NMG Doh – Page 88 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
နိုင်ငံတကာသတင်း
NMG အကြောင်း
Contact

Home
Author Archive

NMG Doh

Author: NMG Doh

Apr 9

ထိုင်ဝမ်အတိုက်အခံခေါင်းဆောင် တရုတ်ပြည်သို့ သွားရောက် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၉ ရက်။ ထိုင်ဝမ်၏ အဓိကအတိုက်အခံပါတီဖြစ်သော ကူမင်တန် (KMT) ပါတီဥက္ကဋ္ဌ Cheng Li-wun သည် တရုတ်နိုင်ငံသို့ ၆ ရက်ကြာ ခရီးစဉ်အဖြစ် သွားရောက်နေပြီး တရုတ်သမ္မတ ရှီကျင့်ဖျင်နှင့် တွေ့ဆုံရန် ရှိသည်။ ယင်းသည် ဆယ်စုနှစ်တစ်ခုအတွင်း KMT ဥက္ကဋ္ဌတစ်ဦး၏ ပထမဆုံးသော တရုတ်ပြည်ခရီးစဉ် ဖြစ်သည်။ Cheng Li-wun က ၎င်းအနေဖြင့် နှစ်နိုင်ငံကြား ပြန်လည်သင့်မြတ်ရေးအတွက် "ငြိမ်းချမ်းရေးတံတား" အဖြစ် ဆောင်ရွက်လိုကြောင်း ပြောကြားခဲ့သည်။ ထိုင်ဝမ်အာဏာရ DPP ပါတီကမူ ယခုခရီးစဉ်သည် အမျိုးသားလုံခြုံရေးကို ထိခိုက်စေသည်ဟု ဝေဖန်ခဲ့သည်။ တရုတ်က ထိုင်ဝမ်ပတ်ပတ်လည်တွင် စစ်ရေးခြိမ်းခြောက်မှုများ လုပ်နေချိန်တွင် ယခုလို သွားရောက်ခြင်းသည် ရန်သူ့ထံ ဒူးထောက်ခြင်းဖြစ်ပြီး၊ အမျိုးသားလုံခြုံရေးကို ထိခိုက်စေသည်ဟု ဆိုသည်။ နိုင်ငံရေးလေ့လာသူများကမူ ယခုခရီးစဉ်သည် အမေရိကန်သမ္မတ ဒေါ်နယ်ထရမ့်၏ မရေရာသော ထိုင်ဝမ်မူဝါဒနှင့် အရှေ့အလယ်ပိုင်းပဋိပက္ခများကြောင့် အမေရိကန်အပေါ် ယုံကြည်မှု လျော့နည်းလာချိန်တွင် ပေါ်ပေါက်လာခြင်းဖြစ်သည်ဟု သုံးသပ်ထားကြသည်။ အထူးသဖြင့် ထိုင်ဝမ်၏ ကာကွယ်ရေးအသုံးစရိတ်တိုးမြှင့်ရန် ကိစ္စရပ်ကို အတိုက်အခံပါတီက လွှတ်တော်တွင် ပိတ်ဆို့ထားချိန်နှင့် တိုက်ဆိုင်နေခြင်းကြောင့် ပြည်တွင်းပြည်ပ နိုင်ငံရေးမျက်နှာစာတွင် ဝေဖန်မှုများ ထွက်ပေါ်လျက်ရှိသည်။ #ChengLi_wun #ထိုင်ဝမ် #ကူမင်တန်

ထိုင်ဝမ်အတိုက်အခံခေါင်းဆောင် တရုတ်ပြည်သို့ သွားရောက်

Apr 9

ဟောမုဇ် ရေလက်ကြားကို အီရန်က ပြန်ပိတ်ထား၊ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၉ ရက်။ အမေရိကန်နှင့် အီရန်နိုင်ငံတို့အကြား နှစ်ပတ်ကြာ ယာယီအပစ်ရပ်စဲရန် သဘောတူညီမှု ရရှိထားသော်လည်း အီရန်တော်လှန်ရေးအစောင့်တပ် (IRGC) က ကမ္ဘာ့ကုန်သွယ်ရေးအတွက် အရေးပါသည့် ဟော်မုဇ်ရေလက်ကြား (Strait of Hormuz) ကို ပြန်လည်ပိတ်ဆို့လိုက်ကြောင်း ကြေညာခဲ့သည်။ အစ္စရေးနိုင်ငံက လက်ဘနွန်နိုင်ငံအတွင်းသို့ ထိုးစစ်ဆင်တိုက်ခိုက်မှုများ ပြုလုပ်ခဲ့ခြင်းမှာ အပစ်ရပ်စဲရေး သဘောတူညီချက်ကို ချိုးဖောက်ခြင်းဖြစ်သည်ဟု စွပ်စွဲကာ အခုလို ကြေညာခဲ့ခြင်း ဖြစ်သည်။ အမေရိကန်သမ္မတ ဒေါ်နယ်ထရမ့်နှင့် အစ္စရေးဝန်ကြီးချုပ် နေတန်ယာဟုတို့ကမူ ယခုအပစ်ရပ်စဲရေး သဘောတူညီချက်သည် လက်ဘနွန်ရှိ ဟစ်ဇ်ဘိုလာအဖွဲ့အား တိုက်ခိုက်နေသည့် စစ်ဆင်ရေးများနှင့် သက်ဆိုင်ခြင်းမရှိကြောင်း တရားဝင်တုံ့ပြန်ထားသည်။ အစ္စရေး၏ အကြီးမားဆုံးသော ပူးပေါင်းစစ်ဆင်ရေးနှင့် ဗုံးကြဲတိုက်ခိုက်မှုများကြောင့် လက်ဘနွန်တွင် အနည်းဆုံး လူပေါင်း ၁၈၀ ကျော် သေဆုံးခဲ့ကြောင်း လက်ဘနွန်ကျန်းမာရေးဝန်ကြီးဌာနက ထုတ်ပြန်ထားသည်။ သမ္မတထရမ့်က အီရန်နှင့် အပြည့်အဝ သဘောတူညီချက်မရမချင်း အမေရိကန်၏ စစ်သင်္ဘောများ၊ လေယာဉ်များနှင့် စစ်သည်အင်အားများကို အီရန်နိုင်ငံအနီးတဝိုက်တွင် ဆက်လက်တပ်စွဲထားမည်ဟု သတိပေးခဲ့ပြီး၊ အစီအစဉ်အတိုင်း ဖြစ်မလာပါက ပြင်းထန်သော စစ်ရေးအရေးယူမှုများ ချက်ချင်းစတင်မည်ဟု ဆိုသည်။ လက်ရှိ ပဋိပက္ခသည် ဆော်ဒီအာရေဗျနိုင်ငံရှိ အကြီးဆုံး Abqaiq ရေနံချက်စက်ရုံကိုပါ ရိုက်ခတ်ခဲ့ပြီး အီရန်၏ ဒရုန်းဖြင့် တိုက်ခိုက်မှုကြောင့် မီးလောင်ကျွမ်းမှုများ ဖြစ်ပွားခဲ့ရာ ကမ္ဘာ့ရေနံဈေးကွက်အပေါ် စိုးရိမ်မှုများ မြင့်တက်လျက်ရှိသည်။ ယခုပြဿနာများကို ဖြေရှင်းရန် လာမယ့်စနေနေ့တွင် ပါကစ္စတန်နိုင်ငံ၊ အစ္စလာမ္မာဘတ်မြို့၌ အမေရိကန်ဒုသမ္မတ JD Vance ဦးဆောင်သောအဖွဲ့နှင့် အီရန်ကိုယ်စားလှယ်များ တွေ့ဆုံဆွေးနွေးရန် စီစဉ်ထားသည်။ #StraitofHormuz #IRGC #ဟစ်ဇ်ဘိုလာ

ဟောမုဇ် ရေလက်ကြားကို အီရန်က ပြန်ပိတ်ထား၊

Apr 8

ထိုင်းသင်္ကြန်ကာလအတွင်း လိုက်နာရမည့် စည်းကမ်းချက်များ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၈ ရက်။ ထိုင်းနိုင်ငံအစိုးရသည် ၂၀၂၆ ခုနှစ် သင်္ကြန်ကာလကို "အရက်ကင်းစင်၍ ဘေးကင်းသော သင်္ကြန်" အဖြစ် သတ်မှတ်ထားပြီး စည်းကမ်းဖောက်ဖျက်သူများကို တင်းတင်းကြပ်ကြပ် အရေးယူသွားမည်ဖြစ်သည်။ ထိုင်း ဘုရင့် ရဲတပ်ဖွဲ့ကလည်း စည်းကမ်းများကို တင်းတင်းကျပ်ကျပ် ကိုင်တွယ်သွားမည်ဖြစ်ကြောင်း ပြောကြားထားသည်။ အဓိက တားမြစ်ချက်များနှင့် ပြစ်ဒဏ်များ: ၁။ ရေသေနတ်နှင့် ဖိအားပြင်းပိုက်များ: PVC ပိုက်ဖြင့် ပြုလုပ်ထားသော ရေအမြောက်များနှင့် ဖိအားပြင်းရေသေနတ်များ အသုံးမပြုရ။ ချိုးဖောက်ပါက ထောင်ဒဏ် ၂ နှစ် သို့မဟုတ် ဒဏ်ငွေ ၄,၀၀၀ ဘတ် ကျခံရနိုင်သည်။ ၂။ အရက်ရောင်းချမှု: အသက် ၂၀ မပြည့်သူများကို အရက်ရောင်းချခြင်း လုံးဝမပြုရ။ ရောင်းချခွင့်ပြုချိန်မှာ (၁၁:၀၀ - ၁၄:၀၀) နာရီနှင့် (၁၇:၀၀ - ၂၄:၀၀) နာရီအတွင်းသာ ဖြစ်သည်။ ၃။ မူးယစ်မောင်းနှင်မှု: အရက်သောက်၍ ယာဉ်မောင်းနှင်ပါက ထောင်ဒဏ် ၁ နှစ်နှင့် ဒဏ်ငွေ ၂၀,၀၀၀ ဘတ်အထိ ကျခံရနိုင်ပြီး၊ ၂ နှစ်အတွင်း ထပ်မံကျူးလွန်ပါက ပြစ်ဒဏ် ပိုမိုပြင်းထန်မည်ဖြစ်သည်။ ၄။ အဝတ်အစားနှင့် အပြုအမူ: လူပုံအလယ်တွင် အမြင်မတော်သော ဝတ်စားဆင်ယင်မှုနှင့် အပြုအမူများအတွက် ဒဏ်ငွေ ၅,၀၀၀ ဘတ်အထိ ချမှတ်နိုင်သည်။ ၅။ ယာဉ်စည်းကမ်း: ပစ်ကပ်ကားဘေးဘောင်ပေါ်တွင် ထိုင်ခြင်းနှင့် ခေါင်မိုးပေါ်တက်၍ ရေကစားခြင်းတို့ကို တားမြစ်ထားသည်။ လမ်းမကြီးများတွင် ၂၄ နာရီ အမြန်နှုန်းတိုင်း ကင်မရာများဖြင့် စစ်ဆေးမည်ဖြစ်ပြီး အရှိန်ကျော်ပါက ဒဏ်ငွေ ၄,၀၀၀ ဘတ်နှင့် လိုင်စင်အမှတ် အဖြတ်ခံရမည်ဖြစ်သည်။ ၆။ ဆူညံသံ: စပီကာများအသုံးပြုခြင်းနှင့် ပွဲလမ်းသဘင်များပြုလုပ်ရန် သက်ဆိုင်ရာခရိုင်ရုံးများ၏ ကြိုတင်ခွင့်ပြုချက် ရယူရမည်ဖြစ်သည်။ #ထိုင်းသင်္ကြန် #SongkranFestival

ထိုင်းသင်္ကြန်ကာလအတွင်း လိုက်နာရမည့် စည်းကမ်းချက်များ

Apr 8

အီရန်အရပ်သားများ "လူသားတံတိုင်း" ခတ်၍ အရေးကြီး အဆောက်အအုံများအား ကာကွယ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၈ ရက်။ အမေရိကန်သမ္မတ ဒေါ်နယ်ထရန့်က ဟော်မုဇ်ရေလက်ကြားအား ပြန်လည်ဖွင့်လှစ်ခြင်းမရှိပါက အီရန်နိုင်ငံရှိ လျှပ်စစ်ဓာတ်အားပေးစက်ရုံများနှင့် တံတားများကို ဗုံးကြဲဖျက်ဆီးမည်ဟု ရာဇသံပေးခဲ့ပြီးနောက် အီရန်အရပ်သားများသည် "လူသားတံတိုင်း (Human Chain)" ပြုလုပ်၍ ခုခံကာကွယ်ခဲ့ကြသည်။ အီရန်အစိုးရ၏ တိုက်တွန်းနှိုးဆော်ချက်အရ နိုင်ငံတစ်ဝန်းရှိ အရေးကြီးသော လျှပ်စစ်ဓာတ်အားပေးစက်ရုံများဖြစ်သည့် Kermanshah ပြည်နယ်ရှိ Bisotun စက်ရုံ၊ Mazandaran ရှိ စက်ရုံနှင့် နိုင်ငံ၏ အကြီးဆုံးစက်ရုံဖြစ်သော Shahid Rajaee တို့တွင် ကလေးငယ်များအပါအဝင် အရပ်သားများက လက်ချင်းချိတ်ကာ ဝိုင်းရံစောင့်ကြပ်နေကြသည်။ ၎င်းတို့သည် "စွမ်းအင်ကဏ္ဍကို တိုက်ခိုက်ခြင်းသည် စစ်ရာဇဝတ်မှုဖြစ်သည်" ဟူသော ဆိုင်းဘုတ်များကို ကိုင်ဆောင်ကာ အခြေခံအဆောက်အအုံများ ပျက်စီးဆုံးရှုံးမှုကို ကာကွယ်ရန် ကြိုးပမ်းခဲ့ကြခြင်း ဖြစ်သည်။ #HumanChain #IranWar

အီရန်အရပ်သားများ “လူသားတံတိုင်း” ခတ်၍ အရေးကြီး အဆောက်အအုံများအား ကာကွယ်

Apr 8

အီရန် စစ်ပွဲ ၂ ပတ် ရပ်ဆိုင်းရန် သဘောတူ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၈ ရက်။ အမေရိကန်ပြည်ထောင်စုနှင့် အီရန်နိုင်ငံတို့သည် နှစ်ဖက်တိုက်ခိုက်မှုများကို နှစ်ပတ်ကြာ ရပ်ဆိုင်းထားရန် သဘောတူညီခဲ့ကြသည်။ အမေရိကန်သမ္မတ ဒေါ်နယ်ထရန့်က စစ်ရေးအရ တိုက်ခိုက်မှုများကို ခေတ္တရပ်ဆိုင်းထားမည်ဟု ကြေညာခဲ့ပြီးနောက် အီရန်အစိုးရဘက်ကလည်း အဆိုပါ အပစ်အခတ်ရပ်စဲရေးကို လက်ခံကြောင်း အတည်ပြုခဲ့သည်။ အပစ်အခတ်ရပ်စဲရေး သဘောတူညီချက်အရ လာမည့် ဧပြီလ ၁၀ ရက် (သောကြာနေ့) တွင် ပါကစ္စတန်နိုင်ငံ၊ အစ္စလာမ္မာဘတ်မြို့၌ နှစ်နိုင်ငံကိုယ်စားလှယ်များ တွေ့ဆုံဆွေးနွေးကြမည်ဖြစ်သည်။ အပစ်အခတ်ရပ်စဲရေး၏ အဓိကသော့ချက်မှာ ဟော်မုဇ်ရေလက်ကြား (Strait of Hormuz) ကို ပြန်လည်ဖွင့်လှစ်ပေးရန်ဖြစ်သည်။ အီရန်နိုင်ငံခြားရေးဝန်ကြီးက အဆိုပါရေလမ်းကြောင်းအတွင်း ကုန်သွယ်ရေးသင်္ဘောများ ဘေးကင်းစွာ ဖြတ်သန်းနိုင်ရေးအတွက် လက်နက်ကိုင်တပ်ဖွဲ့များနှင့် ညှိနှိုင်းဆောင်ရွက်သွားမည်ဟု အာမခံထားသည်။ အပစ်အခတ်ရပ်စဲရေး သတင်းများထွက်ပေါ်နေသော်လည်း အစ္စရေးဝန်ကြီးချုပ် နေတန်ယာဟုက ဤသဘောတူညီချက်သည် လက်ဘနွန်ရှိ ဟဇ်ဘိုလာအဖွဲ့များနှင့် အကျုံးမဝင်ကြောင်း ထုတ်ဖော်ပြောကြားခဲ့သည်။ တဖက်တွင်လည်း အစ္စရေး၊ ဆော်ဒီအာရေဗျနှင့် ယူအေအီးနိုင်ငံတို့သည် အီရန်ဘက်မှ ပစ်ခတ်သော ဒုံးကျည်ခြိမ်းခြောက်မှုများကို လေကြောင်းရန်ကာကွယ်ရေးစနစ်များဖြင့် ဆက်လက်ခုခံနေရဆဲဖြစ်သည်။ #အီရန်စစ်ပွဲသဘောတူညီမှု #အီရန်စစ်ပွဲ

အီရန် စစ်ပွဲ ၂ ပတ် ရပ်ဆိုင်းရန် သဘောတူ

Apr 8

ဝန်ကြီးစာရင်းတွင် အငြိမ်းစား ဗိုလ်ချုပ်ဟောင်း အများအပြားပါနေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၈ ရက်။ အငြိမ်းစား ဗိုလ်ချုပ်ဟောင်းများ အများအပြား ပါဝင်သည့် ပြည်ထောင်စုဝန်ကြီး ၃၀ ဦး အမည်စာရင်းကို သမ္မတအဖြစ် ရွေးချယ်ခံထားရသူ ဗိုလ်ချုပ်မှူးကြီး မင်းအောင်လှိုင်က ဧပြီလ ၇ ရက်နေ့တွင် ပြည်ထောင်စု လွှတ်တော်သို့ တင်ပြခဲ့သည်။ ယခုကဲ့သို့ အမည်စာရင်း တင်သွင်းမှုသည် စစ်တပ်၏ အတုအယောင် ရွေးကောက်ပွဲမှ တစ်ဆင့် ပေါ်ပေါက်လာ သည့် အတုအယောင် အစိုးရသစ်ကို စစ်ဘက် အသိုင်းအဝိုင်းမှ လူဟောင်းများဖြင့်သာ ပြန်လည်ဝန်းရံလိုက်ခြင်း လည်း ဖြစ်သည်။ ယခု တင်သွင်းလိုက်သည့် ဝန်ကြီးစာရင်းကို ကြည့်ပါက ကာကွယ်ရေး၊ ပြည်ထဲရေးနှင့် နယ်စပ်ရေးရာကဲ့သို့သော အရေးကြီးဝန်ကြီးဌာနများ သာမက စီးပွားရေးနှင့် လူမှုရေးဆိုင်ရာ ဝန်ကြီးဌာနများတွင်ပါ စစ်တက္ကသိုလ် အသီးသီးမှ ဆင်းသက်လာသည့် အငြိမ်းစားဗိုလ်ချုပ်ကြီးနှင့် ဗိုလ်မှူးချုပ်ဟောင်းများကိုသာ အဓိကထား အသုံးပြုထားသည်ကို တွေ့ရသည်။ နိုင်ငံရေးလေ့လာသူတစ်ဦးက ယခုအစိုးရသစ် ဖွဲ့စည်းပုံအပေါ် ယခုကဲ့သို့ မှတ်ချက်ပြုသည်။ “ဒါဟာ အရပ်သား တစ်ပိုင်း အစိုးရလို့ နာမည်တပ်ထားပေမဲ့ တကယ်တမ်းတော့ စစ်တပ်ကလူတွေ စုပေါင်းပြီး အုပ်ချုပ်မယ့် ပုံစံမျိုးပါပဲ။ အသွင်ပြောင်း ဗိုလ်ချုပ်ဟောင်းတွေနဲ့ပဲ ဝန်းရံထားတော့ မူဝါဒပိုင်းမှာ ထူးခြားတဲ့ ပြောင်းလဲမှု မျိုးထက် စစ်တပ်ရဲ့ ထိန်းချုပ်မှုကိုပဲ ဆက်သွားမယ့် သဘောရှိပါတယ်။” ဝန်ကြီးစာရင်းတွင် လက်ရှိဝန်ကြီးအဟောင်း ၂၀ ကျော်ကို ပြန်လည်အမည်တင်သွင်းထားပြီး ၎င်းတို့အနက် ဒုဗိုလ်ချုပ်ကြီးညွန့်ဝင်းဆွေ (ပြည်ထဲရေး)၊ ဗိုလ်ချုပ်ကြီးထွန်းအောင် (ကာကွယ်ရေး) နှင့် ဒုဗိုလ်ချုပ်ကြီးဖုန်းမြတ် (နယ်စပ်ရေးရာ) တို့ကဲ့သို့သော လက်ရှိစစ်ဖက်တာဝန်ယူထားသူများလည်း ပါဝင်နေသည်။ ထို့ပြင် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP) မှ ထိပ်ပိုင်းခေါင်းဆောင်များဖြစ်သည့် ဦးမျိုးဇော်သိမ်း၊ ဦးခင်မောင်စိုးနှင့် ဦးမောင်မြင့် တို့ကိုလည်း ဝန်ကြီးအဖြစ် ခန့်အပ်ရန် အမည်စာရင်း တင်သွင်း ထားသည်။ နေပြည်တော်မှ အုပ်ချုပ်ရေးပိုင်းနှင့် နီးစပ်သူတစ်ဦးက “အစိုးရအဖွဲ့ထဲမှာ ပါလာတဲ့သူတွေက အရင်စစ်တပ်ထဲ မှာလည်း အတူတူ ဖြတ်သန်းခဲ့ကြတဲ့သူတွေ များတယ်။ ဒါကြောင့် သမ္မတနဲ့ ဝန်ကြီးတွေကြားမှာ အမိန့်နာခံမှု အပိုင်းကတော့ အားကောင်းနေဦးမှာပဲ။ ပြည်သူတွေ တကယ်လိုလားတဲ့ အရပ်သားပညာရှင်တွေ ပါဝင်မှုက တော့ အရမ်းကို နည်းနေတာ တွေ့ရတယ်” ဟု ပြောသည်။ အမည်စာရင်း တင်သွင်းခံရသူများထဲတွင် အသက်အကြီးဆုံးအဖြစ် အသက် ၈၁ နှစ်အရွယ် ဒေါက်တာ သက်သက်ဇင် (အမျိုးသမီးရေးရာ) ပါဝင်ပြီး၊ ဒေါက်တာကံဇော် (ဘဏ္ဍာရေး)၊ ဒေါက်တာသီတာဦး (ဥပဒေရေးရာ) နှင့် ဒေါက်တာသက်ခိုင်ဝင်း (ကျန်းမာရေး) တို့ကဲ့သို့သော လက်ရှိဝန်ကြီးများကိုလည်း ၎င်းတို့၏ နေရာဟောင်းများတွင်သာ ဆက်လက်ထားရှိရန် အဆိုပြုထားသည်။ ယခုတင်ပြထားသည့် ဝန်ကြီးလောင်းများနှင့် ပတ်သက်၍ ကန့်ကွက်လိုသည့် ကိုယ်စားလှယ်များရှိပါက လုပ်ထုံးလုပ်နည်းအရ အမည်စာရင်းပေးသွင်းနိုင်ပြီး၊ လာမည့် ဧပြီလ ၉ ရက်နေ့တွင် ကျင်းပမည့် ပြည်ထောင်စုလွှတ်တော် အစည်းအဝေးတွင် ဆွေးနွေးအတည်ပြုသွားမည်ဟု ဆိုသည်။ စစ်ဗိုလ်ချုပ်ဟောင်းများဖြင့်သာ ပြန်လည်ဖွဲ့စည်းထားသည့် အစိုးရသစ်သည် ဒေသတွင်း တည်ငြိမ်မှုကို ဆောင်ကြဉ်းပေးနိုင်မည်ထက် စစ်အာဏာရှင်ယန္တရားကိုသာ ဆက်လက် အသက်သွင်းသွားမည့်အပေါ် ပြည်တွင်းပြည်ပမှ ပြင်းပြင်းထန်ထန် ဝေဖန်လျက်ရှိပြီး၊ အဆိုပါ အစိုးရ၏ တရားဝင်မှုအပေါ်တွင်လည်း လူထုက ယုံကြည်မှု ကင်းမဲ့နေကြသည်။ ဓါတ်ပုံ - MOI #စစ်ကော်မရှင် #အငြိမ်းစားဗိုလ်ချုပ်ဟောင်း

ဝန်ကြီးစာရင်းတွင် အငြိမ်းစား ဗိုလ်ချုပ်ဟောင်း အများအပြားပါနေ

Apr 8

ပအိုဝ်း ပြည်သူစစ် အဖွဲ့က မြေယာများသိမ်းဆည်း သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၈ ရက်။ ရှမ်းပြည်နယ်တောင်ပိုင်း၊ ပအိုဝ်းကိုယ်ပိုင်အုပ်ချုပ်ခွင့်ရဒေသ၊ ဟိုပုံးမြို့နယ်အတွင်းရှိ ပအိုဝ်းတောင်သူများ၏ မြေယာဧက သောင်းချီ အဓမ္မသိမ်းဆည်းခံရပြီး စိုက်ပျိုး၍မရသည့် မြေကွက်ငယ်များဖြင့် အစားထိုးခံနေရ သည်။ ပအိုဝ်းတိုင်းရင်းသား တောင်သူများ ပိုင်ဆိုင်သည့် မြေယာဧက တစ်သောင်းရှစ်ထောင်ကျော်ကို စစ်ကော်မရှင်နှင့် လက်အောက်ခံ ပအိုဝ်းပြည်သူ့စစ် (PNA) အဖွဲ့က မြို့ပြစီမံကိန်းအကြောင်းပြကာ အဓမ္မ သိမ်းယူနေပြီး၊ အစား ပြန်ပေးသည့် မြေကွက်ငယ်များမှာ တောင်သူများအတွက် အသက်မွေးဝမ်းကျောင်းပြုရန်ပင် လုံးဝမလုံလောက် ကြောင်း ဒေသခံများက ပြောသည်။ ဟိုပုံးမြို့နယ်၊ ညောင်ဗက်ကျေးရွာရှိ တောင်သူများပိုင်ဆိုင်သော မြေဧက ၁၄,၀၀၀ ကျော်အပါအဝင် မြို့နယ် အတွင်းရှိ မြေယာများကို PNA နှင့် မြေပွဲစားများ ပူးပေါင်းကာ သိမ်းယူနေခြင်းဖြစ်ပြီး၊ အစားပြန်ပေးသည့် ပေ ၂၀ - ၄၀ ခန့်သာရှိသော မြေကွက်ငယ်များကိုပင် ငွေကျပ်သိန်း ၅၀ ဖြင့် ပြန်လည်ရောင်းချနေသည်ဟု ဆိုသည်။ ဒေသခံတောင်သူတစ်ဦးက “ပအိုဝ်းပြည်သူတွေအနေနဲ့ ယာမြေ ပေ ၂၀ - ၅၀ ဆိုတာက အသက်မွေးဝမ်း ကျောင်း ပြုလို့ မရပါဘူး။ ပအိုဝ်းပြည်သူတွေအနေနဲ့ ကိုယ့်ရဲ့အသက်မွေးဝမ်းကျောင်းပြုဖို့အတွက်က လယ် ယာတွေ၊ တောင်ယာတွေရှိဖို့ လိုပါတယ်။ ဒါကြောင့်ပဲ ပအိုဝ်းပြည်သူတွေရဲ့ မြေကို ဒီလိုမျိုး သိမ်းဆည်းနေတာ ဟာ ပြည်သူလူထုရဲ့ ဘဝကို သတ်ဖြတ်လိုက်တာနဲ့ အတူတူပဲလို့ ကျနော် ပြောချင်ပါတယ်” ဟု ပြောသည်။ အဆိုပါမြေယာများကို ပြီးခဲ့သည့် မတ်လ ၃၀ ရက်နေ့တွင် PNA အဖွဲ့၊ ထွေအုပ်နှင့် မြေပွဲစားများ ရောက်ရှိလာ ပြီး အဓမ္မသိမ်းယူခဲ့ခြင်းဖြစ်သည်။ ထိုသို့သိမ်းယူစဉ် ဒေသခံများနှင့် PNA အဖွဲ့တို့အကြား ရုန်းရင်းဆန်ခတ် ဖြစ်ပွားခဲ့ရာ ဒေသခံ ၁၀ ဦးကို ဟိုပုံး ရဲစခန်း၌ ဖမ်းဆီးထိန်းသိမ်းခဲ့သည်။ ထို့နောက် ဧပြီလ ၆ ရက်နေ့၊ မွန်းလွဲပိုင်းတွင် ဖမ်းဆီးခံထားရသူများအနက် အမျိုးသား ၆ ဦးကို ပြန်လည် လွှတ်ပေးခဲ့သော်လည်း ၎င်းတို့မှာ ရိုက်နှက်နှိပ်စက်ခံထားရသည့် ဒဏ်ရာများ ရရှိထားကြောင်း နီးစပ်သူများက ပြောသည်။ နီးစပ်သူတစ်ဦးက “လွတ်လာတဲ့ ခြောက်ဦးကတော့ အကုန်လုံး အမျိုးသားတွေချည်းပါပဲ။ ဒဏ်ရာတွေတော့ ရထားကြတယ်၊ ရိုက်နှက်နှိပ်စက်ခံရတယ်လို့ သိရပါတယ်။ ကျန်တဲ့ လေးဦးကတော့ အမျိုးသမီး နှစ်ဦး၊ ရွာသူကြီးနဲ့ နောက်တစ်ဦး ကျန်နေသေးတယ်” ဟု ပြောသည်။ လက်ရှိတွင် ဖမ်းဆီးခံထားရသူများနှင့် ကျေးရွာရှိ အိမ်ထောင်စု ၆၆ စုကို ရွာမှ ပြောင်းရွှေ့ပေးမည်ဖြစ်ကြောင်း ခံဝန်ကတိလက်မှတ် ရေးထိုးခိုင်းထားကြောင်းလည်း ဆိုသည်။ ညောင်ဗက်ကျေးရွာရှိ မြေယာများကို ၁၉၉၂ ခုနှစ်ကတည်းက တပ်မတော်နည်းပညာ တက္ကသိုလ်နှင့် စစ်ဘက် ဆိုင်ရာ တပ်ရင်းများ တည်ဆောက်ရန် လျော်ကြေးမပေးဘဲ သိမ်းဆည်းခဲ့ခြင်းဖြစ်သည်။ ၂၀၁၅ ခုနှစ်တွင် အရပ်သားအစိုးရလက်ထက်၌ ပအိုဝ်းကိုယ်ပိုင်အုပ်ချုပ်ခွင့်ရဒေသ ဦးစီးအဖွဲ့ထံ ပြန်လည် လွှဲပြောင်းပေးခဲ့သော်လည်း ယခုအခါ စစ်ကော်မရှင် အဖွဲ့ဝင် ခွန်စံလွင်နှင့် PNO/PNA ခေါင်းဆောင်များက မြို့ပြစီမံကိန်းအကြောင်းပြကာ မြေပွဲစားများနှင့် ပူးပေါင်း၍ အကွက်ရိုက် ရောင်းစားနေခြင်းဖြစ်ကြောင်း ဒေသခံများက ပြောသည်။ တောင်သူများအနေဖြင့် ယခင်က တစ်ဦးလျှင် အနည်းဆုံး ၂ ဧကခန့် ပိုင်ဆိုင်ကြပြီး စိုက်ပျိုးရေး လုပ်ငန်းဖြင့် အသက်မွေးခဲ့ကြသော်လည်း ယခုအခါ စိုက်ပျိုး၍မရသည့် မြေကွက်ငယ်များဖြင့် အစားထိုးခံရကာ ဘဝ ရပ်တည်ရေးအတွက် အခက်အခဲများနှင့် ရင်ဆိုင်နေရသည်ဟု ပြောသည်။ #PNA #PNO #ပအိုဝ်းပြည်သူ့စစ် #ဟိုပုံးမြို့နယ် #ညောင်ဗက်ကျေးရွာ

ပအိုဝ်း ပြည်သူစစ် အဖွဲ့က မြေယာများသိမ်းဆည်း

Apr 8

ရွှေဘို အနောက်ခြမ်း ဗုံးကြဲမှု ဆရာတော်တစ်ပါးနှင့် အမျိုးသမီး တစ်ဦးသေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၈ ရက်။ စစ်ကိုင်းတိုင်းဒေသကြီး၊ ရွှေဘိုမြို့နယ်အနောက်ခြမ်းရှိ စစ်ရှောင်စာသင်ကျောင်းကို စစ်ကော်မရှင်တပ်က လေကြောင်းမှ ဗုံးကြဲခဲ့ရာ ဆရာတော်တစ်ပါးနှင့် အမျိုးသမီးတစ်ဦး သေဆုံးခဲ့သည်။ ရွှေဘိုတွင် စစ်ဘေးရှောင်ကလေးငယ်များ ပညာသင်ကြားနေသည့် ဘုန်းတော်ကြီးကျောင်းနှင့် စစ်ရှောင်စခန်းကို စစ်ကော်မရှင်က လေကြောင်းမှ ပစ်မှတ်ထား တိုက်ခိုက်ခဲ့သဖြင့် ဆရာတော်တစ်ပါး ပျံလွန်တော်မူပြီး အမျိုးသမီးတစ်ဦး သေဆုံးသွားကြောင်း ဒေသခံများက ပြောသည်။ ရွှေဘိုမြို့နယ်၊ ဆင်အင်းကျေးရွာရှိ စစ်ရှောင်စာသင်ကျောင်းနေရာသို့ စစ်ကော်မရှင်က ဧပြီလ ၆ ရက်နေ့၊ နံနက်ပိုင်းတွင် ဂျက်ဖိုက်တာ တိုက်လေယာဉ်နှစ်စီးဖြင့် ခြောက်ကြိမ်ထက်မနည်း လာရောက် ဗုံးကြဲခဲ့ခြင်း ဖြစ်သည်။ ထိုသို့ ဗုံးကြဲချိန်တွင် တိုက်ပွဲဖြစ်ပွားနေခြင်းမျိုး မရှိဘဲ စစ်ရှောင်စခန်းကိုသာ တမင်ပစ်မှတ်ထားခြင်းဖြစ်သည်ဟု ဒေသခံများက ဆိုသည်။ မြေပြင်သတင်းရင်းမြစ်က “ကလေးတွေ စာသင်နေတဲ့ ဘုန်းကြီးကျောင်းကို ဂျက်ဖိုက်တာနှစ်စီးနဲ့ တစ်လှည့်စီ ပတ်ပြီး ဗုံးကြဲသွားတာဗျ။ ဗုံးကြဲရုံတင်မကဘူး၊ စက်သေနတ်တွေနဲ့ပါ ဝဲပြီး ပစ်သေးတာ။ ကျောင်းထဲက ဆရာတော်ကတော့ နေရာတင် ပျံလွန်တော်မူတယ်။ ဒကာမကြီးတစ်ယောက်လည်း ခြေထောက်ပြတ်ပြီး အဲ့ဒီ ဒဏ်ရာနဲ့ပဲ သေသွားရရှာတယ်” ဟု ပြောသည်။ အဆိုပါ တိုက်ခိုက်မှုကြောင့် ကျောင်း၌ သတင်းသုံးနေသည့် သက်တော် (၅၀) ကျော်အရွယ် ဆရာတော်မှာ နေရာ၌ပင် ပျံလွန်တော်မူခဲ့ပြီး၊ အသက် (၆၀) ခန့်ရှိ အမျိုးသမီးကြီးတစ်ဦးမှာလည်း ခြေထောက်ပြတ်တောက် သည့် ဒဏ်ရာဖြင့် သေဆုံးသွားခဲ့ခြင်းဖြစ်သည်။ ထို့အပြင် အခြားစစ်ဘေးရှောင် ၃ ဦးလည်း ဒဏ်ရာအပြင်းအထန် ရရှိထားသဖြင့် အရေးပေါ် ဆေးကုသမှု ခံယူနေရသည်။ ဒေသခံတစ်ဦးကလည်း “ကျနော်တို့မှာ ဘာတိုက်ပွဲမှလည်း မရှိဘဲနဲ့ လေယာဉ် ဗုံးဒဏ်ကို ခံလိုက်ရတာ။ ကျောင်းဆောင်တွေလည်း မြေစာပုံဖြစ်ကုန်ပြီ။ ကလေးတွေ ပညာသင်နေတဲ့ နေရာတွေကိုမှ ပစ်မှတ်ထား တာကတော့ လူမဆန်တဲ့ လုပ်ရပ်လို့ပဲ ပြောရမှာပဲဗျ” ဟု ပြောသည်။ စစ်ကော်မရှင်၏ စက်သေနတ်ဖြင့် ပစ်ခတ်မှုနှင့် ဗုံးဒဏ်ကြောင့် စာသင်ကျောင်းဆောင်နှင့် ဘုန်းကြီးကျောင်း အတွင်းရှိ အဆောက်အအုံများစွာ ပြိုကျပျက်စီးခဲ့ရသည်။ ဆင်အင်းကျေးရွာသည် ဧပြီလ ၃ ရက်နေ့ကလည်း လေကြောင်းတိုက်ခိုက်မှု ခံခဲ့ရသဖြင့် လူ ၇ ဦး ဒဏ်ရာရ ရှိခဲ့ဖူးပြီး ယခုအခါ အရပ်သားသေဆုံးမှုပါ ရှိလာခြင်း ဖြစ်သည်။ လက်ရှိတွင် ရွှေဘိုမြို့နယ် အနောက်ခြမ်းရှိ ကျေးရွာများမှာ စစ်ကော်မရှင်၏ လေကြောင်းရန်ကို အမြဲတစေ စိုးရိမ်နေကြရပြီး၊ စစ်ရှောင်များမှာလည်း ဘေးလွတ်ရာသို့ ထပ်မံ တိမ်းရှောင်နေကြရသည်။ #ရွှေဘိုမြို့နယ် #ဆင်အင်းရွာ #စစ်ကိုင်းတိုင်း

ရွှေဘို အနောက်ခြမ်း ဗုံးကြဲမှု ဆရာတော်တစ်ပါးနှင့် အမျိုးသမီး တစ်ဦးသေဆုံး

Apr 8

ဧရာဝတီတိုင်းဒေသကြီး ဝန်ကြီးချုပ် သစ်ကို တိုင်းလွှတ်တော် အတည်ပြု သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၈ ရက်။ ဧရာဝတီတိုင်းဒေသကြီး၏ ဝန်ကြီးချုပ်သစ်အဖြစ် မြေယာ သိမ်းဆည်းမှုများဖြင့် လူသိများသူ အငြိမ်းစား တိုင်းအထွေထွေ အုပ်ချုပ်ရေးဦးစီးဌာန ညွှန်ကြား ရေးမှူး ဦးအေးကျော်ကို တိုင်းလွှတ်တော်က ကန့်ကွက်သူမရှိ အတည်ပြုခန့်အပ်လိုက်သည်ဟု လွှတ်တော် ကိုယ်စားလှယ် အချို့က ပြောသည်။ ၂၀၂၅ ခုနှစ် အတုအယောင် ရွေးကောက်ပွဲတွင် ပုသိမ်မြို့နယ် အမှတ် (၁) တိုင်းဒေသကြီး လွှတ်တော် ကိုယ်စား လှယ် အဖြစ် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP) မှ ဝင်ရောက်အရွေးခံခဲ့သူ ဦးအေးကျော်ကို နိုင်ငံတော်သမ္မတအဖြစ် ရွေးချယ်ခံရသူ ဗိုလ်ချုပ်မှူးကြီး မင်းအောင်လှိုင်က ဝန်ကြီးချုပ်အဖြစ် အမည်စာရင်း တင်သွင်းခဲ့ခြင်းဖြစ်ပြီး၊ ဧပြီလ ၆ ရက်နေ့တွင် တိုင်းလွှတ်တော်က အတည်ပြုခဲ့ခြင်းဖြစ်သည်။ ဦးအေးကျော်သည် ယခင်ဝန်ကြီးချုပ် ဦးသိန်းအောင်လက်ထက်တွင် တိုင်းအထွေထွေအတွင်းရေးမှူး (တိုင်းမင်း ကြီး) အဖြစ် ၆ နှစ်ခန့် တာဝန်ထမ်းဆောင်ခဲ့သူဖြစ်ပြီး၊ ၎င်း၏ အုပ်ချုပ်ရေးသက်တမ်းအတွင်း မြေယာ သိမ်းဆည်းမှုဆိုင်ရာ စွပ်စွဲချက်များ ရှိနေသူလည်းဖြစ်သည်။ ဂေါ်ရန်ဂျီကျွန်းဒေသခံ အသက် ၇၀ ကျော်အရွယ် အမျိုးသားတစ်ဦးက “ဝန်ကြီးချုပ် ဦးသိန်းအောင် လက်ထက် က ထွေအုပ်မင်းကြီးလုပ်ခဲ့သူပေါ့။ ကမ်းခြေဒေသက မြေတွေကို ခြိမ်းခြောက်ပြီးသိမ်းတယ်၊ သားသမီးတွေကို အလုပ်ပေးမယ်လို့ မြူဆွယ်ပြီး မဖြစ်စလောက် ငွေကြေးနဲ့ဝယ်တယ်။ နည်းမျိုးစုံသုံးပြီး အာဏာနဲ့ အနိုင်ကျင့် ခဲ့သူပါ" ဟု ပြောသည်။ ထို့ပြင် ဦးအေးကျော်သည် တိုင်းအထွေထွေ အတွင်းရေးမှူးအဖြစ် တာဝန်ယူစဉ်က တိုင်းအတွင်းရှိ စီးပွားရေး လုပ်ငန်းရှင်ကြီးများနှင့် နီးကပ်သော ဆက်ဆံရေးရှိခဲ့ပြီး၊ လာဒ်ပေးလာဒ်ယူကိစ္စများဖြင့် ကြီးပွားချမ်းသာလာသူ ဖြစ်ကြောင်း ပုသိမ်မြို့ရှိ စီးပွားရေးအသိုင်းအဝိုင်းတွင် သတင်းများထွက်ပေါ်နေသည်။ ယခု ဝန်ကြီးချုပ်ရွေးချယ်မှု လုပ်ငန်းစဉ်တွင် စစ်ကော်မရှင်လက်ထက် တိုင်းဝန်ကြီးချုပ်ဟောင်း ဦးတင်မောင် ဝင်းနှင့် ဦးအေးကျော်တို့ နှစ်ဦးအကြား အပြိုင်အဆိုင်ဖြစ်ခဲ့ပြီး စီးပွားရေးလုပ်ငန်းရှင်များက မိမိတို့ နှင့် အဆင် ပြေမည့်သူ အနိုင်ရရှိရေးအတွက် နေပြည်တော်အထိ သွားရောက်ကာ အပြိုင်အဆိုင် ကြိုးပမ်းမှုများ ရှိခဲ့ကြောင်း ကြံ့ခိုင်ရေးပါတီနှင့် နီးစပ်သူများ၏ ပြောပြချက်အရ သိရသည်။ တိုင်းအစိုးရအဖွဲ့ရုံးမှ ဝန်ထမ်းတစ်ဦးက ဦးတင်မောင်ဝင်းနှင့် ဦးအေးကျော်တို့၏ ကွာခြားချက်ကို “ဦးတင်မောင် ဝင်းကို ဝန်ထမ်းတွေက သိပ်မနှစ်သက်ကြဘူး။ ဖိနှိပ်တယ်၊ အထက်စီးဆန်တယ်၊ သူ့အတွက်ပဲကြည့်ပြီး အောက် ခြေ ဝန်ထမ်းတွေကို ငဲ့ကြည့်လေ့မရှိဘူး” ဟု ပြောသည်။ ဦးအေးကျော်နှင့် ရင်းနှီးသည့် အရာရှိဟောင်းတစ်ဦး၏ သုံးသပ်ချက်အရ ဦးအေးကျော်သည် စစ်တပ်မှ အသွင်ပြောင်းလာသူ ဖြစ်သော်လည်း ဦးတင်မောင်ဝင်းထက် ပိုမိုပျော့ပြောင်းကာ အထက်အောက် ဆက်ဆံရေး ပြေပြစ်သူဖြစ်ကြောင်း၊ အထူးသဖြင့် စီးပွားရေးလုပ်ငန်းရှင်များနှင့် ချောမွေ့သော ဆက်ဆံရေးရှိသူဖြစ်ကြောင်း ဆိုသည်။ သို့သော်လည်း ဝန်ကြီးချုပ်သစ် အပေါ် နိုင်ငံရေးလောက၏ အမြင်မှာမူ အကောင်းမြင်မှု နည်းပါးနေသည်။ ၈၈ မျိုးဆက် နိုင်ငံရေးသမားတစ်ဦးက “ဘယ်သူဖြစ်ဖြစ် အတူနဲ့အနူနူတွေချည်းပဲ၊ ကောင်းဖို့ဆိုတာမရှိဘူး။ ဒီယုန်မြင်လို့ ဒီခြုံထွင်ထားတာ၊ သူ့ထက်သူ လူစွမ်းကောင်းတွေပဲ ပေါ်လာမှာ။ နောက်ဘုန်းကြီးက နှစ်ချက် ပိုခေါက်ကြဦးမှာပေါ့” ဟု ပြောသည်။ လက်ရှိ ဧရာဝတီတိုင်းဒေသကြီး လွှတ်တော်တွင် စုစုပေါင်း ကိုယ်စားလှယ် ၇၂ ဦးရှိရာ USDP ပါတီမှ ၃၇ ဦးဖြင့် အများစုနေရာယူထားပြီး၊ တပ်မတော်သား ကိုယ်စားလှယ် ၁၈ ဦး၊ တိုင်းရင်းသား စည်းလုံးညီညွတ်ရေး ပါတီမှ ၇ ဦး၊ ပြည်သူ့ပါတီမှ ၃ ဦး၊ ပြည်သူ့ရှေ့ဆောင်ပါတီမှ ၃ ဦး၊ ကရင်ပြည်သူ့ပါတီမှ ၃ ဦးနှင့် မြန်မာနိုင်ငံ တောင်သူ လယ်သမား ဖွံ့ဖြိုးတိုးတက်ရေး ပါတီမှ ၁ ဦးတို့ ပါဝင်ဖွဲ့စည်းထားသည်။ ဝန်ကြီးချုပ်သစ် ဦးအေးကျော်အနေဖြင့် အတိတ်က မြေယာအငြင်းပွားမှုများနှင့် လာဒ်ပေးလာဒ်ယူ စွပ်စွဲချက် များကို မည်သို့ဖြေရှင်းပြီး၊ ဒေသတွင်း စီးပွားရေးနှင့် အုပ်ချုပ်ရေးယန္တရားကို မည်သို့ ကိုင်တွယ်သွားမည် နည်း ဆိုသည်မှာ စောင့်ကြည့်ရမည့်အချက် ဖြစ်နေသည်။ #ဧရာဝတီတိုင်း #USDP

ဧရာဝတီတိုင်းဒေသကြီး ဝန်ကြီးချုပ် သစ်ကို တိုင်းလွှတ်တော် အတည်ပြု

« Prev 1 … 86 87 88 89 90 … 1,113 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

တရုတ်နိုင်ငံခြားရေးဝန်ကြီး ဝမ်ယိ တောင်ကိုရီးယားနှင့် အင်ဒိုနီးရှားသို့ သွားမည် — August 19, 2026 2:17 pm
ဒုံးကျည်ဖြင့် တိုက်ခိုက်ခံရပြီးနောက် အီရန်အပေါ် UAE က ကုန်သွယ်ရေး ပိတ်ဆို့ — August 19, 2026 2:14 pm
ရုရှားတွင် ဘဏ်အပ်ငွေ ထုတ်ယူမှု စံချိန်တင် မြင့်တက် — August 19, 2026 2:11 pm

Recent Posts

တနင်္သာရီ လောင်းလုံးတွင် စစ်တပ်က ရမ်းသမ်းပစ်ခတ်၍ သားအဖ ၂ ဦး သေဆုံး
ဘန်ကောက် မြန်မာသံရုံးက PV ပတ်စပို့ သက်တမ်းတိုးခြင်း ရုတ်တရက် ရပ်ဆိုင်း
မောင်တော နယ်စပ်နှင့် မြို့တွင်း၌ AA လုံခြုံရေး တင်းကျပ်စွာ တိုးမြှင့်ထား
ပင်လည်ဘူးတွင် စစ်တပ်က ရက်ဆက် ဗုံးကြဲ၍ ကလေးငယ်အပါအဝင် ၉ ဦးထက်မနည်း သေဆုံး
ဝမ်းပျက်ဝမ်းလျှောရောဂါကြောင့် လူသေဆုံးမှု ရှိနေစဉ် စစ်တပ်က စစ်တွေကို လမ်းပိတ်ထား

Archives

Archives

×Close