့် တိုက်ပွဲများ ဆက်လက် ပြင်းထန်လျက်ရှိသည်။ စစ်အုပ်စုတပ် ထောက်ခံသည့် တယ်လီဂရမ်ချန်နယ်များ၌မူ ဖမ်းဆီးခံရသူများသည် စစ်တပ်ဖွဲ့ဝင်များ မဟုတ်ဘဲ ရွှေမျောလုပ်ငန်းမှ အရပ်သားများသာ ဖြစ်ကြောင်း ပြန်လည် ဝါဒဖြန့် ဖုံးကွယ်ပြောဆိုလျက်ရှိသည်။ KIA ၏ စစ်ရေးသတင်းများအရ ၂၀၂၅ ခုနှစ်တွင် ဗန်းမော်စစ်မျက်နှာသို့ စစ်ကူ ရိက္ခာပို့သည့် စစ်အုပ်စုတပ်၏ စစ်သင်္ဘော ၅ စီးကို ဖျက်ဆီးနိုင်ခဲ့သော်လည်း ယခု ၂၀၂၆ ခုနှစ်တွင်မူ စစ်အုပ်စုတပ် စစ်သင်္ဘော ၉ စီးအထိ ပစ်ခတ်ဖျက်ဆီးနိုင်ခဲ့ကြောင်း သိရသည်။ #KIA #စစ်သုံ့ပန်း

စစ်သင်္ဘောများကို တိုက်ခိုက်ပြီး စစ်သုံ့ပန်း ၁၀၀ ကျော် KIA ဖမ်းဆီး

« Prev 1 … 20 21 22 23 24 … 1,148 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

အင်ဒိုနီးရှားအကျဉ်းထောင်မှ ဇိမ်ခံအဆောင်များကို အာဏာပိုင်များ စတင်ဖြိုဖျက် — October 2, 2026 5:33 pm
ယူကရိန်းနှင့် ရုရှားတို့ ဗျူဟာမြောက် ဒရုန်းအသစ်များ တိုးမြှင့် အသုံးပြုလာ — October 2, 2026 5:30 pm
အမေရိကန်၌ ဆေးထိုးကွပ်မျက်ရန် နှစ်ကြိမ်ကြိုးစားသော်လည်း မအောင်မြင် — October 2, 2026 5:29 pm

Recent Posts

အင်ဒိုနီးရှားအကျဉ်းထောင်မှ ဇိမ်ခံအဆောင်များကို အာဏာပိုင်များ စတင်ဖြိုဖျက်
ယူကရိန်းနှင့် ရုရှားတို့ ဗျူဟာမြောက် ဒရုန်းအသစ်များ တိုးမြှင့် အသုံးပြုလာ
အမေရိကန်၌ ဆေးထိုးကွပ်မျက်ရန် နှစ်ကြိမ်ကြိုးစားသော်လည်း မအောင်မြင်
တရုတ်က ရေနံ တင်ပို့မှု ရပ်ဆိုင်းလိုက်ပြီး ရေနံဈေးများ ပြန်တက်
ကချင်နှင့် ရှမ်း-ကချင်အစပ် မြို့နယ် ၆ ခုတွင် KIA နှင့် စစ်အုပ်စုတပ်တို့ တိုက်ပွဲများ ဆက်လက်ပြင်းထန်

Archives

Archives

×Close