NMG Doh – Page 90 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Author Archive

NMG Doh

Author: NMG Doh

Dec 8

တနင်္သာရီတိုင်းအတွင်း တံတားငယ် တစ်စင်းကို စစ်ကော်မရှင် ဖျက်ဆီး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၈ ရက်။ တနင်္သာရီတိုင်း၊ ထားဝယ်မြို့အနီးရှိ ကျေးရွာချင်းဆက် တံတားငယ်တစ်စင်းကို စစ်ကော်မရှင်တပ် စစ်ကြောင်းမှ မီးရှို့ဖျက်ဆီးခဲ့ကြောင်း ဒေသခံရွာသားများက ပြောသည်။ ဒီဇင်ဘာလ ပထမပတ်အတွင်း စစ်ကော်မရှင်တပ်မှ တံတားဖျက်ဆီးမှု စုစုပေါင်း လေးစင်းအထိ ရှိလာခဲ့ပြီး၊ အဆိုပါ လုပ်ရပ်များသည် တော်လှန်ရေးအင်အားစုများ၏ လှုပ်ရှားမှုကို ပိတ်ဆို့ရန် စစ်ရေးဗျူဟာအရ ရည်ရွယ်ခြင်း ဖြစ်သည်ဟု စစ်ရေးအခြေအနေကို စောင့်ကြည့်နေသည့် ဒေသခံအချို့က ပြောသည်။ အဆိုပါတံတားကို ဖြတ်သန်းသွားလာနေသည့် တောနား၊ ပေါက်တိုင်း၊ ဝမော်၊ ရှမ်းမတွင်း စသည့် ကျေးရွာများမှ ရွာသားများအတွက် ယခုကဲ့သို့ မီးရှို့ဖျက်ဆီးခံရခြင်းကြောင့် ကျန်းမာရေး၊ စားဝတ်နေရေးနှင့် လူမှုရေးကိစ္စရပ် များတွင် အခက်အခဲများနှင့် ရင်ဆိုင်လာရဖွယ်ရှိကြောင်း ဒေသခံများက စိုးရိမ်လျက်ရှိသည်။ အသက် ၅၀ ခန့်အရွယ် ဝမော်ရွာသားတစ်ဦးက “အရင်တစ်ကြိမ်ကလည်း ကွန်ကရစ်တံတားကို လာပြီးတော့ ဖျက်ဆီးသွားသေးတယ်။ အခုကတော့ ရွာသားတွေစုပြီး ပြန်ဆောက်ထားတဲ့ သစ်သားတံတားကို တမင်သက် သက် လာပြီး မီးရှို့ဖျက်ဆီးသွားတာပါ” ဟု ပြောသည်။ ထားဝယ်မြို့နှင့် လေးမိုင်ခန့်သာ ကွာဝေးသည့် တောနားနှင့် ဝမော်ကျေးရွာအကြားရှိ ကျေးရွာချင်းဆက် တံတား ငယ်အား စစ်ကော်မရှင်တပ်ဖွဲ့ဝင် အင်အားတစ်ရာခန့်ဖြင့် စစ်ကြောင်းထိုးလာကာ ဒီဇင်ဘာလ ၆ ရက်နေ့တွင် နံနက် ၉ နာရီခန့်က မီးရှို့ဖျက်ဆီးခဲ့ခြင်း ဖြစ်သည်။ ဖျက်ဆီးခံရသည့် တံတားငယ်သည် ယခင်က ကွန်ကရစ်တံတားအဖြစ် ဆောက်လုပ်ထားခဲ့ခြင်းဖြစ်ပြီး၊ ပြီးခဲ့ သည့် မေလက စစ်ကော်မရှင်တပ်မှ မြေတူးစက် (ဘက်ဟိုး) ဖြင့် ဖြိုချဖျက်ဆီးခဲ့ ဖူးသည်ဟု ရွာသားများက ပြောသည်။ ဒေသခံများ စုပေါင်း၍ ပြန်လည်ဆောက်လုပ်ထားသည့် သစ်သားတံတားကို ယခုတစ်ကြိမ် ထပ်မံလာရောက် မီးရှို့ဖျက်ဆီးသွားခြင်း ဖြစ်သည်။ ထားဝယ်နှင့် သရက်ချောင်းမြို့နယ်တို့အတွင်း စစ်ကော်မရှင်တပ်မှ တံတားဖျက်ဆီးမှုများ ဆက်တိုက် ပြုလုပ် နေကြောင်း တွေ့ရဟု ဒေသခံများက ပြောသည်။ ဒေသခံ အမျိုးသားတစ်ဦးက “ဒီလို တံတားတွေကို ဆက်တိုက် ဖျက်ဆီးနေတာက ရှင်းပါတယ်။ တော်လှန်ရေး အင်အားစုတွေဖြစ်တဲ့ PDF တို့၊ ဒေသခံတပ်ဖွဲ့တွေရဲ့ ရွှေ့ပြောင်းတာနဲ့ ထောက်ပံ့ရေး လမ်းကြောင်းတွေ၊ အထူးသဖြင့် စားနပ်ရိက္ခာ သယ်ယူ ပို့ဆောင်ရေးကိုပါ တမင်သက်သက် ဖြတ်တောက် ပိတ်ဆို့ဖို့ ဗျူဟာကျကျ ရည်ရွယ်လုပ်နေတာမျိုးပေါ့ဗျာနော်” ဟု ပြောသည်။ ဒီဇင်ဘာလ ပထမပတ်အတွင်းမှာပင် ထားဝယ်နှင့် သရက်ချောင်းမြို့နယ်တို့အတွင်းရှိ ကျေးရွာချင်းဆက် တံတား များကို စစ်ကော်မရှင်တပ်မှ ဖျက်ဆီးခဲ့သည့် စုစုပေါင်းအရေအတွက်မှာ ယခုတံတားအပါအဝင် လေးစင်းအထိ ရှိနေပြီဖြစ်ကြောင်း ဒေသခံသတင်းရင်းမြစ်များအရ သိရသည်။ ဒီဇင်ဘာလ ၂ ရက်နေ့ကလည်း ကျေးရွာချင်းဆက် တံတားသုံးစင်းကို ဘက်ဟိုးဖြင့် တူးဖြို ဖျက်ဆီးခဲ့သေးသည် ဟု ရွာသားများက ပြောသည်။ ယခုကဲ့သို့ တံတားများကို ဆက်တိုက်ဖျက်ဆီးခြင်းသည် စစ်ကော်မရှင်တပ်၏ နယ်မြေထိန်းချုပ်မှု တိုးမြှင့်ရန်နှင့် တော်လှန်ရေး အင်အားစုများ၏ ထောက်ပံ့ရေးလမ်းကြောင်းများကို ဖြတ်တောက်ရန် ရည်ရွယ်ချက်များကြောင့် ဖြစ်ကြောင်း ဒေသခံစစ်ရေးလေ့လာသူများက သုံးသပ်ကြသည်။

တနင်္သာရီတိုင်းအတွင်း တံတားငယ် တစ်စင်းကို စစ်ကော်မရှင် ဖျက်ဆီး

Dec 8

ပကဖ အမည်ခံ လိမ်လည်သူ ဖမ်းဆီးထားစဉ် ထွက်ပြေးသဖြင့် ပစ်ခတ်ရာမှ သေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၈ ရက်။ နယ်မြေခံ ပြည်သူ့ကာကွယ်ရေးအဖွဲ့ (ပကဖ) အမည်ခံ လိမ်လည် အလှူခံသူတစ်ဦး ကို ဖမ်းဆီးထားစဉ် ထွက်ပြေးသောကြောင့် ပစ်ခတ်ဖမ်းဆီးရာ သေဆုံးသွားသည်ဟု နီးစပ်သူများက ပြောသည်။ တနင်္သာရီတိုင်း၊ မြိတ်ခရိုင်၊ ကျွန်းစုမြို့နယ် နယ်မြေခံ ပြည်သူ့ကာကွယ်ရေးအဖွဲ့ (ပကဖ) အမည်ကို အလွဲသုံး စားပြုကာ ကျပ်သိန်းပေါင်းများစွာ လိမ်လည်အလှူခံပြီး ခြိမ်းခြောက်ငွေတောင်းခံနေသူ အဖွဲ့ဝင်ငါးဦးထဲမှ တစ်ဦးကို ပစ်ခတ်ဖမ်းဆီးရမိခဲ့ကြောင်း ကျွန်းစုမြို့နယ် ပကဖ အဖွဲ့တာဝန်ရှိသူတစ်ဦးက ပြောသည်။ “ကျနော်တို့ ကျွန်းစုမြို့နယ် နယ်မြေခံ ပကဖ အဖွဲ့နာမည်ကို အလွဲသုံးစားလုပ်ပြီး ကျပ်သိန်းပေါင်းများစွာ လိမ်လည် အလှူခံ ခြိမ်းခြောက်ငွေတောင်းနေတဲ့ အဖွဲ့ဝင်ငါးဦးထဲက တစ်ဦးကို ပစ်ခတ်ဖမ်းဆီးရမိခဲ့ပါတယ်။” ၎င်းအား မိုင်းတွေးကျေးရွာနေ ဒေသခံတစ်ဦးထံမှ ကျွန်းစု-ပကဖ တာဝန်ခံနာမည်ကို သုံးပြီး ကျပ် ၂၇ သိန်း အား တောင်းယူခဲ့သည့် သတင်းရရှိ၍ ဖမ်းဆီးခဲ့ခြင်းဖြစ်သည်။ နိုဝင်ဘာလ ၃၀ ရက်နေ့ ညပိုင်းတွင် ဖမ်းဆီးရမိသူသည် ပန်းဇင်ကျေးရွာရှိ ပြည်ခိုင်ဖြိုးပါတီဝင် ပျူစောထီး ခေါင်းဆောင် ဦးတင်စိုးဆိုသူ၏ ညီတစ်ဝမ်းကွဲတော်စပ်သူ ဦးကျော်ဝင်းဆိုသူ ဖြစ်သည်ဟု ကျွန်းစုမြို့နယ် ပကဖ အဖွဲ့တာဝန်ရှိသူတစ်ဦးက ပြောသည်။ ပကဖ တပ်ဖွဲ့ဝင်တစ်ဦး၏ ပြောပြချက်အရ ဒီဇင်ဘာ ၁ ရက်နေ့ မွန်းလွဲပိုင်းတွင် ဦးကျော်ဝင်းသည် ဖမ်းဆီး စစ်ဆေးနေစဉ်အတွင်း လက်ထိပ်ချွတ်၍ ထွက်ပြေးခဲ့ရာ ရှော်တောမော်ကျေးရွာ အနီး၌ လိုက်လံဖမ်းဆီးရာမှ ပြန်လည်ခုခံမှုများ ရှိ၍ အသေပစ်ခတ်ဖမ်းဆီးခဲ့ရသည်ဟု ဆိုသည်။ ဖမ်းဆီးရမိသူ ဦးကျော်ဝင်းအား စစ်ဆေးရာတွင် လွန်ခဲ့သည့် နှစ်နှစ်ခန့်ကတည်းက PDF/ပကဖ အမည်ခံပြီး ၎င်းအပါအဝင် စုစုပေါင်း ငါးဦးဖြင့် စုဖွဲ့ထားကြောင်း ထွက်ဆိုခဲ့သည်ဟု ကျွန်းစု-ပကဖ တာဝန်ရှိသူက ပြောသည်။ “ဖမ်းဆီးစစ်ဆေးတဲ့ အခါမှာ လွန်‌ခဲ့တဲ့၂ နှစ်လောက် ကတည်းက PDF၊ ပကဖ အမည်ခံပြီး စုစုပေါင်း ၅ ဦးနဲ့ စုဖွဲ့ထားတာ၊ ပန်းဇင်ကျေးရွာ အုပ်ချုပ်ရေးမှူး ဝင်းလတ်ထံက ၂၅ သိန်း၊ မိုင်းတွေး ကျေးရွာမှ ၂၇ သိန်း ဖုန်းဆက်တောင်းတယ်၊ တခြားအုပ်ကြီးတွေကိုလည်း ခြိမ်းခြောက်တောင်းတာတွေ ရှိသေးတယ်” ဟု ပကဖ တာဝန်ရှိသူတစ်ဦးက ပြောသည်။ ၎င်းအဖွဲ့သည် ကဘင်ကျေးရွာအုပ်စုရှိ ဘဒ္ဒနဲကျေးရွာအုပ်စု၊ သဲဖြူကျွန်းတွင်လည်း ခြိမ်းခြောက်ငွေတောင်းခံ သဖြင့် ရွာသားများက Wave Pay ဖြင့် ကျပ် ၄၀ သိန်းကျော် ပေးဆောင်ခဲ့ရသေးကြောင်း ပေါ်ပေါက်ခဲ့သည်။ ထို့အပြင် မိုင်းတွေးကျေးရွာ ကျောင်းထိုင်ဆရာတော်ထံမှ ပင်လျှင် ကျပ်သိန်း ၃၀၀ ကို ခြိမ်းခြောက်တောင်းယူခဲ့ သေးကြောင်း စစ်ဆေးတွေ့ရှိခဲ့သည်ဟု ဆိုသည်။ သဲဖြူကျွန်းကျေးရွာမှ ခြိမ်းခြောက်ငွေတောင်းခံမှု အပြီးတွင် ကျွန်းစု-ပကဖ အဖွဲ့မှ သတင်းရရှိခဲ့ပြီး၊ နောက်ထပ် ကျေးရွာများတွင် ထပ်မံခြိမ်းခြောက်ခြင်းမခံရအောင် အချိန်မီ တားဆီးနိုင်ခဲ့ကြောင်း ဆိုသည်။ လိမ်လည်သူများက တနင်္သာရီမြို့နယ်-ပကဖ တာဝန်ခံ ဖိုးတက်တိုး ၏ နာမည်ကိုပင် အလွဲသုံးစားပြုပြီး 'ဖိုးဆေးတံ' ဟု အမည်ပြောင်ဖြင့် လိမ်လည်ခြိမ်းခြောက်ခဲ့သေးကြောင်းလည်း ပကဖ အဖွဲ့မှ စစ်ဆေးတွေ့ရှိခဲ့ သည်။ လက်ရှိတွင် ကျွန်းစုမြို့နယ် ပြည်သူ့ကာကွယ်ရေးအဖွဲ့သည် ဦးကျော်ဝင်းနှင့်အတူ လိမ်လည်မှုများတွင် ပါဝင် ပတ်သက်ခဲ့သည့် ကျန်လေးဦး၏ အမည်နှင့် နေရပ်လိပ်စာများကိုပါ သိရှိထားပြီးဖြစ်ကြောင်း အတည်ပြုပြောဆို သည်။

ပကဖ အမည်ခံ လိမ်လည်သူ ဖမ်းဆီးထားစဉ် ထွက်ပြေးသဖြင့် ပစ်ခတ်ရာမှ သေဆုံး

Dec 8

ကမ္ဘောဒီးယားနယ်စပ်တွင် ထိုင်းက လေကြောင်းတိုက်ခိုက်မှုများ ပြုလုပ် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၈ ရက်။ ယနေ့နံနက်ပိုင်းတွင် ထိုင်းစစ်တပ်က ထိုင်း-ကမ္ဘောဒီးယားနယ်စပ်တစ်လျှောက် နေရာအများအပြားကို လေကြောင်းတိုက်ခိုက်မှုများ ပြုလုပ်ခဲ့ကြောင်း ထုတ်ပြန်ခဲ့သည်။ ဤတိုက်ခိုက်မှုများသည် နယ်စပ်တင်းမာမှုများ မြင့်တက်လာပြီးနောက် ဖြစ်ပေါ်လာခြင်းဖြစ်သည်။ လေကြောင်းတိုက်ခိုက်မှု မပြုလုပ်မီ တစ်ရက်အလိုက Ubon Ratchathani (ဥဘွန် ရပ်ချ်ထာနီ) ခရိုင်တွင် နှစ်နိုင်ငံတပ်ဖွဲ့များအကြား ပစ်ခတ်မှုများ ဖြစ်ပွားခဲ့သည်။ ထိုင်းစစ်တပ်၏ ပြောကြားချက်အရ ကမ္ဘောဒီးယားဘက်မှ ထိုင်းစစ်စခန်းတစ်ခုကို လက်နက်ကြီးဖြင့် ပစ်ခတ်ခဲ့ရာ ထိုင်းစစ်သားတစ်ဦး သေဆုံးပြီး လေးဦး ဒဏ်ရာရရှိခဲ့သည်။ ကမ္ဘောဒီးယားဘက်ကမူ ထိုင်းနိုင်ငံသည် နံနက်စောစောပိုင်းတွင် ၎င်းတို့၏ နေရာနှစ်ခုကို လေကြောင်းမှ တိုက်ခိုက်ခဲ့ကြောင်း ပြောဆိုသော်လည်း၊ ယင်းလေကြောင်းတိုက်ခိုက်မှုများကြောင့် ဖြစ်ပေါ်လာသော အသေးစိတ်ထိခိုက်မှု အချက်အလက်များကို နှစ်ဖက်စလုံးက ထုတ်ပြန်ခြင်း မရှိသေးပေ။ နှစ်နိုင်ငံအကြား နယ်စပ်အငြင်းပွားမှုများသည် ဇူလိုင်လက ငါးရက်ကြာ တိုက်ပွဲကြီး ဖြစ်ပွားခဲ့ပြီးနောက် အာဆီယံထိပ်သီးညီလာခံအတွင်း ငြိမ်းချမ်းရေးသဘောတူညီချက်တစ်ရပ်ကို လက်မှတ်ရေးထိုးနိုင်ခဲ့သည်။ သို့သော် ထိုသဘောတူညီချက်ကို ချိုးဖောက်သည်ဟု အပြန်အလှန် စွပ်စွဲမှုများ ရှိခဲ့ပြီးနောက် ယခုကဲ့သို့ လေကြောင်းတိုက်ခိုက်မှု အဆင့်အထိ တင်းမာမှုများ မြင့်တက်လာခဲ့ခြင်း ဖြစ်သည်။

ကမ္ဘောဒီးယားနယ်စပ်တွင် ထိုင်းက လေကြောင်းတိုက်ခိုက်မှုများ ပြုလုပ်

Dec 5

တောင်အာဖရိက ပင်ဂွင်းများ အစုလိုက်အပြုံလိုက် သေဆုံးနေ သတင်းနှင့် မီဒီယာကွန်ရက်။ ၂၀၂၅ ခုနှစ်၊ ဒီဇင်ဘာလ ၅ ရက်။ တောင်အာဖရိက ကမ်းရိုးတန်းမှ စိုးရိမ်ဖွယ်ရာ သတင်းတစ်ရပ်မှာ မျိုးတုံးလုနီးပါး အခြေအနေသို့ ရောက်ရှိနေပြီဖြစ်သည့် အာဖရိကန် ပင်ဂွင်းငှက်များသည် အစားအစာပြတ်လပ်မှု ကြောင့် အစုလိုက်အပြုံလိုက် အစာငတ်မွတ်၍ သေဆုံးခဲ့ရကြောင်း လေ့လာမှုအသစ်တစ်ခုက ဖော်ပြသည်။ ယင်းသို့ သေဆုံးရခြင်း၏ အဓိက အကြောင်းရင်းမှာ ပင်ဂွင်းတို့ အဓိက စားသုံးသော ငါးသေတ္တာငါး (ဆာဒင်းငါး) အရေအတွက် သိသိသာသာ လျော့နည်းသွားခြင်းကြောင့် ဖြစ်သည်။ ၂၀၀၄ ခုနှစ်မှ ၂၀၁၁ ခုနှစ်အတွင်း အရေးပါသော မျိုးပွားစခန်းများဖြစ်သည့် ဒါ့ဆန်ကျွန်း (Dassen Island) နှင့် ရော့ဘန်ကျွန်း (Robben Island) တို့တွင် ပင်ဂွင်းငှက် ၆၂,၀၀၀ ခန့် သေဆုံးခဲ့သည်။ ထို ၈ နှစ်တာကာလအတွင်း ဆာဒင်းငါး အရေအတွက်သည် ယခင် အများဆုံးရှိခဲ့သည့် ပမာဏ၏ လေးပုံတစ်ပုံအောက် သို့ အမြဲလိုလို ကျဆင်းနေခဲ့သည်ကို တွေ့ရသည်။ ဤအခြေအနေများကြောင့် အာဖရိကန် ပင်ဂွင်းငှက်တို့၏ အနာဂတ်မှာ စိုးရိမ်ဖွယ်ဖြစ်လာသည်။ IUCN (အပြည်ပြည်ဆိုင်ရာ သဘာဝထိန်းသိမ်းရေးသမဂ္ဂ) သည် ၂၀၂၄ ခုနှစ်တွင် ၎င်းတို့ကို "အလွန်အန္တရာယ်ရှိသော မျိုးတုံးရန်အလားအလာရှိသည့်" မျိုးစိတ်အဖြစ် သတ်မှတ်ခဲ့သည်။ ထိန်းသိမ်းရေး ပညာရှင်များ၏ သတိပေးချက်အရ လက်ရှိနှုန်းအတိုင်းသာဆိုလျှင် ၂၀၃၅ ခုနှစ် တွင် အာဖရိကန် ပင်ဂွင်းများသည် သဘာဝတောရိုင်းထဲမှ လုံးဝ မျိုးတုံးပျောက်ကွယ်သွားနိုင်ခြေရှိသည်။

တောင်အာဖရိက ပင်ဂွင်းများ အစုလိုက်အပြုံလိုက် သေဆုံးနေ

Dec 5

ဩစတေးလျက လူမှုမီဒီယာ အကောင့်ဖွင့်နိုင်သည့် အနိမ့်ဆုံးအသက် သတ်မှတ် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၅ ရက်။ ဩစတေးလျ အစိုးရသည် အွန်လိုင်း ဘေးကင်းလုံခြုံရေး ဥပဒေ ပြင်ဆင်ချက် ကို ထုတ်ပြန်လိုက်ရာ လူမှုမီဒီယာများတွင် အကောင့်ဖွင့်နိုင်မည့် အနိမ့်ဆုံး အသက်ကို သတ်မှတ်လိုက်သည်။ ယင်းဥပဒေအရ အသက် ၁၆ နှစ်အောက် ကလေးများ သည် သတ်မှတ်ထားသော လူမှုမီဒီယာ ပလက်ဖောင်းများတွင် အကောင့်ဖွင့်ခြင်းကို တားမြစ်လိုက်ခြင်း ဖြစ်သည်။ ဒီဇင်ဘာလ ၁၀ ရက်နေ့တွင် စတင်အသက်ဝင်မည့် ဤဥပဒေဖြင့် အကောင့်ဖွင့်ခွင့် ပိတ်ပင်လိုက်သည့် လူမှုမီဒီယာများမှာ YouTube, X, Facebook, Instagram, TikTok, Snapchat, Reddit, Twitch, Threads, နှင့် Kick တို့ ပါဝင်သည်။ ဩစတေးလျ အစိုးရက ၎င်းတို့၏ ကလေးသူငယ်များနှင့် ဆယ်ကျော်သက်များ၏ စိတ်ပိုင်းဆိုင်ရာ ကျန်းမာရေးနှင့် ကြံ့ခိုင်သန်စွမ်းရေး အတွက် ယခုလို တားမြစ်လိုက်ခြင်းဖြစ်ကြောင်း ရှင်းပြထားသည်။ အကယ်၍ အဆိုပါ ပလက်ဖောင်းများသည် အသက် ၁၆ နှစ်အောက် ကလေးများ၏ အကောင့်များကို ရပ်ဆိုင်းရန်အတွက် ကျိုးကြောင်းဆီလျော်သော လုပ်ဆောင်မှုများ မပြုလုပ်ခဲ့ပါက ဩစတေးလျဒေါ်လာ သန်း ၅၀ အထိ ဒဏ်ရိုက်ခံရနိုင်သည်။ ဥပဒေအရ ချိုးဖောက်မှုများအတွက် ကလေးများ သို့မဟုတ် ၎င်းတို့၏ မိဘများကို အရေးယူမည်မဟုတ်ဘဲ အကောင့်ဖွင့်ခွင့်ပြုသော လူမှုကွန်ရက် ကုမ္ပဏီများကိုသာ ဒဏ်ရိုက်မည်ဖြစ်သည်။ ထို့ပြင် မိဘများအနေဖြင့်လည်း အသက် ၁၆ နှစ်အောက် ကလေးများကို အကောင့်ဖွင့်ရန် သဘောတူညီချက် ပေးခွင့်မရှိကြောင်း ဖော်ပြထားသည်။ တားမြစ်မှုတွင် ကလေးများအတွက် သီးသန့်ပြုလုပ်ထားသော Messenger Kids, Whatsapp, Kids Helpline, Google Classroom နှင့် YouTube Kids တို့ကဲ့သို့သော လိုင်းများ ပါဝင်မည်မဟုတ်ပါ။ လက်ရှိတွင် Facebook နှင့် TikTok ကဲ့သို့သော နာမည်ကြီး လူမှုပလက်ဖောင်းများသည် ကလေးများ၏ အကောင့်များကို ပိတ်သိမ်းရန် လုပ်ဆောင်နေပြီဟု သတင်းများက ဆိုသည်။

ဩစတေးလျက လူမှုမီဒီယာ အကောင့်ဖွင့်နိုင်သည့် အနိမ့်ဆုံးအသက် သတ်မှတ်

Dec 5

အမေရိကန်အောက်လွှတ်တော်တွင် ကျားဖြန့် (ငွေလိမ်) ဂိုဏ်းများ နှိမ်နင်းရေး ဥပဒေကြမ်းအတည်ပြု သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၅ ရက်။ အမေရိကန်ပြည်ထောင်စု အောက်လွှတ်တော် နိုင်ငံခြားရေး ကော်မတီသည် ငွေလိမ်ဂိုဏ်းများ၊ ခေါ်ဆိုလေ့ရှိသည့် "ကျားဖြန့်" လုပ်ငန်းများကို နှိမ်နင်းရေးအတွက် ဥပဒေတစ်ရပ်ကို မနေ့က အတည်ပြုလိုက်သည်။ အဆိုပါ ဥပဒေကြမ်းတွင် ငွေလိမ်လုပ်ငန်းများ ကြီးထွားလာခြင်းနှင့် ပတ်သက်၍ မြန်မာစစ်အုပ်စု၌ တာဝန်ရှိသည်ဟု ဖော်ပြထားသည်။ အထူးသဖြင့်၊ မြန်မာစစ်အုပ်စုသည် ငွေလိမ်ဂိုဏ်းများကို လုပ်ငန်းလည်ပတ်ခွင့် ပေးခြင်း၊ လစ်လျူရှုခြင်းနှင့် ၎င်းတို့ထံမှ အကျိုးအမြတ် ရယူနေခြင်းတို့ကြောင့် တာဝန်ရှိကြောင်း ဥပဒေဖော်ပြချက်တွင် ထည့်သွင်းထားသည်။ ဤဥပဒေ၏ အဓိက ရည်ရွယ်ချက်မှာ ငွေလိမ်လုပ်ငန်းများ ပပျောက်သွားစေရန်အတွက် အမေရိကန် အစိုးရဌာနများ ပူးပေါင်းပါဝင်သည့် "လုပ်ငန်းအကောင်အထည်ဖော်ရေး အထူးအဖွဲ့ (Task Force)" ဖွဲ့စည်းရန် ခွင့်ပြုချက်ပေးရန် ဖြစ်သည်။ ဤဥပဒေကြမ်းကို အောက်လွှတ်တော်တွင် ကန့်ကွက်သူမရှိ အတည်ပြုခဲ့ပြီးဖြစ်ရာ အထက်လွှတ်တော်၏ အတည်ပြုချက်နှင့် သမ္မတ၏ လက်မှတ်ရေးထိုးမှု ရရှိပါက အသက်ဝင်လာမည်ဖြစ်သည်။ ယင်းဥပဒေတွင် ပစ်မှတ်ထား တိုက်ဖျက်မည့် နိုင်ငံသုံးနိုင်ငံအဖြစ် မြန်မာ၊ ကမ္ဘောဒီးယားနှင့် လာအို နိုင်ငံများကို ဖော်ပြထားသည်။

အမေရိကန်အောက်လွှတ်တော်တွင် ကျားဖြန့် (ငွေလိမ်) ဂိုဏ်းများ နှိမ်နင်းရေး ဥပဒေကြမ်းအတည်ပြု

Dec 4

မိုင်းအန္တရာယ် ဆိုင်းဘုတ်တွေက ဘာတွေလဲ၊ တွေ့ရင် ဘာလုပ်မလဲ သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၄ ရက်။ အရင် အပတ်တွေမှာ မြေမြုပ်မိုင်းနဲ့ စစ်လက်ကျန် ပစ္စည်းတွေနဲ့ ပတ်သက်လို့ ဘယ်လို လမ်းကြောင်းတွေ ရွေးသင့်တယ်၊ မသင်္ကာစရာ တစ်ခုခု တွေ့တယ်ဆိုရင် ဘာတွေ လုပ်ရမယ်၊ မလုပ်ရဘူး စတာတွေ ပြောခဲ့ပါတယ်။ ဒီတပါတ်တော့ မိုင်းအန္တရာယ် သတိပေးဆိုင်းဘုတ်တွေ အကြောင်း ပြောပြပါတယ်။ အခု နှစ်ထဲမှာ ရှမ်းပြည်မြောက်ပိုင်းမှာတော့ သိသိသာသာ တိုက်ပွဲတွေ လျော့နည်းသွားခဲ့ပါတယ်။ အိမ်နီးချင်း နိုင်ငံရဲ့ ဝင်ရောက် ညှိုနှိုင်းမှုနဲ့ လားရှိုးကို ကိုးကန့်တပ်တွေက စစ်ကော်မရှင်ကို ပြန်လွှဲပေးခဲ့ သလို တအာင်းတပ်တွေကလည်း မိုးကုတ်နဲ့ မိုးမိတ်ကို လွှဲပေးဖို့ သဘောတူထားခဲ့ပါတယ်။ ဒီလို အခြေအနေမှာ ရှမ်းမြောက်မှာ တိုက်ပွဲတွေက အရင်နှစ်တွေ လတွေကထက် လျော့နည်းသွားခဲ့ ပါတယ်။ တိုက်ပွဲတွေ လျော့နည်းသွားပေမယ့်လည်း မြေမြှုပ်မိုင်းနဲ့ စစ်လက်ကျန် ပစ္စည်းတွေရဲ့ ဘေးအန္တရာယ် တွေကတော့ ရှိနေဆဲပါပဲ၊ ဒီလပိုင်းတွေ ထဲမှာလည်း မြေမြှုပ်မိုင်းကြောင့် ထိခိုက် ဒဏ်ရာရတဲ့ သတင်းတွေ ဆက်ပြီး တွေ့ နေရပါတယ်။ စက်တင်ဘာလ ၂၀ ရက်နေ့က နောင်ချိုမြို့နယ် အုမ္မတီးရွာက ဒေသခံ အရပ်သား တစ်ယောက်ဟာ မြေမြှုပ်မိုင်း နင်းမိတဲ့အတွက် ခြေထောက်တဖက် ပြတ်ထွက်သွားခဲ့ရပါတယ်။ သူက တော့ အသက် ၇၉ နှစ် အရွယ် စိုင်းထွန်းလှ ဖြစ်ပါတယ်။ နောင်ချိုမှာ တိုက်ပွဲတွေ ပြီးသွားတဲ့ အချိန်မှာ စစ်ဘေးရှောင်ရာကနေ ပြန်လာပြီး သူ့ရဲ့ ခြံဝန်းအတွင်းမှာ ပဲ သန့်ရှင်းရေး လုပ်နေတုန်း မြေမြှုပ်မိုင်း နင်းမိတာ ဖြစ်ပါတယ်။ တိုက်ပွဲတွေ ဆဲသွားခဲ့တယ် ရပ်သွားခဲ့ရတယ် ဆိုပေမယ့် မြေမြှုပ်မိုင်း အန္တရာယ်နဲ့ စစ်လက်ကျန် ပစ္စည်း အန္တရာယ် တွေက ရှင်းသွားခဲ့တာ မဟုတ်ပါဘူး။ အောက်တိုဘာ ၁၇ ရက်နေ့ကတော့ နောင်ချိုမြို့နယ် မန်ကျည်းပင်ရွာက အသက် ၆၃ နှစ်အရွယ် ဦးစံမောင်ဟာ တောစပ်ကို အပေါ့အပါး သွားရင်းနဲ့ မြေမြှုပ်မိုင်းနင်းမိခဲ့ပါတယ်။ မြေမြှုပ်မိုင်း ပေါက်ကွဲမှုကြောင့် ညာခြေထောက်ဟာ ပေါင်ရင်းကနေ ပြတ်သွားခဲ့ပါတယ်။ သူတို့ မိသားစုဟာ နောင်ချိုက တအာင်းတပ်ဖွဲ့တွေ ဆုတ်ခွာသွားတဲ့ အချိန်မှာ နေရပ်မှာ ပြန်နေကြတာ ဖြစ်ပါတယ်။ ရွာပြန်ရောက်တာ တစ်လတောင် မပြည့်ခင်မှာပဲ မိုင်းနင်းမိခဲ့တာ ဖြစ်ပါတယ်။ လက်နက်ကိုင် တပ်ဖွဲ့ ဝင်ရောက်သွားတဲ့ နေရာတွေမှာ အများဆုံး မိုင်းထောင်သွားတာတွေ၊ ပေါက်ကွဲစေ တတ်တဲ့ ပစ္စည်းတွေ ကျန်နေခဲ့တာတွေက ရှိနေနိုင်ပါတယ်။ အခု ဆိုရင်တော့ မြို့တွေ ရွာတွေကို စစ်ဖြစ်နေတဲ့ ဘက်တွေက တပြန်တလှည့်စီ ထိန်းချုပ်တာတွေ လည်း ရှိတော့ အန္တရာယ်က ဆက်ရှိနေတာ ဖြစ်ပါတယ်။ တစ်ခါတစ်ရံ လက်နက်ကိုင် အဖွဲ့တစ်ဖွဲ့က ထိန်းချုပ်ခဲ့ပြီး ထွက်ခွာသွားတဲ့ အခါ တခြား လက်နက်ကိုင် အဖွဲ့တွေ ဝင်ရောက် ထိန်းချုပ်တာမျိုးလည်း ရှိတတ်ပါတယ်။ ဒီလို အခါမျိုးမှာ ရောက်လာတဲ့ လက်နက်ကိုင် အဖွဲ့တွေက မိုင်းရှင်းတာတွေ အပြင် ‌ဒေသခံတွေ အလွယ်တကူ နားလည်နိုင်တဲ့ မိုင်းသတိပေး ဆိုင်းဘုတ်တွေ၊ မြေမြှုပ်မိုင်း ရှိနေနိုင်တဲ့ နေရာတွေ၊ မိုင်းမရှင်းရသေးတဲ့ နေရာတွေ မှာ သတိပေး ဆောင်ပုဒ်တွေ လုပ်ဆောင်ပေးလေ့ ရှိကြပါတယ်။ ဒီဆိုင်းဘုတ်တွေဟာ လူတွေကို အသက်ကယ်တဲ့ သတိပေးချက်တွေလည်း ဖြစ်ပါတယ်။ မြေမြှုပ်မိုင်း ဆိုင်းဘုတ်တွေကို စိုက်ထူရတဲ့ ရည်ရွယ်ချက်က သုံးမျိုးလောက် ရှိပါတယ်။ ပထမ ရည်ရွယ်ချက်ကတော့ မိုင်းအန္တရာယ်ရှိတဲ့ ဧရိယာကို နယ်နမိတ် သတ်မှတ်ပေးတာ ဖြစ်ပါတယ်။ ဘယ်နေရာကနေ ဘယ်နေရာအထိ မိုင်းရှိနိုင်တယ် ဆိုပြီး မိုင်းရှိနိုင်တဲ့ ဧရိယာကို ဖော်ပြတဲ့ ဆိုင်းဘုတ် တွေ ဖြစ်ပါတယ်။ ဒုတိယ ရည်ရွယ်ချက်က‌တော့ အနီးအနားမှာရှိတဲ့ လူတွေကို အန္တရာယ်ကနေ ကြိုတင်ရှောင်ရှားနိုင်ဖို့ သတိပေး တာ ဖြစ်ပါတယ်။ တတိယ ရည်ရွယ်ချက်ကတော့ လူ နှင့် တရိဆ္တန် တွေ အန္တရာယ်ရှိတဲ့ နေရာ မသွားခြင်းအားဖြင့် သူတို့ရဲ့ အသက် ဆုံးရှုံးမှုနဲ့ ထိခိုက်ဒဏ်ရာရမှုတွေကို လျော့ချပေးဖို့ ဖြစ်ပါတယ်။ အဲဒီတော့ မြေမြှုပ်မိုင်း သတိပေး ဆိုင်းဘုတ်တွေက ဘယ်လိုပုံစံမျိုးလဲ၊ ဘာပုံတွေ ပါသလဲ၊ ဘာအရောင်တွေ ပါသလဲ ဆိုတာကို ဆက်ပြောပြပါတယ်။ နိုင်ငံတကာ စံနှုန်းတွေနဲ့ ဒေသအလိုက် အခြေအနေပေါ်မူတည်ပြီး သတိပေး ဆိုင်းပုဒ်တွေကို ပုံစံ အမျိုးမျိုးနဲ့ တွေ့နိုင်ပါတယ်။ ဒီထဲမှာ အတွေ့ ရများဆုံးက ပထမ ပုံစံကတော့ အနီရောင်နဲ့ အဖြူရောင် လက္ခဏာပါတဲ့ သတိပေး အမှတ်အသားတွေ ဖြစ်ပါတယ်။ တြိဂံပုံ ဒါမှမဟုတ် လေးထောင့်ပုံ ဖြစ်ပြီး အနီရောင် နောက်ခံပေါ်မှာ အဖြူရောင်နဲ့ ရေးဆွဲထားလေ့ ရှိပါတယ်။ အဲဒီ မှာ ပါဝင်တဲ့ သင်္ကေတကတော့ ဦးခေါင်းခွံ နဲ့ အရိုး၊ ဒါမှမဟုတ် ပေါက်ကွဲမှု ဖြစ်နေတဲ့ သင်္ကေတ တွေ ပါလေ့ရှိပါတယ်။ ပြီးရင်တောာ့ ဒေသခံတွေ နားလည်နိုင်တဲ့ စကားနဲ့ “မိုင်းအန္တရာယ်ရှိသည်”။ “မဝင်ရ” ဒါမှမဟုတ် “သေတတ်သည်” စတဲ့ စာသားတွေ ရေးသား ထားနိုင်ပါတယ်။ နောက်တမျိုးကတော့ ကျောက်တိုင်တွေ တိုင်တွေ စိုက်ထူထားတာပါ။ တိုင်တွေမှာ အနီရောင်သုတ်ထားတဲ့ ဒါမှမဟုတ် မိုင်းသတိပေး တံဆိပ် ကပ်ထားတဲ့ တိုင်တွေ ဒါမှမဟုတ် သစ်သားတိုင်တွေကို မိုင်းအန္တရာယ်ရှိတဲ့ ဧရိယာ တဝိုက်မှာ စိုက်ထူထားတတ်ပါတယ်။ နောက်တမျိုးကတော့ ကြိုးတွေ တိတ်တွေ တပ်ဆင်ထားတာပါ။ အန္တရာယ်ရှိတဲ့ ဧရိယာကို ရှင်းရှင်း လင်းလင်း ဝိုင်းရံထားဖို့အတွက် အနီရောင် ဒါမှမဟုတ် အဝါရောင် တိတ် ဒါမှမဟုတ် ကြိုးတွေကို အသုံးပြုထားနိုင်ပါတယ်။ ဒီလိုမျိုး သတိပေးထားတဲ့ အမှတ်အသားတွေ သင်္ကေတတွေ တွေ့ပြီဆိုရင် မိုင်းအန္တရာယ်ရှိတာကို သတိထားဖို့ လိုအပ်ပါတယ်။ ဒီလိုမျိုး အမှတ်အသားတွေ ဆိုင်းဘုတ်တွေ တွေ့ပြီဆိုရင်‌ ဘာလုပ်ကြမလဲ။ ဒီလိုမျိုး အမှတ်အသားတွေ မြေမြှုပ်မိုင်း သတိပေး ဆိုင်းဘုတ်တွေ တွေ့ပြီဆိုရင် ဘယ်မှာပဲ တွေ့တွေ့ အခုပြော မယ့် အချက်တွေကို တင်းတင်းကျပ်ကျပ် လိုက်နာဖို့ လိုပါတယ်။ ချက်ချင်း ရပ်လိုက်ပါ၊ စိတ်ကို အေးအေးထားပါ။ မြေမြှုပ်မိုင်း သတိပေး ဆိုင်းဘုတ် ဒါမှမဟုတ် အမှတ်အသား တွေ့တာနဲ့ ချက်ချင်း ရပ်လိုက်ပြီး စိတ်ကို အေးအေးထားပါ။ ကိုယ်နဲ့အတူပါလာတဲ့ သူတွေကို သတိပေးရပါမယ်၊ နောက်ပြန်ဆုတ်ပါ၊ ကိုယ်လာခဲ့တဲ့ လမ်းအတိုင်း ခြေရာအတိုင်း ဂရုတစိုက် နောက်ပြန်ဆုတ်ရပါမယ်။ အဲဒီပြီးရင်တော့ ဆိုင်းဘုတ်တွေ့တဲ့ အကြောင်း၊ အဲဒီ နေရာမှာ အန္တရာယ်ရှိနေတယ်ဆိုတာ နဲ့ အန္တရာယ် ရှိတဲ့ နေရာကို တခြားသူတွေ မသွားမလာအောင် သတိပေးဖို့ လိုပါတယ်။ မိုင်းအန္တရာယ်ရှိတာကြောင့် သူတို့ဆီကို ကိုယ်သွားတာ ဖြစ်စေ၊ ကိုယ့်ဆီကို သူတို့ကို လာခိုင်းတာ ဖြစ် စေ မလုပ်သင့်ပါဘူး။ နောက်ထပ် ရှောင်ရှားရမယ့် ကိစ္စကတော့ ဘယ်အရာကိုမှ မထိဖို့ပါ၊ ဆိုင်းဘုတ်တွေပဲ ဖြစ်ဖြစ်၊ ကျောက်တိုင်၊ သစ်သားတိုင်၊ ကြိုး ဒါမှမဟုတ် အနီးအနားက မသင်္ကာ စရာ ပစ္စည်း တစ်ခုခုကို လုံးဝ မထိမိအောင် သတိထားဖို့ လိုပါတယ်။ သင့် အနေဖြစ် ဘေးကင်းတဲ့နေရာကို ရောက်ပြီဆိုရင်တော့ ရွာထဲမှာ ရှိတဲ့သူတွေကို ရှင်းရှင်းလင်းလင်း ပြန် လည် မျှဝေပေးခြင်းနဲ့ အတူ ဒေသမှာရှိတဲ့ အာဏာပိုင်တွေ၊ နယ်မြေကို တာဝန်ယူထား တဲ့ လက်နက်ကိုင် အဖွဲ့ ဖြစ်စေ မိုင်းရှင်းလင်းရေး အဖွဲ့ကိုဖြစ်စေ သတင်းပို့ရမှာ ဖြစ်ပါတယ်။ ဆိုင်းဘုတ်တွေ အမှတ်အသားတွေကို မဖြုတ်ပစ်ပါနဲ့။ နေရာမရွှေ့ပါနဲ့။ ဒါဟာ တခြားသူတွေရဲ့ အသက် ကို ကယ်ပေးရာလည်း ရောက်ပါတယ်။ အားလုံး ဘေးကင်းကြပါစေ။

မိုင်းအန္တရာယ် ဆိုင်းဘုတ်တွေက ဘာတွေလဲ၊ တွေ့ရင် ဘာလုပ်မလဲ

Nov 28

တနင်္သာရီတိုင်းတွင် ရေးကောက်ပွဲ ဆန့်ကျင်သူများ တရားစွဲ ခံနေရ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၂၉ ရက်။ တနင်္သာရီတိုင်းတွင် စစ်ကော်မရှင်၏ ရွေးကောက်ပွဲ ဥပဒေဖြင့် ဒေါင်းနက်အဖွဲ့ အပါအဝင် ဆန့်ကျင်သူများ တရားစွဲခံနေရသည်။ စစ်ကော်မရှင်က လာမည့်ရွေးကောက်ပွဲကို နှောင့်ယှက်ဟန့်တားခြင်းမှ ကာကွယ်ရန်ဟုဆိုကာ ပြဋ္ဌာန်းထားသော ရွေးကောက်ပွဲ ကာကွယ်ရေး (ရွေး/ကာ) ဥပဒေဖြင့် တနင်္သာရီတိုင်း ဒေသကြီး၊ မြိတ်ခရိုင်အတွင်းရှိ ဒေါင်းနက် အဖွဲ့ အပါအဝင် စစ်အာဏာရှင်ဆန့်ကျင်ရေး လှုပ်ရှားသူများကို တရားစွဲဆိုမှုများ ပြုလုပ်လျက်ရှိသည်ဟု နီးစပ်သူများက ပြောသည်။ ကျွန်းစုမြို့နယ်၊ ကံမော်နယ်မြေရဲစခန်းတွင် ကိုသိန်းဇော်မင်း (ဒေါင်းနက်) ဦးဆောင်သည့် အဖွဲ့ဝင် ၅၀ ဦးပါ PDF အဖွဲ့ကို ရွေး/ကာ ဥပဒေပုဒ်မ ၂၄ (က) နှင့် ၂၄ (ခ) တို့ဖြင့် အမှုဖွင့်ထားသည်ဟု ရဲစခန်းနှင့်နီးစပ်သူက ပြောသည်။ စစ်ကော်မရှင်၏ စွပ်စွဲချက်အရ အဆိုပါအဖွဲ့သည် နိုဝင်ဘာလ ၁၁ ရက်နေ့က ကျွန်းစုမြို့နယ်အတွင်းရှိ မဲတော၊ အုတ်ဖိုမော်၊ စန္ဒားငယ်၊ ဂျုံးဂျုံးကြ၊ ချောင်းညီကိုနှင့် ချောင်းကြီးဝ စသည့် ကျေးရွာများမှ ရပ်ကျေး အုပ်ချုပ်ရေး မှူးများနှင့် ရွေးကောက်ပွဲ ကော်မရှင်အဖွဲ့ဝင်များထံသို့ ခြိမ်းခြောက်စာများ ပေးပို့ခဲ့သည်ဟု ဆိုသည်။ ဒေါင်းနက်အဖွဲ့သည် ကျွန်းစုမြို့နယ်အတွင်း စစ်ရေးလှုပ်ရှားမှုများ လုပ်ဆောင်နေသည့် အဖွဲ့ဖြစ်ကြောင်း ဒေသခံကာကွယ်ရေးအဖွဲ့ (ပကဖ) တာဝန်ရှိသူတစ်ဦးက အတည်ပြု ပြောသည်။ “ကိုသိန်းဇော်မင်းတို့အဖွဲ့က ကျွန်းစုမြို့နယ်ထဲမှာ စစ်ရေးလှုပ်ရှားမှုတွေ လုပ်နေတဲ့အဖွဲ့ ပါ၊ သူတို့ကို ဒေါင်းနက် အဖွဲ့လို့ လူသိများတယ်၊ ရွာက လူကြီးတွေကို ရွေးကောက်ပွဲနဲ့ ပတ်သက်တဲ့ သတိပေးစာတွေ လိုက်ပေးနေတာ လည်း ဟုတ်ပါတယ်” ဟု ကျွန်းစုမြို့နယ် ပကဖတာဝန်ရှိသူတစ်ဦးက ပြောသည်။ သို့သော် စစ်ကော်မရှင်မှ တရားစွဲဆိုထားသော်လည်း ဒေါင်းနက်အဖွဲ့ကို လွယ်လင့်တကူ ဖမ်းဆီးနိုင်ခြင်း မရှိကြောင်း ၎င်း ပကဖ တာဝန်ရှိသူက ပြောသည်။ တနင်္သာရီတိုင်းအတွင်း ရွေး/ကာ ဥပဒေဖြင့် တရားစွဲဆိုမှုများသည် ကျွန်းစုမြို့နယ်တွင်သာမက အခြားမြို့နယ် များတွင်လည်း ဆက်တိုက် ဖြစ်ပွားလျက်ရှိသည်။ နိုဝင်ဘာလ ၇ ရက်နေ့က စစ်ကော်မရှင်၏ ရွေးကောက်ပွဲကို ဆန့်ကျင်ကြောင်း လမ်းမပေါ်တွင် စာရေးသားကာ ဆန္ဒထုတ်ဖော်ခဲ့သည့် DDMSC ၏ ပြန်ကြားရေးတာဝန်ခံ ကိုကျော်ကျော် ကို ရွေး/ကာ ပုဒ်မ ၂၃ (က)၊ ၂၃ (ခ) တို့ဖြင့် သရက်ချောင်းမြို့မရဲစခန်း၌ အမှုဖွင့်ထားသည်။ အလားတူ နိုဝင်ဘာလ ၁၉ ရက်နေ့တွင် ဘုတ်ခြံကျေးရွာ၌ စိုက်ထူထားသည့် ကြံ့ခိုင်ရေးပါတီ မဲဆွယ်ဆိုင်းဘုတ် ဖျက်ဆီးခံရသည်ဟုဆိုကာ ရှာဖွေနေဆဲဖြစ်သူ တစ်ဦးကို ရွေး/ကာ ပုဒ်မ ၂၄ (က) ဖြင့် ပုလောမြို့မရဲစခန်း၌ အမှုဖွင့်ထားသည်။ စစ်ကော်မရှင်က ပြဋ္ဌာန်းထားသည့် ရွေးကောက်ပွဲ ကာကွယ်ရေး ဥပဒေပုဒ်မများသည် ထောင်ဒဏ် သုံးနှစ်မှ ခုနစ်နှစ်အထိ ကျခံရမည့်အပြင် ငွေဒဏ်ကိုလည်း ချမှတ်နိုင်သော ပြစ်ဒဏ်ပြင်းထန်သည့် ဥပဒေများ ဖြစ်သည်။ စစ်ကော်မရှင်သည် လာမည့် ဒီဇင်ဘာလ ရွေးကောက်ပွဲ မတိုင်မီ တိုင်းရင်းသား လက်နက်ကိုင်အဖွဲ့အစည်းများ၊ ဒေသကာကွယ်ရေးတပ်ဖွဲ့များ အပါအဝင် ရွေးကောက်ပွဲကို ဆန့်ကျင်သူများအား ဤဥပဒေကို အသုံးပြု၍ ဖိနှိပ်ခြိမ်းခြောက်ခြင်းများ ဆက်လုပ်နေသည်ဟု ဒေသတွင်း သတင်းရင်းမြစ်များက သုံးသပ်သည်။

တနင်္သာရီတိုင်းတွင် ရွေးကောက်ပွဲ ဆန့်ကျင်သူများ တရားစွဲ ခံနေရ

Nov 28

မြိတ်နှင့် ထားဝယ်ထောင်မှ နိုင်ကျဉ်း ၁၀ ဦး သာ လွတ်မြောက် သတင်းနှင့် မီဒီယာ ကွန်ရက်။ ၂၀၂၅ ခုနှစ် နိုဝင်ဘာလ ၂၈ ရက်။ မြိတ်နှင့် ထားဝယ်ထောင်မှ နိုင်ငံရေးအကျဉ်းသား ၁၀ ဦးသာ လွတ်မြောက်လာသည်ဟု နိုင်ငံရေးအကျဉ်းသား မိသားစုဝင်များနှင့် နီးစပ်သူများက ပြောသည်။ စစ်ကော်မရှင်၏ နိုဝင်ဘာလ ၂၆ ရက်နေ့၊ ညပိုင်း ထုတ်ပြန်ကြေညာခဲ့သော ပုဒ်မ ၅၀၅-က အမှုများ ရုတ်သိမ်း ခြင်းနှင့် လွတ်ငြိမ်းခွင့်ပေးခြင်း အစီအစဉ်အရ တနင်္သာရီတိုင်း ဒေသကြီး မြိတ်နှင့် ထားဝယ်အကျဉ်းထောင်တို့မှ နိုင်ငံရေးအကျဉ်းသူ/သား စုစုပေါင်း ၁၀ ဦး သည် နိုဝင်ဘာလ ၂၇ ရက်နေ့တွင် လွတ်မြောက်လာခဲ့သည်။ လွတ်မြောက်မည့် သတင်းကို ကြားသိရပြီးနောက် မိမိတို့၏ သားသမီးများကို စောင့်ဆိုင်းခဲ့ကြသော်လည်း လွတ်မြောက်လာသူ နည်းပါးသည်ဟု မြိတ်ထောင်ရှေ့တွင် စောင့်ဆိုင်းနေသည့် အသက် ၅၀ ကျော်အရွယ် နိုင်ငံရေးအကျဉ်းသားတစ်ဦး၏ ဖခင်ဖြစ်သူက ပြောသည်။ “ညက ၅၀၅-က တွေ လွှတ်ပေးမယ်လို့ သတင်းကြားရတော့ မနက်စောစောပိုင်းကတည်းက ထောင်အရှေ့မှာ သွားစောင့်တာ၊ ကိုယ့်သားက မပါလာဘူးဗျာ။ မိန်းကလေး ၄ ယောက်နဲ့ ယောက်ကျားလေး တစ်ယောက်တော့ လွတ်တယ်၊ စောင့်ရကျိုး မနပ်ဘူးဗျာ။” မြိတ်နှင့် ထားဝယ်အကျဉ်းထောင်များ အနီးတွင် မိသားစုဝင်များက မျှော်လင့်တကြီး လာရောက် စောင့်ဆိုင်းခဲ့ ကြသော်လည်း လွတ်မြောက်လာသူ ဦးရေသည် ကြေညာခဲ့သည့် အကျဉ်းသားဦးရေနှင့် နှိုင်းယှဉ်ပါက နည်းပါး နေသောကြောင့် ကျန်ရှိသူများ၏ မိသားစုဝင်များအကြား စိတ်ပျက်နေကြသည်ဟု နီးစပ်သူက ပြောသည်။ ၂၀၂၅ ခုနှစ် အစောပိုင်း စာရင်းများအရ ထားဝယ် အကျဉ်းထောင်တွင် နိုင်ငံရေး အကျဉ်းသား ၄၀၀ ကျော် အပါအဝင် အကျဉ်းသား တစ်ထောင်ကျော်ရှိပြီး မြိတ်အကျဉ်းထောင်တွင် အကျဉ်းသူ/သား စုစုပေါင်း ၂၀၀၀ ကျော်ရှိသည်။ ထိုအထဲမှ ၁၀ ဦးသာ လွတ်လာခြင်း ဖြစ်သည်။ မြိတ်အကျဉ်းထောင်မှ နိုင်ငံရေးအကျဉ်းသား၊ အကျဉ်းသူ ၅ ဦး (အမျိုးသမီး ၄ ဦး၊ အမျိုးသား ၁ ဦး) နှင့် ထားဝယ်အကျဉ်းထောင်မှ ၅ ဦး (အမျိုးသား ၂ ဦး၊ အမျိုးသမီး ၃ ဦး) တို့သည် ပုဒ်မ ၅၀၅ - က ဖြင့် အကျဉ်းချ ခံထားရသူများဖြစ်ပြီး ယခုရုတ်သိမ်းချက်ကြောင့် လွတ်မြောက်ခဲ့ခြင်း ဖြစ်သည်။ လွတ်မြောက်လာသူများမှာ နောက်ထပ် စစ်အာဏာသိမ်းမှုကို ဆန့်ကျင်သည့် လှုပ်ရှားမှုမျိုး ထပ်မံပြုလုပ်ပါက ယခုလက်ကျန် ပြစ်ဒဏ်များကိုပါ ပြန်လည်ကျခံရမည်ဟူသော ခံဝန်ချက်ကို လက်မှတ်ရေးထိုး ခဲ့ရခြင်း ဖြစ်သည်။ ကော့သောင်းအကျဉ်းထောင်တွင်မူ လွတ်မြောက်လာသူ ရှိမရှိကိုမူ စုံစမ်းမေးမြန်း၍ မရသေးဘူးဟု နိုင်ငံရေး အကျဉ်းသား မိသားစုဝင်များနှင့် နီးစပ်သူတစ်ဦးက ပြောသည်။ စစ်ကော်မရှင်သည် နိုဝင်ဘာလ ၂၆ ရက်နေ့ ညပိုင်းတွင် ပုဒ်မ ၅၀၅-က ဖြင့် အကျဉ်းကျခံထားရသူ ၃,၀၈၅ ဦးအား လွှတ်ပေးရန်နှင့် အမှုရင်ဆိုင်နေရသူ ၅,၅၈၀ ဦး၏ အမှုများကို ရုတ်သိမ်းပေးရန် ထုတ်ပြန်ခဲ့သည်။ အဆိုပါ ထုတ်ပြန်ချက်ထဲတွင် မကြာမီ ဒီဇင်ဘာလအတွင်း ကျင်းပမည့် ရွေးကောက်ပွဲတွင် မဲပေးနိုင်ရန်နှင့် ရွေးကောက်ပွဲ အောင်မြင်ရန်တို့အတွက် ယခုကဲ့သို့ လွတ်ပေးခြင်းဖြစ်သည်ဟု ပါရှိသည်။ စစ်ကော်မရှင်၏ ယခုလုပ်ရပ်သည် နိုင်ငံတကာ ဖိအားများကို လျော့ချရန်နှင့် လာမည့်ရွေးကောက်ပွဲ အတွက်သာ ရည်ရွယ်သည့် နိုင်ငံရေးအရ ချိန်ကိုက်ထားသော လှုပ်ရှားမှု အဖြစ် နိုင်ကျဉ်းအရေး တက်ကြွလှုပ်ရှားသူများက သုံးသပ်ကြသည်။  ဓါတ်ပုံ - မြိတ်အကျဥ်းထောင်နှင့် ထားဝယ်အကျဥ်းထောင်တို့မှ လွတ်မြောက်လာသူများပုံ။

မြိတ်နှင့် ထားဝယ်ထောင်မှ နိုင်ကျဉ်း ၁၀ ဦး သာ လွတ်မြောက်

« Prev 1 … 88 89 90 91 92 … 1,047 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

ဒေါ်နယ်ထရန့်ကို ရှီကျင့်ဖျင် ကော်ဇောနီဖြင့် ကြိုဆို
ထိုင်းနိုင်ငံတွင် အရက် သောက်သုံးရောင်းချမှု အပေါ် ထပ်မံတင်းကြပ်
ဖိလစ်ပိုင် လွှတ်တော်အတွင်းမှ ပစ်ခတ်သံများ ကြားရ
မြစ်ဆုံစီမံကိန်း ပြန်လည် စတင်ခြင်းသည် ဒေသခံများ အတွက် အကျိုး မဖြစ်နိုင်
အဆက်မပြတ်မိုးကြောင့် ရှမ်းအရှေ့ ရော်ဘာခြံလုပ်သားများ အခက်တွေ့

Archives

Archives

×Close