PPNM – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
နိုင်ငံတကာသတင်း
NMG အကြောင်း
Contact

Home
Tag Archive

Tag: PPNM

အာဏာသိမ်းကာလအတွင်း နိုင်ကျဉ်း ၁၄၈ ဦး သေဆုံး

ဒေါ်အောင်ဆန်းစုကြည်နှင့် နိုင်ကျဉ်းများ လွတ်မြောက်ရေး အဖွဲ့ ၅၉ ဖွဲ့ တောင်းဆို သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဧပြီလ ၂၂ ရက်။ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် အပါအဝင် မတရားဖမ်းဆီးခံထားရသည့် နိုင်ငံရေး အကျဉ်းသား အားလုံး ခြွင်းချက်မရှိ အမြန်ဆုံး လွတ်မြောက်ရေးအတွက် နိုင်ငံတကာ အသိုင်းအဝန်း အနေဖြင့် ယခုထက်ပို၍ ထိရောက်ပြီး လက်တွေ့ကျသည့် ဖိအားပေးမှုများ လုပ်ဆောင်ရန် Blue Shirt Movement-Myanmar နှင့် မဟာမိတ်အဖွဲ့ ၅၈ ဖွဲ့က တောင်းဆိုလိုက်သည်။ ဧပြီလ ၁၀ ရက်နေ့မှ ၂၁ ရက်နေ့အထိ (၁၂) ရက်တိုင်တိုင် ပြုလုပ်ခဲ့သည့် Blue Shirt Campaign လူထုလှုပ်ရှားမှု နှင့်အတူ ကုလသမဂ္ဂ (UN)၊ ဥရောပသမဂ္ဂ (EU)၊ အာဆီယံနှင့် အမေရိကန်အပါအဝင် အိမ်နီးချင်းနိုင်ငံများမှ ခေါင်းဆောင်များ အနေဖြင့် မြန်မာ့နိုင်ငံရေးအကျဉ်းသားအရေးကို အထူးအလေးထား ဆောင်ရွက်ပေးရန် တိုက်တွန်းခဲ့ခြင်း ဖြစ်သည်။ Blue Shirt Movement-Myanmar မှ ပြောရေးဆိုခွင့်ရှိသူ ကိုကောင်းယံလင်းက “အမှန်တကယ်တော့ နိုင်ငံရေး အကျဉ်းသားအများစု မလွတ်မြောက်သေးပါဘူး။ လွတ်ငြိမ်းချမ်းသာပေးတယ်ဆိုတဲ့ နေရာမှာလည်း ထောင်ထဲမှာ နှစ်အကြာကြီးနေပြီး လွတ်ရက်စေ့ခါနီးသူတွေက အများစုပါ။ ဒါကြောင့် စစ်အုပ်စုရဲ့ အကျဉ်းထောင်တွေထဲမှာ ခံစားနေရတဲ့ လူ့အခွင့်အရေးချိုးဖောက်မှုတွေနဲ့ ဒေါ်အောင်ဆန်းစုကြည်အပါအဝင် အားလုံးလွတ်မြောက်ဖို့အတွက် နိုင်ငံတကာက အစဉ်တစိုက် ဖိအားပေးစေချင်ပါတယ်” ဟု ပြောသည်။ လက်ရှိတွင် အသက် ၈၀ ကျော်အရွယ်ရှိပြီ ဖြစ်သည့် ဒေါ်အောင်ဆန်းစုကြည်၏ ကျန်းမာရေးနှင့် ပတ်သက်၍ စစ်အုပ်စုက သတင်းအမှောင်ချထားသည့်အပေါ် နိုင်ငံရေးအင်အားစုများက အထူးစိုးရိမ်နေကြသည်။ ဆိုရှယ်ဒီမိုကရက်တစ်ပါတီ (SDP) အထွေအထွေအတွင်းရေးမှူး ကိုကျော်ကိုကိုက “လက်ရှိ ထောင်ထဲမှာရှိတဲ့ ဒေါ်အောင်ဆန်းစုကြည် အပါအဝင် ကျန်တဲ့ နိုင်ငံရေးအကျဉ်းသားအားလုံးရဲ့ အသက်အန္တရာယ်က အင်မတန်မှ စိုးရိမ်စရာကောင်းတယ်။ အခု အခြေအနေ ဘာတွေဖြစ်နေမှန်းလည်း မသိဘူး။ သတင်းအမှောင် ချထားတာ တွေလည်း ရှိတယ်” ဟု ထောက်ပြသည်။ အလားတူ နိုင်ငံရေးအကျဉ်းသူများအဖွဲ့ (WOPP) ဦးဆောင်တာဝန်ခံ မဇူးဇူးမေယွန်းကလည်း “အတုအယောင် အစိုးရက လက်ရှိအထိ ဘာမှ တိတိကျကျ မဖော်ပြတဲ့အတွက် ကျမတို့အနေနဲ့က ဒေါ်အောင်ဆန်းစုကြည်နဲ့ တကွ ကျန်ရှိနေတဲ့ နိုင်ငံရေး အကျဉ်းသားတွေ လွတ်မြောက်ဖို့အရေးကို ပိုပြီးတော့ အရွေ့တစ်ခုကို သွားဖို့ လိုအပ်လာပြီလို့ သုံးသပ်ချင်ပါတယ်” ဟု ပြောသည်။ အထူးသဖြင့် နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ကျန်းကျန်းမာမာနှင့် အသက်ရှင်လျက်ရှိ ကြောင်း ခိုင်မာသည့် သက်သေပြရန် "Proof of Life" ကမ်ပိန်းကို သားဖြစ်သူ ဦးထိန်လင်းနှင့်အတူ ပြည်သူများ က ယခုရက်ပိုင်းအတွင်း စတင်လိုက်ကြသည်။ All in One Piece Movement အဖွဲ့က ဦးဆောင်သည့် ဤလှုပ်ရှားမှုသည် မိခင်ဖြစ်သူ၏ ကျန်းမာရေး အခြေ အနေကို သားတစ်ဦးအနေဖြင့် သိရှိခွင့်ရရှိရန်ဟူသော အခြေခံလူသားအခွင့်အရေးအပေါ် မူတည်ကာ တောင်းဆိုထားခြင်း ဖြစ်သည်။ ကိုထိန်လင်းနှင့်အတူ မြန်မာ့အရေးလှုပ်ရှားနေသူများက ကုလသမဂ္ဂနှင့် အမေရိကန်အပါအဝင် နိုင်ငံတကာ အသိုင်းအဝန်းအနေဖြင့် စစ်အုပ်စုအပေါ် ဖိအားပေးရန်၊ အတုအယောင်ရွေးကောက်ပွဲကို အသိအမှတ်မပြုရန်နှင့် ပြည်သူကို ဗုံးကြဲနေသည့် လေယာဉ်ဆီတင်သွင်းမှုများကို ရပ်တန့်ပေးရန် တိုက်တွန်းထားသည်။ လက်ရှိတွင် ဒေါ်အောင်ဆန်းစုကြည်၏ သတင်းများကို စစ်အုပ်စုဘက်က လုံးဝအမှောင်ချထားသည့်အတွက် ၎င်း၏ အသက်အန္တရာယ်အတွက် ပြည်တွင်းပြည်ပရှိ ပြည်သူများက အထူးစိုးရိမ်ပူပန်နေကြသည်။ PPNM ၏ မှတ်တမ်းများအရ အာဏာသိမ်းကာလအတွင်း အကျဉ်းထောင်တွင်း ကျန်းမာရေးစောင့်ရှောက်မှု မလုံလောက်ခြင်းနှင့် ညှဉ်းပန်းနှိပ်စက်ခံရခြင်းတို့ကြောင့် နိုင်ငံရေးအကျဉ်းသား ၂၇၉ ဦးခန့် အသက်ဆုံးရှုံးခဲ့ရပြီး ဖြစ်သည်။ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများ ကွန်ရက် (PPNM) ဦးဆောင်ကော်မတီဝင် ကိုသိုက်ထွန်းဦးက “ကျနော်တို့ ပြည်သူလူထု တစ်ရပ်လုံးက ရောက်ရှိရာနိုင်ငံတွေမှာ ကြိုးစားနေကြသလိုပဲ၊ နိုင်ငံတကာ အသိုင်း အဝန်း အနေနဲ့လည်း ပိုပြီး လက်တွေ့ကျတဲ့ ဆောင်ရွက်မှုတွေ၊ မလွတ်လာခင်စပ်ကြားမှာ ကူညီစောင့်ရှောက်မှု တွေ ပိုပေးဖို့ အတွက် ကျနော်တို့ ရည်ရွယ်ပါတယ်” ဟု ပြောသည်။ AAPP ၏ ထုတ်ပြန်ချက်အရ လက်ရှိအချိန်ထိ ကလေးသူငယ် ၆၀၀ ကျော်အပါအဝင် နိုင်ငံရေးအကျဉ်းသား ၁၄,၀၀၀ ကျော် ဖမ်းဆီးချုပ်နှောင်ခံထားရဆဲ ဖြစ်သည်။ ထို့ကြောင့် နိုင်ငံတကာအနေဖြင့် စစ်အုပ်စုအား အသိအမှတ်မပြုရန်နှင့် လူသားမျိုးနွယ်အပေါ် ကျူးလွန်သည့် ရာဇဝတ်မှုများအတွက် တာဝန်ခံစေရေး အရှိန်မြှင့် ဆောင်ရွက်ပေးရန် Blue Shirt Movement က အလေး အနက် တိုက်တွန်းထားသည်။ ဓါတ်ပုံ - PPNM #ဒေါ်အောင်ဆန်းစုကြည် #နိုင်ကျဉ်း #PPNM #ကိုထိန်လင်း #စစ်အုပ်စု

ဒေါ်အောင်ဆန်းစုကြည်နှင့် နိုင်ကျဉ်းများ လွတ်မြောက်ရေး အဖွဲ့ ၅၉ ဖွဲ့ တောင်းဆို

ကြက်ခြေနီ အဖွဲ့အား အခြေအနေပြောပြသည့် နိုင်ကျဉ်း ရိုက်နှက်ခံရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၁၅ ရက်။ ICRC ထံ အခြေအနေများ တင်ပြသည့် နိုင်ငံရေး အကျဉ်းသားအား သာယာဝတီထောင် အာဏာပိုင်များ က ဝိုင်းဝန်းရိုက်နှက်ပြီး ဆေးကုသခွင့်ပါ ပိတ်ပင်ထားသည်။ ပဲခူးတိုင်း၊ သာယာဝတီ အကျဉ်းထောင်အတွင်း နိုင်ငံတကာ ကြက်ခြေနီ ကော်မတီ (ICRC) နှင့် တွေ့ဆုံစဉ် ထောင်တွင်းဖိနှိပ်မှုများကို တင်ပြခဲ့သည့် နိုင်ငံရေးအကျဉ်းသား ကိုမျိုးကျော်ထက် (ခ) သိုးသိုးမှာ အကျဉ်းထောင် အာဏာပိုင်များ၏ ဝိုင်းဝန်းရိုက်နှက်ခြင်းကို ခံလိုက်ရသည်။ ၎င်းသည် လက်ရှိတွင် ပြင်းထန်ဒဏ်ရာများဖြင့် တိုက်ပိတ်ခံထားရပြီး လိုအပ်သည့် ဆေးကုသခွင့်များလည်း ပိတ်ပင်ခံထားရကြောင်း မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် (PPNM) က ထုတ်ပြန်သည်။ ဖြစ်စဉ်မှာ ပြီးခဲ့သည့် ဖေဖော်ဝါရီလအစောပိုင်းတွင် ICRC အဖွဲ့ သာယာဝတီထောင်သို့ လာရောက်သည့် ခရီးစဉ် အတွင်း ကိုမျိုးကျော်ထက်က အကျဉ်းသားများ၏ ရပိုင်ခွင့်များ ဆုံးရှုံးနေမှုနှင့် ဖိနှိပ်ခံရသည့် အခြေအနေများကို တင်ပြခဲ့ခြင်း ဖြစ်သည်။ ထိုသို့ တင်ပြခဲ့မှုအပေါ် မကျေနပ်သည့်အတွက် ဖေဖော်ဝါရီလ ၇ ရက်နေ့တွင် အကျဉ်းဦးစီးအရာရှိ ကြည်ဖြိုးအောင် ဦးဆောင်သောအဖွဲ့က ကိုမျိုးကျော်ထက်ကို ပင်မအကျဉ်းထောင်အတွင်းသို့ ခေါ်ဆောင်သွား ကာ လူမဆန်စွာ ဝိုင်းဝန်းရိုက်နှက်ခဲ့ကြခြင်း ဖြစ်သည်။ PPNM ဦးဆောင်ကော်မတီဝင် ကိုသိုက်ထွန်းဦးက “အကျဉ်းသားဆိုတာ အခက်အခဲနဲ့ ကြုံတွေ့ရမှုတွေ တင်ပြမှု၊ လွတ်လပ်စွာ ထုတ်ဖော်ပြောဆိုခွင့် မရှိရင် အဲ့ဒီနိုင်ငံဟာ စစ်အာဏာရှင် အုပ်စိုးတဲ့ လူ့အခွင့်အရေး ဆိုးဝါးတဲ့နိုင်ငံ ဖြစ်ပါတယ်။ နိုင်ငံတကာလို အဖွဲ့အစည်းလိုမျိုး တင်ပြတာတောင် ဒီလိုဖြစ်တယ်ဆိုရင် ပုံမှန် အခြေအနေမှာ ဘယ်လောက်ထိ ဆိုးဝါးနေမလဲဆိုတာကို နိုင်ငံတကာအနေနဲ့ ပိုပြီးတော့မှ တွေးဆကြည့်လို့ရမယ်လို့ ပြောချင် ပါတယ်” ဟု ပြောသည်။ ထောင်ဝန်ထမ်းများ၏ ဝိုင်းဝန်းရိုက်နှက်မှုကြောင့် ကိုမျိုးကျော်ထက်မှာ မျက်နှာတစ်ခြမ်း ဖူးယောင်ညိုမဲခြင်း၊ နားအတွင်းမှ သွေးထွက်သံယိုဖြစ်ခြင်း စသည့် ပြင်းထန်ဒဏ်ရာများ ရရှိခဲ့သည်။ သို့သော်လည်း မတ်လလယ်အထိ ၎င်းအား ဆေးကုသခွင့်မပေးသည့်အပြင် အပြင်လူများနှင့်ပါ အဆက်အသွယ် ဖြတ်တောက်ထားသည်။ အကျဉ်းသားများက အဆိုပါ မတရားမှုကို အရေးယူပေးရန် တောင်းဆိုသည့်အခါတွင်လည်း အာဏာပိုင်များက လက်နက်များဖြင့် ခြိမ်းခြောက်ခဲ့သည်ဟု ဆိုသည်။ ကိုသိုက်ထွန်းဦးက ဆက်လက်၍ “ဒီပုံစံက ဘာကို သွားနေလဲဆိုတော့ Jungle Law ဥပဒေအရ ထောင်ထဲမှာ ထောင်အာဏာပိုင်တွေက လုပ်ချင်တာ လုပ်လို့ရတယ် အဲ့ဒါကို ထောက်ပြတဲ့ သူတွေပါ အန္တရာယ်ရှိနိုင်တယ် ဆိုတာမျိုးပေါ့နော်။ ဒါကို မသိချင်ယောင် ဆောင်ကြဖို့ဆိုတဲ့ သဘောမျိုး ရိုက်သွင်းနေတယ်လို့ ပြောချင်ပါ တယ်” ဟု ပြောသည်။ သာယာဝတီထောင်တွင် ပြီးခဲ့သည့် ဖေဖော်ဝါရီ ၂ ရက်နေ့ကလည်း နိုင်ငံရေးအကျဉ်းသား ၃ ဦးက စားသောက် ရေးနှင့် ကျန်းမာရေး အခက်အခဲများကို တင်ပြခဲ့ဖူးသည်။ လက်ရှိတွင် နိုင်ငံတကာ အဖွဲ့အစည်းများနှင့် တွေ့ဆုံတင်ပြမှုအပေါ် လက်တုံ့ပြန် ညှဉ်းပန်းနှိပ်စက်နေခြင်းမှာ အကျဉ်းသားများ၏ အသက်အန္တရာယ်ကို တိုက်ရိုက်ခြိမ်းခြောက်နေခြင်း ဖြစ်ပြီး သာယာဝတီထောင်တွင်းရှိ နိုင်ငံရေး အကျဉ်းသားများမှာ အကာအကွယ်မဲ့စွာဖြင့် စိုးရိမ်ထိတ်လန့်နေရကြောင်း PPNM က ဆိုသည်။ #PPNM #သာယာဝတီအကျဉ်းထောင် #ICRC #ကြက်ခြေနီအဖွဲ့

ကြက်ခြေနီ အဖွဲ့အား အခြေအနေပြောပြသည့် နိုင်ကျဉ်း ရိုက်နှက်ခံရ

စာရင်းပါပြီး လွတ်မလာသော နိုင်ကျဉ်းများ ရှိနေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၄ ရက်။ လွတ်ငြိမ်းစာရင်းပါသော်လည်း ပြန်လွတ်မလာသေးသည့် နိုင်ငံရေးအကျဉ်းသားများအတွက် မိသားစုဝင်များ က စိုးရိမ်ပူပန်နေကြသည်။ နိုင်ငံတစ်ဝန်းရှိ အကျဉ်းထောင်အသီးသီးတွင် အကြမ်းဖက်မှုတိုက်ဖျက်ရေး ဥပဒေပုဒ်မများဖြင့် ဖမ်းဆီးခံထား ရသူအများအပြားသည် လွတ်ငြိမ်းချမ်းသာခွင့် စာရင်းတွင် အမည်ပါဝင်သော်လည်း လက်ရှိအချိန်အထိ ပြန်လည် လွတ်မြောက်လာခြင်းမရှိသေးသဖြင့် မိသားစုဝင်များက စိုးရိမ်ပူပန်နေကြသည်ဟု မြန်မာနိုင်ငံလုံးဆိုင်ရာ နိုင်ငံရေး အကျဉ်းသားများ ကွန်ရက် (PPNM) က ထုတ်ပြန်ပြောဆိုလိုက်သည်။ မတ်လ ၂ ရက်နေ့တွင် ကျရောက်သည့် တောင်သူလယ်သမားနေ့ကို ဂုဏ်ပြုသောအားဖြင့်ဟုဆိုကာ စစ်ကော် မရှင်က နိုင်ကျဉ်း ၇,၀၀၀ ကျော်ကို လွတ်ငြိမ်းသက်သာခွင့်ပြုခဲ့သော်လည်း အမှန်တကယ် လက်တွေ့တွင် လွတ် မြောက်လာသူမှာ ထက်ဝက်ခန့်သာ ရှိသေးကြောင်း PPNM က ဆိုသည်။ အထူးသဖြင့် ဒိုက်ဦး၊ မြင်းခြံ၊ ပေါင်းတည်၊ မအူပင်၊ အိုးဘိုနှင့် အင်းစိန်အကျဉ်းထောင်တို့တွင် ပုဒ်မ ၅၀-ည နှင့် ၅၂-က တို့ဖြင့် ပြစ်ဒဏ်ကျခံနေရသူအများစုမှာ ပြန်လည်လွတ်မြောက်လာခြင်း မရှိသေးပေ။ ယင်းအခြေအနေနှင့်ပတ်သက်၍ PPNM ဦးဆောင်ကော်မတီဝင် မရောင်နီလင်းက “မနေ့ကတည်းက လွတ်ရ မယ့် ၅၂-က၊ ၅၀-ည တွေကို အခုအချိန်ထိ လွှတ်ပေးတာမျိုး မရှိဘူးပေါ့နော်။ ဗဟိုထောင်တွေမှာကအစ နာ မည် စာရင်းတွေ ပါပြီးတော့မှ ထောင်ထဲကို ပြန်ထည့်ထားတယ်လို့လည်း သိရတယ်။ ကျနော်တို့ ထုတ်ပြန် ထားတဲ့ အတိုင်းဆိုရင် ၃,၈၀၀ ဝန်းကျင်ပဲ ရှိသေးတယ်ပေါ့။ ဒါကို စစ်ကော်မရှင်ဘက်က ၇,၀၀၀ လွှတ်ပေး မယ်လို့ ပြောထားတာဖြစ်တဲ့အတွက် ထက်ဝက်လောက်ပဲ လွှတ်ပေးတဲ့ အခြေအနေမှာ ရှိပါသေးတယ်” ဟု ပြောသည်။ အထူးသဖြင့် ဒိုက်ဦးအကျဉ်းထောင်တွင် လွတ်ငြိမ်းခွင့်စာရင်းဝင် ၂၅၀ ခန့်ရှိသော်လည်း နိုင်ကျဉ်း ၂၀၀ ကျော်မှာ ယနေ့တိုင် အကျဉ်းထောင်အတွင်း ဆက်လက်ပိတ်လှောင်ခံထားရဆဲ ဖြစ်သည်။ ထိုသို့ စာရင်းပါသော်လည်း ပြန်မလွတ်လာသည့်အတွက် မိသားစုဝင်များမှာ သတင်းအမှန်ကို သိရှိနိုင်ရန် စိုးရိမ်တကြီး စောင့်ဆိုင်းနေကြရသည်။ မရောင်နီလင်းက ဆက်လက်၍ “တချို့မိဘတွေကတော့ အရမ်းတွေ စိတ်ပူနေတယ်။ တစ်ချို့မိသားစုဝင်တွေ ဆိုရင် စစ်ကော်မရှင်ဘက်က အတိအလင်း ထုတ်ပြန်ထားရဲ့သားနဲ့၊ သူတို့ဒီအမှုပဲ ရှိရဲ့သားနဲ့၊ ကိုက်ညီရဲ့သားနဲ့ ဘာလို့ လွတ်မလာသေးတာလဲဆိုပြီး စိတ်တွေ အရမ်းပူကြတယ်” ဟု ပြောသည်။ စစ်ကော်မရှင်၏ ထုတ်ပြန်ချက်ထဲတွင် ပုဒ်မ ၅၀-ည နှင့် ၅၂-က တို့ဖြင့် ပြစ်ဒဏ်ကျခံနေရသူ ၇,၃၃၇ ဦးကို လွတ်ငြိမ်းခွင့်ပေးခဲ့ပြီး၊ စစ်ဆေးဆဲအမှု ၉၅၃ မှုမှ တရားခံ ၁,၂၄၈ ဦးကိုလည်း အမှုပိတ်သိမ်းလွှတ်ပေးမည်ဟု ဆိုထားသည်။ သို့သော် PPNM ၏ အချက်အလက်အရ လက်ရှိအချိန်ထိ ၃,၆၁၃ ဦးသာ လွတ်မြောက်သေးသည်ကို တွေ့ရ သည်။ စစ်ကော်မရှင်၏ ယခုလုပ်ရပ်သည် နိုင်ငံတကာ၌ မျက်နှာသာရရန် လုပ်ဆောင်လေ့ရှိသည့် ဟန်ပြ ခြေလှမ်း တစ်ခုသာဖြစ်ကြောင်း ရာမညဖက်ဒရယ်အင်အားစုသစ် (NRFF) ၏ ပြောရေးဆိုခွင့်ရှိသူ နိုင်ပီတာက ထောက်ပြ ဝေဖန်လိုက်သည်။ “ဒါက နိုင်ငံတကာ ဖိအားပေးမှုရော၊ မျက်နှာသာရစေဖို့အတွက်ပါ သူတို့ လုပ်လေ့လုပ်ထ ရှိတာပါ။ ဒီနိုင်ငံရေးအကျဉ်းသားတွေက အစကတည်းက ဖမ်းဆီးခံသင့်တဲ့သူတွေ မဟုတ်ဘူး။ သူတို့ရဲ့ အဓမ္မ မတရား ဖမ်းဆီးထားတဲ့သူတွေ ဖြစ်တယ်။ ဒီကနေပြီးတော့ ပြန်လွှတ်လိုက်တယ်ဆိုတဲ့အပေါ်မှာ ကျေးဇူးတင်စရာ မရှိ ဘူး။ ဒါပေမဲ့ ပြန်လွတ်လာတဲ့သူတွေအတွက်တော့ ဝမ်းသာတယ်။ ကျန်ရှိနေသေးတဲ့သူတွေ လွတ်မြောက်ဖို့ အတွက်လည်း ကျနော်တို့အားလုံး ဝိုင်းဝန်းကြိုးစားဖို့ လိုတယ်” ဟု နိုင်ပီတာက သုံးသပ်ပြောဆိုသည်။ နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) ၏ နောက်ဆုံးထုတ်ပြန်ချက်အရ အာဏာ သိမ်းပြီးနောက်ပိုင်း ဖမ်းဆီးခံထားရဆဲ နိုင်ငံရေးအကျဉ်းသား ၂၂,၇၇၂ ဦးရှိနေပြီး၊ ၁၁,၅၃၆ ဦးမှာ ထောင်ဒဏ် ချမှတ်ခံထားရဆဲ ဖြစ်သည်။ PPNM ကမူ ပုဒ်မ ၅၀-ည၊ ၅၂-က ဖြင့် ကျခံနေရသူများသာမက အခြားသော နိုင်ငံရေးပုဒ်မများဖြင့် မတရား ဖမ်းဆီးခံထားရသူ အားလုံးကို ခြွင်းချက်မရှိ အမြန်ဆုံးလွှတ်ပေးရန် ဆက်လက်တောင်းဆိုထားသည်။ #PPNM #AAPP #နိုင်ငံရေးအကျဉ်းသား #လွတ်ငြိမ်းခွင့်

စာရင်းပါပြီး လွတ်မလာသော နိုင်ကျဉ်းများ ရှိနေ

ထောင်အာဏာပိုင်များ စီးပွားရှာမှု တိုးမြင့်လာနေ သတင်းနှင့် မီဒီဲယာကွန်ရက်။ ၂၀၂၆ ခုနှစ်၊ ဇန္နဝါရီလ ၂၃ ရက်။ စစ်ကိုင်းတိုင်းဒေသကြီး၊ ကလေးအကျဉ်းထောင်အတွင်း အာဏာပိုင်များ စီးပွားရှာနေမှုနှင့် လူ့အခွင့်အရေး ချိုးဖောက်မှုများ မြင့်တက်လာနေသည်ဟု နိုင်ငံရေး အကျဉ်းသားရေး စောင့်ကြည့်နေသူများက ပြောသည်။ ကလေးအကျဉ်းထောင်ရှိ ထောင်အာဏာပိုင်အချို့သည် တရားမဝင်ပစ္စည်းများအား ဈေးတင် ရောင်းချ ခြင်း၊ အကျဉ်းသားများအား ငွေညှစ်ခြင်းနှင့် ကိုယ်ထိလက်ရောက် နှိပ်စက်ခြင်းများ ကျူးလွန်ကာ အကျဉ်း ထောင်ကို ကိုယ်ကျိုးရှာ ဈေးကွက်တစ်ခုသဖွယ် အသုံးချနေကြောင်း မြန်မာနိုင်ငံလုံးဆိုင်ရာ အကျဉ်းသားများ ကွန်ယက် (PPNM) နှင့် ဒေသခံသတင်းရင်းမြစ်များထံမှ သိရသည်။ PPNM ပြောရေးဆိုခွင့်ရှိသူ မရောင်နီလင်းက “လာဘ်ပေးလာဘ်ယူလုပ်တာတွေ၊ အမြတ်တင်ပြီးတော့ ရောင်း ချနေတာမျိုးတွေ၊ တရားမဝင်ပစ္စည်းတွေကို သွင်းပေးပြီးတော့ တရားမဝင်ပစ္စည်းတွေကို သွင်းပေးတယ် ဆိုတာမှာ ဝန်ထမ်းတွေဆီကနေမှပဲ သွင်းလို့ရကြတာပေါ့နော်။ ဒီဝန်ထမ်းတွေက သွင်းပေးပြီးလို့ရှိရင်လည်း မတန်တဆတွေ ပြန်ပြီးတော့ ရောင်းချတယ်။ ပြောရမယ် ဆိုလို့ရှိရင် ထောင်ထဲမှာ စီးပွားရေးလုပ်နေကြ တာ မျိုး ဖြစ်ပါတယ်။ စီးပွားရေးလုပ်တဲ့အခါမှာလည်း အကျဉ်းသား/သူတွေရဲ့ ငွေတွေ၊ ပြီးလို့ရှိရင် ဒီနိုင်ငံရေး အကျဉ်းသား/သူတွေကို ခေါင်းပုံဖြတ်ပြီးတော့မှ ရောင်းချနေတာမျိုးတွေ ဖြစ်ပါတယ်” ဟု ပြောသည်။ ထောင်အာဏာပိုင်များက ကွမ်းပေါင်းနှင့် အကျဉ်းသားများ ကိုယ်တိုင်စိုက်ပျိုးထားသည့် သီးနှံများကို ဈေးနှုန်း ၃ ဆခန့်အထိ အမြတ်တင်ရောင်းချကာ အကျဉ်းသားများအပေါ် ခေါင်းပုံဖြတ်မှုများ ပြုလုပ်နေကြောင်း PPNM က ထုတ်ပြန်လိုက်သည်။ ကလေးအကျဉ်းထောင်အတွင်း ငွေကြေးမပေးဆောင်နိုင်သည့် အကျဉ်းသားများမှာ မြောင်းဖော်ခြင်း၊ တောင် ယာလုပ်ကိုင်ခြင်း၊ အိမ်သာဆေးခြင်းနှင့် အမှိုက်ရှင်းခြင်းစသည့် ပင်ပန်းသောအောက်ခြေသိမ်းအလုပ် (ဘောက်ဆင်း) များကို လုပ်ကိုင်နေရသည်။ ထိုသို့ လုပ်ကိုင်ရာမှ ထွက်ရှိလာသည့် ဟင်းသီးဟင်းရွက်နှင့် သီးနှံများကိုလည်း အာဏာပိုင်များက မတရားယူ ဆောင်ကာ ငွေကြေးတတ်နိုင်သည့် အကျဉ်းသားများထံ ပြန်လည်ရောင်းချနေကြောင်း နိုင်ကျဉ်းဟောင်းများက PPNM ကို ပြောသည်။ “ကလေးထောင်မှာက အခုက ထောင်အာဏာပိုင်တွေက စီးပွားရေးသမားတွေလို ဖြစ်နေတာ။ ပါဆယ်တွေ ကိုလည်း စစ်ဆေးတဲ့နေရာမှာ သူတို့လိုချင်တာကို ယူတယ်၊ ပြီးရင် အထဲမှာ အကျဉ်း သားတွေ စိုက်ထားတဲ့ ဟာကို အပြင်ဈေးထက် အများကြီးတင်ပြီး ပြန်ရောင်းစားနေတာ။ ငွေမရှိတဲ့သူတွေ ဆိုရင် ထောင်ထဲမှာ တော်တော်လေး ငတ်ငတ်ပြတ်ပြတ်နဲ့ ဒုက္ခရောက်နေကြရတယ်” ဟု ပြောသည်။ အဆိုပါ အကျဉ်းထောင်တွင် ကြီးကြပ်ရေးမှူးတစ်ဦးမှာ ရာထူးတိုးလာပြီးနောက်ပိုင်း အကျဉ်းသား များထံမှ ငွေညှစ်၍ အခန်းပြောင်းခြင်း၊ အိပ်ဆောင်ရွှေ့ခြင်းများ ပြုလုပ်ကာ လာဘ်ပေးလာဘ်ယူမှုများကို အထင်အရှား ကျူးလွန်နေကြောင်း အကျဉ်းဦးစီးနှင့် နီးစပ်သူများက ပြောသည်။ မရောင်နီလင်း၏ အဆိုအရ အဆိုပါ ကြီးကြပ်ရေးမှူးသည် ၎င်းကိုယ်တိုင် ကျူးလွန်ခြင်းမျိုး မဟုတ်ဘဲ မူးယစ်ဆေးဝါးမှုဖြင့် ကျခံနေရသူ တစ်ဦးကို လက်ပါးစေအဖြစ် အသုံးချကာ အရောင်းအဝယ်ပြုလုပ်ခြင်း၊ အခြားအကျဉ်းသားများထံ လာရောက်သည့် ပါဆယ်ပစ္စည်းများထဲမှ စားစရာများ ကို ယူခိုင်း၍ စားသောက်ခြင်းများ လုပ်ဆောင်နေကြောင်း သိရသည်။ မရောင်နီလင်းက “တရားမဝင် တင်သွင်းပြီးတော့ ရောင်းချတာမျိုးတွေက အကျဉ်းထောင်တိုင်းမှာ လိုလို ဖြစ်နေတယ်။ စီးပွားရှာ နေတယ်လို့ ကျနော်တို့အနေနဲ့ကတော့ မြင်ပါတယ်ပေါ့နော်။ ထပ်ပြီးတော့ ပြောရ မယ်ဆိုလို့ရှိရင်တော့ အကျဉ်း ထောင်တွေက စီးပွားရှာရမယ့် နေရာမဟုတ်ပါဘူး၊ စီးပွားရေးဈေးကွက်တစ်ခု မဟုတ်ပါဘူး” ဟု ဆက်ပြောသည်။ လက်ရှိတွင် ကလေးအကျဉ်းထောင်၌ စားနပ်ရိက္ခာ လုံလောက်မှုမရှိသည့်အပြင် နိုင်ငံရေးအကျဉ်းသား မိသားစု ဝင်များ ပို့ဆောင်သည့် ရိက္ခာများကိုလည်း အာဏာပိုင်များက ဖြတ်ယူစားသောက်နေသဖြင့် အခြေခံလူတန်းစား အကျဉ်းသားများအတွက် ပိုမိုခက်ခဲနေကြောင်း PPNM က ဆိုသည်။ အလားတူ ရန်ကုန်၊ အင်းစိန်အကျဉ်းထောင်တွင်လည်း အဆောင်မှူး ကျော်လင်းထွန်း ဆိုသူက အဆောင် စည်း ကမ်း အကြောင်းပြ၍ လာဘ်ယူခြင်းနှင့် ရိုက်နှက်နှိပ်စက်ခြင်းများ ကျူးလွန်နေကြောင်း PPNM က ထုတ်ပြန် ထားသည်။ #အကျဉ်းထောင် #နိုင်ငံရေးအကျဉ်းသား #PPNM #စစ်ကိုင်းတိုင်း #ထောင်အာဏာပိုင်

ထောင်အာဏာပိုင်များ စီးပွားရှာမှု တိုးမြင့်လာနေ

မြောင်းမြထောင်တွင် နိုင်ကျဉ်းသာမက ရာဇဝတ်သားများပါ ငွေညှစ်ခံနေရ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၁၆ ရက်။ ဧရာဝတီတိုင်း၊ မြောင်းမြအကျဉ်းထောင်တွင် ထောင်အာဏာပိုင်များက နိုင်ငံရေးအကျဉ်းသားများသာမက ရာဇဝတ် အကျဉ်းသားများကိုပါ ရိုက်နှက်အကြမ်းဖက်မှုနှင့် ငွေညှစ်တောင်းခံမှုများ လုပ်နေသည်ဟု မြန်မာ နိုင်ငံလုံးဆိုင်ရာ နိုင်ငံရေးအကျဉ်းသားများကွန်ယက် (PPNM) က ထုတ်ပြန်သည်။ အကျဉ်းသားများ၏ အသက်အန္တရာယ်ကို ခြိမ်းခြောက်နိုင်သည့် လုပ်ရပ်များအထိ ပါဝင်နေပြီး၊ ဒုထောင်ပိုင် အပါအဝင် ထောင်ဝန်ထမ်းအချို့သည် အရက်သေစာ သောက်စားမူးယစ်ကာ အကျဉ်းသားများကို လေးခွများ ဖြင့် ပစ်ခတ်မှုများပါ ပြုလုပ်နေကြောင်း ထောင်နှင့်နီးစပ်သူများက ပြောသည်။ PPNM ပြောရေးဆိုခွင့်ရှိသူ မလင်း က “ဘယ်လို ပြောလို့ရလဲ ဆိုလို့ရှိရင် အပြင်ဘက်ကနေမှ လေးဂွနဲ့ ပစ်တာ ဆိုလို့ရှိရင် အထဲထဲတွေရော ထိတယ် ပေါ့နော်။ အဲ့ဒီအိပ်ဆောင်တွင်းထဲမှာ ဒီ အကျဉ်းသား၊ နိုင်ငံရေး အကျဉ်း သားရယ်လို့ မကွဲတော့ဘဲနဲ့ အပြင်ကနေမှ ဟို ပစ်တဲ့ပုံစံမျိုးဆိုတော့လေ။ တခြားအကျဉ်းသားတွေလည်း ရိုက် နှက်ခံနေရတာမျိုးလည်း ဖြစ်ပါတယ်” ဟု ပြောသည်။ PPNM ၏ ထုတ်ပြန်ချက်အရ မြောင်းမြထောင်တွင် ထောင်ဝန်ထမ်းများဖြစ်သော တပ်ကြပ်ကြီး ဦးမြင့်ချို၊ တပ်သား ဦးရဲဝေထွန်း နှင့် ဦးမြတ်မင်းအောင် တို့က ဦးဆောင်ကာ မိသားစုဝင်များထံမှ အကြောင်းပြချက်မရှိ ငွေကြေးများ ကောက်ခံနေကြသည်။ ငွေကြေးမပေးနိုင်သည့် အကျဉ်းသားများမှာ အခန်းပြောင်းခြင်း၊ အဆောင်ပြောင်းခြင်းများ ပြုလုပ်ကြရပြီး၊ ယင်းသို့ ကောက်ခံရရှိသည့် ငွေကြေးများမှာ အကျဉ်းသားများထံသို့ မရောက်ရှိကြောင်း ဖော်ထုတ်ထားသည်။ ထိုသို့ ငွေတောင်းခံရာတွင် အိပ်ဆောင်မှူးများဖြစ်ကြသည့် ဝန်ထမ်း ဦးမျိုးသက်အောင် (အိပ်ဆောင် ၂)၊ ဦးရဲဟိန်း နှင့် ဦးအောင်ထက် (အိပ်ဆောင် ၃)၊ ဦးစိုးရန်နိုင်၊ ဦးပြောင်ကြီး နှင့် ဦးထက်ဝေကို (အိပ်ဆောင် ၅ နှင့် ၆) တို့လည်း ပူးပေါင်းကူညီနေသည်ဟု ဆိုသည်။ မြောင်းမြထောင် ဒုထောင်ပိုင် ဦးတင့်ဆွေဝင်း သည်လည်း သောက်စားမူးယစ်သည့်အခါများ၌ အကျဉ်းသား များအား စိန်ခေါ်၍ လေးခွဖြင့် ပစ်ခတ်သောင်းကျန်းလေ့ရှိပြီး၊ ကျန်တပ်သားများကိုလည်း ၎င်းအတိုင်း ပြုမူစေ သည်ဟု ထောင်နှင့်နီးစပ်သူများက ပြောသည်။ ထို့ပြင် တပ်သား ဦးမြတ်မင်းအောင်ဆိုသူကလည်း မူးယစ်လာပါက တောင်ယာလုပ်ကိုင်သည့် အကျဉ်းသားများ အား အနိုင်ကျင့်နှိပ်စက်သည်ဟု ဆိုသည်။ အာဏာပိုင်များသည် ထောင်တွင်း ရာဇဝတ်သားများကိုပင် ခန့်အပ်ကာ အခြားအကျဉ်းသားများအား နှိပ်စက်ခိုင်း စေနေကြောင်း မလင်းက ဆက်ပြောသည်။ “ဒီလက်ပါးစေတွေပေါ့နော်။ အကျဉ်းသားတွေကို သူတို့က မွေးမြူထားလိုက်တယ်ပေါ့နော်။ သူတို့ရဲ့ ဘက် တော်သားအဖြစ် အဲ့ဒီမှာ အကျဉ်းသားတွေကမှ တစ်ဆင့် နိုင်ငံရေးအကျဉ်းသားတွေကို နှိပ်စက်တာမျိုးတွေ လည်း ကြုံနေရတာ ဖြစ်တဲ့အတွက် မြောင်းမြထောင်အတွက်ကို အားလုံးဝိုင်းဝန်းပြီးတော့ပေါ့နော် သတင်း ထုတ်ပြန် ပေးကြဖို့၊ ရပ်တည်ပေးကြဖို့ အတွက် PPNM ဘက်ကနေမှ တိုက်တွန်းနှိုးဆော်အပ်ပါတယ်။” ထောင်တွင်းဈေးဘားတွင် ရောင်းချသည့်နေရာ၌ အပြင်ဈေးထက် သုံးဆခန့် ဈေးတင်ရောင်းချပြီး ထောင် အာဏာပိုင်များအတွက် ငွေရှာပေးနေသူမှာ သူရမြင့်လွင် (ခ) သားလေး ဆိုသူဖြစ်ပြီး၊ ၎င်းသည် ပုသိမ်ထောင် တွင် မူးယစ်ဆေး ရောင်းချမှုဖြင့် ပြောင်းရွှေ့လာသူဖြစ်သည်ဟု ဆိုသည်။ ထို့ပြင် ထောင်တွင်း တန်းစီနေရာများအတွက် လာဘ်ထိုးရလေ့ရှိရာ၊ ယခုလက်ရှိ တစ်လလျှင် ကျပ်သိန်း ၅၀ ခန့် ရှာဖွေပေးနေသူများမှာ လူသတ်မှု၊ မုဒိန်းမှုဖြင့် သေဒဏ်ကျခံနေရသည့် မင်းထက် (ခ) ဘိုကြီး နှင့် ခန့်ဝေ တို့ ဖြစ်ကြောင်း စုံစမ်းသိရှိရသည်ဟု PPNM က ဆိုသည်။

မြောင်းမြထောင်တွင် နိုင်ကျဉ်းသာမက ရာဇဝတ်သားများပါ ငွေညှစ်ခံနေရ

ထားဝယ်ထောင်တွင် နိုင်ကျဉ်းတစ်ဦး သေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၈ ရက်။ တနင်္သာရီတိုင်း၊ ထားဝယ်မြို့ရှိ အကျဉ်းထောင်တွင် အသက် ၄၈ နှစ်အရွယ် နိုင်ငံရေး အကျဉ်းသား ဖြစ်သူ ကိုအောင်ကိုဦး သေဆုံးသွားသည်ဟု မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ယက် (PPNM)က ထုတ်ပြန်သည်။ သေဆုံးချိန်တွင် ပြင်ပ ဆေးရုံတွင် ကုသခွင့်ရခဲ့သော်လည်း အကျဉ်းထောင်တွင်း လုံလောက်သည့် ကျန်းမာရေးစောင့်ရှောက်မှု မရရှိခြင်းကြောင့် နှလုံး၊ ဆီးချို၊ ကျောက်ကပ် ရောဂါများဖြင့် သေဆုံးခဲ့ရခြင်း ဖြစ်သည်ဟု PPNM က ပြောသည်။ PPNM ဦးဆောင် ကော်မတီဝင် ကိုသိုက်ထွန်းဦးက “မကျဆုံးခင်မှာ အကျဉ်းထောင် ပြင်ပမှာရှိတဲ့ ဆေးရုံကို တက်ရောက် ကုသခွင့် ရပါတယ်။ ဘာလို့လဲဆိုတော့ ထားဝယ်အကျဉ်းထောင်မှာ ထောင်ဆေးရုံ မရှိဘဲနဲ့ ဆရာ ဝန်လည်း မရှိဘူးပေါ့။ ဒါကြောင့်မို့လို့ ကျန်းမာရေး မကောင်းတဲ့လူ၊ နာတာရှည်သမားတွေ အတွက်ကတော့ ထောင်ထဲမှာ ကုသနိုင်တဲ့ အခြေအနေ မရှိတဲ့အတွက် ပြင်ပဆေးရုံကို ပို့ဆောင်ပြီးမှ ကုသခွင့်ရပြုနေရတဲ့ အခြေ အနေတစ်ခု ဖြစ်ပါတယ်ခင်ဗျာ။ အဲတော့ ဆုံးသွားတာကလည်း အကျဉ်းထောင်ပြင်ပမှာ ဆုံးသွားတယ်လို့ စုံစမ်း သိရှိရပါတယ် ခင်ဗျာ” ဟု ပြောသည်။ ၎င်းမှာ ရောဂါခံကြောင့် မသေဆုံးမီကတည်းက မကြာခဏ ဆေးကုသမှု ခံယူနေရပြီး အောက်တိုဘာလ ၃ ရက်နေ့၌ ရုတ်တရက် ရောဂါဖောက်၍ သေဆုံးခဲ့ရသည်ဟု ဆိုသည်။ အကျဉ်းထောင်တွင်းရှိ တာဝန်ရှိသူများ အနေဖြင့် အကျဉ်းသားများအား လုံလောက်သည့် ကျန်းမာရေး စောင်ရှောက်မှုကို အချိန်နှင့် တပြေးညီ ပေးရန်လိုအပ်နေသည်ဟု ကိုသိုက်ထွန်းဦးက အကြံပြုသည်။ “အဓိကအားဖြင့် ထောင်တွင်းသေဆုံးမှု လျော့ကျဖို့အတွက်ဆိုရင် လက်ရှိအခြေအနေမှာ လက်တွေ့ကျကျ ဆောင်ရွက်နိုင်မယ့်သူတွေက အကျဉ်းထောင် အောက်မှာ ရှိနေတဲ့ အကျဉ်းဦးစီး ဝန်ထမ်းတွေနဲ့ ထောင်ဆရာဝန် တွေ ဖြစ်ပါတယ်။ အဲတော့ အကျဉ်းထောင်ထဲမှာ လုံလောက်တဲ့ ကျန်းမာရေး စောင့်ရှောက်မှုကို ပေးမယ်။ အရေးပေါ် ဖြစ်နေတဲ့သူတွေကို ထောင်ပြင်ပဆေးရုံတွေကို အချိန်နဲ့ တပြေးညီ ပို့မယ်။ ရောဂါနည်းနည်း သက် သာလာရင် ထောင်ကို ခေါ်ပြန်တာထက်စာရင် ရောဂါပျောက်ကင်းနိုင်လောက်အောင် လုံးဝကင်းရှင်းသွား အောင်အထိ ကုသခွင့် ရရှိအောင် စီမံပေးတာမျိုးတွေပေါ့နော်။” ထို့အပြင် ကိုသိုက်ထွန်းဦးက “ပြီးတော့ ထောင်ထဲမှာပဲ အကျဉ်းသား အခွင့်အရေးပေါ့နော်။ ကျနော်တို့ ပိုပြီး တော့မှတော့ မတောင်း ပါဘူး။ အကျဉ်းသား အခွင့်အရေးကို ပြည့်ပြည့် ဝဝ ပေးဖို့ပေါ့နော်” ဟု အကြံပြုထား သည်။ ကိုအောင်ကိုဦးမှာ ၂၀၂၁ ခုနှစ် စစ်အာဏာသိမ်းသည့် အစောပိုင်းကာလများ အတွင်း ဦးဆောင်သပိတ် လှုပ်ရှား ခဲ့သူ တစ်ဦး ဖြစ်ပြီး ယင်းနှစ် မေလ ၁၄ ရက်နေ့၌ ဖောက်ခွဲရေး ပစ္စည်းများနှင့်အတူ ဖမ်းဆီးခံခဲ့ရခြင်း ဖြစ်သည်။ ထို့နောက် စစ်ကော်မရှင်က ပုဒ်မ ၅၀၅ - က/ ပေါက်ကွဲ - ၅ တို့ဖြင့် ထောင်ဒဏ် ၈ နှစ် ချမှတ်ခဲ့ပြီးနောက် လျှော့ ရက်များဖြင့် လွတ်ငြိမ်းချမ်းသာခွင့် ရမည့်ဆဲဆဲ အခြေအနေတွင် ထိခိုက်သေဆုံးခဲ့ရခြင်း ဖြစ်သည်။ တနင်္သာရီတိုင်းမှ နိုင်ကျဉ်းများအား ထားရှိသည့် ထားဝယ် အကျဉ်းထောင်တွင် အိုးဘို၊ သာယာဝတီ၊ သရက် စသည့်ထောင်များကဲသို့ အခြေအနေ ဆိုးရွားခြင်း မရှိဘဲ လက်ရှိ၌လည်း ထောင်ဝင်စာခွင့်ပြုသည့် အခြေအနေ ရှိသည်ဟု ထောင်နှင့် နီးစပ်သူများက ပြောသည်။

ထားဝယ်ထောင်တွင် နိုင်ကျဉ်းတစ်ဦး သေဆုံး

နိုင်ကျဉ်းများ အကျဉ်းထောင်များအတွင်း ဆက်လက် သေဆုံးနေ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၂၄ ရက်။ မြန်မာနိုင်ငံတစ်ဝန်း အကျဉ်းထောင်များတွင် လုံလောက်သော ဆေးကုသခွင့် မရသည့်အတွက် ယခုနှစ်အတွင်း နိုင်ငံရေး အကျဉ်းသား၊ အကျဉ်းသူ စုစုပေါင်း အယောက် ၂၀ ဦးအသက်ဆုံးရှုံးခဲ့သည်ဟု မြန်မာနိုင်ငံလုံးဆိုင်ရာ နိုင်ငံရေး အကျဉ်းသားများ ကွန်ရက် PPNM က ပြောသည်။ ယခုနှစ် ဇန္နဝါရီလမှ စက်တင်ဘာလ ၁၉ ရက်နေ့အထိ အကျဉ်းထောင်များ အတွင်း ဆေးဝါးစောင့်ရှောက်မှု လုံ လောက်စွာ မပေးခြင်း၊ အချိန်မီ ဆေးကုသခွင့် မပေးခြင်းတို့ကြောင့် နိုင်ငံရေးအကျဉ်းသား၊ အကျဉ်းသူ အနည်း ဆုံး အယောက် ၂၀ ဦးအသက် ဆုံးရှုံးခဲ့သည်ဟု PPNM က မှတ်တမ်းတင်ထားသည်။ (PPNM) ၏ ဦးဆောင် ကော်မတီဝင် ကိုသိုက်ထွန်းဦးက “လုံလောက်တဲ့ ကျန်းမာရေးစောင့်ရှောက်မှု မပေးနိုင် တာ၊ ဆေးဝါးတွေ ပြတ်လပ်တာ၊ ပြင်ပဆေးရုံတွေကို အချိန်နဲ့တပြေးညီ မပို့တာတွေကြောင့်မို့လို့ နိုင်ငံရေး အကျဉ်းသားတွေ သေဆုံးနေရပါတယ်။ အဆိုးဆုံး ဒီနှစ်ထဲမှာ သေဆုံးနေတဲ့ ထောင်ဆိုရင်တော့ မန္တလေး အိုးဘို အကျဉ်းထောင် ဖြစ်ပါတယ်” ဟု ပြောသည်။ ဆေးကုသခွင့် မရရှိမှုကြောင့် အသက်ဆုံးရှုံးခဲ့ရသည့် နိုင်ငံရေး အကျဉ်းသား၊ အကျဉ်းသူ အယောက် ၂၀ ဦးတို့ သည် မန္တလေး အိုးဘိုအကျဉ်းထောင်၊ ဒိုက်ဦး၊ မြောင်းမြ၊ သာယာဝတီ၊ ကော့သောင်း၊ ပေါင်းတည်၊ အင်းစိန်၊ ရမည်းသင်းနှင့် သရက်အကျဉ်းထောင်တို့မှ ဖြစ်သည်ဟု ဆိုသည်။ ထို နိုင်ငံရေး အကျဉ်းသား၊ အကျဉ်းသူ အများစုသည် သွေးတိုး၊ ဆီးချို၊ အသည်း၊ နှလုံး၊ အစာအိမ်၊ ကျောက် ကပ်၊ ပန်းနာရင်ကြပ်နှင့် အမောဖောက်ခြင်း စသည့် ကျန်းမာရေး အခြေအနေများကို ခံစားရပြီး ဆေးဝါးစောင့် ရှောက်မှု အချိန်မှီ မရရှိမှုကြောင့် အသက်ဆုံးရှုံးခဲ့ကြရသည်ဟု ကိုသိုက်ထွန်းဦး က ပြောသည်။ “အထူးသဖြင်တော့ ထောင်တွင်းကျန်းမာရေးကြောင့် ဆုံးတယ်ဆိုပေမဲ့ ထောင်တွင်း ကျန်းမာရေး စောင့်ရှောက် မှု လုံလောက်စွာမရရှိလို့ အသက်သေဆုံးခဲ့ရတယ် ဆိုရင် ပိုပြီးတော့မှ မှန်ကန်တယ်။ ထောင်တစ်ထောင်မှာ ဆရာဝန် အင်အားဟာ ၃ ဦးကနေ ၅ ဦးအထိ ရှိပါတယ်။ အင်းစိန်လိုမျိုး သောင်းဂဏန်း ဝန်းကျင်ရှိတဲ့ အကျဉ်း သားတွေကို ထိထိရောက်ရောက် ကာဗာဖြစ်အောင် ကုသပေးဖို့ အတွက်ဆိုရင် အင်မတန်ကိုမှ အခက်အခဲ ရှိတဲ့ အခြေအနေ ဖြစ်ပါတယ်။” မကွေးတိုင်း၊ သရက်အကျဉ်းထောင်တွင် ညွှန်မှူးလမ်းကြောင်းရှိနေ၍ အရေးပေါ်လူနာကို ထောင်အာဏာပိုင် များ က အချိန်မီ ဆေးကုသခွင့် မ‌ပေးခဲ့သဖြင့် နိုင်ငံရေး အကျဉ်းသား ကိုကျော်လင်းအောင် သည် စက်တင်ဘာလ ၁၇ ရက်နေ့၊ ညနေပိုင်းတွင် မသေဆုံးသင့်ဘဲ သေဆုံးခဲ့ရသည်ဟု PPNM က ဆိုသည်။ အဆိုပါ သရက်အကျဉ်းထောင်ရှိ ထောင်ပိုင် ဦးစိုးနောင်သည် နိုင်ငံရေး အကျဉ်းသားများ‌ အပေါ် အကျဉ်းထောင် ဥပဒေကို လက်တစ်လုံးခြား လုပ်ကာ ဖိနှိပ်မှုများကိုလည်း စနစ်တကျ ကျူးလွန်နေသည်ဟု PPNM က ဆိုသည်။ အကျဉ်းထောင်များ အတွင်း အကျဉ်းသူ/သားများအား ဆေးဝါးကုသခွင့် မပေးခြင်းသည် လူသား တစ်ယောက် ရရှိရမည့် အသက်ရှင်သန်ပိုင်ခွင့်ကို အတိအလင်း ချိုးဖောက်‌နေခြင်းဖြစ်သည် ဟု ကိုသိုက်ထွန်းဦးက ဆက် ပြော သည်။ “အထူးသဖြင့် အကျဉ်းထောင်ထဲမှာ ရှိတဲ့ အကျဉ်းသားတွေဟာ အကျဉ်းသား အခွင့်အရေးရော လူ့အခွင့် အရေး ရော ဆုံးရှုံးနေတဲ့ အခြေအနေ တစ်ခု ဖြစ်ပါတယ်။ ဒါကြောင့်မို့လို့ ထောင်ထဲမှာရှိတဲ့ လက်ရှိ ပြည်သူ လူထု ခေါင်းဆောင် ဒေါ်အောင်ဆန်းစုကြည် အပါအဝင် နိုင်ငံရေး အကျဉ်းသားတွေရဲ့ အသက်ရှင်သန် ပိုင်ခွင့်ကို အဆိုး ဝါးဆုံး ခြိမ်းခြောက်ခံရတဲ့ အခြေအနေမှာ ရောက်နေတယ်လို့ ပြောချင်ပါတယ်။ အဲ့တော့ အကျဉ်းထောင်ထဲမှာ ရှိတဲ့ နိုင်ငံရေးအကျဉ်းသားတွေကိုလုံလောက်တဲ့ ကျန်းမာရေးစောင့်ရှောက်မှု မပေးတာ အကျဉ်းသားတွေ အရေးပေါ်ဖြစ်တဲ့ အခြေအနေမှာ နိုင်ငံရေး အကျဉ်းသားတွေကို ပြင်ပဆေးရုံ မထုတ်တာဟာ တစ်ဖက်ကနေ နိုင်ငံရေး အကျဉ်းသားတွေ အသက်သေဆုံးအောင် သတ်ဖြတ်နေခြင်း ဖြစ်ပါတယ်။” နိုင်ငံရေး အကျဉ်းသားများ အပါအဝင် အခြား အကျဉ်းသားများသည် အကျဉ်းထောင်ထဲတွင် အကျဉ်းသား တစ်ဦး ရရှိရမည့် အခွင့်အရေးများ ဆုံးရှုံးနေရသည်။ အထူးသဖြင့် အခြေခံ အကျဆုံးဖြစ်သည့် စားသောက်နေထိုင်ရေးနှင့် ကျန်းမာစွာ ထောင်တွင်းတွင် အသက်ရှင် နေထိုင်ရေးသည် အပြည့်အဝ ရရှိရမည် ဖြစ်သော်လည်း လက်ရှိ မြန်မာနိုင်ငံတွင် ချိုးဖောက် ခံနေရသည့် အခြေအနေ တစ်ခု ဖြစ်နေသည်ဟု ကိုသိုက်ထွန်းဦးက ပြောသည်။ အကျဉ်းထောင်များတွင် အကျဉ်းသား အခွင့်အရေးနှင့် လူ့အခွင့်အရေး ချိုးဖောက်မှုများတွင် အဓိက ကျူးလွန် နေသူများ၊ ပါဝင်နေသူများအနေဖြင့် ရပ်တန်းမှရပ်ရန် PPNM ဆိုသည်။ တာဝန်ယူမှု၊ တာဝန်ခံမှုမရှိဘဲ ဆက်လက်ကျူးလွန်နေပါက ကျူးလွန်သူများကို ဆက်လက် ဖော်ထုတ်သွားမည် ဖြစ်ပြီး နိုင်ငံရေး အကျဉ်းသူ/သားများ အတွက် တရားမျှတမှု အပြည့်အဝရရှိရေး ဆောင်ရွက်သွားမည် ဖြစ် ကြောင်း PPNM က စက်တင်ဘာလ ၁၉ ရက်နေ့ တွင် သတိပေးထုတ်ပြန်ထားသည်။

နိုင်ကျဉ်းများ အကျဉ်းထောင်များအတွင်း ဆက်လက် သေဆုံးနေ

နိုင်ငံရေး အကျဉ်းသူများ အရေပြားရောဂါ ပြင်းထန်စွာ ဖြစ်ပွားနေဟု WOPP ပြော သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၇ ရက်။ နိုင်ငံတစ်ဝန်းရှိ အကျဉ်းထောင်များတွင် နိုင်ငံရေး အကျဉ်းသူ အများအပြား အရေပြားရောဂါ ဆိုးရွားစွာ ခံစားနေရပြီး တစ်ကိုယ်ရေသုံး ပစ္စည်းများနှင့် ဆေးဝါးများလိုအပ်နေသည်ဟု နိုင်ငံရေးအကျဉ်းသူများ အဖွဲ့ - WOPP က ပြောသည်။ နိုင်ငံရေးအကျဉ်းသူများ အဖွဲ့- WOPP၏ ပြန်ကြာရေးတာဝန်ရှိသူ မစုမြတ်က “အဓိကအဖြစ်များတဲ့ အရေပြား ရောဂါကတော့ ထောင်ထဲမှာလက်ရှိကတော့ ဝဲနဲ့ ပွေးကတော့ အဓိက အဖြစ်များပါတယ်ရှင့်။ အကျဉ်းထောင် တိုင်း လိုလိုမှာ ဖြစ်နေတာရှင့်။ မိုးတွင်းကာလမှာ ပိုပြီး‌တော့ ဆိုးလာတဲ့ အခြေအနေတွေ ရှိလာတယ်။ ဘယ်လို ဆိုးလာလည်း ဆိုရင် ၇၀ ရာခိုင်နှုန်းလောက် အထိကို အရေပြားရောဂါ ကူးစက်ခံနေရတယ် ဆိုတာသိရတယ်” ဟု ပြောသည်။ အကျဉ်းထောင် အသီးသီးတွင် ရေမသန့်ရှင်းမှု၊ ရက်လွန် သို့မဟုတ် နှစ်လွန်ဆေးဝါးများ ပေးမှု၊ မိသားစုများမှ ပို့ပေးသည့် ဆေးဝါးများ မရရှိမှု၊ နေရာမသန့်ရှင်းမှုနှင့် နေရာကြပ်တည်းမှု စသည်တို့ကြောင့် နိုင်ငံရေး အကျဉ်းသူများသည် အရေပြား ကူးစက်ရောဂါ ပိုမိုဖြစ်ပွားလာခြင်းဖြစ်သည်ဟု မစုမြတ်က ဆက်ပြောသည်။ “ရေချိုးရင်လည်း ဒီနေရာမှာပဲ ချိုးရတယ်။ ဒါပေမဲ့ ချိုးရတဲ့နေရာမှာလည်း လူအများနဲ့ ချိုးရတယ်။ ချိုးရေ တွေက လုံလောက်မှုမရှိဘူး။ အဲ့ခါကြတော့ တစ်ယောက်နဲ့ တစ်ယောက် ပြန်ပြီးတော့ ကူးစက်နိုင်ခြေက အရမ်း များတယ်။ ဒါ့အပြင် ပြန်ပြီးတော့ အိပ်တဲ့နေရာရော စားတဲ့နေရာရော ဒီတစ်နေရာတည်း ဖြစ်နေတဲ့ အခြေ အနေကြောင့်လည်း ပိုပြီးတော့ မသန့်ရှင်းတာကြောင့် ပိုဆိုးလာတာတွေ့ရတယ်ရှင့်။” မိသားစုများမှ ပေးပို့သည့် ဆေးဝါးများတွင် ပုလင်းနှင့်ထည့်ထားသော ဆေးဝါးများကို ထောင်တွင်းသို့ ပေးသွင်း ခွင့်မပြုခြင်း၊ ထောင်ဝန်ထမ်းများ သိထားသော ဆေးဝါးများ မဟုတ်ခဲ့ပါက အကျဉ်းထောင် ဆရာဝန်နှင့် စစ်ဆေး ခြင်း မလုပ်ဘဲ ပေးသွင်းခွင့်မပြုခြင်းတို့ကြောင့် ကူးစက်မှုများ ပိုဆိုးလာခြင်း ဖြစ်သည်ဟု ဆိုသည်။ ထို့အပြင် ဖြစ်ပေါ်နေသည့် ရောဂါများကို စစ်ဆေးခြင်း မလုပ်ဘဲ အဖျားပျောက်ဆေး၊ အကိုက်အခဲပျောက်ဆေး အနေဖြင့် အသုံးများသည့် Paracetamol ကိုသာပေး၍ ကုသခြင်းတို့ကြောင့် ရောဂါများ၊ ကူးစက်ခြင်းများ ပိုမို ဆိုးရွာလာသည်ဟုလည်း ဆိုသည်။ နိုင်ငံတစ်ဝန်းရှိ အကျဉ်းထောင်များတွင် အရေပြားကူးစက် ရောဂါ ဖြစ်ပွားမှုမှာ ပြီးခဲ့သည့် ဇွန်လကတည်းက စတင်ဆိုးရွာလာခဲ့ခြင်း ဖြစ်သည်ဟု WOPP က ပြောသည်။ အကျဉ်းထောင်များတွင် နိုင်ငံရေး အကျဉ်းသူများအတွက် သန့်ရှင်းသည့် နေရာထိုင်ခင်း၊ သန့်ရှင်းသည့် သောက် သုံးရေ၊ ကျန်းမာရေးနှင့် ညီညွှတ်သည့် အစားအသောက်များ၊ တစ်ကိုယ်ရေသုံး ပစ္စည်းများ၊ ဆေးဝါး၊ လစဉ်သုံး ပစ္စည်းများနှင့် အတွင်းခံများ အဓိက လိုအပ်နေသည်ဟု ဆိုသည်။ နိုင်ငံတစ်ဝန်းရှိ အကျဉ်းထောင်များထဲတွင် WOPP ၏ စာရင်းအရ နိုင်ငံရေးအကျဉ်းသူ စုစုပေါင်း အယောက် ၆,၀၀၀ ကျော်ရှိသည်ဟု သိရသည်။

နိုင်ငံရေး အကျဉ်းသူများ အရေပြားရောဂါ ပြင်းထန်စွာ ဖြစ်ပွားနေဟု WOPP ပြော

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

အမေရိကန်က အီရန်မြို့ကြီးအများအပြားကို ကိုးညမြောက်အဖြစ် ဆက်တိုက်ဗုံးကြဲတိုက်ခိုက် — July 20, 2026 3:02 pm
နျူကလီးယားလက်နက် ပိုင်ဆိုင်ရေး နိုင်ငံအတွင်း ပွင့်လင်းစွာဆွေးနွေးရန် လိုအပ်ကြောင်း ဂျပန်ကာကွယ်ရေးဝန်ကြီး ပြော — July 20, 2026 2:50 pm
ထိုင်ဝမ်ကျွန်း တရုတ်လက်အောက်ခံဖြစ်မသွားရေးကာကွယ်ကြရန်သမ္မတ လိုင်ချင်းတယ် တိုက်တွန်း — July 20, 2026 2:43 pm

Recent Posts

ငွေဆောင်တွင် တောဆင်ရိုင်းဝင်တိုက်၊ မိသားစု ၃ ဦးသေဆုံး
အာဏာသိမ်းကာလအတွင်း နိုင်ကျဉ်း ၁၄၈ ဦး သေဆုံး
အမေရိကန်က အီရန်မြို့ကြီးအများအပြားကို ကိုးညမြောက်အဖြစ် ဆက်တိုက်ဗုံးကြဲတိုက်ခိုက်
နျူကလီးယားလက်နက် ပိုင်ဆိုင်ရေး နိုင်ငံအတွင်း ပွင့်လင်းစွာဆွေးနွေးရန် လိုအပ်ကြောင်း ဂျပန်ကာကွယ်ရေးဝန်ကြီး ပြော
ထိုင်ဝမ်ကျွန်း တရုတ်လက်အောက်ခံဖြစ်မသွားရေးကာကွယ်ကြရန်သမ္မတ လိုင်ချင်းတယ် တိုက်တွန်း

Archives

Archives

×Close