KNLA – Page 2 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
နိုင်ငံတကာသတင်း
NMG အကြောင်း
Contact

Home
Tag Archive

Tag: KNLA

သရက်ချောင်းတိုက်ပွဲတွင် စစ်ကောင်စီတပ် အထိနာပြီး လက်နက်ခဲယမ်းများ သိမ်းဆည်းရမိ   သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၁၁ ရက်။ သရက်ချောင်းတွင် စစ်ကြောင်းထိုးလာသည့် စစ်ကော်မရှင်တပ်ကို KNLA နှင့် PDF ပူးပေါင်းတပ်ဖွဲ့ ကြားဖြတ် တိုက်ခိုက်ခဲ့ရာ စစ်တပ်ဘက်မှ ၁၀ ဦးထက်မနည်း သေဆုံးပြီး လက်နက်ခဲယမ်းများ သိမ်းဆည်းရရှိခဲ့သည်။ တနင်္သာရီတိုင်းဒေသကြီး၊ ထားဝယ်ခရိုင်၊ သရက်ချောင်းမြို့နယ် တောင်ပျောက်တိုက်နယ်အတွင်းသို့ အင်အား တစ်ရာခန့်ဖြင့် စစ်ကြောင်းထိုးလာသည့် စစ်ကော်မရှင်တပ်ကို ကရင်အမျိုးသား လွတ်မြောက်ရေး တပ်မတော် (KNLA) နှင့် ပြည်သူ့ကာကွယ်ရေး တပ်မတော် (PDF) ပူးပေါင်းတပ်ဖွဲ့များက ကြားဖြတ်တိုက်ခိုက်ခဲ့ရာ စစ်ကော်မရှင်ဘက်မှ အထိနာကာ အကျအဆုံးများပြားခဲ့ခြင်း ဖြစ်သည်။ တိုက်ပွဲတွင် ပါဝင်ခဲ့သည့် ပူးပေါင်းတပ်ဖွဲ့ဝင်တစ်ဦးက “တိုက်ပွဲက နေ့တစ်ဝက်လောက် အပြင်းအထန်ဖြစ်တာ၊ စစ်တပ်ဘက်က ၁၀ ကျော်လောက်သေတယ်၊ ဒဏ်ရာရတာတွေလည်း မနည်းဘူး၊ လက်နက်ခဲယမ်းတွေ သိမ်း ဆည်းမိတာကို စာရင်းလုပ်နေတုန်းပါပဲ၊ ပူးပေါင်းတပ်ဖွဲ့ဝင်တွေဘက်ကတော့ ဒဏ်ရာရသူတွေ ရှိခဲ့ပေမဲ့ စိုးရိမ်စရာ မရှိပါဘူး” ဟု ပြောသည်။ ဖြစ်စဉ်မှာ ဖေဖော်ဝါရီလ ၁၀ ရက်နေ့ မွန်းလွဲ ၁၂ နာရီခွဲခန့်တွင် သရက်ချောင်းမြို့နယ် ဝင်းဝစခန်းမှ သဲချောင်း ကြီးကျေးရွာသို့ ဦးတည်ထွက်ခွာလာသည့် စစ်ကော်မရှင် စစ်ကြောင်းကို တောင်ပျောက်တိုက်နယ် အဝင်၌ ပူးပေါင်းတပ်ဖွဲ့များက ဝိုင်းဝန်းပိတ်ဆို့ တိုက်ခိုက်ခဲ့ခြင်းဖြစ်သည်။ အဆိုပါတိုက်ပွဲအတွင်း စစ်ကော်မရှင်တပ်သား ၁၀ ဦးထက်မနည်း သေဆုံးခဲ့ပြီး လက်နက်ခဲယမ်း အမြောက် အမြားကိုပါ သိမ်းဆည်းရရှိခဲ့ကြောင်း တိုက်ပွဲတွင် ပါဝင်ခဲ့သည့် ပူးပေါင်းတပ်ဖွဲ့ဝင်တစ်ဦးက အတည်ပြုသည်။ တိုက်ပွဲအတွင်း အထိနာသွားသည့် စစ်ကော်မရှင်တပ်သည် ညနေ ၅ နာရီခွဲခန့်တွင် သဲချောင်းကြီးကျေးရွာ အတွင်းသို့ ဂျက်ဖိုက်တာ (Jet Fighter) တိုက်လေယာဉ်ဖြင့် ဗုံးနှစ်လုံး ကြဲချတိုက်ခိုက်ခဲ့သည်။ ထို့ပြင် ည ၁၁ နာရီအချိန်ခန့်တွင်လည်း ထားဝယ်ပင်လယ်ဝ၌ ကျောက်ချထားသည့် စစ်သင်္ဘောပေါ်မှနေ၍ ရငဲ၊ ကမြိုင်နှင့် ဝဲရစ်ကျေးရွာများဘက်သို့ လက်နက်ကြီးများဖြင့် ၁၁ ကြိမ်ထက်မနည်း ရမ်းသန်းပစ်ခတ်ခဲ့ခြင်း ဖြစ် သည်။ လက်ရှိတွင် အဆိုပါ စစ်ကော်မရှင် စစ်ကြောင်းမှာ သဲချောင်းကြီးကျေးရွာဘက်မှ ပြန်လည်ဆုတ်ခွာသွားသော် လည်း သရက်ချောင်းမြို့နယ် အောက်ဘက်ခြမ်းရှိ မြိတ်-ထားဝယ် ကားလမ်းတစ်လျှောက်တွင် စစ်အင်အား ၂၀၀ ခန့်ဖြင့် ပြန်လည်စုစည်းကာ စစ်ရေးပြင်ဆင်မှုများ ပြုလုပ်နေကြောင်း ဒေသတွင်းသတင်းရင်းမြစ်များက ဆိုသည်။ စစ်ကော်မရှင်၏ လေကြောင်းနှင့် ရေကြောင်းမှ လက်နက်ကြီး ပစ်ခတ်မှုများကြောင့် ဒေသခံပြည်သူများမှာ ဘေးလွတ်ရာသို့ ထွက်ပြေးတိမ်းရှောင်နေရပြီး တောင်ပျောက်တိုက်နယ်အတွင်း စစ်ရေးတင်းမာမှုများ ဆက်လက်ရှိနေဆဲ ဖြစ်သည်။

သရက်ချောင်းတိုက်ပွဲတွင် စစ်ကောင်စီတပ် အထိနာပြီး လက်နက်ခဲယမ်းများ သိမ်းဆည်းရမိ  

ရွေးကောက်ပွဲမှာ စစ်တပ် အကျိုးစီးပွားသာဖြစ်ဟု KNU ဥက္ကဌ ပြော သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၂၀ ရက်။ စစ်ကော်မရှင်က ပြုလုပ်ရန် ပြင်ဆင်နေသည့် ရွေးကောက်ပွဲသည် စစ်တပ်နှင့် အပေါင်းအပါတစ်စု၏ အကျိုး စီးပွား အတွက်သာ ဖြစ်ပြီး အာဏာရှင်စနစ် ထာဝရတည်မြဲရေးကို ရည်ရွယ်ခြင်းဖြစ်ကြောင်း ကရင်အမျိုးသား အစည်းအရုံး (KNU) ဥက္ကဋ္ဌ ပဒိုစောကွယ်ထူးဝင်းက ပြောဆိုလိုက်သည်။ ဒီဇင်ဘာလ ၁၉ ရက်တွင် ကျရောက်သည့် ၂၇၆၅ ခုနှစ်၊ ကရင်အမျိုးသားနှစ်သစ်ကူးနေ့သို့ ပေးပို့သည့် သဝဏ်လွှာ၌ ဥက္ကဋ္ဌက ထိုသို့ ထည့်သွင်းပြောဆိုခဲ့ခြင်းဖြစ်သည်။ စစ်အုပ်စုသည် ၎င်းတို့၏ အာဏာကို ၂၀၀၈ ဖွဲ့စည်းပုံအခြေခံ ဥပဒေအတိုင်း ဆက်လက် ထိန်းချုပ်နိုင်ရန်အတွက် အတုအယောင်ရွေးကောက်ပွဲကို နည်းလမ်းမျိုးစုံဖြင့် ပြင်ဆင်နေခြင်းဖြစ်သည်ဟု ဆိုသည်။ ပဒိုစောကွယ်ထူးဝင်းက “အခုအချိန်မှာ ဗမာစစ်အာဏာရှင်အုပ်စုဟာ သူတို့ရဲ့ အာဏာ ထာဝရ တည်တံ့ခိုင်မြဲ နိုင်ဖို့အတွက် ကြိုးပမ်းဆောင်ရွက်နေရာမှာ အတုအယောင်ရွေးကောက်ပွဲတစ်ရပ်ကို ၂၀၀၈ ဖွဲ့စည်းပုံ အခြေခံ ဥပဒေအတိုင်း ကျင်းပနိုင်ရန် ပြင်ဆင်ဆောင်ရွက်နေပါတယ်။ အဓိကရည်ရွယ်ချက်ကတော့ စစ်တပ်ဟာ ဒီနိုင်ငံ ရဲ့ နိုင်ငံရေးကို အမြဲတမ်းချုပ်ကိုင်ချယ်လှယ်ပြီး ထာဝရအာဏာတည်တံ့ခိုင်မြဲနေစေဖို့အတွက်ပဲ ဖြစ်ပါတယ်” ဟု ပြောသည်။ ထို့အပြင် ယခုရွေးကောက်ပွဲသည် စစ်ခေါင်းဆောင်များ၏ ဆွေမျိုးသားချင်းများနှင့် မိတ်ဖက်အစုအဖွဲ့များ ကြီးပွားချမ်းသာရေးအတွက် အခြေခံထားသည့် လုပ်ရပ်ဖြစ်ကြောင်းလည်း ၎င်းက ဆက်လက်ပြောဆိုသည်။ “ဒီအတုအယောင်ရွေးကောက်ပွဲမှာ သေချာပေါက် အနိုင်ရဖို့အတွက်ကို ပြင်ဆင်စီမံနေပြီး စစ်ခေါင်းဆောင် အများအပြားဟာ ရွေးကောက်ပွဲမှာ ပါဝင်အရွေးခံပြီး အနိုင်ရဖို့ နည်းလမ်းမျိုးစုံသုံးနေတာ ဖြစ်ပါတယ်။ စစ်အာဏာရှင်အုပ်စုဟာ စစ်တပ်ထဲမှာရှိနေတဲ့ ဗမာလူမျိုးတွေနဲ့ မိတ်ဖက်ဆွေမျိုးများ အာဏာရရှိရေးနဲ့ ကြီးပွားတိုးတက်ရေးအတွက်ကို လုပ်ဆောင်နေတာ ဖြစ်ပါတယ်” ဟု KNU ဥက္ကဋ္ဌက ပြောသည်။ မြန်မာနိုင်ငံတွင် ၁၉၆၂ ခုနှစ် အာဏာသိမ်းချိန်မှစ၍ စစ်အုပ်ချုပ်ရေးပုံစံအမျိုးမျိုး ပြောင်းလဲခဲ့သော်လည်း မဟာ လူမျိုးကြီး ဝါဒကိုမူ စွန့်လွှတ်ခြင်းမရှိကြောင်း၊ ၂၀၂၁ ခုနှစ် ဖေဖော်ဝါရီလတွင် ထပ်မံ အာဏာသိမ်း လိုက်ခြင်း သည် ပြည်သူများလိုလားသည့် ဖက်ဒရယ် ဒီမိုကရေစီ ပြည်ထောင်စု တည်ဆောက်ရေးကို စစ်တပ်က လုံးဝ လက်မခံနိုင်ကြောင်း ပြသလိုက်ခြင်းပင် ဖြစ်သည်ဟု KNU က သုံးသပ်သည်။ ပဒိုစောကွယ်ထူးဝင်းက “ဗမာစစ်တပ်အနေနဲ့ ဒီလိုအဓမ္မ အာဏာသိမ်းမှုဟာ လူမျိုးစုတွေနဲ့ ပြည်သူလူထုတွေ လိုလားတဲ့ ဒီနိုင်ငံကို ဖက်ဒရယ်ဒီမိုကရေစီပြည်ထောင်စုအနေနဲ့ တည်ထောင်ဖို့ဆိုတာကို လုံးဝလက်မခံနိုင်ဘူး ဆိုတာ ရှင်းရှင်းလင်းလင်း ဖော်ပြတာပဲ ဖြစ်ပါတယ်။ ဗမာစစ်တပ်အနေနဲ့ ၂၀၀၈ ဖွဲ့စည်းပုံအခြေခံဥပဒေက ရေးသားထားတဲ့ အခွင့်အာဏာပေးထားတဲ့အတိုင်းပဲ စစ်တပ်ကနေ ကြီးစိုးချုပ်ကိုင်လိုတဲ့ ဆန္ဒပဲ ရှိပါတယ်” ဟု ပြောသည်။ KNU ၏ တော်လှန်ရေး ရည်မှန်းချက်သည် အာဏာရှင်စနစ် ပုံသဏ္ဍာန် အမျိုးမျိုးကို ဖြိုချဖျက်ဆီးပြီး တန်းတူရေးနှင့် ကိုယ်ပိုင်ပြဋ္ဌာန်းခွင့်ရှိသည့် ဖက်ဒရယ်ဒီမိုကရေစီ ပြည်ထောင်စု တည်ဆောက်ရေး ဖြစ်ကြောင်း၊ ယင်းရည်မှန်းချက် အောင်မြင်ရန် နိုင်ငံရေးနည်းလမ်း တစ်ခုတည်းနှင့် မလုံလောက်ဘဲ စစ်ရေးနည်းလမ်းဖြင့် လည်း အကောင်အထည် ဖော်ဆောင်ရွက်သွားမည် ဖြစ်ကြောင်း KNU ဥက္ကဋ္ဌက ပြောသည်။

ရွေးကောက်ပွဲမှာ စစ်တပ် အကျိုးစီးပွားသာဖြစ်ဟု KNU ဥက္ကဋ္ဌ ပြော

NUG ၏ အထူးတိုင်း စစ်ဌာနဗျူဟာမှူး အပါအဝင် တပ်ဖွဲ့ဝင်နှင့် ထောက်ပို့ ၅၀ ခန့်ကို KNU ဖမ်းထား သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၁၇ ရက်။ တနင်္သာရီတိုင်းအတွင်း လှုပ်ရှားနေသည့် အမျိုးသားညီညွတ်ရေး အစိုးရ (NUG) ၏ အထူးတိုင်းစစ်ဌာန ဗျူဟာမှူး တစ်ဦး အပါအဝင် တပ်ဖွဲ့ဝင်နှင့် ထောက်ပို့ ၅၀ ခန့်ကို ကရင်အမျိုးသားအစည်းအရုံး (KNU) တပ်မဟာ ၄ လက်အောက်ခံ တပ်များက ဖမ်းဆီးထိန်းသိမ်းထားသည်ဟု ထားဝယ်ခရိုင်အမှတ် ၂ တပ်ရင်းက ပြောသည်။ ယနေ့ (ဒီဇင်ဘာ ၁၇ ရက်) နံနက်ပိုင်းတွင် ဖမ်းဆီးထိန်းသိမ်းလိုက်ကြောင်း ထားဝယ်ခရိုင်အမှတ် ၂ တပ်ရင်းက တာဝန်ရှိသူ တစ်ဦးက ပြောသည်။ ဖြစ်စဉ်နှင့်ပတ်သက်၍ ထားဝယ်ခရိုင်အမှတ် ၂ တပ်ရင်း တာဝန်ရှိသူက “ဘာကြောင့်ဆိုတာလည်း အသေအချာ မသိရသေးဘူး။ အခုက ဆက်ပြီးဖမ်းထားတုန်းပဲ။ တပ်မဟာ ၄ တပ်ရင်း ၁၂ ဌာနချုပ်ကို ခေါ်သွားတယ်လို့တော့ သိရတယ်။ ဗျူဟာမှူးရယ်၊ တပ်ရင်းမှူးရယ်၊ ရဲဘော်အချို့ရယ်က နယ်စပ်ကအပြန် သူတို့တပ်ကို ဖြတ်ရတာမှာ အဲဒီမှာ ထိန်းလိုက်တာ။ ပြီးမှ ဒီမနက်မှာ တပ်ခွဲက ရဲဘော်တွေနဲ့ ထောက်ပို့တွေကိုပါ ဆက်တိုက်ဖမ်းတာ အားလုံး ၄၀ ကျော်၊ ၅၀ နီးပါး ရှိနေပြီ” ဟု ပြောသည်။ ဖမ်းဆီးခံရသူများထဲတွင် အထူးတိုင်းစစ်ဌာန နည်းဗျူဟာ ၃၃ ဗျူဟာမှူး စောဒါးကို၊ တနင်္သာရီတိုင်းစစ်ဌာန ဒရုန်းတပ်ရင်း ဒုတပ်ရင်းမှူး ဒိုရာ နှင့် ထားဝယ်ခရိုင်အမှတ် ၂ တပ်ရင်း (T5) တပ်ရင်းမှူး မင်းသားကြီးတို့ကဲ့သို့ အဆင့်မြင့်အရာရှိများ ပါဝင်နေသည်။ ၎င်းတို့အား KNU တပ်မဟာ ၄၊ တပ်ရင်း ၁၂ လက်အောက်ခံ ကစယ်ဒိုကျားတပ်ဖွဲ့နှင့် ပုတီးတစ်လုံးတပ်ဖွဲ့တို့က ဖမ်းဆီးကာ လက်နက်ခဲယမ်းများကိုပါ သိမ်းဆည်းထားခြင်းဖြစ်သည်။ ဒေသခံများ၏ ပြောဆိုချက်အရ ပြီးခဲ့သည့် ဒီဇင်ဘာလ ၁၆ ရက်နေ့က ထားဝယ်ခရိုင်အမှတ် ၂ တပ်ရင်း တပ်ဖွဲ့ဝင်များနှင့် KNU တပ်ရင်း ၁၂ အောက်ရှိ တပ်ဖွဲ့ဝင်များအကြား ပြဿနာတစ်စုံတစ်ရာ ဖြစ်ပွားခဲ့သည်။ အဆိုပါ ဖြစ်စဉ်များနှင့် ပတ်သက်၍ KNU တာဝန်ရှိသူများကို ဆက်သွယ်နေဆဲ ဖြစ်သည်။ ထိုဖြစ်စဉ် နောက်ပိုင်းတွင် ယခုကဲ့သို့ ဖမ်းဆီးမှုများ ဆက်တိုက်ဖြစ်ပွားလာခြင်းဖြစ်ပြီး လက်ရှိတွင် KNU က သရက်ချောင်းမြို့နယ် ဂုံညှင်းဆိပ်လှေဆိပ် အပါအဝင် လှေဆိပ်အချို့ကိုလည်း ပိတ်ထားကြောင်း ဒေသခံများ၏ ပြောပြချက်အရ သိရသည်။ KNU တပ်မဟာ ၄ အတွင်းရေးမှူး ပဒိုအယ်နားကမူ အခြေအနေအသေးစိတ် မသိရသေးကြောင်း Dawei Watch သတင်းဌာနကို ဖြေကြားထားသည်။ NUG လက်အောက်ခံ တပ်ဖွဲ့ဝင်များအနေဖြင့် ဤဖြစ်စဉ်အပေါ် အမြန်ဆုံး တွေ့ဆုံဖြေရှင်းနိုင်ရန် ကြိုးပမ်းနေ သည်ဟု ဆိုသည်။ ထားဝယ်ခရိုင်အမှတ် ၂ တပ်ရင်း တာဝန်ရှိသူက “ကျနော်တို့ကတော့ ဘုံရန်သူကိုတိုက်ဖို့အတွက် တော်လှန်သူ တွေနဲ့ လက်တွဲပြီးသွားနေပါတယ်။ မြေပြင်ပွတ်တိုက်မှုလေးတွေကို တွေ့ဆုံညှိနှိုင်းဆွေးနွေးတာတော့ အကောင်းဆုံးပေါ့။ အခုလိုကတော့ ဘယ်လိုမှအဆင်မပြေပါဘူး။ ကျနော်တို့ ဝန်ကြီးဌာနနဲ့ တိုင်းစစ်ဌာနတွေကို တင်ပြထားပြီးပါပြီ။ သူတို့ဘက်ကလည်း တွေ့ဆုံမှုတွေအတွက် လုပ်ဆောင်နေတယ်လို့ သိရတယ်” ဟု ပြော သည်။ လက်ရှိတွင် နှစ်ဖက်တာဝန်ရှိသူများ အကြား တင်းမာမှုများ လျော့ကျစေရန်နှင့် ဖမ်းဆီးခံထားရသူများ ပြန်လည် လွတ်မြောက်ရေးအတွက် အဆင့်မြင့်တာဝန်ရှိသူများအကြား ညှိနှိုင်းမှုများ ဆက်လက်လုပ်ဆောင်နေသည်ဟု ဆိုသည်။   ဓါတ်ပုံ - ဖမ်းဆီးခံထားရသည့် အမှတ် ၃၃ ဗျူဟာမှူး ကိုဘိ (ခ) စောဒါးကို နှင့် ထားဝယ်ခရိုင် အမှတ် ၂ တပ်ရင်းမှူး မင်းသားကြီးတို့၏ ပုံ (Crd)

NUG ၏ အထူးတိုင်း စစ်ဌာနဗျူဟာမှူး အပါအဝင် တပ်ဖွဲ့ဝင်နှင့် ထောက်ပို့ ၅၀ ခန့်ကို KNU ဖမ်းထား

နေရပ် မပြန်နိုင်သေးသည့် မောတောင်မှ ဒုက္ခသည်များ ထိုင်းဘက်တွင် နေထိုင်ရန်လည်း အခက်တွေ့နေ သတင်းနှင့် မီဒီယာ ကွန်ရက်။ ၂၀၂၅ ခုနှစ် နိုဝင်ဘာလ ၂၆ ရက်။ တနင်္သာရီတိုင်း ဒေသကြီး၊ မြန်မာ-ထိုင်းနယ်စပ်ရှိ အရေးပါသော ကုန်သွယ်ရေးမြို့ဖြစ်သည့် မောတောင်မြို့သိမ်း တိုက်ပွဲ ကြောင့် တိမ်းရှောင်ခဲ့ရသည့် ဒေသခံ ၃,၀၀၀ ဝန်းကျင် သည် နေရပ်သို့ ပြန်၍ မရသည့်အပြင် ထိုင်းဘက်ခြမ်းတွင်ပါ ဆက်လက်ခိုလှုံရန် ခက်ခဲနေသည်ဟု အကူအညီပေးနေသူများက ပြောသည်။ မောတောင်မြို့ကို ကရင်အမျိုးသား လွတ်မြောက်ရေး တပ်မတော် (KNLA) ဦးဆောင်သည့် ပူးပေါင်းတပ်က နိုဝင်ဘာ ၁၄ ရက်နေ့တွင် အပြီးသတ် သိမ်းပိုက်နိုင်ခဲ့သော်လည်း၊ မြို့၏ အဓိက လမ်းမကြီးပေါ်ရှိ သိန်ခွန်း နှင့် သဲဖြူကျေးရွာ တို့တွင် နိုဝင်ဘာလ ၁၅ ရက်နေ့မှစ၍ ယနေ့အထိ တိုက်ပွဲများ ပြင်းထန်နေဆဲ ဖြစ်သည်။ စစ်ကော်မရှင်တပ်သည် အင်အား အလုံးအရင်းဖြင့် စစ်ကြောင်းထိုးခြင်း၊ လေကြောင်းတိုက်ခိုက်မှုများ ဆက်တိုက် လုပ်နေခြင်းတို့ကြောင့် ဒေသခံများသည် မြို့ထဲသို့ ပြန်လည်ဝင်ရောက်နေထိုင်ရန် စိုးရိမ်ကြောက်ရွံ့ နေကြရသည်။ ခုနှစ်စင်ကြယ်အဖွဲ့ (မြိတ်ခရိုင် စစ်ဘေးရှောင် ကူညီရေး) အဖွဲ့ဝင် ကိုဘလက် က “မောတောင်မြို့အဝင်ဖြစ်တဲ့ သိန်ခွန်းနဲ့ သဲဖြူဆိုတဲ့ကျေးရွာတွေမှာက လက်ရှိအချိန်အထိ တိုက်ပွဲတွေ အရမ်းကြီး ပြင်းထန်နေဆဲဖြစ်တယ်။ အဲ့နှစ်ရွာမှာ စစ်တိုက်နေခြင်းက မောတောင်မြို့ကို ပိတ်ဆို့ လိုက်သလို ဖြစ်တယ်ပေါ့နော်။ အကယ်၍ စစ်ရှောင် တွေက မြို့ထဲကိုပြန်ဝင်ပြီးနေမယ်ဆိုရင် ကျနော်တို့ လေယာဉ်ကို ကြောက်ရတဲ့အနေအထား စိန်ခေါ်မှု ဖြစ်နေ တယ်ပေါ့နော်” ဟု ပြောသည်။ မောတောင်မြို့ဒေသခံ ၁,၄၀၀ ဦးကျော်သည် နိုဝင်ဘာလ ၁၁ ရက်နေ့မှ စ၍ မြန်မာ - ထိုင်းနယ်စပ်ရှိ အလယ်ဂိတ်တွင် တိမ်းရှောင်နေထိုင်ခဲ့ကြသည်။ သို့သော်လည်း စစ်ရှောင်များက အမှိုက်များကို စနစ်တကျ မစွန့်ပစ်ခြင်း၊ ယာယီတဲဆောက်လုပ်ရာတွင် ထိုင်းပိုင် သစ်များကို ခုတ်ယူခြင်းတို့ကြောင့် ထိုင်းအာဏာပိုင်တို့က နိုဝင်ဘာလ ၂၄ ရက်နေ့မှစ၍ နေရပ်ပြန်ခိုင်းသည့် အခြေအနေနှင့် ရင်ဆိုင်ခဲ့ရသည်။ ထို့ကြောင့် စစ်ရှောင်အချို့သည် လေကြောင်းအန္တရာယ်ကို စိုးရိမ်စိတ်ဖြင့်ပင် မြန်မာဘက်ခြမ်းရှိ လုံခြုံသည့် နေရာများသို့ ပြန်လည်ပြောင်းရွှေ့နေကြရသည် ဟု ကိုဘလက်က ဆက်ပြောသည်။ “အဓိကအားဖြင့်က ထောင်နဲ့ချီတဲ့ လူဦးရေတွေက အနီးနားဝန်ကျင်မှာ ယာယီတဲတွေဆောက်ဖို့အတွက် သစ်ခုတ်တဲ့ဟာသည် ထိုင်းရဲ့သစ်တွေ တော်တော်များကိုလည်း ခုတ်တဲ့ဟာထဲမှာ ပါသွားတယ်ပေါ့နော်။ ဆိုတော့ အဲ့လို အခြေအနေမျိုးဖြစ်တဲ့ အခါ ကြတော့ ထိုင်းအာဏာပိုင်တွေက လူဦးရေလျော့ပါးသွားအောင် လုပ်လိုက် တဲ့ဟာမျိုးပဲ ကျနော်ထင်တယ်။” မောတောင်မြို့အနီး တောထဲနှင့် ဥယျာဉ်ခြံများထဲတွင် တိမ်းရှောင်နေရသူ ၇၀၀ ကျော်ရှိပြီး၊ စစ်ကော်မရှင်၏ ရမ်းသန်းပစ်ခတ်မှုများကြောင့် နေရပ်မပြန်ရဲကြသေးပေ။ ကမ်းမယ့်လက်အဖွဲ့ဝင် ကိုပိုင်ကိုဦး က “ပြန်ဝင်လို့ မရသေးဘူးဆိုတာ စစ်ကြောင်းလည်း အမြဲတမ်းထိုးတယ်။ ရဟတ်ယာဉ် ဂျက်ဖိုက်တာနဲ့ ရမ်းသမ်းပစ်လာနေတယ်။ လေယာဉ်နဲ့ ဗုံးကြဲတယ်။ လူရှိတဲ့နေရာတွေကြဲတယ်။ အဲ့တာက အမြဲတမ်း တွေ့မြင်နေရတာကိုးနော်။ ဘယ်လောက် ကြာကြာစစ်ရှောင်ရမလဲ ဆိုရင် အနည်းဆုံး ၂လ ဝန်းကျင်လောက်မှာ ရှိတယ်” ဟု ပြောသည်။ လက်ရှိတွင် စစ်ဘေးရှောင်များအတွက် အစားအစာ ရိက္ခာခြောက်များ၊ စောင်၊ အနွေးထည်များအပြင် ကလေးများအတွက် နို့မှုန့်နှင့် နို့တိုက်ပစ္စည်းများပါ အဓိက လိုအပ်နေကြောင်း အကူအညီပေးနေသူများက ပြော သည်။ စစ်ကော်မရှင်ဘက်က မောတောင်မြို့ကို နည်းအမျိုးမျိုးဖြင့် ပြန်လည်ရယူရန် ကြိုးပမ်းနေခြင်းကြောင့် ဒေသခံ ပြည်သူများအနေဖြင့် ပိတ်ဆို့မှုဒဏ် အမျိုးမျိုးကို ရင်ဆိုင်လာရနိုင်သည်ဟု ကိုဘလက်က ပြောသည်။ ထို့ကြောင့် စစ်ရှောင်အရေးကို အားစိုက်လုပ်ဆောင်ရန်အတွက် သက်ဆိုင်ရာ လူသားချင်း စာနာထောက်ထားမှု အဖွဲ့များ၊ NGO အဖွဲ့အစည်းများ နှင့် ထိုင်းနိုင်ငံသို့ ရောက်ရှိနေသည့် အဖွဲ့အစည်းများအနေဖြင့် မောတောင် စစ်ဘေးရှောင်များကို ကူညီပေးကြရန်နှင့် ဝိုင်းဝန်းအသံထုတ်ပေးကြရန် တိုက်တွန်းနှိုးဆော်ထားသည်။ ဓါတ်ပုံ - ကိုဘလက်

နေရပ် မပြန်နိုင်သေးသည့် မောတောင်မှ ဒုက္ခသည်များ ထိုင်းဘက်တွင် နေထိုင်ရန်လည်း အခက်တွေ့နေ

ကျားဖြန့်ရုံ ဝင်စီးရာမှ KNLA နဲ့ DKBA တိုက်ပွဲများ ပြင်းထန် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၂၅ ရက်။ မြန်မာ-ထိုင်းနယ်စပ်၊ ကရင်ပြည်၊ မြဝတီတောင်ဘက်ရှိ စစ်ကော်မရှင်တပ်နှင့် DKBA ထိန်းချုပ်သော ငွေလိမ်လုပ်ငန်း 'ကျားဖြန့်' ရုံကို KNLA ပူးပေါင်းတပ်များက စီးနင်းခဲ့ရာမှ တိုက်ပွဲများ ပြင်းထန်လာခဲ့သည်။ ထိုတိုက်ပွဲအတွင်းက လက်နက်ကြီးကျည်မှာ ထိုင်းနိုင်ငံအတွင်းသို့ ကျရောက်မှုကြောင့် ထိုင်းစစ်တပ်ကပါ သတိပေးပစ်ခတ်မှု ပြုလုပ်ခဲ့ကြောင်း သိရသည်။ နယ်စပ်လုံခြုံရေး အမြင့်ဆုံး အခြေအနေသို့ ရောက်ရှိနေပြီး၊ မြန်မာဘက်ခြမ်းက အရပ်သားပြည်သူများ ထိုင်းဘက်သို့ စစ်ဘေးရှောင်မှုများလည်း ရှိနေသည်ဟု အကူအညီပေးနေသူများက ပြောသည်။ နိုဝင်ဘာလ ၂၁ ရက်နေ့က ဖြစ်ပွားခဲ့သော မင်းလက်ပံကျေးရွာအဝင် ကျားဖြန့်ရုံ စီးနင်းမှုသည် DKBA တပ်ဖွဲ့ဝင်များဘက်မှ ကရင်အမျိုးသား လွတ်မြောက်ရေး တပ်မတော် KNLA ပူပေါင်းတပ်ကို စတင်ပစ်ခတ်ရာမှ ပဋိပက္ခဖြစ်ပွားခဲ့ခြင်း ဖြစ်သည်ဟု ဒေသအခြေစိုက် သတင်းဌာနများက ဖော်ပြသည်။ စစ်ကော်မရှင်တပ်နှင့် လက်ဝါးချင်းရိုက်ကာ ကျားဖြန့်ရုံကို စောင့်ကြပ်နေသည့် ဗိုလ်သခွားသီး ဦးစီးသော DKBA တပ်ဖွဲ့များသည် KNLA တပ်မဟာ (၆) ဦးဆောင်သည့် တော်လှန်ရေး ပူးပေါင်းတပ်များကို သေနတ်ဖြင့် စတင်ပစ်ခတ်ခဲ့ခြင်းဖြစ်ကြောင်း စစ်ရေးသတင်းရင်းမြစ်များက ပြောသည်။ တော်လှန်ရေး ပူးပေါင်းတပ်ဘက်မှ ပြန်လည်ပစ်ခတ်ကာ အဆိုပါ ကျားဖြန့်ရုံကို ဝင်ရောက်စီးနင်းခဲ့ရာ DKBA တပ်ဖွဲ့ဝင်များနှင့် လက်နက်ခဲယမ်းများကို ဖမ်းဆီးထိန်းသိမ်းလိုက်သည်။ ပစ်ခတ်ရန် အမိန့်ပေးခဲ့သည့် ဗိုလ်သခွားသီးကမူ ထွက်ပြေးတိမ်းရှောင်သွားခဲ့သည်။ ဒေသတွင်း စစ်ရေးအခြေအနေကို စောင့်ကြည့်နေသူတစ်ဦးက “ဒီ ကျားဖြန့်ဂိုဒေါင်တွေဟာ စစ်ကောင်စီနဲ့ ပူးပေါင်းအဖွဲ့တွေအတွက် ငွေရှာပေးရာ နေရာတွေပါ။ KNLA ပူးပေါင်းတပ်တွေက ဒါကို တိုက်ခိုက်သိမ်းပိုက် နိုင်တာဟာ စစ်ရေးအရရော၊ ငွေကြေးအရပါ သူတို့ရဲ့ ထိန်းချုပ်မှုကို ဖြတ်တောက်လိုက်တာ ဖြစ်တယ်” ဟု ပြောသည်။ ဖမ်းဆီးထိန်းသိမ်းခံထားရသည့် DKBA တပ်ဖွဲ့ဝင်များနှင့် လက်နက်များ ပြန်လည်ရရှိရေးအတွက် DKBA ခေါင်း ဆောင်တစ်ဦး ဖြစ်သူ စောဆန်းအောင်က နယ်မြေခံ KNLA တာဝန်ရှိသူများနှင့် လာရောက်ညှိနှိုင်းခဲ့ကြောင်း သတင်းရရှိထားသည်ဟု အဆိုပါ စောင့်ကြည့်နေသူက ဆိုသည်။ မြဝတီတောင်ဘက် ဖလူးနှင့် မင်းလက်ပံကျေးရွာတိုဘက်တွင် KNLA မဟာမိတ် ပူးပေါင်းတပ်နှင့် စစ်ကော်မရှင် တပ်မ (၂၂) တို့အကြား နိုဝင်ဘာလ ၂၂ ရက်နေ့ကစ၍ ယနေ့အချိန်ထိ တိုက်ပွဲများ ဆက်လက်ပြင်းထန်နေသည်။ ယင်းတိုက်ပွဲအတွင်း လမ်းကြောင်းချော်လာသော ၆၀ မမ အမြောက်ကျည်ဆံတစ်လုံးသည် နယ်စပ်စည်းမှ တစ်ကီလိုမီတာခန့်သာ ဝေးသော ထိုင်းနိုင်ငံ၊ မဲဆောက်ခရိုင်၊ မဲ့ကိုကင်းကျေးရွာထဲသို့ ကျရောက်ခဲ့သည်။ ယင်းဖြစ်ရပ်ကြောင့် နေအိမ် ၄ လုံးနှင့် ပစ်ကပ်ကား ၁ စီး ပျက်စီးခဲ့ပြီး ဒေသခံများကြား စိုးရိမ်မှုများ မြင့်တက်ခဲ့ သည်။ ထို့နောက်တွင် ထိုင်းစစ်တပ်ဘက်မှ ၁၂၀ မမ မီးခိုးဗုံးကျည်ကို သတိပေးချက်အဖြစ် မြန်မာဘက်သို့ ပြန်လည် ပစ်ခတ်ခဲ့သည်ဟု ထိုင်းသတင်းဌာနများက ဖော်ပြသည်။ ထိုင်းအမှတ် (၃) စစ်ဒေသကလည်း နယ်စပ်ဒေသတစ်လျှောက် လုံခြုံရေး အစီအမံများကို အမြင့်ဆုံး တိုးမြှင့်ချ ထားကြောင်း ထုတ်ပြန်ခဲ့သည်။ ထိုင်းစစ်တပ်အရာရှိများသည် ပျက်စီးသွားသော မဲ့ကိုကင်းကျေးရွာထဲထိ သွားရောက်စစ်ဆေးခဲ့ပြီး နိုင်ငံ၏ နယ်စပ်ကို ခိုင်ခိုင်မာမာ ကာကွယ်စောင့်ရှောက်သွားမည်ဟု ဒေသခံများကို အာမခံ ပြောဆိုခဲ့သည်ဟု ထိုင်း သတင်းများက ဆိုသည်။ တိုက်ပွဲများကြောင့် မြန်မာဘက်ခြမ်းမှ အရပ်သား ၁၀၀ ကျော်လည်း ထိုင်းနိုင်ငံဘက်သို့ စစ်ဘေးတိမ်းရှောင် နေရပြီး ထိုင်းလုံခြုံရေးအဖွဲ့များက လူသားချင်းစာနာမှု အကူအညီများ ပေးနေသည်ဟု စစ်ရှောင်များကို အကူအညီပေးနေသူများက ပြောသည်။ လက်ရှိတွင် စစ်ရှောင်များကို အရင်ကလို ပြန့်ကျဲမထားတော့ဘဲ မဲ့ကိုကင်းကျေးရွာရှိ နွားခြံတစ်နေရာတည်း တွင်သာ စုစည်းထားရန် စီစဉ်နေကြောင်း စစ်ဘေးရှောင်အရေး ကူညီသူများက ပြောသည်။

ကျားဖြန့်ရုံ ဝင်စီးရာမှ KNLA နဲ့ DKBA တိုက်ပွဲများ ပြင်းထန်

KK Park စီးနင်းမှု 'ဟန်ပြ' ရှင်းလင်းရေး၊ KNU ကို စွပ်စွဲခြင်းနှင့် မပြိုလဲသေးသည့် ရာဇဝတ်ကွန်ရက်  သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၄ ရက်။ မြန်မာ - ထိုင်းနယ်စပ်၊ ကရင်ပြည်၊ မြဝတီမြို့နယ်ရှိ အကြီးဆုံး ဆိုက်ဘာ ငွေလိမ်ခြံဝန်းတစ်ခုဖြစ်သည့် KK Park ကို စစ်ကော်မရှင်တပ်များ ဝင်ရောက်စီးနင်းမှုသည် နိုင်ငံဖြတ်ကျော် ရာဇဝတ်မှု ကွန်ရက်များ၏ ရှုပ်ထွေး ပွေလီမှုနှင့် အာဏာပိုင်များ၏ တာဝန်ခံမှု ကင်းမဲ့ပုံကို ထင်ဟပ်စေသည်။ အထူးသဖြင့် စစ်ကော်မရှင်သည် ဤယောင်ပြစီးနင်းမှုကို အသုံးချ၍ ကရင်အမျိုးသားအစည်းအရုံး (KNU) အပေါ် စစ်ရေး၊ နိုင်ငံရေးအရ တိုက်ခိုက်စွပ်စွဲရန် ကြိုးပမ်းနေကြောင်း KNU ဘက်က ပြန်လည် တုံ့ပြန်ငြင်းဆိုခဲ့သည်။ စစ်ကော်မရှင်၏ 'ဟန်ပြ' စီးနင်းမှုနှင့် ထုတ်ပြန်ချက် အောက်တိုဘာလ (၂၀၂၅) နှောင်းပိုင်းတွင် စစ်ကော်မရှင် တပ်ဖွဲ့ဝင်များသည် KK Park ကို ဝင်ရောက်ရှင်းလင်းခဲ့ ပြီး အလုပ်သမား ၂,၁၉၈ ဦး ကို ဖမ်းဆီးထိန်းသိမ်းကာ Starlink စက် ၃၀ စုံ ကို သိမ်းဆည်းရမိကြောင်း ထုတ်ပြန် ခဲ့သည်။ ဤလုပ်ဆောင်ချက်သည် အာဆီယံ ထိပ်သီးအစည်းအဝေး မတိုင်မီ နိုင်ငံတကာ ဖိအားများကို လျှော့ချရန် ရည်ရွယ်သည့် အယောင်ပြလုပ်ရပ် အဖြစ် အရပ်ဘက်အဖွဲ့အစည်းများနှင့် လေ့လာသူများက ရှုမြင်ကြသည်။ စစ်ကော်မရှင် ပြောခွင့်ရသူ ဗိုလ်ချုပ် ဇော်မင်းထွန်းက KK Park စီမံကိန်းတွင် KNU ခေါင်းဆောင်များ ကိုယ် တိုင် ပါဝင်ပတ်သက်နေသည်ဟု စွပ်စွဲသည်။ ဗိုလ်ချုပ်ဇော်မင်းထွန်းက “KK Park စီမံကိန်းဆိုတာ KNU က ခေါင်းဆောင်ကိုယ်တိုင် ပါဝင် ပတ်သက်နေ တယ် ဆိုတာ ထင်ရှားတာတွေ့ရ ပါတယ်။ ငွေကြေးရယူလိုမှု တစ်ခုနဲ့ နိုင်ငံတော်ပိုင်မြေကို ဥပဒေမဲ့စွာ အလွဲသုံး စား လုပ်ခဲ့တာ ဖြစ်ပါတယ်” ဟု ပြောသည်။ စာချုပ်အထောက်အထား ထုတ်ဖော်မှုဖြင့် KNU ကို စွပ်စွဲခြင်း ဗိုလ်ချုပ် ဇော်မင်းထွန်းသည် ၎င်းတို့၏ စွပ်စွဲချက်ကို အတည်ပြုရန် စာချုပ်အထောက်အထားများကို ထုတ်ဖော် ခဲ့သည်။ KNU ၏ မူလအိအလင်း ကုမ္ပဏီ နှင့် ထိုင်းကုမ္ပဏီတို့အကြား ၂၀၂၀ ပြည့်နှစ်၊ ဖေဖော်ဝါရီ လ ၁၇ ရက်နေ့တွင် မြေငှားရမ်းခြင်း သဘောတူညီချက် ချုပ်ဆိုခဲ့ဖူးကြောင်း ဖော်ထုတ်ခဲ့သည်။ အဆိုပါစာချုပ်တွင် လက်ရှိ KNU ဥက္ကဋ္ဌ ပဒိုစောကွယ်ထူးဝင်း က KNU ဘဏ္ဍာရေး ကော်မတီ ဗဟိုကိုယ်စားနှင့် ယခင် ကာကွယ်ရေးဌာန တာဝန်ခံ ဗိုလ်မှူးကြီး စောရောဂျာခင် တို့က အသိသက်သေအဖြစ် လက်မှတ်ရေးထိုးခဲ့ ကြောင်း စစ်ကော်မရှင်ဘက်က စွပ်စွဲသည်။ ဗိုလ်ချုပ်ဇော်မင်းထွန်း က “အဲ့မြေပေါ်မှာ လုပ်ဆောင်နေတဲ့ လောင်းကစား လုပ်ငန်းတွေကိုလည်း အခကြေးငွေ ယူပြီး ကြေးစား ကာကွယ် မှုများ လုပ်ဆောင်ပေးနေတာလည်း ဖြစ်ပါတယ်။ ဒီလုပ်ငန်းက ရရှိနေတဲ့ ငွေကြေး တွေနဲ့ နိုင်ငံတော်နဲ့ တိုင်းရင်းသား ပြည်သူလူထုအပေါ်မှာ အကြမ်းဖက် သတ်ဖြတ်မှုတွေ ကျူးလွန်နေတာ ဖြစ်ပါတယ်” ဟု စွပ်စွဲ ပြောဆိုသည်။ KNU သည် အဆိုပါ လောင်းကစားလုပ်ငန်းများကို အခကြေးငွေယူ၍ ကာကွယ်ပေးနေပြီး ယင်းမှရရှိသော ငွေများကို စစ်ကော်မရှင်တပ်နှင့် တိုင်းရင်းသားများအပေါ် အကြမ်းဖက်မှုများ ကျူးလွန်ရန် အသုံးပြုနေကြောင်း မြန်မာစစ်အုပ်စုက စွပ်စွဲပြောဆိုခဲ့သည်။ KNU ၏ ပြတ်သားသော တုံ့ပြန်ချက်နှင့် ငြင်းဆိုမှု စစ်ကော်မရှင်တပ်၏ စွပ်စွဲချက်များနှင့် စာချုပ်စာတမ်း ထုတ်ဖော်မှုအပေါ် KNU ပြောရေးဆိုခွင့်ရှိသူ ပဒိုကလယ်စေး ကမူ KK Park နှင့် လက်ရှိလုပ်ငန်းများတွင် KNU အနေဖြင့် လုံးဝမပတ်သက်ကြောင်း ပြင်းပြင်းထန်ထန် ငြင်းဆိုခဲ့သည်။ ပဒိုကလယ်စေး၏ ပြောကြားချက်အရ- - စစ်ကော်မရှင် ထုတ်ဖော်ပြောဆိုသည့် စာချုပ်ပါ မြေနေရာသည် KK Park နှင့် နီးစပ်နေခြင်းကို အသုံးချ၍ KNU ကို နိုင်ငံရေးအရ ဆွဲသွင်းတိုက်ခိုက်လိုခြင်း သက်သက်သာ ဖြစ်သည်။ - KK Park သည် KNU ထိန်းချုပ်နယ်မြေမဟုတ်ဘဲ BGF (နယ်ခြားစောင့်တပ်) က ဦးဆောင်လုပ်ကိုင် ထားသည့် နေရာဖြစ်ကြောင်း KNU ဘက်က တိတိကျကျ ထောက်ပြသည်။ - စစ်ကော်မရှင်၏ စီးနင်းမှုသည် ဟန်ပြသက်သက် ဖြစ်ပြီး သိမ်းဆည်းခဲ့သော Starlink ကိရိယာများသည် လည်း ကုမ္ပဏီက လော့ခ်ချထားပြီးဖြစ်သည့်အတွက် ရည်ရွယ်ချက်တစ်ခုခုရှိ၍ KNU ကို စွပ်စွဲရန် ကြိုးပမ်းခြင်းဟု ရှုမြင်သည်။ - KNU အဖွဲ့အစည်းအတွင်းမှ မည်သူမဆို ယင်းလုပ်ငန်းများတွင် ပါဝင်ပတ်သက်ပါက ဥပဒေလုပ်ငန်းစဉ် အတိုင်း အပြစ်ပေး အရေးယူ သွားမည့် လုပ်ထုံးနည်းများ ချမှတ်ထားပြီးဖြစ်ကြောင်း ပြောကြားခဲ့ သည်။ ပဒိုကလယ်စေးက “ကျနော်တို့ KNU က နဂိုကတည်းက လုံးလုံးမပတ်သက်ဘူး။ KNU ရဲ့ ထုတ်ပြန်ချက်ထဲမှာ လည်း KNU ထဲမှာ ပါဝင်ပတ်သက်တဲ့ လူရှိရင် တာဝန်ခံရမယ်လို့ ကျနော်တို့ထုတ်ပြန် ကြေညာထားပြီး ဖြစ် တယ်။ ကျနော်တို့ KNU အနေနဲ့ကတော့ လုံးလုံးကို ဒါမပတ်သက်ဖို့ ဥပဒေအရ သော်လည်းကောင်း ကျနော်တို့ အဖွဲ့အစည်း အဆုံးအဖြတ်အရ သော်လည်းကောင်း ဒါတွေသည် ကျနော်တို့ လုံးဝလက်မခံဘူးဆိုတဲ့ အကြောင်း လုပ်ဆောင်တဲ့ လူရှိရင်လည်း ကျနော်တို့ အပြစ်ပေးအရေးယူ သွားမယ်” ဟု ပြောသည်။ ပဒိုကလယ်စေးက ကရင် အဖွဲ့အစည်းများ ပတ်သက်မှု ရှိသဖြင့် အချို့နားမလည်သူများက ကရင် အဖွဲ့အစည်း ဖြစ်သော KNU ကို အထင်မှားမှုများ ရှိသည်ဟု သူက ပြောသည်။ နယ်စပ်တစ်လျှောက်ရှိ လက်နက်ကိုင် အဖွဲ့အစည်းအချို့သည် စစ်အာဏာရှင်အဖွဲ့အစည်း၏ တပ်လျှိုသွေးခွဲမှုကြောင့် ခွဲထွက်သွားသည့် အဖွဲ့များ ဖြစ်ပြီး၊ ၎င်းတို့၏ နောက်ကျောတွင် စစ်အုပ်စုက ဓားဖြင့် ထောက်ထားသည် ကို မမေ့သင့်ကြောင်း သတိပေး ပြောကြားခဲ့သည်။ BGF ၏ ဝန်ခံချက်နှင့် စစ်ကော်မရှင်တပ် (မြန်မာစစ်အုပ်စု) ၏ တိုက်ရိုက်ဖိအား KK Park ကို စီမံခန့်ခွဲနေသည့် ကရင်နယ်ခြားစောင့်တပ် (BGF) ၏ စစ်ဒေသ (၂) တာဝန်ရှိသူ ဗိုလ်မှူးချုပ် စောတင်ဝင်း ၏ ပြောဆိုမှုသည် စစ်ကော်မရှင်၏ တာဝန်ခံမှုကင်းမဲ့ပုံကို ပိုမို ထင်ဟပ်စေသည်။ ကရင်သတင်းဌာန (KIC) ကို ပြောဆိုရာတွင် ဗိုလ်မှူးချုပ် စောတင်ဝင်းက KK Park မှ လူများကို ပြောင်းရွှေ့ပေး ရသည့် အကြောင်းရင်းကို ပြောပြထားသည်။ BGF စစ်ဒေသ (၂) ၏ တာဝန်ရှိ ဗိုလ်မှူးချုပ် စောတင်ဝင်းက “KK park ကိစ္စနဲ့ပတ်သက်ပြီး ကျားဖြန့်လို့ နာမည် ထွက်တော့ အဖွဲ့အစည်းနာ မည်လည်း ထိခိုက်တယ်။ ပြီးတော့ မြန်မာစစ်တပ်ဘက်ကလည်း ကျနော်တို့ ဖိအား ပေးလာတာ ရှိတယ်။ အဲဒါကြောင့် သူတို့မှာရှိတဲ့အဆက်အသွယ်ကနေတဆင့် ကျနော်တို့ပေးပြန်တာ” ဟု ကေအိုင်စီကို ပြောဆိုထားသည်။ ဤဝန်ခံချက်သည် BGF သည် KK Park ကို ထိန်းချုပ်ထားကြောင်း သွယ်ဝိုက် အတည်ပြုသလို နိုင်ငံတကာ ဖိအားကြောင့် စစ်ကောင်စီကိုယ်တိုင် BGF ကို လှုပ်ရှားရန် တိုက်ရိုက်ဖိအားပေးခဲ့ကြောင်းလည်း ပြသသည်။ သို့သော် ပြောင်းရွှေ့သူများကို နေရပ်ပြန်ပို့ခြင်း ဟုတ်မဟုတ် မရှင်းလင်းဘဲ မြဝတီအတွင်း အခြားနေရာသို့ ပုန်းလျှိုးနေရာချထားရန် လှုပ်ရှားနေသည်ဆိုသော သတင်းများကြောင့် ဤပြောင်းရွှေ့မှုသည် ပြဿနာကို ဖုံးကွယ်ခြင်းသာ ဖြစ်နိုင်ကြောင်း သုံးသပ်ရသည်။ လက်ရှိ အခြေအနေနှင့် ရာဇဝတ်ကွန်ရက်၏ မပြိုလဲနိုင်မှု KK Park တွင် စစ်ကော်မရှင်တပ်၏ စီးနင်းမှုအပြီး လူအများအပြားကို ပြောင်းရွှေ့ခဲ့သော်လည်း ရာဇဝတ်ကွန် ရက်သည် ချက်ချင်းပြိုလဲသွားခြင်း မရှိကြောင်း ဒေသခံသတင်းရင်းမြစ်များနှင့် ထိုင်းအာဏာပိုင်များက ပြောကြသည်။ စီးနင်းမှု ဖြစ်ပွားပြီးနောက် နိုင်ငံခြားသား ၆၀၀ ကျော် (၆၇၇ ဦးအထိ) သည် KK Park မှ ထိုင်းနိုင်ငံ၊ မဲဆောက် ဘက်ခြမ်းသို့ မြစ်ကို ဖြတ်ကျော်ကာ ထွက်ပြေးခဲ့ကြကြောင်း ထိုင်းတာ့ခ်ခရိုင် ဒုတိယအုပ်ချုပ်ရေးမှူးက အတည်ပြုပြောကြားထားသည်။ ဒေသအတွင်းမှ အင်ဒိုနီးရှားနိုင်ငံသားတစ်ဦး၏ သတင်းပေးပို့ချက် (Antara News အား ရန်ကုန်ရှိ အင်ဒိုနီးရှား သံရုံးက ကိုးကားဖော်ပြ) အရ၊ ဖမ်းဆီးထိန်းသိမ်းခံရသူများအနက် အချို့မှာ KK Park တွင် ပိတ်မိနေဆဲဖြစ်ပြီး၊ အချို့မှာ မြဝတီ - ရွှေကုက္ကိုလ်ဘက်သို့ ရွှေ့ပြောင်းသွားခဲ့သည်။ ထိုင်းစစ်ဘက်အရာရှိများ၏ အဆိုအရ BGF သည် KK Park အတွင်းရှိ လုပ်ငန်းနှင့် သက်ဆိုင်သော အဆောက် အအုံ အချို့တွင် ပေါက်ကွဲမှုများ ပြုလုပ်ဖျက်ဆီးခဲ့သည်။ ဤဖျက်ဆီးမှုများသည် စစ်ကော်မရှင်နှင့် တရုတ်ကိုယ်စားလှယ်အဖွဲ့တို့၏ ပူးပေါင်းစစ်ဆေးမှုအတွက် ကြိုတင် ပြင်ဆင်မှုအဖြစ် နိုင်ငံတကာအား ဟန်ပြခြင်း၏ အစိတ်အပိုင်းတစ်ခုအဖြစ် ရှုမြင်ကြသည်။ AFP သတင်းအေဂျင်စီ၏ ဂြိုဟ်တုဓာတ်ပုံ ဆန်းစစ်ချက် အရ စစ်ကော်မရှင်သည် KK Park တစ်စိတ်တစ်ပိုင်း ကိုသာ ထိန်းချုပ်ထားပြီး၊ မြဝတီဒေသတစ်ဝိုက်တွင် အခြား သံသယရှိ ငွေလိမ်စင်တာ ၂၇ ခု ခန့် ရှိနေဆဲဖြစ် သည်။ ထို့ကြောင့် ဒေသဆိုင်ရာ လေ့လာသူများက ၎င်း၏ စီးနင်းမှုသည် ပြဿနာကို အမှန်တကယ် အမြစ်ဖြတ်ခြင်း ထက်၊ နိုင်ငံတကာ ဖိအားများကို တုံ့ပြန်ခြင်းသက်သက်သာ ဖြစ်နိုင်သည်ဟူသော သုံးသပ်ချက်ကို ပိုမိုခိုင်မာစေ သည်။ နိုင်ငံတကာ ဖိအား၏ အရှိန်အဟုန် KK Park ကိစ္စ ပေါ်ပေါက်လာရခြင်းနှင့် စစ်ကော်မရှင်တပ်၏ ဝင်ရောက်ရှင်းလင်းမှုသည် အမေရိကန်၊ တရုတ် အပါအဝင် နိုင်ငံတကာ၏ ပြင်းထန်သော ဖိအားကြောင့် ဖြစ်ကြောင်း ရှင်းလင်းသည်။ အမေရိကန်၏ တိုက်ရိုက်ပိတ်ဆို့မှုများ - ၂၀၂၅ ခုနှစ်၊ မေလတွင် အမေရိကန် ဘဏ္ဍာရေးဝန်ကြီးဌာန (Treasury Department) သည် BGF ကို နိုင်ငံဖြတ်ကျော် ရာဇဝတ်ဂိုဏ်း (TCO) အဖြစ် သတ်မှတ်ခဲ့ပြီး ခေါင်းဆောင် စောချစ်သူနှင့် ၎င်း၏ သားနှစ်ဦးကိုပါ ငွေလိမ်လည်မှုနှင့် လူကုန်ကူးမှုများတွင် ပါဝင်ပတ်သက်သည်ဟု စွပ်စွဲကာ ပိတ်ဆို့ခဲ့သည်။ (BGF ကို အချို့သတင်းများတွင် 'Karen National Army - KNA' ဟုလည်း ဖော်ပြလေ့ရှိသည်။) ဆက်လက်၍ ၂၀၂၅ ခုနှစ်၊ စက်တင်ဘာလတွင် ဘဏ္ဍာရေးဝန်ကြီးဌာနသည် ရွှေကုက္ကိုလ် (Shwe Kokko) အပါအဝင် မြန်မာရှိ ငွေလိမ်စင်တာ ၉ ခု ကို ထပ်မံပိတ်ဆို့ခဲ့ပြီး၊ ယင်းစခန်းများသည် ပိတ်ဆို့ခံထားရသော BGF ၏ အကာအကွယ်အောက်တွင် လည်ပတ်နေကြောင်း တရားဝင် ဖော်ပြခဲ့သည်။ ဥပဒေမူကြမ်း (H. R. 5490) - အမေရိကန်ကွန်ဂရက်သို့ တင်သွင်းထားသည့် "နိုင်ငံခြားငွေလိမ်လည်မှု ဂိုဏ်းများ တိုက်ဖျက်ရေး အက်ဥပဒေ" မူကြမ်းတွင် မြန်မာရှိ ငွေလိမ်စင်တာများသည် တရုတ် ရာဇဝတ် ဂိုဏ်းများနှင့် အာဏာရှင်အစိုးရများအကြား ဖက်စပ်လုပ်ငန်းများအဖြစ် လည်ပတ်နေကြောင်း ဖော်ပြခဲ့သည်။ ထို့ပြင် ဤဥပဒေမူကြမ်းသည် မြန်မာစစ်အုပ်စု၏ တိုက်ရိုက်ပါဝင်မှုများကို စုံစမ်းစစ်ဆေးရန် တိုက်တွန်းထားပြီး၊ BGF မှ ဗိုလ်မှူး Mote Thun (မုတ်သုန်) အပါအဝင် မြန်မာနှင့် ဒေသတွင်းမှ ပုဂ္ဂိုလ်၊ အဖွဲ့အစည်း ၄၀ ကျော် ကို ထပ်မံဒဏ်ခတ်ပိတ်ဆို့ရန် စဉ်းစားမည့် စာရင်းတွင်လည်း ထည့်သွင်းထားသည်ကို တွေ့ရသည်။ တရုတ်နိုင်ငံ၏ ပြင်းထန်သော ဖိအားပေးမှု - မြန်မာနိုင်ငံမြောက်ပိုင်းနှင့် အရှေ့ပိုင်းဒေသရှိ ဆိုက်ဘာငွေလိမ် ဂိုဏ်းများကို ဖိအားပေး ဖြိုခွင်းရာတွင် တရုတ်နိုင်ငံ၏ အခန်းကဏ္ဍသည် အဓိကကျသည်။ ၂၀၂၃ ခုနှစ်နှောင်းပိုင်းတွင် မြန်မာမြောက်ပိုင်း၌ တရုတ်နိုင်ငံသားများကို ပစ်မှတ်ထားသည့် ငွေလိမ်ဂိုဏ်းများ အပေါ် တရုတ်၏ ပြင်းထန်သော ဖိအားပေးမှုကြောင့် ကိုးကန့် ခေါင်းဆောင်များ ကို ဖမ်းဆီးပြီး သေဒဏ်ပေး သည်အထိ တရုတ်နိုင်ငံက ဆောင်ရွက်ခဲ့ခြင်းသည် နိုင်ငံတကာ ဖိအားပေးမှု၏ ထိရောက်ပုံကို အထင်အရှား ပြသခဲ့သည်။ လက်ရှိအချိန်တွင်လည်း တရုတ်နိုင်ငံ၏ ဦးစားပေးမှာ နယ်စပ်လုံခြုံရေးနှင့် ငွေလိမ်ဂိုဏ်းများ ဖြိုခွဲရေး ဖြစ်လာသည်။ တရုတ်အစိုးရသည် ၎င်းတို့၏ နိုင်ငံသားများအား ခေါ်ယူကာ ငွေလိမ်ဂိုဏ်းများ ထူထောင်စေသည့် မြဝတီကဲ့သို့ ဒေသများပေါ်တွင် ဆက်လက်၍ ဖိအားပေးနေခြင်း သည် စစ်ကော်မရှင်အား KK Park ကို ဟန်ပြ ဝင်ရောက် ရှင်းလင်းစေရန် တွန်းအားဖြစ်စေခဲ့သည့် အဓိကအချက်ဖြစ်သည်။ စစ်ကော်မရှင်တပ်သည် ဤလုပ်ရပ်ဖြင့် တရုတ်နိုင်ငံ၏ လုံခြုံရေးနှင့် စီးပွားရေးဆိုင်ရာ စိုးရိမ်မှုများကို ဖြေရှင်းရန် ကြိုးပမ်းခြင်းဖြင့် ပြည်တွင်း/ပြည်ပ မျက်နှာစာ ထိန်းသိမ်းရန် ရည်ရွယ်ခဲ့သည်ဟု သုံးသပ်ရသည်။ ကျင်းပလုဆဲဆဲ အာဆီယံ ထိပ်သီးညီလာခံ - ယခုနှစ် ၄၇ ကြိမ်မြောက် အာဆီယံ ထိပ်သီးညီလာခံကို မလေးရှား နိုင်ငံတွင် အောက်တိုဘာလ ၂၆ ရက်နေ့မှ ၂၈ ရက်နေ့အထိ ကျင်းပဖို့ ရှိရာ ထိုထိပ်သီး ညီလာခံအတွင်း ငွေလိမ် ဂိုဏ်းများနှင့် ပတ်သက်၍ နိုင်ငံအများအပြားက ဖိအားပေးရန် ရှိနေသည်။ ဖော်ပြထားပြီး ဖြစ်သော အမေရိကန် နှင့် တရုတ်တို့အပြင် ကိုရီးယား၊ ထိုင်းနှင့် မလေးရှားကဲ့သို့ အာဆီယံ အဖွဲ့ဝင် နိုင်ငံများက ကမ္ဘောဒီးယားနှင့် မြန်မာနိုင်ငံတို့တွင် ခွင့်ပြုထားသော ငွေလိမ်ဂိုဏ်းများအား ထိရောက်စွာ အရေးယူရန် ဖိအားပေးသွားရန် ရှိနေသည်။ တောင်ကိုရီးယား နိုင်ငံသားများ သားကောင်ဖြစ်နေရမှုကြောင့် ကမ္ဘောဒီးယားနှင့် ဒေသတွင်း ရှိ ငွေလိမ်ဂိုဏ်းများ ကို တိုက်ဖျက်ရန် အာဆီယံတွင် ဒေသတွင်း ပူးပေါင်းဆောင်ရွက်ရေး မူဘောင် ချမှတ်ရန် တောင်ကိုရီးယားနိုင်ငံ က တောင်းဆိုထားသည်။ အာဆီယံ ဥက္ကဋ္ဌ အဖြစ် တာဝန်ယူထားသော မလေးရှားနိုင်ငံက ငွေလိမ်ဂိုဏ်းကိစ္စကို ‘ဒစ်ဂျစ်တယ်ကျွန်ပြုမှု’ နှင့် ‘လူသားလုံခြုံရေးကို ခြိမ်းခြောက်မှု’ အဖြစ် သတ်မှတ်ပြီး အာဆီယံအနေဖြင့် အရှက်ရစေသော ဤပြဿနာကို အရေးယူရန် တိုက်တွန်းထားသည်။ ထို့ကြောင့်လည်း KK Park ဟန်ပြ စီးနင်းမှုသည် အာဆီယံ ထိပ်သီး ညီလာခံမတိုင်မီတွင် အချိန်ကိုက်ပြီး ဖြစ်ပေါ် ခဲ့ပုံရသည်။ လူကုန်ကူးမှုနှင့် လူသားချင်းစာနာမှုဆိုင်ရာ ခြိမ်းခြောက်မှု KK Park နှင့် အခြားငွေလိမ်စင်တာများ၏ ပြဿနာသည် ငွေကြေးခိုးယူမှုထက် ကျော်လွန်၍ လူသားချင်း စာနာထောက်ထားမှု အကျပ်အတည်းကိုပါ ဖြစ်စေသည်။ ဤဆိုက်ဘာဂိုဏ်းများသည် အမေရိကန် အပါအဝင် နိုင်ငံတကာမှ ပြည်သူများထံမှ နှစ်စဉ် ဒေါ်လာဘီလီယံ ပေါင်းများစွာ ခိုးယူနေသည်သာမက၊ လူကုန်ကူးခံရသူ ထောင်နှင့်ချီကို အဓမ္မစေခိုင်းမှု၊ ရုပ်ပိုင်းဆိုင်ရာ အကြမ်းဖက်မှုနှင့် လိင်ပိုင်းဆိုင်ရာ အလွဲသုံးစားမှုများ ဖြင့် ခိုင်းစေနေသည်။ ဤအချက်သည် KK Park ကိစ္စအား ကမ္ဘာ့လုံခြုံရေးနှင့် လူသားချင်းစာနာမှုဆိုင်ရာ ခြိမ်းခြောက်မှုအဖြစ် နိုင်ငံတကာက အလေးထား ရှုမြင်ရခြင်း၏ အဓိက အကြောင်းရင်း ဖြစ်သည်။ အဖြေရှာရန် လိုအပ်နေသော တာဝန်ခံမှု ကွင်းဆက် KK Park မှ လူအစုလိုက် ပြောင်းရွှေ့နေမှုနှင့်ပတ်သက်၍ ဗိုလ်ချုပ် ဇော်မင်းထွန်းနှင့် ဗိုလ်မှူးချုပ် စောတင်ဝင်းတို့ ၏ ကွဲပြားသော ပြောဆိုမှုများသည် ဤရာဇဝတ်မှုကွန်ရက်များတွင် စစ်အုပ်စု၏ စနစ်တကျ ပါဝင်ပတ်သက်မှု (သို့မဟုတ်) အကာအကွယ်ပေးမှုတို့ကို ဖော်ထုတ်ရန် အခြေခံအချက်များ ဖြစ်သည်။ နိုင်ငံတကာ အသိုက်အဝန်းအနေဖြင့် ဤရာဇဝတ် စီးပွားကွန်ရက်ကို ထိရောက်စွာ အမြစ်ဖြတ်နိုင်ရန်အတွက် ဆိုက်ဘာဂိုဏ်းများထက် ယင်းတို့ကို အကာအကွယ်ပေးနေသော မြန်မာစစ်အုပ်စုအား မဖြစ်မနေ ပစ်မှတ်ထား အရေးယူရမည်ဟု နိုင်ငံတကာရေးရာ လေ့လာသူများက သုံးသပ်ကြသည်။

KK Park စီးနင်းမှု ‘ဟန်ပြ’ ရှင်းလင်းရေး၊ KNU ကို စွပ်စွဲခြင်းနှင့် မပြိုလဲသေးသည့် ရာဇဝတ်ကွန်ရက် 

ထိုင်းမြန်မာနယ်စပ် ကန်ချနဘူရီခရိုင် တဘက်ရှိ ထီးခီးဒေသကို စစ်ကော်မရှင် ဗုံးကြဲ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၁၆ ရက်။ ထိုင်း-မြန်မာနယ်စပ် ထီးခီးဒေသကို စစ်ကော်မရှင်တပ်က လေကြောင်းဖြင့် ထပ်မံ ဗုံးကြဲခဲ့ရာ အရပ်သား ၂ ဦး ဒဏ်ရာရခဲ့သည်။ စစ်ကော်မရှင်တပ်သည် ထိုင်း-မြန်မာနယ်စပ်ရှိ ကရင်အမျိုးသား အစည်းအရုံး (KNU) ထိန်းချုပ်နယ်မြေ ဖြစ်သော ထီးခီးကျေးရွာကို တိုက်ပွဲဖြစ်ပွားနေခြင်းမရှိဘဲ အောက်တိုဘာလအတွင်း တတိယအကြိမ်မြောက် လေယာဉ်ဖြင့် ဗုံးထပ်မံကြဲချတိုက်ခိုက်ခဲ့ရာ ရွာသားနှစ်ဦး ထိခိုက်ဒဏ်ရာရရှိခဲ့ကြောင်း ဒေသခံများက ပြော သည်။ နောက်ဆုံးတိုက်ခိုက်မှုကို အောက်တိုဘာလ ၁၄ ရက်နေ့၊ မွန်းလွဲ ၁၂ နာရီခွဲ အချိန်ခန့်က ဂျက်တိုက်လေယာဉ်ဖြင့် ဗုံး ၄ လုံး ကြဲချတိုက်ခိုက်ခဲ့ခြင်း ဖြစ်ပြီး၊ ဗုံးကြဲမှုကြောင့် ဈေးဆိုင်တစ်ဆိုင် မီးလောင်ပျက်စီးခဲ့ကာ အရပ်သား နှစ်ဦး ထိခိုက်ဒဏ်ရာရရှိခဲ့သည်။ ဒေသခံတစ်ဦးက “တိုက်ပွဲမရှိဘဲ ဗုံးလာကြဲနေတာက စစ်တပ်က ထိုးစစ်ဆင်ဖို့ ဖြစ်နိုင်ချေရှိနေတယ်။ ရွာသား တချို့လည်း နေမရဲတော့ဘူး၊ ရှောင်တိမ်းတဲ့သူတွေ ရှောင်နေကြပြီ” ဟု ပြောသည်။ ဗုံးကြဲတိုက်ခိုက်မှုများကြောင့် ကာစီနိုလောင်းကစားရုံများ အပါအဝင် အရပ်သားနေအိမ်များနှင့် အလုပ်ရုံ အဆောက်အအုံ အချို့ ထိခိုက်ပျက်စီးခဲ့ကြောင်း ၎င်းက ဆိုသည်။ စစ်ကော်မရှင်တပ်သည် အောက်တိုဘာလ ၈ ရက်နေ့မှ စတင်၍ ကေအန်ယူ တပ်မဟာ(၄) ထိန်းချုပ်နယ်မြေ ဖြစ်သည့် ထီးခီးဒေသကို စတင် ဗုံးကြဲတိုက်ခိုက်ခဲ့ခြင်း ဖြစ်ပြီး၊ အောက်တိုဘာလ ၁၀ ရက်နေ့တွင်လည်း တစ်ကြိမ် ထပ်မံဗုံးကြဲခဲ့သဖြင့် ယခုလအတွင်း ၃ ရက် ၃ ကြိမ်အထိ လေယာဉ်ဖြင့် တိုက်ခိုက်မှုများ ရှိလာခဲ့ သည်။ လက်ရှိတွင် ထားဝယ်ခရိုင်အတွင်းရှိ ကံပေါက်ဒေသနှင့် ထိစပ်နေသည့် နတ်အိမ်တောင်စခန်းမှလွဲ၍ ထိုင်း-မြန်မာ နယ်စပ်ဒေသ တစ်ခုလုံးကို ကေအန်ယူ (KNU) မှ ထိန်းချုပ်ထားသည်။ ယင်းဒေသ၌ ၂၀၂၅ ခုနှစ်၊ ဧပြီလ ၁၉ ရက်နေ့တွင် ထီးထစခန်း၊ မေလ ၉ ရက်နေ့တွင် ထီးခီးနယ်စပ်စခန်းနှင့် နယ်စပ် ကုန်သွယ်ရေးဂိတ်၊ ဇွန်လ ၁၀ ရက်နေ့တွင် ဗောဓိစခန်း၊ ဇူလိုင်လ ၇ ရက်နေ့တွင် သုခစခန်းများကို ကေအန်ယူ (KNLA) နှင့် ပြည်သူ့ကာကွယ်ရေး မဟာမိတ်ပူးပေါင်းတပ်ဖွဲ့များက တိုက်ခိုက်သိမ်းယူထားခဲ့သည်။ ထိုသို့ တိုက်ခိုက်သိမ်းယူခဲ့ပြီးနောက် စစ်ကော်မရှင်တပ်ဘက်မှ လေကြောင်းဖြင့် မကြာခဏ တိုက်ခိုက်လာခြင်း ဖြစ်သည်။

ထိုင်းမြန်မာနယ်စပ် ကန်ချနဘူရီခရိုင် တဘက်ရှိ ထီးခီးဒေသကို စစ်ကော်မရှင် ဗုံးကြဲ

လေးကေကော်တွင် တိုက်ပွဲ ပြင်းထန်၊ KNLA ပူးပေါင်းတပ်က နေရာအချို့မှ ယာယီဆုတ် သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၉ ရက်။ မြန်မာ - ထိုင်းနယ်စပ်၊ ကရင်ပြည်ရှိ လေးကေကော်မြို့သစ်တွင် စစ်ကော်မရှင်တပ်နှင့် KNLA ဦးဆောင်သော ပူးပေါင်းတပ်ဖွဲ့တို့ကြား တိုက်ပွဲများ အောက်တိုဘာလ ၉ ရက်နေ့အထိ ပြင်းထန်နေဆဲဖြစ်ကြောင်း မြေပြင် သတင်းအရင်း အမြစ်များ အရ သိရသည်။ စက်တင်ဘာလ အစောပိုင်းမှ စတင်၍ စစ်ကော်မရှင်တပ်ဖွဲ့များသည် လူအင်အား အလုံးအရင်းဖြင့် မြဝတီမြို့ တောင်ပိုင်းသို့ ထိုးစစ်ဆင်လာခဲ့သည်။ နယ်ခြားစောင့်တပ် (BGF) အဖွဲ့၏ အကူအညီဖြင့် စစ်ကြောင်း ၅ ခုခန့် ပူးပေါင်းကာ လေးကေကော်ကို ပိတ်ဆို့ တိုက်ခိုက်နေခြင်း ဖြစ်သည်။ အောက်တိုဘာလ ပထမအပတ်အတွင်း စစ်တပ်၏ ထိုးစစ်နှင့် လေကြောင်းပစ်ကူများကြောင့် ကရင် အမျိုးသား လွတ်မြောက်ရေး တပ်မတော် KNLA ပူးပေါင်းတပ်ဖွဲ့သည် စစ်နည်းဗျူဟာအရ လေးကေ့ကော်မြို့သစ်ရှိ ရပ်ကွက် ၃ မှ ဆေးရုံကုန်းနှင့် ရပ်ကွက် ၅ မှ ရေကန်ကုန်း နေရာတို့မှ ယာယီ ဆုတ်ခွာပေးထားရသည်။ မြေပြင်ထိုးစစ်များအပြင် လေကြောင်းတိုက်ခိုက်မှုများ ပါဝင်သော စစ်ပွဲများက ဆက်လက် ပြင်းထန်နေဆဲဖြစ်၍ ဒေသခံပြည်သူများသည် ကြီးမားသော အသက်အန္တရာယ် စိုးရိမ်မှုများနှင့် ရင်ဆိုင်နေရသည်။ လက်ရှိ စစ်ရေး အခြေအနေများကြောင့် လေးကေကော်ဒေသနှင့် ဖလူးကျေးရွာအုပ်စုမှ ကျေးရွာပေါင်း ၈ ရွာ ခန့်ရှိ စစ်ဘေးရှောင်ပြည်သူ ၃,၄၀၀ ကျော်မှာ နေရပ်စွန့်ခွာခဲ့ရသည်။ အဆိုပါစစ်ဘေးရှောင်များသည် ထိုင်း-မြန်မာ နယ်စပ် သောင်ရင်းမြစ်ကမ်းဘေး တစ်လျှောက်၌ ခိုလှုံနေကြရ သည်။ ထိုင်းစစ်တပ်နှင့် ထိုင်းနယ်ခြားစောင့်တပ်ဖွဲ့များကလည်း လေးကေ့ကော်ဒေသနှင့် မျက်နှာချင်းဆိုင် နယ်စပ် တစ်လျှောက်တွင် လုံခြုံရေးကို တင်းတင်းကျပ်ကျပ် တိုးမြှင့်ချထားသည်။ ထို့အပြင် မြန်မာဘက်မှ ထွက်ပြေးလာသော စစ်ရှောင်ပြည်သူများကို ယာယီ လက်ခံထားရှိနိုင်ရန် အတွက် ယာယီနေရာများကိုလည်း စီစဉ်ပေးထားကြောင်း ထိုင်းသတင်းများက ဖော်ပြသည်။

လေးကေကော်တွင် တိုက်ပွဲ ပြင်းထန်၊ KNLA ပူးပေါင်းတပ်က နေရာအချို့မှ ယာယီဆုတ်

လေးကေကော်တွင် စစ်ကော်မရှင်တပ်က စစ်ကြောင်း ၅ ကြောင်းဖြင့် ထိုးစစ်ဆင်  သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာ ၄ ရက်။ ကရင်ပြည်၊ မြဝတီမြို့တောင်ဘက်၊ လေးကေကော်မြို့သစ် အနီးတွင် စစ်ကော်မရှင်တပ်နှင့် KNLA ပူးပေါင်းတပ်တို့အကြား တိုက်ပွဲများ ပြင်းထန်နေပြီး စစ်တပ်က စစ်ကြောင်း ၅ ကြောင်းဖြင့် ထိုးစစ်ဆင်နေ ကြောင်း မြေပြင်သတင်းအရင်းအမြစ်က ပြောသည်။ စစ်ကော်မရှင်တပ်သည် မြဝတီမြို့ တောင်ဘက်တွင် ဆုံးရှုံးထားသည့် တပ်စခန်းများကို ပြန်လည်ရယူရန် အတွက် ဒရုန်းနှင့် လက်နက်ကြီးပစ်ကူများ ယူကာ စစ်ကြောင်း ၅ ကြောင်းဖြင့် ဝင်ရောက်လာခြင်းဖြစ်ကြောင်း သိရသည်။ လေးကေ့ကော်မြို့သစ်နားက ရေကန်ကုန်းကလေးဘက်မှ ထိုးဖောက်ဝင်ရောက်လာသည့် စစ်ကြောင်းနှင့် အောက်တိုဘာလဆန်းအထိ တိုက်ပွဲများ ပြင်းထန်နေသည်။ တိုက်ပွဲများတွင် နှစ်ဖက်အကျအဆုံး များနေပြီး လက်ရှိအချိန်ထိ ကရင်အမျိုးသား အစည်းအရုံး (KNU) ဘက်ကရော၊ စစ်ကော်မရှင်တပ်ဘက်ကပါ တစ်စုံ တစ်ရာ ထုတ်ပြန်ခြင်း မရှိသေးပေ။ လေကြောင်းတိုက်ခိုက်မှု နည်းပါးသော်လည်း သင်္ကန်းညီနောင်ဘက်မှ မစ်ဇိုင်းဒုံးများ၊ လက်နက်ကြီးများနှင့် မောင်းသူမဲ့ ကာမီကာဇေဒုံးများဖြင့် စစ်ကူပစ်ပေးနေကြောင်း တိုက်ပွဲအခြေအနေကို သိရှိသူတစ်ဦးက ပြောသည်။ တိုက်ပွဲများကြောင့် လေးကေကော်၊ မင်းလက်ပံ၊ ဖလူး၊ ရသေ့ဂူ၊ ထီးမယ်ဝါးခီး စသည့်ရွာများမှ ဒေသခံ ထောင်နှင့်ချီကာ သောင်းရင်းမြစ်တစ်ဘက်ကမ်းရှိ ထိုင်းနိုင်ငံဘက်သို့ ထွက်ပြေးတိမ်းရှောင်နေကြရသည်။ အဆိုပါ စစ်ဘေးရှောင်များအတွက် ယာယီတဲများ၊ စားနပ်ရိက္ခာနှင့် ဆေးဝါးများ လိုအပ်နေကြောင်း အကူအညီပေးနေသူများက ဆိုသည်။

လေးကေကော်တွင် စစ်ကော်မရှင်တပ်က စစ်ကြောင်း ၅ ကြောင်းဖြင့် ထိုးစစ်ဆင်

« Prev 1 2 3 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

ရက်သတ္တပတ် အတန်ကြာတွင် အီရန်နှင့် အမေရိကန် အကြား ပစ်ခတ်မှု ပြန်ဖြစ် — August 31, 2026 3:40 pm
နီပေါ ရေကြီးမှုကြောင့် လိုဏ်ခေါင်းအတွင်း လူရာပေါင်းများစွာ ပိတ်မိနေဆဲဖြစ် အတည်ပြု သေဆုံးသူ ၉၀၀ ကျော်ပြီ — August 31, 2026 3:29 pm
EU နှင့် မပူးပေါင်းရန် အိုက်စလန် လူထု ဆန္ဒပြု — August 31, 2026 3:27 pm

Recent Posts

ချင်းတောင်ပိုင်း မင်းတပ်တွင် စစ်အုပ်စုက လေကြောင်းမှ ဗုံးကြဲ၍ ကလေးများအပါ ၈ ဦး သေဆုံး
ရခိုင်-မကွေး အစပ် မင်းတုန်းတွင် ထွန်စက်များ ချောဆွဲခံရမှုကြောင့် တောင်သူများ စိုးရိမ်ထိတ်လန့်
ရခိုင်မြောက်ပိုင်း မောင်တောနယ်စပ်တွင် ကင်းလှည့်နေသည့် AA နှင့် ARSA, RSO ပူးပေါင်းအဖွဲ့ တိုက်ပွဲဖြစ်
ရက်သတ္တပတ် အတန်ကြာတွင် အီရန်နှင့် အမေရိကန် အကြား ပစ်ခတ်မှု ပြန်ဖြစ်
နီပေါ ရေကြီးမှုကြောင့် လိုဏ်ခေါင်းအတွင်း လူရာပေါင်းများစွာ ပိတ်မိနေဆဲဖြစ် အတည်ပြု သေဆုံးသူ ၉၀၀ ကျော်ပြီ

Archives

Archives

×Close