April 2026 – Page 5 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Monthly Archive

Archive: April 2026

Apr 27

ကျေးရွာ အုပ်ချုပ်ရေးမှူး ကို လက်နက်ကိုင်အဖွဲ့က ဖမ်းဆီးခေါ်ဆောင် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၂၇ ရက်။ ထားဝယ်တွင် ရှင်မုတ္ထီးကျေးရွာ အုပ်ချုပ်ရေးမှူးကို လက်နက်ကိုင်အဖွဲ့တစ်ခုက ဖမ်းဆီးခေါ်ဆောင်သွားသည်ဟု မိသားစုနှင့်နီးစပ်သူများက ပြောသည်။ တနင်္သာရီတိုင်းဒေသကြီး၊ ထားဝယ်မြို့နယ်ရှိ ရှင်မုတ္ထီးကျေးရွာအုပ်ချုပ်ရေးမှူးကို လက်နက်ကိုင်အဖွဲ့တစ်ခုက လာရောက်ဖမ်းဆီးသွားပြီးနောက် ယနေ့တိုင် ပြန်လည်လွတ်မြောက်လာခြင်း မရှိသေးဘဲ ပျောက်ဆုံးနေကြောင်း ဒေသခံများက ပြောသည်။ အသက် (၄၀) ကျော်အရွယ် ကျေးရွာအုပ်ချုပ်ရေးမှူး ဦးသက်စိုးပိုင်သည် ဧပြီလ ၂၃ ရက်နေ့ ညနေပိုင်းက ရှင်မုတ္ထီးနှင့် ရောင်းမော်ကျေးရွာကို ဆက်သွယ်ထားသည့် လမ်းပိုင်းရှိ ဈေးဆိုင်တစ်ဆိုင်တွင် ပစ္စည်း ဝင်ဝယ်နေစဉ် လက်နက်ကိုင်များက လာရောက်ဖမ်းဆီးသွားခြင်း ဖြစ်သည်။ အသက် (၅၀) ခန့်အရွယ် ရှင်မုတ္ထီးရွာသားတစ်ဦးက “ဈေးဆိုင်မှာ ပစ္စည်းဝင်ဝယ်နေတုန်း မေးမြန်းစရာရှိလို့ ဆိုပြီး အေးအေးဆေးဆေးပဲ ခေါ်ဆောင်သွားတယ်။ ရိုက်တာနှက်တာမျိုးတော့ မရှိဘူး” ဟု ပြောသည်။ ဖမ်းဆီးခေါ်ဆောင်သွားသည့် လက်နက်ကိုင်အဖွဲ့မှာ မည်သည့်အဖွဲ့အစည်း ဖြစ်သည်ကို တိတိကျကျ မသိရ သေးသလို မည်သည့် အကြောင်းအရင်းကြောင့် ဖမ်းဆီးသွားသည်ကိုလည်း လက်ရှိအချိန်အထိ ထုတ်ပြန် ကြေညာထားခြင်း မရှိသေးပေ။ ဦးသက်စိုးပိုင်နှင့် နီးစပ်သူ အမျိုးသားတစ်ဦးကမူ ယနေ့အချိန်ထိ ၎င်းမှာ ပြန်လည် လွတ်မြောက်လာခြင်း မရှိသေးကြောင်း အတည်ပြုသည်။ ရှင်မုတ္ထီးကျေးရွာသည် ထားဝယ်မြို့၏ အရှေ့တောင်ဘက် (၆) မိုင်ခန့်အကွာတွင် တည်ရှိပြီး ၂၀၁၄ ခုနှစ် သန်းခေါင်စာရင်းအရ လူဦးရေ (၄,၀၀၀) ကျော် နေထိုင်သည့် ကျေးရွာကြီးတစ်ရွာ ဖြစ်သည်။ ယခုကဲ့သို့ လူစည်ကားရာ လမ်းပိုင်းရှိ ဆိုင်အတွင်း၌ပင် ကျေးရွာအုပ်ချုပ်ရေးမှူး ဖမ်းဆီးခံရခြင်းကြောင့် ဒေသခံများအတွင်း လုံခြုံရေးအရ စိုးရိမ်မှုများ မြင့်တက်နေသည်။ တနင်္သာရီတိုင်း အတွင်းရှိ ကျေးရွာအုပ်ချုပ်ရေးမှူးများသည် မကြာခဏဆိုသလို ဖမ်းဆီးခံရခြင်း သို့မဟုတ် ပစ်ခတ်ခံရခြင်းများ ရှိနေပြီး ယခုဖြစ်စဉ်နှင့် ပတ်သက်၍ သက်ဆိုင်ရာ နယ်မြေခံလုံခြုံရေးအဖွဲ့များဘက်မှ တစ်စုံတစ်ရာ ထုတ်ပြန်ပြောဆိုခြင်း မရှိသေးပေ။ #ထားဝယ် #ရှင်မုတ္ထီးကျေးရွာအုပ်ချုပ်ရေးမှူး

ကျေးရွာ အုပ်ချုပ်ရေးမှူး ကို လက်နက်ကိုင်အဖွဲ့က ဖမ်းဆီးခေါ်ဆောင်

Apr 27

အမှိုက်ကား မလာ၍ ပုသိမ်မြို့ခံများ အခက်တွေ့ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၂၇ ရက်။ ဧရာဝတီတိုင်းဒေသကြီး၊ ပုသိမ်မြို့နယ် စည်ပင်သာယာရေးကော်မတီက အခွန်များကို တိုးမြှင့်ကောက်ခံခဲ့ သော် လည်း စက်သုံးဆီပြတ်လပ်သည်ဟု အကြောင်းပြကာ ရပ်ကွက်များအတွင်း အမှိုက်သိမ်းယာဉ်များ လာရောက် ခြင်း မရှိတော့သဖြင့် မြို့ခံများ အမှိုက်စွန့်ပစ်ရန် အခက်အခဲဖြစ်နေကြသည်။ ပုသိမ်စည်ပင်သည် ၂၀၂၅-၂၀၂၆ ဘဏ္ဍာနှစ်၊ ဒုတိယ (၆) လပတ်အတွက် အဆောက်အအုံနှင့် မြေခွန်၊ လမ်းမီးခွန်၊ အမှိုက်နှင့် အညစ်အကြေးခွန် စသည့် အခွန် (၃) မျိုးပေါင်းကို ယခင်နှစ်ကထက် ၁၀ ရာခိုင်နှုန်း တိုးမြှင့်ကောက်ခံ ခဲ့ခြင်း ဖြစ်သည်။ အသက် (၅၀) ကျော်အရွယ် အခွန်ထမ်းတစ်ဦးက “တစ်နှစ်ကို နှစ်ကြိမ်ဆောင်ရတာ၊ ခြောက်လတစ်ကြိမ်ပေါ့။ မြေခွန်လို့ပဲ အလွယ်ခေါ်ကြတာ။ အရင်နှစ်က ၁၄၀၀ ကျပ် ဆောင်ရတယ်၊ ဒီနှစ်မှာ ၂၁၀၀ ကျပ်ထိ တက်ဆောင်ရတာ။ အခွန်သာတိုးဆောင်နေရတာ အမှိုက်ကားက မလာတာကြာပြီ” ဟု ပြောသည်။ စစ်အုပ်စုက ပြုလုပ်သည့် ရွေးကောက်ပွဲ ကာလမတိုင်မီက တစ်ရက်ခြား အချိန်မှန် လာရောက်ခဲ့သော်လည်း မတ်လဆန်းပိုင်းမှ စတင်ကာ အမှိုက်သိမ်းယာဉ်များမှာ သုံးရက်ခြား တစ်ခါခန့်သာ လာရောက်တော့ကြောင်း မြို့ခံများက ဆိုသည်။ ပုသိမ်မြို့ခံ အသက် (၄၀) အရွယ် အမျိုးသားတစ်ဦးကလည်း “သူတို့လုပ်မယ့် ရွေးကောက်ပွဲ မတိုင်ခင်တုန်း ကတော့ မြို့ကလမ်းမတွေပေါ်မှာ အမှိုက်တစ်စမြင် တစ်စကောက် ဆိုတဲ့ဆောင်ပုဒ်နဲ့ မြို့တော်သာယာလှပ သန့်ရှင်းစေရမယ်တဲ့ မဲဆွယ်တာလေ။ ခုကတော့ ငြမ်းဖျက်တာမဟုတ်ဘူး၊ ဖြိုပါပစ်လိုက်တာ” ဟု စည်ပင်၏ ပြောင်းလဲသွားသော အခြေအနေကို ဝေဖန်ပြောဆိုသည်။ ဖေဖော်ဝါရီလအတွင်း အရှေ့အလယ်ပိုင်း စစ်ရေးအခြေအနေကြောင့် စက်သုံးဆီဈေးနှုန်းများ မြင့်တက်လာမှုကို အခွင့်ကောင်းယူကာ စည်ပင်က အမှိုက်သိမ်းခြင်းလုပ်ငန်းကို လျှော့ချခဲ့ခြင်းဖြစ်ကြောင်း မြို့ခံများက ယူဆနေ ကြသည်။ အမှတ် (၂) ရပ်ကွက်မှ အမျိုးသမီးတစ်ဦးက “စည်ပင်က ဆီပြတ်တာကို အခွင့်ကောင်းယူပြီး အမှိုက်သိမ်းကား ပျောက်သွားလိုက်တာ။ တစ်ပတ် တစ်ရက်လောက်ကနေ ခုတော့ သင်္ကြန်မကျခင်ကတည်းက လုံးလုံး မလာ တော့တာ ခုချိန်ထိပဲ” ဟု ပြောသည်။ ထို့ပြင် စည်ပင်ဝန်ထမ်းအချို့သည် သတ်မှတ်ထားသည့် အမှိုက်သိမ်းခေါက်ရေကို လျှော့ချကာ ပိုလျှံသည့် စက်သုံးဆီများကို မှောင်ခိုဈေးကွက်တွင် ပြန်လည်ရောင်းချ၍ ကိုယ်ကျိုးရှာနေကြကြောင်း စည်ပင်ဝန်ထမ်း တစ်ဦးက ပြောသည်။ ထိုသို့ ရပ်ကွက်များအတွင်း အမှိုက်မသိမ်းသော်လည်း ငွေကြေးပေးနိုင်သည့် ကုန်စိမ်းဒိုင်များနှင့် ကြံဆိုင်ကြီးများ ရှိရာ နတ်လမ်းတစ်ကြောတွင်မူ အမှိုက်များကို နေ့စဉ်သိမ်းပေးနေကြောင်း ဈေးသည်များက ဆိုသည်။ မြို့မဈေးမှ ဈေးသည်တစ်ဦးက “နတ်လမ်းက ကြံဆိုင်တွေနဲ့ ကုန်စိမ်းဒိုင်တွေက ငွေပေးနိုင်ကြတော့ သူတို့ အမှိုက်တွေကိုတော့ တစ်နေ့မှမပျက်ဘူး သိမ်းပေးနေတာ” ဟု ပြောသည်။ လက်ရှိတွင် အမှိုက်ပုံများအနီး နေထိုင်သူများမှာ အနံ့ဆိုးများ၊ ယင်ကောင်နှင့် ကြွက်များ ပေါများလာမှုကြောင့် ကျန်းမာရေး ထိခိုက်မည်ကို စိုးရိမ်နေကြပြီး မိုးမကျမီ အမှိုက်များကို အမြန်ဆုံး ရှင်းလင်းပေးရန် လိုလားနေကြ သည်။ ပုသိမ်စည်ပင်သည် အများပိုင် မြေကွက်များကို လက်သိပ်ထိုးရောင်းချခြင်း၊ လာဒ်ငွေယူ၍ အထပ်မြင့် အဆောက်အအုံများ ဆောက်လုပ်ခွင့်ပြုခြင်းနှင့် အိုးဝေ၊ ဆိုင်ကယ် ဘီးခွန်များကို ယခင်ကထက် (၂) ဆ တိုးမြှင့် ကောက်ခံနေခြင်းတို့ကြောင့်လည်း မြို့ခံများ၏ ဝေဖန်မှုကို ခံနေရသည်။ #ဧရာဝတီတိုင်း #ပုသိမ်

အမှိုက်ကား မလာ၍ ပုသိမ်မြို့ခံများ အခက်တွေ့

Apr 26

အမေရိကန် သမ္မတ ဒေါ်နယ်ထရန့် တက်ရောက်တဲ့ ညစာစားပွဲမှာ ပစ်ခတ်မှု ဖြစ်ပွား သတင်းနဲ့ မီဒီယာ ကွန်ရက်။  ၂၀၂၆ ခုနှစ်၊ ဧပြီလ ၂၆ ရက်။ ဝါရှင်တန်ဒီစီရဲ့ ခမ်းနားထည်ဝါလှတဲ့ စနေနေ့ညချမ်းဟာ ရုတ်တရက်ဆိုသလို ထိတ်လန့်တုန်လှုပ်ဖွယ်ရာ အခိုက်အတန့်တွေနဲ့ ပြည့်နှက်သွားခဲ့ပါတယ်။ ဝါရှင်တန်ဟီလ်တန်ဟိုတယ်မှာ ကျင်းပနေတဲ့ အိမ်ဖြူတော်သတင်းထောက်များအသင်း (WHCA) ရဲ့ နှစ်ပတ်လည်ညစာစားပွဲမှာ သေနတ်သံလိုမျိုး ကျယ်လောင်တဲ့ အသံတွေထွက်ပေါ်လာပြီးနောက် သမ္မတ ဒေါ်နယ်ထရန့်ကို လုံခြုံရေးအဖွဲ့ဝင်တွေက အရေးပေါ် ဘေးကင်းရာကို ခေါ်ဆောင်သွားခဲ့ရပါတယ်။ ဖြစ်စဉ်ဖြစ်ပွားခဲ့ပုံ ဝါရှင်တန်ဟီလ်တန်ဟိုတယ်ရဲ့ ခမ်းမကြီးအတွင်းမှာတော့ တီးဝိုင်းရဲ့ သံစဉ်တွေ၊ ဝတ်စုံပြည့်ဝတ်ဆင်ထားတဲ့ အစိုးရအဖွဲ့ဝင်တွေနဲ့ သတင်းထောက်တွေရဲ့ ရယ်မောသံတွေကြောင့် စည်ကားလို့နေတယ်လို့ အဲဒီပွဲမှာ တက်ရောက်နေတဲ့ သတင်းထောက်တွေက ပြန်ရေးကြပါတယ်။ သမ္မတ ဒေါ်နယ်ထရန့်ဟာ သမ္မတသက်တမ်းအတွင်း ပထမဆုံးအကြိမ်အဖြစ် ဒီညစာစားပွဲကို တက်ရောက်လာတာဖြစ်ပြီး စင်မြင့်ထက်မှာ ဂုဏ်သရေရှိလူကြီးမင်းတွေနဲ့အတူ နေရာယူထားခဲ့ပါတယ်။ ဒါပေမယ့်လည်း ပျော်ရွှင်စရာကောင်းနေတဲ့ အခိုက်အတန့်ဟာ ကျယ်လောင်လှတဲ့ အသံဗလံတွေကြောင့် ရုတ်ချည်းပျက်ပြယ်သွားခဲ့ပါတယ်။ ခန်းမထဲက ဧည့်သည်တွေဟာ "ဝပ်နေကြ! အောက်ဆင်းနေကြ!" ဆိုတဲ့ အော်ဟစ်သံတွေနဲ့အတူ ကြမ်းပြင်ပေါ်ကို မှောက်ချလိုက်ကြရပါတယ်။ "ကျွန်မ စားပွဲအောက်ကိုပဲ ငုပ်လျှိုးနေလိုက်တော့တယ်။ ဘာဖြစ်နေလဲဆိုတာ မသိရတဲ့အတွက် အန္တရာယ်ကို မစွန့်စားနိုင်ဘူးလေ" လို့ One America News သတင်းထောက် Alexandra Ingersoll က အခြေအနေကို ပြန်ပြောင်းပြောပြပါတယ်။ အသံတွေထွက်ပေါ်လာပြီး စက္ကန့်ပိုင်းအတွင်းမှာပဲ လျို့ဝှက် လုံခြုံရေး Secret Service တပ်ဖွဲ့ဝင်တွေဟာ လက်နက်တွေကိုယ်စီနဲ့ သမ္မတကို ဝိုင်းရံလိုက်ကြပြီး စင်နောက်ဘက်ကတစ်ဆင့် ဘေးကင်းရာကို အမြန်ဆုံး ခေါ်ဆောင်သွားခဲ့ပါတယ်။ အဲဒီ အချိန်မှာတော့ ခန်းမထဲက ဂီတသံတွေ ရပ်တန့်သွားပြီး ကြောက်လန့်တုန်လှုပ်နေတဲ့ ဧည့်သည်တွေကြားထဲမှာ လုံခြုံရေးအေးဂျင့်တွေဟာ သေနတ်တွေကိုင်ဆောင်ပြီး နေရာအနှံ့ ဖြန့်ကြက်စစ်ဆေးခဲ့ကြပါတယ်။ ထူးခြားတဲ့ တိုက်ဆိုင်မှုတစ်ခုကတော့ ဒီဟိုတယ်ဟာ လွန်ခဲ့တဲ့ ၄၅ နှစ်က အမေရိကန် သမ္မတ ရော်နယ်ရေဂင် လုပ်ကြံသတ်ဖြတ်ခံရမှုကနေ ကံကောင်းထောက်မစွာ လွတ်မြောက်ခဲ့တဲ့ ဟော်တယ်ပဲ ဖြစ်နေပါတယ်။ ညစာစားပွဲကနေ ဘေးကင်းရာကို အရေးပေါ်ရွှေ့ပြောင်းပေးခဲ့ရသူတွေထဲမှာ ကျန်းမာရေးဝန်ကြီး Robert F. Kennedy Jr လည်း ပါဝင်ခဲ့ပါတယ်။ သူဟာ ၁၉၆၃ ခုနှစ်က လုပ်ကြံခံခဲ့ရတဲ့ သမ္မတ ဂျွန်အက်ဖ်ကနေဒီရဲ့ တူတော်စပ်သူဖြစ်ပါတယ်။ အဲဒီလိုပဲ သမ္မတရဲ့ အုပ်ချုပ်ရေးအဖွဲ့ဝင် တစ်ဦးဖြစ်တဲ့ Mehmet Oz ကလည်း အရေးပေါ်ထွက်ခွာသွားခဲ့ပါတယ်။ ဒီပစ်ခတ်မှု အတွင်းမှာ သမ္မတနှင့် သမ္မတကတော် လုံခြုံဘေးကင်းစွာ လွတ်မြောက်ခဲ့ပြိး အိမ်ဖြူတော်ကို ပြန်လှည့် သွားခဲ့ပါတယ်။ လုပ်ကြံ သတ်ဖြတ်ဖို့ ကြိုးစားခဲ့တယ်လို့ သံသယ ရှိသူ တစ်ဦးကို ဖမ်းဆီးထိန်းသိမ်းထားပါတယ်။ ဝါရှင်တန်ဟီလ်တန်ဟိုတယ် ပတ်ဝန်းကျင်မှာတော့ ရဲတပ်ဖွဲ့ဝင်တွေက လမ်းတွေကို ပိတ်ဆို့ပြီး လုံခြုံရေးအဆင့်မြှင့်တင်ထားသလို၊ ကောင်းကင်ယံမှာလည်း ရဟတ်ယာဉ်တွေနဲ့ ကင်းလှည့်နေပါတယ်။ #အမေရိကန်သမ္မတဒေါ်နယ်ထရမ့် #ပစ်ခတ်မှု #လုပ်ကြံမှု #ဝါရှင်တန်ဟီလ်တန်ဟိုတယ်

အမေရိကန် သမ္မတ ဒေါ်နယ်ထရန့် တက်ရောက်တဲ့ ညစာစားပွဲမှာ ပစ်ခတ်မှု ဖြစ်ပွား

Apr 25

ကချင်ပြည်မှာ စစ်ရေး ပိုမို တင်းမာလာနိုင်ဟု KIO သတိပေး သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဧပြီလ ၂၅ ရက်။ စစ်ဦးစီးချုပ်အသစ် “လက်စွမ်းပြလိုမှုနှင့်အတူ” ကချင်ပြည်အတွင်း စစ်ရေးပိုမိုတင်းမာလာနိုင်ဟု ကချင်လွတ်လပ် ရေးအဖွဲ့ KIO သတိပေးလိုက်သည်။ စစ်တပ်ဘက်မှ စစ်ဦးစီးချုပ်အသစ် အပြောင်းအလဲပြုလုပ်လာမှုနှင့်အတူ လက်စွမ်းပြလိုသည့် ဆန္ဒရှိနိုင်သဖြင့် ကချင်ပြည်အတွင်း ရှေ့လာမည့်ကာလများတွင် စစ်ရေးပိုမိုတင်းမာလာနိုင်ကြောင်း၊ ပြည်သူများအနေဖြင့် စစ်ရေးသတင်းများကို အမြဲနားစွင့်ကာ သတိဖြင့် သွားလာကြရန် KIO အဖွဲ့၏ သတင်းနှင့်ပြန်ကြားရေး တာဝန်ခံ ဗိုလ်မှူးကြီးနော်ဘူက ပြောဆိုလိုက်သည်။ လက်ရှိစစ်ရေးအခြေအနေနှင့် ပတ်သက်၍ ဗိုလ်မှူးကြီးနော်ဘူက “စစ်ကော်မရှင်တွေလည်း အခုသူတို့ အပြောင်း အလဲတွေပေါ့နော်။ အင်္ကျီတွေ အဝတ်အထည်တွေလဲပြီးမှ အစိုးရဖွဲ့စည်းတဲ့ အချိန်ကာလဆိုတော့ သူတို့လည်း စစ်ဦးစီးချုပ်လည်း အခု အသစ် ပြန်ရွေးလာတယ်ဆိုတော့ သူလည်း နည်းနည်းလက်စွမ်းပြချင်တဲ့ ဆန္ဒလည်း ရှိမှာပေါ့။ ဒါကြောင့် စစ်ရေး အခြေအနေကိုတော့ အမြဲတမ်းနားထောင်ဖို့ အရေးကြီးပါတယ်” ဟု ပြောသည်။ မြေပြင်အခြေအနေများအရ ဗန်းမော်မြို့နယ်ရှိ ခလရ (၄၀) ပတ်ဝန်းကျင်တွင် စစ်တပ်နှင့် ကချင်လွတ်လပ်ရေး တပ်မတော် KIA ပူးပေါင်းတပ်များအကြား တိုက်ပွဲများ နေ့စဉ်နီးပါး ဖြစ်ပွားနေပြီး စစ်တပ်ဘက်မှ လက်နက်ကြီး၊ ဒရုန်းနှင့် လေကြောင်းတိုက်ခိုက်မှုများကို အမြဲတမ်းပြုလုပ်နေကြောင်း ဆိုသည်။ ထို့ပြင် ဝိုင်းမော်မြို့နယ်ရှိ မိုင်းနားနှင့် စံပြတောင်တစ်ဝိုက်တွင်လည်း ထိတွေ့ရင်ဆိုင်တိုက်ပွဲများ ခပ်စိပ်စိပ် ဖြစ်ပွားနေသဖြင့် အမြဲတမ်း သတိအနေအထားဖြင့် စောင့်ကြည့်နေရသည့် အခြေအနေဖြစ်သည်။ တနိုင်းဒေသရှိ ပယင်းမှော်ဘက်တွင် KIA နှင့် ပူးပေါင်းတပ်များက စစ်တပ်၏ အခိုင်အမာစခန်းများကို ထိုးစစ် ဆင်နေကြောင်း ဗိုလ်မှူးကြီးနော်ဘူက အတည်ပြုသည်။ ဧပြီလ ၂၄ ရက်နေ့အထိ တိုက်ပွဲများ ဆက်ဖြစ်နေ သည်ဟု ပြောသည်။ “ပယင်းမှော်ဖက်မှာ ဖြစ်ပါတယ်။ နန်ဗျူချောင်းတစ်ကြောလုံးမှာရှိတဲ့ စစ်ကော်မရှင်တပ်တွေ အဓိကကတော့ ဝှေ့လော့ဆိုတဲ့ စခန်းရယ်၊ နောက် ဟာလောင်ကောင်ဆိုတဲ့ စခန်းရယ်ပေါ့။ အဲဒီစခန်း ၂ ခုရဲ့ ရှေ့တန်း ကာကင်း ဖြစ်နေတဲ့ အဲဒီလမ်းတစ်ကြောမှာ ဖွင့်ထားတဲ့ ကာကင်းပို့စ် ၂ ခုကတော့ သိမ်းပိုက်လိုက်တာ ရှိပါတယ်။ ဒါပေ မယ့် ဟို အခိုင်အမာ လုပ်ထားတဲ့ စခန်း ၂ ခုကိုတော့ မသိမ်းရသေးပါဘူး။ အဲဒီနေရာဖက်မှာလည်း တိုက်ပွဲက တော့ ဆက်ဖြစ်နေပါတယ်” ဟု ဗိုလ်မှူးကြီးနော်ဘူက ပြောသည်။ ဖားကန့်ဒေသတွင် တိုက်ပွဲများ တစ်ပတ်ခန့် ငြိမ်သက်နေသော်လည်း စစ်တပ်၏ ဗျူဟာကုန်းမှ လက်နက်ကြီး များဖြင့် ရမ်းသန်းပစ်ခတ်မှုကြောင့် ပြည်သူထိခိုက်ဒဏ်ရာရသူ နေ့စဉ်နှင့်အမျှတိုးလာနေသည်ဟု ဆိုသည်။ ထို့ပြင် ဧပြီလ တတိယပတ်အတွင်း လုံးခင်းဘက်ရှိ ဆေးဆိုင်နှင့် တည်းခိုခန်းများတွင် ပြည်သူများကို ဖမ်းဆီးမှု များရှိနေသဖြင့် ဖားကန့် တစ်ခွင်လုံးတွင် အချိန်မရွေး တိုက်ပွဲများ ပြန်လည်ပြင်းထန်လာနိုင်သည့် အခြေအနေ တွင် ရှိနေသည်။ အခြားတစ်ဖက်တွင်မူ ခေါင်လန်ဖူးဒေသရှိ စစ်တပ်လက်အောက်ခံ ပြည်သူ့စစ်များအတွင်း စစ်မတိုက်ချင်သဖြင့် ထွက်ပြေးမှုများ ရှိနေသည်။ ပူတာအိုအခြေစိုက် ပြည်သူ့စစ်အဖွဲ့ဝင်များသည် နေရပ်ပြန်ပါက ပြန်လည်ဖမ်းဆီးခံရမည်ကို စိုးရိမ်နေကြပြီး ဒေသခံများ၏ ပြောပြချက်အရ ၎င်းတို့မှာ ကြောက်လန့်နေသည့် အနေအထားရှိကြောင်း သိရသည်။ လက်ရှိတွင် လမ်းပိုင်းအချို့ကို ပြည်သူလူထု လုံခြုံရေးအတွက် KIA ဘက်မှ အကန့်အသတ်မရှိ ပိတ်ထားရခြင်း ဖြစ်ပြီး၊ ပြည်သူများအနေဖြင့် ခရီးသွားလာရာတွင် မြေပြင်နှင့် ဝေဟင်သတင်းများကို ဂရုတစိုက် နားထောင်ရင်း သွားလာကြရန် ဗိုလ်မှူးကြီးနော်ဘူက တိုက်တွန်းထားသည်။ #ကချင်တိုက်ပွဲ #KIA #KIO #စစ်အုပ်စု

ကချင်ပြည်မှာ စစ်ရေး ပိုမို တင်းမာလာနိုင်ဟု KIO သတိပေး

Apr 25

ထိရောက်သည့် ဖိအားပေးအရေးယူမှုများလုပ်ရန် အာဆီယံအား ND-Burma တိုက်တွန်း သတင်းနှင့် မီဒီယာကွန်ရက်။ ၂၀၂၆ ခုနှစ်၊ ဧပြီလ ၂၅ ရက်။ မြန်မာ့အရေး ဖြေရှင်းရန် ချမှတ်ထားသည့် အာဆီယံ၏ ဘုံသဘောတူညီချက် ၅-ချက်သည် ငါးနှစ်ကြာမြင့်သည့် တိုင် လက်တွေ့တွင် အလုပ်မဖြစ်ဘဲ ကျရှုံးနေသဖြင့် နည်းလမ်းသစ်တစ်ရပ်ကို အရေးပေါ် ချမှတ်ဆောင်ရွက်ရန် လူ့အခွင့်အရေးမှတ်တမ်းကွန်ရက်-မြန်မာနိုင်ငံ (ND-Burma) က တိုက်တွန်းတောင်းဆိုလိုက်သည်။ ဧပြီလ ၂၄ ရက်နေ့တွင် ND - Burma က ထုတ်ပြန်သည့် အစီရင်ခံစာ၌ အာဆီယံအနေဖြင့် လက်တွေ့မကျသည့် နည်းလမ်းများကို စွန့်လွှတ်ရန် ထောက်ပြထားသည်။ အာဆီယံက ၎င်းတို့၏ ဘုံသဘောတူညီချက်ကို လိုက်နာရန် တိုက်တွန်းနေသော်လည်း စစ်အုပ်စုသည် လက်နက် အားကိုးဖြင့် အဓမ္မဖိနှိပ်မှုများကိုသာ ကျူးလွန်နေကြောင်း မွန်ပြည် လူ့အခွင့်အရေး ဖောင်ဒေးရှင်း (HURFOM) ဒါရိုက်တာ နိုင်အဲမွန်က ပြောသည်။ “အဓိကကတော့ ဒီစစ်ကောင်စီရဲ့ ပြည်သူလူထုအပေါ်မှာ ဖိနှိပ်ပြီးတော့ လက်နက်အားကိုးနဲ့ အုပ်ချုပ်ချင်တဲ့ စိတ်အာသီသတွေက အမြဲတမ်းရှင်သန်နေဆဲ ဖြစ်တယ်ပေါ့နော်။ အာဆီယံကနေ ချမှတ်ထားတဲ့ ဘုံသဘော တူညီချက် ၅ ချက်ကို လိုက်နာပြီးတော့ မဖြစ်မနေ ဆောင်ရွက်ဖို့ တောက်လျှောက် ဝိုင်းတွဲပြီးတော့ ခေါ်တယ် ပေါ့နော်။ တိုက်တွန်းတယ်။” နိုင်အဲမွန်က “ဒါပေမဲ့ စစ်အုပ်စုက ပြည်သူလူထုရဲ့ သဘောထားကို ဆန့်ကျင်ပြီးတော့ ပြည်သူ့အစိုးရဆီကနေ အာဏာကို မတရားရယူ၊ အဓမ္မနည်းနဲ့ အုပ်ချုပ်ဖို့ လုပ်တဲ့အခါကျတော့ သူ့ပြည်သူကို တောက်လျှောက် ဖိနှိပ်တယ်” ဟု ပြောသည်။ ND-Burma ၏ မှတ်တမ်းများအရ ၂၀၂၅ ခုနှစ် နှောင်းပိုင်းမှ ၂၀၂၆ ခုနှစ်အစောပိုင်းအထိ မြန်မာနိုင်ငံအတွင်း လူ့အခွင့်အရေး ချိုးဖောက်မှုများ ဆက်တိုက်မြင့်တက်နေပြီး နေရပ်စွန့်ခွာထွက်ပြေးရသူ (IDPs) ဦးရေမှာ ၄ သန်းအထိ ရှိလာနိုင်ကြောင်း ခန့်မှန်းထားသည်။ လက်ရှိအခြေအနေမှာ ညှိနှိုင်းရေးထက် ထိရောက်စွာ အရေးယူရမည့် အဆင့်သို့ ရောက်ရှိနေပြီဖြစ်ကြောင်း နိုင်အဲမွန်က ဆက်လက်ထောက်ပြသည်။ “စစ်အုပ်စုက ဒီအဆင့်မှာ မဟုတ်တော့ဘူး။ တကယ်တမ်းကျတော့ လုံးဝ Sanction တွေနဲ့ ထိထိရောက်ရောက် အရေးယူရမယ့်အဆင့်၊ ကျူးလွန်လာတဲ့ စစ်ရာဇဝတ်မှုတွေအတွက် ICC ကို ပို့ရမယ့် အဆင့်အထိတောင် ရောက်နေပြီ။ Five-Point Consensus က တကယ်တမ်းကျတော့ စစ်တပ်နဲ့ ညှိနှိုင်းရေးအပေါ်မှာပဲ အခြေခံ ပြီး သံတမန်ရေးအရ တွန်းတာဖြစ်တယ်။ ဆိုတော့ ဒီအချက်မှာ ပြည်သူလူထု တော်တော်များများ ဖြစ်စေချင် တာက ဒီဖိနှိပ်တာတွေကို ရပ်၊ ပြီးလို့ရှိရင် ပြည်သူက အုပ်ချုပ်တဲ့ NUG အစိုးရနဲ့ ညှိနှိုင်းဖို့ပဲ” ဟု နိုင်အဲမွန်က ပြောသည်။ အာဆီယံနှင့် နိုင်ငံတကာအနေဖြင့် စစ်အုပ်စု၏ အတုအယောင် (Sham) ရွေးကောက်ပွဲရလဒ်များကို အသိအမှတ်မပြုရန်နှင့် တရားဝင်မှု မပေးရန်လည်း အစီရင်ခံစာက သတိပေးထားသည်။ စစ်အုပ်စုကို အသိအမှတ်ပြုခြင်းသည် “မကောင်းမှုကို အားပေးသလို” ဖြစ်သွားမည် ဖြစ်သောကြောင့် မြန်မာပြည်သူများ၏ ဒီမိုကရေစီရေး လှုပ်ရှားမှုကိုသာ ထောက်ပံ့ကူညီရန် ND-Burma က တိုက်တွန်းထား သည်။ #NDBurma #အာဆီယံ #နိုင်အဲမွန်

ထိရောက်သည့် ဖိအားပေးအရေးယူမှုများလုပ်ရန် အာဆီယံအား ND-Burma တိုက်တွန်း

Apr 25

အာလူးဈေး ကျသဖြင့် ရှမ်းတောင် တောင်သူများ အရှုံးပေါ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၂၅ ရက်။ စိုက်ပျိုးစရိတ် ကြီးမြင့်သော်လည်း အာလူးဈေး ထိုးကျနေသဖြင့် ရှမ်းတောင်မှ တောင်သူများ အရှုံးပေါ်နေကြ သည်။ ရှမ်းပြည် တောင်ပိုင်းမှ ထွက်ရှိသော အာလူးများမှာ သင်္ကြန်ကာလအပြီး၌ ဈေးနှုန်းများ ဆက်တိုက် ထိုးကျလာ သောကြောင့် စိုက်ပျိုးတောင်သူများ အရှုံးပေါ်ကာ အခက်အခဲနှင့် ရင်ဆိုင်နေကြရကြောင်း ဒေသတွင်း စိုက်ပျိုးရေး သတင်းရင်းမြစ်များက ပြောသည်။ မြေပြင် အခြေအနေများအရ မြန်မာပြည်အထက်ပိုင်း အညာဈေးကွက်နှင့် ပြည်ပဝယ်လိုအား ကျဆင်းလာခြင်း၊ ဈေးကွက်အတွင်းသို့ တရုတ်အာလူးများ အလုံးအရင်းဖြင့် ဝင်ရောက်လာခြင်းတို့ကြောင့် ယခုကဲ့သို့ ဈေးနှုန်းများ ထိုးဆင်းသွားခြင်းဖြစ်သည်။ ဟဲဟိုးမြို့ရှိ တောင်သူတစ်ဦးက ၎င်းတို့ကြုံတွေ့နေရသည့် အခြေအနေကို လက်ဖက်ရည်ဈေးနှုန်းနှင့် နှိုင်းယှဉ် ကာ ယခုကဲ့သို့ ပြောသည်။ “လက်ဖက်ရည်တစ်ခွက် တစ်ထောင်ကျော်ပြီ။ ကျနော်တို့ အာလူးစိုက်တာ တစ်ပိဿာ တစ်ထောင်ပဲ ရတယ်။ နောက်နှစ်တွေပဲ မျှော်ရတော့မယ်” ဟု ပြောသည်။ အာလူးဈေးနှုန်း ကျဆင်းရသည့် နောက်ထပ် အကြောင်းအရင်းတစ်ခုမှာ စက်သုံးဆီရှားပါးမှုကြောင့် သယ်ယူ ပို့ဆောင်ခ (တန်ဆာခ) မြင့်တက်လာခြင်းနှင့် စားအုန်းဆီဈေး မြင့်တက်မှုကြောင့် ဒေသတွင်း အာလူးကြော် လုပ်ငန်းများ ရပ်ဆိုင်းလိုက်ရခြင်းတို့ကြောင့် ဖြစ်သည်ဟု ဆိုကြသည်။ လက်ရှိတွင် ရှမ်းတောင်၌ အာလူးတစ်ပိဿာလျှင် ကျပ် ၁,၀၀၀ သာ ပေါက်ဈေးရှိပြီး ရန်ကုန်ဈေးကွက်တွင် လည်း ကျပ် ၁,၈၀၀ နှုန်း၌သာ ရပ်တန့်နေသည်။ တောင်သူများအနေဖြင့် မြေဩဇာနှင့် ပိုးသတ်ဆေးစသည့် စိုက်ပျိုးစရိတ်များ ကြီးမြင့်လာသည့်အပြင် စက်သုံး ဆီကိုလည်း မှောင်ခိုလမ်းကြောင်းမှ ဈေးကြီးပေးဝယ်ခဲ့ရသဖြင့် နစ်နာဆုံးရှုံးမှု ပိုမိုများပြားနေခြင်းဖြစ်သည်။ အာလူးမျိုးရင်းများ ဝယ်ယူစဉ်က တစ်ပိဿာလျှင် ကျပ် ၆,၀၀၀ ကျော်အထိ ပေးခဲ့ရသဖြင့် လက်ရှိနစ်နာမှုများ ကို ကာမိရန်အတွက် အနိမ့်ဆုံး တစ်ပိဿာ ၄,၀၀၀ ကျပ်အထိ ရရှိရန် မျှော်လင့်နေကြသည်။ အောင်ပန်းရှိ ပွဲရုံလုပ်ငန်းရှင်တစ်ဦးကမူ ဈေးကွက်အခြေအနေနှင့် ပတ်သက်၍ ယခုကဲ့သို့ ပြောသည်။ “အာလူးဈေးကွက် ကျရင်လည်း ကြာတယ်။ တက်ရင်လည်း တော်တော်နဲ့ မဆင်းဘူး။ မိုးကုန်အထိတောင် တက်ဖို့ဝေးပါသေးတယ်” ဟု ပြောသည်။ ယနေ့ (ဧပြီလ ၂၅ ရက်နေ့) ရှမ်းပြည်တောင်ပိုင်း၊ အောင်ပန်းမြို့ ကုန်စည်ရောင်းဝယ်ရေး ပွဲရုံတစ်ခု၏ ထုတ်ပြန် ချက်အရ အာလူးဈေးနှုန်းများမှာ အရွယ်အစားအလိုက် S-2/ S-3 အမျိုးအစား ၃,၀၀၀ ကျပ်၊ S-1-OK တစ်ပိဿာ ၂,၀၀၀ ကျပ်နှင့် ဂေါ်လီဆိုဒ်မှာ ကျပ် ၁,၀၀၀ အထိ ပေါက်ဈေးရှိနေသည်။ ပြည်တွင်းဖြစ် အာလူးများ ဈေးကွက် မကောင်းသည့်ကြားမှ တရုတ် L6 အာလူးများမှာလည်း တစ်ပိဿာ ကျပ် ၁,၀၀၀ နှုန်းဖြင့် ဈေးကွက်အတွင်း နေရာယူထားကြောင်း ပွဲရုံလုပ်ငန်းရှင်များက ပြောသည်။ #အာလူးစိုက်တောင်သူ #အာလူးစျေး #ဟဲဟိုး #စိုက်ပျိုးစရိတ်

အာလူးဈေး ကျသဖြင့် ရှမ်းတောင် တောင်သူများ အရှုံးပေါ်

Apr 25

စက်သုံးဆီဈေး ကွာဟမှုကြောင့် စစ်ရှောင်များ စားရေ ရိက္ခာ ရှားပါးမှု ကြုံ သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဧပြီလ ၂၅ ရက်။ တော်လှန်ရေးတပ်ဖွဲ့များ ထိန်းချုပ်ရာ ကရင်နီပြည်အတွင်း ဒေသအလိုက် စက်သုံးဆီဈေးနှုန်း ကွာဟချက် ကြီးမားနေခြင်းကြောင့် စစ်ဘေးရှောင်များမှာ စားနပ်ရိက္ခာပြတ်လပ်မှု၊ ရေရှားပါးမှုဒဏ်များကို ရင်ဆိုင်နေကြရ သည်။ လက်ရှိတွင် ကရင်နီပြည်အတွင်း လောင်စာဆီ တစ်လီတာ ပေါက်ဈေးမှာ ထိုင်းနယ်စပ်နှင့် နီးစပ်သည့် မယ်စဲ့မြို့ တွင် ကျပ် ၁၀,၀၀၀ ခန့်ရှိသော်လည်း၊ စစ်ဘေးရှောင်အများစု ခိုလှုံရာ ဒီးမော့ဆိုမြို့နယ် အနောက်ဘက်ခြမ်းတွင် ကျပ် ၁၃,၅၀၀ ရှိနေသည်။ လမ်းပန်းဆက်သွယ်ရေး ပိုမိုခက်ခဲသော ဖရူဆိုမြို့နယ် အနောက်ဘက်ခြမ်းတွင်မူ ဆီတစ်လီတာလျှင် ကျပ် ၁၆,၀၀၀ မှ ၁၈,၀၀၀ အထိ ဒေသအလိုက် ဈေးနှုန်းမြင့်တက်နေကြောင်း စစ်ရှောင်များက ပြောသည်။ စက်သုံးဆီဈေး မြင့်တက်လာမှုနှင့်အတူ ကုန်ဈေးနှုန်းများပါ လိုက်လံတက်လာခြင်းကြောင့် စစ်ဘေးရှောင်များ အတွက် ထောက်ပံ့မှုများ ယခင်ကထက် နည်းပါးသွားကြောင်း စစ်ဘေးရှောင်ကူညီကယ်ဆယ်ရေးအဖွဲ့ Karenni Hope တာဝန်ခံ ကိုလွမ်းက ပြောသည်။ “အရင်က ဆန်တစ်အိတ် တစ်သိန်းဝန်းကျင်ပဲ ရှိရာကနေ အခု တစ်သိန်းခွဲလောက်အထိ ဝယ်နေရတယ်။ ဆီတွေဆိုရင်လည်း အရင်ကထက် တစ်ဆခွဲလောက် တက်သွားတယ်။ သွားဖို့လာဖို့ကစ ခက်ခဲသွားတော့ စစ်ဘေးရှောင်တွေဘက်မှာ အများကြီး ပိုပြီးခက်ခဲသွားတာပေါ့” ဟု ၎င်းက ပြောသည်။ အထူးသဖြင့် ဖရူဆိုမြို့နယ် အတွင်းရှိ ဒိုးပရယ်ကျေးရွာအုပ်စုကဲ့သို့ စစ်ဘေးရှောင် ထောင်နှင့်ချီ ခိုလှုံရာနေရာ များတွင် ရိက္ခာပြတ်လပ်မှုမှာ ပိုမိုဆိုးဝါးလာနေသည်။ စစ်ဘေးရှောင်စခန်း တာဝန်ရှိသူတစ်ဦးက အရေးပေါ်ဆန် ထုတ်ယူရမှု အခြေအနေနှင့် ပတ်သက်ပြီး ယခုကဲ့သို့ ရှင်းပြသည်။ စစ်ဘေးရှောင်စခန်း တာဝန်ရှိသူက “အရေးပေါ်ဆန် အိတ် ၁၀၀ လောက် ထားလိုက်ပါတော့ ဒီအိမ်ထောင်စု ၁၀၀ ဆီ တစ်ခါတလေ တစ်လတောင်မရှိဘူး ကုန်သွားပြီ။ အရင်တုန်းကဆို အရေးပေါ်ဆန်တောင်မှ တော်တော်နဲ့ မထုတ်ဘူး။ ထုတ်တဲ့လူကတော့ နည်းတယ်။ အခုက များသည်ထက် များလာတယ်။ သူများက ကျနော်တို့ကို စားနပ်ရိက္ခာ ပေးမယ်ဆိုရင် ကိုယ့်ဘာသာသွားသယ်လို့ရှိရင်လည်း ကားခမတတ်နိုင်ဘူး။ ဆီဈေးက အဆမတန် တက်နေတော့ မတတ်နိုင်ဘူးလေ။” ဟု ပြောသည်။ ရိက္ခာအခက်အခဲ အပြင် နွေရာသီကာလ ရေကန်များ ခန်းခြောက်သွားသဖြင့် ရေရှားပါးမှုနှင့်လည်း ထပ်ဆင့် ရင်ဆိုင်နေရသည်။ အိမ်ထောင်စု ၃၀ ခန့်အတွက် နှစ်ရက်စာသာ အသုံးပြုနိုင်သည့် ရေသယ်ကားတစ်စီးလျှင် ယခင်နှစ်က ကျပ် ၃ သိန်းသာ ပေးရသော်လည်း၊ ယခုနှစ်တွင် ဆီဈေးကြောင့် ကျပ် ၄ သိန်းခွဲအထိ မြင့်တက်နေကြောင်း ဆိုသည်။ စစ်ရှောင်ကာလ ကြာမြင့်လာသည်နှင့်အမျှ အလုပ်အကိုင်မရှိခြင်း၊ ကုန်ဈေးနှုန်းကြီးမြင့်ခြင်းတို့ကြောင့် စစ်ဘေး ရှောင်များမှာ လုံခြုံရေးအရ စိုးရိမ်ရသည့်ကြားမှပင် နေရပ်ပြန်၍ တောင်ယာလုပ်ကိုင်ရန် စဉ်းစားလာနေကြ သည်။ လက်ရှိတွင် ဖရူဆိုမြို့နယ်အတွင်း ရိက္ခာ၊ ရေနှင့် ကျန်းမာရေးဆိုင်ရာ အခက်အခဲများ ပိုတိုး၍ ရင်ဆိုင်လာနေရ သဖြင့် လူသားချင်းစာနာမှု အကူအညီများ မြေပြင်သို့ တိုက်ရိုက်ရောက်ရှိနိုင်မည့် လမ်းကြောင်းများ အရေးပေါ် ဖော်ဆောင်ပေးရန် ဒေသခံအဖွဲ့အစည်းများက တောင်းဆိုထားကြသည်။ #လမ်းပန်းဆက်သွယ်ရေး #စက်သုံးဆီ #ကရင်နီ

စက်သုံးဆီဈေး ကွာဟမှုကြောင့် စစ်ရှောင်များ စားရေ ရိက္ခာ ရှားပါးမှု ကြုံ

Apr 24

တရုတ်ဂြိုလ်တု အကူအညီဖြင့် အီရန်က အမေရိကန်နှင့် အစ္စရေး စစ်စခန်းများကို ထောက်လှမ်းနေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီ ၂၄ ရက်။ အမေရိကန်အစိုးရက အရှေ့အလယ်ပိုင်းဒေသဆိုင်ရာ ဂြိုဟ်တုဓာတ်ပုံနှင့် ဒေတာ အချက်အလက်များကို ရက်အကန့်အသတ်မရှိ ပိတ်ပင်ကန့်သတ်လိုက်သော်လည်း အီရန်နိုင်ငံသည် တရုတ်နိုင်ငံ၏ အဆင့်မြင့်ဂြိုဟ်တုနည်းပညာကို အသုံးပြု၍ အမေရိကန်နှင့် အစ္စရေး စစ်အခြေစိုက်စခန်းများကို တိကျစွာ ပစ်မှတ်ထားထောက်လှမ်းလျက်ရှိကြောင်း နိုင်ငံတကာ သတင်းများတွင် ဖော်ပြကြသည်။ ယခင်က နိုင်ငံတကာသုတေသီများနှင့် သတင်းမီဒီယာများသည် အမေရိကန်အခြေစိုက် ဂြိုဟ်တုကုမ္ပဏီများထံမှ အချက်အလက်များ ရယူခဲ့ကြသည်။ သို့သော်လည်း ယခုအခါ အမေရိကန်အစိုးရ၏ ဖိအားကြောင့် အဆိုပါကုမ္ပဏီများက ဝန်ဆောင်မှုပိတ်ပင်လိုက်သည့် အတွက် လိုအပ်ချက်နေရာကို တရုတ်ဂြိုဟ်တုကုမ္ပဏီများက အစားထိုးဝင်ရောက်လာခြင်းဖြစ်သည်။ အီရန်တော်လှန်ရေးအစောင့်တပ် (IRGC) သည် တရုတ်ပုဂ္ဂလိကကုမ္ပဏီဖြစ်သော Earth Eye Co ထံမှ TEE-01B ဂြိုဟ်တုကို အမေရိကန်ဒေါ်လာ ၃၆.၆ သန်းဖြင့် ဝယ်ယူခဲ့ခြင်း ဖြစ်သည်။ အဆိုပါဂြိုဟ်တုသည် မြေပြင်အရာဝတ္ထုများကို ၀.၅ မီတာ (Half-meter resolution) အထိ ကြည်လင်ပြတ်သားစွာ ရိုက်ကူးနိုင်စွမ်းရှိသဖြင့် ရန်သူ့လေယာဉ်အမျိုးအစားနှင့် ပျံသန်းရန်ပြင်ဆင်နေသည့် အခြေအနေများကိုပါ အသေးစိတ်ထောက်လှမ်းနိုင်သည်။ တရုတ်က အီရန်အပေါ် နိုင်ငံတကာပိတ်ဆို့မှုများကို ရှောင်လွှဲနိုင်ရန်အတွက် ဂြိုဟ်တုကို တရုတ်မြေပေါ်တွင် တည်ဆောက်လွှတ်တင်ခဲ့ပြီး အာကာသလမ်းကြောင်းအတွင်းသို့ ရောက်ရှိချိန်မှသာ အီရန်ထံသို့ တိုက်ရိုက်ထိန်းချုပ်ခွင့် လွှဲပြောင်းပေးခဲ့ခြင်းဖြစ်ပါသည်။ အီရန်သည် ဤဂြိုဟ်တုအကူအညီဖြင့် ဆော်ဒီအာရေးဗီးယားရှိ Prince Sultan လေတပ်စခန်းအပါအဝင် ဒေသတွင်းရှိ အမေရိကန်စခန်းများကို စောင့်ကြည့်ခဲ့ပြီး အမေရိကန်ဆီဖြည့်လေယာဉ် ၅ စီးနှင့် AWACS ထောက်လှမ်းရေးလေယာဉ်တစ်စီးကို ထိမှန်အောင် တိုက်ခိုက်နိုင်ခဲ့သည်ဟု သတင်းများက ဆိုသည်။ #အီရန်အစ္စရေးတိုက်ပွဲ #တရုတ်ဂြိုလ်တု #ဂြိုလ်တုနည်းပညာ #အီရန်ထောက်လှမ်းရေး

တရုတ်ဂြိုလ်တု အကူအညီဖြင့် အီရန်က အမေရိကန်နှင့် အစ္စရေး စစ်စခန်းများကို ထောက်လှမ်းနေ

Apr 24

ဂျာမနီက သမိုင်းတွင် ပထမဆုံးသော စစ်ဘက်ဆိုင်ရာ မဟာဗျူဟာသစ်ကို ထုတ်ပြန် သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဧပြီလ ၂၄ ရက်။ ဂျာမနီကာကွယ်ရေးဝန်ကြီး Boris Pistorius သည် ဂျာမန်စစ်တပ် (Bundeswehr) ကို ခေတ်နှင့်အညီ ပြုပြင်ပြောင်းလဲရန်အတွက် သမိုင်းတစ်လျှောက် ပထမဆုံးသော စစ်ဘက်ဆိုင်ရာ မဟာဗျူဟာသစ်ကို ထုတ်ဖော်ကြေညာလိုက်ပါသည်။ ဤမဟာဗျူဟာသည် ရုရှား-ယူကရိန်းစစ်ပွဲကြောင့် ပြောင်းလဲလာသော ကမ္ဘာ့လုံခြုံရေးအခြေအနေအရ ဂျာမန်စစ်တပ်ကို ပိုမိုမြန်ဆန်ပြီး နည်းပညာမြင့်မားသော စစ်တပ်ဖြစ်လာစေရန် ရည်ရွယ်ခြင်းဖြစ်ပါသည်။ မဟာဗျူဟာသစ်၏ ထူးခြားချက်မှာ လက်နက်အရေအတွက်ထက် စွမ်းဆောင်ရည် (Capability) ကိုသာ အဓိကထားတော့မည်ဖြစ်ပြီး လေကြောင်းရန်ကာကွယ်ရေး၊ အချက်အလက်အခြေပြု စစ်ဆင်ရေးနှင့် AI နည်းပညာများကို ပိုမိုအသုံးပြုသွားမည်ဖြစ်ပါသည်။ အဝေးပစ်လက်နက်စွမ်းရည် မြှင့်တင်မှုအဖြစ် လက်ရှိရှိနေသည့် Taurus ဒုံးကျည်များထက် ပိုမိုဝေးလံသော အကွာအဝေး ၁,၀၀၀ ကီလိုမီတာခန့်အထိ ပစ်ခတ်နိုင်သည့် JASSM-ER ဒုံးကျည်များကို ဝယ်ယူသွားရန် စီစဉ်လျက်ရှိသည်။ ထို့အပြင် စစ်သည်အင်အားကိုလည်း ၄၆၀,၀၀၀ အထိ တိုးမြှင့်သွားမည်ဖြစ်ကာ ဗျူရိုကရေစီလုပ်ထုံးလုပ်နည်းများကို လျှော့ချ၍ စစ်တပ်ကို ဒစ်ဂျစ်တယ်စနစ်သို့ ပြောင်းလဲသွားမည်ဟု ဆိုသည်။   မဟာဗျူဟာကို ထုတ်ပြန်သည်ဟု ဆိုသော်လည်း အချက်အလက်အများအပြားကိုမူ လျို့ဝှက်အဖြစ် ထိန်းသိမ်းထားဆဲလည်း ဖြစ်သည်။ #germany #ဂျာမဏီ #စစ်ဖက်ဆိုင်ရာ #မဟာဗျူဟာ

ဂျာမနီက သမိုင်းတွင် ပထမဆုံးသော စစ်ဘက်ဆိုင်ရာ မဟာဗျူဟာသစ်ကို ထုတ်ပြန်

« Prev 1 … 3 4 5 6 7 … 17 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

အမေရိကန်တွင် ပညာသင်ကြားနိုင်မည့် Hubert Humphrey Fellowship အစီအစဉ်မှ လျှောက်လွှာခေါ်
ဟားခါး-ထန်တလန် လမ်းပိုင်းကို စစ်တပ် ပြန်ထိန်းချုပ်ပြီး CDF-Zophei ဌာနချုပ်ကို ဗုံးကြဲ
အမေရိကန်က အီရန်ကို ဒုတိယမြောက်ညအဖြစ် ဆက်တိုက်ဗုံးကြဲ၊ ရေနံဈေးနှုန်းများ မြင့်တက်
ပါကစ္စတန်က အာဖဂန်ကို လေကြောင်း တိုက်ခိုက်မှု ပြန်လုပ်
ထိုင်းအစိုးရနှင့် FBI ပူးပေါင်းဆောင်ရွက်မှု တိုးမြှင့်

Archives

Archives

×Close