နိုင်ငံတကာသတင်း

ဒုံးကျည်ဖြင့် တိုက်ခိုက်ခံရပြီးနောက် အီရန်အပေါ် UAE က ကုန်သွယ်ရေး ပိတ်ဆို့   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၁၉ ရက်။     အာရပ်စော်ဘွားများ ပြည်ထောင်စု (UAE) က ၎င်း၏ အမျိုးသား လုံခြုံရေးနှင့် ပင်လယ်ရေကြောင်း သွားလာရေးကို ခြိမ်းခြောက်သည့် အီရန်နိုင်ငံ၏ ဒုံးကျည် တိုက်ခိုက်မှုများကို အကြောင်းပြု၍ အီရန်အပေါ် အကန့်အသတ်မရှိ စီးပွားရေးနှင့် ကုန်သွယ်ရေး ပိတ်ဆို့မှုများ စတင်လိုက်ကြောင်း UAE နိုင်ငံခြားရေးဝန်ကြီးဌာနက ထုတ်ပြန်ခဲ့သည်။   UAE ဘက်က အီရန်ဘက်မှ ပစ်ခတ်လိုက်သည့် ဒုံးကျည် နှစ်စင်းကို ရှာဖွေတွေ့ရှိခဲ့ပြီးနောက် အီရန်နှင့် ပြုလုပ်နေသည့် ကုန်သွယ်ရေး၊ ကူးသန်းရောင်းဝယ်ရေးနှင့် ဘဏ္ဍာရေး ဆက်သွယ်ဆောင်ရွက်မှု အားလုံးကို နောက်ထပ် အကြောင်းမပြန်မီအထိ ရပ်ဆိုင်းလိုက်ခြင်း ဖြစ်သည်။   အီရန် နိုင်ငံခြားရေးဝန်ကြီးဌာနကမူ ယင်းစွပ်စွဲချက်သည် အခြေအမြစ်မရှိကြောင်းနှင့် အမေရိကန်-အစ္စရေး စစ်ပွဲအတွင်း ပရိယာယ်ဆင် တိုက်ခိုက်မှုသာ ဖြစ်ကြောင်း ငြင်းဆိုထားသည်။   UAE သည် အီရန်နိုင်ငံ လိုအပ်သည့် သွင်းကုန်များ၏ သုံးပုံတစ်ပုံခန့်ကို ပံ့ပိုးပေးနေသော အဓိက ကုန်သွယ်ဖက် နိုင်ငံဖြစ်သည့်အပြင် နိုင်ငံတကာ စီးပွားရေး ပိတ်ဆို့မှုများကို ရှောင်လွှဲရာ အဓိက ဘဏ္ဍာရေး လမ်းကြောင်းလည်း ဖြစ်သည့်အတွက် ယခု ပိတ်ဆို့မှုသည် အီရန် စီးပွားရေးအပေါ် ပြင်းထန်သော ရိုက်ခတ်မှုများ ရှိလာနိုင်ကြောင်း စီးပွားရေး သုံးသပ်သူများက ထောက်ပြကြသည်။ Photo:AFP   #UAE

ဒုံးကျည်ဖြင့် တိုက်ခိုက်ခံရပြီးနောက် အီရန်အပေါ် UAE က ကုန်သွယ်ရေး ပိတ်ဆို့

ဒုံးကျည်ဖြင့် တိုက်ခိုက်ခံရပြီးနောက် အီရန်အပေါ် UAE က ကုန်သွယ်ရေး ပိတ်ဆို့ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၁၉ ရက်။  အာရပ်စော်…

  • August 19, 2026
ရုရှားတွင် ဘဏ်အပ်ငွေ ထုတ်ယူမှု စံချိန်တင် မြင့်တက်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၁၉ ရက်။   ရုရှား-ယူကရိန်း စစ်ပွဲစရိတ်အတွက် ကရင်မလင် အစိုးရက ပုဂ္ဂလိက ဘဏ်အပ်ငွေများကို သိမ်းယူခြင်း သို့မဟုတ် ထုတ်ယူခွင့် ကန့်သတ်ခြင်းများ ပြုလုပ်လာနိုင်သည်ဟူသော စိုးရိမ်မှုများကြောင့် ရုရှား ပြည်သူများသည် ဘဏ်များမှ အမေရိကန်ဒေါ်လာ ဘီလီယံနှင့်ချီ၍ ပြန်လည်ထုတ်ယူလျက်ရှိသည်။   ရုရှား ဗဟိုဘဏ်၏ အချက်အလက်များအရ ဩဂုတ်လ ပထမ နှစ်ပတ်အတွင်းမှာပင် ဒေါ်လာ ၃ ဒသမ ၄ ဘီလီယံနီးပါး ထုတ်ယူခဲ့ကြသည်။     ဇူလိုင်လအတွင်း ဒေါ်လာ ၇ ဒသမ ၃ ဘီလီယံနှင့် ဇွန်လအတွင်း ဒေါ်လာ ၄ ဒသမ ၅ ဘီလီယံကျော် ထုတ်ယူခဲ့ကြသည်။   ၂၀၂၆ ခုနှစ် နှစ်စမှ လက်ရှိအချိန်အထိ ဘဏ်များမှ ငွေထုတ်ယူမှု စုစုပေါင်း ပမာဏသည် ၂၀၂၂ ခုနှစ် စစ်ပွဲစတင်ခဲ့သည့် ပထမနှစ်က ထုတ်ယူခဲ့သော ဒေါ်လာ ၂၄ ဒသမ ၇ ဘီလီယံထက် ကျော်လွန်သွားခဲ့ပြီ ဖြစ်သည်။   ရုရှား၏ အကြီးဆုံးဘဏ်ဖြစ်သော Sberbank မှ တာဝန်ရှိသူများက ယခုနှစ်ကုန်တွင် ငွေထုတ်ယူမှု ပမာဏသည် စစ်ပွဲပထမနှစ်ထက် နှစ်ဆနီးပါးအထိ ရှိလာနိုင်ကြောင်း သတိပေးထားသည်။     ယခုကဲ့သို့ ဘဏ်အပ်ငွေများ ဆက်တိုက် ထုတ်ယူရခြင်းမှာ ယူကရိန်း၏ ဒရုန်းဖြင့် တိုက်ခိုက်မှုများ ရုရှားနယ်မြေအတွင်းအထိ ကျရောက်လာခြင်း၊ စီးပွားရေး ကျဆင်းလာခြင်းတို့နှင့်အတူ အစိုးရ၏ ဘဏ်စနစ်အပေါ် ကိုင်တွယ်မှုများကို မယုံကြည်တော့သည့်အတွက် ဖြစ်ကြောင်း သုံးသပ်ကြသည်။   အများပြည်သူနှင့် စီးပွားရေးလုပ်ငန်းရှင်များသည် ငွေကြေးများကို လက်ဝယ် သိမ်းဆည်းထားကြသည့်အပြင် အိမ်နီးချင်း နိုင်ငံများမှတစ်ဆင့် ပြည်ပသို့ ရွှေ့ပြောင်းလျက်ရှိသည်။   ယင်းကဲ့သို့ ဘဏ်များ၌ ငွေကြေး ပြတ်လပ်လာမှုကြောင့် ရုရှား ဘဏ္ဍာရေးဝန်ကြီးဌာနအနေဖြင့် ဘတ်ဂျက်လိုငွေ ကာမိစေရန် ထုတ်ရောင်းသည့် အစိုးရ ငှားရမ်းစာချုပ် (Bonds) များကို ဘဏ်များက မဝယ်ယူနိုင်တော့သည့် အကျိုးဆက်များ ကြုံတွေ့နေရသည်။   ၂၀၂၆ ခုနှစ် ဇန်နဝါရီလမှ ဇူလိုင်လအထိ ရုရှား၏ ဘတ်ဂျက်လိုငွေသည် ဒေါ်လာ ၇၆ ဘီလီယံနီးပါးအထိ ရှိခဲ့ပြီး ယင်းမှာ တစ်နှစ်လုံးစာအတွက် ခန့်မှန်းထားသည့် ပမာဏထက်ပင် များစွာ ကျော်လွန်နေသည်။   #Sberbank

ရုရှားတွင် ဘဏ်အပ်ငွေ ထုတ်ယူမှု စံချိန်တင် မြင့်တက်

ရုရှားတွင် ဘဏ်အပ်ငွေ ထုတ်ယူမှု စံချိန်တင် မြင့်တက် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၁၉ ရက်။  ရုရှား-ယူကရိန်း စစ်ပွဲစရိတ်အတွက် …

  • August 19, 2026
အင်ဒိုနီးရှား ငလျင်လှုပ်ခတ်နေစဉ်အတွင်း အသက်လု ခွဲစိတ်မီးဖွားမှု အောင်မြင်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ် လ ၁၈ ရက်။   အင်ဒိုနီးရှားနိုင်ငံ အရှေ့ပိုင်းတွင် ပြင်းအား ၇.၇ မဂ္ဂနီကျုရှိ အင်အားပြင်း ငလျင်ကြီး လှုပ်ခတ်နေစဉ်အတွင်း မိခင်တစ်ဦးကို အရေးပေါ် ခွဲစိတ်ကုသ၍ ကလေးငယ်အား အောင်မြင်စွာ မီးဖွားပေးနိုင်ခဲ့သည်။   အသက် ၃၉ နှစ်အရွယ် မိခင် မာရီးယား (Maria) သည် ကိုယ်ဝန်ဆောင်မှု နောက်ဆက်တွဲ ပြဿနာများကြောင့် သတ်မှတ်ရက်ထက် ၂ လစော၍ အသက်အန္တရာယ်ရှိသော အရေးပေါ်အခြေအနေနှင့် ရင်ဆိုင်ခဲ့ရသည်။   ငလျင်နောက်ဆက်တွဲ တုန်လှုပ်မှုများ၊ လျှပ်စစ်မီးများ ပြတ်တောက်မှုများနှင့်အတူ ဆေးရုံအဆောက်အအုံ ပြိုကျမတတ် လှုပ်ခါနေချိန်တွင် ဆရာဝန်များက လက်နှိပ်ဓာတ်မီးများကို အားပြုကာ အသက်လု ခွဲစိတ်မီးဖွားပေးခဲ့ရခြင်း ဖြစ်သည်။   ငလျင်ဒဏ်ကြားမှ မွေးဖွားလာသော အဆိုပါ သမီးငယ်လေးကို အင်ဒိုနီးရှားဘာသာဖြင့် 'ငလျင်' ဟု အဓိပ္ပာယ်ရသည့် 'ဂန်ပီတာ' (Gempita) ဟု အမည်ပေးခဲ့သည်။   ကလေးငယ်မှာ မွေးစကိုယ်အလေးချိန် ၁.၃ ကီလိုဂရမ် (၂.၈ ပေါင်ခန့်) သာ ရှိသော်လည်း ဆေးရုံအပြင်ဘက် တဲအတွင်းရှိ မွေးကင်းစကလေး ဖန်ပေါင်းချောင် (Incubator) အတွင်း ကျန်းမာရေး အခြေအနေ တည်ငြိမ်လျက်ရှိသည်။   မီးဖွားပြီးနောက် သွေးလွန်ခဲ့သည့် မိခင်ဖြစ်သူကလည်း ဘေးအန္တရာယ်ကြားမှ ကယ်တင်ပေးခဲ့သော ဆရာဝန်များကို ကျေးဇူးတင်ရှိကြောင်း ပြောကြားခဲ့သည်။   ပြီးခဲ့သည့် ရက်သတ္တပတ်က အရှေ့နူဆာတန်ဂါရာ (East Nusa Tenggara) ပြည်နယ်တွင် လှုပ်ခတ်ခဲ့သော ငလျင်ကြောင့် လက်ရှိအချိန်အထိ အနည်းဆုံး လူ ၅၄ ဦး သေဆုံးထားသည်။   ဆေးရုံများနှင့် နေအိမ်အများအပြား ပျက်စီးခဲ့ရသည့်အတွက် ဒဏ်ရာရသူများကို အပြင်ဘက် ယာယီတဲများအတွင်း၌သာ အရေးပေါ် ကုသပေးလျက်ရှိသည်။   #Maria #indonesiaearthquake

အင်ဒိုနီးရှား ငလျင်လှုပ်ခတ်နေစဉ်အတွင်း အသက်လု ခွဲစိတ်မီးဖွားမှု အောင်မြင်

အင်ဒိုနီးရှား ငလျင်လှုပ်ခတ်နေစဉ်အတွင်း အသက်လု ခွဲစိတ်မီးဖွားမှု အောင်မြင် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ် လ ၁၈ ရက်။  အင်ဒိုနီးရှားန…

  • August 18, 2026
အိန္ဒိယရှိ ဘုရားကျောင်းတစ်ခုတွင် လူအုပ်တိုးဝှေ့မှုဖြစ်ပွားရာ ၆ ဦးသေဆုံး   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၁၈ ရက်။   အိန္ဒိယနိုင်ငံ၊ ဘီဟားပြည်နယ်ရှိ အာသောက ဓမ္မ (Ashok Dham) ဘုရားကျောင်းတွင် လျှပ်စစ်ဓာတ်တိုင် ပြိုကျရာမှ လူအုပ်တိုးဝှေ့မှုဖြစ်ပွားခဲ့ပြီး လူ ၆ ဦးထက်မနည်း သေဆုံးခဲ့သည်။   ဟိန္ဒူဘာသာရေး ပွဲတော်ကာလအတွင်း လာရောက်ဝတ်ပြုသူ များပြားနေစဉ် လျှပ်စစ်ဓာတ်တိုင် ပြိုကျခဲ့ခြင်းဖြစ်သည်။   ယင်းသို့ လဲကျစဉ် လျှပ်စစ်ဓာတ်လိုက်မှုများ ဖြစ်ပေါ်ခဲ့ရာမှ လူအုပ်အတွင်း ထိတ်လန့်တကြား တိုးဝှေ့ထွက်ပြေးခဲ့ကြသည်။   လူအုပ် ကြီးက အချင်းချင်း ဖိမိ နင်းမိပြီး အနည်းဆုံး လူ ၆ ဦး သေဆုံးကာ ၅ ဦးထက်မနည်း ဒဏ်ရာရရှိခဲ့ကြောင်း ရဲတပ်ဖွဲ့နှင့် တာဝန်ရှိသူများက အတည်ပြုထားသည်။   Photo:PTI   #AshokDham #India

အိန္ဒိယရှိ ဘုရားကျောင်းတစ်ခုတွင် လူအုပ်တိုးဝှေ့မှုဖြစ်ပွားရာ ၆ ဦးသေဆုံး

အိန္ဒိယရှိ ဘုရားကျောင်းတစ်ခုတွင် လူအုပ်တိုးဝှေ့မှုဖြစ်ပွားရာ ၆ ဦးသေဆုံး သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၁၈ ရက်။  အိန္ဒိယနိုင်ငံ၊ ဘ…

  • August 18, 2026
တရုတ်ဒရုန်းနည်းပညာကို အသုံးပြု၍ ရုရှားဗုံးကြဲလေယာဉ်ကို ယူကရိန်း တိုက်ခိုက်   သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ ဩဂုတ်လ ၁၈ ရက်။   ရုရှားနိုင်ငံ အနောက်ပိုင်းရှိ Engels-2 လေတပ်စခန်းအား ယူကရိန်းတပ်ဖွဲ့က ဇူလိုင်လ ၁၆ ရက်နေ့တွင် ဒရုန်းများဖြင့် ဝင်ရောက်တိုက်ခိုက်ခဲ့ရာ ရုရှား၏ အဓိကကျသော Tu-95 ဗုံးကြဲလေယာဉ်တစ်စင်း အမြီးပိုင်းပြတ်ထွက်သွားသည်အထိ ပြင်းထန်စွာ ထိခိုက်ပျက်စီးခဲ့ကြောင်း ယူကရိန်းလုံခြုံရေးအဖွဲ့ (SBU) က အတည်ပြုသည်။   ယင်းတိုက်ခိုက်မှုတွင် အသုံးပြုခဲ့သည့် ဒရုန်းများမှာ တရုတ်နိုင်ငံထုတ် ZTK-150 အမျိုးအစားနှင့် ပုံပန်းသဏ္ဌာန် တစ်ထပ်တည်းတူညီနေသည်။   သို့သော် အဆိုပါဒရုန်းများကို ယူကရိန်းသို့ ရောင်းချရန် တရုတ်နိုင်ငံက ၂၀၂၃ ခုနှစ်ကတည်းက ပိတ်ပင်ထားခဲ့သဖြင့် ယူကရိန်းဘက်က MICH 2000 အမည်ဖြင့် ကိုယ်ပိုင်ပုံတူကူး ထုတ်လုပ်ထားခြင်းဖြစ်သည်။   ယူကရိန်းတာဝန်ရှိသူများသည် တရုတ်နိုင်ငံရှိ စက်ရုံသို့ သွားရောက်၍ ယင်းဒရုန်းနှင့် နည်းပညာများ ဝယ်ယူရန် ကြိုးပမ်းခဲ့သော်လည်း ငြင်းဆန်ခံခဲ့ရသည်။   သို့ရာတွင် ပွဲစားများ၏ အကူအညီဖြင့် ဒရုန်းမောင်းနှင်သူများကို သင်တန်းပေးနေစဉ် စက်ရုံတွင်း ထုတ်လုပ်မှုလုပ်ငန်းစဉ်အဆင့်ဆင့်ကို ဓာတ်ပုံရိုက်ယူနိုင်ခဲ့ပြီး ဒရုန်း ၈ စင်းကိုလည်း လျှို့ဝှက်သယ်ဆောင်နိုင်ခဲ့သည်။   မူလ တရုတ်ထုတ် ZTK-150 ဒရုန်းတစ်စင်းလျှင် အမေရိကန်ဒေါ်လာ ၅၀,၀၀၀ တန်ဖိုးရှိသော်လည်း ယူကရိန်း၏ MICH 2000 ဒရုန်းမှာ ကန်ဒေါ်လာ ၄၈,၀၀၀ သာ ကုန်ကျသည်။   လက်ရှိတွင် အမည်မဖော်လိုသော စက်ရုံတစ်ရုံမှ တစ်နှစ်လျှင် အစင်းရေ ၆,၀၀၀ ခန့် ထုတ်လုပ်နေပြီး နောင်တွင် အစင်းရေ ၁၀,၀၀၀ အထိ တိုးမြှင့်ထုတ်လုပ်သွားမည်ဟု Yahoo သတင်းတွင် ဖော်ပြထားသည်။   #Drone

တရုတ်ဒရုန်းနည်းပညာကို အသုံးပြု၍ ရုရှားဗုံးကြဲလေယာဉ်ကို ယူကရိန်း တိုက်ခိုက်

တရုတ်ဒရုန်းနည်းပညာကို အသုံးပြု၍ ရုရှားဗုံးကြဲလေယာဉ်ကို ယူကရိန်း တိုက်ခိုက် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၁၈ ရက်။  ရုရှားနိုင်ငံ …

  • August 18, 2026
EUက ရုရှားအပေါ် က ဒဏ်ခတ်ပိတ်ဆို့မှုများ တိုးမြှင့်မည်   သတင်းနှင့် မီဒီယာ ကွန်ရက်။ 
၂၀၂၆ ခုနှစ် ဩဂုတ်လ ၁၈ ရက်။   ဥရောပသမဂ္ဂ (EU) ၏ အရေးယူပိတ်ဆို့မှုများကြောင့် ရုရှားနိုင်ငံ၏ စစ်ရေးစရိတ် ယူရို ၁ ထရီလီယံကျော် ဆုံးရှုံးခဲ့ပြီးဖြစ်ကြောင်းနှင့် လာမည့်လများအတွင်း အကြီးမားဆုံးသော ဒဏ်ခတ်ပိတ်ဆို့မှုအသစ်များကို ထပ်မံချမှတ်သွားမည်ဖြစ်ကြောင်း EU နိုင်ငံခြားရေးနှင့် လုံခြုံရေးမူဝါဒဆိုင်ရာ အကြီးအကဲ ကာယာ ကာလာ့စ် (Kaja Kallas) က ပြောကြားသည်။   အဆိုပါ ပိတ်ဆို့မှုအသစ်များကို အတည်ပြုနိုင်ပါက ရုရှားအဖွဲ့အစည်းများနှင့် လူပုဂ္ဂိုလ်များအပေါ် အရေးယူထားမှုစာရင်းမှာ လက်ရှိထက် သုံးပုံတစ်ပုံခန့် တိုးလာမည်ဖြစ်သည်။   အဓိကအားဖြင့် ရုရှား၏ စစ်ဘက်ဆိုင်ရာ စက်မှုကုန်ထုတ်လုပ်ငန်းများကို ပစ်မှတ်ထားမည်ဖြစ်ပြီး လူပုဂ္ဂိုလ်နှင့် အဖွဲ့အစည်းပေါင်း ၁,၆၀၀ ခန့်ကို စာရင်းသစ်သွင်းရန် လျာထားသည်။   အရေးယူမှုပုံစံများတွင် ခရီးသွားလာခွင့် ပိတ်ပင်ခြင်း၊ ငွေကြေးနှင့် စီးပွားရေးဆိုင်ရာ လွှဲပြောင်းမှုများ ပိတ်ပင်ခြင်းနှင့် ပိုင်ဆိုင်မှုများ ထိန်းချုပ်ပိတ်ဆို့ခြင်းတို့ ပါဝင်မည်ဖြစ်သည်။   ယင်းအရေးယူမည့်စာရင်းကို လာမည့် စက်တင်ဘာလဆန်းတွင် တင်ပြ၍ အောက်တိုဘာလအတွင်း အတည်ပြုနိုင်ရန် ကြိုးပမ်းနေသည်။     ထို့အပြင် ကလေးသူငယ် လူကုန်ကူးမှု၊ ဆိုက်ဘာတိုက်ခိုက်မှုနှင့် သတင်းအမှား ဖြန့်ဝေမှုများတွင် ပါဝင်ပတ်သက်သူများကိုလည်း ဆက်လက် ပစ်မှတ်ထား အရေးယူသွားမည်ဟု ဆိုသည်။   #KajaKallas #EU

EUက ရုရှားအပေါ်က ဒဏ်ခတ်ပိတ်ဆို့မှုများ တိုးမြှင့်မည်

EUက ရုရှားအပေါ်က ဒဏ်ခတ်ပိတ်ဆို့မှုများ တိုးမြှင့်မည်  သတင်းနှင့် မီဒီယာ ကွန်ရက်။၂၀၂၆ ခုနှစ် ဩဂုတ်လ ၁၈ ရက်။  ဥရောပသမဂ္ဂ (EU) ၏ အရေးယူပိတ်ဆို…

  • August 18, 2026
ဂရိ၊ ဘယ်လ်ဂျီယံ၊ စပိန်နှင့် ခရိုအေးရှားတွင် တောမီးများ စံချိန်တင် လောင်ကျွမ်း   သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ ဩဂုတ်လ ၁၇ ရက်။     ဥရောပတိုက်တွင် အပူလှိုင်း ရိုက်ခတ်မှုနှင့်အတူ နိုင်ငံအများအပြား၌ တောမီးများ ဆိုးရွားစွာ လောင်ကျွမ်းလျက်ရှိသည်။   ဂရိနိုင်ငံတွင် တောမီး ၂ ခု ပြိုင်တူလောင်ကျွမ်းမှုကြောင့် လူ ၂ ဦး သေဆုံးပြီး အနည်းဆုံး ၁၀ ဦး ဒဏ်ရာရရှိခဲ့သည်။   မီးလောင်မှုကြောင့် လူပေါင်း ၅၀၀ နီးပါးကို ရေကြောင်းလိုင်းမှတစ်ဆင့် အရေးပေါ် ရွှေ့ပြောင်းပေးခဲ့ရကာ မီးသတ်တပ်ဖွဲ့ဝင် ၂၀၀ ခန့်က စစ်သင်္ဘောများ၊ မီးသတ်လေယာဉ်များ အသုံးပြု၍ ငြှိမ်းသတ်လျက်ရှိသည်။   ထို့အပြင် ဘယ်လ်ဂျီယံနိုင်ငံ အရှေ့ပိုင်း သဘာဝဘေးမဲ့တော၌ လောင်ကျွမ်းနေသည့် တောမီးသည် ဧရိယာ ဟက်တာ ၃,၀၀၀ ကျော်အထိ ကူးစက်ခဲ့ပြီး နိုင်ငံသမိုင်းတွင် အကြီးမားဆုံး စံချိန်တင် တောမီးဖြစ်လာခဲ့သည်။   အဆိုပါ မီးဘေးသည် ဂျာမနီနယ်စပ်ဘက်သို့ ဦးတည်ရွေ့လျားနေသဖြင့် နယ်စပ်အနီးနေ ပြည်သူများကို ဘေးလွတ်ရာ ရွှေ့ပြောင်းကြရန် နှိုးဆော်ထားရပြီး ဥရောပသမဂ္ဂ (EU) က အရေးပေါ် မီးသတ်ဟယ်လီကော်ပတာနှင့် လေယာဉ်များ ကူညီစေလွှတ်ထားသည်။   စပိန်နိုင်ငံ အာရာဂွန်ဒေသနှင့် ခရိုအေးရှား ကမ်းရိုးတန်းဒေသတို့တွင်လည်း တောမီးများ ဆိုးရွားစွာ လောင်ကျွမ်းလျက်ရှိသည်။ #wildfire

ဂရိ၊ ဘယ်လ်ဂျီယံ၊ စပိန်နှင့် ခရိုအေးရှားတွင် တောမီးများ စံချိန်တင် လောင်ကျွမ်း

ဂရိ၊ ဘယ်လ်ဂျီယံ၊ စပိန်နှင့် ခရိုအေးရှားတွင် တောမီးများ စံချိန်တင် လောင်ကျွမ်း သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၁၇ ရက်။  ဥရောပတ…

  • August 17, 2026
တရုတ်၌ ဖိလစ်ပိုင်လုပ်သား ၁၀၀ ကျော် ဖမ်းဆီးခံရမှု မနီလာကို အကြပ်ကိုင်ခြင်းဖြစ်ဟု ဆို   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ် လ ၁၇ ရက်။   တရုတ်နိုင်ငံ၌ တရားမဝင် ရောက်ရှိလုပ်ကိုင်နေသည်ဟူသော စွပ်စွဲချက်ဖြင့် ဖိလစ်ပိုင်နိုင်ငံသား ၁၀၀ ကျော်ကို တရုတ်အာဏာပိုင်များက ဖမ်းဆီးထိန်းသိမ်းလိုက်သည်။   အဆိုပါကိစ္စနှင့် ပတ်သက်၍ ဖိလစ်ပိုင် နိုင်ငံခြားရေးဝန်ကြီးဌာနက ပီကင်းရှိ ဖိလစ်ပိုင်သံရုံးနှင့် ကောင်စစ်ဝန်ရုံးများအား ဖမ်းဆီးခံရသူများ၏ အတိအကျ အရေအတွက်နှင့် အခြေအနေကို စုံစမ်းစစ်ဆေးပြီး ကောင်စစ်ဝန်ဆိုင်ရာ အကူအညီများ အမြန်ဆုံးပေးအပ်ရန် ညွှန်ကြားထားသည်။   ဖိလစ်ပိုင် ကာကွယ်ရေးဝန်ကြီးကမူ ယခုဖမ်းဆီးမှုသည် ပြီးခဲ့သည့် မေလက ဖိလစ်ပိုင်စက်ရုံတစ်ခုတွင် တရားမဝင် လုပ်ကိုင်မှုဖြင့် ဖမ်းဆီးခံခဲ့ရသည့် တရုတ်နိုင်ငံသား ၇၀ နီးပါးကို ပြန်လွှတ်ပေးရန် တရုတ်နိုင်ငံက ဖိအားပေးခြင်းဖြစ်ပြီး "ရိုးရိုးရှင်းရှင်း ခြောက်လှန့် ငွေညှစ်ခြင်းနှင့် အကြပ်ကိုင်ခြင်း" ဖြစ်သည် ဟု ပြင်းထန်စွာ စွပ်စွဲလိုက်သည်။   အာရှ-ပစိဖိတ် တရုတ်လေ့လာရေးအဖွဲ့ (ACPSSI) ဥက္ကဋ္ဌကလည်း တရုတ်အစိုးရပိုင် မီဒီယာများက ထိုအကြောင်းကို ထင်ထင်ရှားရှား ထုတ်ပြန်ခြင်းသည် မနီလာအစိုးရအား သတိပေးချက် သတင်းစကား ပါးလိုက်ခြင်းဖြစ်နိုင်ကြောင်း သုံးသပ်ထားသည်။ Photo:AFP #ACPSSI

တရုတ်၌ ဖိလစ်ပိုင်လုပ်သား ၁၀၀ ကျော် ဖမ်းဆီးခံရမှု မနီလာကို အကြပ်ကိုင်ခြင်းဖြစ်ဟု ဆို

တရုတ်၌ ဖိလစ်ပိုင်လုပ်သား ၁၀၀ ကျော် ဖမ်းဆီးခံရမှု မနီလာကို အကြပ်ကိုင်ခြင်းဖြစ်ဟု ဆို သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ် လ ၁၇ ရက်။  …

  • August 17, 2026
ရုရှားပိုင်နက်အတွင်း တိုက်ခိုက်နိုင်သည့် ဘော်လစ်စတစ်ဒုံးကျည်များ နှစ်မကုန်မီ ယူကရိန်း ထုတ်မည်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၁၇ ရက်။   ယူကရိန်းနိုင်ငံသည် နောက် ၃ လမှ ၆ လအတွင်း ရုရှားနိုင်ငံအတွင်းထဲအထိ တိုက်ခိုက်နိုင်မည့် ပြည်တွင်းထုတ် ဘော်လစ်စတစ် ပဲ့ထိန်းဒုံးကျည်များကို စတင်အသုံးပြုနိုင်တော့မည်ဖြစ်ကြောင်း ယူကရိန်း ကာကွယ်ရေးဝန်ကြီးဟောင်း မီခါအီလို ဖီဒိုရောဗ် (Mykhailo Fedorov) က CBS News နှင့် ပြုလုပ်သည့် အင်တာဗျူးတွင် ပြောကြားခဲ့သည်။   ယူကရိန်းအနေဖြင့် ယခင်က ရုရှားပိုင်နက်အတွင်း သွားရောက်တိုက်ခိုက်ရာတွင် အဝေးပစ်ဒရုန်းများနှင့် အနိမ့်ပျံပဲ့ထိန်းဒုံးကျည်များကိုသာ အဓိက အားကိုးခဲ့ရပြီး ယင်းလက်နက်များသည် ပျံသန်းမှု နှေးကွေးသည့် အားနည်းချက်ရှိခဲ့သည်။   ရုရှားဘက်က ဘော်လစ်စတစ်ဒုံးကျည်များကို ဆက်တိုက်အသုံးပြုနေသည့်အတွက် ယူကရိန်းကလည်း နဂိုထက် ပိုမိုလျင်မြန်ပြီး လေထုအထက် အာကာသအထိ ပျံသန်းကာ အသံထက်မြန်သည့် အရှိန်ဖြင့် ပစ်မှတ်ကို ထိမှန်နိုင်သည့် ကိုယ်ပိုင်ဘော်လစ်စတစ် ဒုံးကျည် ထုတ်လုပ်မှု နည်းပညာကို အရှိန်အဟုန်မြှင့် လုပ်ဆောင်ခဲ့ခြင်း ဖြစ်သည်။   #Mykhailo_Fedorov #ballistic Photo:AP

ရုရှားပိုင်နက်အတွင်း တိုက်ခိုက်နိုင်သည့် ဘော်လစ်စတစ်ဒုံးကျည်များ နှစ်မကုန်မီ ယူကရိန်း ထုတ်မည် 

ရုရှားပိုင်နက်အတွင်း တိုက်ခိုက်နိုင်သည့် ဘော်လစ်စတစ်ဒုံးကျည်များ နှစ်မကုန်မီ ယူကရိန်း ထုတ်မည်  သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၁၇ ရက်…

  • August 17, 2026
×Close