NMG Doh – Page 86 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
နိုင်ငံတကာသတင်း
NMG အကြောင်း
Contact

Home
Author Archive

NMG Doh

Author: NMG Doh

Apr 13

ဟော်မုဇ် ရေလက်ကြားကို ပိတ်ဆို့ရန် ဒေါ်နယ် ထရမ့်အမိန့်ပေး သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဧပြီလ ၁၃ ရက်။ အမေရိကန်သမ္မတ ဒေါ်နယ်ထရမ့်က အမေရိကန် ရေတပ်အနေဖြင့် ဟော်မုဇ် ရေလက်ကြား (Strait of Hormuz) ကို ချက်ချင်း စတင်ပိတ်ဆို့သွားမည်ဟု ဖြစ်ကြောင်း ဧပြီလ ၁၂ ရက် တနင်္ဂနွေနေ့တွင် ပြောကြားခဲ့သည်။ ထို့ပြင် အီရန်နိုင်ငံသို့ ဖြတ်သန်းခ ပေးဆောင်သည့် မည်သည့်သင်္ဘောကိုမဆို နိုင်ငံတကာ ရေပိုင်နက်အတွင်း တားဆီးစစ်ဆေးသွားမည်ဟုလည်း ပြောကြားခဲ့ကြောင်း ရိုက်တာ သတင်းဌာနကို ကိုးကား၍ ဘန်ကောက် ပို့စ် သတင်းစာက ဖော်ပြသည်။ အမေရိကန်နှင့် အီရန်တို့အကြား ပြုလုပ်ခဲ့သည့် ငြိမ်းချမ်းရေး ဆွေးနွေးပွဲများ သဘောတူညီမှုမရဘဲ ပြီးဆုံးသွားပြီးနောက် ထရမ့်က ယခုကဲ့သို့ ကြေညာခဲ့ခြင်းဖြစ်သည်။ ဆွေးနွေးပွဲတွင် အချက်အလက်အတော်များများ သဘောတူညီမှု ရခဲ့သော်လည်း အီရန်၏ နျူကလီးယား အစီအစဉ်နှင့် ပတ်သက်၍မူ ပြေလည်မှု မရရှိခဲ့ပေ။ ဟော်မုဇ် ရေလက်ကြားအတွင်း အဝင်/အထွက် ပြုလုပ်မည့် မည်သည့်သင်္ဘောကိုမဆို အမေရိကန် ရေတပ်က ပိတ်ဆို့တားဆီးသွားမည်ဖြစ်သည်။ အီရန်နိုင်ငံက ရေလက်ကြားကို ဖြတ်သန်းသည့် သင်္ဘောများထံမှ ဖြတ်သန်းခ ကောက်ခံနေခြင်းကို ထရမ့်က ပြင်းပြင်းထန်ထန် ကန့်ကွက်ထားသည်။ တရားမဝင် ဖြတ်သန်းခ ပေးဆောင်တဲ့ ဘယ်သူ့ကိုမှ ပင်လယ်ပြင်မှာ ဘေးကင်းစွာ သွားလာခွင့်ပေးမှာ မဟုတ်ဘူးဟု သမ္မတ ထရမ့်က ပြောထားသည်။ ဤကျေညာချက် မတိုင်မီက ဟော်မုဇ် ရေလက်ကြားကို ရေနံတင်သင်္ဘောကြီး သုံးစီး ဖြတ်သန်းသွားခဲ့ပြီး ဖြစ်သည်။ ဆော်ဒီနှင့် ယူအေအီးမှ ရေနံများတင်ဆောင်ထားပြီး မလေးရှားနိုင်ငံ၊ မလက္ကာဆိပ်ကမ်းသို့ ဧပြီ ၂၁ တွင် ဆိုက်ကပ်ရန် မျှော်မှန်းထားသည့် လိုက်ဘေးရီးယားအလံတင်ထားသည့် Serifos သင်္ဘော၊ အီရတ်ရေနံများ တင်ဆောင်ထားပြီး တရုတ်နိုင်ငံ၊ ကျိုးရှန်း (Zhoushan) ဆိပ်ကမ်းသို့ မေလ ၁ ရက်တွင် ရောက်ရှိမည့် တရုတ်အလံတင် Cospearl Lake သင်္ဘောနှင့် ဆော်ဒီရေနံများ တင်ဆောင်ထားသည့် တရုတ်အလံတငါ He Rong Hai သင်္ဘောတို့သည် သမ္မတ ထရမ့်က ဟော်မုဇ် ရေလက်ကြားကို ပိတ်ဆို့ရန် အမိန့်မပေးမီ ဖြတ်သန်းသွားခဲ့ခြင်း ဖြစ်သည်။ #StraitofHormuz #ဟော်မုဇ်ရေလက်ကြား

ဟော်မုဇ် ရေလက်ကြားကို ပိတ်ဆို့ရန် ဒေါ်နယ် ထရမ့်အမိန့်ပေး

Apr 12

အမိန့်တစ်ခု၊ မူတစ်ခု၊ မဟာဗျူဟာ တစ်ခု အောက်တွင် စစ်အောင်နိုင်ရေး အရှိန်မြှင့်မည်ဟု SCEF ပြော သတင်းနှင့် မီဒီယာ ကွန်ရက်။ ၂၀၂၆ ခုနှစ် ၊ဧပြီလ ၁၂ ရက်။ တော်လှန်ရေး အင်အားစုများအကြား ‘တစ်ခုတည်းသောကွပ်ကဲမှု’ (One Command) အောက်တွင် စစ်ရေး ဗျူဟာများကို ပေါင်းစပ်ညှိနှိုင်း၍ စစ်အောင်နိုင်ရေးအတွက် အရှိန်မြှင့်တင် ဆောင်ရွက်သွားမည်ဟု ဖက်ဒရယ် ဒီမိုကရေစီ ပြည်ထောင်စု ပေါ်ထွန်းရေး ဦးဆောင်ကောင်စီ (SCEF) က ပြောသည်။ ဧပြီလ ၁၁ ရက်နေ့ ညပိုင်းက ပြုလုပ်သည့် သတင်းစာရှင်းလင်းပွဲတွင် SCEF တာဝန်ရှိသူများက ကောင်စီ၏ ရှေ့လုပ်ငန်းစဉ်များနှင့် စပ်လျဉ်း၍ ထည့်သွင်းပြောကြားခဲ့ခြင်း ဖြစ်သည်။ အဆိုပါ ဦးဆောင်ကောင်စီကို အင်အားကြီး တိုင်းရင်းသား လက်နက်ကိုင်အဖွဲ့များဖြစ်သည့် KIO၊ KNU၊ CNF နှင့် KNPP တို့ အပါအဝင် ကရင်နီအင်အားစုများ၊ ပြည်ထောင်စု လွှတ်တော်ကိုယ်စားပြု ကော်မတီ (CRPH) နှင့် အမျိုးသား ညီညွတ်ရေး အစိုးရ (NUG) တို့ ပူးပေါင်းဖွဲ့စည်းထားခြင်း ဖြစ်သည်။ စစ်ရေးဗျူဟာများနှင့် ပတ်သက်၍ SCEF အတွင်းရေးမှူးအဖွဲ့ဝင် ဆလိုင်းထက်နီက “စစ်ရေးမဟာဗျူဟာ ပူးပေါင်းညှိနှိုင်းကွပ်ကဲရေး ကော်မတီ ဆိုတဲ့ဟာ ကျနော်တို့ ဖွဲ့ထားတာ ရှိပါတယ်။ အဲ့ဒီကနေမှတစ်ဆင့် ကျနော် တို့ အခုဒေသတွင်းမှာရှိတဲ့ တခြားတိုင်းရင်းသား လက်နက်ကိုင်အဖွဲ့အစည်းတွေ မဟာဗျူဟာ စစ်ရေးအရ ကွဲပြားတဲ့ဟာတွေကို ကျနော်တို့ ချိန်ညှိပြီးတော့မှ One Command, One Policy, One Strategy အောက်မှာ သွားနိုင်ဖို့ စစ်ရေးကို အဲ့ဒီလို လုပ်ထားပါတယ်” ဟု ပြောသည်။ ကရင်အမျိုးသား အစည်းအရုံး (KNU) မှ ပဒိုစောတာဒိုမှူးကလည်း စစ်ရေးပိုင်းတွင် ဒေသအခြေခံ၍ နယ်မြေ ချင်း ချိတ်ဆက်ကာ တာဝန်ခွဲဝေယူသည့် စနစ်ကျသော အမိန့်ပေးကွပ်ကဲမှုဖြင့် စစ်ရေးရည်မှန်းချက်ကို ပိုမို အားဖြည့်သွားမည်ဖြစ်ကြောင်း ဖြည့်စွက်ပြောဆိုသည်။ စစ်ရေးအပြင် နိုင်ငံရေးအရ အသွင်ကူးပြောင်းမှု ကာလအတွက် ပြင်ဆင်မှုများနှင့် ပတ်သက်၍ ကရင်နီ အမျိုးသား တိုးတက်ရေးပါတီ KNPP အတွင်းရေးမှူး ဦးအောင်ဆန်းမြင့်က ယခုကဲ့သို့ ပြောသည်။ “SCEF စုဖွဲ့မှုအနေနဲ့ အဓိကအခန်းကဏ္ဍ ၂ ရပ်ရှိပါတယ်။ စစ်‌အောင်နိုင်ရေးနဲ့ အသွင်ကူးပြောင်းမှုကို ချော ချောမွေ့မွေ့ ကူးပြောင်းနိုင်ရေးအတွက် လက်တွေ့ကျကျနဲ့ စစ်ရေး၊ နိုင်ငံရေးကို အကောင်အထည်ဖော်မှာပါ။ SCEF ဟာ Governing Body (အုပ်ချုပ်မှုဆိုင်ရာအဖွဲ့) လိုမျိုး ဖြစ်ပါတယ်။” လက်ရှိတွင် SCEF သည် ရက်ပေါင်း ၆၀ အတွင်း ဦးစားပေးဆောင်ရွက်ရမည့် လုပ်ငန်းစဉ်များကို သတ်မှတ်ထား ပြီး ဖြစ်ကြောင်း NUG နိုင်ငံခြားရေးဝန်ကြီး ဒေါ်ဇင်မာအောင်က အတည်ပြုပြောဆိုသည်။ သို့သော်လည်း ရှမ်းပြည်မြောက်ပိုင်းနှင့် အခြားနယ်စပ်ဒေသရှိ အင်အားကြီး တိုင်းရင်းသားလက်နက်ကိုင်အချို့ အဖွဲ့ဝင်အဖြစ် မပါဝင်လာနိုင်သေးသည့် အပေါ် ဦးအောင်ဆန်းမြင့်က ပထဝီနိုင်ငံရေးနှင့် အိမ်နီးချင်းနိုင်ငံများ၏ ဖိအားပေးမှုစိန်ခေါ်မှုများကို ထည့်သွင်းရှင်းပြခဲ့သည်။ ၎င်းက “ကျနော်တို့ တိုင်းရင်းသား တော်လှန်ရေး အဖွဲ့အစည်းတွေဟာ များသောအားဖြင့် အိမ်နီးချင်းနိုင်ငံတွေရဲ့ နယ်စပ်တွေနဲ့ ထိတွေ့ ဆက်ဆံနေရတာတွေ အများကြီးရှိပါတယ်။ တချို့ အဖွဲ့အစည်းတွေက တခြား အိမ်နီးချင်းနိုင်ငံရဲ့ နိုင်ငံရေးအရ ဖိအားပေးမှုတွေနဲ့ မလွန်ဆန်နိုင်တဲ့ အနေအထားမျိုးတွေ ရှိပါတယ်။ ဒါပေမဲ့ ကျနော်တို့ ကြားထဲမှာကတော့ စစ်ရေးအရသော်လည်းကောင်း၊ နိုင်ငံရေးအရသော်လည်းကောင်း အမြဲ ထိတွေ့ ချိတ်ဆက်နေတာ ရှိပါတယ်” ဟု ရှင်းလင်းပြောကြားသည်။ ထို့ကြောင့် လက်ရှိတွင် အဆိုပါအဖွဲ့များသည် SCEF ၏ အဖွဲ့ဝင် (Member) အဖြစ် တရားဝင် မပါဝင်နိုင်သေး သော်လည်း၊ မဟာမိတ် (Alliance) လမ်းကြောင်းမှ တစ်ဆင့် စစ်ရေး၊ နိုင်ငံရေးအရ ဆက်လက် ပူးပေါင်း ဆောင်ရွက်သွားမည့် အနေအထားတွင် ရှိနေကြောင်း ဆိုသည်။ SCEF အနေဖြင့် ရှေ့ဆက်၍ အမျိုးသမီး ကိုယ်စားပြုမှုများ အပြင် အခြားသော တော်လှန်ရေးအင်အားစုများ ပါဝင်လာရေး အတွက် ဆက်လက်ညှိနှိုင်းသွားရန် ရှိနေပြီး၊ တော်လှန်ရေး အရှိန်အဟုန် မြှင့်တင်နိုင်မည့် နိုင်ငံရေး အခင်းအကျင်းသစ် တစ်ခုကို ဆက်လက် ဖော်ဆောင်သွားမည်ဟု ပြောသည်။ #SCEF

အမိန့်တစ်ခု၊ မူတစ်ခု၊ မဟာဗျူဟာ တစ်ခု အောက်တွင် စစ်အောင်နိုင်ရေး အရှိန်မြှင့်မည်ဟု SCEF ပြော

Apr 11

ဒု-ဗိုလ်ချုပ်ကြီး ဂွန်မော် ရှမ်းပြည် ခရီးစဉ်အတွင်း မဟာမိတ် လက်တွဲ ဆောင်ရွက်ရေး ဆွေးနွေး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၁၁ ရက်။ ကချင်လွတ်လပ်ရေး ကောင်စီ (KIC) ဒုတိယ ဥက္ကဋ္ဌ၊ ဒုတိယဗိုလ်ချုပ်ကြီး ဂွန်မော်သည် ဧပြီလပထမပတ်တွင် ရှမ်းပြည် မြောက်ပိုင်းသို့ သွားရောက်ကာ မြောက်ပိုင်းညီနောင်မဟာမိတ် တပ်ဖွဲ့များနှင့် SSPP တို့မှ ထိပ်ပိုင်း ခေါင်းဆောင်များကို သီးခြားစီ တွေ့ဆုံ၍ မဟာမိတ်အချင်းချင်းကြား အတူတကွ လက်တွဲ လုပ်ဆောင်ရေးကို ဦးစားပေးရန် ဆွေးနွေးခဲ့သည်။ အဆိုပါ ခရီးစဉ်အတွင်း ဒုတိယဗိုလ်ချုပ်ကြီး ဂွန်မော်သည် ကိုးကန့်တပ် (MNDAA)၊ တအာင်းတပ် (TNLA) နှင့် ရှမ်းတပ် (SSPP/SSA) တို့ကို သီးခြားစီ သွားရောက်တွေ့ဆုံခဲ့ခြင်းဖြစ်ပြီး၊ မဟာမိတ်တပ်များအကြား မကြာခင် က ဖြစ်ပွားခဲ့သည့် ပဋိပက္ခများကို ဖြေရှင်းရန်နှင့် တော်လှန်ရေးအင်အားစုများအကြား ပြန်လည်စည်းလုံးရန် တိုက်တွန်းခဲ့သည်။ ဧပြီလ ၄ ရက်နေ့မှ ၆ ရက်နေ့ထိ တွေ့ဆုံမှုများနှင့် ပတ်သက်၍ KIO/KIA ပြောရေးဆိုခွင့်ရှိသူ ဗိုလ်မှူးကြီး နော်ဘူက ယခုကဲ့သို့ အတည်ပြု ပြောဆိုသည်။ “ကျနော်တို့ KIO/KIA ရဲ့ တောင်ပိုင်းဖက်မှာရှိနေတဲ့ စစ်တပ်တွေ၊ အရပ်ဖက်ဌာနတွေက အဖွဲ့သားတွေကို လာပြီးကြည့်ရှုတာ၊ အားပေးစကားပြောတာပါ။ လာတဲ့အချိန်မှာ MNDAA၊ TNLA နဲ့ SSPP/SSA အဖွဲ့ တွေနဲ့လည်း တစ်ဖွဲ့ချင်းစီ တွေ့ခဲ့ပါတယ်။ ဒါဟာ မဟာမိတ်တွေဆိုတော့ လာရင်းနဲ့တွေ့တဲ့ သဘောမျိုးပါပဲ။” ပြီးခဲ့သည့် မတ်လအတွင်းက MNDAA နှင့် TNLA တပ်ဖွဲ့များကြား နယ်မြေအငြင်းပွားမှုကြောင့် ပဋိပက္ခအချို့ ဖြစ်ပွားခဲ့ရာ ဒုတိယဗိုလ်ချုပ်ကြီး ဂွန်မော်၏ ခရီးစဉ်သည် အဆိုပါ တင်းမာမှုများကို လျှော့ချရန်နှင့် အချင်းချင်း လေးစားမှုရှိရန် အဓိက တိုက်တွန်းခဲ့ခြင်း ဖြစ်သည်။ ဗိုလ်မှူးကြီး နော်ဘူက ဆက်လက်၍ “MNDAA နဲ့ TNLA တွေ ပဋိပက္ခဖြစ်တာတွေကို အချင်းချင်းနားလည်ဖို့၊ လေးစားမှုနဲ့ ပြန်ပြီးပူးပေါင်းနေထိုင်ဖို့ လိုလားတဲ့အကြောင်းတွေကို ပြောထားပါတယ်။ TNLA နဲ့ဆိုရင်လည်း ပလောင်နဲ့ ကချင်ဟာ ယခင်ကတည်းက အတူတူယှဉ်တွဲနေထိုင်လာတဲ့ တိုင်းရင်းသားတွေဖြစ်သလို၊ တော်လှန် ရေး လောကမှာလည်း အတူလက်တွဲလာတာမို့ ဆက်ပြီးတော့လည်း အချင်းချင်း အားကိုးအားထားပြုပြီး နေဖို့ ပြောထားပါတယ်” ဟု ပြောသည်။ ဒုတိယဗိုလ်ချုပ်ကြီး ဂွန်မော်သည် KIA က ၂၀၂၄ ခုနှစ်၊ ဇန်နဝါရီလတွင် စစ်အစိုးရတပ်ထံမှ တိုက်ခိုက် သိမ်းပိုက် ထားခဲ့သည့် နမ့်ဖတ်ကာကျေးရွာသို့လည်း ပထမဆုံးအကြိမ် သွားရောက်ခဲ့ပြီး ဒေသခံ ကချင်နှင့် တအာင်း လူထုကို တွေ့ဆုံကာ နိုင်ငံရေးဆိုင်ရာ အသိပေးပြောကြားမှုများ ပြုလုပ်ခဲ့သည်။ သို့သော်လည်း အဆိုပါ ခရီးစဉ်အတွင်း စစ်ရေးဆိုင်ရာ ပေါ်လစီအသစ်များ ချမှတ်ခြင်းမျိုး မရှိခဲ့ကြောင်း ဗိုလ်မှူးကြီးနော်ဘူက ဆက်ပြောသည်။ “ထူးထူးထွေထွေ ပေါ်လစီနဲ့ဆိုင်တာတွေ၊ စီမံကိန်းနဲ့ ပတ်သက်တာတွေ၊ အထူးစစ်ဆင်ရေး လုပ်ဖို့ ကိစ္စတွေ ဘာမှမရှိပါဘူး။ မိတ်ဟောင်းဆွေဟောင်းတွေကို လာတွေ့တဲ့ သဘောပါပဲ။ ပြည်သူလူထုလည်း ပဋိပက္ခတွေ ကြောင့် စိတ်ဆင်းရဲ ကြောက်ရွံ့တာမျိုး မဖြစ်ဖို့ အတူတူလက်တွဲပြီး ကျော်ဖြတ်ဖို့ ခွန်အားပေး စကားတွေ ပြောထားပါတယ်။” တစ်ဖက်တွင်လည်း KIO သည် အမျိုးသားညီညွတ်ရေး အစိုးရ (NUG) နှင့် အခြားတိုင်းရင်းသား လက်နက်ကိုင် အဖွဲ့ကြီးများ (KNU, KNPP, CNF) နှင့် ပူးပေါင်းကာ 'ဖက်ဒရယ်ဒီမိုကရေစီ ပြည်ထောင်စု ပေါ်ထွန်းရေး ဦးဆောင်ကောင်စီ' ကို မတ်လ ၃၀ ရက်နေ့တွင် ဖွဲ့စည်းကြောင်း ကြေညာထားသည်။ ထို့ကြောင့် ယခု ဒုတိယဗိုလ်ချုပ်ကြီး ဂွန်မော်၏ ရှမ်းမြောက်ခရီးစဉ်မှာ အဆိုပါ ဦးဆောင်ကောင်စီတွင် ရှမ်းမြောက်အခြေစိုက် တိုင်းရင်းသားတပ်ဖွဲ့များ ထပ်မံပါဝင်လာရေးအတွက် စည်းရုံးလှုံ့ဆော်သည့် သံတမန် ရေးရာ လှုပ်ရှားမှုတစ်ခု ဖြစ်နိုင်ကြောင်း ဒေသခံ သတင်းရင်းမြစ်များက ရှုမြင်နေကြသည်။ စစ်အာဏာရှင် ဖြုတ်ချရေးအတွက် KIA၊ TNLA၊ MNDAA နှင့် SSPP စသည့် အင်အားကြီး လေးဖွဲ့စလုံး စစ်ရေး၊ နိုင်ငံရေးအရ ပြန်လည်စည်းလုံးလာစေမည့် အပြုသဘောဆောင်သည့် အလှည့်အပြောင်းတစ်ခု ဖြစ်လာရန် ဒေသခံပြည်သူများက မျှော်လင့်စောင့်ကြည့်နေကြသည်။ #ဗိုလ်ချုပ်ဂွန်မော် #KIA #KIO #MNDAA #TNLA #SSPP

ဒု-ဗိုလ်ချုပ်ကြီး ဂွန်မော် ရှမ်းပြည် ခရီးစဉ်အတွင်း မဟာမိတ် လက်တွဲ ဆောင်ရွက်ရေး ဆွေးနွေး

Apr 11

ကယန်း အမျိုးသားနေ့ အခမ်းအနားများ နေရာခွဲ ကျင်းပခဲ့ရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၁၁ ရက်။ ကရင်နီ (ကယား) ပြည် အတွင်းရှိ နယ်မြေလုံခြုံရေး အခြေအနေများကြောင့် (၂၆) ကြိမ်မြောက် ကယန်း အမျိုးသားနေ့ အခမ်းအနားကို ယခင်နှစ်များကဲ့သို့ စုပေါင်းကျင်းပနိုင်ခြင်းမရှိဘဲ ဒေသအသီးသီး၌ နေရာခွဲ၍ အကန့်အသတ်များဖြင့်သာ ကျင်းပခဲ့ကြရသည်။ ဧပြီလ ၁၀ ရက်နေ့တွင် ကျရောက်သည့် ကယန်းအမျိုးသားနေ့ကို ယခင်က ကယန်းဒေသအတွင်း သတ်မှတ် ထားသည့် စုရပ်တစ်ခုတည်း၌ ခမ်းနားစွာ ကျင်းပခဲ့ကြသော်လည်း၊ ယခုနှစ်တွင်မူ စစ်ရေးနှင့် လုံခြုံရေးစိုးရိမ် ချက်များကြောင့် ဒီးမော့ဆို၊ ဖယ်ခုံ၊ ဆီးဘူး၊ ပီကင်းနှင့် သံတောင် အစရှိသည့် နေရာ (၇) ခုထက်မနည်း ခွဲ၍ ကျင်းပခဲ့ရသည်။ ကယန်းအမျိုးသမီးအစည်းအရုံး (KYWO) ၏ တွဲဖက်အတွင်းရေးမှူး-၁ မူထရီဇာက “ပုံမှန်နှစ်တွေမှာ ဆိုလို့ရှိရင် နေရာ တစ်နေရာထဲကိုပဲ ကြီးကြီးမားမား လုပ်တယ်ပေါ့နော်။ ဒီနှစ်မှာတော့ ကရင်နီပြည် ကယန်းဒေသကို ကြည့်မယ် ဆိုလို့ရှိရင် ဒီးမော့ဆို အနောက်ခြမ်းမှာ၊ ဖယ်ခုံမြို့နယ်မှာ လုပ်တာရှိတယ်။ အလယ်ကယန်းဒေသ ဆီးဘူးမှာ လုပ်တာလည်း ရှိတယ်ပေါ့နော်။ ဆိုတော့ ဒီနှစ်ရဲ့ ထူးခြားချက်ကတော့ ကျမတို့ နေရာကို သုံးလေးခု လောက် ဖြန့်ကျက်ပြီးတော့ လုပ်လိုက်နိုင်တယ်” ဟု နေရာခွဲကျင်းပခဲ့ရသည့် အခြေအနေကို ပြောသည်။ လုံခြုံရေးအရ နေရာဖြန့်ကျက်ကျင်းပခဲ့ရသော်လည်း ဒေသခံလူထု၏ အမျိုးသားရေးစိတ်ဓာတ်ဖြင့် ပူးပေါင်း ပါဝင်မှုမှာ အားကောင်းခဲ့ပြီး၊ အခမ်းအနားသို့ မတက်ရောက်နိုင်သည့် စစ်ဘေးရှောင်များကလည်း မိမိတို့ စခန်း များ၌ပင် ကိုယ်ထူကိုယ်ထ အစီအစဉ်များဖြင့် ကျင်းပခဲ့ကြသည်။ မူထရီဇာကပင် ဆက်လက်၍ “ဘယ်လိုအခြေအနေ ဘယ်လို နေရာမျိုးမှာပဲ ရောက်ရောက် ကယန်းအမျိုးသား နေ့၊ ကယန်းနှစ်သစ်ကူး အခမ်းအနားတွေကို ကျင်းပနေဖို့လိုတယ်” ဟု ပြောသည်။ ကယန်းမျိုးဆက်သစ်လူငယ် (KNGY) ၏ ဒုဥက္ကဋ္ဌ မူမာရီယာကလည်း ယခုကဲ့သို့ အခြေအနေများကြားမှ အမျိုးသားနေ့ကို ဆက်လက်ကျင်းပရခြင်းသည် လူမျိုးတစ်မျိုး၏ ဝိသေသလက္ခဏာ (Identity) ကို ထိန်းသိမ်းရန်ဖြစ်ကြောင်း ဆိုသည်။ မူမာရီက “အဓိက ရည်ရွယ်ချက်က အမျိုးသားအမှတ်အသား (Identity) ကို တည်တံ့စေရန် ဘာသာစကား၊ ယဉ်ကျေးမှု၊ စာပေ ထိန်းသိမ်းရန် ကယန်းလူမျိုးအတွင်း ညီညွတ်မှု တည်ဆောက်ရန် ဖြစ်တယ်” ဟု ပြော သည်။ ထို့အပြင် မျိုးဆက်သစ်လူငယ်များအနေဖြင့် ရှေးယခင်က ရှိခဲ့သည့် မညီညွတ်မှု အယူအဆအစွဲများကို ဘေးဖယ်ကာ ညီညွတ်မှု မှတ်တိုင်သစ် တည်ဆောက်ကြရန်လည်း KNGY က တိုက်တွန်းထားသည်။ “လူငယ်တွေ အနေနဲ့ မညီညွတ်မှု အမွေအနှစ်ကို ဆက်မယူသွားဖို့လိုတယ်။ သမိုင်းတစ်လျောက် မရှိခဲ့ဖူးသော ညီညွတ်မှုကို ဒီမျိုးနွယ်စုလူငယ်အင်အားဖြင့် အတွေးအခေါ်အသစ်နဲ့ ညီညွတ်မှုအတွက် သမိုင်းမှတ်တိုင် တည် ဆောက်သွားဖို့ လိုအပ်ကြောင်း တိုက်တွန်းလိုပါတယ်” ဟု မူမာရီယာက ပြောသည်။ ကယန်းအမျိုးသားနေ့ကို ကျင်းပရခြင်းသည် ကယန်းလူမျိုးတို့၏ စာပေ၊ ဘာသာစကားနှင့် ယဉ်ကျေးမှု အမွေ အနှစ်များ မပျောက်ပျက်အောင် ထိန်းသိမ်းစောင့်ရှောက်ရန်ဖြစ်ကြောင်း ကယန်းမျိုးဆက်သစ်လူငယ် (KNGY) ဒုဥက္ကဋ္ဌ မူမာရီယာက ဆိုသည်။ ၎င်းက ကယန်းခေါင်းဆောင်များသည် ကယန်းဝိသေသလက္ခဏာများ ထိန်းသိမ်းနိုင်ရေးအတွက် ၂၀၀၀ ပြည့်နှစ် တွင် ကျင်းပသည့် ပထမအကြိမ် ကယန်းအမျိုးသားညီလာခံ၌ ဧပြီ ၁၀ ရက်နေ့ကို အမျိုးသားနေ့အဖြစ် စတင် သတ်မှတ်ခဲ့ကြခြင်းဖြစ်ပြီး ယခုနှစ်တွင် (၂၆) ကြိမ်မြောက်အထိ ရောက်ရှိလာခြင်းဖြစ်ကြောင်း ရှင်းပြသည်။ ယခုနှစ် ကယန်းအမျိုးသားနေ့ကို ပြည်တွင်း၌သာမက ဂျပန်၊ ကိုးရီးယား၊ ထိုင်းနှင့် စင်္ကာပူနိုင်ငံရောက် ကယန်း လူမျိုးများကလည်း သက်ဆိုင်ရာ နိုင်ငံအလိုက် အခမ်းအနားများကို ကျင်းပခဲ့ကြသည်။ #ကယန်းအမျိုးသားနေ့

ကယန်း အမျိုးသားနေ့ အခမ်းအနားများ နေရာခွဲ ကျင်းပခဲ့ရ

Apr 11

ရွေးကောက်ပွဲ နောက်ပိုင်း မီးပြန်ပျက် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၁၁ ရက်။ ဧရာဝတီတိုင်း၊ ပုသိမ်မြို့တွင် စစ်အစိုးရ၏ အတုအယောင်လို့ ပညာရှင်တွေ သုံးသပ်ထားတဲ့ ရွေးကောက်ပွဲ ပြီးဆုံးသွားပြီးနောက် လျှပ်စစ်မီး ပေးဝေမှုမှာ ယခင်ကထက် ထက်ဝက်ခန့် လျော့နည်းသွားသည်ဟု ဒေသခံများက ပြောသည်။ ရွေးကောက်ပွဲကာလ မတိုင်မီက ပုသိမ်မြို့တွင် တစ်နေ့လျှင် လျှပ်စစ်မီး အနည်းဆုံး ၈ နာရီမှ ၁၂ နာရီအထိ ရရှိခဲ့ သော်လည်း၊ ဖေဖော်ဝါရီလဆန်းပိုင်းမှ စတင်ကာ တစ်နေ့လျှင် ၄ နာရီခန့်သာ မီးရရှိတော့သည့်အပြင် မီးလာချိန်၊ ပျက်ချိန်မှာလည်း တိကျမှုမရှိဘဲ စိတ်တိုင်းကျ ဖြတ်တောက်ခံနေရခြင်း ဖြစ်သည်။ အမှတ် (၁၂) ရပ်ကွက်တွင် နေထိုင်သူ ဒေသခံတစ်ဦးက “ရွေးကောက်ပွဲမတိုင်ခင်‌လေးမှာ မီးပေးတာ တော်တော် အချိန်မှန်တာ။ တနေ့ ၈ နာရီကျော်လောက်သုံးနေရတော့ ဘဝမှန်ကိုမေ့ပြီး ဘဝင်မြင့်ချင်ချင်တောင် ဖြစ်သွား တာ။ ဘာကြာလို့လဲ ဒုံရင်းကဒုံရင်းပေါ့၊ ကျောက်ခေတ်ထဲပြန်ရောက်သွားတာပါပဲ” ဟု ပြောသည်။ နိုင်ငံရေး လေ့လာသုံးသပ်သူများကမူ ဤသို့ ရွေးကောက်ပွဲမတိုင်မီ မီးမှန်အောင်ပေးခဲ့ခြင်းမှာ လူထု၏ စိတ်အာရုံ ကို ဆွဲဆောင်ရန်နှင့် မဲဆွယ်ရန်အတွက် အတင်းအကျပ် စီမံဆောင်ရွက်ခဲ့သည့် ‘ဆေးမီးတိုစီမံကိန်း’ မျှသာဖြစ် ကြောင်း ဝေဖန်ကြသည်။ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP) အနိုင်ရရှိသွားပြီးနောက်တွင် မျက်နှာဖုံးတပ်ထားသည့် အပြုံးများ ပျောက်ကွယ်သွားခြင်းဖြစ်သည်ဟု အသက် ၇၀ ကျော်အရွယ် ဝါရင့်နိုင်ငံရေးသမားတစ်ဦးက ပြောသည်။ ၎င်းက “စစ်ကော်မရှင်ဟာ ပြည်သူ့အတွက်ဆိုပြီး စဉ်းစားတာ နမ်းစေ့တစ်စေ့လောက်တောင် ဘယ်တုန်းကမှ မရှိခဲ့ဘူး။ အတ္တကြီးလွန်းတယ်။ လိုချင်တာရဖို့ ခဏကောင်းပြတတ်တာဟာ သူတို့ရဲ့ ရိုးရာဗျူဟာစစ်စစ်ပဲ” ဟု ပြောသည်။ လျှပ်စစ်ဝန်ထမ်းအချို့ကမူ နွေရာသီဖြစ်သဖြင့် ထုတ်လုပ်မှုနှင့် သုံးစွဲမှုမညီမျှခြင်းကြောင့် အလှည့်ကျပေးရခြင်း ဖြစ်သည်ဟု အကြောင်းပြသော်လည်း၊ မြေပြင်တွင် မီးလာချိန်မမှန်ခြင်းက ပြည်သူများကို ပိုမိုပင်ပန်းစေသည် ဟု ပြောဆိုနေကြသည်။ ဝန်ထမ်းအိမ်ရာမှ အသက် ၄၀ ကျော် အမျိုးသမီးတစ်ဦးက “ဓာတ်အားမနိုင်လို့ အလှည့်ကျပေးတာ လက်ခံရမှာ ပေါ့။ ဒါပေမဲ့ ပေးချိန်ဖြတ်ချိန် တိကျစေချင်တာ။ ဒါဆိုရင် ချက်ဖို့ပြုတ်ဖို့ကို စီမံလို့ရတာပေါ့။ အခုက လာချင်တဲ့ အချိန်လာ၊ ပျက်ချင်တဲ့အချိန်ပျက်ဆိုတော့ အတော်ဒုက္ခရောက်တယ်” ဟု ပြောသည်။ မီးလာချိန်ကို စောင့်ဆိုင်းကာ ချက်ပြုတ်နေရသဖြင့် အခန့်မသင့်ပါက ထမင်းအိုးများ ပစ်လိုက်ရသည့်အထိ ဆုံးရှုံးမှုများရှိနေကြောင်း အမှတ် (၈) ရပ်ကွက်မှ အမျိုးသမီးတစ်ဦးကလည်း ယခုကဲ့သို့ ပြောသည်။ “သက်သာမလားလို့ မီးလာချိန်လေးစောင့်ပြီး ထမင်းအိုးတည်ပါတယ်။ ထမင်းမကျက်ခင် မီးပျက်‌တော့ ပစ် လိုက်ရ‌ရော။ မရှိမဲ့ရှိမဲ့ ပိုက်ဆံ‌လေးနဲ့ ဝယ်ထားရတဲ့ ဆန်လေး နှမြောလိုက်တာ မပြောပါနဲ့တော့။ ဖြစ်ပေါင်း များနေတော့လည်း လျှပ်စစ်က မောင်မင်းကြီးသားတွေ ကျန်းမာပါစေ ဆုတောင်းပေးရတာ အမောပဲ။” ထို့ပြင် ပုသိမ်မြို့ခံများမှာ လျှပ်စစ်မီးကို တစ်နေ့ ၄ နာရီခန့်သာ သုံးစွဲရသော်လည်း၊ လကုန်တွင် ကျသင့် ယူနစ် ထက် ပိုမိုကောက်ခံသည့် မီတာခပြဿနာများနှင့်ပါ ရင်ဆိုင်နေရကြောင်း မြို့ခံများက ပြောသည်။ ရွေးကောက်ပွဲအလွန် ပုသိမ်မြို့၏ လျှပ်စစ်မီးအခြေအနေမှာ ပြည်သူလူထု၏ လူမှုစီးပွားဘဝကို သိသိသာသာ ထိုးနှက်လျက်ရှိသည်ဟု ပြောဆိုနေကြသည်။ #ရွေးကောက်ပွဲ #ဧရာဝတီတိုင်း #ပုသိမ်မြို့

ရွေးကောက်ပွဲ နောက်ပိုင်း မီးပြန်ပျက်

Apr 10

တရုတ် စူပါ ကွန်ပြူတာ ဟက်ခံရ သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဧပြီလ ၁၀ ရက်။ တရုတ်နိုင်ငံ၊ တီယန်ကျင်းမြို့ရှိ အမျိုးသားစူပါကွန်ပျူတာစင်တာ (NSCC) မှ အရေးကြီး အချက်အလက်များ ခိုးယူခံခဲ့ရကြောင်း CNN သတင်းဌာနက ဖော်ပြသည်။ "FlamingChina" (တရုတ်မီးလျှံ) ဟု အမည်ပေးထားသည့် ဟက်ကာအဖွဲ့သည် ဒေတာပမာဏ ၁၀ ပက်တာဗိုက် (10 Petabytes) အထိ ဖောက်ထွင်းခိုးယူနိုင်ခဲ့ခြင်းဖြစ်ပြီး၊ ၎င်းသည် တရုတ်နိုင်ငံသမိုင်းတွင် အကြီးမားဆုံးသော ဒေတာခိုးယူမှုအဖြစ် သတ်မှတ်ခံထားရသည်။ 10 ပက်တာဗိုက်ဆိုသည်မှာ လက်ပ်တော့ ကွန်ပြူတာ ၁ သောင်းခန့် ( ဂျီဂါဗိုက် ၁၀ သန်း) ခန့် အချက်အလက်များ ဖြစ်သည်။ ခိုးယူခံရသည့် အချက်အလက်များထဲတွင် နိုင်ငံတော်ကာကွယ်ရေး လျှို့ဝှက်စာတမ်းများ၊ ဒုံးကျည်ပုံစံငယ် ဒီဇိုင်းများ၊ လေကြောင်းနည်းပညာနှင့် နျူကလီးယားသုတေသနဆိုင်ရာ အချက်အလက်များ ပါဝင်နေသည်။ ဟက်ကာအဖွဲ့သည် ကုမ္ပဏီများအသုံးပြုသည့် VPN မှတစ်ဆင့် စိမ့်ဝင်ခဲ့ပြီး ၆ လတာကာလအတွင်း အချက်အလက်များကို တဖြည်းဖြည်းချင်း ခိုးယူခဲ့ခြင်းဖြစ်သည်။ လက်ရှိတွင် အဆိုပါဒေတာများကို Telegram မှတစ်ဆင့် နမူနာထုတ်ပြ၍ ခရစ်ပတို (Crypto) ငွေကြေးဖြင့် ရောင်းချရန် ကြိုးပမ်းနေသည်ဟု ဆိုသည်။ ဆိုင်ဘာလုံခြုံရေးကျွမ်းကျင်သူများက အဆိုပါဒေတာများမှာ စစ်မှန်ကြောင်း အတည်ပြုထားသည်။ #FlamingChina #NSCC

တရုတ် စူပါ ကွန်ပြူတာ ဟက်ခံရ

Apr 10

ယူကရိန်း-ရုရှားစစ်ပွဲ အီစတာကာလ အပစ်ရပ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၁၀ ရက်။ လေးနှစ်ကျော်ကြာမြင့်လာပြီဖြစ်သော ယူကရိန်းစစ်ပွဲအတွင်း နှစ်ဖက်ခေါင်းဆောင်များသည် အော်သိုဒေါ့စ် (Orthodox) အီစတာပွဲတော်အတွက် ၃၂ နာရီကြာ တိုက်ပွဲများရပ်နားရန် သဘောတူညီခဲ့ကြသည်။ ရုရှားသမ္မတ ဗလာဒီမာပူတင်၏ ညွှန်ကြားချက်အရ ဧပြီလ ၁၁ ရက် ညနေ ၄ နာရီမှ ၁၂ ရက်နေ့ ကုန်ဆုံးသည်အထိ စစ်မျက်နှာပြင်အားလုံးတွင် တိုက်ပွဲများ ရပ်နားထားမည်ဖြစ်သည်။ ယူကရိန်းသမ္မတ ဇယ်လန်းစကီးကလည်း အမေရိကန်မှတစ်ဆင့် အဆိုပြုခဲ့သော ယင်းယာယီအပစ်ရပ်မှုကို လိုက်နာမည်ဖြစ်ကြောင်း ဘန်ကောက်ပို့စ်သတင်းစာက ဖော်ပြသည်။ စစ်ရေးကျွမ်းကျင်သူများ၏ အဆိုအရ ၂၀၂၅ ခုနှစ်နှောင်းပိုင်းမှစ၍ ရုရှား၏ ထိုးစစ်များမှာ နှေးကွေးသွားခဲ့ပြီး၊ ယင်းမှာ ရုရှားစစ်တပ်က Starlink ဂြိုဟ်တုနှင့် Telegram ဆက်သွယ်ရေးစနစ်များ အသုံးပြုခွင့် ပိတ်ပင်ခံရခြင်းကြောင့်ဖြစ်သည်ဟု သုံးသပ်ကြသည်။ သို့သော်လည်း ဒိုးနက်စ် (Donetsk) ဒေသရှိ မြို့ကြီးများတွင် ယူကရိန်းတပ်ဖွဲ့များမှာ အကျပ်အတည်းနှင့် ဆက်လက်ရင်ဆိုင်နေရဆဲဖြစ်သည်။ ထို့အပြင် ယူကရိန်းက ရုရှားရေနံတင်ဆိပ်ကမ်းများကို ဒရုန်းဖြင့် တိုက်ခိုက်ခဲ့ခြင်းနှင့် ပတ်သက်၍ ယူကရိန်းဒရုန်းများကို ဝေဟင်ပိုင်နက် အသုံးပြုခွင့်ပေးသော ဘောလ်တစ်နိုင်ငံများဖြစ်သည့် အက်စတိုးနီးယား၊ လတ်ဗီးယားနှင့် လစ်သူယေးနီးယားတို့ကို တိုက်ခိုက်မည်ဟု ရုရှားက ခြိမ်းခြောက်လိုက်သည်။ လက်ရှိတွင် ရုရှားသည် ယူကရိန်းပိုင်နက်၏ ၁၉ ရာခိုင်နှုန်းကျော်ကို ဆက်လက်ထိန်းချုပ် ထားဆဲ ဖြစ်သည်။ #ယူကရိန်းစစ်ပွဲ #အပစ်ရပ် #ဇယ်လန်းစကီး #ဗလာဒီမာပူတင်

ယူကရိန်း-ရုရှားစစ်ပွဲ အီစတာကာလ အပစ်ရပ်

Apr 10

လက်ဘနွန်စစ်မျက်နှာက အပစ်အခတ်ရပ်စဲရေးကို ခြိမ်းခြောက်နေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၁၀ ရက်။ အစ္စရေးနှင့် အီရန်အကြား တင်းမာမှုများ မြင့်တက်နေစဉ် လက်ဘနွန်စစ်မျက်နှာ၌ အပြန်အလှန် တိုက်ခိုက်မှုများပြင်းထန်နေခြင်းက အပစ်အခတ်ရပ်စဲရေး အလားအလာကို အဟန့်အတား ဖြစ်စေလျက်ရှိသည်။ အစ္စရေးစစ်တပ်က လက်ဘနွန်ပိုင်နက်အတွင်းသို့ လေကြောင်းတိုက်ခိုက်မှုများ ဆက်လက်လုပ်ဆောင်နေသကဲ့သို့ ဟစ်ဇ်ဘိုလာအဖွဲ့ကလည်း အစ္စရေးနိုင်ငံအတွင်းသို့ ဒုံးကျည်များဖြင့် ပြန်လည်တုံ့ပြန်ပစ်ခတ်လျက်ရှိသည်။ သို့ရာတွင် အမေရိကန်နိုင်ငံခြားရေးဝန်ကြီးဌာနက အစ္စရေးနှင့် လက်ဘနွန်အရာရှိများအကြား ငြိမ်းချမ်းရေးဆွေးနွေးပွဲများ ကျင်းပသွားမည်ဟု ထုတ်ပြန်ထားသည်။ တစ်ချိန်တည်းမှာပင် အမေရိကန်ဒုသမ္မတ ဂျေဒီဗန့်စ် (JD Vance) သည် အီရန်အဆင့်မြင့်အရာရှိများနှင့် တွေ့ဆုံရန် ပါကစ္စတန်နိုင်ငံ၊ အစ္စလာမာဘတ်မြို့သို့ ရောက်ရှိနေကြောင်း ဂျာမနီအခြေစိုက် DW သတင်းဌာနက ဖော်ပြသည်။ ဤတွေ့ဆုံမှုသည် ဆယ်စုနှစ်များစွာအတွင်း အမေရိကန်နှင့် အီရန်အကြား အမြင့်ဆုံးအဆင့် တိုက်ရိုက်ထိတွေ့မှုအဖြစ် ရှုမြင်ခံနေရသည်။ အပစ်အခတ်ရပ်စဲရေး သဘောတူညီချက်တွင် လက်ဘနွန်နိုင်ငံ ပါဝင်မှု ရှိ၊ မရှိမှာ အငြင်းပွားဖွယ်ဖြစ်နေပြီး၊ အမေရိကန်အစိုးရသည် လာမည့်သီတင်းပတ်အတွင်း ဝါရှင်တန်ဒီစီ၌ အစ္စရေး-လက်ဘနွန် အပစ်ရပ်ရေးဆိုင်ရာ သီးသန့်ဆွေးနွေးပွဲတစ်ရပ်ကို အိမ်ရှင်အဖြစ် လက်ခံကျင်းပသွားရန် စီစဉ်ထားသည်။ ပြီးခဲ့သည့် ဗုဒ္ဓဟူးနေ့ အပစ်ရပ်ရေးစတင်ချိန်မှစ၍ အစ္စရေး၏ ဗုံးကြဲမှုများကြောင့် လက်ဘနွန်တွင် လူပေါင်း ၃၀၀ ကျော် သေဆုံးခဲ့ရာ၊ ယင်းလုပ်ရပ်သည် အပစ်ရပ်မှုကို ချိုးဖောက်ခြင်းဖြစ်သဖြင့် တုံ့ပြန်ရခြင်းဖြစ်ကြောင်း ဟစ်ဇ်ဘိုလာဘက်က ဆိုသည်။ အခြားတစ်ဖက်တွင်လည်း ကူဝိတ်နိုင်ငံက ၎င်းတို့၏ အရေးကြီးအခြေခံအဆောက်အအုံများကို အီရန်က ဒရုန်းများဖြင့် တိုက်ခိုက်ခဲ့သည်ဟု စွပ်စွဲထားသော်လည်း အီရန်ဘက်ကမူ ယင်းစွပ်စွဲချက်ကို ငြင်းဆိုထားသည်။ #လက်ဘနွန်စစ်ပွဲ #အပစ်ခတ်ရပ်စဲရေး #အီရန်စစ်ပွဲ #အရှေ့အလယ်ပိုင်းစစ်ပွဲ #ဟစ်ဇ်ဘိုလာ #အမေရိကန်ဒုသမ္မတဂျေဒီဗန့်စ် #JDVance

လက်ဘနွန်စစ်မျက်နှာက အပစ်အခတ်ရပ်စဲရေးကို ခြိမ်းခြောက်နေ

Apr 9

စီမံခန့်ခွဲမှု အလွဲကြောင့် ယာဉ်ပိုင်ရှင်များ သတ်မှတ် ဆီ ပမာဏ မဝယ်ယူနိုင် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၉ ရက်။ ဧရာဝတီတိုင်းဒေသကြီး၊ ပုသိမ်မြို့တွင် QR စနစ်ဖြင့် စက်သုံးဆီရောင်းချမှု တစ်ပတ်နီးပါးကြာမြင့်လာပြီ ဖြစ်သော်လည်း စီမံခန့်ခွဲမှုအလွဲများကြောင့် အဆင်မပြေသေးဘဲ အခက်ကြုံနေရဆဲသည်ဟု မြို့ခံများက ပြောသည်။ ပုသိမ်မြို့တွင် စက်သုံးဆီအရောင်းဆိုင်များ၌ QR Code စနစ်ဖြင့် စတင်ရောင်းချခဲ့သည့် ၆ ရက်တာကာလ အတွင်း စီမံခန့်ခွဲမှု အလွဲအချော်များနှင့် နည်းပညာပိုင်းဆိုင်ရာ အားနည်းချက်များကြောင့် ဒေသခံယာဉ်မောင်း များနှင့် အခြေခံလူတန်းစားများ အလုပ်ပျက်အကိုင်ပျက်ဖြစ်ကာ အခက်ကြုံနေကြရသည်။ ပုသိမ်မြို့တွင် ဧပြီလ ၄ ရက်နေ့မှစတင်ကာ ယာဉ်အမျိုးအစားအလိုက် တစ်ပတ်စာ လီတာခွဲတမ်းသတ်မှတ်၍ QR Code စနစ်ဖြင့် ရောင်းချပေးနေခြင်း ဖြစ်သော်လည်း လက်တွေ့မြေပြင်တွင် ဆီတိုင်ကီဆန့်ပမာဏနှင့် သတ်မှတ်ခွဲတမ်း ကိုက်ညီမှုမရှိခြင်းကြောင့် ပြည်သူများ နစ်နာမှုများရှိနေသည်။ အသက် ၄၀ ကျော်အရွယ် အိုးဝေယာဉ်မောင်းတစ်ဦးက “တစ်ပတ်ကို ၂၅ လီတာ သတ်မှတ်တယ် ဝယ်လို့ရ မယ်ပေါ့။ ဒါပေမဲ့ ကျနော်တို့ တိုင်ကီက ၆ လီတာ၊ ၆ လီတာခွဲလောက်ပဲ ဆန့်တာ။ ၃ ခါထုတ်မှ အများဆုံး ၁၉ လီတာပဲ ရတယ်။ ကျန်တဲ့ ၆ လီတာက ဆိုင်မှာ မထုတ်ရဘဲနဲ့ ဆုံးသွားပြီ။ အဲဒီတော့ သုံးဖို့က မလုံလောက်တော့ ဘူး” ဟု ပြောသည်။ အလားတူ ဆိုင်ကယ်များအတွက်လည်း တစ်ပတ်လျှင် ၈ လီတာဖြင့် ၂ ကြိမ် ခွဲယူရန် ခွင့်ပြုထားသော်လည်း အများစုစီးနင်းသည့် ဆိုင်ကယ်တိုင်ကီငယ်များမှာ ခွဲတမ်းပါပမာဏကို တစ်ကြိမ်တည်းနှင့် အပြည့်မဆန့်ခြင်း ကြောင့် ခွဲတမ်းအချို့ ဆုံးရှုံးနေရသည်ဟု ဆိုကြသည်။ ဆိုင်ကယ်တက္ကစီသမားတစ်ဦးက “PCX တို့ ဗိုက်ပူတို့ကတော့ ၄ လီတာဆန့်တယ်၊ အဲဒါက လူနည်းစုပဲရှိတာ။ အများစုက တိုင်ကီသေးတွေဆိုတော့ တစ်ပတ်ကို ၂ လီတာလောက်စီ ဆုံးရှုံးနေရတယ်။ အဲဒီဆီတွေက မှောင်ခို ဈေးကွက်ထဲ ရောက်ကုန်ပြီး တိုင်စီသမားတွေက ဈေးကြီးပေး ပြန်ဝယ်နေရတာပေါ့” ဟု ပြောသည်။ လက်ရှိတွင် QR စနစ်ကြောင့် ဆီရရှိရန် နေပူအောက်တွင် ၃ နာရီမှ ၄ နာရီအထိ အချိန်ပေး တန်းစီနေရပြီး စုံ/မ ရက်ခွဲခြားမှုများကြောင့်လည်း စားဝတ်နေရေးအတွက် ပြေးလွှားနေရသည့် ယာဉ်မောင်းများမှာ အချိန်ကုန် လူပန်းဖြစ်နေကြရသည်။ ကုန်ကားယာဉ်မောင်းတစ်ဦးကလည်း “တစ်ပတ်မှ လီတာ ၁၅၀ ပဲရတာ၊ အဲဒါကို တစ်နာရီလောက် တန်းစီပြီး ထုတ်ရတာတောင် ၅၀ လီတာပဲ ရမယ်တဲ့။ နောက်တစ်ကြိမ်ကျမှ ဆီနည်းလို့ မပေးနိုင်ဘူးဆိုရင် ကျနော်တို့ပဲ ဆုံးရှုံးဦးမယ်။ စိတ်ညစ်ဖို့ အတော်ကောင်းတယ်၊ ဘယ်လိုမှ အဆင်မပြေပါဘူး” ဟု ပြောသည်။ ထို့ပြင် လိုင်စင်ရှိသော်လည်း QR Scan ဖတ်၍မရသည့် ယာဉ်အသစ်ပိုင်ရှင်များမှာ ပြင်ပမှောင်ခိုဈေးကွက်တွင် စက်သုံးဆီတစ်လီတာလျှင် ကျပ် ၁၂,၀၀၀ မှ ၁၅,၀၀၀ ခန့်အထိ ပေးဆောင်ဝယ်ယူနေရကြောင်း ဆိုသည်။ စက်သုံးဆီဆိုင် တာဝန်ရှိသူအချို့ကမူ ဆိုင်ကယ်နှင့် အိုးဝေများကို သတ်မှတ်ရက်အတိုင်းသာ ထုတ်ပေးမည်ဖြစ် ပြီး တိုင်ကီနှင့်မဆန့်ပါက ပုံးများဖြင့် ထုတ်ပေးမည်မဟုတ်ဘဲ လက်ကျန်ခွဲတမ်းကို ကုန်ဆုံးသည်ဟုသာ သတ်မှတ်မည်ဖြစ်ကြောင်း ပြောဆိုထားသည်။ ဧရာဝတီတိုင်းအတွင်းရှိ စိုက်ပျိုးရေးလုပ်ကိုင်သည့် လယ်သမားများနှင့် ကမ်းရိုတန်း ငါးဖမ်းလုပ်ငန်းရှင်များမှာ လည်း ဆီဆိုင်ကြီးများတွင် ဆီဝယ်ယူ၍ မရနိုင်တော့ဘဲ ဖြစ်နေသည်။ ထို့ကြောင့် ပြင်ပမှောင်ခိုဈေးကွက်တွင် အဆမတန် မြင့်တက်နေသည့် ဈေးနှုန်းများဖြင့် ဝယ်ယူနေရသဖြင့် လုပ်ငန်းများ ဆက်လက်လုပ်ကိုင်ရန် အခက်အခဲများနှင့် ကြုံတွေ့နေရသည်။ ယခုကဲ့သို့ ဧပြီလအတွင်း အပူရှိန်မြင့်တက်မှုနှင့်အတူ စက်သုံးဆီ အကျပ်အတည်းပါ ပေါင်းစပ်လာခြင်းကြောင့် ဒေသတွင်း ကုန်စည်စီးဆင်းမှုအပေါ်ပါ ထိခိုက်မှုများ ရှိလာနိုင်ကြောင်း စိုးရိမ်မှုများ မြင့်တက်နေကြသည်။ #စက်သုံးဆီပြတ်လပ်မှု #ပုသိမ်မြို့ #ဧရာဝတီတိုင်း

စီမံခန့်ခွဲမှု အလွဲကြောင့် ယာဉ်ပိုင်ရှင်များ သတ်မှတ် ဆီ ပမာဏ မဝယ်ယူနိုင်

« Prev 1 … 84 85 86 87 88 … 1,113 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

တရုတ်နိုင်ငံခြားရေးဝန်ကြီး ဝမ်ယိ တောင်ကိုရီးယားနှင့် အင်ဒိုနီးရှားသို့ သွားမည် — August 19, 2026 2:17 pm
ဒုံးကျည်ဖြင့် တိုက်ခိုက်ခံရပြီးနောက် အီရန်အပေါ် UAE က ကုန်သွယ်ရေး ပိတ်ဆို့ — August 19, 2026 2:14 pm
ရုရှားတွင် ဘဏ်အပ်ငွေ ထုတ်ယူမှု စံချိန်တင် မြင့်တက် — August 19, 2026 2:11 pm

Recent Posts

တနင်္သာရီ လောင်းလုံးတွင် စစ်တပ်က ရမ်းသမ်းပစ်ခတ်၍ သားအဖ ၂ ဦး သေဆုံး
ဘန်ကောက် မြန်မာသံရုံးက PV ပတ်စပို့ သက်တမ်းတိုးခြင်း ရုတ်တရက် ရပ်ဆိုင်း
မောင်တော နယ်စပ်နှင့် မြို့တွင်း၌ AA လုံခြုံရေး တင်းကျပ်စွာ တိုးမြှင့်ထား
ပင်လည်ဘူးတွင် စစ်တပ်က ရက်ဆက် ဗုံးကြဲ၍ ကလေးငယ်အပါအဝင် ၉ ဦးထက်မနည်း သေဆုံး
ဝမ်းပျက်ဝမ်းလျှောရောဂါကြောင့် လူသေဆုံးမှု ရှိနေစဉ် စစ်တပ်က စစ်တွေကို လမ်းပိတ်ထား

Archives

Archives

×Close