NMG Doh – Page 99 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Author Archive

NMG Doh

Author: NMG Doh

Nov 5

ကရင်ပြည် တိုက်ပွဲ၌ အကြပ်အတည်းတွေ့သည့် စစ်တပ်က လေကြောင်းကို အပြင်းအထန် အားကိုးလာ သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၅ ရက်။ ကရင်ပြည်တိုက်ပွဲများ အရှိန်မြင့်လာနေပြီး မြေပြင်၌ အကျပ်အတည်းတွေ့နေသည့် စစ်ကော်မရှင်တပ်သည် လေကြောင်းကို အပြင်းအထန် အားကိုးလာနေသည်ဟု မြေပြင်သတင်းအရင်းအမြစ်များက ပြောသည်။ ကရင်ပြည်ရှိ စစ်မျက်နှာနှစ်ခုဖြစ်သော ဖာပွန်နှင့် မြဝတီနယ်စပ်ဒေသများတွင် စစ်ကော်မရှင်တပ်နှင့် ကရင် အမျိုးသား အစည်းအရုံး (KNU) ပူးပေါင်းတပ်ဖွဲ့များကြား တိုက်ပွဲများသည် နိုဝင်ဘာလဆန်းပိုင်းအထိ ဆက် လက် ပြင်းထန်နေဆဲဖြစ်သည်။ မြေပြင်ထိုးစစ်များ အကျပ်အတည်းတွေ့နေသည့် စစ်ကော်မရှင်တပ်သည် လေကြောင်းနှင့် နည်းပညာမြင့် ဒရုန်းများကို အဓိကအားထား တိုက်ခိုက်နေကြောင်း မြေပြင်သတင်းရင်းမြစ်များက ပြောသည်။ KNU တပ်မဟာ (၅) နယ်မြေ (ဖာပွန်) ဘက်ခြမ်းတွင် စစ်ကော်မရှင် စစ်ကြောင်းတစ်ခုသည် ကတိုင်တိကျေးရွာ အနီးရှိ ဗျူဟာကုန်းဆီသို့ တက်ရောက်ရန် စက်တင်ဘာလကုန်မှစ၍ တစ်လကျော်ကြာ ကြိုးပမ်းနေသော်လည်း ရှေ့တိုးမရဘဲ ပိတ်မိနေသည်ဟု သိရသည်။ KNU နှင့် နီးသပ်သူတစ်ဦးက “စက်တင်ဘာ လကုန်ကတည်းက စတဲ့ ဒီထိုးစစ်ဟာ စစ်ကော်မရှင်က လေ ကြောင်းပစ်ကူတွေ ဘယ်လောက် ပေးပေး မြေပြင်မှာတော့ ရှေ့တက်လို့မရဘဲ ပိတ်မိနေတယ်” ဟု ပြောသည်။ သို့သော် မြေပြင်တွင် ရှေ့မတိုးနိုင်လေ၊ စစ်ကော်မရှင်တပ်သည် လေယာဉ်ဖြင့် ဗုံးကြဲခြင်း၊ ဒရုန်းဖြင့် တိုက်ခိုက် ခြင်းများကို ပိုမိုလုပ်ဆောင်လာသည်။ ဤရက်ပိုင်းအတွင်း ဗုံးကြဲတိုက်ခိုက်မှုများကြောင့် ကျောင်းများ၊ ဘော်ဒါဆောင်များကဲ့သို့ အရပ်သား အဆောက်အအုံများ ပျက်စီးဆုံးရှုံးမှုများ ရှိခဲ့သည်။ တစ်ချိန်တည်းတွင် KNU တပ်မဟာ (၆) နယ်မြေဖြစ်သည့် မြဝတီဘက်ခြမ်းရှိ လေးကေကော်၊ ရသေ့ဂူနှင့် ဖလူးကျေးရွာ ပတ်ဝန်းကျင်များတွင်လည်း တိုက်ပွဲများ ဆက်ဖြစ်နေသည်။ မြေပြင် စစ်ရေးအခြေအနေကို သိသူတစ်ဦးက “စစ်ကော်မရှင်တပ်ဟာ ကရင်ပြည်မှာ လိုချင်တဲ့ ပစ်မှတ်တွေကို မြေပြင်တပ်နဲ့ သိမ်းယူဖို့ အခက်အခဲရှိနေတာကြောင့် နည်းပညာနဲ့ လေကြောင်းအင်အားကို အပြင်းအထန် အားကိုးပြီး ဖိအားပေးနေတာကို တွေ့ရပါတယ်” ဟု သုံးသပ်သည်။ စစ်ကော်မရှင်တပ်သည် ပုံမှန်တပ်သားများထက် နည်းပညာမြင့် ဒရုန်းများနှင့် လက်နက်ကြီးများကို အားထား ကာ ထိုးစစ်ဆင်နေသော်လည်း KNU/KNLA ပူးပေါင်းတပ်များက ပြင်းပြင်းထန်ထန် ခုခံနေသည်ဟု ဒေသခံများ က ပြောသည်။

ကရင်ပြည် တိုက်ပွဲ၌ အကြပ်အတည်းတွေ့သည့် စစ်တပ်က လေကြောင်းကို အပြင်းအထန် အားကိုးလာ

Nov 4

စစ်ကော်မရှင် စစ်ကြောင်းကြောင့် ပြည်သူ ၁ သောင်းကျော် တောတောင်ထဲ တိမ်းရှောင်နေရ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၄ ရက်။ မကွေးတိုင်း၊ ပေါက်မြို့နယ်တွင် စစ်ကော်မရှင်တပ်၏ စစ်ကြောင်းကြောင့် ပြည်သူ ၁၂,၀၀၀ ကျော် တောတောင်ထဲ တိမ်းရှောင်နေရသည်ဟု ပေါက်မြို့နယ် (ပအဖ) လူသားချင်းစာနာဌာနက ထုတ်ပြန်သည်။ ပေါက်မြို့နယ်အတွင်း ဆိပ်ဖြူမြို့နယ်အခြေစိုက် ကပစ (၂၂) လက်နက်စက်ရုံမှ စစ်သား ၅၀၀ နီးပါး သည် ဒေသခံ ပျူစောထီးများ ပူးပေါင်းကာ စစ်ကြောင်း (၃) ကြောင်းခွဲ၍ နိုဝင်ဘာလ ၃ ရက်နေ့မှ စတင်ကာ စစ်ကြောင်း ထိုးလာခြင်း ဖြစ်သည်။ အဆိုပါ စစ်ကြောင်းမှာ ကျေးရွာများထဲ စစ်ကြောင်းထိုး၊ မီးရှို့ဖျက်ဆီးမှုများ လုပ်နေကြောင်း ပေါက်မြို့နယ် (ပအဖ) လူသားချင်းစာနာဌာန၏ နိုဝင်ဘာလ ၄ ရက်နေ့ ထုတ်ပြန်ချက်တွင် ဖော်ပြထားသည်။ စစ်ကော်မရှင်တပ်၏ ထိုးစစ်ကြောင့် ပေါက်မြို့နယ်အတွင်းရှိ ကျေးရွာ ၁၉ ရွာ မှ အိမ်ထောင်စု ၃,၀၀၀ ကျော်၊ လူဦးရေ ၁၂,၀၀၀ ကျော် သည် ဘေးလွတ်ရာ တောတောင်များထဲသို့ ထွက်ပြေးတိမ်းရှောင်နေကြရသည်။ ထို့အပြင် စစ်ကော်မရှင် စစ်ကြောင်းများသည် ကျေးရွာများအတွင်းရှိ ပြည်သူ့နေအိမ်များကို မီးရှို့ဖျက်ဆီးလျက် ရှိသည်။ ပေါက်မြို့နယ် ပအဖနှင့် နီးစပ်သူတစ်ဦးက “မနေ့ကဆို မြို့ရဲ့ အရှေ့ပိုင်းက အုန်းတောတောင်စုက နေအိမ်တွေ မီးရှို့ခံရတယ်လို့ ဒေသခံတွေဆီက သတင်းရထားပါတယ်” ဟု ပြောသည်။ အဆိုပါ စစ်ကြောင်းထိုးမှုသည် ပေါက်မြို့နယ်၏ တောင်၊ မြောက်နှင့် အနောက်ဘက်ခြမ်းရှိ တော်လှန်ရေးတပ်ဖွဲ့ များ စိုးမိုးရာနှင့် စစ်ရေးအရ အရေးပါသည့် ဒေသများကို ထိန်းချုပ်နိုင်ရန် စစ်ကော်ရှင်တပ်က ကြိုးပမ်းခြင်း ဖြစ်သည်ဟု စစ်ရေးသတင်း အရင်းအမြစ်များက သုံးသပ်သည်။ စစ်ရေးအခြေအနေကို သိသူ တစ်ဦးက “အခုစစ်ကြောင်းထိုးတာက တောင်ဘက်ကနေ ဆိပ်ဖြူစစ်ကြောင်းကို အဓိကထားပြီး ထိုးစစ်ဆင်နေတာ ဖြစ်ပြီး၊ သူတို့က တော်လှန်ရေးအားကောင်းတဲ့ နယ်မြေတွေကို ဖျက်ဆီးပြီး စစ်မျက်နှာအသစ်ဖွင့်ချင်ပုံရတယ်” ဟု ပြောသည်။ ဆိပ်ဖြူအခြေစိုက် ကပစ (၂၂) စစ်ကြောင်းမှာ တပ်မ (၉၉) လက်အောက်ခံ တပ်ရင်း (၁၀၉)၊ (၄၁၉)၊ (၁၄) တို့ ပါဝင်ကြောင်း သိရသည်။ အဆိုပါ စစ်ကြောင်းကို လွန်ခဲ့သည့် ငါးရက်ခန့်က (Young Revolution Front - ယောဒေသ ကာကွယ်ရေး တပ်ဖွဲ့) က ဝင်ရောက်တိုက်ခိုက်ခဲ့ရာ စစ်သား သုံးဦးကို အရှင်ဖမ်းမိပြီး အလောင်းအချို့နှင့် လက်နက်ခဲယမ်းများ သိမ်းဆည်းရမိခဲ့ကြောင်း တော်လှန်ရေးသတင်းရင်းမြစ်များက ပြောသည်။ စစ်ကော်မရှင်တပ်သည် နိုင်ငံအနှံ့ လက်လွတ်ဆုံးရှုံးထားသည့် ဒေသများကို အင်အားဖြင့် စစ်ကြောင်းထိုးကာ အရပ်သားနေအိမ်များ မီးရှို့ခြင်းနှင့် လက်နက်ကြီး၊ ဒရုန်းတို့ဖြင့် နေ့စဉ် ပစ်ခတ်တိုက်ခိုက်မှုများ ဆက်တိုက် လုပ်ဆောင်နေသည်ဟုလည်း ထုတ်ပြန်ချက်များက ဖော်ပြသည်။ ပေါက်မြို့နယ် - ပအဖ လူသားစာနာဌာနက စစ်ဘေးရှောင် ပြည်သူများအတွက် အကူအညီများ လိုအပ်နေ ကြောင်းလည်း ထုတ်ပြန်ပြောဆိုထားသည်။ ဓါတ်ပုံ - ပေါက်မြို့နယ် - ပအဖ

စစ်ကော်မရှင် စစ်ကြောင်းကြောင့် ပြည်သူ ၁ သောင်းကျော် တောတောင်ထဲ တိမ်းရှောင်နေရ

Nov 4

ကရင်နီ ဒေသခံများ အသက်စွန့်က စပါးရိတ်နေရ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၄ ရက်။ ကရင်နီပြည်၊ ဒီးမောဆိုနှင့် ဖရူဆိုမြို့နယ်တို့ရှိ ဒေသခံတောင်သူများသည် စစ်ကော်မရှင်တပ်၏ ဒရုန်းဗုံးနှင့် လက် နက်ကြီးရန်များ ကြားမှ ရိတ်သိမ်းချိန် မကျော်လွန်စေရန် အတွက် စပါးခင်းများသို့ အသက်စွန့်၍ သွားလာ လုပ်ကိုင်နေကြရကြောင်း ဒေသခံသတင်းရင်းမြစ်များနှင့် တာဝန်ရှိသူများက ပြောသည်။ ဒေသခံတောင်သူများသည် စစ်ကော်မရှင်တပ် ထိုးစစ်အနီးတစ်ဝိုက်ရှိ စပါးခင်းများ ကျန်ရှိနေသေးသည့်အတွက်၊ စစ်ကော်မရှင်၏ ရည်ရွယ်ချက်ရှိရှိ တိုက်ခိုက်မှုများကို ရင်ဆိုင်နေရသည်။ ဖရူဆိုမြို့နှင့် ဒီးမောဆိုမြို့ကို ဆက်သွယ်ထားသော ပြည်ထောင်စု လမ်းမကြီး တစ်လျှောက်နှင့် ဒီးမော့ဆို အနောက်ခြမ်းရှိ ကျေးရွာ ၅ ခုခန့်မှ လယ်ဧက ၂၀၀ နီးပါး သည် ရိတ်သိမ်းရန် ကျန်ရှိနေသေးသည်ဟု ဒေသခံများ က ပြောသည်။ ဖရူဆိုဒေသခံ အမျိုးသားတောင်သူတစ်ဦးက ၎င်းတို့ရင်ဆိုင်နေရသည့် အခြေအနေနှင့် ပတ်သက်၍ “တစ်ချို့ ကတော့ သွားသိမ်းတယ်ပေါ့ မဖြစ်မနေ သိမ်းရမယ့်ဟာမျိုးတွေလည်းရှိတယ်။ ဘာလို့လဲဆိုတော့ သူတို့ စားဝတ်နေရေးက အဆင်မပြေဘူးဆိုတော့ မဖြစ်မနေ သွားသိမ်းတဲ့ဟာမျိုးတော့ ရှိတယ်ပေါ့နော်။ ဒါပေမယ့် အခြေနေတွေတော့ကြည့်ရတာပေါ့ ဒရုန်းလာရင် ထွက်ပြေးရမှာပေါ့” ဟု ပြောသည်။ အဆိုပါ ဒေသခံတောင်သူ၏ အဆိုအရ စစ်ကော်မရှင်တပ်၏ ဒရုန်းများသည် နှစ်လခန့်က စတင်၍ လူစုလူဝေး ကို ဦးတည် ဗုံးချတိုက်ခိုက်နေပြီး၊ လူများသောနေရာ၊ လယ်ခင်း၊ စပါးခင်း၊ မြေပဲခင်း စသည့် နေရာများကို ကင်းထောက်၍ သော်လည်းကောင်း၊ ကင်းမထောက်ဘဲနှင့် သော်လည်းကောင်း လာရောက်တိုက်ခိုက်လေ့ ရှိသည်။ ဩဂုတ်လ နောက်ဆုံးပတ်မှ စတင်ကာ အောက်တိုဘာလ နောက်ဆုံးပတ်အထိ စစ်ကော်မရှင်တပ်၏ ဒရုန်း တိုက်ခိုက်မှုကြောင့် ဖရူဆိုမြို့နယ်မှ ဒေသခံတောင်သူ ၂ ဦး သေဆုံးပြီး ၈ ဦး ဒဏ်ရာရရှိခဲ့သည်။ သေဆုံး၊ ထိခိုက်မှုများမှာ စပါးရိတ်သိမ်းနေသည့် လုပ်ငန်းခွင်များသို့ စစ်ကော်မရှင်မှ ဒရုန်းဖြင့် အကြောင်းမဲ့ ဗုံးကြဲ တိုက်ခိုက်မှုများကြောင့် ဖြစ်ကြောင်း KNDF က နိုဝင်ဘာလ ၃ ရက်နေ့တွင် ထုတ်ပြန်သည်။ အောက်တိုဘာလအတွင်း ဖရူဆိုမြို့နယ်တွင် အမျိုးသမီးတစ်ဦး သေဆုံးကာ၊ အမျိုးသားတစ်ဦး သေဆုံးခဲ့သည်။ ဒီးမော့ဆိုမြို့နယ်တွင်လည်း ဒေသခံရွာသားတစ်ဦး သေဆုံးပြီး သုံးဦးခန့် ထိခိုက်ဒဏ်ရာရရှိခဲ့သည်။ ထို့ပြင် စပါးခြွေစက်နှင့် စပါးအချို့ ထိခိုက်ပျက်စီးခဲ့မှုများလည်း ရှိခဲ့သည်။ ကရင်နီတပ်မတော် (KA) စစ်ရေးချုပ် ဗိုလ်မှူးကြီး ဘုန်းနိုင် က “စပါးရိတ်တဲ့ လူထုတွေကို ဒရုန်းနဲ့ ကြဲချနေတာ တော့ရှိတယ်။ ဖရူဆိုမြို့နယ်ပေါ့နော်၊ ဒီးမော့ဆိုကတော့ ၁၀၂ တပ်ကနေ လက်နက်ကြီးနဲ့ ပစ်တာတော့ရှိတယ်။ ဒရုန်းနဲ့ လာချတာတွေတော့ရှိတယ်” ဟု ပြောသည်။ စပါးရိတ်သိမ်းကာလအတွင်း တော်လှန်ရေးတပ်ပေါင်းစုများဘက်မှ စစ်ရေးဖော်ဆောင်မှုကို ခေတ္တရပ်နားထား သော်လည်း စစ်ကော်မရှင်ဘက်မှ လူထုများအား ရည်ရွယ်ချက်ရှိရှိ တိုက်ခိုက်နေကြောင်း ဗိုလ်မှူးကြီး ဘုန်းနိုင်က ဆက် ပြောသည်။ ဗိုလ်မှူးကြီး ဘုန်းနိုင်က “တိုက်ပွဲမရှိဘူး ခြောက်လှန့်ပြီးတော့ ပစ်တယ်လေ။ လူထုတွေ အလုပ်မလုပ်နိုင်အောင် ငတ်အောင်လေ” ဟု ပြောသည်။ ဒေသခံများ အနေဖြင့် လက်ရှိ ရိတ်သိမ်းနိုင်ခြင်းမရှိသည့် စပါးများ ပျက်စီးဆုံးရှုံးသွားပါက နောင်နှစ်အတွက် စားနပ်ရိက္ခာ အခက်အခဲများ ကြုံတွေ့လာနိုင်သည်ဟု ဒေသခံများက ပြောသည်။ လက်ရှိတွင် ကရင်နီပြည်၌ လွိုင်ကော်၊ ဒီးမော့ဆို၊ ဖရူဆို၊ ဘောလခဲနှင့် ဖယ်ခုံမြို့နယ်များတွင် စစ်ကော်မရှင်တပ် မှ စစ်မျက်နှာ ၅ ခု ဖွင့်ကာ ထိုးစစ်ဆင်နေမှုများရှိနေကြောင်း KNDF က အောက်တိုဘာ ၁၈ ရက်နေ့တွင် ထုတ် ပြန်ခဲ့သည်။ ဒေသခံပြည်သူများအား စစ်ရေး အသိသတိ၊ လုံခြုံရေး သတိထားရန် ဗိုလ်မှူးကြီး ဘုန်းနိုင်ကလည်း အကြံပြု ထားသည်။

ကရင်နီ ဒေသခံများ အသက်စွန့်က စပါးရိတ်နေရ

Oct 31

ရခိုင်ပြည် မြို့နယ် သုံးခုတွင် စစ်ကော်မရှင်က လေယာဉ်ဖြင့် ဗုံးကြဲ၊ အရပ်သား ၆ ဦး သေဆုံး  သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၃၁ ရက်။   ရခိုင်ပြည်က ပုဏ္ဏားကျွန်း၊ ရသေ့တောင်နှင့် ကျောက်ဖြူမြို့နယ်တို့တွင် စစ်ကော်မရှင်တပ်က လေကြောင်း မှ ဗုံးကြဲမှုကြောင့် အရပ်သား ၆ ဦး သေဆုံးခဲ့သည်။  ရခိုင်ပြည်အတွင်း တိုက်ပွဲမရှိသည့် မြို့နယ်များ ဖြစ်သော ပုဏ္ဏားကျွန်း၊ ရသေ့တောင်နှင့် ကျောက်ဖြူမြို့နယ် တို့ ကို ယမန်နေ့ အောက်တိုဘာ ၃၀ ရက် တစ်ရက်တည်း၌ စစ်ကော်မရှင်တပ်က လေကြောင်းမှ ဗုံးကြဲတိုက်ခိုက်ခဲ့ ခြင်း ဖြစ်သည်။  လေကြောင်းမှ တိုက်ခိုက်မှုများကြောင့် အရပ်သားပြည်သူ ၆ ဦး သေဆုံး ခဲ့ပြီး ၁၂ ဦးထက်မနည်း ဒဏ်ရာရရှိခဲ့ သည် ဟု ဒေသခံသတင်းရင်းမြစ်များက ပြောသည်။  ယခုရက်ပိုင်းအတွင်း စစ်ကော်မရှင်တပ်သည် ရခိုင်ဒေသခံများ နေထိုင်ရာ မြို့နယ်များကို လေကြောင်း၊ လက် နက်ကြီး အပြင် ဒရုန်းများဖြင့် ဗုံးကြဲတိုက်ခိုက်မှု နေ့စဉ်ရက်ဆက် ပြုလုပ်လာသဖြင့် အရပ်သား သေဆုံးဒဏ်ရာရရှိမှု မှာ နေ့စဉ်နှင့်အမျှ တိုးလာနေသည်။  အဆိုးရွားဆုံးဖြစ်စဉ်မှာ ကျောက်ဖြူမြို့နယ်၊ ဇင်ချောင်းတိုက်နယ်၊ ဇင်ချောင်းကုန်ဘွေကျေးရွာ ၌ ဖြစ်ပွားခဲ့ပြီး၊ အရပ်သား ၅ ဦး သေဆုံးခဲ့သည်။  အောက်တိုဘာလ ၃၀ ရက်နေ့၊ ညနေ ၄ နာရီကျော်အချိန်ခန့်တွင် စစ်ကော်မရှင်တပ်၏ ဂျက်ဖိုက်တာဖြင့် ဗုံးကြဲ တိုက်ခိုက်မှုကြောင့် အမျိုးသမီး ၂ ဦး အပါအဝင် အရပ်သား ၅ ဦး သေဆုံးခဲ့ပြီး ၁၀ ဦးကျော် ပြင်းထန်ဒဏ်ရာ များ ရရှိခဲ့ကြောင်း ဒေသခံများက အတည်ပြုခဲ့သည်။  စစ်ကော်မရှင်တပ်သည် ဇင်ချောင်းကျေးရွာသို့ ပေါင် ၅၀၀ ဗုံး ၂ လုံးကို ဆက်တိုက်ကြဲချခဲ့သည် ဟု ဒေသခံ တစ်ဦးက ပြောသည်။  အကြမ်းဖက် လေတပ်၏ တိုက်ခိုက်မှုကြောင့် ကုန်ဘွေကျေးရွာမှ နေအိမ် ၆ ဆောင် အပါအဝင်၊ ဆိုင်ကယ်၊ ကားနှင့် လူ့အသုံးအဆောင်ပစ္စည်းများလည်း မီးလောင်ပျက်စီးသွားခဲ့ကြောင်း သိရသည်။  ထိုနေ့ နံနက် ၉ နာရီကျော်တွင် ရသေ့တောင်မြို့နယ်ထဲက အောက်ဇီးကိုင်းကျေးရွာ ကို စစ်ကော်မရှင်တပ်က ဒရုန်းဖြင့် ဗုံးကြဲ တိုက်ခိုက်ခဲ့ရာ အမျိုးသား ၁ ဦး သေဆုံး ခဲ့ပြီး အမျိုးသား ၂ ဦး ဒဏ်ရာရရှိခဲ့သည်။  ရသေ့တောင်မြို့နယ် ဒေသခံအမျိုးသားတစ်ဦးက “လေယာဉ်သံကြားတာနဲ့ အသက်ရှူရပ်မလို ခံစားရတယ်။ ကျနော်တို့ဟာ ဘယ်နေရာရောက်ရောက် လုံခြုံမှုမရှိဘူးဆိုတာကို နေ့တိုင်းလိုလို ခံစားနေရတယ်။ ကလေးတွေနဲ့ မိသားစုဝင်တွေအတွက် အသက်ရှင်သန်ဖို့ကပဲ အဓိကပေါ့နော်” ဟု ၎င်း၏ ခံစားချက်ကို ပြောသည်။  ထို့အပြင် နေ့လည် ၃ နာရီဝန်းကျင်ခန့်၌ ပုဏ္ဏားကျွန်းမြို့ကို စစ်ကောင်စီက ဗုံး ၁၀ လုံးထက်မနည်း ကြဲချ တိုက် ခိုက်ခဲ့သဖြင့် အဆောက်အဦများ ပျက်စီးခဲ့သည်ဟု ဆိုသည်။   အလားတူ အောက်တိုဘာက ၂၉ ရက်နေ့ ကလည်း ပေါက်တောမြို့နယ်၊ တောင်ညိုကျေးရွာ ကို စစ်ကော်မရှင် ရေတပ်၏ လက်နက်ကြီး ပစ်ခတ်မှုကြောင့် အသက် ၅ နှစ်အရွယ် ကလေးငယ်တစ်ဦး သေဆုံး ပြီး ၂ ဦး ဒဏ်ရာ ရရှိခဲ့သည်။  စစ်ကော်မရှင်တပ်သည် တိုက်ပွဲမရှိသည့် အရပ်သားနေထိုင်ရာ အဆောက်အအုံများကို စစ်ရေးပစ်မှတ်ထားကာ လေကြောင်း တိုက်ခိုက်မှုကို အရှိန်မြင့် လုပ်ဆောင်လာခြင်းကြောင့် ဒေသခံများမှာ စိတ်ပိုင်းဆိုင်ရာ မလုံခြုံမှုများ ခံစားနေရသည်။  စစ်ရေးလေ့လာသုံးသပ်သူတစ်ဦး က “လက်ရှိမှာ မြန်မာစစ်တပ်က မြေပြင်မှာ အသာစီးမရတဲ့အတွက် လေ ကြောင်းကို အာရုံစိုက်ပြီး အပြစ်မဲ့ ပြည်သူတွေ အပေါ် တမင်တကာ ဖိအားပေးလာတာကို တွေ့ရတယ်။ ဒါဟာ ပြည်သူလူထုရဲ့ စိတ်ဓာတ်ကို ချိုးနှိမ်ဖို့ ရည်ရွယ်တဲ့ စစ်ရာဇဝတ်မှု မြောက်တဲ့ လုပ်ရပ်ဖြစ်ပြီး ရှေ့ဆက်ပြီး တော့ လည်း ဒီလို ထိုးစစ်မျိုးတွေ ပိုမို အရှိန်မြင့်လာနိုင်တဲ့အတွက် ဒေသခံတွေ အထူး စစ်ရေးသတိရှိဖို့ လိုအပ်ပါ တယ်” ဟု သုံးသပ်ပြောကြားခဲ့သည်။  လက်ရှိ၌ စစ်တွေနှင့် ပုဏ္ဏားကျွန်း မြို့နယ် အစပ်နေရာများတွင် စစ်ကော်မရှင်တပ်နှင့် အာရက္ခတပ်တော် (AA) တို့အကြား စစ်ရေးတင်းမာမှု၊ လက်နက်ကြီးနှင့် ဒရုန်းများဖြင့် အပြန်အလှန် ပစ်ခတ်မှုများ နေ့စဉ်ရှိနေသည်။  ရခိုင်မြို့သိမ်းတိုက်ပွဲ စတင်ခဲ့သည့် ၂၀၂၃ ခုနှစ်၊ နိုဝင်ဘာလ ၁၃ ရက်နေ့မှ ၂၀၂၅ ခုနှစ် စက်တင်ဘာလ ၃၀ ရက်နေ့ အထိ စစ်ကော်မရှင်တပ်၏ ပစ်ခတ်မှုများကြောင့် အရပ်သား သေဆုံးသူ ၉၇၀ ဦး၊ ဒဏ်ရာရသူ ၂,၀၅၄ ဦး ရှိကြောင်း ULA ၏ လူသားချင်စာနာထောက်ထားရေးရုံး (HDCO) က အောက်တိုဘာလ ၂၅ ရက်နေ့ ထုတ်ပြန် ချက်တွင် ဖော်ပြသည်။

ရခိုင်ပြည် မြို့နယ် သုံးခုတွင် စစ်ကော်မရှင်က လေယာဉ်ဖြင့် ဗုံးကြဲ၊ အရပ်သား ၆ ဦး သေဆုံး 

Oct 31

နယ်စပ်ဂိတ်များပြန်ဖွင့်သော်လည်း အကန့်အသတ်ဖြင့်သာ ကုန်သွယ်မှု ရှိဟု KIO ပြော သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၃၁ ရက်။ တရုတ်-ကချင်နယ်စပ်ဂိတ်များ ပြန်ဖွင့်သော်လည်း စီးပွားရေး အေးစက်ကာ တရုတ်မှ ကုန်သွယ်မှု အကန့်အသတ်များ ရှိနေဆဲဟု KIA က ပြောသည်။ ကချင်လွတ်လပ်ရေး တပ်မတော် (KIA) ထိန်းချုပ်နယ်မြေများနှင့် ထိစပ်နေသည့် တရုတ် - မြန်မာ နယ်စပ်ဂိတ် များကို တရုတ်ဘက်မှ အောက်တိုဘာ ၂၄ ရက် ည သန်းခေါင် ၁၂ နာရီမှစတင်၍ ပြန်လည်ဖွင့်လှစ်ခဲ့သည် ဟု KIA သတင်းနှင့်ပြန်ကြားရေးတာဝန်ခံ ဗိုလ်မှူးကြီးနော်ဘူ က အတည်ပြုပြောသည်။ သို့သော်လည်း လက်ရှိတွင် ကုန်သွယ်ရေးနှင့် လူဝင်လူထွက်မှာ ယခင်ကဲ့ သို့ ပုံမှန်အခြေအနေသို့ ပြန်မရောက် သေးဘဲ အကန့်အသတ်များစွာ ရှိနေသေးကြောင်း ၎င်းက ဆိုသည်။ ပြန်လည်ဖွင့်လှစ်သည့် ဂိတ်များမှာ မန်ဝိန်းကြီး၊ လွယ်ဂျယ်၊ လိုင်ဇာ၊ ကံပိုင်တည်၊ ပန်ဝါ၊ ဖီမော် အပါအဝင် နယ်စပ်တစ်လျှောက်ရှိ ဂိတ်အားလုံးဖြစ်ကြောင်း ဗိုလ်မှူးကြီးနော်ဘူက အတည်ပြုပြောကြားခဲ့သည်။ ဗိုလ်မှူးကြီးနော်ဘူက “ပစ္စည်းတွေလည်း အားလုံးလွတ်လွတ်လပ်လပ် ဝင်ထွက်လို့တော့ မရဘူး။ အဓိက ကတော့ ပြည်သူလူထုရဲ့ စားသောက်ကုန်ပစ္စည်းနဲ့ အိမ်ဆောက်ပစ္စည်းတွေကိုပဲ အခုလောလောဆယ်ကတော့ ခွင့်ပြုတာ တွေ့ရပါတယ်” ဟု ပြောသည်။ စက်သုံးဆီများ၊ အီလက်ထရောနစ်နှင့် သက်ဆိုင်သော ပစ္စည်းများ အားလုံးကို တရုတ်ဘက်မှ သွင်းခွင့်မပေးဘဲ ကန့်သတ်ထားသည်။ တရုတ်ဘက်မှ စျေးရောင်းစျေးဝယ်သူများ အဝင်အထွက်ရှိသော်လည်း မြန်မာဘက်မှ လူများ ဝင်ထွက်မှုမှာ မရှိသလောက် နည်းပါးနေဆဲ ဖြစ်သည်။ KIA ထိန်းချုပ်နယ်မြေများမှ ဝင်ထွက်သူများကိုမူ KIO မှ ပေးထားသော အိမ်ထောင်စုလက်မှတ် ကိုင်ဆောင် သူများကို ဦးစားပေးပြီး၊ မြို့တွင်းမှ လာသူများအားလည်း ဘာကိစ္စကြောင့် သွားလာသည်ကို စိစစ်မှုများ ပြုလုပ် ၍ ခွင့်ပြုပေးနေကြောင်း ၎င်းက ဖြည့်စွက်ပြောသည်။ ဗိုလ်မှူးကြီးနော်ဘူ၏ အဆိုအရ နယ်စပ်ဂိတ်များကို တစ်နှစ်ကျော်ခန့်ကြာမြင့်အောင် ပိတ်ထားခဲ့ခြင်း ဖြစ်သည်။ ဗိုလ်မှူးကြီးနော်ဘူက “သူတို့ပိတ်တာ ကျနော်တို့ဖက်ကနေ ပိတ်တာမဟုတ်ဘူး။ သူတို့ပိတ်တာ နယ်စပ်ဒေသ မှာ တိုက်ပွဲတွေ ဖြစ်နေလို့ ပိတ်တယ်လို့တော့ ပြောပါတယ်။ နယ်စပ်ဒေသ သူတို့ တရုတ်နယ်စပ်မှာ လုံခြုံမှု ရှိအောင် ဆိုပြီးမှ အဲဒီ နယ်စပ်ဂိတ်တွေကို ပိတ်တာ ဖြစ်ပါတယ်” ဟု အတည်ပြုခဲ့သည်။ တရုတ်ဘက်မှ မြေရှားသတ္တု တူးဖော်ရေးလုပ်ငန်းများ လုပ်ကိုင်ရန် ကြိုးပမ်းနေသည်ဟူသော သတင်းများ ထွက်ပေါ်နေသော်လည်း KIA ဘက်မှ ခွင့်ပြုထားခြင်း မရှိသေးကြောင်း ၎င်းက ငြင်းဆိုသည်။ “မြေရှားသတ္တုနဲ့ ပတ်သက်လို့တော့ ကျနော်တို့လည်း ဘာမှ ဖြုတ်တာလည်း မရှိဘူး။ တူးတာလည်း မရှိဘူး။ ဘာမှ မရှိဘူး ကျနော်တို့နဲ့ သဘောတူညီမှု မရှိဘူး။ လက်မှတ်ထိုးထားတာလည်း မရှိပါဘူး” ဟု ဗိုလ်မှူးကြီး နော်ဘူက အခိုင်အမာ ပြောသည်။ ဤသို့ ပြန်ဖွင့်ပေးခြင်းသည် ဒေသခံများအတွက် အားတက်စရာဖြစ်ပြီး အခြေအနေ တဖြည်းဖြည်း တိုးတက် လာမည်ဟု မျှော်လင့်ချက်ရှိနေကြသည်။ ဗိုလ်မှူးကြီးနော်ဘူက “နယ်စပ်ဂိတ် ဖွင့်တာကတော့ ဖြေးဖြေးချင်းတော့ ကောင်းလာမယ်လို့ မျှော်လင့်ပါတယ်။ လူတွေ အဝင်အထွက်တွေကအစ စီးပွားရေးတွေက အစပေါ့လေ” ဟု ဆက်ပြောသည်။ သို့သော်၊ နယ်စပ်ဂိတ်များ ပြန်လည်ဖွင့်လှစ်သည်မှာ ရက်သတ္တပတ်မျှသာ ရှိသေးသော်လည်း ကုန်သွယ်မှုမှာ ယခင်ကဲ့သို့ ကြီးကြီးမားမား မရှိသေးကြောင်း ဒေသခံများက ပြောသည်။   ဓါတ်ပုံ - CJ

နယ်စပ်ဂိတ်များပြန်ဖွင့်သော်လည်း အကန့်အသတ်ဖြင့်သာ ကုန်သွယ်မှု ရှိဟု KIO ပြော

Oct 31

မိုးကုတ်-မိုးမိတ်မှ ဆုတ်ရန် ဆုံးဖြတ်ချက်ကို ခက်ခက်ခဲခဲ ချရခြင်း ဖြစ်သည်ဟု TNLA ပြော သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၃၁ ရက်။ တအာင်းအမျိုးသား လွတ်မြောက်ရေး တပ်မတော် TNLA နှင့် စစ်ကော်မရှင်တို့ အပစ်ရပ်စဲရေး သဘောတူ လက်မှတ်ထိုးရခြင်းမှာ အရပ်သားထိခိုက်မှုများကြောင့် ခက်ခဲသော ဆုံးဖြတ်ချက်ချမှတ်ခဲ့ရခြင်း ဖြစ်သည်ဟု TNLA က ပြောသည်။ တအာင်းတပ်မတော် (TNLA) သည် တရုတ်နိုင်ငံ၊ ကူမင်းမြို့၌ စစ်ကော်မရှင်တပ်နှင့် လက်မှတ်ရေးထိုးခဲ့သည့် နှစ်ဖက် အပစ်အခတ်ရပ်စဲရေး သဘောတူစာချုပ်သည် ၎င်းတို့အတွက် အလွယ်တကူ ဆုံးဖြတ်ခဲ့ခြင်း မဟုတ်ဘဲ ခက်ခဲသော ရွေးချယ်မှု ဖြစ်ကြောင်း ပြောရေးဆိုခွင့်ရှိသူ လွေးယေဦး က ပြောသည်။ သဘောတူစာချုပ် ရေးထိုးရန် ရက်ပိုင်းအလို၌ TNLA ထိန်းချုပ်နယ်မြေများအတွင်း စစ်ကော်မရှင်တပ်က လေကြောင်း တိုက်ခိုက်မှုများ ရက်ဆက် ပြုလုပ်ခဲ့ပြီးနောက် အရပ်သား ထိခိုက်မှုများ တိုးလာခဲ့သည်။ ယင်းအခြေအနေကြောင့် လူထု၏ ဘေးကင်းလုံခြုံမှုနှင့် ထိခိုက်နစ်နာမှု လျော့နည်းစေရန် ရည်ရွယ်၍ ယခုကဲ့သို့ ဆုံးဖြတ်ခဲ့ခြင်းဖြစ်ကြောင်း ၎င်းက ရှင်းပြသည်။ TNLA ပြောရေးဆိုခွင့်ရှိသူ လွေးယေဦးက “ဆုံးဖြတ်ချက်နဲ့ ပတ်သက်ပြီးတော့မှ ခက်ခက်ခဲခဲ ရွေးချယ်ဆုံးဖြတ် ရတာ ဖြစ်တယ်။ အဓိကတော့ လူထုတွေရဲ့ ဘေးကင်းလုံခြုံမှုနဲ့ လူထုတွေရဲ့ ထိခိုက်နစ်နာမှု လျော့နည်းသွား အောင်၊ စစ်ရေးဖိအားတွေ အခြားသော ဖိအားတွေကြားက ပိုပြီးတော့ နစ်နာလာတာမျိုးတွေ ရှိလာတာကြောင့် ခက်ခဲတဲ့ ဆုံးဖြတ်ချက်ကို ရွေးချယ်ရတာ ဖြစ်ပါတယ်” ဟု ပြောသည်။ ယခု အောက်တိုဘာလအတွင်း TNLA ထိန်းချုပ်နယ်မြေများ၌ စစ်ကော်မရှင်၏ လေကြောင်းတိုက်ခိုက်မှုကြောင့် အရပ်သား ၅၀ ကျော် ထိခိုက်သေဆုံးခဲ့ရပြီး ၈၀ ကျော် ပြင်းထန်ဒဏ်ရာ ရရှိခဲ့သည် ဟု သတင်းများတွင် ဖော်ပြထားသည်။ အဆိုပါ စာချုပ်တွင် အောက်တိုဘာ ၂၉ ရက်မှ စတင်၍ နှစ်ဖက်တပ်များ ရောက်ရှိသည့် နေရာ၌ အပစ်ရပ်ရ မည်ဟု ပါရှိသည်။ TNLA အနေဖြင့်လည်း စစ်ကော်မရှင်တပ်က တအာင်းဒေသများအား လေကြောင်းတိုက်ခိုက်မှု၊ ထိုးစစ်ဆင်မှု များ ရပ်တန့်ခြင်းရှိမရှိကို အနီးကပ် လေ့လာစောင့်ကြည့်သွားမည် ဟု လွေးယေဦးက ပြောသည်။ လွေးယေဦးက “လောလောဆယ်မှာတော့ ကျမတို့က ဒီအပေါ်မှာ လေ့လာစောင့်ကြည့်သွားမယ်။ စောင့်ကြည့် လေ့လာရေးကိုပဲ ပိုပြီးတော့ ဆောင်ရွက်မှာ ဖြစ်ပါတယ်” ဟု အတည်ပြုခဲ့သည်။ TNLA တပ်ဖွဲ့များမှာ ရှမ်းပြည်မြောက်ပိုင်းရှိ မိုးမိတ်မြို့ နှင့် မိုးကုတ်မြို့ တို့မှ ဆုတ်ခွာရမည် ဖြစ်သော်လည်း၊ မန္တလေး PDF နှင့် မိုးကုတ်ဗျူဟာတို့အပါအဝင် မဟာမိတ်တပ်ဖွဲ့များက ၎င်းတို့ ထိန်းချုပ်နယ်မြေများကို အစွမ်း ကုန် ကာကွယ်သွားမည်ဟု ထုတ်ပြန်ထားပြီး ဖြစ်သည်။ TNLA မှ မြို့တွင်း ကျန်ရှိနေသည့် ပြည်သူများအား ၎င်းတို့ ထိန်းချုပ်ထားသော အခြားမြို့နယ်များသို့ လာရောက် အကူအညီတောင်းခံ ခိုလှုံနိုင်သည် ဟု လွေးယေဦးက အမှာစကားပါးခဲ့သည်။ လွေးယေဦး၏ ပြည်သူသို့ မှာကြားချက်မှာ “လောလောဆယ်မှာတော့ ကျမတို့က လူထုနဲ့အတူ ရပ်တည်ပါ တယ်။ မြို့သိမ်းကာလမှာ ကျမတို့ကို ဝိုင်းဝန်းကူညီပေးကြတဲ့ လူတွေကိုလည်း ကျမတို့ အခုလို ပြန်လက်လွှတ် ပေးရတာ စိတ်တော့မကောင်းဘူး။ ခက်ခဲတဲ့ ဆုံးဖြတ်ချက်တခု ဖြစ်ပါတယ်။ လူထုအနေနဲ့ ကျမတို့ ထိန်းချုပ် ထားတဲ့ အခြားမြို့နယ်တွေမှာ လာရောက်ခိုလှုံနိုင်ပါတယ်၊ အကူအညီတောင်းခံနိုင်ပါတယ်” ဟု ပြောသည်။ TNLA တပ်များမှာ ယခုလက်ရှိ အချိန်၌ ၎င်းတို့ ထိန်းချုပ်ဒေသများမှ စတင်ဆုတ်ခွါနေပြီဖြစ်ပြီး မည်မျှ ကြာမြင့်မည်ကို မသိရသေးပေ။ စစ်ရေးလေ့လာစောင့်ကြည့်သူများက လတ်တလော သဘောတူညီချက်သည် စစ်ကော်မရှင်နှင့် TNLA အတွက် သာ အကျုံးဝင်သဖြင့် အပစ်ရပ်ကာလအတွင်း စစ်ကော်မရှင်တပ်သည် TNLA အစား ရှမ်းမြောက်ရှိ အခြား လက်နက်ကိုင်တပ်များနှင့် တိုက်ပွဲ ထပ်မံဖြစ်ပွားနိုင်ပြီး စစ်ရေးအခြေအနေ ပိုမို ရှုပ်ထွေးလာနိုင်သည် ဟု သုံးသပ်နေကြကြောင်း နီးစပ်သည့် စစ်ရေး သတင်းရင်းမြစ်များက ပြောသည်။

မိုးကုတ်-မိုးမိတ်မှ ဆုတ်ရန် ဆုံးဖြတ်ချက်ကို ခက်ခက်ခဲခဲ ချရခြင်း ဖြစ်သည်ဟု TNLA ပြော

Oct 31

ကသာတွင် ကလပ်စတာဗုံးများ ကြဲချ၊ အမျိုးသမီးနဲ့ ကလေးငယ် အပါအဝင် ၅ ဦး သေဆုံး သတင်းနှင့် မီဒီယာကွန်ရက်။ ၂၀၂၅ ခုနှစ်၊ အောက်တိုဘာလ ၃၁ ရက်။ စစ်ကိုင်းတိုင်းဒေသကြီး၊ ကသာမြို့နယ်၊ ညောင်ခြေထောက်ကျေးရွာ လေကြောင်းတိုက်ခိုက်ခံရပြီး အမျိုးသမီးနှင့် ကလေးငယ် အပါအဝင် (၅) ဦး သေဆုံးခဲ့သည်။ ညောင်ခြေထောက်ကျေးရွာကို စစ်ကော်မရှင်တပ်က အောက်တိုဘာလနေ ၂၉ ရက်နေ့၊ ညပိုင်းတွင် လေကြောင်း ဖြင့် ဗုံးကြဲတိုက်ခိုက်ခဲ့ခြင်း ဖြစ်သည်။ အဆိုပါ လေကြောင်း တိုက်ခိုက်ခံရမှုထဲ အသက် ၁၀ နှစ်အရွယ် ကလေးငယ်နှင့် အမျိုးသမီးများ အပါအဝင် အရပ်သား (၅) ဦး သေဆုံးခဲ့ရပြီး (၈) ဦး ထိခိုက်ဒဏ်ရာရရှိခဲ့သည် ဟု ကသာမြို့နယ် ပြည်သူ့အုပ်ချုပ်ရေးအဖွဲ့ (ပအဖ) က သတင်းထုတ်ပြန်သည်။ ညောင်ခြေထောက်ကျေးရွာကို အောက်တိုဘာလ ၂၉ ရက်နေ့ ည ၁၀ နာရီမှ ၁၁ နာရီကြားတွင် ဂျက်တိုက် လေယာဉ်ဖြင့် ကလပ်စတာဗုံးသီးများကို သုံးကြိမ်တိုင်တိုင် ကြဲချတိုက်ခိုက်ခဲ့ခြင်းဖြစ်ကြောင်း ဒေသခံများက အတည်ပြုပြောသည်။ ဒေသခံများ၏ ပြောဆိုချက်အရ စစ်ကော်မရှင်တပ်က ဂျက်ဖိုက်တာဖြင့် ပစ်မှတ်ထား တိုက်ခိုက်ခဲ့သည့် ဗုံးများ သည် နိုင်ငံတကာမှ ပိတ်ပင်ထားသော ကလပ်စတာဗုံးသီးများ ဖြစ်ကြသည်။ ညောင်ခြေထောက်ရွာအနီး နေထိုင်သူ ဒေသခံတစ်ဦးက “ဘုန်းကြီးကျောင်းက ဓမ္မာရုံကနဲ့ ဘေးကအိမ်တွေက လည်း တော်တော်လေး ပျက်ဆီးသွားတယ်။ ကျွင်းကြီးဖြစ်နေခဲ့တာ။ ချတာကလည်း ရွာထဲကိုချတာ။ ကလပ်စတာဗုံးဆိုတော့ နောက်ဆင့်ကွဲဟာတွေက ရေထဲတွေကျတာ။ ရေထဲကျလို့ သက်သာတာ။ မဟုတ်ရင် တစ်ရွာလုံးက မလွယ်ဘူး” ဟု ပြောသည်။ သေဆုံးသူများမှာ မောင်သက်ဖြိုးဦး (အသက် ၁၀ နှစ်)၊ ဦးကျော်ထွန်း (အသက် ၇၂ နှစ်)၊ ဒေါ်ရီ (အသက် ၆၄ နှစ်)၊ ဒေါ်သိန်းသိန်းနု (အသက် ၅၈ နှစ်) နှင့် ဒေါ်စန်းဌေး (အသက် ၄၂ နှစ်) တို့ဖြစ်ကြပြီး၊ ဒဏ်ရာရသူများတွင် အသက် ၉၀ ကျော်အရွယ် အဘွားအို ဒေါ်ရွှေမှတ် အပါအဝင် ၇ ဦးမှာ စိုးရိမ်ရသည့် ဒဏ်ရာများ ရရှိထားသည်ဟု ဆိုသည်။ ဗုံးကြဲတိုက်ခိုက်မှုကြောင့် ညောင်ခြေထောက်ကျေးရွာရှိ ဘုန်းကြီးကျောင်းဝန်းရှိ ဓမ္မာရုံ၊ ဂရုဏာ ပရဟိတကား အပါအဝင် နေအိမ်နှင့် အဆောက်အအုံ စုစုပေါင်း ၁၄ လုံး ပျက်စီးခဲ့သည် ဟု ကသာ ပအဖ အဖွဲ့ဝင်တစ်ဦးက ပြောသည်။ အထူးသဖြင့် ကသာမြို့နယ်အတွင်း ယခုရက်ပိုင်းတွင် စစ်ကော်မရှင်တပ်နှင့် တော်လှန်ရေးအင်အားစုများ အကြား ထိတွေ့တိုက်ပွဲတစ်စုံတစ်ရာ ဖြစ်ပွားနေခြင်းမရှိကြောင်း ဒေသခံများက အတည်ပြုသည်။ ဒေသခံတစ်ဦးက “ကသာမှာက အေးဆေးပါပဲဗျာ။ တိုက်ပွဲက လုံးဝမရှိဘူး။ သက်သက်မဲ့ ဒါ ပြည်သူတွေကို အကြမ်းဖက်တာ” ဟု မှတ်ချက်ပြုခဲ့သည်။ ကသာမြို့နယ် ပြည်သူ့အုပ်ချုပ်ရေး အဖွဲ့ကလည်း ပြည်သူများနေထိုင်သည့် ကျေးရွာအား အကြောင်းမဲ့ ဗုံးကြဲခံရမှုကြောင့် မသေသင့်ပဲ ပြည်သူ့အသက်အိုးအိမ်များ ဆုံးရှုံးခဲ့ရသည် ဟု ၎င်းတို့၏ ထုတ်ပြန်ချက်တွင် ရေးသားထားသည်။ ဗုံးပေါက်ကွဲသည့် အသံကို ၁၅ မိုင်ခန့်ဝေးကွာသည့် ကသာမြို့ပေါ်ကပင် ကြားရပြီး ဖျက်အားပြင်းဗုံးများ သုံးစွဲခဲ့ကြောင်း မြို့ခံတစ်ဦးက ပြောသည်။ အောက်တိုဘာလ ၃၀ ရက်နေ့တွင် စစ်ကော်မရှင်တပ်သည် ရခိုင်၊ မန္တလေးနှင့် စစ်ကိုင်းတိုင်းတို့အတွင်း လေကြောင်းဖြင့် ပစ်ခတ်တိုက်ခိုက်မှုများ ဆက်လက်ပြုလုပ်ခဲ့ရာ ကလေးနှစ်ဦးအပါအဝင် အရပ်သား ၈ ဦး သေဆုံးခဲ့ကြောင်း သိရသည်။ ထို့အပြင် စစ်အုပ်ချုပ်ရေးအဖွဲ့များက ကသာနှင့် အနီးတစ်ဝိုက်ရှိ ကျေးရွာများအား လေကြောင်းနှင့် စစ်သင်္ဘော များဖြင့် မကြာခဏ တိုက်ခိုက်မှုများ ပြုလုပ်လေ့ရှိပြီး မြို့အနီးဝန်းကျင် ကျေးရွာအများစုမှာ တော်လှန်ရေးတပ် များ၏ ထိန်းချုပ်မှုအောက်တွင် ရှိနေသည်။

ကသာတွင် ကလပ်စတာဗုံးများ ကြဲချ၊ အမျိုးသမီးနဲ့ ကလေးငယ် အပါအဝင် ၅ ဦး သေဆုံး

Oct 30

ချင်းမိုင် အဆင့်မြင့်အိမ်ရာ၌ အွန်လိုင်းငွေလိမ်ဂိုဏ်းဝင် တရုတ်နိုင်ငံသား ၂၀ ဦး ဖမ်းမိ သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၃၀ ရက်။   ထိုင်းနိုင်ငံမြောက်ပိုင်း၊ ချင်းမိုင်ရှိ အဆင့်မြင့်အိမ်ရာ၌ အွန်လိုင်းငွေလိမ်ဂိုဏ်းဝင် တရုတ်နိုင်ငံသား ၂၀ ဦး ကို ဖမ်းမိခဲ့သည်ဟု ဘန်ကောက်ပို့စ်အပါအဝင် ထိုင်းသတင်းများတွင် ဖော်ပြထားသည်။ ချင်းမိုင်ပြည်နယ်၊ မဲ့ရင်ခရိုင်ရှိ အဆင့်မြင့်အိမ်ရာ တစ်ခုကို ယနေ့ အောက်တိုဘာလ ၃၀ ရက်နေ့တွင် ထိုင်း အာဏာပိုင်များက ဝင်ရောက်စီးနင်းခဲ့ရာ အွန်လိုင်း ငွေလိမ်ဂိုဏ်းဝင် တရုတ်နိုင်ငံသား ၂၀ ဦး ကို ဖမ်းဆီးရမိခဲ့ ခြင်း ဖြစ်သည်။ ဖမ်းဆီးခံရသူများတွင် အမျိုးသား ၁၄ ဦးနှင့် အမျိုးသမီး ၆ ဦး ပါဝင်ပြီး၊ အမျိုးသမီးတစ်ဦးမှာ ထွက် ပြေးရန် ကြိုးပမ်းရင်း မြေပြင်သို့ ခုန်ချခဲ့ရာ ခြေထောက်ကျိုးသွားသဖြင့် ဆေးရုံသို့ ပို့ဆောင်ခဲ့ရသည် ဟု သိရသည်။ ၎င်းတို့သည် တရုတ်နိုင်ငံသားများကို ပစ်မှတ်ထားသည့် အသက်အာမခံ ကမ်းလှမ်းခြင်းနှင့် မပို့ဖြစ် သည့် ပစ္စည်းများအတွက် ငွေတောင်းခံခြင်း စသည့် လိမ်လည်မှုများ လုပ်ဆောင်နေသည်ဟု ဆိုသည်။ ဖမ်းဆီးခံရသည့် နေရာသည် တစ်လလျှင် ဘတ်ငွေ ၁၂၀,၀၀၀ ဖြင့် ငှားရမ်းထားသော ဇိမ်ခံအိမ်ရာ ဖြစ်ပြီး၊ ၎င်းတို့သည် လွန်ခဲ့သော နှစ်လခန့်ကမှ ပြောင်းရွှေ့လာခဲ့ခြင်း ဖြစ်သည်ဟု ထိုင်းသတင်းများ တွင် ဖော်ပြသည်။ ဤဂိုဏ်းခေါင်းဆောင်က အဆိုပါ ဂိုဏ်းဝင်များကို တစ်လလျှင် ဘတ်ငွေ ၁ သိန်း အထိ လစာပေး ကြောင်း စုံစမ်းသိရှိရသည်။ ဖမ်းဆီးခံရသူများအနက် အချို့မှာ ချင်းမိုင်တက္ကသိုလ်များမှ ကျောင်းသားဗီဇာဖြင့် နေထိုင်သူများ ဖြစ်ပြီး၊ အချို့မှာ ခရီးသွားဗီဇာဖြင့် ဝင်ရောက်ခဲ့သူများဖြစ်ကြောင်း ရဲတပ်ဖွဲ့က ပြောသည်။ ယခုစီးနင်းမှုအတွင်း မိုဘိုင်းလ်ဖုန်း အလုံး ၁၀၀ ခန့်၊ တရုတ်ဖုန်း ဆင်းမ်ကတ်များ၊ နည်းပညာ ပစ္စည်းများနှင့် ရဲများလာရောက်မှုကို စောင့်ကြည့်ရန် တပ်ဆင်ထားသည့် လုံခြုံရေးကင်မရာများကိုပါ သိမ်းဆည်းရမိခဲ့သည်။ စီးနင်းမှုအတွင်း သံသယရှိသူ ၁၀ ဦးခန့် ထွက်ပြေးလွတ်မြောက်သွားရာ ၎င်းတို့ကို ဆက်လက်ခြေရာခံ နေကြောင်း ရဲတပ်ဖွဲ့က ပြောသည်။ ဒေသဆိုင်ရာ ရဲတပ်ဖွဲ့၏ ကိုးကားချက်အရ “ယခုဖမ်းဆီးရမိသူများသည် ဇူလိုင်လက ဟန်ဒုံးနှင့် မဲ့ရင် တို့တွင် နှစ်ကြိမ်တိုင်တိုင် စီးနင်းခံခဲ့ရသည့် ဂိုဏ်းတစ်ခုအတွက် အလုပ်လုပ်ကြောင်း ပြောသည်” ဟု သိရသည်။

ချင်းမိုင် အဆင့်မြင့်အိမ်ရာ၌ အွန်လိုင်းငွေလိမ်ဂိုဏ်းဝင် တရုတ်နိုင်ငံသား ၂၀ ဦး ဖမ်းမိ

Oct 30

ရန်ကုန်လေဆိပ် ညပိုင်း ပျံသန်းပြေးဆွဲခွင့် နှစ်လကြာ ယာယီပိတ် သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၃၀ ရက်။ ရန်ကုန် အပြည်ပြည်ဆိုင်ရာ လေဆိပ် (YIA) ၏ လေယာဉ်ပြေးလမ်းကြောင်း ပြုပြင်ထိန်းသိမ်းမှုများ ပြုလုပ် နေခြင်းကြောင့် လေဆိပ်ကို ည ၁၂ နာရီမှ နံနက် ၆ နာရီအထိ ယာယီပိတ်ထားမည် ဖြစ်ကြောင်း လေယာဉ် လက်မှတ် အရောင်းဌာနများထံမှ သိရသည်။ ညပိုင်းပျံသန်းခွင့် ပိတ်ထားခြင်းကို အောက်တိုဘာလ ၂၉ ရက်နေ့ ညပိုင်းမှစတင်၍ ဒီဇင်ဘာလ ၃၁ ရက်နေ့အထိ စုစုပေါင်း နှစ်လအကြာ ယာယီပိတ်ထားမည်ဖြစ်သည်။ ဤယာယီပိတ်ထားမှုကြောင့် လေကြောင်းလိုင်းများအနေဖြင့် ညဘက် ပြေးဆွဲရန် စီစဉ်ထားသည့် ခရီးစဉ်များကို အချိန်ပြောင်းလဲပြီး ပြေးဆွဲပေးရန် စီစဉ်လျက်ရှိသည်။ လေယာဉ်လက်မှတ် အရောင်းဌာနများက ညပိုင်းခရီးစဉ် လက်မှတ်ဖြတ်ထားသူများအတွက် သတိပေးပြော ဆိုမှုများ ပြုလုပ်ခဲ့သည်။ လေယာဉ်လက်မှတ် အရောင်းဌာန တာဝန်ရှိသူတစ်ဦးက “ညပိုင်း ခရီးစဉ်တွေအတွက် လက်မှတ်ဖြတ်ထား သူတွေ အနေနဲ့ ကိုယ့်ခရီးစဉ်ရဲ့ အချိန် အပြောင်းအလဲတွေကို လေကြောင်းလိုင်း ဒါမှမဟုတ် လက်မှတ်ဝယ် ယူထားတဲ့ အေဂျင်စီတွေဆီကို သေချာ စုံစမ်းမေးမြန်းပြီး တခြား လိုအပ်တဲ့ စီစဉ်မှုတွေကို လုပ်ထားကြဖို့ လိုပါတယ်” ဟု တိုက်တွန်းပြောကြားခဲ့သည်။ လက်ရှိတွင် ဤအစီအစဉ်သည် ပြည်ပခရီးစဉ်များ အပေါ်သာ အဓိက သက်ရောက်မှုရှိမည် ဖြစ်ပြီး၊ ပြည်တွင်း လေကြောင်း ခရီးစဉ်များမှာ ညဘက် ပျံသန်းမှု မရှိကြောင်းလည်း သိရသည်။

ရန်ကုန်လေဆိပ် ညပိုင်း ပျံသန်းပြေးဆွဲခွင့် နှစ်လကြာ ယာယီပိတ်

« Prev 1 … 97 98 99 100 101 … 1,047 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

ဒေါ်နယ်ထရန့်ကို ရှီကျင့်ဖျင် ကော်ဇောနီဖြင့် ကြိုဆို
ထိုင်းနိုင်ငံတွင် အရက် သောက်သုံးရောင်းချမှု အပေါ် ထပ်မံတင်းကြပ်
ဖိလစ်ပိုင် လွှတ်တော်အတွင်းမှ ပစ်ခတ်သံများ ကြားရ
ရွှေဆိုင်ပိုင်ရှင်ကို ပစ်သတ်ပြီး ရွှေ ၃ ပိဿာ လုယူသူများ လွတ်မြောက်နေ 
ရွာငံမြို့မရဲစခန်းမှ သက်ငယ်မုဒိန်းမှုတရားခံ လက်ထိပ်ခတ်လျက် ထွက်ပြေးလွတ်မြောက်

Archives

Archives

×Close