NMG Doh – Page 16 – Network Media Group

NMG Doh

Author: NMG Doh

Apr 22

တရုတ်ဖိအားကြောင့် ထိုင်ဝမ်သမ္မတ၏ အာဖရိကခရီးစဉ် ပျက် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၂၂ ရက်။ ထိုင်ဝမ်သမ္မတ လိုင်ချင်းတယ်သည် ယခုတစ်ပတ်အတွင်း အာဖရိကနိုင်ငံဖြစ်သော အက်စ်ဝါတီးနီ (Eswatini) သို့ သွားရောက်မည့် ခရီးစဉ်ကို အင်္ဂါနေ့တွင် ရုတ်တရက် ဖျက်သိမ်းလိုက်ရပါသည်။ သမ္မတ၏ လေယာဉ်ဖြတ်သန်းမည့် လမ်းကြောင်းပေါ်ရှိ ဆေးရှဲလ် (Seychelles)၊ မောရစ်ရှ (Mauritius) နှင့် မာဒါဂတ်စကာ (Madagascar) နိုင်ငံတို့က ဝေဟင်ပိုင်နက်အတွင်း ဖြတ်သန်းပျံသန်းခွင့်ကို ကြိုတင်အကြောင်းကြားခြင်းမရှိဘဲ ပိတ်ပင်လိုက်ခြင်းကြောင့် ဖြစ်ပါသည်။ ထိုင်ဝမ်အစိုးရက ဤလုပ်ရပ်သည် တရုတ်နိုင်ငံ၏ စီးပွားရေးအရ အကြပ်ကိုင်မှုနှင့် ဖိအားပေးမှုများကြောင့်ဖြစ်ကြောင်း တိုက်ရိုက်စွပ်စွဲထားပါသည်။ မာဒါဂတ်စကာနိုင်ငံကမူ ၎င်းတို့အနေဖြင့် "တရုတ်တစ်နိုင်ငံတည်းမူဝါဒ" ကိုသာ လက်ခံသောကြောင့်ဖြစ်ကြောင်း တုံ့ပြန်ထားပါသည်။ အက်စ်ဝါတီးနီ (Eswatini) သည် ထိုင်ဝမ်ကို နိုင်ငံအဖြစ် တရားဝင်အသိအမှတ်ပြုထားသည့် ၁၂ နိုင်ငံထဲမှ တစ်နိုင်ငံဖြစ်သည်၊ သမ္မတလိုင်သည် ထိုနိုင်ငံ၏ ဘုရင် နန်းတက်ခြင်း အနှစ် ၄၀ ပြည့်ပွဲကို တက်ရောက်ရန် စီစဉ်ထားခဲ့ခြင်း ဖြစ်သည်။ သမ္မတလိုင်က တရုတ်နိုင်ငံ၏ ယခုကဲ့သို့ နှိပ်ကွပ်မှုများသည် နိုင်ငံတကာငြိမ်းချမ်းရေးကို ခြိမ်းခြောက်နေခြင်းဖြစ်ကြောင်း ၎င်း၏ လူမှုကွန်ရက်မှတစ်ဆင့် ပြောကြားခဲ့သည်။ တရုတ်နိုင်ငံ၏ ဖိအားကြောင့် ထိုင်ဝမ်သမ္မတတစ်ဦး ပြည်ပခရီးစဉ်ကို ဖျက်သိမ်းလိုက်ရခြင်းမှာ ယခုအကြိမ်သည် ပထမဆုံးအကြိမ် ဖြစ်သည်။ #Eswatini #ထိုင်ဝမ်သမ္မတလိုင်ချင်းတယ်

တရုတ်ဖိအားကြောင့် ထိုင်ဝမ်သမ္မတ၏ အာဖရိကခရီးစဉ် ပျက်

Apr 22

ဒေါ်နယ်ထရမ့်က အပစ်အခတ်ရပ်စဲရေးကို ရက်အကန့်အသတ်မရှိ သက်တမ်းတိုး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၂၂ ရက်။ အမေရိကန်သမ္မတ ဒေါ်နယ်ထရမ့်သည် အီရန်နိုင်ငံနှင့် ချုပ်ဆိုထားသော အပစ်အခတ်ရပ်စဲရေး သဘောတူညီချက် သက်တမ်းကုန်ဆုံးရန် နာရီပိုင်းအလိုတွင် ရက်အကန့်အသတ်မရှိ ထပ်မံတိုးမြှင့်လိုက်သည်။ ဤဆုံးဖြတ်ချက်သည် ဒေသတွင်းစစ်မီး ပြန်လည်တောက်လောင်မည့် အခြေအနေကို ယာယီရှောင်ရှားနိုင်ခဲ့ပြီး သံတမန်နည်းလမ်းဖြင့် ဆက်လက်ဖြေရှင်းနိုင်ရန် အခွင့်အလမ်းတစ်ရပ် ဖန်တီးပေးလိုက်ခြင်းလည်း ဖြစ်သည်။ သမ္မတထရမ့်သည် အင်္ဂါနေ့နံနက်ပိုင်းအထိ အဆိုပါသက်တမ်းကို တိုးမြှင့်ရန် ဆန္ဒမရှိကြောင်း ပြောကြားခဲ့သော်လည်း ပါကစ္စတန်နိုင်ငံမှ ကြားခံစေ့စပ်သူများဖြစ်သည့် စစ်သေနာပတိချုပ် အဆင်မ် မူနာ (Asim Munir) နှင့် ဝန်ကြီးချုပ် ရှီဘာ့ဇ် ရှာရဖ် (Shehbaz Sharif) တို့၏ မေတ္တာရပ်ခံမှုကြောင့် ယခုကဲ့သို့ ဆုံးဖြတ်ခဲ့ခြင်းဖြစ်ကြောင်း ၎င်း၏ Truth Social ကွန်ရက်တွင် ဖော်ပြထားသည်။ အီရန်အစိုးရအတွင်း သဘောထားကွဲလွဲမှုများ ရှိနေခြင်းကြောင့် တညီတညွတ်တည်းဖြစ်သော အဆိုပြုချက်တစ်ရပ် တင်ပြနိုင်ခြင်းမရှိသေးမီ အချိန်စောင့်ဆိုင်းပေးရန် ပါကစ္စတန်ဘက်က တောင်းဆိုခဲ့ခြင်းဖြစ်ပါသည်။ အီရန်၏ အမြင့်ဆုံးခေါင်းဆောင်သစ် မိုဂျတာဘာ ခါမေနီ (Mojtaba Khamenei) ၏ ဆုံးဖြတ်ချက်ကို ဗုဒ္ဓဟူးနေ့တွင် ရရှိမည်ဟု ခန့်မှန်းထားကြသည်။ #အီရန်စစ်ပွဲ #ဒေါ်နယ်ထရမ့် #အမေရိကန်အီရန်ဆွေးနွေးပွဲ #MojtabaKhamenei #ShehbazSharif #AsimMunir

ဒေါ်နယ်ထရမ့်က အပစ်အခတ်ရပ်စဲရေးကို ရက်အကန့်အသတ်မရှိ

Apr 22

ဂျပန်က နိုင်ငံတကာသို့ လက်နက်တင်ပို့တော့မည် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၂၂ ရက်။ ဂျပန်နိုင်ငံသည် ဆယ်စုနှစ်ပေါင်းများစွာ ကျင့်သုံးခဲ့သော လက်နက်တင်ပို့မှုဆိုင်ရာ တင်းကျပ်သည့် ကန့်သတ်ချက်များကို အင်္ဂါနေ့တွင် ဖြေလျှော့ပေးလိုက်သည်။ ဤပြောင်းလဲမှုကြောင့် ဂျပန်နိုင်ငံသည် ၎င်းနှင့် ကာကွယ်ရေးဆိုင်ရာ သဘောတူညီချက်ရယူထားသော အမေရိကန်၊ ဗြိတိန် အပါအဝင် နိုင်ငံပေါင်း ၁၇ နိုင်ငံသို့ တိုက်ခိုက်ရေးသုံး လက်နက်များ ရောင်းချခွင့် ရရှိသွားမည်ဖြစ်သည်။ ယခင်က ဂျပန်နိုင်ငံသည် ကယ်ဆယ်ရေး၊ သယ်ယူပို့ဆောင်ရေး၊ သတိပေးစနစ်၊ စောင့်ကြည့်ရေးနှင့် မိုင်းရှင်းလင်းရေးဟူသော ကဏ္ဍ ၅ ခုတွင်သာ လက်နက်ကိရိယာ တင်ပို့ခွင့်ရှိခဲ့ခြင်းဖြစ်သည်။ ၂၀၂၅ ခုနှစ်၊ အောက်တိုဘာလတွင် ဝန်ကြီးချုပ်ဖြစ်လာသည့် ဆာနိုင်း တာကာအီချီ (Sanae Takaichi) က လက်ရှိလုံခြုံရေးအခြေအနေ တင်းမာမှုများအရ ငြိမ်းချမ်းရေးကို တစ်နိုင်ငံတည်း မကာကွယ်နိုင်တော့ကြောင်း ပြောကြားခဲ့သည်။ သို့သော်လည်း စစ်ပွဲဖြစ်ပွားနေသည့် နိုင်ငံများကို လက်နက်ရောင်းချခြင်းမပြုသည့် မူဝါဒကိုမူ ဆက်လက်ထိန်းသိမ်းသွားမည်ဟု ဆိုသည်။ တရုတ်နိုင်ငံကမူ ဂျပန်၏ ယခုလုပ်ရပ်သည် မဆင်မခြင် စစ်အင်အားချဲ့ထွင်မှုဖြစ်ကြောင်း ပြင်းပြင်းထန်ထန် ဝေဖန်ကန့်ကွက်ထားပါသည်။ #JapanWeapon #JapanArmy #Japan #ဂျပန်လက်နက်ရောင်းချတင်ပို့မှု

ဂျပန်က နိုင်ငံတကာသို့ လက်နက်တင်ပို့တော့မည်

Apr 21

ထီးချိုင့်-ကသာကြား မြစ်ရိုး ကျေးရွာများ တိမ်းရှောင်နေရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၂၁ ရက်။ ထီးချိုင့်မြို့ကို ပြန်လည်ထိန်းချုပ်ထားသည့် စစ်တပ်သည် ဧရာဝတီမြစ်ကြောင်းအတိုင်း ကသာမြို့ ဘက်သို့ အင်အားအလုံးအရင်းဖြင့် စစ်ကြောင်းထိုး ဝင်ရောက်လာရာ လမ်းတစ်လျှောက်ရှိ ကျေးရွာများမှ ဒေသခံပြည်သူများမှာ ရွာလုံးကျွတ် ဘေးလွတ်ရာသို့ အရေးပေါ် တိမ်းရှောင်နေကြရသည်။ ပြီးခဲ့သည့် ဧပြီလ ၁၃ ရက် (သင်္ကြန်အကြိုနေ့) ကတည်းက ထီးချိုင့်မြို့မှ အင်အား ၃၀၀ ခန့်ဖြင့် စတင် ထွက်ခွာ လာသည့် အဆိုပါစစ်ကြောင်းကြောင့် လမ်းတစ်လျှောက်ရှိ သာဂရ၊ ကလုံနှင့် အင်းရွာလေး အပါအဝင် မြစ်ကမ်းဘေး ကျေးရွာများကို တော်လှန်ရေး အင်အားစုများ ဘက် မှ စစ်ရေးဗျူဟာအရ ဖယ်ပေးလိုက်ရပြီးနောက် ဒေသခံအများအပြား နေရပ်စွန့်ခွာ တိမ်းရှောင်နေကြရခြင်း ဖြစ်သည်။ လက်ရှိတွင် စစ်အစိုးရတပ် စစ်ကြောင်းသည် ကသာမြို့နှင့် ၈ မိုင်ခန့်အကွာရှိ မဲဟင်းရွာနှင့် ကလုံရွာကြားသို့ ရောက်ရှိနေပြီး စစ်ကြောင်း ၃ ကြောင်းခွဲ၍ ဒရုန်းနှင့် လက်နက်ကြီးများကို အဓိကအသုံးပြုကာ နယ်မြေရှင်းလင်းနေကြောင်း မြေပြင်သတင်းရင်းမြစ်က ပြောသည်။သည်။ ဒေသခံတော်လှန်ရေးတပ်ဖွဲ့ဝင်တစ်ဦးက “သူတို့က မြစ်ကြောင်းစိုးမိုးရေးအတွက် ထိုးလာတဲ့သဘောဗျ။ စစ်ကြောင်းက ၃ ကြောင်းခွဲပြီး တက်လာတာဆိုတော့ ကျနော်တို့ဘက်က နယ်မြေတချို့ကို ပြန်ဖယ်ပေးလိုက် ရတယ်။ ဒရုန်းတွေနဲ့ အပေါ်ကနေ အရင်ကြည့်ပြီး လက်နက်ကြီးနဲ့ ထုတာ။ အခုတော့ ကသာနဲ့ တော်တော် နီးနေပြီ၊ မြစ်ကမ်းဘေးရွာတွေက လူတွေလည်း အကုန်ပြေးနေရတယ်” ဟု ပြောသည်။ စစ်အစိုးရတပ်သည် မိုးတွင်းကာလ မြစ်ရေတက်ချိန်တွင် မန္တလေးမှ ဗန်းမော်အထိ ရိက္ခာနှင့် စစ်လက်နက်များ အဟန့်အတားမရှိ ပို့ဆောင်နိုင်ရန် ဧရာဝတီမြစ်ကြောင်းစိုးမိုးရေးကို အသည်းအသန် လုပ်ဆောင်လာခြင်း ဖြစ်သည်ဟု ဆိုသည်။ လက်ရှိတွင် သာဂရ၊ ကလုံနှင့် အင်းရွာလေး အပါအဝင် မြစ်ကမ်းဘေးကျေးရွာများမှ ဒေသခံပြည်သူများမှာ ကိုင်းတောများအတွင်း၌ ခက်ခဲစွာ ပုန်းရှောင်နေရပြီး ရိက္ခာပြတ်လပ်မှုနှင့် ရင်ဆိုင်နေရသည်။ မြေပြင်သတင်းရင်းမြစ်တစ်ဦးက “မြစ်ကြောင်းတစ်လျှောက် ရွာတွေက လူတွေလည်း ထပ်တိုးပြီး ပြေးနေရ တာဆိုတော့ ကူညီပေးဖို့ တော်တော်လေး ခက်ခဲနေတယ်” ဟု ပြောသည်။ စစ်အစိုးရတပ်ဘက်က ကသာမြို့ကို အပြည့်အဝ ထိန်းချုပ်နိုင်ပြီဟု ဝါဒဖြန့်ကာ ဒေသခံများကို မြို့ထဲပြန်ဝင်ရန် ဖိအားပေးနေသော်လည်း မြေပြင်တွင် လေကြောင်းနှင့် လက်နက်ကြီးပစ်ခတ်မှုများ နေ့စဉ်ရှိနေဆဲဖြစ်သည်။ ကသာတော်လှန်ရေးတပ်ဖွဲ့ဝင်တစ်ဦးကမူ တော်လှန်ရေးအင်အားစုများဘက်မှ အလုံးစုံ ဆုတ်ခွာသွားခြင်းမျိုး မဟုတ်ဘဲ တိုက်ပွဲများ ဆက်လက်ဆင်နွှဲရန် ပြင်ဆင်နေသဖြင့် မြို့ထဲသို့ ပြန်လည်ဝင်ရောက်ခြင်းမပြုရန် သတိပေးထားသည်။ ကသာတော်လှန်ရေးတပ်ဖွဲ့ဝင် တစ်ဦးက “ပြည်သူတွေကို မြို့ထဲမဝင်ကြပါနဲ့ဦးလို့ ကျနော်တို့ တောက်လျှောက် ပြောနေတာပါ။ ဒါဟာ တိုက်ပွဲက ပြီးသွားတာ မဟုတ်ပါဘူး၊ ဒီတိုက်ပွဲက ပြန်ဖြစ်မှာပါ။ ကျနော်တို့ တော် လှန်ရေးဘက်ကလည်း အရှုံးပေးလို့မရဘူး၊ မနိုင်နိုင်အောင် တိုက်ရမှာပါ။ ဒါဟာ စစ်ရေးအရ ခဏတာ အနည်း ငယ် နောက်ဆုတ်ပေးတဲ့ သဘောပါပဲ၊ အပြီးအပိုင် ထွက်ခွာသွားတာ မဟုတ်ပါဘူး” ဟု ပြောသည်။ ကသာမြို့တွင် ၂၀၂၅ ခုနှစ်၊ ဒီဇင်ဘာလကုန်ပိုင်း မြို့သိမ်းတိုက်ပွဲ စတင်ခဲ့သည့်အချိန်မှစ၍ ယနေ့အထိ နှစ်ဖက် တပ်များအကြား စစ်ရေးတင်းမာမှုများ လျော့ပါးသွားခြင်းမရှိဘဲ ယခုကဲ့သို့ စစ်အစိုးရတပ်၏ အင်အား အလုံး အရင်းဖြင့် စစ်ကြောင်းထိုး ဝင်ရောက်လာမှုကြောင့် ရှေ့ဆက်၍ တိုက်ပွဲများ ပိုမိုပြင်းထန်လာမည်ကို ဒေသခံ များက စိုးရိမ်လျက် ရှိသည်။ #ကသာတိုက်ပွဲ #ထီးချိုင့် #စစ်အုပ်စု #စစ်ဘေးရှောင်

ထီးချိုင့်-ကသာကြား မြစ်ရိုး ကျေးရွာများ တိမ်းရှောင်နေရ

Apr 21

လေယာဉ်ဗုံး ထိုင်းဘက်ကျပြီး နယ်စပ် ခရိုင်များတွင် လုံခြုံရေး တင်းကြပ်ထား သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၂၁ ရက်။ သံလွင်မြစ်ဘေးရှိ ဆေးရုံကို စစ်အစိုးရတပ်က ဗုံးကြဲခဲ့ရာ ထိုင်းဘက်အခြမ်းသို့ ကျရောက်ပေါက်ကွဲမှုကြောင့် နယ်စပ် ၄ ခရိုင်တွင် လုံခြုံရေး အရေးပေါ်တင်းကျပ်ထားသည်ဟု မြေပြင်သတင်းရင်းမြစ်များက ပြောသည်။ ကရင်ပြည်၊ ဖာပွန်ခရိုင်အတွင်းရှိ စစ်ဘေးရှောင်များကို ဆေးကုသပေးနေသည့် ဆေးရုံနှင့် အရပ်သားနေရာ များကို စစ်အစိုးရတပ်က လေကြောင်းမှ ဗုံးကြဲတိုက်ခိုက်ခဲ့ရာ ထိုင်းဘက်အခြမ်းသို့ပါ ဗုံးကျရောက်ပေါက်ကွဲ ခဲ့ပြီး နယ်စပ်ဒေသခံများ အရေးပေါ် ထွက်ပြေးတိမ်းရှောင်နေကြရသည်။ ပြီးခဲ့သည့် ဧပြီလ ၂၀ ရက် နံနက် ၁၁ နာရီခန့်တွင် စစ်အစိုးရလေတပ်သည် ဖာပွန်ခရိုင်၊ သံလွင်မြစ်ကမ်းနံဘေးရှိ KNU ၏ အူးမေထဆေးရုံနှင့် လူနေရပ်ကွက်များကို တိုက်လေယာဉ်များဖြင့် ဗုံး ၁၀ လုံးခန့် ကြဲချခဲ့ခြင်းဖြစ် သည်။ အဆိုပါတိုက်ခိုက်မှုကြောင့် ဆေးရုံအဆောက်အအုံများ ပြာကျပျက်စီးခဲ့သည့်အပြင် ဗုံးတစ်လုံးမှာ ထိုင်းဘက် ခြမ်းရှိ သဲသောင်ပြင်ပေါ်သို့ ကျရောက်ပေါက်ကွဲခဲ့သည်။ ထိုင်းဘက်ခြမ်းက မြေပြင်သတင်းရင်းမြစ်က “ကျနော်တို့က မနေ့က ဗုံးကြဲသွားတဲ့ အူးမဲထ ဆေးရုံရဲ့ ဒီဘက်ခြမ်း ထိုင်းဘက်ခြမ်းမှာပါ။ မနေ့ ၁၁ နာရီလောက်မှာ လေယာဉ်နဲ့ လာကြဲတော့ ကြဲခံရတဲ့နေရာက မီးခိုးတွေ ထွက်လာတယ်။ ဆေးရုံနေရာနဲ့ အဲ့ဒီနားတဝိုက်ကို ၆ လုံး - ၇ လုံးလောက် ကြဲသွားတာ။ ဆေးရုံက တော့ အကုန်ပျက်သွားတယ်။ အဲ့ဒီမှာရှိတဲ့ အစည်းအဝေးခန်းပေါ့ အဲ့ဒါလည်း ပျက်စီးသွားတယ်။ ပျက်စီးသွား တာ များတယ်။ လူတော့ ထိခိုက်တာမျိုးမရှိဘူးလို့ ဒီဘက်ခြမ်းကို သတင်းပို့တာပေါ့နော်” ဟု ပြောသည်။ အဆိုပါဖြစ်စဉ်နှင့်ပတ်သက်၍ ထိုင်းနယ်စပ်သို့ တိမ်းရှောင်နေရသည့် ဒေသခံတစ်ဦးက မြေပြင်အခြေအနေကို အခုလို ပြောပြပါတယ် - အဆိုပါ ထိုင်းသတင်းရင်းမြစ်က “ထိုင်းဘက်ခြမ်း သဲသောင်ပြင်ပေါ် ဗုံးကျတော့ ဟိုဘက်က ရွာသားတွေလည်း အကုန်လန့်ပြီး ပြေးကြရတာ။ ထိုင်းဘက်က အိမ်တွေပါ မှန်တွေကွဲ၊ အမိုးတွေပွင့်ကုန်တာ။ အခုထိတော့ သံလွင် မြစ်ဘေးမှာ ဘယ်သူမှ မနေရဲကြတော့ဘူး” ဟု ပြောသည်။ ဗုံးကျရောက်ပေါက်ကွဲမှုကြောင့် ထိုင်းဘက်ခြမ်းရှိ မယ့်စန်လက်ရွာမှ နေအိမ် ၁၀ လုံးခန့် ပျက်စီးခဲ့ပြီး အိမ်ထောင်စု ၄၀ ကျော်မှာ ဘေးလွတ်ရာသို့ အရေးပေါ် ရွှေ့ပြောင်းခဲ့ရကြောင်း ထိုင်းသတင်းဌာနများတွင် ဖော်ပြထားသည်။ အဆိုပါ အိမ်ထောင်စု ၄၀ ခန့်ကို သံလွင်မြစ်ကမ်းနံဘေးမှ ၇ ကီလိုမီတာခန့် ကွာဝေးသော ဟွေ့ကောင်ကတ် (Huay Kong Kat) ကျေးရွာရှိ ဘေးကင်းလုံခြုံရာ နေရာများသို့ ယာယီရွှေ့ ပြောင်း နေထိုင်ကြရန် ထိုင်းနိုင်ငံ ဘက်ခြမ်းမှ မယ့်စန်လက် (Mae Sam Laeb) ကျေးရွာလူကြီးက အသံချဲ့စက်ဖြင့် အရေးပေါ် နှိုးဆော်ခဲ့ရကြောင်း ထိုင်းသတင်းမီဒီယာများတွင် ဖော်ပြသည်။ ထို့ပြင် မယ့်စရိန်း (Mae Sariang) ခရိုင် အုပ်ချုပ်ရေးမှူးနှင့် စစ်ဘက်တာဝန်ရှိသူများကလည်း ဗုံးစထိမှန်၍ နေအိမ်အမိုးပျက်စီး သွားသည့် မယ့်ဝမ်ကျေးရွာသို့ သွားရောက်စစ်ဆေးခဲ့ပြီး နယ်စပ်တစ်လျှောက် ၂၄ နာရီပတ်လုံး ကင်းလှည့်ရန်နှင့် အရေးပေါ်ဗုံးခိုကျင်းများ ပြင်ဆင်ထားရန် ညွှန်ကြားခဲ့သည်။ နယ်စပ်စစ်မီး ပြင်းထန်လာမှုကြောင့် ထိုင်းပြည်ထဲရေးဝန်ကြီးဌာနက မယ်ဟောင်ဆောင်၊ ချင်းမိုင်၊ ချင်းရိုင်နှင့် တာ့ခ်ခရိုင်ရှိ အာဏာပိုင်များကို လုံခြုံရေးတင်းကျပ်ရန်နှင့် ဒေသခံများကို ၂၄ နာရီပတ်လုံး ကူညီစောင့်ရှောက်ရန် အရေးပေါ်ညွှန်ကြားထားကြောင်း The Nation Thailand က ဧပြီလ ၂၁ ရက်နေ့တွင် ဖော်ပြခဲ့သည်။ KNU ၏ ထုတ်ပြန်ချက်အရ ပြီးခဲ့သည့် ၁၀ ရက်အတွင်း ဖာပွန်ခရိုင်၌ စစ်အစိုးရတပ်၏ ပစ်မှတ်ထား တိုက်ခိုက် မှုများကြောင့် အရပ်သား ၆ ဦး သေဆုံးကာ ၁၃ ဦး ဒဏ်ရာရရှိခဲ့သည်။ လက်ရှိတွင် ထိုင်းအာဏာပိုင်များသည် နယ်စပ်တစ်လျှောက် ကင်းလှည့်ခြင်းနှင့် စစ်ဆေးရေးဂိတ်များကို အရှိန်မြှင့် လုပ်ဆောင်နေပြီး၊ တိုက်ပွဲကြောင့် ပျက်စီးသွားသည့် နေအိမ်များနှင့် ပိုင်ဆိုင်မှုများအတွက် ကနဦး ကူညီကယ်ဆယ်ရေးများကို စတင်ဆောင်ရွက်နေသည်ဟု ဆိုသည်။ ယခုကဲ့သို့ နယ်စပ်ဖြတ်ကျော် စစ်မီးကူးစက်လာမှုကြောင့် ထိုင်း-မြန်မာ ကုန်သွယ်ရေးနှင့် ဒေသခံများ၏ နေ့စဉ် ဘဝအပေါ် ရိုက်ခတ်မှုများ ရှိနေသည့်အတွက် နယ်စပ်တစ်လျှောက် အခြေအနေများကို ၂၄ နာရီပတ်လုံး စောင့်ကြည့်လျက်ရှိကြောင်း ထိုင်းသတင်းများက ဆိုသည်။ ဓါတ်ပုံ - Maesariang District Administration Office #ဖာပွန် #မူတြော် #ဗုံးကြဲ #လေကြောင်းတိုက်ခိုက်

လေယာဉ်ဗုံး ထိုင်းဘက်ကျပြီး နယ်စပ် ခရိုင်များတွင် လုံခြုံရေး တင်းကြပ်ထား

Apr 21

NCA ကို အခြေခံသည့် နိုင်ငံရေး တွေ့ဆုံပွဲများတွင် KNPP ပါမည်မဟုတ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၂၁ ရက်။ စစ်တပ်ကို နိုင်ငံရေးမှာ ဝင်ရောက်စွတ်ဖက်ခွင့်ပြုထားသည့် ၂၀၀၈ ဖွဲ့စည်းပုံ အခြေခံ ဥပဒေ နှင့် NCA ကို အခြေခံထားသော နိုင်ငံရေး တွေ့ဆုံဆွေးနွေးပွဲများကို အသိအမှတ်ပြု လက်ခံဆွေးနွေးသွားမည် မဟုတ်ကြောင်း ကရင်နီအမျိုးသား တိုးတက်ရေးပါတီ KNPP က ပြောဆိုလိုက်သည်။ NCA ပါ သဘောတူညီချက်များမှာ နိုင်ငံရေးတွင် စစ်တပ် ပါဝင် စွက်ဖက်ခွင့်ကို ခွင့်ပြုထားခြင်းကြောင့် လက်မခံ ခြင်း ဖြစ်ကြောင်း KNPP က ပြောသည်။ ဧပြီလ ၂၀ ရက်နေ့ (ယမန်နေ့) က ပြုလုပ်ခဲ့သည့် စစ်အစိုးရ၏ အစည်းအဝေးတွင် တိုင်းရင်းသား လက်နက်ကိုင် တော်လှန်ရေး အဖွဲ့အစည်းများကို တွေ့ဆုံဆွေးနွေးသွားမည်ဟု ဦးမင်းအောင်လှိုင်၏ ပြောဆိုမှုအပေါ် KNPP က ပြောဆိုလိုက်ခြင်း ဖြစ်သည်။ KNPP အထွေထွေ အတွင်းရေးမှူး ဦးအောင်ဆန်းမြင့်က “ကျနော်တို့ကတော့ ဒီ NCA လမ်းကြောင်းနဲ့က ကျနော်တို့ အခုလိုချင်တဲ့ ဖက်ဒရယ် ဒီမိုကရေစီ ပြည်ထောင်စု တည်ဆောက်ရေးကို ကျနော်တို့ သွားနိုင်မှာ မဟုတ်ဘူးလို့ အဲလိုပဲ ယုံကြည်တယ်။ ဘာကြောင့်လဲဆိုလို့ရှိရင် အခု သူတို့ သဘောတူညီထားတဲ့ National Acord ၄၃ ချက်ကလည်း တကယ့် နိုင်ငံရေး ဆန်တဲ့ ကတိကဝတ်တွေကို ဘာမှ မတွေ့ရဘူးဗျ။နောက်တစ်ခုက ဒီ ဘယ်လိုပဲ ပြောပြော ၂၀၀၈ အပြင်က National Acord ကို ယူတယ်လို့ ပြောပေမယ့် ၂၀၀၈ နဲ့ ဘယ်လိုမှ မကင်းဘူး။ ဆိုတော့ ၂၀၀၈ ကလည်း ကျနော်တို့ စစ်တပ် နိုင်ငံရေးမှာ ဝင်ရောက်စွတ် ဖက်တာကိုပဲ ဒါက ခွင့် ပြုထားတဲ့ ဖွဲ့စည်းပုံ အခြေခံဥပဒေဖြစ်တော့ ဒါကြောင့် ဘယ်လိုမှ မဖြစ်နိုင်ဘူးလေနော်။ ဒါကတော့ ဥပဒေ အကြောင်းအရ တကယ်ဆွေးနွေးမယ် ပြုမယ်ဆိုလို့ရှိရင် ဒါကတော့ မဖြစ်နိုင်ဘူး” ဟု ပြောသည်။ NCA စာချုပ် လက်မှတ်ရေးထိုးထားသည့် တိုင်းရင်းသား လက်နက်ကိုင် အဖွဲ့အစည်းများနှင့် NCA စာချုပ် လက်မှတ်ရေးထိုးထားခြင်း မရှိသည့် တိုင်းရင်းသား လက်နက်ကိုင် အဖွဲ့အစည်းများကို ငြိမ်းချမ်းရေး တွေ့ဆုံ ဆွေး နွေးသွားမည်ဟု ဧပြီလ ၂၀ ရက်နေ့ (ယမန်နေ့) က ပြုလုပ်ခဲ့သည့် စစ်အစိုးရ၏ အစည်းအဝေးတွင် ဦးမင်းအောင်လှိုင်က ထည့်သွင်း ပြောဆိုခဲ့ခြင်းဖြစ်သည်။ ဦးမင်းအောင်လှိုင်က “လက်မှတ်ရေးထိုးထားပြီးတော့မှ ကျနော်တို့ ဒီ ၅ နှစ်အတွင်းမှာ တွေ့ဆုံမှု မပြုတဲ့ အဖွဲ့တွေရှိတယ်။ ဥပမာ KNU တို့ အဖွဲ့တို့ပေါ့နော်။ CNF လိုဟာမျိုးတွေ ABSDF လိုဟာမျိုးတွေ ကျနော်တို့ ဖိတ်ခေါ်သွားမှာပါ။ ဘာလုပ်ချင်တယ်။ ဆွေးနွေးလိုမှုတွေ ကျနော်တို့ AA ကိုလည်းဖိတ်ခေါ်ပါတယ်။ လက် မှတ်ရေးထိုးထားပြီးတော့မှ ကျနော်တို့ သဘောတူညီချက် ရေးထားတာရှိတယ်။ ဘာလဲ ၄၃ ချက် သဘောတူ တာရှိပါတယ်။ အဲတော့ NCA လက်မှတ်ရေးထိုးပြီးမှ ဆွေးနွေးတဲ့ထဲမှာ Union Accord ရထားတဲ့ သဘော တူညီချက်တွေ ရှိတယ်။ အဲဒါပဲ လာမဲ့ လွှတ်တော်တွေမှာ တင်ပြပြီးတော့ အပိုင်းလိုက် ကျနော်တို့ ဆောင်ရွက် သွားမှာ ဖြစ်ပါတယ်။ ခုနကပြောတဲ့ တွေ့ဆုံဆွေးနွေးရေး မပြုရသေးတဲ့ အဖွဲ့တွေလည်း တွေ့ဆုံ ဆွေးနွေးဖို့ကို ဇူလိုင်လ ၃၁ ရက်နေ့ နောက်ဆုံးထားပြီးတော့ ဆွေးနွေးဖို့အတွက် ကျနော်တို့ ဖိတ်ခေါ်ပါတယ်” ဟု ပြောသည်။ ပြည်ထောင်စုသဘောတူစာချုပ် (Union Accord) ၄၃ ချက်ဆိုသည်မှာ ၂၁ ရာစု ပင်လုံညီလာခံ အဆင့်ဆင့်တွင် NCA အဖွဲ့များနှင့် သဘောတူညီခဲ့သည့် စီးပွားရေးနှင့် လူမှုရေးဆိုင်ရာ အခြေခံမူများဖြစ်သည်။ ယခင် ငြိမ်းချမ်းရေး ဆွေးနွေးပွဲများမှ သဘောတူညီမှု ရရှိထားသည့် အဆိုပါ အချက် ၄၃ ချက်သည် နိုင်ငံရေး အရ အာမခံမှု ပေးနိုင်သည့် အချက်များ မဟုတ်ပဲ စီးပွားရေး၊ အမျိုးသမီးအရေးနှင့် သဘာဝပတ်ဝန်းကျင် အရေး နှင့် ပတ်သက်သည့် အချက်များသာ တွေ့ရသည်ဟု KNPP က ဆိုသည်။ အဆိုပါအချက်များသည် ၂၀၀၈ ဖွဲ့စည်းပုံအခြေခံဥပဒေ၏ ဘောင်အတွင်း၌သာ ရှိနေပြီး စစ်တပ်က နိုင်ငံရေး တွင် ဆက်လက်ပါဝင်ခွင့်ကို အကာအကွယ်ပေးထားသည့်အတွက် တော်လှန်ရေးအင်အားစုများက လက်မခံခြင်း ဖြစ်သည်။ ငြိမ်းချမ်းရေး တွေ့ဆုံဆွေးနွေးသွားမည့်ဟု ဦးမင်းအောင်လှိုင်က ပြောဆိုနေသော်လည်း လက်တွေ့တွင် ၎င်း၏ ပြောဆိုမှုများသည် မြေပြင် အခြေအနေနဲ့ ကင်းကွာနေသည်ဟု ဦးအောင်ဆန်းမြင့်က ပြောသည်။ ၎င်းက “ငြိမ်းချမ်းရေးကို ခေါ်တယ်ပြောပြီးတော့မှ ဒီနေ့အချိန်အထိ ကျနော်တို့ ပြည်နယ်ထဲမှာ နောက်တစ်ခြား ဒေသ တွေမှာ နေ့စဉ် လေယာဉ်နဲ့ ဗုံးကြဲ ဒရုန်းနဲ့ပစ် အမြောက်နဲ့ ပစ် ဒါတွေကို မရပ်စဲပဲနဲ့ ကျနော်တို့က ဘယ် လိုလုပ် စားပွဲပေါ်မှာ တင်ပြီးမှ နိုင်ငံရေး ဆွေးနွေးရမှာလဲ ဆိုတဲ့ မေးခွန်းက ရှိပါတယ်။ အပြောတစ်မျိုး အလုပ် တစ်မျိုးနဲ့ကတော့ ကျနော်တို့ အလုပ်မဖြစ်ဘူးပေါ့နော်” ဟု ပြောသည်။ တွေ့ဆုံဆွေးနွေးမှုများကို ဇူလိုင်လ ၃၁ ရက်နေ့ မတိုင်မှီ လုပ်ဆောင်သွားဖြစ်ပြီး ငြိမ်းချမ်းရေးတွင် မဖြစ်နိုင် သည့် အရာများကို တောင်းဆိုပြီး အဖွဲ့အစည်း တည်တံ့ခိုင်မြဲရေးအတွက် လုပ်နေမည်ဆိုပါက လုပ်သင့် လုပ်ထိုက်သည်များကို လုပ်ဆောင်သွားမည်ဟု ဦးမင်းအောင်လှိုင်က ပြောသည်။ ထို့အပြင် ပြည်သူ့ကာကွယ်ရေးတပ် PDF များကိုလည်း ဇူလိုင်လ ၃၁ ရက် မတိုင်မှီ ဥပဒေဘောင်အတွင်းသို့ ဝင်လာကြရန် ဦးမင်းအောင်လှိုင်က ပြောဆိုထားသည်။ Photo-KnIC (ပုံဟောင်း) #KNPP #NCA #၂၀၀၈ဖွဲ့စည်းပုံအခြေခံဥပဒေ #နိုင်ငံရေးဆွေးနွေးပွဲ #PeaceTalks #PeaceProcess

NCA ကို အခြေခံသည့် နိုင်ငံရေး တွေ့ဆုံပွဲများတွင် KNPP ပါမည်မဟုတ်

Apr 21

ဟုမ္မလင်းတွင် ဆီတင် မော်တော်ပေါ် ပေါက်ကွဲမှုဖြစ်၊ ၂ ဦးသေ ၁၀ ဦးထက်မနည်း ဒဏ်ရာရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၂၁ ရက်။ စစ်ကိုင်းတိုင်း၊ ဟုမ္မလင်းမြို့ရှိ နောင်ပကျစ် (မြို့မဘုန်းကြီးကျောင်း) ဆိပ်ကမ်းတွင် ဆီတင်မော်တော်များ ကုန်တင်ကားပေါ်သို့ ဆီတင် နေစဉ် ပေါက်ကွဲမှုဖြစ်ပွားပြီး မီးလောင်ကျွမ်းခဲ့ရာ အမျိုးသားတစ်ဦးနှင့် အမျိုးသမီးတစ်ဦး သေဆုံးကာ ၁၀ ဦးထက်မနည်း ဒဏ်ရာရရှိခဲ့ကြောင်း ဒေသခံများက ပြောသည်။ ပြီးခဲ့သည့် ဧပြီလ ၂၀ ရက်နေ့၊ ညနေ ၆ နာရီခွဲ အချိန်ခန့်တွင် မုံရွာဘက်မှ ရောက်ရှိလာသည့် ကုန်တင်ယာဉ်ပေါ် သို့ ဆီများ တင်ရာမှ အပူလွန်ကဲကာ စတင်ပေါက်ကွဲခဲ့ခြင်းဖြစ်ပြီး၊ ဘေးနားရှိ ဆီတင်နှင့် လူတင်မော်တော် ၂၂ စီးအပြင် ကုန်တင်ကား ၂ စီးပါ မီးကူးစက်လောင်ကျွမ်းခဲ့ခြင်း ဖြစ်သည်။ အခင်းဖြစ်ပွားရာနေရာသို့ ရောက်ရှိနေသည့် ဒေသခံတစ်ဦးက “ပေါက်ကွဲသံကတော့ တကယ်ကို ကျယ်တာဗျ။ ဆီတင်မော်တော်တွေဆိုတော့ တစ်စီးပြီးတစ်စီး ဆင့်ကာဆင့်ကာ ပေါက်ကွဲပြီး မီးက ဟုန်းခနဲ တက်သွားတာပဲ” ဟု ပြောသည်။ ယနေ့ ဧပြီလ ၂၁ ရက်နေ့ နံနက်ပိုင်းထိ မီးဆက်လောင်ကျွမ်းနေဆဲ ဖြစ်သည်ဟု အဆိုပါ ဒေသခံက ဆက် ပြော သည်။ “မီးကလည်း ဆက်တိုက်လောင်နေတာ။ ဘယ်လိုမှ ငြိမ်းမရဘူး။ ညနေကစလောင်တာ ဒီနေ့ (၂၁ ရက်) မနက် အထိတောင် လှေ ၆ စီးလောက်က မီးမငြိမ်းသေးဘူး။ လူနာတွေ ထဲမှာလည်း မီးလောင်ဒဏ်ရာ ပြင်းတဲ့ သူတွေ ရှိတော့ သေဆုံးတဲ့သူ ဒီထက်တိုးလာမှာကို စိုးရိမ်နေရတယ်” ဟု ပြောသည်။ အဆိုပါ မီးလောင်မှုကြောင့် ဟုမ္မလင်းမြို့နယ် မီးသတ်စခန်းမှ မီးသတ်ယာဉ် ၄ စီးနှင့် သန္ဓေ၊ အရန်မီးသတ် တပ်ဖွဲ့ ဝင်များက ဝိုင်းဝန်းငြှိမ်းသတ်ခဲ့ရသည်။ ယနေ့နံနက်ပိုင်းအထိ ပျက်စီးဆုံးရှုံးမှုနှင့် ထိခိုက်သေဆုံးသူ အရေအတွက်ကို တာဝန်ရှိသူများက ဆက်လက် စိစစ်နေဆဲ ဖြစ်သည်။ မီးလောင်မှုကို ကိုယ်တိုင်မြင်တွေ့ခဲ့ရသည့် အခြားဒေသခံတစ်ဦးကလည်း “ဆိပ်ကမ်းက မော်တော်တွေအကုန် ပြာကျကုန်တာ။ မုံရွာကနေ ခန္တီးဘက်တက်မယ့် ကုန်တွေလည်း အကုန်ပါသွားပြီ။ ဟုမ္မလင်းနားမှာ ပြီးခဲ့တဲ့ လကလည်း ဆီတင် ဖလပ်ယာဉ် ၃ စီး လောင်ဖူးတယ်။ အဲဒီတုန်းက တစ်ပတ်လောက်ကြာမှ မီးငြိမ်းတာ။ အခုလည်း ဆီတင်မော်တော်တွေဆိုတော့ မီးသတ်ရတာ တော်တော်ခက်ခဲနေပုံရတယ်” ဟု ပြောသည်။ လက်ရှိတွင် မီးလောင်မှုကြောင့် ဒဏ်ရာရရှိသူများကို ဟုမ္မလင်းဆေးရုံသို့ ပို့ဆောင်ကုသပေးထားပြီး၊ ဆိပ်ကမ်း တစ်လျှောက်တွင်လည်း ပေါက်ကွဲမှုများ ထပ်မံဖြစ်ပွားမည်ကို စိုးရိမ်ကာ ဒေသခံအချို့ ဘေးလွတ်ရာသို့ ရွှေ့ပြောင်းနေကြရသည်။

ဟုမ္မလင်းတွင် ဆီတင် မော်တော်ပေါ် ပေါက်ကွဲမှုဖြစ်၊ ၂ ဦးသေ ၁၀ ဦးထက်မနည်း ဒဏ်ရာရ

Apr 21

ခရစ်တော် ရုပ်ထု ဖျက်စီးသူအား အစ္စရေး အပြစ်ပေးမည် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၂၁ ရက်။ လက်ဘနွန်တောင်ပိုင်း၊ ဒက်ဘယ်လ် (Debl) ကျေးရွာရှိ ယေရှုခရစ်တော်ရုပ်ထုအား အစ္စရေးစစ်သားတစ်ဦးက ဖျက်ဆီးခဲ့သည့် ဖြစ်ရပ်နှင့် ပတ်သက်၍ အစ္စရေးဝန်ကြီးချုပ် ဘင်ဂျမင် နေတန်ယာဟု က ပြင်းထန်စွာ ရှုတ်ချလိုက်သည်။ လက်ဘနွန်တောင်ပိုင်းက ခရစ်ယာန်ကျေးရွာတစ်ခုဖြစ်သည့် ဒက်ဘယ်လ် (Debl) တွင် အစ္စရေးစစ်သားတစ်ဦးက ယေရှုခရစ်တော်ရုပ်ထုကို တူနဲ့ထုပြီး ဖျက်ဆီးနေသည့် ဓာတ်ပုံတစ်ပုံ ဆိုရှယ်မီဒီယာတွင် ပျံ့နှံ့နေခဲ့သည်။ အဆိုပါ ဓာတ်ပုံမှာ အစစ်အမှန်ဖြစ်သည်ဟုလည်း အစ္စရေးစစ်တပ်က အတည်ပြုခဲ့သည်။ အစ္စရေး ဝန်ကြီးချုပ် နေတန်ယာဟုက ယင်းလုပ်ရပ်ကို လက်ခံနိုင်ဖွယ်မရှိသော ရာဇဝတ်မှုအဖြစ် သတ်မှတ်ပြီး ကျူးလွန်သူအား စစ်စည်းကမ်းဆိုင်ရာ အပြင်းထန်ဆုံး အရေးယူမှုများ ပြုလုပ်သွားမည်ဟု လူမှုကွန်ရက် X မှတစ်ဆင့် ကတိပြုခဲ့ပါသည်။ ယေရုရှလင်ရှိ ကက်သလစ်အသင်းတော် ခေါင်းဆောင်များက ဤလုပ်ရပ်သည် ခရစ်ယာန်ဘာသာအပေါ် ကြီးလေးသော စော်ကားမှုဖြစ်ကြောင်းနှင့် အခြားသော ဘာသာရေးအမှတ်အသားများအား စော်ကားခံရမှုများ ရှိနေခြင်းအပေါ် စိုးရိမ်ကြောင်း ဖော်ပြကာ စစ်ပွဲအား အမြန်ဆုံး အဆုံးသတ်ရန် တောင်းဆိုခဲ့ကြပါသည်။ အစ္စရေးစစ်တပ် (IDF) က ယင်းလုပ်ရပ်သည် တပ်မတော်၏ ကျင့်ဝတ်စံနှုန်းများနှင့် ကိုက်ညီမှုမရှိကြောင်း ထုတ်ပြန်ခဲ့ပြီး၊ အဆိုပါရုပ်ထုအား နဂိုအတိုင်း ပြန်လည်ပြုပြင်ထားရှိ နိုင်ရေးအတွက် ဒေသခံလူထုနှင့် ပူးပေါင်းဆောင်ရွက်လျက်ရှိသည်ဟု ဆိုသည်။ #ခရစ်တော် #အစ္စရေးစစ်တပ် #ရုပ်တု

ခရစ်တော် ရုပ်ထု ဖျက်စီးသူအား အစ္စရေး အပြစ်ပေးမည်

Apr 21

အိန္ဒိယ-တောင်ကိုရီးယား နှစ်နိုင်ငံကုန်သွယ်မှု နှစ်ဆ တိုးမြှင့်မည် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၂၁ ရက်။ အိန္ဒိယဝန်ကြီးချုပ် နာရင်ဒရာမိုဒီ နှင့် တောင်ကိုရီးယားသမ္မတ လီဂျေမျောင် တို့သည် နယူးဒေလီမြို့၌ တွေ့ဆုံခဲ့ပြီး လက်ရှိ နှစ်နိုင်ငံကုန်သွယ်မှုပမာဏ ဒေါ်လာ ၂၇ ဘီလီယံမှ ၂၀၃၀ ပြည့်နှစ်တွင် အမေရိကန်ဒေါ်လာ ၅၀ ဘီလီယံ အထိ နှစ်ဆနီးပါး တိုးမြှင့်သွားရန် သဘောတူညီခဲ့ကြသည်။ နှစ်နိုင်ငံခေါင်းဆောင်များသည် နှစ်နိုင်ငံစီးပွားရေးနှင့် မဟာဗျူဟာမြောက် ဆက်ဆံရေး ပိုမိုခိုင်မာစေရန် ဆွေးနွေးခဲ့ကြခြင်း ဖြစ်သည်။ သင်္ဘောတည်ဆောက်ရေး၊ ကာကွယ်ရေး၊ AI (ဉာဏ်ရည်တု)၊ အဆင့်မြင့်ကုန်ထုတ်လုပ်မှု၊ အရေးကြီးတွင်းထွက်ပစ္စည်းများနှင့် နျူကလီးယားစွမ်းအင် ကဏ္ဍများတွင် ပူးပေါင်းဆောင်ရွက်မှုကို အဆင့်မြှင့်တင်သွားမည် ဖြစ်သည်။ အီရန်စစ်ပွဲကြောင့် ဖြစ်ပေါ်လာသည့် စွမ်းအင်နှင့် ကုန်ကြမ်းပြတ်တောက်မှု အန္တရာယ်ကို ကာကွယ်ရန် တောင်ကိုရီးယားသည် အိန္ဒိယနိုင်ငံမှ နက်ဖ်သာ (Naphtha) ခေါ် ရေနံဓာတ်ပစ္စည်း တင်သွင်းမှုကို တိုးမြှင့်သွားရန် စီစဉ်လျက်ရှိသည်။ ပြီးခဲ့သည့်နှစ်တွင် တောင်ကိုရီးယား၏ နက်ဖ်သာတင်သွင်းမှု စုစုပေါင်း၏ ၈ ရာခိုင်နှုန်းကို အိန္ဒိယက တင်ပို့ခဲ့ခြင်း ဖြစ်ပါသည်။ #India #Korea #Trade #အိန္ဒိယ #တောင်ကိုရီးယား #ကုန်သွယ်ရေး

အိန္ဒိယ-တောင်ကိုရီးယား နှစ်နိုင်ငံကုန်သွယ်မှု နှစ်ဆ တိုးမြှင့်မည်

« Prev 1 … 14 15 16 17 18 … 1,047 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ