ပဲခူးတိုင်း – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Tag Archive

Tag: ပဲခူးတိုင်း

အပတ်စဉ် တိုင်းရင်းသားဘာသာ သတင်းအစီအစဉ် (၁၁-၅-၂၆) ဗုံးသီးတွေထုတ်တဲ့ ပဲခူးတိုင်း ပန်းတောင်းမြို့နယ်ထဲက ကပစ ၁၆ နားမှာ စစ်တပ်နဲ့ AA ပူးပေါင်းတပ်တွေအကြား တိုက်ပွဲပြင်းထန်နေပါတယ်။ တော်လှန်ရေးတပ်ဖွဲ့တွေ ထိန်းချုပ်ထားတဲ့ ချင်းနဲ့ရခိုင်ပြည်ထဲက ဒေသတွေကို စစ်တပ်က လေကြောင်းကနေ ဆက်တိုက်ဗုံးကြဲတိုက်ခိုက်နေပါတယ်။ အိမ်ပြန်တဲ့ ရွှေ့ပြောင်းလုပ်သားတွေ သံရုံးထောက်ခံစာပါမှသာ ပြန်လာနိုင်မယ်ဆိုတဲ့အတွက် အခက်အခဲတွေ ကြုံနေကြရပါတယ်။

ပဲခူးတိုင်း ပန်းတောင်းမြို့နယ်ထဲက ကပစ ၁၆ အနီးမှာ ဘာတွေဖြစ်နေသလဲ

ပဲခူးတိုင်း ညောင်လေးပင်ခရိုင်အတွင်း စစ်ရှောင် ၄၀၀၀ ကျော် အကူအညီများ လိုအပ် သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ မတ်လ ၁၈ ရက်။   ပဲခူးတိုင်း၊ ညောင်လေးပင်ခရိုင်၊ ကျောက်ကြီးမြို့နယ်အတွင်း စစ်ကော်မရှင်၏ လူသားဒိုင်းကာပြုလုပ်မှုနှင့် အစုလိုက်အပြုံလိုက် သတ်ဖြတ်ခံရမှုများကြောင့် ထွက်ပြေးတိမ်းရှောင်နေရသည့် ပြည်သူ ၄,၀၀၀ ကျော် အတွက် အရေးပေါ် အကူအညီများ လိုအပ်နေသည်။ ကျောက်ကြီးတွင် စစ်ကော်မရှင်တပ်များ၏ ရက်စက်ကြမ်းကြုတ်သော စစ်ကြောင်းထိုးမှု၊ လေကြောင်း တိုက် ခိုက်မှုနှင့် လူသားဒိုင်းကာပြုလုပ်မှုများကြောင့် ကျေးရွာ ၅ ရွာမှ ဒေသခံပြည်သူ ၄,၀၀၀ ကျော်သည် ဘေးလွတ် ရာသို့ ထွက်ပြေးတိမ်းရှောင်နေရပြီး စားနပ်ရိက္ခာနှင့် ဆေးဝါးအကူအညီများ အရေးပေါ်လိုအပ်နေခြင်း ဖြစ်သည်။ ကရင်အရေးပေါ် ကူညီကယ်ဆယ်ရေးကော်မတီ (KRC) ၏ ပြောရေးဆိုခွင့်ရှိသူတစ်ဦးက “အခုလက်ရှိ စစ်ဘေး ရှောင်နေတဲ့သူတွေက အဓိက လိုအပ်တာကတော့ အခြေခံစားနပ်ရိက္ခာပေါ့နော်။ ပြီးတော့မှ ကျန်းမာရေး အတွက် လိုအပ်တဲ့ဆေးဝါးတွေ။ သက်ကြီးရွယ်အို၊ ကလေးသူငယ်တွေနဲ့ ကျန်းမာရေးမကောင်းတဲ့သူတွေလည်း ရှိနေတယ်။ အချို့ထဲမှာတောင် ကိုယ်ဝန်ဆောင်မိခင်တွေပါနေတယ်။ ပြောရရင်တော့ အစစအရာရာ လိုအပ်နေ တာပါပဲ” ဟု ပြောသည်။ ပြီးခဲ့သည့် မတ်လ ၅ ရက်နေ့မှ စတင်ကာ စစ်ကော်မရှင်တပ်များသည် ရေတွင်းကုန်းကျေးရွာအုပ်စု အတွင်းသို့ လေယာဉ်၊ ဒရုန်းနှင့် လက်နက်ကြီးများအသုံးပြု၍ အကြမ်းဖက်ဝင်ရောက်လာခဲ့ခြင်းဖြစ်သည်။ ထိုသို့ဝင်ရောက်လာပြီးနောက် အပြစ်မဲ့ပြည်သူ အယောက် ၃၀ ထက်မနည်းကို ရက်စက်စွာ သတ်ဖြတ်ခဲ့သည့် အပြင် ပြည်သူပိုင်ပစ္စည်းများကို လုယက်ကာ နေအိမ်များကို မီးရှို့ဖျက်ဆီးခြင်း၊ ပြည်သူများကို လူသားဒိုင်း အဖြစ် အသုံးပြုခြင်းစသည့် လူ့အခွင့်အရေးချိုးဖောက်မှုများကို ကျူးလွန်ခဲ့သည်။ လူပေါင်း ၃၀၀ ခန့်ကို လူသားဒိုင်းအဖြစ် ဖမ်းဆီးထားသည့်အတွက် ကရင့်အမျိုးသား အစည်းအရုံးနှင့် ပူးပေါင်း တပ်ဖွဲ့များက ကယ်ထုတ်ခဲ့ရသေးသည်။ စစ်ဘေးရှောင် ၄,၀၉၇ ဦးခန့်ရှိသည့် ရေတွင်းကုန်း၊ ကျောင်းကုန်း၊ ဝါချဲ၊ အင်းပရစ်နှင့် ဒလဆိပ်ကျေးရွာများမှ ပြည်သူများသည် လက်ရှိတွင် တောတောင်များထဲ၌ လည်းကောင်း၊ နီးစပ်ရာကျေးရွာရှိ အသိမိတ်ဆွေများ၏ နေအိမ်များတွင်လည်းကောင်း ခိုလှုံနေရကာ အစားအသောက်၊ ဆေးဝါး နှင့် အမိုးအကာ လိုအပ်နေကြသည်။ ကရင်လူ့အခွင့်အရေးအဖွဲ့ (KHRG) မှ ပြောရေးဆိုခွင့်ရှိသူ စောအဲလ်ဘတ်ကလည်း “အခုလက်ရှိ ဒုက္ခရောက် နေတဲ့ ပြည်သူလူထုကို နိုင်တဲ့ဘက်ကနေပြီးတော့မှ ပံ့ပိုးကူညီပေးဖို့၊ အထူးသဖြင့် ကျန်းမာရေး ဝန်ဆောင်မှု တွေ၊ လက်နက်ကြီးနဲ့ လေကြောင်းတိုက်ခိုက်မှုကြောင့် ဒဏ်ရာရနေတဲ့ ပြည်သူတွေအတွက် လိုအပ်တဲ့ ဆေးဝါး နဲ့ ကုသမှုတွေကို အချိန်မီပံ့ပိုးပေးဖို့ ကျနော်တို့ တောင်းဆိုချင်ပါတယ်” ဟု ပြောသည်။ စစ်ကော်မရှင်၏ အဆိုပါလုပ်ရပ်များကြောင့် ပြည်သူ ၁၆ ဦး အပြင်းအထန် ဒဏ်ရာရရှိခဲ့ပြီး ဒေသခံများ၏ စည်းစိမ်ဥစ္စာများမှာလည်း ဆုံးရှုံးခဲ့ရသည်။ ထိုသို့သော စစ်ရာဇဝတ်မှုများကို နိုင်ငံတကာက သိရှိနေသော်လည်း ထိရောက်သော အရေးယူဆောင်ရွက်မှု မရှိခြင်းအပေါ် ဝေဖန်မှုများလည်း ထွက်ပေါ်နေသည်။ ကရင်ငြိမ်းချမ်းရေး အထောက်အကူပြုကွန်ရက် (KPSN) မှ နော်ချယ်ရီက “သူတို့ စစ်ရာဇဝတ်မှုတွေကို အမြဲ တမ်းကျူးလွန်နေတာ ဒါက နိုင်ငံတကာလည်း သိအောင် လုပ်နေတာပဲ။ နေ့စဉ်ရက်ဆက်ပေါ့နော်။ သိသိကြီးနဲ့ ဘာမှမလုပ်ဆောင်၊ အရေးလည်းမယူဘူးဆိုတော့ ဒါက ဝေဖန်စရာတွေ အများကြီးပဲ။ ခံရတာ ကျမတို့ ပြည်သူ လူထုတွေပဲလေ” ဟု ပြောသည်။ လူ့အခွင့်အရေး လှုပ်ရှားသူများကမူ ကုလသမဂ္ဂအပါအဝင် နိုင်ငံတကာ အသိုင်းအဝန်းအနေဖြင့် စိုးရိမ်ပူပန် ကြောင်း ကြေညာချက်များ ထုတ်ပြန်နေရုံနှင့် မလုံလောက်ဘဲ စစ်ကော်မရှင်၏ လေယာဉ်ဆီ၊ လက်နက်နှင့် ဘဏ္ဍာငွေ လမ်းကြောင်းများကို အမြန်ဆုံး ဖြတ်တောက်ပေးရန် တောင်းဆိုထားကြသည်။ ထို့ပြင် စစ်ကော်မရှင်တပ်၏ လူ့အခွင့်အရေး ချိုးဖောက်မှုများကို ခံစားနေရသည် မြန်မာပြည်သူများအတွက် တရားမျှတမှု ပြန်လည်ရရှိအောင် ကူညီလုပ်ဆောင်ပေးရန်နှင့် ကျူးလွန်သူများကို တာဝန်ယူ၊ တာဝန်ခံမှုရှိလာ အောင် လုပ်ဆောင်ပေးရန် တိုက်တွန်း တောင်းဆိုနေ ကြသည်။ #ပဲခူးတိုင်း #ညောင်လေးပင်ခရိုင် #ကျောက်ကြီးမြို့နယ် #လယ်ဒိုမြို့နယ် #လူ့အခွင့်အရေးချိုးဖောက်မှု #စစ်ကော်မရှင်တပ်

ပဲခူးတိုင်း ညောင်လေးပင်ခရိုင်အတွင်း စစ်ရှောင် ၄၀၀၀ ကျော် အကူအညီများ လိုအပ်

ကရင် ဒေသအတွင်း အရပ်သားများအပေါ် ဗုံးကြဲချသဖြင့် လူ ၄၀ ကျော် သေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၁၀ ရက်။ ပဲခူးတိုင်း၊ ညောင်လေးပင်ခရိုင် အတွင်း စစ်ကော်မရှင်က ရွာသားများကို ဖမ်းဆီးပြီး လူသားဒိုင်းပြုလုပ်ကာ လေကြောင်းမှ ဗုံးကြဲတိုက်ခိုက်မှုကြောင့် အရပ်သား ၄၀ ကျော် သေဆုံးခဲ့သည်။ ညောင်လေးပင်ခရိုင် (ခလယ်လွီထူ)၊ ကျောက်ကြီး (လယ်ဒို) မြို့နယ် အတွင်းသို့ စစ်ကြောင်းထိုးဝင်ရောက်လာ သော စစ်ကော်မရှင်တပ်က အရပ်သားပြည်သူ ၁၆၀ ခန့်ကို အစုလိုက် အပြုံလိုက် ဖမ်းဆီးကာ လူသားဒိုင်းအဖြစ် အသုံးပြုခဲ့သည်ဟု ကရင်အမျိုးသားအစည်းအရုံး (KNU)က မတ်လ ၉ ရက်နေ့တွင် ထုတ်ပြန်သည်။ ထို့ပြင် လေကြောင်းမှ ဗုံးကြဲတိုက်ခိုက်မှုများကြောင့် ကလေးငယ်များ အပါအဝင် အပြစ်မဲ့ပြည်သူ ၄၀ ကျော် သေဆုံးခဲ့ရသည့် ဖြစ်စဉ်တစ်ခု ဖြစ်ပွားခဲ့သည်။ ပြီးခဲ့သည့် မတ်လ ၅ ရက်နေ့မှစတင်ကာ စစ်ကော်မရှင်၏ ခမရ-၂၀၊ ခလရ-၂၆၄ နှင့် ခမရ-၄၃၉ ပူးပေါင်း စစ်ကြောင်းသည် ရေတွင်းကုန်းကျေးရွာအုပ်စုအတွင်းသို့ ဝင်ရောက်စီးနင်းခဲ့ပြီး ရွာသားများ အကြောင်းမဲ့ ဖမ်းဆီးခဲ့ခြင်း ဖြစ်သည်။ ထို့နောက် မတ်လ ၇ ရက်နေ့တွင် နယ်မြေခံ ကရင်အမျိုးသားလွတ်မြောက်ရေး တပ်မတော် (KNLA) နှင့် တိုက်ပွဲ များ ဖြစ်ပွားခဲ့ရာ စစ်ကော်မရှင်တပ်က ဂျက်ဖိုက်တာနှင့် ဒရုန်းများကိုအသုံးပြုကာ ၎င်းတို့ကိုယ်တိုင် ရွာသားများ ကို ဖမ်းဆီးချုပ်နှောင်ထားသည့် နေရာများသို့ပါ ဗုံးကြဲတိုက်ခိုက်ခဲ့ခြင်း ဖြစ်သည်။ ကျောက်ကြီးမြို့နယ် ကရင်အရေးပေါ် ကူညီကယ်ဆယ်ရေးကော်မတီ ပြောရေးဆိုခွင့်ရှိသူက “အဲနားတစ်ဝိုက်မှာ အဲဒီကျေးရွာတွေကို တပ်က ဝင်စီးပြီးတော့ ရွာသားတွေကို ဖမ်းတယ်။ ဖမ်းပြီးတော့မှ လေယာဉ်ဗုံးကြဲတယ်။ အဲဒီမှာ ရွာသားပြည်သူတွေ တော်တော်သေတယ်။ ဒီကျောက်ကြီးမြို့နယ်ထဲက စစ်တောင်းမြစ်အနောက်ဖက် အဲဒီရေတွင်းကျေးရွာ ကျောင်းကုန်းကျေးရွာ အဲဒီနားတစ်ဝိုက် စသဖြင့် အဲဒီနားတကြောကရွာတွေ စစ်ကောင်စီ ဖက်က ရွာသားတွေကို ထိုးစစ်ဆင်ပြီးတော့ ပစ်ခတ်တိုက်ခိုက်မှု ဖြစ်တယ်။ ဖြစ်တဲ့အခါကတော့ သူတို့ အဲဒီရွာ ကို ဝင်စီးလို့ ရတဲ့အခါ ရွာသားတွေကို သူတို့ ဖမ်းဆီးထားတယ်။ ပြီးတော့မှ သူတို့ သတ်တဲ့လူသတ်တယ်ပေါ့ နော်။ အဲဒီထဲမှာတော့ အရပ်သားပစ်ခတ်မှုတွေမှာ ပြည်သူ ခန့်မှန်း ၄၀ ကျော်သေတယ်နော်” ဟု ပြောသည်။ KNU ၏ ထုတ်ပြန်ချက်အရ လေကြောင်းတိုက်ခိုက်မှုကြောင့် ဖမ်းဆီးခံထားရသူများအနက် ၂၅ ဦးခန့် သေဆုံး ခဲ့ရပြီး အခြား ၅ ဦးမှာမူ စစ်ကော်မရှင်တပ်၏ သတ်ဖြတ်ခြင်းကို ခံခဲ့ရသည်ဟု ဆိုသည်။ ကျန်ရှိနေသည့် သေဆုံးစာရင်းများကိုမူ ဆက်လက်စိစစ်နေဆဲ ဖြစ်သည်။ မတ်လ ၇ ရက်နေ့၊ ညပိုင်းတွင် KNLA ဘက်မှ သွားရောက်တိုက်ခိုက်ခဲ့သဖြင့် ဖမ်းဆီးခံထားရသူများအနက်မှ ၂၀ ကျော်၊ ၃၀ ခန့်မှာ ထွက်ပြေး လွတ် မြောက်လာနိုင်ခဲ့သည်။ ကူညီကယ်ဆယ်ရေးကော်မတီ တာဝန်ရှိသူက “ရွာသားတစ်ဝက်လုံးနီးပါးပဲပေါ့နော်။ အဲဒီထဲမှာတော့ တစ်ရွာ လုံးကို ဖမ်းထားတာ။ ဟိုးမနက်ပိုင်းမှာ ဖမ်းထားပြီးတော့ ညနေပိုင်းမှာတော့ တစ်ချို့ ကလေးတွေကိုတော့ ပြန် လွတ်ပေးတယ်။ သူတို့ ခေါ်ချင်ထားတဲ့ ခေါ်ထားတဲ့လူတွေလည်း ရှိနေသေးတယ်ပေါ့နော်။ လူဦးရေ ၃၀၀ ဝန်း ကျင် ခန့်မှန်းခြေ တချို့က ထွက်ပြေးလွတ်မြောက်တယ်။ တချို့ကတော့ ပြန်လွတ်ပေးတယ်။ ကလေးမအေ တွေ နည်းနည်း အသုံးမတည့်တဲ့သူတွေပေါ့ ပြန်လွတ်ပေးတယ်။ သေရတဲ့ အဓိက အကြောင်းအရင်းကတော့ ဘာပဲ ဖြစ်ဖြစ်လေ ပြည်သူတွေကို သတ်တာပဲ” ဟု ဆက်ပြောသည်။ စစ်ကော်မရှင်သည် ၎င်းတို့၏ အာဏာတည်မြဲရေးအတွက် အရပ်သားပြည်သူများကို ပစ်မှတ်ထားသည့် လုပ်ရပ် များကို မြန်မာနိုင်ငံအနှံ့ ကျူးလွန်လျက်ရှိပြီး၊ အထူးသဖြင့် အတုအယောင်ရွေးကောက်ပွဲ ကျင်းပပြီးနောက်ပိုင်း ကာလများတွင် လူ့အခွင့်အရေး ချိုးဖောက်မှုများမှာ ပိုမိုဆိုးရွားပြင်းထန်လာကြောင်း KNU က ထောက်ပြထား သည်။ လက်ရှိတွင် ရေတွင်းကုန်းနှင့် ကျောင်းကုန်းကျေးရွာတစ်ဝိုက်၌ ပစ်ခတ်မှုများ ဆက်လက်ဖြစ်ပွားနေဆဲဖြစ်ကာ ဒေသခံပြည်သူ အများအပြားမှာ ဘေးလွတ်ရာသို့ ထွက်ပြေးတိမ်းရှောင်နေရသည့်အပြင် အချို့မှာလည်း ပိတ်မိနေဆဲဖြစ်သည်။ #ကျောက်ကြီးမြို့နယ် #ခလယ်လွီထူ #စစ်ရာဇဝတ်မှု #လူသားဒိုင်းကာ #စစ်ကော်မရှင် #ညောင်လေးပင်တိုက်ပွဲ #KNU #KNLA

ကရင် ဒေသအတွင်း အရပ်သားများအပေါ် ဗုံးကြဲချသဖြင့် လူ ၄၀ ကျော် သေဆုံး

ပြည်အကျဉ်းထောင်တွင် နိုင်ကျဉ်းများအား ခြိမ်းခြောက် ချိုးဖောက်မှုများပြုလုပ်နေ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၁၈ ရက်။ ပဲခူးတိုင်းအနောက်ခြမ်း၊ ပြည်အကျဉ်းထောင်ရှိ နိုင်ငံရေးအကျဉ်းသူ/သားများအပေါ် ထောင်ဝန်ထမ်းများက နည်းအမျိုးမျိုးဖြင့် အလွဲသုံးစားပြုလုပ်မှုနှင့် ခြိမ်းခြောက်မှုများ ပိုမိုလုပ်လာသည်ဟု နိုင်ငံရေး အကျဉ်းသူများ အဖွဲ့ (WOPP) က ပြောသည်။ ထောင်ဝန်ထမ်းများ၏ လုပ်ဆောင်ချက်များသည် နိုင်ငံရေးအကျဉ်းသူ/သားများ၏ အခြေခံ အကျဉ်းသား အခွင့်အရေးများနှင့် လူ့အခွင့်အရေးများကို ချိုးဖောက်နေခြင်းဖြစ်ကြောင်း WOPP က အောက်တိုဘာလ ၁၇ ရက်နေ့တွင် ထုတ်ပြန် ထောက်ပြလိုက်ခြင်း ဖြစ်သည်။ ပြည်အကျဉ်းထောင်တွင် အကျဉ်းသားများ သွားလာရာ၌ပင် “ပခုံးချင်းယှဉ်ပြီး လာလမ်းမလျှောက်နဲ့၊ တွန်းချ ပစ်မှာ” ဟူသည့် စကားလုံးများဖြင့် ခြိမ်းခြောက်မှုများ ရှိနေကြောင်း WOPP သတင်းနှင့် ပြန်ကြားရေးတာဝန်ခံ မစုမြတ် က ပြောသည်။ ထို့အပြင် ပြင်းထန်သော ခြိမ်းခြောက်မှုများလည်း ရှိနေပြီး “ထမင်းယူပြီးတော့ စားရတယ်။ ယူထားတဲ့ထမင်းက နည်းနည်းလေး ကျန်တာတွေ့ရင်တောင်မှ သွန်လို့မရဘူး။ သွန်တာတွေ့ရင် ချီးပုံးခပ်ရမယ်။ ဒဏ်ငွေ ရိုက်ခံရ မယ်” ဆိုသည့် ခြိမ်းခြောက်မှုများပါ ရှိနေသည်ဟု မစုမြတ်က ပြောသည်။ ယခင်ကပင် ခြိမ်းခြောက်မှုများ ရှိခဲ့သော်လည်း ထောင်ပိုင် ဦးသော်လှိုင်ထွန်း ပြောင်းလာပြီးနောက် ခြိမ်းခြောက် မှုများနှင့် ဖိနှိပ်မှုများ ပိုမိုဆိုးရွားလာခဲ့သည် ဟု WOPP က ဆိုသည်။ ထောင်ဝန်ထမ်းများက အကျဉ်းသားများ စည်းကမ်းချိုးဖောက်ခြင်း သို့မဟုတ် အသံကျယ်ကျယ် ပြောဆိုခြင်းတို့ အတွက် ရိုင်းစိုင်းသော စကားလုံးများဖြင့်လည်း ဆဲဆိုလေ့ရှိသည်ဟုလည်း ဆိုသည်။ နိုင်ကျဉ်းများကို ပြင်ပနှင့် အဆက်အသွယ် ဖြတ်တောက်ရန် (တစ်နည်းအားဖြင့် သတင်းအမှောင်ချရန်) ရည်ရွယ် ၍ ဩဂုတ်လမှစပြီး တစ်လတစ်ကြိမ် မိသားစုများနှင့် တရားဝင် စာရေးသားဆက်သွယ်ခွင့်ကိုပါ ပိတ်ပင်ထားခဲ့ သည် ဟု မစုမြတ်က ပြောသည်။ စာရေးသား ဆက်သွယ်ခွင့် ပိတ်ပင်လိုက်ခြင်းကြောင့် အကျဉ်းထောင် ပြောင်းရွှေ့သည့် အခြေအနေများ၊ အထူးသဖြင့် ကျန်းမာရေး အခြေအနေများကို မိသားစုများက အချိန်မီ မသိရှိနိုင်တော့ဘဲ စိုးရိမ်ပူပန်မှုများ ပိုမိုဖြစ်ပေါ်လာစေသည်။ ထို့အပြင် အကျဉ်းသားများ အာဟာရပြည့်ဝစွာ မစားရသည့်အတွက် မိသားစုပေးပို့သည့် ထောင်ဝင်စာများကို အဓိက မှီခိုနေရချိန်တွင် ထောင်ဝန်ထမ်းများက ပါဆယ်ပစ္စည်းများကို အရည်အသွေးညံ့သော ပစ္စည်းများနှင့် လဲလှယ်ခြင်း၊ ပစ္စည်းများ ထုတ်ယူသုံးစွဲခြင်း၊ အမျိုးအမည် ကန့်သတ်ခြင်း၊ ပါဆယ်ပို့ခွင့်ရရန်အတွက် ‘လက်ဖက်ရည်ဖိုး’ ဟုဆိုကာ ငွေကြေးပေါ်ပေါ်ထင်ထင် တောင်းခံခြင်းများ ဖြစ်ပေါ်နေကြောင်း WOPP က ဆိုသည်။ စစ်အာဏာသိမ်းပြီးနောက် ထောင်အာဏာပိုင်များသည် ‘ထောင်တွင်း၏ ဘုရင်များ’ ကဲ့သို့ ဖြစ်လာကြောင်း မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများ ကွန်ရက် (PPNM) ဦးဆောင်ကော်မတီဝင် ကိုသိုက်ထွန်းဦး က မှတ်ချက်ပြုသည်။ “စစ်ကောင်စီကလည်း နိုင်ငံရေးအကျဉ်းသားကို ဖိနှိပ်လေ ပိုပြီးမှ သဘောကျလေ ဖြစ်တဲ့အတွက် ထောင်အာ ဏာပိုင်တွေဟာ စစ်ကောင်စီအလိုကျ ဖိနှိပ်မှုတွေကို ထဲထဲဝင်ဝင်ကိုမှ လုပ်ဆောင်တာမျိုးကို ပြုလုပ်လာကြ တယ်” ဟု ၎င်းက ပြောသည်။ စစ်ကော်မရှင်သည် နိုင်ငံရေးအကျဉ်းသားများကို ဓားစာခံ အနေဖြင့် အဓိက ဖမ်းဆီးထားခြင်းဖြစ်ရာ ရည်ရွယ် ချက်ရှိရှိ ဖိနှိပ်မှုများ လုပ်ဆောင်နေခြင်း ဖြစ်ကြောင်း ၎င်းက သုံးသပ်သည်။ WOPP က အကျဉ်းထောင်ထဲတွင် ရသင့်ရထိုက်သည့် အခွင့်အရေးများ နည်းမျိုးစုံဖြင့် ချိုးဖောက်ခံနေရသည့် အပေါ် လူ့အခွင့်အရေး ကာကွယ်စောင့်ရှောက်မှု လှုပ်ရှားသည့် အဖွဲ့အစည်းများအနေဖြင့် စစ်ကော်မရှင်က နိုင်ကျဉ်းများ အားလုံးကို ချွင်းချက်မရှိ ပြန်လည် လွတ်ပေးရန်အတွက် ဝိုင်းဝန်းတိုက်တွန်း ပေးကြဖို့ တောင်းဆို ထားသည်။ ဓာတ်ပုံ - Information and Public Relation Department (ပုံဟောင်း)

ပြည်အကျဉ်းထောင်တွင် နိုင်ကျဉ်းများအား ခြိမ်းခြောက် ချိုးဖောက်မှုများပြုလုပ်နေ

ထောင်မှ လွတ်လာသော နိုင်ကျဉ်းများအား ပြန်လည် ဖမ်းဆီး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၈ ရက်။ ပဲခူးတိုင်း၊ သာယာဝတီ အကျဉ်းထောင်မှ လွတ်ရက်စေ့ပြီး ပြန်လည် လွတ်မြောက်လာသည့် နိုင်ငံရေးအကျဉ်း သား ၅ ဦးကို စစ်တပ်မှ ပြန်လည်ဖမ်းဆီးခဲ့သည်ဟု မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများ ကွန်ရက် (PPNM) ပြောသည်။ သာယာဝတီ အကျဉ်းထောင်မှ အောက်တိုဘာလ ၁ ရက်နေ့တွင် လွတ်ရက်စေ့သဖြင့် အကျဉ်းသား အယောက် ၃၀ ပြန်လည် လွတ်မြောက်လာခဲ့ရာ နိုင်ငံရေးအကျဉ်းသား ၁၆ ဦး ပါဝင်သည်ဟု ဆိုသည်။ ထိုသို့ ပြန်လွတ်မြောက်လာသည့် နိုင်ငံရေးအကျဉ်းသား ၁၆ ဦးအနက် နိုင်ငံရေးအကျဉ်းသား ၆ ဦးကို ထောင်ဗူးဝ ၌ပင် စစ်ကော်မရှင် လက်အောက်ခံ ပြည်ထဲရေးဌာနမှ ရဲကားဖြင့် သာယာဝတီရဲစခန်းသို့ ပြန်လည် ဖမ်းဆီးသွား ခဲ့ခြင်း ဖြစ်သည်။ ပြန်လည် ဖမ်းဆီးခံခဲ့ရသည့် နိုင်ငံရေးအကျဉ်းသား ၆ ဦးအနက် နိုင်ငံရေးအကျဉ်းသား ၁ ဦးသာ လွတ်မြောက် ခဲ့ပြီး ကျန်နိုင်ငံရေး အကျဉ်းသား ၅ ဦးမှာ နောက်အမှုများတပ်ကာ ဆက်လက်ဖမ်းဆီးထားသည်ဟု PPNM က အောက်တိုဘာလ ၂ ရက် နေ့တွင် ထုတ်ပြန်ထားသည်။ PPNM ဦးဆောင်ကော်မတီဝင် ကိုသိုက်ထွန်းဦးက “ဒါဟာ လုံးဝ မလုပ်သင့်တဲ့ ကိစ္စ ဖြစ်ပါတယ်။ လူတစ်ယောက်ဟာ ထောင်ထဲမှာ ကာလတစ်ခုထိ ကြာအောင် နေခဲ့ပြီးသွားတော့မှ အခုလိုပြန်ဖမ်းခံရတာဟာ အရှေ့မှာလည်း ဟံသာဝတီ ဦးဝင်းတင်တို့ လက်ထက်ကတည်းက ရှိခဲ့ပေမဲ့ ဒီနွေဦးတော်လှန်ရေးမှာ လူတော် တော် များများကို အလားတူ ပုံစံမျိုး လုပ်လာတာကတော့ ကျနော်တို့အနေနဲ့ ကတော့ ဒီကိစ္စဟာ လုံးဝ မဖြစ် သင့်တဲ့ ကိစ္စလို့ ပြောချင်ပါတယ်” ဟု ပြောသည်။ သာယာဝတီ အကျဉ်းထောင်တွင် နောက်အမှုများဖြင့် ပြန်လည် ဖမ်းဆီးခံထားရသည့် နိုင်ကျဥ်း ၅ ဦးအနက် ၄ ဦး ၏ အမည်စာရင်းကို အတည်ပြုထားပြီး ဖြစ်ရာ ၎င်းတို့မှာ ကိုစိုင်းအောင်ငင်း၊ ကိုဂျယ်ရီကောင်းထိုက်၊ မမေမြတ် သူနှင့် ကိုတင်စိုး (ခ) နတ်ဆိုးတို့ ဖြစ်ကြသည်။ ၎င်းတို့မှာ နိုင်ငံတော် အကြည်ညိုပျက်စေမှု ပုဒ်မ ၅၀၅၊ မတရား အသင်း ဆက်သွယ်မှု ပုဒ်မ ၁၇-၁ တို့ဖြင့် ထောင်ဒဏ်ကျခံခဲ့ရသူများ ဖြစ်သည်။ နိုင်ငံရေးအကျဉ်းသူများအဖွဲ့ (WOPP) ဦးဆောင်တာဝန်ခံ မဇူးဇူးမေယွန်းက “လွတ်ရက်စေ့လို့ ပြန်ပြီးတော့ ဖမ်းတယ်ဆိုတဲ့ ဟာကလည်း အဓိကကတော့ ထပ်ပြီးတော့ဒါ နိုင်ငံရေး အကျဉ်းသူတွေ နိုင်ငံရေး အကျဉ်းသား တွေကို မတရားနည်းနဲ့ နည်းအမျိုးမျိုးနဲ့ ပြန်လည်ပြီးတော့ ယုတ်မာပြီးတော့ နောက်အမူကပ်တာမျိုးတွေ အကြောင်းမရှိပဲ ဒါပုဒ်မမျိုးတွေတပ် ပြန်လည်ဖမ်းဆီး ထည့်တယ်လို့တော့မြင်မိတယ်” ဟု ပြောသည်။ နိုင်ငံရေး အကျဉ်းသားများကို မဟုတ်မမှန်သည့် စွပ်စွဲမှုများဖြင့် အကြမ်းဖက် ပုဒ်မများတပ်ကာ ပြန်လည် ဖမ်းဆီးခြင်းသည် လူ့အခွင့်အရေးကို ချိုးဖောက်ခြင်း ဖြစ်သည့် အတွက် PPNM အနေဖြင့် အပြင်းအထန် ကန့် ကွက် ရှုတ်ချသည်ဟု ကိုသိုက်ထွန်းဦးက ပြောသည်။ “ထောင်ဗူးဝကနေ ပြန်ဖမ်းခံရတာကတော့ နိုင်ကျဉ်းတွေပဲ ဖြစ်တယ်။ လက်ရှိကာလမှာ တရားရေး ဆိုတဲ့ ဟာကလည်း စစ်ကောင်စီရဲ့ လက်အောက်ထဲ စစ်တပ်ရဲ့ လက်အောက်မှာ ဖြစ်နေတယ်။ ရဲဆိုတာလည်း စစ်တပ် ရဲ့ အောက်မှာပဲ ဖြစ်နေတဲ့အခါမှာ လက်ရှိမှာ တရားမျှတမှု ရရှိဖို့နဲ့ လူ့အခွင့်အရေး ပြည့်ပြည့်ဝဝ ရရှိဖို့ ပေါ့နော် လွတ်လပ်စွာ သွားလာခွင့်တွေ လှုပ်ရှားနေထိုင်ခွင့်တွေ ရဖို့ဆိုတာ လက်ရှိအခြေအနေမှာ ဘာမှမရရှိတဲ့ အခြေ အနေ ဖြစ်ပါတယ်။” လွတ်ရက်စေ့ဖြင့် ပြန်လည် လွတ်မြောက်လာသည့် နိုင်အကျဉ်းများကို စစ်ကော်မရှင်မှ ပြန်လည် ဖမ်းဆီးနေမှု များနှင့် နိုင်ကျဉ်းများ အပေါ် လူအခွင့်အရေး ချိုးဖောက်မှုများ ပေါ်ပေါ်တင်တင် ပြုလုပ်နေမှုများကို လူအခွင့် အရေး ဆိုင်ရာ အဖွဲ့အစည်းများအနေဖြင့် စောင့်ကြည့်မှုများပြုလုပ်ကြရန် PPNM က တိုက်တွန်းထားသည်။ မဇူးဇူးမေယွန်း က “ကျမတို့ WOPP အဖွဲ့ကတော့ နိုင်ငံရေး အကျဉ်းသားတွေ ဘက်မှာ အဆုံးထိ ရပ်တည်သွား မှာ ဖြစ်တယ်။ ထောင်ထဲမှာ လူ့အခွင့်အရေး ချိုးဖောက်မှုတွေကို နိုင်ငံရေး အကျဉ်းသားတွေ ကိုယ်စား ရတဲ့ နည်း အမျိုးအမျိုးနဲ့ အခက်အခဲကြားကပဲ ရတဲ့နည်းနဲ့ အသံတွေ ထုတ်ပေး သွားမှာ ဖြစ်ပါတယ်။ နိုင်ငံရေး အကျဉ်းသားတွေနဲ့ပဲ တစ်သားတည်း ရပ်တည်သွားမယ်လို့ ပြောချင်ပါတယ်” ဟု ပြောသည်။ စစ်အာဏာသိမ်း ကာလအတွင်း မြန်မာနိုင်ငံ တစ်ဝန်းက အကျဉ်းထောင် အသီးသီးရှိ လွတ်ရက်စေ့ နိုင်ကျဉ်းများ ကို ထောင်ဗူးဝမှ ပုဒ်မအမျိုးမျိုးတပ်ကာ ပြန်လည် ဖမ်းဆီးမှုများကို ရည်ရွယ်ချက်ရှိရှိ လုပ်ဆောင် လျှက်ရှိရာ ပြန်လည်ဖမ်းဆီးခံသူ ၇၄ ဦး ရှိပြီးဖြစ်ကြောင်း PPNM မှ မှတ်တမ်းတင်ထားသည်။ ဓာတ်ပုံ - (ပုံဟောင်း) နိုင်ငံရေး အကျဉ်းသားများ ကူညီစောင့်ရှောက်ရေး အသင်း (AAPP)

ထောင်မှ လွတ်လာသော နိုင်ကျဉ်းများအား ပြန်လည် ဖမ်းဆီး

ပဲခူးတိုင်းအတွင်း ရဲစခန်းတစ်ခု ဝင်တိုက်၊ စစ်ကောင်စီ တပ်ဖွဲ့ဝင် ၃ ဦး သေဆုံး သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၂၂ ရက်။ ပဲခူးတိုင်း၊ ဆိပ်ဖြူမြို့နယ်၊ လက်ဆည်ကျေးရွာ ရဲစခန်းကို အညာမြေတပ်ပေါင်းစုနှင့် မဟာမိတ်တပ်များက ဝင်ရောက် တိုက်ခိုက်ခဲ့ရာတွင် စစ်ကောင်စီ တပ်ဖွဲ့ဝင် ၃ ဦး သေဆုံးပြီး တစ်ဦး ပြင်းထန်ဒဏ်ရာ ရရှိခဲ့သည်ဟု မြေပြင်တာဝန်ရှိသူများက ပြောသည်။ လူအင်အား ၂၅ ဦး ဝန်းကျင်ဖြင့် ဝင်ရောက်တပ်စွဲထားသည့် လက်ဆည်ရဲစခန်းကို ဇူလိုင်လ ၁၇ ရက်နေ့၊ နံနက် ၄ နာရီခွဲ အချိန်ခန့်၌ ဝင်ရောက်ပစ်ခတ်ခဲ့ပြီး စစ်ကောင်စီဖက်မှ စစ်ကူအလျှင်အမြန် ရောက်ရှိလာမှုကြောင့် အလုံးစုံသိမ်းပိုက်နိုင်တော့မည့် အခြေအနေတွင် ပြန်လည်ဆုတ်ခွါခဲ့ရသည်ဟု ဆိုသည်။ အညာမြေတပ်ပေါင်းစု သတင်းနှင့် ပြန်ကြားရေး တာဝန်ခံ ကိုဘိုဘိုသန့်စင်က “သူတို့ဖက်က ကျဆုံးနဲ့ ဒဏ်ရာ ရကတော့ ပွဲချိန်အတွင်းမှာ ဒီတိုင်းပဲ၊ ကျနော်တို့ဖက်က ကျည်တွေ ထိမှန်ပြီး ကျဆုံးသွားပြီးတော့ တစ်ယောက် ကိုတော့ ကယ်ထုတ်သွားတာ အဲလိုမျိုးပေါ့။ ကျနော်တို့ သူတို့ပုံတွေတော့ မရခဲ့ဘူးပေါ့ဗျာ” ဟု ပြောသည်။ စစ်ဆင်ရေးအတွင်း ရဲတန်းလျား ၄ ဆောင်၊ ဘန်ကာ ၄ ခု အထိ သိမ်းပိုက်နိုင်ခဲ့ပြီး ပင်မအဆောင်နှင့် ဘန်ကာ ၂ ခုအား ထပ်မံရရှိရန်အတွက် အပြန်အလှန်ပစ်ခတ်နေစဉ် တော်လှန်ရေး အင်အားစုများဘက်မှ ကျည်ကုန်သဖြင့် ပြန်လည် ဆုတ်ခွာခဲ့ရခြင်း ဖြစ်သည်။ ထို့အပြင် အပြန်အလှန်ပစ်ခတ်မှုအတွင်း အညာမြေတပ်ပေါင်းစုမှ အသက် ၁၉ နှစ်အရွယ် ရဲဘော်ဆိုင်းနှောင် (ခ) ထွန်းခနှင့် အမှတ် ၈ စစ်ကြောင်းမှ အသက် ၃၆ နှစ်အရွယ် ရဲဘော်နဂါးတို့ ၂ ဦး ကျဆုံးခဲ့ရပြီး အသေးစားဒဏ်ရာ ရရှိသူလည်း တစ်ဦးပါဝင်သည်ဟု ကိုဘိုဘိုသန့်စင်က ဆက်ပြောသည်။ “ကျဆုံးရဲဘော် ၂ ယောက်ကလည်း အပြန်အလှန်ပစ်ကြရင်းနဲ့ ကျနော်တို့ဖက်ကနေ ပွဲချင်းပြီး ကျတာပါ။ ကျနော်တို့ဖက်က တစ်ယောက်ပဲ ပြန်ပြီးတော့ ရခဲ့ပြီးတော့ တယောက်ကတော့ ကျနော်တို့ ရဲဘော်နဂါးရဲ့ Dead Body (အလောင်း)ကတော့ ပြန်မရခဲ့ဘူးပေါ့။ ဒဏ်ရာရတဲ့ ရဲဘော်ကတော့ တယ်လီဂရမ်မှာ လှည်းလေး နဲ့ သယ်နေတဲ့ ပုံကို တင်ထားတယ်နော်။ သူကတော့ အခုချိန်မှာ မစိုးရိမ်ရတော့ဘူး။ ပြန်ပြီးတော့ တော်တော်ကို ကောင်းသွား ပြီပေါ့။” အဆိုပါ စစ်ဆင်ရေးကို အမှတ် (၈) စစ်ကြောင်း ဦးဆောင်မှုဖြင့် အညာမြေ တပ်ပေါင်းစု၊ ပခုက္ကူခရိုင်တပ်ရင်း - ၁၉ တပ်ခွဲ - ၃၊ ဆိပ်ဖြူ ဗိုလ်မထား တပ်ဖွဲ့၊ ပြည်သူ့လွတ်မြောက်ရေး တပ်ပေါင်းစု (PLC)၊ ပြည်သူ့တော်လှန်ရေး တပ်ဦး (PRF)၊ ကိုရေခဲနှင့် ကိုဗလ ဦးဆောင်သော လူငယ်ပြောက်ကျားတပ်ဖွဲ့၊ God of myaing၊ PL PDF၊ ကိုရေခဲနှင့် ကိုဗလတို့ ဦးဆောင်သော လူငယ်ပြောက်ကျားတပ်ဖွဲ့တို့မှ ပူးပေါင်းဖော်ဆောင်ခဲ့ပြီး Type 81 သေနတ် ၂ လက် ဆုံးရှုံးခဲ့ရသည်ဟု ဆိုသည်။ ဇူလိုင်လ ၂၁ ရက်နေ့ မြေပြင် သတင်းပေးပို့ချက်အရ လက်ဆည်ရဲစခန်းတွင် စစ်ကောင်စီက လူအင်အား အလုံးအရင်းဖြင့် စစ်ကူဖြည့်တင်းထားပြီး ခံစစ်အနေအထား ပြင်ဆင်ထားသည်ဟု ဆိုသည်။

ပဲခူးတိုင်းအတွင်း ရဲစခန်းတစ်ခု ဝင်တိုက်၊ စစ်ကောင်စီ တပ်ဖွဲ့ဝင် ၃ ဦး သေဆုံး

သာယာဝတီထောင်တွင် နိုင်ကျဉ်း တစ်ဦး ရိုက်နှက် တိုက်ပိတ်ခံရ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၁၉ ရက်။ သာယာဝတီ အကျဉ်းထောင်၌ နိုင်ငံရေး အကျဉ်းသား တစ်ဦး ရိုက်နှက် တိုက်ပိတ်ခံထားရသည်ဟု အကျဉ်းဦးစီး နှင့် နီးစပ်သူများက ပြောသည်။ ပဲခူးတိုင်း၊ သာယာဝတီ အကျဉ်းထောင်တွင် နိုင်ငံရေး အကျဉ်းသားတစ်ဦးကို ပုခုံးဆစ် ပြုတ်သည်အထိ ရိုက် နှက်ခံရပြီး ဇူလိုင်လ ၁၇ ရက်နေ့ အထိ တိုက်ပိတ်ထားဆဲ ဖြစ်သည်ဟု မြန်မာနိုင်ငံလုံးဆိုင်ရာ နိုင်ငံရေး အကျဉ်း သားများ ကွန်ယက် (PPNM) က ထုတ်ပြန်သည်။ PPNM ဦးဆောင် ကော်မတီဝင် ကိုသိုက်ထွန်းဦးက “ကိုအောင်သူထက် တိုက်ပိတ်ခံထားရတဲ့ အခြေအနေပေါ့ နော်။ စတင်တိုက်ပိတ်ပြီ ဆိုတာနဲ့ ထောင်ဝင်စာ ပါဆယ်ပါ တစ်လအနည်းဆုံး ပိတ်ခံထားရတဲ့ အခြေအနေ ဖြစ် ပါတယ်။ မိသားစုဝင်တွေ အဆက်အသွယ် နဂိုကတည်းက ခက်ခဲတဲ့သူဆိုရင်တော့ ထောင်ဝင်စာ အင်မတန် ခက်ခဲတဲ့ အခြေအနေတစ်ခုကို ရင်ဆိုင်နေရတာ ဖြစ်ပါတယ်” ဟု ပြောသည်။ နိုင်ငံရေး အကျဉ်းသားဖြစ်သည့် ကိုအောင်ထက်သူအား အကျဉ်းဦးစီးဌာနမှ ဝန်ထမ်း စိုးမင်းက အခြား ရာဇဝတ် အကျဉ်းသားနှင့် ရန်ဖြစ်သည်ဟု ဆိုကာ စွပ်စွဲရိုက်နှက်ခဲ့ခြင်း ဖြစ်သည်။ ကိုအောင်ထက်သူအား ဇူလိုင်လ ၆ ရက်နေ့တွင် ရိုက်နှက်ခဲ့ပြီးနောက် ဆေးကုသခွင့် ပိတ်ပင်ထားခဲ့ပြီး ယင်းနေ့ နေ့လည် ၂ နာရီမှသာ နိုင်ကျဉ်းများ၏ ဝိုင်းဝန်းတောင်းဆိုမှုကြောင့် ဆေးကုသခွင့် ရရှိခဲ့သည်ဟု ထောင်နှင့် နီးစပ်သူများ၏ ပြောပြချက်အရ သိရသည်။ ကျူးလွန်သူ စိုးမင်း ဆိုသူမှာ ယခင်နှစ်များကလည်း နိုင်ကျဉ်းများ အပေါ် ကိုယ်ထိလက်ရောက် အကြမ်းဖက် ကျူးလွန်မှုများ မကြာခဏ လုပ်ဆောင်လေ့ ရှိသဖြင့် တိုင်ကြားခြင်း ခံထားရသူ ဖြစ်သည်ဟု နိုင်ကျဉ်းဟောင်း များက ပြောသည်။ သို့သော် ၎င်းအား လက်ရှိချိန်အထိ ထောင်ပြောင်းရွှေ့ပေးခြင်း မရှိဘဲ သာယာဝတီထောင်၌သာ အပြင်ထွက်ခွင့် ပိတ်ခြင်း၊ ထောင်အဆောက်အအုံ ပြောင်းခြင်းဖြင့်သာ အရေးယူခဲ့ပြီး လက်ရှိတွင်လည်း ဆက်လက် တာဝန် ထမ်းဆောင်ခွင့် ပေးထားဆဲဖြစ်သည်ဟု ဆိုသည်။ “ထောင်တိုင်းနီးပါး အဓိက ဖိနှိပ်မှုတွေ ဖြစ်ပေမယ့် အများအားဖြင့် မန္တလေး အိုးဘိုထောင်၊ မြင်းခြံထောင်၊ ဒိုက်ဦးထောင်၊ သာယာဝတီထောင်ပေါ့နော် ပြီးတော့ မကွေးထောင်၊ မုံရွာထောင်ပေါ့နော်။ ဒီလိုထောင်တွေမှာ နိုင်ငံရေး အကျဉ်းသားတွေကို ဖိနှိပ်တဲ့ ကိစ္စတွေတော့ ရှိပါတယ်။ အများအားဖြင့်တော့ ဗဟိုထောင်တွေပေါ့ နော်၊ ထောင်မကြီးတွေတော့ ပိုပြီးတော့ ဖိနှိပ်မှု ပိုများတယ်လို့ ပြောလို့ရပါတယ်ခင်ဗျာ” ဟု ကိုသိုက်ထွန်းဦးက ဆက်ပြောသည်။ သာယာဝတီ အကျဉ်းထောင်၌ နိုင်ငံရေး အကျဉ်းသားများအား လူ့အခွင့်အရေး ချိုးဖောက်သည့် အကြမ်းဖက် ဖိနှပ်မှုများ ဆက်တိုက် ကျူးလွန်နေကြသော်လည်း စစ်ကောင်စီ လက်အောက်ခံ ထောင်အာဏာပိုင်များက လျစ်လျူရှုထားသဖြင့် ဖိနှိပ်များ ဆက်လက် လုပ်ဆောင်နေကြခြင်း ဖြစ်သည်။ နိုင်ကျဉ်းများ၏ အကျဉ်းသား အခွင့်အရေးအရ ထောင်တွင်း ဆေးဝါးကုသမှုနှင့် ဆေးဝါးလုံလောက်စွာ ထားရရှိ ရေး၊ ကျန်းမာရေးအရ စိုးရိမ်ရသူများကို ပြင်ပဆေးရုံသို့ အချိန်နှင့် တပြေးညီ ပို့ဆောင်ပေးရန် PPNM မှ တောင်း ဆိုထားသော်လည်း အကျဉ်းဦးစီးဌာနမှ လိုက်နာမှု မရှိသဖြင့် နှစ်စဉ်ပျမ်းမျှ နိုင်ကျဉ်း ၂၅ ဦးခန့် အသက် ဆုံးရှုံးနေ ရသည်ဟု ဆိုသည်။

သာယာဝတီထောင်တွင် နိုင်ကျဉ်း တစ်ဦး ရိုက်နှက် တိုက်ပိတ်ခံရ

လက်နက်ကြီးကြောင့် ပဲခူးတိုင်းအတွင်း အရပ်သား ၂ ဦး သေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇွန်လ ၂၇ ရက်။ ပဲခူးတိုင်း ညောင်လေးပင်ခရိုင် မုန်းမြို့နယ်တွင် စစ်ကောင်စီတပ်၏ လက်နက်ကြီး ပစ်ခတ်မှုကြောင့် အရပ်သား ပြည်သူ ၂ ဦး ထိမှန် သေဆုံးခဲ့သည်။ စစ်ကောင်စီတပ်၏ လက်နက်ကြီး ပစ်ခတ်မှုကြောင့် မုန်းမြို့နယ်ရှိ ခြောက်အိမ်စု ကျေးရွာမှ အသက် ၃၀ နှစ် အရွယ် မဟန်နီ စိုးနှင့် ကညင်တဲ ကျေးရွာမှ အသက် ၂၀ နှစ်အရွယ် မောင်ဘုန်းချစ်နိုင် တို့ ၂ ဦး ပွဲချင်းပြီး သေဆုံး ခဲ့ရသည်ဟု KNU က ဇွန်လ ၂၇ ရက်နေ့ (ယနေ့) တွင် ထုတ်ပြန်သည်။ စစ်ကောင်စီတပ်၏ ကညွတ်ကွင်း အခြေစိုက် ခမရ ၄၃၉ တပ်စခန်းမှ လင်းရောင်ခင်ကျေးရွာသို့ ဇွန်လ ၂၆ ရက်နေ့ (ယမန်နေ့)က လက်နက်ကြီး ပစ်ခတ်ခဲ့သည်ဟု KNU က ပြောသည်။ ထိုပစ်ခတ်ခဲ့မှုကြောင့် လင်းရောင်ခင်ကျေးရွာသို့ ရောက်ရှိနေသည့် အခြားရွာမှ အရပ်သား ၂ ဦး ထိမှန် သေဆုံးခဲ့ ရခြင်းဖြစ်သည်ဟု KNU က ဆိုသည်။ ထို့အပြင် ကျောက်ကြီးမြို့နယ်ထဲတွင်လည်း နတ်သံကွင်း စစ်ကောင်စီတပ်မှ အင်းနက်လယ်ကွင်းပြင်သို့ ဇွန်လ ၂၄ ရက်နေ့က ၁၂၀ မမ လက်နက်ကြီး တစ်လုံးပစ်ခတ်ခဲ့သည်။ ထို့အတူ ပိန်းဇလုပ်အခြေစိုက် ခလရ-၂၆၄ စစ်ကောင်စီ တပ်မှလည်း ကညင်းကျိုးကျေးရွာထဲကို ဇွန်လ ၂၅ ရက်နေ့က ၁၂၀ မမ လက်နက်ကြီး ၂ လုံးနှင့် သမင်အင်းကုန်းရွာကို ၁ လုံး ပစ်ခတ်ခဲ့သည်ဟု KNU က ဆိုသည်။

လက်နက်ကြီးကြောင့် ပဲခူးတိုင်းအတွင်း အရပ်သား ၂ ဦး သေဆုံး

သာယာဝတီထောင်တွင် နိုင်ကျဉ်းတစ်ဦး သေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇွန်လ ၁၃ ရက်။ ပဲခူးတိုင်း၊ သာယာဝတီခရိုင်၊ သာယာဝတီထောင်တွင် နိုင်ငံရေး အကျဉ်းသားတစ်ဦး သေဆုံးသွား သည်။ ရန်ကုန်တိုင်း၊ လှည်းကူးမြို့နယ်၊ လှည်းကူးမြို့မရဲစခန်းတွင် ပုဒ်မ ၅၀-ဈဖြင့် ထောင်ဒဏ် ၁၀ နှစ် ချမှတ်ခံထားရသူ အသက် ၄၈ နှစ်အရွယ် ဦးကျော်စိုးဦး (ခ) ဦးဇော် သေဆုံးခြင်း ဖြစ်သည်ဟု မြန်မာနိုင်ငံလုံးဆိုင်ရာ နိုင်ငံရေး အကျဉ်းသားများကွန်ယက် PPNM က ထုတ်ပြန်သည်။ ဆေးကုသခွင့် လုံလောက်စွာ မရရှိသဖြင့် သေဆုံးခဲ့ရသည်ဟု ထောင်နှင့် နီးစပ်သူများက ပြောသည်။ မြန်မာနိုင်ငံလုံးဆိုင်ရာ နိုင်ငံရေး အကျဉ်းသားများကွန်ယက် (PPNM) ဦးဆောင် ကော်မတီဝင်ဖြစ်သူ မရောင်နီ လင်းက “မိသားစုနဲ့ ပေးတွေ့လားဆိုတော့ ထောင်ထဲမှာ သူတို့ ထောင်ထဲမှာ သေဆုံးသွားတယ်ပေါ့နော်။ သေဆုံး သွားတော့ ရင်ခွဲရုံကို ပို့တယ်။ နောက်ရက် အသုဘချတယ်ဆိုတော့ မိသားစုနဲ့ ပေးတွေ့တာမျိုးတော့ ရှိခဲ့ပါ တယ်။ မိသားစုကလည်း အပြင်မှာပဲ သဂြိုဟ်ပေးခဲ့တယ်ပေါ့နော်” ဟု ပြောသည်။ ထောင်တွင်း ဆေးကုသခွင့် မရရှိခြင်း၊ ဆေးဝါးမလုံလောက်ခြင်း၊ ပြင်ပဆေးခန်းများသို့ ပြောင်းရွှေ့ ကုသခွင့် မရရှိခြင်း စသည့် အကြောင်းအရာများကြောင့် ဇွန်လ ၁၀ ရက်နေ့၌ နှလုံးရောဂါ၊ သွေးတိုးရောဂါခံများဖြင့် သေဆုံးခဲ့ရခြင်း ဖြစ်သည်။ သာယာတီထောင်တွင် ကျန်းမာရေး စောင့်ရှောက်မှု လုံလောက်စွာ မရရှိသဖြင့် နိုင်ကျဉ်းများ အပါအဝင် အကျဉ်း သား အားလုံးသည် ရောဂါ ဖြစ်ပွားခြင်း၊ ဆေးကုသခွင့် ဆုံးရှုံး၍ ရောဂါအခံများ ပိုမိုဆိုးရွားလာခြင်း၊ သေဆုံးသင့် သည့် အခြေအနေမဟုတ်ဘဲ သေဆုံးရခြင်းများ ကြုံတွေ့နေကြရသည်ဟု မရောင်နီလင်းက ဆက် ပြောသည်။ “သာယာဝတီထောင်က သိတဲ့အတိုင်း ကြမ်းတဲ့ထောင်ပေါ့နော်။ အာဏာရှင်တွေရဲ့ လက်ပါးစေထောင်လို့ ပြော လို့ ရတာပေါ့နော်။ ကြမ်းတမ်းတယ် ပြီးတော့ နာမည်ဆိုးနဲ့ ကျော်ကြားတယ်လို့ ပြောလို့ရပါတယ်။ အဲဒီတော့ သာယာဝတီထောင်မှာ ပြီးခဲ့တဲ့ နှစ်တွေတုန်းကဆိုရင် ကျန်းမာရေးစောင့်ရှောက်မှု လုံလောက်စွာ မရရှိတာ ကြောင့် သေဆုံးခဲ့တာတွေလည်း ရှိတယ်။ ကျနော်တို့ကတော့ စောင့်ကြည့်လေ့လာဆဲပဲ ဖြစ်တယ်ပေါ့နော်။” မြန်မာတစ်နိုင်ငံလုံးရှိ စစ်ကောင်စီ လက်အောက်ခံ အကျဉ်းထောင်များတွင် ၂၀၂၅ ခုနှစ် ဇန္နဝါရီလ ၁ ရက်နေ့မှ စတင်၍ ဇွန်လ ၆ ရက်နေ့အထိ ‌လုံလောက်သည့် ကျန်းမာရေးစောင့်ရှောက်မှု မရရှိသဖြင့် ထိခိုက်သေဆုံးသည့် နိုင်ကျဉ်းအရေအတွက် ၁၀ ဦးခန့်ထိ ရှိပြီဟု PPNM စာရင်းပြုစုချက်များအရ သိရသည်။

သာယာဝတီထောင်တွင် နိုင်ကျဉ်းတစ်ဦး သေဆုံး

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

အလည်ဗီဇာဖြင့် ပြည်ပထွက်မည့်လူငယ်များ လေဆိပ်၌ မှတ်ပုံတင်ထားခဲ့ရ
TNLA ယမ်းသိုလှောင်ရုံ ပေါက်ကွဲမှု သေဆုံးသူမြင့်တက်၊ အရေးပေါ်အကူအညီများ လိုအပ်နေ
ရခိုင်ရှိ AA ထိန်းချုပ်နယ်မြေများကို စစ်တပ် ဗုံးကြဲ၊ စက်တပ်လေထီးများဖြင့် စစ်ပြင်နေ
မိုးဦးကာလ ကရင်နီစစ်ရှောင်စခန်းများတွင် ကူးစက်ရောဂါမျိုးစုံ ဖြစ်ပွားနေ
မြန်မာနိုင်ငံဘက်မှ မြစ်ရေညစ်ညမ်းမှုပြဿနာကို ဖြေရှင်းပေးရန် ထိုင်းမြောက်ပိုင်းဒေသခံများ ငြိမ်းချမ်းစွာ လမ်းလျှောက်ဆန္ဒပြ

Archives

Archives

×Close