NMG Doh – Page 82 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
နိုင်ငံတကာသတင်း
NMG အကြောင်း
Contact

Home
Author Archive

NMG Doh

Author: NMG Doh

Apr 22

ဒေါ်အောင်ဆန်းစုကြည်နှင့် နိုင်ကျဉ်းများ လွတ်မြောက်ရေး အဖွဲ့ ၅၉ ဖွဲ့ တောင်းဆို သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဧပြီလ ၂၂ ရက်။ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် အပါအဝင် မတရားဖမ်းဆီးခံထားရသည့် နိုင်ငံရေး အကျဉ်းသား အားလုံး ခြွင်းချက်မရှိ အမြန်ဆုံး လွတ်မြောက်ရေးအတွက် နိုင်ငံတကာ အသိုင်းအဝန်း အနေဖြင့် ယခုထက်ပို၍ ထိရောက်ပြီး လက်တွေ့ကျသည့် ဖိအားပေးမှုများ လုပ်ဆောင်ရန် Blue Shirt Movement-Myanmar နှင့် မဟာမိတ်အဖွဲ့ ၅၈ ဖွဲ့က တောင်းဆိုလိုက်သည်။ ဧပြီလ ၁၀ ရက်နေ့မှ ၂၁ ရက်နေ့အထိ (၁၂) ရက်တိုင်တိုင် ပြုလုပ်ခဲ့သည့် Blue Shirt Campaign လူထုလှုပ်ရှားမှု နှင့်အတူ ကုလသမဂ္ဂ (UN)၊ ဥရောပသမဂ္ဂ (EU)၊ အာဆီယံနှင့် အမေရိကန်အပါအဝင် အိမ်နီးချင်းနိုင်ငံများမှ ခေါင်းဆောင်များ အနေဖြင့် မြန်မာ့နိုင်ငံရေးအကျဉ်းသားအရေးကို အထူးအလေးထား ဆောင်ရွက်ပေးရန် တိုက်တွန်းခဲ့ခြင်း ဖြစ်သည်။ Blue Shirt Movement-Myanmar မှ ပြောရေးဆိုခွင့်ရှိသူ ကိုကောင်းယံလင်းက “အမှန်တကယ်တော့ နိုင်ငံရေး အကျဉ်းသားအများစု မလွတ်မြောက်သေးပါဘူး။ လွတ်ငြိမ်းချမ်းသာပေးတယ်ဆိုတဲ့ နေရာမှာလည်း ထောင်ထဲမှာ နှစ်အကြာကြီးနေပြီး လွတ်ရက်စေ့ခါနီးသူတွေက အများစုပါ။ ဒါကြောင့် စစ်အုပ်စုရဲ့ အကျဉ်းထောင်တွေထဲမှာ ခံစားနေရတဲ့ လူ့အခွင့်အရေးချိုးဖောက်မှုတွေနဲ့ ဒေါ်အောင်ဆန်းစုကြည်အပါအဝင် အားလုံးလွတ်မြောက်ဖို့အတွက် နိုင်ငံတကာက အစဉ်တစိုက် ဖိအားပေးစေချင်ပါတယ်” ဟု ပြောသည်။ လက်ရှိတွင် အသက် ၈၀ ကျော်အရွယ်ရှိပြီ ဖြစ်သည့် ဒေါ်အောင်ဆန်းစုကြည်၏ ကျန်းမာရေးနှင့် ပတ်သက်၍ စစ်အုပ်စုက သတင်းအမှောင်ချထားသည့်အပေါ် နိုင်ငံရေးအင်အားစုများက အထူးစိုးရိမ်နေကြသည်။ ဆိုရှယ်ဒီမိုကရက်တစ်ပါတီ (SDP) အထွေအထွေအတွင်းရေးမှူး ကိုကျော်ကိုကိုက “လက်ရှိ ထောင်ထဲမှာရှိတဲ့ ဒေါ်အောင်ဆန်းစုကြည် အပါအဝင် ကျန်တဲ့ နိုင်ငံရေးအကျဉ်းသားအားလုံးရဲ့ အသက်အန္တရာယ်က အင်မတန်မှ စိုးရိမ်စရာကောင်းတယ်။ အခု အခြေအနေ ဘာတွေဖြစ်နေမှန်းလည်း မသိဘူး။ သတင်းအမှောင် ချထားတာ တွေလည်း ရှိတယ်” ဟု ထောက်ပြသည်။ အလားတူ နိုင်ငံရေးအကျဉ်းသူများအဖွဲ့ (WOPP) ဦးဆောင်တာဝန်ခံ မဇူးဇူးမေယွန်းကလည်း “အတုအယောင် အစိုးရက လက်ရှိအထိ ဘာမှ တိတိကျကျ မဖော်ပြတဲ့အတွက် ကျမတို့အနေနဲ့က ဒေါ်အောင်ဆန်းစုကြည်နဲ့ တကွ ကျန်ရှိနေတဲ့ နိုင်ငံရေး အကျဉ်းသားတွေ လွတ်မြောက်ဖို့အရေးကို ပိုပြီးတော့ အရွေ့တစ်ခုကို သွားဖို့ လိုအပ်လာပြီလို့ သုံးသပ်ချင်ပါတယ်” ဟု ပြောသည်။ အထူးသဖြင့် နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ကျန်းကျန်းမာမာနှင့် အသက်ရှင်လျက်ရှိ ကြောင်း ခိုင်မာသည့် သက်သေပြရန် "Proof of Life" ကမ်ပိန်းကို သားဖြစ်သူ ဦးထိန်လင်းနှင့်အတူ ပြည်သူများ က ယခုရက်ပိုင်းအတွင်း စတင်လိုက်ကြသည်။ All in One Piece Movement အဖွဲ့က ဦးဆောင်သည့် ဤလှုပ်ရှားမှုသည် မိခင်ဖြစ်သူ၏ ကျန်းမာရေး အခြေ အနေကို သားတစ်ဦးအနေဖြင့် သိရှိခွင့်ရရှိရန်ဟူသော အခြေခံလူသားအခွင့်အရေးအပေါ် မူတည်ကာ တောင်းဆိုထားခြင်း ဖြစ်သည်။ ကိုထိန်လင်းနှင့်အတူ မြန်မာ့အရေးလှုပ်ရှားနေသူများက ကုလသမဂ္ဂနှင့် အမေရိကန်အပါအဝင် နိုင်ငံတကာ အသိုင်းအဝန်းအနေဖြင့် စစ်အုပ်စုအပေါ် ဖိအားပေးရန်၊ အတုအယောင်ရွေးကောက်ပွဲကို အသိအမှတ်မပြုရန်နှင့် ပြည်သူကို ဗုံးကြဲနေသည့် လေယာဉ်ဆီတင်သွင်းမှုများကို ရပ်တန့်ပေးရန် တိုက်တွန်းထားသည်။ လက်ရှိတွင် ဒေါ်အောင်ဆန်းစုကြည်၏ သတင်းများကို စစ်အုပ်စုဘက်က လုံးဝအမှောင်ချထားသည့်အတွက် ၎င်း၏ အသက်အန္တရာယ်အတွက် ပြည်တွင်းပြည်ပရှိ ပြည်သူများက အထူးစိုးရိမ်ပူပန်နေကြသည်။ PPNM ၏ မှတ်တမ်းများအရ အာဏာသိမ်းကာလအတွင်း အကျဉ်းထောင်တွင်း ကျန်းမာရေးစောင့်ရှောက်မှု မလုံလောက်ခြင်းနှင့် ညှဉ်းပန်းနှိပ်စက်ခံရခြင်းတို့ကြောင့် နိုင်ငံရေးအကျဉ်းသား ၂၇၉ ဦးခန့် အသက်ဆုံးရှုံးခဲ့ရပြီး ဖြစ်သည်။ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများ ကွန်ရက် (PPNM) ဦးဆောင်ကော်မတီဝင် ကိုသိုက်ထွန်းဦးက “ကျနော်တို့ ပြည်သူလူထု တစ်ရပ်လုံးက ရောက်ရှိရာနိုင်ငံတွေမှာ ကြိုးစားနေကြသလိုပဲ၊ နိုင်ငံတကာ အသိုင်း အဝန်း အနေနဲ့လည်း ပိုပြီး လက်တွေ့ကျတဲ့ ဆောင်ရွက်မှုတွေ၊ မလွတ်လာခင်စပ်ကြားမှာ ကူညီစောင့်ရှောက်မှု တွေ ပိုပေးဖို့ အတွက် ကျနော်တို့ ရည်ရွယ်ပါတယ်” ဟု ပြောသည်။ AAPP ၏ ထုတ်ပြန်ချက်အရ လက်ရှိအချိန်ထိ ကလေးသူငယ် ၆၀၀ ကျော်အပါအဝင် နိုင်ငံရေးအကျဉ်းသား ၁၄,၀၀၀ ကျော် ဖမ်းဆီးချုပ်နှောင်ခံထားရဆဲ ဖြစ်သည်။ ထို့ကြောင့် နိုင်ငံတကာအနေဖြင့် စစ်အုပ်စုအား အသိအမှတ်မပြုရန်နှင့် လူသားမျိုးနွယ်အပေါ် ကျူးလွန်သည့် ရာဇဝတ်မှုများအတွက် တာဝန်ခံစေရေး အရှိန်မြှင့် ဆောင်ရွက်ပေးရန် Blue Shirt Movement က အလေး အနက် တိုက်တွန်းထားသည်။ ဓါတ်ပုံ - PPNM #ဒေါ်အောင်ဆန်းစုကြည် #နိုင်ကျဉ်း #PPNM #ကိုထိန်လင်း #စစ်အုပ်စု

ဒေါ်အောင်ဆန်းစုကြည်နှင့် နိုင်ကျဉ်းများ လွတ်မြောက်ရေး အဖွဲ့ ၅၉ ဖွဲ့ တောင်းဆို

Apr 22

ဖားကန့်တွင် ဆရာဝန် အပါအဝင် လူ ၂၀ ခန့်ကို စစ်တပ်က ဖမ်းခေါ်သွား သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၂၂ ရက်။ ကချင်ပြည်၊ ဖားကန့်မြို့နယ်တွင် စစ်တပ်နှင့် ပြည်သူ့စစ်ပူးပေါင်းအဖွဲ့များက ပုဂ္ဂလိကဆေးခန်းနှင့် မိုတယ် တစ်ခုကို အင်အားသုံးစီးနင်းပြီး ဆရာဝန်များ အပါအဝင် လူအယောက် ၂၀ ခန့်ကို ဖမ်းဆီးသွားကြောင်း ဒေသခံများနှင့် မြေပြင်သတင်းရင်းမြစ်များက ပြောသည်။ ဧပြီလ ၂၁ ရက်နေ့၊ ည ၁၀ နာရီဝန်းကျင်ခန့်တွင် လုံးခင်းကျေးရွာအုပ်စုရှိ ‘မိုင်’ ပုဂ္ဂလိကဆေးခန်းနှင့် ‘ဥရုဆွတ် အောင်’ မိုတယ်တို့ကို စစ်တပ်က ဝင်ရောက်စီးနင်းခဲ့ခြင်းဖြစ်ပြီး၊ ဖမ်းဆီးခံရသူများထဲတွင် ဆေးကုသမှုခံယူ နေသည့် လူနာတစ်ဦးပင် ပါဝင်သွားခဲ့သည်။ လုံခြုံရေးအရ အမည်မဖော်လိုသည့် လုံးခင်းဒေသခံတစ်ဦးက “ညကြီးအချိန်မတော် သေနတ်တွေနဲ့ ဝိုင်းပြီး ဝင်လာတာ။ ဆေးခန်းထဲက ဆရာဝန်တွေ၊ သူနာပြုတွေနဲ့ ဝန်ထမ်းတွေကိုပါ ရိုက်နှက်ပြီး ဖမ်းသွားတာ။ ဖုန်းတွေ၊ ပိုက်ဆံတွေလည်း အကုန်သိမ်းသွားတယ်။ လက်ရှိအချိန်ထိ သူတို့ကို ဘယ်ခေါ်သွားမှန်းမသိရတော့ မိသားစုတွေက အရမ်းစိုးရိမ်နေကြတယ်” ဟု ပြောသည်။ အဆိုပါ အုပ်စုလိုက်ဖမ်းဆီးမှုသည် ဖားကန့်ဒေသအတွင်း တိုက်ပွဲများ ပြင်းထန်လာနိုင်သည့် အခြေအနေနှင့် တိုက်ရိုက်ဆက်စပ်နေကြောင်း သုံးသပ်မှုများရှိနေသည်။ ယနေ့ ဧပြီ ၂၂ ရက်တွင်ပင် KIA တပ်မဟာ (၉)၊ တပ်ရင်း (၆) က ဖားကန့်-နန်ယား-ကာမိုင်း လမ်းပိုင်းကို ရက်အကန့်အသတ်မရှိ (ယာယီ) ပိတ်လိုက်ကြောင်း ထုတ်ပြန်ခဲ့သည်။ KIA နှင့် နီးစပ်သည့် အမျိုးသားတစ်ဦးက “စစ်ကောင်စီဘက်က စစ်ကြောင်းထိုး လှုပ်ရှားတာတွေရှိနေလို့ လမ်းပိတ်လိုက်တာပါ။ ယာဉ်ကြီးယာဉ်ငယ်တွေရော လူပါ သွားလာလို့ မရတော့ဘူး။ အခုလို လမ်းပိတ် လိုက်ပြီဆိုတော့ စစ်တပ်ဘက်က အထိနာမှာစိုးလို့ မြို့ထဲကလူတွေကို လိုက်ဖမ်းပြီး လူသားဒိုင်းလုပ်ဖို့ ပြင်နေ တာလားလို့ သံသယရှိတယ်” ဟု ပြောသည်။ ပြီးခဲ့သည့် ဧပြီလ ၆ ရက်နေ့မှစ၍ စစ်တပ်ဘက်က စစ်ကူစစ်ကြောင်းများ အလုံးအရင်းနှင့် တက်လာနေသကဲ့သို့၊ ဧပြီ ၂ ရက်နေ့ကလည်း အင်မားယန်ကျေးရွာရှိ စစ်တပ်ကာကင်းစခန်းများကို KIA/KPDF ပူးပေါင်းတပ်များက တိုက်ခိုက်သိမ်းပိုက်ခဲ့သဖြင့် နှစ်ဖက်စစ်ရေးမှာ အထူးတင်းမာနေသည်။ လက်ရှိတွင် လုံးခင်းကျေးရွာအတွင်း စစ်တပ်က နေရာအနှံ့ယူထားပြီး လမ်းသွားလမ်းလာများကို တင်းတင်း ကျပ်ကျပ် စစ်ဆေးဖမ်းဆီးမှုများ လုပ်နေသည်ဟု ဒေသခံများက ပြောသည်။ ထို့အပြင် ဒေသခံပြည်သူများမှာ စစ်ရေးအခြေအနေများကြောင့် ဒေသတွင်း ကုန်စည်ပြတ်တောက်မည်ကို သာမက တိုက်ပွဲအကြား ညှပ်မည်ကိုပါ စိုးရိမ်ထိတ်လန့်နေကြသည်။ #ဖားကန့် #စစ်အုပ်စု #ကချင်ပြည်နယ်

ဖားကန့်တွင် ဆရာဝန် အပါအဝင် လူ ၂၀ ခန့်ကို စစ်တပ်က ဖမ်းခေါ်သွား

Apr 22

တရုတ်နိုင်ငံခြားရေး ဝန်ကြီး ဝမ်ယိ မြန်မာသို့ လာမည် သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဧပြီလ ၂၂ ရက်။ တရုတ်နိုင်ငံခြားရေးဝန်ကြီး ဝမ်ယိသည် ဗုဒ္ဓဟူးနေ့မှ တနင်္ဂနွေနေ့အထိ ကမ္ဘောဒီးယား၊ ထိုင်းနှင့် မြန်မာနိုင်ငံများသို့ သွားရောက်မည်ဖြစ်ကြောင်း တရုတ်အစိုးရက အင်္ဂါနေ့ (ဧပြီ ၂၁ ရက်) တွင် ပြောကြားခဲ့သည်။ ကမ္ဘောဒီးယားနှင့် ထိုင်းမှ အပြန်တွင် မြန်မာနိုင်ငံသို့ ရောက်ရှိမည်ဖြစ်ပြီး နေပြည်တော်တွင် စစ်အုပ်စု ခေါင်းဆောင် ဦးမင်းအောင်လှိုင်နှင့် တွေ့ဆုံမည်ဟု သတင်းများ ထွက်ပေါ်နေသည်။ ကမ္ဘောဒီးယားနိုင်ငံတွင် ဝမ်ယိသည် ကာကွယ်ရေးဝန်ကြီး ဒုံကျွင်းနှင့်အတူ "တရုတ်-ကမ္ဘောဒီးယား ၂+၂ မဟာဗျူဟာမြောက် ဆွေးနွေးပွဲ" (နိုင်ငံခြားရေးဝန်ကြီးများနှင့် ကာကွယ်ရေးဝန်ကြီးများအဆင့်) ၏ ပထမဆုံးအကြိမ် ဖွင့်လှစ်သည့် အစည်းအဝေးသို့ တက်ရောက်မည်ဖြစ်ကြောင်း နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ ကော့ကျိကွန်း (Guo Jiakun) က ပြောကြားခဲ့သည်။ ယခုခရီးစဉ်အတွင်း ကမ္ဘောဒီးယားနိုင်ငံနှင့် အဆင့်မြင့် လုံခြုံရေးနှင့် သံတမန်ရေးရာ ပူးပေါင်းဆောင်ရွက်မှု ပုံစံသစ်တစ်ရပ် ဖော်ဆောင်ရန် မျှော်မှန်းထားကြသည်။ ပြောရေးဆိုခွင့်ရှိသူ ကော့ကျိကွန်းက ကမ္ဘောဒီးယား၊ ထိုင်းနှင့် မြန်မာနိုင်ငံတို့အား တရုတ်နိုင်ငံ၏ “ချစ်ကြည်ရင်းနှီးသော အိမ်နီးချင်းနိုင်ငံများ” အဖြစ် ရည်ညွှန်းပြောဆိုခဲ့သည်။ ယခုခရီးစဉ်သည် နိုင်ငံခေါင်းဆောင်များအကြား ရရှိထားသည့် ဘုံသဘောတူညီချက်များကို လက်တွေ့ကျသော တိုးတက်မှုများအဖြစ် ဖော်ဆောင်ပေးနိုင်မည်ဟု ပေကျင်းက မျှော်လင့်ကြောင်း ပြောသည်။ ထို့အပြင် တရုတ်နိုင်ငံအနေဖြင့် ဘက်စုံမဟာဗျူဟာမြောက် ပူးပေါင်းဆောင်ရွက်မှုများကို မြှင့်တင်ရန်၊ နိုင်ငံသုံးနိုင်ငံမှ ပြည်သူများအတွက် ပိုမိုကောင်းမွန်သော အကျိုးကျေးဇူးများ ဖော်ဆောင်ပေးရန်နှင့် ဒေသတွင်း ငြိမ်းချမ်းရေး၊ တည်ငြိမ်ရေး၊ ဖွံ့ဖြိုးတိုးတက်ရေးနှင့် သာယာဝပြောရေးတို့အတွက် ပိုမိုအထောက်အကူပြုရန် ရည်မှန်းထားကြောင်း ၎င်းက ဖြည့်စွက်ပြောကြားခဲ့သည်။ ကမ္ဘောဒီးယားနိုင်ငံနှင့် ပြုလုပ်မည့် ပထမဆုံးအကြိမ် ၂+၂ ဆွေးနွေးပွဲတွင် နှစ်နိုင်ငံ ဆက်ဆံရေး၊ နိုင်ငံရေးနှင့် လုံခြုံရေးဆိုင်ရာ ကိစ္စရပ်များ၊ ကာကွယ်ရေးနှင့် လုံခြုံရေး ပူးပေါင်းဆောင်ရွက်မှုများ၊ ဒေသတွင်းနှင့် နိုင်ငံတကာ အခြေအနေများ စသည့် ကျယ်ပြန့်သော ကဏ္ဍရပ်များကို ဆွေးနွေးမည် ဖြစ်သည်။ ကမ္ဘောဒီးယားမှ အပြန်တွင် ထိုင်းနိုင်ငံသို့ ရောက်ရှိမည်ဖြစ်သည်။ ထိုင်းဝန်ကြီးချုပ် အနုတင်က တရုတ်နိုင်ငံခြားရေး ဝန်ကြီး ဝမ်ယိ ကြာသပတေးတွင်ရောက်ရှိမည် ဖြစ်ကြောင်း နှင့် ဆွေးနွေးမည့်အကြောင်းအရာများကို ကန့်သတ်ထားခြင်း မရှိဟု သတင်း‌ထောက်များအားပြောသည်။ ထို့နောက်တွင်မှ မြန်မာနိုင်ငံသို့ သွားရောက်မည်ဖြစ်သည်။ #တရုတ်နိုင်ငံခြားရေးဝန်ကြီး #ဝမ်ယိ

တရုတ်နိုင်ငံခြားရေး ဝန်ကြီး ဝမ်ယိ မြန်မာသို့ လာမည်

Apr 22

ထိုင်းတွင် ကွန်ဒို ဝယ်သူများအား တစ်နှစ် ဗီဇာ ပေးမည် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၂၂ ရက်။ ထိုင်းနိုင်ငံ၊ ဖူးကက်မြို့တွင် ကွန်ဒိုဝယ်ယူသူများနှင့် တန်ဖိုးမြင့်အိမ်ရာ ငှားရမ်းနေထိုင်သူများအတွက် ကာလရှည်ဗီဇာ ထုတ်ပေးမည့် အစီအစဉ်ကို ဧပြီ ၂၁ ရက်နေ့က ရှင်းလင်းတင်ပြခဲ့သည်။ သတ်မှတ်ချက်အရ အနည်းဆုံး ထိုင်းဘတ် ၃ သန်းတန်ဖိုးရှိ ကွန်ဒိုမီနီယံဝယ်ယူသူများ သို့မဟုတ် တစ်လလျှင် အနည်းဆုံး ဘတ် ၈၅,၀၀၀ နှုန်းဖြင့် ငှားရမ်းနေထိုင်သူများ (သို့မဟုတ်) စုစုပေါင်း ဘတ် ၃.၀၆ သန်းတန်ဖိုးရှိ ၃ နှစ်စာ စာချုပ်ဖြင့် ငှားရမ်းသူများသည် ၁ နှစ်သက်တမ်းရှိ ဗီဇာကို လျှောက်ထားနိုင်မည်ဖြစ်ပါသည်။ အဆိုပါဗီဇာကို ထိုင်းနိုင်ငံ ခရီးသွားလုပ်ငန်းအဖွဲ့ (TAT) မှ အသိအမှတ်ပြုထားသည့် ကိုယ်စားလှယ်များမှတစ်ဆင့် လျှောက်ထားရမည်ဖြစ်ပြီး ဗီဇာရရှိသူများသည် ရက်ပေါင်း ၉၀ တိုင်း သတင်းပို့ရန် လိုအပ်သည်။ ဤအစီအစဉ်သည် လက်ရှိဈေးကွက်အတွင်း ပိုလျှံနေသည့် အခန်းပေါင်း ၂ သိန်း ၈ သောင်းကျော်ကို ရောင်းချနိုင်ရန်နှင့် ရုရှား၊ ယူကရိန်း၊ ထိုင်ဝမ်နှင့် စင်ကာပူနိုင်ငံတို့မှ ရင်းနှီးမြှုပ်နှံသူများကို ဆွဲဆောင်ရန် ရည်ရွယ်ခြင်းဖြစ်ပါသည်။ လက်ရှိတွင် ထိုင်းအိမ်ခြံမြေဈေးကွက်၌ မြန်မာနိုင်ငံသားများ ဝယ်ယူမှု မြင့်တက်နေသည့်အတွက် ဘတ် ၃ သန်းတန်ဖိုးရှိ ကွန်ဒိုဝယ်ယူသူ မြန်မာနိုင်ငံသားများလည်း ဤအကျိုးခံစားခွင့်တွင် ပါဝင်မည်ဖြစ်ပါသည်။ #ထိုင်းကွန်ဒိုစျေးကွက် #ထိုင်းကွန်ဒိုဝယ်ယူမှု #ကွန်ဒိုစျေးကွက်

ထိုင်းတွင် ကွန်ဒို ဝယ်သူများအား တစ်နှစ် ဗီဇာ ပေးမည်

Apr 22

တရုတ်ဖိအားကြောင့် ထိုင်ဝမ်သမ္မတ၏ အာဖရိကခရီးစဉ် ပျက် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၂၂ ရက်။ ထိုင်ဝမ်သမ္မတ လိုင်ချင်းတယ်သည် ယခုတစ်ပတ်အတွင်း အာဖရိကနိုင်ငံဖြစ်သော အက်စ်ဝါတီးနီ (Eswatini) သို့ သွားရောက်မည့် ခရီးစဉ်ကို အင်္ဂါနေ့တွင် ရုတ်တရက် ဖျက်သိမ်းလိုက်ရပါသည်။ သမ္မတ၏ လေယာဉ်ဖြတ်သန်းမည့် လမ်းကြောင်းပေါ်ရှိ ဆေးရှဲလ် (Seychelles)၊ မောရစ်ရှ (Mauritius) နှင့် မာဒါဂတ်စကာ (Madagascar) နိုင်ငံတို့က ဝေဟင်ပိုင်နက်အတွင်း ဖြတ်သန်းပျံသန်းခွင့်ကို ကြိုတင်အကြောင်းကြားခြင်းမရှိဘဲ ပိတ်ပင်လိုက်ခြင်းကြောင့် ဖြစ်ပါသည်။ ထိုင်ဝမ်အစိုးရက ဤလုပ်ရပ်သည် တရုတ်နိုင်ငံ၏ စီးပွားရေးအရ အကြပ်ကိုင်မှုနှင့် ဖိအားပေးမှုများကြောင့်ဖြစ်ကြောင်း တိုက်ရိုက်စွပ်စွဲထားပါသည်။ မာဒါဂတ်စကာနိုင်ငံကမူ ၎င်းတို့အနေဖြင့် "တရုတ်တစ်နိုင်ငံတည်းမူဝါဒ" ကိုသာ လက်ခံသောကြောင့်ဖြစ်ကြောင်း တုံ့ပြန်ထားပါသည်။ အက်စ်ဝါတီးနီ (Eswatini) သည် ထိုင်ဝမ်ကို နိုင်ငံအဖြစ် တရားဝင်အသိအမှတ်ပြုထားသည့် ၁၂ နိုင်ငံထဲမှ တစ်နိုင်ငံဖြစ်သည်၊ သမ္မတလိုင်သည် ထိုနိုင်ငံ၏ ဘုရင် နန်းတက်ခြင်း အနှစ် ၄၀ ပြည့်ပွဲကို တက်ရောက်ရန် စီစဉ်ထားခဲ့ခြင်း ဖြစ်သည်။ သမ္မတလိုင်က တရုတ်နိုင်ငံ၏ ယခုကဲ့သို့ နှိပ်ကွပ်မှုများသည် နိုင်ငံတကာငြိမ်းချမ်းရေးကို ခြိမ်းခြောက်နေခြင်းဖြစ်ကြောင်း ၎င်း၏ လူမှုကွန်ရက်မှတစ်ဆင့် ပြောကြားခဲ့သည်။ တရုတ်နိုင်ငံ၏ ဖိအားကြောင့် ထိုင်ဝမ်သမ္မတတစ်ဦး ပြည်ပခရီးစဉ်ကို ဖျက်သိမ်းလိုက်ရခြင်းမှာ ယခုအကြိမ်သည် ပထမဆုံးအကြိမ် ဖြစ်သည်။ #Eswatini #ထိုင်ဝမ်သမ္မတလိုင်ချင်းတယ်

တရုတ်ဖိအားကြောင့် ထိုင်ဝမ်သမ္မတ၏ အာဖရိကခရီးစဉ် ပျက်

Apr 22

ဒေါ်နယ်ထရမ့်က အပစ်အခတ်ရပ်စဲရေးကို ရက်အကန့်အသတ်မရှိ သက်တမ်းတိုး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၂၂ ရက်။ အမေရိကန်သမ္မတ ဒေါ်နယ်ထရမ့်သည် အီရန်နိုင်ငံနှင့် ချုပ်ဆိုထားသော အပစ်အခတ်ရပ်စဲရေး သဘောတူညီချက် သက်တမ်းကုန်ဆုံးရန် နာရီပိုင်းအလိုတွင် ရက်အကန့်အသတ်မရှိ ထပ်မံတိုးမြှင့်လိုက်သည်။ ဤဆုံးဖြတ်ချက်သည် ဒေသတွင်းစစ်မီး ပြန်လည်တောက်လောင်မည့် အခြေအနေကို ယာယီရှောင်ရှားနိုင်ခဲ့ပြီး သံတမန်နည်းလမ်းဖြင့် ဆက်လက်ဖြေရှင်းနိုင်ရန် အခွင့်အလမ်းတစ်ရပ် ဖန်တီးပေးလိုက်ခြင်းလည်း ဖြစ်သည်။ သမ္မတထရမ့်သည် အင်္ဂါနေ့နံနက်ပိုင်းအထိ အဆိုပါသက်တမ်းကို တိုးမြှင့်ရန် ဆန္ဒမရှိကြောင်း ပြောကြားခဲ့သော်လည်း ပါကစ္စတန်နိုင်ငံမှ ကြားခံစေ့စပ်သူများဖြစ်သည့် စစ်သေနာပတိချုပ် အဆင်မ် မူနာ (Asim Munir) နှင့် ဝန်ကြီးချုပ် ရှီဘာ့ဇ် ရှာရဖ် (Shehbaz Sharif) တို့၏ မေတ္တာရပ်ခံမှုကြောင့် ယခုကဲ့သို့ ဆုံးဖြတ်ခဲ့ခြင်းဖြစ်ကြောင်း ၎င်း၏ Truth Social ကွန်ရက်တွင် ဖော်ပြထားသည်။ အီရန်အစိုးရအတွင်း သဘောထားကွဲလွဲမှုများ ရှိနေခြင်းကြောင့် တညီတညွတ်တည်းဖြစ်သော အဆိုပြုချက်တစ်ရပ် တင်ပြနိုင်ခြင်းမရှိသေးမီ အချိန်စောင့်ဆိုင်းပေးရန် ပါကစ္စတန်ဘက်က တောင်းဆိုခဲ့ခြင်းဖြစ်ပါသည်။ အီရန်၏ အမြင့်ဆုံးခေါင်းဆောင်သစ် မိုဂျတာဘာ ခါမေနီ (Mojtaba Khamenei) ၏ ဆုံးဖြတ်ချက်ကို ဗုဒ္ဓဟူးနေ့တွင် ရရှိမည်ဟု ခန့်မှန်းထားကြသည်။ #အီရန်စစ်ပွဲ #ဒေါ်နယ်ထရမ့် #အမေရိကန်အီရန်ဆွေးနွေးပွဲ #MojtabaKhamenei #ShehbazSharif #AsimMunir

ဒေါ်နယ်ထရမ့်က အပစ်အခတ်ရပ်စဲရေးကို ရက်အကန့်အသတ်မရှိ

Apr 22

ဂျပန်က နိုင်ငံတကာသို့ လက်နက်တင်ပို့တော့မည် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၂၂ ရက်။ ဂျပန်နိုင်ငံသည် ဆယ်စုနှစ်ပေါင်းများစွာ ကျင့်သုံးခဲ့သော လက်နက်တင်ပို့မှုဆိုင်ရာ တင်းကျပ်သည့် ကန့်သတ်ချက်များကို အင်္ဂါနေ့တွင် ဖြေလျှော့ပေးလိုက်သည်။ ဤပြောင်းလဲမှုကြောင့် ဂျပန်နိုင်ငံသည် ၎င်းနှင့် ကာကွယ်ရေးဆိုင်ရာ သဘောတူညီချက်ရယူထားသော အမေရိကန်၊ ဗြိတိန် အပါအဝင် နိုင်ငံပေါင်း ၁၇ နိုင်ငံသို့ တိုက်ခိုက်ရေးသုံး လက်နက်များ ရောင်းချခွင့် ရရှိသွားမည်ဖြစ်သည်။ ယခင်က ဂျပန်နိုင်ငံသည် ကယ်ဆယ်ရေး၊ သယ်ယူပို့ဆောင်ရေး၊ သတိပေးစနစ်၊ စောင့်ကြည့်ရေးနှင့် မိုင်းရှင်းလင်းရေးဟူသော ကဏ္ဍ ၅ ခုတွင်သာ လက်နက်ကိရိယာ တင်ပို့ခွင့်ရှိခဲ့ခြင်းဖြစ်သည်။ ၂၀၂၅ ခုနှစ်၊ အောက်တိုဘာလတွင် ဝန်ကြီးချုပ်ဖြစ်လာသည့် ဆာနိုင်း တာကာအီချီ (Sanae Takaichi) က လက်ရှိလုံခြုံရေးအခြေအနေ တင်းမာမှုများအရ ငြိမ်းချမ်းရေးကို တစ်နိုင်ငံတည်း မကာကွယ်နိုင်တော့ကြောင်း ပြောကြားခဲ့သည်။ သို့သော်လည်း စစ်ပွဲဖြစ်ပွားနေသည့် နိုင်ငံများကို လက်နက်ရောင်းချခြင်းမပြုသည့် မူဝါဒကိုမူ ဆက်လက်ထိန်းသိမ်းသွားမည်ဟု ဆိုသည်။ တရုတ်နိုင်ငံကမူ ဂျပန်၏ ယခုလုပ်ရပ်သည် မဆင်မခြင် စစ်အင်အားချဲ့ထွင်မှုဖြစ်ကြောင်း ပြင်းပြင်းထန်ထန် ဝေဖန်ကန့်ကွက်ထားပါသည်။ #JapanWeapon #JapanArmy #Japan #ဂျပန်လက်နက်ရောင်းချတင်ပို့မှု

ဂျပန်က နိုင်ငံတကာသို့ လက်နက်တင်ပို့တော့မည်

Apr 21

ထီးချိုင့်-ကသာကြား မြစ်ရိုး ကျေးရွာများ တိမ်းရှောင်နေရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၂၁ ရက်။ ထီးချိုင့်မြို့ကို ပြန်လည်ထိန်းချုပ်ထားသည့် စစ်တပ်သည် ဧရာဝတီမြစ်ကြောင်းအတိုင်း ကသာမြို့ ဘက်သို့ အင်အားအလုံးအရင်းဖြင့် စစ်ကြောင်းထိုး ဝင်ရောက်လာရာ လမ်းတစ်လျှောက်ရှိ ကျေးရွာများမှ ဒေသခံပြည်သူများမှာ ရွာလုံးကျွတ် ဘေးလွတ်ရာသို့ အရေးပေါ် တိမ်းရှောင်နေကြရသည်။ ပြီးခဲ့သည့် ဧပြီလ ၁၃ ရက် (သင်္ကြန်အကြိုနေ့) ကတည်းက ထီးချိုင့်မြို့မှ အင်အား ၃၀၀ ခန့်ဖြင့် စတင် ထွက်ခွာ လာသည့် အဆိုပါစစ်ကြောင်းကြောင့် လမ်းတစ်လျှောက်ရှိ သာဂရ၊ ကလုံနှင့် အင်းရွာလေး အပါအဝင် မြစ်ကမ်းဘေး ကျေးရွာများကို တော်လှန်ရေး အင်အားစုများ ဘက် မှ စစ်ရေးဗျူဟာအရ ဖယ်ပေးလိုက်ရပြီးနောက် ဒေသခံအများအပြား နေရပ်စွန့်ခွာ တိမ်းရှောင်နေကြရခြင်း ဖြစ်သည်။ လက်ရှိတွင် စစ်အစိုးရတပ် စစ်ကြောင်းသည် ကသာမြို့နှင့် ၈ မိုင်ခန့်အကွာရှိ မဲဟင်းရွာနှင့် ကလုံရွာကြားသို့ ရောက်ရှိနေပြီး စစ်ကြောင်း ၃ ကြောင်းခွဲ၍ ဒရုန်းနှင့် လက်နက်ကြီးများကို အဓိကအသုံးပြုကာ နယ်မြေရှင်းလင်းနေကြောင်း မြေပြင်သတင်းရင်းမြစ်က ပြောသည်။သည်။ ဒေသခံတော်လှန်ရေးတပ်ဖွဲ့ဝင်တစ်ဦးက “သူတို့က မြစ်ကြောင်းစိုးမိုးရေးအတွက် ထိုးလာတဲ့သဘောဗျ။ စစ်ကြောင်းက ၃ ကြောင်းခွဲပြီး တက်လာတာဆိုတော့ ကျနော်တို့ဘက်က နယ်မြေတချို့ကို ပြန်ဖယ်ပေးလိုက် ရတယ်။ ဒရုန်းတွေနဲ့ အပေါ်ကနေ အရင်ကြည့်ပြီး လက်နက်ကြီးနဲ့ ထုတာ။ အခုတော့ ကသာနဲ့ တော်တော် နီးနေပြီ၊ မြစ်ကမ်းဘေးရွာတွေက လူတွေလည်း အကုန်ပြေးနေရတယ်” ဟု ပြောသည်။ စစ်အစိုးရတပ်သည် မိုးတွင်းကာလ မြစ်ရေတက်ချိန်တွင် မန္တလေးမှ ဗန်းမော်အထိ ရိက္ခာနှင့် စစ်လက်နက်များ အဟန့်အတားမရှိ ပို့ဆောင်နိုင်ရန် ဧရာဝတီမြစ်ကြောင်းစိုးမိုးရေးကို အသည်းအသန် လုပ်ဆောင်လာခြင်း ဖြစ်သည်ဟု ဆိုသည်။ လက်ရှိတွင် သာဂရ၊ ကလုံနှင့် အင်းရွာလေး အပါအဝင် မြစ်ကမ်းဘေးကျေးရွာများမှ ဒေသခံပြည်သူများမှာ ကိုင်းတောများအတွင်း၌ ခက်ခဲစွာ ပုန်းရှောင်နေရပြီး ရိက္ခာပြတ်လပ်မှုနှင့် ရင်ဆိုင်နေရသည်။ မြေပြင်သတင်းရင်းမြစ်တစ်ဦးက “မြစ်ကြောင်းတစ်လျှောက် ရွာတွေက လူတွေလည်း ထပ်တိုးပြီး ပြေးနေရ တာဆိုတော့ ကူညီပေးဖို့ တော်တော်လေး ခက်ခဲနေတယ်” ဟု ပြောသည်။ စစ်အစိုးရတပ်ဘက်က ကသာမြို့ကို အပြည့်အဝ ထိန်းချုပ်နိုင်ပြီဟု ဝါဒဖြန့်ကာ ဒေသခံများကို မြို့ထဲပြန်ဝင်ရန် ဖိအားပေးနေသော်လည်း မြေပြင်တွင် လေကြောင်းနှင့် လက်နက်ကြီးပစ်ခတ်မှုများ နေ့စဉ်ရှိနေဆဲဖြစ်သည်။ ကသာတော်လှန်ရေးတပ်ဖွဲ့ဝင်တစ်ဦးကမူ တော်လှန်ရေးအင်အားစုများဘက်မှ အလုံးစုံ ဆုတ်ခွာသွားခြင်းမျိုး မဟုတ်ဘဲ တိုက်ပွဲများ ဆက်လက်ဆင်နွှဲရန် ပြင်ဆင်နေသဖြင့် မြို့ထဲသို့ ပြန်လည်ဝင်ရောက်ခြင်းမပြုရန် သတိပေးထားသည်။ ကသာတော်လှန်ရေးတပ်ဖွဲ့ဝင် တစ်ဦးက “ပြည်သူတွေကို မြို့ထဲမဝင်ကြပါနဲ့ဦးလို့ ကျနော်တို့ တောက်လျှောက် ပြောနေတာပါ။ ဒါဟာ တိုက်ပွဲက ပြီးသွားတာ မဟုတ်ပါဘူး၊ ဒီတိုက်ပွဲက ပြန်ဖြစ်မှာပါ။ ကျနော်တို့ တော် လှန်ရေးဘက်ကလည်း အရှုံးပေးလို့မရဘူး၊ မနိုင်နိုင်အောင် တိုက်ရမှာပါ။ ဒါဟာ စစ်ရေးအရ ခဏတာ အနည်း ငယ် နောက်ဆုတ်ပေးတဲ့ သဘောပါပဲ၊ အပြီးအပိုင် ထွက်ခွာသွားတာ မဟုတ်ပါဘူး” ဟု ပြောသည်။ ကသာမြို့တွင် ၂၀၂၅ ခုနှစ်၊ ဒီဇင်ဘာလကုန်ပိုင်း မြို့သိမ်းတိုက်ပွဲ စတင်ခဲ့သည့်အချိန်မှစ၍ ယနေ့အထိ နှစ်ဖက် တပ်များအကြား စစ်ရေးတင်းမာမှုများ လျော့ပါးသွားခြင်းမရှိဘဲ ယခုကဲ့သို့ စစ်အစိုးရတပ်၏ အင်အား အလုံး အရင်းဖြင့် စစ်ကြောင်းထိုး ဝင်ရောက်လာမှုကြောင့် ရှေ့ဆက်၍ တိုက်ပွဲများ ပိုမိုပြင်းထန်လာမည်ကို ဒေသခံ များက စိုးရိမ်လျက် ရှိသည်။ #ကသာတိုက်ပွဲ #ထီးချိုင့် #စစ်အုပ်စု #စစ်ဘေးရှောင်

ထီးချိုင့်-ကသာကြား မြစ်ရိုး ကျေးရွာများ တိမ်းရှောင်နေရ

Apr 21

လေယာဉ်ဗုံး ထိုင်းဘက်ကျပြီး နယ်စပ် ခရိုင်များတွင် လုံခြုံရေး တင်းကြပ်ထား သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၂၁ ရက်။ သံလွင်မြစ်ဘေးရှိ ဆေးရုံကို စစ်အစိုးရတပ်က ဗုံးကြဲခဲ့ရာ ထိုင်းဘက်အခြမ်းသို့ ကျရောက်ပေါက်ကွဲမှုကြောင့် နယ်စပ် ၄ ခရိုင်တွင် လုံခြုံရေး အရေးပေါ်တင်းကျပ်ထားသည်ဟု မြေပြင်သတင်းရင်းမြစ်များက ပြောသည်။ ကရင်ပြည်၊ ဖာပွန်ခရိုင်အတွင်းရှိ စစ်ဘေးရှောင်များကို ဆေးကုသပေးနေသည့် ဆေးရုံနှင့် အရပ်သားနေရာ များကို စစ်အစိုးရတပ်က လေကြောင်းမှ ဗုံးကြဲတိုက်ခိုက်ခဲ့ရာ ထိုင်းဘက်အခြမ်းသို့ပါ ဗုံးကျရောက်ပေါက်ကွဲ ခဲ့ပြီး နယ်စပ်ဒေသခံများ အရေးပေါ် ထွက်ပြေးတိမ်းရှောင်နေကြရသည်။ ပြီးခဲ့သည့် ဧပြီလ ၂၀ ရက် နံနက် ၁၁ နာရီခန့်တွင် စစ်အစိုးရလေတပ်သည် ဖာပွန်ခရိုင်၊ သံလွင်မြစ်ကမ်းနံဘေးရှိ KNU ၏ အူးမေထဆေးရုံနှင့် လူနေရပ်ကွက်များကို တိုက်လေယာဉ်များဖြင့် ဗုံး ၁၀ လုံးခန့် ကြဲချခဲ့ခြင်းဖြစ် သည်။ အဆိုပါတိုက်ခိုက်မှုကြောင့် ဆေးရုံအဆောက်အအုံများ ပြာကျပျက်စီးခဲ့သည့်အပြင် ဗုံးတစ်လုံးမှာ ထိုင်းဘက် ခြမ်းရှိ သဲသောင်ပြင်ပေါ်သို့ ကျရောက်ပေါက်ကွဲခဲ့သည်။ ထိုင်းဘက်ခြမ်းက မြေပြင်သတင်းရင်းမြစ်က “ကျနော်တို့က မနေ့က ဗုံးကြဲသွားတဲ့ အူးမဲထ ဆေးရုံရဲ့ ဒီဘက်ခြမ်း ထိုင်းဘက်ခြမ်းမှာပါ။ မနေ့ ၁၁ နာရီလောက်မှာ လေယာဉ်နဲ့ လာကြဲတော့ ကြဲခံရတဲ့နေရာက မီးခိုးတွေ ထွက်လာတယ်။ ဆေးရုံနေရာနဲ့ အဲ့ဒီနားတဝိုက်ကို ၆ လုံး - ၇ လုံးလောက် ကြဲသွားတာ။ ဆေးရုံက တော့ အကုန်ပျက်သွားတယ်။ အဲ့ဒီမှာရှိတဲ့ အစည်းအဝေးခန်းပေါ့ အဲ့ဒါလည်း ပျက်စီးသွားတယ်။ ပျက်စီးသွား တာ များတယ်။ လူတော့ ထိခိုက်တာမျိုးမရှိဘူးလို့ ဒီဘက်ခြမ်းကို သတင်းပို့တာပေါ့နော်” ဟု ပြောသည်။ အဆိုပါဖြစ်စဉ်နှင့်ပတ်သက်၍ ထိုင်းနယ်စပ်သို့ တိမ်းရှောင်နေရသည့် ဒေသခံတစ်ဦးက မြေပြင်အခြေအနေကို အခုလို ပြောပြပါတယ် - အဆိုပါ ထိုင်းသတင်းရင်းမြစ်က “ထိုင်းဘက်ခြမ်း သဲသောင်ပြင်ပေါ် ဗုံးကျတော့ ဟိုဘက်က ရွာသားတွေလည်း အကုန်လန့်ပြီး ပြေးကြရတာ။ ထိုင်းဘက်က အိမ်တွေပါ မှန်တွေကွဲ၊ အမိုးတွေပွင့်ကုန်တာ။ အခုထိတော့ သံလွင် မြစ်ဘေးမှာ ဘယ်သူမှ မနေရဲကြတော့ဘူး” ဟု ပြောသည်။ ဗုံးကျရောက်ပေါက်ကွဲမှုကြောင့် ထိုင်းဘက်ခြမ်းရှိ မယ့်စန်လက်ရွာမှ နေအိမ် ၁၀ လုံးခန့် ပျက်စီးခဲ့ပြီး အိမ်ထောင်စု ၄၀ ကျော်မှာ ဘေးလွတ်ရာသို့ အရေးပေါ် ရွှေ့ပြောင်းခဲ့ရကြောင်း ထိုင်းသတင်းဌာနများတွင် ဖော်ပြထားသည်။ အဆိုပါ အိမ်ထောင်စု ၄၀ ခန့်ကို သံလွင်မြစ်ကမ်းနံဘေးမှ ၇ ကီလိုမီတာခန့် ကွာဝေးသော ဟွေ့ကောင်ကတ် (Huay Kong Kat) ကျေးရွာရှိ ဘေးကင်းလုံခြုံရာ နေရာများသို့ ယာယီရွှေ့ ပြောင်း နေထိုင်ကြရန် ထိုင်းနိုင်ငံ ဘက်ခြမ်းမှ မယ့်စန်လက် (Mae Sam Laeb) ကျေးရွာလူကြီးက အသံချဲ့စက်ဖြင့် အရေးပေါ် နှိုးဆော်ခဲ့ရကြောင်း ထိုင်းသတင်းမီဒီယာများတွင် ဖော်ပြသည်။ ထို့ပြင် မယ့်စရိန်း (Mae Sariang) ခရိုင် အုပ်ချုပ်ရေးမှူးနှင့် စစ်ဘက်တာဝန်ရှိသူများကလည်း ဗုံးစထိမှန်၍ နေအိမ်အမိုးပျက်စီး သွားသည့် မယ့်ဝမ်ကျေးရွာသို့ သွားရောက်စစ်ဆေးခဲ့ပြီး နယ်စပ်တစ်လျှောက် ၂၄ နာရီပတ်လုံး ကင်းလှည့်ရန်နှင့် အရေးပေါ်ဗုံးခိုကျင်းများ ပြင်ဆင်ထားရန် ညွှန်ကြားခဲ့သည်။ နယ်စပ်စစ်မီး ပြင်းထန်လာမှုကြောင့် ထိုင်းပြည်ထဲရေးဝန်ကြီးဌာနက မယ်ဟောင်ဆောင်၊ ချင်းမိုင်၊ ချင်းရိုင်နှင့် တာ့ခ်ခရိုင်ရှိ အာဏာပိုင်များကို လုံခြုံရေးတင်းကျပ်ရန်နှင့် ဒေသခံများကို ၂၄ နာရီပတ်လုံး ကူညီစောင့်ရှောက်ရန် အရေးပေါ်ညွှန်ကြားထားကြောင်း The Nation Thailand က ဧပြီလ ၂၁ ရက်နေ့တွင် ဖော်ပြခဲ့သည်။ KNU ၏ ထုတ်ပြန်ချက်အရ ပြီးခဲ့သည့် ၁၀ ရက်အတွင်း ဖာပွန်ခရိုင်၌ စစ်အစိုးရတပ်၏ ပစ်မှတ်ထား တိုက်ခိုက် မှုများကြောင့် အရပ်သား ၆ ဦး သေဆုံးကာ ၁၃ ဦး ဒဏ်ရာရရှိခဲ့သည်။ လက်ရှိတွင် ထိုင်းအာဏာပိုင်များသည် နယ်စပ်တစ်လျှောက် ကင်းလှည့်ခြင်းနှင့် စစ်ဆေးရေးဂိတ်များကို အရှိန်မြှင့် လုပ်ဆောင်နေပြီး၊ တိုက်ပွဲကြောင့် ပျက်စီးသွားသည့် နေအိမ်များနှင့် ပိုင်ဆိုင်မှုများအတွက် ကနဦး ကူညီကယ်ဆယ်ရေးများကို စတင်ဆောင်ရွက်နေသည်ဟု ဆိုသည်။ ယခုကဲ့သို့ နယ်စပ်ဖြတ်ကျော် စစ်မီးကူးစက်လာမှုကြောင့် ထိုင်း-မြန်မာ ကုန်သွယ်ရေးနှင့် ဒေသခံများ၏ နေ့စဉ် ဘဝအပေါ် ရိုက်ခတ်မှုများ ရှိနေသည့်အတွက် နယ်စပ်တစ်လျှောက် အခြေအနေများကို ၂၄ နာရီပတ်လုံး စောင့်ကြည့်လျက်ရှိကြောင်း ထိုင်းသတင်းများက ဆိုသည်။ ဓါတ်ပုံ - Maesariang District Administration Office #ဖာပွန် #မူတြော် #ဗုံးကြဲ #လေကြောင်းတိုက်ခိုက်

လေယာဉ်ဗုံး ထိုင်းဘက်ကျပြီး နယ်စပ် ခရိုင်များတွင် လုံခြုံရေး တင်းကြပ်ထား

« Prev 1 … 80 81 82 83 84 … 1,113 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

တရုတ်နိုင်ငံခြားရေးဝန်ကြီး ဝမ်ယိ တောင်ကိုရီးယားနှင့် အင်ဒိုနီးရှားသို့ သွားမည် — August 19, 2026 2:17 pm
ဒုံးကျည်ဖြင့် တိုက်ခိုက်ခံရပြီးနောက် အီရန်အပေါ် UAE က ကုန်သွယ်ရေး ပိတ်ဆို့ — August 19, 2026 2:14 pm
ရုရှားတွင် ဘဏ်အပ်ငွေ ထုတ်ယူမှု စံချိန်တင် မြင့်တက် — August 19, 2026 2:11 pm

Recent Posts

တနင်္သာရီ လောင်းလုံးတွင် စစ်တပ်က ရမ်းသမ်းပစ်ခတ်၍ သားအဖ ၂ ဦး သေဆုံး
ဘန်ကောက် မြန်မာသံရုံးက PV ပတ်စပို့ သက်တမ်းတိုးခြင်း ရုတ်တရက် ရပ်ဆိုင်း
မောင်တော နယ်စပ်နှင့် မြို့တွင်း၌ AA လုံခြုံရေး တင်းကျပ်စွာ တိုးမြှင့်ထား
ပင်လည်ဘူးတွင် စစ်တပ်က ရက်ဆက် ဗုံးကြဲ၍ ကလေးငယ်အပါအဝင် ၉ ဦးထက်မနည်း သေဆုံး
ဝမ်းပျက်ဝမ်းလျှောရောဂါကြောင့် လူသေဆုံးမှု ရှိနေစဉ် စစ်တပ်က စစ်တွေကို လမ်းပိတ်ထား

Archives

Archives

×Close