ဒီးမော့ဆို – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
နိုင်ငံတကာသတင်း
NMG အကြောင်း
Contact

Home
Tag Archive

Tag: ဒီးမော့ဆို

ရှမ်း-ကရင်နီအစပ်တွင် စစ်အုပ်စု လေကြောင်းမှ ဆက်တိုက်ဗုံးကြဲ၍ ပြည်သူများ စိုးရိမ်ထိတ်လန့်နေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၆ ရက်။ ရှမ်း-ကရင်နီနယ်စပ် မိုးဗြဲ-နန်းမယ်ခုံ-ဒီးမော့ဆို လမ်းကြောင်းတစ်လျှောက် စစ်အုပ်စုတပ်က စစ်ကြောင်းထိုး လာပြီးနောက် အရပ်သားများနေထိုင်ရာ ကျေးရွာများအထိ လေကြောင်းနှင့် ဒရုန်းများအသုံးပြုကာ ဆက်တိုက် ဗုံးကြဲ တိုက်ခိုက်နေသဖြင့် ဒေသခံပြည်သူများနှင့် စစ်ဘေးရှောင်များမှာ လုံခြုံရေးအတွက် စိုးရိမ်နေကြသည်။ ထိုသို့ လေကြောင်းရန် စိုးရိမ်ရသည့် အခြေအနေများကြောင့် ဒီးမော့ဆိုမြို့နယ် အနောက်ဘက်ခြမ်းရှိ စာသင် ကျောင်းများကို အရေးပေါ် ပိတ်ထားလိုက်ရသည်။ စက်တင်ဘာလ ၁၅ ရက်နေ့ နံနက် ၉ နာရီခွဲဝန်းကျင်တွင်လည်း ဒီးမော့ဆိုမြို့နယ် ပဆေးလာကျေးရွာဘက်သို့ တိုက်ပွဲဖြစ်ပွားခြင်းမရှိဘဲ စစ်အုပ်စုတပ်က ဂျက်ဖိုက်တာ (၂) စီးဖြင့် ဗုံး (၈) လုံးခန့် ကြဲချခဲ့သလို၊ ခလရ (၁၀၂) တပ်ရင်းကလည်း လက်နက်ကြီးများဖြင့် (၅) ကြိမ်ထက်မနည်း ပစ်ခတ်တိုက်ခိုက်ခဲ့သည်။ ထိုသို့ ရုတ်တရက် လေကြောင်းမှ ဝင်ရောက်တိုက်ခိုက်မှုကြောင့် စာမေးပွဲဖြေဆိုနေသည့် စစ်ဘေးရှောင် ကလေး ငယ်များနှင့် ဆရာ၊ ဆရာမများမှာ ဗုံးခိုကျင်းများထဲသို့ ဝင်ရောက်ပုန်းအောင်းခဲ့ကြရသည်။ “လေယာဉ်လာတဲ့အချိန်က ကျောင်းချိန်ဆိုတော့ အသံကြားတာနဲ့ ချက်ချင်း ကလေးတွေကို ဗုံးခိုကျင်းထဲ အရင် ပြေးခိုင်းရတယ်။ ပြီးမှ ခဏပြန်စောင့်ကြ။ လေယာဉ်ကလည်း ပျံတာ အရမ်းနိမ့်နိမ့်လေးပေါ့နော် အရမ်းနီး နီးကပ် ကပ်လေး ပျံတော့ အားလုံး အရမ်းကြောက်ကြတာ။ လေယာဉ်သံ ငြိမ်သွားတာနဲ့ ကလေးတွေ ပြန်ခိုင်း ပြီး ကျောင်းပိတ်ထားလိုက်ရတယ်” ဟု ဒီးမော့ဆို အနောက်ခြမ်းမှ ကျောင်းဆရာမတစ်ဦးက ပြောသည်။ လတ်တလောတွင် စစ်အုပ်စုတပ်သည် မိုးဗြဲမှတစ်ဆင့် နန်းမယ်ခုံမြို့ဘက်သို့ စစ်ကြောင်းထိုးလာနေပြီး ရှေ့ဆက် မတိုးနိုင်သည့်အဆုံး တိုက်ပွဲနှင့်မသက်ဆိုင်သည့် အရပ်သားပစ်မှတ်များကို ရည်ရွယ်ချက်ရှိရှိ တိုက်ခိုက်နေ ကြောင်း ဒေသခံများက ဆိုသည်။ ပြီးခဲ့သည့် စက်တင်ဘာလ ၁၄ ရက်နေ့ ညနေပိုင်းကလည်း နန်းမယ်ခုံမြို့နယ်အတွင်းရှိ ကျေးရွာတစ်ရွာကို အသေခံဒရုန်းဖြင့် တိုက်ခိုက်ခဲ့ရာ အရပ်သားထိခိုက်သေဆုံးမှု ရှိခဲ့သည်။ “ဒီရက်ပိုင်း လေကြောင်းရော၊ ဒရုန်းပါ တော်တော်စိပ်လာတယ်။ အမြဲတမ်းသတိထားနေရတယ်။ ကလေးတွေ အတွက်လည်း စိုးရိမ်ရသလို လူကြီးတွေလည်း တောင်ယာတို့လည်း သွားလို့မရဘူး။ ဘာမှ လုပ်ကိုင် စား သောက်လို့ရမဘူး။ နေ့ရော ညရော အမြဲသတိနဲ့ပဲနေနေရတယ်” ဟု စစ်ရှောင်တစ်ဦးက ပြောသည်။ ဒီးမော့ဆို အနောက်ဘက်ခြမ်းတွင် စစ်အုပ်စုတပ်၏ လက်နက်ကြီးနှင့် လေကြောင်းရန်ကြောင့် ကျောင်းများ မည်သည့်အချိန်တွင် ပြန်လည်ဖွင့်လှစ်နိုင်မည်ကို အတိအကျ မသိရသေးဘဲ စစ်ဘေးရှောင် ပြည်သူများအနေဖြင့် ဗုံးခိုကျင်းများ၌သာ သတိထားနေထိုင်ကြရန် ကူညီရေးအဖွဲ့များက တိုက်တွန်းထားသည်။ ယခု စက်တင်ဘာလအတွင်း စစ်အုပ်စုတပ်၏ လေကြောင်း၊ ဒရုန်းနှင့် လက်နက်ကြီး ပစ်ခတ်မှုများကြောင့် ဒီးမော့ဆို၊ လွိုင်ကော်နှင့် မော်ချီးဒေသ တစ်ကြောတွင် ကလေးငယ်များ အပါအဝင် အရပ်သားပြည်သူ အယောက် (၂၀) နီးပါးခန့် ထိခိုက်သေဆုံးခဲ့ရပြီး ဖြစ်ကြောင်း မြေပြင်သတင်းရင်းမြစ်များက ပြောသည်။ ဓါတ်ပုံ - (ဒီးမော့ဆို အနောက်ဘက်ခြမ်းတွင် စစ်အုပ်စု၏ လေကြောင်းရန်ကြောင့် ဘေးလွတ်ရာသို့ ထွက်ပြေးနေကြရသည့် စစ်ဘေးရှောင် ကလေးငယ်များ။ / Crd) #နန်းမယ်ခုံ #ဒီးမော့ဆို #မိုးဗြဲ

ရှမ်း-ကရင်နီအစပ်တွင် စစ်အုပ်စု လေကြောင်းမှ ဆက်တိုက်ဗုံးကြဲ၍ ပြည်သူများ စိုးရိမ်ထိတ်လန့်နေ

ကရင်နီပြည် ဒီးမော့ဆို၌ တိုက်ပွဲမရှိဘဲ စစ်တပ်က ဒရုန်းနှင့် လေကြောင်းမှ ဗုံးကြဲ၍ စစ်ရှောင်တစ်ဦး သေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၁၅ ရက်။ ကရင်နီပြည်၊ ဒီးမော့ဆိုမြို့နယ် အနောက်ခြမ်းတွင် တိုက်ပွဲဖြစ်ပွားခြင်း မရှိဘဲ စစ်တပ်က ဒရုန်းနှင့် လက်နက် ကြီးများဖြင့် ပစ်ခတ်တိုက်ခိုက်ခဲ့သဖြင့် တောင်ယာသို့ သွားရောက်သည့် စစ်ဘေးရှောင် အမျိုးသားတစ်ဦး သေဆုံးသွားကြောင်း ဒေသတွင်း စစ်ဘေးရှောင်အရေး ကူညီဆောင်ရွက်သူများက ပြောသည်။ ဒီးမော့ဆိုမြို့နယ် အနောက်ခြမ်း၊ နန်းမယ်ခုံမြို့အနီးရှိ သာယပ်ကျေးရွာကို စက်တင်ဘာ ၁၄ ရက် မွန်းလွဲ ၂ နာရီ ခန့်တွင် စစ်တပ်က ဒရုန်းဗုံးသီး ၂ လုံးနှင့် ၁၂၀ မမ လက်နက်ကြီးများဖြင့် ပစ်ခတ်ခဲ့ရာ တောင်ယာလုပ်ကိုင်နေသူ အသက် ၅၀ ဝန်းကျင်အရွယ် အမျိုးသားတစ်ဦး၏ ဦးခေါင်းတိုက်ရိုက် ထိမှန်ကာ ပွဲချင်းပြီး သေဆုံးခဲ့ခြင်း ဖြစ် သည်။ နီးစပ်သူ စစ်ဘေးရှောင်တစ်ဦးက“ကားလမ်းမကြီး တည့်တည့်ကျတာ။ ဘယ်လိုထိလဲတော့ မသိဘူး။ အဲဒီချိန် သူက တောင်ယာ သွားလိုက်ပြီ။ ထိပြီဆိုတော့မှ သိတာ။ သွားကြည့်တော့ အသက်မမီတော့ဘူး” ဟု ပြောသည်။ အလားတူ စက်တင်ဘာ ၁၅ ရက်နေ့ (ယနေ့) နံနက် ၉ နာရီခွဲခန့်တွင်လည်း ဒီးမော့ဆိုမြို့နယ် အနောက်ဘက် ခြမ်း ပဆေးလာကျေးရွာဘက်ကို နမ့်စန်နှင့် နေပြည်တော် လေတပ်စခန်းတို့မှ ပျံတက်လာသည့် ဂျက်ဖိုက်တာ ၂ စီးဖြင့် ဗုံးကြဲတိုက်ခိုက်ခဲ့သည့်အပြင် လက်နက်ကြီးများဖြင့်ပါ ထပ်မံပစ်ခတ်ခဲ့သည်။ ဒီးမော့ဆို အနောက်ဘက်ခြမ်းမှ ဒေသခံတစ်ဦးက “နေ့တိုင်းနီးပါး ပစ်တယ်။ ဒီးမော့ဆို အနောက်ခြမ်းရော၊ မိုးဗြဲ လွယ်ရင်းမင်္ဂလာဘက်ရော ပစ်တယ်။ တိုက်လေယာဉ်ထက်စာရင် ဒရုန်းက ရုတ်တရက် လာ လာပြီးချ တော့ အရမ်းသတိထားရတယ်” ဟု ပြောသည်။ လက်ရှိတွင် စစ်တပ်သည် မိုးဗြဲ - နန်းမယ်ခုံ - ဒီးမော့ဆို လမ်းမကြီးကို ပြန်လည်ထိန်းချုပ်နိုင်ရေး အပြင်းအထန် စစ်ကြောင်းထိုးနေသော်လည်း တော်လှန်ရေးတပ်ဖွဲ့များ၏ ခုခံမှုကြောင့် မြေပြင်စစ်ဆင်ရေးများတွင် အရေးနိမ့် နေသဖြင့် စစ်ဘေးရှောင်များ စုဝေးနေထိုင်ရာ ဒေသများကို ပစ်မှတ်ထား တိုက်ခိုက်နေခြင်းဖြစ်ကြောင်း စစ်ရေးသတင်းရင်းမြစ်များက သုံးသပ်ကြသည်။ ပြီးခဲ့သည့် ဩဂုတ်လအတွင်းကလည်း ဒီးမော့ဆို အနောက်ခြမ်းကို စစ်တပ်က ဗုံးကြဲတိုက်ခိုက်ခဲ့သဖြင့် စာသင် ကျောင်း အပါအဝင် လူနေအိမ် ၁၀ လုံးကျော် ပျက်စီးခဲ့ပြီး စစ်ဘေးရှောင်တစ်ဦး သေဆုံးကာ ၃ ဦး ဒဏ်ရာရရှိခဲ့ သည်။ စက်တင်ဘာလဆန်းပိုင်းအတွင်း စစ်တပ်၏ လေကြောင်းနှင့် လက်နက်ကြီး တိုက်ခိုက်မှုများကြောင့် ဒီးမော့ဆို၊ လွိုင်ကော်နှင့် မော်ချီးဒေသတို့တွင် ကလေးငယ်များ အပါအဝင် အရပ်သား ၂၀ ကျော် ထိခိုက်သေဆုံးထားသည်။ ထို့ကြောင့် စစ်ဘေးရှောင် ကလေးငယ်များ၏ စာသင်ကျောင်းများကို ခေတ္တပိတ်ထားရန်နှင့် ဒေသခံပြည်သူများ အနေဖြင့် ဗုံးခိုကျင်းများအတွင်း ဂရုစိုက်နေထိုင်ကြရန် စစ်ရှောင်အရေး ကူညီဆောင်ရွက်သူများက တိုက်တွန်း ထားသည်။ #ဒီးမော့ဆို

ကရင်နီပြည် ဒီးမော့ဆို၌ တိုက်ပွဲမရှိဘဲ စစ်တပ်က ဒရုန်းနှင့် လေကြောင်းမှ ဗုံးကြဲ၍ စစ်ရှောင်တစ်ဦး သေဆုံး

ကရင်နီပြည် ဒီးမော့ဆိုတွင် တိုက်ပွဲများ ပြင်းထန်နေ

ပစ္စည်းယူ လူသတ်သူ အား ကရင်နီ ရဲတပ်ဖွဲ့ ဖမ်းဆီး အမှုဖွင့် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၁၉ ရက်။ အမျိုးသမီးတစ်ဦးအား ဓါးနှင့် ထိုးသတ်ပြီး လက်ကိုင်ဖုန်း လုယူခဲ့သူ တစ်ဦးကို ကရင်နီပြည် ရဲတပ်ဖွဲ့ (KSP)က ဖမ်းဆီးကာ အမှုဖွင့် စစ်ဆေးနေပြီဟု တာဝန်ရှိသူများက ပြောသည်။ ကျူးလွန်သူမှာ အသက် ၂၅ နှစ်ဝန်းကျင် အရွယ်ရှိ အမျိုးသား တစ်ဦးဖြစ်ပြီး ကရင်နီပြည်၊ ဒီးမော့ဆိုမြို့နယ်၊ ငွေတောင်ကျေး ရွာတွင် နေထိုင်သူ ဖြစ်သည်ဟု ဆိုသည်။ KSP ဒုရဲချုပ် ကိုဘိုဘိုက “အခု လူသတ်မှုနဲ့ပက်သက်ပြီး ကရင်နီပြည်ရဲ အမှတ် (၁) ရဲစခန်း (ပ) ၁/၂၀၂၆ ရာဇ သတ်ကြီး ဥပဒေပုဒ်မ - ၃၀၂ နဲ့ အမှုဖွင့် အရေးယူဆောင်ရွက်နေပါတယ်ဗျ။ ဘာကြောင့်သတ်တယ် ဆိုတာက တော့ စုံစမ်းနေဆဲပါဗျ။ ခုမှ မေးမြန်းစစ်ဆေးနေတုန်းပါဗျ” ဟု ပြောသည်။ KSP အနေဖြင့် လူသတ်မှု ဖြစ်ပွားပြီးနောက် နယ်မြေခံ တပ်ရင်းများသို့ သတင်းပို့ထားသည်ဖြစ်ရာ ၎င်းအား ဒီးမော့ဆိုမြို့နယ်၊ ပဆေးလာကျေးရွာ၌ ဇန်နဝါရီလ ၁၄ ရက်နေ့ညတွင် လက်ရဖမ်းဆီးနိုင်ခဲ့သည်ဟု ဆိုသည်။ ၎င်းမှာ လူသတ်မှုကျူးလွန်ပြီးနောက် လုယက်ခဲ့သည့်ဖုန်းအား ဒီးမော့ဆိုမြို့နယ်၊ ပဆေးလာကျေးရွာ၌ လာရောက် ရောင်းချခဲ့ခြင်း ဖြစ်သည်။ KSP အနေဖြင့် မိမိတို့ ထိန်းချုပ်နယ်မြေများတွင် ယခု ကျူးလွန်သည့် အမှုသာမက ပြီးခဲ့သည့်နှစ်အတွင်း လူသတ်မှု အားလုံးကို ဖမ်းဆီးအရေးယူနိုင်ခဲ့သည် ဖြစ်ရာ ပြည်သူများ အနေဖြင့် စိုးရိမ်ထိတ်လန့်စရာ မလိုဘူး ဟု ဒုရဲချုပ် ကိုဘိုဘိုက ဆက်ပြောသည်။ ”ဒီလူသတ်မှု ဆိုရင်ပေါ့နော်၊ ၂၀၂၅ ခုနှစ် တစ်နှစ်မှာဆိုရင် ကျနော်တို့ ကရင်နီပြည် ရဲဌာန ရဲစခန်းအမှတ် ၁ ကနေ အမှတ် ၁၇ ထိ ရဲစခန်းတွေကနေ အမှုဖွင့် အရေးယူတဲ့ ဒီလူသတ်မှု အားလုံးပေါင်း ၇ မှု ရှိပါတယ်ပေါ့ နော်။ အဲဒီ ၇ မှုစလုံးကို ကျနော်တို့ လူသတ်တရားခံကို ဖမ်းဆီးအရေးယူ ထောင်ချနိုင်ခဲ့ပါတယ်။” ဇန်နဝါရီလ ၁၂ ရက်နေ့တွင် ဒီးမော့ဆိုမြို့နယ်ရှိ ကျေးရွာတစ်ရွာမှ နွားကျောင်းရန် ထွက်လာသည့် အသက် ၄၅ နှစ်အရွယ် ဒေါ်ပိုင်ဆိုသူမှာ ရွာနှင့် တစ်မိုင်ခန့်ဝေးသည့် လမ်းခုလတ်နေရာတွင် ဓါးဖြင့် ထိုးသတ်ခံလိုက်ရခြင်း ဖြစ်သည်။ ဒေါ်ပိုင်အား ဝမ်းဗိုက်နှင့် လည်ပင်းနေရာတို့တွင် ဓါးဖြင့် ထိုးသတ်၍ ဖုန်းလုယက် ထွက်ပြေး ခဲ့သူအား KSP နယ်မြေခံတပ်ရင်းများ၏ အဆင့်ဆင့် ပူးပေါင်းဆောင်ရွက်မှုများဖြင့် လက်ရဖမ်းဆီးနိုင်ခဲ့ခြင်း ဖြစ်သည်ဟု ဆိုသည်။ ကရင်နီပြည် ကြားကာလ အုပ်ချုပ်ရေးကောင်စီ (IEC) လက်အောက်ခံ KSP အနေဖြင့် လူသတ်မှု၊ ခိုးမှု၊ လုယက် မှုများအား ဖမ်းဆီးအရေးယူဆောင်ရွက်လျက် ရှိသော်လည်း လက်နက်ကိုင် အဖွဲ့အစည်းများ ပါဝင်ပတ်သက်နေ သည့် မူးယစ်ဆေးဝါးနှင့် KTV ကိစ္စများကိူမူ အရေးယူနိုင်ရန် ခက်ခဲနေဆဲ ဖြစ်သည်ဟု စစ်ဘေးရှောင်များ အကြားတွင် ဝေဖန်ပြောဆိုနေကြသည်။

ပစ္စည်းယူ လူသတ်သူ အား ကရင်နီ ရဲတပ်ဖွဲ့ ဖမ်းဆီး အမှုဖွင့်

တိုက်ပွဲများဆက်ဖြစ်နေသဖြင့် ဒီးမော့ဆို ပြည်သူများ ထပ်မံ စစ်ရှောင်ရမည်ကို စိုးရိမ် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၁ ရက်။ ကရင်နီပြည်၊ ဒီးမော့ဆိုမြို့နယ်အတွင်း စစ်ကော်မရှင်တပ်၏ ထိုးစစ်များကြောင့် နှစ်ဖက်ကြား ထိတွေ့ တိုက်ပွဲ များ ဆက်ဖြစ်နေသည့်အတွက် ဒေသခံများနှင့် စစ်ဘေးရှောင် ပြည်သူများမှာ ထပ်မံ တိမ်းရှောင်ရမည်ကို စိုးရိမ် နေကြသည်။ ကရင်နီပြည်တွင် ရွေးကောက်ပွဲ ဖြစ်မြောက်ရေးအတွက် နယ်မြေများ ပြန်လည်ထိန်းချုပ်နိုင်ရန် ဩဂုတ်လမှ စ၍ စစ်ကော်မရှင်တပ်က ဒီးမော့ဆို - ဖရူဆို လမ်းမကြီးတစ်လျှောက် ထိုးစစ်ဆင်လာသည်။ ထို့ကြောင့် ဒီးမော့ဆိုမြို့နယ် အတွင်း တော်လှန်ရေးတပ်ဖွဲ့များနှင့် စစ်ကော်မရှင်တပ်တို့ အကြား နှစ်ဖက် ထိတွေ့ တိုက်ပွဲများ ယနေ့ချိန်ထိ ဆက်လက် ဖြစ်ပွားနေပြီး ပိုမို ပြင်းထန်လာနေသည်။ ထို့သို့နှစ်ဖက်ထိတွေ့တိုက်ပွဲများ ပြင်းထန်လာသည့်အတွက် စစ်ကော်မရှင်က စစ်ရေးပစ်မှတ် အရပ်သားပစ်မှတ် မခွဲခြားဘဲ လက်နက်ကြီး၊ ဒရုန်းနှင့် လေကြောင်းတိုက်ခိုက်မှုများ ပိုမိုပြုလုပ်လာမည်ကို စိုးရိမ်နေကြသည်ဟု ဒီးမော့ဆို အနောက်ခြမ်းရှိ စစ်ဘေးရှောင်မှ အမျိုးသမီးတစ်ဦးက ယခုကဲ့သို့ ပြောသည်။ “လေယာဉ်ဆိုလည်း နေ့တိုင်းဝဲနေ။ ဒရုန်းသံဆိုလည်း တစ်ခါလေ ကြားတယ်။ လက်နက်ကြီးသံလည်း နေ့တိုင်း လိုလိုကြားတယ်။ စိုးရိမ်စရာတွေတော့ အများကြီးပေါ့နော်။ သူတို့က လျှောက်ကြဲမယ်လို့လည်း ကြားတယ်။ စစ်ရှောင်တို့ ကျောင်းတို့ လိုက်ကြဲမယ်လို့လည်း ကြားတယ်။ အဲ့ဒါကြောင့်မို့လို့ လေယာဉ်လာတယ် ဆိုရင် စိုးရိမ်ရတယ်။ အဓိက ကလေးတွေပေါ့နော်။ ပညာရေး အဓိက ဦးစားပေးချင်တယ်။ ပြီးလို့ရှိရင် ကောင်း ကောင်းနဲ့ ပြီးဆုံးစေချင်တယ်။ အခုက ကျောင်းဖွင့်လိုက် ပိတ်လိုက်ဆိုတော့ သူတို့လည်း ဒီတစ်သက်တော့ ကျောင်းပြီးနိုင်မှာ မဟုတ်ဘူးထင်တယ်။ လေယာဉ်က နေ့တိုင်းဝဲ ကျောင်းက တစ်ချိန်လုံးပိတ် ဆိုတော့ အဆင် မပြေဘူးလေ။” လက်ရှိတွင် လေကြောင်းရန်နှင့် ဒရုန်းသုံး ဗုံးကြဲတိုက်ခိုက်မှုရန်တို့မှ ကာကွယ်နိုင်ရေး ကျောင်းများကို ပိတ်ထား ရသည်ဟု စစ်ရှောင်များက ပြောသည်။ စစ်ရေး အခြေအနေ ပြင်းထန်လာမူကြောင့် ပြည်သူများအနေဖြင့် လုံခြုံရေးအရ တစ်နေရာမှ တစ်နေရာသို့ ပြောင်းရွှေ့သွားလာရေး၊ အလုပ်လုပ်ကိုင်ရန် ခက်ခဲခြင်းတို့နှင့် ရင်ဆိုင်နေကြရသည်ဟု ကရင်နီပြည် ကြားကာလ အုပ်ချုပ်ရေး ကောင်စီ အတွင်းရေးမှူး ၂ ဦးဗညားက ပြောသည်။ “စစ်ရေးက ပိုတင်းမာလာတယ်။ နောက်စစ်ရေးကလည်း ပိုကျယ်ပြန့်လာတယ်ပေါ့နော်။ အဲ့ကြောင့်မို့ လူထု တွေက ပိုပြီးတော့မှ စိုးရိမ်ပူပန်စိတ် ရှိတယ်ပေါ့။ အထူးသဖြင့် ကျန်းမာရေးဆိုင်ရာ အရ သွားလာရတာ အခက် အခဲ ပိုရှိသွားတယ်။ တချို့နေရာဆိုရင် ဥပမာ ဒီးမော့ဆို အရှေ့နဲ့ ဒီးမော့ဆို အနောက် ကူးဆက်သွားဖို့ အရမ်း ခက်ခဲ သွားတယ်ပေါ့နော်။ အဲ့ဒီအတွက်ကြောင့်မို့လို့ ပုံမှန် ကူသန်းရောင်းဝယ်ရေး လုပ်လို့ မရတော့သလို လူနာ တွေကို ပို့တာတွေ လူနာနဲ့ ပတ်သက်ပြီးတော့ ကျန်းမာရေး ဆိုင်ရာ ကုသမှုတွေ နောက်ပြီးတော့မှ သာရေး နာရေး ကိစ္စတွေမှာ သွားလာဆက်ဆံလို့ မရတဲ့ ပုံစံ ဖြစ်သွားတာပေါ့။” စစ်ရေး အခြေအနေအရ ဖရူဆို - ထားလဲ - နန်းဖဲ လမ်းမကြီး အပါအဝင် လမ်းသွယ်များ အားလုံးကို စက်တင် ဘာလ ၂၃ ရက်နေ့မှ စတင်၍ ရက်အကန့်အသတ် မရှိ ပိတ်ထားသည့်အပြင် လွိုင်ကော် - ဒီးမော့ဆို - ဖရူဆို -ဘောလခဲ လမ်းမကြီးကိုလည်း အသုံးပြုသွားလာခြင်း မလုပ်ရန် ကရင်နီ တော်လှန်ရေး အဖွဲ့များက ထုတ်ပြန် ထားသည်။ ဒေသတွင်း ဖြစ်ပွားနေသည့် တိုက်ပွဲများနှင့် စစ်တပ်၏ လေကြောင်း၊ ဒရုန်း၊ လက်နက်ကြီး တိုက်ခိုက်မှု အန္တရာယ်များကြောင့် အကြောက်တရား လွမ်းမိုးပြီး စိုးရိမ်စိတ်နှင့် အသက်ရှင်နေရသည်ဟု စစ်ရှောင်များက ပြောသည်။ စစ်ရှောင်အမျိုးသမီးက “အခုဆို တိုက်ပွဲလည်း ရက်တိုင်းလိုလို ဖြစ်တယ်။ မနက်ဆိုလည်း ဒုန်းဒုန်းဒိုင်းဒိုင်းနဲ့။ လေယာဉ်ဆိုလည်း အမြဲ နားစွင့်ပြီးနေရတယ်။ လက်နက်ကြီးသံလည်း နေ့တိုင်းလိုလို ကြားတယ်။ စိုးရိမ်စရာ တွေတော့ အမျာကြီးပေါ့နော်။ ဟို့တစ်နေ့ကဆိုလည်း လက်နက်ကြီးတွေ ထုလာတယ်။ အစ်မတို့ဆို မအိပ်ဘဲနဲ့ အောက်ပြေးဆင်း ပြီးတော့ ဗုံးခိုကျင်းဘေးမှာ သွားနေ၊ လက်နက်ကြီးလာတော့ တကယ့်ကိုယ့်နားမှာ ကျမယ့် ပုံနဲ့ မီးနီနီနဲ့လာ အဲ့လိုမျိုးဆို ကြောက်ရတယ်။ အခုဆို စစ်သားလည်း တော်တော်လေး နီးလာပြီးကော။ ပြေးစရာနေရာလည်း ကုန်ပြီ မရှိတော့ဘူးလေး” ဟု ပြောသည်။ တိုက်ပွဲ အခြေအနေများကြောင့် လွိုင်နန်းဖမြို့နယ်၊ ဒီးဘောင်းခူမြို့နယ်နှင့် နန်းမယ်ခုံမြို့နယ်အတွင်း အသွားအလာများကို ကန့်သတ်ထားသည်။  စစ်ရေးအရ သွားလာလှုပ်ရှားသည့် တပ်ဖွဲ့များနှင့် အရေးပေါ် ကျန်းမာရေး (နာရေး) လိုအပ်ချက်အရ သွားလာ ရမည့်သူများမှအပ မည်သူမှ လုံခြုံရေးအရ ည ၉ နာရီ မှ နံနက် ၄ နာရီအတွင်း သွားလာလှုပ်ရှားခြင်း မလုပ်ကြ ရန် သက်ဆိုင်ရာ မြို့နယ် ပူးပေါင်း အုပ်ချုပ်ရေး ကော်မတီက စက်တင်ဘာလ ၂၆ ရက်နေ့တွင် ထုတ်ပြန်ထား သည်။ ကရင်နီပြည်ရှိ ပြည်သူလူထုအနေဖြင့် သက်ဆိုင်ရာဒေသတွင်းက တပ်ရင်းတပ်ဖွဲ့များ၏ ထုတ်ပြန်ချက်များကို လိုက်နာကြရန်နှင့် စစ်ရေးသတိ ရှိကြရန်လိုသည်ဟု သတိပေးထားသည်။

တိုက်ပွဲများဆက်ဖြစ်နေသဖြင့် ဒီးမော့ဆို ပြည်သူများ ထပ်မံ စစ်ရှောင်ရမည်ကို စိုးရိမ်

လွိုင်ကော် - ဒီးမော့ဆို - ဖရူဆို - ဘောလခဲ လမ်းကြီးကို ကရင်နီတပ်ပေါင်းစုက သွားလာခွင့် ပိတ် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၂၃ ရက်။ ကရင်နီပြည်ထဲက လွိုင်ကော် - ဒီးမော့ဆို - ဖရူဆို - ဘောလခဲ လမ်းမကြီးကို ကရင်နီ အမျိုးသားများ ကာကွယ် ရေးတပ် - KNDF က သွားလာခွင့် ပိတ်လိုက်သည်။ မြေပြင်က စစ်ရေး အခြေအနေများကြောင့် အဆိုပါ လမ်းမကြီးကို ဖြတ်သန်း သွားလာခွင့် ပိတ်လိုက်ရခြင်း ဖြစ်သည်ဟု KNDF က ထုတ်ပြန်သည်။ “လွိုင်ကော် - ဒီးမော့ဆို - ဖရူဆို - ဘောလခဲ လမ်းမကြီးအား မြေပြင်စစ်ရေး အခြေအနေအရ စက်တင်ဘာလ (၂၃) ရက်နေ့မှစ၍ အသုံးပြု၍ ဖြတ်သန်းသွားလာခြင်း မပြုလုပ်ကြရန် အများပြည်သူများအား အသိပေး အပ်ပါသည်” ဟု ထုတ်ပြန်ထားသည်။ စက်တင်ဘာလ ၂၃ ရက်နေ့မှ စတင်၍ အဆိုပါ လမ်းမကြီးအား ဖြတ်သန်းသွားလာခြင်းမျိုး မလုပ်ကြရန် အများပြည်သူကို အသိပေးအပ်သည်ဟု ထုတ်ပြန်သည်။ ထို့အပြင် သြဂုတ်လက စတင်၍ ဒီးမော့ဆို - ဖရူဆိုကြား လမ်းမကြီးတလျှောက် ထိုးစစ်ဆင်လာသော စစ်ကော်မရှင်တပ်နှင့် ကရင်နီ တော်လှန်ရေး ပူးပေါင်းအဖွဲ့တို့ကြား မြေပြင်၌ ယနေ့ချိန်ထိ တိုက်ပွဲများ ဆက်ဖြစ်နေသည်။ ပြီးခဲ့သည့်ပတ်ကလည်း ဖရူဆိုမြို့ကို စစ်ကော်မရှင်၏ စစ်ယာဉ်တန်း ရောက်လာခဲ့ပြီး ရိက္ခာ၊ ခဲယမ်း၊ လူအင်အားများ ဖြည့်တင်းထားသည်ဟု မြေပြင် သတင်းအရင်းအမြစ်က ဆိုသည်။ အလားတူ စက်တင်ဘာလ ၂၀ ရက်နေ့ကစတင်ပြီး ဘောလခဲ လမ်းမကြီးဖက်ကိုလည်း စစ်ကော်မရှင်တပ်က ဦးတည် စစ်ရေးလှုပ်ရှားမှုများ ရှိလာနေသည်ဟု KNDF က ဆိုသည်။ ထို့ကြောင့် ဘောလခဲလမ်းမကြီး ဘက်၌လည်း နှစ်ဖက်ကြား တိုက်ပွဲများ ဖြစ်နေသည့်အတွက် ပြည်သူများ အနေဖြင့် စစ်ရေး သတိရှိကြရန် KNDF က အသိပေး ထုတ်ပြန်ထားသည်။

လွိုင်ကော် – ဒီးမော့ဆို – ဖရူဆို – ဘောလခဲ လမ်းမကြီးကို ကရင်နီတပ်ပေါင်းစုက သွားလာခွင့် ပိတ်

ဒီးမော့ဆိုကို စစ်ကော်မရှင်တပ်များ အပြည့်အဝ မထိန်းချုပ်နိုင်သေးဟု ကရင်နီ တော်လှန်ရေး တပ်များ ပြော သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၁ ရက်။ ကရင်နီပြည်၊ ဒီးမော့ဆိုမြို့ကို အပြည့်အဝ ပြန်လည်ထိန်းချုပ်နိုင်ပြီ ဖြစ်ကြောင်း စစ်ကော်မရှင်တပ်က ထုတ်ပြန် မှုမှာ ဝါဒဖြန့်ခြင်းသာ ဖြစ်သည်ဟု ကရင်နီတော်လှန်ရေးတပ်ဖွဲ့များက ပြောသည်။ ဒီးမော့ဆိုမြို့ကို ထိန်းချုပ်နိုင်ရေး စစ်ကော်မရှင်တပ်က ကြိုးပမ်းနေဆဲဖြစ်ပြီး မြေပြင်တွင် တိုက်ပွဲများ ပြင်းပြင်း ထန်ထန် ဖြစ်ပွားနေသည်ဟု ဒေသခံ ကာကွယ်ရေး တပ်ဖွဲ့များက ပြောသည်။ ဒီးမော့ဆိုမြို့နယ် ကာကွယ်ရေးတပ်မှ တပ်ဖွဲ့ဝင်တစ်ဦး “တစ်မြို့လုံးကို ထိန်းချုပ်နိုင်တာ မဟုတ်သေးဘူး။ အဓိက မြို့မနေရာကိုပဲ ရထားတာပါ။ ဒီအရှေ့ဘက်ကို တော်တော်ရထားတယ်။ အနောက်ဘက်မှာတော့ ဒေါငံ ခါးကနေ မားနာပလော့ထိ ရထားတယ်” ဟု ပြောသည်။ ‘ရန်နိုင်မင်း’ စစ်ဆင်ရေးအဖြစ် သြဂုတ်လ ၄ ရက်နေ့မှ ၁၉ ရက်နေ့အထိ ထိုးစစ်ဆင်ပြီး နောက် မြို့တစ်ခုလုံးကို ထိန်းချုပ်နိုင်ခဲ့ခြင်း ဖြစ်သည်ဟု စစ်ကော်မရှင်တပ်က ကြေညာခဲ့သည်။ သို့သော် မြေပြင်ရှိ တော်လှန်ရေး တပ်ဖွဲ့များ၏ ပြောပြချက်အရ မြို့မဧရိယာနှင့် အချို့သော နေရာများကိုသာ ထိန်းချုပ်ထားနိုင်သေးသည်ဟု ဆိုသည်။ ဒီးမော့ဆိုမြို့ အဝင်ဆိုင်းဘုတ်၊ ငွေတောင်ဆည်၊ မြို့နယ်ခန်းမ၊ ဆေးရုံနှင့် အထက်တန်းကျောင်း ရှေ့၌ ရိုက်ထား သော ဓါတ်ပုံများနှင့် အတူ စစ်ကော်မရှင်တပ်က မြို့ကို ထိန်းချုပ်လိုက်ပြီဟု ထုတ်ပြန်လာသည်။ အဆိုပါ ထုတ်ပြန်မှုမှာ ဝါဒဖြန့်ခြင်း သက်သက်သာဖြစ်ကြောင်း၊ သတင်းအမှားသာ ဖြစ်ကြောင်း မြေပြင် ရှိ သတင်းအရင်းအမြစ်များက ပြောသည်။ စစ်ကော်မရှင်တပ်သည် ဒေသအခြေစိုက် ခလရ ၁၀၂ နှင့် ခမရ ၄၂၇ တို့ကို အခြေစိုက်ကာ အင်အား ၃၀၀ ကျော် ဖြင့် ဒီးမော့ဆို အနောက်ဘက်ခြမ်းရှိ ဒေါငံခါးကျေးရွာဘက်သို့ စစ်ကြောင်း နှစ်ကြောင်းဖြင့် ဆက်လက် စစ်ကြောင်းထိုးနေသည်ဟု မြေပြင် သတင်းအရင်းအမြစ်က ပြောသည်။ ထို့အပြင် လေကြောင်း၊ လက်နက်ကြီး၊ တင့်ကားအပြင် အထူးသဖြင့် ဒရုန်းများကို အဓိက အသုံးပြုကာ မြို့ကို ပြန်လည်ရရှိရေး အပြင်းအထန် ကြိုးစားနေသည်ဟု ဒေသတွင်းရှိ ကာကွယ်ရေးတပ်ဖွဲ့များက ဆိုသည်။ စစ်ကော်မရှင်၏ ထုတ်ပြန်ချက်အရ သြဂုတ်လ ၄ ရက်နေ့တွင် ဒီးမော့ဆိုမြို့ မြောက်ဘက်ခြမ်းရှိ ရွှေယောက် ရပ်ကွက်နှင့် အရှေ့တောင်ဘက်ရှိ ပါဒေါဒူကျေးရွာတို့မှ စတင်ထိုးစစ်ဆင်ခဲ့သည်ဟု ဆိုသည်။ ထို့နောက် အောင်မင်္ဂလာ၊ စည်ပင်သာယာရပ်ကွက်များအပါအဝင် မြို့ပေါ်ရှိ ရဲစခန်း၊ ထွေအုပ်ရုံးစသည့် အစိုးရ ရုံးများကို ဆက်တိုက်သိမ်းပိုက်ကာ သြဂုတ်လ ၁၉ ရက်နေ့တွင် မြို့တစ်ခုလုံးကို အလုံးစုံသိမ်းပိုက်နိုင်ပြီဟု ထုတ် ပြန်ခဲ့ခြင်း ဖြစ်သည်။ စစ်ကော်မရှင်တပ်သည် အင်အားအလုံးအရင်းဖြင့် ရှမ်း - ကရင်နီ နယ်စပ်ရှိ မိုးဗြဲမြို့ကို ဇူလိုင်လ ၁၆ ရက်နေ့တွင် ပြန်လည် ထိန်းချုပ်နိုင်ခဲ့ပြီးနောက် ဒီးမော့ဆိုမြို့ကိုလည်း ပြန်လည် ထိန်းချုပ်နိုင်ရေး ကြိုးစားနေခြင်း ဖြစ်သည်။ ကယန်းအမျိုးသား တပ်မတော် (KNA) နိုင်ငံရေး ဦးဆောင်ကော်မတီမှ ခွန်းရဲခေါင်က “လက်နက်ကိုင် တော်လှန် ရေးမှာလည်း ကျနော်တို့ အားကောင်းတဲ့ အချိန်မှာ ရန်သူစိုးမိုးတဲ့ နယ်မြေတွေကို စိုးမိုးသိမ်းပိုက်ထားတာ ရှိ သလို၊ ကျနော်တို့ဘက်က အားနည်းလာတဲ့ အခါမှာ လည်း ရန်သူရဲ့ အလုံးအရင်းနဲ့ ဝိုင်းဝန်း ပိတ်ဆို့ပြီးတော့မှ တိုက်ခိုက်တာ ခံရပါတယ်၊ ဒါဟာ တော်လှန်စစ်ရဲ့ သဘော သဘာဝပဲ ဖြစ်ပါတယ်။ ဒီအတွက်ကြောင့် ရန်သူရဲ့ တိုးချဲ့လာတဲ့အပေါ်မှာ ကျနော်တို့ စစ်ရေးအရ ဘယ်လို တုံ့ပြန်ကြမလဲဆိုတာကို စဉ်းစား တိုင်ပင်ပြီးတော့မှ ရန်သူကို ချေမှုန်းနိုင်တဲ့ နည်းနာတွေကို စုစည်းပြီး ဒါကို ကျနော်တို့ တုံ့ပြန်သွားကြရမှာ ဖြစ်ပါတယ်” ဟု ပြောသည်။ ဖယ်ခုံ၊ မိုးဗြဲ၊ ဒီးမော့ဆိုမြို့တို့ကို ကရင်နီ တော်လှန်ရေး တပ်များက တစ်လေးလုံး စစ်ဆင်ရေးကာလ အတွင်း ထိန်းချုပ်ထားခဲ့ပြီးနောက် ဒေသခံများ နေရပ်သို့ ပြန်လည်နေထိုင်ခဲ့ကြသည်။ သို့သော် လက်ရှိ စစ်တပ်၏ ထိုးစစ်များကြောင့် မိုးဗြဲ၊ ဖယ်ခုံနှင့် ဒီးမော့ဆိုမြို့နယ်တို့ထဲမှ ဒေသခံ တစ်သောင်းခွဲ ကျော်မှာ ထပ်မံ ထွက်ပြေး တိမ်းရှောင်နေကြရသည်ဟု ကရင်နီပြည် ကြားကာလ အုပ်ချုပ်ရေး ကောင်စီ IEC နှင့် အကူtညီပေးနေသော အဖွဲ့အစည်းများက ပြောသည်။ ဒီးမော့ဆိုမြို့ ထိုးစစ်အတွင်း စစ်တပ်က အရပ်သားများကို လူသားဒိုင်းကာ အဖြစ် အသုံးပြုခဲ့ကြောင်း ကရင်နီ အမျိုးသားများ ကာကွယ်ရေးတပ် (KNDF) က သြဂုတ်လ ၁၈ ရက်နေ့တွင် ထုတ်ပြန်ခဲ့ပြီး လွိုင်ကော် - ဒီးမော့ဆို - ဖရူဆို ပြည်ထောင်စုလမ်းမကြီးနှင့် လမ်းသွယ်များကို အသုံးမပြုရန် ပြည်သူများကို သတိပေးထားသည်။ ယခုနှစ်ကုန်တွင် ကျင်းပမည်ဟု ထုတ်ပြန်ထားသော ရွေးကောက်ပွဲအတွက် စစ်ကော်မရှင်တပ်မှ နယ်မြေ စိုးမိုးမှု ပြန်လည်ရယူနေခြင်း ဖြစ်သည်။

ဒီးမော့ဆိုကို စစ်ကော်မရှင်တပ်များ အပြည့်အဝ မထိန်းချုပ်နိုင်သေးဟု ကရင်နီ တော်လှန်ရေး တပ်များ ပြော

ဒီးမော့ဆိုနှင့် မော်ချီး ဒေသများကို စစ်ကော်မရှင် ဗုံးကြဲ၊ အရပ်သား ထိခိုက်မှုများရှိ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၁ ရက်။ ကရင်နီပြည်၊ ဒီးမော့ဆိုမြို့နယ်အတွင်းနှင့် ဖားဆောင်းမြို့နယ်တွင်းမှ မော်ချီးဒေသတို့ကို စစ်ကော်မရှင်တပ်က လေကြောင်းမှ ဗုံးကြဲတိုက်ခိုက်ခဲ့ရာ အရပ်သား ပြည်သူများ ထိမှန်သေဆုံး၊ ဒဏ်ရာ ရရှိခဲ့သည်။ စစ်ကော်မရှင်တပ်က မော်ချီးဒေသထဲကို ဩဂုတ်လ ၂၀ ရက်နေ့၊ နံနက် ၆ နာရီ ဝန်းကျင် အချိန်ခန့်တွင် လေကြောင်းမှ ထပ်မံ ဗုံးကြဲသောကြောင့် အရပ်သား ၁ ဦး သေဆုံးပြီး ၂ ဦး ထိမှန်ဒဏ်ရာရခဲ့သည်ဟု ကရင်နီပြည် ကြားကာလ အုပ်ချုပ်ရေး ကောင်စီ (IEC) ကပြောသည်။ IEC အတွင်းရေးမှူး -၂ ဦးဗညားက “ဒီမနက် ၆နာရီ မော်ချီး လိုခါးလိုမှာ ဗုံးကြဲတာပေါ့နော်။ Y12 ဗုံးကြဲ လေယာဉ်နဲ့ပေါ့နော် လာကြဲသွားပါတယ်။ အဲ့မှာတော့ တစ်ယောက် သေဆုံးပြီ နှစ်ယောက် ဒဏ်ရာရတယ်။ နေအိမ်တစ်လုံး ထိခိုက်ပျက်စီးတာ တွေ့ရပါတယ်” ဟု ပြောသည်။ မော်ချီးဒေသထဲက လိုခါးလိုကျေးရွာကို Y12 လေယာဉ်ဖြင့် ထပ်မံ ဗုံးကြဲတိုက်ခိုက်ခဲ့ခြင်းဖြစ်သည်ဟု ဦးဗညားက ပြောသည်။ စစ်ကော်မရှင်တပ်သည် တိုက်ပွဲဖြစ်ပွားခြင်း မရှိဘဲ မော်ချီးဒေသကို ဆက်တိုက် လေကြောင်း အသုံးပြု ဗုံးကြဲ တိုက်ခိုက်နေသည်ဟု ဒေသခံများက ပြောသည်။ အလားတူ ဩဂုတ်လ ၂၀ ရက်နေ့ တစ်နေ့တည်း၌ပင် ဒီးမော့ဆိုမြို့နယ် အနောက်ခြမ်းက နေရာတစ်နေရာလည်း လေကြောင်းမှ ဗုံးကြဲတိုက်ခိုက်ခံခဲ့ရသေးသည်။ ဦးဗညားက “ဒီးမော့ဆို အနောက်ခြမ်းကိုတော့ ၁၁ နာရီ ဝန်းကျင်လောက်မှာတော့ ဗုံးလာကြဲသွားပါတယ်“ ဟု ပြောသည်။ ဒီးမော့ဆိုမြို့နယ်ထဲတွင် မြေပြင်၌လည်း စစ်ကော်မရှင်တပ်နှင့် ကရင်နီ တော်လှန်ရေး အင်အားစုများအကြား တိုက်ပွဲများ ပြင်းပြင်းထန်ထန် ဖြစ်ပွားလျှက်ရှိသည်။ တိုက်ပွဲများ ဖြစ်နေသောကြောင့် ဒီးမော့ဆိုမြို့နယ်ထဲက လွိုင်ကော် - ဒီးမော့ဆို - ဖရူဆို ပြည်ထောင်စု လမ်းမကြီးကို ပြည်သူများ မသွားလာကြရန် ကရင်နီအမျိုးသားများ ကာကွယ်ရေးတပ် KNDF က သတိပေးထား သည်။ စစ်ကော်မရှင်တပ်သည် ကရင်နီပြည်နယ်ထဲ မြေပြင်ထိုးစစ်များ ထိုးနေသည့် အပြင် အရပ်သားများကို ပစ်မှတ်ထားပြီး လေကြောင်းမှ ဗုံးကြဲတိုက်ခိုက်မှုများ ဆက်တိုက်ဗုံးကြဲ တိုက်ခိုက်နေသောကြောင့် အရပ်သားပြည်သူများ အစုလိုက်အပြုံလိုက် သေဆုံးမှုများ ရှိနေသည်။ မော်ချီးဒေသထဲက လိုခါးလိုကျေးရွာကို ဩဂုတ်လ ၁၉ ရက်နေ့က စစ်တပ်က Y12 လေယာဉ်ဖြင့် ဗုံးကြဲ တိုက်ခိုက်မှုကြောင့် ဒေသခံပြည်သူ ၃ ဦး ထိမှန် ဒဏ်ရာရရှိခဲ့သည်။ အလားတူ ဩဂုတ်လ ၁၇ ရက်နေ့ကလည်း မော်ချီးဒေသကို စစ်တပ်က လေ‌ကြောင်းမှ ဗုံးကြဲတိုက်ခိုက်မှု ကြောင့် က လေးငယ် ၅ ဦး အပါအဝင် အရပ်သား ၃၂ ဦး သေဆုံးခဲ့ကာ ၅ ဦး ထိခိုက်ဒဏ်ရာရရှိခဲ့ပြီး တိုက် ခိုက်ခံခဲ့ရသော နေရာများမှ ပြည်သူအချို့လည်း ပျောက်ဆုံးနေလျှက်ရှိသည်။ စစ်ကော်မရှင်တပ်က အရပ်သားပြည်သူများကို ပစ်မှတ်ထားပြီး ဗုံးကြဲတိုက်ခိုက်ခဲ့မှုကြောင့် ဩဂုတ်လ ၁၇ ရက်နေ့မှ ၂၀ ရက်နေ့အထိ မော်ချီးဒေသရှိ အရပ်သားပြည်သူ ၃၃ ဦး သေဆုံးပြီး ထိမှန်ဒဏ်ရာရရှိသူ ၁၀ ဦး အထိ ရှိနေပြီ ဖြစ်သည်။ ကရင်နီပြည်ကြားကာလ အုပ်ချုပ်ရေး ကောင်စီ (IEC) က ကုလသမဂ္ဂနှင့် အာဆီယံ အပါအဝင် နိုင်ငံတကာ အစိုးရများ အနေဖြင့် စစ်ကော်မရှင်တပ်၏ ကြီးလေးသော စစ်ရာဇဝတ်မှု ကျူးလွန်နေမှုအပေါ် ထိရောက်စွာ အရေးယူပေးရန် တိုက်တွန်း တောင်းဆိုထားသည်။

ဒီးမော့ဆိုနှင့် မော်ချီး ဒေသများကို စစ်ကော်မရှင် ဗုံးကြဲ၊ အရပ်သား ထိခိုက်မှုများရှိ

ဗုဒ္ဓဟူးနေ့ည ရုပ်သံသတင်း (၇-၁၀-၂၆)

ဗုဒ္ဓဟူးနေ့ညပိုင်း ရုပ်သံသတင်း(၇-၁၀-၂၆)

ဒီကနေ့ အစီအစဉ်ထဲမှာတော့-

– ကျိုက်ထိုမြို့နယ်မှာ တိုက်ပွဲမဖြစ်ပဲ စစ်အုပ်စုက အရပ်သားရွာတွေကို ဗုံးကြဲလို့ ထောင်နဲ့ချီထွက်ပြေးနေရ

– ရခိုင်-ဧရာဝတီ အစပ်မှာ တိုက်ပွဲ ပြင်းထန်ပြီး စစ်အုပ်စုက အစုအပြုံလိုက် ကျဆုံးနေ

– ကချင်ပြည်က ရွှေကူ-ငအိုး လမ်းပိုင်း သုံးသူတွေကို အရေးယူသွားမယ်လို့ KIAသတိပေး

– အလုပ်သမားတွေ ဆီက အခွန်နဲ့ လွှဲငွေ ရရှိဖို့ ပိုမို တင်းကြပ်သွားမယ်လို့ စစ်အုပ်စုပြော

– စစ်အုပ်စု ခေါင်းဆောင် ၇-၈ ရက်နေ့တွေမှာ မလေးရှားကို သွားမည်

– လာအို ဒုတိယမြို့တော်လေဆိပ် ကိုယ်ပိုင်လေယာဉ်ပေါ်တင်တဲ့ မူးယစ်ဆေးဝါး ကီလို ၅၀၀ ကျော်ဖမ်းမိ

– မက်ဒေါ်နယ်(McDonald’s)ကုမ္ပဏီဟာ AI သုံးစွဲပြီး လွတ်လပ်စွာ ယှဉ်ပြိုင်ခွင့်ကို ချိုးဖောက်တယ်ဆိုပြီး တရားစွဲခံရ

– ပထမဆုံး FIFA အာဆီယံ ဖလားကို အင်ဒိုနီးရှား အသင်း ပင်နယ်တီ အဆုံးအဖြတ်နဲ့ ဆွတ်ခူး…..စတာတွေ တင်ဆက်ထားပါတယ်။

×Close

News

တောမီးငြှိမ်းသတ်ရေးအတွက် နိုင်ငံတကာအကူအညီ လက်ခံရန် အင်ဒိုနီးရှား သမ္မတ သဘောတူ — October 16, 2026 6:36 pm
ပါကစ္စတန်တွင် ကျောင်းခေါင်မိုးပြိုကျ၍ အနည်းဆုံး ကလေးငယ် နှင့် ဆရာ/မ ၃၄ ဦး သေဆုံး — October 16, 2026 6:26 pm
တရုတ်နှင့် မြောက်ကိုရီးယား နယ်စပ်ဖြတ်ကျော်မြစ်ကူးတံတားသစ် ဖွင့်လှစ် — October 16, 2026 6:17 pm

Recent Posts

တောမီးငြှိမ်းသတ်ရေးအတွက် နိုင်ငံတကာအကူအညီ လက်ခံရန် အင်ဒိုနီးရှား သမ္မတ သဘောတူ
ပါကစ္စတန်တွင် ကျောင်းခေါင်မိုးပြိုကျ၍ အနည်းဆုံး ကလေးငယ် နှင့် ဆရာ/မ ၃၄ ဦး သေဆုံး
တရုတ်နှင့် မြောက်ကိုရီးယား နယ်စပ်ဖြတ်ကျော်မြစ်ကူးတံတားသစ် ဖွင့်လှစ်
အမေရိကန်နှင့် မြန်မာစစ်အုပ်စုတို့ ဒုတိယအကြိမ်အဖြစ် ဂျပန်တွင် တိုက်ရိုက် တွေ့ဆုံ
စစ်ကိုင်း အထက်ပိုင်း ဝန်းသိုတွင် တိုက်ပွဲပြင်းထန်ပြီး ရဲဘော် ၃ ဦးကျဆုံး၊ ဒေသခံ သောင်းနှင့်ချီ တိမ်းရှောင်ရ

Archives

Archives

×Close