KNU – Page 2 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
နိုင်ငံတကာသတင်း
NMG အကြောင်း
Contact

Home
Tag Archive

Tag: KNU

ကော်သူးလေပြည်ကို ပြည်ထောင်စု ယူနစ် တစ်ခု အဖြစ် တည်ထောင်ဖွဲ့စည်းမည် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၂ ရက်။ ကရင်ဘိုးဘေးတို့၏ မျှော်လင့်ချက်ဖြစ်သလို ကရင်တစ်မျိုးသားလုံး၏ အိပ်မက်လည်းဖြစ်သည့် ‘ကော်သူးလေ ပြည်’ တည်ဆောက်ရေးကို ဖက်ဒရယ် ပြည်ထောင်စုမူဘောင် အတွင်းမှပင် အကောင်အထည် ဖော်သွားမည် ဖြစ်ကြောင်း ကရင်အမျိုးသားအစည်းအရုံး (KNU) က အတိအလင်း ပြောကြားလိုက်သည်။ အဆိုပါ တည်ဆောက်ရေးသည် ပြည်ထောင်စုမှ ခွဲထွက်ရန်မဟုတ်ဘဲ တိုင်းရင်းသားညီအစ်ကိုများနှင့်အတူ တန်းတူညီမျှစွာ ယှဉ်တွဲနေထိုင်နိုင်မည့် ပြည်နယ်တစ်ခုအဖြစ် ရည်ရွယ်ခြင်းဖြစ်သည်ဟု ဆိုသည်။ “ကော်သူးလေ” ဟူသည့် အမည်နာမနှင့် ပတ်သက်၍ KNU ပြောရေးဆိုခွင့်ရှိသူ ပဒိုစောတောနီးက “ကျနော်တို့က ကော်သူးလေပြည်သားတွေဆိုတာက ကျနော်တို့ ဒီဘိုးဘွားတွေကနေ လက်ဆင့်ကမ်းလာတဲ့ အမည်နာမ တစ်ခု အနေနဲ့ ကျနော်တို့ ကရင်တွေ နေထိုင်တဲ့ တိုင်းပြည်နော်။ ဒါပေမယ့် သူ့ရဲ့ မူရင်းအဓိပ္ပာယ်ကတော့ မကောင်းမှု အလုံးစုံကင်းစင်တဲ့ တိုင်းပြည်လို့ အဓိပ္ပာယ်သက်ရောက်ပါတယ်။ အဲ့ဒီထဲမှာကတော့ ကျနော်တို့ နေထိုင်ကြတာ ဖြစ်တယ်” ဟု ပြောသည်။ KNU အနေဖြင့် ကော်သူးလေပြည် တည်ဆောက်ရေး မူဝါဒကို ၁၉၅၆ ခုနှစ်ကတည်းက စတင်ချမှတ်ခဲ့ခြင်း ဖြစ် ပြီး ယခုလက်ရှိ တော်လှန်ရေးကာလ အကူးအပြောင်းတွင် အပြောင်းအလဲတစ်ခု ဖြစ်ပေါ်စေရန်အတွက် ‘ကော်သူးလေချာတာ’ (Kawthoolei Charter) ကို ရေးဆွဲပြဋ္ဌာန်းကာ လက်တွေ့ကျကျ ဆောင်ရွက်နေပြီ ဖြစ် သည်။ ပဒိုစောတောနီးက ဆက်လက်၍ “နှစ်ပေါင်း ခုနှစ်ဆယ်ထဲမှာပဲ ကျနော်တို့ မယိမ်းမယိုင်ပဲ ပြည်ထောင်စု စစ်စစ် ကို တည်ဆောက်မယ်ဆိုတာ ကျနော်တို့ ခံယူချက်ပြင်းပြင်းနဲ့ပဲ ကျနော်တို့ ချီတက်နေပါတယ်။ အဲဒါကြောင့်မို့ လို့ ကျနော်တို့ ပြောနေတဲ့ ကော်သူးလေပြည်က လွတ်လပ်ချုပ်ခြာအာဏာရှိတဲ့ ကျနော်တို့ သီးခြားနိုင်ငံလည်း မဟုတ်ပါဘူး။ ကျနော်တို့ ပြည်ထောင်စုထဲမှာ ပြည်ထောင်စုအဖွဲ့ဝင် ဆက်ရှိမယ်။ ကျနော်တို့ တခြားညီအစ်ကို လက်တွဲပြီးတော့ အင်မတန်ဖွံ့ဖြိုးတိုးတက် ခိုင်မာတဲ့ ပြည်ထောင်စု၊ သာယာဝပြောတဲ့ ပြည်ထောင်စုတစ်ခု တည်ဆောက်နိုင်ဖို့အတွက် ကျနော်တို့ ဆက်ပြီးတော့ ရုန်းကန်နေကြပါတယ်” ဟု ပြောသည်။ ကော်သူးလေပြည်ကို လက်ရှိ KNU ထိန်းချုပ်ထားသည့် တပ်မဟာ ၇ ခု (သထုံ၊ တောင်ငူ၊ ညောင်လေးပင်၊ မြိတ်-ထားဝယ်၊ ဖာပွန်၊ ဒူးပလာယာ နှင့် ဘားအံခရိုင်) အပေါ် အခြေခံကာ တည်ဆောက်သွားရန် ရည်မှန်းထား သည်။ သို့သော် အဆိုပါဒေသများတွင် ကရင်လူမျိုးများသာမက ဗမာ၊ ရှမ်း၊ မွန်၊ ပအိုဝ်း အစရှိသည့် တိုင်းရင်းသား ပေါင်းစုံ စုပေါင်းနေထိုင်ကြသည့်အတွက် နယ်မြေအငြင်းပွားမှုများကို ရှောင်ရှားကာ အားလုံးလက်ခံနိုင်သည့် ငြိမ်းချမ်းစွာ ယှဉ်တွဲနေထိုင်ရေးမူကို ကျင့်သုံးသွားမည်ဟု ဆိုသည်။ “ကျနော်တို့ ပြည်ထောင်စုကို ဖွဲ့နိုင်ရေးအတွက် ပြည်နယ်အသီးသီးမှာရှိတဲ့ ပြည်နယ်တွေက သူ့မှာသူ ဖွဲ့စည်းပုံ အခြေခံဥပဒေဆိုတာလည်း ရှိရမယ်လေ။ ဒါပေမယ့် ကျနော်တို့ ဒီလိုမျိုး တော်လှန်ရေးကာလ အကူးအပြောင်း ဖြစ်နေတဲ့ ကာလတွေမှာတော့ ဒီလိုမျိုး တကယ်တိကျခိုင်မာတဲ့ ဖွဲ့စည်းပုံအခြေခံဥပဒေကို မသုံးနိုင်သေးတဲ့ အနေအထားမှာ ကော်သူးလေပဋိညာဉ်ဆိုတဲ့ တစ်ခုကိုတော့ ကျနော်တို့ ပြဋ္ဌာန်းပြီးတော့ လုပ်ဆောင်သွားဖို့ ရှိတာပေါ့” ဟု ပဒိုစောတောနီးက အကူးအပြောင်းကာလ အုပ်ချုပ်ရေးယန္တရားနှင့် ပတ်သက်၍ ရှင်းပြသည်။ လက်ရှိမြေပြင်အခြေအနေတွင် စစ်ကောင်စီတပ်များသည် ၂၀၂၁ ခုနှစ်နောက်ပိုင်း ဆုံးရှုံးသွားသော နယ်မြေများ ကို ပြန်လည်ရရှိရန် KNU ထိန်းချုပ်နယ်မြေများအတွင်း အပြင်းအထန် ထိုးစစ်ဆင်နေသဖြင့် တိုက်ပွဲများ နေ့စဉ်နှင့်အမျှ ဖြစ်ပွားလျက်ရှိသည်။ စစ်ရေးတင်းမာမှုများ ကြုံတွေ့နေရသော်လည်း KNU အနေဖြင့် အောက်ခြေမှ အထက်သို့ သွားသည့် (Bottom-up) ပြည်ထောင်စုစနစ်ကို တည်ဆောက်ရန်အတွက် ကော်သူးလေပြည် ဖော်ဆောင်ရေးကို ဆက်လက်ရုန်းကန် သွားမည်ဟု ပြောသည်။

ကော်သူးလေပြည်ကို ပြည်ထောင်စု ယူနစ် တစ်ခု အဖြစ် တည်ထောင်ဖွဲ့စည်းမည်

ရွေးကောက်ပွဲမှာ စစ်တပ် အကျိုးစီးပွားသာဖြစ်ဟု KNU ဥက္ကဌ ပြော သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၂၀ ရက်။ စစ်ကော်မရှင်က ပြုလုပ်ရန် ပြင်ဆင်နေသည့် ရွေးကောက်ပွဲသည် စစ်တပ်နှင့် အပေါင်းအပါတစ်စု၏ အကျိုး စီးပွား အတွက်သာ ဖြစ်ပြီး အာဏာရှင်စနစ် ထာဝရတည်မြဲရေးကို ရည်ရွယ်ခြင်းဖြစ်ကြောင်း ကရင်အမျိုးသား အစည်းအရုံး (KNU) ဥက္ကဋ္ဌ ပဒိုစောကွယ်ထူးဝင်းက ပြောဆိုလိုက်သည်။ ဒီဇင်ဘာလ ၁၉ ရက်တွင် ကျရောက်သည့် ၂၇၆၅ ခုနှစ်၊ ကရင်အမျိုးသားနှစ်သစ်ကူးနေ့သို့ ပေးပို့သည့် သဝဏ်လွှာ၌ ဥက္ကဋ္ဌက ထိုသို့ ထည့်သွင်းပြောဆိုခဲ့ခြင်းဖြစ်သည်။ စစ်အုပ်စုသည် ၎င်းတို့၏ အာဏာကို ၂၀၀၈ ဖွဲ့စည်းပုံအခြေခံ ဥပဒေအတိုင်း ဆက်လက် ထိန်းချုပ်နိုင်ရန်အတွက် အတုအယောင်ရွေးကောက်ပွဲကို နည်းလမ်းမျိုးစုံဖြင့် ပြင်ဆင်နေခြင်းဖြစ်သည်ဟု ဆိုသည်။ ပဒိုစောကွယ်ထူးဝင်းက “အခုအချိန်မှာ ဗမာစစ်အာဏာရှင်အုပ်စုဟာ သူတို့ရဲ့ အာဏာ ထာဝရ တည်တံ့ခိုင်မြဲ နိုင်ဖို့အတွက် ကြိုးပမ်းဆောင်ရွက်နေရာမှာ အတုအယောင်ရွေးကောက်ပွဲတစ်ရပ်ကို ၂၀၀၈ ဖွဲ့စည်းပုံ အခြေခံ ဥပဒေအတိုင်း ကျင်းပနိုင်ရန် ပြင်ဆင်ဆောင်ရွက်နေပါတယ်။ အဓိကရည်ရွယ်ချက်ကတော့ စစ်တပ်ဟာ ဒီနိုင်ငံ ရဲ့ နိုင်ငံရေးကို အမြဲတမ်းချုပ်ကိုင်ချယ်လှယ်ပြီး ထာဝရအာဏာတည်တံ့ခိုင်မြဲနေစေဖို့အတွက်ပဲ ဖြစ်ပါတယ်” ဟု ပြောသည်။ ထို့အပြင် ယခုရွေးကောက်ပွဲသည် စစ်ခေါင်းဆောင်များ၏ ဆွေမျိုးသားချင်းများနှင့် မိတ်ဖက်အစုအဖွဲ့များ ကြီးပွားချမ်းသာရေးအတွက် အခြေခံထားသည့် လုပ်ရပ်ဖြစ်ကြောင်းလည်း ၎င်းက ဆက်လက်ပြောဆိုသည်။ “ဒီအတုအယောင်ရွေးကောက်ပွဲမှာ သေချာပေါက် အနိုင်ရဖို့အတွက်ကို ပြင်ဆင်စီမံနေပြီး စစ်ခေါင်းဆောင် အများအပြားဟာ ရွေးကောက်ပွဲမှာ ပါဝင်အရွေးခံပြီး အနိုင်ရဖို့ နည်းလမ်းမျိုးစုံသုံးနေတာ ဖြစ်ပါတယ်။ စစ်အာဏာရှင်အုပ်စုဟာ စစ်တပ်ထဲမှာရှိနေတဲ့ ဗမာလူမျိုးတွေနဲ့ မိတ်ဖက်ဆွေမျိုးများ အာဏာရရှိရေးနဲ့ ကြီးပွားတိုးတက်ရေးအတွက်ကို လုပ်ဆောင်နေတာ ဖြစ်ပါတယ်” ဟု KNU ဥက္ကဋ္ဌက ပြောသည်။ မြန်မာနိုင်ငံတွင် ၁၉၆၂ ခုနှစ် အာဏာသိမ်းချိန်မှစ၍ စစ်အုပ်ချုပ်ရေးပုံစံအမျိုးမျိုး ပြောင်းလဲခဲ့သော်လည်း မဟာ လူမျိုးကြီး ဝါဒကိုမူ စွန့်လွှတ်ခြင်းမရှိကြောင်း၊ ၂၀၂၁ ခုနှစ် ဖေဖော်ဝါရီလတွင် ထပ်မံ အာဏာသိမ်း လိုက်ခြင်း သည် ပြည်သူများလိုလားသည့် ဖက်ဒရယ် ဒီမိုကရေစီ ပြည်ထောင်စု တည်ဆောက်ရေးကို စစ်တပ်က လုံးဝ လက်မခံနိုင်ကြောင်း ပြသလိုက်ခြင်းပင် ဖြစ်သည်ဟု KNU က သုံးသပ်သည်။ ပဒိုစောကွယ်ထူးဝင်းက “ဗမာစစ်တပ်အနေနဲ့ ဒီလိုအဓမ္မ အာဏာသိမ်းမှုဟာ လူမျိုးစုတွေနဲ့ ပြည်သူလူထုတွေ လိုလားတဲ့ ဒီနိုင်ငံကို ဖက်ဒရယ်ဒီမိုကရေစီပြည်ထောင်စုအနေနဲ့ တည်ထောင်ဖို့ဆိုတာကို လုံးဝလက်မခံနိုင်ဘူး ဆိုတာ ရှင်းရှင်းလင်းလင်း ဖော်ပြတာပဲ ဖြစ်ပါတယ်။ ဗမာစစ်တပ်အနေနဲ့ ၂၀၀၈ ဖွဲ့စည်းပုံအခြေခံဥပဒေက ရေးသားထားတဲ့ အခွင့်အာဏာပေးထားတဲ့အတိုင်းပဲ စစ်တပ်ကနေ ကြီးစိုးချုပ်ကိုင်လိုတဲ့ ဆန္ဒပဲ ရှိပါတယ်” ဟု ပြောသည်။ KNU ၏ တော်လှန်ရေး ရည်မှန်းချက်သည် အာဏာရှင်စနစ် ပုံသဏ္ဍာန် အမျိုးမျိုးကို ဖြိုချဖျက်ဆီးပြီး တန်းတူရေးနှင့် ကိုယ်ပိုင်ပြဋ္ဌာန်းခွင့်ရှိသည့် ဖက်ဒရယ်ဒီမိုကရေစီ ပြည်ထောင်စု တည်ဆောက်ရေး ဖြစ်ကြောင်း၊ ယင်းရည်မှန်းချက် အောင်မြင်ရန် နိုင်ငံရေးနည်းလမ်း တစ်ခုတည်းနှင့် မလုံလောက်ဘဲ စစ်ရေးနည်းလမ်းဖြင့် လည်း အကောင်အထည် ဖော်ဆောင်ရွက်သွားမည် ဖြစ်ကြောင်း KNU ဥက္ကဋ္ဌက ပြောသည်။

ရွေးကောက်ပွဲမှာ စစ်တပ် အကျိုးစီးပွားသာဖြစ်ဟု KNU ဥက္ကဋ္ဌ ပြော

ငွေလိမ်ခြံဝန်းကို အပြီးသတ်ချိပ်ပိတ်ပြီး လူထုအကျိုးစီးပွားအတွက် အသုံးပြုမည်ဟု KNU ပြော  သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၁၉ ရက်။ ကရင်ပြည်၊ မြဝတီခရိုင်၊ မင်းလက်ပံရှိ Shunda Park ငွေလိမ်ဂိုဏ်းများ KNU က အပြီးသတ်ချိတ်ပိတ်ပြီး လူထုအကျိုးပြု စီမံကိန်းအဖြစ် ဖော်ဆောင်မည်ဟု ပြောသည်။ မြဝတီခရိုင်၊ မင်းလက်ပံနယ်မြေအတွင်း နှစ်ရှည်လများ အခြေစိုက်ခဲ့သည့် Shunda Park ငွေလိမ်ခြံဝင်း အတွင်းရှိ အွန်လိုင်းငွေလိမ်လုပ်ငန်း (Scam) များကို ကရင်အမျိုးသားအစည်းအရုံး (KNU) က အပြီးသတ် အောင်မြင်စွာ တိုက်ဖျက်ချိတ်ပိတ်လိုက်ပြီဖြစ်ကြောင်း ဒီဇင်ဘာလ ၁၇ ရက်နေ့ ထုတ်ပြန်လိုက်သည်။ “ချိတ်ပိတ်သိမ်းပြီးနောက် ၎င်းနေရာကို အနာဂတ်တွင် အများပြည်သူ အကျိုးစီးပွားအတွက်သာ အသုံးပြု စေရမည်ဖြစ်ပြီး၊ ယင်းသို့ဆောင်ရွက်ရာတွင်လည်း သက်ဆိုင်ရာ ဒေသခံပြည်သူများနှင့် ခေါင်းဆောင်များ နှင့် တိုင်ပင်ကာ ပွင့်လင်းမြင်သာစွာ၊ တာဝန်ခံတာဝန်ယူမှုရှိစွာ ဆောင်ရွက်ရမည်” ဟု KNU ထုတ်ပြန်ချက်ထဲတွင် ဖော်ပြထားသည်။ အဆိုပါခြံဝင်းကို နောင်အနာဂတ်တွင် ဒေသခံပြည်သူများ၏ လူမှုစီးပွားဘဝ ဖွံ့ဖြိုးတိုးတက်ရေးနှင့် အဆင့်မြင့် ပညာရေး ဗဟိုဌာနတစ်ခုအဖြစ် ပြောင်းလဲဖော်ဆောင်သွားမည်ဟု KNU က ကတိပြု ပြောကြားသည်။ “လုံခြုံရေးနှင့်နိုင်ငံရေး တည်ငြိမ်မှု များရှိလာပါက ၎င်းနေရာကို ခေတ်မီနည်းပညာ၊ စီးပွားရေး၊ ကုန်သွယ်ရေး၊ ဥပဒေ၊ မှုခင်း၊ လုံခြုံရေးနှင့် မဟာဗျူဟာလေ့လာရေး စသည့်ဘာသာရပ်များကို အထူးပြုသင်ကြားပေးသော အဆင့်မြင့် ပညာရေး ပုရဝုဏ် တစ်ခု အဖြစ် ပြန်လည်အသုံးပြုရန် ရည်ရွယ်ချက်ထားရှိရမည်” KNU ထုတ်ပြန် ချက်က ဆိုသည်။ KNU အနေဖြင့် နိုဝင်ဘာလ ၂၁ ရက်နေ့မှစ၍ Shunda Park ခြံဝင်းအတွင်းရှိ ရာဇဝတ်မှုများကို စတင်ရှင်းလင်း ခဲ့ရာ သုံးပတ်ကျော်အကြာတွင် လူကုန်ကူးခံရသူများအပါအဝင် Scam အလုပ်သမားအားလုံးကို အပြီးသတ် ကယ်ထုတ်နိုင်ခဲ့သည်။ ယင်းစစ်ဆင်ရေးအတွင်း နှစ်ရှည်လများ လည်ပတ်ခဲ့သည့် အွန်လိုင်းလောင်းကစားနှင့် ငွေလိမ်လုပ်ငန်းများကို အဆုံးသတ်နိုင်ခဲ့ရုံသာမက ကွန်ပျူတာနှင့် ဆက်သွယ်ရေးပစ္စည်း အမြောက်အမြားကိုလည်း သိမ်းဆည်းနိုင်ခဲ့ သည်။ ခြံဝင်းအတွင်းမှ ကယ်ထုတ်နိုင်ခဲ့သည့် လူကုန်ကူးခံရသူများအနက် နိုဝင်ဘာလ ၃၀ ရက်နေ့တွင် မလေးရှားနိုင်ငံ သား ၃၁ ဦးနှင့် ရုရှားနိုင်ငံသား ၁ ဦး အပါအဝင် နိုင်ငံခြားသား ၁၇၇ ဦးကို သက်ဆိုင်ရာနိုင်ငံများသို့ လွှဲပြောင်း ပေးအပ်နိုင်ခဲ့သည်။ ထို့ပြင် ဒီဇင်ဘာလ ၁၄ ရက်နေ့အထိ နောက်ထပ် နိုင်ငံခြားသား ၁,၂၆၀ ဦးကိုလည်း ထပ်မံကယ်ထုတ်နိုင်ခဲ့ပြီး ယင်းတို့အနက် အများစုမှာ တရုတ်နိုင်ငံသားများဖြစ်ကာ အိန္ဒိယ၊ နီပေါ၊ ထိုင်း၊ ဗီယက်နမ်နှင့် အီသီယိုးပီးယား နိုင်ငံသားများလည်း ပါဝင်ကြောင်း KNU ၏ ထုတ်ပြန်ချက်များအရ သိရသည်။ KNU ၏ Shunda Park ငွေလိမ်ခြံဝင်း အပြီးသတ် ချိတ်ပိတ်သိမ်းဆည်းမှုသည် နယ်စပ်ဒေသ တရားဥပဒေ စိုးမိုးရေးအတွက် ကြီးမားသော ခြေလှမ်းတစ်ခုဖြစ်ပြီး အဆိုပါနေရာအား လူထုအကျိုးပြု ပညာရေးဗဟိုဌာန အဖြစ် ပြောင်းလဲမည်ဆိုသည့်အချက်မှာ အားလုံး၏ စိတ်ဝင်စားမှုကို ရရှိနေသည်။ ထို့အပြင် မင်းလက်ပံဒေသခံများ အနေဖြင့် စစ်ကော်မရှင်တပ်၏ လက်တုံ့ပြန် တိုက်ခိုက်မှုများကို စိုးရိမ်နေကြ သည်။ မြေပြင်သတင်းရင်းမြစ် တစ်ဦးက “စစ်တပ်က သူတို့အကျိုးစီးပွား ထိခိုက်တော့ ကျနော်တို့ ဒီဘက်က ရွာတွေ ကို လက်နက်ကြီးနဲ့ လှမ်းပစ်နေတာတော့ တော်တော်လေး စိတ်ပူရတယ်။ တိုက်ပွဲတွေကလည်း ဆက်တိုက် ဖြစ်တာလေနော် ဆိုတော့ အခုထိလည်း စိတ်ပူနေရတုန်းပဲဗျ” ဟု ပြောသည်။ စစ်ဆင်ရေးကာလအတွင်း အာဏာသိမ်းစစ်ကောင်စီတပ်သည် Shunda Park ရှိ ၎င်းတို့၏ အကျိုးစီးပွားကို ကာကွယ်ရန်အတွက် လေကြောင်းနှင့် လက်နက်ကြီးများအသုံးပြုကာ နေ့စဉ်ရက်ဆက် တိုက်ခိုက်ခဲ့သဖြင့် အနီးပတ်ဝန်းကျင်ရှိ အရပ်သားနေအိမ်များနှင့် စစ်ရှောင်စခန်းများအနီး လက်နက်ကြီးကျည်များ ကျရောက်ပေါက်ကွဲခဲ့သည်။ စစ်တပ်၏ ရည်ရွယ်ချက်မှာ ခြံဝင်းအတွင်းရှိ ရာဇဝတ်မှု သက်သေများကို ဖျက်ဆီးရန်နှင့် ပြည်သူများကို ထိတ်လန့်အောင် လုပ်ဆောင်ရန်ဖြစ်ကြောင်း KNU က ဆိုသည်။ လက်ရှိတွင် Shunda Park ခြံဝင်းအတွင်းရှိ အဆောက်အအုံများနှင့် ပစ္စည်းများကို KNU က စနစ်တကျ စာရင်းပြုစုသိမ်းဆည်းထားပြီး ရာဇဝတ်မှုတွင် ပါဝင်ပတ်သက်သူများကို ကော်သူးလေဥပဒေနှင့်အညီ ဆက်လက်အရေးယူဆောင်ရွက်သွားမည်ဖြစ်ကြောင်း သိရသည်။

ငွေလိမ်ခြံဝန်းကို အပြီးသတ်ချိပ်ပိတ်ပြီး လူထုအကျိုးစီးပွားအတွက် အသုံးပြုမည်ဟု KNU ပြော 

NUG ၏ အထူးတိုင်း စစ်ဌာနဗျူဟာမှူး အပါအဝင် တပ်ဖွဲ့ဝင်နှင့် ထောက်ပို့ ၅၀ ခန့်ကို KNU ဖမ်းထား သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၁၇ ရက်။ တနင်္သာရီတိုင်းအတွင်း လှုပ်ရှားနေသည့် အမျိုးသားညီညွတ်ရေး အစိုးရ (NUG) ၏ အထူးတိုင်းစစ်ဌာန ဗျူဟာမှူး တစ်ဦး အပါအဝင် တပ်ဖွဲ့ဝင်နှင့် ထောက်ပို့ ၅၀ ခန့်ကို ကရင်အမျိုးသားအစည်းအရုံး (KNU) တပ်မဟာ ၄ လက်အောက်ခံ တပ်များက ဖမ်းဆီးထိန်းသိမ်းထားသည်ဟု ထားဝယ်ခရိုင်အမှတ် ၂ တပ်ရင်းက ပြောသည်။ ယနေ့ (ဒီဇင်ဘာ ၁၇ ရက်) နံနက်ပိုင်းတွင် ဖမ်းဆီးထိန်းသိမ်းလိုက်ကြောင်း ထားဝယ်ခရိုင်အမှတ် ၂ တပ်ရင်းက တာဝန်ရှိသူ တစ်ဦးက ပြောသည်။ ဖြစ်စဉ်နှင့်ပတ်သက်၍ ထားဝယ်ခရိုင်အမှတ် ၂ တပ်ရင်း တာဝန်ရှိသူက “ဘာကြောင့်ဆိုတာလည်း အသေအချာ မသိရသေးဘူး။ အခုက ဆက်ပြီးဖမ်းထားတုန်းပဲ။ တပ်မဟာ ၄ တပ်ရင်း ၁၂ ဌာနချုပ်ကို ခေါ်သွားတယ်လို့တော့ သိရတယ်။ ဗျူဟာမှူးရယ်၊ တပ်ရင်းမှူးရယ်၊ ရဲဘော်အချို့ရယ်က နယ်စပ်ကအပြန် သူတို့တပ်ကို ဖြတ်ရတာမှာ အဲဒီမှာ ထိန်းလိုက်တာ။ ပြီးမှ ဒီမနက်မှာ တပ်ခွဲက ရဲဘော်တွေနဲ့ ထောက်ပို့တွေကိုပါ ဆက်တိုက်ဖမ်းတာ အားလုံး ၄၀ ကျော်၊ ၅၀ နီးပါး ရှိနေပြီ” ဟု ပြောသည်။ ဖမ်းဆီးခံရသူများထဲတွင် အထူးတိုင်းစစ်ဌာန နည်းဗျူဟာ ၃၃ ဗျူဟာမှူး စောဒါးကို၊ တနင်္သာရီတိုင်းစစ်ဌာန ဒရုန်းတပ်ရင်း ဒုတပ်ရင်းမှူး ဒိုရာ နှင့် ထားဝယ်ခရိုင်အမှတ် ၂ တပ်ရင်း (T5) တပ်ရင်းမှူး မင်းသားကြီးတို့ကဲ့သို့ အဆင့်မြင့်အရာရှိများ ပါဝင်နေသည်။ ၎င်းတို့အား KNU တပ်မဟာ ၄၊ တပ်ရင်း ၁၂ လက်အောက်ခံ ကစယ်ဒိုကျားတပ်ဖွဲ့နှင့် ပုတီးတစ်လုံးတပ်ဖွဲ့တို့က ဖမ်းဆီးကာ လက်နက်ခဲယမ်းများကိုပါ သိမ်းဆည်းထားခြင်းဖြစ်သည်။ ဒေသခံများ၏ ပြောဆိုချက်အရ ပြီးခဲ့သည့် ဒီဇင်ဘာလ ၁၆ ရက်နေ့က ထားဝယ်ခရိုင်အမှတ် ၂ တပ်ရင်း တပ်ဖွဲ့ဝင်များနှင့် KNU တပ်ရင်း ၁၂ အောက်ရှိ တပ်ဖွဲ့ဝင်များအကြား ပြဿနာတစ်စုံတစ်ရာ ဖြစ်ပွားခဲ့သည်။ အဆိုပါ ဖြစ်စဉ်များနှင့် ပတ်သက်၍ KNU တာဝန်ရှိသူများကို ဆက်သွယ်နေဆဲ ဖြစ်သည်။ ထိုဖြစ်စဉ် နောက်ပိုင်းတွင် ယခုကဲ့သို့ ဖမ်းဆီးမှုများ ဆက်တိုက်ဖြစ်ပွားလာခြင်းဖြစ်ပြီး လက်ရှိတွင် KNU က သရက်ချောင်းမြို့နယ် ဂုံညှင်းဆိပ်လှေဆိပ် အပါအဝင် လှေဆိပ်အချို့ကိုလည်း ပိတ်ထားကြောင်း ဒေသခံများ၏ ပြောပြချက်အရ သိရသည်။ KNU တပ်မဟာ ၄ အတွင်းရေးမှူး ပဒိုအယ်နားကမူ အခြေအနေအသေးစိတ် မသိရသေးကြောင်း Dawei Watch သတင်းဌာနကို ဖြေကြားထားသည်။ NUG လက်အောက်ခံ တပ်ဖွဲ့ဝင်များအနေဖြင့် ဤဖြစ်စဉ်အပေါ် အမြန်ဆုံး တွေ့ဆုံဖြေရှင်းနိုင်ရန် ကြိုးပမ်းနေ သည်ဟု ဆိုသည်။ ထားဝယ်ခရိုင်အမှတ် ၂ တပ်ရင်း တာဝန်ရှိသူက “ကျနော်တို့ကတော့ ဘုံရန်သူကိုတိုက်ဖို့အတွက် တော်လှန်သူ တွေနဲ့ လက်တွဲပြီးသွားနေပါတယ်။ မြေပြင်ပွတ်တိုက်မှုလေးတွေကို တွေ့ဆုံညှိနှိုင်းဆွေးနွေးတာတော့ အကောင်းဆုံးပေါ့။ အခုလိုကတော့ ဘယ်လိုမှအဆင်မပြေပါဘူး။ ကျနော်တို့ ဝန်ကြီးဌာနနဲ့ တိုင်းစစ်ဌာနတွေကို တင်ပြထားပြီးပါပြီ။ သူတို့ဘက်ကလည်း တွေ့ဆုံမှုတွေအတွက် လုပ်ဆောင်နေတယ်လို့ သိရတယ်” ဟု ပြော သည်။ လက်ရှိတွင် နှစ်ဖက်တာဝန်ရှိသူများ အကြား တင်းမာမှုများ လျော့ကျစေရန်နှင့် ဖမ်းဆီးခံထားရသူများ ပြန်လည် လွတ်မြောက်ရေးအတွက် အဆင့်မြင့်တာဝန်ရှိသူများအကြား ညှိနှိုင်းမှုများ ဆက်လက်လုပ်ဆောင်နေသည်ဟု ဆိုသည်။   ဓါတ်ပုံ - ဖမ်းဆီးခံထားရသည့် အမှတ် ၃၃ ဗျူဟာမှူး ကိုဘိ (ခ) စောဒါးကို နှင့် ထားဝယ်ခရိုင် အမှတ် ၂ တပ်ရင်းမှူး မင်းသားကြီးတို့၏ ပုံ (Crd)

NUG ၏ အထူးတိုင်း စစ်ဌာနဗျူဟာမှူး အပါအဝင် တပ်ဖွဲ့ဝင်နှင့် ထောက်ပို့ ၅၀ ခန့်ကို KNU ဖမ်းထား

ရှမ်းပြည် မှတ်ပုံတင် ကိုင်ဆောင်သူများ မွန်ပြည်နယ်တွင် နေထိုင်သွားလာရေး အခက်တွေ့နေ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၁၂ ရက်။ မွန်ပြည်တွင် စစ်ကော်မရှင်က ကျားဖြန့်ခေါင်းစဉ်ဖြင့် ရှမ်းပြည်သားများကို တည်းခိုခွင့် ကန့်သတ်နေသည့် အပြင် ဖမ်းဆီးငွေညှစ်မှုများ ရှိနေဟု ဒေသတွင်း လူ့အခွင့်အရေး စောင့်ကြည့် လှုပ်ရှားနေသူများက ပြော သည်။ စစ်ကော်မရှင်၏ ထိန်းချုပ်မှုအောက်ရှိ မွန်ပြည်သို့ ဝင်ရောက်သည့် ပြည်တွင်းခရီးသွားများအပေါ် စစ်ဆေးမှုများ အလွန်အမင်း တင်းကျပ်လာနေပြီး အထူးသဖြင့် ရှမ်းပြည် နိုင်ငံသားစိစစ်ရေးကတ် (၁၃/) ကိုင်ဆောင်ထား သူများအား တည်းခိုခွင့်ကန့်သတ်ခြင်းနှင့် ဖမ်းဆီးငွေညှစ်ခြင်းများ ပိုမိုလုပ်ဆောင်လာနေခြင်း ဖြစ်သည်။ သံလွင်တံတား (မော်လမြိုင်)၊ ဘီးလင်းနှင့် သထုံမြို့အဝင်အထွက် စစ်ဆေးရေးဂိတ်များတွင် တင်းကျပ်စွာ စစ်ဆေးဖမ်းဆီးနေခြင်းသည် နိုင်ငံသားတို့၏ လွတ်လပ်စွာ သွားလာခွင့်ကို ချိုးဖောက်နေခြင်း ဖြစ်ကြောင်း လူ့အခွင့်အရေးလှုပ်ရှားသူများက ဝေဖန်သည်။ စစ်ကော်မရှင်၏ ယခုလုပ်ရပ်သည် နယ်မြေအေးချမ်းမှုထက် လက်ရှိကျင်းပမည့် ရွေးကောက်ပွဲကို ရည်ရွယ် သည့် နိုင်ငံရေးလှုပ်ရှားမှုနှင့် ဆက်စပ်နေကြောင်း မွန်ပြည်လူ့အခွင့်အရေး ဖောင်ဒေးရှင်း HURFOM ဒါရိုက်တာ နိုင်အဲမွန်က သုံးသပ်သည်။ “မွန်ပြည်နယ်၊ ကရင်ပြည်နယ် တစ်ချို့ သူတို့ထိန်းချုပ်တဲ့နေရာမှာ တခြားလူတွေကို အဝင်မခံတော့ဘဲနဲ့ သူ့ရှိ ရင် ဒေသခံပြည်သူတွေကို အသေပိတ်ပြီးတော့စည်းရုံး၊ ပြီးလို့ရှိရင် ပြည်ခိုင်ဖြိုးကို မဲထည့်ခိုင်းဆိုတဲ့ အခြေ အနေမျိုးတွေ ရှိတယ်။ ဒါကြောင့်မို့လို့ နယ်မြေကန့်သတ်မှုတွေ ပိုလုပ်ပြီးတော့ တစ်ခြားသော ပြည်နယ်သား တွေကို ကန့်သတ်တယ်၊ အဲ့ထဲမှာတော့ ရှမ်းက အများဆုံးဖြစ်ခဲ့တယ်။ အထူးသဖြင့် လူငယ်တွေကို ပိတ်တာ ရှိတယ်။” အထူးအခြေအနေအဖြစ် မော်လမြိုင်မြို့တွင်းသို့ ဝင်ရောက်လာသည့် ရှမ်းပြည် (၁၃/) မှတ်ပုံတင် ကိုင်ဆောင်သူ မည်သူမဆို စက်တင်ဘာလ ၁၇ ရက်နေ့မှစတင်၍ စစ်ကော်မရှင်က သတ်မှတ်ထားသည့် တော်ဝင်ဟင်္သာ ဟိုတယ်၊ Mawlamyine Strand Hotel နှင့် ဟောင်သရောမိုတယ် သုံးခုတွင်သာ တည်းခိုနေထိုင်ခွင့် ပြုထား သည်။ ထို့အပြင် စစ်ကော်မရှင်က ‘ကျားဖြန့်’ နှင့် ဆက်နွယ်သည်ဟု စွပ်စွဲကာ မြဝတီဘက်မှ ပြန်ဝင်လာသူ အလုပ် သမားများနှင့် သာမန်ခရီးသွားများ အပါအဝင် စုစုပေါင်း လူအယောက် ၄၀ ခန့် ကို ဘားအံနှင့် မော်လမြိုင် အထွက် ဂိတ်များဖြစ်သည့် ကျိုက်မရောတံတားနှင့် မုတ္တမ သံလွင်တံတားတို့တွင် ဖမ်းဆီးထားကြောင်း HURFOM က ဆိုသည်။ ဤ Operation သည် နိုင်ငံတကာ၏ အရေးယူဆောင်ရွက်မှုမှ လွတ်မြောက်ရန် ဟန်ပြပြုလုပ်နေသည့် ‘ပြဇာတ်’ သာ ဖြစ်ကြောင်းနှင့် ကျားဖြန့်လုပ်ငန်း ခေါ်သွင်းသူများတွင်မူ အာဏာပိုင်များနှင့် နယ်ခြားစောင့်တပ် (BGF) များ ပါဝင်နေကြောင်း နိုင်အဲမွန်က ထောက်ပြသည်။ “တကယ်တမ်းကြတော့ ဒါတွေအားလုံးက ပြဇာတ်တွေပဲ။ တကယ့်တကယ်ကျားဖြန့် လူတွေကို ခေါ်သွင်းတဲ့ လူတွေကိုခေါ်သွင်းတဲ့ကိစ္စ အာဏာပိုင်တွေနဲ့ BGF တွေအများဆုံးပါတယ်။ ပြည်သူလူထုက ဘာမှမသိဘဲနဲ့ ဒီကြားထဲမှာ Operation ကို ခေါင်းစဉ်တပ်ပြီးတော့ လုပ်စားခံရတဲ့ကိစ္စဖြစ်တယ်” ဟု နိုင်အဲမွန်က ပြောသည်။ မွန်ပြည် ကျိုက်ထို၊ ဘီးလင်း၊ သထုံ၊ ပေါင်မြို့နယ်အတွင်း နိုဝင်ဘာလအတွင်းကလည်း ကျားဖြန့်လုပ်ငန်းမှ ပြန်လာသူ ၆၀၀ ကျော် ကို ဖမ်းဆီးခဲ့ရာ ရှမ်းပြည် မှတ်ပုံတင် ကိုင်ဆောင်ထားသူ အများစု ပါဝင်ခဲ့ကြောင်း လဂွန်းအိမ်စာစဉ်က နိုဝင်ဘာလ ၂၇ ရက်နေ့က ဖော်ပြထားသည်။ တစ်ချိန်တည်းမှာပင် ကျိုက်ထိုဒေသ စီးပွားရေးသည် ကျိုက်ထီးရိုးဘုရားဖူးကို မှီခိုနေရသဖြင့် ဘုရားဖူး ပြည်သူ များအပေါ် အတင်းအကျပ် စစ်ဆေးနေခြင်းမျိုး မရှိသော်လည်း ရွေးကောက်ပွဲအတွက် လုံခြုံရေး အပြည့်အဝ ချထားမှုနှင့် မှတ်ပုံတင်မပါဘဲ သွားလာသည့် ဆိုင်ကယ်၊ ကားများကို ဖမ်းဆီးစစ်ဆေးနေသည်ဟု ဟု ဆိုသည်။ မွန်ပြည်လူသားချင်းစာနာမှု ကွန်ယက်အဖွဲ့ (MSHN) မှ ပြောရေးဆိုခွင့်ရှိသူ မဆောင်းက “ကျမတို့ ကျိုက်ထိုရဲ့ စီးပွားရေးအခြေအနေက ကျိုက်ထီးရိုးဘုရားကို မှီခိုနေတာဆိုတော့ စစ်ကော်မရှင်အနေနဲ့လည်း ဘုရားဖူး ပြည်သူတွေ အပေါ် အတင်းအကျပ် စစ်ဆေးနေတာတွေတော့ မရှိပါဘူး။ အဓိက က without ကား၊ ဆိုင်ကယ် တွေ ဖမ်းပြီး စစ်တယ်။ ရွေးကောက်ပွဲတွက် မဲဆွယ်ဖို့ လုံခြုံရေးအပြည့်ချတာတွေတော့ ရှိပါတယ်” ဟု ပြော သည်။ မွန်ပြည်နယ် ဝန်ကြီးချုပ်က ခရီးသွားလာမှုကို အားပေးနေသည့်ကြားမှ စစ်ကော်မရှင်၏ တင်းကျပ်သော စစ်ဆေးမှုနှင့် ဖမ်းဆီးကန့်သတ်မှုများကြောင့် ပြည်သူများ၏ သွားလာရေး လွတ်လပ်မှုနှင့် နိုင်ငံသား အခွင့် အရေးများ ခြိမ်းခြောက်ခံနေရသည်ဟု လူ့အခွင့်အရေးလှုပ်ရှားသူများက ထောက်ပြလျက်ရှိသည်။ ဓာတ်ပုံ - INFORMATION AND PUBLIC RELATIONS DEPARMENT

ရှမ်းပြည် မှတ်ပုံတင် ကိုင်ဆောင်သူများ မွန်ပြည်နယ်တွင် နေထိုင်သွားလာရေး အခက်တွေ့နေ

နေရပ် မပြန်နိုင်သေးသည့် မောတောင်မှ ဒုက္ခသည်များ ထိုင်းဘက်တွင် နေထိုင်ရန်လည်း အခက်တွေ့နေ သတင်းနှင့် မီဒီယာ ကွန်ရက်။ ၂၀၂၅ ခုနှစ် နိုဝင်ဘာလ ၂၆ ရက်။ တနင်္သာရီတိုင်း ဒေသကြီး၊ မြန်မာ-ထိုင်းနယ်စပ်ရှိ အရေးပါသော ကုန်သွယ်ရေးမြို့ဖြစ်သည့် မောတောင်မြို့သိမ်း တိုက်ပွဲ ကြောင့် တိမ်းရှောင်ခဲ့ရသည့် ဒေသခံ ၃,၀၀၀ ဝန်းကျင် သည် နေရပ်သို့ ပြန်၍ မရသည့်အပြင် ထိုင်းဘက်ခြမ်းတွင်ပါ ဆက်လက်ခိုလှုံရန် ခက်ခဲနေသည်ဟု အကူအညီပေးနေသူများက ပြောသည်။ မောတောင်မြို့ကို ကရင်အမျိုးသား လွတ်မြောက်ရေး တပ်မတော် (KNLA) ဦးဆောင်သည့် ပူးပေါင်းတပ်က နိုဝင်ဘာ ၁၄ ရက်နေ့တွင် အပြီးသတ် သိမ်းပိုက်နိုင်ခဲ့သော်လည်း၊ မြို့၏ အဓိက လမ်းမကြီးပေါ်ရှိ သိန်ခွန်း နှင့် သဲဖြူကျေးရွာ တို့တွင် နိုဝင်ဘာလ ၁၅ ရက်နေ့မှစ၍ ယနေ့အထိ တိုက်ပွဲများ ပြင်းထန်နေဆဲ ဖြစ်သည်။ စစ်ကော်မရှင်တပ်သည် အင်အား အလုံးအရင်းဖြင့် စစ်ကြောင်းထိုးခြင်း၊ လေကြောင်းတိုက်ခိုက်မှုများ ဆက်တိုက် လုပ်နေခြင်းတို့ကြောင့် ဒေသခံများသည် မြို့ထဲသို့ ပြန်လည်ဝင်ရောက်နေထိုင်ရန် စိုးရိမ်ကြောက်ရွံ့ နေကြရသည်။ ခုနှစ်စင်ကြယ်အဖွဲ့ (မြိတ်ခရိုင် စစ်ဘေးရှောင် ကူညီရေး) အဖွဲ့ဝင် ကိုဘလက် က “မောတောင်မြို့အဝင်ဖြစ်တဲ့ သိန်ခွန်းနဲ့ သဲဖြူဆိုတဲ့ကျေးရွာတွေမှာက လက်ရှိအချိန်အထိ တိုက်ပွဲတွေ အရမ်းကြီး ပြင်းထန်နေဆဲဖြစ်တယ်။ အဲ့နှစ်ရွာမှာ စစ်တိုက်နေခြင်းက မောတောင်မြို့ကို ပိတ်ဆို့ လိုက်သလို ဖြစ်တယ်ပေါ့နော်။ အကယ်၍ စစ်ရှောင် တွေက မြို့ထဲကိုပြန်ဝင်ပြီးနေမယ်ဆိုရင် ကျနော်တို့ လေယာဉ်ကို ကြောက်ရတဲ့အနေအထား စိန်ခေါ်မှု ဖြစ်နေ တယ်ပေါ့နော်” ဟု ပြောသည်။ မောတောင်မြို့ဒေသခံ ၁,၄၀၀ ဦးကျော်သည် နိုဝင်ဘာလ ၁၁ ရက်နေ့မှ စ၍ မြန်မာ - ထိုင်းနယ်စပ်ရှိ အလယ်ဂိတ်တွင် တိမ်းရှောင်နေထိုင်ခဲ့ကြသည်။ သို့သော်လည်း စစ်ရှောင်များက အမှိုက်များကို စနစ်တကျ မစွန့်ပစ်ခြင်း၊ ယာယီတဲဆောက်လုပ်ရာတွင် ထိုင်းပိုင် သစ်များကို ခုတ်ယူခြင်းတို့ကြောင့် ထိုင်းအာဏာပိုင်တို့က နိုဝင်ဘာလ ၂၄ ရက်နေ့မှစ၍ နေရပ်ပြန်ခိုင်းသည့် အခြေအနေနှင့် ရင်ဆိုင်ခဲ့ရသည်။ ထို့ကြောင့် စစ်ရှောင်အချို့သည် လေကြောင်းအန္တရာယ်ကို စိုးရိမ်စိတ်ဖြင့်ပင် မြန်မာဘက်ခြမ်းရှိ လုံခြုံသည့် နေရာများသို့ ပြန်လည်ပြောင်းရွှေ့နေကြရသည် ဟု ကိုဘလက်က ဆက်ပြောသည်။ “အဓိကအားဖြင့်က ထောင်နဲ့ချီတဲ့ လူဦးရေတွေက အနီးနားဝန်ကျင်မှာ ယာယီတဲတွေဆောက်ဖို့အတွက် သစ်ခုတ်တဲ့ဟာသည် ထိုင်းရဲ့သစ်တွေ တော်တော်များကိုလည်း ခုတ်တဲ့ဟာထဲမှာ ပါသွားတယ်ပေါ့နော်။ ဆိုတော့ အဲ့လို အခြေအနေမျိုးဖြစ်တဲ့ အခါ ကြတော့ ထိုင်းအာဏာပိုင်တွေက လူဦးရေလျော့ပါးသွားအောင် လုပ်လိုက် တဲ့ဟာမျိုးပဲ ကျနော်ထင်တယ်။” မောတောင်မြို့အနီး တောထဲနှင့် ဥယျာဉ်ခြံများထဲတွင် တိမ်းရှောင်နေရသူ ၇၀၀ ကျော်ရှိပြီး၊ စစ်ကော်မရှင်၏ ရမ်းသန်းပစ်ခတ်မှုများကြောင့် နေရပ်မပြန်ရဲကြသေးပေ။ ကမ်းမယ့်လက်အဖွဲ့ဝင် ကိုပိုင်ကိုဦး က “ပြန်ဝင်လို့ မရသေးဘူးဆိုတာ စစ်ကြောင်းလည်း အမြဲတမ်းထိုးတယ်။ ရဟတ်ယာဉ် ဂျက်ဖိုက်တာနဲ့ ရမ်းသမ်းပစ်လာနေတယ်။ လေယာဉ်နဲ့ ဗုံးကြဲတယ်။ လူရှိတဲ့နေရာတွေကြဲတယ်။ အဲ့တာက အမြဲတမ်း တွေ့မြင်နေရတာကိုးနော်။ ဘယ်လောက် ကြာကြာစစ်ရှောင်ရမလဲ ဆိုရင် အနည်းဆုံး ၂လ ဝန်းကျင်လောက်မှာ ရှိတယ်” ဟု ပြောသည်။ လက်ရှိတွင် စစ်ဘေးရှောင်များအတွက် အစားအစာ ရိက္ခာခြောက်များ၊ စောင်၊ အနွေးထည်များအပြင် ကလေးများအတွက် နို့မှုန့်နှင့် နို့တိုက်ပစ္စည်းများပါ အဓိက လိုအပ်နေကြောင်း အကူအညီပေးနေသူများက ပြော သည်။ စစ်ကော်မရှင်ဘက်က မောတောင်မြို့ကို နည်းအမျိုးမျိုးဖြင့် ပြန်လည်ရယူရန် ကြိုးပမ်းနေခြင်းကြောင့် ဒေသခံ ပြည်သူများအနေဖြင့် ပိတ်ဆို့မှုဒဏ် အမျိုးမျိုးကို ရင်ဆိုင်လာရနိုင်သည်ဟု ကိုဘလက်က ပြောသည်။ ထို့ကြောင့် စစ်ရှောင်အရေးကို အားစိုက်လုပ်ဆောင်ရန်အတွက် သက်ဆိုင်ရာ လူသားချင်း စာနာထောက်ထားမှု အဖွဲ့များ၊ NGO အဖွဲ့အစည်းများ နှင့် ထိုင်းနိုင်ငံသို့ ရောက်ရှိနေသည့် အဖွဲ့အစည်းများအနေဖြင့် မောတောင် စစ်ဘေးရှောင်များကို ကူညီပေးကြရန်နှင့် ဝိုင်းဝန်းအသံထုတ်ပေးကြရန် တိုက်တွန်းနှိုးဆော်ထားသည်။ ဓါတ်ပုံ - ကိုဘလက်

နေရပ် မပြန်နိုင်သေးသည့် မောတောင်မှ ဒုက္ခသည်များ ထိုင်းဘက်တွင် နေထိုင်ရန်လည်း အခက်တွေ့နေ

ကျားဖြန့် စခန်းမှ ထွက်လာသော နိုင်ငံခြားသားများ ထိုင်းနယ်စပ်တွင် သောင်တင်နေ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၂၆ ရက်။ ကရင်ပြည်နယ်၊ မြဝတီမြို့နယ်ရှိ DKBA ထိန်းချုပ်ထားသော မင်းလက်ပံကျေးရွာရှိ ကျားဖြန့်ဂိုဏ်းမှ နိုင်ငံခြား သား ၁,၀၀၀ ကျော် ထိုင်းနယ်စပ်တွင် သောင်တင်နေသည်။ မင်းလက်ပံကျေးရွာ မှ တရားမဝင် အွန်လိုင်းငွေလိမ်ဂိုဏ်း (ကျားဖြန့်) လုပ်သား ၁,၀၀၀ ကျော်သည် သောင်ရင်း မြစ်ကို ဖြတ်ကူး၍ ထိုင်းနိုင်ငံဘက်သို့ ဝင်ရောက်ရန် ကြိုးစားခဲ့သော်လည်း ထိုင်းစစ်တပ်၏ လက်မခံမှုကြောင့် မြန်မာဘက် ကမ်းနဖူးတွင် သောင်တင်နေသည် ဟု နယ်စပ်သတင်းရင်းမြစ်များက ပြောသည်။ ထိုင်း-မြန်မာနယ်စပ်သတင်းရင်းမြစ်တစ်ဦးက “မနေ့ညကတည်းက သောင်းရင်းမြစ် ကမ်းနဖူးမှာ လာစောင့် နေကြတာလို့ သတင်းရတယ်။ နိုင်ငံခြားသား ၁၀၀၀ ကျော်တယ်လို့ ပြောတယ်ဗျ။ ထိုင်းဘက်ကို ဝင်ဖို့ ကြိုးစား တာပေါ့ဗျာ။ မင်းလက်ပံကနေ လာကြတာ။ ထိုင်းက အဝင်မခံဘူး” ဟု ပြောသည်။ ထိုင်းနိုင်ငံဘက်ခြမ်းသို့ ဝင်ရောက်ရန် ကြိုးစားသော နိုင်ငံခြားသား ၁,၀၀၀ ကျော်ကို ထိုင်းစစ်တပ်က လက်မခံဘဲ မြစ်ကမ်းနဖူးတစ်လျှောက်တွင် တစ်ညလုံး စောင့်ကြည့် ပိတ်ဆို့ထားခဲ့သည်ဟု နယ်စပ်သတင်းရင်းမြစ်များက ပြောသည်။ သို့သော် “သူတို့ ထိုင်းနိုင်ငံသားတွေကိုတော့ လက်ခံတယ်လို့တော့ ကြားတယ်ဗျ။ တခြားနိုင်ငံခြားသားတွေက တော့ ဒီနေ့အထိ ဆက်စောင့်နေတုန်းပဲလို့ ပြောတယ်” ဟု အဆိုပါ နယ်စပ်သတင်းရင်းမြစ်က ဆက်ပြောသည်။ အဆိုပါ ဖြစ်စဉ်သည် ကရင်အမျိုးသား အစည်းအရုံး (KNU) လက်အောက်ခံတပ်ဖွဲ့များက DKBA တပ်များ တပ်စွဲထားသည့် မင်းလက်ပံကျေးရွာရှိ ကြီးမားသော ခြံဝင်းကို နိုဝင်ဘာလ ၂၁ ရက်နေ့၊ တိုက်ပွဲများအပြီးတွင် သိမ်းပိုက်ရရှိခဲ့ပြီးနောက် ထွက်ပေါ်လာခြင်းဖြစ်သည်။ KNU က အဆိုပါခြံဝင်းအတွင်း လူရာပေါင်းများစွာကို တရားမဝင်ချုပ်နှောင်ထားသည့် ကျားဖြန့်အလုပ်ရုံများ ကို တွေ့ရှိခဲ့ကြောင်း ယမန်နေ့ (နိုဝင်ဘာ ၂၅ ရက်) က သတင်းထုတ်ပြန်ခဲ့သည်။ KNU ၏ ထုတ်ပြန်ချက် ထွက်ပေါ်လာပြီးနောက် နိုဝင်ဘာလ ၂၅ ရက်နေ့ ည ၁၀ နာရီခန့်တွင် တရုတ်၊ ဗီယက်နမ် နှင့် လာအိုနိုင်ငံသားများသည် ထိုင်းနိုင်ငံဘက်ခြမ်းသို့ ဝင်ရောက်ရန် သောင်ရင်းမြစ်ကို ဖြတ်ကာ ထိုင်းနိုင်ငံ၊ မဲ့ကိုကင်းကျေးရွာဘက်သို့ ထွက်ခွာလာခဲ့ကြခြင်း ဖြစ်သည်ဟု ဆိုသည်။ နိုဝင်ဘာလ ၂၆ ရက်နေ့၊ နံနက်ပိုင်းတွင် စစ်ကော်မရှင်တပ်က မင်းလက်ပံကျေးရွာထိပ်သို့ လေကြောင်းမှ ဗုံးကြဲ တိုက်ခိုက်ခဲ့သောကြောင့် ကျားဖြန့်လုပ်သား အများစုမှာ ယနေ့ ညနေပိုင်းတွင် ထိုင်းနိုင်ငံဘက်ခြမ်းသို့ ထပ်မံ ရောက်ရှိနေသည်ဟု မြေပြင် သတင်းရင်းမြစ်က ဆိုသည်။ DKBA ၏ အကာအကွယ်အောက်တွင်ရှိသော အဆိုပါ ကျားဖြန့်လုပ်ငန်းခွင်များသည် KNU ၏ ဝင်ရောက် စစ်ဆေးမှုများကြောင့် နိုင်ငံတကာ၏ အာရုံစိုက်မှုကို ခံနေရပြီး၊ KNU ကလည်း အဆိုပါ အလုပ်ရုံများမှ အခြေ အနေများကို စုံစမ်းဖော်ထုတ်ရန် နိုင်ငံတကာသို့ အကူအညီတောင်းခံထားသည်။

ကျားဖြန့် စခန်းမှ ထွက်လာသော နိုင်ငံခြားသားများ ထိုင်းနယ်စပ်တွင် သောင်တင်နေ

KNU၊ KNPP ယာယီရပ်ဆိုင်းမှု: NUCC ညှိနှိုင်းဖြေရှင်းမည် သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၂၄ ရက်။ ကရင်အမျိုးသား အစည်းအရုံး KNU နှင့် ကရင်နီ အမျိုးသား တိုးတက်ရေးပါတီ KNPP တို့ ယာယီရပ်ဆိုင်းမှုအပေါ် NUCC ညှိနှိုင်းဖြေရှင်းနိုင်ရေး အဖွဲ့ ဖွဲ့စည်းလိုက်ကြောင်း ထုတ်ပြန်သည်။ အမျိုးသားညီညွတ်ရေး အတိုင်ပင်ခံကောင်စီ (NUCC) မှ အဖွဲ့ဝင်အင်အားကြီးနှစ်ဖွဲ့ဖြစ်သည့် ကရင်အမျိုးသား အစည်းအရုံး (KNU) နှင့် ကရင်နီအမျိုးသား တိုးတက်ရေးပါတီ (KNPP) တို့၏ ယာယီရပ်ဆိုင်းမှုနှင့် စပ်လျဉ်း၍ အများပြည်သူ၏ စိုးရိမ်ပူပန်မှုများကို ဖြေရှင်းရန်နှင့် ညီညွတ်မှုကို ထိန်းသိမ်းရန်အတွက် ညှိနှိုင်းရေးအဖွဲ ့တစ်ရပ်ကို ဖွဲ့စည်းလိုက်ခြင်း ဖြစ်သည်။ NUCC သည် KNU နှင့် KNPP တို့၏ အကြောင်းကြားစာကို နိုဝင်ဘာလ ၁၇ ရက်နေ့တွင် လက်ခံရရှိပြီးနောက် နိုဝင်ဘာ ၂၂ ရက်နေ့တွင် ညှိနှိုင်းရေးအဖွဲ့ကို ဖွဲ့စည်းခဲ့ပြီး လုပ်ငန်းများ စတင်ခဲ့ခြင်း ဖြစ်သည်။ NUCC ၏ အဓိကရည်ရွယ်ချက်မှာ အများပြည်သူကြား ပျံ့နှံ့နေသော ‘နုတ်ထွက်သည်’ ဟူသည့် မှားယွင်းသည့် သတင်းများကို ရှင်းလင်းရန်ဖြစ်သည်။ NUCC က ၎င်းတို့အနေဖြင့် ဤလုပ်ရပ်ကို ‘ယာယီရပ်ဆိုင်းခြင်း’ သာဖြစ်သည်ဟု တရားဝင် ရှင်းလင်းထား သည်။ နိုင်ငံရေးလေ့လာသူများက ဤယာယီရပ်ဆိုင်းမှုသည် တော်လှန်ရေးကာလအတွင်း အဖွဲ့အစည်းအချင်းချင်း မူဝါဒနှင့် လုပ်ငန်းစဉ်များအပေါ် သဘောထားကွဲလွဲမှုများကို ဖြေရှင်းရန် ကြိုးပမ်းခြင်း ဖြစ်နိုင်သည်ဟု သုံးသပ် ကြသည်။ ကချင်နိုင်ငံရေး လေ့လာသူ တစ်ဦးက “ဒီလို တင်းမာမှုမျိုးဟာ ခေါင်းဆောင်ပိုင်း ဖွဲ့စည်းပုံ မတူညီတဲ့ အဖွဲ့ကြီး တွေကြားမှာ ပေါ်ပေါက်နိုင်ပါတယ်။ အခုလိုမျိုး ညှိနှိုင်းဖို့ အဖွဲ့ဖွဲ့တာကိုလည်း ကြိုဆိုပါတယ်။ ဒါပေမယ့် လက် တွေ့မှာ ဘာတွေလုပ်မလဲဆိုတာ စောင့်ကြည့်မယ်။ ဒီကိစ္စကို အချိန်မီ မဖြေရှင်းနိုင်ရင် တော်လှန်ရေးရဲ့ နိုင်ငံ ရေး ရုပ်ပုံလွှာကို ထိခိုက်နိုင်ပါတယ်” ဟု သုံးသပ်ပြောဆိုသည်။ NUCC အနေဖြင့် ညှိနှိုင်းရေး ကာလအတွင်း၌လည်း တော်လှန်ရေးကို ရှေးရှုကာ ဖက်ဒရယ်ဒီမိုကရေစီ ပဋိညာဉ် ပါ ကတိကဝတ်များအတိုင်း ၎င်းတို့၏ တာဝန်များကို ဆက်လက် ဆောင်ရွက်သွားမည်ဟု အာမခံပြောဆိုထား သည်။ KNU နှင့် KNPP တို့သည် မြေပြင်တွင် စစ်ကော်မရှင်တပ်များကို အပြင်းအထန် တိုက်ခိုက်နေသော အင်အားကြီး တိုင်းရင်းသား လက်နက်ကိုင် အဖွဲ့အစည်းများ ဖြစ်သောကြောင့် ၎င်းတို့၏ ယာယီရပ်ဆိုင်းမှုက တော်လှန်ရေးအပေါ် ပြည်သူများ စိုးရိမ်ပူပန်နေကြသည်။ ရှမ်းမြောက်ဒေသခံ တက်ကြွလူငယ်တစ်ဦးက “KNU နဲ့ KNPP လို အဖွဲ့ကြီးတွေဟာ စစ်ကောင်စီကို အား အကိုးရဆုံး တိုက်ခိုက်နေတာပါ။ ဒီနှစ်ဖွဲ့ NUCC ကနေ ဘာကြောင့် ယာယီရပ်ဆိုင်းရသလဲဆိုတာကို သိချင် တယ်။ ဒါပေမဲ့ NUCC က ဒါကို ညှိနှိုင်းပြီး ရှင်းလင်းပေးမယ်ဆိုရင် တော်လှန်ရေးအပေါ် ယုံကြည်မှု မပျက် ပြားဖို့ မျှော် လင့်ပါတယ်” ဟု ပြောသည်။ NUCC သည် ညှိနှိုင်းရေးအဖွဲ့မှတစ်ဆင့် အဆိုပါ အဖွဲ့နှစ်ဖွဲ့နှင့် စေ့စပ်ဆွေးနွေးကာ နိုင်ငံရေး ခေါင်းဆောင်မှု ညီညွတ်ရေးကို မပျက်အောင် ထိန်းသိမ်းနိုင်ရေး ကြိုးပမ်းသွားမည်ဖြစ်ကြောင်း ထုတ်ပြန်ကြေညာ ထားသည်။

KNU၊ KNPP ယာယီရပ်ဆိုင်းမှု: NUCC ညှိနှိုင်းဖြေရှင်းမည်

KNU က ဘားအံမြို့နယ်အတွင်း ရွေးကောက်ပွဲကို တရားဝင်ပိတ်ပင် ဆန့်ကျင် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၁၉ ရက်။ ကရင်အမျိုးသား အစည်းအရုံး KNU က ဘားအံနယ်မြေအတွင်း စစ်ကော်မရှင်၏ ရွေးကောက်ပွဲကို တရားဝင် ပိတ်ပင် ဆန့်ကျင်လိုက်ပြီး ပြည်သူ့ဆန္ဒ အလွဲသုံးစားလုပ်ခြင်းဟု ထုတ်ပြန် ပြောဆိုလိုက်သည်။ ကရင်အမျိုးသားအစည်းအရုံး (KNU) ဒူးသထူခရိုင် - ဘားအံမြို့နယ် အလုပ်မှုဆောင်ကော်မတီက စစ်ကော်မရှင် က လာမည့် ဒီဇင်ဘာလ ၂၈ ရက်နေ့တွင် ကျင်းပရန် ပြင်ဆင်နေသည့် ရွေးကောက်ပွဲကို ၎င်းတို့ ထိန်းချုပ်နယ်မြေ အတွင်း လုံးဝ ခွင့်ပြုမည်မဟုတ်ဘဲ ဆန့်ကျင်သွားမည်ဟု နိုဝင်ဘာလ ၁၇ ရက်နေ့တွင် တရားဝင် ထုတ်ပြန် ကြေညာလိုက်သည်။ KNU ၏ ထုတ်ပြန်ချက်အရ၊ စစ်ကော်မရှင်သည် နိုင်ငံတစ်ဝန်းတွင် စစ်ရာဇဝတ်မှုများကို ပေါ်ပေါ်ထင်ထင် ကျူးလွန်နေသည့် အဖွဲ့ဖြစ်ပြီး၊ ၎င်းတို့ ကျင်းပမည့် ရွေးကောက်ပွဲသည် တိကျမှန်ကန်သည့် ရလဒ်မဟုတ်ဘဲ ပြည်သူ့ သဘောဆန္ဒကို အလွဲသုံးစားပြုမည့် အတုအယောင် ရွေးကောက်ပွဲ သာဖြစ်ကြောင်း သတ်မှတ်သည်။ KNU ဒူးသထူခရိုင် - ဘားအံမြို့နယ် အလုပ်မှုဆောင်ကော်မတီက ဒေသခံပြည်သူများကို စစ်အာဏာရှင် သက်ဆိုး ရှည်စေမည့် ယင်းရွေးကောက်ပွဲတွင် ပူးပေါင်းပါဝင်ခြင်း မပြုဘဲ၊ အကြမ်းမဖက်သောနည်းဖြင့် ဆန့်ကျင်ရန် တိုက်တွန်းထားသည်။ KNU ၏ ပြောဆိုချက်တွင် စစ်ကော်မရှင်သည် ၎င်းတို့၏ ရွေးကောက်ပွဲ အောင်မြင်ရေးအတွက် ပြည်သူလူထု အပေါ် ဖိအားပေးမှုများ ပြုလုပ်နေကြောင်း ဖော်ပြသည်။ စစ်ကော်မရှင်သည် စစ်မှုထမ်းဥပဒေနှင့် စစ်ဘေးဒဏ်များကို အသုံးချပြီး ပြည်သူများအား မိမိနေရပ်သို့ မပြန်နိုင်အောင် ပြုလုပ်နေသည်။ ကျန်ရှိနေသော ပြည်သူများကိုလည်း ခြိမ်းခြောက်ဖိအားပေးကာ အတင်းအဓမ္မ မဲပေးခိုင်းစေမှုများ ဖြင့် ရင်ဆိုင်နေရသည်ဟု ဆိုသည်။ ထို့အပြင် စစ်ကော်မရှင်သည် ရွေးကောက်ပွဲစနစ်ကို ပြည်သူများ နားလည်ရခက်ခဲစေသော မဲပေးနည်းစနစ်များ၊ အထူးသဖြင့် ၎င်းတို့လိုချင်သည့် ရလဒ်ထွက်စေရန် ရည်ရွယ်သည့် အီလက်ထရောနစ်မဲပေးသည့် လုပ်ငန်းစဉ် များကို အသုံးပြုနေသည်ဟု KNU က ထောက်ပြသည်။ ကရင်စစ်ရှောင်များကို အကူအညီပေးနေသူ တစ်ဦးက "ဒီနယ်မြေမှာဆို စစ်ကြောင့် ပြည်သူတွေ ဘေးလွတ်ရာ ထွက်ပြေးနေရတာ၊ စားဝတ်နေရေး ခက်ခဲနေရတာတွေပဲ ရှိတယ်။ ဒီလိုအခြေအနေမှာ ရွေးကောက်ပွဲ လုပ်မယ် ဆိုတာဟာ လူထုရဲ့ အခက်အခဲကို လုံးဝ မထောက်ထားဘဲ သူတို့ရဲ့ နိုင်ငံရေး ထွက်ပေါက် တစ်ခုတည်းကိုပဲ ကြည့်တာဖြစ်ပါတယ်” ဟု ပြောသည်။ အဆိုပါ ရွေးကောက်ပွဲကို အဓိက တော်လှန်ရေး အင်အားစုများဖြစ်သည့် အမျိုးသားညီညွတ်ရေးအစိုးရ (NUG)၊ ကရင်အမျိုးသား အစည်းအရုံး (KNU) အပါအဝင် အာရက္ခတပ်တော် (AA) စသည့် အဖွဲ့အစည်းများကလည်း တရားမဝင်သော အတုအယောင် ရွေးကောက်ပွဲအဖြစ် ပြင်းပြင်းထန်ထန် ဆန့်ကျင်ထားသည်။ နိုင်ငံရေး လေ့လာသူတစ်ဦးက “KNU ကနေ နယ်မြေဒေသအလိုက် ပြတ်သားတဲ့ ဆန့်ကျင်မှုကို ပြသလိုက်တာ ဟာ စစ်ကောင်စီရဲ့ ရွေးကောက်ပွဲကို တရားဝင်မှု (legitimacy) လုံးဝ မပေးဘူးဆိုတာ ပြသလိုက်တာပဲ” ဟု ပြောသည်။ ပြီးခဲ့သည့် နိုဝင်ဘာလ ၂ ရက်နေ့ကလည်း ကရင်ပြည်၊ ဘားအံမြို့တွင် စစ်ကော်မရှင် လက်အောက်ခံ ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီ (USDP) ၏ ဆိုင်းဘုတ်ကို ဆုတ်ဖြဲမှုဖြင့် လူငယ်နှစ်ဦး ဖမ်းဆီးခံခဲ့ ရသေးရာ ရွေးကောက်ပွဲနှင့် ပတ်သက်သည့် ဖိနှိပ်မှုများ ရှိနေကြောင်း ထပ်မံတွေ့ရှိရသည်။ ဘားအံမြို အမှတ် ၂ ရပ်ကွက်၊ အုပ်ချုပ်ရေးမှူးရုံး ရှေ့၌ စိုက်ထူထားသည့် USDP ပါတီက လွှတ်တော်ကိုယ်စား လှယ်လောင်း ဝန်ကြီးချုပ်ဦး စောမြင့်ဦး၏ မဲဆွယ်ဗီနိုင်းဖျက်ဆီးခံရပြီး လူငယ် ၂ ဦးကို စစ်ကော်မရှင်က ဖမ်းဆီးခဲ့ပြီး ပုဒ်မ ၂၄ - က ဖြင့် အမှုဖွင့်ထားခြင်း ဖြစ်သည်။

KNU က ဘားအံမြို့နယ်အတွင်း ရွေးကောက်ပွဲကို တရားဝင်ပိတ်ပင် ဆန့်ကျင်

« Prev 1 2 3 4 5 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

ရက်သတ္တပတ် အတန်ကြာတွင် အီရန်နှင့် အမေရိကန် အကြား ပစ်ခတ်မှု ပြန်ဖြစ် — August 31, 2026 3:40 pm
နီပေါ ရေကြီးမှုကြောင့် လိုဏ်ခေါင်းအတွင်း လူရာပေါင်းများစွာ ပိတ်မိနေဆဲဖြစ် အတည်ပြု သေဆုံးသူ ၉၀၀ ကျော်ပြီ — August 31, 2026 3:29 pm
EU နှင့် မပူးပေါင်းရန် အိုက်စလန် လူထု ဆန္ဒပြု — August 31, 2026 3:27 pm

Recent Posts

ချင်းတောင်ပိုင်း မင်းတပ်တွင် စစ်အုပ်စုက လေကြောင်းမှ ဗုံးကြဲ၍ ကလေးများအပါ ၈ ဦး သေဆုံး
ရခိုင်-မကွေး အစပ် မင်းတုန်းတွင် ထွန်စက်များ ချောဆွဲခံရမှုကြောင့် တောင်သူများ စိုးရိမ်ထိတ်လန့်
ရခိုင်မြောက်ပိုင်း မောင်တောနယ်စပ်တွင် ကင်းလှည့်နေသည့် AA နှင့် ARSA, RSO ပူးပေါင်းအဖွဲ့ တိုက်ပွဲဖြစ်
ရက်သတ္တပတ် အတန်ကြာတွင် အီရန်နှင့် အမေရိကန် အကြား ပစ်ခတ်မှု ပြန်ဖြစ်
နီပေါ ရေကြီးမှုကြောင့် လိုဏ်ခေါင်းအတွင်း လူရာပေါင်းများစွာ ပိတ်မိနေဆဲဖြစ် အတည်ပြု သေဆုံးသူ ၉၀၀ ကျော်ပြီ

Archives

Archives

×Close