တနင်္သာရီတိုင်း – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Tag Archive

Tag: တနင်္သာရီတိုင်း

တော်လှန်ရေးတပ်များ သိမ်းလိုက်သည့် ဝင်းဝ စခန်း ဝန်းကျင်ကို စစ်ကော်မရှင် ဗုံးကြဲ သတင်းနှင့်မီဒီယာ ကွန်ရက်။ ၂၀၂၆ ခုနှစ်၊ မတ်လ ၁၅ ရက်။ တနင်္သာရီတိုင်း၊ ထားဝယ်ခရိုင်အတွင်းရှိ ဝင်းဝစခန်းကို တော်လှန်ရေးပူးပေါင်းတပ်များက သိမ်းပိုက်နိုင်ခဲ့ပြီး နောက် စစ်ကော်မရှင်တပ်က အနီးဝန်းကျင်ရှိ အရပ်သားကျေးရွာများကို လေကြောင်းမှတစ်ဆင့် ဗုံးကြဲ တိုက်ခိုက်မှုများ ဆက်တိုက်လုပ်ဆောင်နေကြောင်း ဒေသခံများက ပြောသည်။ သရက်ချောင်းမြို့နယ် အောက်ပိုင်းရှိ ဝင်းကဖော်နှင့် ဂုံညှင်းဆိပ်ကျေးရွာတို့ကို စစ်တပ်က မတ်လ ၁၂ ရက်နှင့် ၁၃ ရက်နေ့တို့တွင် တိုက်လေယာဉ်များအသုံးပြု၍ ပစ်မှတ်ထားတိုက်ခိုက်ခဲ့ခြင်းဖြစ်သည်။ အဆိုပါကျေးရွာများတွင် တိုက်ပွဲဖြစ်ပွားခြင်းမရှိဘဲ စစ်ကော်မရှင်တပ်က အရပ်သားပစ်မှတ်များကိုသာ ရည်ရွယ်ချက်ရှိရှိ တိုက်ခိုက်ခဲ့ခြင်းဖြစ်သည်ဟု ဆိုသည်။ အသက် ၅၀ ခန့်အရွယ်ရှိ ဂုံညှင်းဆိပ်ရွာသားတစ်ဦးက “ပင်လယ်ကမ်းခြေရွာဖြစ်တဲ့ ဂုံညှင်းဆိပ်ကျေးရွာကို မတ်လ ၁၂ ရက်နေ့ မနက် ၁၀ နာရီခန့်နဲ့ မွန်းလွဲ ၁ နာရီခွဲလောက်မှာ K8W တိုက်လေယာဉ်နဲ့ ဗုံးကြဲခဲ့တယ်၊ စက် သေနတ်နဲ့လည်း ဘုန်းကြီးကျောင်းဘက်ကို လှည့်ပတ်ပစ်ခတ်ခဲ့သေးတယ်၊ လူထိခိုက်တာတော့ မရှိပါဘူး” ဟု ပြောသည်။ ထို့အပြင် မတ်လ ၁၃ ရက်နေ့ မွန်းလွဲပိုင်းတွင်လည်း ဝင်းဝစခန်းနှင့် ၇ မိုင်ခန့်အကွာရှိ ဝင်းကဖော်ကျေးရွာကို K8W တိုက်လေယာဉ်ဖြင့် ပေါင် ၂၅၀ ဗုံး နှစ်လုံး ကြဲချခဲ့သည့်အပြင် စက်သေနတ်ဖြင့်ပါ လိုက်လံပစ်ခတ်ခဲ့သဖြင့် ရွာသားတစ်ဦး ဒဏ်ရာရရှိခဲ့ကြောင်း သိရသည်။ မြိတ် - ထားဝယ်သွား အမှတ် (၈) ပြည်ထောင်စုလမ်းမကြီးပေါ်ရှိ ဝင်းဝစခန်းကို KNU တပ်မဟာ (၄)၊ KNLA တပ်ရင်း (၁၂)၊ တပ်ရင်း (၂၇) နှင့် PDF ပူးပေါင်းတပ်ဖွဲ့များက မတ်လ ၁၁ ရက်နေ့တွင် အပြီးသတ် တိုက်ခိုက် သိမ်းပိုက်ခဲ့ခြင်းဖြစ်သည်။ စစ်ရေးအရ အရေးပါသော စခန်းတစ်ခုကို လက်လွှတ်ခဲ့ရပြီးနောက် စစ်ကော်မရှင်တပ်သည် ဒေါသတကြီးဖြင့် ပတ်ဝန်းကျင်ရှိ ကျေးရွာများသို့ လက်နက်ကြီးနှင့် လေကြောင်းပစ်ကူများ သုံးစွဲကာ အဆက်မပြတ် ခြိမ်းခြောက် လာနေခြင်း ဖြစ်သည်။ အမျိုးသားညီညွတ်ရေး အစိုးရ (NUG) တနင်္သာရီတိုင်း စစ်ဌာနကလည်း စစ်ကော်မရှင်သည် စခန်းလက်လွှတ် ရမှု အပေါ် လက်တုံ့ပြန်သည့် အနေဖြင့် လေကြောင်းတိုက်ခိုက်မှုများ ပိုမိုလုပ်ဆောင်လာနိုင်ကြောင်း သတိပေးချက် ထုတ်ပြန်ထားသည်။ ဒေသခံပြည်သူများ အနေဖြင့် လေကြောင်းရန်ကို အထူးသတိပြုကာ ဗုံးခိုကျင်းများ အဆင်သင့်ပြင်ဆင်ထားရန် နှင့် ဘေးကင်းရာသို့ ကြိုတင်ရှောင်တိမ်းကြရန် မြေပြင်ကယ်ဆယ်ရေးအဖွဲ့များက နှိုးဆော်ထားသည်။ ဓါတ်ပုံ - ဗုံးကြဲခဲ့သည့် နေရာများကို ပြည်သူ့ကာကွယ်ရေးတပ်ဖွဲ့က ကြည့်ရှု့စစ်ဆေးနေစဥ် #ဝင်းဝစခန်း #ဗုံးကြဲတိုက်ခိုက် #KNLA #PDF #စစ်ကော်မရှင်

တော်လှန်ရေးတပ်များ သိမ်းလိုက်သည့် ဝင်းဝ စခန်း ဝန်းကျင်ကို စစ်ကော်မရှင် ဗုံးကြဲ

တနင်္သာရီတိုင်းတွင် ဇန္နဝါရီလ အတွင်း နေအိမ် ၂၅၀ ကျော် မီးရှို့ဖျက်ဆီးခံရဟု သုတေသနအဖွဲ့ ဆို သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၂၄ ရက်။ တနင်္သာရီတိုင်းတွင် တစ်လအတွင်း နေအိမ် ၂၅၀ ကျော် မီးရှို့ဖျက်ဆီးခံခဲ့ရပြီး စစ်ဘေးရှောင် ၈ သောင်းကျော် အတွက် ရိက္ခာနှင့် ဆေးဝါးပြတ်လပ်မှု ကြုံတွေ့နေရသည်ဟု အကူအညီပေးနေသူများက ပြောသည်။ တနင်္သာရီတိုင်းအတွင်းရှိ ကျေးရွာများကို စစ်ကော်မရှင်တပ်က စစ်ကြောင်းထိုးဝင်ရောက်ကာ မီးရှို့ဖျက်ဆီးသည့် ဗျူဟာကို အရှိန်မြှင့်ကျင့်သုံးလာခြင်းကြောင့် ဇန်နဝါရီလတစ်လအတွင်း ဒေသခံနေအိမ် ၂၅၀ ကျော် ပြာကျခဲ့ရသည်။ ထို့အပြင် စစ်ဘေးရှောင်ဦးရေ ၈ သောင်းကျော်အထိ မြင့်တက်လာကြောင်း ဒေသတွင်း သုတေသနအဖွဲ့တစ်ခု ဖြစ်သည့် FE5Tanintaryi က ထုတ်ပြန်လိုက်သည်။ မြိတ်ခရိုင်အတွင်းရှိ ကျွန်းစု၊ တနင်္သာရီနှင့် ပုလောမြို့နယ်တို့သည် အများဆုံး မီးရှို့ဖျက်ဆီးခံခဲ့ရသည့် ဒေသများဖြစ်ပြီး၊ ၂၀၂၅ ခုနှစ် စက်တင်ဘာလမှ ယခု ဖေဖော်ဝါရီလဆန်းပိုင်းအထိ ခြောက်လတာကာလအတွင်း တိုင်းတစ်တိုင်းလုံးတွင် နေအိမ် ၈၀၀ ဝန်းကျင် မီးလောင်ပျက်စီးခဲ့ရသည်ဟု FE5 Tanintharyi က ဆိုသည်။ FE5Tanintaryi ၏ အယ်ဒီတာတစ်ဦးက လက်ရှိမြေပြင်အခြေအနေနှင့် ပတ်သက် ယခုကဲ့သို့ ပြောသည်။ “နေအိမ်မီးရှို့ခံရတဲ့ ပြည်သူတွေက စားရေးသောက်ရေးအပြင် နေထိုင်ရေးအတွက်ပါ အခက်တွေ့နေကြတဲ့ အနေအထား ရှိတယ်။ အဓိကကတော့ စစ်ကောင်စီတပ်က သူတို့ စစ်ကြောင်းတွေ၊ စခန်းတွေ တိုက်ခိုက်ခံရ တိုင်း အနီးနားက ကျေးရွာကို ပိုပြီး မီးရှို့တဲ့ ဗျူဟာကို ကျင့်သုံးလာတာပါ။” စစ်ကော်မရှင်တပ်သည် ဒေသခံလူထုအကြား အကြောက်တရားဖြစ်စေရန်နှင့် တော်လှန်ရေးအင်အားစုများ အပေါ် ထောက်ပံ့မှုအားနည်းသွားစေရန် ရည်ရွယ်၍ နေအိမ်များကို မီးရှို့နေခြင်းဖြစ်ကြောင်း၊ စစ်ကြောင်းထိုး လာစဉ် ရွာသားများကို ခေါ်ယူ၍ ‘တိုက်ခိုက်ခံရပါက ရွာကို မီးရှို့မည်’ ဟု ပေါ်ပေါ်တင်တင် ခြိမ်းခြောက်လေ့ရှိ သည်ဟု ဆိုသည်။ “တော်လှန်ရေးတပ်တွေကြောင့်မို့လို့ ရွာတွေကို မီးရှို့ရတာ ဆိုတဲ့ ဇာတ်ညွှန်းကို သူတို့က ပိုပြီးတော့ အကောင် အထည် ဖော်လာတာမျိုး တွေ့ရတယ်” ဟု အဆိုပါ အယ်ဒီတာက ဆက်ပြောသည်။ မီးရှို့ဖျက်ဆီးမှုများအပြင် အရပ်သားများကို လူသားဒိုင်းအဖြစ် ဖမ်းဆီးခြင်း၊ နေအိမ်ပစ္စည်းများ ဖောက်ထွင်း ခိုးယူခြင်းနှင့် လက်နက်ကြီး၊ ရေကြောင်းပစ်ခတ်မှုများကြောင့် ဇန်နဝါရီလအတွင်း နေရပ်စွန့်ခွာထွက်ပြေးရသူ အနည်းဆုံး ၈၅,၀၀၀ ခန့်အထိ ရှိလာခဲ့သည်။ ၎င်းတို့အနက် ထောင်ဂဏန်းခန့်သာ စစ်ဘေးရှောင်စခန်းများတွင် ခိုလှုံနိုင်ပြီး အများစုမှာ တောတောင်နှင့် ဥယျာဉ်ခြံများအတွင်း ဆိုးရွားစွာ နေထိုင်နေကြရသည်။ လက်ရှိ စစ်ဘေးရှောင်များ၏ ကျန်းမာရေးအခြေအနေနှင့် ပတ်သက်၍လည်း FE5Tanintaryi အယ်ဒီတာက ယခုကဲ့သို့ သတိပေးထားသည်။ “စစ်ဘေးရှောင်တွေမှာ အရေပြားရောဂါနဲ့ ငှက်ဖျားရောဂါ အဖြစ်များနေတဲ့အတွက် ဆေးဝါးလိုအပ်ချက်က အရမ်းမြင့်မားနေတယ်။ တိုက်ပွဲတွေ ငြိမ်တဲ့အချိန် ရွာထဲ ခဏပြန်ဝင်လိုက်၊ စစ်ကြောင်းလာရင် ပြန်ပြေးလိုက် နဲ့ စားနပ်ရိက္ခာ လိုအပ်ချက်ကလည်း အရမ်းများနေတာ သတိပြုမိတယ်။” ဇန်နဝါရီလအတွင်း စစ်ကော်မရှင်က ပြုလုပ်ခဲ့သည့် ရွေးကောက်ပွဲ အပိုင်း (၂) နှင့် (၃) ကာလများအတွင်း တိုက်ပွဲပေါင်း ၅၈ ကြိမ်ထက်မနည်း ဖြစ်ပွားခဲ့ပြီး စစ်တပ်ဘက်က ဒရုန်းဖြင့် ဗုံးချတိုက်ခိုက်မှုများ ပိုမိုလုပ် ဆောင်လာသည်။ ရှေ့လျှောက်တွင် တိုက်ပွဲများ ပိုမိုပြင်းထန်လာနိုင်ပြီး အလှူရှင်နည်းပါးလာခြင်းကြောင့် စစ်ဘေးရှောင်ကူညီရေး အဖွဲ့များမှာ ရှိနေသည့် လူဦးရေကိုပင် လုံလောက်စွာ မထောက်ပံ့နိုင်သည့် စိန်ခေါ်မှုကြီးနှင့် ရင်ဆိုင်နေရကြောင်း မြေပြင်ရှိ သတင်းရင်းမြစ်များက ပြောသည်။    ဓာတ်ပုံ - The Tanintharyi Times (ပုံဟောင်း) #တနင်္သာရီတိုင်း #နေအိမ်မီးရှို့ #စစ်ကော်မရှင် #FE5Tanintaryi #ပုလောမြို့နယ် #မြိတ်ခရိုင်

တနင်္သာရီတိုင်းတွင် ဇန္နဝါရီလ အတွင်း နေအိမ် ၂၅၀ ကျော် မီးရှို့ဖျက်ဆီးခံရဟု သုတေသနအဖွဲ့ ဆို

တနင်္သာရီ မြို့နယ်အချို့တွင် ပြိုင်ဘက်မရှိသဖြင့် USDP အနိုင်ရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၁၃ ရက်။ စစ်ကော်မရှင်က ကျင်းပနေသော ရွေးကောက်ပွဲများတွင် တနင်္သာရီတိုင်း မြို့နယ် အချို့တွင် ပြိုင်ဘက်မရှိသဖြင့် ပြည်ထောင်စု ကြံ့ခိုင်ရေးနှင့် ဖွံ့ဖြိုးရေး ပါတီ (USDP)မှ ကိုယ်စားလှယ်များက အနိုင်ရနေကြသည်။ လာမည့် ဇန်နဝါရီလ ၂၅ ရက်နေ့တွင် ပြုလုပ်မည့် ရွေးကောက်ပွဲအပိုင်း (၃) တွင် ပါဝင်သည့် လောင်းလုံးမြို့နယ် နှင့် ဇန်နဝါရီလ ၁၁ ရက်တွင် ကျင်းပခဲ့သော အပိုင်း (၂) မှ ရေဖြူမြို့နယ် ပြည်သူ့လွှတ်တော်ကိုယ်စားလှယ် နေရာများအတွက် ပြိုင်ဘက်မရှိသဖြင့် ယှဉ်ပြိုင်ရန်မလိုဘဲ အနိုင်ရရှိထားခြင်း ဖြစ်သည်။ ၎င်းအပြင် အပိုင်း (၂) တွင် ပါဝင်သော သရက်ချောင်းနှင့် ရေဖြူမြို့နယ်တို့၏ တိုင်းဒေသကြီးလွှတ်တော် နေရာ များတွင်လည်း USDP ပါတီမှ ကိုယ်စားလှယ်လောင်းနှစ်ဦးမှာ ပြိုင်ဘက်မရှိ အလိုအလျောက် အနိုင်ရရှိနေ သည်ဟု ရွေးကောက်ပွဲကော်မရှင် တာဝန်ရှိသူတစ်ဦးက အတည်ပြုသည်။ ပြီးခဲ့သည့် ၂၀၂၅ ခုနှစ်၊ ဒီဇင်ဘာလ ၂၈ ရက်က ကျင်းပခဲ့သော ရွေးကောက်ပွဲအပိုင်း (၁) တွင်လည်း ထားဝယ်၊ မြိတ်၊ ဘုတ်ပြင်းနှင့် ကော့သောင်းမြို့နယ်များရှိ ပြည်သူ့လွှတ်တော်နေရာ ၄ နေရာစလုံးကို USDP ပါတီကပင် အနိုင်ရရှိခဲ့သည်။ တနင်္သာရီတိုင်း ရွေးကောက်ပွဲအပိုင်း (၁) အပြီးတွင် USDP ပါတီသည် ပြည်သူ့လွှတ်တော်အတွက် ၆ ဦးနှင့် တိုင်းဒေသကြီးလွှတ်တော် အတွက် ၅ ဦး၊ စုစုပေါင်း ၁၁ ဦးအထိ အနိုင်ရရှိထားခြင်း ဖြစ်သည်။ အဆိုပါ အနိုင်ရရှိမှုများနှင့် ပတ်သက်၍ UEC မှ တာဝန်ရှိသူတစ်ဦးက “ပြည်သူ့လွှတ်တော်အတွက် ကြံ့ခိုင်ရေး ပါတီက အနိုင်ရတဲ့သူတွေက ထားဝယ်မြို့နယ်မှာ ဒေါက်တာ ကျော်ကျော်ဌေး၊ မြိတ်မြို့နယ်မှာ ဦးလင်းအောင်၊ ဘုတ်ပြင်းမြို့နယ်မှာ ဦးအောင်လင်းလှိုင် နဲ့ ကော့သောင်းမြို့နယ်က ဦးကျော်သူတို့ပါပဲ၊ တိုင်းဒေသကြီး လွှတ် တော်အတွက် ဦးကိုကိုကြီးဦးဆောင်တဲ့ မြိတ်မြို့နယ် ပြည်သူ့ပါတီမှ ဦးခိုင်ဦးက တစ်နေရာ အနိုင်ရထားတယ်” ဟု ပြောသည်။ ယှဉ်ပြိုင်ရန် မလိုဘဲ အနိုင်ရရှိနေသည့် USDP ပါတီမှ ပြည်သူ့လွှတ်တော် ကိုယ်စားလှယ်များမှာ လောင်းလုံး မြို့နယ်မှ ဦးတင့်လွင်နှင့် ရေဖြူမြို့နယ်မှ ဦးမင်းနိုင်တို့ ဖြစ်ကြသည်။ တိုင်းဒေသကြီး လွှတ်တော်တွင်မူ လက်ရှိ စစ်ကော်မရှင်၏ ဝန်ကြီးချုပ် ဦးမြတ်ကိုက ထားဝယ်မြို့နယ်မှ အနိုင် ရရှိခဲ့ပြီး၊ ကော့သောင်းမြို့နယ်တွင် ဒေါက်တာဝင်းအောင်နှင့် ဘုတ်ပြင်းမြို့နယ်မှ ဦးအောင်ကျော်ကျော်ဦးတို့က အသီးသီး အနိုင်ရရှိထားကြသည်။ သို့သော်လည်း အမျိုးသားလွှတ်တော် အတွက် အနိုင်ရရှိမှု စာရင်းကိုမူ ပြည်ထောင်စု ရွေးကောက်ပွဲကော်မရှင် က သတင်းထုတ်ပြန်ခြင်း မရှိသေးပေ။ တော်လှန်ရေး အင်အားစုများကမူ ယခုရွေးကောက်ပွဲသည် စစ်ကော်မရှင်က ၎င်းတို့၏ တရားဝင်မှုကို ပြသရန် ကြိုးပမ်းသည့် အတုအယောင် ရွေးကောက်ပွဲသာ ဖြစ်ကြောင်းနှင့် ပြိုင်ဘက်မရှိ အနိုင်ရနေခြင်းမှာလည်း စစ်ကော်မရှင်က နိုင်ငံရေးပါတီများကို ကန့်သတ်ချုပ်ချယ်မှုများ ပြုလုပ်ထားခြင်းကြောင့် ဖြစ်ကြောင်း ဝေဖန် ထောက်ပြနေကြသည်။

တနင်္သာရီ မြို့နယ်အချို့တွင် ပြိုင်ဘက်မရှိသဖြင့် USDP အနိုင်ရ

စစ်ကော်မရှင်တပ် မီးရှို့၍ တနင်္သာရီတိုင်းတွင် ရာဘာနှင့် ကွမ်းခြံ ဧက ၂၀ ကျော် မီးလောင် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၁၃ ရက်။ တနင်္သာရီတွင် ရွေးကောက်ပွဲအကြိုနေ့၌ စစ်ကော်မရှင်တပ်က ကျေးရွာများကို မီးရှို့ဖျက်ဆီးခဲ့ရာ ရာဘာနှင့် ကွမ်းခြံ ဧက ၂၀ ကျော် ပြာကျသွားသည်ဟု ဒေသခံများက ပြောသည်။ စစ်ကော်မရှင်က ကျင်းပသည့် ရွေးကောက်ပွဲ ဒုတိယပိုင်း အကြိုနေ့တွင် မြိတ်ခရိုင်၊ တနင်္သာရီမြို့နယ်အတွင်းရှိ ကျေးရွာများကို စစ်ကော်မရှင် စစ်ကြောင်းက ဝင်ရောက်မီးရှို့ဖျက်ဆီးခဲ့သဖြင့် ရာဘာခြံ၊ ကွမ်းခြံနှင့် နေအိမ်တစ်ဆောင် အပါအဝင် ပိုင်ဆိုင်မှုများစွာ ဆုံးရှုံးပျက်စီးခဲ့ကြောင်း ဒေသခံများက ပြောသည်။ မီးရှို့ဖျက်ဆီးခံရမှု အခြေအနေနှင့်ပတ်သက်၍ အသက် ၄၀ ခန့်အရွယ် ဒေသခံရွာသားတစ်ဦးက “ဘန်းလမွတ် ရွာက ရော်ဘာခြံက မီးရှို့ခံရတာ အများဆုံး ပါပဲ၊ နွေရာသီဆိုတော့ ပိုဆိုးတာပေါ့၊ မီးလောင်မြန်တယ်” ဟု ပြောသည်။ ဇန်နဝါရီလ ၁၀ ရက်နေ့၊ နံနက် ၁၁ နာရီခွဲခန့်တွင် ဘန်းလမွတ်ကျေးရွာအုပ်စု အတွင်းသို့ ဘန်းလမွတ်ကျေးရွာ အခြေစိုက် စစ်ကော်မရှင်၏ ခြေလျင်စစ်ကြောင်း နှစ်ကြောင်း ဝင်ရောက်လာပြီးနောက် ကျေးရွာအတွင်းရှိ စိုက်ပျိုးခြံများနှင့် နေအိမ်များကို တမင်သက်သက် မီးရှို့ဖျက်ဆီးခဲ့ခြင်း ဖြစ်သည်။ အဆိုပါ မီးရှို့ဖျက်ဆီးမှုကြောင့် ဘန်းလမွတ်ကျေးရွာ၊ ပနပ်ငယ်ကျေးရွာနှင့် (ဒေသအခေါ်) လယ်ဦးကျေးရွာတို့ရှိ ရာဘာခြံ သုံးခြံ၊ စုစုပေါင်း ဧက ၂၀ ကျော်၊ ကွမ်းခြံ ၅ ဧကခန့်နှင့် သစ်ခွဲသား ၂ တန်ခန့် မီးလောင်ပြာကျခဲ့ရသည်။ ထို့အပြင် ရမ်းဖိုကျေးရွာရှိ တစ်ထပ်တိုက် နေအိမ်တစ်ဆောင်ကိုလည်း စစ်ကော်မရှင်တပ်က မီးရှို့ဖျက်ဆီးခဲ့ ကြောင်း ဒေသခံများက ပြောသည်။ စစ်ကော်မရှင်တပ်ဖွဲ့ဝင်များ လက်ရှိအချိန်ထိ ကျေးရွာအတွင်း ရှိနေဆဲဖြစ်သဖြင့် ခြံပိုင်ရှင်များနှင့် ရွာသားများ သည် အသက်ဘေးကို စိုးရိမ်ကာ မီးဝင်ရောက်ငြှိမ်းသတ်နိုင်ခြင်း မရှိခဲ့ကြောင်း ဆိုသည်။ စစ်ကော်မရှင်တပ်နှင့် ဝေးရာနေရာများတွင်သာ မီးကူးစက်မှု မရှိစေရန် တားဆီးငြှိမ်းသတ်ခဲ့ရကြောင်း ရွာသားတစ်ဦးက ဆိုသည်။ တနင်္သာရီမြို့နယ်အတွင်း၌ စစ်ကော်မရှင်က ရွေးကောက်ပွဲကျင်းပနိုင်ရန် ကြိုးပမ်းနေသည့် ကာလအတွင်း ယခုကဲ့သို့ ကျေးရွာများကို မီးရှို့ဖျက်ဆီးခြင်းများ လုပ်ဆောင်နေသည်။ အလားတူ ဇန်နဝါရီလ ၁၁ ရက်နေ့ ရွေးကောက်ပွဲနေ့တွင်လည်း မော်တုန်း ကျေးရွာကို ဒရုန်းဖြင့် ဗုံးကြဲ တိုက်ခိုက်သဖြင့် အမျိုးသမီးကြီးတစ်ဦး ဒဏ်ရာရရှိခြင်း စသည့် လူ့အခွင့်အရေး ချိုးဖောက်မှုများ ဆက်တိုက် ဖြစ်ပေါ်နေသည်။ လက်ရှိတွင် တနင်္သာရီမြို့နယ်အတွင်း စစ်ရေးတင်းမာမှုများ ဆက်ရှိနေပြီး စစ်ကော်မရှင်တပ်၏ ရမ်းသန်း ပစ်ခတ်မှုနှင့် မီးရှို့ဖျက်ဆီးမှုများကြောင့် ဒေသခံပြည်သူများသည် လုပ်ငန်းခွင်အတွင်း မဝင်ရဲကြဘဲ ဘေးလွတ် ရာသို့ တိမ်းရှောင်နေကြရကြောင်း မြေပြင်သတင်းရင်းမြစ်များ၏ ပြောပြချက်အရ သိရှိသည်။

စစ်ကော်မရှင်တပ် မီးရှို့၍ တနင်္သာရီတိုင်းတွင် ရာဘာနှင့် ကွမ်းခြံ ဧက ၂၀ ကျော် မီးလောင်

ရွေးကောက်ပွဲနေ့တွင် ရွာအတွင်း ဒရုန်းဗုံးချသည့်အတွက် အသက် ၆၀ အရွယ် အမျိုးသမီးတစ်ဦး ဒဏ်ရာရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၁၃ ရက်။ ရွေးကောက်ပွဲ အပိုင်း ၂ ကျင်းပသည့်ရက်တွင် တနင်္သာရီတိုင်း မြိတ်ခရိုင်အတွင်း ဒရုန်းဖြင့် ဗုံးသီးချ တိုက်ခိုက်သဖြင့် အသက် ၆၀ အရွယ် အမျိုးသမီးတစ်ဦး ဒဏ်ရာရရှိသွားခဲ့သည်ဟု ဒေသခံများက ပြောသည်။ ရွေးကောက်ပွဲကျင်းပသည့် ဇန်နဝါရီလ ၁၁ ရက်နေ့၊ ညနေ ၅ နာရီခန့်တွင် တနင်္သာရီမြို့နယ်၊ မော်တုန်းကျေးရွာ အခြေစိုက် အမှတ် (၃၀၆) အမြောက်တပ်ရင်းက အနောက်မော်တုန်းကျေးရွာသို့ ဒရုန်းဖြင့် ဗုံးသီးနှစ်လုံး လာရောက် ကြဲချခဲ့ခြင်း ဖြစ်သည်။ အဆိုပါ တိုက်ခိုက်မှုကြောင့် ကျေးရွာအတွင်းရှိ ကွင်းပြင်၌ရှိနေသော နားလေးသည့် အဖွားအိုတစ်ဦး၏ လက် တွင် ဗုံးစထိမှန်ကာ ဒဏ်ရာရရှိခဲ့ခြင်းဖြစ်သည်ဟု ဒေသခံများက ပြောသည်။ ဖြစ်စဉ်နှင့်ပတ်သက်၍ မော်တုန်းရွာသားတစ်ဦးက “ရွေးကောက်ပွဲလုပ်တဲ့ရက်မှာ ဒရုန်းနဲ့ ဗုံးနှစ်လုံး ပြိုင်တူ လာကြဲချတာ၊ ကွင်းပြင်ထဲမှာကျပြီး နားလေးနေတဲ့ အဖွားရဲ့လက်မှာ အစစင်ပြီး ထိသွားတာ” ဟု ပြောသည်။ စစ်ကော်မရှင်တပ်သည် အနောက်မော်တုန်းကျေးရွာသို့ ဗုံးနှစ်လုံးကြဲချပြီးနောက် အနီးနားရှိ ကမ်းတိုကျေးရွာ သို့လည်း ဗုံးတစ်လုံး ထပ်မံကြဲချခဲ့သော်လည်း လူထိခိုက်မှုမရှိခဲ့ကြောင်း ကမ်းတိုရွာသားတစ်ဦးက အတည်ပြု သည်။ တနင်္သာရီမြို့နယ်အတွင်း၌ ကျေးရွာအုပ်စု ၂၁ ခု၊ ကျေးရွာပေါင်း ၂၂၀ ကျော် ရှိသော်လည်း စစ်ကော်မရှင်သည် နယ်မြေမစိုးမိုးနိုင်သဖြင့် မြို့နယ်တစ်ခုလုံးတွင် မဲရုံ ၃ ရုံသာ ဖွင့်လှစ်နိုင်ခဲ့သည်။ စစ်ကော်မရှင်က ဖွင့်လှစ်ခဲ့သည့် မဲရုံများမှာ တနင်္သာရီမြို့ပေါ်ရှိ တပ်ဦးစာသင်ကျောင်း၊ မြို့မအားကစားကွင်းနှင့် ခမရ (၅၅၆) တပ်ရင်းရှိရာ ဇဝဲကျေးရွာတို့တွင်သာ ဖြစ်သည်။ ဒေသခံများ၏ ပြောပြချက်အရ စစ်ကော်မရှင်သည် ၎င်းတို့၏ ရွေးကောက်ပွဲကို အောင်မြင်အောင် ကျင်းပနိုင်ရန် အတွက် လွန်ခဲ့သည့် တစ်ပတ်ခန့်မှစ၍ ပြည်ထောင်စုလမ်းမကြီးတစ်လျှောက်ရှိ နယ်ခြားရွာမှ ရေဖြူကျေးရွာ အထိ လုံခြုံရေးအင်အား တိုးမြှင့်ချထားခဲ့သည်။ ထို့အပြင် မြေမအုံနှင့် ပျို့အိုင်ကျေးရွာများတွင်လည်း လမ်းကင်းများ ချထားကာ လုံခြုံရေးတင်းကျပ်ထားသည့် ကြားမှ ကျေးရွာများအတွင်းသို့ ဒရုန်းဖြင့် ရမ်းသန်းဗုံးကြဲတိုက်ခိုက်မှုများ ပြုလုပ်နေခြင်း ဖြစ်သည်။ လက်ရှိတွင် တနင်္သာရီမြို့နယ် အတွင်းရှိ ဒေသခံပြည်သူများသည် စစ်ကော်မရှင်၏ အတင်းအကျပ် မဲပေးခိုင်းမှု များ အပြင်၊ ယခုကဲ့သို့ လူနေကျေးရွာများကို ဒရုန်းဖြင့် ဗုံးကြဲတိုက်ခိုက်နေမှုများကြောင့် အသက်ဘေးအတွက် စိုးရိမ်ထိတ်လန့်နေကြသည်။

ရွေးကောက်ပွဲနေ့တွင် ရွာအတွင်း ဒရုန်းဗုံးချသည့်အတွက် အသက် ၆၀ အရွယ် အမျိုးသမီးတစ်ဦး ဒဏ်ရာရ

စစ်ကော်မရှင် လက်နက်ကြီးကြောင့် ကလေး တစ်ဦးအပါအဝင် ရွာသား ၃ ဦး ဒဏ်ရာရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၈ ရက်။ တနင်္သာရီမြို့နယ်အတွင်း စစ်ကော်မရှင်တပ်က လက်နက်ကြီးဖြင့် ရမ်းသန်းပစ်ခတ်မှုကြောင့် အသက် ၁၂ နှစ်အရွယ် ကလေး အပါအဝင် ရွာသားသုံးဦး ဒဏ်ရာရခဲ့သည်ဟု ဒေသခံများက ပြောသည်။ တနင်္သာရီတိုင်း၊ မြိတ်ခရိုင်၊ တနင်္သာရီမြို့နယ်အတွင်းရှိ ကျေးရွာများသို့ စစ်ကော်မရှင်တပ်က လက်နက်ကြီးများ ဖြင့် ရည်ရွယ်ချက်ရှိရှိ ရမ်းသန်းပစ်ခတ်ခဲ့သဖြင့် ၁၂ နှစ်အရွယ် ကလေးတစ်ဦးအပါအဝင် ကျေးရွာသားသုံးဦး ထိခိုက်ဒဏ်ရာရရှိခဲ့ခြင်း ဖြစ်သည်။ ဖြစ်စဉ်နှင့်ပတ်သက်၍ မုတ်ဆိတ်ကွင်းရွာသားတစ်ဦးက “ကလေးတစ်ယောက်က ခြေမှာဒဏ်ရာရတယ်၊ လူကြီးတစ်ယောက်မှာက ဒဏ်ရာရများတယ်၊ နောက်ထပ် လူကြီးတစ်ယောက်မှာကတော့ ဒဏ်ရာနည်းတယ်” ဟု ပြောသည်။ ဇန်နဝါရီလ ၆ ရက်နေ့ ညနေပိုင်းတွင် တနင်္သာရီအခြေစိုက် စစ်ကော်မရှင်၏ အမှတ် (၅၆၁) ခြေမြန်တပ်ရင်းကို ပြည်သူ့ကာကွယ်ရေးတပ်ဖွဲ့များက ဝင်ရောက်တိုက်ခိုက်ခဲ့ပြီးနောက်၊ စစ်ကော်မရှင်တပ်က ကျေးရွာများအတွင်း သို့ လက်နက်ကြီးများဖြင့် တန်ပြန်ပစ်ခတ်ခဲ့ခြင်း ဖြစ်သည်။ အဆိုပါ ပစ်ခတ်မှုကြောင့် မုတ်ဆိတ်ကွင်းကျေးရွာအတွင်း လက်နက်ကြီးကျည် ကျရောက်ပေါက်ကွဲခဲ့ပြီး အသက် ၁၂ နှစ်အရွယ် ကလေးငယ်တစ်ဦး၏ ခြေထောက်တွင် ဒဏ်ရာရရှိခဲ့သလို၊ ကျန်အမျိုးသားနှစ်ဦးမှာ လည်း ခြေနှင့်လက်တို့တွင် ထိခိုက်ဒဏ်ရာများ ရရှိခဲ့သည်။ ၎င်းလက်နက်ကြီးကျည်များသည် မုတ်ဆိတ်ကွင်းရွာအပြင် အနီးနားရှိ အခြားကျေးရွာနှစ်ရွာအတွင်းသို့လည်း ကျရောက်ပေါက်ကွဲခဲ့သဖြင့် ဒေသခံများမှာ ဘေးလွတ်ရာသို့ တိမ်းရှောင်နေကြရသည်။ တနင်္သာရီမြို့နယ်အတွင်းရှိ စစ်ကော်မရှင်တပ်များသည် တိုက်ပွဲဖြစ်ပွားသည့် အခါတိုင်း အရပ်သားများနေထိုင် ရာ ကျေးရွာများကို ပစ်မှတ်ထားကာ လက်နက်ကြီးများဖြင့် တုံ့ပြန်လေ့ရှိကြောင်း ဒေသခံများက ဆိုသည်။ ပြီးခဲ့သည့် ၂၀၂၅ ခုနှစ်၊ ဩဂုတ်လအတွင်းကလည်း မုတ်ဆိတ်ကွင်းရွာအပါအဝင် ကျေးရွာလေးရွာကို တိုက်ပွဲ ဖြစ်ပွားခြင်းမရှိဘဲ စစ်ကော်မရှင်က လေကြောင်းမှ ဗုံးကြဲတိုက်ခိုက်ခဲ့သည့် သာဓကများ ရှိခဲ့သည်။ လက်ရှိတွင် တနင်္သာရီမြို့နယ်အတွင်း စစ်ရေးတင်းမာမှုများ ဆက်ရှိနေပြီး စစ်ကော်မရှင်တပ်၏ လက်နက်ကြီး အန္တရာယ်ကြောင့် ဒေသခံရွာသားများမှာ လုပ်ငန်းခွင်သို့ မသွားရဲဘဲ စိုးရိမ်ထိတ်လန့်နေကြရသည်။ နိုင်ငံတကာလူ့အခွင့်အရေး စံနှုန်းများအရ အရပ်သားများကို ပစ်မှတ်ထားတိုက်ခိုက်ခြင်းမှာ စစ်ရာဇဝတ်မှု မြောက်သော်လည်း စစ်ကော်မရှင်တပ်ကမူ ယခုကဲ့သို့ ကျေးရွာများအတွင်းသို့ ရည်ရွယ်ချက်ရှိရှိ ပစ်ခတ်မှုများ ကို ဆက်တိုက်ကျူးလွန်လျက်ရှိသည်ဟု ဒေသတွင်း ကူညီကယ်ဆယ်ရေး လုပ်ဆောင်နေသူများက ပြောသည်။

စစ်ကော်မရှင် လက်နက်ကြီးကြောင့် ကလေး တစ်ဦးအပါအဝင် ရွာသား ၃ ဦး ဒဏ်ရာရ

ထားဝယ် စုပေါင်းရုံးနဲ့ ရဲတပ်ဖွဲ့မှူး ရုံးများ ဒရုန်းဖြင့် တိုက်ခံရ၊ ခရီးသွားအချို့ ဒဏ်ရာရ သတင်းနှင့် မီဒီယာကွန်ရက်။ ၂၀၂၆ ခုနှစ်၊ ဇန္နဝါရီလ ၂ ရက်။ ထားဝယ်မြို့ပေါ်ရှိ စုပေါင်းရုံးနှင့် ရဲတပ်ဖွဲ့မှူးရုံးအပါအဝင် နေရာ ၄ ခု ဒရုန်းဖြင့် တိုက်ခိုက်ခံရပြီး ကျောင်းသူ ၂ ဦးအပါအဝင် ၅ ဦး ဒဏ်ရာရခဲ့သည်ဟု မြို့ခံများက ပြောသည်။ တနင်္သာရီတိုင်းဒေသကြီး၊ ထားဝယ်မြို့ပေါ်ရှိ စစ်ကော်မရှင်၏ အုပ်ချုပ်ရေးယန္တရား ရုံးစိုက်ရာနေရာများနှင့် အဓိကစစ်ဆေးရေးဂိတ်များအား ၂၀၂၅ ခုနှစ်၊ ဒီဇင်ဘာလ ၃၁ ရက် နှစ်ကုန်ရက်တွင် ပြည်သူ့ကာကွယ်ရေး တပ်ဖွဲ့တစ်ဖွဲ့က ဒရုန်းဖြင့် ဗုံးသီးချတိုက်ခိုက်မှုများ ဆက်တိုက်လုပ်ဆောင်ခဲ့သည်။ ယင်းသို့ တိုက်ခိုက်ခံရမှုများအနက် ကမြောကင်းတံတား စစ်ဆေးရေးဂိတ်တွင် ဗုံးသီးကျရောက်ပေါက်ကွဲမှု ကြောင့် ကျောင်းဝတ်စုံ ဝတ်ဆင်ထားသည့် ကျောင်းသူ နှစ်ဦးနှင့် ခရီးသွားအမျိုးသမီး သုံးဦး၊ စုစုပေါင်း ၅ ဦး ထိခိုက်ဒဏ်ရာများ ရရှိခဲ့သည်။ ဒီဇင်ဘာလ ၃၁ ရက် နံနက် ၈ နာရီခန့်တွင် ထားဝယ်မြို့ရှိ စုပေါင်းရုံးအား ဒရုန်းဖြင့် ဗုံးသီးတစ်လုံး စတင်ချကာ တိုက်ခိုက်ခဲ့ခြင်းဖြစ်ပြီး၊ ထို့နောက် နံနက် ၁၁ နာရီမှ ၁၂ နာရီအတွင်း ကမြောကင်းတံတား စစ်ဆေး ရေးဂိတ်သို့ ဗုံးသီးနှစ်လုံး၊ ထားဝယ်ခရိုင် ရဲတပ်ဖွဲ့မှူးရုံးအနီး တစ်လုံးနှင့် ကမ်းနားလမ်းသဲကွင်းသို့ နှစ်လုံး၊ စုစုပေါင်း ဗုံးသီး ၆ လုံးဖြင့် အဆင့်ဆင့် တိုက်ခိုက်ခဲ့ခြင်း ဖြစ်သည်။ ကမြောကင်းတံတားအနီး နေထိုင်သူ အမျိုးသားတစ်ဦးက “အားလုံးပေါင်း ခြောက်လုံးတောင်မှ။ ကမြောကင်း တံတားမှာတော့ ကျောင်းသူနှစ်ယောက် ကျောင်းဝတ်စုံတွေနဲ့။ ကျောင်းသူတစ်ယောက်က ဝမ်းဗိုက်နဲ့ ခြေလက် တွေ ထိထားတယ်။ အမျိုးသမီး သုံးယောက်မှာလည်း ခြေထောက်တွေ ထိထားတယ်။ ကျန်တဲ့နေရာတွေမှာ တော့ ထိခိုက်တာမျိုး မရှိဘူးလို့ သိရတယ်” ဟု ပြောသည်။ ဒဏ်ရာရရှိသူများကို ထားဝယ်ဆေးရုံကြီးသို့ အရေးပေါ်ပို့ဆောင်ကာ ဆေးကုသမှု ပေးနေရကြောင်းနှင့် တံတား စစ်ဆေးရေးဂိတ် တိုက်ခိုက်ခံရပြီးနောက် တံတားဖြတ်သန်းခွင့်ကို ယာယီပိတ်ထားခဲ့ရာမှ မွန်းလွဲ ၁ နာရီခန့်တွင် ပြန်လည်ဖွင့်လှစ်ပေးခဲ့ကြောင်း မြို့ခံများက ပြောသည်။ ကမြောကင်းတံတား စစ်ဆေးရေးဂိတ်သည် စစ်ကော်မရှင်တပ် အတွက် အရေးပါသော လုံခြုံရေးဂိတ်တစ်ခု ဖြစ်ပြီး ပြီးခဲ့သည့် ဒီဇင်ဘာလ ၂၅ ရက် ခရစ္စမတ်နေ့ ညသန်းခေါင်အချိန်ကလည်း ဒရုန်းဖြင့် တိုက်ခိုက်ခံခဲ့ရသေး သည်။ ထိုစဉ်က ဂိတ်ဧရိယာအတွင်းရှိ နေအိမ်တစ်လုံးအနီး ဗုံးသီးကျရောက် ပေါက်ကွဲခဲ့သဖြင့် အိမ်အတွင်း အိပ်ပျော်နေသည့် အမျိုးသမီးတစ်ဦး ခြေသလုံးတွင် ဒဏ်ရာရရှိခဲ့သည့် ဖြစ်စဉ်လည်း ရှိခဲ့သည်။ ယခုနှစ်ကုန်ရက် မြို့ပေါ် တိုက်ခိုက်မှုများအတွင်း ကမ်းနားလမ်းသဲကွင်း၊ စုပေါင်းရုံးနှင့် ခရိုင်ရဲတပ်ဖွဲ့မှူးရုံးတို့တွင် လူထိခိုက်မှု မရှိကြောင်း သိရသော်လည်း မြို့တွင်းလုံခြုံရေးမှာမူ ယခင်ကထက် ပိုမိုတင်းကျပ်လာနေသည်။ ထားဝယ်မြို့ပေါ်ရှိ အဆိုပါနေရာများကို ဒရုန်းဖြင့် ဗုံးသီးချတိုက်ခိုက်မှုကို မည်သည့်တော်လှန်ရေးတပ်ဖွဲ့မှ လုပ်ဆောင်ခဲ့သည်ဆိုသည်ကိုမူ လက်ရှိအချိန်ထိ သတင်းထုတ်ပြန်ခြင်း မရှိသေးပေ။ တနင်္သာရီတိုင်းအတွင်း၌ စစ်ကော်မရှင်တပ်နှင့် ဒေသခံကာကွယ်ရေး တပ်ဖွဲ့များအကြား စစ်ရေးတင်းမာမှုများ မြင့်တက်နေပြီး၊ ယခုကဲ့သို့ မြို့ပေါ်ပစ်မှတ်များကို ဒရုန်းဖြင့် တိုက်ခိုက်လာခြင်းမှာ နှစ်သစ်ကူးကာလတွင် တော်လှန်ရေးအရှိန် မြှင့်တင်လာခြင်းဖြစ်နိုင်ကြောင်း စစ်ရေးလေ့လာသူများက သုံးသပ်နေကြသည်။

ထားဝယ် စုပေါင်းရုံးနဲ့ ရဲတပ်ဖွဲ့မှူး ရုံးများ ဒရုန်းဖြင့် တိုက်ခံရ၊ ခရီးသွားအချို့ ဒဏ်ရာရ

ရေဖြူ အုပ်ချုပ်ရေးရုံးများနှင့် ရွေးကောက်ပွဲရုံးကို တော်လှန်ရေး ပူးပေါင်းတပ်များ မီးရှို့ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၁၈ ရက်။ တနင်္သာရီတိုင်း၊ ရေဖြူမြို့ပေါ်ရှိ အုပ်ချုပ်ရေးယန္တရားများကို တော်လှန်ရေးပူးပေါင်းတပ်များ ဝင်ရောက်စီးနင်း ပြီးနောက် ရွေးကောက်ပွဲ ကော်မရှင်ရုံး အပါအဝင် အဆောက်အအုံ ၆ ခုကို မီးရှို့ဖျက်ဆီးခဲ့ကြသည်။ ရေဖြူမြို့ပေါ်ရှိ စစ်ကော်မရှင်၏ အုပ်ချုပ်ရေးယန္တရားများကို တော်လှန်ရေးပူးပေါင်းတပ်ဖွဲ့များက အလုံးအရင်း ဖြင့် ဝင်ရောက်စီးနင်းတိုက်ခိုက်ခဲ့ရာ ရေဖြူမြို့ကို ခေတ္တထိန်းချုပ်နိုင်ခဲ့သည့်အပြင် ရွေးကောက်ပွဲ ကော်မရှင်ရုံး အပါအဝင် အုပ်ချုပ်ရေးယန္တရားအဆောက်အအုံများကို မီးရှို့ရှင်းလင်းနိုင်ခဲ့ကြောင်း ပြည်သူ့ကာကွယ်ရေး တပ်မတော်၊ ထားဝယ်ခရိုင် အမှတ် (၁) တပ်ရင်းက သတင်းထုတ်ပြန်သည်။ ပြီးခဲ့သည့် ဒီဇင်ဘာလ ၁၂ ရက်နေ့တွင် ဖော်ဆောင်ခဲ့သော ဤစစ်ဆင်ရေးသည် စစ်ကော်မရှင်က ကျင်းပရန် ပြင်ဆင်နေသည့် အတုအယောင်ရွေးကောက်ပွဲကို တုံ့ပြန်ဆန့်ကျင်သည့်အနေဖြင့် လုပ်ဆောင်ခဲ့ခြင်းဖြစ်သည်။ တော်လှန်ရေးပူးပေါင်းတပ်ဖွဲ့များသည် ရေဖြူမြို့ပေါ်ရှိ အထွေထွေအုပ်ချုပ်ရေးဦးစီးဌာနရုံးနှင့် မြို့မရဲစခန်းတို့ကို ဝင်ရောက်စီးနင်းခဲ့ပြီး၊ တစ်ပြိုင်တည်းမှာပင် မြို့အနီးရှိ ခမရ (၄၀၆)၊ (၄၀၇)၊ အမတ (၃၀၄) တပ်ရင်းများနှင့် တံတားစစ်ဆေးရေးဂိတ်တို့ကို ဒရုန်းများ၊ လက်နက်ကြီးများဖြင့် အရှိန်အဟုန်မြှင့် တိုက်ခိုက်ခဲ့ကြသည်။ တိုက်ပွဲအခြေအနေနှင့်ပတ်သက်၍ တော်လှန်ရေးတပ်ဖွဲ့ဝင်တစ်ဦးက “တိုက်ပွဲက တော်တော်လေး ပြင်းထန်ခဲ့ တယ်။ အကြမ်းဖက် စစ်တပ်ဘက်က အယောက် ၂၀ နီးပါးလောက် ထိခိုက်သေဆုံးနိုင်တယ်လို့ ခန့်မှန်းရပါ တယ်။ ကျနော်တို့ဘက်ကတော့ မြို့ပေါ်က အုပ်ချုပ်ရေးယန္တရား အဆောက်အအုံ ၆ ခုထက်မနည်းကို မီးရှို့ ရှင်းလင်းနိုင်ခဲ့ ပြီး အထိအခိုက်မရှိ ပြန်လည်ဆုတ်ခွာနိုင်ခဲ့ပါတယ်” ဟု ပြောသည်။ ဤစစ်ဆင်ရေးကို ထားဝယ်အခြေစိုက် တော်လှန်ရေးမဟာမိတ် ၁၃ ဖွဲ့ဖြစ်သော TPLF၊ ထားဝယ်ခရိုင်အမှတ် (၁) တပ်ရင်း၊ ဒေါနစစ်ကြောင်းများ၊ ရေဖြူပကဖ၊ Ba Htoo Army နှင့် အခြားမဟာမိတ်တပ်ဖွဲ့များ စနစ်တကျ ပူးပေါင်းဖော်ဆောင်ခဲ့ခြင်းဖြစ်သည်။ တိုက်ခိုက်မှုအတွင်း ရွေးကောက်ပွဲကော်မရှင်ရုံး၊ ထွေအုပ်ရုံးနှင့် ရဲစခန်းအတွင်းရှိ အဆောက်အအုံအချို့ မီးလောင် ပျက်စီးခဲ့သည်။ မြို့ပေါ်စီးနင်းတိုက်ခိုက်ခံရပြီးနောက် လက်ရှိတွင် စစ်ကော်မရှင်ဘက်က ရေဖြူမြို့ပေါ်၌ စစ်အင်အား အလုံးအရင်း ထပ်မံဖြည့်တင်းထားသလို၊ အနီးနားရှိကျေးရွာများသို့လည်း စစ်ကြောင်းထိုး ဝင်ရောက်နေခြင်း ကြောင့် စစ်ရေးတင်းမာမှုများ ဆက်လက်မြင့်တက်နေသည်။ ဒေသခံ သတင်းရင်းမြစ်များ၏ အဆိုအရ ရေဖြူမြို့ ပတ်ဝန်းကျင်တွင် တိုက်ပွဲများ ဆက်လက်ဖြစ်ပွားနေပြီး ခရီးသွားပြည်သူများအနေဖြင့် လုံခြုံရေးသတိပြုကြရန်လည်း သတိပေးနှိုးဆော်ထားသည်။

ရေဖြူ အုပ်ချုပ်ရေးရုံးများနှင့် ရွေးကောက်ပွဲရုံးကို တော်လှန်ရေး ပူးပေါင်းတပ်များ မီးရှို့

ပကဖ အမည်ခံ လိမ်လည်သူ ဖမ်းဆီးထားစဉ် ထွက်ပြေးသဖြင့် ပစ်ခတ်ရာမှ သေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၈ ရက်။ နယ်မြေခံ ပြည်သူ့ကာကွယ်ရေးအဖွဲ့ (ပကဖ) အမည်ခံ လိမ်လည် အလှူခံသူတစ်ဦး ကို ဖမ်းဆီးထားစဉ် ထွက်ပြေးသောကြောင့် ပစ်ခတ်ဖမ်းဆီးရာ သေဆုံးသွားသည်ဟု နီးစပ်သူများက ပြောသည်။ တနင်္သာရီတိုင်း၊ မြိတ်ခရိုင်၊ ကျွန်းစုမြို့နယ် နယ်မြေခံ ပြည်သူ့ကာကွယ်ရေးအဖွဲ့ (ပကဖ) အမည်ကို အလွဲသုံး စားပြုကာ ကျပ်သိန်းပေါင်းများစွာ လိမ်လည်အလှူခံပြီး ခြိမ်းခြောက်ငွေတောင်းခံနေသူ အဖွဲ့ဝင်ငါးဦးထဲမှ တစ်ဦးကို ပစ်ခတ်ဖမ်းဆီးရမိခဲ့ကြောင်း ကျွန်းစုမြို့နယ် ပကဖ အဖွဲ့တာဝန်ရှိသူတစ်ဦးက ပြောသည်။ “ကျနော်တို့ ကျွန်းစုမြို့နယ် နယ်မြေခံ ပကဖ အဖွဲ့နာမည်ကို အလွဲသုံးစားလုပ်ပြီး ကျပ်သိန်းပေါင်းများစွာ လိမ်လည် အလှူခံ ခြိမ်းခြောက်ငွေတောင်းနေတဲ့ အဖွဲ့ဝင်ငါးဦးထဲက တစ်ဦးကို ပစ်ခတ်ဖမ်းဆီးရမိခဲ့ပါတယ်။” ၎င်းအား မိုင်းတွေးကျေးရွာနေ ဒေသခံတစ်ဦးထံမှ ကျွန်းစု-ပကဖ တာဝန်ခံနာမည်ကို သုံးပြီး ကျပ် ၂၇ သိန်း အား တောင်းယူခဲ့သည့် သတင်းရရှိ၍ ဖမ်းဆီးခဲ့ခြင်းဖြစ်သည်။ နိုဝင်ဘာလ ၃၀ ရက်နေ့ ညပိုင်းတွင် ဖမ်းဆီးရမိသူသည် ပန်းဇင်ကျေးရွာရှိ ပြည်ခိုင်ဖြိုးပါတီဝင် ပျူစောထီး ခေါင်းဆောင် ဦးတင်စိုးဆိုသူ၏ ညီတစ်ဝမ်းကွဲတော်စပ်သူ ဦးကျော်ဝင်းဆိုသူ ဖြစ်သည်ဟု ကျွန်းစုမြို့နယ် ပကဖ အဖွဲ့တာဝန်ရှိသူတစ်ဦးက ပြောသည်။ ပကဖ တပ်ဖွဲ့ဝင်တစ်ဦး၏ ပြောပြချက်အရ ဒီဇင်ဘာ ၁ ရက်နေ့ မွန်းလွဲပိုင်းတွင် ဦးကျော်ဝင်းသည် ဖမ်းဆီး စစ်ဆေးနေစဉ်အတွင်း လက်ထိပ်ချွတ်၍ ထွက်ပြေးခဲ့ရာ ရှော်တောမော်ကျေးရွာ အနီး၌ လိုက်လံဖမ်းဆီးရာမှ ပြန်လည်ခုခံမှုများ ရှိ၍ အသေပစ်ခတ်ဖမ်းဆီးခဲ့ရသည်ဟု ဆိုသည်။ ဖမ်းဆီးရမိသူ ဦးကျော်ဝင်းအား စစ်ဆေးရာတွင် လွန်ခဲ့သည့် နှစ်နှစ်ခန့်ကတည်းက PDF/ပကဖ အမည်ခံပြီး ၎င်းအပါအဝင် စုစုပေါင်း ငါးဦးဖြင့် စုဖွဲ့ထားကြောင်း ထွက်ဆိုခဲ့သည်ဟု ကျွန်းစု-ပကဖ တာဝန်ရှိသူက ပြောသည်။ “ဖမ်းဆီးစစ်ဆေးတဲ့ အခါမှာ လွန်‌ခဲ့တဲ့၂ နှစ်လောက် ကတည်းက PDF၊ ပကဖ အမည်ခံပြီး စုစုပေါင်း ၅ ဦးနဲ့ စုဖွဲ့ထားတာ၊ ပန်းဇင်ကျေးရွာ အုပ်ချုပ်ရေးမှူး ဝင်းလတ်ထံက ၂၅ သိန်း၊ မိုင်းတွေး ကျေးရွာမှ ၂၇ သိန်း ဖုန်းဆက်တောင်းတယ်၊ တခြားအုပ်ကြီးတွေကိုလည်း ခြိမ်းခြောက်တောင်းတာတွေ ရှိသေးတယ်” ဟု ပကဖ တာဝန်ရှိသူတစ်ဦးက ပြောသည်။ ၎င်းအဖွဲ့သည် ကဘင်ကျေးရွာအုပ်စုရှိ ဘဒ္ဒနဲကျေးရွာအုပ်စု၊ သဲဖြူကျွန်းတွင်လည်း ခြိမ်းခြောက်ငွေတောင်းခံ သဖြင့် ရွာသားများက Wave Pay ဖြင့် ကျပ် ၄၀ သိန်းကျော် ပေးဆောင်ခဲ့ရသေးကြောင်း ပေါ်ပေါက်ခဲ့သည်။ ထို့အပြင် မိုင်းတွေးကျေးရွာ ကျောင်းထိုင်ဆရာတော်ထံမှ ပင်လျှင် ကျပ်သိန်း ၃၀၀ ကို ခြိမ်းခြောက်တောင်းယူခဲ့ သေးကြောင်း စစ်ဆေးတွေ့ရှိခဲ့သည်ဟု ဆိုသည်။ သဲဖြူကျွန်းကျေးရွာမှ ခြိမ်းခြောက်ငွေတောင်းခံမှု အပြီးတွင် ကျွန်းစု-ပကဖ အဖွဲ့မှ သတင်းရရှိခဲ့ပြီး၊ နောက်ထပ် ကျေးရွာများတွင် ထပ်မံခြိမ်းခြောက်ခြင်းမခံရအောင် အချိန်မီ တားဆီးနိုင်ခဲ့ကြောင်း ဆိုသည်။ လိမ်လည်သူများက တနင်္သာရီမြို့နယ်-ပကဖ တာဝန်ခံ ဖိုးတက်တိုး ၏ နာမည်ကိုပင် အလွဲသုံးစားပြုပြီး 'ဖိုးဆေးတံ' ဟု အမည်ပြောင်ဖြင့် လိမ်လည်ခြိမ်းခြောက်ခဲ့သေးကြောင်းလည်း ပကဖ အဖွဲ့မှ စစ်ဆေးတွေ့ရှိခဲ့ သည်။ လက်ရှိတွင် ကျွန်းစုမြို့နယ် ပြည်သူ့ကာကွယ်ရေးအဖွဲ့သည် ဦးကျော်ဝင်းနှင့်အတူ လိမ်လည်မှုများတွင် ပါဝင် ပတ်သက်ခဲ့သည့် ကျန်လေးဦး၏ အမည်နှင့် နေရပ်လိပ်စာများကိုပါ သိရှိထားပြီးဖြစ်ကြောင်း အတည်ပြုပြောဆို သည်။

ပကဖ အမည်ခံ လိမ်လည်သူ ဖမ်းဆီးထားစဉ် ထွက်ပြေးသဖြင့် ပစ်ခတ်ရာမှ သေဆုံး

သောကြာနေ့ည ရုပ်သံသတင်း (၁၀-၁၀-၂၅)

သောကြာနေ့ည ရုပ်သံသတင်း (၁၀-၁၀-၂၅)

ဒီကနေ့ အစီအစဉ်ထဲမှာတော့ … မိုးမိတ်မှာ ဗုံးကြဲတိုက်ခိုက်ခဲ့လို့ ကလေးတွေ အပါအဝင် အရပ်သားတွေ အသက်ဆုံးရှုံးခဲ့ရပါတယ်။ မွန်နဲ့ တနင်္သာရီမှာလည်း အရပ်သားတွေ လေကြောင်းတိုက်ခိုက်မှု ခံရပါတယ်။ ဖားကန့်မှာ စစ်ကော်မရှင်က ဘာကြောင့် ညမထွက်ရ အမိန့်ထုတ်လိုက်တာပါလဲ

ထိုင်းရောက် အလုပ်သမားတွေအတွက် ပန်းရောင်ကတ် ပြုလုပ်ရမယ့် နေရာတွေက ဘယ်နေရာတွေလဲ၊ ဘယ်လိုလုပ်ရမှာလဲ။ ယူကရိန်းတိုက်ပွဲမှာ လောင်စာ အရင်းအမြစ်တွေကို ဘာလို့ အပြန်အလှန် တိုက်ခိုက်နေကြတာလဲ။ ယူကေက အိန္ဒိယ နိုင်ငံကို အပေါ့စား ဒုံးကျည်တွေ ရောင်းပေးလိုက်ပါတယ်။

ကမ္ဘာကျော် မုဒိမ်းမှုတစ်ခုမှာ အယူခံဝင်တဲ့သူကို တရားရုံးက ဘယ်လို အမိန့်ချမှတ်လိုက်သလဲ … စတာတွေတင်ဆက်ထားပါတယ်။

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

စစ်အသွင်ပြောင်း သမ္မတက နိုင်ငံတော် သမ္မတအား လွတ်ငြိမ်းချမ်းသာခွင့်ပေး
အမေရိကန်က ဟော်မုဇ်ရေလက်ကြားတွင် အီရန်ကို ပိတ်ဆို့
BBC က ဝန်ထမ်း ၂၀၀၀ လျှော့မည်
ဥရောပတွင် လေယာဉ်ဆီ ၆ ပတ်စာသာကျန်တော့သည်ဟု IEA ဆို
အငြင်းပွား တောင်တရုတ်ပင်လယ်တွင် တရုတ်လှေမှ ပြင်းထန်သော အဆိပ်ငွေ့များ ဖမ်းဆီးရမိ

Archives

Archives

×Close