KIA – Page 2 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Tag Archive

Tag: KIA

Mi-17 ရဟတ်ယာဉ် KIA ပစ်ခတ်မှုကြောင့် အရေးပေါ် ဆင်းသက်ခဲ့ရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၆ ရက်။ တိုက်ပွဲများ ဖြစ်ပွားနေသည့် ကချင်ပြည်၊ ဗန်းမော်မြို့နယ်တွင် စစ်ကော်မရှင် ရဟတ်ယာဉ် တစ်စီး KIA ပစ်ခတ်မှု ကြောင့် ဆီတိုင်ကီ ထိမှန်ကာ အရေးပေါ်ဆင်းသက်ခဲ့ရသည်။ ဗန်းမော်မြို့တိုက်ပွဲအတွင်း ဒဏ်ရာရရှိသွားသည့် စစ်ကော်မရှင် တပ်ရင်းမှူးကို လာရောက်ကယ်ထုတ်သည့် Mi-17 အမျိုးအစား ရဟတ်ယာဉ်တစ်စီးကို ကချင်လွတ်လပ်ရေးတပ်မတော် (KIA) နှင့် ပူးပေါင်းတပ်များက ယနေ့ မတ်လ ၆ ရက် နေ့လယ်ပိုင်းတွင် ပစ်ခတ်တိုက်ခိုက်ခဲ့ခြင်း ဖြစ်သည်။ အဆိုပါ ပစ်ခတ်တိုက်ခိုက်မှုကြောင့် ထိမှန်မှုများရှိပြီး ရွှေကူမြို့အနီးတွင် အရေးပေါ်ဆင်းသက်ခဲ့ရကြောင်း စစ်ရေး သတင်းရင်းမြစ်များက ပြောသည်။ ဖြစ်စဉ်မှာ ယနေ့ မွန်းလွဲ ၂ နာရီခန့်တွင် ဗန်းမော်တိုက်ပွဲအတွင်း ထိခိုက်ဒဏ်ရာရသွားသည့် ဗိုလ်မှူးအဆင့်ရှိ တပ်ရင်းမှူးတစ်ဦးကို လာရောက်ခေါ်ဆောင်စဉ် KIA ပူးပေါင်းတပ်များက လက်နက်ကြီးများဖြင့် ပစ်ခတ် တိုက်ခိုက်ခဲ့ခြင်း ဖြစ်သည်။ ပစ်ခတ်မှုကြောင့် ရဟတ်ယာဉ်၏ ဆီတိုင်ကီနှင့် နောက်ပိုင်းတို့ ထိမှန်သွားပြီး မီးခိုးများအူကာ ရွှေကူမြို့အပြင် ဘက်သို့ အမြန်ဆုံး ဦးတည်ပျံသန်းခဲ့ရသည်။ မြေပြင်သတင်းရင်းမြစ်က “ပုဇင်းက ဗန်းမော်ကနေ ပြန်တက်တာနဲ့ ကျနော်တို့ဘက်က လက်နက်ကြီးနဲ့ လှမ်း ပစ်တဲ့ချိန် ထိသွားတာလို့ ပြောလို့ရတယ်။ ထိသွားတော့ ဆီတိုင်ကီပွင့်သွားတယ်လို့ ပြောတယ်ဗျ။ လေယာဉ်က ပျက်ကျသွားတာမျိုးတော့ မဟုတ်ဘူးနော်။ အခု ကျနော်တို့ ရတဲ့ အချက်အလက်အရဆိုရင် ရွှေကူဘက်မှာ အရေးပေါ် ဆင်းလိုက်ရတဲ့ ပုံစံမျိုးပါ” ဟု ပြောသည်။ ပုဇင်းဆိုသည်မှာ ရဟတ်ယာဉ်ကို ပြောခြင်း ဖြစ်သည်။ အဆိုပါ ရဟတ်ယာဉ်သည် ရွှေကူမြို့အခြေစိုက် ခလရ (၅၆) တပ်ရင်းအတွင်းသို့ ဆင်းသက်ရန် ကြိုးပမ်းခဲ့သော် လည်း မရောက်ရှိမီ မြို့အပြင်ဘက်၌ အရေးပေါ်ဆင်းသက်ခဲ့ရခြင်းဖြစ်ကာ လက်ရှိတွင် Y-12 လေယာဉ် တစ်စီး က ကောင်းကင်မှ အကာအကွယ်ပေးထားသည်ဟုလည်း သတင်းဌာနအချို့တွင် ဖော်ပြကြသည်။ ယနေ့ နေ့လယ်ပိုင်းတွင် ဖြစ်ပွားခဲ့သည့် ရဟတ်ယာဉ် ထိမှန်မှုဖြစ်စဉ်နှင့် ပတ်သက်၍ ကချင်လွတ်လပ်ရေးအဖွဲ့ (KIO/KIA) ပြောရေးဆိုခွင့်ရှိသူ ဗိုလ်မှူးကြီးနော်ဘူက ယခုကဲ့သို့ ပြောသည်။ “ဗန်းမော်ဘက်က တိုက်ပွဲက သိပ်ပြင်းထန်တာတော့ မရှိဘူး။ လေကြောင်းနဲ့ ပစ်တာတွေတော့ ရှိတယ်။ ရဟတ် ယာဉ်တစ်စီး ပစ်ချလိုက်တယ်ဆိုတာကတော့ အခုထက်ထိ confirm မဖြစ်ဘူး။ ပစ်ပြီးမှ ထိတော့ ထိတယ်လို့ တော့ ပြောတယ်။ ရွှေကူမှာ ခနဆင်းပြီးတော့ ပြန်သွားတယ်လို့တော့ ပြောကြတယ်။ Mi-17 လို့တော့ ပြော တယ်။ လူကြီးပိုင်းတွေကိုများ လူလဲတာတွေပေါ့နော် လူနာတွေကို ကယ်ထုတ်တာလား အဲ့လိုမျိုးတော့ သုံးသပ် ကြတယ်။” အလားတူ မတ်လ ၅ ရက်နေ့ကလည်း ဗန်းမော်မြို့နယ်အတွင်း တိုက်ပွဲအချို့ရှိခဲ့သည့်အပြင် စစ်ကော်မရှင်တပ် က လေကြောင်းမှ တစ်ဆင့် ထောက်ပံ့ရေးပစ္စည်းများ လာရောက်ချပေးခဲ့သည့် ဖြစ်စဉ်များရှိခဲ့ကြောင်း ၎င်းက ဆိုသည်။ ဗိုလ်မှူးကြီးနော်ဘူက “ဗန်းမော်ဘက်မှာလည်း တိုက်ပွဲ ရှိတယ်။ လေကြောင်းနဲ့ ပစ်တာတော့ရှိတယ်။ ဒီနေ့ တောင်မှ ပစ္စည်းတွေ ချပေးတယ်လို့ ပြောတယ်။ KIA နဲ့ ပူးပေါင်းတပ်တွေလည်း ထိုးစစ်ဆင်တာတော့ မရှိဘူး။ စစ်ကောင်စီဘက်က ထိုးလာလို့ရှိရင်တော့ ခုခံတိုက်ပွဲ တွေတော့ ရှိပါတယ်” ဟုလည်း မတ်လ ၅ ရက်နေ့တွင် သတင်းနှင့်မီဒီယာကွန်ရက်ကို ပြောဆိုထားသည်။ KIA အနေဖြင့် စစ်အာဏာသိမ်းပြီးနောက်ပိုင်း စစ်ကော်မရှင်၏ တိုက်လေယာဉ်နှင့် ရဟတ်ယာဉ်များကို အကြိမ် ကြိမ် ပစ်ချနိုင်ခဲ့သည်။ ပြီးခဲ့သည့် ၂၀၂၅ ခုနှစ် မေလကလည်း ဗန်းမော်တိုက်ပွဲသို့ စစ်ကူလာသည့် ရဟတ်ယာဉ် ၃ စီးကို တိုက်ခိုက်ခဲ့ရာ တစ်စီးပျက်ကျပြီး ကျန်တစ်စီးမှာ ရွှေကူတွင် အရေးပေါ်ဆင်းသက်ခဲ့ရသည့် သာဓကများ ရှိခဲ့သည်။ ဗန်းမော်မြို့သိမ်းတိုက်ပွဲသည် ၂၀၂၄ ခုနှစ် ဒီဇင်ဘာလမှ စတင်ကာ ယနေ့အထိ တစ်နှစ်ခွဲကျော်ကြာမြင့်လာပြီ ဖြစ်သော်လည်း နှစ်ဖက်စလုံးမှ အရေးပါသည့် တပ်စခန်းများကို လက်လွှတ်ရခြင်း မရှိသေးဘဲ တိုက်ပွဲများမှာ ပြင်းထန်စွာ ဆက်လက်ဖြစ်ပွားနေဆဲဖြစ်သည်။ ယခုဖြစ်စဉ်နှင့် ပတ်သက်၍ စစ်ကော်မရှင်တပ်ဘက်ကမူ တစ်စုံတစ်ရာ ထုတ်ပြန်ခြင်း မရှိသေးပေ။ ဓါတ်ပုံ - ပုံဟောင်း #KIA #KIO #ဗန်းမော်တိုက်ပွဲ #စစ်ကော်မရှင် #Mi-17

Mi-17 ရဟတ်ယာဉ် KIA ပစ်ခတ်မှုကြောင့် အရေးပေါ် ဆင်းသက်ခဲ့ရ

စစ်ကော်မရှင် လေကြောင်းနှင့် လက်နက်ကြီး တိုက်ခိုက်မှုကြောင့် ကလေးများအပါအဝင် အရပ်သားများ သေဆုံး သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဖေဖော်ဝါရီလ ၁၇ ရက်။ ဖားကန့်တွင် လေကြောင်းနှင့် လက်နက်ကြီး ပစ်ခတ်မှုကြောင့် ကလေးငယ်များ အပါအဝင် အရပ်သား ထိခိုက်သေဆုံးမှုများ ဆက်တိုက်ဖြစ်ပွားနေသည်။ ကချင်ပြည်၊ ဖားကန့်ရတနာမြေတွင် တိုက်ပွဲများ ပြင်းထန်နေသည်မှာ နှစ်ပတ်ကျော်ကြာမြင့်လာပြီ ဖြစ်ကာ လုံးခင်းနယ်မြေရဲစခန်း စီးနင်းတိုက်ခိုက်ခံရမှုနှင့်အတူ စစ်ကော်မရှင်တပ်၏ လေကြောင်းနှင့် လက်နက်ကြီးဖြင့် ပစ်ခတ်မှုများကြောင့် ကလေးငယ်များအပါအဝင် အရပ်သားထိခိုက်သေဆုံးမှုများ ဆက်တိုက်ဖြစ်ပွားနေသည်။ ပြီးခဲ့သည့် ဖေဖော်ဝါရီလ ၁၄ ရက်နေ့ နံနက်အစောပိုင်း ၂ နာရီခန့်မှစတင်၍ လုံးခင်းကျေးရွာအုပ်စု၊ ငြိမ်းချမ်းသာယာ (ခေါ်) ခွန်ဆာကုန်းရှိ လုံးခင်းနယ်မြေရဲစခန်းကို ကချင်လွတ်လပ်ရေးတပ်မတော် (KIA/KPDF) ပူးပေါင်းတပ်များက ဝင်ရောက်တိုက်ခိုက်ခဲ့ခြင်းဖြစ်သည်။ အဆိုပါတိုက်ပွဲအတွင်း လုံးခင်းရဲစခန်းကို တော်လှန်ရေးအင်အားစုများက အလုံးစုံရှင်းလင်းနိုင်ခဲ့သော်လည်း စစ်ကော်မရှင်တပ်ဘက်မှ လက်နက်ကြီးနှင့် လေကြောင်းပစ်ကူများကို ကျေးရွာများအတွင်းသို့ ရည်ရွယ်ချက်ရှိရှိ ပစ်ခတ်ခဲ့ခြင်းကြောင့် ပြည်သူများ သေဆုံးဒဏ်ရာရခဲ့ကြသည်။ ဖေဖော်ဝါရီ ၁၄ ရက်နေ့ ညနေပိုင်းတွင် လုံးခင်းရဲစခန်းအနီးရှိ ‘ပြည့်စုံကောင်း’ ထမင်းဆိုင်နောက်ကျော အိမ်ငှားဆောင်ပေါ်သို့ လက်နက်ကြီးကျည် တည့်တည့်ကျရောက်ခဲ့သည့် ဖြစ်စဉ်နှင့် ပတ်သက်၍ ဒေသခံတစ်ဦး က ယခုကဲ့သို့ ပြောသည်။ “ဒီ ၁၄ ရက်နေ့ ညနေ ၄ နာရီခွဲလောက်က လုံးခင်းရွာထဲက အိမ်ခန်းငှားနေတဲ့ အဆောင်ပေါ် စကစ လက်နက် ကြီး ကျတာပါ။ အဲဒီအချိန်က မိသားစုတွေ ထမင်းစားနေကြတဲ့အချိန်၊ ကလေး လေးယောက်နဲ့ လူကြီးနှစ် ယောက် ထိခိုက်ဒဏ်ရာ ရခဲ့ပါတယ်။ လုံးခင်းကို တော်လှန်ရေး အင်အားစုက စီးမိထားချိန် စကစဘက်က ပြည်သူ့တွေ နေအိမ်ကြားထဲကို လက်နက်ကြီးနဲ့ ပစ်ခတ်ခဲ့တာ ဖြစ်ပါတယ်။” တိုက်ပွဲသည် ဖေဖော်ဝါရီလ ၁၅ ရက်နေ့အထိ ဆက်လက်ပြင်းထန်ခဲ့ပြီး ဂျက်လေယာဉ်ဖြင့် တိုက်ခိုက်မှုကြောင့် ဆိုင်းတောင် ရွာဟောင်းလမ်းရှိ RC ဘုရားကျောင်း ထိမှန်ကာ အမျိုးသားတစ်ဦး သေဆုံးခဲ့ရသည်။ ထို့ပြင် ငြိမ်းချမ်းသာယာ အပိုင်း(၂) အတွင်းရှိ နေအိမ်တစ်လုံး လက်နက်ကြီးထိမှန်ကာ အမျိုးသားတစ်ဦး သေဆုံးပြီး သုံးဦး ဒဏ်ရာရရှိခဲ့သည့်အပြင် မီးလောင်ကျွမ်းမှုများလည်း ဖြစ်ပွားခဲ့သည်။ မြေပြင်တွင် တိုက်ပွဲဖြစ်ပွားနေသည့် အခြေအနေကို ဒေသခံ အမျိုးသားတစ်ဦးက ဆက်လက်ပြောပြသည်။ “လုံးခင်းနယ်မြေ ရဲစခန်းအနီး ငြိမ်းချမ်းသာယာ အပိုင်း (၂) က အိမ်တစ်လုံး လက်နက်ကြီးကျည်ကျပြီး မီးလောင်သွားတာလည်း ရှိတယ်။ အခုတော့ ပြည်သူအများစု စစ်ဘေးရှောင်နေကြရပြီ။ ပစ္စည်းဥစ္စာထက် အသက်က အရေးကြီးတာမို့ အကုန်လုံး ဂရုစိုက်ကြဖို့၊ ဘေးကင်းဖို့က အဓိကပေါ့ဗျာနော်” ဟု ပြောသည်။ လက်ရှိတွင် KIA ပူးပေါင်းတပ်များက လုံးခင်းရဲစခန်းကို ဖျက်ဆီးပြီးနောက် ပြန်လည်ဆုတ်ခွာသွားချိန်တွင် စစ်ကော်မရှင်ဘက်မှ ရှမ်းနီတပ် (SNA) ပါဝင်သော စစ်ကူများ ရောက်ရှိလာပြီး ကျေးရွာအတွင်း နေရာယူ ထားသဖြင့် တော်လှန်ရေးတပ်များက ဒရုန်းဖြင့် ပြန်လည်ဗုံးကြဲတိုက်ခိုက်နေကြောင်း ဒေသခံများက ပြောသည်။ ဖားကန့်တွင် ဇန်နဝါရီလ ၃၀ ရက်နေ့ခန့်မှ စတင်ကာ စစ်ကြောင်းထိုးလာသည့် စစ်ကော်မရှင်တပ်နှင့် KIA တို့ အကြား နှစ်ပတ်ကျော်ကြာ ဖြစ်ပွားနေသည့် တိုက်ပွဲများကြောင့် မရှီကထောင်၊ ထုံးဘို နှင့် ဂျန်ကပ် ကျေးရွာတို့မှ ဒေသခံများ တိမ်းရှောင်နေရသည်။ #ဖားကန့်တိုက်ပွဲ #လက်နက်ကြီးပစ်ခတ်မှု #KIA #စစ်ကော်မရှင် #SNA

စစ်ကော်မရှင် လေကြောင်းနှင့် လက်နက်ကြီး တိုက်ခိုက်မှုကြောင့် ကလေးများအပါအဝင် အရပ်သားများ သေဆုံး

ဗန်းမောက်ကို စစ်ကော်မရှင်နှင့် ရှမ်းနီတပ် ပြန်လည်ထိန်းချုပ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၁၀ ရက်။ ဗန်းမောက်မြို့ကို စစ်ကော်မရှင်တပ်နှင့် ရှမ်းနီ တပ်မတော် SNA ပူးပေါင်းတပ် ပြန်လည်ထိန်းချုပ်လိုက်ပြီဟု စစ်ရေးသတင်းရင်းမြစ်များက ပြောသည်။ စစ်ကိုင်းတိုင်းအတွင်း တော်လှန်ရေးအင်အားစုများ သိမ်းပိုက်စိုးမိုးထားသည့် ဗန်းမောက်မြို့ကို လေကြောင်း ပစ်ကူနှင့် အဆင့်မြင့်ဒရုန်းနည်းပညာများကို အသုံးပြုကာ ဖေဖော်ဝါရီ ၈ ရက်နေ့တွင် ပြန်လည်ထိန်းချုပ်သွားခြင်း ဖြစ်သည်ဟု ဆိုသည်။ ပြီးခဲ့သည့် ၂၀၂၅ ခုနှစ်၊ စက်တင်ဘာ ၂၀ ရက်နေ့တွင် တော်လှန်ရေးပူးပေါင်းတပ်များက ဗန်းမောက်မြို့ကို အောင်မြင်စွာ သိမ်းပိုက်နိုင်ခဲ့သော်လည်း ၄ လကျော်ကြာ တန်ပြန်ထိုးစစ်များကို ပြင်းထန်စွာ ရင်ဆိုင်ခဲ့ရခြင်း ဖြစ်သည်။ ဖေဖော်ဝါရီ ၈ ရက်နေ့တွင် စစ်ကော်မရှင်တပ်က တိုက်လေယာဉ် ၃ စင်းဖြင့် အပြင်းအထန် ဗုံးကြဲတိုက်ခိုက်ခဲ့ သဖြင့် မြို့ပေါ်၌ နောက်ဆုံးကျန်ရှိနေသည့် အောင်သာကုန်းရပ်ကွက်မှ တော်လှန်ရေးတပ်ဖွဲ့ဝင်များ ဆုတ်ခွာ ပေးခဲ့ရပြီး မြို့ပေါ်ရပ်ကွက် ၄ ခုလုံးကို လက်လွှတ်လိုက်ရခြင်း ဖြစ်သည်။ ဗန်းမောက်မြို့ကို ပြန်လည်ရရှိရေးအတွက် စစ်ကော်မရှင်တပ်သည် SNA တပ်ကို အဆင့်မြင့်နည်းပညာသုံး လက်နက်များ ထောက်ပံ့ပေးခဲ့ကြောင်း တော်လှန်ရေးအင်အားစုများနှင့် နီးစပ်သည့် ဒေသခံတစ်ဦးက ပြောသည်။ “ဗန်းမောက်မှာ သုံးသွားတာဆိုရင် အဆင့်မြင့် ကင်းထောက်ဒရုန်းနဲ့ ဗန်းမောက်ကို ဝဲတယ်။ ဝဲပြီးတော့မှ လက်နက်ကြီးနဲ့ အတိအကျချိန်ပြီး လှမ်းထုတယ်။ အသေခံဒရုန်းတွေရောပေါ့ တောက်လျှောက်သုံးလာတာ။ အဲ့လိုနဲ့ပဲ ဗန်းမောက်မြို့ကြီးကို အရယူသွားတာ။ ရဲဘော်တွေကတော့ သူတို့လောက်လည်း ဖြုံးလည်းမဖြုံးနိုင် သုံးလည်းမသုံးနိုင်ဆိုတော့ နောက်ဆုတ်ခဲ့ရတာပေါ့။ စစ်ကောင်စီကလည်း တောက်လျှောက်ကူညီနေတာ။” စစ်ကော်မရှင်သည် ဗန်းမောက်မြို့သိမ်း ထိုးစစ်တွင် ဂျက်ဖိုက်တာ တိုက်လေယာဉ်များသာမက Y-12 ယာဉ်များ ဖြင့်ပါ ဗုံးကြဲတိုက်ခိုက်မှုများ ပြုလုပ်ခဲ့သဖြင့် တော်လှန်ရေးတပ်ဖွဲ့ဝင်များဘက်တွင် သေဆုံးမှုများပြားခဲ့ကြောင်း ဆိုသည်။ ထို့ပြင် ဟုမ္မလင်းမြို့ရှိ စစ်ကော်မရှင် ဗျူဟာအဖွဲ့နှင့် တပ်ရင်း ၃ ရင်းခန့်သည် လက်နက်နှင့် လူအင်အား အလုံး အရင်းဖြင့် ကူညီပေးခဲ့သည်ဟု စစ်ကိုင်းနှင့် ကချင်အစပ်ရှိ ကာကွယ်ရေးတပ်ဖွဲ့ဝင်တစ်ဦးက အတည်ပြု သည်။ “ဟုတ်တယ်။ ဆုတ်ခဲ့ရပြီ။ ဟုမ္မလင်းကနေ စကမအဖွဲ့က ဆင်းလာတာ။ စကမ တစ်ဗျူဟာနဲ့ တပ်ရင်း ၃ ရင်း ရှမ်းနီတွေရော။ ကသာ၊ ထီးချိုင့်တို့ကိုလည်း ဖိအားပေးမလို့ ထင်တယ်။ တစ်ခရိုင်တည်း ဖြစ်နေတာကို။ အရေးကြီးတဲ့ နေရာအားလုံး ပေးလိုက်ရတဲ့ သဘောပေါ့လေ။” လက်ရှိတွင် ဗန်းမောက်မြို့ပေါ်၌ စစ်ကော်မရှင်တပ်နှင့် SNA တပ်များ နေရာယူထားပြီး မြို့ခံပြည်သူများမှာ ဘေးလွတ်ရာသို့ ထွက်ပြေးတိမ်းရှောင်နေကြရဆဲ ဖြစ်သည်။ စစ်ရေးအခြေအနေ စောင့်နေကြည့်နေသူများကမူ ဗန်းမောက်မြို့ကို ပြန်လည်ရရှိသွားသည့် ပူးပေါင်းတပ်များ သည် ယခုအခါ အင်အားတောင့်တင်းလာသဖြင့် တော်လှန်ရေးတပ်ဖွဲ့များ ထိန်းချုပ်ထားဆဲဖြစ်သော ဗန်းမောက် တောင်ပိုင်းနှင့် မြောက်ပိုင်းဒေသများအထိ နယ်မြေဖြန့်ကျက် ထိုးစစ်ဆင်လာနိုင်ကြောင်း သုံးသပ်နေကြသည်။ ရွှေနှင့် သစ်ကဲ့သို့သော သယံဇာတ ပေါများသည့် ဗန်းမောက်မြို့သည် ကချင်ပြည်နှင့် ထိစပ်နေသည့် မဟာ ဗျူဟာကျသော မြို့ဖြစ်ပြီး ရှမ်းနီ၊ ကဒူး၊ ကနန်း လူမျိုးစုများ အများစု နေထိုင်ရာ ဒေသတစ်ခုလည်း ဖြစ်သည်။

ဗန်းမောက်ကို စစ်ကော်မရှင်နှင့် ရှမ်းနီတပ် ပြန်လည်ထိန်းချုပ်

မော်လူး လေကြောင်းတိုက်ခိုက်မှု ပကဖ နှင့် KIA ၅ ဦး သေဆုံး သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဇန္နဝါရီလ ၂၃ ရက်။ စစ်ကိုင်းတိုင်း မော်လူးမြို့ ပြည်သူ့ကာကွယ်ရေး အဖွဲ့ (ပကဖ) ရုံးကို လေကြောင်းတိုက်ခိုက်မှုကြောင့် တော်လှန်ရေး တပ်သား ၅ ဦး သေဆုံးခဲ့သည်ဟု ဒေသခံများက ပြောသည်။ စစ်ကိုင်းတိုင်းဒေသကြီး၊ အင်းတော်မြို့နယ်၊ မော်လူးမြို့၊ မာန်ဟဲကျေးရွာရှိ ပြည်သူ့ကာကွယ်ရေးအဖွဲ့ (ပကဖ) ရုံးကို ဇန္နဝါရီလ ၂၁ ရက် ည ၁၁ နာရီခန့်က စစ်ကော်မရှင်တပ်က ဂျက်ဖိုက်တာဖြင့် လေကြောင်းတိုက်ခိုက်မှု ပြုလုပ်ခဲ့သဖြင့် ကာကွယ်ရေးတပ်ဖွဲ့ဝင် ၄ ဦးနှင့် KIA တပ်ဖွဲ့ဝင် ၁ ဦး သေဆုံးခဲ့ခြင်း ဖြစ်သည်။ အဆိုပါ တိုက်ခိုက်မှုကြောင့် အရပ်သား ၂ ဦး ထိခိုက်ဒဏ်ရာရရှိခဲ့သည့်အပြင် နေအိမ် ၂ လုံးနှင့် နွားတစ်ကောင် လည်း သေဆုံးပျက်စီးခဲ့ရသည်။ ကာကွယ်ရေးတပ်ဖွဲ့ဝင်များနှင့် နီးစပ်သည့် မော်လူးဒေသခံတစ်ဦးက “တည်နေရာကို သိလို့ကို တိုက်ခိုက်တာပေါ့နော်။ ပြီးတော့ ရုံးကလည်း လမ်းဘေးမှာလည်း ရှိနေတာပဲလေ။ အဲ့ဒီနေရာက တည်နေရာ လည်း ပေါက်ထားပြီးသားနေရာ” ဟု ပြောသည်။ ပြီးခဲ့သည့် ဇန်နဝါရီလ ၂ ရက်နေ့ကလည်း မာန်ဟဲကျေးရွာနှင့် တစ်ဆက်တည်းရှိသည့် ပဲခူးကျေးရွာမှ ပြည်သူ့ လုံခြုံရေးအဖွဲ့ (ပလဖ) ရုံးကို လေကြောင်းတိုက်ခိုက်ခဲ့ရာတွင် ၁၂ တန်းကျောင်းသူတစ်ဦး သေဆုံးခဲ့သေးသည်။ ထိုသို့ တော်လှန်ရေးတပ်ဖွဲ့များ၏ ရုံးနှင့် စခန်းများကို လူနေကျေးရွာများအတွင်း ထားရှိခြင်းကြောင့် လေကြောင်း တိုက်ခိုက်ခံရသည့်အခါ အရပ်သားများ မကြာခဏ ထိခိုက်သေဆုံးနေရမှုအပေါ် ဒေသခံများ အကြား ဝေဖန်ထောက်ပြမှုများ မြင့်တက်လာလျက်ရှိသည်။ တော်လှန်ရေးတပ်ဖွဲ့များ၏ ရုံးနှင့် စခန်းများကို ကျေးရွာများနှင့် အနည်း ဆုံး ၃ မိုင်ခန့် အကွာတွင်သာ နေရာချသင့်သည်ဟု ဒေသခံများ ပြောသည်။ ဒေသခံတစ်ဦးက “ပဲခူးရွာနားက ၁၂ တန်း ကျောင်းသူလေး သေတုန်းကလည်း အမှတ်တကယ်တော့ အဲ့နားမှာ ပလဖရုံးရှိတာ။ အဲ့ဒီရုံးကို ကြဲတာ ဒါပေမဲ့ အဲ့ရုံးကိုမထိဘဲ အဲ့ကျောင်းသူလေးကို သွားထိတာပေါ့။ စစ်ရေး အရ ဆိုရင် ဂိတ်တွေ တော်လှန်ရေးတပ်ဖွဲ့ရဲ့ ရုံးတွေကို စစ်ရေးအရ သတ်မှတ်ထားပြီးသား။ စစ်ဘက်ဆိုင်ရာက သတ် မှတ်ထားပြီးသား။ ဒါပေမဲ့ မလိုက်နာကြဘူး။ ရပ်ရွာနဲ့ အနည်းဆုံး ၃ မိုင်အကွာမှာ နေရမယ်ပေါ့နော်” ဟု ပြောသည်။ ပဲခူးကျေးရွာတွင် ကျောင်းသူတစ်ဦး သေဆုံးခဲ့ရပြီးနောက် ဒေသခံများက ဆန္ဒပြကန့်ကွက်မှုများ ပြုလုပ်ခဲ့သဖြင့် အဆိုပါ ပလဖရုံးကို ပြောင်းရွှေ့ပေးခဲ့ရသည်။ လက်ရှိတွင် စစ်ကိုင်းနှင့် ကချင်အစပ်ရှိ ကသာမြို့၌ မြို့သိမ်းတိုက်ပွဲများ ပြင်းထန်နေသဖြင့် စစ်ကော်မရှင်တပ်က လေကြောင်း တိုက်ခိုက်မှုများကို ဆက်တိုက်လုပ်ဆောင်နေသည်။ အလားတူ ကောလင်းနှင့် ဝန်းသိုမြို့နယ်အစပ်တွင်လည်း စစ်ကြောင်းပတ်ထိုးနေသဖြင့် တိုက်ပွဲများ ပြင်းထန်နေ ပြီး၊ ဇန်နဝါရီလ ၂၀ ရက်နေ့က ကောလင်းမြို့နယ် အရှေ့ခြမ်းရှိ ပကဖရုံး လေကြောင်းတိုက်ခိုက်ခံရမှုတွင်လည်း ပကဖ အဖွဲ့ဝင် ၈ ဦး သေဆုံးခဲ့သည်။ #မော်လူးလေကြောင်းတိုက်ခိုက်မှု #စစ်ကိုင်းတိုင်း

မော်လူး လေကြောင်းတိုက်ခိုက်မှု ပကဖ နှင့် KIA ၅ ဦး သေဆုံး

တနိုင်းဒေသ တိုက်ပွဲများ ပြင်းထန်၊ ဗျူဟာ စခန်းနှင့် မှော်များကို စစ်ကော်မရှင် ထိုးစစ်ဆင် သတင်းနှင့် မီဒီယာ ကွန်ရက် ၂၀၂၆ ခုနှစ်၊ ဇန္နဝါရီလ ၈ ရက်။ ကချင်ပြည်၊ တနိုင်းမြို့နယ်အတွင်းရှိ အချက်အချာကျသော နမ်ဗျူစခန်းနှင့် ပယင်း၊ ရွှေမှော်ဒေသများကို ထိန်းချုပ်နိုင်ရန် စစ်ကော်မရှင်တပ်က အင်အားအလုံးအရင်းဖြင့် အပြင်းအထန် ထိုးစစ်ဆင်နေ သည်ဟု ဒေသခံများနှင့် မြေပြင်သတင်းရင်းမြစ်များက ပြောသည်။ လွန်ခဲ့သည့် ဒီဇင်ဘာလ ဒုတိယပတ်ကတည်းက စတင်ခဲ့သည့် ထိုးစစ်ဆင် တိုက်ခိုက်မှုများသည် ယနေ့အထိ ပြင်းထန်နေ ဆဲဖြစ်ပြီး စစ်ကော်မရှင်တပ်သည် ဒရုန်းများ၊ လက်နက်ကြီးများနှင့် လေကြောင်းတိုက်ခိုက်မှုများကို အဆက် မပြတ် အသုံးပြုနေသည်။ ထိုသို့ ထိုးစစ်ဆင်မှုကြောင့် နမ်ဗျူနှင့် လမုန်ခ မှော်အနီးရှိ ကချင်လွတ်မြောက်ရေးတပ်မတော် (KIA) တပ်ရင်း (၁၄) ၏ ကာကင်းစခန်းအချို့ လက်လွှတ်ခဲ့ရသည်။ တိုက်ပွဲများကြောင့် မှော်လုပ်သား သောင်းနှင့်ချီ၍ မြို့ပေါ်၌ ခိုလှုံနေကြရသည်။ ပယင်းမှော်မှ ထွက်လာသည့် မှော်လုပ်သားတစ်ဦးက “မှော်ထဲမှာက နေလို့ အဆင်မပြေတော့လို့ပါ။ ဦးလေးက ပြီးခဲ့တဲအပတ်ထဲက မြစ်ကြီးနားကို ပြန်ရောက်လာပြီလေ။ မှော်ထဲမှာလည်း အများကြီး ကျနေသေးတယ်။ ဦးလေးတို့ မှော်ထဲမှာ ရှိနေတုန်းကဆိုရင် လက်နက်ကြီးတွေက နေ့တိုင်းကျနေတာ၊ အလုပ်လည်း လုပ်လို့မရ ဘူး။ တချို့ကတော့ အခြေအနေစောင့်ကြည့်အုံးမယ်ဆိုပြီး နေခဲ့ကြတာ” ဟု ပြောသည်။ ထို့ပြင် စစ်ကော်မရှင်နှင့် လက်တွဲနေသော ဝါရာဇွပ်ပြည်သူ့စစ်နှင့် ရှမ်းနီပြည်သူ့စစ်အဖွဲ့များသည်လည်း ပယင်းနှင့် ရွှေမှော်များကို စီးနင်းရန်အတွက် နမ်ဗျူစခန်းဘက်သို့ ဦးတည်ကာ စစ်ကော်မရှင်တပ်နှင့်အတူ စစ်ကြောင်းထိုးလျက်ရှိသည်ဟု မြေပြင် သတင်း ရင်းမြစ်က ပြောသည်။ စစ်ကော်မရှင်၏ တနိုင်းဒေသကွပ်ကဲမှု စစ်ဌာနချုပ် (ဒကစ) က မှော်ဒေသများအတွင်းသို့ လက်နက်ကြီးများဖြင့် ဆက်တိုက်ပစ်ခတ်နေပြီး မှော်အတွင်းရှိ ပြည်သူများကို အမြန်ဆုံးထွက်ခွာရန် အမိန့်ထုတ်ပြန်ထားသည်။ စစ်ဘေးရှောင်များ ရုတ်တရက် အလုံးအရင်းနှင့် ရောက်ရှိလာခြင်းကြောင့် တနိုင်းမြို့ပေါ်ရှိ အိမ်ငှားခနှင့် အခန်းခ များသည် ယခင်ကထက် ၃ ဆနီးပါးအထိ ဈေးတက်သွားကြောင်း ဒေသခံများ၏ ပြောဆိုချက်ကို ကိုးကား၍ ကချင်သတင်းဌာနက KNG က ဖော်ပြထားသည်။ ယခင်က ကျပ်နှစ်သိန်းဝန်းကျင်သာရှိသည့် လုံးချင်းအိမ်ငှားခမှာ ကျပ်ငါးသိန်းအထိ ဖြစ်လာပြီး အခန်းငှားခများ မှာလည်း တစ်သိန်းခွဲအထိ စျေးတက်လာသဖြင့် လက်လုပ်လက်စား မိသားစုများမှာ နေရေးထိုင်ရေး အကျပ် အတည်းနှင့် ရင်ဆိုင်နေရသည်ဟု ဆိုသည်။ တနိုင်းဒေသခံ လူငယ်သူတစ်ဦးက “သူတို့ ဒီဗမာစစ်တပ်က ရွေးကောက်ပွဲလုပ်ဖို့ နယ်မြေစိုးမိုးရေးအတွက် မှော်တွေကို ထိုးစစ်ဆင်နေတာလို့ မြင်တယ်။ ဒီမှာက အဲ့လိုမျိုးလည်း သုံးသပ်ကြတာပေါ့နော်။ ဒါပေမဲ့ လက်တွေ့မှာတော့ လူထုက မဲပေးဖို့ထက် အသက်ရှင်ဖို့အတွက် တနိုင်းမြို့ပေါ်ကို ပြေးနေရတာပါ။ အိမ် ငှားခတောင် မတတ်နိုင်တဲ့ ပြည်သူတွေအတွက် ဒီရွေးကောက်ပွဲက ဘာမှအဓိပ္ပာယ်မရှိပါဘူး” ဟု ပြောသည်။ လက်ရှိတွင် စစ်ကော်မရှင်တပ်သည် စစ်ရေးဖိအားပေးမှုများ အပြင် နိုင်ငံရေးအရလည်း ၎င်းတို့ကျင်းပမည့် ရွေးကောက်ပွဲအတွက် နယ်မြေစိုးမိုးမှုရရန် ကြိုးပမ်းနေခြင်းဖြစ်သည်ဟု ဒေသတွင်းက တက်ကြွလှုပ်ရှား သူများနှင့် စစ်ရေးလေ့လာသူများက သုံးသပ်ကြသည်။

တနိုင်းဒေသ တိုက်ပွဲများ ပြင်းထန်၊ ဗျူဟာ စခန်းနှင့် မှော်များကို စစ်ကော်မရှင် ထိုးစစ်ဆင်

တော်လှန်ရေးတပ်များ စခန်း ၄ ခု သိမ်းပြီး ကသာ မြို့လယ်သို့ ရောက်ရှိ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၂ ရက်။ တော်လှန်ရေး ပူးပေါင်းတပ်များက ကသာမြို့လယ်အထိ ထိုးစစ်ဆင်နိုင်ခဲ့ပြီး စစ်ကော်မရှင် အခြေစိုက်စခန်း ၄ ခုကို သိမ်းပိုက်ထားနိုင်သည်ဟု မြေပြင်စစ်ရေး သတင်းရင်းမြစ်များက ပြောသည်။ စစ်ကိုင်းတိုင်းနှင့် ကချင်ပြည်အစပ်ရှိ ဗျူဟာကျသည့် ခရိုင်ရုံးစိုက်ရာ ကသာမြို့သိမ်းတိုက်ပွဲကို ရွေးကောက်ပွဲ မတိုင်မီ ၂ ရက်အလို ဒီဇင်ဘာ ၂၆ ရက်က စတင်ခဲ့ခြင်း ဖြစ်သည်။ တိုက်ပွဲ အတွင်း တော်လှန် ရေးပူးပေါင်းတပ်ဖွဲ့များက မြို့ပြင်ရှိ ကာကင်းစခန်း ၂ ခုကို ရှေးဦးစွာ သိမ်းပိုက်နိုင်ခဲ့ခြင်းဖြစ်ပြီး၊ ဒီဇင်ဘာလ ၃၀ ရက်နေ့တွင် မြို့တွင်းရှိ စစ်ကောင်စီတပ်စွဲထားရာ အမှတ် (၅) ရပ်ကွက်မှ စိုးမိုးကုန်း (ဘုန်းကြီးကျောင်း) နှင့် အမှတ် (၈) ရပ်ကွက်ရှိ စေတီကုန်းအထိုင်စခန်းတို့ကိုပါ ထပ်မံ သိမ်းပိုက်နိုင်ခဲ့ခြင်း ဖြစ်သည်။ ကသာဒေသခံ တော်လှန်ရေးတပ်ဖွဲ့ဝင်တစ်ဦးက မြေပြင်စစ်ရေးအခြေအနေနှင့် ပတ်သက်၍ ယခုကဲ့သို့ အတည်ပြု ပြောဆိုသည်။ “လက်ရှိကတော့ စခန်း ၄ ခု ရထားပြီ။ တော်လှန်ရေးတပ်တွေ မြို့ထဲကို တောက်လျှောက်ဝင်သွားပြီး မြို့ရဲ့ တစ်ဝက်လောက် ရောက်နေပြီ။ မြို့လယ်ခေါင်လို့တောင် ပြောလို့ရပါတယ်။ စစ်ကောင်စီဘက်ကတော့ ခမရ ၃၀၉ တပ်ရင်းတစ်ခုကနေပဲ အဓိကခုခံနိုင်တော့တဲ့ အခြေအနေပါ။” အမျိုးသားညီညွတ်ရေး အစိုးရ (NUG) လက်အောက်ခံ PDF တပ်ဖွဲ့များနှင့် ကချင်လွတ်လပ်ရေး တပ်မတော် (KIA) ပူးပေါင်းတပ်များ၏ ထိုးစစ်ဆင်မှုကြောင့် စစ်ကော်မရှင်တပ်သည် မြေပြင်လမ်းကြောင်းများ ပြတ်တောက်နေသည်ဟု ဆိုသည်။ ဇန်နဝါရီ ၂ ရက် ယနေ့နံနက်ပိုင်းတွင် ထောက်ပို့လေယာဉ် ၂ စီးအသုံးပြုကာ ခမရ ၃၀၉ တပ်ရင်းအတွင်းသို့ ရိက္ခာနှင့် စစ်ကူတပ်သားများ လေကြောင်းမှတစ်ဆင့် ချပေးခဲ့သည်။ စစ်ကော်မရှင်တပ်သည် ခမရ ၃၀၉ တပ်ရင်းအတွင်းမှ နေ၍ ဒရုန်းနှင့် လက်နက်ကြီးများအသုံးပြုကာ မြို့ပေါ် ရပ်ကွက်များသို့ နေ့စဉ်ဗုံးကြဲတိုက်ခိုက်နေသဖြင့် လူနေအိမ်အများအပြား မီးလောင်ပျက်စီးလျက်ရှိသည်။ ထို့အပြင် Y-12 လေယာဉ်ဖြင့် မြို့ပတ်ပတ်လည်ကို ဗုံးအလုံးပေါင်း ၆၀ ကျော် ဆက်တိုက်ကြဲချခဲ့သလို မြို့အဝင် အထွက်လမ်းများကိုလည်း ပိတ်ဆို့ထားခဲ့သည်။ သို့သော်လည်း ဒီဇင်ဘာလ ၃၁ ရက်နေ့တွင် တော်လှန်ရေးတပ်ဖွဲ့များက လမ်းကြောင်းများ ရှင်းလင်းပေးခဲ့သဖြင့် မြို့ခံပြည်သူများသည် ဘေးလွတ်ရာသို့ အစုလိုက်အပြုံလိုက် ထွက်ခွာနိုင်ခဲ့ကြသည်။ ကသာမြို့မှ စစ်ဘေးရှောင်လာသည့် ဒေသခံတစ်ဦးက ၎င်းတို့ကြုံတွေ့ခဲ့ရသည့် အခြေအနေကို ယခုကဲ့သို့ ပြောပြသည်။ “အရင်နေ့တွေက စစ်တပ်က မြို့ထွက်လမ်းတွေအကုန် ပိတ်ထားတာ။ အခု PDF တွေက မြို့တစ်ဝက်ရပြီ ဆို တော့မှ သူတို့ထိန်းထားတဲ့ နေရာတွေကနေ ပြည်သူတွေ ထွက်လာနိုင်တာပါ။ တော်လှန်ရေးအဖွဲ့တွေက လမ်း ရှင်းပေးတာ၊ ကူညီပေးတာတွေ လုပ်ပေးတယ်။ လေယာဉ်ကလည်း တစ်ညလုံး ဗုံးတွေပတ်ချနေတာ။” လက်ရှိတွင် ကသာမြို့၏ တစ်ဝက်နီးပါးကို တော်လှန်ရေးတပ်များက ထိန်းချုပ်ထားပြီး ခမရ ၃၀၉ တပ်ရင်း အနီးနှင့် ဇေယျာချောင်ရပ်ကွက်များ၌ တိုက်ပွဲများ ဆက်လက်ပြင်းထန်နေသည်။ တိုက်ပွဲအတွင်း စစ်ကော်မရှင် တပ်သား ၅၀ ကျော်ကို အရှင်ဖမ်းမိထားပြီး လက်နက်ခဲယမ်း အချို့ကိုလည်း သိမ်းဆည်းရမိထားသည်ဟု ဆိုသည်။ ကသာခရိုင်အတွင်းရှိ အင်းတော်နှင့် ဗန်းမောက်မြို့များကို ၂၀၂၅ ခုနှစ်အတွင်း တော်လှန်ရေးတပ်ဖွဲ့များက သိမ်းပိုက်ထိန်းချုပ်ထားပြီးဖြစ်ရာ၊ ခရိုင်မြို့ဖြစ်သည့် ကသာကိုပါ သိမ်းပိုက်နိုင်ရေး ထိုးစစ်ဆင်နေခြင်း ဖြစ်သည်။ သို့သော် စစ်ကော်မရှင်တပ်က လေကြောင်းနှင့် လက်နက်ကြီးများကို အလွန်အကျွံ အသုံးပြု၍ ခုခံနေသဖြင့် အရပ်သားထိခိုက်မှုများ ပိုမိုရှိလာနိုင်မည်ကို ဒေသခံများက စိုးရိမ်လျက်ရှိကြသည်။ ကသာ မြို့သိမ်း တိုက်ပွဲနှင့်အတူ ဗန်းမော် တိုက်ပွဲကိုလည်း တော်လှန်ရေး တပ်ဖွဲ့များက စစ်ရှိန် ပြန်မြှင့်ထားခဲ့သည်။

တော်လှန်ရေးတပ်များ စခန်း ၄ ခု သိမ်းပြီး ကသာ မြို့လယ်သို့ ရောက်ရှိ

ကချင်တွင် မဲစာရင်းမှားယွင်းမှုနှင့် တင်းမာမှုများကြောင့် မဲပေးသူ နည်းပါး သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၂၈ ရက်။ စစ်ရေးတင်းမာမှုကြား ကချင်တွင် ဟန်ပြမဲရုံများဖွင့်ထားပြီး မဲစာရင်းမှားယွင်းမှုနှင့် ခြိမ်းခြောက်မှုများကြောင့် ပြည်သူများစိုးရိမ်နေကြသည်။ ကချင်ပြည် အတွင်းရှိ မြို့နယ်အချို့ကို ကချင်လွတ်လပ်ရေး တပ်မတော် (KIA) နှင့် ပူးပေါင်းတပ်ဖွဲ့များက ထိန်းချုပ်ထားချိန်တွင် စစ်ကော်မရှင်သည် မြစ်ကြီးနားနှင့် ပူတာအိုကဲ့သို့သော မြို့ပေါ်ရပ်ကွက်အချို့၌သာ ရွေးကောက်ပွဲကို အတင်းအကျပ် ကျင်းပနေသည်ဟု မြို့ခံများက ပြောသည်။ သို့သော် မဲစာရင်းမှားယွင်းမှုများနှင့် စစ်ရေးတင်းမာမှုများကြောင့် မဲရုံများတွင် လူသူကင်းမဲ့ နေကြောင်း မြို့ခံများက ပြောသည်။ ယနေ့ (ဒီဇင်ဘာ ၂၈ ရက်) ကျင်းပသည့် ရွေးကောက်ပွဲအပိုင်း (၁) တွင် ကချင်ပြည်နယ်မှ မြစ်ကြီးနား၊ တနိုင်း၊ ခေါင်လန်ဖူး၊ နောင်မွန်၊ ပူတာအိုနှင့် မိုးညှင်းမြို့နယ်တို့ ပါဝင်သည်။ သို့သော် ရွေးကောက်ပွဲမတိုင်မီ တစ်ရက်အလိုအထိ ဒေသခံအများစုမှာ သတင်းအချက်အလက် ရရှိမှုအားနည်း နေပြီး ပါဝင်ယှဉ်ပြိုင်မည့် ကိုယ်စားလှယ်များကိုပင် မသိရှိကြကြောင်း မြစ်ကြီးနားမြို့ခံများက ဆိုသည်။ မြစ်ကြီးနားမြို့၊ မြို့သစ်ကြီးရပ်ကွက်နေ ပြည်သူတစ်ဦးက “မနက်ဖြန်လုပ်မှန်းတောင် မသိဘူး။ ရပ်ကွက်၊ အိမ်မှာလည်း ဘယ်သူမှ ဘာမှ လာမပြောကြဘူး။ ဘယ်မှာ သွားထည့်ရမှန်းလည်း မသိဘူး" ဟု မြေပြင် အခြေအနေကို ပြောသည်။ ထို့အပြင် မဲစာရင်းများတွင် နာမည်စာရင်းမပါဝင်သူများ ရှိနေသည့်အပြင် သေဆုံးပြီးသူများ၏ နာမည်များ ပါဝင်နေခြင်းကြောင့် မဲစာရင်းသွားရောက်ကြည့်ရှုသူများအကြား ဝေဖန်မှုများ ထွက်ပေါ်နေသည်။ အလားတူ ပူတာအိုမြို့နယ်တွင်လည်း အုပ်ချုပ်ရေးအဖွဲ့များက အိမ်ထောင်စုစာရင်းများ လိုက်လံကောက်ယူကာ ဓာတ်ပုံရိုက်ယူမှုများ ပြုလုပ်ခဲ့သဖြင့် ဒေသခံများမှာ ဖမ်းဆီးခံရမည်ကို စိုးရိမ်နေကြသည်။ ပူတာအိုဒေသခံတစ်ဦးက “ဒီအိမ်ထောင်စုစာရင်းက စစ်တပ်ကလူတွေဆီမှာ ရှိတယ်။ ဆိုတော့ မဲသွားမထည့်ရင် သိမှာစိုးရိမ်တယ်။ အဲ့ဒါကြောက်တယ်လေနော်။ စိုးရိမ်လို့ မဲထည့်တဲ့ဘက်ပဲ ဖြစ်မှာ” ဟု ပြောသည်။ စစ်ကော်မရှင်သည် မြစ်ကြီးနားမြို့ပေါ်ရှိ သီတာ၊ မင်းရပ်နှင့် အောင်နန်းရိပ်သာရပ်ကွက်များတွင် မဲရုံများ ပြင်ဆင်ကာ ပြည်နယ်ဝန်ကြီးချုပ် ဦးခက်ထိန်နန်နှင့် တိုင်းမှူး ဗိုလ်ချုပ်အောင်ဇော်ထွေးတို့က ကွင်းဆင်းစစ်ဆေး မှုများ ပြုလုပ်ခဲ့သော်လည်း၊ ဖားကန့်၊ ဝိုင်းမော်နှင့် ကျန်မြို့နယ်အများစုတွင်မူ ရွေးကောက်ပွဲ လုံးဝကျင်းပနိုင်ခြင်း မရှိပေ။ ယနေ့တွင်ပင် ဖားကန့်မြို့၌ ပေါက်ကွဲမှုဖြစ်ပွားကာ ဒေသခံတစ်ဦး သေဆုံးခဲ့သဖြင့် လုံခြုံရေးအခြေအနေမှာ ပိုမိုစိုးရိမ်စရာ ဖြစ်နေသည်။ ကချင်သတင်းဌာန (KNG) ၏ အယ်ဒီတာချုပ် ကိုဆမ်နော်ကလည်း ယခုရွေးကောက်ပွဲသည် ယခင်ရွေးကောက်ပွဲများနှင့် လုံးဝမတူဘဲ ပြည်သူများ သိရှိမှုပင် မရှိကြောင်း သုံးသပ်သည်။ “ဒီနေ့မှာ မဲမထည့်ကြဘူး။ မဲရုံတွေက တော်တော်လေး ခြောက်ကပ်နေတယ်။ သတ်မှတ်ထားတဲ့ မြို့နယ်တွေဆိုတာထက် မြို့ပေါ်တွေမှာပဲ လုပ်နေတယ်ဆိုတဲ့ သတင်းမျိုး ရရှိထားတယ်” ဟု ၎င်းက ပြောသည်။ ထို့အပြင် ယခုရွေးကောက်ပွဲအပြီးတွင်လည်း စစ်တပ်နှင့် မဟာမိတ်ဖြစ်သည့် USDP ကဲ့သို့သော ပါတီများသာ အစိုးရဖြစ်လာမည်ဟု ပြည်သူများက ကြိုတင်မှတ်ချက်ပြုထားကြကြောင်းလည်း ကိုဆမ်နော်က ဆက်လက် ပြောဆိုသည်။ လက်ရှိတွင် တနိုင်းမြို့နယ်နှင့် မြစ်ကြီးနား-မြစ်ဆုံလမ်းပေါ်ရှိ အောင်မြင်သာကျေးရွာတို့တွင်လည်း စစ်ကော် မရှင်တပ်များက မဲရုံများ၌ လုံခြုံရေးယူထားသော်လည်း အနီးတစ်ဝိုက်တွင် စစ်ကြောင်းထိုးမှုများရှိနေသဖြင့် စစ်ရေးတင်းမာနေသည်။ ကချင်လွတ်လပ်ရေးတပ်မတော် (KIA) ဘက်ကလည်း ယခုရွေးကောက်ပွဲသည် တရားမဝင်ကြောင်း ကြိုတင် သတိပေးထားသဖြင့် ကချင်ပြည်အတွင်းရှိ စစ်ကော်မရှင်၏ ရွေးကောက်ပွဲမှာ မြေပြင်တွင် နယ်မြေစိုးမိုးမှု ကင်းမဲ့နေပြီး ကျရှုံးနေသည့် အခြေအနေသာ ဖြစ်ကြောင်း နိုင်ငံရေးလေ့လာသူများက သုံးသပ်ကြသည်။ ဓါတ်ပုံ - MOI

ကချင်တွင် မဲစာရင်းမှားယွင်းမှုနှင့် တင်းမာမှုများကြောင့် မဲပေးသူ နည်းပါး

ကချင်ပြည် မြို့နယ် ၃ ခုတွင် တိုက်ပွဲများ ဆက်ဖြစ်နေ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၂၀ ရက်။ ကချင်ပြည်ထဲက မိုးကောင်း၊ ဗန်းမော်နှင့် ဝိုင်းမော်မြို့နယ်တို့တွင် စစ်ကော်မရှင်တပ်နှင့် ကချင်လွတ်လပ်ရေး တပ်မတော် KIA ပူးပေါင်းအဖွဲ့တို့ကြား ဒီဇင်ဘာလ ၁၈ ရက်နေ့အထိ တိုက်ပွဲများ ဖြစ်ပွားနေပြီး စစ်ကူလာသည့် ပြည်သူ့စစ် ဒုခေါင်းဆောင် သေဆုံးသွားသည်။ မိုးကောင်းမြို့နယ်အတွင်း စစ်ကော်မရှင်တပ်နှင့် ကချင်လွတ်လပ်ရေး တပ်မတော် (KIA) ပူးပေါင်းတပ်များ အကြား တိုက်ပွဲများ ပြင်းထန်နေပြီး စစ်ကူလာသည့် ပြည်သူ့စစ် ဒုတိယခေါင်းဆောင် ဦးမြင့်ဦး ဒရုန်းဗုံးထိမှန် သေဆုံးသွားကြောင်း မြေပြင်သတင်းရင်းမြစ်က ပြောသည်။ မြေပြင်သတင်းရင်းမြစ် တစ်ဦးက “ဒီဘက်မှာ တိုက်ပွဲတွေက ခဏခဏဖြစ်နေတာ။ အခုသေသွားတဲ့ ဦးမြင့်ဦး ဆိုတာကလည်း စစ်တပ်အားကိုးနဲ့ ပြည်သူတွေကို ဒုက္ခပေးနေတဲ့သူပါ။ သူတို့က စစ်ကြောင်းနဲ့အတူ လိုက်လာ ပြီး အခုလို တိုက်ပွဲဖြစ်တော့ ဒရုန်းဗုံးထိပြီး သေတာပဲ။ တိုက်ပွဲတွေကြောင့် ကျနော်တို့ ပြည်သူတွေလည်း ဘယ်မှမသွားရဲဘဲ အိမ်ထဲမှာတင် ပုန်းနေကြရတယ်” ဟု ပြောသည်။ ပြီးခဲ့သည့် ဒီဇင်ဘာလ ၁၆ ရက်နေ့က မိုးကောင်းမြို့နယ်၊ မီးသွေးကုန်းကျေးရွာဘက်သို့ စစ်ကြောင်းထိုးလာသည့် စစ်ကော်မရှင်တပ်ကို KIA နှင့် KPDF ပူးပေါင်းတပ်များက ကြားဖြတ်တိုက်ခိုက်ခဲ့ခြင်းဖြစ်သည်။ ယင်းတိုက်ပွဲအတွင်း စစ်ကူပေးရန် ရောက်ရှိလာသည့် ပြည်သူ့စစ်ဒုခေါင်းဆောင် ဦးမြင့်ဦးသည် ဒရုန်းဗုံး ထိမှန် ခဲ့ပြီး မိုးကောင်းဆေးရုံတွင် ဆေးကုသမှုခံယူနေစဉ် သေဆုံးသွားခဲ့ခြင်း ဖြစ်သည်။ သေဆုံးသူ ဦးမြင့်ဦးသည် ဒေသတွင်း လမ်းသွားလမ်းလာ ပြည်သူများကို ခြိမ်းခြောက်ငွေညှစ်ခြင်းများ လုပ်ဆောင်လေ့ရှိသည့်အတွက် နာမည်ဆိုးဖြင့် ကျော်ကြားသူတစ်ဦးဖြစ်ကြောင်းလည်း ဒေသခံများက ဆိုသည်။ အလားတူ ဝိုင်းမော်မြို့နယ်တွင်လည်း စစ်ကော်မရှင်တပ်၏ ဒရုန်းဗုံး ကျရောက်ပေါက်ကွဲမှုကြောင့် ဖွင့်ပွဲပြုလုပ်ရန် ပြင်ဆင် နေသည့် ခရစ်ယာန် ဘုရားကျောင်းဆောင်သစ် တစ်ခု ထိခိုက်ပျက်စီးသွားခဲ့သည်။ ဝိုင်းမော်ဒေသခံ အမျိုးသမီးတစ်ဦးက “ဘုရားကျောင်းက အသစ်စက်စက်ကြီးပါ။ ဖွင့်ပွဲတောင် မလုပ်ရသေး ဘူး။ စစ်တပ်က ဒရုန်းနဲ့ ဗုံးချလိုက်တော့ အမိုးတွေရော၊ အတွင်းထဲက ပစ္စည်းတွေပါ အကုန်ပျက်စီးသွားတာပဲ။ ကျမတို့ အလှူငွေတွေနဲ့ ဆောက်ထားတယ်နော်။ အခုလို ဖြစ်သွားတော့ တကယ့်ကို စိတ်မကောင်းဘူး” ဟု ပြော သည်။ ကချင်ပြည် တစ်ဝှမ်း၌ စစ်ကော်မရှင်တပ်က လေကြောင်းနှင့် လက်နက်ကြီးများကို အလွန်အကျွံ အသုံးပြု တိုက်ခိုက်နေသဖြင့် အရပ်သားထိခိုက်မှုများနှင့် ဘာသာရေးအဆောက်အအုံ ပျက်စီးမှုများ တိုးပွားလာနေသည်။ ဗန်းမော်မြို့နယ်အတွင်း၌လည်း စစ်ကော်မရှင်တပ်နှင့် ကချင်လွတ်လပ်ရေး တပ်မတော် (KIA) ပူးပေါင်းတပ်များ အကြား တိုက်ပွဲများ နေ့စဉ်နှင့်အမျှ အရှိန်အဟုန်ပြင်းစွာ ဖြစ်ပွားနေပြီး စစ်တပ်ဘက်က လေကြောင်း တိုက်ခိုက် မှုများအပြင် ဒရုန်းဗုံး ရာနှင့်ချီ အသုံးပြုကာ ခုခံတိုက်ခိုက်နေရကြောင်း မြေပြင် သတင်းရင်းမြစ်များက ဆိုသည်။ တိုက်ပွဲများ ပြင်းထန်နေမှုကြောင့် ဗန်းမော်မြို့နယ်အတွင်းရှိ ကျေးရွာအများအပြားမှ ပြည်သူများသည် ဘေးလွတ်ရာသို့ တိမ်းရှောင်နေကြရပြီး၊ လမ်းပန်းဆက်သွယ်ရေးများလည်း ပြတ်တောက်လျှက်ရှိသည်။

ကချင်ပြည် မြို့နယ် ၃ ခုတွင် တိုက်ပွဲများ ဆက်ဖြစ်နေ

တနိုင်းပယင်းမှော်ကို စစ်တပ် လေကြောင်းဖြင့် ထိုးစစ်ဆင်  သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာ ၁၆ ရက်။ စစ်ကော်မရှင်တပ်ဖွဲ့များသည် တစ်နိုင်ငံလုံး အတိုင်းအတာဖြင့် လေကြောင်းတိုက်ခိုက်မှုများကို အရှိန်မြှင့်တင်နေ သည့် ကြားမှ စီးပွားရေးအရ အရေးပါသည့် ကချင်ပြည်၊ တနိုင်းမြို့နယ်ရှိ ပယင်းမှော်ဒေသကို ပစ်မှတ်ထားကာ စစ်ကြောင်းထိုးပြီး လေကြောင်းပါသုံး၍ အပြင်းအထန် ထိုးစစ်ဆင် တိုက်ခိုက်ခဲ့သည်။ အဆိုပါ တနိုင်းဒေသရှိ ပယင်းမှော်နှင့် ရွှေမှော် နေရာများကို ဒီဇင်ဘာ ၁၃ ရက်နေ့တွင် လေကြောင်းမှ ဗုံးကြဲခဲ့ သည့်အပြင် ဒီဇင်ဘာလ ၁၅ ရက်နေ့အထိ စစ်ကြောင်းထိုးမှုများ ဆက်ရှိနေသည်ဟု မြေပြင် သတင်းရင်းမြစ်က ပြောသည်။ အဆိုပါ တိုက်ခိုက်မှုမှာ ကချင်လွတ်လပ်ရေးတပ်မတော် (KIA) တပ်ရင်း ၁၄ နယ်မြေ ကို ဦးတည်ခဲ့ခြင်းဖြစ်ပြီး၊ တနိုင်း ပယင်းမှော်ဒေသသည် ပယင်းနှင့် ရွှေမှော်များ ပေါများသည့်အတွက် စစ်ကော်မရှင်အတွက် စီးပွားရေးအရ အရေးပါသော နယ်မြေတစ်ခု ဖြစ်သည်။ KIA က အဆိုပါ စခန်းကို ၂၀၂၄ ခုနှစ်၊ ဧပြီလတွင် သိမ်းပိုက်ထားခဲ့ရာ၊ ယခု စစ်ကော်မရှင်၏ လုပ်ရပ်သည် နယ်မြေပြန်လည် သိမ်းပိုက်ရန် ကြိုးပမ်းခြင်းဖြစ်သည်ဟု ဒေသခံအချို့က သုံးသပ်ပြောဆိုနေကြသည်။ ဒေသခံများ၏ ပြောဆိုချက်အရ တိုက်ပွဲ ပြင်းထန်လာချိန် ဒီဇင်ဘာလ ၁၃ ရက်နေ့၊ နေ့ခင်း ၁ နာရီကျော်ခန့်တွင် စစ်ကော်မရှင်တပ်သည် တိုက်ပွဲဖြစ်ပွားရာ ပတ်ဝန်းကျင်ကို ဂျက်တိုက်လေယာဉ်များဖြင့် ဗုံးကြဲတိုက်ခိုက်ခဲ့ သည်ဟု သိရသည်။ ဒေသခံတစ်ဦးက “စစ်တပ်က မြေပြင်ကနေ ထိုးစစ်ဆင်ရုံမကဘဲ လေကြောင်း အင်အားနဲ့ပါ အပြင်းအထန် တိုက်ခိုက်ခဲ့တာပါ။ ဒီပယင်းမှော်ဒေသကို သူတို့ ဘယ်လောက် အရေးထားလဲဆိုတာ ပြတာပဲ။ တိုက်ပွဲဖြစ်တဲ့ ပတ်ဝန်းကျင်မှာ အရပ်သားလုပ်သားတွေလည်း ရှိနေတာကို ဂရုမစိုက်ပါဘူး” ဟု ပြောသည်။ တိုက်ပွဲများကြောင့် ပယင်းမှော်လုပ်ကွက်များ အားလုံး ရပ်နားထားရပြီး ဒေသခံလုပ်သား ထောင်ပေါင်းများစွာ မှာ ဘေးလွတ်ရာသို့ ထွက်ပြေးတိမ်းရှောင်နေကြရသည်။ တနိုင်းဒေသ တိုက်ခိုက်မှုသည် စစ်အုပ်စု၏ လက်ရှိ စစ်ရေးရည်မှန်းချက်ကို ထင်ဟပ်နေကြောင်း ဒေသခံများက သုံးသပ်သည်။ စစ်တပ်သည် ယခုရက်ပိုင်းအတွင်း ချင်းပြည်နှင့် ရခိုင်ပြည် (မြောက်ဦး၊ ပုဏ္ဏားကျွန်းတို့အပြင် AA က သိမ်းပိုက် ထားသည့် နယ်မြေများကိုလည်း လေကြောင်းတိုက်ခိုက်မှုများကို တစ်နိုင်ငံလုံး အတိုင်းအတာဖြင့် ဆက်တိုက် ပြုလုပ်နေသည်ကို တွေ့ရသည်။ ဒေသခံများက ယခုတနိုင်း တိုက်ခိုက်မှုသည် စစ်အုပ်စု၏ နယ်မြေပြန်သိမ်းပိုက်ရေး စစ်ရေးရည်မှန်းချက်ကို ပြသနေပြီး၊ အရပ်သားပြည်သူများ၏ အသက်အိုးအိမ်စည်းစိမ်ကို ထိခိုက်စေသည့် လုပ်ရပ်ဖြစ်ကြောင်း ဝေဖန် ပြောဆိုလျက်ရှိသည်။

တနိုင်းပယင်းမှော်ကို စစ်တပ် လေကြောင်းဖြင့် ထိုးစစ်ဆင်

« Prev 1 2 3 4 5 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

Quad အဖွဲ့က ဖီဂျီတွင် ဆိပ်ကမ်းတည်ဆောက်ရန်နှင့် မြေရှားသတ္တုဆိုင်ရာ မူဘောင်များကိုသဘောတူ
မြောက်ကိုရီးယားကပဲ့ထိန်းဒုံးနှင့် အခြား ဒုံးကျည်များ အတွဲလိုက်ပစ်ခတ်
အပစ်ရပ် သဘောတူညီမှု အမေရိကန် ကြီးကြီးမားမား ချိုးဖောက်ဟု အီရန် စွပ်စွဲ
ဘင်္ဂလားဒေ့ရှ် နယ်ခြား တပ်စခန်း တစ်ခု တိုက်ခိုက်ခံရ
ထိုင်းတွင် တောဆင်ရိုင်း နှစ်ကောင်၏ အလောင်းများတွေ့

Archives

Archives

×Close