ဖားကန့် – Page 2 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
နိုင်ငံတကာသတင်း
NMG အကြောင်း
Contact

Home
Tag Archive

Tag: ဖားကန့်

ကချင်ပြည်အတွင်း အနည်းဆုံး မြို့နယ် ၄ ခုတွင် တိုက်ပွဲများ ဖြစ်ပွား သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၃၀ ရက်။ ကချင်ပြည်အတွင်း စစ်ကော်မရှင်တပ်က စစ်မျက်နှာအစုံဖွင့်၍ ထိုးစစ်ဆင်နေသဖြင့် ဒေသအနှံ့တွင် တိုက်ပွဲများ ပြင်းထန်နေသည်။ ကချင်ပြည်အတွင်းရှိ ဗန်းမော်၊ ဝိုင်းမော်၊ တနိုင်းနှင့် ဖားကန့်မြို့နယ်တို့တွင် စစ်ကော်မရှင်တပ်၏ အင်အား အလုံး အရင်းဖြင့် ထိုးစစ်ဆင်လာမှုကြောင့် တိုက်ပွဲများ ဆက်တိုက်ဖြစ်ပွားနေပြီး၊ ပူတာအိုနှင့် ခေါင်လန်ဖူးဒေသတို့ တွင်လည်း စစ်ရေးအခြေအနေများ တင်းမာနေကြောင်း ကချင်လွတ်လပ်ရေးအဖွဲ့ (KIO/KIA) က ပြောသည်။ လက်ရှိစစ်ရေးအခြေအနေနှင့် ပတ်သက်၍ KIA ပြန်ကြားရေးတာဝန်ခံ ဗိုလ်မှူးကြီးနော်ဘူက ၎င်းတို့ဘက်မှ ထိုးစစ်ဆင်ခြင်းမျိုး မရှိသော်လည်း စစ်ကော်မရှင်တပ်ဘက်မှ မြေပြင်စစ်ကြောင်းများဖြင့် စတင်ဝင်ရောက်လာ ခြင်းဖြစ်ကြောင်း ဆိုသည်။ ဗန်းမော်မြို့နယ်အတွင်း တိုက်ပွဲအခြေအနေကို ဗိုလ်မှူးကြီးနော်ဘူက “အခုလောလောဆယ်ကတော့ သုံးမိုင်လေး မိုင်ပေါ့ ဗန်းမော်ဖက်ကနေ မိုးမောက် တက်သွားတဲ့ သုံးမိုင်လေးမိုင် နေရာဖက်မှာလည်း နေ့တိုင်းလို တိုက်ပွဲ တွေရှိပါတယ်။ သူက မြေပြင်ကနေ ထိုးစစ်ဆင်လာတဲ့ အခြေအနေနဲ့ ရှိပါတယ်။ လေကြောင်းနဲ့ ပစ်တာ လက်နက်ကြီးနဲ့ ပစ်တာတွေကတော့ ပြောစရာတောင် မလိုဘူးပေါ့။ ဒါတောင် အဲဒီဗန်းမော်ဖက်မှာကတော့ တိုက်ပွဲကတော့ ဆက်ဖြစ်နေတဲ့ ဆိုတဲ့ဟာ ဖြစ်ပါတယ်” ဟု ပြောသည်။ အလားတူ ဝိုင်းမော်မြို့နယ်အတွင်း၌လည်း စစ်ကော်မရှင်တပ်သည် ဗျူဟာကျသည့် လမ်းကြောင်းများမှ တစ်ဆင့် စစ်ကြောင်းထိုးဝင်ရောက်လာနေသဖြင့် ခုခံတိုက်ပွဲများ နေ့စဉ်ဖြစ်ပွားနေသည်။ “ဝိုင်းမော်ဖက်မှာကတော့ ဝိုင်းမော်နဲ့ ဝါရှောင်တက်သွားတဲ့လမ်းရဲ့ မြောက်ဖက်ကျမှာပေါ့ အဲဒီချောင်း တစ်ချောင်းရှိတယ်။ အဲ့ဖက်မှာလည်း လမ်းတွေရှိတာပေါ့ သူတို့က ဗျူဟာလမ်းတွေ ရှိမှာပေါ့။ အဲဒီဖက်မှာ စစ်ကောင်စီဖက်ကနေ ဝင်လာလို့ တိုက်ပွဲတွေ ခုခံတိုက်ပွဲတွေ ရှိပါတယ်။ လက်နက်ကြီးတွေ ဒရုန်းတွေနဲ့က တော့ နေ့တိုင်း ပစ်တာတော့ရှိပါတယ်” ဟု ဗိုလ်မှူးကြီးနော်ဘူက ဆက်လက်ရှင်းပြသည်။ တနိုင်းမြို့နယ်အတွင်းရှိ ရွှေမှော်နှင့် ပယင်းမှော်ဒေသများတွင်လည်း တိုက်ပွဲများ ပြင်းထန်နေပြီး စစ်ကော်မရှင် ၏ အင်အားအလွန်အကျွံသုံး ထိုးစစ်ဆင်မှုကြောင့် KIA နှင့် ပူးပေါင်းတပ်များဘက်မှ ရှေ့တန်းတပ်စခန်းတစ်ခုကို လက်လွတ်လိုက်ရသည့် အခြေအနေများလည်း ရှိခဲ့သည်။ ထို့အပြင် ကချင်ပြည် မြောက်ဖျား ပူတာအိုနှင့် ခေါင်လန်ဖူးဒေသတို့တွင်လည်း စစ်ကော်မရှင်တပ်က ပြည်သူ့ စစ်တပ်ဖွဲ့ဝင်များနှင့် ပူးပေါင်းကာ အင်အားဖြည့်တင်းမှုများ ဆက်တိုက်လုပ်ဆောင်နေသည်။ ခေါင်လန်ဖူးစစ်မျက်နှာနှင့် ပတ်သက်၍ ဗိုလ်မှူးကြီးနော်ဘူက “ဆွမ်ပရာဘွမ်ဖက်မှာကတော့ တိုက်ပွဲကတော့ မရှိဘူး။ ဟိုခေါင်လန်ဖူးဖက်မှာကတော့ သူတို့ကစစ်အင်အားတွေ ထိုးထားပြီးမှ ပြည်သူ့စစ်နဲ့ ပူးပေါင်းပြီး ကျနော်တို့ KIA နဲ့ ပူးပေါင်းတပ်တွေရှိတဲ့ လန်ဆယ်ဖက်ကို သူတို့ ထိုးလာတာ။ ခေါင်လန်ဖူး စစ်မျက်နှာဖက်မှာ တော့ လက်နက်ကြီးနဲ့ 81 ၊ 82 ပေါ့ အဲဒါမျိုးတွေနဲ့ ပစ်တာကတော့ နေ့တိုင်းလို ရှိပါတယ်။ တကယ့်ထိတွေ့ ရင်ဆိုင် တိုက်ပွဲကြီးတွေတော့ မရှိဘူး” ဟု ပြောသည်။ ခေါင်လန်ဖူး စစ်မျက်နှာတွင် စစ်ကော်မရှင်ဘက်မှ လက်နက်ကြီးများကို အဓိကထား အသုံးပြုနေကြောင်း ဗိုလ်မှူးကြီးနော်ဘူက ပြောသည်။ လက်ရှိတွင် ကချင်ပြည်အတွင်းရှိ မြို့နယ်အများစု၌ စစ်ရေးပဋိပက္ခများ မြင့်တက်နေသဖြင့် ဒေသခံပြည်သူများ သည် စစ်ဘေးဒဏ်ကို ဆိုးရွားစွာ ခံစားနေရသည်။ စစ်ကော်မရှင်တပ်၏ စစ်ရေးလှုပ်ရှားမှုများနှင့်အတူ ပေါ်ပေါက်လာသည့် လူ့အခွင့်အရေး ချိုးဖောက်မှုများ ကြောင့် ဒေသခံများမှာ အသက်ဘေးအန္တရာယ်အတွက် စိုးရိမ်ထိတ်လန့်နေကြရကြောင်း ဒေသခံများနှင့် လူ့အခွင့်အရေး လှုပ်ရှားသူများက ပြောသည်။

ကချင်ပြည်အတွင်း အနည်းဆုံး မြို့နယ် ၄ ခုတွင် တိုက်ပွဲများ ဖြစ်ပွား

လက်နက်ကြီး ပစ်ခတ်မှုများကြောင့် ဖားကန့်ရွေးကောက်ပွဲ မဲပေးသူ နည်းပါး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၂၆ ရက်။ ကချင်ပြည်၊ ဖားကန့်မြို့တွင် ဇန်နဝါရီလ ၂၅ ရက်နေ့က ကျင်းပခဲ့သည့် စစ်ကော်မရှင်၏ အပိုင်း (၃) ရွေးကောက် ပွဲသည် မြို့ပေါ်တွင် လက်နက်ကြီးများ ကျရောက်ပေါက်ကွဲမှုများကြောင့် မဲလာပေးသူမရှိဘဲ တိတ်ဆိတ်စွာ ပြီးဆုံးသွားခဲ့ကြောင်း ဒေသခံများက ပြောသည်။ စစ်ကော်မရှင်သည် ရွေးကောက်ပွဲ ကျင်းပနိုင်ရန် ဖားကန့်မြို့အဝင်အထွက် တံတားများကို ဇန်နဝါရီ ၂၃ ရက်နေ့ ကတည်းက ပိတ်ဆို့ကာ ဗျူဟာကုန်းအနီးရှိ ရပ်ကွက် (၄) ခုတွင် မဲရုံများ ပြင်ဆင်ခဲ့သော်လည်း မြေပြင်တွင် မဲပေးမည့်သူမရှိဘဲ ဝန်ထမ်းအချို့သာ ပေးခဲ့ကြသည်ဟု ဆိုသည်။ ဖားကန့်မြို့ခံတစ်ဦးက မြေပြင်အခြေအနေကို “မဲရုံတွေကတော့ ဖွင့်ထားတာပဲ၊ ဒါပေမဲ့ တစ်မြို့လုံးက ဘယ်သူ မှလည်း မဲသွားမပေးဘူး၊ အိမ်ထဲမှာပဲ အောင်းနေကြတာ။ အပြင်မှာလည်း လက်နက်ကြီးသံတွေက လည်း ကြားနေရတာဆိုတော့ ဘယ်သူက သွားပေးရဲမှာလဲ။ ဝန်ထမ်းအချင်းချင်းပဲ ပေးနေတာ တွေ့ရတယ်” ဟု ပြောသည်။ ရွေးကောက်ပွဲကျင်းပချိန်တွင် ဖားကန့်ဗျူဟာကုန်းနှင့် ရဲစခန်းဘက်မှ လက်နက်ကြီးများ တရစပ်ပစ်ခတ်ခဲ့သလို၊ ကချင်လွတ်လပ်ရေး တပ်မတော် KIA နှင့် KPDF ပူးပေါင်းတပ်ဖွဲ့များဘက်ကလည်း မဲရုံများရှိရာဘက်သို့ ဒရုန်းဗုံးများဖြင့် ပြန်လည်တိုက်ခိုက်ခဲ့ခြင်းကြောင့် တိုက်ပွဲများ ပြင်းထန်ခဲ့သည်။ မြေပြင်၌ ကူညီပေးနေသူတစ်ဦးက “လက်နက်ကြီးကျည်က မြို့ပေါ်ရပ်ကွက်တွေထဲ ကျတာ။ တောင်ပြိုရွာမှာ တစ်ယောက်၊ ဆိပ်မူမှာ နှစ်ယောက် ထိတယ်။ မြို့ပေါ်မှာလည်း ထိတာရှိတော့ အားလုံးပေါင်း ၅ ယောက်ထက် မနည်း ဒဏ်ရာရထားတယ်။ အဲဒီထဲက ၃ ယောက်ကတော့ တော်တော်စိုးရိမ်ရလို့ ခွဲစိတ်ခန်းဝင်နေရတယ်” ဟု ပြောသည်။ ရွေးကောက်ပွဲကျင်းပနိုင်ရန် မြို့ပေါ်ရှိ လမ်းဆုံလမ်းခွများနှင့် အချက်အချာကျသော နေရာများတွင် လုံခြုံရေး အင်အား အလုံးအရင်းဖြင့် ချထားကာ စစ်ဆေးမှုများ တင်းကျပ်ထားသော်လည်း၊ မြေပြင်တွင် လက်နက်ကြီး သံများနှင့် တိုက်ပွဲများ ဆက်တိုက်ကြားနေရသည်ဟု ဆိုကြသည်။ ထို့ပြင် မြို့ခံများကမူ ၎င်းတို့၏ ဆန္ဒအစစ်အမှန်ကို ကိုယ်စားမပြုသည့် ဤရွေးကောက်ပွဲအပေါ် စိတ်ဝင်စားမှု ကင်းမဲ့နေကြသည်ကို တွေ့ရှိရသည်ဟု မြေပြင်သတင်းရင်းမြစ်က ပြောသည်။ စစ်ကော်မရှင်ကမူ ဖားကန့်မြို့တွင် ပြည်သူများ အေးချမ်းတည်ငြိမ်စွာ မဲပေးခဲ့ကြသည်ဟု ထုတ်ပြန်ထားသော် လည်း၊ လက်တွေ့တွင် ဖားကန့်ပြည်သူများမှာ မဲမပေးဘဲ နေအိမ်များ၌သာ နေထိုင်ခြင်းဖြင့် ရွေးကောက်ပွဲကို ဆန့်ကျင်ခဲ့ကြကြောင်း မြေပြင်သတင်းရင်းမြစ်က ပြောသည်။ ဖားကန့်မြို့နယ်အတွင်း စစ်ကောင်မရှင်၏ အပိုင်း (၃) ရွေးကောက်ပွဲ အတွက် မဲရုံပေါင်း (၁၉) ရုံကို ဇန်နဝါရီလ ၂၅ ရက်နေ့ နံနက် ၆ နာရီမှစတင်ကာ ဖွင့်လှစ်ခဲ့သည်ဟု ထုတ်ပြန်ထားသည်။ စစ်ကော်မရှင်သည် ဖားကန့်မြို့ပေါ်ရှိ စုပေါင်းရုံး၊ အခြေခံပညာအထက်တန်းကျောင်းနှင့် ငှက်ပျောတောကျောင်း တို့တွင် မဲရုံအမှတ် (၃၄) မှ (၄၉) အတွင်းရှိ မဲရုံများကိုလည်းကောင်း၊ ကာမိုင်းမြို့နှင့် လီဒိုလမ်းကြောရှိ ကျေးရွာ များဖြစ်သော ဒွန်ဘုန်းခ၊ လဝါး၊ ဒွန်ဘန်၊ မန်ပန်၊ နောင်းမြီ၊ ဝါရာဇွပ်၊ ရှဒူဇွပ်၊ ကောင်ရာနှင့် နန့်ယားကျေးရွာ အုပ်စုတို့တွင် မဲရုံအမှတ် (၁၅) မှ (၂၉) အထိ မဲရုံများကိုလည်းကောင်း စုစုပေါင်း (၁၉) ရုံ ဖွင့်လှစ်ခဲ့သည်ဟု ထုတ်ပြန်ထားသည်။ သို့သော်လည်း ရွေးကောက်ပွဲ ကျင်းပချိန်တွင် ဖားကန့်ဗျူဟာကုန်းနှင့် ရဲစခန်းအနီး တစ်ဝိုက်အပါအဝင် မဲရုံများ ပြင်ဆင်ထားရာ မြို့ပေါ်ရပ်ကွက်များအတွင်း လက်နက်ကြီးများ တရစပ်ပစ်ခတ်မှုနှင့် ပေါက်ကွဲမှုများ ဖြစ်ပွားခဲ့သည်။ ထို့ကြောင့် မြို့ပေါ်ရပ်ကွက်များနှင့် တောင်ပြို၊ ဆိပ်မူကျေးရွာတို့တွင် လက်နက်ကြီးကျည် ကျရောက် ပေါက်ကွဲမှု ကြောင့် ဒေသခံ ၅ ဦးထက်မနည်း ပြင်းထန်စွာဒဏ်ရာရရှိခဲ့သည်။

လက်နက်ကြီး ပစ်ခတ်မှုများကြောင့် ဖားကန့်ရွေးကောက်ပွဲ မဲပေးသူ နည်းပါး

ရွေးကောက်ပွဲ ကျင်းပစဉ် ဖားကန့် မြို့ပေါ် ရပ်ကွက်များအား လက်နက်ကြီးဖြင့် ပစ်ခတ် သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဇန္နဝါရီလ ၂၅ ရက်။ ကချင်ပြည် ဖားကန့် မြို့ပေါ် ရပ်ကွက် တချို့တွင် ရွေးကောက်ပွဲ အပိုင်း (၃) ကျင်းပနေစဉ် လက်နက်ကြီးကျည်များ ကျရောက်ပေါက်ကွဲ သဖြင့် ဒေသခံ ၅ ဦး ထိခိုက်ဒဏ်ရာရခဲ့သည်ဟု မြို့ခံ သတင်းရင်းမြစ်များက ပြောသည်။ ကချင်ပြည်၊ ဖားကန့်မြို့ပေါ်ရပ်ကွက် အချို့တွင် စစ်ကော်မရှင်က အပိုင်း (၃) ရွေးကောက်ပွဲ ကျင်းပရန် ကြိုးပမ်း နေသည့် ဇန်နဝါရီလ ၂၅ ရက်နေ့၌ လူနေရပ်ကွက်များ အတွင်းသို့ လက်နက်ကြီးကျည်များ ပစ်ခတ်ခဲ့ခြင်း ဖြစ်သည်။ စစ်ကော်မရှင်က မော်ဝမ်း၊ ငှက်ပျောတော၊ အေးမြသာယာနှင့် မြို့မရပ်ကွက်တို့ရှိ စာသင်ကျောင်းများကို အခြေပြုကာ ရွေးကောက်ပွဲပြုလုပ်နေစဉ် မြို့ပေါ်ရပ်ကွက်များအတွင်းသို့ လက်နက်ကြီးကျည်များ ကျရောက် ခဲ့ခြင်း ဖြစ်သည်။ ဖားကန့်မြို့ခံ အမျိုးသားတစ်ဦးက “မနက်ကတည်းက လက်နက်ကြီးသံတွေက တစ်ချက်ပြီးတစ်ချက်ပဲ၊ အိမ်တွေတောင် တုန်နေတာ။ ရွေးကောက်ပွဲ လုပ်နေတဲ့ ရပ်ကွက်တွေထဲကို လက်နက်ကြီးတွေ ကျနေတာ ဆိုတော့ ဘယ်သူမှ သိပ်ပြီး အပြင်မထွက်ရဲကြဘူး” ဟု ပြောသည်။ ဇန်နဝါရီလ ၂၅ ရက်နေ့၊ နံနက်ပိုင်းတွင် ငှက်ပျောတောရပ်ကွက် အတွင်းရှိ ကုန်စုံဆိုင်တစ်ဆိုင်နှင့် မြို့မကလပ် ကုန်းရှိ လူနေအိမ်များ ပေါ်သို့ လက်နက်ကြီးကျည်များ ကျရောက်ခဲ့ခြင်းကြောင့် အိမ်ထဲတွင်ရှိနေသည့် အရပ်သား ၅ ဦး ဒဏ်ရာရရှိ ခဲ့ကာ လူမှုကူညီရေးအသင်းများက ဆေးခန်းသို့ ပို့ဆောင်ပေးထားရသည်ဟု ဆိုသည်။ အခြားဖားကန့် ဒေသခံတစ်ဦးကလည်း “လက်နက်ကြီးကျည်က ရပ်ကွက်တွေထဲ ကျနေတာဆိုတော့ ဘယ်သူမှ မဲသွားဖို့ မစဉ်းစားအားဘူး၊ အသက်ဘေးကိုပဲ ကြောက်နေရတာ။ စစ်သားတွေကတော့ ကျောင်းတွေထဲမှာ သေနတ်တွေနဲ့ စောင့်နေကြတာပဲ၊ သွားတဲ့လူတွေ ပြောတော့ မဲရုံနားမှာလည်း စစ်သားတွေ၊ ရဲတွေ လက်နက် တွေနဲ့ စောင့်နေကြတာ” ဟု ပြောသည်။ စစ်ကော်မရှင်တပ်သည် ဖားကန့်မြို့အဝင်အထွက် တံတားများကို ဇန်နဝါရီ ၂၃ ရက်ကတည်းက ပိတ်ဆို့ထားပြီး မြို့ပေါ်ရပ်ကွက် ၅ ခုတွင် မဲရုံများဖွင့်လှစ်ရန် ကြိုးပမ်းခဲ့သော်လည်း တိုက်ပွဲများကြောင့် မဲထည့်သူမရှိသလောက် နည်းပါးနေခြင်း ဖြစ်သည်ဟု မြို့ခံများက ပြောသည်။ စစ်ကော်မရှင် ဗျူဟာကုန်းမှ ပစ်ခတ်သည့် လက်နက်ကြီးများသည် တော်လှန်ရေးအဖွဲ့များ ထိန်းချုပ်ရာ ဆိပ်မူ ကျေးရွာ အုပ်စုဘက်သို့လည်း ကျရောက်ခဲ့သဖြင့် အရပ်သား ၂ ဦး ထပ်မံဒဏ်ရာရရှိခဲ့ကြောင်း မြေပြင်သတင်း ရင်းမြစ်က ပြောသည်။ ကချင်ပြည် အတွင်း ဗန်းမော်၊ မံစီ၊ မိုးမောက်၊ ဖားကန့်နှင့် ရွှေကူတို့တွင် ရွေးကောက်ပွဲကျင်းပမည်ဟု စစ်ကော်မရှင်က ကြေညာ ထားသော်လည်း ဖားကန့်နှင့် ရွှေကူမြို့နယ်တို့တွင်သည ရွေးကောက်ပွဲ အပိုင်း ၃ ကို နေရာအချို့တွင်သာ လုပ်နိုင်ခဲ့ခြင်း ဖြစ်သည်။ သို့သော် ဖားကန့်တွင်လည်း ယခုကဲ့သို့ လက်နက်ကြီးသံများ ဆက်တိုက်ကြား နေရသဖြင့် ဒေသခံများမှာ စိုးရိမ်ထိတ်လန့်နေပြီး မဲပေးသူလည်း နည်းပါးသည်ဟု ဆိုကြသည်။ ဓါတ်ပုံ - စစ်ကော်မရှင် (မြို့နယ် ပြန်/ဆက်)

ရွေးကောက်ပွဲ ကျင်းပစဉ် ဖားကန့် မြို့ပေါ် ရပ်ကွက်များအား လက်နက်ကြီးဖြင့် ပစ်ခတ်

ဖားကန့် မြေစာပုံပြိုကျ၊ ရေမဆေးသမား ၂ ဦး ထပ်မံသေဆုံး  သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၄ ရက်။ ကချင်ပြည်နယ်၊ ဖားကန့်ကျောက်စိမ်းဒေသတွင် မနေ့က မြေစာပုံပြိုကျမှုကြောင့် အသက်နှင့်ရင်းပြီး ကျောက် ရှာဖွေနေသော ရွှေ့ပြောင်းရေမဆေးသမား နှစ်ဦး ထပ်မံသေဆုံးခဲ့သည်။ ယင်းဖြစ်စဉ်သည် ဝမ်းစာအတွက် အသက်စွန့်နေရသည့် ဖားကန့်ဒေသ၏ ဘဝများကို မီးမောင်းထိုးပြနေသည်။ အောက်တိုဘာလ ၂၃ ရက်နေ့၊ ညနေ ၄ နာရီခန့်က ဖားကန့်မြို့နယ်၊ နမ့်မှော်ရွာရှိ ကုမ္ပဏီပိုင် မြေစာပုံဟောင်း လုပ်ကွက်တစ်ခုမှာ ရေမဆေးကျောက်ရှာဖွေနေစဥ် မြေစာပုံ ရုတ်တရက် ပြိုကျကာ အမျိုးသားနှစ်ဦး မြေအောက်သို့ ပါသွားခဲ့ခြင်းဖြစ်သည်။ ချက်ချင်း ကယ်ဆယ်ခဲ့သော်လည်း ပါသွားသည့် အမျိုးသားနှစ်ဦးလုံးမှာ ပွဲချင်းပြီး သေဆုံးခဲ့သည်ဟု ဒေသခံတွေ က ပြောသည်။ သေဆုံးသူနှစ်ဦးမှာ ဒေသခံများမဟုတ်ဘဲ ဝမ်းရေးအတွက် ရောက်လာသည့် ရွှေ့ပြောင်းလုပ်သားများ ဖြစ်သည်။ ကယ်ဆယ်ရေးလုပ်ငန်းများတွင် ပါဝင်ခဲ့သည့် အသက် ၁၄ နှစ်အရွယ် အမျိုးသားငယ်လေး တစ်ဦးမှာလည်း ဒဏ်ရာအနည်းငယ် ရရှိခဲ့ကြောင်း သိရသည်။

ဖားကန့် မြေစာပုံပြိုကျ၊ ရေမဆေးသမား ၂ ဦး ထပ်မံသေဆုံး 

ဖားကန့်တွင် နှစ်ဘက်တပ်များ လူသစ်စုဆောင်း သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၁၈ ရက်။ ဖားကန့်တွင် စစ်ကော်မရှင်တပ်နှင့် ကချင်လွတ်လပ်ရေး တပ်မတော် KIA တို့က အတင်းအဓမ္မ လူသစ်စုဆောင်း နေမှုများကြောင့် လူထုအခက်ကြုံနေကြသည်။ ကချင်ပြည်နယ်၊ ကျောက်စိမ်းထွက်ရာ ဖားကန့်ဒေသတွင် စစ်ကော်မရှင်တပ်နှင့် KIA ဦးဆောင်သော တော်လှန် ရေး အဖွဲ့များက တပ်သားစုဆောင်းမှုများကြောင့် ဒေသခံလူထုမှာ အခက်အခဲများ၊ စိုးရိမ်ထိတ်လန့်မှုများ နှင့် ကြုံတွေ့နေရသည်။ ဖားကန့် ဒေသခံတစ်ဦးက “စစ်တပ်ဘက်ကလည်း ဖမ်းတာရှိသလို၊ ဒီဘက်က KIA ဦးဆောင်တဲ့ တော်လှန်ရေး အဖွဲ့တွေကလည်း ဖမ်းတာတွေရှိတယ်။ ဖမ်းတာမှ အများကြီး။ အတင်းအကျပ် နေ့လည်ကြောင်တောင် ဝင် ဖမ်းတာတွေလည်း လုပ်တယ်ဗျာ။ တိုက်ပွဲတွေဖြစ်လို့ ပြေးရတာတမျိုး၊ စုဆောင်းရေးကြောင့် ပြေးရတာ ရှောင်ရတာက တမျိုးနော်” ဟု ပြောသည်။ စစ်ကောင်စီဘက်က ၂၀၂၃ ခုနှစ် နှစ်စပိုင်းမှစ၍ ယနေ့အချိန်ထိ လုံခြုံရေး တင်းကျပ်ခြင်းနှင့် ရမ်းသမ်း ဖမ်းဆီး ခေါ်ဆောင်ခြင်းများ လုပ်ဆောင်ခဲ့သည်ဟု ဖားကန့်ဒေသခံများက ပြောသည်။ KIA နှင့် တော်လှန်ရေးအဖွဲ့များဘက်မှမူ နယ်မြေထိန်းချုပ်မှု တိုးမြှင့်လာသည့် ၂၀၂၅ ခုနှစ် စက်တင်ဘာလနှင့် အောက်တိုဘာလ ဝန်းကျင်မှစ၍ အတင်းအကြပ် လူသစ်စုဆောင်းမှုများ လုပ်ခဲ့သည်ဟု ပြောသည်။ ဒေသခံများ၏ ခန့်မှန်းချက်အရ ဆိုင်းတောင် ကျေးရွာအုပ်စုကဲ့သို့ နေရာများတွင် ရက်သတ္တပတ် နှစ်ပတ်အတွင်း လူ ၅၀၀ ခန့်အထိ စုဆောင်းခံခဲ့ရသည် ဟု သိရသည်။ ဤသို့ နှစ်ဖက်ညှပ်ပြီး လူသစ်စုဆောင်းခံရသည့် အခြေအနေများကြောင့် ဒေသခံလူငယ်များသည် အပြင်မထွက်ရဲဘဲ ပုန်းအောင်းနေရသည်။ ကျောက်စိမ်းမှော်များ၊ လူမြင်ကွင်းများအထိ ဝင်ရောက်ဆွဲခေါ်မှုများ ရှိနေပြီး၊ ကြောက်လန့်တကြား ထွက်ပြေး ရင်း မတော်တဆ သေဆုံးခဲ့သည့် ဖြစ်စဉ်မျိုးပင် ရှိခဲ့သည်ဟု ဒေသခံများက ပြောသည်။ လူငယ်များ အလုပ်မလုပ်ရဲခြင်း၊ ပုန်းအောင်းနေရခြင်းတို့ကြောင့် ဖားကန့်၏ အဓိကစီးပွားရေးဖြစ်သော ကျောက်စိမ်းလုပ်ငန်းအပါအဝင် နေ့စဉ် စားဝတ်နေရေးအတွက် အလုပ်လုပ်ကိုင်ရန် ခက်ခဲလာသည်။ ဆိုင်းတောင်ကဲ့သို့ နေရာများတွင် ဈေးဆိုင်များပါ ပိတ်ထားရဆဲဖြစ်ပြီး ဒေသခံအများစုမှာ ဘေးလွတ်ရာသို့ တိမ်းရှောင်နေကြရသည်။ ဆိုင်းတောင် ဒေသခံတစ်ဦးက “KIA က စုဆောင်းရေး ဆွဲတာကလည်း စစ်ကောင်စီလိုပဲ အတူတူပဲ အတင်းဖမ်း ခေါ်တာ။ လာဝင်ဖမ်းပြီဆိုရင် ဆိုင်တွေလည်း ပိတ်။ ဒီတလော လူကြီးတွေနဲ့ KIA နဲ့ တွေ့တယ်ပြောတော့ ဝမ်း သာတယ်။ အတင်းအကြပ် စုဆောင်းတာ ရပ်ပေးဖို့၊ လူထုစည်းရုံးရေး နည်းလမ်းနဲ့ပဲ လုပ်ဖို့ စာပို့ထား တယ်လို့ တော့ ပြောကြတယ်။ အခုထိတော့ ဘာမှန်းမသိသေးဘူး။ အခြေအနေ ကြည့်ပြီး သွားလာပေါ့ဗျာနော်” ဟု ပြောသည်။ အခြေအနေများ ဆိုးရွားလာခြင်းကြောင့် ဖားကန့်ဒေသရှိ စစ်အာဏာရှင်ဆန့်ကျင်ရေး လူထုကွန်ရက်နှင့် တော် လှန်ရေး အင်အားစုများမှာ KIA တပ်မဟာ (၉) က တာဝန်ရှိသူများနှင့် တွေ့ဆုံဆွေးနွေးခဲ့ကြသည်။ ဆွေးနွေးပွဲ၏ အဓိက ရည်ရွယ်ချက်မှာ အတင်းအကြပ် လူသစ်စုဆောင်းမှုများကို ရပ်တန့်ပေးရန်နှင့် တော်လှန် ရေး၏ ပုံရိပ်ကို မထိခိုက်စေရန် ဖြစ်သည်ဟု အောက်တိုဘာလ ၁၁ ရက်နေ့က ထုတ်ပြန်ထားသည်။ ၎င်းတို့က KIA တပ်မဟာမှူးကို လိပ်မူတင်ပြသော စာတွင် ‘အာဏာရှင်စနစ် အမြစ်ဖြတ်ရေးအတွက် လူထု တစ်ဦးချင်းစီ၏ ပါဝင်အားကို အသုံးပြုပြီး၊ အတင်းအကြပ် စုဆောင်းမှုအစား လူထုစည်းရုံးရေး နည်းလမ်း ဖြင့်သာ ဆောင်ရွက်ရန်’ တိုက်တွန်း ပန်ကြားထားသည်။ လက်ရှိတွင် ဤဆွေးနွေးပွဲမှ ကောင်းမွန်သော ရလဒ်များ ရရှိခဲ့သည်ဟု သတင်းများ ထွက်ပေါ်နေသော်လည်း မြေပြင်တွင် လူသစ်စုဆောင်းမှုများ ဆက်ရှိနေသေးသောကြောင့် ဖားကန့်ဒေသခံများသည် လုံခြုံမှုမရှိဘဲ စိုးရိမ်ထိတ်လန့်စွာ ရှင်သန်နေရဆဲ ဖြစ်ကြောင်း သိရသည်။

ဖားကန့်တွင် နှစ်ဘက်တပ်များ လူသစ်စုဆောင်း

ဖားကန့်တွင် ညမထွက်ရ အမိန့်ထုတ်ပြန် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၁၁ ရက်။ ကချင်ပြည်ရှိ မြန်မာနိုင်ငံ၏ အဓိက ကျောက်စိမ်းထွက်ရာ ဒေသဖြစ်သော ဖားကန့်မြို့နယ် တွင် စစ်ကော်မရှင် တပ်ဖွဲ့က ညမထွက်ရအမိန့် နှင့် လူငါးဦးထက် ပိုမစုရအမိန့် များကို ထပ်မံထုတ်ပြန်လိုက်ကြောင်း ဒေသခံများက ပြောသည်။ ဖားကန့် ဒေသခံ အမျိုးသားတစ်ဦးက “၁၄၄ မထုတ်တာတောင် ဖမ်းဆီးတာ၊ စစ်ဆေးတာ၊ ပစ်သတ်တာတွေက ဆက်တိုက်ဆိုတော့ အခုက ပိုဆိုးမှာပေါ့ဗျာနော်။ အခု ဒီလိုလိုက်တော့ ဥပဒေမဲ့လုပ်နေရာကနေ ဥပဒေအရ လုပ်တာဆိုပြီး အဖမ်းခံတာ၊ ပစ်သတ်ခံရတာ တွေ ပိုများလာမှာပေါ့ဗျာ” ဟု ပြောသည်။ ညရေးညတာ ကိစ္စများ ပေါ်လာပါက အခက်ကြုံနိုင်သည်ဟု လည်း ပြောသည်။ “ညဘက်တွေမှာ တိုက်ပွဲတွေ ရုတ်တရက် ဖြစ်လာရင်ပေါ့ လူနာတွေကို အရေးပေါ် အခြေအနေအရ ကယ်ဆယ်ရေးလုပ်ဖို့ ကူညီဖို့ ပိုခက်ခဲသွားမယ်။ သွားကယ်တဲ့လူကအစ အဖမ်းခံရတာမျိုး ပစ်သတ်ခံရတာမျိုး တွေ ဖြစ်လာမှာပေါ့နော်” ဟု အဆိုပါ ဒေသခံက ဆက်ပြောသည်။ ဖားကန့်မြို့နယ် (အုပ်ချုပ်ရေးမှူး) က လက်မှတ်ရေးထိုးထားသော အဆိုပါ အမိန့်ကို ရာဇဝတ်ကျင့်ထုံး ဥပဒေပုဒ်မ ၁၄၄ အရ ၂၀၂၅ ခုနှစ်၊ အောက်တိုဘာလ ၈ ရက်နေ့ တွင် စတင် အသက်သွင်းခဲ့သည်။ အဆိုပါ ညမထွက်ရအမိန့် ကို ည ၁၀ နာရီမှ နံနက် ၄ နာရီအထိ သတ်မှတ်ထားသည်။ ယင်းအမိန့်သည် ဖားကန့်မြို့နယ်အတွင်း စစ်ရေးတင်းမာမှုများ ဆက်လက်မြင့်တက်နေဆဲ ဖြစ်ကြောင်းကို ပြသ နေသည်။ KIO/KIA သတင်းနှင့် ပြန်ကြားရေး တာဝန်ခံ ဗိုလ်မှူးကြီးနော်ဘူက “သူတို့ကတော့ အခု ရွေးကောက်ပွဲလည်း နီးလာပြီဆိုတော့ ရွေးကောက်ပွဲနယ်မြေတွေ၊ မဲဆွယ်နယ်မြေတွေ ပိုပြီးမှ တိုးချဲ့နိုင်ဖို့အတွက် လက်လွှတ်ဆုံးရှုံး ခဲ့တဲ့ စခန်းဟောင်းတွေ နေရာဟောင်းတွေ ပြန်ရနိုင်ဖို့အတွက် ကြိုးစားတဲ့ အနေနဲ့ အခုလိုမျိုး ၁၄၄ တွေ ချတာ နေမှာ။ တိုက်ပွဲကို မထိန်းနိုင်လို့ ပြည်သူလူထုဘက်ကို လှည့်ပြီးမှ အဲ့လိုမျိုး လုပ်တာပဲလို့ ကျနော်ကတော့ သုံးသပ်ပါတယ်” ဟု ပြောသည်။ ထို့အပြင် မြို့နယ်အတွင်းရှိ လမ်းမများ၊ လမ်းသွယ်များနှင့် အများပြည်သူနှင့် သက်ဆိုင်သော နေရာများတွင် လူငါးဦး သို့မဟုတ် ငါးဦးထက် ပိုမို၍ စုဝေးခြင်းကို လုံးဝ မပြုလုပ်ရဟု ဆိုသည်။ စုဝေးခြင်း၊ ဟောပြောခြင်း၊ ဖျက်ဆီးခြင်းနှင့် ရုန်းရင်းဆန်ခတ်ပြုမူခြင်းမျိုး မှန်သမျှကိုလည်း တားမြစ်ထားသည်။ ထိုအမိန့်ကို မလိုက်နာပါက တည်ဆဲဥပဒေများ အရ အရေးယူခံရမည် ဖြစ်ကြောင်း ထုတ်ပြန်ချက်တွင် ဖော်ပြ ထားသည်။ ဗိုလ်မှူးကြီးနော်ဘူက “၁၄၄ ထုတ်တာပဲ ဖြစ်ဖြစ်၊ မထုတ်တာပဲ ဖြစ်ဖြစ် ပြည်သူလူထုကို ပစ်ခတ်တာတွေ၊ ဖမ်း ဆီးတာတွေ စစ်ဆေးတာတွေ အများကြီး လုပ်နေတာ။ ဒါပေမယ့် အဲ့ဒီ ၁၄၄ ထုတ်ပြီ ဆိုလို့ရှိရင်တော့ ပိုပြီးမှ သတိထားဖို့ လိုတာပေါ့နော်” ဟု ပြောသည်။ အမိန့်ထုတ်ပြန်ရခြင်း၏ တရားဝင်အကြောင်းပြချက်အဖြစ် စစ်ကော်မရှင်ဘက်မှ ဒေသတွင်း ရာဇဝတ်မှုများနှင့် လုယက်မှုများ များပြားလာခြင်းကြောင့် လုံခြုံရေးထိန်းသိမ်းရန်ဟု ဆိုသည်။ သို့သော် နိုင်ငံရေး လေ့လာသူများနှင့် ဒေသခံများ၏ သုံးသပ်ချက်မှာ မတူညီပေ။ ဖားကန့်မြို့နယ်သည် ကချင်လွတ်လပ်ရေး တပ်မတော် (KIA) နှင့် ပြည်သူ့ကာကွယ်ရေး တပ်ဖွဲ့ (PDF) ပူးပေါင်း တပ်များ၏ ထိုးစစ်ဒဏ်ကို အပြင်းအထန် ခံနေရသောဒေသ ဖြစ်သည်။ စစ်ကော်မရှင်တပ်အနေဖြင့် စစ်ရေးဖိအားကြောင့် လုံခြုံရေးကို အပြင်းအထန် တင်းကျပ်နေရသည်ဟု သုံးသပ်မှု များ ရှိနေသည်။ နိုင်ငံရေးလေ့လာသူများက ဤအမိန့်သည် အရပ်သား ပြည်သူများ၏ လှုပ်ရှားမှုကို ထိန်းချုပ်ရန် နှင့် စစ်ကော်မရှင်တပ်၏ စစ်ရေးလှုပ်ရှားမှုများကို ပိုမို လွယ်ကူစေရန် ရည်ရွယ်ပြီး ထုတ်ပြန်ခြင်း ဖြစ်ကြောင်း ဝေဖန်သုံးသပ်ထားသည်။ ဖားကန့်မြို့နယ်ရှိ ဒေသခံများမှာမူ ညမထွက်ရ အမိန့်ကြောင့် လုပ်ငန်းဆောင်တာများနှင့် လူမှုရေးကိစ္စရပ်များ တွင် အခက်အခဲများစွာနှင့် ရင်ဆိုင်ရနိုင်ပြီး လုံခြုံရေး အခြေအနေအတွက် စိုးရိမ်ပူပန်မှုများ မြင့်တက်နေသည်ဟု ပြောသည်။  ဓါတ်ပုံ - Tarlin Mg

ဖားကန့်တွင် ညမထွက်ရ အမိန့်ထုတ်ပြန်

ဖားကန့်မြို့တွင် ဒရုန်းဗုံးထိမှန်သဖြင့် သားအဖနှစ်ဦးသေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၂၃ ရက်။ ကချင်ပြည်၊ ဖားကန့်မြို့နယ်ထဲက ဆိုင်းတောင် (ဆိပ်မူ)ကျေးရွာ အုပ်စုထဲ စစ်ကော်မရှင်တပ်က ဒရုန်းဖြင့် ဗုံးကြဲခဲ့ရာ သားအဖနှစ်ဦး ထိမှန်သေဆုံးခဲ့သည်။ ကချင်လွတ်လပ်ရေး တပ်မတော် KIA နှင့် ပြည်သူ့ကာကွယ်ရေးတပ်ဖွဲ့ PDF ပူးပေါင်းအဖွဲ့က ထိန်းချုပ်ထားသည့် ဆိုင်းတောင် (ဆိပ်မူ) ကျေးရွာအုပ်စုထဲက ကျောက်သွေးတောင်ကျေးရွာအား စစ်ကော်မရှင်တပ်က ဒရုန်းဖြင့် ဗုံးကြဲခဲ့ခြင်း ဖြစ်သည်။ အဆိုပါ ကျေးရွာအတွင်း နေထိုင်သည့် သားအဖနှစ်ဦးမှာ ဒရုန်းဗုံးထိမှန်သဖြင့် သေဆုံးခဲ့ရသည်ဟု ဒေသခံများ ကပြောသည်။ စစ်ရေး သတင်းအရင်းအမြစ် တစ်ဦးက “ဟုတ်ပါတယ်။ မနေ့ကဘဲ ဒရုန်းနဲ့ချလို့ ပြည်သူနှစ်ယောက် သားအဖ နှစ်ယောက်ပေါ့။ ဒရုန်းဗုံးထိမှန်လို့ သေဆုံးသွားတာ။ လောလောဆယ် စစ်တပ်ဘက်က ဒရုန်းဗုံးသီးချတာတွေက ဆိုင်းတောင်ဘက်တွေမှာ တော်တော်လုပ်နေတာ။ တိုက်ပွဲတော့ဒီ နှစ်ရက် သုံးရက် အတွင်း မရှိဘူး ငြိမ်နေပါ တယ်” ဟု ပြောသည်။ ဖားကန့်ဗျူဟာကုန်းမှ စစ်ကော်မရှင်ပူးပေါင်းတပ်များက စက်တင်ဘာလ ၂၂ ရက်နေ့တွင် ဒရုန်းဖြင့် ဗုံးကြဲချခဲ့ ခြင်း ဖြစ်ကြောင်း ဒေသခံများက ဆိုသည်။ သေဆုံးခဲ့သွားသည့် သားအဖနှစ်ဦးမှာ အသက် ၅၀ ဝန်းကျင်အရွယ် ဦးကျော်စိုး ဆိုသူနှင့် သားဖြစ်သူ မောင်ထူးထူးစံတို့ ဖြစ်သည်ဟု ဒေသခံများက ပြောသည်။ စစ်ကော်မရှင် ပူးပေါင်းတပ်နှင့် တော်လှန်ရေး အင်အားစုများအကြား ပြင်းထန်လာသည့် တိုက်ပွဲကြောင့် ဖားကန့် မြို့နယ်ထဲက ဘေးလွှတ်သည့် နေရာများတွင် တိမ်းရှောင်နေရသည့် ကျေးရွာ ၇ ရွာခန့်မှ ဒေသခံများသည် စက် တင်ဘာလ ၂၀ ရက်နေ့မှ စတင်ကာ မြစ်ကြီးနား၊ မိုးကောင်း၊ မိုးညှင်းစသည့် မြို့နယ်များသို့ ဆက်လက် တိမ်းရှောင်နေကြရသည်။ “ဖားကန့်က လောလောဆယ် စစ်ပွဲတွေကြောင့် စစ်ရှောင်ရွာကတော့ ရွာ ၇ ရွာလောက် ရှိနေပြီ။ ဒီဒေသခံတွေ ကလည်း ဖားကန့်မှာ မလုံခြုံတော့လို့ မိုးညှင်း၊ မြစ်ကြီးနားဘက်တို့ကို ရှောင်နေကြတယ်။ အလံဖြူလေးတွေ ထောင်ပြီး ဆိုင်ကယ်တွေနဲ့ ရွှေ့နေကြတာတွေ့ရတယ်“ ဟု အထက်ပါ စစ်ရေးသတင်းရင်းမြစ်က ဆက် ပြော သည်။ ဖားကန့်မြို့တွင် စစ်ကော်မရှင် ပူးပေါင်းတပ်နှင့် KIA ပူးပေါင်းတပ်တို့အကြားက အပြန်အလှန် ပစ်ခတ်မှုများထဲ အရပ်သား သေဆုံးမှုသည် တစ်နေ့ထက်တစ်နေ့ မြင့်တက်လာနေသည်။ ပြီးခဲ့သည့် စက်တင်ဘာလ ၉ ရက်နေ့တွင်လည်း ထုံးဘိုကျေးရွာရှိ တော်လှန်ရေး အင်အားစုများ၏ အထိုင်ဂိတ် အနီး အမှိုက်ကောက်နေသည့် သားအမိနှစ်ဦး ဒရုန်းဗုံး ထိမှန်ကာ သေဆုံးခဲ့ရသေးသည်။ အာဏာသိမ်းပြီးနောက်ပိုင်း နိုင်ငံတစ်ဝှမ်းတွင် စစ်ကော်မရှင်တပ်၏ လက်ချက်ကြောင့် ဒီမိုကရေစီ အရေး လှုပ်ရှားသူနှင့် အရပ်သား စုစုပေါင်း ၇၂၀၀ ကျော်သေဆုံးခဲ့ရပြီ ဖြစ်ကြောင်း နိုင်ငံရေး အကျဥ်းသားများ ကူညီစောင့်ရှောက်ရေး အသင်း AAPP က စက်တင်ဘာလ ၁၉ ရက်နေ့တွင် ထုတ်ပြန်ထားသည်။ Photo - Tarlin Mg

ဖားကန့်မြို့တွင် ဒရုန်းဗုံးထိမှန်သဖြင့် သားအဖနှစ်ဦးသေဆုံး

ကချင်တွင် တိုက်ပွဲများဖြစ်၊ စစ်ကော်မရှင်က တပ်အင်အား တိုးချဲ့ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၂၃ ရက်။ ကချင်ပြည် ဗန်းမော်၊ ဝိုင်းမော်နှင့် ဖားကန့်တို့တွင် စစ်ရေးတင်းမာမှုများနှင့်အတူ တိုက်ပွဲများ ဆက်လက် ဖြစ်ပွား နေပြီး စစ်ကော်မရှင်တပ်က တပ်အင်အားတိုးချဲ့ဖြည့်တင်းမှုများ လုပ်ဆောင်နေသည်ဟု ကချင်လွတ်လပ်ရေး အဖွဲ့ KIO/KIA က ပြောသည်။ ရွေးကောက်ပွဲမတိုင်ခင် ရှုံးဆုံးသွားသည့် နယ်မြေများအား ပြန်လည်ထိန်းချုပ်နိုင်ရေး ဗန်းမော်၊ ဝိုင်းမော်နှင့် ဖားကန့်ဒေသတို့ကို စစ်ကော်မရှင်က ပြင်းပြင်းထန်ထန် ထိုးစစ်ဆင် တိုက်ခိုက်နေသည်ဟု KIO ပြောရေးဆိုခွင့် ရှိသူ ဗိုလ်မှူးကြီးနော်ဘူက ပြောသည်။ “ကချင်ပြည်နယ်ရဲ့ စစ်ရေးအခြေအနေကတော့ ဗန်းမော်ဘက်က ခါတိုင်းပြောသလိုပေါ့ အမြဲတမ်း တိုက်ပွဲတွေ ရှိပါတယ်။ နောက်ဝိုင်းမော်ဘက်မှာ တိုက်ပွဲရှိပါတယ်။ ဖားကန့်ဘက်မှာ တိုက်ပွဲတွေ ရှိပါတယ်။ အဲဒီ ၃ နေရာ ကတော့ လောလောဆယ် ကချင်ပြည်နယ်မှာ တိုက်ပွဲအခြေအနေတွေ စစ်ရေးအခြေအနေကတော့ တင်းမာတဲ့ အနေအထား ဖြစ်ပါတယ်။ အခု လောလောဆယ်ကတော့ သူတို့လည်း ဒီဇင်ဘာလမှာ ရွေးကောက်ပွဲလုပ်မယ်လို့ အားလုံးအသိ ဖြစ်ပါတယ်။ ရွေးကောက်ပွဲမရောက်ခင်မှာ သူတို့ ကချင်ပြည်နယ် တော်တော်များများမှာ သူတို့ က မဲပုံးတွေထောင်နိုင်ဖို့ မဲရုံတွေထောင်နိုင်ဖို့ စစ်ရေးကနေ တော်တော်ကြိုးစားတဲ့ဟာမျိုး ကြိုးစားတာလို့ ကျနော် သုံးသပ်မိပါတယ်။” တိုက်ပွဲဖြစ်ပွားနေသည့် မြို့နယ် ၃ မြို့နယ်ထဲ စစ်ကော်မရှင်တပ်က တပ်အင်အား ဖြည့်တင်းထားသည်ဟု ဗိုလ်မှူးကြီးနော်ဘူက ဆက်ပြောသည်။ “ဗန်းမော်ဘက်မှာကတော့ သူတို့ရဲ့ ၈ လပိုင်းမှာ သင်္ဘောဝင်တဲ့ အဲဒီနောက်ပိုင်းမှာ သင်္ဘောမှာ စစ်အင်အားတွေ လက်နက်အင်အားတွေ ဖြည့်ထားတယ်။ အဲဒါကြောင့် သူတို့က စစ်ဆင်ရေးတွေလည်း တော်တော် ပြင်းပြင်း ထန်ထန် သူတို့လှုပ်ရှားတာတွေ့ရပါတယ်။ ကျန်တဲ့ ဖားကန့်တို့ ဝိုင်းမော်တို့မှာကတော့ မပခ အင်အားတွေပဲ ဖြစ်မှာ။ အပြင်ကနေ စစ်အင်အားတွေ ဝင်လာတာကတော့ မကြားရသေးပါဘူး။” ဖားကန့်မြို့နယ်ထဲကို ကာမိုင်းဘက်မှ ဝင်လာသည့် စစ်ကော်မရှင် စစ်ကြောင်းမှာ ဖားကန့်ကို ဝင်ရောက်သွားပြီ ဟု ဗိုလ်မှူးကြီးနော်ဘူက ပြောသည်။ ဖားကန့်ကို ဝင်ရောက်ရာ၌ လက်နက်ကြီးများ၊ ဒရုန်းများဖြင့် လူနေရပ်ရွာများထဲ ပစ်ခတ်ခဲ့သည့်အတွက် အရပ် သား ပြည်သူ သေဆုံးမှုများ ရှိခဲ့သည်။ ထို့အပြင် ဗန်းမော်ဘက်တွင် နှစ်ဖက်ကြား စစ်ရေးတင်းမာမှုများနှင့် အတူ စစ်ကော်မရှင်တပ်က လက်နက်ကြီး ဖြင့် ပစ်ခတ်မှုများကို ဆက်တိုက် လုပ်ဆောင်နေသည်ဟု ဆိုသည်။ ဗန်းမော်မြို့က နေရာအချို့ကိုလည်း စစ်ကော်မရှင်တပ်က စက်တင်ဘာလ ဒုတိယပတ်မှစတင်၍ ပြန်လည် ထိန်း ချုပ်နိုင်ပြီ ဖြစ်သည်ဟု KIO ပြောခွင့်ရက ဆိုသည်။ ပြောဆိုပါတယ်။ ဗိုလ်မှူးကြီး နော်ဘူ က “သူတို့ကတော့ ထိန်းချုပ်နိုင်တယ်လို့တော့ ပြောတယ်။ ဒါပေမဲ့ အပြီးအပိုင်ပေါ့နော အားလုံး သူတို့ ထိန်းချုပ်တဲ့အနေအထားတော့ မရှိပါဘူး။ ကျနော်တို့ KIA နဲ့ ပူးပေါင်းတပ်တွေလည်း မြို့တွင်း မှာလည်း နဂိုအတိုင်း ရှိပါတယ်။ နောက် သူတို့ရဲ့တပ်စခန်းတွေ သူတို့ရဲ့ တပ်ရင်းဌာနချုပ် ပတ်ဝန်းကျင်မှာ လည်း ကျနော်တို့လည်း နေရာယူထားတာရှိပါတယ်။ ဆိုတော့ သူတို့လည်း ရှိတယ်။ ကျနော်တို့လည်း ရှိတာ ပေါ့။ အချင်းချင်း စောင့်ကြည့်တဲ့ အနေအထား ဖြစ်ပါတယ်ခင်ဗျာ” ဟု ပြောသည်။ စစ်ကော်မရှင်တပ်က စက်တင်ဘာလ ၁၁ ရက်နေ့တွင် ဗန်းမော် သံချပ်ကာကားတပ်ရင်းနှင့် ခလရ ၂၃၆ ကို ပြန်လည်ထိန်းချုပ်ထားပြီဟု ဗိုလ်မှူးကြီးနော်ဘူက ပြောသည်။ စစ်ကော်မရှင်တပ်က ကချင်ပြည်အပြင် တစ်နိုင်ငံလုံးအတိုင်းအတာဖြင့် ၎င်းတို့ ရှုံးဆုံးထားရသည့် နယ်မြေများ ကို ရွေးကောက်ပွဲ မတိုင်မီ ပြန်လည်ရယူနိုင်ရေး ပြင်းပြင်းထန်ထန် ထိုးစစ်ဆင် တိုက်ခိုက်နေခြင်း ဖြစ်သည်။ ပြန်လည်ရယူဖို့ ကြိုးစားနေသည့် နယ်မြေများ၌ ရွေးကောက်ပွဲ ပြုလုပ်နိုင်ရေး ရည်ရွယ်ချက်ဖြင့် ယခုကဲ့သို့ အင်အား အလုံးအရင်းဖြင့် ထိုးစစ်ဆင် တိုက်ခိုက်နေခြင်း ဖြစ်သည်ဟု တော်လှန်ရေး အင်အားစုများက ပြော သည်။ #ကချင် #ဗန်းမော် #ဖားကန့် #ဝိုင်းမော် #စစ်ကော်မရှင်

ကချင်တွင် တိုက်ပွဲများဖြစ်၊ စစ်ကော်မရှင်က တပ်အင်အား တိုးချဲ့

ဝိုင်းမော်တွင် တိုက်ပွဲပြင်းထန်၊ ကျောင်းအချို့ ပိတ်ထားရ သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၁၀ ရက်။ ကချင်ပြည်၊ ဝိုင်းမော်မြို့နယ်အတွင်း စစ်ကော်မရှင်တပ်နှင့် ကချင်လွတ်လပ်ရေး တပ်မတော် KIA ပူးပေါင်းတပ် တို့ အကြား တိုက်ပွဲများ ဖြစ်ပွားနေပြီး ကျောင်းအချို့ ပိတ်ထားရသည်ဟု ဒေသခံများက ပြောသည်။ ဝိုင်းမော်မြို့နယ်အတွင်းက တိုက်ပွဲများထဲ စစ်တပ်က လေကြောင်းမှ ဗုံးကြဲတိုက်ခိုက်မှုများ လုပ်နေသည်ဟု ဒေသခံများက ပြောသည်။ ဒေသခံ အမျိုးသား တစ်ဦးက “ဒီလိုလေကြောင်း တိုက်ခိုက်မှုတွေကြောင့် စက်တင်ဘာလ ၉ ရက်နေ့ မနေ့က စပြီး ကျောင်းတချို့ ပိတ်ထား လိုက်ရတယ်။ ဒီနေ့လည်း ကျနော်တို့က ကလေးတွေကို စိုးရိမ်လို့ ကျောင်းမပို့ ဘူး။ အခြေနေကို ဆက်စောင့်ကြည့်နေတုန်းဗျ။ မနေ့ကဆို တနေကုန်နီးပါးပဲ အသံတွေ ကြားနေရတာ” ဟု ပြော သည်။ ကျောင်းသားမိဘများ ကလေးများအတွက် စိုးရိမ်ပြီး ကျောင်းမပို့ဘဲ အခြေအနေကို ဆက်ပြီး စောင့်ကြည့်နေကြ သည်ဟု ဆိုသည်။ စက်တင်ဘာ ၉ ရက်နေ့တွင် ဝိုင်းမော်မြို့နယ်ထဲ စစ်တပ်က လေယာဉ်ဖြင့် ဗုံးကြဲခဲ့သည့်အပြင် လမြန်ကျေးရွာနှင့် နမ့်ဝါကျေးရွာ ပတ်ဝန်းကျင်ကိုလည်း မြောက်ပိုင်းတိုင်း စစ်ဌာနချုပ် (မပခ) ဘက်ကနေပါ လက်နက်ကြီးများဖြင့် ဆက်တိုက် လှမ်းပစ်နေသည်ဟု ဆိုသည်။ ထို့အပြင် ဖားကန့်မြို့နယ်ထဲတွင်လည်း စက်တင်ဘာလ ၉ ရက်နေ့က စစ်ကော်မရှင်တပ်၏ လက်နက်ကြီးဖြင့် ပစ်ခတ်မှုတို့ကြောင့် အရပ်သား ၁၀ ဦး ထိမှန်ဒဏ်ရာ ရခဲ့သည်။ ဖားကန့်ဗျူဟာကုန်းမှ ဆိပ်မူကျေးရွာဘက်ခြမ်းကို အကြောင်းမဲ့သက်သက် လက်နက်ကြီး အလုံး (၂၀) ခန့် ပစ်ခဲ့သည်ဟု ဖားကန့်ဒေသခံ တစ်ဦးက ပြောသည်။ ဆိပ်မူကျေးရွာအုပ်စု၊ ဘဇံချောက်ကျေးရွာက အရပ်သားပြည်သူ ၁၀ ဦး ထိမှန်ဒဏ်ရာရခဲ့ပြီး ၄ ဦးမှာ စိုးရိမ်ရ သည်ဟု ဆိုသည်။ အလားတူ စက်တင်ဘာလ ၉ ရက်နေ့၊ နေ့လည် ၂ နာရီအချိန်ခန့်တွင် ဆိပ်မူကျေးရွာ အုပ်စုထဲက ဆန်းကြွယ် ကျေးရွာရှိ ဘုရားကုန်းနေရာဘက်ကို လေယာဉ်ဖြင့် ဗုံးကြဲသွားခဲ့သေးသည်ဟု ဒေသခံများက ပြောသည်။

ဝိုင်းမော်တွင် တိုက်ပွဲပြင်းထန်၊ ကျောင်းအချို့ ပိတ်ထားရ

« Prev 1 2 3 Next »

ဗုဒ္ဓဟူးနေ့ည ရုပ်သံသတင်း (၇-၁၀-၂၆)

ဗုဒ္ဓဟူးနေ့ညပိုင်း ရုပ်သံသတင်း(၇-၁၀-၂၆)

ဒီကနေ့ အစီအစဉ်ထဲမှာတော့-

– ကျိုက်ထိုမြို့နယ်မှာ တိုက်ပွဲမဖြစ်ပဲ စစ်အုပ်စုက အရပ်သားရွာတွေကို ဗုံးကြဲလို့ ထောင်နဲ့ချီထွက်ပြေးနေရ

– ရခိုင်-ဧရာဝတီ အစပ်မှာ တိုက်ပွဲ ပြင်းထန်ပြီး စစ်အုပ်စုက အစုအပြုံလိုက် ကျဆုံးနေ

– ကချင်ပြည်က ရွှေကူ-ငအိုး လမ်းပိုင်း သုံးသူတွေကို အရေးယူသွားမယ်လို့ KIAသတိပေး

– အလုပ်သမားတွေ ဆီက အခွန်နဲ့ လွှဲငွေ ရရှိဖို့ ပိုမို တင်းကြပ်သွားမယ်လို့ စစ်အုပ်စုပြော

– စစ်အုပ်စု ခေါင်းဆောင် ၇-၈ ရက်နေ့တွေမှာ မလေးရှားကို သွားမည်

– လာအို ဒုတိယမြို့တော်လေဆိပ် ကိုယ်ပိုင်လေယာဉ်ပေါ်တင်တဲ့ မူးယစ်ဆေးဝါး ကီလို ၅၀၀ ကျော်ဖမ်းမိ

– မက်ဒေါ်နယ်(McDonald’s)ကုမ္ပဏီဟာ AI သုံးစွဲပြီး လွတ်လပ်စွာ ယှဉ်ပြိုင်ခွင့်ကို ချိုးဖောက်တယ်ဆိုပြီး တရားစွဲခံရ

– ပထမဆုံး FIFA အာဆီယံ ဖလားကို အင်ဒိုနီးရှား အသင်း ပင်နယ်တီ အဆုံးအဖြတ်နဲ့ ဆွတ်ခူး…..စတာတွေ တင်ဆက်ထားပါတယ်။

×Close

News

ဧဝရက်တောင်တန်းအနီး ရဟတ်ယာဉ် နှစ်စီး တိုက်မိပြီး လူတစ်ဦး သေဆုံး — November 4, 2026 2:16 pm
ဥရောပ၌ ခရီးသည်တင် လေယာဉ်နှင့် သင်္ဘောများ ဗုံးခြိမ်းခြောက်ခံရမှု ဆက်တိုက်ဖြစ်ပွား — November 4, 2026 2:09 pm
ရုရှား၊ ယူကရိန်းနှင့် အမေရိကန် သုံးပွင့်ဆိုင် ငြိမ်းချမ်းရေး ဆွေးနွေးပွဲ UAE ၌ ကျင်းပမည် — November 4, 2026 1:54 pm

Recent Posts

မွန်ပြည်နယ် ရေးမြို့နယ်၌ စစ်အုပ်စု စစ်ကြောင်း မိုင်းဆွဲခံရပြီး တပ်ကြပ်ကြီး အပါအဝင် ၃ ဦး ဒဏ်ရာရ
မကွေးတိုင်း ပေါက်မြို့နယ်၌ စစ်အုပ်စု လေကြောင်းတိုက်ခိုက်မှုကြောင့် ပြည်သူ ၇ ဦးသေဆုံး
ဧဝရက်တောင်တန်းအနီး ရဟတ်ယာဉ် နှစ်စီး တိုက်မိပြီး လူတစ်ဦး သေဆုံး
ဥရောပ၌ ခရီးသည်တင် လေယာဉ်နှင့် သင်္ဘောများ ဗုံးခြိမ်းခြောက်ခံရမှု ဆက်တိုက်ဖြစ်ပွား
ရုရှား၊ ယူကရိန်းနှင့် အမေရိကန် သုံးပွင့်ဆိုင် ငြိမ်းချမ်းရေး ဆွေးနွေးပွဲ UAE ၌ ကျင်းပမည်

Archives

Archives

×Close