သတင်း

ရှမ်းမြောက် ပဋိပက္ခအတွင်း အရပ်သားများ အခွင့်အရေး ချိုးဖောက်ခံနေရ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မတ်လ ၁၈ ရက်။   ရှမ်းပြည် မြောက်ပိုင်းတွင် ညီနောင်မဟာမိတ် အဖွဲ့ဝင်များ ဖြစ်ကြသည့် ကိုးကန့်တပ် (MNDAA) နှင့် တအာင်း တပ် (TNLA) တို့အကြား စစ်ရေး ပဋိပက္ခများနှင့် တိုက်ခိုက်မှုများအတွင်း တအာင်းတိုင်းရင်းသားများနှင့် ဒေသခံ အရပ်သားများမှာ ဖမ်းဆီးနှိပ်စက်ခံရခြင်းနှင့် ဒရုန်းဗုံးထိမှန် သေဆုံးခြင်းများကို ဆိုးရွားစွာ ရင်ဆိုင်နေရသည်။   မတ်လ ၁၄ ရက်နေ့မှ ၁၆ ရက်နေ့အတွင်း MNDAA ၏ ထိုးစစ်ဆင်မှုများအတွင်း မုံးကိုးမြို့နယ်၌ TNLA နှင့် ဆက်စပ်သည်ဟု စွပ်စွဲကာ တအာင်းတိုင်းရင်းသား ၉ ဦးထက်မနည်း ဖမ်းဆီးခြင်း ခံခဲ့ရသည်။   ထို့ပြင် ကွတ်ခိုင်မြို့နယ် နမ့်ဖတ်ကာတွင်လည်း တအာင်းအမျိုးသားအချို့ ဖမ်းဆီးခေါ်ဆောင်ခံရပြီး တစ်ဦးမှာ အပြင်းအထန် ရိုက်နှက်နှိပ်စက်ခံခဲ့ရကြောင်း မြေပြင်သတင်းများအရ သိရသည်။   ဒေသခံ အမျိုးသားတစ်ဦးက “အခုက လမ်းပေါ်သွားလာဖို့တောင် မရဲတော့ဘူး။ TNLA နဲ့ ပတ်သက်တယ်ဆိုပြီး စွပ်စွဲဖမ်းတာတွေ ခပ်စိပ်စိပ် ဖြစ်လာတယ်။ ဖမ်းသွားတဲ့သူတွေထဲက တစ်ယောက်ဆိုရင် လူမဆန်အောင် အနှိပ်စက်ခံထားရတယ်လို့ ကြားရတယ်။ ဘယ်သူ့ကို အားကိုးရမှန်း မသိတဲ့ အခြေအနေပဲ” ဟု ပြောသည်။   စစ်ရေးအရှိန် မြင့်တက်လာမှုနှင့်အတူ MNDAA ၏ ဒရုန်းဗုံးကြဲ တိုက်ခိုက်မှုများကြောင့် ကွတ်ခိုင်မြို့နယ် လွယ်ဆိုင်ကျေးရွာတွင် စစ်ဘေးရှောင်များကို ကူညီပေးနေသည့် ပရဟိတသမား မိုင်းထွန်းလှ အပါအဝင် ဒေသခံ ၃ ဦး သေဆုံးခဲ့ရသည်။   လွယ်ဆိုင်ကျေးရွာအတွင်းသို့ ဒရုန်းဗုံး အလုံး ၁၀၀ ကျော် ကြဲချခဲ့သဖြင့် နေအိမ်များနှင့် ဘုန်းကြီးကျောင်းများပါ ထိခိုက်ပျက်စီးခဲ့ရကြောင်း ဒေသခံများက ပြောသည်။   ပရဟိတသမား မိုင်းထွန်းလှနှင့် နီးစပ်သူတစ်ဦးက “ထွန်းလှက စစ်ရှောင်တွေကို အကြိမ်ကြိမ်ကယ်ခဲ့တဲ့သူပါ။ သူ ဒရုန်းဗုံးထိတာ သိတယ်။ ဒဏ်ရာ ရထားပေမယ့် သူဘာမှမဖြစ်လောက်ဘူး ထင်ခဲ့တာ။ တကယ် စိတ်မကောင်း ဖြစ်ရတယ်။ အားလုံးကလည်း စစ်ရှောင်တွေကို ဦးစားပေးနေရတာ ဆိုတော့လေ။ သူ့ကိုတော့ ငါတို့က မကယ်လိုက်နိုင်ဘူး။ တာဝန်မကျေသလို ခံစားရတယ်” ဟု ပြောသည်။   လက်ရှိတွင် ကွတ်ခိုင်၊ မူဆယ် ၁၀၅ မိုင်နှင့် နမ့်ဖတ်ကာ စသည့်နေရာများတွင် MNDAA ဘက်က အင်အား အလုံးအရင်းဖြင့် လှုပ်ရှားနေသဖြင့် တအာင်းဒေသခံ အများအပြားမှာ ဖမ်းဆီးခံရမည်ကို စိုးရိမ်ကာ နေရပ် စွန့်ခွာ ထွက်ပြေးနေကြရသည်။   မတ်လ ၁၅ ရက်ကတည်းက နမ့်ခမ်းမှ ကွတ်ခိုင်သို့ အဆင်းတွင် MNDAA ၏ ဖမ်းဆီးခြင်း ခံလိုက်ရသည့် တအာင်းအမျိုးသား ၃ ဦးနှင့် ပတ်သက်၍ ယနေ့အထိ အဆက်အသွယ် လုံးဝမရရှိသေးသဖြင့် အသက်အန္တရာယ် အတွက် မိသားစုများက စိုးရိမ်နေကြသည်။   မဟာမိတ် အချင်းချင်းကြား ဖြစ်ပွားသည့် စစ်ရေးပဋိပက္ခများတွင် အပြစ်မဲ့အရပ်သားများ ပစ်မှတ်ထား ခံနေရသည့် အပေါ် တအာင်းလူမှုအဖွဲ့အစည်းများက ပြင်းပြင်းထန်ထန် ကန့်ကွက်ရှုတ်ချနေကြပြီး၊ ဖမ်းဆီးထား သူများကို အမြန်ဆုံးပြန်လွှတ်ပေးရန်နှင့် ဒေသခံများ၏ လုံခြုံရေးကို အာမခံပေးရန် တောင်းဆိုနေကြသည်။   ညီနောင်မဟာမိတ် အချင်းချင်းကြား ဖြစ်ပွားနေသည့် ယခုစစ်ရေးတင်းမာမှုများသည် ပြည်သူလူထု၏ အသက်အိုးအိမ်စည်းစိမ်ကို သာမက၊ တော်လှန်ရေး အင်အားစုများ အပေါ် ထားရှိသည့် လူထု၏ယုံကြည်မှုနှင့် ဒေသတွင်း လူမျိုးစုများအကြား ရေရှည်တည်ဆောက်ရမည့် စည်းလုံးညီညွတ်မှုကိုပါ အကြီးအကျယ် ရိုက်ခတ် နေသည်။   လက်နက်ကိုင် အဖွဲ့အစည်းများ အနေဖြင့် စစ်ရေးနည်းလမ်းဖြင့် နယ်မြေစိုးမိုးရန် ကြိုးပမ်းခြင်းထက် အပြစ်မဲ့ အရပ်သားများအား ကာကွယ်ရန်နှင့် ရေရှည်ငြိမ်းချမ်းရေးအတွက် နှစ်ဖက်အဖွဲ့အစည်းကြား တွေ့ဆုံဆွေးနွေး ကာ အဖြေရှာညှိနှိုင်းကြရန် ဒေသခံများနှင့် လူမှုအဖွဲ့အစည်းများက တိုက်တွန်းတောင်းဆိုထားသည်။   ဓါတ်ပုံ - ဒရုန်းထိမှန်သေဆုံးသွားသည့် ပရဟိတသမား မိုင်းထွန်းလှပုံ   #ရှမ်းမြောက်တိုက်ပွဲ #TNLAတအာင်းတပ် #MNDAAကိုးကန့်တပ်

ရှမ်းမြောက် ပဋိပက္ခအတွင်း အရပ်သားများ အခွင့်အရေး ချိုးဖောက်ခံနေရ

ရှမ်းမြောက် ပဋိပက္ခအတွင်း အရပ်သားများ အခွင့်အရေး ချိုးဖောက်ခံနေရ  သတင်းနှင့် မီဒီယာ ကွန်ရက်။၂၀၂၆ ခုနှစ်၊ မတ်လ ၁၈ ရက်။  ရှမ်းပြည် မြောက်ပိုင…

  • March 18, 2026
ဓါးစာခံများ ကယ်တင်ပြီးနောက်ပိုင်း စစ်ကော်မရှင်က စစ်ရေးလှုပ်ရှားမှုများ ပိုမို လုပ်ဆောင်လာ   သတင်းနှင့် မီဒိယာ ကွန်ရက်။
၂၀၂၆ ခုနှစ်၊ မတ်လ ၁၈ ရက်။   ပဲခူးတိုင်း၊ ညောင်လေးပင်ခရိုင်၊ ကျောက်ကြီးမြို့နယ်ထဲတွင် စစ်ကော်မရှင်တပ်က စစ်ရေးလှုပ်ရှားမှုများကို ယခင်ကထက် ပိုမို လုပ်ဆာင်လာနေပြီး တိုက်ပွဲများလည်း ဆက်လက်ဖြစ်ပွားနေသည်။   စစ်ကော်မရှင်တပ်က ဖမ်းဆီးထားသည့် ပြည်သူများကို မကြာသေးမီက တော်လှန်ရေးပူးပေါင်းတပ်များက ဝင်ရောက်ကယ်တင်ခဲ့သည့် ဖြစ်စဉ်နောက်ပိုင်းတွင် စစ်ကော်မရှင်ဘက်က အာဃာတဖြင့် စစ်ရေးအရှိန် ပိုမို မြှင့်တင်လာခြင်းဖြစ်ကြောင်း ကရင် အရေးပေါ် ကူညီကယ်ဆယ်ရေး ကော်မတီ KRC က သုံးသပ်သည်။   ကျောက်ကြီးမြို့နယ်အတွင်း၌ စစ်ကော်မရှင်တပ်က စစ်ရေးလှုပ်ရှားမှုများ ယခင်ကထက် ပိုမိုတိုးမြှင့်လာပြီး ကျေးရွာများအတွင်း စစ်ကြောင်းထိုးဝင်ရောက်ကာ ဒေသခံများကို ဖမ်းဆီးသတ်ဖြတ်ခြင်းနှင့် လူသားဒိုင်းအဖြစ် အသုံးပြုခြင်းများ လုပ်ဆောင်လျက်ရှိနေသည်။   လက်ရှိကျောက်ကြီးမြို့နယ်အတွင်းရှိ စစ်ရေးအခြေအနေနှင့် ပတ်သက်၍ ကျောက်ကြီးမြို့နယ် ကရင်အရေးပေါ် ကူညီကယ်ဆယ်ရေးကော်မတီ (KRC) တာဝန်ရှိသူတစ်ဦးက ယခုကဲ့သို့ ပြောသည်။   “လက်ရှိ ကျောက်ကြီးမြို့နယ်အတွင်းမှာတော့ စစ်ကော်မရှင်ရဲ့ စစ်ရေးအခြေအနေကတော့ လှုပ်ရှားမှု နည်း နည်း ပိုများတယ်လို့ သိရတယ်နော်။ ပိုပြီးတော့မှလည်း ရမ်းသမ်းပစ်ခတ်မှုတွေလည်း လုပ်နေတယ်။ အဲဒီ ထူးခြားတဲ့ ရေတွင်းကုန်းအနီးအနားတစ်ခွင်မှာ အခုဆိုရင်လည်း သူတို့တပ် အင်အားတိုးချဲ့တာတွေလည်း တွေ့ရတယ်” ဟု ပြောသည်။   ပြီးခဲ့သည့် မတ်လ ၅ ရက်နေ့မှစတင်ကာ စစ်ကော်မရှင်တပ်သည် ရေတွင်းကုန်းကျေးရွာ အုပ်စုအတွင်းရှိ ကျေးရွာများသို့ အင်အားတိုးချဲ့ ဝင်ရောက်လာပြီး ဒေသခံပြည်သူများအပေါ် ဖမ်းဆီးသတ်ဖြတ်ခြင်း၊ ညှင်းပန်း နှိပ်စက်ခြင်း၊ လူသားဒိုင်းကာ ပြုလုပ်ခြင်း အစရှိသည့် လူ့အခွင့်အရေး ချိုးဖောက်မှုများ ဆက်တိုက်ကျူးလွန် နေခြင်း ဖြစ်သည်။   လက်ရှိတွင် ကျေးရွာများအတွင်းသို့ ဒရုန်းများ၊ လက်နက်ကြီးများဖြင့် ရမ်းသမ်းပစ်ခတ်မှုများ နေ့စဉ်ပြုလုပ်နေ သဖြင့် ရေတွင်းကုန်းအုပ်စုနှင့် အနီးဝန်းကျင်ကျေးရွာများမှ ဒေသခံများမှာ ဘေးလွတ်ရာသို့ ထွက်ပြေး တိမ်းရှောင် နေကြရသည်။   စစ်ကော်မရှင်တပ်၏ လုပ်ရပ်များသည် စစ်ဆင်ရေးထက် လုယက်ဖျက်ဆီးသည့် လုပ်ရပ်များဖြစ်နေကြောင်း KRC ပြောရေးဆိုခွင့်ရှိသူက ဝေဖန်ရှုတ်ချထားသည်။   “စစ်တိုက်တာမဟုတ်ဘူး၊ ဓမြတိုက်တာနဲ့တူတယ်ပေါ့နော်။ ကျနော့်အနေနဲ့ ကျနော်တို့ ပြည်တွင်းစစ်ကို ဒီလိုမျိုး လုပ်ရပ်တွေကတော့ လူမဆန်တဲ့ လုပ်ရပ်တွေ၊ ကျနော်တို့ကတော့ လုံးဝရှုတ်ချတယ်။ သူရဲ့လုပ်ရပ်က လူမဆန်တဲ့လုပ်ရပ်ကို စစ်တိုက်နေတာနဲ့ မတူတော့ဘူး။ ကျနော်တို့ ပြည်သူတွေက ဓမြတိုက်နေတာနဲ့ တူတယ်။ အဲဒီအပေါ်မှာကတော့ သူတို့ရဲ့ ထိုးစစ်ဆင်လာတဲ့ ဒီကျေးရွာတွေကို လုယက်သတ်ဖြတ်တယ်။ လုယက်တယ်၊ ပြီးတော့ ပစ္စည်းတွေ သိမ်းသွားတယ်။ ပြီးတော့မှ ပြန်လွတ်ပေးတဲ့သူတွေ ရှိခဲ့သော်လည်း ငွေကြေးတွေ တောင်းခံတယ်ပေါ့နော်” ဟု ၎င်းက ပြောသည်။   ကျောက်ကြီးမြို့နယ်သည် ကေအန်ယူ (KNU) တပ်မဟာ (၃) နယ်မြေဖြစ်ပြီး စစ်ကော်မရှင်တပ်က နယ်မြေ စိုးမိုးရေးအတွက် အင်အားသုံး ကြိုးပမ်းနေခြင်းကြောင့် တိုက်ပွဲများ ဆက်လက်ပြင်းထန်လာမည့် အလားအလာ ရှိနေသည်။ ကျောက်ကြီးမြို့နယ်အတွင်း၌ သာမက မြန်မာတစ်နိုင်ငံလုံးတွင် ပြည်သူများအပေါ် လူ့အခွင့်အရေး ချိုးဖောက် နေသည့် စစ်ကော်မရှင်တပ်ကို နိုင်ငံတကာ အနေဖြင့် ထိရောက်စွာ အရေးယူပေးရန်နှင့် တောတောင်များ အတွင်း ပိတ်မိနေသည့် စစ်ဘေးရှောင်များ အတွက် လူသားချင်း စာနာထောက်ထားမှုဆိုင်ရာ အကူအညီများ အမြန်ဆုံးပေးအပ်ရန် ကရင်အရေးပေါ် ကူညီကယ်ဆယ်ရေးအဖွဲ့ (KRC) က အရေးပေါ် တောင်းဆိုထားသည်။   #ကျောက်ကြီးမြို့နယ် #လယ်ဒိုမြို့နယ် #ညောင်လေးပင်ခရိုင် #ပဲခူးတိုင်း #လူ့အခွင့်အရေးချိုးဖောက်မှု #ရေတွင်းကုန်းကျေးရွာအုပ်စု #KNLA #KNDO #PDF

ဓါးစာခံများ ကယ်တင်ပြီးနောက်ပိုင်း စစ်ကော်မရှင်က စစ်ရေးလှုပ်ရှားမှုများ ပိုမို လုပ်ဆောင်လာ

ဓါးစာခံများ ကယ်တင်ပြီးနောက်ပိုင်း စစ်ကော်မရှင်က စစ်ရေးလှုပ်ရှားမှုများ ပိုမို လုပ်ဆောင်လာ သတင်းနှင့် မီဒိယာ ကွန်ရက်။၂၀၂၆ ခုနှစ်၊ မတ်လ ၁၈ ရက်။ …

  • March 18, 2026
ပဲခူးတိုင်း ညောင်လေးပင်ခရိုင်အတွင်း စစ်ရှောင် ၄၀၀၀ ကျော် အကူအညီများ လိုအပ်   သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ မတ်လ ၁၈ ရက်။ 
 ပဲခူးတိုင်း၊ ညောင်လေးပင်ခရိုင်၊ ကျောက်ကြီးမြို့နယ်အတွင်း စစ်ကော်မရှင်၏ လူသားဒိုင်းကာပြုလုပ်မှုနှင့် အစုလိုက်အပြုံလိုက် သတ်ဖြတ်ခံရမှုများကြောင့် ထွက်ပြေးတိမ်းရှောင်နေရသည့် ပြည်သူ ၄,၀၀၀ ကျော် အတွက် အရေးပေါ် အကူအညီများ လိုအပ်နေသည်။   ကျောက်ကြီးတွင် စစ်ကော်မရှင်တပ်များ၏ ရက်စက်ကြမ်းကြုတ်သော စစ်ကြောင်းထိုးမှု၊ လေကြောင်း တိုက် ခိုက်မှုနှင့် လူသားဒိုင်းကာပြုလုပ်မှုများကြောင့် ကျေးရွာ ၅ ရွာမှ ဒေသခံပြည်သူ ၄,၀၀၀ ကျော်သည် ဘေးလွတ် ရာသို့ ထွက်ပြေးတိမ်းရှောင်နေရပြီး စားနပ်ရိက္ခာနှင့် ဆေးဝါးအကူအညီများ အရေးပေါ်လိုအပ်နေခြင်း ဖြစ်သည်။   ကရင်အရေးပေါ် ကူညီကယ်ဆယ်ရေးကော်မတီ (KRC) ၏ ပြောရေးဆိုခွင့်ရှိသူတစ်ဦးက “အခုလက်ရှိ စစ်ဘေး ရှောင်နေတဲ့သူတွေက အဓိက လိုအပ်တာကတော့ အခြေခံစားနပ်ရိက္ခာပေါ့နော်။ ပြီးတော့မှ ကျန်းမာရေး အတွက် လိုအပ်တဲ့ဆေးဝါးတွေ။ သက်ကြီးရွယ်အို၊ ကလေးသူငယ်တွေနဲ့ ကျန်းမာရေးမကောင်းတဲ့သူတွေလည်း ရှိနေတယ်။ အချို့ထဲမှာတောင် ကိုယ်ဝန်ဆောင်မိခင်တွေပါနေတယ်။ ပြောရရင်တော့ အစစအရာရာ လိုအပ်နေ တာပါပဲ” ဟု ပြောသည်။   ပြီးခဲ့သည့် မတ်လ ၅ ရက်နေ့မှ စတင်ကာ စစ်ကော်မရှင်တပ်များသည် ရေတွင်းကုန်းကျေးရွာအုပ်စု အတွင်းသို့ လေယာဉ်၊ ဒရုန်းနှင့် လက်နက်ကြီးများအသုံးပြု၍ အကြမ်းဖက်ဝင်ရောက်လာခဲ့ခြင်းဖြစ်သည်။     ထိုသို့ဝင်ရောက်လာပြီးနောက် အပြစ်မဲ့ပြည်သူ အယောက် ၃၀ ထက်မနည်းကို ရက်စက်စွာ သတ်ဖြတ်ခဲ့သည့် အပြင် ပြည်သူပိုင်ပစ္စည်းများကို လုယက်ကာ နေအိမ်များကို မီးရှို့ဖျက်ဆီးခြင်း၊ ပြည်သူများကို လူသားဒိုင်း အဖြစ် အသုံးပြုခြင်းစသည့် လူ့အခွင့်အရေးချိုးဖောက်မှုများကို ကျူးလွန်ခဲ့သည်။   လူပေါင်း ၃၀၀ ခန့်ကို လူသားဒိုင်းအဖြစ် ဖမ်းဆီးထားသည့်အတွက် ကရင့်အမျိုးသား အစည်းအရုံးနှင့် ပူးပေါင်း တပ်ဖွဲ့များက ကယ်ထုတ်ခဲ့ရသေးသည်။   စစ်ဘေးရှောင် ၄,၀၉၇ ဦးခန့်ရှိသည့် ရေတွင်းကုန်း၊ ကျောင်းကုန်း၊ ဝါချဲ၊ အင်းပရစ်နှင့် ဒလဆိပ်ကျေးရွာများမှ ပြည်သူများသည် လက်ရှိတွင် တောတောင်များထဲ၌ လည်းကောင်း၊ နီးစပ်ရာကျေးရွာရှိ အသိမိတ်ဆွေများ၏ နေအိမ်များတွင်လည်းကောင်း ခိုလှုံနေရကာ အစားအသောက်၊ ဆေးဝါး နှင့် အမိုးအကာ လိုအပ်နေကြသည်။   ကရင်လူ့အခွင့်အရေးအဖွဲ့ (KHRG) မှ ပြောရေးဆိုခွင့်ရှိသူ စောအဲလ်ဘတ်ကလည်း “အခုလက်ရှိ ဒုက္ခရောက် နေတဲ့ ပြည်သူလူထုကို နိုင်တဲ့ဘက်ကနေပြီးတော့မှ ပံ့ပိုးကူညီပေးဖို့၊ အထူးသဖြင့် ကျန်းမာရေး ဝန်ဆောင်မှု တွေ၊ လက်နက်ကြီးနဲ့ လေကြောင်းတိုက်ခိုက်မှုကြောင့် ဒဏ်ရာရနေတဲ့ ပြည်သူတွေအတွက် လိုအပ်တဲ့ ဆေးဝါး နဲ့ ကုသမှုတွေကို အချိန်မီပံ့ပိုးပေးဖို့ ကျနော်တို့ တောင်းဆိုချင်ပါတယ်” ဟု ပြောသည်။   စစ်ကော်မရှင်၏ အဆိုပါလုပ်ရပ်များကြောင့် ပြည်သူ ၁၆ ဦး အပြင်းအထန် ဒဏ်ရာရရှိခဲ့ပြီး ဒေသခံများ၏ စည်းစိမ်ဥစ္စာများမှာလည်း ဆုံးရှုံးခဲ့ရသည်။   ထိုသို့သော စစ်ရာဇဝတ်မှုများကို နိုင်ငံတကာက သိရှိနေသော်လည်း ထိရောက်သော အရေးယူဆောင်ရွက်မှု မရှိခြင်းအပေါ် ဝေဖန်မှုများလည်း ထွက်ပေါ်နေသည်။     ကရင်ငြိမ်းချမ်းရေး အထောက်အကူပြုကွန်ရက် (KPSN) မှ နော်ချယ်ရီက “သူတို့ စစ်ရာဇဝတ်မှုတွေကို အမြဲ တမ်းကျူးလွန်နေတာ ဒါက နိုင်ငံတကာလည်း သိအောင် လုပ်နေတာပဲ။ နေ့စဉ်ရက်ဆက်ပေါ့နော်။ သိသိကြီးနဲ့ ဘာမှမလုပ်ဆောင်၊ အရေးလည်းမယူဘူးဆိုတော့ ဒါက ဝေဖန်စရာတွေ အများကြီးပဲ။ ခံရတာ ကျမတို့ ပြည်သူ လူထုတွေပဲလေ” ဟု ပြောသည်။   လူ့အခွင့်အရေး လှုပ်ရှားသူများကမူ ကုလသမဂ္ဂအပါအဝင် နိုင်ငံတကာ အသိုင်းအဝန်းအနေဖြင့် စိုးရိမ်ပူပန် ကြောင်း ကြေညာချက်များ ထုတ်ပြန်နေရုံနှင့် မလုံလောက်ဘဲ စစ်ကော်မရှင်၏ လေယာဉ်ဆီ၊ လက်နက်နှင့် ဘဏ္ဍာငွေ လမ်းကြောင်းများကို အမြန်ဆုံး ဖြတ်တောက်ပေးရန် တောင်းဆိုထားကြသည်။   ထို့ပြင် စစ်ကော်မရှင်တပ်၏ လူ့အခွင့်အရေး ချိုးဖောက်မှုများကို ခံစားနေရသည် မြန်မာပြည်သူများအတွက် တရားမျှတမှု ပြန်လည်ရရှိအောင် ကူညီလုပ်ဆောင်ပေးရန်နှင့် ကျူးလွန်သူများကို တာဝန်ယူ၊ တာဝန်ခံမှုရှိလာ အောင် လုပ်ဆောင်ပေးရန် တိုက်တွန်း တောင်းဆိုနေ ကြသည်။   #ပဲခူးတိုင်း #ညောင်လေးပင်ခရိုင် #ကျောက်ကြီးမြို့နယ် #လယ်ဒိုမြို့နယ် #လူ့အခွင့်အရေးချိုးဖောက်မှု #စစ်ကော်မရှင်တပ်

ပဲခူးတိုင်း ညောင်လေးပင်ခရိုင်အတွင်း စစ်ရှောင် ၄၀၀၀ ကျော် အကူအညီများ လိုအပ်

ပဲခူးတိုင်း ညောင်လေးပင်ခရိုင်အတွင်း စစ်ရှောင် ၄၀၀၀ ကျော် အကူအညီများ လိုအပ် သတင်းနှင့် မီဒီယာ ကွန်ရက်။၂၀၂၆ ခုနှစ်၊ မတ်လ ၁၈ ရက်။ပဲခူးတိုင်း၊ ညောင်လေး…

  • March 18, 2026
တနင်္သာရီတိုင်းအတွင်း စစ်ရှိန် အမြင့်ဆုံး ဖြစ်လာနေ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မတ်လ ၁၈ ရက်။   တနင်္သာရီတိုင်းအတွင်း စစ်ကော်မရှင်နှင့် တော်လှန်ရေး တပ်ဖွဲ့များ၏ နှစ်ဘက် ထိုးစစ်များကြောင့် စစ်ရေး အရှိန် အမြင့်ဆုံးသို့ ရောက်နေပြီး စစ်ရှောင် ဦးရေမှာ ၉၀,၀၀၀ လောက်အထိ ဖြစ်လာနေသည်ဟု ဒေသတွင်း အခြေအနေများကို သုတေသန ပြုနေသော FE5 Tanintharyi အဖွဲ့က ပြောသည်။    စစ်ကော်မရှင်က နယ်မြေစိုးမိုးရေး အတွက် စစ်ကြောင်းများ ထိုးနေပြီး တော်လှန်ရေး တပ်ဖွဲ့များကလည်း စခန်းသိမ်းတိုက်ပွဲများ ဆင်နွဲနေခဲ့ခြင်းကြောင့် ဖေဖော်ဝါရီလဆန်းပိုင်းမှ ယခု မတ်လလယ်အထိ တစ်လကျော်ကြာ ရက်ရှည်တိုက်ပွဲများ ဆက်တိုက်ပြင်းထန်နေခဲ့သည်။   စစ်ရေးနှင့် ဒေသတွင်း အခြေအနေများကို လေ့လာစောင့်ကြည့်နေသည့် FE5 Tanintharyi အဖွဲ့၏ ထုတ်ပြန် ချက်အရ ဇန်နဝါရီလတွင် တိုက်ပွဲပေါင်း ၅၈ ကြိမ် ရှိခဲ့သော်လည်း ဖေဖော်ဝါရီလတွင်မူ ၆၆ ကြိမ်အထိ တိုးလာ ကာ မတ်လလယ်အထိ တိုက်ပွဲများ ရပ်တန့်ခြင်းမရှိဘဲ ရက်ဆက် ဖြစ်ပွားနေခြင်းဖြစ်သည်။   FE5 Tanintharyi ၏ အယ်ဒီတာတစ်ဦးက “ဖေဖော်ဝါရီလထဲမှာ ဖြစ်ခဲ့တဲ့ တိုက်ပွဲအများစုက ရက်ရှည်တိုက်ပွဲ တွေ ဖြစ်ပြီးတော့က အဓိကကတော့ စစ်အာဏာရှင် တပ်စခန်းတွေကို သိမ်းပိုက်ဖို့အတွက် တော်လှန်ရေးတပ် တွေက စစ်ရေး ဖော်ဆောင်တာ ရှိတယ်။ တစ်ဖက်မှာလည်း စစ်အာဏာရှင်တပ်က သူတို့ လက်လွတ်ထားရတဲ့ မောတောင်မြို့လို နေရာကို ပြန်ယူဖို့အတွက် စစ်ကြောင်း တောက်လျှောက်ထိုးနေတာကြောင့် တိုက်ပွဲ အရေ အတွက် တိုးလာတာလို့ ပြောလို့ရတယ်။ တိုက်ပွဲ မဖြစ်တဲ့ရက်က မရှိဘူးလို့ ပြောလို့တောင် ရတယ်ပေါ့နော်” ဟု လက်ရှိအခြေအနေကို ရှင်းပြသည်။     အထူးသဖြင့် သရက်ချောင်းမြို့နယ်အတွင်းရှိ ထားဝယ်-မြိတ် အမှတ် (၈) လမ်းမကြီးပေါ်တွင် နှစ်ပေါင်း ၃၀ ကျော် အခြေစိုက်ခဲ့သည့် ဝင်းဝတပ်စခန်းသိမ်းတိုက်ပွဲမှာ ဖေဖော်ဝါရီ ၁၁ ရက်နေ့မှစ၍ တစ်လခန့်ကြာ ဆင်နွှဲခဲ့ ရပြီး မတ်လ ၁၁ ရက်နေ့တွင် တော်လှန်ရေးတပ်များက သိမ်းပိုက်နိုင်ခဲ့သည်။   အဆိုပါ ရက်ရှည်တိုက်ပွဲများအတွင်း စစ်ကော်မရှင်ဘက်က လေကြောင်းနှင့် လက်နက်ကြီးများကို အများအပြား အသုံးပြုခဲ့သည်။   အထက်ပါအယ်ဒီတာက “ဝင်းဝစခန်းသိမ်း တိုက်ပွဲဆိုရင် ဖေဖော်ဝါရီလဆန်းကတည်းက စတိုက်ခဲ့တာဆိုတော့ အဲ့ဒီနားဝန်းကျင်က တိုက်ပွဲအပြင်းထန်ဆုံးဒေသလို့ ပြောလို့ရတယ်။ အဲ့ဒီမှာ လေကြောင်းက ဗုံးကြဲတာ၊ လက် နက်ကြီးကြောင့် ပျက်စီးသွားတာတွေ အများကြီးတွေ့ရတယ်။ ပြည်သူဆယ်ချီလည်း ထိခိုက်သေဆုံးခဲ့ရတာ မျိုး ရှိတယ်” ဟု ဆက်လက်ပြောဆိုသည်။   ယခုကဲ့သို့ စစ်ရေးပြင်းထန်လာမှုနှင့်အတူ စစ်ကော်မရှင်တပ်၏ လေကြောင်းတိုက်ခိုက်မှု၊ မတရားဖမ်းဆီး သတ် ဖြတ်မှုများနှင့် နေအိမ်မီးရှို့ဖျက်ဆီးမှုများကြောင့် တနင်္သာရီတိုင်းအတွင်း ယခင်တစ်လအတွင်း နေရပ်စွန့်ခွာ ထွက်ပြေး ရသူ စစ်ဘေးရှောင်ဦးရေမှာ ၉၀,၀၀၀ နီးပါးအထိ ရှိလာခဲ့သည်။   တိုက်ပွဲများ ဆက်လက်ပြင်းထန်နေပါက စစ်ဘေးရှောင်ဦးရေမှာလည်း ထပ်တိုးလာနိုင်သည်ဟု ဒေသတွင်း သတင်းရင်းမြစ်များက ခန့်မှန်းနေကြသည်။   FE5Tarnintharyi ၏ အယ်ဒီတာတစ်ဦးက “စခန်းတွေ နယ်မြေတွေ လက်လွတ်ထားရတဲ့ စစ်အာဏာရှင်တပ်က လာမယ့် ကာလတွေမှာဆိုရင် တန်ပြန်ထိုးစစ်တွေ လေကြောင်းတိုက်ခိုက်မှုတွေ လက်နက်ကြီး ပစ်ခတ်တာတွေ အဲ့တာတွေက ဆက်တိုက်လုပ်လာနိုင်တဲ့ အနေအထားရှိတယ်လို့ သုံးသပ်ရတယ်ပေါ့နော်။ ဒါကြောင့် ပြည်သူ တွေအနေနဲ့ အရင်ကထက် လုံခြုံရေးသတိရှိရှိနဲ့ လုံခြုံရေးနိုးနိုးကြားကြားနေကြဖို့ ပိုပြီး လိုအပ်လာတဲ့ အနေ အထား ဖြစ်တယ်” ဟု ပြောသည်။   လက်ရှိတွင် တောတောင်များအတွင်း တိမ်းရှောင်နေရသည့် စစ်ဘေးရှောင် ၉၀,၀၀၀ နီးပါးမှာ လမ်းပန်းဆက် သွယ်ရေး ခက်ခဲမှုနှင့် စက်သုံးဆီပြတ်လတ်မှုများကြောင့် အခြေခံစားနပ်ရိက္ခာနှင့် ဆေးဝါးများ သယ်ယူနိုင်ခြင်း မရှိဘဲ အရေးပေါ်အကူအညီများ လိုအပ်နေသည်။   ဖေဖော်ဝါရီတစ်လအတွင်းမှာပင် စစ်ကော်မရှင်တပ်၏ ရည်ရွယ်ချက်ရှိရှိ သတ်ဖြတ်မှုနှင့် လေကြောင်းမှ ဗုံးကြဲ မှုများကြောင့် တနင်္သာရီတွင် ဒေသခံ ၁၆ ဦး သေဆုံးခဲ့ပြီး နေအိမ် ၁၁၇ လုံးထက်မနည်း မီးလောင်ပျက်စီးခဲ့ရ သည်ဟု FE5 Tanintharyi အဖွဲ့က ပြောသည်။   ထို့ပြင် အကြောင်းအမျိုးမျိုးပြ ဖမ်းဆီးခံရသူ ၃၂ ဦးရှိခဲ့သည့်အနက် ၉ ဦးမှာ သေဆုံးခဲ့ကြောင်း FE5 Tanintharyi က ဆိုသည်။   ဓာတ်ပုံ - (ပုံဟောင်း) ပြည်သူ့ကာကွယ်ရေး တပ်မတော် - မြိတ်ခရိုင် တပ်ရင်း (၂)   #E5Tanintharyi #တနင်္သာရီတိုင်းစစ်ရေးအခြေအနေ #စစ်ဘေးရှောင်တိုးလာ

တနင်္သာရီတိုင်းအတွင်း စစ်ရှိန် အမြင့်ဆုံး ဖြစ်လာနေ 

တနင်္သာရီတိုင်းအတွင်း စစ်ရှိန် အမြင့်ဆုံး ဖြစ်လာနေ သတင်းနှင့် မီဒီယာ ကွန်ရက်။၂၀၂၆ ခုနှစ်၊ မတ်လ ၁၈ ရက်။ တနင်္သာရီတိုင်းအတွင်း စစ်ကော်မရှင်နှင့် တ…

  • March 18, 2026
နမ့်ခမ်းဒေသခံများ နေရပ်ပြန်နိုင်လောက်သည့် လုံခြုံမှု မရှိသေး   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မတ်လ ၁၈ ရက်။   ရှမ်းပြည်မြောက်ပိုင်းတွင် ကိုးကန့်တပ် (MNDAA) နှင့် တအာင်းတပ် (TNLA)တို့ကြား တိုက်ပွဲများ ယာယီ ငြိမ်သက် သွားသော်လည်း နမ့်ခမ်းဒေသခံများ နေရပ်ပြန်ရန် စိုးရိမ်နေဆဲဖြစ်သည်။   ဆေးရုံများနှင့် စာသင်ကျောင်းများ၊ ဌာန ဆိုင်ရာများ အပါအဝင် အရပ်သား အများအပြားမှာ စစ်ရှောင်နေကြပြီး နေရပ် မပြန်ရဲသေးပဲ ရှိနေခြင်း ဖြစ်သည်။   ရှမ်းပြည် မြောက်ပိုင်းတွင် ညီနောင်မဟာမိတ်တပ်ဖွဲ့ဝင်များ ဖြစ်ကြသည့် ကိုးကန့်တပ် (MNDAA) နှင့် တအာင်း တပ် (TNLA) တို့အကြား ဖြစ်ပွားခဲ့သော စစ်ရေးပဋိပက္ခများမှာ ယနေ့တွင် ယာယီငြိမ်သက်သွားသော် လည်း၊ နမ့်ခမ်းမြို့နယ်အတွင်းရှိ စစ်ဘေးရှောင်ပြည်သူများမှာမူ တိုက်ပွဲများ ပြန်လည်ဖြစ်ပွားလာမည်ကို စိုးရိမ်သဖြင့် နေအိမ်များသို့ ပြန်လည်ဝင်ရောက်ရန် ဝန်လေးနေကြကြောင်း ပြောသည်။   ပြီးခဲ့သည့် မတ်လ ၁၄ ရက်နေ့မှ စတင်ကာ ကွတ်ခိုင်မြို့ရှိ TNLA တပ်စခန်းများကို MNDAA က အင်အား အလုံး အရင်းဖြင့် ထိုးစစ်ဆင်ခဲ့ပြီးနောက် မတ်လ ၁၆ ရက်နေ့တွင် ကွတ်ခိုင်မြို့တစ်ခုလုံးကို MNDAA က အပြည့်အဝ ထိန်းချုပ်လိုက်ပြီဖြစ်ကြောင်း ဒေသခံများက အတည်ပြုသည်။   ထိုမှတစ်ဆင့် တိုက်ပွဲများသည် နမ့်ခမ်းမြို့နယ်ဘက်သို့ ကူးစက်ပျံ့နှံ့ခဲ့ပြီး TNLA ထိန်းချုပ်ထားသော ဗျူဟာ ကုန်းများနှင့် နမ့်ဖတ်ကာလမ်းပိုင်းများကို MNDAA က ဆက်လက်တိုက်ခိုက်ခဲ့ခြင်း ဖြစ်သည်။   နမ့်ခမ်းမြို့ပေါ်တွင် တိုက်ပွဲများ အပြင်းအထန် ဖြစ်ပွားလာမည်ကို စိုးရိမ်သဖြင့် ဒေသခံများသည် ဘေးလွတ်ရာ သို့ ကြိုတင်တိမ်းရှောင်ခဲ့ကြရာ မြို့ပေါ်ရပ်ကွက်အချို့မှာ ယနေ့တိုင် တိတ်ဆိတ် ခြောက်ကပ်နေဆဲ ဖြစ်သည်။   နမ့်ခမ်းမြို့ခံ အမျိုးသားတစ်ဦးက “ဆေးရုံကလူတွေရော၊ ဌာနဆိုင်ရာတွေရော တော်တော်များများ ရွှေ့ကြ တယ်။ ဆိုင်ကယ်တွေ၊ ကားတွေ အများကြီးပဲ။ ဘော်ဒါဆောင်က ကျောင်းတက်တဲ့ ကလေးတွေကိုလည်း မိဘတွေက ရွာဘက်ပိုင်းကို ပြန်ခေါ်သွားကြတာမျိုးတွေ ရှိတယ်” ဟု ပြီးခဲ့သည့်ရက်ပိုင်းက မြို့တွင်း အခြေ အနေကို ပြောပြသည်။   သို့သော် မတ်လ ၁၇ ရက်နှင့် ယနေ့ ၁၈ ရက်တို့တွင် တိုက်ပွဲသံများ သိသိသာသာ ငြိမ်သက်သွားခဲ့သည်။   လက်ရှိတွင် နှစ်ဖက်တပ်ဖွဲ့မှ တာဝန်ရှိသူများသည် လောက်ကိုင်မြို့၌ အရေးပေါ် တွေ့ဆုံဆွေးနွေးမှုများ ပြုလုပ်နေကြောင်း သတင်းများ ထွက်ပေါ်နေသော်လည်း တရားဝင် အပစ်ရပ်စဲရေး သဘောတူညီချက် တစ်စုံတစ်ရာကိုမူ ထုတ်ပြန်ခြင်း မရှိသေးပေ။   အဆိုပါ ဒေသခံအမျိုးသားက “တိုက်ပွဲတွေမဖြစ်တော့ဘူး ငြိမ်နေတယ်။ ဒါပေမဲ့ ဘယ်အဖွဲ့ကမှ အတည်တကျ ထုတ်ပြန်ထားတာ မရှိတော့ အခြေအနေကို စောင့်ကြည့်နေရတုန်းပဲ။ အဲ့ဒါကြောင့် ရှောင်သွားတဲ့လူတွေလည်း မြို့ထဲကို တော်ရုံပြန်မဝင်ကြသေးဘူး။ အခြေအနေကို စောင့်ကြည့်ဦးမှာပဲ” ဟု ဆိုသည်။   လက်ရှိတွင် တရုတ်-မြန်မာ နယ်စပ်ကုန်သွယ်ရေး လမ်းကြောင်းနှင့် နီးကပ်သော နေရာများ၌ လူသူသွားလာမှု အလွန်နည်းပါးနေပြီး စီးပွားရေးလုပ်ငန်းများလည်း ရပ်တန့်လုနီးပါး ဖြစ်နေသည်။     နမ့်ခမ်းမြို့သည် ကချင်ပြည်နယ်နှင့် ရှမ်းပြည်မြောက်ပိုင်း အစပ် တရုတ်-မြန်မာနယ်စပ်ကုန်သွယ်ရေး၏ အရေးပါသော လမ်းဆုံလမ်းခွ ဖြစ်သဖြင့် ယခုစစ်ရေးတင်းမာမှုသည် ကုန်စည်စီးဆင်းမှုကိုပါ ထိခိုက်စေလျက်ရှိသည်။   ဒေသခံပြည်သူများကမူ ညီနောင်မဟာမိတ် အချင်းချင်းကြား ဖြစ်ပေါ်နေသော အကျပ်အတည်းများကို စစ်ရေး နည်း လမ်းထက် တွေ့ဆုံဆွေးနွေးမှုဖြင့်သာ အမြန်ဆုံး အဖြေရှာဖြေရှင်းပေးရန်နှင့် ၎င်းတို့၏ အသက်အိုးအိမ် စည်းစိမ်များကို အကာအကွယ်ပေးရန် လိုလားနေကြသည်။   #ရှမ်းမြောက်စစ်ရေးအခြေအနေ #ကွတ်ခိုင်တိုက်ပွဲ #နမ့်ခမ်းတိုက်ပွဲ #TNLAတအာင်းတပ် #ကိုးကန့်တပ်MNDAA #စစ်ကော်မရှင်တပ် #တရုတ်ဖိအား    

နမ့်ခမ်းဒေသခံများ နေရပ်ပြန်နိုင်လောက်သည့် လုံခြုံမှု မရှိသေး

နမ့်ခမ်းဒေသခံများ နေရပ်ပြန်နိုင်လောက်သည့် လုံခြုံမှု မရှိသေး  သတင်းနှင့် မီဒီယာ ကွန်ရက်။၂၀၂၆ ခုနှစ်၊ မတ်လ ၁၈ ရက်။  ရှမ်းပြည်မြောက်ပိုင်းတွင…

  • March 18, 2026
မြန်မာနိုင်ငံဘက် ကူးခဲ့သော နိုင်ငံခြားသား ၇ ဦး အိန္ဒိယ ဖမ်းဆီး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မတ်လ ၁၈ ရက်။ မြန်မာလက်နက်ကိုင်များကို သင်တန်းပေးရန် ကြိုးပမ်းမှုဖြင့် ယူကရိန်း ၆ ဦးနှင့် အမေရိကန်နိုင်ငံသား ၁ ဦးကို အိန္ဒိယအာဏာပိုင်များက ဖမ်းဆီးလိုက်သည်။ မြန်မာနိုင်ငံအတွင်းရှိ လက်နက်ကိုင်အဖွဲ့များကို စစ်သင်တန်းပေးရန် ကြိုးပမ်းသည်ဟူသော သံသယဖြင့် ယူကရိန်းနိုင်ငံသား ၆ ဦးနှင့် အမေရိကန်နိုင်ငံသား ၁ ဦး၊ စုစုပေါင်း ၇ ဦးကို အိန္ဒိယအမျိုးသား စုံစမ်းစစ်ဆေးရေးအေဂျင်စီ (NIA) က မတ်လ ၁၃ ရက်နေ့က ဖမ်းဆီးလိုက်ခြင်း ဖြစ်သည်။ ၎င်းတို့အား ဒေလီ (Delhi)၊ လတ်ခနောင်း (Lucknow) နှင့် ကိုလ်ကတ္တား (Kolkata) မြို့များတွင် ဖမ်းဆီးခဲ့ခြင်းဖြစ်ပြီး၊ မနေ့က တရားရုံးတွင် ၁၁ ရက်ကြာ စစ်ဆေးမေးမြန်းရန် ချုပ်မိန့် (ရမန်) ရယူခဲ့သည်။ ဖမ်းဆီးခံရသူများသည် ခွင့်ပြုချက်မရှိဘဲ အိန္ဒိယ-မြန်မာနယ်စပ် မီဇိုရမ်ပြည်နယ်အတွင်းသို့ တရားမဝင် ဝင်ရောက်ခဲ့ခြင်း၊ မီဇိုရမ်မှတစ်ဆင့် မြန်မာနိုင်ငံအတွင်းသို့ ဝင်ရောက်ကာ တိုင်းရင်းသားလက်နက်ကိုင်အဖွဲ့များကို စစ်သင်န်းပေးခြင်းနှင့် ဥရောပတိုက်မှ ဒရုန်း (Drone) အမြောက်အမြားကို အိန္ဒိယမှတစ်ဆင့် မြန်မာနိုင်ငံအတွင်းသို့ တရားမဝင် သယ်ဆောင်ရန် ကြိုးပမ်းခြင်း စသည့် စွပ်စွဲချက်များဖြင့် ဖမ်းဆီးခံထားရခြင်း ဖြစ်ပါသည်။ ယူကရိန်းအစိုးရက ၎င်းတို့နိုင်ငံသား ၆ ဦး ဖမ်းဆီးခံရမှုကို အတည်ပြုထားပြီး ကောင်စစ်ဝန်ရုံးအနေဖြင့် တွေ့ဆုံခွင့်ရရန် ကြိုးပမ်းနေသော်လည်း၊ ၎င်းတို့နိုင်ငံသားများက တရားမဝင်လုပ်ရပ်များ ကျူးလွန်ခဲ့သည်ဟူသော ခိုင်လုံသည့် အထောက်အထား မရှိသေးကြောင်း ပြောဆိုထားပါသည်။ နယူးဒေလီရှိ အမေရိကန်သံရုံးကမူ ယင်းဖြစ်စဉ်ကို သိရှိထားသော်လည်း ပုဂ္ဂိုလ်ရေးလုံခြုံမှုဆိုင်ရာ အကြောင်းပြချက်များကြောင့် အသေးစိတ် မှတ်ချက်ပေးရန် ငြင်းဆိုထားပါသည်။ အိန္ဒိယအစိုးရသည် နယ်စပ်ဒေသ မတည်ငြိမ်မှုများကို စိုးရိမ်သဖြင့် လက်ရှိတွင် မြန်မာနယ်စပ်တစ်လျှောက် ခြံစည်းရိုးခတ်ရန် ပြင်ဆင်လျက်ရှိကြောင်း သိရပါသည်။ #India #အိန္ဒိယအမျိုးသားစုံစမ်းစစ်ဆေးရေးအေဂျင်စီNIA #မီဇိုရမ်ပြည်နယ် #Myanmar

မြန်မာနိုင်ငံဘက် ကူးခဲ့သော နိုင်ငံခြားသား ၇ ဦး အိန္ဒိယ ဖမ်းဆီး

မြန်မာနိုင်ငံဘက် ကူးခဲ့သော နိုင်ငံခြားသား ၇ ဦး အိန္ဒိယ ဖမ်းဆီး သတင်းနှင့် မီဒီယာ ကွန်ရက်။၂၀၂၆ ခုနှစ်၊ မတ်လ ၁၈ ရက်။ မြန်မာလက်နက်ကိုင်များကို သင်တ…

  • March 18, 2026
အာဖဂန်နစ္စတန်ရှိ မူးယစ်ဆေးဖြတ်စင်တာ တိုက်ခိုက်ခံရ၊ လူ ၄၀၀ နီးပါး သေဆုံး   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မတ်လ ၁၈ ရက်။   အာဖဂန်နစ္စတန်နိုင်ငံ၊ ကဘူးလ် (Kabul) မြို့ရှိ အိုမစ် (Omid) မူးယစ်ဆေးစွဲရောဂါကုဆေးရုံကို ပါကစ္စတန်လေတပ်က လေကြောင်းမှ တိုက်ခိုက်ခဲ့ရာ လူ ၄၀၀ ခန့် သေဆုံးသွားပြီဖြစ်ကြောင်း တာလီဘန်အစိုးရက ထုတ်ပြန်လိုက်ပါသည်။   တိုက်ခိုက်မှုသည် တနင်္လာနေ့ည ၉ နာရီခန့် (ရာမာဒန်ဥပုသ်လအတွင်း ညစာစားချိန်) တွင် ဖြစ်ပွားခဲ့ခြင်းဖြစ်ပြီး၊ ပါကစ္စတန်နှင့် အာဖဂန်နစ္စတန်အကြား မကြာသေးမီက ဖြစ်ပွားခဲ့သော ပဋိပက္ခများအတွင်း အသေအပျောက် အများဆုံးဖြစ်စဉ် ဖြစ်သည်။   ပါကစ္စတန်အစိုးရဘက်ကမူ ၎င်းတို့အနေဖြင့် ဆေးရုံကို ရည်ရွယ်ချက်ရှိရှိ တိုက်ခိုက်ခဲ့ခြင်းမဟုတ်ဘဲ အကြမ်းဖက်သမားများနှင့် စစ်ဘက်ဆိုင်ရာ ပစ်မှတ်များကိုသာ တိတိကျကျ ပစ်မှတ်ထား တိုက်ခိုက်ခဲ့ခြင်းဖြစ်ကြောင်း တုံ့ပြန်ထားပါသည်။   တိုက်ခိုက်ခံရသည့် နေရာသည် လွန်ခဲ့သော ၁၀ နှစ်ခန့်က အမေရိကန်ဦးဆောင်သည့် နေတိုး (NATO) တပ်ဖွဲ့များ အသုံးပြုခဲ့သော စစ်သင်္တန်းကျောင်းဟောင်းဖြစ်ပြီး၊ နောက်ပိုင်းတွင် မူးယစ်ဆေးဖြတ်စင်တာအဖြစ် ပြောင်းလဲခဲ့ခြင်း ဖြစ်ပါသည်။   လူ ၂,၀၀၀ ခန့်သာ ဆန့်သည့် အဆိုပါစင်တာတွင် တိုက်ခိုက်ခံရချိန်၌ လူပေါင်း ၅,၀၀၀ ခန့်အထိ ပြည့်နှက်နေခဲ့သည်ဟု ဆိုသည်။   #အာဖဂန်နစ္စတန် #မူးယစ်ဆေးဖြတ်စင်တာ #Omid #Kabul

အာဖဂန်နစ္စတန်ရှိ မူးယစ်ဆေးဖြတ်စင်တာ တိုက်ခိုက်ခံရ၊ လူ ၄၀၀ နီးပါး သေဆုံး 

အာဖဂန်နစ္စတန်ရှိ မူးယစ်ဆေးဖြတ်စင်တာ တိုက်ခိုက်ခံရ၊ လူ ၄၀၀ နီးပါး သေဆုံး  သတင်းနှင့် မီဒီယာ ကွန်ရက်။၂၀၂၆ ခုနှစ်၊ မတ်လ ၁၈ ရက်။  အာဖဂန်နစ္စတန်…

  • March 18, 2026
အီရန်လုံခြုံရေးအကြီးအကဲ Ali Larijani နှင့် ပြည်သူ့စစ်ခေါင်းဆောင် ဗိုလ်ချုပ် Golamreza Soleimani တို့ သေဆုံး   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မတ်လ ၁၈ ရက်။   အီရန်နိုင်ငံ၏ ဩဇာအရှိဆုံး နိုင်ငံရေးသမားတစ်ဦးဖြစ်သူ အမျိုးသားလုံခြုံရေးအကြံပေး အလီ လာရီဂျာနီ (Ali Larijani) နှင့် ဘာဆစ်ဂျ် (Basij) ပြည်သူ့စစ်တပ်ဖွဲ့ အကြီးအကဲ ဗိုလ်ချုပ် ဂိုလမ်ရီဇာ ဆိုလေမာနီ (Gholamreza Soleimani) တို့သည် အစ္စရေးနှင့် အမေရိကန်တို့၏ လေကြောင်းတိုက်ခိုက်မှုအတွင်း သေဆုံးသွားပြီဖြစ်ကြောင်း အီရန် အစိုးရနှင့် အီရန်တော်လှန်ရေးအစောင့်တပ် (IRGC) က အတည်ပြုထုတ်ပြန်လိုက်သည်။   အလီ လာရီဂျာနီသည် စစ်ဘက်ခေါင်းဆောင်တစ်ဦး မဟုတ်သော်လည်း အီရန်၏ အမျိုးသားလုံခြုံရေး၊ သံတမန်ရေးနှင့် စစ်ရေးဆိုင်ရာ မဟာဗျူဟာမြောက် ဆုံးဖြတ်ချက်များ ချမှတ်ရာတွင် အဓိကကျသူ ဖြစ်ပါသည်။   ၎င်းသည် မသေဆုံးမီကာလအတွင်း ဟော်မုဇ်ရေလက်ကြား ပိတ်ဆို့ရေးအပါအဝင် ဒေသတွင်းစစ်ပွဲကို ရေရှည်ဆင်နွှဲရန် ပြင်ဆင်ခြင်း၊ စီးပွားရေးကျပ်တည်းမှုကြောင့် ပေါ်ပေါက်လာသည့် ပြည်တွင်းဆန္ဒပြပွဲများကို နှိမ်နင်းခြင်းနှင့် ရပ်တန့်နေသော အမေရိကန်-အီရန် နျူကလီးယားဆွေးနွေးပွဲများကို ကိုင်တွယ်ခြင်း စသည့် အရေးကြီးလုပ်ငန်းစဉ် ၃ ခုကို တာဝန်ယူဆောင်ရွက်နေသူ ဖြစ်ပါသည်။     ပြည်သူ့စစ်ခေါင်းဆောင်ဖြစ်သူ ဗိုလ်ချုပ် ဂိုလမ်ရီဇာ ဆိုလေမာနီ (Gholamreza Soleimani)ကလည်း အမေရိကန်နဲ့ အစ္စရေးတို့၏ တိုက်ခိုက်မှု အတွင်း ကျဆုံးသွားခဲ့ကြောင်း အီရန် အစ္စလာမ်မစ် တော်လှန်ရေး တပ်ဖွဲ့ (IRGC- Iran Revolutionary Guard Corps) က မနေ့က ထုတ်ပြန်သည်။   ပြီးခဲ့သည့် ဖေဖော်ဝါရီ ၂၈ ရက်တွင် အမြင့်ဆုံးခေါင်းဆောင် အယာတိုလာ ခါမေနီ သေဆုံးခဲ့ပြီးနောက်၊ ယခုအခါ လာရီဂျာနီနှင့် ဗိုလ်ချုပ်ဆိုလေမာနီတို့ ထပ်မံသေဆုံးသွားခြင်းကြောင့် အီရန်၏ ခေါင်းဆောင်မှုယန္တရား ယိုင်နဲ့လာနေကြောင်း အကဲခတ်များက သုံးသပ်ကြပါသည်။   အရပ်ဘက်ခေါင်းဆောင်ကြီးများဖြစ်သည့် အယာတိုလာ ခါမေနီနှင့် လုံခြုံရေး တာဝန်ခံ အလီ လာရီဂျာနီ တို့ ဆုံးရှုံးသွားမှုကြောင့် နောင်တွင် အရေးကြီးသည့် ဆုံးဖြတ်ချက်ချမှတ်မှုများသည် စစ်ဘက်ဆိုင်ရာ ခေါင်းဆောင်များထံသို့ ပိုမိုရောက်ရှိသွားနိုင်သည့် အခြေအနေ ဖြစ်ပေါ်နေသည်။   #AliLarijani #GolamrezaSoleimani

အီရန်လုံခြုံရေးအကြီးအကဲ Ali Larijani နှင့် ပြည်သူ့စစ်ခေါင်းဆောင် ဗိုလ်ချုပ် Golamreza Soleimani တို့ သေဆုံး

အီရန်လုံခြုံရေးအကြီးအကဲ Ali Larijani နှင့် ပြည်သူ့စစ်ခေါင်းဆောင် ဗိုလ်ချုပ် Golamreza Soleimani တို့ သေဆုံး  သတင်းနှင့် မီဒီယာ ကွန်ရက်။၂၀၂၆ ခု…

  • March 18, 2026
လေယာဉ်လက်မှတ်ခများ မတ်လလယ်မှစတင် ဈေးတက်မည်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မတ်လ ၁၈ ရက်။   လေယာဉ်ဆီ စရိတ် ကြီးမြင့်လာသဖြင့် လေကြောင်းလိုင်းအများအပြားက လေယာဉ်လက်မှတ် ဈေးနှုန်းများကို မတ်လလယ်မှ စတင်၍ ဈေးတင်လိုက်သည်။   အီရန် စစ်ပွဲနှင့် အရှေ့အလယ်ပိုင်းပဋိပက္ခကြောင့် ကမ္ဘာ့ရေနံဈေးနှုန်း မြင့်တက်လာမှုနှင့် အတူ လေယာဉ်ဆီ (Jet Fuel) စရိတ် ကြီးမြင့်လာခြင်းကြောင့် နိုင်ငံတကာလေကြောင်းလိုင်းများက လေယာဉ် လက်မှတ်ခများကို "လောင်စာဆီ ထပ်ဆောင်းခ" (Fuel Surcharge) အနေဖြင့် တိုးမြှင့်ကောက်ခံလာခြင်း ဖြစ်သည်။   အရှေ့အလယ်ပိုင်း စစ်ပွဲကြောင့် လေယာဉ်ဆီဈေးနှုန်းများ ၁၅၀ ရာခိုင်နှုန်းအထိ ထိုးတက်သွားခဲ့သည်။   ထိုင်းနိုင်ငံ အစိုးရ ပိုင် THAI ထိုင်းလေကြောင်းလိုင်းအပါအဝင် ဒေသတွင်း လေကြောင်းလိုင်းများဖြစ်သည့် အိန္ဒိယ လေကြောင်းလိုင်းများ၊ ဟောင်ကောင် အခြေစိုက် Cathy Pacific လေကြောင်းလိုင်း၊ အဲယားဖရန့်စ် Air France၊ KLM နှင့် Quant‌as လေကြောင်းလိုင်းများတွင် လက်မှတ် ဈေးနှုန်းများ တိုးမြှင့် လိုက်ခြင်း ဖြစ်သည်။   Air New Zealandက လောင်စာဆီစရိတ် လျှော့ချရန်အတွက် မေလအစောပိုင်းအထိ ပြေးဆွဲမည့် ခရီးစဉ်ပေါင်း ၁,၁၀၀ ကျော်ကို ဖျက်သိမ်းလိုက်သည်။   အရှေ့တောင်အာရှ၏ အကြီးဆုံး တန်ဖိုးနည်းလေကြောင်းလိုင်းဖြစ်သည့် Air Asia ကလည်း လက်မှတ်ခတွေကို တိုးမြှင့်လိုက်ပေမဲ့ အသေးစိတ်နှုန်းထားကိုတော့ ထုတ်ပြန်ခြင်း မရှိသေးပါဘူး။   ဤ"လောင်စာဆီ ထပ်ဆောင်းခ"များသည် ယာယီသဘောမျိုးဖြစ်ပြီး ရေနံဈေးနှုန်း ပြန်လည်တည်ငြိမ်သွားခဲ့ပါက ပြန်လည် လျှော့ချခြင်း သို့မဟုတ် ပယ်ဖျက်ခြင်း မျိုး လုပ်ဆောင်သွားမည်ဟု လေကြောင်းလိုင်းများက ဆိုသည်။   လေကြောင်းလိုင်း စာရင်းနှင့် တိုးမြှင့်မှု ငွေပမာဏကို အောက်ပါ ဇယားတွင် ဖော်ပြထားသည်။   လေကြောင်းလိုင်း ခရီးစဉ်အမျိုးအစား တိုးမြှင့်သည့်နှုန်းထား (ခန့်မှန်းခြေ) Air India & Air India Express ပြည်တွင်းနှင့် SAARC နိုင်ငံများ ၃၉၉ ရူပီး (INR) အရှေ့တောင်အာရှ ၅,၅၄၀ ရူပီး ခန့် ဥရောပ၊ မြောက်အမေရိက၊ သြစတြေးလျ ၁၁,၅၄၀ မှ ၁၈,၄၆၅ ရူပီး အထိ IndiGo အိန္ဒိယပြည်တွင်း ၄၂၅ ရူပီး အနောက်အာရှ ၉၀၀ ရူပီး အရှေ့တောင်အာရှ၊ တရုတ်၊ အာဖရိက ၁,၈၀၀ ရူပီး ဥရောပ ၂,၃၀၀ ရူပီး Cathay Pacific ဟောင်ကောင်မှ မြောက်အမေရိက၊ ဥရောပ၊ အရှေ့အလယ်ပိုင်း ၁,၁၆၄ ဒေါ်လာ (HKD) အာရှတိုက်အတွင်း ခရီးစဉ်များ ၂၉၀ မှ ၅၄၁ ဒေါ်လာ (HKD) Thai Airways ခရီးစဉ်အားလုံး (ပျမ်းမျှ) ၁၀ % မှ ၁၅ % အထိ တိုးမြှင့် Air France & KLM ဥရောပ ပြန်အလာ ခရီးစဉ်များ ၅၀ ယူရို (EUR) ခန့် Qantas နိုင်ငံတကာ ခရီးစဉ်များ ၅ % ခန့် တိုးမြှင့်    

လေယာဉ်လက်မှတ်ခများ မတ်လလယ်မှစတင် ဈေးတက်မည်

လေယာဉ်လက်မှတ်ခများ မတ်လလယ်မှစတင် ဈေးတက်မည်  သတင်းနှင့် မီဒီယာ ကွန်ရက်။၂၀၂၆ ခုနှစ်၊ မတ်လ ၁၈ ရက်။  လေယာဉ်ဆီ စရိတ် ကြီးမြင့်လာသဖြင့် လေကြောင်း…

  • March 18, 2026
×Close