ထိုင်းလေတပ်က F-16 တိုက်လေယာဉ်နှစ်စင်း မြန်မာ နယ်စပ်သို့ စေလွှတ်

သတင်းနှင့် မီဒီယာ ကွန်ရက်။
၂၀၂၆ ခုနှစ်၊ နိုဝင်ဘာလ ၁၇ ရက်။

ထိုင်း-မြန်မာ နယ်စပ်အနီး မြန်မာ့လေတပ်၏ လှုပ်ရှားမှုများကြောင့် ထိုင်းတော်ဝင်လေတပ်က F-16 တိုက်လေယာဉ် နှစ်စင်းကို မယ်ဟောင်ဆောင်ခရိုင်သို့ အရေးပေါ် စေလွှတ်ခဲ့သည်။

ထိုင်းနိုင်ငံ၊ မယ်စရီယန်းမြို့နယ် တစ်ဖက်ကမ်း မြန်မာဘက်ခြမ်း နယ်စပ်အနီးတွင် လေယာဉ်ပျံသန်းမှုများ ရှိနေကြောင်း ထောက်လှမ်းတွေ့ရှိခဲ့ပြီးနောက် နိုဝင်ဘာလ ၁၆ ရက် မွန်းလွဲ ၂ နာရီခန့်တွင် F-16 တိုက်လေယာဉ် နှစ်စင်းကို စေလွှတ်ခဲ့ခြင်း ဖြစ်သည်။

နယ်စပ်အခြေအနေကို စောင့်ကြည့်ရန်နှင့် ဝေဟင်ကင်းလှည့်ရန် စေလွှတ်ခဲ့ခြင်းဖြစ်ပြီး ထိုင်းလေပိုင်နက်အတွင်းသို့ ကျူးကျော်ဝင်ရောက်ခြင်း မရှိခဲ့ကြောင်း ထိုင်းလေတပ် ပြောရေးဆိုခွင့်ရှိသူ လေတပ်ဗိုလ်ချုပ် ချာရွန် ဝပ်တနာစရီမွန်ခွန်က ပြောကြားသည်။

နိုင်ငံတော်လုံခြုံရေးနှင့် အချုပ်အခြာအာဏာကို ထိပါးလာနိုင်သည့် အခြေအနေများကို စောင့်ကြည့်ရန်နှင့် အသင့်အနေအထား ရှိနေစေရန် ပုံမှန်လုပ်ထုံးလုပ်နည်းအတိုင်း ဆောင်ရွက်ခဲ့ခြင်းဖြစ်ကြောင်း ၎င်းက ဆိုသည်။

ယင်းတုံ့ပြန်ဆောင်ရွက်မှုသည် နိုင်ငံတကာဥပဒေနှင့် ညီညွတ်ပြီး ထိုင်းလေပိုင်နက်နှင့် ပြည်သူများ၏ လုံခြုံရေးကို ကာကွယ်စောင့်ရှောက်ရန် ထိုင်းလေတပ်အနေဖြင့် အချိန်ပြည့် အသင့်ရှိနေကြောင်း လေတပ်ပြောခွင့်ရပုဂ္ဂိုလ်က ထပ်လောင်းပြောကြားသည်။