KNU – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
နိုင်ငံတကာသတင်း
NMG အကြောင်း
Contact

Home
Tag Archive

Tag: KNU

KNLA ပူးပေါင်းတပ်က တနင်္သာရီတိုင်းအတွင်း စစ်တပ် ဗျူဟာစခန်းကို တိုက်ခိုက်သိမ်းယူ

KNU ထိန်းချုပ်ထားသည့် ကျိုက်ဒုံမြို့ပေါ်ကို လေကြောင်းမှ ဗုံးကြဲ၍ အမျိုးသမီး ၃ ဦး သေဆုံး

KNU ထိန်းချုပ်ထားသည့် မောတောင်ကို လေယာဉ်ဖြင့် ဗုံးကြဲ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မေလ ၄ ရက်။ ထိုင်း-မြန်မာနယ်စပ် ကရင့်အမျိုးသား အစည်းအရုံး KNU က မကြာသေးခင်က သိမ်းပိုက်ထားသည့် မောတောင်မြို့ပေါ်ကို စစ်တပ်က လေယာဉ်ဖြင့် ဗုံးကြဲတိုက်ခိုက်ခဲ့ရာ လသားအရွယ် ကလေးငယ်တစ်ဦး အပါအဝင် အရပ်သား ၄ ဦး ထိခိုက်ဒဏ်ရာရရှိပြီး နေအိမ်များ ပျက်စီး ဆုံးရှုံးခဲ့သည်။ စစ်တပ်က လေယာဉ်နှစ်စီးဖြင့် တနင်္သာရီတိုင်းဒေသကြီး၊ မြိတ်ခရိုင်၊ မောတောင်မြို့ပေါ်ရှိ သုဿာန်နှင့် ကာစီနိုရုံအနီးသို့ မတ်လ ၂ ရက်နေ့၊ မွန်းလွဲ ၂ နာရီဝန်းကျင်တွင် ဗုံးကြဲတိုက်ခိုက်ခဲ့ခြင်း ဖြစ်သည်။ အဆိုပါ လေကြောင်းတိုက်ခိုက်မှုနှင့် ပတ်သက်၍ ဘေးလွတ်ရာသို့ တိမ်းရှောင်နေရသည့် အသက် ၅၀ ခန့်အရွယ် ဒေသခံအမျိုးသားတစ်ဦးက ယခုကဲ့သို့ ပြောသည်။ "ဗုံးလာကြဲတာ လေယာဉ်နှစ်စီးနဲ့ ရှေ့ဆင့်နောက်ဆင့် ကြဲချသွားတာ။ အိမ်တွေလည်း မီးလောင်တယ်။ လူက တော့ သိသလောက် ထိခိုက်တာ လေးယောက်ရှိပြီလို့တော့ သိရတယ်။ ကိုယ်တွေလည်း ပုန်းရှောင်နေရတာ ဆိုတော့ အသေးစိတ်တော့ မသိရသေးဘူးလေ။" မောတောင်မြို့ကို ပြည်သူ့ကာကွယ်ရေး ပူးပေါင်းတပ်ဖွဲ့များက တိုက်ခိုက်သိမ်းပိုက်ပြီးနောက်ပိုင်း စစ်တပ်ဘက် က မြို့ပေါ်သို့ လေကြောင်းဖြင့် ပထမဆုံးအကြိမ် ဗုံးကြဲတိုက်ခိုက်လာခြင်း ဖြစ်သည်။ စစ်တပ်သည် ပြီးခဲ့သည့် ဧပြီလ ၂၆ ရက်နှင့် ၂၇ ရက်နေ့များတွင်လည်း မောတောင်မြို့အနီးရှိ ကျေးရွာများကို လေကြောင်းမှ တိုက်ခိုက်ခဲ့ရာ အမှတ် ၆ ကျေးရွာမှ ရွာသားနှစ်ဦး သေဆုံးခဲ့ပြီး နေအိမ်များ ပျက်စီးခဲ့သည့် ဖြစ်စဉ်များလည်း ရှိခဲ့သည်။ တစ်ဖက်တွင်မူ ထိုင်းနိုင်ငံ၊ ပရာကျွတ်ခီရီခန် ပြည်နယ်အုပ်ချုပ်ရေးမှူးက မောတောင်ဒေသတွင်း တိုက်ပွဲများ ရပ်တန့်သွားပြီဟုဆိုကာ နယ်စပ်ဂိတ်၌ ယာယီသတ်မှတ်ထားသည့် ကန့်သတ်ချက်များကို ဧပြီလ တတိယပတ်မှ စတင်ကာ ဖယ်ရှားမည့် အမိန့်ကို လက်မှတ်ရေးထိုး အတည်ပြုပေးထားသည်။ အဆိုပါ ဖြေလျှော့မှုအရ ဆင်ခွန်း-မောတောင် နယ်စပ်ဂိတ်မှာ ကုန်သွယ်ရေးလုပ်ငန်းများကို နေ့စဉ် နံနက် ၆ နာရီမှ ညနေ ၆ နာရီအထိ ခွင့်ပြုသွားမည်ဟု ထိုင်းသတင်းဌာနများက ဆိုသည်။ ယခင်က အင်္ဂါနှင့် စနေနေ့တို့တွင် နံနက် ၈ နာရီမှ မွန်းတည့်ချိန်အထိသာ ယာယီဖွင့်လှစ်ပေးခဲ့ခြင်း ဖြစ်သည်။ နယ်စပ်ဂိတ် ပြန်လည်ဖွင့်လှစ်ခြင်းသည် ထိုင်း-မြန်မာ နယ်စပ်စီးပွားရေး တည်ငြိမ်စေရေးအတွက် အရေးကြီးသည့် ခြေလှမ်းဖြစ်သည်ဟု ထိုင်းအာဏာပိုင်များက ဆိုသည်။ ထိုသို့ နယ်စပ်ဂိတ်၌ ယာယီသတ်မှတ်ချက်ကို ဖယ်ရှားလိုက်သည့်နောက်၊ လက်ရှိတွင် စစ်တပ်က မောတောင်မြို့ နှင့် အနီးဝန်းကျင်ရှိ ကျေးရွာများကို ရက်ပိုင်းအတွင်း ဆက်တိုက်ဆိုသလို လေကြောင်းမှ ဗုံးကြဲနေသဖြင့် ဒေသခံများအနေဖြင့် ဘေးလွတ်ရာသို့ ပြောင်းရွှေ့နေထိုင်ကြရသည်။ ထို့ကြောင့် လေကြောင်း အန္တရာယ်ကို အထူးသတိပြုကြရန်နှင့် ဗုံးခိုကျင်းများ စနစ်တကျ ဆောက်လုပ်နေထိုင် ကြရန် ပြည်သူ့ကာကွယ်ရေး ပူးပေါင်းတပ်ဖွဲ့က ဒေသခံပြည်သူများကို သတိပေးနှိုးဆော်ထားသည်။ #KNU #မောတောင်မြို့ #စစ်တပ် #လေကြောင်းတိုက်ခိုက်

KNU ထိန်းချုပ်ထားသည့် မောတောင်ကို လေယာဉ်ဖြင့် ဗုံးကြဲ

ကရင်နယ်မြေ သတ္တုတွင်း ဗုံးကြဲရာ တရုတ် လုပ်ငန်းရှင် အပါအဝင် အလုပ်သမားများ ထိခိုက် သေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မေလ ၁ ရက်။ ကရင်အမျိုးသားအစည်းအရုံး (KNU) တပ်မဟာ (၆) နယ်မြေ၊ ဘုရားသုံးဆူမြို့အနီးရှိ မက္ကသာသတ္တုခဲမိုင်း လုပ်ကွက်များကို စစ်အုပ်စုက လေကြောင်းမှ ဗုံးကြဲတိုက်ခိုက်ခဲ့သဖြင့် တရုတ်နိုင်ငံသား လုပ်ငန်းရှင်များ အပါအဝင် အလုပ်သမားအများအပြား ထိခိုက်သေဆုံးမှုများ ဖြစ်ပေါ်ခဲ့သည်။ ပြီးခဲ့သည့် ဧပြီလ ၂၉ ရက်နေ့ မွန်းလွဲပိုင်းတွင် စစ်အုပ်စုသည် Y-12 လေယာဉ်ဖြင့် မက္ကသာမိုင်းတွင်း အမှတ် (၁) မှ (၅) အထိ နေရာများကို (၆) ကြိမ်တိုင်တိုင် ဗုံးကြဲတိုက်ခိုက်ခဲ့ခြင်းဖြစ်သည်။ ထိုသို့ တိုက်ခိုက်မှုကြောင့် တရုတ်နိုင်ငံသား လုပ်ငန်းရှင်နှင့် မိုင်းလုပ်သား ၁၀ ဦးထက်မနည်း ထိခိုက်ဒဏ်ရာ ရရှိခဲ့ပြီး ဒဏ်ရာပြင်းထန်သည့် တရုတ်နိုင်ငံသားတစ်ဦးကို ထိုင်းနိုင်ငံဘက်သို့ ပို့ဆောင်ကုသပေးနေရသည်။ မြေပြင်သတင်းရင်းမြစ်က "တရုတ်တစ်ယောက်ကတော့ ဒဏ်ရာ အရမ်းပြင်းထန်တော့ ထိုင်းဘက်ကို ပို့လိုက် တယ်။ ကျန်တာက ဒီမှာပဲ ကုလိုက်တယ်” ဟု ပြောသည်။ မြေပြင်သတင်းရင်းမြစ်များ၏ အဆိုအရ အဆိုပါတိုက်ခိုက်မှုတွင် သေဆုံးသူများရှိနေပြီး အလောင်းများသည် ကိုယ်လက်အင်္ဂါ အစိတ်အပိုင်းများ ပြတ်တောက်နေသောကြောင့် အရေအတွက် အတိအကျနှင့် မည်သူမည်ဝါ ဖြစ်ကြောင်း အတည်ပြုရန် ခက်ခဲနေသည်ဟု ဆိုသည်။ ယခင်အစိုးရလက်ထက် ကတည်းက တရားဝင်ခွင့်ပြုမိန့်ဖြင့် လုပ်ကိုင်နေသည့် ဤမိုင်းတွင်းတွင် ထိုင်းနှင့် တရုတ်ကုမ္ပဏီများလည်း ပါဝင်ပတ်သက်နေသည်။ စစ်အုပ်စုအနေဖြင့် အဆိုပါ မိုင်းတွင်းများကို ပစ်မှတ်ထားတိုက်ခိုက်ခြင်းသည် KNU ၏ စီးပွားရေးထောက်တိုင် များကို ဖြိုခွင်းရန် ရည်ရွယ်ခြင်းဖြစ်သည်ဟု ကေအဲန်ယူ တပ်မဟာ (၆) နှင့် နီးစပ်သူတစ်ဦးက သုံးသပ် ပြောဆိုသည်။ “စစ်တပ်က အဓိကတော့ ကေအဲန်ယူမြေမှာရှိတဲ့ ဝင်ငွေလမ်းကြောင်း တွေကိုပိတ်ဆို့တဲ့သဘောပေါ့။ တရုတ် လုပ်ငန်းရှင်တွေ လုပ်ခြုံမှု မရှိတော့ရင် လာကြမှာမဟုတ်တော့ဘူး။ နောက်ပြီးတော့ ဒီ ပြည်တွင်းလုပ်ငန်းရှင် တွေလည်း လာလုပ် မရဲအောင်လုပ်တဲ့ သဘောပဲ။" ဗုံးကြဲတိုက်ခိုက်မှုကြောင့် မိုင်းလုပ်ငန်းခွင်ရှိ အဆောက်အအုံအများအပြား ပျက်စီးသွားခဲ့ကာ မိုင်းလုပ်သားများ သည်လည်း ဘုရားသုံးဆူမြို့ဘက်သို့ ထွက်ပြေးတိမ်းရှောင်နေကြရသည်။ မက္ကသာနှင့် သဗြုသတ္တုခဲမိုင်းတွင်း နေရာများသည် ၂၀၂၂ ခုနှစ်မှစ၍ စစ်အုပ်စု၏ နှစ်စဉ် လေကြောင်းတိုက်ခိုက်မှု ကို ခံနေရသည့် နေရာများဖြစ်သည်။ ပြီးခဲ့သည့် မတ်လ ၃၁ ရက်နေ့ကလည်း မက္ကသာမော်ဖားထောကျေးရွာတွင် ဒရုန်းဖြင့် ဗုံးကြဲတိုက်ခိုက်ခံရမှု ကြောင့် အမျိုးသမီး ၂ ဦး သေဆုံးကာ ကလေးငယ် ၁ ဦး ဒဏ်ရာရရှိခဲ့သည့် ဖြစ်စဉ်ရှိခဲ့သည်။ လက်ရှိတွင် မြဝတီမြို့တောင်ပိုင်းနှင့် ဝေါ်လေဒေသများ၌ တိုက်ပွဲများ အပြင်းအထန် ဖြစ်ပွားနေသော်လည်း ဘုရားသုံးဆူမြို့ အနီးတွင် တိုက်ပွဲဖြစ်ပွားခြင်း မရှိဘဲ စစ်အုပ်စုက လေကြောင်းမှတစ်ဆင့် အရပ်သားများနှင့် စီးပွားရေးလုပ်ကွက်များကို ပစ်မှတ်ထားတိုက်ခိုက်နေခြင်း ဖြစ်သည်။ #မက္ကသာသတ္တုခဲမိုင်းလုပ်ကွက် #KNUတပ်မဟာ၆ #လေကြောင်းတိုက်ခိုက်မှု

ကရင်နယ်မြေ သတ္တုတွင်း ဗုံးကြဲရာ တရုတ် လုပ်ငန်းရှင် အပါအဝင် အလုပ်သမားများ ထိခိုက် သေဆုံး

KNU ပူးပေါင်းတပ်များ ဝေါလေဗျူဟာကုန်းကို ထိုးစစ်ဆင်နေပြီး တိုက်ပွဲ ပြင်းထန် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၂၉ ရက်။ မြန်မာ-ထိုင်းနယ်စပ်၊ မြဝတီမြို့တောင်ဘက်ရှိ စစ်တပ်၏ ‘ဝေါလေဗျူဟာကုန်း’ ကို ကရင်အမျိုးသား လွတ်မြောက်ရေးတပ်မတော် (KNLA) နှင့် တော်လှန်ရေးပူးပေါင်းတပ်ဖွဲ့များက အပြီးသတ်သိမ်းပိုက်နိုင်ရန် အရှိန်အဟုန်မြှင့် ထိုးစစ်ဆင်လျက်ရှိရာ တိုက်ပွဲများ ဆက်လက်ပြင်းထန်နေသည်။ ပြီးခဲ့သည့် ဧပြီလတတိယပတ်မှ စတင်ကာ တော်လှန်ရေးပူးပေါင်းတပ်များက ဝေါလေဗျူဟာစခန်းကို အလုံး အရင်းဖြင့် ဝင်ရောက်တိုက်ခိုက်ခဲ့ခြင်းဖြစ်ပြီး၊ လက်ရှိတွင် စစ်တပ်၏ ရှေ့တန်းကာကင်းစခန်းအချို့ကို ထပ်မံ သိမ်းပိုက်ထားနိုင်ပြီဖြစ်သည်။ စစ်တပ်ဘက်ကမူ ၎င်းတို့၏ ဗျူဟာစခန်း လက်မလွှတ်ရရေးအတွက် တစ်ရက်တည်းတွင်ပင် လေကြောင်းမှ ဗုံးအကြိမ် ၂၀ နီးပါး ကြဲချကာ ခုခံနေရသည်။ ထိုသို့ တိုက်ပွဲများပြင်းထန်နေစဉ်အတွင်း ဧပြီလ ၂၇ ရက်နေ့က စစ်တပ်ဘက်မှ ဂျက်ဖိုက်တာများဖြင့် မီးလောင် ဗုံးများ အသုံးပြုကာ တိုက်ခိုက်ခဲ့သဖြင့် ဝေါလေနှင့် ထီးသဲလယ်ကျေးရွာရှိ လူနေအိမ် ၃၀ ခန့် မီးလောင်ပျက်စီး သွားသည်ဟု တော်လှန်ရေး တပ်ဖွဲ့ဝင်တစ်ဦးက ပြောသည်။ မြေပြင်ရှိ တော်လှန်ရေးတပ်ဖွဲ့ဝင်တစ်ဦးက “၂၇ ရက်နေ့ နေ့လယ် ၁ နာရီလောက်မှာ ဗုံးလာကြဲတယ်။ ဂျက် ဖိုက်တာနဲ့ မီးလောင်ဗုံးတွေ အပါအဝင် ဗုံးအလုံးရေ တော်တော်များများ လာကြဲသွားတာပါ။ အဲ့ဒီတိုက်ခိုက်မှု ကြောင့် ဝေါလေနဲ့ ထီးသဲလယ်ရွာက အိမ်ပေါ့နော် ၃၀ လောက် မီးလောင်ပြာကျသွားခဲ့ရတယ်။ ကံကောင်းတာ က ဒေသခံတွေက တိုက်ပွဲအခြေအနေကြောင့် ကြိုတင်ရှောင်တိမ်းနေကြလို့ လူထိခိုက်မှုတော့ မရှိခဲ့ဘူး” ဟု ပြောသည်။ တိုက်ပွဲများကြောင့် ဝေါလေဒေသခံ အရပ်သား ၁၂ ဦးထက်မနည်း ထိခိုက်ဒဏ်ရာရရှိခဲ့ပြီး ဒေသခံများမှာလည်း ဘေးလွတ်ရာသို့ ထွက်ပြေးတိမ်းရှောင်နေကြရသည်။ ဝေါလေဒေသခံတစ်ဦးက “လေယာဉ်ကတော့ တောက်လျှောက်ဝဲပြီး ဗုံးကြဲနေတာပဲ။ စခန်းထဲက စစ်သားတွေ လည်း အပြင်ကို ထွက်ပြေးနေကြတယ်လို့ ကြားတယ်။ ရွာထဲမှာလည်း လက်နက်ကြီးကျည်တွေကျတော့ လူတွေက ထိုင်းဘက်ကမ်းကို ကူးဖို့ အထုပ်အပိုးတွေနဲ့ ပြင်နေကြရပြီ” ဟု ပြောသည်။ တစ်ဖက်တွင်လည်း စစ်တပ်သည် နယ်စပ်ကုန်သွယ်ရေး တံတားကို ဧပြီလ ၂၈ ရက်နေ့တွင် ပြန်ဖွင့်ရန် ထိုင်းအာဏာပိုင်များထံ စာပို့ အကြောင်းကြားထားကြောင်း ထိုင်းသတင်းအချို့က ဖော်ပြသည်။ မြဝတီတဖက်ခြမ်း မဲဆောက်မြို့မှ ဒေသခံတစ်ဦးက “ချစ်ကြည်ရေး တံတားဖွင့်ဖို့ မြန်မာအာဏာပိုင်တွေ Tak (တက်ခ်ခရိုင်) အာဏာပိုင်တွေကို စာပို့တယ်လို့ ကြားတယ်။ ဧပြီ ၂၈ ရက်မှာ ဖွင့်ဖို့ ဖွင့်လို့အဆင်ပြေပြီ ဆိုတဲ့အကြောင်းပေါ့ဗျာ။ ဒါက တကယ်တော့ ဘယ်လိုမှ မဖြစ်နိုင်တဲ့ကိစ္စ။ တိုက်ပွဲက နေ့တိုင်းလိုလို ဖြစ်နေတာလေ။ မြန်မာဘက်က သူတို့ဖြစ်ချင်တာကို ပြောနေတာမျိုးဗျ” ဟု ပြောသည်။ သို့သော်လည်း မြေပြင်တွင် စစ်တပ်ကပစ်ခတ်သည့် လက်နက်ကြီးကျည်များမှာ ထိုင်းနိုင်ငံဘက်ခြမ်းသို့ အကြိမ်ကြိမ်ကျရောက်နေသဖြင့် ထိုင်းအာဏာပိုင်များက နယ်စပ်လုံခြုံရေးကို အရေးပေါ်တပ်လှန့် သတိပေးထားသည်။ ဝေါလေဗျူဟာကုန်းသည် မြဝတီတောင်ဘက်ခြမ်းတွင် စစ်တပ်၏ နောက်ဆုံး အမာခံစခန်းဖြစ်သဖြင့် အဆိုပါ စခန်းသာ ကျဆုံးသွားပါက နယ်စပ်တစ်လျှောက် စစ်တပ် ကင်းစင်နယ်မြေ ဖြစ်လာမည်ဖြစ်သည်။ ဝေါလေဗျူဟာ ကုန်းသည် ထိုင်း-မြန်မာနယ်စပ်အား စောင့်ကြည့်စိုးမိုးနိုင်သည့် အမြင့်ပိုင်းနေရာတွင် ရှိခြင်းကြောင့် နယ်စပ်ဖြတ်ကျော်မှုများနှင့် ကုန်သွယ်ရေးလမ်းကြောင်းများကို ထိန်းချုပ်ထားနိုင်သည့် ဗျူဟာမြောက်ကုန်းတစ်ခု ဖြစ်သည်။ မြဝတီ - ဝေါလေ လမ်းပိုင်းကို စိုးမိုးထားနိုင်သည့် အတွက် ဤဒေသတွင်ရှိ စစ်ရေးလှုပ်ရှားမှုတွေအတွက် အချက်အခြာကျသည်။ ထို့ကြောင့် စစ်တပ်အနေဖြင့် လေကြောင်းတိုက်ခိုက်မှုများကို အရှိန်မြှင့်လုပ်ဆောင်နေသလို၊ ထိုင်းနိုင်ငံဘက်မှ တစ်ဆင့် စစ်ကူပို့ဆောင်နိုင်ရေး ကြိုးပမ်းနေသည်ဟူသော သတင်းများလည်း ထွက်ပေါ်နေသည်။ #ဝေါလေဗျူဟာကုန်း #KNLA #KNU #PDF #KNDO #ဝေါလေတိုက်ပွဲ

KNU ပူးပေါင်းတပ်များ ဝေါလေဗျူဟာကုန်းကို ထိုးစစ်ဆင်နေပြီး တိုက်ပွဲ ပြင်းထန်

နှစ် ၃၀ ကြာ ဆုံးရှုံးခဲ့သော ကဘောတူ စခန်းကို KNU ပြန်သိမ်း သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၂၇ ရက်။ ကရင်ပြည်၊ ဖာပွန်တွင် နှစ် ၃၀ ကြာ စစ်တပ် အခြေစိုက်ခဲ့သည့် ကဘောတူစခန်းကို KNU က အပြီးသတ် တိုက်ခိုက် သိမ်းပိုက်နိုင်ခဲ့သည်။ ကရင်အမျိုးသားအစည်းအရုံး (KNU)၊ တပ်မဟာ (၅) နယ်မြေဖြစ်သော ဖာပွန် (မူတြော်) ခရိုင်အတွင်း စစ်တပ် ၏ လမ်းပန်းဆက်သွယ်ရေးနှင့် နယ်မြေလုံခြုံရေးအတွက် ဗျူဟာမြောက် အရေးပါသည့် ကဘောတူစခန်းကို ကရင်အမျိုးသား လွတ်မြောက်ရေး တပ်မတော် (KNLA) ပူးပေါင်းတပ်ဖွဲ့များက ဧပြီလ ၂၅ ရက်နေ့တွင် အပြီး သတ် တိုက်ခိုက်သိမ်းပိုက်နိုင်ခဲ့ခြင်း ဖြစ်သည်။ အဆိုပါ ကဘောတူတပ်စခန်းသည် ဖာပွန်ခရိုင်၊ လူသောမြို့နယ်အတွင်း တည်ရှိပြီး ၁၉၉၇ ခုနှစ်ခန့်မှစ၍ စစ်တပ် က နှစ်ပေါင်း ၃၀ နီးပါး ကျူးကျော်အခြေစိုက်ထားသည့် စခန်းဖြစ်သည်။ စခန်းမကျစေရန် စစ်တပ်ဘက်မှ လေကြောင်းပစ်ကူများ အဆက်မပြတ် ပြုလုပ်ခဲ့သော်လည်း KNLA ပူးပေါင်း တပ်များက ဝိုင်းဝန်းပိတ်ဆို့ကာ သိမ်းပိုက်နိုင်ခဲ့ခြင်း ဖြစ်သည်။ တပ်မဟာ (၅) နယ်မြေတွင်းရှိ သတင်းရင်းမြစ်တစ်ဦးက “ကဘောတူ စခန်းကို သိမ်းလိုက်ပါပြီဗျ။ မြေပြင်မှာ အားလုံးက အောင်ပွဲခံနေကြပြီ။ ဒီစခန်းမသိမ်းခင်က နေ့တိုင်းလိုလို စခက လေယာဉ်နဲ့ ဗုံးကြဲတာရှိတယ်။ သိမ်း တာက ဧ ပြီ ၂၅ ရက်နေ့ ၁၂ ဝန်းကျင်မှာတော့ အပြီးသတ်သိမ်းနိုင်ခဲ့တာပါ” ဟု ပြောသည်။ စခန်းသိမ်းပိုက်မှုအတွင်း လက်နက်မျိုးစုံ ၁၈ လက်ထက်မနည်း သိမ်းဆည်းရမိခဲ့ပြီး ၎င်းအထဲတွင် ငါးကြင်းမြီး ဟုခေါ်သည့် စက်သေနတ် ၂ လက်နှင့် ၆၀ မမ လက်နက်ကြီး ၁ လက်တို့ ပါဝင်ကြောင်း၊ စစ်တပ် လက်အောက်ခံ တပ်သား အချို့၏ အလောင်းများကို တွေ့ရှိရသည့်အပြင် အချို့မှာ ထွက်ပြေးသွားကြကြောင်း ကရင်စစ်ရေးသတင်း ရင်းမြစ်များက ဆိုသည်။ ကဘောတူစခန်းသည် စစ်အာဏာသိမ်းပြီးနောက် ၂၀၂၁ ခုနှစ် စက်တင်ဘာလအတွင်းကလည်း KNU ဘက်မှ ပထမတစ်ကြိမ် တိုက်ခိုက်သိမ်းပိုက်ခဲ့ဖူးသော်လည်း ထိုစဉ်က ပြန်လည်ဆုတ်ခွာပေးခဲ့သဖြင့် စစ်တပ်က နေရာ ပြန်ဝင်ယူကာ တပ်စွဲထားခဲ့ခြင်းဖြစ်သည်။ ယခုတစ်ကြိမ်တွင်မူ ဒေသခံများ၏ လုံခြုံရေးအတွက် အပြီးသတ်တိုက်ခိုက်သိမ်းယူခဲ့ခြင်းဖြစ်ပြီး စခန်း သိမ်း ပိုက်ပြီးနောက် နယ်မြေရှင်းလင်းရေးလုပ်ငန်းများကို ဆက်လက်လုပ်ဆောင်လျက်ရှိသည်။ ဖာပွန် (မူတြော်) ခရိုင်အတွင်း အာဏာသိမ်းပြီးနောက်ပိုင်း KNLA မဟာမိတ်ပူးပေါင်းတပ်များက စစ်တပ် စခန်း ပေါင်း ၇၀ နီးပါးအထိ သိမ်းပိုက်နိုင်ခဲ့ပြီဖြစ်ရာ လက်ရှိတွင် ဖာပွန်ခရိုင်အတွင်း၌ စစ်တပ်၏ ဖာပွန်ဗျူဟာကုန်း အပါအဝင် တပ်စခန်း ၁၀ ခုခန့်သာ ကျန်ရှိတော့သည်ဟု ဆိုသည်။ လက်ရှိတွင် အဆိုပါ ဖာပွန်ဗျူဟာကုန်းကို သိမ်းပိုက်နိုင်ရန် KNLA ဘက်မှ ဆက်လက် ပိတ်ဆို့တိုက်ခိုက်နေပြီး၊ စစ်တပ်ဘက်မှလည်း နယ်ခြားစောင့်တပ် (BGF) အင်အားများကို အသုံးပြု၍ စစ်အင်အားဖြည့်တင်းမှုများ လုပ်ဆောင်နေသဖြင့် ဒေသတွင်း စစ်ရေးတင်းမာမှုများ ပိုမိုပြင်းထန်လာသည်ဟု ဆိုသည်။

နှစ် ၃၀ ကြာ ဆုံးရှုံးခဲ့သော ကဘောတူ စခန်းကို KNU ပြန်သိမ်း

သင်္ကြန်အတွင်း KNU နယ်မြေများတွင် ဗုံးကြဲတိုက်ခိုက်ရာ အရပ်သား ၆ ဦးသေဆုံး သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဧပြီလ ၁၉ ရက်။ သင်္ကြန်ကာလအတွင်း KNU နယ်မြေများတွင် စစ်အစိုးရတပ် လေကြောင်းမှ တိုက်ခိုက်ခဲ့ရာ အရပ်သား ၆ ဦး သေဆုံးကာ နေအိမ်နှင့် ကျောင်းများစွာ ပျက်စီးခဲ့သည်ဟု KNU က ထုတ်ပြန်သည်။ မြန်မာ့ရိုးရာသင်္ကြန်ကာလ ၄ ရက်အတွင်း ကရင်အမျိုးသားအစည်းအရုံး (KNU) တပ်မဟာ (၅) နယ်မြေဖြစ် သည့် ဖာပွန် (မူတြော်) ခရိုင်အတွင်း စစ်အစိုးရတပ်၏ လေကြောင်း ဗုံးကြဲတိုက်ခိုက်မှုများကြောင့် အနည်းဆုံး အရပ်သား ၆ ဦး သေဆုံးပြီး ၁၃ ဦး ဒဏ်ရာရရှိခဲ့ကြောင်း KNU က အတည်ပြု ထုတ်ပြန်ထားသည်။ ဧပြီလ ၁၃ ရက်နေ့ (အကြိုနေ့) မှ ၁၆ ရက်နေ့ (အတက်နေ့) အထိ စစ်အစိုးရတပ်သည် တိုက်ပွဲဖြစ်ပွားခြင်း မရှိသော ကျေးရွာများကို ဂျက်ဖိုက်တာများနှင့် Y-12 လေယာဉ်များအသုံးပြု၍ နေ့စဉ်ဗုံးကြဲခဲ့ခြင်းဖြစ်သည်။ အထူးသဖြင့် ဧပြီလ ၁၅ ရက်နေ့တွင် ခဲပါထကျေးရွာအား ဗုံးကြဲခဲ့သဖြင့် အရပ်သား ၄ ဦး သေဆုံးကာ နေအိမ် ၂၁ လုံးနှင့် ဘာသာရေး အဆောက်အအုံများ မီးလောင်ပျက်စီးခဲ့ရသည်။ ယခုတိုက်ခိုက်မှုများသည် လူထုကိုသာ သီးသန့်ပစ်မှတ်ထားခြင်းဖြစ်ကြောင်း KNU တပ်မဟာ (၅) ပြောရေး ဆိုခွင့်ရှိသူ ဒုဗိုလ်မှူးကြီး စောကလယ်ဒိုက သတင်းမီဒီယာများကို ပြောဆိုထာသည်။ ထို့ပြင် ဧပြီလ ၁၂ ရက်နေ့က ဦးမယ်ထာဆေးရုံအား ပေါင် ၅၀၀ ဗုံးများဖြင့် တိုက်ခိုက်ခဲ့သကဲ့သို့၊ ဧပြီလ ၁၄ ရက်နေ့တွင်လည်း မူတြော်ဂျူနီယာကောလိပ် (Mutraw Junior College) ကို ရည်ရွယ်ချက်ရှိရှိ ဗုံးကြဲဖျက်ဆီးခဲ့ သည်။ မြေပြင်အခြေအနေနှင့် ပတ်သက်၍ ဒေသခံတစ်ဦးက “သင်္ကြန်တွင်းမှာလည်း ဆက်တိုက်ပဲ ဗုံးကြဲနေတာ။ သူတို့က စာသင်ကျောင်းတွေ၊ ဆေးရုံတွေကိုပဲ ရွေးပြီး ကြဲနေတာ။ ရွာလုံးကျွတ်နီးပါး ပြာကျကုန်ပြီ” ဟု ပြော သည်။ အလားတူ မြဝတီမြို့တောင်ပိုင်းရှိ မင်းလက်ပံကျေးရွာတွင်လည်း ဝေါလေဗျူဟာသို့ စစ်ကူပို့ရန် ကြိုးစားသည့် စစ်အစိုးရတပ် စစ်ကြောင်းနှင့် KNLA ပူးပေါင်းတပ်များအကြား တိုက်ပွဲများ ပြင်းထန်နေသည်။ စစ်အစိုးရတပ်ဘက်က အသေခံဒရုန်းများနှင့် မီးလောင်ဗုံးများ အသုံးပြုတိုက်ခိုက်နေသဖြင့် မင်းလက်ပံကျေးရွာ အတွင်းရှိ နေအိမ် ၁၄ လုံးထက်မနည်း မီးလောင်ပျက်စီးသွားကြောင်း မြေပြင်သတင်းရင်းမြစ်များက ဆိုသည်။ KNU ဗဟိုက ဧပြီလ ၁၈ ရက်နေ့တွင် ထုတ်ပြန်ချက်တစ်ရပ် ထုတ်ပြန်ခဲ့ပြီး စစ်အစိုးရတပ်၏ လုပ်ရပ်များသည် အပြည်ပြည်ဆိုင်ရာ လူသားချင်းစာနာထောက်ထားမှုဥပဒေကို ပြောင်ပြောင်တင်းတင်း ချိုးဖောက်သည့် စစ်ရာဇဝတ်မှုများဖြစ်ကြောင်း ရှုတ်ချထားသည်။ အဆိုပါ ထုတ်ပြန်ချက်တွင် “အာဆီယံအဖွဲ့ဝင်နိုင်ငံများနှင့် နိုင်ငံတကာအသိုင်းအဝိုင်းအား မိမိတို့၏ စိုးရိမ် ပူပန် မှုကို ထုတ်ဖော်ပြသခြင်းထက်ပိုသော လက်တွေ့ကျသည့် အရေးယူဆောင်ရွက်မှုများကို ချက်ချင်း အကောင် အထည်ဖော် ဆောင်ရွက်ကာ ယခုဆက်လက်ဖြစ်ပွားနေသော လေကြောင်းတိုက်ခိုက်မှုများကို ရပ်တန့်စေရန် ထိရောက်သည့် တားဆီးကာကွယ်မှုများကို လုပ်ဆောင်ရန် တိုက်တွန်းသည်။ ထိုသို့ ထင်ရှားသည့် ဥပဒေချိုး ဖောက်မှုများကို မတားဆီးဘဲ ဆက်လက်၍ နှုတ်ဆိတ်နေခြင်းသည် အကြမ်းဖက်မှုများ ပြောင်ပြောင်တင်းတင်း ပိုမိုကျူးလွန်လာစေရန် အတွက် အားပေးကူညီရာရောက်မည်ဖြစ်သည်” ဟု ဖော်ပြပါရှိသည်။ လက်ရှိတွင် နှစ်ဖက်စစ်ရေး အခြေအနေမှာ သင်္ကြန်အပြီးတွင် ပိုမိုတင်းမာလာနိုင်သည့် အနေအထားရှိနေပြီး စစ်အစိုးရတပ် အနေဖြင့် အရပ်သားပြည်သူများ၏ ကျန်းမာရေးနှင့် ပညာရေးဝန်ဆောင်မှုများကို ဖျက်ဆီးရန် ရည်ရွယ်ချက်ရှိရှိ လုပ်ဆောင်နေခြင်းအပေါ် နိုင်ငံတကာက မျက်ကွယ်မပြုရန် KNU က တောင်းဆိုထားသည်။ #KNU #KNLA #လေကြောင်းတိုက်ခိုက် #စစ်တပ် #စစ်အုပ်စု

သင်္ကြန်အတွင်း KNU နယ်မြေများတွင် ဗုံးကြဲတိုက်ခိုက်ရာ အရပ်သား ၆ ဦးသေဆုံး

KNU ၏ ကော်သူးလေ ကောင်စီများ အရှိန်မြှင့်တင် ဆောင်ရွက်နေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၁၇ ရက်။ ကော်သူးလေ အတိုင်ပင်ခံ ကောင် စီနှင့် အုပ်ချုပ်ရေးကောင်စီတို့သည် နယ်မြေအတွင်း အုပ်ချုပ်ရေးယန္တရား ပိုမိုအားကောင်းလာစေရန်နှင့် နိုင်ငံ တကာနှင့် ချိတ်ဆက်သည့် လူထုဝန်ဆောင်မှုလုပ်ငန်းများကို အရှိန်မြှင့်တင် ဆောင်ရွက်နေသည်ဟု ပြောသည်။ အဆိုပါ ကောင်စီနှစ်ရပ်ကို ကရင်အမျိုးသားအစည်းအရုံး (KNU) က ဧပြီလ ၁၀ ရက်နေ့က စတင်ဖွဲ့စည်းခဲ့ခြင်း ဖြစ်ပြီး၊ ယခင်ကရှိခဲ့သော အုပ် ချုပ်ရေး လုပ်ငန်းများကို အခြေခံကာ နိုင်ငံတကာချိတ်ဆက်မှုများမှတစ်ဆင့် ပိုမိုထိရောက်သော အုပ်ချုပ်ရေး ပုံစံသစ်ကို ဖော်ဆောင်သွားမည်ဖြစ်သည်။ ယခုခြေလှမ်းနှင့် ပတ်သက်၍ KNU ပြောရေးဆိုခွင့်ရှိသူ ပဒိုစောကလယ်စေးက “နောက်ထပ် ဒီထက် ကျနော်တို့ မျှော်လင့်တာက ဒီထက်ကောင်းမွန်တဲ့ အုပ်ချုပ်ရေး လုပ်ငန်းတွေ အထူးသဖြင့်တော့ ဒီ ပြည်သူ့ ဝန်ဆောင်မှု လုပ်ငန်းတွေ ဖြစ်တဲ့ ဌာနတွေပေါ့နော် အဲဒါတွေက ပိုပြီး အလုပ်လုပ်လာနိုင်မယ် နိုင်ငံတကာနဲ့လည်း ပိုပြီး ချိတ် ဆက်ဆောင်ရွက်လာနိုင်တယ်ဆိုတဲ့ ပိုပြီး ကောင်းမွန်လာနိုင်တဲ့ အနေအထားတော့ ကျနော်တို့ မျှော်လင့်ထားတာ ဖြစ်ပါတယ်” ဟု ပြောသည်။ ကောင်စီသစ်များ အနေဖြင့် ပြည်တွင်းရှိ အခြားသော ဖက်ဒရယ်ယူနစ်များနှင့်လည်း ညှိနှိုင်းချိတ်ဆက်သွားမည် ဖြစ်ပြီး၊ စစ်အာဏာရှင်စနစ်ကို တိုက်ဖျက်ရင်း တော်လှန်ရေးအသွင်ကူးပြောင်းမှုကာလ (Transitional Period) ကို စနစ်တကျ ကျော်ဖြတ်နိုင်ရန် ပြင်ဆင်နေခြင်းဖြစ်သည်ဟု ဆိုသည်။ တော်လှန်ရေးနှင့် အုပ်ချုပ်ရေး ဟန်ချက်ညီရန် လိုအပ်မှုကိုလည်း ပဒိုစောကလယ်စေးက “တစ်ဖက်က တော် လှန်ရေး အခန်းကဏ္ဍနဲ့ ပတ်သက်ပြီးတော့ ကျနော်တို့ မေ့ထားလို့မရဘူး။ တော်လှန်ရေး ကာလဖြစ်နေတဲ့ အပေါ်မှာ တော်လှန်ရေး လုပ်ငန်းကိုတော့ တစ်စိုက်မတ်မတ် ကျနော်တို့ အတိုင်ပင်ခံကောင်စီနဲ့ တွဲဖက်ပြီး တော့ပေါ့နော်။ ဒီအုပ်ချုပ်ရေးကောင်စီနဲ့ ဟန်ချက်ညီ ကျနော်တို့ တော်လှန်ရေး လုပ်ငန်းကိုလည်း ကျနော်တို့ ဆက်လက်အကောင်အထည်ဖော် တိုးမြှင့်သွားနိုင်မှာ ဖြစ်တယ်လို့ ကျနော်တို့ အဲ့လိုပဲ ယုံကြည် နားလည်ထား ပါတယ်” ဟု ဖြည့်စွက် ပြောသည်။ ကော်သူးလေ အတိုင်ပင်ခံကောင်စီ (Kawthoolei Consultative Council - KCC) ၏ စုဖွဲ့မှုတွင် KNU ဗဟို ကိုယ်စားလှယ်များ၊ ခရိုင် ၇ ခုမှ ကိုယ်စားလှယ်များ၊ လူမျိုးစုအလိုက် ကိုယ်စားလှယ်များ၊ အမျိုးသမီးနှင့် လူငယ် အစုအဖွဲ့များအပြင် ၂၀၂၀ ရွေးကောက်ပွဲ အနိုင်ရကိုယ်စားလှယ်များပါ ပါဝင်ဖွဲ့စည်းထားသည်။ “အထူးသဖြင့် တော်လှန်ရေးကာလ ကော်သူးလေ အတိုင်ပင်ခံကောင်စီထဲမှာ ပါဝင်တဲ့ ကိုယ်စားလှယ်တွေ က တော့ ဗဟိုအဆင့်၊ KNU ရဲ့ ဗဟိုအဆင့် ကိုယ်စားလှယ်တွေပါသလို ခရိုင် ၇ ခုရဲ့ ကိုယ်စားလှယ်တွေလည်း ပါဝင်မှာ ဖြစ်ပါတယ်။ နောက်တော့ အဲဒီ ခရိုင်တွေထဲမှာ ရှိနေကြတဲ့ လူမျိုး ကိုယ်စားလှယ်တွေလည်း ပါဝင်မှာ ဖြစ်သလို အမျိုးသမီးနဲ့ လူငယ်အစုအဖွဲ့တွေ ပါဝင်ကြမှာ ဖြစ်ပါတယ်။ အဲဒီအထဲမှာ ၂၀၂၀ ရွေးကောက်ပွဲ အနိုင်ရခဲ့တဲ့ ကိုယ်စားလှယ်တွေလည်း ပါဝင်မှာ ဖြစ်ပါတယ်” ဟု စုဖွဲ့မှုပုံစံကို ပဒိုကလယ်စေးက ရှင်းပြသည်။ ကောင်စီအသစ်များ အနေဖြင့် ဒီမိုကရေစီနှင့် လူ့အခွင့်အရေးကို အာမခံထားသလို၊ တာဝန်ယူမှု တာဝန်ခံမှု အပြည့်ဖြင့် လုပ်ဆောင်သွားမည်ဟု ခံဝန်ကတိပြုထားကြသည်။ ထို့အပြင် ကော်သူးလေ၏ တည်ငြိမ်မှုကို နှောင့်ယှက်မည့် မည်သည့်အတားအဆီးကိုမဆို အစုအဖွဲ့အားလုံးက စုပေါင်းကာကွယ်သွားမည်ဟု ဆိုသည်။ လက်ရှိတွင် KNU နယ်မြေအသီးသီး၌ စစ်ရေးအရှိန် မြင့်တက်နေသော်လည်း ယခုကဲ့သို့ အုပ်ချုပ်ရေးမဏ္ဍိုင်ကို ခိုင်မာစွာ တည်ဆောက်လိုက်ခြင်းမှာ အနာဂတ် ဖက်ဒရယ်ပြည်ထောင်စု တည်ဆောက်ရေးအတွက် အသွင် ကူးပြောင်းမှုကာလ ပြင်ဆင်ချက်များထဲမှ တစ်ခုဖြစ်ကြောင်း KNU ဘက်က ထုတ်ပြန်ထားသည်။ #KNU #KawthooLeiCouncil #KCC #KGC

KNU ၏ ကော်သူးလေ ကောင်စီများ အရှိန်မြှင့်တင် ဆောင်ရွက်နေ

စစ်ရာဇဝတ်မှုများကို လက်တွေ့ကျကျ တားဆီးပေးရန် နိုင်ငံတကာကို ကရင် အဖွဲ့အစည်းများ တောင်းဆို သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ မတ်လ ၁၆ ရက်။ ညောင်လေးပင်တွင် ပြည်သူ ၃၀၀ ကျော် လူသားဒိုင်းအဖြစ် အသုံးချခံရပြီးနောက် စစ်ရာဇဝတ်မှုများကို လက်တွေ့ကျကျ တားဆီးပေးရန် ကရင့်အမျိုးသားအစည်းအရုံး KNU နှင့် ကရင်အရပ်ဘက်အဖွဲ့အစည်းများက နိုင်ငံတကာကို တိုက်တွန်း လိုက်သည်။ မြန်မာနိုင်ငံတစ်ဝန်းတွင် စစ်ကော်မရှင်၏ စစ်ရာဇဝတ်မှုများ နေ့စဉ်နှင့်အမျှ ပိုမိုဆိုးရွားလာနေပြီး ညောင်လေး ပင်ခရိုင်အတွင်း ပြည်သူ ၃၀၀ ကျော်ကို လူသားဒိုင်းအဖြစ် အသုံးပြုကာ သတ်ဖြတ်မှုများ ကျူးလွန်ခဲ့သည့် အပေါ် နိုင်ငံတကာအနေဖြင့် စိုးရိမ်ကြောင်း ထုတ်ပြန်ရုံတင်မကဘဲ လက်တွေ့ကျကျ တားဆီးပေးရန် တိုက်တွန်း လိုက်ခြင်း ဖြစ်သည်။ လက်တွေ့ကျကျ တားဆီးပေးရန် ဆိုသည်မှာ စစ်ကော်မရှင်၏ လေယာဉ်ဆီ၊ လက်နက်နှင့် ဘဏ္ဍာငွေလမ်း ကြောင်းများကို အမြန်ဆုံး ဖြတ်တောက်ပေးရန် တောင်းဆိုထားခြင်း ဖြစ်သည်။ ပြီးခဲ့သည့် မတ်လ ၅ ရက်နေ့မှစတင်ကာ ပဲခူးတိုင်း၊ ညောင်လေးပင်မြို့နယ်အတွင်းရှိ ကျေးရွာများကို စစ်ကော်မရှင်၏ တပ်မ ၇၇ စစ်ကြောင်းများက စီးနင်းခဲ့ပြီး ရေတွင်းကုန်း၊ ခရုကုန်းနှင့် ကျောင်းကုန်းရွာတို့မှ ပြည်သူ ၃၀၀ ကျော်ကို လူသားဒိုင်းအဖြစ် ဖမ်းဆီးကာ ရက်ရက်စက်စက် ညှဉ်းပန်းနှိပ်စက်ခဲ့ခြင်းဖြစ်သည်။ အဆိုပါ ဖမ်းဆီးခံပြည်သူများကို ကယ်တင်ရန် KNLA နှင့် PDF ပူးပေါင်းတပ်ဖွဲ့များက အသက်ပေးစစ်ဆင်ရေး ဖော်ဆောင်ခဲ့ရပြီး မတ်လ ၁၁ ရက်နေ့တွင် အားလုံးကို ကယ်ထုတ်နိုင်ခဲ့သော်လည်း စစ်ကော်မရှင်၏ သတ်ဖြတ် မှုကြောင့် ကိုယ်ဝန်ဆောင်မိခင်နှင့် ကလေးငယ်များ အပါအဝင် ပြည်သူ ၄၀ ကျော် သေဆုံးခဲ့ရသည်။ ထို့ပြင် အဆိုပါ စစ်ဆင်ရေးတွင် တော်လှန်ရေးရဲဘော် ၁၁ ဦးလည်း ကျဆုံးခဲ့သည်။ ကရင်လူ့အခွင့်အရေးအဖွဲ့ (KHRG) မှ ပြောရေးဆိုခွင့်ရှိသူ စောအဲလ်ဘတ်က “စစ်ကောင်စီကတော့ ဒီလူ့အခွင့် အရေးတွေကို တန်ဖိုးမထားဘူး။ လုံးဝပြောင်ပြောင်တင်းတင်း ချိုးဖောက်မှုတွေ ကျူးလွန်နေတယ်။ ပြည်သူ လူထုကို သူတို့ရဲ့ အကာအကွယ်သဖွယ် အသုံးပြုတာသည် လည်း crime against humanity ဖြစ်တယ်ပေါ့ နော်။ စစ်ရာဇဝတ်မှုလည်း ပြောလို့ရသလိုမျိုး၊ လူသားမျိုးနွယ်အပေါ် ကျူးလွန်တဲ့ ရာဇဝတ်မှု မြောက်တယ် လို့လည်း ကျနော်တို့ ပြောလို့ရပါတယ်” ဟု ပြောသည်။ အလားတူ ကရင်အမျိုးသားအစည်းအရုံး (KNU) ကလည်း မတ်လ ၁၂ ရက်နေ့တွင် ကြေညာချက်တစ်စောင် ထုတ်ပြန်ခဲ့ပြီး နိုင်ငံတကာအသိုင်းအဝန်းအနေဖြင့် စိုးရိမ်ပူပန်ကြောင်း ကြေညာချက်များ ထုတ်ပြန်နေရုံနှင့် မလုံလောက်တော့ဘဲ စစ်ကော်မရှင်၏ လေယာဉ်ဆီ၊ လက်နက်နှင့် ဘဏ္ဍာငွေလမ်းကြောင်းများကို အမြန်ဆုံး ဖြတ်တောက်ပေးရန် တောင်းဆိုထားသည်။ KNU ၏ အချက်အလက်များအရ ၂၀၂၆ ခုနှစ် ဖေဖော်ဝါရီနှင့် မတ်လအတွင်းမှာပင် KNU နယ်မြေကို လေကြောင်းမှ အကြိမ် ၆၀ ကျော် ဗုံးကြဲခဲ့ပြီး အရပ်သား ၅၀ ကျော် သေဆုံးခဲ့ရကြောင်း သိရသည်။ ကရင်ငြိမ်းချမ်းရေး အထောက်အကူပြုကွန်ရက် (KPSN) မှ နော်ချယ်ရီကလည်း “နှောင့်နှေးမှုတွေ ကြန့်ကြာ မှုတွေ ရှိနေတဲ့အပေါ်မှာလည်း အားမရဘူးပေါ့နော်။ ကျမတို့တွေက ရင်ဆိုင်လာရတာ အသက်ပေါင်းတွေနဲ့ ပေးဆပ်ရတာ သေဆုံးတဲ့သူတွေလည်း မနည်းဘူးလေနော်။ ပေးဆပ်ရတာ ဘယ်လိုခေါ်မလဲ ဖွံ့ဖြိုးတိုးတက် နှောင့်နှေးတဲ့ နိုင်ငံမို့လို့ ဂရုမစိုက်တာလား နှောင့်နှေးမှုတွေ ကြန့်ကြာမှုတွေ ဒီလိုမျိုး စာနာပါတယ်၊ နားလည် ပါတယ်။ ဆိုတာလောက်နဲ့ မမြင်ချင်တော့ဘူးလေ။ အမှန်အတိုင်းပြောရင် တစ်ခုခုကို အကောင်အထည် ဖော်စေချင်တယ်” ဟု ပြောသည်။ ထို့ပြင် စစ်ကော်မရှင်၏ အတုအယောင် ရွေးကောက်ပွဲကို အသိအမှတ်မပြုရန်နှင့် လူသားချင်းစာနာမှု အကူအညီများကို စစ်ကော်မရှင်မှတစ်ဆင့် မပေးဘဲ တော်လှန်ရေးအဖွဲ့အစည်းများနှင့် တိုက်ရိုက်ထိတွေ့ ပေးအပ်ရန်လည်း KNU က တိုက်တွန်းထားသည်။ စစ်ကော်မရှင်သည် စစ်မြေပြင်တွင် ရှုံးနိမ့်လေလေ အရပ်သားပြည်သူများ၊ စာသင်ကျောင်းနှင့် ဘုရားကျောင်း များကို ပစ်မှတ်ထားလေလေ ဖြစ်နေသည်ဟု နော်ချယ်ရီက ဆက်လက်ဝေဖန်သည်။ “စစ်တပ်အချင်းချင်း စစ်လက်နက်ကိုင် အချင်းချင်း တိုက်လို့ မနိုင်တဲ့အတွက် ဘာမှ စစ်ဖက်ရေးရာ နားမလည် တဲ့ ပြည်သူလူထုတွေကို သက်သက်မဲ့ပေါ့နော် လူညွှန့်တုံးအောင် အဲဒါက ကျမ အဲလိုပဲ ပြောချင်တယ်။ တော် တော်ယုတ်ညံ့တယ်။ လူလို့တောင် ပြောလို့မရတဲ့ အခြေအနေလေနော်” ဟု ၎င်းက ပြောသည်။ အာဆီယံနှင့် နိုင်ငံတကာ အသိုင်းအဝန်းအနေဖြင့် စစ်ကော်မရှင်ကို သံတမန်အခင်းအကျင်းတွင် ဆက်လက် နေရာပေးနေခြင်းသည် စစ်ရာဇဝတ်မှုများကို ပိုမိုအားပေးရာရောက်နေကြောင်း KNU က သတိပေးထားသည်။ အလားတူ စကားလုံးများထက် ထိရောက်သည့် အရေးယူဆောင်ရွက်မှုများကသာ ပြည်သူများ၏အသက်ကို ကယ်တင်နိုင်မည်ဖြစ်ကြောင်း ထုတ်ပြန်ချက်တွင် ဖော်ပြထားသည်။ #စစ်ရာဇဝတ်မှု #crimeagainsthumanity #KNU #KPSN #KHRG #စစ်ကော်မရှင်

စစ်ရာဇဝတ်မှုများကို လက်တွေ့ကျကျ တားဆီးပေးရန် နိုင်ငံတကာကို ကရင် အဖွဲ့အစည်းများ တောင်းဆို

1 2 3 … 5 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

ရက်သတ္တပတ် အတန်ကြာတွင် အီရန်နှင့် အမေရိကန် အကြား ပစ်ခတ်မှု ပြန်ဖြစ် — August 31, 2026 3:40 pm
နီပေါ ရေကြီးမှုကြောင့် လိုဏ်ခေါင်းအတွင်း လူရာပေါင်းများစွာ ပိတ်မိနေဆဲဖြစ် အတည်ပြု သေဆုံးသူ ၉၀၀ ကျော်ပြီ — August 31, 2026 3:29 pm
EU နှင့် မပူးပေါင်းရန် အိုက်စလန် လူထု ဆန္ဒပြု — August 31, 2026 3:27 pm

Recent Posts

ချင်းတောင်ပိုင်း မင်းတပ်တွင် စစ်အုပ်စုက လေကြောင်းမှ ဗုံးကြဲ၍ ကလေးများအပါ ၈ ဦး သေဆုံး
ရခိုင်-မကွေး အစပ် မင်းတုန်းတွင် ထွန်စက်များ ချောဆွဲခံရမှုကြောင့် တောင်သူများ စိုးရိမ်ထိတ်လန့်
ရခိုင်မြောက်ပိုင်း မောင်တောနယ်စပ်တွင် ကင်းလှည့်နေသည့် AA နှင့် ARSA, RSO ပူးပေါင်းအဖွဲ့ တိုက်ပွဲဖြစ်
ရက်သတ္တပတ် အတန်ကြာတွင် အီရန်နှင့် အမေရိကန် အကြား ပစ်ခတ်မှု ပြန်ဖြစ်
နီပေါ ရေကြီးမှုကြောင့် လိုဏ်ခေါင်းအတွင်း လူရာပေါင်းများစွာ ပိတ်မိနေဆဲဖြစ် အတည်ပြု သေဆုံးသူ ၉၀၀ ကျော်ပြီ

Archives

Archives

×Close