NMG Doh – Page 34 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Author Archive

NMG Doh

Author: NMG Doh

May 18

အီရန်က UAE နျူကလီးယားစက်ရုံကို ဒရုန်းဖြင့် တိုက်ခိုက် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မေလ ၁၈ ရက်။ ယူအေအီး (အာရပ်စော်ဘွားများပြည်ထောင်စု) နိုင်ငံ၊ အဘူဒါဘီမြို့ရှိ "ဘာရာကာ" (Barakah) နျူကလီးယားလျှပ်စစ်ဓာတ်အားပေးစက်ရုံအနီးတွင် ဒရုန်းဖြင့် တိုက်ခိုက်ခံခဲ့ရသဖြင့် စက်ရုံအပြင်ဘက်ဝန်းကျင်ရှိ လျှပ်စစ်မီးစက်တစ်ခု မီးလောင်မှုဖြစ်ပွားခဲ့ကြောင်း ယူအေအီးအာဏာပိုင်များက သတင်းထုတ်ပြန်သည်။ ယူအေအီးအစိုးရက ယခုဖြစ်စဉ်သည် နိုင်ငံတကာဥပဒေကို ပြောင်ပြောင်တင်းတင်း ချိုးဖောက်သည့် ရန်စမှုဖြစ်ကြောင်း ပြစ်တင်ရှုတ်ချခဲ့ပြီး မိမိတို့နိုင်ငံအနေဖြင့် ပြန်လည်တုံ့ပြန်ပိုင်ခွင့်ရှိကြောင်း သတိပေးလိုက်သည်။ တိုက်ခိုက်မှုကြောင့် လူထိခိုက်ဒဏ်ရာရရှိမှုနှင့် နျူကလီးယားဓာတ်ရောင်ခြည် ယိုစိမ့်မှုတစ်စုံတစ်ရာ မရှိဘဲ နျူကလီးယားစက်ရုံမှာ ပုံမှန်အတိုင်း ဆက်လက်လည်ပတ်လျက်ရှိသည်ဟု ဆိုသည်။ ကုလသမဂ္ဂ နျူကလီးယားစောင့်ကြည့်ရေးအဖွဲ့ (IAEA) ကလည်း ယခုဖြစ်စဉ်အပေါ် အထူးစိုးရိမ်ပူပန်ကြောင်း ထုတ်ပြန်ခဲ့ပြီး သက်ဆိုင်ရာအဖွဲ့အစည်းများအနေဖြင့် စစ်ရေးအရ အမြင့်ဆုံး ထိန်းထိန်းသိမ်းသိမ်း ဆောင်ရွက်ကြရန် တောင်းဆိုထားသည်။ ယခုပဋိပက္ခ၏ ဂယက်သည် မကြာသေးမီက အိန္ဒိယနိုင်ငံ နယူးဒေလီမြို့၌ ကျင်းပခဲ့သည့် BRICS နိုင်ငံခြားရေးဝန်ကြီးများ အစည်းအဝေးသို့အထိ ရိုက်ခတ်ခဲ့ပြီး ထိပ်တိုက်တွေ့ဆုံမှုများ ဖြစ်ပွားခဲ့သည်။ အဆိုပါ အစည်းအဝေးအတွင်း အီရန်နိုင်ငံဘက်က UAE သည် အမေရိကန်၊ အစ္စရေးတို့နှင့် စစ်ရေးအရ ပူးပေါင်းကာ ဒေသတွင်းစစ်ပွဲတွင် ပါဝင်ပတ်သက်နေကြောင်း စွပ်စွဲခဲ့သည်။ သို့သော် UAE ဘက်ကလည်း စစ်ပွဲစတင်ကတည်းက အီရန်သည် ၎င်းတို့နိုင်ငံအတွင်းသို့ ဒရုန်းနှင့် ဒုံးကျည်အစင်းရေ ၃,၀၀0 ကျော်ဖြင့် အကြမ်းဖက်တိုက်ခိုက်ခဲ့ကြောင်း ပြန်လည်ချေပခဲ့သည်။ ထိုသို့ နှစ်ဦးနှစ်ဖက် သဘောထား တင်းမာလွန်းခဲ့ခြင်းကြောင့် ယခုအကြိမ် BRICS အစည်းအဝေးတွင် ပူးတွဲကြေညာချက်ပင် ထုတ်ပြန်နိုင်ခြင်းမရှိဘဲ ပျက်ပြယ်ခဲ့ရသည်။ လက်ရှိတွင် အမေရိကန်နှင့် အီရန်တို့အကြား ပြီးခဲ့သည့် ဧပြီလက ရရှိခဲ့သည့် အပစ်အခတ်ရပ်စဲရေး သဘောတူညီချက်သည် ဟိုတစ်စဒီတစ်စ အပြန်အလှန် ပစ်ခတ်မှုများကြောင့် "အသက်ရှူစက် တပ်ထားရသလို အလွန်စိုးရိမ်ရသည့် အခြေအနေ" တွင် ရှိနေကြောင်း အမေရိကန်သမ္မတ ဒေါ်နယ်ထရန့်က မှတ်ချက်ပြု ပြောကြားထားသည်။ Iranwar #UAE #Barakah

အီရန်က UAE နျူကလီးယားစက်ရုံကို ဒရုန်းဖြင့် တိုက်ခိုက်

May 14

ဒေါ်နယ်ထရန့်ကို ရှီကျင့်ဖျင် ကော်ဇောနီဖြင့် ကြိုဆို သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မေလ ၁၄ ရက်။ ကမ္ဘာ့အင်အားကြီးနှစ်နိုင်ငံဖြစ်သည့် တရုတ်ပြည်သူ့သမ္မတနိုင်ငံနှင့် အမေရိကန်ပြည်ထောင်စုတို့မှ ထိပ်သီးခေါင်းဆောင်နှစ်ဦးသည် ယနေ့တွင် ပေကျင်းမြို့ရှိ ပြည်သူ့ခမ်းမဆောင်ကြီးရှေ့၌ တွေ့ဆုံခဲ့ကြသည်။ တရုတ်သမ္မတ ရှီကျင့်ဖျင်သည် အမေရိကန်သမ္မတ ဒေါ်နယ်ထရမ့်အား ကော်ဇော်နီခင်း၍ ခမ်းနားထည်ဝါစွာ ကြိုဆိုခဲ့သည်။ အဆိုပါအခမ်းအနားတွင် စစ်ရေးပြအခမ်းအနားများနှင့် ကလေးငယ်များ၏ ကြိုဆိုနှုတ်ဆက်မှုများ ထည့်သွင်းကျင်းပခဲ့သည်။ တွေ့ဆုံဆွေးနွေးပွဲမစတင်မီ သမ္မတရှီကျင့်ဖျင်က နှစ်နိုင်ငံအကြား ပြိုင်ဘက်များအဖြစ် ရှုမြင်ခြင်းထက် မိတ်ဖက်များအဖြစ် လက်တွဲဆောင်ရွက်သွားရန် တိုက်တွန်းပြောကြားခဲ့သည်။ အလားတူ သမ္မတဒေါ်နယ်ထရမ့်ကလည်း သမ္မတရှီကျင့်ဖျင်အား ခေါင်းဆောင်ကောင်းတစ်ဦးအဖြစ် ချီးကျူးစကားဆိုခဲ့ပြီး ၎င်းနှင့် မိတ်ဆွေဖြစ်ရသည်ကို ဂုဏ်ယူကြောင်းနှင့် နှစ်နိုင်ငံဆက်ဆံရေးမှာ ယခင်ကထက် ပိုမိုခိုင်မာလာမည်ဖြစ်ကြောင်း တုံ့ပြန်ပြောကြားခဲ့သည်။ အဆိုပါခရီးစဉ်တွင် သမ္မတထရမ့်နှင့်အတူ Tesla အမှုဆောင်အရာရှိချုပ် အီလွန်မတ်စ်နှင့် Nvidia အမှုဆောင်အရာရှိချုပ် ဂျန်ဆင်ဟွမ်တို့ကဲ့သို့သော နည်းပညာထိပ်သီးလုပ်ငန်းရှင်များလည်း လိုက်ပါလာကြသည်။ အမေရိကန်ဘဏ္ဍာရေးဝန်ကြီးသည် အင်္ဂါနေ့က ဂျပန်နိုင်ငံတွင် ဝန်ကြီးချုပ် စနိုင်းတာကာအိချီနှင့် တွေ့ဆုံခဲ့ပြီး မနေ့က တောင်ကိုရီးယားနိုင်ငံတွင် တရုတ်ဒုသမ္မတဦးဆောင်သောအဖွဲ့နှင့် တွေ့ဆုံဆွေးနွေးခဲ့သည်။ သမ္မတထရမ့်သည် အမေရိကန်စက်မှုလုပ်ငန်းများအတွက် တရုတ်ဈေးကွက်သို့ ပိုမိုဝင်ရောက်ခွင့်ရရှိရန် တောင်းဆိုသွားမည်ဖြစ်ပြီး နှစ်နိုင်ငံကုန်သွယ်ရေးအဖွဲ့များကြား အပြုသဘောဆောင်သည့် ရလဒ်များ ထွက်ပေါ်နေကြောင်း တရုတ်အစိုးရပိုင်မီဒီယာများက ဖော်ပြသည်။ သို့သော်လည်း ဆွေးနွေးပွဲတွင် အခွန်တိုးမြှင့်မှု၊ နည်းပညာယှဉ်ပြိုင်မှု၊ အီရန်စစ်ပွဲနှင့် ထိုင်ဝမ်အရေးကဲ့သို့သော ထိရှလွယ်သည့် ကိစ္စရပ်များကိုလည်း ထည့်သွင်းဆွေးနွေးရန် ရှိနေသည်။ သမ္မတထရမ့်သည် ၂၀၁၇ ခုနှစ်နောက်ပိုင်း ပထမဆုံးအကြိမ် တရုတ်နိုင်ငံသို့ လာရောက်ခြင်းဖြစ်သည်။ ခေါင်းဆောင်နှစ်ဦးသည် ယနေ့ညနေပိုင်းတွင် ကျင်းပမည့် နိုင်ငံတော်ဧည့်ခံပွဲ အခမ်းအနားသို့ ဆက်လက်တက်ရောက်မည်ဖြစ်သည်။

ဒေါ်နယ်ထရန့်ကို ရှီကျင့်ဖျင် ကော်ဇောနီဖြင့် ကြိုဆို

May 14

ထိုင်းနိုင်ငံတွင် အရက် သောက်သုံးရောင်းချမှု အပေါ် ထပ်မံတင်းကြပ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မေလ ၁၄ ရက်။ ထိုင်းနိုင်ငံအတွင်း အများပြည်သူနှင့်သက်ဆိုင်သော နေရာများ၌ အရက်၊ ဘီယာ ရောင်းချခြင်းနှင့် သောက်သုံးခြင်းကို တားမြစ်သည့် စည်းမျဉ်းအသစ် (၈) ချက်ကို အစိုးရက ထုတ်ပြန်လိုက်ကြောင်း ဘန်ကောက်ပို့စ်သတင်းစာတွင် ဖော်ပြထားသည်။ မေလ ၁၂ ရက်နေ့တွင် ထုတ်ပြန်ခဲ့သည့် အဆိုပါစည်းမျဉ်းများတွင် ရောင်းချခြင်းသာမက သောက်သုံးခြင်းကိုပါ ပိတ်ပင်ထားခြင်းဖြစ်သည်။ တားမြစ်ချက်များတွင် အောက်ပါအချက်များ ပါဝင်သည် - • လမ်းမပေါ်၊ မော်တော်ယာဉ်ပေါ် သို့မဟုတ် လမ်းဘေးတွင် ရပ်ထားသော ယာဉ်ပေါ်တွင် ရောင်းချခြင်း မပြုရ။ • မီးရထားဘူတာရုံနှင့် ရထားပေါ်တွင် ရောင်းချခြင်း မပြုရ။ (ဘန်ကောက်ဘူတာကြီးရှိ လေအေးပေးစက်ပါ ခမ်းမအတွင်း ကျင်းပသော အထူးပွဲလမ်းများမှအပ) • အများပြည်သူသုံး ဆိပ်ကမ်းနှင့် ကူးတို့သင်္ဘောဆိပ်များတွင် ရောင်းချခြင်း၊ သောက်သုံးခြင်း မပြုရ။ • တစ်နိုင်ငံလုံးရှိ ခရီးသည်တင်ယာဉ် လိုင်းကားဂိတ်များတွင် ရောင်းချခြင်း၊ သောက်သုံးခြင်း မပြုရ။ • အရက်ချက်စက်ရုံများ၏ ထုတ်လုပ်မှုလုပ်ငန်းစဉ်အရ မြည်းစမ်းခြင်းမှလွဲ၍ စက်ရုံဝင်းအတွင်း ရောင်းချခြင်း၊ သောက်သုံးခြင်း မပြုရ။ • အစိုးရဌာနဆိုင်ရာ အဆောက်အအုံနှင့် နိုင်ငံပိုင်လုပ်ငန်းနယ်မြေများတွင် ရောင်းချခြင်း၊ သောက်သုံးခြင်း မပြုရ။ (ဝန်ထမ်းအိမ်ရာ၊ ကလပ်များနှင့် သတ်မှတ်ထားသော ရိုးရာဧည့်ခံပွဲနေရာများမှအပ) • အစိုးရဌာန သို့မဟုတ် နိုင်ငံပိုင်လုပ်ငန်းပိုင် အများပြည်သူအပန်းဖြေပန်းခြံများတွင် ရောင်းချခြင်း၊ သောက်သုံးခြင်း မပြုရ။ • နိုင်ငံပိုင်စီးပွားရေးလုပ်ငန်းများ၏ ရုံးဝင်းအတွင်း ရောင်းချခြင်း၊ သောက်သုံးခြင်း မပြုရ။ အဆိုပါစည်းမျဉ်းများသည် ထုတ်ပြန်သည့်နေ့မှစ၍ ချက်ချင်းအသက်ဝင်မည်ဖြစ်သဖြင့် ခရီးသွားလာသူများနှင့် ဒေသခံများအနေဖြင့် အထူးသတိပြုလိုက်နာရန် တိုက်တွန်းထားပါသည်။ အကျဉ်းချုပ်အားဖြင့် ခရီးသွားလာမှုနယ်မြေများ၊ အများပြည်သူဆိုင်ရာနေရာများနှင့် အစိုးရပိုင်နေရာများတွင် ကန့်သတ်ထားခြင်း ဖြစ်သည်။

ထိုင်းနိုင်ငံတွင် အရက် သောက်သုံးရောင်းချမှု အပေါ် ထပ်မံတင်းကြပ်

May 14

ဖိလစ်ပိုင် လွှတ်တော်အတွင်းမှ ပစ်ခတ်သံများ ကြားရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မေလ ၁၄ ရက်။ ဖိလစ်ပိုင်နိုင်ငံ မနီလာမြို့ရှိ အထက်လွှတ်တော်အဆောက်အအုံအတွင်း ဗုဒ္ဓဟူးနေ့ညနေပိုင်းက သေနတ်သံများ ထွက်ပေါ်ခဲ့မှုကြောင့် လွှတ်တော်တစ်ခုလုံးကို ပိတ်ဆို့ (Lockdown) ထားလိုက်ရသည်။ အဆိုပါအဆောက်အအုံအတွင်း၌ နိုင်ငံတကာရာဇဝတ်ခုံရုံး (ICC) က ဖမ်းဝရမ်းထုတ်ပြန်ထားသည့် အထက်လွှတ်တော်အမတ် ရော်နယ်ဒယ်လာရိုဆာ (Ronald Dela Rosa) ခိုလှုံနေခြင်းဖြစ်သည်။ ပစ်ခတ်မှုအတွင်း ထိခိုက်ဒဏ်ရာရရှိသူမရှိကြောင်း တာဝန်ရှိသူများက အတည်ပြုသော်လည်း ပစ်ခတ်သူနှင့် အကြောင်းရင်းကိုမူ စုံစမ်းစစ်ဆေးဆဲဖြစ်သည်။ ပြည်ထဲရေးဝန်ကြီးက ၎င်းတို့အနေဖြင့် ရဲချုပ်ဟောင်းဖြစ်သူ အမတ်ဒယ်လာရိုဆာအား ဖမ်းဆီးရန်မဟုတ်ဘဲ အကာအကွယ်ပေးရန် ရောက်ရှိနေခြင်းဖြစ်ကြောင်းနှင့် လွှတ်တော်အမတ်များအားလုံး ဘေးကင်းစေရန် သမ္မတက ညွှန်ကြားထားကြောင်း ပြောကြားခဲ့သည်။ အမတ်ဒယ်လာရိုဆာသည် သမ္မတဟောင်းဒူတာတေး လက်ထက် ရဲချုပ်အဖြစ် တာဝန်ယူစဉ် "မူးယစ်ဆေးဝါးတိုက်ဖျက်ရေးစစ်ပွဲ" အတွင်း လူပေါင်းထောင်ချီ သတ်ဖြတ်ခံရမှုတွင် ပါဝင်ပတ်သက်နေသည်ဟု ICC က စွပ်စွဲထားသည်။ ICC သည် သမ္မတဟောင်းဒူတာတေးကို ၂၀၂၅ ခုနှစ် မတ်လကတည်းက နယ်သာလန်နိုင်ငံ သည်ဟိဂ်မြို့တွင် ဖမ်းဆီးထိန်းသိမ်းထားပြီးဖြစ်သည်။ ဖိလစ်ပိုင်အစိုးရက ၎င်းတို့သည် ICC အဖွဲ့ဝင်အဖြစ်မှ နုတ်ထွက်ထားသဖြင့် စစ်ဆေးပိုင်ခွင့်မရှိဟု ငြင်းဆိုထားသော်လည်း ICC ကမူ အဆိုပါရာဇဝတ်မှုများသည် ဖိလစ်ပိုင်နိုင်ငံ အဖွဲ့ဝင်ဖြစ်နေသည့် ၂၀၁၁ ခုနှစ်မှ ၂၀၁၉ ခုနှစ်အတွင်း ဖြစ်ပွားခဲ့ခြင်းကြောင့် တရားစီရင်ပိုင်ခွင့်ရှိကြောင်း ဆုံးဖြတ်ထားသည်။ လက်ရှိတွင် လွှတ်တော်အပြင်ဘက်၌ ဆန္ဒပြမှုများရှိနေပြီး အဆောက်အအုံအတွင်း စစ်ဘက်နှင့် ရဲတပ်ဖွဲ့ဝင်များက လုံခြုံရေးရယူထားသည်။

ဖိလစ်ပိုင် လွှတ်တော်အတွင်းမှ ပစ်ခတ်သံများ ကြားရ

May 14

ရွှေဆိုင်ပိုင်ရှင်ကို ပစ်သတ်ပြီး ရွှေ ၃ ပိဿာ လုယူသူများ လွတ်မြောက်နေ   သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မေလ ၁၄ ရက်။ ရှမ်းပြည်အရှေ့ပိုင်း၊ ကျိုင်းတုံမြို့ပေါ်တွင် နေ့ခင်းကြောင်တောင် ရွှေဆိုင်ပိုင်ရှင်တစ်ဦး သေနတ်ဖြင့် ပစ်သတ်ခံ ရပြီး ရွှေ ၃ ပိဿာနှင့် မော်တော်ယာဉ်ပါ ဓားပြတိုက်လုယူခံရသည့် ဖြစ်စဉ်တစ်ခု ဖြစ်ပွားခဲ့ကာ ကျူးလွန်သူ တရားခံ ၃ ဦးမှာ ယနေ့အထိ ထွက်ပြေးလွတ်မြောက်နေဆဲဖြစ်သည်။ ဖြစ်စဉ်မှာ ကျိုင်းတုံမြို့မဈေးကြီးတွင် 'ခေမာရဋ်' ရွှေဆိုင်ဖွင့်လှစ်ထားသည့် အသက် ၄၀ အရွယ် ဆိုင်ပိုင်ရှင် ဦးစိုင်းယီသည် မိသားစုဝင် ၃ ဦးနှင့်အတူ ၎င်းတို့၏ နေအိမ်ရှိရာ ရပ်ကွက် (၃)၊ နောင်ခိုက်ရပ်ကွက်၊ ကျိုင်းငန်း ဝပ်အင်းလမ်းသို့ မော်တော်ယာဉ်ဖြင့် ပြန်လာစဉ် ပြီးခဲ့သည့် မေလ ၁၃ ရက်နေ့ မွန်းလွဲ ၁ နာရီခွဲခန့်တွင် အခင်း ဖြစ်ပွားခဲ့ခြင်း ဖြစ်သည်။ နေအိမ်အနီးသို့ ရောက်ရှိစဉ် အမည်မသိ အမျိုးသား ၃ ဦးက PAJERO IO အမျိုးအစား မော်တော်ယာဉ် တစ်စီးဖြင့် ရောက်ရှိလာပြီး ဆိုင်ပိုင်ရှင်ကို သေနတ်ဖြင့် ၂ ချက် ပစ်ခတ်ခဲ့ခြင်း ဖြစ်သည်။ သေဆုံးသူနှင့် နီးစပ်သူတစ်ဦးက “လူမှုရေးအရှုပ်အရှင်း ဘာညာတော့ မကြားမိပါဘူး။ အေးအေးလူလူထဲကပဲ။ ရန်ငြိုးလည်း မရှိပါဘူး။ ခုတောင် အံ့အားသင့်နေကြတာ။ ပစ္စည်းလိုချင်လို့ လုပ်တာပဲ ဖြစ်မှာပါ။ ကျိုင်းတုံမှာ က ဒါတွေ မဆန်းတော့ပါဘူး။” ဟူ ပြောသည်။ ကျူးလွန်သူများသည် သေနတ်ဖြင့် ပစ်ခတ်ပြီးနောက် ကားပေါ်တွင် ပါလာသည့် ကျန်မိသားစုဝင် ၂ ဦးကိုပါ လမ်းပေါ်သို့ ကန်ချကာ ကားအတွင်းပါရှိသည့် ရွှေ ၃ ပိဿာခန့်နှင့်အတူ ၎င်းတို့ စီးနင်းလာသည့် မော်တော် ယာဉ်ကိုပါ လုယူမောင်းနှင် ထွက်ပြေးသွားခဲ့ကြခြင်း ဖြစ်သည်။ သေနတ်ဖြင့် အနီးကပ်ပစ်ခတ်ခံရသည့် ဆိုင်ပိုင်ရှင် ဦးစိုင်းယီမှာ အခင်းဖြစ်နေရာ၌ပင် ပွဲချင်းပြီး သေဆုံး သွားခဲ့သည်။ ကျိုင်းတုံမြို့ခံတစ်ဦးကလည်း “ဓားပြတိုက်တာတော့ ခဏခဏပဲ။ သေတာတို့ သတ်သွားတာတို့ သိပ်မဖြစ်ဘူး။ မကြားတာ တော်တော်ကြာပြီ။ ဒီမှာက အဖွဲ့အစည်းများတော့ တစ်ခုခုဆို ပြောရခက်တယ်။ ဖြစ်ရင်လည်း စစ်တပ်က ကိုင်တာမဟုတ်တော့ တိုင်လို့တောလို့ သိပ်မထူးဘူး” ဟု ပြောသည်။ ကျိုင်းတုံမြို့သည် စစ်တပ်က မြို့ပြလုံခြုံရေးကို ထိန်းချုပ်ရန် ရုန်းကန်နေရသည့်အလျောက် ဒေသတွင်း အုပ်ချုပ်ရေးပိုင်းများတွင် စစ်တပ်အရာရှိများနှင့်အတူ ပြည်သူ့စစ် (ဌာနေ) အဖွဲ့ဝင်များကိုပါ တွဲဖက်ခန့်အပ် တာဝန်ပေးထားသည်။ သို့သော်လည်း မြို့ပေါ်နေရာအနှံ့အပြား၌ ခိုးဆိုးလုယက်မှုများနှင့် ရာဇဝတ်မှုပေါင်းစုံ မကြာခဏ ဆိုသလို ဖြစ်ပွားနေသည်ဟု ဒေသခံများက ပြောသည်။ ပြီးခဲ့သည့် မေလ ၁၂ ရက်နေ့ကလည်း ကျိုင်းတုံမြို့မဈေးအနီး၊ နားဟွေ့ရွာ၊ သစ်တောရုံးရှေ့ BOC လမ်းတွင် လမ်းလျှောက်လာသည့် ဒေသခံ ၂ ဦးကို အမည်မသိ လူ ၄ ဦးက ရှေ့နှင့်နောက် ညှပ်ပိတ်ရပ်ကာ ပိုက်ဆံအိတ်နှင့် လက်ကိုင်ဖုန်းကို ဓားပြတိုက်လုယူသွားသည့် ဖြစ်စဉ်တစ်ခုလည်း ဖြစ်ပွားခဲ့သေးသည်။ စစ်အာဏာသိမ်းပြီးနောက်ပိုင်း ကျိုင်းတုံမြို့ပေါ်တွင် ဖြစ်ပွားခဲ့သည့် ရာဇဝတ်မှုအများစုမှာ တရားခံ ပေါ်ပေါက် ခြင်းနှင့် ဖမ်းဆီးရမိခြင်း မရှိသလောက် နည်းပါးသည့်အပြင်၊ ဖမ်းဆီးရမိသည့် တရားခံအနည်းစုကိုလည်း စစ်တပ်၏ ရဲစခန်းများက ထိရောက်စွာ အရေးယူနိုင်ခြင်း မရှိကြောင်း ရဲတပ်ဖွဲ့နှင့် နီးစပ်သည့် သတင်းရင်း မြစ်များက ပြောသည်။ #ကျိုင်းတုံမြို့

ရွှေဆိုင်ပိုင်ရှင်ကို ပစ်သတ်ပြီး ရွှေ ၃ ပိဿာ လုယူသူများ လွတ်မြောက်နေ 

May 14

ရွာငံမြို့မရဲစခန်းမှ သက်ငယ်မုဒိန်းမှုတရားခံ လက်ထိပ်ခတ်လျက် ထွက်ပြေးလွတ်မြောက်   သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မေလ ၁၄ ရက်။ ရှမ်းပြည်တောင်ပိုင်း၊ ရွာငံမြို့မရဲစခန်းတွင် သက်ငယ်မုဒိန်းမှုဖြင့် ဖမ်းဆီးစစ်ဆေးခံနေရသည့် တရားခံတစ်ဦး သည် ရဲတပ်ဖွဲ့ဝင်များ၏ ပေါ့ဆမှုကြောင့် လက်ထိပ်ခတ်လျက်အတိုင်း စခန်းအတွင်းမှ ထွက်ပြေး လွတ်မြောက် သွားသဖြင့် ၎င်းအား ပြန်လည်ဖမ်းဆီးနိုင်ရေးအတွက် လိုက်လံရှာဖွေနေရဆဲဖြစ်ကြောင်း နစ်နာသူမိသားစုနှင့် အမှုလိုက်ပါဆောင်ရွက်ပေးနေသူများက ပြောသည်။ ဖြစ်စဉ်မှာ ရွာငံမြို့နယ်၊ တပင်ပျော်ကျေးရွာတွင် ပြီးခဲ့သည့် မေလ ၇ ရက်နေ့က အသက် ၁၄ နှစ်အရွယ် အမျိုး သမီးငယ် တစ်ဦးအား တစ်ရွာတည်းသားဖြစ်သူ အသက် ၄၀ အရွယ် မောင်တူးဆိုသူက ရိုက်နှက် အဓမ္မပြုကျင့် ခဲ့ခြင်း ဖြစ်သည်။ အဆိုပါကျူးလွန်သူကို မေလ ၉ ရက်နေ့တွင် ရဲတပ်ဖွဲ့က ဖမ်းဆီးရမိခဲ့သော်လည်း စခန်း၌ စစ်ချက်ယူနေစဉ် အတွင်း ထွက်ပြေးလွတ်မြောက်သွားခဲ့ခြင်း ဖြစ်သည်။ နစ်နာသူနှင့် နီးစပ်သူတစ်ဦးက “ရဲတွေစစ်ပြီးတော့ ဆရာမတွေ စစ်ခါနီးအချိန် ပြေးသွားတာ။ သူတို့ တစ်ညလုံး ဝိုင်းရှာကြတာပဲ။ တွေ့မှမတွေ့တာ။ မိသားစုဝင်ဖက်ကတော့ ရဲကိုပဲ အပစ်တင်နေကြတယ်။ ရဲကလည်း တော်တော်ပေါ့ဆတာ။ ဂိတ်တွေပိတ်ခိုင်းထားတယ်လို့ ပြောတယ်” ဟု ပြောသည်။ လက်ရှိတွင် အဆိုပါ ထွက်ပြေးလွတ်မြောက်နေသူ မောင်တူးကို ရွာငံမြို့မရဲစခန်းတွင် (ပ)၆၇/ ၂၀၂၆၊ ရာဇသတ် ကြီး ဥပဒေပုဒ်မ ၃၂၃ (နာကျင်အောင်ပြုလုပ်မှု) ၊ ပုဒ်မ ၃၇၆ (မုဒိန်းမှု) တို့ဖြင့် အမှုဖွင့်လှစ်ထားကြောင်း အမှု လိုက်ပါဆောင်ရွက်နေသူများက အတည်ပြုသည်။ တစ်ဖက်တွင်လည်း အသက်မပြည့်သေးဘဲ အဓမ္မပြုကျင့်ခံခဲ့ရသည့် အမျိုးသမီးငယ်မှာ ရိုက်နှက်ခံရသည့် ဒဏ်ရာများ သက်သာလာသော်လည်း ပတ်ဝန်းကျင်၏ ရှုံ့ချမှုများကြောင့် စိတ်ပိုင်းဆိုင်ရာ ပြင်းထန်စွာ ထိခိုက် ဒဏ်ရာရရှိနေပြီး စိတ်ပိုင်းဆိုင်ရာ ပြန်လည်ကုစားခြင်း (Counseling) ဆောင်ရွက်ပေးမည့် အဖွဲ့အစည်းများ အရေးပေါ်လိုအပ်နေကြောင်း ဆိုသည်။ အမှုလိုက်ပါဆောင်ရွက်ပေးနေသည့် လူမှုရေးတက်ကြွလှုပ်ရှားသူတစ်ဦးက နစ်နာသူ၏ လက်ရှိအခြေအနေကို ယခုကဲ့သို့ ရှင်းပြသည်။ “အရိုက်ခံရတဲ့ ဒဏ်ရာပြောရမလား အညိုအမဲစွဲတာတွေတော့ ပျောက်သွားပြီ။ စိတ်ကတော့ လုံးဝမရသေး ဘူး။ တော်တော်အချိန်ယူရဦးမှာ။ လောလောဆယ်တော့ မီဒီယာတွေ မဖြေနိုင်လောက်သေးဘူး။” စစ်အာဏာသိမ်းပြီးနောက်ပိုင်း ရွာငံမြို့နယ်အတွင်း ဓနုအမျိုးသားလွတ်မြောက်ရေးတပ်မတော် (DPLA)၊ ဓနု ပြည်နယ် အမျိုးသား ကာကွယ်ရေးတပ်ဦး (DSNA) ကဲ့သို့သော တော်လှန်ရေးအဖွဲ့များသာမက စစ်တပ်နှင့် ၎င်းတို့လက်အောက်ခံ ပအိုဝ်းပြည်သူ့စစ် (PNA)၊ ပျူစောထီအဖွဲ့များအပြင် RCSS နှင့် SSPP တို့ပါ ရံဖန်ရံခါ လှုပ်ရှားသွားလာလျက်ရှိသည်။ အဆိုပါ နယ်မြေမတည်ငြိမ်မှုနှင့် ရှုပ်ထွေးသည့် စစ်ရေးအခင်းအကျင်းကို အခွင့်ကောင်းယူကာ အပြန်အလှန် လုပ်ကြံသတ်ဖြတ်မှုများနှင့် ပြန်ပေးဆွဲမှုများ နေ့စဉ်နှင့်အမျှ ဖြစ်ပွားနေသည့် ရွာငံဒေသတွင် ယခုကဲ့သို့ အဆိုးရွားဆုံး လူမှုရေးရာရာဇဝတ်မှု ကျူးလွန်သူပါ စနစ်တကျ ထိန်းသိမ်းနိုင်ခြင်းမရှိဘဲ လွတ်မြောက်သွားခြင်း အပေါ် ဒေသခံများအကြား တရားဥပဒေစိုးမိုးရေးအတွက် ပိုမိုစိုးရိမ်ပူပန်နေကြသည်။ #သက်ငယ်မုဒိမ်း #ရွာငံ

ရွာငံမြို့မရဲစခန်းမှ သက်ငယ်မုဒိန်းမှုတရားခံ လက်ထိပ်ခတ်လျက် ထွက်ပြေးလွတ်မြောက် 

May 14

ကချင်ပြည်သို့ ကုန်းလမ်းပေါက်ရန် စစ်တပ် အင်အားအလုံးအရင်းဖြင့် စစ်ကြောင်းထိုး   သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မေလ ၁၄ ရက်။ ရှမ်းပြည်မြောက်ပိုင်း မိုးမိတ်မြို့နယ်မှတစ်ဆင့် မဘိမ်း-ငါးအိုးဘက်သို့ စစ်ကြောင်းထိုးကာ ကချင်ပြည်အတွင်းသို့ ကုန်းလမ်းဖြင့် ဝင်ရောက်နိုင်ရန် စစ်တပ်က အင်အားအလုံးအရင်းဖြင့် စစ်ရေးပြင်ဆင်နေမှုကြောင့် နှစ်ဖက် စစ်ရေး တင်းမာမှုနှင့် တိုက်ပွဲများ ပိုမိုပြင်းထန်လာနေသည်ဟု တော်လှန်ရေးပူးပေါင်းတပ်ဖွဲ့များက ပြောသည်။ ပြီးခဲ့သည့် မေလဆန်းပိုင်းမှ စတင်ကာ မန္တလေးမြို့ဘက်မှ မိုးမိတ်မြို့ဘက်သို့ စစ်တပ်၏ စစ်ကားယာဉ်တန်းများ အင်အားအလုံးအရင်းဖြင့် ဆက်တိုက်တက်လာခဲ့ခြင်းဖြစ်ပြီး၊ လက်ရှိတွင် စစ်တပ်က မိုးမိတ်နှင့် မဘိမ်းမြို့ ကြား ရှိ ကျေးရွာများမှ ဒေသခံ ပြည်သူများကို နေအိမ်များမှ အတင်းအဓမ္မ ထပ်မံရွှေ့ပြောင်းခိုင်းထားကြောင်း ဆို သည်။ စစ်တပ်သည် မိုးမိတ်မှ မဘိမ်း-ငါးအိုး လမ်းကြောင်းအတိုင်း ကချင်ပြည်အတွင်းသို့ မြေပြင်စစ်ကြောင်း ပေါက် ထွက်နိုင်ရန် စစ်ရေးဗျူဟာချ၍ ထိုးစစ်ဆင်ရန် ကြိုးပမ်းနေခြင်းဖြစ်ကြောင်း တော်လှန်ရေးတပ်ဖွဲ့များက သုံးသပ် ထားသည်။ မိုးမိတ်နှင့် မဘိမ်းကြား စစ်ကောင်စီတပ်၏ လှုပ်ရှားမှုနှင့်ပတ်သက်၍ ဒေသခံ သတင်းရင်းမြစ်တစ်ဦးက “မန္တလေးက တက်လာတဲ့ စစ်တပ်ယာဉ်တန်းတွေ မိုးမိတ်ထဲ ရောက်လာကတည်းက မြေပြင်က တော်တော်လေး လှုပ်ခတ်သွားတာ။ အခုဆို မိုးမိတ်နဲ့ မဘိမ်းကြားက ရွာတွေကို စစ်တပ်က အတင်းအဓမ္မ ရွှေ့ခိုင်းနေပြီ။ သူတို့ က ကချင်ပြည်ဘက်ကို စစ်ကြောင်းပေါက်အောင် သွားချင်လို့ လမ်းကြောင်းရှင်းတဲ့ သဘောပဲ။ ရွာသားတွေ လည်း ပြေးနေကြရတယ်” ဟု ပြောသည်။ ပြီးခဲ့သည့်ရက်ပိုင်းကလည်း ငါးအိုးကျေးရွာဘက်မှ ထွက်ခွာလာသည့် စစ်တပ် စစ်ကြောင်းကို ကချင်လွတ်လပ် ရေး တပ်မတော် (KIA) ၊ ပြည်သူ့ကာကွယ်ရေး တပ်မတော် (PDF) နှင့် ကျောင်းသားတပ်မတော် (ABSDF) ပူးပေါင်းတပ်ဖွဲ့များက လမ်းခရီးတွင် ကြားဖြတ်တိုက်ခိုက်ခဲ့သဖြင့် စစ်တပ်ဘက်က အထိနာကာ ပြန်လည် ဆုတ် ခွာသွားခဲ့ရသည့် ဖြစ်စဉ်ရှိခဲ့သည်။ ဒေသတွင်း တော်လှန်ရေးတပ်ဖွဲ့မှ ရဲဘော်တစ်ဦးက “လမ်းပိုင်းအများစုကို ကျနော်တို့ဘက်က ထိန်းချုပ်ထား တော့ သူတို့ မြေပြင်စစ်ကြောင်း ထိုးဖို့ တော်တော်ရုန်းကန်နေရတယ်။ ဒါပေမဲ့ ရွှေကူနဲ့ ဗန်းမော်ဘက်ကို လမ်းပွင့်ဖို့ သူတို့ အသေအလဲ ကြိုးစားလာနိုင်တာမို့ စစ်ရေးအရ အနီးကပ် စောင့်ကြည့်ပိတ်ဆို့ထားပါတယ်။ ပြည်သူတွေအနေနဲ့လည်း စစ်ရေးသတိ အမြဲရှိနေဖို့ လိုပါတယ်” ဟု ပြောသည်။ စစ်တပ်သည် ဗန်းမော်နှင့် ရွှေကူမြို့နယ်ဘက်သို့ ကုန်းလမ်းပေါက်ရန် ဆက်လက် ကြိုးပမ်းနေဆဲ ဖြစ်ရာ တော် လှန်ရေး ပူးပေါင်းတပ်ဖွဲ့များဘက်ကလည်း ၎င်းတို့၏ စစ်ကြောင်းများကို အနီးကပ်စောင့်ကြည့်ကာ လမ်း ကြောင်းများကို ပိတ်ဆို့ထားသည့် အနေအထားတွင် ရှိနေသည်။ လက်ရှိတွင် မြစ်ကြီးနား - ဗန်းမော် - မန္တလေး လမ်းပိုင်းတစ်လျှောက်နှင့် ရွှေလီမြစ်ဝှမ်းဒေသများကို တော် လှန်ရေး ပူးပေါင်းတပ်ဖွဲ့များက စိုးမိုးထိန်းချုပ်ထားသဖြင့် စစ်တပ်စစ်ကြောင်းများ လှုပ်ရှားရန် ခက်ခဲနေသည်။ တိုက်ပွဲများ အချိန်မရွေး ပိုမိုပြင်းထန်လာနိုင်သည့် အခြေအနေကြောင့် ဒေသခံပြည်သူများအနေဖြင့် ဘေးလွတ် ရာသို့ ကြိုတင်ရှောင်တိမ်းကြရန် KIA ဘက်က သတိပေးနှိုးဆော်ထားသည်။ ဓါတ်ပုံ - ပုံဟောင်း #ကချင်ပြည်နယ်

ကချင်ပြည်သို့ ကုန်းလမ်းပေါက်ရန် စစ်တပ် အင်အားအလုံးအရင်းဖြင့် စစ်ကြောင်းထိုး  

May 14

ဗုံးကြဲပြီး ဒရုန်းဖြင့်စောင့်ကြည့်ကာ ထပ်ဆင့်တိုက်ခိုက်သည့် ဗျူဟာသစ် စစ်တပ် အသုံးပြုလာ   သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မေလ ၁၄ ရက်။ ချင်းပြည်၊ မင်းတပ်မြို့နှင့် စစ်ကိုင်းတိုင်း၊ ရွှေဘိုမြို့နယ်တို့တွင် စစ်တပ်က လေကြောင်းမှ ဗုံးကြဲတိုက်ခိုက်မှုများ ဆက်တိုက်လုပ်ဆောင်ခဲ့ရာ စစ်သုံ့ပန်းများ အပါအဝင် အရပ်သားပြည်သူများ သေဆုံးမှုရှိခဲ့ကြောင်း ဒေသခံများ နှင့် တော်လှန်ရေးအဖွဲ့အစည်းများက ပြောသည်။ အထူးသဖြင့် စစ်တပ်သည် လေကြောင်းမှ ဗုံးကြဲပြီးနောက် ဒဏ်ရာရရှိသူများကို လာရောက်ကူညီသည့် ကယ် ဆယ်ရေးသမားများကို ဒရုန်းဖြင့် စောင့်ကြည့်ကာ ဒုတိယအကြိမ် ထပ်ဆင့်ဗုံးကြဲသည့် ဗျူဟာ အသစ်ကို အသုံးပြုလာနေကြောင်း ချင်းပြည်သူ့အစည်းအရုံး (CPU/CPA) က သတိပေးလိုက်သည်။ ပြီးခဲ့သည့် မေလ ၁၁ ရက်နေ့ ညပိုင်းမှ မေလ ၁၂ ရက်နေ့ ညနေပိုင်းအထိ ၂၄ နာရီအတွင်း မင်းတပ်မြို့ပေါ်သို့ စစ်တပ်က လေကြောင်းတိုက်ခိုက်မှု ၁၁ ကြိမ်အထိ ဆက်တိုက်ပြုလုပ်ခဲ့ရာ စစ်သုံ့ပန်းများ အပါအဝင် လူ ၄ ဦး သေဆုံးခဲ့ပြီး၊ ပြည်သူ့နေအိမ် ၁၅ လုံးနှင့် အုပ်ချုပ်ရေးရုံးဌာန ၁၀ ခုထက်မနည်း ပျက်စီးဆုံးရှုံးခဲ့ရသည်။ လေကြောင်းဗျူဟာ အသစ်နှင့် ပတ်သက်၍ ချင်းပြည်သူ့အစည်းအရုံး (CPU/CPA) တာဝန်ရှိသူတစ်ဦးက “စစ်တပ်က အခုနောက်ပိုင်း အရင်လို ဗုံးကြဲပြီး ပြန်လှည့်သွားတာမျိုး မဟုတ်တော့ဘူး။ ဗုံးကြဲပြီးရင် ဒရုန်းနဲ့ အပေါ်ကနေ စောင့်ကြည့်နေတာ။ အဲဒီနောက် ဗုံးဒဏ်ကြောင့် ထိခိုက်ဒဏ်ရာရတဲ့သူတွေကို ကူညီဖို့ လူတွေ စုလာတဲ့အချိန်ကျမှ နောက်တစ်ကြိမ် ထပ်ဆင့်ဗုံးကြဲတဲ့ ဗျူဟာကို ကောက်ကျစ်စွာ အသုံးပြုလာတာ တွေ့ရ တယ်” ဟု ပြောသည်။ အလားတူ စစ်ကိုင်းတိုင်း၊ ရွှေဘိုမြို့နယ်၊ မဲတောကျေးရွာရှိ ဘုန်းကြီးကျောင်းကိုလည်း မေလ ၁၁ ရက်နေ့ ညပိုင်း တွင် စစ်တပ်က လေကြောင်းမှ ဗုံး ၂ လုံး ကြဲချတိုက်ခိုက်ခဲ့ရာ ဆွမ်းစားကျောင်းဆောင်ပေါ်သို့ တိုက်ရိုက် ကျရောက် ပေါက်ကွဲခဲ့သည်။ ထိုဖြစ်စဉ်ကြောင့် ဘုန်းကြီးကျောင်းအတွင်းရှိ အသက် ၃၀ အရွယ် အမျိုးသားတစ်ဦး နေရာ၌ပင် သေဆုံးခဲ့ပြီး အမျိုးသမီး ၂ ဦးအပါအဝင် ၃ ဦး ပြင်းထန်စွာ ဒဏ်ရာရရှိခဲ့သည်။ မြေပြသတင်းရင်းမြစ် တစ်ဦးက “ညဘက်ကြီး ဗုံးက ဝုန်းဆိုပြီး ကျောင်းပေါ်တည့်တည့် ကျလာတာ။ အိပ်နေ ရင်းနဲ့ကို အလန့်တကြား ထပြေးကြရတယ်။ အခုက ဘုန်းကြီးကျောင်းတွေပါ မချန်ဘဲ ပစ်မှတ်ထား တိုက်ခိုက် လာတော့ ဘယ်နေရာမှ မလုံခြုံတော့ဘူး။ ရွာထဲမှာလည်း လူစုလူဝေးမလုပ်ရဲကြတော့ဘူး” ဟု ပြောသည်။ စစ်တပ်သည် စစ်ရေးပစ်မှတ်မဟုတ်သည့် ဘာသာရေး အဆောက်အအုံများ၊ အရပ်သားပြည်သူများနှင့် ကယ်ဆယ်ရေးသမားများကိုပါ အငြိုးတေးဖြင့် ပစ်မှတ်ထားတိုက်ခိုက်လာနေခြင်း ဖြစ်သည်။ မြေပြင်စစ်မျက်နှာတွင် အထိနာနေသည့် စစ်တပ်သည် လေကြောင်း အသာစီးရမှုကို အသုံးချကာ အရပ်သား လူထုအား စိတ်ဓာတ်ရေးရာ ခြိမ်းခြောက်ရန်အတွက် ယခုကဲ့သို့ ဗုံးကြဲတိုက်ခိုက်မှုများကို ရက်ဆက် လုပ်ဆောင် နေခြင်း ဖြစ်သည်ဟု ဆိုသည်။ ထို့ကြောင့် ပြည်သူများအနေဖြင့် လေကြောင်းရန် သတိပေးချက်များကို ဂရုပြုရန်နှင့် လူစုလူဝေးများကို အထူးရှောင်ရှားကြရန် ဒေသတွင်း တော်လှန်ရေးအဖွဲ့အစည်းများက တိုက်တွန်းနှိုးဆော်ထားသည်။ #ချင်းပြည် #မင်းတပ် #စစ်တပ် #ရွှေဘို

ဗုံးကြဲပြီး ဒရုန်းဖြင့်စောင့်ကြည့်ကာ ထပ်ဆင့်တိုက်ခိုက်သည့် ဗျူဟာသစ် စစ်တပ် အသုံးပြုလာ 

May 14

မိုးဗြဲတွင် မိုးစပါးစိုက်ပျိုးမှု ထက်ဝက်လျော့နည်း၊ ဆန်ဈေးထပ်တက်မည်ကို စစ်ဘေးရှောင်များ စိုးရိမ်   သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မေလ ၁၄ ရက်။ ရှမ်းပြည်တောင်ပိုင်းနှင့် ကရင်နီပြည်အစပ်၊ ဖယ်ခုံမြို့နယ်၊ မိုးဗြဲမြို့တွင် စစ်ရေးမတည်ငြိမ်မှုနှင့် မြေပြင် အခြေ အနေများကြောင့် လာမည့်မိုးရာသီ စပါးစိုက်ပျိုးမှု လယ်ဧကထောင်နှင့်ချီ၍ ရပ်နားထားရသဖြင့် ဆန်ဈေးနှုန်း များ ထပ်မံမြင့်တက်လာမည်ကို ဒေသတွင်း ခိုလှုံနေသည့် စစ်ဘေးရှောင်များနှင့် ပြည်သူများ စိုးရိမ်နေကြသည်။ မိုးဗြဲမြို့၊ ဘီလူးချောင်းဘေး အနီးတစ်ဝိုက် ပတ်ပတ်လည်ရှိ လယ်ကွင်းများနှင့် ဘီလူးချောင်း အနောက်ဘက် ခြမ်းရှိ နောင်ခိုက်၊ လက်ပံကွင်း၊ စပါးကွင်းတို့တွင် လယ်ဧကတစ်ထောင်ကျော် ရှိသော်လည်း ယခုနှစ်တွင် မိုးစပါးစိုက်ပျိုးသူ ထက်ဝက်ကျော်ခန့် လျော့နည်းသွားခြင်း ဖြစ်ပြီး လက်ရှိအချိန်အထိ စိုက်ပျိုးသူ မရှိသ လောက် နည်းပါးနေဆဲ ဖြစ်သည်။ မိုးဗြဲမြို့အတွင်း ခိုလှုံနေသည့် စစ်ဘေးရှောင် ပြည်သူတစ်ဦးက ကြုံတွေ့နေရသည့် မြေပြင်အခြေအနေနှင့် ပတ်သက်၍ ယခုကဲ့သို့ ပြောသည်။ “လယ်ထဲဆင်းရင် တဝုန်းဝုန်းနဲ့ ဘယ်ချိန်ကျလာမလဲ မသိဘူး။ အသက်နဲ့ရင်းရတော့ စိုက်မယ့်လူ မရှိတော့ဘူး။ တချို့လည်း စိုက်ကြတယ်။ မကြောက်တတ်တဲ့လူ နည်းနည်းပါးပါးပေါ့။” အလားတူ ဘီလူးချောင်း အရှေ့ဘက်ခြမ်းရှိ လယ်ကွင်းများမှာ စစ်တပ် လက်အောက်ခံ တပ်စခန်းများနှင့် နီးကပ် နေခြင်း၊ မိုးဗြဲဆည်မှ စိုက်ပျိုးရေရရှိနိုင်မှု အာမခံချက်မရှိခြင်း၊ ဒေသခံအများစု စစ်ဘေးရှောင်နေရခြင်းတို့အပြင် ဓာတ်မြေဩဇာ၊ ပိုးသတ်ဆေးနှင့် စက်သုံးဆီ ဈေးနှုန်းများ ၃ ဆခန့်အထိ မြင့်တက်လာခြင်းတို့ကြောင့် တောင်သူ များ မိုးစပါး မစိုက်ပျိုးနိုင်ကြခြင်း ဖြစ်သည်။ ထို့ပြင် စစ်တပ်က လယ်ကွင်းအတွင်း သွားရောက်သည့် တောင်သူများကို လုံခြုံရေးအကြောင်းပြ ပိတ်ပင်ခြင်း၊ ဒရုန်းများဖြင့် စောင့်ကြည့်ခြင်း၊ လယ်ကွင်းအချို့တွင် မြေမြုပ်မိုင်းအန္တရာယ်များ ရှိနေခြင်းနှင့် တောင်သူအချို့ ပေါ်တာဆွဲခံရခြင်းတို့ကြောင့် တောင်သူများ လယ်ယာလုပ်ငန်းခွင်သို့ မဆင်းရဲကြကြောင်း စစ်ဘေးရှောင်များက ပြောသည်။ မိုးဗြဲဒေသ၏ အနာဂတ် စားနပ်ရိက္ခာအခြေအနေအပေါ် ဒေသတွင်း စစ်ဘေးရှောင်အရေး ကူညီဆောင်ရွက်ပေး နေသူ တစ်ဦးကလည်း ယခုကဲ့သို့ သုံးသပ်ပြောဆိုသည်။ “မိုးဗြဲဆိုတာ ဆန်တအားထွက်တဲ့ ဒေသပဲလေ။ ဒီလိုနေရာတောင် မစိုက်နိုင်ဘူးဆိုတော့ လာမယ့်နှစ် ဆန်ဈေးကိုပဲ ခန့်မှန်းလို့ရနေပြီ။ အလုပ်သမားလည်း ခေါ်ရခက်တယ်လို့ ပြောနေကြတာပဲ။ စိုက်တဲ့သူလည်း ခုက အကုန်မရောက်သေးဘူးလေ။ ဒီမိုးရာသီ နည်းနည်းငြိမ်ရင်တော့ တော်တော်များများ ပြန်လာကြမှာပါ။” မိုးဗြဲမြို့တွင် ရှမ်းမလေး၊ မနောသုခ၊ မနောနီ၊ ကောက်ညင်းဆန်၊ တောင်ယာဆန်နှင့် ဒေသထွက် ရှမ်းဆန်များကို အဓိက စိုက်ပျိုးကြပြီး လက်ရှိ မြေပြင်ပေါက်ဈေးအရ ဆန်တစ်အိတ်လျှင် ပျှမ်းမျှ မြန်မာကျပ်ငွေ ၁၆၀,၀၀၀ ဝန်းကျင်အထိ ရှိနေကြောင်း ဒေသခံများက ပြောသည်။ #မိုးဗြဲမြို့ #မိုးစပါး #စစ်ဘေးရှောင်

မိုးဗြဲတွင် မိုးစပါးစိုက်ပျိုးမှု ထက်ဝက်လျော့နည်း၊ ဆန်ဈေးထပ်တက်မည်ကို စစ်ဘေးရှောင်များ စိုးရိမ် 

« Prev 1 … 32 33 34 35 36 … 1,081 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

မြစ်ဆုံစီမံကိန်းပြီးပါက တစ်နိုင်ငံလုံး မီးရမည်ဆိုသည်ကို KHRW မယုံကြည်
AA ထိန်းချုပ်ဒေသများတွင် Grade-12 မြန်မာစာအစား ရခိုင်ဖတ်စာ ပြောင်းလဲသင်မည်
တစ်လကျော်ကြာ ချင်းတောင်ပိုင်း တိုက်ပွဲတွင် စစ်တပ် အထိနာနေ
Taylor Swift နဲ့ Travis Kelce တို့ မင်္ဂလာဆောင်ပြီ
ထိုင်းလေကြောင်း လေယာဉ်မယ် မူးယစ်ဆေးနှင့် တွေ့ရှိမှု အပေါ် စုံစမ်းစစ်ဆေးမှုများ စတင်

Archives

Archives

×Close