စစ်ကော်မရှင် – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Tag Archive

Tag: စစ်ကော်မရှင်

ရွေးကောက်ပွဲ နောက်ပိုင်း မီးပြန်ပျက် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၁၁ ရက်။ ဧရာဝတီတိုင်း၊ ပုသိမ်မြို့တွင် စစ်အစိုးရ၏ အတုအယောင်လို့ ပညာရှင်တွေ သုံးသပ်ထားတဲ့ ရွေးကောက်ပွဲ ပြီးဆုံးသွားပြီးနောက် လျှပ်စစ်မီး ပေးဝေမှုမှာ ယခင်ကထက် ထက်ဝက်ခန့် လျော့နည်းသွားသည်ဟု ဒေသခံများက ပြောသည်။ ရွေးကောက်ပွဲကာလ မတိုင်မီက ပုသိမ်မြို့တွင် တစ်နေ့လျှင် လျှပ်စစ်မီး အနည်းဆုံး ၈ နာရီမှ ၁၂ နာရီအထိ ရရှိခဲ့ သော်လည်း၊ ဖေဖော်ဝါရီလဆန်းပိုင်းမှ စတင်ကာ တစ်နေ့လျှင် ၄ နာရီခန့်သာ မီးရရှိတော့သည့်အပြင် မီးလာချိန်၊ ပျက်ချိန်မှာလည်း တိကျမှုမရှိဘဲ စိတ်တိုင်းကျ ဖြတ်တောက်ခံနေရခြင်း ဖြစ်သည်။ အမှတ် (၁၂) ရပ်ကွက်တွင် နေထိုင်သူ ဒေသခံတစ်ဦးက “ရွေးကောက်ပွဲမတိုင်ခင်‌လေးမှာ မီးပေးတာ တော်တော် အချိန်မှန်တာ။ တနေ့ ၈ နာရီကျော်လောက်သုံးနေရတော့ ဘဝမှန်ကိုမေ့ပြီး ဘဝင်မြင့်ချင်ချင်တောင် ဖြစ်သွား တာ။ ဘာကြာလို့လဲ ဒုံရင်းကဒုံရင်းပေါ့၊ ကျောက်ခေတ်ထဲပြန်ရောက်သွားတာပါပဲ” ဟု ပြောသည်။ နိုင်ငံရေး လေ့လာသုံးသပ်သူများကမူ ဤသို့ ရွေးကောက်ပွဲမတိုင်မီ မီးမှန်အောင်ပေးခဲ့ခြင်းမှာ လူထု၏ စိတ်အာရုံ ကို ဆွဲဆောင်ရန်နှင့် မဲဆွယ်ရန်အတွက် အတင်းအကျပ် စီမံဆောင်ရွက်ခဲ့သည့် ‘ဆေးမီးတိုစီမံကိန်း’ မျှသာဖြစ် ကြောင်း ဝေဖန်ကြသည်။ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP) အနိုင်ရရှိသွားပြီးနောက်တွင် မျက်နှာဖုံးတပ်ထားသည့် အပြုံးများ ပျောက်ကွယ်သွားခြင်းဖြစ်သည်ဟု အသက် ၇၀ ကျော်အရွယ် ဝါရင့်နိုင်ငံရေးသမားတစ်ဦးက ပြောသည်။ ၎င်းက “စစ်ကော်မရှင်ဟာ ပြည်သူ့အတွက်ဆိုပြီး စဉ်းစားတာ နမ်းစေ့တစ်စေ့လောက်တောင် ဘယ်တုန်းကမှ မရှိခဲ့ဘူး။ အတ္တကြီးလွန်းတယ်။ လိုချင်တာရဖို့ ခဏကောင်းပြတတ်တာဟာ သူတို့ရဲ့ ရိုးရာဗျူဟာစစ်စစ်ပဲ” ဟု ပြောသည်။ လျှပ်စစ်ဝန်ထမ်းအချို့ကမူ နွေရာသီဖြစ်သဖြင့် ထုတ်လုပ်မှုနှင့် သုံးစွဲမှုမညီမျှခြင်းကြောင့် အလှည့်ကျပေးရခြင်း ဖြစ်သည်ဟု အကြောင်းပြသော်လည်း၊ မြေပြင်တွင် မီးလာချိန်မမှန်ခြင်းက ပြည်သူများကို ပိုမိုပင်ပန်းစေသည် ဟု ပြောဆိုနေကြသည်။ ဝန်ထမ်းအိမ်ရာမှ အသက် ၄၀ ကျော် အမျိုးသမီးတစ်ဦးက “ဓာတ်အားမနိုင်လို့ အလှည့်ကျပေးတာ လက်ခံရမှာ ပေါ့။ ဒါပေမဲ့ ပေးချိန်ဖြတ်ချိန် တိကျစေချင်တာ။ ဒါဆိုရင် ချက်ဖို့ပြုတ်ဖို့ကို စီမံလို့ရတာပေါ့။ အခုက လာချင်တဲ့ အချိန်လာ၊ ပျက်ချင်တဲ့အချိန်ပျက်ဆိုတော့ အတော်ဒုက္ခရောက်တယ်” ဟု ပြောသည်။ မီးလာချိန်ကို စောင့်ဆိုင်းကာ ချက်ပြုတ်နေရသဖြင့် အခန့်မသင့်ပါက ထမင်းအိုးများ ပစ်လိုက်ရသည့်အထိ ဆုံးရှုံးမှုများရှိနေကြောင်း အမှတ် (၈) ရပ်ကွက်မှ အမျိုးသမီးတစ်ဦးကလည်း ယခုကဲ့သို့ ပြောသည်။ “သက်သာမလားလို့ မီးလာချိန်လေးစောင့်ပြီး ထမင်းအိုးတည်ပါတယ်။ ထမင်းမကျက်ခင် မီးပျက်‌တော့ ပစ် လိုက်ရ‌ရော။ မရှိမဲ့ရှိမဲ့ ပိုက်ဆံ‌လေးနဲ့ ဝယ်ထားရတဲ့ ဆန်လေး နှမြောလိုက်တာ မပြောပါနဲ့တော့။ ဖြစ်ပေါင်း များနေတော့လည်း လျှပ်စစ်က မောင်မင်းကြီးသားတွေ ကျန်းမာပါစေ ဆုတောင်းပေးရတာ အမောပဲ။” ထို့ပြင် ပုသိမ်မြို့ခံများမှာ လျှပ်စစ်မီးကို တစ်နေ့ ၄ နာရီခန့်သာ သုံးစွဲရသော်လည်း၊ လကုန်တွင် ကျသင့် ယူနစ် ထက် ပိုမိုကောက်ခံသည့် မီတာခပြဿနာများနှင့်ပါ ရင်ဆိုင်နေရကြောင်း မြို့ခံများက ပြောသည်။ ရွေးကောက်ပွဲအလွန် ပုသိမ်မြို့၏ လျှပ်စစ်မီးအခြေအနေမှာ ပြည်သူလူထု၏ လူမှုစီးပွားဘဝကို သိသိသာသာ ထိုးနှက်လျက်ရှိသည်ဟု ပြောဆိုနေကြသည်။ #ရွေးကောက်ပွဲ #ဧရာဝတီတိုင်း #ပုသိမ်မြို့

ရွေးကောက်ပွဲ နောက်ပိုင်း မီးပြန်ပျက်

စစ်ကော်မရှင် လက်နက်ကြီးကြောင့် သားအဖ ၂ ဦးသေ၊ သားအမိ ၂ ဦး ဒဏ်ရာရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၂၃ ရက်။ တိုက်ပွဲဖြစ်ပွားခြင်းမရှိဘဲ စစ်ကော်မရှင်တပ်က လက်နက်ကြီးဖြင့် ပစ်ခတ်ခဲ့ရာ သားအဖနှစ်ဦး သေဆုံးပြီး သားအမိနှစ်ဦး ဒဏ်ရာရရှိခဲ့သည်။ တနင်္သာရီတိုင်းဒေသကြီး၊ ထားဝယ်ခရိုင်၊ ရေဖြူမြို့နယ်တွင် စစ်ကော်မရှင်တပ်က လက်နက်ကြီးဖြင့် အကြောင်း မဲ့ ပစ်ခတ်ခဲ့မှုကြောင့် နေအိမ်တစ်လုံးပေါ် ကျရောက်ပေါက်ကွဲပြီး အလုပ်သမားမိသားစုဝင် သားအဖနှစ်ဦး သေဆုံးကာ သားအမိနှစ်ဦး ပြင်းထန်စွာ ဒဏ်ရာရရှိခဲ့ကြောင်း ဒေသခံများက ပြောသည်။ ဖြစ်စဉ်နှင့်ပတ်သက်၍ အသက် ၄၀ ဝန်းကျင်အရွယ်ရှိ အလုပ်သမားတစ်ဦးက “တိုက်ပွဲဖြစ်တာမရှိဘဲ ပစ်တာ ပါ။ မိသားစု ၅ ယောက်မှာ အဖေလုပ်တဲ့သူနဲ့ ၁၅ နှစ်အရွယ် သမီးအကြီးဆုံးတို့ နှစ်ယောက်လုံး နေရာမှာတင် ဆုံးသွားတယ်။ သားအလတ်နဲ့ အမေဖြစ်သူကတော့ ဒဏ်ရာတွေနဲ့ ဆေးကုနေရတယ်။ ကံကောင်းတာက လသားအရွယ် သားအငယ်ဆုံးလေးကတော့ ဘာမှမဖြစ်ဘဲ လွတ်သွားတယ်” ဟု ပြောသည်။ ဖြစ်စဉ်မှာ မတ်လ ၂၀ ရက်နေ့ မွန်းလွဲပိုင်းအချိန်တွင် ကလိန်အောင်မြို့အနီးရှိ ရာဖူးရွာဟောင်း၌ တပ်စွဲထားသည့် စစ်ကောင်စီ၏ ပူးပေါင်းစစ်ကြောင်းက ၁၂၀ မမ လက်နက်ကြီးများဖြင့် ၁၀ လုံးထက်မနည်း ပစ်ခတ်ခဲ့ခြင်း ဖြစ်သည်။ အဆိုပါ လက်နက်ကြီးကျည်များသည် စစ်ကော်မရှင်တပ်မှ ဗိုလ်မှူးတစ်ဦး ပိုင်ဆိုင်သည့် ရော်ဘာခြံအတွင်းရှိ အလုပ်သမားနေအိမ်ပေါ်သို့ တိုက်ရိုက်ကျရောက် ပေါက်ကွဲခဲ့ခြင်း ဖြစ်သည်။ အဆိုပါ လက်နက်ကြီးများကို ရာဖူးကျေးရွာဟောင်းတွင် အခြေစိုက်ထားသည့် စစ်ကော်မရှင်၏ ခလရ ၂၈၂၊ ၂၇၃ နှင့် ခမရ ၄၀၈၊ ၄၀၉၊ ၄၁၀ ပူးပေါင်းစစ်ကြောင်းမှ ပစ်ခတ်ခဲ့ခြင်းဖြစ်သည်။ ရာဖူးကျေးရွာအနီးတွင် ပြီးခဲ့သည့် မတ်လ ၁၉ ရက်နေ့က စစ်ကော်မရှင်တပ်နှင့် ပြည်သူ့ကာကွယ်ရေးတပ်ဖွဲ့ (PDF) တို့အကြား ထိတွေ့တိုက်ပွဲတစ်ကြိမ် ဖြစ်ပွားခဲ့သော်လည်း၊ ယခု သားအဖနှစ်ဦး သေဆုံးသည့်ဖြစ်စဉ်မှာမူ တိုက်ပွဲဖြစ်ပွားခြင်းမရှိသည့် အချိန်တွင် အကြောင်းမဲ့ ပစ်ခတ်ခံရခြင်းဖြစ်သည်ဟု ဒေသခံများက ဆိုသည်။ လက်ရှိတွင် ရေး-ထားဝယ် ကားလမ်းမကြီးပေါ်၌ တည်ရှိသည့် ရာဖူးကျေးရွာ၏ တစ်ဖက်တစ်ချက်စီတွင် စစ်ကော်မရှင်တပ်နှင့် ပြည်သူ့ကာကွယ်ရေးတပ်များက ကိုယ်စီနေရာယူထားကြပြီး စစ်ရေးတင်းမာနေဆဲ ဖြစ်သည်။ စစ်ကော်မရှင်တပ်၏ လက်နက်ကြီး ပစ်ခတ်မှုများကြောင့် ဒေသခံရွာသားများမှာ လုံခြုံရေးအတွက် စိုးရိမ် ထိတ်လန့် နေကြသည်။ #တနင်္သာရီတိုင်း #ရေဖြူမြို့နယ် #ကလိန်အောင်မြို့ #ရာဖူးရွာ #ထားဝယ်ခရိုင်

စစ်ကော်မရှင် လက်နက်ကြီးကြောင့် သားအဖ ၂ ဦးသေ၊ သားအမိ ၂ ဦး ဒဏ်ရာရ

ဓါးစာခံများ ကယ်တင်ပြီးနောက်ပိုင်း စစ်ကော်မရှင်က စစ်ရေးလှုပ်ရှားမှုများ ပိုမို လုပ်ဆောင်လာ သတင်းနှင့် မီဒိယာ ကွန်ရက်။ ၂၀၂၆ ခုနှစ်၊ မတ်လ ၁၈ ရက်။ ပဲခူးတိုင်း၊ ညောင်လေးပင်ခရိုင်၊ ကျောက်ကြီးမြို့နယ်ထဲတွင် စစ်ကော်မရှင်တပ်က စစ်ရေးလှုပ်ရှားမှုများကို ယခင်ကထက် ပိုမို လုပ်ဆာင်လာနေပြီး တိုက်ပွဲများလည်း ဆက်လက်ဖြစ်ပွားနေသည်။ စစ်ကော်မရှင်တပ်က ဖမ်းဆီးထားသည့် ပြည်သူများကို မကြာသေးမီက တော်လှန်ရေးပူးပေါင်းတပ်များက ဝင်ရောက်ကယ်တင်ခဲ့သည့် ဖြစ်စဉ်နောက်ပိုင်းတွင် စစ်ကော်မရှင်ဘက်က အာဃာတဖြင့် စစ်ရေးအရှိန် ပိုမို မြှင့်တင်လာခြင်းဖြစ်ကြောင်း ကရင် အရေးပေါ် ကူညီကယ်ဆယ်ရေး ကော်မတီ KRC က သုံးသပ်သည်။ ကျောက်ကြီးမြို့နယ်အတွင်း၌ စစ်ကော်မရှင်တပ်က စစ်ရေးလှုပ်ရှားမှုများ ယခင်ကထက် ပိုမိုတိုးမြှင့်လာပြီး ကျေးရွာများအတွင်း စစ်ကြောင်းထိုးဝင်ရောက်ကာ ဒေသခံများကို ဖမ်းဆီးသတ်ဖြတ်ခြင်းနှင့် လူသားဒိုင်းအဖြစ် အသုံးပြုခြင်းများ လုပ်ဆောင်လျက်ရှိနေသည်။ လက်ရှိကျောက်ကြီးမြို့နယ်အတွင်းရှိ စစ်ရေးအခြေအနေနှင့် ပတ်သက်၍ ကျောက်ကြီးမြို့နယ် ကရင်အရေးပေါ် ကူညီကယ်ဆယ်ရေးကော်မတီ (KRC) တာဝန်ရှိသူတစ်ဦးက ယခုကဲ့သို့ ပြောသည်။ “လက်ရှိ ကျောက်ကြီးမြို့နယ်အတွင်းမှာတော့ စစ်ကော်မရှင်ရဲ့ စစ်ရေးအခြေအနေကတော့ လှုပ်ရှားမှု နည်း နည်း ပိုများတယ်လို့ သိရတယ်နော်။ ပိုပြီးတော့မှလည်း ရမ်းသမ်းပစ်ခတ်မှုတွေလည်း လုပ်နေတယ်။ အဲဒီ ထူးခြားတဲ့ ရေတွင်းကုန်းအနီးအနားတစ်ခွင်မှာ အခုဆိုရင်လည်း သူတို့တပ် အင်အားတိုးချဲ့တာတွေလည်း တွေ့ရတယ်” ဟု ပြောသည်။ ပြီးခဲ့သည့် မတ်လ ၅ ရက်နေ့မှစတင်ကာ စစ်ကော်မရှင်တပ်သည် ရေတွင်းကုန်းကျေးရွာ အုပ်စုအတွင်းရှိ ကျေးရွာများသို့ အင်အားတိုးချဲ့ ဝင်ရောက်လာပြီး ဒေသခံပြည်သူများအပေါ် ဖမ်းဆီးသတ်ဖြတ်ခြင်း၊ ညှင်းပန်း နှိပ်စက်ခြင်း၊ လူသားဒိုင်းကာ ပြုလုပ်ခြင်း အစရှိသည့် လူ့အခွင့်အရေး ချိုးဖောက်မှုများ ဆက်တိုက်ကျူးလွန် နေခြင်း ဖြစ်သည်။ လက်ရှိတွင် ကျေးရွာများအတွင်းသို့ ဒရုန်းများ၊ လက်နက်ကြီးများဖြင့် ရမ်းသမ်းပစ်ခတ်မှုများ နေ့စဉ်ပြုလုပ်နေ သဖြင့် ရေတွင်းကုန်းအုပ်စုနှင့် အနီးဝန်းကျင်ကျေးရွာများမှ ဒေသခံများမှာ ဘေးလွတ်ရာသို့ ထွက်ပြေး တိမ်းရှောင် နေကြရသည်။ စစ်ကော်မရှင်တပ်၏ လုပ်ရပ်များသည် စစ်ဆင်ရေးထက် လုယက်ဖျက်ဆီးသည့် လုပ်ရပ်များဖြစ်နေကြောင်း KRC ပြောရေးဆိုခွင့်ရှိသူက ဝေဖန်ရှုတ်ချထားသည်။ “စစ်တိုက်တာမဟုတ်ဘူး၊ ဓမြတိုက်တာနဲ့တူတယ်ပေါ့နော်။ ကျနော့်အနေနဲ့ ကျနော်တို့ ပြည်တွင်းစစ်ကို ဒီလိုမျိုး လုပ်ရပ်တွေကတော့ လူမဆန်တဲ့ လုပ်ရပ်တွေ၊ ကျနော်တို့ကတော့ လုံးဝရှုတ်ချတယ်။ သူရဲ့လုပ်ရပ်က လူမဆန်တဲ့လုပ်ရပ်ကို စစ်တိုက်နေတာနဲ့ မတူတော့ဘူး။ ကျနော်တို့ ပြည်သူတွေက ဓမြတိုက်နေတာနဲ့ တူတယ်။ အဲဒီအပေါ်မှာကတော့ သူတို့ရဲ့ ထိုးစစ်ဆင်လာတဲ့ ဒီကျေးရွာတွေကို လုယက်သတ်ဖြတ်တယ်။ လုယက်တယ်၊ ပြီးတော့ ပစ္စည်းတွေ သိမ်းသွားတယ်။ ပြီးတော့မှ ပြန်လွတ်ပေးတဲ့သူတွေ ရှိခဲ့သော်လည်း ငွေကြေးတွေ တောင်းခံတယ်ပေါ့နော်” ဟု ၎င်းက ပြောသည်။ ကျောက်ကြီးမြို့နယ်သည် ကေအန်ယူ (KNU) တပ်မဟာ (၃) နယ်မြေဖြစ်ပြီး စစ်ကော်မရှင်တပ်က နယ်မြေ စိုးမိုးရေးအတွက် အင်အားသုံး ကြိုးပမ်းနေခြင်းကြောင့် တိုက်ပွဲများ ဆက်လက်ပြင်းထန်လာမည့် အလားအလာ ရှိနေသည်။ ကျောက်ကြီးမြို့နယ်အတွင်း၌ သာမက မြန်မာတစ်နိုင်ငံလုံးတွင် ပြည်သူများအပေါ် လူ့အခွင့်အရေး ချိုးဖောက် နေသည့် စစ်ကော်မရှင်တပ်ကို နိုင်ငံတကာ အနေဖြင့် ထိရောက်စွာ အရေးယူပေးရန်နှင့် တောတောင်များ အတွင်း ပိတ်မိနေသည့် စစ်ဘေးရှောင်များ အတွက် လူသားချင်း စာနာထောက်ထားမှုဆိုင်ရာ အကူအညီများ အမြန်ဆုံးပေးအပ်ရန် ကရင်အရေးပေါ် ကူညီကယ်ဆယ်ရေးအဖွဲ့ (KRC) က အရေးပေါ် တောင်းဆိုထားသည်။ #ကျောက်ကြီးမြို့နယ် #လယ်ဒိုမြို့နယ် #ညောင်လေးပင်ခရိုင် #ပဲခူးတိုင်း #လူ့အခွင့်အရေးချိုးဖောက်မှု #ရေတွင်းကုန်းကျေးရွာအုပ်စု #KNLA #KNDO #PDF

ဓါးစာခံများ ကယ်တင်ပြီးနောက်ပိုင်း စစ်ကော်မရှင်က စစ်ရေးလှုပ်ရှားမှုများ ပိုမို လုပ်ဆောင်လာ

စစ်ကိုင်းတိုင်း ကောလင်းအစပ်က ရွှေဖောင်များကို လေကြောင်းမှ တိုက်ခိုက် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၁၇ ရက်။ စစ်ကိုင်းတိုင်း၊ ကျွန်းလှနှင့် ကောလင်းမြို့နယ် အစပ်ရှိ ရွှေဖောင်များကို စစ်ကော်မရှင်က လေကြောင်းမှ တိုက်ခိုက်ခဲ့သဖြင့် အရပ်သား ၆ ဦး သေဆုံးပြီး ရွှေဖောင် ၁၅ ခု ပျက်စီးခဲ့ရကြောင်း ဒေသခံများက ပြောသည်။ ပြီးခဲ့သည့် မတ်လ ၁၅ ရက်နေ့၊ ညနေ ၃ နာရီခန့်တွင် ဟုမ္မလင်းလေတပ်စခန်းဘက်မှ တက်လာသည့် ဂျက်ဖိုက် တာ တိုက်လေယာဉ် ၂ စီးဖြင့် တော်လှန်ရေး တပ်ဖွဲ့များ ထိန်းချုပ်ထားရာ ကျွန်းလှမြို့နယ်နှင့် ကောလင်းမြို့နယ်အစပ်ရှိ သဖန်းဆိပ်ဆည်အတွင်း ရွှေမျှောလုပ်ငန်း လုပ်ကိုင် နေသည့် ရွှေဖောင်များကို ပစ်မှတ်ထား တိုက်ခိုက်ခဲ့ခြင်း ဖြစ် သည်။ အဆိုပါ လေကြောင်းတိုက်ခိုက်မှုကြောင့် ရွှေဖောင်များပေါ်တွင် အလုပ်လုပ်ကိုင်နေသည့် အရပ်သားလုပ်သား များ အနက် လက်ရှိအချိန်ထိ သေဆုံးသူ ၆ ဦးကို အတည်ပြုထားနိုင်ပြီး ထိခိုက်ဒဏ်ရာရသူများလည်း ရှိနေ ကြောင်း ဒေသခံများက ပြောသည်။ ဖြစ်စဉ်နှင့်ပတ်သက်၍ ဒေသခံအမျိုးသားတစ်ဦးက “ဟုတ်ကဲ့ဗျ။ ရွှေဖောင်တွေတော့ ခဏခဏ ပစ်ခံနေရတာ ပေါ့။ တစ်နေ့ကပစ်တာတော့ ရွှေဖောင် ၁၅ ခု ပျက်စီးသွားတယ်။ သေဆုံး ၆ ဦးလို့ ကြားသိထားရတယ်ဗျ။ အတိအကျတော့ မသိရသေးဘူး” ဟု ပြောသည်။ စစ်ကော်မရှင်တပ်သည် ယခုရက်ပိုင်းအတွင်း မြစ်ချောင်းများနှင့် ဆည်များအတွင်းရှိ ရွှေဖောင်လုပ်ငန်းခွင်များ ကို လေကြောင်းမှ မကြာခဏ တိုက်ခိုက်လျက်ရှိသည်။ ပြီးခဲ့သည့် မတ်လ ၁၀ ရက်နေ့ကလည်း ဗန်းမော်မြို့နယ်၊ စင်းခန်းကျေးရွာရှိ ဧရာဝတီမြစ်ကမ်းတစ်လျှောက် ရွှေဖောင်လုပ်ကွက်များ တိုက်ခိုက်ခံရသဖြင့် ရွှေဖောင်လုပ်သား ၃၀ ကျော် သေဆုံးခဲ့ရသည့် ဖြစ်စဉ်ဖြစ်ပွားခဲ့ သေးသည်။ သဖန်းဆိပ်ဆည်ကိုမူ စစ်ကော်မရှင်က ယခုနှစ် ဇန်နဝါရီလ ၁၄ ရက်နှင့် ဖေဖော်ဝါရီလ ၂၅ ရက်နေ့တို့တွင်လည်း လေကြောင်းမှ ဗုံးကြဲတိုက်ခိုက်မှုများ ပြုလုပ်ခဲ့ဖူးသည်ဟု Infinity Group က ထုတ်ပြန်ထားသည်။ အဆိုပါ သဖန်းဆိပ်ဆည်နှင့် ရေအားလျှပ်စစ်ရုံးအပါအဝင် အနီးဝန်းကျင် ကျေးရွာများကို တော်လှန်ရေး အင်အားစုများက ၂၀၂၅ ခုနှစ် နိုဝင်ဘာလကတည်းက ထိန်းချုပ်ထားခြင်းဖြစ်သည်။ လက်ရှိတွင် ဟုမ္မလင်းလေတပ်နှင့် နီးစပ်သည့် စစ်ကိုင်းတိုင်းအထက်ပိုင်းရှိ ကန့်ဘလူ၊ ကျွန်းလှ၊ ကောလင်း၊ ဝန်းသို၊ ပင်လည်ဘူး၊ ဖောင်းပြင်နှင့် မော်လိုက်မြို့နယ်များအတွင်း နေထိုင်ကြသည့် ပြည်သူများအနေဖြင့် လေကြောင်းတိုက်ခိုက်မှု အန္တရာယ်ကို အထူးသတိပြု နေထိုင်ကြရန် တော်လှန်ရေးအင်အားစုများက သတိပေးချက် ထုတ်ပြန်ထားသည်။ #စစ်ကိုင်တိုင်း #ရွှေဖောင်လုပ်ကွက် #စစ်ကော်မရှင် #ဟုမ္မလင်း #မော်လိုက် #ကျွန်းလှ #ကောလင်း #လေကြောင်းတိုက်ခိုက်

စစ်ကိုင်းတိုင်း ကောလင်းအစပ်က ရွှေဖောင်များကို လေကြောင်းမှ တိုက်ခိုက်

ဗျူဟာကုန်း ကျပြီးနောက် ကွတ်ခိုင်တစ်မြို့လုံးကို MNDAA ထိန်းချုပ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၁၆ ရက်။ ရှမ်းပြည် မြောက်ပိုင်း၊ ကွတ်ခိုင်မြို့ရှိ တအာင်းတပ်မတော် (TNLA) စခန်းများကို ကိုးကန့်တပ် (MNDAA) က ဒရုန်းရာချီ အသုံးပြုကာ အင်အားသုံး တိုက်ခိုက်ခဲ့ပြီးနောက် မြို့တစ်ခုလုံးကို အလုံးစုံထိန်းချုပ်လိုက်ပြီဟု ဒေသခံ များနှင့် မြေပြင်သတင်းရင်းမြစ်များက ပြောသည်။ ပြီးခဲ့သည့် မတ်လ ၁၄ ရက်နေ့မှ စတင်ကာ MNDAA ဘက်က ဒရုန်းအစီးရေ ရာနှင့်ချီအသုံးပြု၍ အပြင်းအထန် ထိုးစစ်ဆင်ခဲ့သဖြင့် မတ်လ ၁၅ ရက်နေ့ ညပိုင်းတွင် TNLA တပ်ဖွဲ့ဝင်များ ကွတ်ခိုင်ဗျူဟာကုန်းမှ ဆုတ်ခွာပေးခဲ့ ရခြင်း ဖြစ်သည်။ ကွတ်ခိုင်မြို့အပြင် မူဆယ် ၁၀၅ မိုင်နှင့် နမ့်ဖတ်ကာဘက်ရှိ TNLA စခန်းများကိုလည်း MNDAA က သိမ်းပိုက်ခဲ့ ပြီး တအာင်းအလံများ ဖြုတ်ချခြင်းနှင့် လူရာနှင့်ချီဖမ်းဆီးခြင်းများ လုပ်ဆောင်ခဲ့သည်ဟု ဆိုသည်။ မြေပြင်အခြေအနေနှင့်ပတ်သက်၍ ကွတ်ခိုင်ဒေသခံတစ်ဦးက “ကွတ်ခိုင်ကတော့ ကိုးကန့်လက်အောက် ကျသွား ပြီလို့ ပြောလို့ရတယ်။ မနေ့ညပိုင်းမှာ TNLA ဘက်က ဆုတ်သွားတာ။ ဒီနေ့မနက်မှာတော့ ပစ်ခတ်သံတွေ ငြိမ် နေပြီ၊ မြို့ပေါ်မှာ လူအသွားအလာ နည်းနည်းရှိလာပေမဲ့ မြို့ခံတွေကတော့ တော်တော်လေး စိုးရိမ်နေကြတုန်း ပဲ။ ဘာဖြစ်လာဦးမလဲ မသိရဘူးလေ” ဟု ပြောသည်။ တိုက်ပွဲအတွင်း ဟိုကျန့်ရွာရှိ နေအိမ်တစ်လုံးပေါ်သို့ ဒရုန်းဗုံးကျရောက်ပေါက်ကွဲခဲ့သဖြင့် အမျိုးသမီးတစ်ဦး သေဆုံးခဲ့ရပြီး ဒဏ်ရာရရှိသူများလည်း ရှိခဲ့သည်။ လက်ရှိတွင် ကွတ်ခိုင်၌ သေနတ်သံများ ငြိမ်သက်နေသော်လည်း နမ့်ခမ်းမြို့နယ်ဘက်တွင်မူ MNDAA က အင်အားဖြည့်တင်းကာ တိုက်ပွဲများ ဆက်လက်ဖြစ်ပွားနေဆဲဖြစ်ကြောင်း မြေပြင်သတင်းရင်းမြစ်က ပြောသည်။ ညီနောင်မဟာမိတ် အချင်းချင်းကြား ဖြစ်ပွားနေသည့် ယခုပဋိပက္ခအပေါ် လက်နက်ကိုင် ဖြေရှင်းခြင်း မပြုရန် အရပ်ဘက် အဖွဲ့အစည်းများကလည်း တိုက်တွန်းထားကြသည်။ တအာင်းအရပ်ဘက် အဖွဲ့အစည်းများကွန်ရက်က မတ်လ ၁၆ ရက်နေ့တွင် ထုတ်ပြန်ချက်တစ်စောင် ထုတ်ပြန်ခဲ့ ပြီး မဟာမိတ်အချင်းချင်းကြား စစ်ရေးပဋိပက္ခသည် စစ်အာဏာရှင်အတွက် အခွင့်အလမ်းများ ဖြစ်ပေါ်စေနိုင်ပြီး နွေဦးတော်လှန်ရေးကို စိန်ခေါ်မှုဖြစ်စေသဖြင့် စစ်ရေးကို ချက်ချင်းရပ်တန့်ကာ စားပွဲဝိုင်းတွင် ညှိနှိုင်းဖြေရှင်းကြ ရန် တိုက်တွန်းထားသည်။ ထို့ပြင် အမျိုးသားညီညွတ်ရေး အတိုင်ပင်ခံ ကောင်စီ (NUCC) နှင့် ကျန်းမာရေးအင်အားစု အသီးသီးကလည်း ယခုဖြစ်စဉ်ကို မိတ်ဖက်ပဋိပက္ခအဖြစ် ရှုမြင်ကာ နိုင်ငံရေးအရ ငြိမ်းချမ်းစွာ တွေ့ဆုံဆွေးနွေးကြရန် ပန်ကြားထား ကြသည်။ TNLA ဘက်ကမူ ၎င်းတို့အနေဖြင့် မဟာမိတ်အချင်းချင်းကြား ပြန်လည်ပစ်ခတ်ခြင်းမပြုဘဲ တွေ့ဆုံဆွေးနွေးရေး လမ်းကြောင်းဖြင့်သာ ကြိုးစားအဖြေရှာသွားမည်ဟု ထုတ်ပြန်ထားသည်။ သို့သော် MNDAA ဘက်ကမူ TNLA က ဦးစွာသေနတ်ဖောက်သဖြင့် တိုက်ပွဲစတင်ရခြင်းဖြစ်ကြောင်း မတ်လ ၁၄ ရက်နေ့တွင် ထုတ်ပြန်ထားရာ နှစ်ဖက်တပ်များကြား စစ်ရေးတင်းမာမှုသည် ကွတ်ခိုင်မှ နမ့်ခမ်းမြို့နယ် ဘက်သို့ ဆက်လက် ကူးစက်နေဆဲဖြစ်သည်။ #MNDAA #ကိုးကန့်တပ် #TNLA #တအာင်းတပ် #ကွတ်ခိုင်တိုက်ပွဲ #NUCC #

ဗျူဟာကုန်း ကျပြီးနောက် ကွတ်ခိုင်တစ်မြို့လုံးကို MNDAA ထိန်းချုပ်

ရွေးကောက်ပွဲရလဒ် နှင့် NCA လမ်းကြောင်းကို မွန်ဖိုရမ် လက်မခံ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၁၆ ရက်။ စစ်ကော်မရှင်၏ “အတုအယောင်” ရွေးကောက်ပွဲနှင့် NCA လမ်းကြောင်းကို လက်ခံမည်မဟုတ်ကြောင်း မွန်တော်လှန်ရေးဖိုရမ် ကြေညာလိုက်သည်။ စစ်ကော်မရှင်၏ ရွေးကောက်ပွဲမှတစ်ဆင့် ပေါ်ပေါက်လာမည့် မည်သည့် အုပ်ချုပ်ရေး အဖွဲ့အစည်းကိုမဆို အသိအမှတ်ပြုမည် မဟုတ်သလို၊ NCA စာချုပ်အပေါ် အခြေခံသည့် နိုင်ငံရေးဆွေးနွေးမှုများကိုလည်း လုံးဝလက်ခံမည်မဟုတ်ကြောင်း မွန်တော်လှန်ရေးအင်အားစုများက ပြောဆိုလိုက်သည်။ မွန်ဖိုရမ်ပြောရေးဆိုခွင့်ရှိသူ နိုင်အောင်းရော့က “၂၀၀၈ ဖွဲ့စည်းပုံကိုအခြေခံပြီး ကျင်းပသည့် ၂၀၂၅ အတု အယောင် ရွေးကောက်ပွဲမှ ထွက်လာသည့် မည်သည့် အုပ်ချုပ်ရေးအဖွဲ့ကိုမဆို အသိအမှတ်မပြုပါ။ ၂၀၂၅ အတုအယောင် ရွေးကောက်ပွဲမှ ထွက်လာသည့် ပြည်ထောင်စုနှင့် ပြည်နယ်၏ အုပ်ချုပ်ရေးအဖွဲ့များသည် ၂၀၀၈ ဖွဲ့စည်းပုံကို အသက်သွင်းသူများ ဖြစ်သောကြောင့် နည်းလမ်းပေါင်းစုံဖြင့် အရေးယူ ဆောင်ရွက်သွား မည်” ဟု ပြောသည်။ မွန်ပြည် တည်ဆောက်ရေးဆိုင်ရာ ဘုံသဘောထား ရပ်တည်ချက်တစ်ရပ် ဖော်ထုတ်ရန် ရည်ရွယ်၍ မတ်လ ၉ ရက်နေ့မှ ၁၁ ရက်နေ့အထိ ၃ ရက်ကြာ ပြုလုပ်ခဲ့သည့် ‘မွန်တော်လှန်ရေးဖိုရမ်’ မှတစ်ဆင့် ယခုကဲ့သို့ သဘော ထား ထုတ်ပြန်လိုက်ခြင်း ဖြစ်သည်။ အဆိုပါဖိုရမ်သို့ မွန်ပြည်သစ်ပါတီ (စစ်အာဏာရှင်တိုက်ဖျက်ရေး-NMSP/AD)၊ မွန်ပြည်ဖက်ဒရယ်ကောင်စီ (MSFC)၊ မွန်ပြည်နယ်အတိုင်ပင်ခံကောင်စီ (MSCC)၊ ပြည်ပရောက် မွန်ပူးပေါင်းဆောင်ရွက်ရေးကော်မတီ (OMCC) တို့အပြင် မွန်အရပ်ဘက်အဖွဲ့အစည်းများ၊ သံဃာတော်များနှင့် လေ့လာသူများ စုစုပေါင်း ၇၃ ဦး တက်ရောက်ခဲ့ကြသည်။ ဖိုရမ်၏ ထုတ်ပြန်ချက်တွင် ၂၀၀၈ ဖွဲ့စည်းပုံအခြေခံဥပဒေနှင့် တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) တို့ကို အခြေခံထားသည့် မည်သည့်နိုင်ငံရေးဆွေးနွေးပွဲကိုမျှ လက်မခံကြောင်း ဖော်ပြထားသည်။ ထို့ပြင် အနာဂတ်နိုင်ငံရေးတွင် စစ်တပ်ပါဝင်မှု လုံးဝမရှိစေရေးနှင့် ဖွဲ့စည်းပုံအခြေခံဥပဒေသစ် ရေးဆွဲသွားမည့် သဘောထားများကိုလည်း ချမှတ်ခဲ့ကြသည်။ ၃ ရက်ကြာ ဆွေးနွေးမှုများအပြီးတွင် ရရှိခဲ့သည့် ဘုံသဘောတူညီချက် ၅ ချက်နှင့် ပတ်သက်၍ နိုင်အောင်းရော့ က “ဘုံသဘောတူညီချက်များကတော့ ဖက်ဒရယ်ဒီမိုကရေစီပြည်ထောင်စုအတွင်း ကိုယ်ပိုင်ပြဌာန်းခွင့် အပြည့် အဝရှိသော မွန်ပြည်ကို တည်ဆောက်သွားမည်။ စစ်အာဏာရှင်စနစ်နှင့် အာဏာရှင်အားလုံး တိုက်ဖျက်ရန်။ ၂၀၀၈ ဖွဲ့စည်းပုံအခြေခံဥပဒေ ဖျက်သိမ်းရန်။ လူမျိုးများအားလုံး တန်းတူညီရေးနှင့် တိုင်းရင်းသား လူမျိုးများ ၏ ကိုယ်ပိုင်ပြဌာန်းခွင့်ကို အပြည့်အဝအာမခံထားသည့် ဖက်ဒရယ်ဒီမိုကရေစီ ပြည်ထောင်စုကို ပြည်နယ်နှင့် ဖက်ဒရယ်ယူနစ်များ အားကောင်းရေးမှ ပြည်ထောင်စုအားကောင်းရေးကို ချဉ်းကပ်သည့်နည်းလမ်းဖြင့် တည်ဆောက်သွားရန်။ အာဏာရှင်စနစ်အားလုံးကို အထောက်အကူပြုသည့် လုပ်ရပ်များအားလုံး တိုက်ဖျက်သွားရန်” ဖြစ်သည်ဟု ပြောသည်။ ထို့ပြင် မွန်တော်လှန်ရေးကာလအတွက် ရည်ရွယ်၍ ‘မွန်ပြည်တော်လှန်ရေး ပဋိညာဉ်’ (Mon State Revolutionary Charter) ကို အင်အားစုအသီးသီး၊ ဥပဒေပညာရှင်များနှင့် ပူးပေါင်းကာ ရေးဆွဲသွားမည်ဟု ဆိုသည်။ နိုင်ငံရေးနှင့် စစ်ရေးဆိုင်ရာ ရှေ့လုပ်ငန်းစဉ်များကို ညှိနှိုင်းဆောင်ရွက်ရန်အတွက် ‘မွန်တော်လှန်ရေးဆိုင်ရာ ပူးပေါင်းဆောင်ရွက်ရေး အလုပ်အဖွဲ့’ ကိုလည်း ဖွဲ့စည်းခဲ့ပြီး မွန်ပြည် အတွင်း စစ်အာဏာရှင်စနစ် တိုက်ဖျက် ရေးကို ပိုမိုအရှိန်မြှင့် လုပ်ဆောင်သွားမည်ဟု ဆိုသည်။ #မွန်တော်လှန်ရေးဖိုရမ် #NMSPAD #MSFC #MSCC #OMCC #NCA #အတုအယောင်ရွေးကောက်ပွဲရလဒ်

ရွေးကောက်ပွဲရလဒ် နှင့် NCA လမ်းကြောင်းကို မွန်ဖိုရမ် လက်မခံ

တာချီလိတ်မှ ထိုင်းနိုင်ငံသို့ ကူးသူများကို ကျပ် ၁၃ သိန်းထိတောင်းခံနေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၁၆ ရက်။ ရှမ်းပြည် အရှေ့ပိုင်း၊ တာချီလိတ်မြို့မှတစ်ဆင့် ထိုင်းနိုင်ငံ၊ မယ်ဆိုင်မြို့သို့ ကူးသန်းသွားလာရာတွင် စစ်ကော်မရှင် လက်အောက်ခံ ဝန်ထမ်းများနှင့် အေးဂျင့်များက VIP Pass ခေါင်းစဉ်ဖြင့် တစ်ဦးလျှင် ငွေကျပ် ၁၃ သိန်း (ထိုင်းဘတ် ၈,၀၀၀ ခန့်) အထိ တောင်းခံနေကြောင်း ခရီးသွားလာသူများက ပြောသည်။ ပြည်ပသို့ ထွက်ခွာမည့်သူများကို စစ်ကော်မရှင် လက်အောက်ခံ လဝက ဝန်ထမ်းများ၊ ရဲတပ်ဖွဲ့ဝင်များနှင့် အေးဂျင့်ကုမ္ပဏီများ ပူးပေါင်းကာ VIP Pass မပါရှိပါက အမျိုးမျိုး အကြောင်းပြချက်ပေး၍ တားဆီးခြင်းများ လုပ်ဆောင်နေခြင်း ဖြစ်သည်။ အဆိုပါ အခက်အခဲမရှိစေရန်အတွက် ခရီးသွားလာသူများမှာ မဖြစ်မနေ ငွေပေးဆောင်နေရသည့် အခြေအနေ ဖြစ်သည်ဟု ဆိုသည်။ ယခုရက်ပိုင်းအတွင်း နယ်စပ်ဖြတ်ကျော်ခဲ့သူတစ်ဦးက “မဖြစ်မနေ ပေးရတာတော့ မဟုတ်ဘူး။ သူတို့ ရစ်ရင် ဒီမှာစီစဉ်ထားသမျှ အလကားဖြစ်မှာစိုးလို့ ပေးရတာ။ တကယ်လည်း ရှေ့မှာတင် လူငယ် ၃ ယောက်။ သူတို့ ရစ်လို့ ထွက်မရတော့ဘူး” ဟု ၎င်းကိုယ်တိုင် ကြုံတွေ့ခဲ့ရသည်ကို ပြောပြသည်။ ထိုသို့ ငွေတောင်းခံရာတွင် ထိုင်းနိုင်ငံသို့ အလည်အပတ်ဗီဇာ၊ အလုပ်ဗီဇာ၊ ပညာရေးနှင့် ပင်စင်ဗီဇာ စသည့် တရားဝင်ဗီဇာကိုင်ဆောင်သူများ အေးဂျင့်များမှတစ်ဆင့် ပေးဆောင်နေရခြင်းဖြစ်သော်လည်း၊ တာချီလိတ် အိမ်ထောင်စုစာရင်းဖြင့် ပြုလုပ်ထားသည့် (စာအုပ်အပြာ) ကိုင်ဆောင်ထားသူများနှင့် နေ့စဉ်သွားလာနေသည့် အခြေခံလုပ်သားများမှာမူ အကျုံးမဝင်ဟု ဆိုကြသည်။ ထို့ပြင် စစ်ကော်မရှင်က အတင်းအကျပ် ပြဌာန်းထားသည့် ပြည်ပအလုပ်အကိုင် အလုပ်သမား သက်သေခံ ကတ်ပြား (OWIC) ကတ် ကိုင်ဆောင်ထားသူများမှာလည်း အဆိုပါ VIP ကြေးကို ပေးဆောင်နေရသဖြင့် နေရပ်ပြန်လာသည့် ရွှေ့ပြောင်းလုပ်သားများအတွက်လည်း ဝန်ထုတ်ဝန်ပိုး ဖြစ်စေသည်ဟု ဆိုကြသည်။ ပွဲစားနှင့် နီးစပ်သူတစ်ဦးက “ရန်ကုန်လမ်းကြောင်းက ဈေးပိုလို့ ဒီဘက်ကို လေယာဉ်နဲ့လာပြီးမှ ဟိုဘက်ကမ်း ပြန်ကူးတာပါ။ တာချီလိတ် လေယာဉ်ခဈေးကြီးတာနဲ့ အတူတူလောက်ပါပဲ” ဟု ပြောသည်။ လက်ရှိတွင် ရန်ကုန်လေဆိပ်မှ ထိုင်းနိုင်ငံသို့ ထွက်ခွာရာတွင်လည်း VIP Pass ကြေးမှာ တစ်ဦးလျှင် ကျပ်သိန်း ၃၀ အထိ ပေါက်ဈေးရှိနေကြောင်း ခရီးသွားအေးဂျင့်အသိုင်းအဝိုင်းက ပြောသည်။ ၂၀၂၄ ခုနှစ်၊ ဖေဖော်ဝါရီလတွင် စစ်မှုထမ်းဥပဒေ ပြဌာန်းပြီးနောက်ပိုင်း မြန်မာနိုင်ငံအတွင်းမှ ပြည်ပသို့ ထွက်ခွာ သည့် လူငယ်ဦးရေ နေ့စဉ်တိုးပွားလျက်ရှိသည်။ ထိုအခြေအနေကို အခွင့်ကောင်းယူကာ စစ်ကော်မရှင် လက်အောက်ခံ Non-CDM ဝန်ထမ်းများက အဂတိ လိုက်စားမှုများ ပေါ်ပေါ်ထင်ထင် လုပ်ဆောင်လာနေခြင်း ဖြစ်သည်ဟု ပြည်သူများအကြား ဝေဖန်ပြောဆိုနေ ကြသည်။ #တာချီလိတ်နယ်စပ်ဂိတ် #ထိုင်းမြန်မာနယ်စပ်ဂိတ် #ပြည်ပထွက်ခွင့် #VIPPass

တာချီလိတ်မှ ထိုင်းနိုင်ငံသို့ ကူးသူများကို ကျပ် ၁၃ သိန်းထိတောင်းခံနေ

ဖယ်ခုံ စစ်ရှောင်များအတွက် တဲများ အရေးပေါ် လိုအပ်နေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၁၆ ရက်။ ရှမ်းပြည်တောင်ပိုင်း၊ ဖယ်ခုံမြို့နယ်အတွင်း အိမ်ငှားခမပေးနိုင်၍ အိမ်ရှင်များ၏ နှင်ထုတ်ခြင်းကို ခံနေရသည့် ထပ်ဆင့် စစ်ဘေးရှောင်များအတွက် နေထိုင်ရေးစစ်ရှောင်တဲများ အရေးပေါ်လိုအပ်နေသည်ဟု စစ်ရှောင်အရေး ကူညီနေသူများက ပြောသည်။ အဆိုပါ စစ်ဘေးရှောင်များသည် ၂၀၂၅ ခုနှစ်၊ အောက်တိုဘာလနှောင်းပိုင်းတွင် ဖယ်ခုံမြို့နယ်၊ ဘောရန်မြောက် စလုံးကျေးရွာအား စစ်ကော်မရှင်နှင့် ပအိုဝ်းပြည်သူ့စစ် (PNA) တို့ ဝင်ရောက်စီးနင်းခဲ့မှုကြောင့် စတင်ထွက်ပြေး ခဲ့ကြရသူများဖြစ်ပြီး၊ ယခုအခါ စစ်ကြောင်းထိုးမှုများကြောင့် တစ်နေရာမှတစ်နေရာသို့ အဆင့်ဆင့် တိမ်းရှောင် နေကြရခြင်း ဖြစ်သည်။ စစ်ဘေးရှောင်ကူညီရေးအဖွဲ့ဖြစ်သည့် Dove KK မှ တာဝန်ခံ ကိုနိုင်းနိုင်းက “ဘောရန်မြောက်စလုံး ပွဲကတည်း က ရှောင်လာရတာပါ။ စားနပ်ရိက္ခာလည်း လိုအပ်တယ်။ အခုနေရာမှာတော့ သူတို့အတွက် ၆၀ ရာခိုင်နှုန်း လောက် လုံခြုံပါတယ်။ ဓာတ်ဆီအခက်အခဲကြောင့်လည်း သစ်တွေ ဝါးတွေ သယ်ဖို့ ခက်နေပါတယ်” ဟု လက်ရှိ ရင်ဆိုင်နေရသည့် အခြေအနေကို ပြောပြသည်။ လက်ရှိတွင် စစ်ဘေးရှောင်ဦးရေ တိုးပွားလာခြင်း၊ အိမ်ငှားခများ ဈေးကြီးမြင့်လာခြင်းနှင့် ငွေကြေးမတတ်နိုင် သဖြင့် အိမ်ရှင်များက နှင်ထုတ်ခြင်းများ ကြုံတွေ့နေရသည့်အတွက် ကိုယ်ပိုင်စစ်ရှောင်တဲများ အမြန်ဆုံး ဆောက်လုပ်ရန် လိုအပ်နေခြင်းဖြစ်သည်။ တဲတစ်လုံးလျှင် မြန်မာငွေ ၆ သိန်းကျပ်ခန့် ကုန်ကျမည်ဖြစ်ပြီး စုစုပေါင်း တဲအလုံး ၅၁ လုံးအထိ အရေးပေါ် လိုအပ်နေသည်ဟု အကူအညီပေးနေသူများက ပြောသည်။ စစ်ဘေးရှောင်များ၏ ရပ်တည်ရေးနှင့်ပတ်သက်၍လည်း ကိုနိုင်းနိုင်းက “အရမ်း စာနာဖို့ကောင်းတယ်ဗျာ့။ အလုပ်ခေါ်တဲ့သူရှိရင် လုပ်ကြတယ်။ လက်သမားတို့၊ တောင်ယာတို့ပေါ့။ မရှိရင် အလုပ်ကိုင်မရှိဘူးဗျ။ သူတို့ကျွမ်းကျင်တဲ့ ရွာပတ်ဝန်းကျင်မဟုတ်တော့” ဟု ရှင်းပြသည်။ ၎င်းတို့ ယခင်နေထိုင်ခဲ့သည့် ကျေးရွာများတွင် စစ်ကော်မရှင်နှင့် PNA တပ်များက တပ်စွဲထားဆဲဖြစ်သဖြင့် နေရပ်ပြန်ရန်မှာ အချိန်ကာလကြာမြင့်ဦးမည် ဖြစ်ကြောင်း စစ်ရှောင်များက ဆိုသည်။ ထို့ပြင် မတ်လ ၇ ရက်နေ့မှစတင်ကာ ဖယ်ခုံမြို့နယ်၊ မိုးဗြဲမြို့ဘက်သို့ စစ်ကော်မရှင်တပ်များ ထပ်မံ စစ်ကြောင်း ထိုးလာခြင်းကြောင့် အနီးနားရှိ ကျေးရွာသားများမှာလည်း ဘေးလွတ်ရာသို့ ထပ်မံတိမ်းရှောင်နေကြရသည်ဟု ဆိုသည်။ အဆိုပါ စစ်ရှောင်များအတွက် အရေးပေါ်စားနပ်ရိက္ခာနှင့် နေရာထိုင်ခင်းများ လိုအပ်နေသည်ဟု ဆိုကြသည်။ #ဖယ်ခုံစစ်ရှောင် #PNA #PNO #တဲအိမ်

ဖယ်ခုံ စစ်ရှောင်များအတွက် တဲများ အရေးပေါ် လိုအပ်နေ

စစ်ရာဇဝတ်မှုများကို လက်တွေ့ကျကျ တားဆီးပေးရန် နိုင်ငံတကာကို ကရင် အဖွဲ့အစည်းများ တောင်းဆို သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ မတ်လ ၁၆ ရက်။ ညောင်လေးပင်တွင် ပြည်သူ ၃၀၀ ကျော် လူသားဒိုင်းအဖြစ် အသုံးချခံရပြီးနောက် စစ်ရာဇဝတ်မှုများကို လက်တွေ့ကျကျ တားဆီးပေးရန် ကရင့်အမျိုးသားအစည်းအရုံး KNU နှင့် ကရင်အရပ်ဘက်အဖွဲ့အစည်းများက နိုင်ငံတကာကို တိုက်တွန်း လိုက်သည်။ မြန်မာနိုင်ငံတစ်ဝန်းတွင် စစ်ကော်မရှင်၏ စစ်ရာဇဝတ်မှုများ နေ့စဉ်နှင့်အမျှ ပိုမိုဆိုးရွားလာနေပြီး ညောင်လေး ပင်ခရိုင်အတွင်း ပြည်သူ ၃၀၀ ကျော်ကို လူသားဒိုင်းအဖြစ် အသုံးပြုကာ သတ်ဖြတ်မှုများ ကျူးလွန်ခဲ့သည့် အပေါ် နိုင်ငံတကာအနေဖြင့် စိုးရိမ်ကြောင်း ထုတ်ပြန်ရုံတင်မကဘဲ လက်တွေ့ကျကျ တားဆီးပေးရန် တိုက်တွန်း လိုက်ခြင်း ဖြစ်သည်။ လက်တွေ့ကျကျ တားဆီးပေးရန် ဆိုသည်မှာ စစ်ကော်မရှင်၏ လေယာဉ်ဆီ၊ လက်နက်နှင့် ဘဏ္ဍာငွေလမ်း ကြောင်းများကို အမြန်ဆုံး ဖြတ်တောက်ပေးရန် တောင်းဆိုထားခြင်း ဖြစ်သည်။ ပြီးခဲ့သည့် မတ်လ ၅ ရက်နေ့မှစတင်ကာ ပဲခူးတိုင်း၊ ညောင်လေးပင်မြို့နယ်အတွင်းရှိ ကျေးရွာများကို စစ်ကော်မရှင်၏ တပ်မ ၇၇ စစ်ကြောင်းများက စီးနင်းခဲ့ပြီး ရေတွင်းကုန်း၊ ခရုကုန်းနှင့် ကျောင်းကုန်းရွာတို့မှ ပြည်သူ ၃၀၀ ကျော်ကို လူသားဒိုင်းအဖြစ် ဖမ်းဆီးကာ ရက်ရက်စက်စက် ညှဉ်းပန်းနှိပ်စက်ခဲ့ခြင်းဖြစ်သည်။ အဆိုပါ ဖမ်းဆီးခံပြည်သူများကို ကယ်တင်ရန် KNLA နှင့် PDF ပူးပေါင်းတပ်ဖွဲ့များက အသက်ပေးစစ်ဆင်ရေး ဖော်ဆောင်ခဲ့ရပြီး မတ်လ ၁၁ ရက်နေ့တွင် အားလုံးကို ကယ်ထုတ်နိုင်ခဲ့သော်လည်း စစ်ကော်မရှင်၏ သတ်ဖြတ် မှုကြောင့် ကိုယ်ဝန်ဆောင်မိခင်နှင့် ကလေးငယ်များ အပါအဝင် ပြည်သူ ၄၀ ကျော် သေဆုံးခဲ့ရသည်။ ထို့ပြင် အဆိုပါ စစ်ဆင်ရေးတွင် တော်လှန်ရေးရဲဘော် ၁၁ ဦးလည်း ကျဆုံးခဲ့သည်။ ကရင်လူ့အခွင့်အရေးအဖွဲ့ (KHRG) မှ ပြောရေးဆိုခွင့်ရှိသူ စောအဲလ်ဘတ်က “စစ်ကောင်စီကတော့ ဒီလူ့အခွင့် အရေးတွေကို တန်ဖိုးမထားဘူး။ လုံးဝပြောင်ပြောင်တင်းတင်း ချိုးဖောက်မှုတွေ ကျူးလွန်နေတယ်။ ပြည်သူ လူထုကို သူတို့ရဲ့ အကာအကွယ်သဖွယ် အသုံးပြုတာသည် လည်း crime against humanity ဖြစ်တယ်ပေါ့ နော်။ စစ်ရာဇဝတ်မှုလည်း ပြောလို့ရသလိုမျိုး၊ လူသားမျိုးနွယ်အပေါ် ကျူးလွန်တဲ့ ရာဇဝတ်မှု မြောက်တယ် လို့လည်း ကျနော်တို့ ပြောလို့ရပါတယ်” ဟု ပြောသည်။ အလားတူ ကရင်အမျိုးသားအစည်းအရုံး (KNU) ကလည်း မတ်လ ၁၂ ရက်နေ့တွင် ကြေညာချက်တစ်စောင် ထုတ်ပြန်ခဲ့ပြီး နိုင်ငံတကာအသိုင်းအဝန်းအနေဖြင့် စိုးရိမ်ပူပန်ကြောင်း ကြေညာချက်များ ထုတ်ပြန်နေရုံနှင့် မလုံလောက်တော့ဘဲ စစ်ကော်မရှင်၏ လေယာဉ်ဆီ၊ လက်နက်နှင့် ဘဏ္ဍာငွေလမ်းကြောင်းများကို အမြန်ဆုံး ဖြတ်တောက်ပေးရန် တောင်းဆိုထားသည်။ KNU ၏ အချက်အလက်များအရ ၂၀၂၆ ခုနှစ် ဖေဖော်ဝါရီနှင့် မတ်လအတွင်းမှာပင် KNU နယ်မြေကို လေကြောင်းမှ အကြိမ် ၆၀ ကျော် ဗုံးကြဲခဲ့ပြီး အရပ်သား ၅၀ ကျော် သေဆုံးခဲ့ရကြောင်း သိရသည်။ ကရင်ငြိမ်းချမ်းရေး အထောက်အကူပြုကွန်ရက် (KPSN) မှ နော်ချယ်ရီကလည်း “နှောင့်နှေးမှုတွေ ကြန့်ကြာ မှုတွေ ရှိနေတဲ့အပေါ်မှာလည်း အားမရဘူးပေါ့နော်။ ကျမတို့တွေက ရင်ဆိုင်လာရတာ အသက်ပေါင်းတွေနဲ့ ပေးဆပ်ရတာ သေဆုံးတဲ့သူတွေလည်း မနည်းဘူးလေနော်။ ပေးဆပ်ရတာ ဘယ်လိုခေါ်မလဲ ဖွံ့ဖြိုးတိုးတက် နှောင့်နှေးတဲ့ နိုင်ငံမို့လို့ ဂရုမစိုက်တာလား နှောင့်နှေးမှုတွေ ကြန့်ကြာမှုတွေ ဒီလိုမျိုး စာနာပါတယ်၊ နားလည် ပါတယ်။ ဆိုတာလောက်နဲ့ မမြင်ချင်တော့ဘူးလေ။ အမှန်အတိုင်းပြောရင် တစ်ခုခုကို အကောင်အထည် ဖော်စေချင်တယ်” ဟု ပြောသည်။ ထို့ပြင် စစ်ကော်မရှင်၏ အတုအယောင် ရွေးကောက်ပွဲကို အသိအမှတ်မပြုရန်နှင့် လူသားချင်းစာနာမှု အကူအညီများကို စစ်ကော်မရှင်မှတစ်ဆင့် မပေးဘဲ တော်လှန်ရေးအဖွဲ့အစည်းများနှင့် တိုက်ရိုက်ထိတွေ့ ပေးအပ်ရန်လည်း KNU က တိုက်တွန်းထားသည်။ စစ်ကော်မရှင်သည် စစ်မြေပြင်တွင် ရှုံးနိမ့်လေလေ အရပ်သားပြည်သူများ၊ စာသင်ကျောင်းနှင့် ဘုရားကျောင်း များကို ပစ်မှတ်ထားလေလေ ဖြစ်နေသည်ဟု နော်ချယ်ရီက ဆက်လက်ဝေဖန်သည်။ “စစ်တပ်အချင်းချင်း စစ်လက်နက်ကိုင် အချင်းချင်း တိုက်လို့ မနိုင်တဲ့အတွက် ဘာမှ စစ်ဖက်ရေးရာ နားမလည် တဲ့ ပြည်သူလူထုတွေကို သက်သက်မဲ့ပေါ့နော် လူညွှန့်တုံးအောင် အဲဒါက ကျမ အဲလိုပဲ ပြောချင်တယ်။ တော် တော်ယုတ်ညံ့တယ်။ လူလို့တောင် ပြောလို့မရတဲ့ အခြေအနေလေနော်” ဟု ၎င်းက ပြောသည်။ အာဆီယံနှင့် နိုင်ငံတကာ အသိုင်းအဝန်းအနေဖြင့် စစ်ကော်မရှင်ကို သံတမန်အခင်းအကျင်းတွင် ဆက်လက် နေရာပေးနေခြင်းသည် စစ်ရာဇဝတ်မှုများကို ပိုမိုအားပေးရာရောက်နေကြောင်း KNU က သတိပေးထားသည်။ အလားတူ စကားလုံးများထက် ထိရောက်သည့် အရေးယူဆောင်ရွက်မှုများကသာ ပြည်သူများ၏အသက်ကို ကယ်တင်နိုင်မည်ဖြစ်ကြောင်း ထုတ်ပြန်ချက်တွင် ဖော်ပြထားသည်။ #စစ်ရာဇဝတ်မှု #crimeagainsthumanity #KNU #KPSN #KHRG #စစ်ကော်မရှင်

စစ်ရာဇဝတ်မှုများကို လက်တွေ့ကျကျ တားဆီးပေးရန် နိုင်ငံတကာကို ကရင် အဖွဲ့အစည်းများ တောင်းဆို

1 2 3 … 10 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

Quad အဖွဲ့က ဖီဂျီတွင် ဆိပ်ကမ်းတည်ဆောက်ရန်နှင့် မြေရှားသတ္တုဆိုင်ရာ မူဘောင်များကိုသဘောတူ
မြောက်ကိုရီးယားကပဲ့ထိန်းဒုံးနှင့် အခြား ဒုံးကျည်များ အတွဲလိုက်ပစ်ခတ်
အပစ်ရပ် သဘောတူညီမှု အမေရိကန် ကြီးကြီးမားမား ချိုးဖောက်ဟု အီရန် စွပ်စွဲ
ဘင်္ဂလားဒေ့ရှ် နယ်ခြား တပ်စခန်း တစ်ခု တိုက်ခိုက်ခံရ
ထိုင်းတွင် တောဆင်ရိုင်း နှစ်ကောင်၏ အလောင်းများတွေ့

Archives

Archives

×Close