March 2026 – Page 10 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Monthly Archive

Archive: March 2026

Mar 15

ကွတ်ခိုင် မြို့ပေါ်နှင့် အနီးဝန်းကျင် တပ်စခန်း အများစုကို ကိုးကန့်တပ် MNDAA က စိုးမိုးထားပြီ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၁၅ ရက်။ ရှမ်းပြည် မြောက်ပိုင်း၊ ကွတ်ခိုင်မြို့ပေါ်ရှိ နေရာအများစုနှင့် အနီးဝန်းကျင်ရှိ တအာင်းတပ် TNLA စခန်းများကို ကိုးကန့်တပ် MNDAA က ဝင်ရောက်စိုးမိုးထားပြီ ဖြစ်ကြောင်း စစ်ရေးသတင်းရင်းမြစ်များနှင့် မြို့ခံများက ပြောသည်။ ယနေ့ မတ်လ ၁၅ ရက်နေ့ နံနက်ပိုင်းတွင် ကွတ်ခိုင်မြို့ပေါ်ရှိ TNLA ၏ နောက်ဆုံးခုခံစစ် စခန်းဖြစ်သော ဗျူဟာကုန်းကို MNDAA က ဒရုန်းအစင်းရေများစွာ အသုံးပြု၍ အပြင်းအထန် ထိုးစစ်ဆင်တိုက်ခိုက်လျက် ရှိသည်။ ကွတ်ခိုင်မြို့ခံ တစ်ဦးက မြို့ပေါ်အခြေအနေနှင့် ပတ်သက်၍ “ကွတ်ခိုင်မြို့မှာ ရပ်ကွက်ကြီး ၈ ခု ရှိတယ်။ စစ်တပ်စခန်း၊ ရဲစခန်းတွေ ရှိတဲ့ ရပ်ကွက် (၁) မှာ တိုက်ပွဲတွေက အပြင်းအထန်ဆုံး ဖြစ်နေတာဗျ။ မနေ့ ညကတည်းက ဒရုန်းတွေ ဆက်တိုက် ပစ်တာ ဒီနေ့အထိပဲ။ အခု MNDAA တပ်ဖွဲ့ဝင်တွေက မြို့ပေါ်က အိမ်တွေကို သွားရောက်ပြီး အရပ်သားတွေနဲ့ တွေ့ဆုံနေပြီ” ဟု ပြောသည်။ ယနေ့ နံနက် ၈ နာရီခန့်မှစ၍ ကွတ်ခိုင်မြို့ အမှတ် (၁) ရပ်ကွက်ရှိ TNLA ၏ မြို့စောင့်တပ် ဗျူဟာကုန်းကို MNDAA က ဒရုန်း ၁၀ စင်းထက်မနည်းဖြင့် ဗုံးကြဲတိုက်ခိုက်နေပြီး၊ နံနက် ၁၀ နာရီခွဲအထိ ဒရုန်းဗုံး ၁၀၀ ထက်မနည်း အသုံးပြုကာ မြေပြင်စီးနင်းရန် ကြိုးပမ်းနေကြောင်း ဆိုသည်။ TNLA ဘက်မှလည်း ဗျူဟာကုန်းမှနေ၍ အပြင်းအထန်ပြန်လည် ခုခံနေသဖြင့် ထိတွေ့တိုက်ပွဲ ပြင်းထန်နေဆဲ ဖြစ်သည်။ စစ်ရေးသတင်းရင်းမြစ်များ၏ အဆိုအရ MNDAA သည် တပ်အင်အား အများအပြားကို အသုံးပြု၍ ကွတ်ခိုင် မြို့နယ်ရှိ နမ့်ဖတ်ကာနှင့် ၁၂ မိုင်ရွာတို့ကိုပါ ထိုးစစ်ဆင်နေပြီး၊ နမ့်ခမ်းမြို့အထိပါ သိမ်းယူရန် ရည်ရွယ်ထားပုံရသည်ဟုလည်း ဆိုသည်။ ယနေ့နံနက်ပိုင်းတွင် ကွတ်ခိုင်နှင့် နမ့်ခမ်းကြားရှိ မိုင်းယုလေးဒေသကို MNDAA က ထိန်းချုပ်လိုက်ပြီဟု ဆို သည်။ တိုက်ပွဲများကြောင့် မူဆယ်မြို့နယ် ၁၀၅ မိုင် နယ်စပ်ကုန်သွယ်ရေးဇုန် အဝင်အထွက်ကိုလည်း MNDAA ဘက်က ပိတ်ထားသည်။ မူဆယ် ၁၀၅ မိုင် အခြေအနေနှင့် ပတ်သက်၍ ဒေသခံအမျိုးသားတစ်ဦးက “ဒီနေ့ မနက် ၉ နာရီလောက်ကစပြီး ကား၊ ဆိုင်ကယ် အဝင်အထွက် ပေးမလုပ်တော့ဘူး။ အရေးပေါ်ဘာကိစ္စနဲ့မှတောင် ပေးမထွက်တော့ဘူး” ဟု ပြောသည်။ အလားတူ လားရှိုး-နမ္မတူကြားရှိ အီနိုင်းတံတားကိုလည်း ပိတ်ထားသဖြင့် ကုန်စည်စီးဆင်းမှုများ ရပ်တန့်နေ သည်။ ယခုဖြစ်ပွားနေသည့် ပဋိပက္ခသည် ဖေဖော်ဝါရီလ ၁၃ ရက်နေ့က ကွတ်ခိုင်ရှိ MNDAA အုပ်ချုပ်ရေးရုံးများကို TNLA ဘက်က ဖယ်ရှားခဲ့ရာမှ စတင်ခဲ့ခြင်းဖြစ်သည်။ MNDAA က TNLA ဘက်မှ ကင်းလှည့်တပ်ဖွဲ့ကို စတင်တိုက်ခိုက်ခဲ့သဖြင့် တန်ပြန်ခုခံရခြင်း ဖြစ်ကြောင်း ထုတ်ပြန်ထားပြီး၊ TNLA ဘက်ကမူ ၎င်းတို့အနေဖြင့် 'မိတ်ဖက်ပြဿနာ' ဟုသာ သတ်မှတ်ထားသဖြင့် ပြန်လည် ပစ်ခတ်ခြင်းမပြုဘဲ တွေ့ဆုံဆွေးနွေးရန် ကြိုးစားနေကြောင်း ဆိုထားသည်။ လက်ရှိတွင် အမျိုးသားညီညွတ်ရေး အတိုင်ပင်ခံကောင်စီ (NUCC) ကလည်း တိုက်ပွဲများကို ချက်ချင်းရပ်တန့်ရန် တောင်းဆိုထားသော်လည်း မြေပြင်တွင်မူ နှစ်ဖက်စစ်ရေးတင်းမာမှုများမှာ နမ့်ခမ်းမြို့ဘက်သို့ ဦးတည်နေပြီး ပိုမိုပြင်းထန်လာမည့်အခြေအနေတွင် ရှိနေသည်။ #TNLA #MNDAA #MNDAAထိုးစစ် #ကွတ်ခိုင်တိုက်ပွဲ

ကွတ်ခိုင် မြို့ပေါ်နှင့် အနီးဝန်းကျင် တပ်စခန်း အများစုကို ကိုးကန့်တပ် MNDAA က စိုးမိုးထားပြီ

Mar 15

ကြက်ခြေနီ အဖွဲ့အား အခြေအနေပြောပြသည့် နိုင်ကျဉ်း ရိုက်နှက်ခံရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၁၅ ရက်။ ICRC ထံ အခြေအနေများ တင်ပြသည့် နိုင်ငံရေး အကျဉ်းသားအား သာယာဝတီထောင် အာဏာပိုင်များ က ဝိုင်းဝန်းရိုက်နှက်ပြီး ဆေးကုသခွင့်ပါ ပိတ်ပင်ထားသည်။ ပဲခူးတိုင်း၊ သာယာဝတီ အကျဉ်းထောင်အတွင်း နိုင်ငံတကာ ကြက်ခြေနီ ကော်မတီ (ICRC) နှင့် တွေ့ဆုံစဉ် ထောင်တွင်းဖိနှိပ်မှုများကို တင်ပြခဲ့သည့် နိုင်ငံရေးအကျဉ်းသား ကိုမျိုးကျော်ထက် (ခ) သိုးသိုးမှာ အကျဉ်းထောင် အာဏာပိုင်များ၏ ဝိုင်းဝန်းရိုက်နှက်ခြင်းကို ခံလိုက်ရသည်။ ၎င်းသည် လက်ရှိတွင် ပြင်းထန်ဒဏ်ရာများဖြင့် တိုက်ပိတ်ခံထားရပြီး လိုအပ်သည့် ဆေးကုသခွင့်များလည်း ပိတ်ပင်ခံထားရကြောင်း မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် (PPNM) က ထုတ်ပြန်သည်။ ဖြစ်စဉ်မှာ ပြီးခဲ့သည့် ဖေဖော်ဝါရီလအစောပိုင်းတွင် ICRC အဖွဲ့ သာယာဝတီထောင်သို့ လာရောက်သည့် ခရီးစဉ် အတွင်း ကိုမျိုးကျော်ထက်က အကျဉ်းသားများ၏ ရပိုင်ခွင့်များ ဆုံးရှုံးနေမှုနှင့် ဖိနှိပ်ခံရသည့် အခြေအနေများကို တင်ပြခဲ့ခြင်း ဖြစ်သည်။ ထိုသို့ တင်ပြခဲ့မှုအပေါ် မကျေနပ်သည့်အတွက် ဖေဖော်ဝါရီလ ၇ ရက်နေ့တွင် အကျဉ်းဦးစီးအရာရှိ ကြည်ဖြိုးအောင် ဦးဆောင်သောအဖွဲ့က ကိုမျိုးကျော်ထက်ကို ပင်မအကျဉ်းထောင်အတွင်းသို့ ခေါ်ဆောင်သွား ကာ လူမဆန်စွာ ဝိုင်းဝန်းရိုက်နှက်ခဲ့ကြခြင်း ဖြစ်သည်။ PPNM ဦးဆောင်ကော်မတီဝင် ကိုသိုက်ထွန်းဦးက “အကျဉ်းသားဆိုတာ အခက်အခဲနဲ့ ကြုံတွေ့ရမှုတွေ တင်ပြမှု၊ လွတ်လပ်စွာ ထုတ်ဖော်ပြောဆိုခွင့် မရှိရင် အဲ့ဒီနိုင်ငံဟာ စစ်အာဏာရှင် အုပ်စိုးတဲ့ လူ့အခွင့်အရေး ဆိုးဝါးတဲ့နိုင်ငံ ဖြစ်ပါတယ်။ နိုင်ငံတကာလို အဖွဲ့အစည်းလိုမျိုး တင်ပြတာတောင် ဒီလိုဖြစ်တယ်ဆိုရင် ပုံမှန် အခြေအနေမှာ ဘယ်လောက်ထိ ဆိုးဝါးနေမလဲဆိုတာကို နိုင်ငံတကာအနေနဲ့ ပိုပြီးတော့မှ တွေးဆကြည့်လို့ရမယ်လို့ ပြောချင် ပါတယ်” ဟု ပြောသည်။ ထောင်ဝန်ထမ်းများ၏ ဝိုင်းဝန်းရိုက်နှက်မှုကြောင့် ကိုမျိုးကျော်ထက်မှာ မျက်နှာတစ်ခြမ်း ဖူးယောင်ညိုမဲခြင်း၊ နားအတွင်းမှ သွေးထွက်သံယိုဖြစ်ခြင်း စသည့် ပြင်းထန်ဒဏ်ရာများ ရရှိခဲ့သည်။ သို့သော်လည်း မတ်လလယ်အထိ ၎င်းအား ဆေးကုသခွင့်မပေးသည့်အပြင် အပြင်လူများနှင့်ပါ အဆက်အသွယ် ဖြတ်တောက်ထားသည်။ အကျဉ်းသားများက အဆိုပါ မတရားမှုကို အရေးယူပေးရန် တောင်းဆိုသည့်အခါတွင်လည်း အာဏာပိုင်များက လက်နက်များဖြင့် ခြိမ်းခြောက်ခဲ့သည်ဟု ဆိုသည်။ ကိုသိုက်ထွန်းဦးက ဆက်လက်၍ “ဒီပုံစံက ဘာကို သွားနေလဲဆိုတော့ Jungle Law ဥပဒေအရ ထောင်ထဲမှာ ထောင်အာဏာပိုင်တွေက လုပ်ချင်တာ လုပ်လို့ရတယ် အဲ့ဒါကို ထောက်ပြတဲ့ သူတွေပါ အန္တရာယ်ရှိနိုင်တယ် ဆိုတာမျိုးပေါ့နော်။ ဒါကို မသိချင်ယောင် ဆောင်ကြဖို့ဆိုတဲ့ သဘောမျိုး ရိုက်သွင်းနေတယ်လို့ ပြောချင်ပါ တယ်” ဟု ပြောသည်။ သာယာဝတီထောင်တွင် ပြီးခဲ့သည့် ဖေဖော်ဝါရီ ၂ ရက်နေ့ကလည်း နိုင်ငံရေးအကျဉ်းသား ၃ ဦးက စားသောက် ရေးနှင့် ကျန်းမာရေး အခက်အခဲများကို တင်ပြခဲ့ဖူးသည်။ လက်ရှိတွင် နိုင်ငံတကာ အဖွဲ့အစည်းများနှင့် တွေ့ဆုံတင်ပြမှုအပေါ် လက်တုံ့ပြန် ညှဉ်းပန်းနှိပ်စက်နေခြင်းမှာ အကျဉ်းသားများ၏ အသက်အန္တရာယ်ကို တိုက်ရိုက်ခြိမ်းခြောက်နေခြင်း ဖြစ်ပြီး သာယာဝတီထောင်တွင်းရှိ နိုင်ငံရေး အကျဉ်းသားများမှာ အကာအကွယ်မဲ့စွာဖြင့် စိုးရိမ်ထိတ်လန့်နေရကြောင်း PPNM က ဆိုသည်။ #PPNM #သာယာဝတီအကျဉ်းထောင် #ICRC #ကြက်ခြေနီအဖွဲ့

ကြက်ခြေနီ အဖွဲ့အား အခြေအနေပြောပြသည့် နိုင်ကျဉ်း ရိုက်နှက်ခံရ

Mar 15

တော်လှန်ရေးတပ်များ သိမ်းလိုက်သည့် ဝင်းဝ စခန်း ဝန်းကျင်ကို စစ်ကော်မရှင် ဗုံးကြဲ သတင်းနှင့်မီဒီယာ ကွန်ရက်။ ၂၀၂၆ ခုနှစ်၊ မတ်လ ၁၅ ရက်။ တနင်္သာရီတိုင်း၊ ထားဝယ်ခရိုင်အတွင်းရှိ ဝင်းဝစခန်းကို တော်လှန်ရေးပူးပေါင်းတပ်များက သိမ်းပိုက်နိုင်ခဲ့ပြီး နောက် စစ်ကော်မရှင်တပ်က အနီးဝန်းကျင်ရှိ အရပ်သားကျေးရွာများကို လေကြောင်းမှတစ်ဆင့် ဗုံးကြဲ တိုက်ခိုက်မှုများ ဆက်တိုက်လုပ်ဆောင်နေကြောင်း ဒေသခံများက ပြောသည်။ သရက်ချောင်းမြို့နယ် အောက်ပိုင်းရှိ ဝင်းကဖော်နှင့် ဂုံညှင်းဆိပ်ကျေးရွာတို့ကို စစ်တပ်က မတ်လ ၁၂ ရက်နှင့် ၁၃ ရက်နေ့တို့တွင် တိုက်လေယာဉ်များအသုံးပြု၍ ပစ်မှတ်ထားတိုက်ခိုက်ခဲ့ခြင်းဖြစ်သည်။ အဆိုပါကျေးရွာများတွင် တိုက်ပွဲဖြစ်ပွားခြင်းမရှိဘဲ စစ်ကော်မရှင်တပ်က အရပ်သားပစ်မှတ်များကိုသာ ရည်ရွယ်ချက်ရှိရှိ တိုက်ခိုက်ခဲ့ခြင်းဖြစ်သည်ဟု ဆိုသည်။ အသက် ၅၀ ခန့်အရွယ်ရှိ ဂုံညှင်းဆိပ်ရွာသားတစ်ဦးက “ပင်လယ်ကမ်းခြေရွာဖြစ်တဲ့ ဂုံညှင်းဆိပ်ကျေးရွာကို မတ်လ ၁၂ ရက်နေ့ မနက် ၁၀ နာရီခန့်နဲ့ မွန်းလွဲ ၁ နာရီခွဲလောက်မှာ K8W တိုက်လေယာဉ်နဲ့ ဗုံးကြဲခဲ့တယ်၊ စက် သေနတ်နဲ့လည်း ဘုန်းကြီးကျောင်းဘက်ကို လှည့်ပတ်ပစ်ခတ်ခဲ့သေးတယ်၊ လူထိခိုက်တာတော့ မရှိပါဘူး” ဟု ပြောသည်။ ထို့အပြင် မတ်လ ၁၃ ရက်နေ့ မွန်းလွဲပိုင်းတွင်လည်း ဝင်းဝစခန်းနှင့် ၇ မိုင်ခန့်အကွာရှိ ဝင်းကဖော်ကျေးရွာကို K8W တိုက်လေယာဉ်ဖြင့် ပေါင် ၂၅၀ ဗုံး နှစ်လုံး ကြဲချခဲ့သည့်အပြင် စက်သေနတ်ဖြင့်ပါ လိုက်လံပစ်ခတ်ခဲ့သဖြင့် ရွာသားတစ်ဦး ဒဏ်ရာရရှိခဲ့ကြောင်း သိရသည်။ မြိတ် - ထားဝယ်သွား အမှတ် (၈) ပြည်ထောင်စုလမ်းမကြီးပေါ်ရှိ ဝင်းဝစခန်းကို KNU တပ်မဟာ (၄)၊ KNLA တပ်ရင်း (၁၂)၊ တပ်ရင်း (၂၇) နှင့် PDF ပူးပေါင်းတပ်ဖွဲ့များက မတ်လ ၁၁ ရက်နေ့တွင် အပြီးသတ် တိုက်ခိုက် သိမ်းပိုက်ခဲ့ခြင်းဖြစ်သည်။ စစ်ရေးအရ အရေးပါသော စခန်းတစ်ခုကို လက်လွှတ်ခဲ့ရပြီးနောက် စစ်ကော်မရှင်တပ်သည် ဒေါသတကြီးဖြင့် ပတ်ဝန်းကျင်ရှိ ကျေးရွာများသို့ လက်နက်ကြီးနှင့် လေကြောင်းပစ်ကူများ သုံးစွဲကာ အဆက်မပြတ် ခြိမ်းခြောက် လာနေခြင်း ဖြစ်သည်။ အမျိုးသားညီညွတ်ရေး အစိုးရ (NUG) တနင်္သာရီတိုင်း စစ်ဌာနကလည်း စစ်ကော်မရှင်သည် စခန်းလက်လွှတ် ရမှု အပေါ် လက်တုံ့ပြန်သည့် အနေဖြင့် လေကြောင်းတိုက်ခိုက်မှုများ ပိုမိုလုပ်ဆောင်လာနိုင်ကြောင်း သတိပေးချက် ထုတ်ပြန်ထားသည်။ ဒေသခံပြည်သူများ အနေဖြင့် လေကြောင်းရန်ကို အထူးသတိပြုကာ ဗုံးခိုကျင်းများ အဆင်သင့်ပြင်ဆင်ထားရန် နှင့် ဘေးကင်းရာသို့ ကြိုတင်ရှောင်တိမ်းကြရန် မြေပြင်ကယ်ဆယ်ရေးအဖွဲ့များက နှိုးဆော်ထားသည်။ ဓါတ်ပုံ - ဗုံးကြဲခဲ့သည့် နေရာများကို ပြည်သူ့ကာကွယ်ရေးတပ်ဖွဲ့က ကြည့်ရှု့စစ်ဆေးနေစဥ် #ဝင်းဝစခန်း #ဗုံးကြဲတိုက်ခိုက် #KNLA #PDF #စစ်ကော်မရှင်

တော်လှန်ရေးတပ်များ သိမ်းလိုက်သည့် ဝင်းဝ စခန်း ဝန်းကျင်ကို စစ်ကော်မရှင် ဗုံးကြဲ

Mar 15

ဧရာဝတီတိုင်းတွင် လွှတ်တော် ကျင်းပရန် ဘတ်ဂျက် မရှိသေး သတင်းနှင့် မီဒီယာ ကွန်ရက်။ ၂၀၂၆ ခုနှစ် မတ်လ ၁၅ ရက်။ စစ်ကော်မရှင်၏ ၂၀၂၅ ခုနှစ် ရွေးကောက်ပွဲအပြီး တိုင်းဒေသကြီးလွှတ်တော် ခေါ်ယူရန် ရက်ပိုင်းသာ လိုတော့ သော်လည်း ဘတ်ဂျက်ချထားပေးခြင်း မရှိသဖြင့် ဧရာဝတီတိုင်းရှိ စီးပွားရေးလုပ်ငန်းရှင်များထံမှ လိုက်လံ အလှူခံနေရကြောင်း လွှတ်တော်ဝန်ထမ်း မိသားစုများနှင့် နီးစပ်သူက ပြောသည်။ ဧရာဝတီတိုင်းဒေသကြီး လွှတ်တော်ကို လာမည့် မတ်လ ၂၀ ရက်နေ့တွင် စတင်ကျင်းပရန် လျာထားသော်လည်း လွှတ်တော်ကိုယ်စားလှယ်များကို ဧည့်ခံကျွေးမွေးရန်အတွက် တိုင်းအစိုးရထံမှ ရန်ပုံငွေ ချပေးလာခြင်း မရှိသေးပေ။ ထို့ကြောင့် လွှတ်တော်ဝန်ထမ်းအသိုင်းအဝိုင်းက စီးပွားရေးလုပ်ငန်းရှင်များထံ ချဉ်းကပ်ကာ အလှူငွေ ရှာဖွေနေရခြင်း ဖြစ်သည်ဟု ဆိုသည်။ ဒေသခံ စီးပွားရေးလုပ်ငန်းရှင် တစ်ဦးက “အစိုးရကငွေချမပေးဘူး စစ်တပ်က လာကြတာဆိုတော့လည်း တပ်ထုံးစံ ရေးဗူးပေါက်တာ မလိုချင်ဘူး ရေပါဖို့ပဲလေ အောက်ကလူတွေကလည်း ငွေရနိုင်မယ့်သူတွေဆီကပဲ အလှုခံပါတယ်ဆိုပြီး အေးဓမြတိုက်ကြတော့တာပေါ့” ဟု ပြောသည်။ လွှတ်တော်အစည်းအဝေး တက်ရောက်မည့် ကိုယ်စားလှယ် စုစုပေါင်း ၇၅ ဦး ရှိမည်ဖြစ်ပြီး တစ်ဦးလျှင် တစ်နေ့ ထမင်းသုံးနပ်နှင့် လက်ဖက်ရည် နှစ်ကြိမ် ကျွေးမွေးရမည်ဖြစ်သည်။ လွှတ်တော်ဝန်ထမ်းများနှင့် နီးစပ်သူတစ်ဦးက “တယောက်ကို ‌တနေ့အတွက် ၆၀၀၀ ကျပ်နဲ့ပဲ အနည်းဆုံးထား ပြီး တွက်ဦး တနေ့ ၄၅၀,၀၀၀ ကျပ် ကုန်မယ်။ ဒါက အကုန်လျော့ချပြီးတော့ တွက်ထားတာနော်။ တစ်ပတ်စာ ကျွေးမွေးရမှာ” ဟု ပြောသည်။ လက်ရှိတွင် တစ်နေ့လျှင် ဆန် ၂၄ ပြည်ဝင် တစ်အိတ်ခန့် ကုန်ကျမည်ဟု ခန့်မှန်းထားပြီး အလှူရှင်တစ်ဦးထံမှ ဆန် ၄ အိတ် ရရှိထားပြီဖြစ်ကြောင်း ဝန်ထမ်းအချို့က ပြောသည်။ သို့သော် အစိုးရအဖွဲ့က ဘတ်ဂျက်မသုံးဘဲ လုပ်ငန်းရှင်များထံမှ အလှူခံသည့် လုပ်ရပ်သည် အဂတိလိုက်စားမှု ကို ဖိတ်ခေါ်နေသကဲ့သို့ ဖြစ်နေကြောင်း ဝေဖန်မှုများ ထွက်ပေါ်နေသည်။ ပုသိမ်မြို့မှ လုပ်ငန်းရှင်ကြီး တစ်ဦးက “စီးပွားရေးသမားတွေကတော့ အာဏာရှိတဲ့ အုပ်ချုပ်သူတွေနဲ့ မကင်းနိုင် တော့ အလှူငွေဆိုတာနဲ့ ထည့်ပေးကြရတာပဲ ဘယ်လက်က တဆုပ်ပေးလိုက်ရရင် ညာလက်က နှစ်ဆုပ် ပြန်နှိုက် ဖို့ ပြင်ထားပြီးသား။ အဲဒီတော့စဉ်းစားကြည့်ဗျာ အဂတိတွေနဲ့ အပေးအယူတွေ မကင်းတော့ဘူး” ဟု ပြော သည်။ လွှတ်တော်ကျင်းပရန် ကုန်ကျမည့်ငွေ ပမာဏသည် သိန်း ၄၀ နှင့် ၅၀ ကြားသာ ရှိနိုင်သဖြင့် တိုင်းအစိုးရ အနေ ဖြင့် ဂုဏ်သိက္ခာရှိရှိ သုံးစွဲသင့်ကြောင်း ပုသိမ်မြို့နေ ၈၈ မျိုးဆက် နိုင်ငံရေးသမား တစ်ဦးက အကြံပြု သည်။ စစ်ကော်ရှင်၏ ထုတ်ပြန်ချက်အရ မတ်လ ၁၆ ရက်နေ့တွင် ပြည်သူ့လွှတ်တော်၊ မတ်လ ၁၈ ရက်နေ့တွင် အမျိုးသား လွှတ်တော်နှင့် မတ်လ ၂၀ ရက်တွင် တိုင်းနှင့်ပြည်နယ် လွှတ်တော်များကို အသီးသီး ကျင်းပသွားမည် ဖြစ်သည်။ သို့သော် လွှတ်တော်မစတင်မီကပင် ဘတ်ဂျက် အခက်အခဲကြောင့် အလှူခံနေရသည့် ဖြစ်စဉ်မှာ အုပ်ချုပ်ရေး ယန္တရား၏ အားနည်းချက်ကို ပြသနေကြောင်း ဒေသတွင်း သတင်းရင်းမြစ်များက ဆိုကြသည်။ #လွှတ်တော်ဘတ်ဂျတ် #ဧရာဝတီတိုင်း

ဧရာဝတီတိုင်းတွင် လွှတ်တော် ကျင်းပရန် ဘတ်ဂျက် မရှိသေး

Mar 15

ကိုးကန့်တပ် (MNDAA) နှင့် တအာင်းတပ် (TNLA)တို့ကြား ဒုတိယမြောက်နေ့ တိုက်ပွဲ ဆက်ဖြစ် သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ မတ်လ ၁၅ ရက်။ ရှမ်းပြည် မြောက်ပိုင်း၊ ကွတ်ခိုင်နှင့် နမ့်ခမ်းဒေသတို့တွင် ညီနောင်မဟာမိတ် တပ်ဖွဲ့ဝင်များ ဖြစ်ကြသည့် ကိုးကန့် တပ် (MNDAA) နှင့် တအာင်းတပ် (TNLA) တို့အကြား နယ်မြေအငြင်းပွားမှုမှစတင်ကာ ဒုတိယ မြောက်နေ့ အဖြစ် တိုက်ပွဲများ ဆက်လက်ပြင်းထန်နေကြောင်း ဒေသခံများက ပြောသည်။ ယနေ့ မတ်လ ၁၅ ရက်နေ့ နံနက် ၆ နာရီကျော်အချိန်မှ စတင်၍ နမ့်ဖတ်ကာနှင့် နမ့်ခမ်းမြို့အကြားရှိ လားရှိုး -နမ့်ခမ်း - ပန်ဆိုင်း လမ်းကြောင်းပေါ်မှ အရေးပါသော ၁၂ မိုင် TNLA စစ်ဆေးရေးဂိတ်ကို MNDAA က ဒရုန်းများ အသုံးပြု၍ အပြင်းအထန် ဗုံးကြဲတိုက်ခိုက်ခဲ့ခြင်းဖြစ်သည်။ အဆိုပါ ၁၂ မိုင်ဂိတ်သည် ဒေသတွင်း ကုန်သွယ်ရေးနှင့် သွားလာရေးအတွက် အချက်အချာကျသော နေရာတစ်ခု ဖြစ်ပြီး ယခင်က နှစ်ဖက်တပ်များ ပူးတွဲလှုပ်ရှားခဲ့ဖူးသည့် ရှုပ်ထွေးသောနယ်မြေလည်း ဖြစ်သည်။ တိုက်ပွဲအခြေအနေနှင့် ပတ်သက်၍ နမ့်ခမ်းဒေသခံ အမျိုးသားတစ်ဦးက “ဒီနေ့ ဒုတိယနေ့မှာတော့ နမ့်ဖတ်ကာနဲ့ နမ့်ခမ်းကြားထဲမှာရှိတဲ့ ၁၂ မိုင်က TNLA ရဲ့ တပ်စခန်းတစ်ခုကို MNDAA က ဒီမနက် ၆ နာရီကျော်လောက်မှာ ဒရုန်းတွေနဲ့ လာရောက်ပစ်ခတ်တာတွေ တွေ့ရပါတယ်။ အဲဒါကြောင့် အခုအချိန်ထိ နမ့်ခမ်းမြို့ပေါ်ကနေဆို အသံတွေ တဝုန်းဝုန်း ကြားနေရတာ။ လက်ရှိအချိန်ထိ အသံတွေ ထွက်နေတုန်းပဲ” ဟု ပြောသည်။ ယမန်နေ့ မတ်လ ၁၄ ရက် နံနက်ပိုင်းမှ စတင်ကာ ကွတ်ခိုင်မြို့ အပါအဝင် မူဆယ် ၁၀၅ မိုင်၊ နမ့်ဖတ်ကာနှင့် မုံစီး စသည့် နေရာ ၅ ခုထက်မနည်းရှိ TNLA တပ်စခန်းများကို MNDAA ဘက်မှ တစ်ပြိုင်နက်တည်း ထိုးစစ်ဆင်ခဲ့ ခြင်းဖြစ်ပြီး၊ ယနေ့တွင်လည်း ကွတ်ခိုင်မြို့ပေါ်ရှိ ဗျူဟာကုန်းကို သိမ်းပိုက်နိုင်ရန် MNDAA ဘက်မှ စစ်ကြောင်း များခွဲ၍ ဖိအားပေး တိုက်ခိုက်နေကြောင်း ဒေသခံများက ပြောသည်။ တိုက်ပွဲများကြောင့် ဒေသခံများမှာ အိုးအိမ်စွန့်ခွာ တိမ်းရှောင်ခြင်း မရှိသေးသော်လည်း နေ့စဉ်ပုံမှန်လုပ်ငန်းများ ရပ်နားထားရပြီး ဗုံးခိုကျင်းများအတွင်း ပုန်းအောင်းနေကြရသည်။ ဒေသခံပြည်သူတစ်ဦးက “ပြည်သူလူထု တစ်ယောက်အနေနဲ့ကတော့ တိုက်ပွဲတွေ ဆက်မဖြစ်စေချင်တော့ဘူး။ ဘာလို့လဲဆိုတော့ သိတဲ့အတိုင်းပဲ ရှမ်းမြောက်မှာက တစ်ချိန်လုံး တိုက်ပွဲဒဏ်ကို အလူးအလဲ ခံခဲ့ရပြီးပြီ။ အဖက်ဖက်ကနေ နစ်နာမှုတွေ အများကြီး ရှိခဲ့တယ်။ ကျနော်တို့က ဖြစ်နိုင်ရင်တော့ ငြိမ်းငြိမ်းချမ်းချမ်းနဲ့ပဲ ပြီးသွားစေချင်တယ်” ဟု ပြောသည်။ ပဋိပက္ခ၏ အစပြုမှုနှင့် ပတ်သက်၍ ကိုးကန့်တပ် MNDAA နှင့် တအာင်းတပ် TNLA တို့ နှစ်ဖက်ကြား အပြန်အလှန် စွပ်စွဲချက်များလည်း ရှိနေသည်။ MNDAA ဘက်က ဖေဖော်ဝါရီလ ၁၃ ရက်နေ့တွင် ကွတ်ခိုင်ရှိ ၎င်းတို့ရုံးများကို TNLA ဘက်မှ ဝင်ရောက် စီးနင်းခဲ့မှုအပေါ် အကြောင်းကြားစာ (၅) ကြိမ် ပေးပို့ခဲ့သော်လည်း လျစ်လျူရှုခံခဲ့ရကြောင်းနှင့် မတ်လ ၁၄ ရက်တွင် TNLA ဘက်က စတင်တိုက်ခိုက်ခဲ့သဖြင့် ယခုဖြစ်စဉ်များ ပေါ်ပေါက်လာခြင်းဖြစ်သည်ဟု ထုတ်ပြန် ထားသည်။ သို့သော် TNLA ဘက်ကမူ MNDAA သည် ၎င်းတို့၏ တပ်ဖွဲ့ဝင် ၁၁၀ ကျော်ကို ဖမ်းဆီးထားကြောင်းနှင့် ပြဿနာ ကို ငြိမ်းချမ်းစွာ ဖြေရှင်းလိုသော်လည်း MNDAA ဘက်က ရည်ရွယ်ချက်ရှိရှိ စစ်ရေးအရ ဖိအားပေး တိုက်ခိုက်နေခြင်းဖြစ်သည်ဟု တုံ့ပြန်ထားသည်။ ထိုဖြစ်စဉ်နှင့် ပတ်သက်၍ အမျိုးသားညီညွတ်ရေး အတိုင်ပင်ခံကောင်စီ (NUCC) ကလည်း လက်နက်ကိုင် တိုက်ပွဲများကို ချက်ချင်းရပ်တန့်ရန်နှင့် နိုင်ငံရေးအရ ငြိမ်းချမ်းစွာ တွေ့ဆုံဆွေးနွေးရန် ယနေ့တွင် ထုတ်ပြန် တောင်းဆိုထားသည်။ လက်ရှိတွင် ရှမ်းမြောက်ဒေသရှိ တော်လှန်ရေး အင်အားစုများအကြား ဖြစ်ပွားနေသောတိုက်ပွဲများမှာ ပိုမို ကျယ်ပြန့်လာမည်ကို စစ်ရေးလေ့လာသူများနှင့် ဒေသခံများက အထူးစိုးရိမ်လျက်ရှိကြသည်။ #ShanNorth #MNDAA #TNLA #Kutkai #Namkham #BrotherhoodAlliance #InternalConflict #BreakingNewsMyanmar #ရှမ်းမြောက်တိုက်ပွဲ #ကွတ်ခိုင် #နမ့်ခမ်း #ညီနောင်မဟာမိတ်

ကိုးကန့်တပ် (MNDAA) နှင့် တအာင်းတပ် (TNLA)တို့ကြား ဒုတိယမြောက်နေ့ တိုက်ပွဲ ဆက်ဖြစ်

Mar 13

တရုတ်တွင် အသစ်ပြဌာန်းသော ဥပဒေကြောင့် တိုင်းရင်းသား ဘာသာများ ပျောက်ကွယ်မည်ကို စိုးရိမ် သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ မတ်လ ၁၃ ရက်။ တရုတ်နိုင်ငံ အမျိုးသားပြည်သူ့ကွန်ဂရက် (National People’s Congress) က အတည်ပြုလိုက်သည့် "တိုင်းရင်းသားစည်းလုံးညီညွတ်ရေးနှင့် တိုးတက်ရေးမြှင့်တင်မှုဥပဒေ" သည် တိုင်းရင်းသားလူနည်းစုများ၏ အခွင့်အရေးကို ထိခိုက်စေနိုင်ကြောင်း ဝေဖန်မှုများ ထွက်ပေါ်နေသော်လည်း ပေကျင်းအစိုးရကမူ ၎င်းတို့၏ မူဝါဒကို ခုခံကာကွယ်ပြောကြားခဲ့သည်။ ယခင်က တိဗက်၊ ဝီဂါ နဲ့ မွန်ဂိုလီးယား စသည့် လူမျိုးစု ဒေသများတွင် ကျောင်းသားများသည် မိခင်ဘာသာစကားနဲ့ သင်ရိုးညွှန်းတမ်း (ဥပမာ- သင်္ချာ၊ သိပ္ပံ) စသည်တို့ကို လေ့လာခွင့် ရှိခဲ့သည်။ သို့ရာတွင် ဥပဒေသစ်အရ ဘာသာရပ်အားလုံးကို မန်ဒရင်း (Mandarin) ဘာသာစကားတစ်ခုတည်းနှင့်သာ သင်ကြားရတော့မည်ဖြစ်သည်။ တရုတ်နိုင်ငံတွင် တိဗက်၊ ဝီဂါ၊ မွန်ဂိုလီးယား၊ ကချင် Jingpo (ကျင်ဖော)၊ ရှမ်း Dai (ဒိုင်)၊ ဝ Wa၊ ပလောင် (Blang)၊ လီဆူ (Lisu)၊ လားဟူ (Lahu)၊ အခါ (Hani) တို့ အပါအဝင် တရားဝင် သတ်မှတ်ထားသော လူမျိုးစု ၅၆ စု ရှိသည်။ ပညာရှင်များက ယခုဥပဒေသည် တိုင်းရင်းသားလူနည်းစုများ၏ ကိုယ်ပိုင်ဘာသာစကားနှင့် ယဉ်ကျေးမှုများကို ပျောက်ကွယ်သွားစေရန် ရည်ရွယ်သည့် မူဝါဒဖြစ်ကြောင်း ထောက်ပြကြသည်ဟု BBC ကမ္ဘာတဝှမ်း အစီအစဉ် (BBC World Service) တွင် ဖော်ပြထားသည်။ အမေရိကန် အခြေစိုက် Cornell တက္ကသိုလ်မှ ပါမောက္ခ Magnus Fiskesjö က "ယခုဥပဒေသည် ၁၉၄၉ ခုနှစ်ကတည်းက တရားဝင်အသိအမှတ်ပြုခဲ့သည့် လူမျိုးရေးကွဲပြားမှုကို နှိမ်နင်းရန် ကြိုးပမ်းခြင်းဖြစ်ပြီး၊ နောက်မျိုးဆက် ကလေးငယ်များသည် ၎င်းတို့၏ မိခင်ဘာသာစကားနှင့် ယဉ်ကျေးမှုကို မေ့ပျောက်သွားစေရန် ရက်စက်စွာ အတင်းအကျပ် ခိုင်းစေခံနေရခြင်းဖြစ်သည်" ဟု ဝေဖန်ခဲ့သည်။ တရုတ်အစိုးရ၏ အသုံးအနှုန်းများသည် တိုင်းရင်းသားဘာသာစကားနှင့် ယဉ်ကျေးမှုများကို ဖွံ့ဖြိုးတိုးတက်မှုအတွက် အဟန့်အတားဖြစ်စေသည့် "နောက်ကျကျန်နေသည့်အရာများ" ဟု ရှုမြင်နေပုံ ရသည်ဟု စင်ကာပူအမျိုးသားတက္ကသိုလ်မှ ပါမောက္ခ Ian Chong က သုံးသပ်ထားသည်။ တိဘက်၊ ရှင်ကျန်းနှင့် အတွင်းမွန်ဂိုလီးယားဒေသများတွင် အတင်းအဓမ္မ ပေါင်းစည်းရေး မူဝါဒများအပေါ် စိုးရိမ်မှုများ မြင့်တက်နေသည်။ ဝေဖန်မှုများရှိနေသော်လည်း ပေကျင်းအစိုးရကမူ ယခုဥပဒေသည် "စည်းလုံးမှုမှတစ်ဆင့် ခေတ်မီအောင်ပြုလုပ်ခြင်း" အတွက် အခြေခံကျသည်ဟု ပြောဆိုထားသည်။ လူနည်းစု ကလေးငယ်များကို မန်ဒရင်းဘာသာစကား (Mandarin) သင်ကြားပေးခြင်းသည် ၎င်းတို့၏ အနာဂတ်အလုပ်အကိုင် အခွင့်အလမ်းများကို အမှန်တကယ် အထောက်အကူပြုစေမည်ဟု တရုတ် အစိုးရဘက်က ပြောသည်။ တရုတ်ကွန်မြူနစ်ပါတီက ၎င်းတို့အနေဖြင့် လူမျိုးစုအားလုံးကို လက်ခံကြောင်းနှင့် နိုင်ငံတော်ဖွဲ့စည်းပုံအခြေခံဥပဒေအရ လူမျိုးစုတိုင်းသည် ၎င်းတို့၏ ကိုယ်ပိုင်ဘာသာစကားကို အသုံးပြုပိုင်ခွင့်ရှိကြောင်း ပြောဆိုထားသည်။ #ဘာသာစကား #တိုင်းရင်းသားဘာသာစကားသင်ကြားမှု #NationalPeoplesCongress

တရုတ်တွင် အသစ်ပြဌာန်းသော ဥပဒေကြောင့် တိုင်းရင်းသား ဘာသာများ ပျောက်ကွယ်မည်ကို စိုးရိမ်

Mar 13

ထီးချိုင့်ကို စစ်တပ်က သုံးရက်ဆက်ဗုံးကြဲ၊ သံဃာနှင့်ကိုရင်များအပါအဝင် ၁၂ ဦးသေဆုံး   သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၁၅ ရက်။ စစ်ကိုင်းတိုင်း၊ ထီးချိုင့်တွင် သုံးရက်ဆက် လေကြောင်းဗုံးကြဲမှုကြောင့် သံဃာတော်များနှင့် ကိုရင်များအပါအဝင် ၁၂ ဦး သေဆုံးခဲ့ပြီး ဆေးရုံနှင့် သာသနာ့အဆောက်အအုံများပါ ပျက်စီးခဲ့ကြောင်း ဒေသခံများက ပြောသည်။ ထီးချိုင့်မြို့နယ်အတွင်းရှိ ကျေးရွာများကို စစ်ကော်မရှင်တပ်က မတ်လ ၈ ရက်နေ့မှ ၁၀ ရက်နေ့အထိ သုံးရက် ဆက်တိုက် လေကြောင်းမှ ဗုံးကြဲတိုက်ခိုက်ခဲ့ရာ ဦးဇင်း ၂ ပါးနှင့် ကိုရင် ၄ ပါးအပါအဝင် စုစုပေါင်း ၁၂ ဦး သေဆုံးခဲ့ရပြီး သာသနာ့အဆောက်အအုံများနှင့် ဆေးရုံများ ပြင်းထန်စွာ ပျက်စီးခဲ့ခြင်း ဖြစ်သည်။ စစ်ကော်မရှင်သည် တိုက်ပွဲဖြစ်ပွားခြင်းမရှိဘဲ ဇီးကုန်း၊ စပ်စား၊ ထုံးကြီးကျွန်းနှင့် အလယ်တောကျေးရွာတို့ကို ပစ်မှတ်ထားကာ ဂျက်ဖိုက်တာများဖြင့် ဗုံးကြဲခဲ့ခြင်းဖြစ်သည်။ အဆိုပါ တိုက်ခိုက်မှုများအနက် မတ်လ ၁၀ ရက်နေ့က ဇီးကုန်းကျေးရွာကို တိုက်ခိုက်မှုမှာ သေဆုံးမှု အများဆုံး ဖြစ်ခဲ့ပြီး သံဃာတော်များအပါအဝင် ၁၂ ဦးအထိ အသက်ဆုံးရှုံးခဲ့ရသည်။ ဖြစ်စဉ်နှင့်ပတ်သက်၍ ထီးချိုင့်မြို့ဒေသခံ အမျိုးသမီးတစ်ဦးက “ဇီးကုန်းရွာက ထီးချိုင့်မြို့နဲ့သိပ်မဝေးဘူး။ လေကြောင်းတိုက်ခိုက်တာလည်းမခံရဖူးဘူး။ ဒီရွာမှာ စစ်ရှောင်တွေလည်းခိုလှုံနေကြတာဟုတ်တယ်။ တိုက်ပွဲ ဖြစ်ပွားတာလည်းမရှိပါဘူး။ အိမ်သစ်တောင်မတက်လိုက်ရဘဲ လေကြောင်းတိုက်ခိုက်မှုမှာ ပါသွားတာတွေ လည်း ရှိပါတယ်။ အသက်မပြည့်တဲ့ကလေးတွေရော၊ ကိုရင်လေးတွေရော၊ ဦးဇင်းတွေရောသေဆုံးခဲ့ရတာပါ” ဟု ပြောသည်။ ဇီးကုန်းကျေးရွာ တိုက်ခိုက်ခံရမှုတွင် ကိုရင် ၈ ပါး၊ ဘုန်းကြီး ၁ ပါးနှင့် ပြည်သူ ၃ ဦး ဒဏ်ရာရရှိခဲ့သည့်အပြင် ဘုန်းကြီးကျောင်း၊ သိမ်၊ ဓမ္မာရုံနှင့် နေအိမ်များစွာ ပျက်စီးခဲ့ရသည်။ ထို့ပြင် မတ်လ ၈ ရက်နေ့ကလည်း အလယ်တောစံပြကျေးရွာရှိ တိုက်နယ်ပြည်သူ့ဆေးရုံဝန်းအတွင်းသို့ ပေါင် ၂၀၀ ဗုံးများ ကြဲချခဲ့သဖြင့် ဆဌမတန်းကျောင်းသူတစ်ဦး အပါအဝင် ၂ ဦး ဒဏ်ရာရရှိခဲ့သည်။ မတ်လ ၉ ရက်နေ့တွင်လည်း စပ်စားကျေးရွာသို့ ပေါင် ၅၀၀ ဗုံးဖြင့် တိုက်ခိုက်ခဲ့ရာ ပြည်သူ ၃ ဦး ဒဏ်ရာရခဲ့ပြီး၊ ထုံးကြီးကျွန်းကျေးရွာတွင်မူ လေကြောင်းတိုက်ခိုက်မှုကြောင့် ပြည်သူ ၃ ဦး သေဆုံးကာ နေအိမ်များ မီးလောင် ပျက်စီးခဲ့ရသည်။ စစ်ကော်မရှင်တပ်သည် မတ်လ အစောပိုင်းမှစတင်ကာ စစ်ကိုင်းနှင့် ကချင်ပြည်အစပ်ရှိ ထီးချိုင့်၊ ပင်လည်ဘူး၊ ကောလင်းနှင့် မော်လူးမြို့တို့ကို လေကြောင်းမှတစ်ဆင့် အပြင်းအထန် တိုက်ခိုက်နေသဖြင့် ဒေသခံပြည်သူများ မှာ ဘေးလွတ်ရာသို့ အစုလိုက်အပြုံလိုက် တိမ်းရှောင်နေကြရသည်။ ယခုကဲ့သို့ ဘာသာရေး အဆောက်အအုံများနှင့် ဆေးရုံများကိုပါမချန် ပစ်မှတ်ထား တိုက်ခိုက်နေခြင်းမှာ လူသား မျိုးနွယ် အပေါ် ကျူးလွန်သည့် ရာဇဝတ်မှုဖြစ်ကြောင်း လူ့အခွင့်အရေးလှုပ်ရှားသူများက ဝေဖန်ထောက်ပြထား ကြသည်။ #စစ်ကိုင်းတိုင်း #ထီးချိုင့် #လေကြောင်းတိုက်ခိုက်

ထီးချိုင့်ကို စစ်တပ်က သုံးရက်ဆက်ဗုံးကြဲ၊ သံဃာနှင့်ကိုရင်များအပါအဝင် ၁၂ ဦးသေဆုံး  

Mar 13

နှစ် ၃၀ ကျော်သက်တမ်းရှိ ဝင်းဝစခန်းကို KNLA ပူးပေါင်းတပ်များ သိမ်းပိုက်   သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၁၃ ရက်။ ထားဝယ်ခရိုင်ရှိ နှစ် ၃၀ ကျော်သက်တမ်းရှိ ဝင်းဝစခန်းကို KNLA နှင့် ပူးပေါင်းတပ်များ အပြီးသတ် သိမ်းပိုက် လိုက်ပြီး လက်နက်ခဲယမ်းအမြောက်အမြား ရရှိခဲ့သည်။ မြိတ် - ထားဝယ်သွား အမှတ် (၈) ပြည်ထောင်စု ကားလမ်းမကြီးပေါ်တွင် နှစ်ပေါင်း ၃၀ ကျော်ကြာ အခိုင်အမာ တပ်စွဲထားသည့် စစ်ကော်မရှင်၏ ဝင်းဝတပ်စခန်းကို ကရင်အမျိုးသား လွတ်မြောက်ရေး တပ်မတော် (KNLA) နှင့် တော်လှန်ရေး ပူးပေါင်းတပ်ဖွဲ့များက တိုက်ခိုက်သိမ်းပိုက်နိုင်ခဲ့ကြောင်း KNU တပ်မဟာ (၄) က ထုတ်ပြန် သည်။ ထားဝယ်ခရိုင်၊ သရက်ချောင်းမြို့နယ်အတွင်း တည်ရှိသော အဆိုပါဝင်းဝစခန်းကို ပြီးခဲ့သည့် ဖေဖော်ဝါရီလ ၇ ရက်နေ့ကတည်းက စတင်တိုက်ခိုက်ခဲ့ခြင်း ဖြစ်ပြီး တစ်လကျော်ကြာ ပြင်းထန်သော တိုက်ပွဲများအပြီး မတ်လ ၁၁ ရက်နေ့ ညနေ ၄ နာရီတွင် အပြီးသတ်သိမ်းယူနိုင်ခဲ့ခြင်းဖြစ်သည်။ အဆိုပါ စခန်းသည် သရက်ချောင်းမြို့အထွက် ဆင်ကူးကျေးရွာမှ ပုလောမြို့နယ် ပလောက်မြို့အနီးရှိ ဆင်ထိုး ကြီးကျေးရွာအထိ လမ်းတစ်လျှောက်တွင် စစ်ကော်မရှင်၏ နောက်ဆုံးကျန်ရှိနေသော အမာခံ တပ်စခန်းလည်း ဖြစ်သည်။ စခန်းသိမ်းတိုက်ပွဲတွင် ပါဝင်ခဲ့သည့် ပူးပေါင်းတပ်ဖွဲ့ဝင်တစ်ဦးက “စခန်းသိမ်းတိုက်ပွဲကာလတစ်လျှောက်လုံးမှာ စစ်ကောင်စီတပ်ဘက်က ကြည်း၊ ရေ၊ လေတို့နဲ့ အပြင်းအထန်ခုခံတိုက်ခိုက်ခဲ့တာ၊ လေယာဉ်နဲ့လည်း နေ့စဉ် နေ့တိုင်း ဗုံးကြဲနေတဲ့ကြားက စခန်းကိုလက်လွှတ်လိုက်ရတာ၊ အခုချိန်ထိလဲ တိုက်ပွဲတွေက ရှိနေသေးတယ်” ဟု ပြောသည်။ အဆိုပါ စခန်းသိမ်း စစ်ဆင်ရေးကို KNLA ဗျူဟာအမှတ် (၂) ၏ ဦးဆောင်မှုဖြင့် KNU တပ်မဟာ (၄)၊ KNLA တပ်ရင်း (၁၂)၊ KNU တပ်မဟာ (၆) တပ်ရင်း (၂၇)၊ KNU အထူးကွန်မန်ဒိုတပ်ဖွဲ့၊ NUG ဗျူဟာ (၃၃) လက်အောက်ခံ ထားဝယ်ခရိုင် အမှတ် (၂) တပ်ရင်း (T5) နှင့် ပြည်သူ့ကာကွယ်ရေး ပူးပေါင်းတပ်ဖွဲ့များက ဟန်ချက်ညီညီ ဆင်နွှဲခဲ့ခြင်းဖြစ်သည်။ တိုက်ပွဲအတွင်း စစ်ကော်မရှင်ဘက်မှ လက်နက်ခဲယမ်း အမြောက်အမြားကိုလည်း သိမ်းဆည်းရမိခဲ့သည်ဟု ထုတ်ပြန်ချက်တွင် ဖော်ပြထားသည်။ တော်လှန်ရေး ပူးပေါင်းတပ်ဖွဲ့များသည် ဒေသတွင်းရှိ စစ်ကော်မရှင်၏ အရေးပါသော ထီးထာ၊ မယ်သမီခီး၊ အီးသာခေး၊ မောတောင်နှင့် မောမစား တပ်စခန်းများကိုလည်း ယခင်က သိမ်းပိုက်ရရှိထားပြီးဖြစ်သည်။ KNU ကမူ ယခုဝင်းဝစခန်းသိမ်းတိုက်ပွဲ အတွင်း အသက်ပေးဆပ်ခဲ့ကြသည့် သူရဲကောင်းရဲဘော်များနှင့် အဘက် ဘက်မှ ကူညီပေးခဲ့ကြသော ပြည်သူလူထု၊ ခေါင်းဆောင်များနှင့် စစ်သည်တော်များကို အထူး အသိအမှတ် ပြုကြောင်း ထည့်သွင်းဖော်ပြထားသည်။ လက်ရှိတွင် ဝင်းဝစခန်းကို လက်လွှတ်လိုက်ရသည့်အတွက် စစ်ကော်မရှင်ဘက်က လေကြောင်းမှတစ်ဆင့် လက်တုံ့ပြန်တိုက်ခိုက်မှုများ ပိုမိုပြုလုပ်လာနိုင်သဖြင့် ဒေသခံပြည်သူများ အနေဖြင့် လေကြောင်းရန်ကို အထူး သတိပြုကြရန် မြေပြင်စစ်ရေးသတင်းရင်းမြစ်များက သတိပေးထားသည်။ #KNLA #ဝင်းဝစခန်း #တနင်္သာရီတိုင်း

နှစ် ၃၀ ကျော်သက်တမ်းရှိ ဝင်းဝစခန်းကို KNLA ပူးပေါင်းတပ်များ သိမ်းပိုက်

Mar 13

အမေရိကန်မှ လက်နက်ဝယ်ယူရန် ထိုင်ဝမ် အစိုးရ လက်မှတ်ရေးထိုးမည် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၁၃ ရက်။ အမေရိကန်ဆီက လက်နက်ဝယ်ယူမည့် သဘောတူညီချက်များကို လက်မှတ်ရေးထိုးရန် ထိုင်ဝမ် လွှတ်တော်က အစိုးရကို လုပ်ပိုင်ခွင့်ပြုလိုက်သည်။ ထိုင်ဝမ်လွှတ်တော်သည် အမေရိကန်နိုင်ငံထံမှ လက်နက်ဝယ်ယူမည့် အစီအစဉ် (၄) ခုအတွက် သဘောတူညီချက်များ လက်မှတ်ရေးထိုးရန် အစိုးရအား သောကြာနေ့တွင် လုပ်ပိုင်ခွင့် အပ်နှင်းလိုက်သည်။ အဆိုပါ လက်မှတ်ရေးထိုးရန် သတ်မှတ်ရက် ကျော်လွန်သွားပါက လက်နက်များ ရရှိရေး နောက်ကျနိုင်သကဲ့သို့ အမေရိကန်အစိုးရထံသို့လည်း မှားယွင်းသော သတင်းစကား ပေးပို့သကဲ့သို့ ဖြစ်နိုင်ကြောင်း တာဝန်ရှိသူများက သတိပေးပြီးနောက် ယခုကဲ့သို့ အတည်ပြုခဲ့ခြင်းဖြစ်သည်။ လွှတ်တော်ဥက္ကဋ္ဌ ဟန်ကော်ယု (Han Kuo-yu) က အမျိုးသားလုံခြုံရေးကို ရှေ့တန်းတင်ရန်နှင့် နယ်မြေတည်တံ့ခိုင်မြဲရေးကို ကာကွယ်ရန်ဟူသော အခြေခံမူဖြင့် ယခုဆုံးဖြတ်ချက်ကို ကန့်ကွက်သူမရှိ အတည်ပြုခဲ့ခြင်းဖြစ်ကြောင်း ထုတ်ပြန်ခဲ့သည်။ ဝယ်ယူမည့် လက်နက်များတွင် -TOW တင့်ဖျက်ဒုံးကျည်များ၊ M109A7 ကိုယ်တိုင်မောင်း သံချပ်ကာ အမြောက်ကြီးများ၊ Javelin ပုခုံးထမ်း တင့်ဖျက် ဒုံးကျည်များနှင့် HIMARS တာဝေးပစ် ဒုံးပစ်စင် စနစ်များ ပါဝင်သည်။ သမ္မတ လိုင်ချင်းတယ် (Lai Ching-te) အစိုးရသည် အမေရိကန်ဒေါ်လာ ၄၀ ဘီလီယံတန်ဖိုးရှိ အပိုဆောင်း ကာကွယ်ရေးအသုံးစရိတ်ကို အတည်ပြုရန် ကြိုးပမ်းနေသော်လည်း လွှတ်တော်တွင်း အင်အားစုများအကြား သဘောထားကွဲလွဲမှုများ ရှိနေခဲ့သည်။ သို့သော်လည်း လာမည့် တနင်္ဂနွေနေ့ နောက်ဆုံးထား၍ လက်မှတ်မထိုးနိုင်ပါက လက်နက်ထုတ်လုပ်ရေးနှင့် ပေးပို့ရေး အစီအစဉ်များတွင် ထိုင်ဝမ်အနေဖြင့် ဦးစားပေးအဆင့် လျော့ကျသွားနိုင်သည့်အတွက် ဘတ်ဂျက်စိစစ်မှုများ မပြီးခင်မှာပင် လက်မှတ်ရေးထိုးခွင့်ကို လွှတ်တော်က ကြိုတင်ခွင့်ပြုလိုက်ခြင်း ဖြစ်သည်။ ထိုင်ဝမ်ကာကွယ်ရေးဝန်ကြီးဌာနက လွှတ်တော်၏ ယခုဆုံးဖြတ်ချက်ကို ကျေးဇူးတင်ရှိကြောင်း ပြောကြားခဲ့ပြီး ဤလက်နက်စနစ်များသည် ထိုင်ဝမ်၏ စစ်ရေးလိုအပ်ချက်များကို ပြည့်မှီစေရန် စနစ်တကျ ပြင်ဆင်ထားခြင်းဖြစ်ကြောင်း တုံ့ပြန်ခဲ့သည်။ တရုတ်နိုင်ငံက ထိုင်ဝမ်ကျွန်းအနီးတွင် စစ်ရေးလေ့ကျင့်မှုများ တိုးမြှင့်လုပ်ဆောင်နေချိန်တွင် ထိုင်ဝမ်အစိုးရအနေဖြင့် ကာကွယ်ရေးအသုံးစရိတ်ကို တိုးမြှင့်ရန် ဒေါ်နယ်ထရမ့် အုပ်ချုပ်ရေးအဖွဲ့၏ ဖိအားပေးမှုကိုလည်း လက်ခံဆောင်ရွက်နေခြင်း ဖြစ်သည်။ #Taiwan #ထိုင်ဝမ်လက်နက် #ထိုင်ဝမ်အစိုးရ #အမေရိကန်

အမေရိကန်မှ လက်နက်ဝယ်ယူရန် ထိုင်ဝမ် အစိုးရ လက်မှတ်ရေးထိုးမည်

« Prev 1 … 8 9 10 11 12 … 18 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

Elon Musk ကမ္ဘာ့ ပထမဆုံး ထရီလီယံနာ ဖြစ်လာ
စစ်တွေနှင့် ၄ မိုင်အကွာသို့ AA ထိုးစစ်ဆင်လာပြီး ဒကစ အရာရှိမိသားစုများ တပ်ရင်း စခန်းများသို့ အရေးပေါ်ဆုတ်ခွာ
ကမ္ဘာ့ဖလား ဖွင့်ပွဲတွင် မက္ကဆီကို အစိုးရအား ဆန့်ကျင် ဆန္ဒပြမှုများ ပြုလုပ်
အသက် ၁၆ နှစ်အောက် ကလေးများ လူမှု ကွန်ရက် သုံးစွဲမှု တားမြစ်ရန် ဆိုရှယ်မီဒီယာ သုံးစွဲမှု တားမြစ်
စစ်အုပ်စု ခေါင်းဆောင် တရုတ်ပြည် သွားမည်

Archives

Archives

×Close