ကသာတိုက်ပွဲ – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Tag Archive

Tag: ကသာတိုက်ပွဲ

စစ်ကိုင်း-ကချင် အစပ်တွင် စစ်တပ်က အင်အားဖြည့်ထိုးစစ်ပြင်နေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၂၇ ရက်။ စစ်ကိုင်းတိုင်းနှင့် ကချင်ပြည် အစပ်ရှိ မြို့နယ်များတွင် စစ်တပ်က စစ်ဆင်ရေးများ အတွက် လူအင်အား အလုံး အရင်း ဖြည့်တင်းလျက်ရှိပြီး အချိန်မရွေးတိုက်ပွဲများ ပြင်းထန်လာနိုင်သည့် အခြေအနေမျိုး ဖြစ်သည်ဟု ကချင် လွတ်လပ်ရေးအဖွဲ့ (KIO) နှင့် ဒေသခံကာကွယ်ရေးတပ်ဖွဲ့ တာဝန်ရှိသူတို့က အတည်ပြုပြောသည်။ လက်ရှိမြေပြင်အခြေအနေနှင့် ပတ်သက်၍ KIO ပြောရေးဆိုခွင့်ရှိသူ ဗိုလ်မှူးကြီးနော်ဘူက “အခုထီးချိုင့်၊ ရွှေကူ၊ ကသာဖက်မှာလည်း စစ်ကော်မရှင်ဖက်တွေကတော့ စစ်ဆင်ရေးတွေ၊ လူအင်အားတွေ ဖြည့်ထားတယ်ဆိုတဲ့ သတင်းတွေကတော့ ရပါတယ်ခင်ဗျား” ဟု ပြောသည်။ စစ်တပ်သည် ပြီးခဲ့သည့် မတ်လအတွင်း ထီးချိုင့်မြို့ကို ပြန်လည်ထိန်းချုပ်နိုင်ခဲ့ပြီးနောက် ကသာနှင့် အင်းတော် မြို့နယ်များသို့ စစ်အင်အားများ ဆက်တိုက်ဖြည့်တင်းကာ ၎င်းတို့လက်လွှတ်ခဲ့ရသည့် နယ်မြေများကို ပြန်လည် သိမ်းပိုက်ရန် ကြိုးပမ်းလာနေခြင်း ဖြစ်သည်။ ထိုသို့ စစ်ရေးတင်းမာနေချိန်အတွင်း ကချင်ပြည်၊ ရွှေကူမြို့နယ်ရှိ ဗျူဟာမြောက် ရွှေကူ ၅ လမ်းဆုံ စစ်တပ် စခန်းကြီးနှင့် ကာကင်းစခန်း ၂ ခုကို ကချင်လွတ်လပ်ရေး တပ်မတော် (KIA) နှင့် ပူးပေါင်းတပ်များက ဧပြီလ ၂၃ ရက် ညနေပိုင်းတွင် သိမ်းပိုက်နိုင်ခဲ့သည်။ အဆိုပါ သိမ်းပိုက်ရရှိသည့် စခန်းများအနက် ရွှေကူမြို့နယ်ရှိ တော်လှန်ရေးအင်အားစုများဘက်က ဧပြီလ ၁၉ ရက်နေ့တွင် ခေတ္တလက်လွှတ်ခဲ့ရသည့် တပ်စခန်းတစ်ခုလည်း ပါဝင်ပြီး၊ ၎င်းစခန်းကို ကချင်လွတ်လပ်ရေး တပ်မတော် (KIA) နှင့် PDF ပူးပေါင်းတပ်များက ပြန်လည်တိုက်ခိုက်သိမ်းပိုက်နိုင်ခဲ့ခြင်း ဖြစ်သည်။ ဧပြီလ ၂၀ ရက်နေ့ကတည်းက စတင်ခဲ့သည့် အဆိုပါထိုးစစ်ကြောင့် ၅ လမ်းဆုံစခန်းရှိ စစ်တပ် လက်အောက်ခံ တပ်သားများမှာ စခန်းကိုစွန့်ခွာ၍ မြို့ထဲသို့ ထွက်ပြေးသွားကြပြီး၊ တိုက်ပွဲအတွင်း လက်နက်ခဲယမ်းနှင့် စစ်အသုံးအဆောင်ပစ္စည်း အမြောက်အမြားကို သိမ်းဆည်းရမိခဲ့ကြောင်း KIA စစ်ရေးသတင်းရင်းမြစ်က ဆို သည်။ ဧပြီလ ၂၃ ရက်နေ့က ပြန်လည် သိမ်းပိုက်နိုင်ခဲ့သည့် တိုက်ပွဲအတွင်း စစ်တပ်ဘက်မှ ၆ ဦး သေဆုံးကာ ၁၆ ဦး ဒဏ်ရာရရှိခဲ့သည်။ စစ်ရေးသတင်းရင်းမြစ်တစ်ဦးက “ကျနော်တို့သိရတာကတော့ စစ်ကောင်စီဘက်က ၆ ဦးသေဆုံးပြီးတော့ ၁၆ ဦး ဒဏ်ရာရတယ်လို့ အဲ့နေ့ကဘဲသိရတယ်ဗျ။ အရင်ကတော့ ကာကွယ်ရေး ပူးပေါင်းတပ်တွေ နေရာ ယူထား ကြတာ ဟုတ်တယ်။ အဲ့နေရာကိုမှ စစ်တပ်က ဝင်လာလို့ PDF နဲ့ KIA တို့က ခဏပြန်ဆုတ်ပေးလိုက်ရတာ ဟုတ်တယ်။ ပြီးမှ ပြန်သိမ်းပိုက်နိုင်တဲ့အခြေနေဟုတ်တယ်” ဟု ပြောသည်။ တိုက်ပွဲအတွင်း RPG၊ ၄၀ မမ ဗုံးသီးများနှင့် အခြား စစ်အသုံးအဆောင် ပစ္စည်းများကိုလည်း သိမ်းဆည်းရမိခဲ့ကြ သည်။ ရွှေကူမြို့နယ်အတွင်းရှိ KIA တပ်မဟာ (၁၁) နယ်မြေသို့ စစ်တပ် လက်အောက်ခံ ခလရ ၅၆၊ ခမရ ၆၀၂ နှင့် တပ်မ ၈၈ လက်အောက်ခံ တပ်ရင်းများက ပူးပေါင်းစစ်ကြောင်းထိုးလာသဖြင့် တိုက်ပွဲများ ဖြစ်ပွားနေခြင်း ဖြစ်သည်။ လက်ရှိတွင် ရွှေကူမြို့ပတ်ဝန်းကျင်ရှိ ကျန်ရှိနေသေးသည့် စစ်တပ်၏ ကာကင်းစခန်းများကိုလည်း KIA ပူးပေါင်း တပ်များက ဆက်လက် ထိုးစစ်ဆင်နေသဖြင့် တိုက်ပွဲများမှာ အချိန်မရွေး ပိုမိုပြင်းထန်လာနိုင်သည့် အခြေအနေ တွင် ရှိနေသည်။ ရွှေကူမြို့ကာကွယ်ရေးတပ်ဖွဲ့နှင့် နီးစပ်သူတစ်ဦးက “စစ်ရေးအခြေနေကတော့ တစ်ဖက်နဲ့တစ်ဖက် စောင့်ကြည့် နေတဲ့ အခြေအနေမှာ ရှိပါတယ်။ အချိန်မရွေး တိုက်ပွဲ ဖြစ်လာနိုင်တယ်လို့ ပြောလို့ရတယ်။ တစ်ဖက်က ဖြစ် လာရင်လည်း ကျနော်တို့ဘက်က တိုက်သင့်ရင်တိုက်ရမှာပေါ့” ဟု လက်ရှိအခြေအနေကို ပြောသည်။ စစ်တပ်သည် ဧပြီလ ၂၃ ရက်နေ့က ရွှေကူ၊ ဆွမ်ပရာဘွမ်၊ ဆော့လော်၊ အင်ဂျန်းယန် နှင့် ချီဖွေမြို့နယ်တို့ကို စစ်အုပ်ချုပ်ရေး (Martial Law) အမိန့်ထုတ်ပြန်ထားပြီး၊ နယ်မြေပြန်လည် စိုးမိုးရေးအတွက် ထိုးစစ်အရှိန်မြှင့်ရန် ပြင်ဆင်နေသဖြင့် စစ်ကိုင်း-ကချင်အစပ် တစ်ကြောတွင် တိုက်ပွဲများ ပိုမိုပြင်းထန်လာနိုင်ကြောင်း ဒေသခံ ကာကွယ်ရေး တပ်ဖွဲ့များနှင့် စစ်ရေးလေ့လာသူများက သုံးသပ်နေကြသည်။ #Katha #ကသာ #ထီးချိုင့် #ရွှေကူ #MartialLaw

စစ်ကိုင်း-ကချင် အစပ်တွင် စစ်တပ်က အင်အားဖြည့်ထိုးစစ်ပြင်နေ

ထီးချိုင့်-ကသာကြား မြစ်ရိုး ကျေးရွာများ တိမ်းရှောင်နေရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၂၁ ရက်။ ထီးချိုင့်မြို့ကို ပြန်လည်ထိန်းချုပ်ထားသည့် စစ်တပ်သည် ဧရာဝတီမြစ်ကြောင်းအတိုင်း ကသာမြို့ ဘက်သို့ အင်အားအလုံးအရင်းဖြင့် စစ်ကြောင်းထိုး ဝင်ရောက်လာရာ လမ်းတစ်လျှောက်ရှိ ကျေးရွာများမှ ဒေသခံပြည်သူများမှာ ရွာလုံးကျွတ် ဘေးလွတ်ရာသို့ အရေးပေါ် တိမ်းရှောင်နေကြရသည်။ ပြီးခဲ့သည့် ဧပြီလ ၁၃ ရက် (သင်္ကြန်အကြိုနေ့) ကတည်းက ထီးချိုင့်မြို့မှ အင်အား ၃၀၀ ခန့်ဖြင့် စတင် ထွက်ခွာ လာသည့် အဆိုပါစစ်ကြောင်းကြောင့် လမ်းတစ်လျှောက်ရှိ သာဂရ၊ ကလုံနှင့် အင်းရွာလေး အပါအဝင် မြစ်ကမ်းဘေး ကျေးရွာများကို တော်လှန်ရေး အင်အားစုများ ဘက် မှ စစ်ရေးဗျူဟာအရ ဖယ်ပေးလိုက်ရပြီးနောက် ဒေသခံအများအပြား နေရပ်စွန့်ခွာ တိမ်းရှောင်နေကြရခြင်း ဖြစ်သည်။ လက်ရှိတွင် စစ်အစိုးရတပ် စစ်ကြောင်းသည် ကသာမြို့နှင့် ၈ မိုင်ခန့်အကွာရှိ မဲဟင်းရွာနှင့် ကလုံရွာကြားသို့ ရောက်ရှိနေပြီး စစ်ကြောင်း ၃ ကြောင်းခွဲ၍ ဒရုန်းနှင့် လက်နက်ကြီးများကို အဓိကအသုံးပြုကာ နယ်မြေရှင်းလင်းနေကြောင်း မြေပြင်သတင်းရင်းမြစ်က ပြောသည်။သည်။ ဒေသခံတော်လှန်ရေးတပ်ဖွဲ့ဝင်တစ်ဦးက “သူတို့က မြစ်ကြောင်းစိုးမိုးရေးအတွက် ထိုးလာတဲ့သဘောဗျ။ စစ်ကြောင်းက ၃ ကြောင်းခွဲပြီး တက်လာတာဆိုတော့ ကျနော်တို့ဘက်က နယ်မြေတချို့ကို ပြန်ဖယ်ပေးလိုက် ရတယ်။ ဒရုန်းတွေနဲ့ အပေါ်ကနေ အရင်ကြည့်ပြီး လက်နက်ကြီးနဲ့ ထုတာ။ အခုတော့ ကသာနဲ့ တော်တော် နီးနေပြီ၊ မြစ်ကမ်းဘေးရွာတွေက လူတွေလည်း အကုန်ပြေးနေရတယ်” ဟု ပြောသည်။ စစ်အစိုးရတပ်သည် မိုးတွင်းကာလ မြစ်ရေတက်ချိန်တွင် မန္တလေးမှ ဗန်းမော်အထိ ရိက္ခာနှင့် စစ်လက်နက်များ အဟန့်အတားမရှိ ပို့ဆောင်နိုင်ရန် ဧရာဝတီမြစ်ကြောင်းစိုးမိုးရေးကို အသည်းအသန် လုပ်ဆောင်လာခြင်း ဖြစ်သည်ဟု ဆိုသည်။ လက်ရှိတွင် သာဂရ၊ ကလုံနှင့် အင်းရွာလေး အပါအဝင် မြစ်ကမ်းဘေးကျေးရွာများမှ ဒေသခံပြည်သူများမှာ ကိုင်းတောများအတွင်း၌ ခက်ခဲစွာ ပုန်းရှောင်နေရပြီး ရိက္ခာပြတ်လပ်မှုနှင့် ရင်ဆိုင်နေရသည်။ မြေပြင်သတင်းရင်းမြစ်တစ်ဦးက “မြစ်ကြောင်းတစ်လျှောက် ရွာတွေက လူတွေလည်း ထပ်တိုးပြီး ပြေးနေရ တာဆိုတော့ ကူညီပေးဖို့ တော်တော်လေး ခက်ခဲနေတယ်” ဟု ပြောသည်။ စစ်အစိုးရတပ်ဘက်က ကသာမြို့ကို အပြည့်အဝ ထိန်းချုပ်နိုင်ပြီဟု ဝါဒဖြန့်ကာ ဒေသခံများကို မြို့ထဲပြန်ဝင်ရန် ဖိအားပေးနေသော်လည်း မြေပြင်တွင် လေကြောင်းနှင့် လက်နက်ကြီးပစ်ခတ်မှုများ နေ့စဉ်ရှိနေဆဲဖြစ်သည်။ ကသာတော်လှန်ရေးတပ်ဖွဲ့ဝင်တစ်ဦးကမူ တော်လှန်ရေးအင်အားစုများဘက်မှ အလုံးစုံ ဆုတ်ခွာသွားခြင်းမျိုး မဟုတ်ဘဲ တိုက်ပွဲများ ဆက်လက်ဆင်နွှဲရန် ပြင်ဆင်နေသဖြင့် မြို့ထဲသို့ ပြန်လည်ဝင်ရောက်ခြင်းမပြုရန် သတိပေးထားသည်။ ကသာတော်လှန်ရေးတပ်ဖွဲ့ဝင် တစ်ဦးက “ပြည်သူတွေကို မြို့ထဲမဝင်ကြပါနဲ့ဦးလို့ ကျနော်တို့ တောက်လျှောက် ပြောနေတာပါ။ ဒါဟာ တိုက်ပွဲက ပြီးသွားတာ မဟုတ်ပါဘူး၊ ဒီတိုက်ပွဲက ပြန်ဖြစ်မှာပါ။ ကျနော်တို့ တော် လှန်ရေးဘက်ကလည်း အရှုံးပေးလို့မရဘူး၊ မနိုင်နိုင်အောင် တိုက်ရမှာပါ။ ဒါဟာ စစ်ရေးအရ ခဏတာ အနည်း ငယ် နောက်ဆုတ်ပေးတဲ့ သဘောပါပဲ၊ အပြီးအပိုင် ထွက်ခွာသွားတာ မဟုတ်ပါဘူး” ဟု ပြောသည်။ ကသာမြို့တွင် ၂၀၂၅ ခုနှစ်၊ ဒီဇင်ဘာလကုန်ပိုင်း မြို့သိမ်းတိုက်ပွဲ စတင်ခဲ့သည့်အချိန်မှစ၍ ယနေ့အထိ နှစ်ဖက် တပ်များအကြား စစ်ရေးတင်းမာမှုများ လျော့ပါးသွားခြင်းမရှိဘဲ ယခုကဲ့သို့ စစ်အစိုးရတပ်၏ အင်အား အလုံး အရင်းဖြင့် စစ်ကြောင်းထိုး ဝင်ရောက်လာမှုကြောင့် ရှေ့ဆက်၍ တိုက်ပွဲများ ပိုမိုပြင်းထန်လာမည်ကို ဒေသခံ များက စိုးရိမ်လျက် ရှိသည်။ #ကသာတိုက်ပွဲ #ထီးချိုင့် #စစ်အုပ်စု #စစ်ဘေးရှောင်

ထီးချိုင့်-ကသာကြား မြစ်ရိုး ကျေးရွာများ တိမ်းရှောင်နေရ

ကသာမြို့ထဲသို့ ပြန်မဝင်ကြသေးရန် တော်လှန်ရေး တပ်ဖွဲ့များ သတိပေး သတင်းနှင့် မီဒီယာကွန်ရက်။ ၂၀၂၆ ခုနှစ်၊ ဧပြီလ ၆ ရက်။ စစ်ကိုင်းတိုင်းဒေသကြီး၊ ကသာမြို့ကို ပြန်လည်ထိန်းချုပ်နိုင်ပြီဟု စစ်ကော်မရှင်က ဝါဒဖြန့်နေသော်လည်း တိုက်ပွဲများ အချိန်မရွေးပြန်ဖြစ်လာနိုင်၍ မြို့ထဲပြန်မဝင်သေးရန် တော်လှန်ရေးအင်အားစုများ သတိပေးထားသည်။ စစ်ကော်မရှင်ဘက်က ကသာမြို့ကို ပြန်လည်ထိန်းချုပ်နိုင်ပြီဟု ဝါဒဖြန့်ကာ ဒေသခံပြည်သူများကို မြို့အတွင်း ပြန်လည်ဝင်ရောက်ရန် ဖိအားပေးနေသော်လည်း မြေပြင်တွင် လေကြောင်းတိုက်ခိုက်မှုများ ဆက်ရှိနေဆဲဖြစ်ပြီး တိုက်ပွဲများ အချိန်မရွေး ပြန်လည်ပေါက်ကွဲလာနိုင်သည့် အခြေအနေမျိုးတွင် ရှိနေသည်။ ကသာမြို့တွင် ပြီးခဲ့သည့် မတ်လ ၂၀ ရက်နေ့မှ စတင်ကာ စစ်ကော်မရှင်တပ်များနှင့် KIA၊ PDF ပူးပေါင်းတပ်ဖွဲ့တို့ ကြား တိုက်ပွဲများ အပြင်းအထန် ဖြစ်ပွားခဲ့ခြင်းဖြစ်သည်။ စစ်ကော်မရှင်ဘက်က ဂျက်ဖိုက်တာများ၊ Y-12 လေယာဉ်များ အသုံးပြုကာ တစ်ပတ်ကျော်ကြာ အဆက်မပြတ် ဗုံးကြဲတိုက်ခိုက်ခဲ့ရာ မတ်လ ၂၀ ရက်နေ့က ရပ်ကွက် (၃) ရှိ လေးထပ်ဘုန်းကြီးကျောင်း ဗုံးကြဲခံရမှုကြောင့် သံဃာတော်များနှင့် စစ်ဘေးရှောင်ပြည်သူ ၈၀ ကျော် သေဆုံးခဲ့ရသည့် ဖြစ်စဉ်များ ရှိခဲ့သည်။ ထိုကဲ့သို့ လေကြောင်းမှ အပြင်းအထန် တိုက်ခိုက်ပြီးနောက် မတ်လ ၃၀ ရက်နေ့တွင် မြို့ကို ပြန်လည် ထိန်းချုပ် နိုင်ပြီဟု စစ်ကော်မရှင်တပ်က ကြေညာခဲ့သော်လည်း မြို့၏ သုံးပုံတစ်ပုံကျော်မှာ မီးလောင်ပျက်စီးနေပြီး စစ်ရေး တင်းမာမှုများမှာ လျော့ပါးသွားခြင်း မရှိသေးပေ။ ကသာတော်လှန်ရေးတပ်ဖွဲ့ဝင် တစ်ဦးက “စစ်ကောင်စီဘက်ကတော့ သူတို့က ထိန်းချုပ်လိုက်ပြီ၊ ပြန်လာလို့ ရပြီ ဆိုပြီး ဝါဒဖြန့်နေပေမဲ့ အန္တရာယ် အရမ်းများပါတယ်။ ပြည်သူတွေကို မြို့ထဲမဝင်ကြပါနဲ့ဦးလို့ ကျနော် ပြောချင်ပါတယ်။ ဒါဟာ တိုက်ပွဲက ပြီးသွားတာ မဟုတ်ပါဘူး၊ ဒီတိုက်ပွဲက ပြန်ဖြစ်မှာပါ။ ကျနော်တို့ တော် လှန်ရေးဘက်ကလည်း အရှုံးပေးလို့မရဘူး၊ မနိုင်နိုင်အောင် တိုက်ရမှာပါ။ ဒါဟာ စစ်ရေးအရ ခဏတာ အနည်း ငယ် နောက်ဆုတ်ပေးတဲ့ သဘောပါပဲ၊ အပြီးအပိုင် ထွက်ခွာသွားတာ မဟုတ်ပါဘူး" ဟု မြေပြင်အခြေအနေကို ပြောသည်။ လက်ရှိတွင် တိုက်ပွဲများ ခေတ္တငြိမ်သက်နေသော်လည်း စစ်ကော်မရှင်ဘက်က လေကြောင်းနှင့် လက်နက်ကြီး ပစ်ခတ်မှုများကို နေ့စဉ်လုပ်ဆောင်နေသဖြင့် အရပ်သားထိခိုက်မှုများ ဆက်ရှိနေဆဲဖြစ်သည်။ ကသာမြို့ရှိ ရပ်ကွက် ၁၁ ခုအနက် မြို့ပေါ်ရပ်ကွက်များထဲက ဆေးရုံ၊ နေအိမ်နှင့် ဘုန်းကြီးကျောင်းများမှာလည်း ဗုံးကြဲမှုကြောင့် ပျက်စီးမှု အများအပြား ရှိနေသည်။ တော်လှန်ရေးတပ်ဖွဲ့ဝင်တစ်ဦးကပင် ဆက်လက်၍ “စစ်ကောင်စီဘက်က သူတို့ ပြန်လာလို့ရပြီလို့ ဝါဒဖြန့်သော် လည်း ဒါတွေကို မယုံနဲ့ပေါ့နော်။ တကယ့်မြေပြင်မှာ ဖြစ်နေတဲ့ အတိုင်းအတာတွေက အန္တရာယ် အရမ်းများ ပါတယ်။ ပြန်ဖို့ မလွယ်ပါဘူး။ တချို့လူတွေက ဝါဒမိုင်းတွေ မိနေတယ်၊ အသိပညာတွေ သိလာအောင် ပြောဖို့ ခက်ပါတယ်။ ကျည်ဆံတွေ၊ ဗုံးတွေ ကိုယ့်နား ရောက်လာမှ သိမယ့်လူတွေအတွက်တော့ ပြောရခက်ပါတယ်ဗျ” ဟု သတိပေးပြောဆိုသည်။ တော်လှန်ရေး အင်အားစုများဘက်ကလည်း အလုံးစုံ ဆုတ်ခွာသွားခြင်းမျိုး မဟုတ်ဘဲ တိုက်ပွဲများ ဆက်လက် ဆင်နွှဲရန် ပြင်ဆင်နေကြသဖြင့် ကသာမြို့၏ အခြေအနေမှာ အချိန်မရွေး ပြန်လည်ပေါက်ကွဲလာနိုင်သည့် စစ်ရေး အရ အလွန်စိုးရိမ်ရသော အနေအထားတွင် ရှိနေခြင်း ဖြစ်သည်။ ဓါတ်ပုံ - ပုံဟောင်း (ကသာစစ်ဘေးရှောင် ပြည်သူများ) #ကသာတိုက်ပွဲ #ကသာစစ်ရှောင် #လေကြောင်းတိုက်ခိုက်မှု

ကသာမြို့ထဲသို့ ပြန်မဝင်ကြသေးရန် တော်လှန်ရေး တပ်ဖွဲ့များ သတိပေး

ဗုံးကြဲမှုကြောင့် အရပ်သား ၈၀ ခန့် အစုအပြုံလိုက် သေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၂၃ ရက်။ စစ်ကိုင်းတိုင်းဒေသကြီးအတွင်းရှိ ကသာ၊ မြောင်နှင့် ကနီမြို့နယ်များတွင် စစ်ကော်မရှင်တပ်က တိုက်လေယာဉ် များအသုံးပြု၍ လူနေကျေးရွာများ၊ ဘုန်းကြီးကျောင်းများနှင့် စာသင်ကျောင်းများကို ပစ်မှတ်ထားကာ ဗုံးကြဲ တိုက်ခိုက်ခဲ့ခြင်းကြောင့် အရပ်သား ၈၀ ခန့် အစုလိုက်အပြုံလိုက် သေဆုံးခဲ့ရသည်။ ကသာမြို့တွင် သံဃာနှင့် အရပ်သား ၈၀ ခန့် အစုလိုက်အပြုံလိုက် သေဆုံးခဲ့ရသလို၊ မြောင်မြို့နယ်တွင် လည်း ရက်သားအရွယ် ကလေးငယ်တစ်ဦး သေဆုံးခဲ့ကြောင်း ဒေသတွင်းသတင်းရင်းမြစ်များက ပြောသည်။ ကသာမြို့ပေါ်ရှိ စစ်ဘေးရှောင်များ ခိုလှုံနေသည့် ရပ်ကွက် (၃) မဟာလေးထပ် ဘုန်းကြီးကျောင်းကို စစ်ကော်မရှင်က တိုက်လေယာဉ် ၅ စီးဖြင့် ပြီးခဲ့သည့် မတ်လ ၂၀ ရက်နေ့ နံနက် ၁၁ နာရီခွဲခန့်တွင် ဗုံးကြဲ တိုက်ခိုက်ခဲ့ခြင်း ဖြစ်သည်။ အဆိုပါ တိုက်ခိုက်မှုကြောင့် ကျောင်းတိုက်အတွင်း ခိုလှုံနေသည့် သံဃာတော်များနှင့် စစ်ဘေးရှောင် ၈၀ ခန့် သေဆုံးခဲ့ပြီး ၃၀ ကျော် ပြင်းထန်စွာ ဒဏ်ရာရရှိခဲ့သည်။ အခင်းဖြစ်ပွားရာတွင် ပါဝင်ခဲ့သည့် ဒေသခံတစ်ဦးက “ကျောင်းပေါ်ကို ဗုံးတွေတည့်တည့်ကျတာ။ မီးလောင်တဲ့ အထဲပါသွားတော့ ရုပ်တွေက မပေါ်တော့ဘူး။ ကိုယ့်မိသားစုဝင် အလောင်းကိုတောင် ရှာမရတော့လို့ ၇၀ ကျော် လောက်ကို ကျောင်းဝန်းထဲမှာတင် စုပြီး မြေမြှုပ်သင်္ဂြိုဟ်လိုက်ရတယ်။ အခုလည်း မြို့အဝင်အထွက်တွေ ပိတ်ထားတော့ ဒဏ်ရာရတဲ့သူတွေ ဆေးကုဖို့ သွေးနဲ့ ဆေးဝါးတွေ အရေးပေါ် လိုနေပါတယ်” ဟု ပြောသည်။ အလားတူ မတ်လ ၂၀ ရက်နေ့တွင်ပင် မြောင်မြို့နယ်၊ နဘက်စံပြကျေးရွာကို တံတားဦးလေတပ်မှ တက်လာ သည့် တိုက်လေယာဉ်တစ်စီးက ဗုံးကြဲတိုက်ခိုက်ခဲ့ရာ တစ်လမပြည့်သေးသည့် ရက်သားအရွယ် ကလေးငယ် တစ်ဦး နေရာတွင်ပင် သေဆုံးခဲ့ပြီး၊ အမျိုးသမီးတစ်ဦးလည်း ဒဏ်ရာဖြင့် ကွယ်လွန် သွားခဲ့သည်။ မြောင်မြို့နယ် ဒေသခံတစ်ဦးကလည်း မြေပြင်အခြေအနေနှင့် ပတ်သက်၍ “တိုက်ပွဲဖြစ်တာလည်း မရှိဘဲနဲ့ ရွာထဲကို လာကြဲတာ။ ရက်သားလေးကတော့ ဗုံးစမှန်ပြီး နေရာမှာတင် ဆုံးသွားရှာတယ်။ ဆီစက်နားလည်း ဗုံးကျတော့ အိမ်တွေလည်း မီးလောင်ကုန်ပြီ။ ရွာထဲမှာ ဘယ်သူမှ မနေရဲတော့ဘဲ အကုန်ပြေးနေကြရတယ်” ဟု ပြောသည်။ ထို့အပြင် မတ်လ ၂၁ ရက်နေ့ကလည်း ကနီမြို့နယ်၊ ဆူးလေကုန်းကျေးရွာရှိ ဘုန်းကြီးကျောင်းနှင့် စာသင်ကျောင်း များကို တိုက်လေယာဉ် ၈ စီးဖြင့် တပြိုင်နက် ဗုံးကြဲခဲ့ရာ ဘုန်းကြီးတစ်ပါးနှင့် လူနှစ်ဦး ထိခိုက် ဒဏ်ရာရရှိကာ အဆောက်အအုံများစွာ ပျက်စီးခဲ့သည်။ လက်ရှိတွင် ကသာမြို့အဝင်အထွက်များကို စစ်ကော်မရှင်က ပိတ်ဆို့ထားပြီး မြို့ခံများမှာ မြို့ထဲတွင် ပိတ်မိနေ ကြသည်။ တစ်ဖက်တွင် ပြည်သူ့လေကြောင်းခရီးစဉ်များမှာ လေယာဉ်ဆီပြတ်လပ်မှုကြောင့် ဖျက်သိမ်းနေရသော်လည်း၊ စစ်ကော်မရှင်သည် ရုရှားနှင့် အီရန်နိုင်ငံများမှ လေယာဉ်ဆီများကို တိုးမြှင့်တင်သွင်းကာ တော်လှန်ရေးနယ်မြေရှိ အရပ်သားများအပေါ် ဗုံးကြဲရန် အရှိန်အဟုန်မြှင့် အသုံးပြုနေကြောင်း Justice for Myanmar က ထောက်ပြ ထားသည်။ #စစ်ကိုင်းတိုင်း #ကသာလေကြောင်းတိုက်ခိုက် #မြောင်လေကြောင်းတိုက်ခိုက်မှု #ကနီလေကြောင်းတိုက်ခိုက်မှု

ဗုံးကြဲမှုကြောင့် အရပ်သား ၈၀ ခန့် အစုအပြုံလိုက် သေဆုံး

တိုက်ပွဲဖြစ်နေသည့် ကသာမြို့တွင် ကျောင်းသားများအား ကျောင်းတက်ခိုင်းသဖြင့် အန္တရာယ် စိုးရိမ်နေရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၂၉ ရက်။ စစ်ကိုင်းတိုင်း ကသာမြို့တွင် တိုက်ပွဲဧရိယာနှင့် ၂ မိုင်အကွာ၌ရှိသော ကျောင်းတွင် စစ်ကော်မရှင်က ကျောင်းပြန်ဖွင့်ခဲ့ရာ ကျောင်းသားများ၏ အသက်အန္တရာယ် စိုးရိမ်နေရသည်ဟု ကာကွယ်ရေး တပ်ဖွဲ့များက ပြောသည်။ စစ်ကိုင်းတိုင်းဒေသကြီး၊ ကသာမြို့တွင် မြို့သိမ်းတိုက်ပွဲများ ပြင်းထန်စွာ ဖြစ်ပွားနေသော်လည်း စစ်ကော်မရှင်က တိုက်ပွဲဖြစ်ပွားရာ တည်နေရာနှင့် ၂ မိုင်အကွာ၌ ကျောင်းများ ပြန်လည်ဖွင့်လှစ်ထားခြင်းကြောင့် ကျောင်းသား၊ ကျောင်းသူများ၏ အသက်အန္တရာယ်ကို ကာကွယ်ရေးတပ်ဖွဲ့များက စိုးရိမ်နေကြသည်။ ကျောင်းပြန်ဖွင့်ချိန်တွင် မြို့ထဲ၌ ကျန်ရစ်သူများသာ တက်ရောက်ခဲ့ကြသော်လည်း ယခုရက်ပိုင်းတွင် စစ်ဘေး ရှောင် အချို့ပါ နေရပ်ပြန်၍ ကျောင်းတက်နေကြသည့်အပေါ် ကာကွယ်ရေးတပ်ဖွဲ့ဝင်တစ်ဦးက ယခုကဲ့သို့ ပြော သည်။ “တချို့စစ်ရှောင်ထွက်လာပြီးမှ စစ်ရှောင်စခန်းမှလက်ခံထားပြီးမှ သူတို့ကလေးတွေကျောင်းထားချင်လို့ဆိုပြီး ကသာမြို့ထဲကို ပြန်ဝင်သွားတဲ့ကိစ္စပေါ့ဗျာ။ ပြန်ဝင်သွားတာတော့မများပါဘူး။ ဒါပေမဲ့ ဒီကလေးတွေရဲ့ အန္တရာယ်ပေါ့နော်။ စစ်ပွဲဖြစ်နေတဲ့ အနီးဆုံးဧရိယာထဲမှာ ကလေးတွေဘယ်လောက်အန္တရာယ်များသလဲ။ စစ်ကောင်စီက ဒါလူသားဒိုင်းအဖြစ် အသုံးချနေတာကို သူတို့ တကယ်ဘဲမသိလို့လားပေါ့။” ကသာမြို့သိမ်းတိုက်ပွဲ စတင်သည့်နေ့မှ စ၍ မြို့ပေါ်ရှိ ကျောင်းများအားလုံး ပိတ်ထားခဲ့ရပြီး မြို့ခံအများစုမှာ လည်း ဘေးလွတ်ရာသို့ တိမ်းရှောင်နေကြရသော်လည်း၊ စစ်ကော်မရှင်က ပြီးခဲ့သည့် ဇန်နဝါရီလ ၁၈ ရက်နေ့မှ စတင်ကာ အထက (၃) ကျောင်းတွင် ကျောင်းများစုပေါင်း၍ ပြန်လည်ဖွင့်လှစ်ခဲ့ရာ ကျောင်းသား ၃၀၀ ဝန်းကျင် တက်ရောက်နေကြသည်။ ကသာမြို့ရှိ အထက (၂) ကျောင်းမှာ တိုက်ပွဲ စတင်စဉ်ကပင် နှစ်ဖက်ပစ်ခတ်မှုများအကြား မီးလောင်ပျက်စီးခဲ့ ရပြီး၊ အထက (၁) ကျောင်းမှာမူ ရဲစခန်းနှင့်နီးကပ်သဖြင့် ကျောင်းဖွင့်ရန် မဖြစ်နိုင်သည့် အခြေအနေတွင် ရှိနေ သည်။ တစ်ဖက်တွင်လည်း ကသာမြို့ပေါ်၌ အရပ်သားသေဆုံးမှုများ ရှိနေပြီး ရုပ်အလောင်းများမှာ လမ်းပေါ်တွင် ပုပ်ပွ ကာ အလောင်းကောက်သူမရှိသည့် အခြေအနေအထိ ဆိုးရွားနေသည်။ အရပ်သားထိခိုက်မှုစာရင်းကို ကောက်ယူရန်ပင် ခက်ခဲနေသည့် အခြေအနေနှင့် ပတ်သက်၍ အထက်ပါ ကာကွယ်ရေးတပ်ဖွဲ့ဝင်က ဆက်လက်ပြောဆိုသည်။ “အရပ်သား ထိခိုက်မှုအခြေနေတွေက ပြောဖို့ခက်ပါတယ်။ တချို့လူသူမသိဘဲ ပျောက်ဆုံးပြီးတော့မှ နောက်မှ အလောင်း ပြန်တွေ့တာတွေမျိုးတွေလည်း ရှိတာပေါ့။ ရမ်းသမ်းပစ်ခတ်မှုနဲ့ ထိခိုက်တာတွေကတော့ အရပ်သား တွေ မှန်းသိရက်နဲ့ ဘာလို့ တမင်ရည်ရွယ်ပြီးပစ်လည်းတော့မပြောတတ်ဘူးပေါ့ဗျာ” ဟု ၎င်းက ပြောသည်။ လက်ရှိတွင် တိုက်ပွဲများမှာ စတင်ချိန်ကလောက် မပြင်းထန်တော့သော်လည်း နှစ်ဖက်စစ်ရေး ဆက်လက် တင်း မာနေဆဲဖြစ်ပြီး စစ်ကော်မရှင်ဘက်က မြို့လက်မလွှတ်ရရေးအတွက် လက်နက်ကြီးများအပြင် လေကြောင်း တိုက်ခိုက်မှုများကိုပါ အသုံးပြု၍ ခုခံနေသည်ဟု ဆိုသည်။ အဆိုပါ တိုက်ပွဲအခြေအနေများကြောင့် လာမည့် အတန်းတင်စာမေးပွဲနှင့် မတ်လ ၁၁ ရက်မှ ၁၈ ရက်အထိ ကျင်းပမည့် တက္ကသိုလ်ဝင်တန်း ဖြေဆိုကြမည့် ကျောင်းသား၊ ကျောင်းသူများမှာ အခက်အခဲများစွာနှင့် ရင်ဆိုင် နေရကာ ၎င်းတို့၏ ပညာရေးနှင့် အသက်အန္တရာယ် လုံခြုံရေးအတွက် စိုးရိမ်မှုများ မြင့်တက်လျက်ရှိသည်။

တိုက်ပွဲဖြစ်နေသည့် ကသာမြို့တွင် ကျောင်းသားများအား ကျောင်းတက်ခိုင်းသဖြင့် အန္တရာယ် စိုးရိမ်နေရ

ထီးချိုင့်တွင် မြို့သိမ်း တိုက်ပွဲများ တကျော့ပြန် ဖြစ်ပွား သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၂၉ ရက်။ စစ်ကိုင်းတိုင်းဒေသကြီး၊ ထီးချိုင့်မြို့တွင် မြို့သိမ်းတိုက်ပွဲများ တကျော့ပြန် စတင်နေပြီး ဧရာဝတီ တံတား အနီးနှင့် မြို့ပေါ်နေရာအချို့တွင် နှစ်ဖက်တိုက်ပွဲများ ပြင်းထန်နေကြောင်း တော်လှန်ရေးအင်အားစု များနှင့် နီးစပ်သူများက ပြောသည်။ ဇန်နဝါရီလ ၂၈ ရက်နေ့၊ နံနက်အစောပိုင်းမှစ၍ တော်လှန်ရေးတပ်ဖွဲ့များက မြို့ကိုထိန်းချုပ်နိုင်ရန် စနစ်တကျ အင်အားဖြည့်တင်းကာ ထိုးစစ်ဆင်လာခြင်းဖြစ်သည်။ လက်ရှိစစ်ရေးအခြေအနေနှင့် ပတ်သက်၍ တော်လှန်ရေးတပ်ဖွဲ့နှင့် နီးစပ်သူတစ်ဦးက “သူတို့ဘက်က တိုးလို့ လည်း မဟုတ်ဘူး။ ကိုယ့်ဘက်က ကပ်တာ။ မြို့သိမ်းဖြစ်မယ်။ ကိုယ့်ဘက်ကစနစ်တကျနဲ့အင်အားဖြည့်တာ။ တံတားပတ်ဝန်းကျင်နဲ့မြို့နေရာတချို့တွေမှာအဓိကဖြစ်နေတာဗျ” ဟု အခြေအနေကို ရှင်းပြသည်။ ကချင်ပြည် အစပ်တွင် တည်ရှိသည့် ထီးချိုင့်မြို့ကို ပြီးခဲ့သည့် ၂၀၂၃ ခုနှစ် နိုဝင်ဘာလအတွင်းကလည်း တော်လှန်ရေး အင်အားစုများက ပထမအကြိမ် မြို့သိမ်းတိုက်ပွဲ ဆင်နွှဲခဲ့ဖူးသည်။ ထိုစဉ်က မြို့၏နေရာ အတော်များများကို ထိန်းချုပ်နိုင်ခဲ့သော်လည်း စစ်ကော်မရှင်တပ်၏ လေကြောင်း တိုက်ခိုက်မှုနှင့် အရပ်သားနေအိမ်များကို ဦးတည်မီးရှို့ဖျက်ဆီးမှုများကြောင့် မြို့လုံးကျွတ်နီးပါး ပျက်စီးခဲ့ရကာ ပြန်လည်ဆုတ်ခွာခဲ့ရသည်။ ယခုအခါ မြို့သိမ်းတိုက်ပွဲပြင်းထန်နေသည့် ကသာမြို့နှင့် မဝေးကွာလှသော ထီးချိုင့်တွင် တိုက်ပွဲသံများ တစ်ကျော့ပြန် ထွက်ပေါ်လာခြင်းဖြစ်သည်။ ကသာမြို့မြစ်ကမ်းနဘေးရှိ ဒေသခံတစ်ဦးကလည်း “ကျနော်တို့က ကသာနယ်လို့သာပြောတာ ထီးချိုင့်နဲ့ ပိုနီး တယ်။ တအုန်းအုန်းနဲ့ အကျယ်ကြီးကို ကြားနေရတာ” ဟု ယမန်နေ့မှစ၍ ယနေ့အထိ တိုက်ပွဲသံများ ဆက် တိုက်ကြားနေရသည့် အပေါ် ပြောပြသည်။ စစ်ရေးလေ့လာသူများ၏ သုံးသပ်ချက်အရ ကသာနှင့် ထီးချိုင့်မြို့တို့သည် မန္တလေး - စစ်ကိုင်း - ဗန်းမော် လမ်း ကြောင်း တစ်လျှောက် ရေကြောင်း၊ ကုန်းလမ်းကြောင်းများဖြင့် ချိတ်ဆက်နိုင်သည့် ဗျူဟာမြောက် ဒေသများ ဖြစ်ခြင်းကြောင့် နှစ်ဖက်စစ်ရေးအရ အလွန်အရေးပါသော နေရာများဖြစ်သည်။ လက်ရှိတွင် တိုက်ပွဲအတွင်း နှစ်ဖက်ထိခိုက်သေဆုံးမှု အခြေအနေများကိုမူ အတည်မပြုနိုင်သေးကြောင်း မြေပြင်သတင်းရင်းမြစ်က ပြောသည်။ ဓါတ်ပုံ - Tigyaing Revolution (TR)

ထီးချိုင့်တွင် မြို့သိမ်း တိုက်ပွဲများ တကျော့ပြန် ဖြစ်ပွား

မြို့သိမ်းတိုက်ပွဲဖြစ်ပွားနေသော်လည်း စစ်ကော်မရှင်က စာသင်ကျောင်း ဖွင့်ခိုင်း သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၂၁ ရက်။ ကသာတွင် မြို့သိမ်းတိုက်ပွဲ ပြင်းထန်နေသော်လည်း စစ်ကော်မရှင်က စာသင်ကျောင်းများအား ပြန်ဖွင့်ခိုင်းထားသည်ဟု မြို့ခံများနှင့် တော်လှန်ရေး အင်အားစုများက ပြောသည်။ စစ်ကိုင်းတိုင်းဒေသကြီး၊ ကသာမြို့တွင် တော်လှန်ရေး အင်အားစုများ၏ မြို့သိမ်းတိုက်ပွဲများ ပြင်းထန် နေသော် လည်း စစ်ကော်မရှင်က မြို့ပေါ်ရှိ အခြေခံပညာကျောင်းများကို ဇန်နဝါရီလ ၁၈ ရက်နေ့မှစတင်ကာ အတင်း အကျပ် ပြန်လည်ဖွင့်လှစ်နေကြောင်း ဒေသခံများနှင့် တော်လှန်ရေးအင်အားစုများက ပြောသည်။ ကသာမြို့ပေါ်တွင် အထက်တန်းကျောင်း ၃ ကျောင်းရှိသည့်အနက် အထက (၂) မှာ တိုက်ပွဲအတွင်း မီးလောင် ပျက်စီးသွားခဲ့ပြီး၊ အထက (၁) မှာလည်း ရဲစခန်းအနီးတွင်ရှိသဖြင့် ဖွင့်လှစ်ရန် မဖြစ်နိုင်သော်လည်း၊ စစ်ကော် မရှင်က ကျောင်း ၃ ကျောင်းလုံးကို ပေါင်းစည်းကာ ဘူတာဈေးအနီးရှိ အထက (၃) တွင် စုပေါင်း ဖွင့်လှစ်နေခြင်း ဖြစ်သည်။ ဖြစ်စဉ်နှင့်ပတ်သက်၍ ကသာမြို့ခံ စစ်ဘေးရှောင်တစ်ဦးက “ကျောင်းကဖွင့်နေပြီတဲ့။ အခုက မြို့ထဲက ဘူတာ ဈေးနဲ့နီးတဲ့ အထက ၃ မှာဖွင့်တာ။ အရှေ့ဘက်ကမ်းမှာရှိတဲ့ ရွာတွေကနေ ကြားတဲ့သတင်းပါ။ မြစ်အရှေ့ ဘက် ကမ်းကသူတွေက သိကြတယ်။ သူတို့တွေလည်း အဲ့မှာကျောင်းထားကြတဲ့သူတွေ ရှိလို့” ဟု ပြောသည်။ ကသာမြို့တွင် ပြီးခဲ့သည့် ဒီဇင်ဘာလ ၁၈ ရက်နေ့ကတည်းက မြို့သိမ်းတိုက်ပွဲများ စတင်ခဲ့ခြင်းဖြစ်ပြီး၊ တိုက်ပွဲ များ ခေတ္တငြိမ်သက်နေချိန်တွင် စစ်ကော်မရှင်က Non-CDM ဆရာ၊ ဆရာမများနှင့် ကျောင်းသား ၄၀၀ ဝန်းကျင် ခန့်ကို မြို့တွင်းသို့ ဝင်ရောက်စေကာ ကျောင်းဖွင့်ရန် ပြင်ဆင်ခဲ့ခြင်း ဖြစ်သည်။ သို့သော် ကျောင်းစတင်ဖွင့်လှစ်သည့် ဇန်နဝါရီလ ၁၈ ရက်နေ့မှစ၍ တိုက်ပွဲများမှာ ပြန်လည် ပြင်းထန်လာနေ သည်။ ယခုကဲ့သို့ စစ်ရေးတင်းမာနေသည့် ကြားမှ ကျောင်းများ ပြန်ဖွင့်နေခြင်းမှာ ကျောင်းသားများကို လူသားဒိုင်း အဖြစ် အသုံးချလိုသောကြောင့် ဖြစ်ကြောင်း ကသာမြို့ တော်လှန်ရေးတပ်ဖွဲ့ဝင်တစ်ဦးက ယခုကဲ့သို့ မှတ်ချက် ပေးသည်။ “ဒါကတော့ ရှင်းပါတယ်။ ပြည်သူကို ကြားခံအဖြစ် စစ်ရေးမှာ အခက်တွေ့သွားမလားဆိုပြီး ပြည်သူကို လူသားဒိုင်းအဖြစ် အသုံးချတာပါပဲ” ဟု ၎င်းက ပြောသည်။ တော်လှန်ရေးအင်အားစုများက ကသာမြို့တွင်းရှိ အရပ်သားများ အနေဖြင့် မြို့ကိုစွန့်ခွာကြရန် တိုက်ပွဲ စတင်ချိန် ကတည်းက သတိပေးထားသည်။ လက်ရှိတွင် ကသာမြို့ခံ အများစုမှာ မန္တလေးနှင့် မြစ်ကြီးနားမြို့ အစရှိသည့် မြို့ကြီးများအပြင် ဧရာဝတီမြစ် ကမ်းဘေးရှိ ကျေးရွာများ၊ မိုးညှင်း၊ မိုးကောင်းနှင့် ရှမ်းပြည် မြောက်ပိုင်းရှိ မဘိန်းမြို့များအထိ ဘေးလွတ်ရာသို့ ထွက်ပြေး တိမ်းရှောင်နေကြရခြင်း ဖြစ်သည်။

မြို့သိမ်းတိုက်ပွဲဖြစ်ပွားနေသော်လည်း စစ်ကော်မရှင်က စာသင်ကျောင်း ဖွင့်ခိုင်း

ကသာတွင် တိုက်ပွဲများ ပြန်လည် ပြင်းထန်၊ စစ်ကော်မရှင်က အဆက်မပြတ် ဗုံးကြဲ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၁၉ ရက်။ စစ်ကိုင်းတိုင်းဒေသကြီး၊ ကသာမြို့တွင် တိုက်ပွဲများ ပြန်လည်ပြင်းထန်လာနေပြီး စစ်ကော်မရှင်တပ်က လေကြောင်းမှ အဆက်မပြတ် ဗုံးကြဲတိုက်ခိုက်နေသည်ဟု မြေပြင်သတင်းရင်းမြစ်က ပြောသည်။ ကသာမြို့တွင် စစ်ကော်မရှင်တပ်နှင့် တော်လှန်ရေး မဟာမိတ် တပ်ပေါင်းစုများအကြား တိုက်ပွဲများ ပြန်လည် ပြင်းထန်နေပြီး စစ်တပ်ဘက်က ဂျက်ဖိုက်တာနှင့် ရဟတ်ယာဉ်များ အပါအဝင် လေကြောင်း အင်အား အလုံး အရင်းဖြင့် အပြင်းအထန် တိုက်ခိုက်နေသည်ဟု စစ်ရေးသတင်းရင်းမြစ်များက ပြောသည်။ မြေပြင်စစ်ရေးသတင်းရင်းမြစ်တစ်ဦးက “မနေ့ကတော့ တော်တော်ဆိုးတယ်။ ဒီနေ့လည်း (သေနတ်သံ) ကြား တော့ကြားရတယ်။ ဒါ‌ပေမဲ့ ဒီနေ့ကတော့ ခပ်ကြဲကြဲပဲ။ မနေ့ကတော့ ခပ်စိပ်စိပ်ကို လေယာဥ်ပျံ Y-12 တွေပျံ တယ်။ ဟက်စကီးဆို နှစ်စီးတွဲတွေပျံတယ်။ ဂျက်ဖိုက်တာတွေပျံတယ်။ တောက်လျှောက်ပေါ့။ အသေကြဲ အသေစော်နေတာ” ဟု ပြောသည်။ ပြီးခဲ့သည့် ဇန်နဝါရီလ ၁၇ ရက် (စနေနေ့) နံနက်ပိုင်းမှ စတင်ကာ ကသာမြို့အခြေစိုက် ခမရ (၃၀၉) တပ်ရင်း အနီးရှိ ဂေါက်ကွင်းနှင့် တပ်ဦးဘုန်းကြီးကျောင်းတစ်ဝိုက်တွင် နှစ်ဖက်တိုက်ပွဲများ ပြန်လည်စတင်ခဲ့ခြင်း ဖြစ်သည်။ ဇန်နဝါရီလ ၁၈ ရက်နေ့ (ယမန်နေ့)ကမူ စစ်ကော်မရှင်တပ်ဘက်က လေကြောင်းတိုက်ခိုက်မှုကို အရှိန်မြှင့်တင်ခဲ့ ကြောင်း စစ်ရေးသတင်းရင်းမြစ်က အတည်ပြုသည်။ ကသာမြို့သိမ်းတိုက်ပွဲမှာ ပြီးခဲ့သည့် ၂၀၂၅ ခုနှစ်၊ ဒီဇင်ဘာလ ၂၈ ရက်နေ့ စစ်ကော်မရှင်၏ ရွေးကောက်ပွဲကာလ တွင် စတင်ခဲ့ခြင်းဖြစ်ပြီး၊ ဇန်နဝါရီလ ၃ ရက်နေ့၌ တိုက်ပွဲအနည်းငယ်ငြိမ်သက်သွားခဲ့သော်လည်း ယခုအခါ ပြန်လည်ပြင်းထန်လာခြင်းဖြစ်သည်။ လက်ရှိတိုက်ပွဲများကြောင့် ခမရ (၃၀၉) အနီးရှိ ရပ်ကွက် (၅)၊ ရပ်ကွက် (၈) နှင့် ရပ်ကွက် (၉) တို့မှ နေအိမ်များစွာ မှာလည်း ထိခိုက်ပျက်စီးမှုများရှိနေသည်။ တိုက်ပွဲများ ပြန်လည် ပြင်းထန်လာမှုကြောင့် မြို့တွင်းသို့ ပစ္စည်းပြန်ယူရန် ပြင်ဆင်နေသည့် စစ်ဘေးရှောင်များ အနေဖြင့် မြို့တွင်းသို့ လုံးဝမဝင်ကြရန် သတိပေးမှုများ ထွက်ပေါ်နေသည်။ မန္တလေးမြို့တွင် စစ်ဘေးရှောင်နေရသည့် ကသာမြို့ခံ အမျိုးသမီးတစ်ဦးက မြို့တွင်းအခြေအနေနှင့်ပတ်သက်၍ ယခုကဲ့သို့ ပြောသည်။ “ကျမတို့ ကသာမြို့နဲ့လည်း အဆက်အသွယ်မရပါဘူး။ ပတ်ဝန်းကျင်ကနေ ကြားတဲ့လူတွေက ပြောပြပေး တာ။ အခြေနေက မကောင်းပါဘူး။ မနေ့တုန်းကလည်း ဗုံးတွေကြဲနေတယ်။ (မြို့ထဲ) မပြန်ခဲ့ကြနဲ့လို့ ပြောခဲ့ တာပဲ” ဟု အဆိုပါ အမျိုးသမီးက ပြောသည်။ ကသာမြို့ခံ အများစုမှာ တိုက်ပွဲစတင်ချိန် ကတည်းက မြစ်ကြီးနား၊ မန္တလေးမြို့ကြီးများအပြင် ဧရာဝတီ မြစ်ကမ်းဘေးရှိ ကျေးရွာများ၊ မိုးညှင်း၊ မိုးကောင်းနှင့် ရှမ်းပြည် မြောက်ပိုင်း မဘိန်းမြို့များအထိ ဖြန့်ကျက် ထွက်ပြေး တိမ်းရှောင်နေကြရသည်။ ကသာမြို့သိမ်းတိုက်ပွဲကို ကချင်လွတ်လပ်ရေး တပ်မတော် (KIA)၊ အမျိုးသား ညီညွတ်ရေး အစိုးရ (NUG) လက်အောက်ခံ ပြည်သူ့ကာကွယ်ရေးတပ် (PDF)၊ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ် တပ်ဦး (ABSDF)၊ ပြည်သူ့လွတ်မြောက်ရေး တပ်မတော် (PLA) နှင့် နွေဦးတော်လှန်ရေး မဟာမိတ်တပ်ပေါင်းစု (SRA) တို့ ပူးပေါင်းကာ တိုက်ခိုက်နေခြင်း ဖြစ်သည်။ စစ်ကော်မရှင်ဘက်ကမူ ဗျူဟာမြောက်သည့် ကသာမြို့ကို လက်မလွှတ်ရရေးအတွက် လေကြောင်းအင်အားကို အလွန်အကျွံသုံးစွဲ၍ ခုခံနေကြောင်း စစ်ရေးလေ့လာသူများနှင့် မြေပြင်သတင်းရင်းမြစ်များက သုံးသပ်ကြသည်။

ကသာတွင် တိုက်ပွဲများ ပြန်လည် ပြင်းထန်၊ စစ်ကော်မရှင်က အဆက်မပြတ် ဗုံးကြဲ

ကသာအနီး ကျေးရွာဗုံးကြဲမှုတွင် အရပ်သား ၁ ဦးသေ၊ ၃ ဦး ဒဏ်ရာရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၃ ရက်။ ကသာအနီး ကျေးရွာတစ်ရွာကို စစ်ကော်မရှင်က ဗုံးကြဲတိုက်ခိုက်မှုကြောင့် အရပ်သား တစ်ဦး သေဆုံးပြီး အခြား ၃ ဦး ဒဏ်ရာရရှိခဲ့သည်။ စစ်ကိုင်းတိုင်း၊ ကသာမြို့သိမ်းတိုက်ပွဲအတွင်း စစ်ကော်မရှင်၏ လေကြောင်းတိုက်ခိုက်မှုကြောင့် ကျေးရွာ အတွင်းရှိ ခေါက်ဆွဲဆိုင်တွင် ထိုင်နေသည့် အသက် ၅၀ ကျော်အရွယ် အမျိုးသားတစ်ဦး ဗုံးစထိမှန်သေဆုံးခဲ့ပြီး အရပ်သား ၃ ဦး ထိခိုက်ဒဏ်ရာရရှိခဲ့ကြောင်း ဒေသခံများက ပြောသည်။ ဇန်နဝါရီလ ၂ ရက် မွန်းလွဲ ၁ နာရီဝန်းကျင်တွင် မြို့သိမ်းတိုက်ပွဲဖြစ်ပွားရာ ကသာမြို့နှင့် ၁၅ မိုင်ခန့်အကွာရှိ မိုးတားလေးတိုက်နယ်၊ ဟဲနားကျေးရွာအတွင်းသို့ စစ်ကောင်စီလေယာဉ်က ဗုံးကြဲတိုက်ခိုက်ခဲ့ခြင်းဖြစ်သည်။ ဗုံးသီးကျရောက်ပေါက်ကွဲသည့်နေရာနှင့် မလှမ်းမကမ်းရှိ ခေါက်ဆွဲဆိုင်အတွင်း ထိုင်နေသူများ ဗုံးစထိမှန်ခဲ့ခြင်း ဖြစ်ကြောင်း ဒေသခံများက ပြောသည်။ ဖြစ်စဉ်နှင့်ပတ်သက်၍ ဒေသခံအမျိုးသမီးတစ်ဦးက “ခေါက်ဆွဲဆိုင်မှာထိုင်နေတာ။ ဗုံးအစအနသွားထိတာ။ ဗုံးသီးကျတဲ့နေရာနဲ့က နည်းနည်းဝေးတယ်။ ၃ ယောက်ဒဏ်ရာရပြီး ၁ ယောက်သေတယ်” ဟု အတည်ပြု ပြောဆိုသည်။ စစ်ကော်မရှင်တပ်သည် မြို့သိမ်းတိုက်ပွဲစတင်သည့် ဒီဇင်ဘာလနောက်ဆုံးပတ်မှ စတင်ကာ ယနေ့အထိ ကသာမြို့ပတ်ပတ်လည်နှင့် အနီးနားရှိကျေးရွာများကို လေကြောင်းမှ အပြင်းအထန် တိုက်ခိုက်နေခြင်းဖြစ်သည်။ ထိုသို့ တိုက်ခိုက်မှုများကြောင့် ကသာမြို့ပေါ်ရှိ ပတ္တမြားရပ်ကွက်မှ ပတ္တမြားစျေးနှင့် အထက (၂) စာသင်ကျောင်း ဆောင် အချို့ မီးလောင်ပျက်စီးခဲ့ရသည်။ ဇန်နဝါရီ ၂ ရက် ညပိုင်း ၇ နာရီဝန်းကျင်တွင်လည်း လေကြောင်းတိုက်ခိုက်မှုများ ဆက်တိုက်ရှိနေခဲ့ပြီး ဗုံးခိုကျင်း များအတွင်း ပုန်းအောင်းနေရသည့် စစ်ဘေးရှောင် အမျိုးသားတစ်ဦးက မြေပြင်အခြေအနေကို ယခုကဲ့သို့ ပြောပြသည်။ “ပျံတာနိမ့်နိမ့်လေး။ ကျဲနေတာ။ ကျနော်တို့လည်း ဗုံးခိုကျင်းထဲဝင်နေတာ။ မြန်လိုက်တာ အဲ့တိုက်လေယာဉ် တွေက နီးမှသိရတာ။ အခြေအနေကတော့ မကောင်းဘူးနေမှာ အဲ့လိုလာရင်။” တော်လှန်ရေး ပူးပေါင်းတပ်ဖွဲ့များသည် ဒီဇင်ဘာလ ၂၈ ရက် (စစ်ကော်မရှင်၏ အတုအယောင် ရွေးကောက်ပွဲ နေ့) တွင် ကသာမြို့သိမ်းတိုက်ပွဲကို စတင်ဆင်နွှဲခဲ့ခြင်းဖြစ်ပြီး၊ တိုက်ပွဲတစ်ပတ်အကြာတွင် မြို့လယ်ခေါင်အထိ ဝင်ရောက်စိုးမိုးထားနိုင်ပြီဖြစ်သည်။ လက်ရှိတွင် ခမရ ၃၀၉ တပ်ရင်းအနီးတစ်ဝိုက်၌ တိုက်ပွဲများ အပြင်းထန်ဆုံးဖြစ်ပွားနေပြီး နေအိမ်အများအပြား မီးလောင်ပျက်စီးနေသကဲ့သို့ မြို့ခံအများစုမှာလည်း ဘေးလွတ်ရာသို့ တိမ်းရှောင်နေကြရသည်။ တော်လှန်ရေး အင်အားစုများသည် ၂၀၂၃ ခုနှစ်ကတည်းက ကသာမြို့ပေါ်မှလွဲ၍ ကျေးရွာအုပ်စုအများစုကို ထိန်းချုပ်ထားခဲ့ခြင်း ဖြစ်ပြီး၊ ၂၀၂၅ ခုနှစ် နှစ်ကုန်ပိုင်းတွင်မှ မြို့သိမ်းတိုက်ပွဲကို အရှိန်မြှင့်တင်ကာ အပြတ်အသတ် တိုက်ခိုက်လာခြင်း ဖြစ်ကြောင်း မြေပြင်သတင်းရင်းမြစ်များက ပြောသည်။

ကသာအနီး ကျေးရွာဗုံးကြဲမှုတွင် အရပ်သား ၁ ဦးသေ၊ ၃ ဦး ဒဏ်ရာရ

သောကြာနေ့ည ရုပ်သံသတင်း (၁၀-၁၀-၂၅)

သောကြာနေ့ည ရုပ်သံသတင်း (၁၀-၁၀-၂၅)

ဒီကနေ့ အစီအစဉ်ထဲမှာတော့ … မိုးမိတ်မှာ ဗုံးကြဲတိုက်ခိုက်ခဲ့လို့ ကလေးတွေ အပါအဝင် အရပ်သားတွေ အသက်ဆုံးရှုံးခဲ့ရပါတယ်။ မွန်နဲ့ တနင်္သာရီမှာလည်း အရပ်သားတွေ လေကြောင်းတိုက်ခိုက်မှု ခံရပါတယ်။ ဖားကန့်မှာ စစ်ကော်မရှင်က ဘာကြောင့် ညမထွက်ရ အမိန့်ထုတ်လိုက်တာပါလဲ

ထိုင်းရောက် အလုပ်သမားတွေအတွက် ပန်းရောင်ကတ် ပြုလုပ်ရမယ့် နေရာတွေက ဘယ်နေရာတွေလဲ၊ ဘယ်လိုလုပ်ရမှာလဲ။ ယူကရိန်းတိုက်ပွဲမှာ လောင်စာ အရင်းအမြစ်တွေကို ဘာလို့ အပြန်အလှန် တိုက်ခိုက်နေကြတာလဲ။ ယူကေက အိန္ဒိယ နိုင်ငံကို အပေါ့စား ဒုံးကျည်တွေ ရောင်းပေးလိုက်ပါတယ်။

ကမ္ဘာကျော် မုဒိမ်းမှုတစ်ခုမှာ အယူခံဝင်တဲ့သူကို တရားရုံးက ဘယ်လို အမိန့်ချမှတ်လိုက်သလဲ … စတာတွေတင်ဆက်ထားပါတယ်။

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

မြိတ်အကျဉ်းထောင်နှင့် ရဲဘက်စခန်းမှ လွတ်မြောက်သူများတွင် နိုင်ကျဉ်းပါဝင်မှု မရှိ
တနင်္သာရီမြို့နယ်အတွင်း လေယာဉ်ကွင်းဆောက်ရန် လူထု မြေများ သိမ်းယူ
၁၂ နှစ်အရွယ် လေးတန်းကျောင်းသား ဓါးဒဏ်ရာအများအပြားဖြင့် သေဆုံး
မိုးကုတ်တွင် စစ်တပ်က စစ်ကား ၃၀ ခန့်ဖြင့် စစ်အင်အားဖြည့်တင်း
ဖားဆောင်းလမ်းပိုင်းများ ၂ လကြာအထိ စစ်တပ် မဖွင့်နိုင်သေး

Archives

Archives

×Close