March 2026 – Page 8 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Monthly Archive

Archive: March 2026

Mar 18

ဘန်ကောက်တွင် စာသင်ခန်းအတွင်း ဖုန်းမသုံးရန် တားမြစ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၁၈ ရက်။ ဘန်ကောက်မြို့တော် အုပ်ချုပ်ရေး အဖွဲ့ (BMA) က ၎င်းတို့ လက်အောက်ရှိ စာသင်ကျောင်း ၄၀၀ ကျော်တွင် စာသင်ခန်းအတွင်း စမတ်ဖုန်းအသုံးပြုမှုကို ကန့်သတ်မည်ဟု ကြေညာလိုက်သည်။ "Phone Off, Learning On" (ဖုန်းပိတ်ထားပါ၊ ပညာဆက်သင်ပါ) ဟု အမည်ပေးထားသည့် ဤမူဝါဒသည် အာရုံစူးစိုက်မှု အားနည်းနေသည့် မျိုးဆက်သစ်တို့၏ အားနည်းချက်ကို ကုသရန် ရည်ရွယ်ခြင်း ဖြစ်သည် ဟု မြို့တော် အုပ်ချုပ်ရေးက ပြောသည်။ ဘန်ကောက်မြို့တော်ဝန် ချတ်ချတ် စစ်သီပန့် (Chadchart Sittipunt) ၏ ကြေညာချက်အရ BMA အောက်ရှိ ကျောင်း ၄၃၇ ကျောင်းမှ ကျောင်းသူ၊ ကျောင်းသားများသည် ကျောင်းတက်ချိန်အတွင်း ၎င်းတို့၏ ဖုန်းများကို အပ်နှံထားရမည်ဖြစ်ပြီး ဆရာ၊ ဆရာမများက သင်ကြားရေးအတွက် လိုအပ်သည်ဟု ယူဆမှသာ အသုံးပြုခွင့်ရမည် ဖြစ်ပါသည်။ ယူနက်စကို (Unesco) ကဲ့သို့သော အဖွဲ့အစည်းများ၏ လေ့လာမှုများအရ ဒစ်ဂျစ်တယ်နည်းပညာကို ရည်ရွယ်ချက်ရှိရှိ အသုံးပြုပါက သင်ကြားရေးကို အထောက်အကူပြုသော်လည်း၊ အစီအစဉ်တကျမရှိသော စမတ်ဖုန်းအသုံးပြုမှုများသည် အာရုံစူးစိုက်မှုကို ပျက်ပြားစေကြောင်း ဖော်ပြနေပါသည်။ ဘန်ကောက်၏ မူဝါဒသည် ကျောင်းသားများ ဖုန်းကို သိမ်းထားရုံဖြင့် မလုံလောက်ဘဲ၊ ဆက်သွယ်မှု (Connectivity) နှင့် အာရုံစူးစိုက်မှု (Concentration) အကြား မျှခြေတစ်ခုကို ပြန်လည်ရရှိစေမှသာ အောင်မြင်မည်ဟု ပညာရှင်များက သုံးသပ်သည်ဟု ဘန်ကောက်ပို့စ် သတင်းစာတွင် ဖော်ပြထားသည်။ အာရုံစူးစိုက်မှုများအတွက် ပြိုင်ဆိုင်နေရသည့် ယနေ့ခေတ်တွင် စာသင်ခန်းများသည် စိတ်အာရုံကို လွတ်လပ်စွာ ထားရှိပြီး သင်ယူနိုင်သည့် ဘေးမဲ့နယ်မြေတစ်ခု ဖြစ်နေသင့်ပါသည်။ တချိန်တည်းမှာပင် မြန်မာနိုင်ငံသား ကလေးများ၏ ပညာရေးနှင့် သက်ဆိုင်သည့် ကိစ္စရပ်တစ်ခုလည်း ထိုင်းနိုင်ငံတွင် ဖြစ်ပွားလျက်ရှိသည်။ မြန်မာနိုင်ငံသား ရွေ့ပြောင်း အလုပ်သမားများ၏ သားသမီးများကို အခမဲ့ ပညာပေးမည့် အစီအစဉ်နှင့် ပတ်သက်၍ တက်ကြွလှုပ်ရှားသူ ထိုင်းမျိုးချစ် အဖွဲ့တစ်ခုက လက်မှတ်ပေါင်း ၈၆,၀၀၀ ကောက်ခံ၍ ထိုင်းပညာရေး ဝန်ကြီးဌာနကို ကန့်ကွက်လွှာ တင်သွင်းထားသည်။ ၂၀၂၅ ခုနှစ် ထိုင်းပညာရေး မူဝါဒတွင် ပါရှိသည့် အထောက်အထားမပြည့်စုံသည့် ကလေးငယ်များအား ပညာသင်ကြားခွင့်ပြုခြင်း ဆိုင်ရာ ကိစ္စကို ကန့်ကွက်ထားခြင်း ဖြစ်သည်။ #CellPhone #Phone #ဖုန်းမသုံးရန်တားမြစ် #စာသင်ကျောင်း

ဘန်ကောက်တွင် စာသင်ခန်းအတွင်း ဖုန်းမသုံးရန် တားမြစ်

Mar 17

တောင်ကြီး အုပ်ချုပ်ရေးမှူးများ အပြောင်းအလဲ လုပ်မည်ဟု သတင်းများ ထွက်ပေါ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၁၇ ရက်။ ရှမ်းပြည်နယ်၏ မြို့တော်၊ တောင်ကြီးတွင် စစ်မှုထမ်းကြေး လာဘ်စားမှုများကြောင့် သင်္ကြန်အပြီး အုပ်ချုပ်ရေး မှူးများ အပြောင်းအလဲလုပ်မည်ဟု ဌာနဆိုင်ရာများအတွင်း သတင်းများထွက်ပေါ်နေသည်။ တောင်ကြီးမြို့ပေါ်ရှိ ရပ်ကွက်အုပ်ချုပ်ရေးမှူး အများစုသည် စစ်မှုထမ်းခေါ်ယူရေး လုပ်ငန်းစဉ်များတွင် သိန်းထောင်ချီ၍ လာဘ်ပေးလာဘ်ယူမှုများ ပြုလုပ်ခဲ့သည်ဟူသော စွပ်စွဲချက်များကြောင့် သင်္ကြန်အပြီး၌ တာဝန်မှ အစုလိုက်အပြုံလိုက် ဖယ်ရှားခြင်းနှင့် အပြောင်းအလဲ ပြုလုပ်ခြင်းများကို ခံရတော့မည်ဟု သတင်းများ ထွက်ပေါ်နေကြောင်း ဌာနဆိုင်ရာ သတင်းရင်းမြစ်များက ပြောသည်။ စစ်ကော်မရှင်လက်အောက်ခံ အထွေထွေအုပ်ချုပ်ရေးဦးစီးဌာန (ထွေအုပ်) က စီစဉ်နေသည့် အဆိုပါ အပြောင်း အလဲတွင် တောင်ကြီးမြို့ပေါ်ရှိ ရပ်ကွက် ၂၂ ခုအနက် ပအိုဝ်းအမျိုးသားအဖွဲ့ချုပ် (PNO) က ထိန်းချုပ်ထားသည့် ဘုရားဖြူ၊ ညောင်ဖြူစခန်းနှင့် ကံကြီးရပ်ကွက် ၃ ခုမှအပ ကျန်ရှိသည့် ၁၉ ရပ်ကွက်စလုံး ပါဝင်မည်ဟု အထွေထွေ အုပ်ချုပ်ရေးရုံးနှင့် နီးစပ်သူ တစ်ဦးက ဆိုသည်။ ယခုဖြစ်စဉ်သည် အုပ်ချုပ်ရေးမှူးများက စစ်မှုထမ်းရန် အကျုံးဝင်သူများထံမှ ကင်းလွတ်ခွင့်ရရှိရေးအတွက် ငွေကြေးအဆမတန် တောင်းခံခဲ့မှုအပေါ် ဒေသခံများ၏ တိုင်ကြားမှုများကြောင့်ဟု ဆိုသည်။ ထွေအုပ်နှင့် နီးစပ်သူတစ်ဦးက “အစကတည်းက ဝိုင်းတိုင်ထားကြတာပဲ။ အုပ်ကြီးတွေကလည်း အရမ်း ယုံကြည်မှု ရှိတာလား ဘာလားတော့ မသိဘူး။ အရင်ကတည်းက နင်တို့ မကျေနပ်ရင် တိုင်ကြဆိုတော့ အဲ့လို တွေ ပေါ့လေ။ တကယ် တတ်နိုင်တဲ့သူတွေကျတော့ အောက်ကျမခံဘူးလေ။ ဘယ်လောက်ကုန်ကုန် အဆုံးထိ သွားမှာဆိုတော့ ဒီလို ဖြစ်သွားတာ” ဟု လက်ရှိအခြေအနေကို ရှင်းပြသည်။ အုပ်ချုပ်ရေးယန္တရားအတွင်း အကျင့်ပျက်ခြစားမှုများကြောင့် ပြီးခဲ့သည့် ဖေဖော်ဝါရီလအတွင်းကပင် အချို့ ရပ်ကွက်များ၌ အုပ်ချုပ်ရေးမှူးနှင့် စာရေးမများကို နေရာလွှဲပြောင်းမှုများ စတင်ပြုလုပ်ခဲ့သေးသည်ဟု ဆိုကြသည်။ အုပ်ချုပ်ရေးပိုင်းနှင့် နီးစပ်သူနောက်တစ်ဦးက “ကျောင်းကြီးစုအုပ်ကြီးက ရတနာသီရိကို သွားရတာမျိုးပေါ့။ ဒါပေမဲ့ ရတနာသီရိအုပ်ကြီးက ဒီကို ပြန်လာရတာမဟုတ်ဘဲ ကျဘမ်းသွားနေရတာ” ဟု ပြောသည်။ အထူးသဖြင့် ကျောင်းကြီးစု၊ ပြည်တော်သာနှင့် မင်္ဂလာဦးရပ်ကွက်များသည် ၂၀၂၅ ခုနှစ်အတွက် မြို့နယ် စစ်မှုထမ်း ခေါ်ယူရေးအဖွဲ့သို့ ပေးသွင်းရန်ကျန်ရှိနေသည့် စရိတ်များအတွက် ဖိအားပေးခံနေရသည်။ အဆိုပါ ငွေကြေးများကို အချိန်မီပေးသွင်းနိုင်ရန် ရပ်ကွက်အတွင်းရှိ ပြည်သူများထံမှ စစ်မှုထမ်းစရိတ် ထပ်မံ တိုးမြှင့်ကောက်ခံသွားရန် ကြေညာထားသဖြင့် ဒေသခံများကြား ဝေဖန်မှုများ မြင့်တက်လျက်ရှိသည်။ တောင်ကြီးမြို့နှင့် ထိစပ်နေသည့် ညောင်ရွှေမြို့နယ်၊ အင်းလေးဒေသတွင်လည်း အလားတူ စစ်မှုထမ်းစရိတ် လာဘ်ယူမှုများ ရှိနေသော်လည်း ယခုအချိန်ထိ ထိရောက်သော အရေးယူမှုများ မရှိသေးကြောင်း ဒေသခံများက ပြောသည်။ လက်ရှိတွင် တောင်ကြီးမြို့၌ အမျိုးသားများ သာမက အမျိုးသမီးများပါ စစ်မှုထမ်းရန် စာရင်းကောက်ခံမှုများ စတင်နေပြီဖြစ်ပြီး သင်္ကြန်အပြီးတွင် အပြီးသတ် စာရင်းပေးသွင်းရန် ညွှန်ကြားထားခြင်းကြောင့် မြို့ခံ အမျိုးသမီးငယ်များနှင့် မိဘအုပ်ထိန်းသူများက စိုးရိမ်ပူပန်နေကြသည်။ #တောင်ကြီးမြို့ #စစ်မှုထမ်း #လာဘ်စားမှု #တောင်ကြီးအုပ်ချုပ်ရေးမှူးများ

တောင်ကြီး အုပ်ချုပ်ရေးမှူးများ အပြောင်းအလဲ လုပ်မည်ဟု သတင်းများ ထွက်ပေါ်

Mar 17

ကိုးကန့် MNDAA နှင့် တအာင်း TNLA တို့ တိုက်ပွဲများ ရပ်ပြီး လောက်ကိုင်တွင် ဆွေးနွေး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၁၇ ရက်။ ညီနောင်မဟာမိတ်ချင်း သွေးထွက်သံယိုဖြစ်ပြီးနောက် ကိုးကန့်တပ် (MNDAA) နှင့် တအာင်းတပ် (TNLA) တို့ တိုက်ပွဲများ ရပ်တန့်ပြီး လောက်ကိုင်တွင် တွေ့ဆုံဆွေးနွေးနေသည်။ ရှမ်းပြည် မြောက်ပိုင်း၊ တရုတ်-မြန်မာနယ်စပ် ကုန်သွယ်ရေးလမ်းကြောင်းပေါ်ရှိ နယ်မြေစိုးမိုးမှု အငြင်းပွားရာမှ စတင်ခဲ့သည့် ကိုးကန့်တပ် (MNDAA) နှင့် တအာင်းတပ် (TNLA) တို့အကြား တိုက်ပွဲများ မတ်လ ၁၆ ရက်နေ့၊ ညနေပိုင်းတွင် ရပ်တန့်သွားခဲ့ပြီး ယနေ့တွင် နှစ်ဖက်ခေါင်းဆောင်များ လောက်ကိုင်မြို့၌ တွေ့ဆုံကာ အရေးပေါ် ညှိနှိုင်းနေကြပြီ ဖြစ်သည်။ ကွတ်ခိုင်မြို့အပါအဝင် မဟာဗျူဟာကျသည့် တပ်စခန်းများကို MNDAA က အင်အားသုံး တိုက်ခိုက်သိမ်းပိုက် ခဲ့ပြီးနောက် ရက်ပိုင်းအတွင်း ဖြစ်ပွားခဲ့သည့် အဆိုပါ ထိပ်တိုက်ရင်ဆိုင်မှုများကြောင့် မဟာမိတ်အချင်းချင်းကြား တိုက်ခိုက်မှုများ ဖြစ်ပွားပြီးနောက် ယခုကဲ့သို့ စားပွဲဝိုင်းဆွေးနွေးမှု ပေါ်ပေါက်လာခြင်းဖြစ်သည်။ TNLA နှင့် နီးစပ်သည့် သတင်းရင်းမြစ်တစ်ခု၏ အဆိုအရ “မနေ့ညနေကစပြီး ပစ်ခတ်မှုတွေ ရပ်သွားပြီပေါ့ ကွာ။ ဒီနေ့ပေါ့နော် မတ်လ ၁၇ ရက်နေ့ ဒီနေ့တော့ နှစ်ဖက်ကိုယ်စားလှယ်တွေ လောက်ကိုင်မှာ တွေ့နေကြ တယ်။ အဓိကကတော့ ကွတ်ခိုင်၊ နမ့်ဖတ်ကာနဲ့ ၁၀၅ မိုင်ကိစ္စတွေ၊ ဖမ်းဆီးခံထားရတဲ့ တပ်ဖွဲ့ဝင်တွေအရေးကို အဓိကထား ညှိနှိုင်းနေတာပါ” ဟု ပြောသည်။ ပြီးခဲ့သည့် ရက်ပိုင်းအတွင်းက MNDAA ၏ ထိုးစစ်ကြောင့် TNLA ဘက်က ကွတ်ခိုင်မြို့၊ နမ့်ဖတ်ကာနှင့် မူဆယ် ၁၀၅ မိုင်ရှိ စခန်းများကို လက်လွှတ်ခဲ့ရသည့်အပြင် တပ်ဖွဲ့ဝင် ၁၀၀ နီးပါးခန့်လည်း ဖမ်းဆီးခံခဲ့ရသည်။ အဆိုပါတိုက်ပွဲများတွင် MNDAA နှင့်အတူ စစ်ကော်မရှင်လက်အောက်ခံ ပြည်သူ့စစ်အချို့ပါ ပူးပေါင်းပါဝင်ခဲ့ သည်ဟူသော သတင်းများကြောင့် တော်လှန်ရေးအင်အားစုများကြားတွင် စိုးရိမ်မှုနှင့် ဝေဖန်မှုများ ကျယ်ကျယ် လောင်လောင် ထွက်ပေါ်ခဲ့ရသည်။ နိုင်ငံရေးလေ့လာသုံးသပ်သူ အချို့ကမူ အဆိုပါ ပဋိပက္ခသည် တရုတ်နယ်စပ် ကုန်သွယ်ရေး လမ်းကြောင်း တစ်ခုလုံးကို MNDAA က တစ်ဖွဲ့တည်း စိုးမိုးနိုင်ရေး ဦးတည်သည့် ဗျူဟာမြောက် ရွှေ့ကွက်တစ်ခုဖြစ်နိုင် ကြောင်း သုံးသပ် နေကြသည်။ အလားတူ နွေဦးတော်လှန်ရေး မဟာမိတ် တပ်ပေါင်းစု SRA၊ အမျိုးသား ညီညွတ်ရေး အတိုင်ပင်ခံ ကော်စီ NUCC နှင့် အရပ်ဘက်အဖွဲ့အစည်းများကလည်း မဟာမိတ်အချင်းချင်းကြား သွေးထွက် သံယိုမှုများကို ချက်ချင်းရပ်တန့်ရန် ထုတ်ပြန်တောင်းဆိုထားသည်။ မြေပြင်အခြေအနေနှင့် ပတ်သက်၍ ကွတ်ခိုင်မြို့ခံ အမျိုးသားတစ်ဦးက “မြို့ထဲမှာတော့ သေနတ်သံတွေ ငြိမ် သွားပြီ။ ဒါပေမဲ့ လူတွေက ကြောက်နေတုန်းပဲ။ ကိုယ့်အချင်းချင်းကြားမှာ ဖြစ်တာဆိုတော့ ဘယ်သူ့ကို အားကိုးရမှန်း မသိတာတော့ အမှန်ပဲ။ အခု လောက်ကိုင်မှာ ဆွေးနွေးနေတယ်ဆိုပေမဲ့ နမ့်ခမ်းဘက်ကိုပါ MNDAA က ထပ်လာမယ်ဆိုတဲ့ သတင်းတွေကြားနေရတော့ စစ်ပွဲတွေ ပြန်ဖြစ်လာမှာကို အရမ်းစိုးရိမ်တယ်” ဟု ပြောသည်။ လတ်တလောတွင် MNDAA သည် ကွတ်ခိုင်ကို သိမ်းပိုက်ပြီးနောက် နမ့်ခမ်းမြို့ဘက်သို့ပါ ထိုးစစ်ဆင်ရန် ပြင် ဆင်နေသည့် လက္ခဏာများ ရှိနေသဖြင့် လောက်ကိုင်ဆွေးနွေးပွဲ၏ ရလဒ်သည် ရှမ်းမြောက်ဒေသ၏ တည်ငြိမ် ရေးအတွက် အလွန်အရေးပါသည့် အဆုံးအဖြတ် ဖြစ်လာဖွယ်ရှိသည်ဟု ရှမ်းမြောက်အရေး စောင့်ကြည့်နေသူ များက ဆိုသည်။ #TNLA #MNDAA #Kutkai #တအာင်းတပ် #ကိုးကန့်တပ် #လောက်ကိုင်

ကိုးကန့် MNDAA နှင့် တအာင်း TNLA တို့ တိုက်ပွဲများ ရပ်ပြီး လောက်ကိုင်တွင် ဆွေးနွေး

Mar 17

မော်ချီးတွင် အရပ်သား ပစ်မှတ်များ တိုက်ခိုက်ခံနေရ သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ မတ်လ ၁၇ ရက်။ စစ်ကော်မရှင်က ‘ရန်နိုင်မင်း’ စစ်ဆင်ရေးဖြင့် ကရင်နီပြည် မော်ချီးသို့ ဦးတည်စစ်ကြောင်းထိုးနေပြီး အရပ်သားနေရာများကို ပစ်မှတ်ထား တိုက်ခိုက်မှုများပြားလာနေသည်။ ကရင်နီပြည်အတွင်း စစ်ကော်မရှင်တပ်သည် ‘ရန်နိုင်မင်း’ ဟု အမည်ပေးထားသည့် စစ်ဆင်ရေးဖြင့် မော်ချီး ဒေသသို့ ဦးတည်ကာ စစ်ကြောင်းထိုးလျက်ရှိပြီး၊ ထိုဖြစ်စဉ်တွင် တိုက်ပွဲနှင့်မသက်ဆိုင်သည့် အရပ်သား နေထိုင် ရာ နေရာများကို ပစ်မှတ်ထားတိုက်ခိုက်မှုများ ဆက်တိုက်ကျူးလွန်နေသည်။ မော်ချီးသည် ကရင်နီ ပြည်အတွင်း ခဲမဖြူနှင့် အဖြိုက်နက် သယံဇာတ ထွက်ရာ ဒေသ ဖြစ်ပြီး လက်ရှိတွင် တော်လှန်ရေး တပ်ဖွဲ့များ ထိန်းချုပ်မှု အောက်တွင် ရှိသည်။ စစ်ကော်မရှင်တပ်သည် စစ်ကြောင်းမထိုးမီ နယ်မြေရှင်းလင်းရေးအဖြစ် ဖားဆောင်းနှင့် ဖရူဆိုဒေသတွင်းရှိ လူထုနေထိုင်ရာ ကျေးရွာများ၊ နေရာများကို လေကြောင်းနှင့် လက်နက်ကြီးများအသုံးပြုကာ ကြိုတင်တိုက်ခိုက် လေ့ရှိကြောင်း ကရင်နီပြည် ကြားကာလအုပ်ချုပ်ရေးကောင်စီ (IEC) အတွင်းရေးမှူး-၂ ဦးဗညားက ပြောသည်။ ဦးဗညားက “စစ်ရေးအရကတော့ လောလောဆယ် ဖရူဆို-ထားလဲ နားမှာပဲ တိုက်ပွဲတွေတော့ ဖြစ်နေတယ်လို့ ပြောလို့ရတယ်ပေါ့။ ဒါပေမဲ့ ဖားဆောင်းဘက်မှာတော့ တိုက်ပွဲတွေကတော့ ငြိမ်နေသေးတယ်ပေါ့နော်။ ငြိမ်နေ သော်ငြားလည်း သူတို့ကတော့ ရှင်းလင်းရေးအတွက် စစ်ကြောင်းတွေ မထိုးခင်မှာ တချို့နယ်မြေတွေကို ကြို တင်ပြီးတော့မှ ဗုံးကြဲတာ အကျင့်ရှိတယ်ပေါ့နော်။ လက်နက်ကြီးနဲ့ မှီရင်တော့ လက်နက်ကြီးနဲ့ လှမ်းပစ် တယ်” ဟု လက်ရှိမြေပြင်အခြေအနေကို ရှင်းပြသည်။ လက်ရှိတွင် ဒီးမော့ဆို - ဖရူဆို - ဘောလခဲ လမ်းမကြီးတစ်လျှောက်၌ စစ်ကော်မရှင်တပ်နှင့် ကရင်နီ တော်လှန် ရေးတပ်များအကြား ထိတွေ့တိုက်ပွဲများ ခပ်စိပ်စိပ်ဖြစ်ပွားနေသည်။ စစ်ကော်မရှင်သည် အတုအယောင် ရွေးကောက်ပွဲကာလ အပြီးတွင် ရပ်နားထားသော စစ်ဆင်ရေးများကို ပြန်လည်အရှိန်မြှင့်လာခြင်းဖြစ်သည်ဟု ဆိုသည်။ ဦးဗညားက “စစ်ရေးက အရင်ရွေးကောက်ပွဲကာလမှာတော့ နည်းနည်းနားထားတာပေါ့နော်။ ရွေးကောက်ပွဲ ပြီးတာနဲ့ သူတို့ချက်ချင်း စစ်ကြောင်းပြန်ထိုးတယ်။ အခုသွားနေတဲ့ စစ်ဆင်ရေးပုံစံကြည့်ရမယ်ဆို ရန်နိုင်မင်း စစ်ဆင်ရေးပါ။ ၆ လ ၁ နှစ်တောင် ပြည့်တော့မယ်လေနော်။ အရင်တုန်းက ဖယ်ခုံကနေ မိုးဗြဲ၊ မိုးဗြဲကနေ လွိုင်ကော်၊ လွိုင်ကော်ကနေ ဒီးမော့ဆို၊ ဒီးမော့ဆိုကနေ ဖရူဆို၊ ဖရူဆိုကနေ ဘောလခဲကို ဆင်းမယ့်လမ်းပေါ့၊ ပြီးတော့မှ ဘောလခဲကနေ ဖားဆောင်း၊ ဖားဆောင်းကနေ မော်ချီးကို တက်မယ်ဆိုပြီးတော့မှ ကနဦးကျနော်တို့ သိထားတဲ့ စစ်ရေးအရ ရန်နိုင်မင်းစစ်ကြောင်းရဲ့ သဘောသဘာဝ ဖြစ်တယ်” ဟု ပြောသည်။ မတ်လအတွင်း စစ်ကော်မရှင်၏ ရမ်းသန်းပစ်ခတ်မှုများကြောင့် ပြည်သူများမှာ စိုးရိမ်ထိတ်လန့်နေရပြီး ထပ်ဆင့် စစ်ဘေးရှောင်နေရသည့် အခြေအနေဖြစ်နေသည်။ ဦးဗညားက ဆက်လက်၍ “ဖရူဆို၊ မော်ချီး၊ ဖားဆောင်းဘက်မှာကတော့ စစ်တပ်က ဗုံးကြဲနေတာ ဆက်တိုက် ပေါ့နော်။ ထိခိုက်မှုကလည်း တချို့ရှိတယ်။ ဖားဆောင်းတို့ ဖရူဆိုတို့ကို ပစ်တဲ့ဟာက စစ်ရေးအရ တိုက်ရိုက် သက်ဆိုင်မှု ရှိတာပေါ့။ ဒါပေမဲ့ တိုက်ပွဲဖြစ်တဲ့နေရာ မဟုတ်ဘူးပေါ့နော်။ လူထုတွေရှိတဲ့နေရာကို ဗုံးကြဲနေ တယ် ပစ်ခတ်နေတယ်ဆိုတာ တွေ့ရပါတယ်” ဟု ပြောသည်။ စစ်ရေးထိခိုက်မှုများအနေဖြင့် မတ်လ ၅ ရက်နေ့က ဖရူဆို-ထားလဲ လမ်းမကြီးပေါ်တွင် စစ်ကော်မရှင်၏ ဘက်ဟိုးယာဉ်ပါ စစ်ယာဉ်တန်း ကြားဖြတ်တိုက်ခိုက်ခံရပြီး စစ်တပ်ဘက်မှ ၃ ဦးသေဆုံးကာ ဘက်ဟိုးယာဉ် လည်း ပျက်စီးခဲ့ကြောင်း KNDF က ထုတ်ပြန်ထားသည်။ သို့သော် စစ်ကော်မရှင်ဘက်က လက်တုံ့ပြန်သည့်အနေဖြင့် အရပ်သားများကို တိုက်ခိုက်ခဲ့ရာ မတ်လ ၁၅ ရက်တွင် ဖရူဆို၌ Y-12 လေယာဉ်ဖြင့် ဗုံးကြဲသဖြင့် စစ်ရှောင်အမျိုးသမီးတစ်ဦး ဒဏ်ရာရခဲ့သည့်အပြင် မတ်လ ၈ ရက်နေ့ကလည်း လက်နက်ကြီးကြောင့် စပါးကျီနှင့် စားနပ်ရိက္ခာများ ပျက်စီးခဲ့ရသည်။ ထို့အပြင် မတ်လ ၁၄ ရက်နေ့တွင် ဖားဆောင်းနှင့် မော်ချီးအကြား ၉ မိုင်ဒေသကို လေကြောင်းမှ ဗုံးကြဲသဖြင့် ဒေသခံတစ်ဦး ဒဏ်ရာရခဲ့ပြီး၊ မတ်လ ၁၀ ရက်ကလည်း မော်ချီးဒေသ၌ လေကြောင်းတိုက်ခိုက်မှုကြောင့် အရပ်သားများ ထိခိုက်ဒဏ်ရာရရှိခဲ့ကြောင်း မြေပြင်သတင်းများက ပြောသည်။ #မော်ချီး #စစ်ကော်မရှင် #အရပ်သား # ရန်နိုင်မင်းစစ်ဆင်ရေး #လေကြောင်းတိုက်ခိုက်မှု

မော်ချီးတွင် အရပ်သား ပစ်မှတ်များ တိုက်ခိုက်ခံနေရ

Mar 17

စစ်ကိုင်းတိုင်း ကောလင်းအစပ်က ရွှေဖောင်များကို လေကြောင်းမှ တိုက်ခိုက် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၁၇ ရက်။ စစ်ကိုင်းတိုင်း၊ ကျွန်းလှနှင့် ကောလင်းမြို့နယ် အစပ်ရှိ ရွှေဖောင်များကို စစ်ကော်မရှင်က လေကြောင်းမှ တိုက်ခိုက်ခဲ့သဖြင့် အရပ်သား ၆ ဦး သေဆုံးပြီး ရွှေဖောင် ၁၅ ခု ပျက်စီးခဲ့ရကြောင်း ဒေသခံများက ပြောသည်။ ပြီးခဲ့သည့် မတ်လ ၁၅ ရက်နေ့၊ ညနေ ၃ နာရီခန့်တွင် ဟုမ္မလင်းလေတပ်စခန်းဘက်မှ တက်လာသည့် ဂျက်ဖိုက် တာ တိုက်လေယာဉ် ၂ စီးဖြင့် တော်လှန်ရေး တပ်ဖွဲ့များ ထိန်းချုပ်ထားရာ ကျွန်းလှမြို့နယ်နှင့် ကောလင်းမြို့နယ်အစပ်ရှိ သဖန်းဆိပ်ဆည်အတွင်း ရွှေမျှောလုပ်ငန်း လုပ်ကိုင် နေသည့် ရွှေဖောင်များကို ပစ်မှတ်ထား တိုက်ခိုက်ခဲ့ခြင်း ဖြစ် သည်။ အဆိုပါ လေကြောင်းတိုက်ခိုက်မှုကြောင့် ရွှေဖောင်များပေါ်တွင် အလုပ်လုပ်ကိုင်နေသည့် အရပ်သားလုပ်သား များ အနက် လက်ရှိအချိန်ထိ သေဆုံးသူ ၆ ဦးကို အတည်ပြုထားနိုင်ပြီး ထိခိုက်ဒဏ်ရာရသူများလည်း ရှိနေ ကြောင်း ဒေသခံများက ပြောသည်။ ဖြစ်စဉ်နှင့်ပတ်သက်၍ ဒေသခံအမျိုးသားတစ်ဦးက “ဟုတ်ကဲ့ဗျ။ ရွှေဖောင်တွေတော့ ခဏခဏ ပစ်ခံနေရတာ ပေါ့။ တစ်နေ့ကပစ်တာတော့ ရွှေဖောင် ၁၅ ခု ပျက်စီးသွားတယ်။ သေဆုံး ၆ ဦးလို့ ကြားသိထားရတယ်ဗျ။ အတိအကျတော့ မသိရသေးဘူး” ဟု ပြောသည်။ စစ်ကော်မရှင်တပ်သည် ယခုရက်ပိုင်းအတွင်း မြစ်ချောင်းများနှင့် ဆည်များအတွင်းရှိ ရွှေဖောင်လုပ်ငန်းခွင်များ ကို လေကြောင်းမှ မကြာခဏ တိုက်ခိုက်လျက်ရှိသည်။ ပြီးခဲ့သည့် မတ်လ ၁၀ ရက်နေ့ကလည်း ဗန်းမော်မြို့နယ်၊ စင်းခန်းကျေးရွာရှိ ဧရာဝတီမြစ်ကမ်းတစ်လျှောက် ရွှေဖောင်လုပ်ကွက်များ တိုက်ခိုက်ခံရသဖြင့် ရွှေဖောင်လုပ်သား ၃၀ ကျော် သေဆုံးခဲ့ရသည့် ဖြစ်စဉ်ဖြစ်ပွားခဲ့ သေးသည်။ သဖန်းဆိပ်ဆည်ကိုမူ စစ်ကော်မရှင်က ယခုနှစ် ဇန်နဝါရီလ ၁၄ ရက်နှင့် ဖေဖော်ဝါရီလ ၂၅ ရက်နေ့တို့တွင်လည်း လေကြောင်းမှ ဗုံးကြဲတိုက်ခိုက်မှုများ ပြုလုပ်ခဲ့ဖူးသည်ဟု Infinity Group က ထုတ်ပြန်ထားသည်။ အဆိုပါ သဖန်းဆိပ်ဆည်နှင့် ရေအားလျှပ်စစ်ရုံးအပါအဝင် အနီးဝန်းကျင် ကျေးရွာများကို တော်လှန်ရေး အင်အားစုများက ၂၀၂၅ ခုနှစ် နိုဝင်ဘာလကတည်းက ထိန်းချုပ်ထားခြင်းဖြစ်သည်။ လက်ရှိတွင် ဟုမ္မလင်းလေတပ်နှင့် နီးစပ်သည့် စစ်ကိုင်းတိုင်းအထက်ပိုင်းရှိ ကန့်ဘလူ၊ ကျွန်းလှ၊ ကောလင်း၊ ဝန်းသို၊ ပင်လည်ဘူး၊ ဖောင်းပြင်နှင့် မော်လိုက်မြို့နယ်များအတွင်း နေထိုင်ကြသည့် ပြည်သူများအနေဖြင့် လေကြောင်းတိုက်ခိုက်မှု အန္တရာယ်ကို အထူးသတိပြု နေထိုင်ကြရန် တော်လှန်ရေးအင်အားစုများက သတိပေးချက် ထုတ်ပြန်ထားသည်။ #စစ်ကိုင်တိုင်း #ရွှေဖောင်လုပ်ကွက် #စစ်ကော်မရှင် #ဟုမ္မလင်း #မော်လိုက် #ကျွန်းလှ #ကောလင်း #လေကြောင်းတိုက်ခိုက်

စစ်ကိုင်းတိုင်း ကောလင်းအစပ်က ရွှေဖောင်များကို လေကြောင်းမှ တိုက်ခိုက်

Mar 17

စစ်ပွဲ၏ ဒုက္ခအခက်အခဲများကိုသာ အသားပေးရန် သတင်းထောက်များကို ပုပ်ရဟန်းမင်းကြီး တိုက်တွန်း သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၁၇ ရက်။ ပုပ်ရဟန်းမင်းကြီး လီယို ၁၄ (Pope Leo XIV) က သတင်းထောက်များအနေဖြင့် စစ်ပွဲသတင်းများ ဖော်ပြရာတွင် အာဏာရှိသူများ၏ ဝါဒဖြန့်မှုများထက် စစ်ဘေးသင့်ပြည်သူများ၏ ဒုက္ခအခက်အခဲများကိုသာ အလေးပေးဖော်ပြကြရန် တိုက်တွန်းလိုက်ပါသည်။ ၎င်းက စစ်ပွဲကို ဗီဒီယိုဂိမ်းတစ်ခုကဲ့သို့ ဖျော်ဖြေမှုဆန်ဆန် တင်ဆက်ခြင်းမျိုး မလုပ်ရန်လည်း သတိပေးခဲ့ပါသည်။ အီတလီရုပ်သံ TG2 နှင့် တွေ့ဆုံရာတွင် ပထမဆုံးသော အမေရိကန်နွယ်ဖွား ပုပ်ရဟန်းမင်းကြီးဖြစ်သည့် လီယို ၁၄ က စစ်ဘေးသင့် နစ်နာသူများ၏ အမြင်ဖြင့် သတင်းတင်ဆက်ကြရန် တောင်းဆိုခဲ့သည်။ ယခင်ကလည်း ပုပ်ရဟန်းမင်းကြီးက လက်ရှိဖြစ်ပွားနေသည့် စစ်ပွဲအား ချက်ချင်းရပ်တန့်၍ အပစ်အခတ်ရပ်စဲရန် အပြင်းအထန် တောင်းဆိုနေခဲ့သည်။ #PopeLeoXIV #ပုပ်ရဟန်းမင်းကြီးလီယို၁၄

စစ်ပွဲ၏ ဒုက္ခအခက်အခဲများကိုသာ အသားပေးရန် သတင်းထောက်များကို ပုပ်ရဟန်းမင်းကြီး တိုက်တွန်း

Mar 17

ကုန်သွယ်ခွန်သစ်အပေါ် အမေရိကန်ကို တရုတ် သတိပေး သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ မတ်လ ၁၇ ရက်။ ပဲရစ်မြို့၌ ပြုလုပ်ခဲ့သော အဆင့်မြင့်ကုန်သွယ်ရေးဆွေးနွေးပွဲအပြီးတွင် အမေရိကန်၏ သွင်းကုန်ခွန်အသစ်များသည် နှစ်နိုင်ငံကုန်သွယ်ရေးကို ထိခိုက်စေနိုင်ကြောင်း တရုတ်နိုင်ငံက သတိပေးလိုက်သည်။ အမေရိကန် အဆင့်မြင့် တရားရုံးကို သမ္မတ ထရန့် အစိုးရ၏ ကုန်သွယ်ခွန်များသည် တရားဝင်မှု မရှိကြောင်း ဆုံးဖြတ်ပြီး ပယ်ချပြီးနောက် သမ္မတ ထရန့်အစိုးရက နိုင်ငံခြားကုန်ထုတ်လုပ်မှုများအား စုံစမ်းစစ်ဆေးနေမှုများအပေါ် တရုတ်ဘက်က စိုးရိမ်ကြောင်း ပြောဆိုခဲ့ခြင်း ဖြစ်သည်။ သို့သော်လည်း ဆွေးနွေးပွဲအတွင်း နှစ်ဦးနှစ်ဖက်စလုံးက အခွန်နှုန်းထားများ တည်ငြိမ်စေရန် ကြိုးပမ်းသွားမည်ဟု သဘောတူညီခဲ့ကြပါသည်။ လာမည့် နှစ်ပတ်အတွင်း ပြုလုပ်ရန် စီစဉ်ထားသော သမ္မတထရန့်၏ တရုတ်နိုင်ငံခရီးစဉ်သည် နောက်ဆုတ်သွားနိုင်ခြေရှိကြောင်း အမေရိကန်ဘက်က ဆိုပါသည်။ အမေရိကန်ဘဏ္ဍာရေးဝန်ကြီး စကော့ ဘဲဆင့် (Scott Bessent) ကမူ ခရီးစဉ်ရွှေ့ဆိုင်းခြင်းမှာ ဖိအားပေးရန်မဟုတ်ဘဲ အီရန်စစ်ပွဲဖြစ်ပွားနေချိန်တွင် သမ္မတအနေဖြင့် ပြည်တွင်း၌သာ ရှိနေသင့်သောကြောင့်ဖြစ်ကြောင်း ရှင်းလင်းခဲ့ပါသည်။ အမေရိကန်သည် ဟော်မုဇ်ရေလက်ကြား ပြန်လည်ဖွင့်လှစ်နိုင်ရေးအတွက် တရုတ်၏ အကူအညီကို လိုအပ်လျက်ရှိနေသည်။ ကုန်သွယ်ရေး စစ်ပွဲများကြောင့် ထိခိုက်ခဲ့သော နှစ်နိုင်ငံဆက်ဆံရေး ကောင်းမွန်အောင် ကြိုးပမ်းနေချိန်သော်လည်း အီရန်စစ်ပွဲကြောင့် နှစ်နိုင်ငံဆက်ဆံရေး ပြန်လည်ကောင်းမွန်လာမည့် ကြိုးပမ်းချက်များမှာ အဟန့်အတားဖြစ်နေရသည်။ #တရုတ်အမေရိကန်ကုန်သွယ်ရေး #ကုန်သွယ်ခွန် #ChinaAmericanTradeWar #Trump #China #American

ကုန်သွယ်ခွန်သစ်အပေါ် အမေရိကန်ကို တရုတ် သတိပေး

Mar 17

အီရန် စစ်ပွဲ အရှိန်မြင့်ဆဲ၊ နေတိုးမဟာမိတ်များက ထရမ့်တောင်းဆိုချက်ကို ပယ်ချ သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ မတ်လ ၁၇ ရက်။ အမေရိကန်-အစ္စရေးနှင့် အီရန်တို့အကြား ဖြစ်ပွားနေသော စစ်ပွဲသည် ၁၇ ရက်မြောက်နေ့သို့ ရောက်ရှိလာပြီး အီရတ်နိုင်ငံ၊ ဘဂ္ဂဒက်မြို့ရှိ အမေရိကန်သံရုံးသည် ဒရုန်းနှင့် ဒုံးကျည်များဖြင့် အပြင်းအထန် တိုက်ခိုက်ခံခဲ့ရပါသည်။ ဤတိုက်ခိုက်မှုသည် စစ်ပွဲကာလအတွင်း အပြင်းထန်ဆုံးဖြစ်ကြောင်း သိရှိရပါသည်။ အစ္စရေးစစ်တပ်သည် အီရန်မြို့တော် တီဟီရန်အပါအဝင် ရှီရပ်ဇ် (Shiraz) နှင့် တဘရစ်ဇ် (Tabriz) မြို့ကြီးများကို ပြင်းပြင်းထန်ထန် ဗုံးကြဲတိုက်ခိုက်ခဲ့ရာ တီဟီရန်မြို့အတွင်း ပျက်စီးမှုများစွာ ရှိခဲ့ပါသည်။ တစ်ဖက်တွင်လည်း ယူအေအီး (UAE) နိုင်ငံသည် လေကြောင်းအန္တရာယ်ကြောင့် ပိတ်ထားသော လေပိုင်နက်ကို ပြန်လည်ဖွင့်လှစ်လိုက်ပြီဖြစ်ကြောင်း အရပ်ဘက်လေကြောင်းအာဏာပိုင်က ထုတ်ပြန်ခဲ့ပါသည်။ သမ္မတ ဒေါ်နယ်ထရန့်က ဟော်မုဇ်ရေလက်ကြား လုံခြုံရေးအတွက် စစ်သင်္ဘောများစေလွှတ်ရန် မဟာမိတ်များနှင့် တရုတ်နိုင်ငံကို တောင်းဆိုခဲ့သော်လည်း ငြင်းဆိုခြင်း ခံခဲ့ရပါသည်။ ဗြိတိသျှဝန်ကြီးချုပ် ကီယာ စတာမာက ဗြိတိန်အနေဖြင့် စစ်ပွဲတွင် ပါဝင်မည်မဟုတ်ကြောင်း ပြောကြားခဲ့သလို၊ ဂျာမနီအဓိပတိ ဖရက်ဒရစ် မာ့ဇ် (Friedrich Merz) ကလည်း ဤပဋိပက္ခသည် နေတိုး (NATO) နှင့် မသက်ဆိုင်ကြောင်း ဆိုခဲ့ပါသည်။ သို့သော် နေတိုးအဖွဲ့နှင့် မဟာမိတ်များသည် မြေထဲပင်လယ်ဒေသတွင် လုံခြုံရေးတိုးမြှင့်ရန် ပြင်ဆင်နေကြပါသည်။ ၎င်းအပြင် ဗြိတိန်၊ ကနေဒါ၊ ပြင်သစ်၊ ဂျာမနီနှင့် အီတလီခေါင်းဆောင်များက အစ္စရေးအနေဖြင့် လက်ဘနွန်သို့ မြေပြင်ထိုးစစ်မဆင်ရန် ပူးတွဲသတိပေးချက် ထုတ်ပြန်ခဲ့ပါသည်။ မြေပြင်ထိုးစစ်လုပ်ခဲ့မည်ဆိုပါက လူသားချင်းစာနာမှုဆိုင်ရာ ဆိုးရွားသော အကျိုးဆက်များ ဖြစ်လာမည်ဟု ပူးတွဲ ကြေညာချက်တွင် ဖော်ပြထားသည်။ #AmericanIranWar #အီရန်အမေရိကန်စစ်ပွဲ #အီရန်စစ်ပွဲ #NATO #Trump

အီရန် စစ်ပွဲ အရှိန်မြင့်ဆဲ၊ နေတိုးမဟာမိတ်များက ထရမ့်တောင်းဆိုချက်ကို ပယ်ချ

Mar 16

ဗျူဟာကုန်း ကျပြီးနောက် ကွတ်ခိုင်တစ်မြို့လုံးကို MNDAA ထိန်းချုပ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၁၆ ရက်။ ရှမ်းပြည် မြောက်ပိုင်း၊ ကွတ်ခိုင်မြို့ရှိ တအာင်းတပ်မတော် (TNLA) စခန်းများကို ကိုးကန့်တပ် (MNDAA) က ဒရုန်းရာချီ အသုံးပြုကာ အင်အားသုံး တိုက်ခိုက်ခဲ့ပြီးနောက် မြို့တစ်ခုလုံးကို အလုံးစုံထိန်းချုပ်လိုက်ပြီဟု ဒေသခံ များနှင့် မြေပြင်သတင်းရင်းမြစ်များက ပြောသည်။ ပြီးခဲ့သည့် မတ်လ ၁၄ ရက်နေ့မှ စတင်ကာ MNDAA ဘက်က ဒရုန်းအစီးရေ ရာနှင့်ချီအသုံးပြု၍ အပြင်းအထန် ထိုးစစ်ဆင်ခဲ့သဖြင့် မတ်လ ၁၅ ရက်နေ့ ညပိုင်းတွင် TNLA တပ်ဖွဲ့ဝင်များ ကွတ်ခိုင်ဗျူဟာကုန်းမှ ဆုတ်ခွာပေးခဲ့ ရခြင်း ဖြစ်သည်။ ကွတ်ခိုင်မြို့အပြင် မူဆယ် ၁၀၅ မိုင်နှင့် နမ့်ဖတ်ကာဘက်ရှိ TNLA စခန်းများကိုလည်း MNDAA က သိမ်းပိုက်ခဲ့ ပြီး တအာင်းအလံများ ဖြုတ်ချခြင်းနှင့် လူရာနှင့်ချီဖမ်းဆီးခြင်းများ လုပ်ဆောင်ခဲ့သည်ဟု ဆိုသည်။ မြေပြင်အခြေအနေနှင့်ပတ်သက်၍ ကွတ်ခိုင်ဒေသခံတစ်ဦးက “ကွတ်ခိုင်ကတော့ ကိုးကန့်လက်အောက် ကျသွား ပြီလို့ ပြောလို့ရတယ်။ မနေ့ညပိုင်းမှာ TNLA ဘက်က ဆုတ်သွားတာ။ ဒီနေ့မနက်မှာတော့ ပစ်ခတ်သံတွေ ငြိမ် နေပြီ၊ မြို့ပေါ်မှာ လူအသွားအလာ နည်းနည်းရှိလာပေမဲ့ မြို့ခံတွေကတော့ တော်တော်လေး စိုးရိမ်နေကြတုန်း ပဲ။ ဘာဖြစ်လာဦးမလဲ မသိရဘူးလေ” ဟု ပြောသည်။ တိုက်ပွဲအတွင်း ဟိုကျန့်ရွာရှိ နေအိမ်တစ်လုံးပေါ်သို့ ဒရုန်းဗုံးကျရောက်ပေါက်ကွဲခဲ့သဖြင့် အမျိုးသမီးတစ်ဦး သေဆုံးခဲ့ရပြီး ဒဏ်ရာရရှိသူများလည်း ရှိခဲ့သည်။ လက်ရှိတွင် ကွတ်ခိုင်၌ သေနတ်သံများ ငြိမ်သက်နေသော်လည်း နမ့်ခမ်းမြို့နယ်ဘက်တွင်မူ MNDAA က အင်အားဖြည့်တင်းကာ တိုက်ပွဲများ ဆက်လက်ဖြစ်ပွားနေဆဲဖြစ်ကြောင်း မြေပြင်သတင်းရင်းမြစ်က ပြောသည်။ ညီနောင်မဟာမိတ် အချင်းချင်းကြား ဖြစ်ပွားနေသည့် ယခုပဋိပက္ခအပေါ် လက်နက်ကိုင် ဖြေရှင်းခြင်း မပြုရန် အရပ်ဘက် အဖွဲ့အစည်းများကလည်း တိုက်တွန်းထားကြသည်။ တအာင်းအရပ်ဘက် အဖွဲ့အစည်းများကွန်ရက်က မတ်လ ၁၆ ရက်နေ့တွင် ထုတ်ပြန်ချက်တစ်စောင် ထုတ်ပြန်ခဲ့ ပြီး မဟာမိတ်အချင်းချင်းကြား စစ်ရေးပဋိပက္ခသည် စစ်အာဏာရှင်အတွက် အခွင့်အလမ်းများ ဖြစ်ပေါ်စေနိုင်ပြီး နွေဦးတော်လှန်ရေးကို စိန်ခေါ်မှုဖြစ်စေသဖြင့် စစ်ရေးကို ချက်ချင်းရပ်တန့်ကာ စားပွဲဝိုင်းတွင် ညှိနှိုင်းဖြေရှင်းကြ ရန် တိုက်တွန်းထားသည်။ ထို့ပြင် အမျိုးသားညီညွတ်ရေး အတိုင်ပင်ခံ ကောင်စီ (NUCC) နှင့် ကျန်းမာရေးအင်အားစု အသီးသီးကလည်း ယခုဖြစ်စဉ်ကို မိတ်ဖက်ပဋိပက္ခအဖြစ် ရှုမြင်ကာ နိုင်ငံရေးအရ ငြိမ်းချမ်းစွာ တွေ့ဆုံဆွေးနွေးကြရန် ပန်ကြားထား ကြသည်။ TNLA ဘက်ကမူ ၎င်းတို့အနေဖြင့် မဟာမိတ်အချင်းချင်းကြား ပြန်လည်ပစ်ခတ်ခြင်းမပြုဘဲ တွေ့ဆုံဆွေးနွေးရေး လမ်းကြောင်းဖြင့်သာ ကြိုးစားအဖြေရှာသွားမည်ဟု ထုတ်ပြန်ထားသည်။ သို့သော် MNDAA ဘက်ကမူ TNLA က ဦးစွာသေနတ်ဖောက်သဖြင့် တိုက်ပွဲစတင်ရခြင်းဖြစ်ကြောင်း မတ်လ ၁၄ ရက်နေ့တွင် ထုတ်ပြန်ထားရာ နှစ်ဖက်တပ်များကြား စစ်ရေးတင်းမာမှုသည် ကွတ်ခိုင်မှ နမ့်ခမ်းမြို့နယ် ဘက်သို့ ဆက်လက် ကူးစက်နေဆဲဖြစ်သည်။ #MNDAA #ကိုးကန့်တပ် #TNLA #တအာင်းတပ် #ကွတ်ခိုင်တိုက်ပွဲ #NUCC #

ဗျူဟာကုန်း ကျပြီးနောက် ကွတ်ခိုင်တစ်မြို့လုံးကို MNDAA ထိန်းချုပ်

« Prev 1 … 6 7 8 9 10 … 18 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

Elon Musk ကမ္ဘာ့ ပထမဆုံး ထရီလီယံနာ ဖြစ်လာ
စစ်တွေနှင့် ၄ မိုင်အကွာသို့ AA ထိုးစစ်ဆင်လာပြီး ဒကစ အရာရှိမိသားစုများ တပ်ရင်း စခန်းများသို့ အရေးပေါ်ဆုတ်ခွာ
ကမ္ဘာ့ဖလား ဖွင့်ပွဲတွင် မက္ကဆီကို အစိုးရအား ဆန့်ကျင် ဆန္ဒပြမှုများ ပြုလုပ်
အသက် ၁၆ နှစ်အောက် ကလေးများ လူမှု ကွန်ရက် သုံးစွဲမှု တားမြစ်ရန် ဆိုရှယ်မီဒီယာ သုံးစွဲမှု တားမြစ်
စစ်အုပ်စု ခေါင်းဆောင် တရုတ်ပြည် သွားမည်

Archives

Archives

×Close