စစ်တွေ – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
နိုင်ငံတကာသတင်း
NMG အကြောင်း
Contact

Home
Tag Archive

Tag: စစ်တွေ

ဗုံးကြဲခံရပြီးနောက် စစ်တွေမြို့လယ်၌ ဈေးများပိတ်ကာ မြို့ခံများ စိုးရိမ်ထိတ်လန့်နေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၂၃ ရက်။ စစ်အုပ်စုတပ်၏ လက်ကျန်ထိန်းချုပ်နယ်မြေ တစ်ခုဖြစ်သည့် ရခိုင်ပြည်၊ စစ်တွေမြို့လယ်ခေါင် လူစည်ကားရာနေရာများ အောက်တိုဘာလ ၂၃ ရက်နေ့၊ နံနက်ပိုင်းတွင် လေကြောင်းမှ ဗုံးကြဲတိုက်ခိုက်ခံရပြီးနောက် မြို့မဈေးကြီး အပါအဝင် ဈေးဆိုင်ခန်းများအားလုံး ပိတ်သိမ်းလိုက်ရပြီး တစ်မြို့လုံး စိုးရိမ်ထိတ်လန့်နေကြသည်။ ယနေ့ နံနက် ၈ နာရီဝန်းကျင်တွင် စစ်အုပ်စုတပ်၏ Y-12 လေယာဉ်နှင့် ဒရုန်းများသည် စစ်တွေမြို့ပေါ်၌ အဆက် မပြတ် ပျံဝဲကာ မောလိပ်ရပ်ကွက်ရှိ ရွှေငါးလမ်းဆုံ လက်ဖက်ရည်ဆိုင်၊ ကသစ်တောရပ်ကွက်နှင့် ကျားရုပ်ဘုန်း တော်ကြီးကျောင်း အပါအဝင် မြို့လယ်ခေါင် ၃ နေရာသို့ ဗုံးကြဲချခဲ့ခြင်းဖြစ်သည်။ အဆိုပါ တိုက်ခိုက်မှုကြောင့် နေရာတွင်ပင် အရပ်သား ၅ ဦး ပွဲချင်းပြီး သေဆုံးခဲ့ကာ ဒဏ်ရာရရှိသူ ၃၇ ဦးအနက် ဆေးရုံအရောက်တွင် ထပ်မံသေဆုံးသူများရှိသဖြင့် လက်ရှိအချိန်အထိ သေဆုံးသူ ၉ ဦးထက်မနည်း ရှိလာနေပြီ ဖြစ်သည်။ စစ်တွေမြို့ခံ အမျိုးသမီးတစ်ဦးက “မနက်က လေယာဉ်သံတွေ၊ ပေါက်ကွဲသံတွေ ကြားတော့ လက်နက်ကြီး ကျ တယ်ပဲထင်တာ။ နောက်မှ လူတွေ တရုန်းရုန်းနဲ့ ဈေးကနေ အိမ်ကို ပြန်ပြေးလာကြတော့မှ မြို့ထဲကို လေယာဉ် နဲ့ ကြဲတာလို့ သိရတာ။ အခုဆို မြို့မဈေးကြီးတွေရော လမ်းမကြီးပေါ်က ဆိုင်တွေပါ အကုန်ပိတ်လိုက်ကြပြီ။ ဘယ်သူမှလည်း အပြင်မထွက်ရဲကြတော့ဘူး” ဟု ပြောသည်။ ထို့ပြင် ဗုံးကြဲခံရသည့် ရွှေငါးလမ်းဆုံနှင့် မောလိပ်ရပ်ကွက်အနီးရှိ ဒေသခံအများအပြားမှာလည်း ထပ်မံ တိုက်ခိုက်ခံရမည်ကို စိုးရိမ်သဖြင့် ဘေးလွတ်ရာ နီးစပ်ရာ ရပ်ကွက်များသို့ ချက်ချင်း တိမ်းရှောင်နေကြရသည်။ အခြားမြို့ခံ အမျိုးသားတစ်ဦးကလည်း “အရင်ကတော့ မြို့ထဲကို လေယာဉ်နဲ့ မကြဲလောက်ဘူးလို့ ထင်ထား ကြတာ။ အခုလို မြို့လယ်ခေါင်ကို ပထမဆုံးအကြိမ် ဗုံးကြဲလိုက်တော့ လူတွေအကုန် ထိတ်လန့်သွားကြတာ ပေါ့။ မြို့ထဲမှာ အခြေအနေတွေက တော်တော်လေး ရုတ်ရုတ်သဲသဲ ဖြစ်သွားတယ်” ဟု ပြောသည်။ တစ်ဆက်တည်းမှာပင် စစ်တွေမြို့၏ အဓိက တပ်စခန်းတစ်ခုဖြစ်သည့် ရွှေမင်းဂံရေတပ်စခန်းကလည်း မြို့အနီး ဝန်းကျင်သို့ လက်နက်ကြီးများဖြင့် တရစပ် ပစ်ခတ်လျက်ရှိသည်။ လက်ရှိတွင် အာရက္ခတပ်တော် (AA) နှင့် စစ်အုပ်စုတပ်တို့အကြား တိုက်ပွဲများသည် စစ်တွေမြို့အခြေစိုက် ဒေသကွပ်ကဲမှုစစ်ဌာနချုပ် (ဒကစ) နှင့် ၄ မိုင်ခန့်အကွာရှိ ပါဒလိတ်၊ တောကန်၊ ကျားမသောက်နှင့် ရွှေမင်းဂံရေတပ် အနီးဝန်းကျင်များအထိ နီးကပ်လာနေသည်။ ထို့ပြင် ပေါက်တော (ဝီရဌာနီ) မြို့နယ်ရှိ ငပြီကျွန်းသို့ စစ်အုပ်စုတပ်က ကမ်းတက်ထိုးစစ်ဆင်ရန် ကြိုးပမ်းနေခြင်း ကြောင့် နှစ်ဖက် တိုက်ပွဲများလည်း ပြင်းထန်လျက်ရှိသည်။ စစ်တွေမြို့သည် ရခိုင်ပြည်မြောက်ပိုင်းတွင် စစ်အုပ်စုတပ်၏ နောက်ဆုံး လက်ကျန် ခံတပ်မြို့ဖြစ်ပြီး တိုက်ပွဲများ မြို့နှင့် နီးကပ်လာသည်နှင့်အမျှ စစ်အုပ်စုတပ်က အရပ်သားပြည်သူများနေထိုင်ရာ မြို့တွင်းနေရာများကိုပါ ပစ်မှတ်ထား တိုက်ခိုက်လာနေသဖြင့် မြို့ခံများအတွက် လုံခြုံရေး အန္တရာယ် ပိုမိုကြီးမားလာနေသည်။ ဓာတ်ပုံ – စစ်တွေမြို့တွင်းတစ်နေရာ / wiki #စစ်တွေ

ဗုံးကြဲခံရပြီးနောက် စစ်တွေမြို့လယ်၌ ဈေးများပိတ်ကာ မြို့ခံများ စိုးရိမ်ထိတ်လန့်နေ

စစ်တွေ ဒကစ အနီးသို့ AA ထိုးဖောက်ဝင်ရောက်လာပြီး တိုက်ပွဲများ ပြင်းထန်နေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၁၉ ရက်။ ရခိုင်ပြည်၊ စစ်တွေမြို့ရှိ စစ်အုပ်စု၏ တပ်နယ်မြေဖြစ်သော ဒေသကွပ်ကဲမှုစစ်ဌာနချုပ် (ဒကစ) အနီးသို့ အာရက္ခ တပ်တော် (AA) တပ်စခန်းအချို့ ထိုးဖောက်ဝင်ရောက်လာပြီး တိုက်ပွဲများ ဖြစ်ပွားလျက်ရှိကြောင်း ဒေသခံ စစ်ရေး သတင်းအရင်းအမြစ်များက ပြောသည်။ စစ်တွေမြို့နှင့် ၅ မိုင်၊ ၆ မိုင်ခန့်အကွာရှိ စစ်အုပ်စု ကာကင်းစခန်းအချို့ကို AA က အောက်တိုဘာလ တတိယပတ် အတွင်း ထိန်းချုပ်လိုက်ပြီးနောက် AA ၏ တန်ပြန်ထိုးစစ်ကြောင့် စစ်အုပ်စုတပ်သည် စခန်းများကို အပြင်းအထန် ခုခံကာကွယ်နေရသည်။ ဒေသခံ စစ်ရေးသတင်းအရင်းအမြစ် အမျိုးသားတစ်ဦးက “အမြင့်ကျွန်းမှာရှိတဲ့ တပ်မ ၁၀၁ ရဲ့ နည်းဗျူဟာ တစ်ခုကို AA က ပြင်းပြင်းထန်ထန် တိုက်နေတယ်။ ဝါဘိုကျေးရွာကို AA က ပြန်ပြီး ထိန်းချုပ်ထားနိုင်တဲ့ အနေအထားရှိတယ်။ ရေချမ်းပြင်က ခလရ ၂၇၀ အတွင်းထဲကိုတောင် လက်နက်ကြီးကျည်တွေ ကျရောက် ပေါက်ကွဲတဲ့ အနေအထား ရှိလာတယ်။ စစ်တပ် တပ်နယ်အနီးကို ဖောက်ဝင်လာတဲ့ အနေအထားပါ။ ရွှေမင်းဂံ ရေတပ်စခန်းနဲ့ စစ်တွေမြို့ကြားမှာ အင်အားတွေ ပို့ဆောင်ထားတယ်၊ ပြီးရင် စစ်တွေ၊ ပုဏ္ဏားကျွန်း၊ ပေါက် တော အစပ်မှာ တိုက်ပွဲရှိတယ်” ဟု ပြောသည်။ အာရက္ခတပ်တော် (AA) သည် အောက်တိုဘာ ၁၆ ရက်နေ့တွင် စစ်တွေမြို့နယ် မြောက်ဖျားပိုင်းရှိ အမြင့်ကျွန်းနှင့် ပါဒလိပ်အနီးရှိ စစ်အုပ်စု ကာကင်းအချို့ကို သိမ်းယူခဲ့ပြီး အမြင့်ကျွန်းနှင့် ရေချမ်းပြင်ဘက်ရှိ ကာကင်း ၅ ခုအထိ သိမ်းပိုက်ထားရာ ရေချမ်းပြင်အနီးတွင် လက်ရှိ တိုက်ပွဲများ ပြင်းထန်လျက်ရှိသည်။ လက်ရှိတွင် စစ်အုပ်စုသည် ခြေလျင်အင်အား ၁,၀၀၀ ကျော်ဖြင့် အမြင့်ကျွန်း၊ မင်းချောင်းတံတား၊ ပါဒလိပ်၊ ရေချမ်းပြင်နှင့် ဂန့်ဂေါ်ကျွန်းဘက်သို့ ထိုးစစ်ဆင်နေသဖြင့် AA နှင့် တိုက်ပွဲများ ပိုမို ပြင်းထန်နေခြင်း ဖြစ်သည်။ အခြားစစ်တွေဒေသခံ စစ်ရေးသတင်းအရင်းအမြစ်တစ်ဦးကလည်း “အခုရက်ပိုင်း ကြားရတာ စစ်တွေမြို့နယ်၊ ကျားမသောက်ကျေးရွာနားက စအရ ၉၀၈ စခန်းကို AA ဝိုင်းထားတယ်လို့ သိရတယ်။ အဲဒီနေရာဟာ စစ်တွေ မြို့နဲ့ ၅ မိုင်လောက်ပဲ ဝေးတော့တယ်။ စစ်တပ်ဟာ AA သိမ်းယူထားတဲ့ နယ်မြေတွေ ပြန်သိမ်းဖို့ ကြိုးစားရာ ကနေ မိမိခြေကုပ်နေရာတွေကိုပါ ပြန်ကာကွယ်နေရတဲ့ ပုံစံ ဖြစ်လာသလို AA ဘက်ကလည်း အကျအဆုံးတွေ ရှိတယ်လို့ ကြားရပါတယ်” ဟု ပြောသည်။ စစ်တွေမြို့နယ်၊ ကျားမသောက်ကျေးရွာအနီး တည်ရှိသော စစ်မြေပြင်အင်ဂျင်နီယာတပ်ရင်း (စအရ ၉၀၈) စခန်းသည် စစ်တွေမြို့နှင့် ၅ မိုင်ခန့်အကွာတွင် တည်ရှိပြီး မြို့လုံခြုံရေးအတွက် အရေးပါသောကြောင့် စစ်အုပ်စု က ခံစစ်ပြင်ဆင်ထားသည်မှာ ၂ နှစ်နီးပါး ကြာမြင့်ပြီဖြစ်သည်။ ထို့ပြင် စစ်တွေမြို့နယ်နှင့် ရသေ့တောင်မြို့နယ်အစပ် ရေချမ်းပြင်အနီးရှိ ကာကင်းစခန်းတစ်ခု၊ အောင်မင်္ဂလာ ကျေးရွာဘက်ရှိ ကင်းစခန်းများ၊ အသေးစားစခန်းများနှင့် ရှေ့ပြေးဘန်ကာများကိုလည်း AA က သိမ်းပိုက်ထား သည်။ လက်ရှိတွင် စစ်တွေမြို့နယ်အပါအဝင် ပုဏ္ဏားကျွန်းနယ်စပ်ရှိ ရွှေမင်းဂံရေတပ်စခန်း၊ ကံ့ကော်ကျွန်း၊ ဇော်မတက်၊ တောကန်နှင့် နာရီကန် ဝန်းကျင်တို့တွင်လည်း နှစ်ဖက်တိုက်ပွဲများ ဆက်လက် ပြင်းထန်လျက်ရှိသည်။ ဓါတ်ပုံ - (AA တပ်ဖွဲ့ဝင်အချို့ / Arakan Princess Media) #စစ်တွေ

စစ်တွေ ဒကစ အနီးသို့ AA ထိုးဖောက်ဝင်ရောက်လာပြီး တိုက်ပွဲများ ပြင်းထန်နေ

အထိနာလာသော စစ်တပ်က စစ်တွေ-ပုဏ္ဏားကျွန်း စစ်မျက်နှာတွင် လေကြောင်းနှင့် လက်နက်ကြီး အားပြုလာ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၁ ရက်။ ရခိုင်ပြည်၊ စစ်တွေ-ပုဏ္ဏားကျွန်း စစ်မျက်နှာတွင် အာရက္ခတပ်တော် (AA) ၏ တန်ပြန်ထိုးစစ်ကြောင့် မြေပြင်၌ အထိနာနေသည့် စစ်အုပ်စုသည် စစ်တွေမြို့အနီးဝန်းကျင်ရှိ ကျေးရွာများကို လေကြောင်းနှင့် လက်နက်ကြီး များ အသုံးပြုကာ ဆက်တိုက် တိုက်ခိုက်လာနေကြောင်း ဒေသခံ စစ်ရေးသတင်းရင်းမြစ်များက ပြောသည်။ စက်တင်ဘာလ ၄ ရက်နေ့မှစတင်၍ စစ်အုပ်စုတပ်သည် ပုဏ္ဏားကျွန်းမြို့နယ်အတွင်းသို့ အင်အား ၁,၀၀၀ ကျော် ဖြင့် စစ်ကြောင်းများခွဲကာ ထိုးစစ်ဆင်ခဲ့သော်လည်း AA ဘက်က ဝါဘိုနှင့် စပါးထားကျေးရွာများကို ပြန်လည် ခြေကုပ်ယူနိုင်ခဲ့သည့်အပြင် စစ်တွေဒေသကွပ်ကဲမှုစစ်ဌာနချုပ် (ဒကစ) လက်အောက်ခံ ကံကော်ကျွန်းအထိ ဆက်လက် ထိုးစစ်ဆင်လာသဖြင့် စစ်အုပ်စုတပ် စစ်ကြောင်းများ အထိနာကာ ဆုတ်ခွာခဲ့ရခြင်း ဖြစ်သည်။ ဒေသခံ စစ်ရေးသတင်းရင်းမြစ် အမျိုးသားတစ်ဦးက “စစ်တွေ-ပုဏ္ဏားကျွန်း နယ်စပ်မှာ စစ်တပ်ရဲ့ စစ်ကြောင်း တွေ အကျအဆုံးများတယ်။ ပြန်ဆုတ်နိုင်ခဲ့တာရှိသလို တချို့က နေရာတွေမှာ ပိတ်မိပြီး စစ်တွေဘက် ပြန် မဆုတ်နိုင်တာတွေရှိတယ်။ AA က နယ်စပ်ကပိတ်ပြီး စစ်ဆိုင်ထားတော့ ပိတ်မိတဲ့ စစ်သားတွေ ပြန်ထွက်လို့ မရဘူး။ အခု စစ်တပ်က လေကြောင်းကိုပဲ အားပြုနေရတယ်” ဟု ပြောဆိုသည်။ မြေပြင်တွင် အကျအဆုံးများနေသည့် စစ်အုပ်စုတပ်သည် စက်တင်ဘာလ ၃၀ ရက်နေ့၊ ည ၉ နာရီခန့်က ပုဏ္ဏားကျွန်းမြို့အနီး စစ်ဘေးရှောင်များ ခိုလှုံနေသည့် ကျောက်ဆိပ်ကျေးရွာကို လေကြောင်းမှ ဗုံးကြဲခဲ့သဖြင့် ပုဏ္ဏားကျွန်းမြို့ပေါ်မှ စစ်ဘေးရှောင်လာသူ အသက် ၄ နှစ်အရွယ် မောင်နေကျော်လင်းနှင့် ကျောက်ဆိပ်ရွာသူ အသက် ၂၆ နှစ်အရွယ် မခင်ခင်သန်းတို့ ဒဏ်ရာရရှိခဲ့သည်။ အခြား ဒေသခံ စစ်ရေးသတင်းရင်းမြစ် အမျိုးသားတစ်ဦးကလည်း “စစ်တွေ-ပုဏ္ဏားကျွန်း နယ်စပ်မှာ စစ် ကြောင်းထိုးတာတွေက အကျအဆုံးတွေနဲ့ ရင်ဆိုင်ရတော့ လေကြောင်းနဲ့ လက်နက်ကြီးပစ်တာတွေ လုပ်ဆောင် နေပါတယ်။ ပုဏ္ဏားကျွန်းမြို့ပေါ် အထိ ဗုံးကြဲတာ ၂ ယောက် ဒဏ်ရာရတယ်။ စစ်တွေ-ပုဏ္ဏားကျွန်း-ရသေ့ တောင် လမ်းပေါ်က တံဘက်လှမ်းရွာကိုလည်း လက်နက်ကြီးတွေနဲ့ လှမ်းပစ်နေပါတယ်။ ဒေသခံတွေကတော့ တိမ်းရှောင်ပေမဲ့ တချို့က ပြေးဖို့နေရာမရှိသလို ဖြစ်နေတယ်” ဟု ပြောသည်။ စစ်အုပ်စုတပ်သည် စက်တင်ဘာလ ၂၈ ရက်က စစ်တွေ-ပုဏ္ဏားကျွန်း နယ်စပ်တောင်တန်းများကို ကင်းထောက် လေယာဉ်များဖြင့် ပျံသန်းထောက်လှမ်းကာ ဒရုန်းဖြင့် ပစ်ခတ်မှုများ ပြုလုပ်ခဲ့ပြီး စက်တင်ဘာလ ၂၉ ရက်နှင့် ၃၀ ရက်တို့တွင်လည်း ကံကော်ကျွန်း၊ ဝါဘို၊ စပါးထားနှင့် တံဘက်လှမ်းကျေးရွာများအတွင်းသို့ လက်နက်ကြီးများ ဆက်တိုက် ပစ်ခတ်ခဲ့သည်။ ထို့ပြင် စက်တင်ဘာလ ၂၃ ရက်ကလည်း ပုဏ္ဏားကျွန်းမြို့နယ် ဖက်ကျကျေးရွာကို စစ်အုပ်စုတပ်က Y-12 လေယာဉ်တစ်စီး၊ ဂျက်တိုက်လေယာဉ်နှစ်စီးတို့ဖြင့် နာရီဝက်ခန့် ဗုံးကြဲခဲ့၍ အရပ်သား ၂ ဦး သေဆုံးကာ နေအိမ် ၂၅ လုံး ပျက်စီးခဲ့သည့်အပြင် စက်တင်ဘာလ ၂၀ ရက်ကလည်း ကုလားချောင်းကျေးရွာကို ဂျက်တိုက်လေယာဉ် ဖြင့် ဗုံးကြဲခဲ့သဖြင့် အရပ်သား ၁ ဦး သေဆုံးခဲ့ရသည်။ လက်ရှိတွင် စစ်တွေ-ပုဏ္ဏားကျွန်း နယ်စပ်ရှိ ကြက်တောရာ၊ ပါဒလိပ်၊ မံစီ၊ အမ်ဘာရီနှင့် ကျောက်တန်းကျေးရွာ တို့၌ စစ်အုပ်စုတပ်၏ စစ်ရေးလှုပ်ရှားမှုများ ရှိနေပြီး စစ်တွေ-ပုဏ္ဏားကျွန်း-ရသေ့တောင် လမ်းမကြီး အနီးဝန်း ကျင်သို့ ထပ်မံစစ်ကြောင်းထိုးရန် ပြင်ဆင်လျက်ရှိသည်။ ဓါတ်ပုံ - (စက်တင်ဘာ ၁၃ ရက်နေ့က ပုဏ္ဏားကျွန်းမြို့၊ ဦးရာဇ်တော်ဘုရား တောင်ခြေ ကြိုးတံတားအနီး စစ်အုပ်စုတပ်၏ လေကြောင်းမှ ဗုံးကြဲတိုက်ခိုက်ခံရမှု မြင်ကွင်း။ / AA Info Desk) #စစ်တွေ #ပုဏ္ဏာကျွန်း

အထိနာလာသော စစ်တပ်က စစ်တွေ-ပုဏ္ဏားကျွန်း စစ်မျက်နှာတွင် လေကြောင်းနှင့် လက်နက်ကြီး အားပြုလာ

ရခိုင်က မြို့နယ် ၃ ခုကို စစ်အုပ်စုတပ် လေကြောင်းမှကြဲ၊ အရပ်သား ၁ ဦး သေ၊ ၈ ဦး ဒဏ်ရာရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၁ ရက်။ ရခိုင်ပြည် စစ်တွေမြို့အနီး တိုက်ပွဲများတွင် အကျအဆုံးများနေသည့် စစ်အုပ်စုတပ်သည် အာရက္ခ တပ်တော် (AA) ထိန်းချုပ်ထားသည့် စစ်တွေမြို့ အနီးဝန်းကျင် မြို့နယ် ၃ ခုကို လေကြောင်းမှ ဆက်တိုက် ဗုံးကြဲတိုက်ခိုက်ခဲ့သဖြင့် ၄ နှစ်အရွယ် ကလေးငယ်တစ်ဦး အပါအဝင် အရပ်သား ၈ ဦး ထိခိုက်ဒဏ်ရာရရှိခဲ့ပြီး အမျိုးသားတစ်ဦး သေဆုံးသွားခဲ့သည်။ လူပေါင်း ၅၀ ဦးထက်မနည်း သေဆုံးခဲ့ရသည့် ကျောက်တော်မြို့ အိန္ဒိယဈေး လေကြောင်းဗုံးကြဲခံရမှု ဖြစ်ပွားပြီး ရက်ပိုင်းအကြာမှာပင် စစ်အုပ်စုတပ်သည် ပုဏ္ဏားကျွန်း၊ ရသေ့တောင်နှင့် ပေါက်တော (ဝီရဋ္ဌာနီ) မြို့နယ်များ အတွင်းရှိ အရပ်သားကျေးရွာများကို ဂျက်ဖိုက်တာများဖြင့် ရမ်းသန်း ဗုံးကြဲတိုက်ခိုက်ခဲ့ခြင်းဖြစ်သည်။ စက်တင်ဘာလ ၃၀ ရက်နေ့ ည ၉ နာရီကျော်တွင် ပုဏ္ဏားကျွန်းမြို့အနီး စစ်ဘေးရှောင်များ ခိုလှုံနေသည့် ကျောက်ဆိပ်ကျေးရွာကို ဂျက်ဖိုက်တာဖြင့် ဗုံးကြဲခဲ့သဖြင့် ပုဏ္ဏားကျွန်းမြို့ပေါ်မှ စစ်ဘေးရှောင်လာသည့် အသက် ၄ နှစ်အရွယ် မောင်နေကျော်လင်း၏ ဘယ်ဘက်ခြေထောက် ထိမှန်ခဲ့ပြီး အသက် ၂၆ နှစ်အရွယ် အမျိုးသမီး တစ်ဦးလည်း ခန္ဓာကိုယ်အနှံ့ ပြင်းထန်စွာ ဒဏ်ရာရရှိခဲ့သည်။ ပုဏ္ဏားကျွန်း ဒေသခံတစ်ဦးက “စစ်တွေဘက်မှာ မြေပြင်တိုက်ပွဲဖြစ်ပြီး စစ်အုပ်စုတပ် အကျအဆုံးများသွားရင် ဒီဘက်ကို လေယာဉ်နဲ့ တန်းလာကြဲတော့တာပဲ။ စစ်ဘေးရှောင်တွေ ဒုက္ခရောက်နေတာကို ကြည့်မရလို့ တမင် ရမ်းသန်းပစ်တာ။ တစ်ညလုံး ပုဏ္ဏားကျွန်း ပတ်ဝန်းကျင်မှာ လေယာဉ်သံ လက်နက်ကြီးသံတွေ ဆူညံပြီး ဗုံးတွေ ဆက်တိုက် ကြဲနေတာပါ” ဟု ပြောသည်။ အလားတူ ရသေ့တောင်မြို့နယ် မူစဲကျွန်းဒေသ ကူတောင်ကျေးရွာကိုလည်း ည ၁၀ နာရီခန့်တွင် စစ်အုပ်စုတပ်က ပေါက်ကွဲအားပြင်း ဗုံး နှစ်လုံး ကြဲချခဲ့ရာ နေအိမ်အတွင်း ရှိနေသည့် လင်မယား နှစ်ဦး ထိမှန်ခဲ့သည်။ ထိုတိုက်ခိုက်မှုကြောင့် အသက် ၅၁ နှစ်အရွယ် ဦးအောင်ထွန်းသိန်း သေဆုံးခဲ့ပြီး ဇနီးဖြစ်သူ ထိမှန် ဒဏ်ရာရခဲ့ သည့်အပြင် အနီးအနားရှိ နေအိမ်များပါ ပျက်စီးသွားခဲ့သည်။ ရသေ့တောင် ဒေသခံတစ်ဦးက “နေအိမ်ပေါ် တည့်တည့်ကျသွားတော့ လင်မယား နှစ်ဦးလုံး ဗုံးစထိမှန်တာ။ ယောက်ျားဖြစ်သူကတော့ သေသွားတယ်။ သူ့မိန်းမ ဒေါ်ဝင်းနုကတော့ ဒဏ်ရာရသွားတယ်။ အနားက အိမ်တွေပါ ပျက်စီးသွားတော့ အခု ရွာသားတွေ စစ်ဘေး ထပ်ရှောင်နေကြရတယ်” ဟု ပြောသည်။ ထို့ပြင် ပေါက်တောမြို့နယ်ကိုလည်း ညသန်းခေါင် ၁၂ နာရီကျော်တွင် လေယာဉ်ဖြင့် ဗုံးများ ဆက်တိုက် ကြဲချခဲ့ သဖြင့် အရပ်သား ၅ ဦး ဒဏ်ရာရရှိခဲ့သည်။ ကုလသမဂ္ဂ၏ မြန်မာနိုင်ငံဆိုင်ရာ လွတ်လပ်သော စုံစမ်းစစ်ဆေးရေးယန္တရား (IIMM) က စက်တင်ဘာလ ၃၀ ရက်နေ့တွင် ထုတ်ပြန်ရာ၌ စစ်အုပ်စုတပ်သည် ဈေးကဲ့သို့သော အများပြည်သူဆိုင်ရာ အခြေခံအဆောက်အအုံ များကို ပစ်မှတ်ထား တိုက်ခိုက်နေပြီး၊ အရပ်သားများအပေါ် ပစ်မှတ်မခွဲခြားဘဲ လေကြောင်းမှ တိုက်ခိုက်ခြင်း သည် လူသားမျိုးနွယ်အပေါ် ကျူးလွန်သည့် စစ်ရာဇဝတ်မှုဖြစ်ကြောင်း ထောက်ပြထားသည်။ လက်ရှိတွင် စစ်တွေမြို့ပေါ်အထိ ပစ်ခတ်သံများ ကြားနေရပြီး စစ်အုပ်စုတပ်သည် မြေပြင်တိုက်ပွဲများတွင် အကျ အဆုံးများပြားလာသည့် အခါ AA ထိန်းချုပ်ထားသည့် အနီးဝန်းကျင် အရပ်သားကျေးရွာများကို လေကြောင်းမှ ပစ်မှတ်ထား တိုက်ခိုက်လျက်ရှိသည်။ #စစ်တွေမြို့

ရခိုင်က မြို့နယ် ၃ ခုကို စစ်အုပ်စုတပ် လေကြောင်းမှကြဲ၊ အရပ်သား ၁ ဦး သေ၊ ၈ ဦး ဒဏ်

စစ်တွေ - ပုဏ္ဏားကျွန်းအစပ်တွင် တိုက်ပွဲပြင်းထန်နေပြီး စစ်တပ်က လေကြောင်းမှ ဆက်တိုက်ဗုံးကြဲ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၅ ရက်။ ရခိုင်ပြည်၊ စစ်တွေမြို့နယ်နှင့် ပုဏ္ဏားကျွန်းမြို့နယ် အစပ်နေရာများတွင် အာရက္ခတပ်တော် (AA) နှင့် စစ်အုပ်စု တို့အကြား မြေပြင်တိုက်ပွဲများ ပြင်းထန်နေပြီး စစ်အုပ်စုတပ်က ဂျက်ဖိုက်တာနှင့် Y-12 ထောက်ပို့လေယာဉ်များ ဖြင့် လေကြောင်းမှ ဆက်တိုက် ဗုံးကြဲတိုက်ခိုက်လျက်ရှိကြောင်း ဒေသတွင်း သတင်းအရင်းအမြစ်များက ပြောသည်။ စက်တင်ဘာလ ၂၃ ရက်နေ့ ညနေ ၇ နာရီခန့်မှစ၍ စစ်တွေ-ပုဏ္ဏားကျွန်း နယ်စပ်တစ်လျှောက်ကို စစ်အုပ်စုက လေကြောင်းမှ ဗုံးကြဲတိုက်ခိုက်ခဲ့ခြင်းဖြစ်ပြီး စက်တင်ဘာလ ၂၄ ရက်နေ့တွင်လည်း မြေပြင်၌လည်း ထိတွေ့ တိုက်ပွဲများ ဆက်လက်ပြင်းထန်ခဲ့သည်။ အဆိုပါ နယ်စပ်စစ်မျက်နှာတွင် စစ်အုပ်စုဘက်မှ အထိနာလျက်ရှိပြီး ကွမ်းတောင်ကျေးရွာအနီး စစ်ကြောင်းများ ဖြန့်ကျက်ထားသော်လည်း မင်းချောင်းတံတား တစ်ဘက်ကမ်းအထိ AA က ပြန်လည်နေရာယူထိန်းချုပ်ထားပြီ ဖြစ်သည်။ ထို့ပြင် စစ်တွေဘက်ခြမ်း စစ်မျက်နှာရှိ ရွှေမင်းဂံရေတပ်စခန်း၏ ကာကင်းအချို့အပါအဝင် ဝါဘို၊ စပါးထားနှင့် ကံ့ကော်ကျွန်း ကျေးရွာများအထိ AA က ထိန်းချုပ်ထားပြီး စစ်အုပ်စုကလည်း အင်အားဖြည့်တင်းကာ စစ်ကြောင်း ဖြန့်ကျက်ထားသည်။ ဒေသခံ စစ်ရေးသတင်းအရင်းအမြစ် အမျိုးသားတစ်ဦးက “လက်ရှိ စစ်တွေနဲ့ ပုဏ္ဏားကျွန်းနယ်စပ်နေရာတွေကို မနေ့ညက ဗုံးကြဲတာတွေ ရှိသလို မနက်ဘက်လည်း လေယာဉ်တွေ ကင်းထောက်တာတွေ ရှိပါတယ်။ လက်ရှိ ဒေသခံတွေလည်း စိုးရိမ်ပြီး စစ်ရှောင်နေတာတွေ ရှိပါတယ်၊ ကွမ်းတောင် အနီးတဝိုက်ကို ဗုံးကြဲခဲ့တဲ့အပြင် မြေပြင် အခြေအနေတွေလည်း တိုက်ပွဲရှိနေပါတယ်” ဟု ပြောသည်။ လက်ရှိတွင် စစ်တွေမြို့၌ ရေစကြို၊ ပခုက္ကူနှင့် စလင်းမြို့နယ်များရှိ တပ်နယ်လက်အောက်ခံ တပ်ရင်း ၁၀ ရင်း လုံး ရောက်ရှိနေသော်လည်း AA ဘက်ကလည်း ဆတ်ရိုးကျချောင်း တစ်ဖက်ကမ်းရှိ ခမောင်းတောကျေးရွာ ဘက်သို့ စစ်အင်အားဖြည့်တင်းထားသည်။ စစ်အုပ်စုသည် ပုဏ္ဏားကျွန်းမြို့နယ်အတွင်းရှိ ကျေးရွာများအပါအဝင် နေရာအနှံ့အပြားသို့ ဂျက်တိုက်လေယာဉ်၊ Y-12 စစ်ထောက်ပို့ယာဉ်၊ အထိုင်တပ်ရင်းများနှင့် စစ်သင်္ဘောများမှ လက်နက်ကြီးများဖြင့် ပစ်ခတ်တိုက်ခိုက် လျက်ရှိသည်။ “စစ်တွေ-ပုဏ္ဏားကျွန်း အစပ်မှာ အရေးနိမ့်နေတဲ့ စစ်တပ်က (AA) ထိန်းချုပ်ထားတဲ့ မြို့နယ်တွေကို လေ ကြောင်းကနေ ဆက်တိုက် ဗုံးကြဲတိုက်ခိုက်နေတာကြောင့် အရပ်သား ထိခိုက်သေဆုံးမှုတွေ နေ့စဉ် မြင့်တက်နေ ပါတယ်။ ပုဏ္ဏားကျွန်းက စစ်တွေမြို့ကနေ ထွက်ပြေးတိမ်းရှောင်လာတဲ့ စစ်ဘေးရှောင် ပြည်သူအများဆုံး ခိုလှုံတဲ့ နေရာ ဖြစ်ပြီး ပြီးခဲ့တဲ့ စက်တင်ဘာလ ၁၇ ရက်နေ့ကလည်း ဖက်ကျရွာကို စစ်တပ်က လေကြောင်း ကနေ ဗုံးကြဲခဲ့တာကြောင့် အရပ်သားတစ်ယောကf ဒဏ်ရာရရှိခဲ့သေးတယ်” မြေပြင်၌ အကူအညီပေးနေသူ တစ်ဦးက ပြောသည်။ စစ်အုပ်စု၏ လေကြောင်းနှင့် လက်နက်ကြီး တိုက်ခိုက်မှုများကြောင့် ပုဏ္ဏားကျွန်းမြို့နယ် ဖက်ကျကျေးရွာတွင် စက်တင်ဘာလ ၁၇ ရက်နှင့် ၂၃ ရက်တို့၌ အရပ်သား ၂ ဦး သေဆုံးကာ ၁ ဦး ဒဏ်ရာရရှိခဲ့ပြီး၊ ရသေ့တောင်မြို့ နယ် ဇီးကိုင်းကျေးရွာတွင် စက်တင်ဘာလ ၂၀ ရက်က မိခင်နှင့် ကလေး သေဆုံးခဲ့ရသည်။ ထို့ပြင် ဂွမြို့နယ် ဆပ်သွားကျေးရွာတွင်လည်း စက်တင်ဘာလ ၂၁ ရက်က လေကြောင်းမှ ဗုံးကြဲမှုကြောင့် ဆယ် ကျော်သက် ကျောင်းသားတစ်ဦးအပါအဝင် အရပ်သား ၂ ဦး ဒဏ်ရာရရှိခဲ့သေးသည်။ ဓါတ်ပုံ - (ယခုလအတွင်း အာရက္ခတပ်တော် AA က ဖမ်းဆီးရမိထားသော စစ်သုံ့ပန်းများ / AA) #စစ်တွေမြို့နယ် #ပုဏ္ဏားကျွန်းမြို့နယ်

စစ်တွေ – ပုဏ္ဏားကျွန်းအစပ်တွင် တိုက်ပွဲပြင်းထန်နေပြီး စစ်တပ်က လေကြောင်းမှ ဆက်တိုက်ဗုံးကြဲ

ရခိုင်တွင် စစ်တပ်၏ လေကြောင်းတိုက်ခိုက်မှုများကြောင့် အရပ်သား သေဆုံးထိခိုက်မှု မြင့်တက် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၂ ရက်။ စစ်တွေ-ပုဏ္ဏားကျွန်း စစ်မြေပြင်တွင် အထိနာပြီး စစ်ရေးရှုံးနိမ့်နေသည့် စစ်တပ်သည် ရခိုင်ပြည်အနှံ့ရှိ စစ်ရေး နှင့် မသက်ဆိုင်သော အရပ်သားကျေးရွာများကို ပစ်မှတ်ထား၍ နေ့စဉ်ရက်ဆက် လေကြောင်းမှ ဗုံးကြဲတိုက်ခိုက် နေသဖြင့် အရပ်သား သေဆုံးထိခိုက်မှုများနှင့် ပျက်စီးဆုံးရှုံးမှုများ မြင့်တက်လျက်ရှိသည်။ စက်တင်ဘာလ ၂၁ ရက်နေ့တစ်ရက်တည်း၌ပင် စစ်အုပ်စုတပ်သည် ဂွ၊ ပေါက်တော (ဝီရဌာနီ)၊ မင်းပြား (အဉ္ဇနပူရ) စသည့် မြို့နယ်များကို ဂျက်ဖိုက်တာများဖြင့် ဆက်တိုက် ဗုံးကြဲတိုက်ခိုက်ခဲ့ရာ အမျိုးသမီးတစ်ဦး သေဆုံးပြီး ကလေးငယ်တစ်ဦး အပါအဝင် ပြည်သူ ၃ ဦး ဒဏ်ရာရရှိခဲ့သည်။ ဖြစ်စဉ်များအနက် ပေါက်တောမြို့နယ်၊ တောင်ဖူးကျေးရွာကို စက်တင်ဘာ ၂၁ ရက် နံနက်စောစော ၁၂ နာရီ ၂၅ မိနစ်မှစ၍ စစ်အုပ်စုတပ်က လေကြောင်းမှ တိုက်ခိုက်မှု ၇ ကြိမ်ပြုလုပ်ကာ ဗုံး ၁၀ လုံးထက်မနည်း ကြဲချခဲ့ သည်။ ထိုသို့ တိုက်ခိုက်မှုကြောင့် တောင်ဖူးကူးတို့ဆိပ်အနီး ဗုံးကျရောက်ပေါက်ကွဲခဲ့ပြီး ပုဏ္ဏားကျွန်းမြို့နယ်၊ ကျွဲထိုးပြင် ကျေးရွာမှ တောင်ဖူးကျေးရွာသို့ အလည်ရောက်ရှိနေသူ အသက် ၃၂ နှစ်အရွယ် ဒေါ်ဝင်းမြတ်အေးမှာ ဦးခေါင်း တွင် ပြင်းထန်ဒဏ်ရာရရှိကာ ဆေးကုသမှုခံယူရန် ပို့ဆောင်စဉ် လမ်း၌ ကွယ်လွန်သွားခဲ့သည်။ ထို့ပြင် တောင်းဖူးရွာမှ အသက် ၄၃ နှစ်အရွယ် ဒေါ်အေးခင်သိန်းမှာလည်း ညာဘက်ပခုံးနှင့် ညှပ်ရိုးတို့တွင် ဗုံးစထိမှန် ဒဏ်ရာရရှိခဲ့သည်။ အဆိုပါ လေကြောင်းတိုက်ခိုက်မှုကြောင့် တောင်ဖူးကျေးရွာရှိ ဘုန်းတော်ကြီးကျောင်း ၂ ကျောင်း၊ စာသင် ကျောင်း ၁ ကျောင်းနှင့် တောင်ဖူးဘုရားကြီးတို့မှာလည်း လုံးဝနီးပါး ပျက်စီးသွားခဲ့ရသည်။ ပေါက်တောဒေသခံတစ်ဦးက “ဒီဘက်မှာတော့ လေကြောင်းဗုံးကြဲမှုတွေက ဆက်တိုက်ဆိုသလိုကို ရှိနေတာ။ စစ်တွေတိုက်ပွဲမှာ စစ်တပ်က အထိနာနေတော့ အနီးနားက ရွာတွေကို လိုက်ပြီး ဗုံးကြဲနေတာဖြစ်တယ်။ ဒါ ကြောင့် အခုအချိန်မှာ စစ်တွေနဲ့ နီးတဲ့နေရာတွေဟာ လေကြောင်းအန္တရာယ် အရမ်းများလို့ အထူးသတိထား နေရတယ်” ဟု ပြောသည်။ အလားတူ ရခိုင်ပြည်တောင်ပိုင်း ဂွမြို့နယ်၊ ဆပ်သွားကျေးရွာသို့လည်း စက်တင်ဘာ ၂၁ ရက် နံနက် ၁၁ နာရီ ၂၀ မိနစ်ခန့်တွင် စစ်အုပ်စုတပ်၏ ဂျက်ဖိုက်တာတစ်စီးက ပေါင် ၃၀၀ ဗုံး ၂ လုံး ကြဲချတိုက်ခိုက်ခဲ့သည်။ ထိုတိုက်ခိုက်မှုကြောင့် ကျေးရွာအတွင်း ဗုံးကျရောက်ပေါက်ကွဲကာ (၈) တန်းကျောင်းသား မောင်ဇွဲထက်အောင် (၁၄ နှစ်) နှင့် ဦးနေလင်းအောင် (၄၄ နှစ်) တို့ ထိခိုက်ဒဏ်ရာရရှိခဲ့ပြီး နီးစပ်ရာ ဆေးရုံဆေးခန်းများ၌ ဆေးကုသမှု ခံယူနေရသည်။ ထို့ပြင် လူနေအိမ် ၁ ဆောင်၊ ဆိုင်ခန်း ၃ ခန်း ပျက်စီးခဲ့ရပြီး ဒေသခံများ၏ ဆိတ် ၂ ကောင်လည်း သေဆုံးခဲ့ရသည်။ ထို့ပြင် အာရက္ခတပ်တော် (AA) ထိန်းချုပ်ထားသည့် မင်းပြားမြို့နယ်၊ သစ်ပုတ်တောင်ကျေးရွာ အရှေ့ဘက် တောင်တန်းကိုလည်း စက်တင်ဘာ ၂၁ ရက် မွန်းလွဲ ၁၂ နာရီ ၄၀ မိနစ်တွင် ဂျက်ဖိုက်တာတစ်စီးဖြင့် ဗုံး ၂ လုံး ကြဲချခဲ့သဖြင့် ကျေးရွာအတွင်း ဗုံးစများ ကျရောက်ခဲ့သည်။ မင်းပြားဒေသခံ အမျိုးသမီးတစ်ဦးက “ဂျက်ဖိုက်တာတစ်စီးနဲ့ ဗုံး ၂ လုံး လာကြဲတာပါ။ ရွာအရှေ့ဘက် တောင် တန်းတွေကို ပစ်မှတ်ထားတာဆိုပေမဲ့ လေယာဉ်က ရွာပေါ်မှာ အကြာကြီး ဝဲပျံနေခဲ့တာ။ ရွာထဲကိုလည်း ဗုံးစတွေ လာကျတယ်။ လေယာဉ်ကလည်း လာတော့ အကုန်လုံး မနေရဲကြတော့ဘဲ ဘေးလွတ်ရာကို ထွက်ပြေးနေရတယ်” ဟု ပြောသည်။ ထို့ပြင် မွန်းလွဲ ၁ နာရီဝန်းကျင်တွင် မြေပုံမြို့နယ်ပေါ်၌ ဂျက်ဖိုက်တာတစ်စီး ဝဲပျံခဲ့သဖြင့် မြို့ခံများ စိုးရိမ်ထိတ် လန့်ခဲ့ရသကဲ့သို့ စက်တင်ဘာလ ၂၀ ရက်နေ့ ကလည်း ရသေ့တောင်မြို့နယ် မိုးစဲကျွန်းဒေသ ဇီးကိုင်းရွာသို့ စစ်အုပ်စုတပ်က လက်နက်ကြီး ပစ်ခတ်ခဲ့သဖြင့် ဒေသခံ အမျိုးသမီး ၂ ဦး သေဆုံးခဲ့ရသေးသည်။ စစ်အုပ်စုတပ်သည် ပြီးခဲ့သည့် ရက်ပိုင်းကစ၍ “၄၉၂၆ စစ်ဆင်ရေး” အမည်ဖြင့် ပုဏ္ဏားကျွန်းမြို့နယ်ကို စစ်တွေမြို့မှနေ၍ ကြည်း၊ ရေ၊ လေ အင်အားအမြောက်အမြားသုံးကာ ထိုးစစ်ဆင်ခဲ့သော်လည်း တပ်ဦးကျိုးကာ အထိနာဆုတ်ခွာခဲ့ရသည်။ အဆိုပါ တိုက်ပွဲအတွင်း စစ်အုပ်စုတပ်၏ ရုပ်အလောင်းများ၊ စစ်သုံ့ပန်းများနှင့် လက်နက်ခဲယမ်း အများအပြားကို အာရက္ခတပ်တော်က သိမ်းပိုက်ရရှိခဲ့သည်။ မြေပြင်စစ်ရေးတွင် အရေးနိမ့်နေသည့် စစ်အုပ်စုတပ်၏ အခြေအနေနှင့် ပတ်သက်၍ ရခိုင်ဒေသခံတစ်ဦးက “ဒီလထဲ စစ်တွေတိုက်ပွဲမှာ စစ်တပ်က အရမ်းအထိနာနေတာ။ အဲ့လိုအထိနာပြီး တပ်ဆုတ်ခဲ့ရတော့ စစ်ရေးနဲ့ လုံးဝမသက်ဆိုင်တဲ့ ရွာတွေကို ရည်ရွယ်ချက်ရှိရှိ နေ့တိုင်း မနားတမ်း လိုက်ဗုံးကြဲနေတာပါ” ဟု ပြောသည်။ လက်ရှိတွင် စစ်အုပ်စုတပ်သည် ပုဏ္ဏားကျွန်း၊ မြောက်ဦး၊ ကျောက်တော်၊ ရသေ့တောင်၊ ပေါက်တော (ဝီရဌာနီ)၊ မင်းပြား (အဉ္ဇနပူရ)၊ သံတွဲနှင့် ကျောက်ဖြူ စသည့် မြို့နယ်များရှိ လူနေရပ်ကွက်များနှင့် ကျေးရွာများကို လေကြောင်း၊ ရေကြောင်းနှင့် လက်နက်ကြီးများဖြင့် နေ့စဉ်ရက်ဆက် ရည်ရွယ်ချက်ရှိရှိ ပစ်ခတ်တိုက်ခိုက်လျက် ရှိသည်။ ဓါတ်ပုံ - Crd #စစ်တွေ

ရခိုင်တွင် စစ်တပ်၏ လေကြောင်းတိုက်ခိုက်မှုများကြောင့် အရပ်သား သေဆုံးထိခိုက်မှု မြင့်တက်

စစ်တွေ-ပုဏ္ဏားကျွန်းအစပ် တိုက်ပွဲတွင် စစ်တပ်ဘက်မှ တပ်သားများနှင့် လက်နက်များ ဆုံးရှုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၀ ရက်။ ရခိုင်ပြည်ကို ပြန်လည်သိမ်းပိုက်ရန် ထိုးစစ်ဆင်နေသည့် စစ်အုပ်စုတပ်သည် စစ်တွေ-ပုဏ္ဏားကျွန်းမြို့နယ်အစပ် တိုက်ပွဲများအတွင်း အကျအဆုံးများပြားနေသည့်အပြင် တပ်သားများနှင့် လက်နက်ခဲယမ်းများပါ ဆုံးရှုံးနေရ သည်။ ပြီးခဲ့သည့် စက်တင်ဘာလ ၁၆ ရက်နေ့က ကွမ်းတောင်နှင့် အမြင့်ကျွန်းကျေးရွာကြား ဖြစ်ပွားခဲ့သည့် တိုက်ပွဲ အတွင်း ပခုက္ကူအခြေစိုက် အမှတ် (၁၀၁) တပ်မဌာနချုပ်လက်အောက်ခံ၊ ခလရ (၂၅၂) တပ်ရင်းမှ တပ်သား အောင်ပြည့်စုံနှင့် တပ်သား မိုင်ကယ်တို့အပါအဝင် စစ်သား ၄ ဦးထက်မနည်း စစ်သုံ့ပန်း အဖြစ် ဖမ်းဆီးခံခဲ့ရသည်။ အလားတူ ဒရုန်းအပါအဝင် လက်နက်ခဲယမ်းများကိုပါ အာရက္ခတပ်တော် (AA) က သိမ်းဆည်းရရှိခဲ့သည်။ ဖမ်းဆီးခံခဲ့ရသူ တပ်သား အောင်ပြည့်စုံ က “အင်အားများတယ်ဆိုပြီး တပ်စိတ်မှူးက ပြေးတယ်။ ကျနော်တို့ကို ထားခဲ့တယ်။ ကျနော်တို့ ဖမ်းခံလိုက်ရတယ်။ သစ္စာလည်းမရှိဘူး၊ ကိုယ်ချင်းစာစိတ်လည်းမရှိဘူး၊ သားသမီး စိတ်ဓာတ်လည်းမရှိဘူး” ဟု ထွက်ဆိုထားသည်။ စစ်အုပ်စုတပ်သည် ရခိုင်ပြည်ကို ပြန်လည်သိမ်းပိုက်နိုင်ရေးအတွက် စက်တင်ဘာလ ၄ ရက်နေ့မှစ၍ စစ်ကြောင်းများခွဲကာ စစ်အင်အား ၁,၀၀၀ ကျော်ဖြင့် '၄၉၂၆ စစ်ဆင်ရေး' (ရန်နိုင်အောင်စစ်ဆင်ရေး) ကို စတင် ခဲ့ခြင်း ဖြစ်သည်။ သို့သော်လည်း တိုက်ပွဲများအတွင်း အရှုံးများနှင့် ရင်ဆိုင်နေရပြီး စစ်ကြောင်းပါ တပ်သားများမှာ တိုက်ပွဲဧရိယာ အတွင်း အကျအဆုံး များပြားလျက်ရှိသည်။ ထိုကဲ့သို့ ထိုးစစ်များ စစ်ရေးအရ အဆင်မပြေဖြစ်နေ၍ စစ်အုပ်စုတပ်သည် အရပ်သား ပြည်သူများနေထိုင်ရာ ကျေးရွာများသို့ လေကြောင်းဗုံးကြဲမှုနှင့် လက်နက်ကြီး ပစ်ခတ်မှုများကို ဆက်တိုက် ပြုလုပ်လျက်ရှိသည်။ စက်တင်ဘာလ ၁၇ ရက်နေ့ နံနက်ပိုင်းကလည်း ပုဏ္ဏားကျွန်းမြို့နယ်၊ ကွမ်းတောင်ကျေးရွာနှင့် မင်းချောင်း တံတား အနီးဝန်းကျင်သို့ စစ်တိုက်လေယာဉ်များဖြင့် တစ်နေ့လုံးနီးပါး လေကြောင်းမှ တိုက်ခိုက်ခဲ့သည်။ ဒေသခံ စစ်ရေးသတင်းအရင်းအမြစ် အမျိုးသားတစ်ဦးက “စစ်တွေနဲ့ ပုဏ္ဏားကျွန်း အစပ်က ရွာတွေကိုစစ်တပ် က လေယာဉ်တွေရော၊ ဒရုန်းတွေပါ သုံးပြီး အုပ်စုလိုက် ဗုံးကြဲနေတာ။ တိုက်ပွဲက ၂ ပတ်ကျော် ပြင်းထန်လာ တာပါ” ဟု ပြောသည်။ လက်ရှိတွင် စစ်တွေ-ပုဏ္ဏားကျွန်း အစပ်၌ တိုက်ပွဲများ ပြင်းထန်နေဆဲဖြစ်ပြီး လေကြောင်းနှင့် လက်နက်ကြီး တိုက်ခိုက်မှုများကြောင့် ပုဏ္ဏားကျွန်းမြို့နယ်အတွင်းရှိ ကွမ်းတောင်၊ စပါးထား၊ ဖက်ကျနှင့် ဒီပါရုံ အပါအဝင် ကျေးရွာ ၂၀ ကျော်မှ ဒေသခံများသည် ဘေးလွတ်ရာသို့ တိမ်းရှောင်နေကြရသည်။ ထို့ပြင် စစ်အုပ်စုတပ်သည် ကျောက်ဖြူ၊ စစ်တွေ၊ သံတွဲနှင့် ဂွမြို့နယ်တို့ရှိ AA ထိန်းချုပ်နယ်မြေများကို ပြန်လည် ရယူရန် ထိုးစစ်ဆင်နေသည့်အပြင် ရခိုင်ရိုးမအရှေ့ဘက်ခြမ်းရှိ မကွေး၊ ပဲခူး၊ ဧရာဝတီတိုင်း ဒေသကြီးများနှင့် ချင်းပြည်၊ မင်းတပ်မြို့နယ်တို့မှတစ်ဆင့် ရခိုင်ဘက်သို့ ထိုးဖောက်ဝင်ရောက်နိုင်ရန်လည်း ကြိုးပမ်းလျက် ရှိသည်။ ဓါတ်ပုံ - (စစ်တွေ-ပုဏ္ဏားကျွန်းအစပ် တိုက်ပွဲအတွင်း သိမ်းဆည်းရမိသော လက်နက်ခဲယမ်းများနှင့် စစ်သုံ့ပန်း များ။ / AA Info Desk) #စစ်တွေ

စစ်တွေ-ပုဏ္ဏားကျွန်းအစပ် တိုက်ပွဲတွင် စစ်တပ်ဘက်မှ တပ်သားများနှင့် လက်နက်များ ဆုံးရှုံး

စစ်ရှိန်မြင့်လာ၍ စစ်တွေ- ပုဏ္ဏားကျွန်း အစပ်ရှိ ဒေသခံထောင်ပေါင်းများစွာ ဘေးလွတ်ရာသို့ ရွှေ့ပြောင်းနေရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၁ ရက်။ ရခိုင်ပြည်၊ စစ်တွေနှင့် ပုဏ္ဏားကျွန်းမြို့နယ် အစပ်တွင် စစ်အုပ်စုတပ်နှင့် အာရက္ခတပ်တော် (AA) တို့အကြား တိုက်ပွဲများ အပြင်းအထန် ဖြစ်ပွားနေပြီး စစ်အုပ်စု၏ လေကြောင်းနှင့် လက်နက်ကြီး တိုက်ခိုက်မှုများကြောင့် ဒေသခံထောင်ပေါင်းများစွာ ဘေးလွတ်ရာသို့ ထွက်ပြေး ရွှေ့ပြောင်းနေကြရသည်။ တိုက်ပွဲများ ပိုမိုပြင်းထန်လာနေသည့်အတွက် ပုဏ္ဏားကျွန်းမြို့နယ် တောင်ပိုင်းရှိ ကျေးရွာ ၁၅ ရွာထက်မနည်းမှ ဒေသခံများကို ဘေးလွတ်ရာသို့ အမြန်ဆုံး ရွှေ့ပြောင်းကြရန် အာရက္ခတပ်တော် (AA) က အိမ်တိုင်ရာရောက် ကွင်းဆင်းကာ သတိပေးနိုးဆော်ထားသည်။ ပြီးခဲ့သည့် စက်တင်ဘာ ဒုတိယအပတ်မှစ၍ စစ်တွေ-ပုဏ္ဏားကျွန်း နယ်စပ်ရှိ စပါးထား၊ ဆားကုန်းပို့၊ ခမောင်း တော ကာကင်းစခန်းနှင့် အမြင့်ကျွန်း တံတားဂိတ်များကို စစ်အုပ်စုတပ်က စစ်ကြောင်းထိုး ထိန်းချုပ်ရန် ကြိုး ပမ်းခဲ့သော်လည်း AA က ပြန်လည် တိုက်ခိုက် သိမ်းပိုက်ခဲ့သည့်အတွက် စစ်အုပ်စုတပ်ဘက်က လက်နက်ကြီးနှင့် လေကြောင်း ပစ်ကူများ သုံးကာ နယ်မြေ ပြန်လည်ရရှိရေး အပြင်းအထန် ထိုးစစ်ဆင်နေခြင်း ဖြစ်သည်။ အဆိုပါ စစ်ရေးအခြေအနေကြောင့် စစ်တွေနှင့် ပုဏ္ဏားကျွန်း အစပ်ရှိ ငှက်ကြီးကျွန်း၊ အလယ်ကျွန်း၊ ပဒေသာ၊ မက္ကာလာကျ၊ ကျွန်းချေ၊ ဆားပြင်ကြီးနှင့် တောင်ပေါက် စသည့် ကျေးရွာများမှ သက်ကြီးရွယ်အိုများနှင့် အပြစ်မဲ့ ပြည်သူများ ပိတ်မိမနေစေရန် အာရက္ခတပ်တော် တာဝန်ရှိသူများက အသိပေး ရွှေ့ပြောင်းခိုင်းနေခြင်း ဖြစ်သည်။ ဒေသခံ စစ်ရေးသတင်းအရင်းအမြစ် အမျိုးသားတစ်ဦးက “စစ်တွေနဲ့ ပုဏ္ဏားကျွန်း အစပ်က ရွာတွေကို စစ်တပ် က လေယာဉ်တွေရော၊ ဒရုန်းတွေပါ သုံးပြီး အုပ်စုလိုက် ဗုံးကြဲနေတာ။ တိုက်ပွဲက ၂ ပတ်ကျော် ပြင်းထန်လာ တာပါ။ ရွာတွေထဲ သက်ကြီးရွယ်အိုတွေနဲ့ ကလေးတွေ ကျန်ခဲ့မှာစိုးလို့ AA က အိမ်တိုင်ရာရောက် လာပြီး ဘေးလွှတ်ရာ ရွှေ့ကြဖို့ အသိပေးနေတာ ဖြစ်ပါတယ်” ဟု ပြောသည်။ လက်ရှိတွင် ငှက်ကြီးကျွန်း၊ အလယ်ကျွန်း၊ မက္ကာလာကျ၊ ကွန်းတောင်၊ ညောင်ရည်ချောင်း၊ ရဲရိုးပြင်နှင့် ဝါဘို အပါအဝင် ကျေးရွာ ၂၀ နီးပါး၏ ကောင်းကင်ယံတွင် စစ်အုပ်စု၏ တိုက်လေယာဉ်များ အဆက်မပြတ် ပျံဝဲနေ သည့်အပြင် ရဟတ်ယာဉ်များ၊ စစ်ရေယာဉ်များနှင့် ဒရုန်းများပါ အသုံးပြု၍ ရွာများအတွင်းသို့ လက်နက်ကြီး များဖြင့် ပစ်ခတ်နေသည့်အတွက် ပြည်သူများမှာ အိုးအိမ်များကို စွန့်ခွာ၍ ဘေးလွှတ်ရာသို့ ရွှေ့ပြောင်းနေ ကြရသည်။ သို့သော်လည်း ဒေသတွင်း၌ သမားရိုးကျ လမ်းကြောင်းအများစု ပိတ်ဆို့ခံထားရခြင်း၊ စစ်အုပ်စုတပ်က မြစ် ကြောင်းနှင့် ကုန်းလမ်း အထွက်ပေါက်များကို လက်နက်ကြီးနှင့် လေကြောင်းမှ စောင့်ကြည့် ပစ်ခတ်နေခြင်း တို့ကြောင့် စစ်ဘေးရှောင်များအတွက် ခရီးလမ်း အန္တရာယ်ကြီးမားလှသည့်အပြင် သယ်ယူပို့ဆောင်ရေး ယာဉ် စရိတ်များ မြင့်တက်နေခြင်း၊ သက်ကြီးရွယ်အိုများနှင့် နာတာရှည်လူနာများကို ရွှေ့ပြောင်းရန် ခက်ခဲခြင်းတို့ ကြောင့် ထွက်ပြေးတိမ်းရှောင်ရာတွင် ကြီးမားသည့် အခက်အခဲများနှင့် ရင်ဆိုင်နေကြရသည်။ ဒေသခံ အမျိုးသမီးတစ်ဦးက “လက်နက်ကြီးသံတွေ၊ လေယာဉ်သံတွေ ကြားရတော့ ဘာမှမယူနိုင်ဘဲ ဗုံးခိုကျင်း ထဲကို ပြေးရတာပါ။ သက်ကြီးရွယ်အိုတွေကို ထမ်းပြေးရတာရော၊ ကလေးတွေနဲ့မို့ လမ်းမှာ စစ်တပ်က လေယာဉ်နဲ့ ဗုံးကြဲမှာရော အရမ်းကြောက်ရတာ။ လမ်းစရိတ်တွေကလည်း အရင်ထက် နှစ်ဆ၊ သုံးဆလောက် ပေးနေရတော့ တော်တော်လေး ဒုက္ခရောက်နေကြရတယ်” ဟု ပြောသည်။ လက်ရှိတွင် စစ်အုပ်စုတပ်သည် ပုဏ္ဏားကျွန်းနှင့် စစ်တွေ နယ်စပ်တစ်လျှောက် စစ်အင်အားနှင့် လက်နက်ကြီး ပစ်အားများကို ဆက်တိုက် ဖြည့်တင်းနေပြီး အရပ်သားပစ်မှတ်များကိုပါ ဦးတည် တိုက်ခိုက်နေသည့်အတွက် ဒေသတွင်း တိုက်ပွဲများ ပိုမိုပြင်းထန်လာနိုင်ဖွယ်ရှိကြောင်း ဒေသခံများနှင့် စစ်ရေးလေ့လာသူများက သုံးသပ် ထားကြသည်။ ဓါတ်ပုံ - (ပုံဟောင်း / ရခိုင်စစ်ရှောင်ပြည်သူများ - Crd) #စစ်တွေ #ပုဏ္ဏားကျွန်း #AA

စစ်ရှိန်မြင့်လာ၍ စစ်တွေ- ပုဏ္ဏားကျွန်း အစပ်ရှိ ဒေသခံထောင်ပေါင်းများစွာ ဘေးလွတ်ရာသို့ ရွှေ့ပြောင်းနေရ

စစ်တွေ-ပုဏ္ဏားကျွန်း အစပ်တွင် AA တန်ပြန်ထိုးစစ်ဆင်၍ စစ်အုပ်စု ကာကင်းစခန်းအချို့ သိမ်းပိုက်ခံရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၉ ရက် ရခိုင်ပြည်၊ စစ်တွေ-ပုဏ္ဏားကျွန်းအစပ်တွင် စစ်အုပ်စုတပ်နှင့် အာရက္ခတပ်တော် (AA) တို့အကြား တိုက်ပွဲများ ပြင်းထန်လျက်ရှိပြီး AA က စစ်အုပ်စုတပ်၏ ကာကင်းစခန်းအချို့ကို ထိန်းချုပ်သိမ်းပိုက်ထားကြောင်း မြေပြင် စစ်ရေးသတင်းရင်းမြစ်များက ပြောသည်။ စစ်အုပ်စုတပ်သည် စစ်တွေ-ပုဏ္ဏားကျွန်းအစပ်သို့ စက်တင်ဘာလ ၄ ရက်နေ့မှစ၍ ထိုးစစ်ဆင်တိုက်ခိုက်လာ ခြင်း ဖြစ်ပြီး တိုက်ပွဲဖြစ်ပွားနေသည်မှာ ၁၆ ရက်ခန့်ရှိပြီဖြစ်သည်။ အဆိုပါ တိုက်ပွဲများအတွင်း နှစ်ဖက်အကျအဆုံးများရှိနေပြီး စစ်အုပ်စုတပ်၏ စပါးထား၊ ဆားကုန်းပို့၊ ခမောင်း တော ကာကင်းစခန်းများနှင့် ရွှေမင်းဂံရေတပ်စခန်း၏ ကာကင်းစခန်းဖြစ်သည့် အမြင့်ကျွန်း တံတားဂိတ်များကို AA က ထိန်းချုပ်သိမ်းပိုက်ထားခြင်းဖြစ်သည်။ ဒေသခံစစ်ရေးသတင်းရင်းမြစ် အမျိုးသားတစ်ဦးက “ပထမ ၁၄ ရက်နေ့ကတည်းက စစ်တပ် စစ်ကြောင်းတွေ စစ်တွေ - ပုဏ္ဏားကျွန်းအစပ်ကို ထိုးလာတော့ စပါးထား၊ ဆားကုန်းပို့၊ ခမောင်းတော ကာကင်းစခန်းတွေကို စစ်တပ်က ထိန်းလိုက်တယ်၊ ရက်ကြာရှည်လာတော့ အေအေရဲ့ တန်ပြန်ထိုးစစ်ကို မနိုင်တော့လို့ အကျအဆုံးနဲ့ ပြန်ဆုတ်တယ်၊ လက်ရှိ ပင်လယ်ရေပြင်တွေမှာလည်း စစ်တပ်အလောင်းတွေ များတယ်” ဟု ပြောသည်။ လက်ရှိတွင် စစ်အုပ်စုတပ်သည် စစ်တွေ-ပုဏ္ဏားကျွန်းအစပ်ရှိ မင်းချောင်းတံတား၊ ဝါဘို၊ အမြင့်ကျွန်း၊ ရဲရိုးပြင်၊ ဆားတောင်ပို့၊ ခမောင်းတောနှင့် ကွမ်းတောင် ကျေးရွာတို့တွင် စစ်အင်အား ရာချီ ဖြန့်ကျက်ထားဆဲ ဖြစ်သည်။ ဒေသခံတစ်ဦးက “လက်ရှိမင်းချောင်းတံတား၊ ဝါဘို အမြင့်ကျွန်း၊ ရဲရိုးပြင်၊ ဆားတောင်ပို့၊ ခမောင်းတော၊ ကွမ်းတောင် ဘက်တွေ မှာ စစ်တပ် ဘက်က စစ်အင်အားတိုးပြီးဖြန့်တယ်။ ဒါပေမယ့် အေအေသတ်ကွင်း ထဲဝင်သလိုဖြစ်နေတယ်။ ရခိုင် ကို အပြင်ဘက်က စစ်ကြောင်းထိုးမရတော့ အတွင်းထဲက သူတို့ထိန်းချုပ်တဲ့ စစ်တွေကတဆင့် အင်အားဖြည့်ပြီး စစ်ကြောင်းထိုးတာ အေအေကလည်းတော်တော်ခုခံယူနေရတယ်” ဟု ပြောသည်။ ထို့ပြင် စစ်အုပ်စုတပ်သည် စစ်တွေ-ပုဏ္ဏားကျွန်းအစပ်သို့ လေယာဉ်အုပ်စုလိုက်ဖြင့် လာရောက်ဗုံးကြဲ တိုက်ခိုက် နေသည့် အပြင် လက်နက်ကြီးများ၊ ဒရုန်းများဖြင့်လည်း နေ့စဉ် ပစ်ခတ်လျက်ရှိရာ AA ဘက်ကလည်း လက်နက်ကြီးများဖြင့် ပြန်လည်ပစ်ခတ်နေသဖြင့် တိုက်ပွဲများ အပြင်းအထန် ဖြစ်ပွားနေသည်။ လက်ရှိစစ်ရေး အနေအထားအရ AA သည် ပုဏ္ဏားကျွန်းဘက်မှတစ်ဆင့် စစ်တွေမြို့အနီးသို့ တန်ပြန်ထိုးစစ်ဖြင့် ရှေ့တိုးလာလျက်ရှိသည်။ အလားတူ စက်တင်ဘာလ ၁၈ ရက် နံနက်ပိုင်းမှ နေ့လယ်ပိုင်းအထိ စစ်တွေ၊ ပုဏ္ဏားကျွန်း၊ ဝီရဌာနီ (ပေါက်တော) နှင့် သံတွဲမြို့များကို စစ်အုပ်စုတပ်က ဂျက်ဖိုက်တာ လေယာဉ်များ အုပ်စုလိုက်အသုံးပြု၍ လေကြောင်းမှ တိုက်ခိုက်ခဲ့သည်။ စစ်အုပ်စုတပ်သည် လေကြောင်းနှင့် ရေကြောင်း ပစ်ကူအပြင် ရွှေမင်းဂံရေတပ်စခန်း၊ အမြင့်ကျွန်းရှိ လက်နက် ကြီးအထိုင်စခန်း၊ စစ်တွေပါဒလိတ်တပ်ရင်း၊ အမြောက်တပ်၊ ခလရ (၂၀)၊ ခလရ (၂၃၂)၊ ခလရ (၂၇၀)၊ ခမရ (၃၄၄) စသည့် စစ်တွေ-ပုဏ္ဏားကျွန်း ကားလမ်းပေါ်တွင် အခြေစိုက်ထားသည့် တပ်ရင်းများမှလည်း လက်နက်ကြီးများဖြင့် တိုက်ပွဲဖြစ်ပွားရာနေရာများသို့ ဆက်continuous ပစ်ကူပေး တိုက်ခိုက်လျက်ရှိသည်။ ဓာတ်ပုံ - Crd #AA #စစ်တွေ #ပုဏ္ဏားကျွန်း

စစ်တွေ-ပုဏ္ဏားကျွန်း အစပ်တွင် AA တန်ပြန်ထိုးစစ်ဆင်၍ စစ်အုပ်စု ကာကင်းစခန်းအချို့ သိမ်းပိုက်ခံရ

ဗုဒ္ဓဟူးနေ့ည ရုပ်သံသတင်း (၇-၁၀-၂၆)

ဗုဒ္ဓဟူးနေ့ညပိုင်း ရုပ်သံသတင်း(၇-၁၀-၂၆)

ဒီကနေ့ အစီအစဉ်ထဲမှာတော့-

– ကျိုက်ထိုမြို့နယ်မှာ တိုက်ပွဲမဖြစ်ပဲ စစ်အုပ်စုက အရပ်သားရွာတွေကို ဗုံးကြဲလို့ ထောင်နဲ့ချီထွက်ပြေးနေရ

– ရခိုင်-ဧရာဝတီ အစပ်မှာ တိုက်ပွဲ ပြင်းထန်ပြီး စစ်အုပ်စုက အစုအပြုံလိုက် ကျဆုံးနေ

– ကချင်ပြည်က ရွှေကူ-ငအိုး လမ်းပိုင်း သုံးသူတွေကို အရေးယူသွားမယ်လို့ KIAသတိပေး

– အလုပ်သမားတွေ ဆီက အခွန်နဲ့ လွှဲငွေ ရရှိဖို့ ပိုမို တင်းကြပ်သွားမယ်လို့ စစ်အုပ်စုပြော

– စစ်အုပ်စု ခေါင်းဆောင် ၇-၈ ရက်နေ့တွေမှာ မလေးရှားကို သွားမည်

– လာအို ဒုတိယမြို့တော်လေဆိပ် ကိုယ်ပိုင်လေယာဉ်ပေါ်တင်တဲ့ မူးယစ်ဆေးဝါး ကီလို ၅၀၀ ကျော်ဖမ်းမိ

– မက်ဒေါ်နယ်(McDonald’s)ကုမ္ပဏီဟာ AI သုံးစွဲပြီး လွတ်လပ်စွာ ယှဉ်ပြိုင်ခွင့်ကို ချိုးဖောက်တယ်ဆိုပြီး တရားစွဲခံရ

– ပထမဆုံး FIFA အာဆီယံ ဖလားကို အင်ဒိုနီးရှား အသင်း ပင်နယ်တီ အဆုံးအဖြတ်နဲ့ ဆွတ်ခူး…..စတာတွေ တင်ဆက်ထားပါတယ်။

×Close

News

ရခိုင်သွေးနှောသူ ရည်မွန်မြတ် ဂျပန် Professional League ဘော်လီဘောပွဲတွင် အကောင်းဆုံးဆုရရှိ — October 23, 2026 2:38 pm
အမေရိကန် ကင်ဆာ လူနာများ တရုတ်ပြည်အထိ ဆေးဝါးသစ် သွားဝယ်နေကြ — October 23, 2026 2:17 pm
စူပါ တိုင်ဖွန်း “ချမ်ပီ” ထိုင်ဝမ်သို့ ဝင်ရောက်၊ ၁ ဦး သေဆုံးပြီး ကျောင်းနှင့် ရုံးများ ပိတ်ထားရ — October 23, 2026 2:16 pm

Recent Posts

NCA လမ်းကြောင်း တွေ့ဆုံဆွေးနွေးပွဲများ တော်လှန်ရေးအင်အားစုများ လက်မခံ
တရုတ်ခဲသတ္တုတွင်းကြောင့် တာချီလိတ် ဒေသခံများ အဆိပ်သင့် အန္တရာယ်ကြုံနေရ
ဗုံးကြဲခံရပြီးနောက် စစ်တွေမြို့လယ်၌ ဈေးများပိတ်ကာ မြို့ခံများ စိုးရိမ်ထိတ်လန့်နေ
ဖားကန့်၌ တိုက်ပွဲမရှိဘဲ စစ်တပ်က လက်နက်ကြီး ရမ်းသမ်းပစ်၍ အရပ်သားများ ထိခိုက်ဒဏ်ရာရ
စစ်တွေအား AA သိမ်းမည်ဆိုသည့် ခန့်မှန်းချက်များကြောင့် NGO နှင့် INGO ဝန်ထမ်းအချို့ ပြောင်းရွှေ့

Archives

Archives

×Close