သတင်း

မြဝတီတွင် စစ်ဘေးရှောင်စခန်း ဒရုန်းဖြင့် ဗုံးကြဲခံရ၍ ကလေးတစ်ဦးအပါအဝင် ၂ ဦး သေဆုံး သတင်းနှင့် မီဒီယာကွန်ရက်။ ၂၀၂၆ ခုနှစ်၊ စက်တင်ဘာလ ၈ ရက်။ ကရင်ပြည်၊ မြဝတီမြို့နယ်တောင်ပိုင်း၊ ဖလူးဒေသရှိ ပလောတပို့ (အမိုးပြာ) စစ်ဘေးရှောင်စခန်းကို စစ်အုပ်စု တပ်က ဒရုန်းဖြင့် ဗုံးကြဲတိုက်ခိုက်ခဲ့သဖြင့် အသက် ၄ နှစ်အရွယ် ကလေးငယ်တစ်ဦးနှင့် အမျိုးသမီးတစ်ဦး သေဆုံးခဲ့ကြောင်း လူ့အခွင့်အရေး အဖွဲ့အစည်းများ တာဝန်ရှိသူများနှင့် စခန်းတာဝန်ခံက ပြောသည်။ မြေပြင်တိုက်ပွဲဖြစ်ပွားခြင်း မရှိဘဲ စစ်ဘေးရှောင်များ နေ့လယ်စာ သုံးဆောင်နေချိန်၌ စစ်အုပ်စုတပ်က အဆိုပါ စစ်ဘေးရှောင်စခန်း တည့်တည့်ကို ဒရုန်းဖြင့် ပြီးခဲ့သည့် စက်တင်ဘာလ ၄ ရက် မွန်းလွဲ ၁ နာရီခန့်တွင် ဗုံးကြဲ တိုက်ခိုက်ခဲ့ခြင်းဖြစ်သည်။ မွန်ပြည်လူ့အခွင့်အရေး ဖောင်ဒေးရှင်း (Human Rights Foundation of MonLand) မှ ပရိုဂရမ် ဒါရိုက်တာ နိုင်အဲမွန်က “စစ်အုပ်စုရဲ့ ဒရုန်းဗုံးထိတာပါ။ ပလောတပို့စခန်းအနီး လမ်းမတန်းပေါ်ကို ကြဲချတာပါ။ ပထမတလုံးက လမ်းမတန်းဘေး အိမ်တအိမ်နားကျတယ်၊ နေအိမ်ထဲက ကလေး အစမှန်ပြီး နေရာမှာပဲ ဆုံးတယ်။ လည်ပင်းထိတာ။ နောက် အမျိုးသမီးတဦးက ဒုတိယကြဲတဲ့အလုံးကို ထိတယ်။ ကေ့စ်နှစ်ခုပေ့ါ။ နေရာနှစ်နေရာ။ နှစ်ဦးစလုံးက မိသားစု နှစ်စုက လာတာဖြစ်တယ်” ဟု ပြောသည်။ ဒရုန်းဖြင့် ဗုံးကြဲတိုက်ခိုက်ခံရမှုကြောင့် မင်းလက်ပံကျေးရွာမှ ပလောတပို့စခန်းသို့ စစ်ဘေးတိမ်းရှောင်လာသည့် အသက် ၄ နှစ်အရွယ် ကလေးငယ်မှာ အခင်းဖြစ်နေရာတွင် ပွဲချင်းပြီး သေဆုံးခဲ့ရသည်။ ထို့ပြင် နေအိမ်သို့ ပြေးဝင်ခိုလှုံသည့် အသက် ၄၀ အရွယ် အမျိုးသမီးတစ်ဦးလည်း ထပ်မံ ထိမှန်ခဲ့ပြီး မဲဆောက် ဆေးရုံသို့ ပို့ဆောင်ကုသစဉ် ထိုည ၇ နာရီခန့်တွင် သေဆုံးသွားခဲ့ကြောင်း သိရသည်။ စစ်အုပ်စုတပ်၏ လေကြောင်းနှင့် ဒရုန်းအန္တရာယ် စိန်ခေါ်မှုများနှင့် ပတ်သက်၍ မနိုင်အဲမွန်က ယခုကဲ့သို့ ဆက်ပြောသည်။ “နောက်ပိုင်း စွမ်းဆောင်ရည်မြင့် ဒရုန်းတွေနဲ့ လှည့်တိုက်တာ ပိုများလာတယ်။ အရင်လို လေယာဉ်နဲ့က တစ်ခါ တစ်လေပဲ ကင်းထောက်ပုံစံ ကြားတော့တယ်။ လက်နက်ကြီးနဲ့ အဝေးက နေလှမ်းပစ်တာတွေလည်း တချို့ ရှိတယ်။ စခန်းတိုင်းနဲ့ ရွာတွေမှာတော့ အခုနောက်ပိုင်း လုံခြုံရေးနဲ့ ကာကွယ်ရေး အစီအမံတွေ ပြင်ဆင်မှုတွေ ရှိလာခဲ့တာ တွေ့ရတယ်။ သို့သော် နေ့တဓူဝ လှုပ်ရှားမှုတွေကြား ရှောင်တခင် တိုက်ခိုက်မှုတွေကိုတော့ တုံပြန်နိုင်စွမ်းနည်းကြတယ်။ ဒါကြောင့်လည်း ထိခိုက်တာတွေ တိမ်းပါးတာတွေ ဖြစ်နေဆဲပါပဲ” ဟု ၎င်းက သုံးသပ်ပြောဆိုသည်။ အဆိုပါ ပလောတပို့ (အမိုးပြာ) စစ်ဘေးရှောင်စခန်းသည် ပြီးခဲ့သည့် ၂၀၂၁ ခုနှစ် ဒီဇဇင်ဘာလ တတိယအပတ် လေးကေ့ကော်မြို့သစ် တိုက်ပွဲအပြီးတွင် ယာယီစစ်ရှောင်တဲများအဖြစ်မှ စခန်းအဖြစ် တည်ထောင်လာခဲ့ခြင်း ဖြစ်သည်။ ပြီးခဲ့သည့် မတ်လ ၁၄ ရက်နေ့ကလည်း အဆိုပါ စစ်ဘေးရှောင်စခန်းကို စစ်အုပ်စုတပ်က ဒရုန်းဖြင့် တိုက်ခိုက်ခဲ့ သဖြင့် အမျိုးသားတစ်ဦး သေဆုံးပြီး ၂ ဦး ပြင်းထန်ဒဏ်ရာ ရရှိခဲ့သေးသည်။ လက်ရှိတွင် အဆိုပါ စခန်း၌ ကော့ကရိတ်မြို့နယ်အတွင်းရှိ နန်းရွှေမိတ်၊ မိဖာလဲ့၊ ထီဖိုးစံ၊ နောင်ကိုင်း၊ နောင်တပ္ပံ၊ မြပတိုင်၊ နောင်တပွဲနှင့် နောင်မိ စသည့် ကျေးရွာများမှ စစ်ဘေးရှောင် ပြည်သူများ လာရောက်ခိုလှုံလျက်ရှိ ကြောင်း စခန်းတာဝန်ခံများထံမှ သိရသည်။ ဓာတ်ပုံ – (Human Rights Foundation of MonLand) #မြဝတီ #HURFOM

မြဝတီတွင် စစ်ဘေးရှောင်စခန်း ဒရုန်းဖြင့် ဗုံးကြဲခံရ၍ ကလေးတစ်ဦးအပါအဝင် ၂ ဦး သေဆုံး

မြဝတီတွင် စစ်ဘေးရှောင်စခန်း ဒရုန်းဖြင့် ဗုံးကြဲခံရ၍ ကလေးတစ်ဦးအပါအဝင် ၂ ဦး သေဆုံး သတင်းနှင့် မီဒီယာကွန်ရက်။၂၀၂၆ ခုနှစ်၊ စက်တင်ဘာလ ၈ ရက်။ ကရင်ပြည်…

  • September 8, 2026
စစ်ကိုင်းတိုင်း ရေဦးတွင် တိုက်ပွဲမရှိဘဲ လေကြောင်းမှ ဗုံးကြဲခံရ၍ အရပ်သား ၇ ဦး သေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၈ ရက်။ စစ်ကိုင်းတိုင်း၊ ရေဦးမြို့နယ်အတွင်း မြေပြင်တိုက်ပွဲဖြစ်ပွားခြင်း မရှိဘဲ စစ်အုပ်စုတပ်က လေကြောင်းမှ ရည် ရွယ်ချက်ရှိရှိ ဗုံးကြဲပစ်ခတ်ခဲ့သဖြင့် အမျိုးသမီးတစ်ဦး အပါအဝင် ဒေသခံ အရပ်သားပြည်သူ ၇ ဦး ထက်မနည်း ပွဲချင်းပြီး သေဆုံးခဲ့ကြောင်း ဒေသခံ ပြည်သူ့ကာကွယ်ရေးတပ်ဖွဲ့ (ပကဖ)နှင့် ဒေသခံများက ပြောသည်။ စက်တင်ဘာလ ၇ ရက် ညနေ ၅ နာရီခန့်တွင် မုံရွာမြို့ အနောက်မြောက်တိုင်းစစ်ဌာနချုပ် (နမခ) မှ တက်လာ သည့် ဂျိုင်ရိုကော်ပတာ (Gyrocopter) များနှင့် Mi-35P တိုက်ခိုက်ရေး ရဟတ်ယာဉ်တို့သည် ရေဦးမြို့ နယ်၊ တင်းတိမ်ရံကျေးရွာရှိ ဈေးနှင့် ကပ်လျက်တည်ရှိသော ကားဝပ်ရှော့သို့ တည့်တည့် ဗုံးကြဲချခဲ့ခြင်း ဖြစ်သည်။ အဆိုပါ လေကြောင်း တိုက်ခိုက်မှုကြောင့် အသက် ၂၀ မှ ၅၀ နှစ်ကြားရှိ အမျိုးသမီးတစ်ဦးနှင့် အမျိုးသား ၆ ဦး နေရာတွင်ပင် သေဆုံးခဲ့ရပြီး နောက်ထပ် အမျိုးသား ၃ ဦး ဒဏ်ရာရရှိကာ ကားဝပ်ရှော့နှင့် ဈေးဆိုင်ခန်းအချို့ ပျက်စီးခဲ့ရသည်။ အလားတူ ကား ၁၀ ထက်မနည်းလည်း ပျက်စီးသွားခဲ့သည်။ ရေဦးမြို့နယ် ဒေသခံတစ်ဦးက “ဗုံးကြဲတာက ညနေ ၅ နာရီကျော်လောက်မှာ ဖြစ်တာပါ။ အရပ်သားတွေရှိတဲ့ ကားအလုပ်ရုံကို ဝပ်ရှော့နေရာကို ဂျိုင်ရိုကော်ပတာနိမ့်နိမ့်နဲ့ တည့်တည့်ကို လာကြဲသွားတာ။ ၇ ယောက် သေသွားတယ်။ လေယာဉ်ပေါ်ကနေ စက်သေနတ်တွေနဲ့ပါ လိုက်ပစ်တော့ ဘေးက အိမ်တွေလည်း မှန်တယ်။ ကြောက်လန့်ပြီး အရပ်သားတွေလည်း ဘေးလွတ်ရာကို ထွက်ပြေးနေကြရတယ်” ဟု ပြောသည်။ ထို့ပြင် အဆိုပါ လေကြောင်း တိုက်ခိုက်မှုအတွင်း လေယာဉ်ပေါ်မှပါ စက်လတ်များဖြင့် လိုက်လံပစ်ခတ်ခဲ့သဖြင့် ဒေသခံများ ဘေးလွတ်ရာသို့ ရွှေ့ပြောင်းတိမ်းရှောင်နေကြရသည်။ ရေဦးမြို့နယ် ပကဖ တာဝန်ရှိသူတစ်ဦးက “ကျနော်တို့ နယ်ဘက်မှာ စစ်တပ်က မြို့ပေါ်ကိုပဲ ထိန်းချုပ်ထားနိုင် တာ။ မြို့ ပတ်ဝန်းကျင် ရွာတွေကို စစ်တပ်က ထိန်းချုပ်နိုင်စွမ်း မရှိဘူး။ မြေပြင်မှာ တိုက်ပွဲမရှိ၊ တော်လှန်ရေး တပ်ဖွဲ့တွေ မရှိဘဲနဲ့ အခုလို အရပ်သားပစ်မှတ်တွေကို ရည်ရွယ်ချက်ရှိရှိ လေကြောင်းကနေ ဆက်တိုက် တိုက် ခိုက်နေတာပါ။ ပြည်သူတွေအနေနဲ့ လေကြောင်းသတင်းတွေကို အမြဲနားစိုပြီး ပုန်းခိုကျင်းတွေထဲ ကြိုတင် ဝင်ရောက်နေထိုင်ကြဖို့ သတိပေးချင်ပါတယ်” ဟု ပြောသည်။ တင်းတိမ်ရံကျေးရွာသည် စစ်အာဏာသိမ်းပြီးချိန်မှစ၍ စစ်အုပ်စုတပ် စစ်ကြောင်းများ၏ အကြိမ်ကြိမ် မီးရှို့ ဖျက်ဆီးခြင်း ခံခဲ့ရသလို စာသင်ကျောင်း အပါအဝင် ကျေးရွာအတွင်းသို့ လေကြောင်းမှ ဗုံးကြဲခံနေရသည့် ကျေးရွာလည်း ဖြစ်သည်။ စစ်အုပ်စုတပ်သည် စက်တင်ဘာလ ၇ ရက်နေ့၌ ရေဦးမြို့နယ် တင်းတိမ်ရံကျေးရွာအပြင် ချောင်းဦးမြို့နယ် အတွင်းသို့ပါ ဂျိုင်ရိုကော်ပတာများဖြင့် လေကြောင်းတိုက်ခိုက်မှု ပြုလုပ်ခဲ့သည်။ အလားတူ စက်တင်ဘာလ ၆ ရက်နေ့ကလည်း အနီးဝန်းကျင်ရှိ ကနီမြို့နယ်၊ ယာကြီးကျေးရွာအနီးတွင် စစ်အုပ်စု တပ်နှင့် ပြည်သူ့ကာကွယ်ရေးတပ်တို့ ထိတွေ့တိုက်ပွဲများ ဖြစ်ပွားခဲ့သည်။ စစ်အုပ်စုတပ်သည် မုံရွာ-ယာကြီး-ကလေး လမ်းပိုင်းကို အင်အား ၈၀၀ နီးပါးဖြင့် စစ်ကြောင်းထိုးနေသဖြင့် မုံရွာ-ယာကြီး-ကလေး ကားလမ်းဘေးဝဲယာရှိ ချောင်းမ၊ အောင်မင်္ဂလာ၊ သင့်ငံနှင့် ယာကြီးအုပ်စုအတွင်းရှိ ကျေးရွာ ၄ ရွာမှ ဒေသခံများ ဘေးလွတ်ရာသို့ ထွက်ပြေးတိမ်းရှောင်နေကြရသည်။ အဆိုပါ စစ်ကြောင်းသည် ယာကြီးကျေးရွာအုပ်စုအတွင်းရှိ ရွာမကျေးရွာနှင့် ရေဖြူကျေးရွာတို့တွင် တပ်စွဲကာ ဒဏ်ရာရ စစ်သည်များကို ဆေးကုသမှု ပေးနေပြီး အနီးနား ပတ်ဝန်းကျင်သို့ လက်နက်ကြီး၊ လက်နက်ငယ်များ ဖြင့် ရမ်းသန်းပစ်ခတ်လျက်ရှိသည်။ ဓာတ်ပုံ - (ဗုံးကြဲပစ်ခတ်မှုကြောင့် ပျက်စီးသွားသည့် အခြေအနေ မြင်ကွင်း / Crd) #စစ်ကိုင်းတိုင်း

စစ်ကိုင်းတိုင်း ရေဦးတွင် တိုက်ပွဲမရှိဘဲ လေကြောင်းမှ ဗုံးကြဲခံရ၍ အရပ်သား ၇ ဦး သေဆုံး

စစ်ကိုင်းတိုင်း ရေဦးတွင် တိုက်ပွဲမရှိဘဲ လေကြောင်းမှ ဗုံးကြဲခံရ၍ အရပ်သား ၇ ဦး သေဆုံး သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၈ ရက်။ စစ်က…

  • September 8, 2026
ဗန်းမော်-ရွှေကူ အစပ် ဧရာဝတီမြစ်ကူးတံတားကို စစ်တပ် ဗုံးကြဲ၍ ရထားလမ်းနှင့် ကားလမ်း ပျက်စီး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၇ ရက်။ ကချင်ပြည်၊ ဗန်းမော်မြို့နယ်နှင့် ရွှေကူမြို့နယ်အစပ်ရှိ လမ်းပန်းဆက်သွယ်ရေးနှင့် စစ်ရေးအရ အရေးပါသော စင်းခန်း ဧရာဝတီမြစ်ကူး သံမဏိသံဘောင်တံတားကို စစ်အုပ်စုတပ်က လေကြောင်းမှ ပေါင် ၅၀၀ ဗုံးများဖြင့် ကြဲချဖျက်ဆီးခဲ့သဖြင့် တံတားပေါ်ရှိ ရထားလမ်းနှင့် ကားလမ်းများ ထိခိုက်ပျက်စီးသွားခဲ့သည်။ ဗန်းမော်မြို့သို့ ရေကြောင်းမှ စစ်ကူနှင့် လက်နက်ရိက္ခာ ပို့ဆောင်သည့် စစ်အုပ်စု၏ စစ်သင်္ဘောတန်းများမှာ စင်းခန်းတံတားအနီး၌ တိုက်ခိုက်ခံရပြီး တပ်ဖွဲ့ဝင်အချို့ အလံဖြူထောင် အလင်းဝင်ခဲ့ပြီးနောက် စစ်အုပ်စုတပ်က အဆိုပါ မြစ်ကူးတံတားကို ဂျက်ဖိုက်တာဖြင့် ပေါင် ၅၀၀ ဗုံးနှစ်လုံး ကြဲချဖျက်ဆီးခဲ့ခြင်းဖြစ်သည်။ လေကြောင်းတိုက်ခိုက်မှုကြောင့် တံတား၏ အရှေ့ဘက်ခြေရင်းပိုင်းရှိ သံဘောင်များ ပျက်စီးသွားပြီး ကားတစ်စီး စာခန့် တံတားကြမ်းပြင် ပေါက်ထွက်သွားသည့်အပြင် ရထားသံလမ်းပါ လုံးဝအသုံးပြု၍ မရတော့သည်အထိ ထိခိုက်ပျက်စီးခဲ့ရသည်။ လက်ရှိ မြေပြင်အခြေအနေနှင့် ပတ်သက်၍ ဗန်းမော်ဒေသခံတစ်ဦးက ”စင်းခန်းတံတားဆိုတာ ကသာ၊ ဗန်းမော် နဲ့ စစ်ကိုင်း၊ ရှမ်းမြောက်ဘက်ကို ဆက်ထားတဲ့ အဓိက သွေးကြောပဲ။ ရထားရော ကားပါ သွားလို့ရတဲ့ တံတား ကို အခုလို ဖျက်ဆီးလိုက်တော့ စစ်အုပ်စုထက် စားဝတ်နေရေးနဲ့ ခရီးသွားလာရေးအတွက် ဒေသခံ ပြည်သူတွေ ပဲ ပိုဒုက္ခရောက်ကုန်တာ။ အခုလည်း အနားမှာ တိုက်ပွဲတွေ ဆက်ဖြစ်နေတော့ မြေပြင်မှာ သွားကြည့်ဖို့တောင် မလွယ်ဘူး” ဟု ပြောသည်။ စင်းခန်းဒေသသည် ဧရာဝတီမြစ်ကြောင်းအတိုင်း မန္တလေးမှ ဗန်းမော်သို့ ဆန်တက်လာသည့် ရေယာဉ်များ ဖြတ် သန်းရသော ဒုတိယမြစ်ကျဉ်းအနီးတွင် တည်ရှိသဖြင့် ကုန်းလမ်းရော ရေလမ်းပါ စစ်ရေးအရ အလွန်အရေးပါ သည့် နေရာတစ်ခု ဖြစ်သည်။ စင်းခန်းဒေသ စစ်ရေးအခြေအနေနှင့် ပတ်သက်၍ ဗန်းမော်ဒေသ အခြေစိုက် တော်လှန်ရေးတပ်ဖွဲ့ဝင်တစ်ဦးက ”စင်းခန်းနားမှာ တိုက်ခိုက်ခံရလို့ ကျန်ခဲ့တဲ့ စစ်သားတွေအပြင် ဝဲမ၊ ဆင်စခန်းနဲ့ နောင်မိုဘက်က ဒီကောင် (စစ်အုပ်စုတပ်) တွေဘက်က တပ်မဟာ ၈ နယ်မြေမှာ နယ်မြေရှင်းလင်းရေး ဆက်လုပ်နေတာပါ။ သူတို့ဘက် က ရေကြောင်း စစ်ကူတွေ တိုက်ခိုက်ခံရပြီး အလင်းဝင်တာတွေ ရှိလာတော့မှ ဒီအဓိက တံတားကို လေယာဉ်နဲ့ ဗုံးကြဲဖျက်ဆီး သွားတာ ဖြစ်ပါတယ်” ဟု သုံးသပ်ပြောဆိုသည်။ လက်ရှိတွင် မန္တလေးဘက်မှ ဗန်းမော်သို့ စစ်အုပ်စု၏ ရေယာဉ်တန်းများ ထပ်မံဆန်တက်လာနေသလို ရွှေကူနှင့် ဗန်းမော်မြို့နယ်အကြားတွင် ကချင်လွတ်လပ်ရေးတပ်မတော် (KIA) ပူးပေါင်းတပ်များနှင့် စစ်အုပ်စုတပ်တို့ အကြား တိုက်ပွဲများ ဆက်လက် ပြင်းထန်လျက်ရှိသည်။ #ရွှေကူ #ဗန်းမော် #ဧရာဝတီမြစ်ကူးတံတား

ဗန်းမော်-ရွှေကူ အစပ် ဧရာဝတီမြစ်ကူးတံတားကို စစ်တပ် ဗုံးကြဲ၍ ရထားလမ်းနှင့် ကားလမ်း ပျက်စီး

ဗန်းမော်-ရွှေကူ အစပ် ဧရာဝတီမြစ်ကူးတံတားကို စစ်တပ် ဗုံးကြဲ၍ ရထားလမ်းနှင့် ကားလမ်း ပျက်စီး သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၇ ရက်။ …

  • September 7, 2026
မကွေးတိုင်း မင်းတုန်းတွင် တိုက်ပွဲမရှိဘဲ စစ်တပ် ဗုံးကြဲ၍ စစ်ဘေးရှောင်တစ်ဦး သေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၇ ရက်။ မကွေးတိုင်း၊ မင်းတုန်းမြို့နယ်၊ မဲဇလီကျေးရွာရှိ လူနေအိမ်များကို စစ်အုပ်စုတပ်က တိုက်ပွဲဖြစ်ပွားခြင်းမရှိဘဲ လေကြောင်းနှင့် ပါရာမော်တာများအသုံးပြုကာ ဗုံးကြဲပစ်ခတ်ခဲ့သဖြင့် စစ်ဘေးရှောင် အမျိုးသမီးတစ်ဦး သေဆုံးပြီး နောက်ထပ် အမျိုးသမီးတစ်ဦး ပြင်းထန်ဒဏ်ရာရရှိခဲ့သည်။ စက်တင်ဘာ ၆ ရက်နေ့၊ မွန်းလွဲ ၂ နာရီခွဲခန့်တွင် မဲဇလီတံတား မြောက်ဘက် ပုသိမ်-မုံရွာ လမ်းဘေးရှိ နေအိမ် များကို လေယာဉ်ဖြင့် ဗုံးကြဲခဲ့ပြီး မိနစ် ၃၀ အကြာတွင် ပါရာမော်တာ ၂ စီးဖြင့် ထပ်မံဗုံးကြဲကာ စက်သေနတ်ဖြင့် ပစ်ခတ်ခဲ့ခြင်းဖြစ်သည်။ အဆိုပါ လေကြောင်းတိုက်ခိုက်မှုကြောင့် ပန်းတောင်းမြို့နယ်၊ အာရက္ခတပ်တော် (AA) ထိန်းချုပ်ထားသည့် ညောင်ကျိုးကျေးရွာမှ မဲဇလီရွာသို့ စစ်ဘေးရှောင်လာပြီး အိမ်ငှားနေထိုင်သည့် အမျိုးသမီးတစ်ဦး ပြင်းထန် ဒဏ်ရာရရှိကာ ညနေပိုင်းတွင် သေဆုံးသွားခဲ့ပြီး အခြားအမျိုးသမီးတစ်ဦးလည်း ဒဏ်ရာပြင်းထန်စွာ ရရှိခဲ့သည်။ လေကြောင်းမှ လာရောက်တိုက်ခိုက်သည့် အခြေအနေနှင့် ပတ်သက်၍ အသက် ၄၀ အရွယ် ဒေသခံအမျိုး သမီး တစ်ဦးက ”ပထမလေယာဥ်နဲ့ဗုံးတလုံးချတော့ တံတားထိပ်က ရဲအုပ်ပိုင်ဆိုင်ခဲ့တဲ့ အိမ်ကိုကျတယ်။ လမ်းတစ် ဘက် မျက်နှာချင်းဆိုင်က အိမ်တွေပါ ပျက်စီးတယ်။ လမ်းတလျှော က်အိမ်တွေ သေနတ်မှန်တယ်” ဟု ပြော သည်။ ထို့ပြင် အဆိုပါ တိုက်ခိုက်မှုတွင် အသုံးပြုခဲ့သည့် ပါရာမော်တာများနှင့် ပတ်သက်၍ အသက် ၅၀ အရွယ် မြို့ခံ တစ်ဦးက ”ပါရာမော်တာတွေက နတ်မောက်တောင်ဘက်က လာတာဆိုတော့ သရက် ကပစ - ၁၂ က တက်လာ တာဖြစ်ဖို့ များတယ်။ မင်းတုန်းမြို့ကို ပါရာမော်တာ ရောက်တာ မကြားမိသေးဘူး” ဟု ပြောသည်။ အဆိုပါ တိုက်ခိုက်မှုသည် မဲဇလီရွာမကြီးကို ထိခိုက်မှုမရှိဘဲ တော်လှန်ရေး တပ်ဖွဲ့ဝင်များ သွားလာတတ်သည့် မြောက်ဘက်ခြမ်းကို ပစ်မှတ်ထားခြင်းဖြစ်ကြောင်း ဒေသခံများက သုံးသပ်ကြသည်။ လေကြောင်းတိုက်ခိုက်မှု အပြီးတွင် စစ်အုပ်စု၏ မြေပြင်စစ်ကြောင်း ဝင်ရောက်လာမည်ဟူသော သတင်းများ ကြောင့် မဲဇလီနှင့် တဆက်တစပ်တည်းရှိသည့် သရက်အုပ်၊ ဒါးလည်ပြင်၊ မဲဇလီရွာမကြီးတို့မှ အမျိုးသမီးများ၊ သက်ကြီးရွယ်အိုများနှင့် ကလေးသူငယ်များသည် ဘေးလွတ်ရာသို့ တိမ်းရှောင်နေကြရသည်။ မကွေးတိုင်း၊ သရက်ခရိုင်အတွင်းရှိ ကံမ၊ မင်းတုန်းနှင့် မင်းလှ မြို့နယ်များကို ဖြတ်သန်းသွားသည့် ပုသိမ်-မုံရွာ လမ်းမကြီးကို တော်လှန်ရေးတပ်ဖွဲ့များက နေရာအများစုတွင် စိုးမိုးထားပြီး စစ်အုပ်စုတပ်ဘက်က နေရာအနည်း ငယ်၌သာ စိုးမိုးနိုင်တော့ကြောင်း ဒေသခံများက ပြောသည်။ ဓါတ်ပုံ - (ပုံဟောင်း / လေကြောင်းတိုက်ခိုက်မှုအပြီး ပျက်စီးသွားသော ပတ်ဝန်းကျင်ကို ၂၀၂၆ ခုနှစ်၊ မတ်လ ၁ ရက်က တွေ့ရစဉ်။) #မင်းတုန်းမြို့နယ် #မဲဇလီကျေးရွာ

မကွေးတိုင်း မင်းတုန်းတွင် တိုက်ပွဲမရှိဘဲ စစ်တပ် ဗုံးကြဲ၍ စစ်ဘေးရှောင်တစ်ဦး သေဆုံး

မကွေးတိုင်း မင်းတုန်းတွင် တိုက်ပွဲမရှိဘဲ စစ်တပ် ဗုံးကြဲ၍ စစ်ဘေးရှောင်တစ်ဦး သေဆုံး သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၇ ရက်။ မကွေးတ…

  • September 7, 2026
တရားမဝင် ပြည်ပလူပို့ဆောင်သည့် အမျိုးသမီး ၂ ဦးကို AA ဖမ်းဆီးအရေးယူ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၇ ရက်။ ရခိုင်ပြည်အတွင်း ပြည်ပသို့ သွားရောက်အလုပ်လုပ်ရန် အကျိုးဆောင်လိုင်စင်မရှိဘဲ တရားမဝင် ဆောင်ရွက် ပေးနေသူများကို AA က လိုက်လံဖမ်းဆီးလျက်ရှိရာ မြောက်ဦးနှင့် ပလက်ဝမြို့နယ်တို့တွင် အမျိုးသမီး ၂ ဦးကို ဖမ်းဆီးအရေးယူထားသည်။ မြောက်ဦးမြို့နယ်နှင့် ပလက်ဝမြို့နယ်တို့တွင် အကျိုးဆောင်လိုင်စင်မရှိဘဲ ပြည်ပ၌ အလုပ်လုပ်ရန် တရားမဝင် လူပို့ဆောင်နေသည့် အမျိုးသမီး ၂ ဦးအား ပြည်ပအလုပ်အကိုင်ဆိုင်ရာ ဥပဒေပုဒ်မ (၂၆) ဖြင့် ဒီလပ် (မြို့မ ရဲစခန်း) က ဩဂုတ်လ ၃၀ ရက်တွင် အမှုဖွင့် အရေးယူထားခြင်း ဖြစ်သည်။ အဆိုပါ တရားခံများကို ဩဂုတ်လ ၁၀ ရက်နှင့် ၁၄ ရက်တို့တွင် ချင်းပြည်နယ်၊ ကျင်ဒွေးမြို့နှင့် မြောက်ဦးမြို့ နယ်၊ အိုးထိမ်းရွာတို့၌ အသီးသီး ဖမ်းဆီးရမိခဲ့ခြင်းဖြစ်သည်။ မြောက်ဦးမြို့နယ်၊ အိုးထိမ်းရွာနေ အသက် ၃၀ နှစ်အရွယ်၊ မယဉ်ယဉ်ဝင်း နှင့် ပလက်ဝမြို့နယ်၊ ဟုန်းရွာနေ အသက် ၂၀ အရွယ် မခိုင်မြတ်မွန်တို့သည် ပြည်ပသို့ လူပို့ဆောင်သည့် အလုပ်ကို လုပ်ကိုင်ရန် နှစ်ဦးသဘောတူ ညီချက်ဖြင့် ပြည်ပနိုင်ငံများနှင့် ရန်ကုန်မြို့သို့ သွားလိုသူများကို ရှာဖွေပေးနေစဉ် ဩဂုတ်လ ၁၀ ရက် ညပိုင်းတွင် ကျင်ဒွေးမြို့ရှိ နေအိမ်တစ်အိမ်၌ အာရက္ခတပ်တော် ထောက်လှမ်းရေးဌာနက ဖမ်းဆီးခဲ့ခြင်းဖြစ်သည်။ ထိုသို့ ဖမ်းဆီးထိန်းသိမ်းပြီးနောက် ဥပဒေအရ အရေးယူဆောင်ရွက်နိုင်ရန် မြောက်ဦးမြို့မ ဒီလပ်စခန်းသို့ လွှဲပြောင်းအပ်နှံခဲ့ပြီး အကျိုးဆောင်လိုင်စင်မရှိဘဲ ငွေကြေးရယူကာ ပြည်ပသို့ ပို့ဆောင်သူများကို ပြည်ပ အလုပ်အကိုင်ဆိုင်ရာ ဥပဒေပုဒ်မ (၂၆) ဖြင့် အမှုဖွင့် အရေးယူခဲ့သည်။ ဒေသခံ ကုန်သည်အမျိုးသမီးတစ်ဦးက “ကျမတို့ကြားပါတယ် အခုကုန်သည်တွေကိုပါ စစ်ဆေးတာတွေ လုပ် မယ်လို့ ကြားထားတယ်။ အကျိုးဆောင် လိုင်စင်လုပ်ဖို့ သူတို့သက်ဆိုင်ရာနဲ့ စကားပြောရမယ်လို့ သိထား တယ်။ အခုက ရှင်းရှင်းလင်းလင်းသိဖို့လည်း လိုပါတယ်။ အေအေဘက်ကလည်း ပြည်တွင်းက ထွက်ခွာသူတွေ ကို စိစစ်နေတဲ့ ကာလဆိုတော့ သတိထားရပါတယ်။ ကုန်သည်တွေနဲ့ လိုက်ပြီး ပြည်မကို ဒါမှမဟုတ် နိုင်ငံခြား ကို ပလက်ဝက တဆင့် ထွက်တဲ့သူတွေ ရှိနေပါတယ်” ဟု ပြောသည်။ လက်ရှိတွင် စုစုပေါင်း ဖမ်းဆီးခံရသူ အမျိုးသမီး ၆ ဦးရှိပြီး ၎င်းတို့အနက် အလုပ်အကိုင်ရှာဖွေရေး လိုင်စင် မရှိဘဲ အခကြေးငွေယူ၍ ရခိုင်ပြည်ပြင်ပသို့ သယ်ယူပို့ဆောင်ပေးသူ အမျိုးသမီး ၂ ဦးကို ပြည်ပ အလုပ်အကိုင် ဆိုင်ရာ ဥပဒေပုဒ်မဖြင့် တရားစွဲဆိုထားသည်။ ရခိုင်ပြည်ပြင်ပသို့ ထွက်ခွာရန် ကြိုးစားသူ အမျိုးသမီး ၄ ဦးအနက် ၂ ဦးမှာ မလေးရှားနိုင်ငံသို့ သွားရောက်မည် ဖြစ်ပြီး တစ်ဦးလျှင် ပွဲစားခ သိန်း ၅၀ ပေးအပ်ထားရသူများဖြစ်ကာ ကျန် ၂ ဦးမှာ ရန်ကုန်မြို့သို့ သွားရောက်မည် ဖြစ်ပြီး ပွဲစားလုပ်သူနှင့် အမျိုးတော်စပ်သည့်အတွက် ငွေကြေးပေးရန် မလိုဘဲ လိုက်ပါလာသူများဖြစ်ကြောင်း စက်တင်ဘာ ၆ ရက်နေ့တွင် AA က ထုတ်ပြန်ထားသည်။ ပြည်ပအလုပ်အကိုင် ရှာဖွေသူများ အလုပ်ရရှိရေးအတွက် သတ်မှတ်သည့် ဝန်ဆောင်ခရယူ၍ ကိုယ်စားလှယ် အဖြစ် ဆောင်ရွက်ပေးသည့် ပုဂ္ဂိုလ် သို့မဟုတ် အဖွဲ့အစည်းများအနေဖြင့် အကျိုးဆောင်လုပ်ငန်း လုပ်ကိုင်လိုပါ က လိုင်စင်ထုတ်ပေးရန် သက်ဆိုင်ရာ ဦးစီးဌာနသို့ သတ်မှတ်ချက်များနှင့်အညီ လျှောက်ထားရမည်ဟုလည်း AA က ထုတ်ပြန်ထားသည်။ #မြောက်ဦးမြို့နယ် #

တရားမဝင် ပြည်ပလူပို့ဆောင်သည့် အမျိုးသမီး ၂ ဦးကို AA ဖမ်းဆီးအရေးယူ

တရားမဝင် ပြည်ပလူပို့ဆောင်သည့် အမျိုးသမီး ၂ ဦးကို AA ဖမ်းဆီးအရေးယူ သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၇ ရက်။ ရခိုင်ပြည်အတွင်း ပြည်ပ…

  • September 7, 2026
ကရင်နီတွင် စစ်တပ် ဗုံးကြဲမှုကြောင့် ကလေးငယ်များအပါအဝင် ၁၁ ဦးသေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၇ ရက်။ ကရင်နီပြည်အတွင်း တိုက်ပွဲဖြစ်ပွားခြင်းမရှိသည့် အရပ်သားကျေးရွာများနှင့် စစ်ဘေးရှောင်စခန်းများကို စစ်တပ်က လေကြောင်းနှင့် ဒရုန်းများအသုံးပြုကာ နေ့စဉ်နီးပါး ဗုံးကြဲတိုက်ခိုက်နေခြင်းကြောင့် စက်တင်ဘာလ ဆန်းပိုင်းအတွင်း ကလေးငယ်များအပါအဝင် ဒေသခံ ၁၁ ဦး ထက်မနည်း သေဆုံးပြီး ၃၅ ဦးထက်မနည်း ဒဏ်ရာ ရရှိခဲ့သည်။ စက်တင်ဘာ ၅ ရက်နှင့် ၆ ရက်တို့တွင် ရှားတော (ဆိုမိုဖရေစိုးလေး) မြို့နယ်နှင့် လွိုင်ကော်မြို့နယ် အရှေ့ဘက် ခြမ်းရှိ လူထုနေထိုင်ရာ နေရာများကို စစ်အုပ်စုတပ်က လေကြောင်းမှ ဗုံးကြဲတိုက်ခိုက်ခဲ့သဖြင့် အသက် ၁၁ နှစ်၊ ၁၃ နှစ်နှင့် ၁၄ နှစ်အရွယ် ကလေးငယ် ၃ ဦးအပါအဝင် ပြည်သူ ၅ ဦး သေဆုံးခဲ့ရပြီး ကလေး ၃ ဦးအပါအဝင် ၁၅ ဦး ထိခိုက်ဒဏ်ရာ ရရှိခဲ့သည်။ အဆိုပါ လေကြောင်းတိုက်ခိုက်မှုနှင့် ပတ်သက်၍ မြေပြင်၌ အကူအညီပေးနေသူ ဒေသခံတစ်ဦးက “တိုက်ပွဲ ဖြစ် တာလည်း မဟုတ်ဘူး။ ရွာထဲကို လေယာဉ်နဲ့ တန်းဗုံးကြဲသွားတာ။ ကလေးတွေနဲ့ အမျိုးသမီးတွေပဲ ဗုံးစထိပြီး သေကုန်ကြရတာ။ ခုဆို ရွာမှာ ဘယ်သူမှ မနေရဲကြတော့ဘဲ ဘေးလွတ်ရာ တောထဲတွေဘက် ပြေးနေကြ ရတယ်” ဟု ပြောသည်။ ထို့ပြင် စက်တင်ဘာ ၆ ရက် ညနေ ၅ နာရီဝန်းကျင်တွင်လည်း လွိုင်ကော်မြို့နယ် အရှေ့ဘက်ခြမ်းရှိ စစ်ဘေး ရှောင်စခန်းများနှင့် ကျေးရွာများကို စစ်အုပ်စုတပ်က လေယာဉ်ဖြင့် ၃ ကြိမ်ထက်မနည်း ဗုံးကြဲခဲ့သလို ဒရုန်းများ ဖြင့်ပါ လာရောက်တိုက်ခိုက်ခဲ့သဖြင့် ဖုန်းဆိုင်တစ်ဆိုင်နှင့် လူနေအိမ်၊ ဘုန်းကြီးကျောင်းများ ထိမှန်ပျက်စီးခဲ့ရ သည်။ စက်တင်ဘာ ၁ ရက်နေ့ကလည်း မော်ချီးဒေသ၌ လေကြောင်းတိုက်ခိုက်မှုကြောင့် ကလေးငယ်များအပါအဝင် ၆ ဦး သေဆုံးခဲ့ရသလို၊ စက်တင်ဘာ ၄ ရက်နေ့ လွိုင်ကော်အရှေ့ခြမ်း ဗုံးကြဲခံရမှုတွင် စာသင်ကျောင်း၊ ဘုန်းကြီး ကျောင်းနှင့် လူနေအိမ် အများအပြား ပျက်စီးခဲ့ရသည်။ လွိုင်ကော်အရှေ့ခြမ်းမှ ဒေသခံတစ်ဦးက “စစ်အုပ်စုက စစ်ရေးနဲ့မဆိုင်တဲ့ စာသင်ကျောင်း၊ ဘုန်းကြီးကျောင်း နားတွေကိုပဲ ပစ်မှတ်ထားနေတာ။ ဖရူဆိုဘက်မှာဆိုရင်လည်း လက်နက်ကြီးတွေနဲ့ ဒရုန်းတွေ ခဏခဏကြဲနေ တော့ တောင်သူတွေ တောင်ယာတောင် မသွားရဲကြဘူး။ လေကြောင်းသတိပေးချက် ထုတ်တာတွေကိုပဲ အမြဲနားစွင့်နေရတယ်” ဟု ပြောသည်။ လွိုင်ကော်မြို့နယ်အတွင်း စက်တင်ဘာလအစောပိုင်းမှစ၍ စစ်အုပ်စုတပ်နှင့် တော်လှန်ရေးတပ်ဖွဲ့များအကြား ထိတွေ့တိုက်ပွဲအချို့ ဖြစ်ပွားခဲ့သော်လည်း စစ်ရေးအခြေအနေ သတင်းအလက်များအား သက်ဆိုင်ရာ တော်လှန် ရေးတပ်ဖွဲ့များဘက်က တစ်စုံတစ်ရာ တရားဝင်ထုတ်ပြန်ခြင်း မရှိသေးပေ။ ထိုသို့ စစ်အုပ်စုတပ်က စစ်ရေးပစ်မှတ် မဟုတ်သည့် အရပ်သားပြည်သူများ ရာနှင့်ချီ ခိုလှုံနေသည့် စစ်ဘေး ရှောင်စခန်းများနှင့် ကျေးရွာများကို ပစ်မှတ်ထား တိုက်ခိုက်နေခြင်းကြောင့် လေကြောင်းအန္တရာယ် သတိပေး ချက်များကို အစဉ်မပြတ် ဂရုစိုက်ကြရန် ကရင်နီတော်လှန်ရေး တပ်ဖွဲ့များက သတိပေးနှိုးဆော်ထားသည်။ #လွိုင်ကော်

ကရင်နီတွင် စစ်တပ် ဗုံးကြဲမှုကြောင့် ကလေးငယ်များအပါအဝင် ၁၁ ဦးသေဆုံး

ကရင်နီတွင် စစ်တပ် ဗုံးကြဲမှုကြောင့် ကလေးငယ်များအပါအဝင် ၁၁ ဦးသေဆုံး သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၇ ရက်။ ကရင်နီပြည်အတွင်း တိုက…

  • September 7, 2026
ကျောက်တော်တွင် သက်ငယ် မုဒိန်းမှု ကျူးလွန်သူအား AA တရားရုံးက ထောင်ဒဏ် နှစ် ၃၀ ချမှတ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၇ ရက်။ ရခိုင်ပြည်၊ ကျောက်တော်မြို့နယ်တွင် အသက် ၁၄ နှစ်အရွယ် မိန်းကလေးတစ်ဦးအား အဓမ္မပြုကျင့်ခဲ့သူကို အလုပ်ကြမ်းနှင့် ထောင်ဒဏ် အနှစ် ၃၀ ချမှတ်လိုက်ကြောင်း အာရက္ခပြည်သူ့တော်လှန်ရေးအစိုးရ၏ အာရက္ခမှု ခင်းနှင့် ဆက်စပ်သတင်းများ ထုတ်ပြန်ရေးအဖွဲ့က စက်တင်ဘာလ ၆ ရက်တွင် သတင်းထုတ်ပြန်သည်။ ထောင်ဒဏ်ချမှတ်ခံရသူ ကျောက်တော်မြို့နယ်၊ သိန်းတန်ကျေးရွာနေ အသက် ၅၅ နှစ်အရွယ် ဦးမောင်အေးလှ (အဖ-ဦးစိန်ထွန်းမောင်) သည် ကျောက်တလုံးရွာနေ အသက် ၁၄ နှစ်အရွယ် မိန်းကလေးအား မုဒိမ်းမှုအပြင် ဓမ္မတာနှင့် ဆန့်ကျင်သည့် ကာမစပ်ယှက်ခြင်းများကို အတင်းအဓမ္မ ကျူးလွန်ကြောင်း စစ်ဆေးပေါ်ပေါက်ခဲ့ခြင်း ဖြစ်သည်။ ထို့ကြောင့် တရားခံ ဦးမောင်အေးလှ ကျူးလွန်ခဲ့သော ပြစ်မှုများအတွက် မြောက်ဦးခရိုင် တရားရုံးက ရာဇသတ် ကြီးပုဒ်မ ၃၇၆ (မုဒိမ်းမှု) အတွက် အလုပ်ကြမ်းနှင့် ထောင်ဒဏ် အနှစ် ၂၀၊ ရာဇသတ်ကြီးပုဒ်မ ၃၇၇ (ဓမ္မတာနှင့် ဆန့်ကျင်သည့် ကာမစပ်ယှက်ခြင်း) အတွက် အလုပ်ကြမ်းနှင့် ထောင်ဒဏ် ၁၀ နှစ် အမိန့်ချမှတ်ခဲ့သည်။ အဆိုပါ ပြစ်ဒဏ်များကို ကျူးလွန်သည့် တရားခံအား သီးခြားစီ ကျခံစေရန် မြောက်ဦးခရိုင် တရားရုံးက အမိန့်ချ မှတ်လိုက်ခြင်း ဖြစ်သည်။ ရခိုင်ပြည်အတွင်း နေထိုင်သည့် ရှေ့နေအမျိုးသမီးတစ်ဦးက ”လက်ရှိအားလုံးလည်း ကြားမှာပါ ဒီကလေးသူငယ် အပါအဝင် မုဒိမ်းမှုတွေကို တပ်တော်က အထူးတရားရုံးနဲ့ပါ ဆောင်ရွက်မယ်လို့ သိရပါတယ်။ ရခိုင်ပြည်ထဲမှာ ရှိနေတဲ့ ကျမတို့တွေကလည်း တရားမျှတအောင် ကြိုးစားပါမယ်။ တချို့ ကျေးရွာအုပ်စုလိုက် အမျိုးသမီး တွေကို ချိတ်ဆက်ပြီး ဒီလိုမျိုးအမှုတွေ ပေါ်ပေါက်ရင် ရဲရဲဝံ့ဝံ့ ဆောင်ရွက်ဖို့ တောင်းဆိုကြဖို့လည်း ပြောဆိုကြ ပါတယ်။ အသိပညာပေးမှုတွေအပြင် မြန်ဆန်အောင် ထိရောက်အောင်လုပ်ရမှာပါ” ဟု ပြောသည်။ ထို့ပြင် အမျိုးသမီးများနှင့် ကလေးသူငယ်များအပေါ် ကျူးလွန်သည့် မုဒိမ်းမှုနှင့် လိင်ပိုင်းဆိုင်ရာ အကြမ်းဖက်မှု များကို တရားဥပဒေအရ ထိရောက်စွာ အရေးယူဆောင်ရွက်နေကြောင်းလည်း အာရက္ခတပ်တော် (AA) က ထုတ်ပြန်ထားသည်။ ယခုအမှုမှာ ပြီးခဲ့သည့် ၂၀၂၆ ခုနှစ်၊ ဧပြီလ ၇ ရက်က ရမ်းချောင်းဒေသအတွင်း ဥယျာဉ်ခြံတစ်ခုတွင် အစောင့် လုပ်ကိုင်နေသည့် အသက် ၁၄ နှစ်အရွယ် မိန်းကလေးငယ်ကို ဥယျာဉ်ခြံပိုင်ရှင် ဦးမောင်အေးလှက အတင်းအဓမ္မ ပြုကျင့်ခဲ့ခြင်းဖြစ်သည်။ မိသားစုများက မေလ ၁၅ ရက်တွင် သက်ဆိုင်ရာသို့ တိုင်ကြားခဲ့ပြီးနောက် ကျူးလွန်သူ ဦးမောင်အေးလှသည် ထွက်ပြေးတိမ်းရှောင်ခဲ့သည်။ ထို့နောက် ၎င်းအား ဇူလိုင်လ ၃၀ ရက်တွင် နေအိမ်၌ ဒီလပ် (မြို့မရဲစခန်း) က ဖမ်းဆီးရမိခဲ့ပြီး အမှုကို စုံစမ်းစစ် ဆေးကာ လက်ရှိတွင် အလုပ်ကြမ်းနှင့် ထောင်ဒဏ် နှစ် ၃၀ ချမှတ်လိုက်ခြင်းဖြစ်သည်။ #ကျောက်တော် #သက်ငယ်မုဒိမ်း

ကျောက်တော်တွင် သက်ငယ် မုဒိန်းမှု ကျူးလွန်သူအား AA တရားရုံးက ထောင်ဒဏ် နှစ် ၃၀ ချမှတ်

ကျောက်တော်တွင် သက်ငယ် မုဒိန်းမှု ကျူးလွန်သူအား AA တရားရုံးက ထောင်ဒဏ် နှစ် ၃၀ ချမှတ် သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၇ ရက်။ ရခို…

  • September 7, 2026
ချင်းပြည်နယ် မြို့အချို့ကို ပြန်ရသော်လည်း စစ်အုပ်စု စိုးမိုးနိုင်ခြင်းမရှိဟု ဆို သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၇ ရက်။ စစ်အုပ်စုက ချင်းပြည်ရှိ မြို့အချို့ကို ပြန်လည် ထိန်းချုပ်ထားနိုင်သော်လည်း ၎င်းတို့၏ အုပ်ချုပ်ရေး သက် ရောက်မှုသည် ဒေသတစ်ခုလုံးကို လွှမ်းခြုံနိုင်ခြင်း မရှိဘဲ ချင်းတော်လှန်ရေး အဖွဲ့အစည်းများကသာ နေရာ အတော်များများကို ထိန်းချုပ်ထားဆဲ ဖြစ်သည်ဟု ချင်းပြည် ချင်းလဲန်းကောင်စီက ပြောဆိုလိုက်သည်။ ဩဂုတ်လ ၂၈ ရက်နေ့က ပြုလုပ်သည့် “ချင်းပြည်သူတို့၏ ကိုယ်ပိုင်ပြဋ္ဌာန်းခွင့်ကို ကျင့်သုံးပြီး နှစ်နှစ်ခွဲကာလ အတွင်း အုပ်ချုပ်ရေးဖော်ဆောင်မှု အစီရင်ခံစာ” သတင်းရှင်းလင်းပွဲတွင် ချင်းပြည် ချင်းလဲန်းကောင်စီ တာဝန်ရှိ သူများက ထိုသို့ ထည့်သွင်း ပြောဆိုခဲ့ခြင်းဖြစ်သည်။ ချင်းပြည် ချင်းလဲန်းအစိုးရ နိုင်ငံခြားရေးဝန်ကြီး ဒေါက်တာရွှေခါးရ်က “အရင်ကတည်းကနေ တချို့မြို့တွေမှ အပ ရွာတွေမှာက နေပြည်တော်ရဲ့ ဩဇာသက်ရောက်မှုက နတ္တိလုံးဝကို မရှိဘူး။ ရုံးသွားရုံးလာ ရုံးစာ တစ်ခုမှ မရှိဘူး။ ပြောချင်တာက သူတို့ ဩဇာ အာဏာသက်ရောက်မှု မရှိဘူး။ ဆိုတော့ ဒီနေ့လည်း ဥပမာ တွန်းဇံ ဖလမ်းမြို့ကိုသာ ယူတာ။ နယ်မှာ သူတို့ ဩဇာ သက်ရောက်မှုက တစ်ခုမှ မရှိဘူး။ အဲဒီ မြို့တောင်မှ ပြည့်ပြည့် စုံစုံထိန်းချုပ်နိုင်တာ မဟုတ်သေးဘူး။ ဘာလဲဆိုတော့ အခုက သူတို့ ဟိုင်းဝေး ဥပမာ ကလေးကနေ ဟားခါး ကလေးကနေ တီးတိန် အဲ့ဒါတွေကို သူတို့က ထိန်းချုပ်နိုင်တယ်လို့ ပြောတယ်။ ဒါပေမယ့် အဲ့ဒါ ၁၀၀ ရာခိုင်နှုန်း ထိန်းချုပ်တာ မဟုတ်ဘူး” ဟု ပြောသည်။ ထို့ပြင် စစ်အုပ်စုက ကလေး-ဟားခါး လမ်းပိုင်းနှင့် ကလေး-တီးတိန် လမ်းပိုင်းကို ထိန်းချုပ်ထားနိုင်ပြီဟု ပြောဆို ထားသော်လည်း ယခင်က မရှိဖူးသည့် စစ်စခန်းပေါင်း ၃၀ ကျော် တည်ဆောက်ပြီးမှ ထိန်းချုပ်ထားခြင်း ဖြစ်သည့်အတွက် အပြည့်အဝ စိုးမိုးနိုင်ခြင်း မဟုတ်ကြောင်းလည်း ဒေါက်တာရွှေခါးရ်က ထောက်ပြသည်။ စစ်အုပ်စုသည် ချင်းပြည်အတွင်း လက်လွှတ်ခဲ့ရသည့် ဖလမ်း၊ တွန်းဇံနှင့် ထန်တလန်မြို့ရှိ နယ်မြေအများစုကို ပြန်လည်သိမ်းပိုက်ထားနိုင်သော်လည်း ထိန်းချုပ်နိုင်မှုနှင့် အုပ်ချုပ်ရေး ယန္တရား လည်ပတ်နိုင်မှုမှာ အကန့် အသတ်ဖြင့်သာ ရှိနေဆဲဖြစ်သည်။ ချင်းပြည် ချင်းလဲန်းကောင်စီ အတွင်းရေးမှူး ဆလိုင်းကဲပ်ချင်းထန်းက “ဘယ်လောက်အထိ သူတို့ရဲ့ အုပ်ချုပ် ရေး အာဏာသက်ရောက်မှု ရှိတယ်ဆိုတာက တကယ့်မြေပြင်မှာက အဲဒါကသူတို့လုပ်တဲ့ ရွေးကောက်ပွဲကပဲ သက်သေပြနေတယ်။ ဆိုတော့ အဲဒီမြို့ပေါ်တွေကိုလည်း သူတို့က Fully Control ဆိုတာ မဟုတ်သေးဘူး။ ကျနော် ဘယ်အချိန်ပဲ ဖြစ်ဖြစ် စစ်ရေးအရရော တခြားအရေရော ကျနော်တို့ ခြိမ်းခြောက် နိုင်တဲ့ အနေအထား ရှိတဲ့အခါကျတော့ အဲဒီ မြို့ပေါ်တွေကိုလည်း နှစ်ဖွဲ့က ပြိုင်ပြီးတော့ ထိန်းချုပ်ဖို့ ဩဇာ သက်ရောက်ဖို့ ကျနော် တို့ ကြိုးစားနေတဲ့ဟာဖြစ်တယ်။ ဆိုတော့ ကျနော်တို့ ဩဇာသက်ရောက်ဖို့ ဆိုတာက စစ်ရေးလည်းဖြစ်နိုင် တယ်။ အုပ်ချုပ်ရေးအရလည်း ဖြစ်နိုင်တယ်။ အဲလိုမျိုး ပေါ့” ဟု ပြောသည်။ ချင်းပြည်အတွင်း စစ်အုပ်စု၏ အုပ်ချုပ်ရေးယန္တရား လည်ပတ်နိုင်သည့် ဧရိယာမှာ မြို့ပေါ်အချို့သာ ကျန်ရှိပြီး နယ်မြေအများစုနှင့် ကျေးရွာများတွင် ချင်းတော်လှန်ရေး အဖွဲ့အစည်းများက ဦးဆောင်၍ အုပ်ချုပ်ရေး ယန္တရား များကို လည်ပတ် ဆောင်ရွက်လျက်ရှိသည်။ ဒေါက်တာ ရွှေခါးရ်က “ချင်းလဲန်း ချင်းပြည်မှာလည်း ဒီမြို့တွေ တချို့မြို့တွေကတော့ ဒီနေပြည်တော်ကနေ သူရဲ့ ဩဇာသက်ရောက်မှု ဩဇာအာဏာ သက်ရောက်မှု ရှိပေမဲ့ တော်တော်များများ မြို့အပါအဝင် ကျေးရွာ အကုန်လုံးမှာတော့ နေပြည်တော်ရဲ့ ဩဇာ သက်ရောက်မှုဟာ လုံးဝ မရှိပါဘူး။ အဲဒီမှာကို ကျနော်တို့ ချင်းလဲန်း ချင်းပြည် ချင်းလဲန်း ကောင်စီကနေ ဦးဆောင်ပြီးတော့ ကျနော်တို့ အုပ်ချုပ်ရေး အကောင်အထည်ဖော် ဆောင် ရွက်နေတာ ရှိပါတယ်” ဟု ဆက် ပြောသည်။ စစ်အာဏာသိမ်းပြီးနောက် ချင်းပြည်အတွင်းရှိ နယ်စပ်ဒေသများနှင့် မြို့အများအပြားကို ချင်းတော်လှန်ရေး အဖွဲ့အစည်းများက သိမ်းပိုက်ကာ ကိုယ်ပိုင် အုပ်ချုပ်ရေးစနစ် အကောင်အထည်ဖော်ခဲ့ခြင်း ဖြစ်သည်။ စစ်အုပ်စုကလည်း အရေးပါသည့် စစ်ရေးဗျူဟာ နယ်မြေများကို ပြန်လည်ရရှိရန် ပြင်းထန်သော ထိုးစစ်များ ဆက်တိုက် ပြုလုပ်ခဲ့သော်လည်း နယ်မြေအများစုမှာ တော်လှန်ရေး တပ်ဖွဲ့များ၏ ထိန်းချုပ်မှုအောက်၌ ဆက်လက် တည်ရှိနေဆဲဖြစ်သည်။ ဓာတ်ပုံ - (ချင်းတော်လှန်ရေး တပ်ဖွဲ့ဝင်အချို့အား တွေ့ရစဉ် / Crd - ပုံဟောင်း) #ချင်းပြည်နယ်

ချင်းပြည်နယ် မြို့အချို့ကို ပြန်ရသော်လည်း စစ်အုပ်စု စိုးမိုးနိုင်ခြင်းမရှိဟု ဆို

ချင်းပြည်နယ် မြို့အချို့ကို ပြန်ရသော်လည်း စစ်အုပ်စု စိုးမိုးနိုင်ခြင်းမရှိဟု ဆို သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၇ ရက်။ စစ်အုပ်…

  • September 7, 2026
ကျောက်ဖြူ ရေနက်ဆိပ်ကမ်း စီမံကိန်းအနီး စစ်တပ်နှင့် AA တိုက်ပွဲပြင်းထန် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၆ ရက်။ ရခိုင်ပြည်၊ ကျောက်ဖြူမြို့နယ် ရေနက်ဆိပ်ကမ်း စီမံကိန်း ဧရိယာအနီး အဝတောင်-စနဲ လမ်းပိုင်းပေါ်သို့ စစ်အုပ်စုတပ်က စစ်ကြောင်းထိုးဝင်ရောက်လာသဖြင့် အာရက္ခတပ်တော် (AA) နှင့် တိုက်ပွဲများ ပြင်းထန်စွာ ဖြစ်ပွားနေကြောင်း ဒေသတွင်း စစ်ရေးသတင်းရင်းမြစ်များက ပြောသည်။ စစ်အုပ်စုသည် အဝတောင်စခန်းမှ အင်အားစုဖွဲ့ပြီး စက်တင်ဘာလ ၃ ရက် နံနက်ပိုင်းမှစ၍ စနဲဘက်သို့ အင်အား ၁၀၀ ကျော်ဖြင့် စစ်ကြောင်းထိုးလာခြင်းဖြစ်ပြီး၊ ကျောက်ဖြူ-စနဲ-ရမ်းဗြဲ လမ်းပိုင်းကို ထိန်းချုပ်ရန် ကြိုးပမ်းနေ ခြင်းလည်း ဖြစ်သည်။ ကျောက်ဖြူဒေသခံ စစ်ရေးသတင်းရင်းမြစ်တစ်ဦးက “ဒီအဝတောင် စနဲလမ်းပိုင်းက ရေနက်ဆိပ်ကမ်း ဧရိယာ ထဲပါတော့ စစ်တပ်က အေအေလွှမ်းမိုးလာတာကို ထိန်းချုပ်ဖို့လုပ်လာတာပါ။ အဝတောင်ရွာဟာ ကျောက်ဖြူ ရေနက်ဆိပ်ကမ်း အခြေစိုက်ရာ တောင်မော်ဦး ရေတပ်စခန်းနဲ့ အနီးဝန်းကျင် မှာရှိတာပါ။ သူ့ဧရိယာ တချို့ကို အေအေက ထိန်းထားတော့ အဲ့ဒီစခန်းမှတင် သိပ်မလုံခြုံတော့ဘူး” ဟု ပြောသည်။ ထို့ကြောင့် စက်တင်ဘာလ ၄ ရက်နေ့မှစတင်၍ နှစ်ဖက်ကြား တိုက်ပွဲများ ပြန်လည်ပြင်းထန်စွာ ဖြစ်ပွားနေခြင်း ဖြစ်သည်။ တစ်ချိန်တည်းမှာပင် ကျောက်ဖြူမြို့နယ် တောင်ပိုင်းရှိ သိုင်းချောင်းနှင့် မင်းပြင်ကျေးရွာတို့၌လည်း တိုက်ပွဲများ ဖြစ်ပွားလျက်ရှိသည်။ အေအေနှင့်နီးစပ်သူ စစ်ရေးသတင်းရင်းမြစ်က “အေအေက စနဲလမ်းပိုင်းကိုပါ အခု ထိန်း ချုပ်ဖို့ လုပ်လာတော့ အင်းအာစုပြီး စစ်တပ်ကထိုးတာ။ ကျောက်ဖြူမှာ ဩဂုတ်လ ၂၀ ရက်နေ့ နောက်ပိုင်း အင်အားဖြည့်နေတာ။ စစ်မဖြစ်ဘူး။အခုမှ စဖြစ်တာ။ နောက်တစ်ခုက ကျောက်ဖြူမြို့နယ် တောင်ပိုင်း သိုင်းချောင်း၊ မင်းပြင်ရွာတွေ မှာလည်း တိုက်ပွဲရှိတယ်” ဟု ပြောသည်။ အဝတောင်ကျေးရွာသည် ကျောက်ဖြူ ရေနက်ဆိပ်ကမ်း အခြေစိုက်ရာ တောင်မော်ဦး ရေတပ်စခန်းနှင့် အနီးဝန်းကျင်တွင် တည်ရှိပြီး စနဲ-အဝတောင် လမ်းပိုင်းမှာ ကျောက်ဖြူမြို့နှင့် ကျောက်ဖြူ ရေနက်ဆိပ်ကမ်း/ အထူးစီးပွားရေးဇုန် (SEZ) ဧရိယာသို့ ဆက်သွယ်ပေးထားသည့် အဓိက ကုန်းလမ်းကြောင်း တစ်ခုဖြစ်သည်။ စစ်ရေးမဟာဗျူဟာအရ ရေနက်ဆိပ်ကမ်း လုံခြုံရေးအတွက် အရေးပါသည့် တောင်မော်ဦး ရေတပ်စခန်း၏ စစ်ရေးစိုးမိုးနယ်မြေနှင့် စနဲမြို့အကြားတွင် အဝတောင် တည်ရှိနေခြင်းကြောင့် ရေနက်ဆိပ်ကမ်း ဧရိယာသို့ ဝင်ရောက်ရာ တံခါးပေါက်သဖွယ် ဖြစ်နေသည်။ ယခုရက်ပိုင်းအတွင်း ကျောက်ဖြူမြို့နယ်တွင် တိုက်ပွဲများ ပြန်လည်ဖြစ်ပွားလာပြီး အဝတောင်-စနဲ လမ်းပိုင်း ပေါ်သို့ ရောက်ရှိလာသည့် စစ်အုပ်စု၏ ရှေ့ပြေးတပ်စိတ် နှစ်ခုနှင့် AA တပ်ဖွဲ့တို့ ထိတွေ့တိုက်ပွဲဖြစ်ပွားခဲ့ခြင်း ဖြစ်သည်။ လက်ရှိတွင် ကျောက်ဖြူ တောင်မော်ဦး ရေတပ်ဘက်မှ စစ်အုပ်စု စစ်ကြောင်း နှစ်ကြောင်းသည် စနဲ-အဝတောင် လမ်းပိုင်းပေါ်၌ ရှိနေဆဲဖြစ်ပြီး အဝတောင်-မျှောချောင်းဘက်မှလည်း ခြေလျှင်စစ်ကြောင်း တစ်ခု ထပ်မံ တက် လာနေသည်။ ထို့ပြင် ပင်လယ်အတွင်းရှိ စစ်အုပ်စု စစ်ရေယာဉ်များကလည်း တိုက်ပွဲဖြစ်ပွားရာ အနီးဝန်းကျင်သို့ လက်နက် ကြီးနှင့် ဒရုန်းများဖြင့် ဆက်တိုက် ပစ်ကူပေးလျက်ရှိသည်။ ဓာတ်ပုံ - (ပုံဟောင်း / CJ) #ကျောက်ဖြူရေနက်ဆိပ်ကမ်းစီမံကိန်း

ကျောက်ဖြူ ရေနက်ဆိပ်ကမ်း စီမံကိန်းအနီး စစ်တပ်နှင့် AA တိုက်ပွဲပြင်းထန်

ကျောက်ဖြူ ရေနက်ဆိပ်ကမ်း စီမံကိန်းအနီး စစ်တပ်နှင့် AA တိုက်ပွဲပြင်းထန် သတင်းနှင့် မီဒီယာ ကွန်ရက်။၂၀၂၆ ခုနှစ်၊ စက်တင်ဘာလ ၆ ရက်။ ရခိုင်ပြည်၊ ကျောက်…

  • September 6, 2026
×Close