ကချင် လွတ်လပ်ရေးအဖွဲ့ KIO/KIA – Network Media Group

Tag: ကချင် လွတ်လပ်ရေးအဖွဲ့ KIO/KIA

ဗန်းမော်တွင် တိုက်ပွဲများ ပြင်းထန်ဆဲဖြစ် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ နိုဝင်ဘာလ ၇ ရက်။ ကချင်ပြည်၊ ဗန်းမော်မြို့နယ်အတွင်း၌ တိုက်ပွဲများမှာ နေ့စဉ်နှင့်အမျှ ပြင်းထန်စွာ ဖြစ်ပွားနေဆဲဖြစ်ပြီး၊ နိုဝင်ဘာ လ ၆ ရက်နေ့ တွင် စစ်ကော်မရှင်၏ ခလရ (၄၇) တပ်ရင်းဘက်၌ တိုက်ပွဲများ ပိုမိုပြင်းထန်ခဲ့ကြောင်း ကချင် စစ်ရေးသတင်းရင်းမြစ်များက ပြောသည်။ ကချင်လွတ်လပ်ရေး တပ်မတော် (KIA) သည် ဗန်းမော်မြို့ကို ထိုးစစ်ဆင်လျက်ရှိပြီး၊ စစ်ကော်မရှင်တပ် က ၎င်းတို့ လက်လွတ်ဆုံးရှုံးခဲ့ရသည့် နေရာများကို ပြန်လည်သိမ်းပိုက်နိုင်ရန်အတွက် အင်အား အလုံးအရင်း ဖြင့် ကြိုးပမ်းတိုက်ခိုက်နေခြင်းကြောင့် တိုက်ပွဲများ ဆက်တိုက်ဖြစ်ပွားနေခြင်းဖြစ်သည်။ ကချင်လွတ်လပ်ရေးအဖွဲ့ (KIO) ၏ သတင်းနှင့်ပြန်ကြားရေး တာဝန်ခံ ဗိုလ်မှူးကြီး နော်ဘူ က “ဗန်းမော်ဘက်မှာ တော့ နေ့တိုင်း တိုက်ပွဲ ဖြစ်ပါတယ်။ အခုအချိန်မှာကတော့ စစ်ကော်မရှင် စစ်သားတွေလည်း သူတို့ လက်လွှတ် ဆုံးရှုံး ခဲ့တဲ့ စခန်းတွေ၊ နေရာတွေ၊ မြို့ရွာရပ်ကွက်တွေ ပြန်ထိန်းချင်လို့ မြေပြင်ကနေလည်း ထိုးတာ။ လက် နက်ကြီးမျိုးစုံနဲ့ ပစ်ပြီးမှ ဒီဗန်းမော်မြို့မှာတော့ တိုက်ပွဲက တော်တော်ပြင်းထန်တယ်။ တိုက်ပွဲတွေက ဆက် တိုက်ဖြစ်တယ်။ အဲ့ဒါက ဗန်းမော်ဘက်က အခြေအနေ” ဟု အတည်ပြုပြောဆိုသည်။ ဗန်းမော်မြို့သိမ်းတိုက်ပွဲသည် ၂၀၂၄ ခုနှစ် ဒီဇင်ဘာလ ကတည်းက စတင်ခဲ့သည်ဖြစ်ရာ လက်ရှိအချိန်အထိ ၁၀ လနီးပါး ကြာမြင့်လာပြီဖြစ်သည်။ နိုဝင်ဘာလ ပထမပတ်အတွင်း နှစ်ဖက်ကြား တိုက်ပွဲများ ပြင်းထန်နေသည့် နေရာများမှာ ဗန်းမော်တက္ကသိုလ်ဝင်း နေရာ၊ ၃ မိုင် နေရာ နှင့် စစ်ကော်မရှင်တပ်၏ ခလရ ၄၇ တပ်ရင်းအနီးတစ်ဝိုက်တို့ဖြစ်သည်ဟု KIO သတင်းနှင့် ပြန်ကြားရေး တာဝန်ခံ ဗိုလ်မှူးကြီးနော်ဘူက ပြောသည်။ တိုက်ပွဲများ ပြင်းထန်ရခြင်း၏ အဓိကအကြောင်းအရင်းမှာ နှစ်ဖက်၏ အပြန်အလှန် ထိုးစစ်များကြောင့် ဖြစ်သည်။ ပြီးခဲ့သည့် ဇူလိုင်၊ ဩဂုတ်လ အတွင်း စစ်ကော်မရှင်တပ်သည် စစ်သင်္ဘော အစီး ၂၀ ကျော် အသုံးပြု၍ စစ်လက် နက်နှင့် ရိက္ခာများ ပို့ဆောင်နိုင်ခဲ့သည်။ ထို့အပြင် လေကြောင်းတိုက်ခိုက်မှုများအပြင် အဆင့်မြင့် ဒရုန်းများကိုပါ သိသိသာသာ အသုံးပြုလာခဲ့သည်။ KIA အနေဖြင့် အောက်တိုဘာလဆန်းပိုင်းအတွင်း လက်လွတ်လိုက်ရသည့် ကာကင်းတပ်စခန်း ၃ ခု နှင့် ရွှေပြည် သာက KBC ဘုရားကျောင်းဝင်းနေရာ တို့ကို ပြန်လည်သိမ်းပိုက်နိုင်ခဲ့သော်လည်း၊ ဗန်းမော်မြို့ကို အပြီးသတ် ထိန်းချုပ်နိုင်ရန်အတွက် နှစ်ဖက်တပ်ဖွဲ့တို့ကြား တိုက်ပွဲများ ဆက်လက် ပြင်းထန်နေဆဲဖြစ်သည်။ ဗန်းမော်အပြင် ကချင်ပြည်ရှိ အခြားစစ်မျက်နှာများတွင်လည်း စစ်ရေးတင်းမာမှုများ ဆက်လက် ရှိနေကြောင်း ဗိုလ်မှူးကြီးနော်ဘူက ဆက် ပြောသည်။ “နောက် ဝိုင်းမော်ဘက်မှာလည်း လေကြောင်းနဲ့ ပစ်တာတွေ၊ လက်နက်ကြီးနဲ့ ပစ်တာတွေ ရှိတယ်။ မြေပြင်နေ တော့ သူတို့ထိုးတက်တာ မတွေ့ရဘူး။ ဖားကန့်ဘက်မှာတော့ တပတ်လောက်တော့ ငြိမ်နေပါတယ်။ လန်ဆယ် ဘက်မှာကတော့ သူတို့လည်း ထိုးလာလို့ ကျနော်တို့ ခုခံတိုက်ပွဲတွေ ရှိပါတယ်။ ဒါပေမယ့် ကျနော်တို့ ရွာတွေ ဘာတွေ ရွာနာမည်တွေ သိပ်မသိဘူး။ ကျနော်တို့လည်း သိပ်မကျွမ်းဘူး။” အဆိုပါ ပြောဆိုချက်အရ ဝိုင်းမော်ဘက်တွင် လေကြောင်းနှင့် လက်နက်ကြီး ပစ်ခတ်မှုများရှိနေသော်လည်း မြေပြင်၌ ထိုးစစ်မှာ ငြိမ်သက်နေပြီး၊ လန်ဆယ်ဘက် တွင်မူ KIA နှင့် စစ်ကော်မရှင်တပ်တို့အကြား ခုခံတိုက်ပွဲ များ ဖြစ်ပွားလျက်ရှိနေသည်။ ဗန်းမော်တိုက်ပွဲကို ရပ်တန့်စေရန်အတွက် နိုင်ငံရေးဖိအားများလည်း ရှိနေသည်။ ပြီးခဲ့သည့် အောက်တိုဘာလ ဒုတိယအပတ် တွင် KIO နှင့် တရုတ်အာဏာပိုင်များ တို့ တရုတ်နိုင်ငံ၊ ကူမင်းမြို့၌ တွေ့ဆုံခဲ့ပြီးနောက် တိုက်ပွဲ ငြိမ်သက်သွားပြီဆိုသော သတင်းများ လူမှုကွန်ရက်တွင် ပျံ့နှံ့ခဲ့သည်။ သို့သော်လည်း စစ်ကော်မရှင် ဝါဒဖြန့်သူများက KIO/KIA နှင့် စစ်တပ်တို့ တွေ့ဆုံဆွေးနွေးရန် ပြင်ဆင်နေပြီဟု ဝါဒဖြန့်မှုများ ဆက်တိုက်ပြုလုပ်နေသည်ကို KIA ဘက်က ငြင်းဆိုထားသည်။ ဗန်းမော်မြို့သည် ဗန်းမော်၊ မိုးမောက်၊ မံစီ၊ ရွှေကူ မြို့နယ်တို့ပါဝင်သော ခရိုင်ရုံးစိုက်ရာ ဒေသဖြစ်ပြီး၊ KIA နှင့် ပူးပေါင်းတပ်များက မိုးမောက်နှင့် မံစီမြို့များကိုမူ သိမ်းပိုက်ထားပြီး ဖြစ်သည်။

ဗန်းမော်တွင် တိုက်ပွဲများ ပြင်းထန်ဆဲဖြစ်

နယ်စပ်ဂိတ်များပြန်ဖွင့်သော်လည်း အကန့်အသတ်ဖြင့်သာ ကုန်သွယ်မှု ရှိဟု KIO ပြော သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၃၁ ရက်။ တရုတ်-ကချင်နယ်စပ်ဂိတ်များ ပြန်ဖွင့်သော်လည်း စီးပွားရေး အေးစက်ကာ တရုတ်မှ ကုန်သွယ်မှု အကန့်အသတ်များ ရှိနေဆဲဟု KIA က ပြောသည်။ ကချင်လွတ်လပ်ရေး တပ်မတော် (KIA) ထိန်းချုပ်နယ်မြေများနှင့် ထိစပ်နေသည့် တရုတ် - မြန်မာ နယ်စပ်ဂိတ် များကို တရုတ်ဘက်မှ အောက်တိုဘာ ၂၄ ရက် ည သန်းခေါင် ၁၂ နာရီမှစတင်၍ ပြန်လည်ဖွင့်လှစ်ခဲ့သည် ဟု KIA သတင်းနှင့်ပြန်ကြားရေးတာဝန်ခံ ဗိုလ်မှူးကြီးနော်ဘူ က အတည်ပြုပြောသည်။ သို့သော်လည်း လက်ရှိတွင် ကုန်သွယ်ရေးနှင့် လူဝင်လူထွက်မှာ ယခင်ကဲ့ သို့ ပုံမှန်အခြေအနေသို့ ပြန်မရောက် သေးဘဲ အကန့်အသတ်များစွာ ရှိနေသေးကြောင်း ၎င်းက ဆိုသည်။ ပြန်လည်ဖွင့်လှစ်သည့် ဂိတ်များမှာ မန်ဝိန်းကြီး၊ လွယ်ဂျယ်၊ လိုင်ဇာ၊ ကံပိုင်တည်၊ ပန်ဝါ၊ ဖီမော် အပါအဝင် နယ်စပ်တစ်လျှောက်ရှိ ဂိတ်အားလုံးဖြစ်ကြောင်း ဗိုလ်မှူးကြီးနော်ဘူက အတည်ပြုပြောကြားခဲ့သည်။ ဗိုလ်မှူးကြီးနော်ဘူက “ပစ္စည်းတွေလည်း အားလုံးလွတ်လွတ်လပ်လပ် ဝင်ထွက်လို့တော့ မရဘူး။ အဓိက ကတော့ ပြည်သူလူထုရဲ့ စားသောက်ကုန်ပစ္စည်းနဲ့ အိမ်ဆောက်ပစ္စည်းတွေကိုပဲ အခုလောလောဆယ်ကတော့ ခွင့်ပြုတာ တွေ့ရပါတယ်” ဟု ပြောသည်။ စက်သုံးဆီများ၊ အီလက်ထရောနစ်နှင့် သက်ဆိုင်သော ပစ္စည်းများ အားလုံးကို တရုတ်ဘက်မှ သွင်းခွင့်မပေးဘဲ ကန့်သတ်ထားသည်။ တရုတ်ဘက်မှ စျေးရောင်းစျေးဝယ်သူများ အဝင်အထွက်ရှိသော်လည်း မြန်မာဘက်မှ လူများ ဝင်ထွက်မှုမှာ မရှိသလောက် နည်းပါးနေဆဲ ဖြစ်သည်။ KIA ထိန်းချုပ်နယ်မြေများမှ ဝင်ထွက်သူများကိုမူ KIO မှ ပေးထားသော အိမ်ထောင်စုလက်မှတ် ကိုင်ဆောင် သူများကို ဦးစားပေးပြီး၊ မြို့တွင်းမှ လာသူများအားလည်း ဘာကိစ္စကြောင့် သွားလာသည်ကို စိစစ်မှုများ ပြုလုပ် ၍ ခွင့်ပြုပေးနေကြောင်း ၎င်းက ဖြည့်စွက်ပြောသည်။ ဗိုလ်မှူးကြီးနော်ဘူ၏ အဆိုအရ နယ်စပ်ဂိတ်များကို တစ်နှစ်ကျော်ခန့်ကြာမြင့်အောင် ပိတ်ထားခဲ့ခြင်း ဖြစ်သည်။ ဗိုလ်မှူးကြီးနော်ဘူက “သူတို့ပိတ်တာ ကျနော်တို့ဖက်ကနေ ပိတ်တာမဟုတ်ဘူး။ သူတို့ပိတ်တာ နယ်စပ်ဒေသ မှာ တိုက်ပွဲတွေ ဖြစ်နေလို့ ပိတ်တယ်လို့တော့ ပြောပါတယ်။ နယ်စပ်ဒေသ သူတို့ တရုတ်နယ်စပ်မှာ လုံခြုံမှု ရှိအောင် ဆိုပြီးမှ အဲဒီ နယ်စပ်ဂိတ်တွေကို ပိတ်တာ ဖြစ်ပါတယ်” ဟု အတည်ပြုခဲ့သည်။ တရုတ်ဘက်မှ မြေရှားသတ္တု တူးဖော်ရေးလုပ်ငန်းများ လုပ်ကိုင်ရန် ကြိုးပမ်းနေသည်ဟူသော သတင်းများ ထွက်ပေါ်နေသော်လည်း KIA ဘက်မှ ခွင့်ပြုထားခြင်း မရှိသေးကြောင်း ၎င်းက ငြင်းဆိုသည်။ “မြေရှားသတ္တုနဲ့ ပတ်သက်လို့တော့ ကျနော်တို့လည်း ဘာမှ ဖြုတ်တာလည်း မရှိဘူး။ တူးတာလည်း မရှိဘူး။ ဘာမှ မရှိဘူး ကျနော်တို့နဲ့ သဘောတူညီမှု မရှိဘူး။ လက်မှတ်ထိုးထားတာလည်း မရှိပါဘူး” ဟု ဗိုလ်မှူးကြီး နော်ဘူက အခိုင်အမာ ပြောသည်။ ဤသို့ ပြန်ဖွင့်ပေးခြင်းသည် ဒေသခံများအတွက် အားတက်စရာဖြစ်ပြီး အခြေအနေ တဖြည်းဖြည်း တိုးတက် လာမည်ဟု မျှော်လင့်ချက်ရှိနေကြသည်။ ဗိုလ်မှူးကြီးနော်ဘူက “နယ်စပ်ဂိတ် ဖွင့်တာကတော့ ဖြေးဖြေးချင်းတော့ ကောင်းလာမယ်လို့ မျှော်လင့်ပါတယ်။ လူတွေ အဝင်အထွက်တွေကအစ စီးပွားရေးတွေက အစပေါ့လေ” ဟု ဆက်ပြောသည်။ သို့သော်၊ နယ်စပ်ဂိတ်များ ပြန်လည်ဖွင့်လှစ်သည်မှာ ရက်သတ္တပတ်မျှသာ ရှိသေးသော်လည်း ကုန်သွယ်မှုမှာ ယခင်ကဲ့သို့ ကြီးကြီးမားမား မရှိသေးကြောင်း ဒေသခံများက ပြောသည်။   ဓါတ်ပုံ - CJ

နယ်စပ်ဂိတ်များပြန်ဖွင့်သော်လည်း အကန့်အသတ်ဖြင့်သာ ကုန်သွယ်မှု ရှိဟု KIO ပြော

ဖားကန့်တွင် ညမထွက်ရ အမိန့်ထုတ်ပြန် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၁၁ ရက်။ ကချင်ပြည်ရှိ မြန်မာနိုင်ငံ၏ အဓိက ကျောက်စိမ်းထွက်ရာ ဒေသဖြစ်သော ဖားကန့်မြို့နယ် တွင် စစ်ကော်မရှင် တပ်ဖွဲ့က ညမထွက်ရအမိန့် နှင့် လူငါးဦးထက် ပိုမစုရအမိန့် များကို ထပ်မံထုတ်ပြန်လိုက်ကြောင်း ဒေသခံများက ပြောသည်။ ဖားကန့် ဒေသခံ အမျိုးသားတစ်ဦးက “၁၄၄ မထုတ်တာတောင် ဖမ်းဆီးတာ၊ စစ်ဆေးတာ၊ ပစ်သတ်တာတွေက ဆက်တိုက်ဆိုတော့ အခုက ပိုဆိုးမှာပေါ့ဗျာနော်။ အခု ဒီလိုလိုက်တော့ ဥပဒေမဲ့လုပ်နေရာကနေ ဥပဒေအရ လုပ်တာဆိုပြီး အဖမ်းခံတာ၊ ပစ်သတ်ခံရတာ တွေ ပိုများလာမှာပေါ့ဗျာ” ဟု ပြောသည်။ ညရေးညတာ ကိစ္စများ ပေါ်လာပါက အခက်ကြုံနိုင်သည်ဟု လည်း ပြောသည်။ “ညဘက်တွေမှာ တိုက်ပွဲတွေ ရုတ်တရက် ဖြစ်လာရင်ပေါ့ လူနာတွေကို အရေးပေါ် အခြေအနေအရ ကယ်ဆယ်ရေးလုပ်ဖို့ ကူညီဖို့ ပိုခက်ခဲသွားမယ်။ သွားကယ်တဲ့လူကအစ အဖမ်းခံရတာမျိုး ပစ်သတ်ခံရတာမျိုး တွေ ဖြစ်လာမှာပေါ့နော်” ဟု အဆိုပါ ဒေသခံက ဆက်ပြောသည်။ ဖားကန့်မြို့နယ် (အုပ်ချုပ်ရေးမှူး) က လက်မှတ်ရေးထိုးထားသော အဆိုပါ အမိန့်ကို ရာဇဝတ်ကျင့်ထုံး ဥပဒေပုဒ်မ ၁၄၄ အရ ၂၀၂၅ ခုနှစ်၊ အောက်တိုဘာလ ၈ ရက်နေ့ တွင် စတင် အသက်သွင်းခဲ့သည်။ အဆိုပါ ညမထွက်ရအမိန့် ကို ည ၁၀ နာရီမှ နံနက် ၄ နာရီအထိ သတ်မှတ်ထားသည်။ ယင်းအမိန့်သည် ဖားကန့်မြို့နယ်အတွင်း စစ်ရေးတင်းမာမှုများ ဆက်လက်မြင့်တက်နေဆဲ ဖြစ်ကြောင်းကို ပြသ နေသည်။ KIO/KIA သတင်းနှင့် ပြန်ကြားရေး တာဝန်ခံ ဗိုလ်မှူးကြီးနော်ဘူက “သူတို့ကတော့ အခု ရွေးကောက်ပွဲလည်း နီးလာပြီဆိုတော့ ရွေးကောက်ပွဲနယ်မြေတွေ၊ မဲဆွယ်နယ်မြေတွေ ပိုပြီးမှ တိုးချဲ့နိုင်ဖို့အတွက် လက်လွှတ်ဆုံးရှုံး ခဲ့တဲ့ စခန်းဟောင်းတွေ နေရာဟောင်းတွေ ပြန်ရနိုင်ဖို့အတွက် ကြိုးစားတဲ့ အနေနဲ့ အခုလိုမျိုး ၁၄၄ တွေ ချတာ နေမှာ။ တိုက်ပွဲကို မထိန်းနိုင်လို့ ပြည်သူလူထုဘက်ကို လှည့်ပြီးမှ အဲ့လိုမျိုး လုပ်တာပဲလို့ ကျနော်ကတော့ သုံးသပ်ပါတယ်” ဟု ပြောသည်။ ထို့အပြင် မြို့နယ်အတွင်းရှိ လမ်းမများ၊ လမ်းသွယ်များနှင့် အများပြည်သူနှင့် သက်ဆိုင်သော နေရာများတွင် လူငါးဦး သို့မဟုတ် ငါးဦးထက် ပိုမို၍ စုဝေးခြင်းကို လုံးဝ မပြုလုပ်ရဟု ဆိုသည်။ စုဝေးခြင်း၊ ဟောပြောခြင်း၊ ဖျက်ဆီးခြင်းနှင့် ရုန်းရင်းဆန်ခတ်ပြုမူခြင်းမျိုး မှန်သမျှကိုလည်း တားမြစ်ထားသည်။ ထိုအမိန့်ကို မလိုက်နာပါက တည်ဆဲဥပဒေများ အရ အရေးယူခံရမည် ဖြစ်ကြောင်း ထုတ်ပြန်ချက်တွင် ဖော်ပြ ထားသည်။ ဗိုလ်မှူးကြီးနော်ဘူက “၁၄၄ ထုတ်တာပဲ ဖြစ်ဖြစ်၊ မထုတ်တာပဲ ဖြစ်ဖြစ် ပြည်သူလူထုကို ပစ်ခတ်တာတွေ၊ ဖမ်း ဆီးတာတွေ စစ်ဆေးတာတွေ အများကြီး လုပ်နေတာ။ ဒါပေမယ့် အဲ့ဒီ ၁၄၄ ထုတ်ပြီ ဆိုလို့ရှိရင်တော့ ပိုပြီးမှ သတိထားဖို့ လိုတာပေါ့နော်” ဟု ပြောသည်။ အမိန့်ထုတ်ပြန်ရခြင်း၏ တရားဝင်အကြောင်းပြချက်အဖြစ် စစ်ကော်မရှင်ဘက်မှ ဒေသတွင်း ရာဇဝတ်မှုများနှင့် လုယက်မှုများ များပြားလာခြင်းကြောင့် လုံခြုံရေးထိန်းသိမ်းရန်ဟု ဆိုသည်။ သို့သော် နိုင်ငံရေး လေ့လာသူများနှင့် ဒေသခံများ၏ သုံးသပ်ချက်မှာ မတူညီပေ။ ဖားကန့်မြို့နယ်သည် ကချင်လွတ်လပ်ရေး တပ်မတော် (KIA) နှင့် ပြည်သူ့ကာကွယ်ရေး တပ်ဖွဲ့ (PDF) ပူးပေါင်း တပ်များ၏ ထိုးစစ်ဒဏ်ကို အပြင်းအထန် ခံနေရသောဒေသ ဖြစ်သည်။ စစ်ကော်မရှင်တပ်အနေဖြင့် စစ်ရေးဖိအားကြောင့် လုံခြုံရေးကို အပြင်းအထန် တင်းကျပ်နေရသည်ဟု သုံးသပ်မှု များ ရှိနေသည်။ နိုင်ငံရေးလေ့လာသူများက ဤအမိန့်သည် အရပ်သား ပြည်သူများ၏ လှုပ်ရှားမှုကို ထိန်းချုပ်ရန် နှင့် စစ်ကော်မရှင်တပ်၏ စစ်ရေးလှုပ်ရှားမှုများကို ပိုမို လွယ်ကူစေရန် ရည်ရွယ်ပြီး ထုတ်ပြန်ခြင်း ဖြစ်ကြောင်း ဝေဖန်သုံးသပ်ထားသည်။ ဖားကန့်မြို့နယ်ရှိ ဒေသခံများမှာမူ ညမထွက်ရ အမိန့်ကြောင့် လုပ်ငန်းဆောင်တာများနှင့် လူမှုရေးကိစ္စရပ်များ တွင် အခက်အခဲများစွာနှင့် ရင်ဆိုင်ရနိုင်ပြီး လုံခြုံရေး အခြေအနေအတွက် စိုးရိမ်ပူပန်မှုများ မြင့်တက်နေသည်ဟု ပြောသည်။  ဓါတ်ပုံ - Tarlin Mg

ဖားကန့်တွင် ညမထွက်ရ အမိန့်ထုတ်ပြန်

ဗန်းမောက်အနီး ကျေးရွာ အချို့ စစ်ကော်မရှင်တပ် ပြန်လည် သိမ်းပိုက် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၈ ရက်။ ကချင် - စစ်ကိုင်းအစပ်က ဗန်းမောက်မြို့ကို စစ်ကော်မရှင်တပ်က ထိုးစစ် ပြန်ဆင်လာသောကြောင့် တော်လှန် ရေး အင်အားစုဘက်က ကျေးရွာအချို့မှ ပြန်ဆုတ်ပေးထားရသည်ဟု မြေပြင် သတင်းအရင်းအမြစ်များ က ပြောသည်။ ဗန်းမောက်မြို့ကို စစ်ကော်မရှင်နှင့် ရှမ်းနီတပ်မတော် SNA ပူးပေါင်းအဖွဲ့က ထိုးစစ်ဆင်လာသဖြင့် သိမ်းပိုက် ထားသည့် ကျေးရွာအချို့ကို တော်လှန်ရေးအင်အားစုများ ပြန်လက်လွှတ်ထားရခြင်း ဖြစ်သည်။ စစ်ရေး သတင်းရင်းမြစ် တစ်ဦးက “ကျနော်တို့က တိုးလိုက် သူတို့က တိုးလိုက်ပါပဲ။ အခုက သူတို့က ပြန်တိုး နေတာ။ အင်အားအရမ်းများတယ်။ နှစ်ရွာလောက်ကနေ ပြန်ဆုတ်ပေးထားရတယ်။ ခမိုးဘက်နဲ့ စက်တော ဘက်။ သူတို့က ဟုမ္မလင်းဘက်က နယ်မြေခံ စကစတပ်ရင်း ၂ ရင်းက ကောင်တွေနဲ့ ရှမ်းနီ SNA တို့ ပူးပေါင်း ပြီး ထိုးလာတာ” ဟု ပြောသည်။ အောက်တိုဘာ ၄ ရက်နေ့မှ စတင်ကာ စစ်ကော်မရှင်ဘက်က ဆက်တိုက် ထိုးစစ်ဆင်လာခြင်းဖြစ်ပြီး ဗန်းမောက် မြို့နှင့် ၅ မိုင်အကွာရှိ ခမိုးကျေးရွာ၊ စက်တောကျေးရွာများကို ပြန်လက်လွှတ်ထားရခြင်း ဖြစ်သည်။ စစ်ကော်မရှင်သည် ဗန်းမောက်မြို့ကို ပြန်လည်ထိန်းချုပ်နိုင်ရေး ဟုမ္မလင်းမြို့နယ်ရှိ တပ်မ ၃၃ လက်အောက်ခံ တပ်ဖွဲ့ဝင်များနှင့် နယ်မြေခံ SNA တပ်သားများဖြင့် ပူးပေါင်း ထိုးစစ်ဆင်ဆင်လာသည်ဟု စစ်ရေး သတင်း အရင်းအမြစ်များက ပြောသည်။ စစ်ကော်မရှင် ပူးပေါင်းတပ်သည် တိုက်ပွဲအတွင်း လေကြောင်း အသုံးပြု တိုက်ခိုက်မှုများလည်း လုပ်နေပြီး အောက်တိုဘာလ ၅ ရက်နေ့၊ နေ့လည် ၂ နာရီ ဝန်းကျင်တွင် တိုက်ပွဲအတွင်း လေကြောင်းအသုံးပြု ဗုံးကြဲ တိုက်ခိုက်ခဲ့သေးသည်ဟု ဆိုသည်။ လက်ရှိတွင် နှစ်ဖက်တပ်များသည် ဗန်းမောက်မြို့နှင့် ၅ မိုင်ပတ်ချာလည်တွင် တိုက်ပွဲများ ပြင်းထန်နေပြီး တိုက်ပွဲ အတွင်း အခြေအနေ အသေးစိတ်ကိုမူ အတည်မပြုနိုင်သေးပေ။ တော်လှန်ရေး အင်အားစုများသည် ပြီးခဲ့သည့် စက်တင်ဘာလ ၂၀ ရက်နေ့ ဗန်းမောက်မြို့ကို သိမ်းပိုက်ရရှိခဲ့ပြီး နောက် တစ်ဆက်တည်း၌ပင် ဗန်းမောက်မြို့ အနောက်ခြမ်းကို ဆက်လက် တိုက်ခိုက်ခဲ့ရာ ကျေးရွာအချို့ကို သိမ်းပိုက်ထားခဲ့ရာမှ လက်ရှိတွင် မြို့ကိုလက်မလွှတ်ရရေး ပြန်လည် ခုခံနေကြရသည်။ တော်လှန်ရေး တပ်ဖွဲ့ဝင်တစ်ဦးက “သူတို့က လေယာဥ်တွေပါ သုံးတာလေ။ ကျနော်တို့ကျ လူနဲ့ဒရုန်းဘဲလေ ခံစစ်က မလွယ်ဘူးပေါ့လေ။ ကျနော်တို့က အရင်က ရွှေချောင်း၊ ပင်ဟင်းခါးတွေ အထိ တိုက်ထားနိုင်တဲ့ အနေ အထား။ ဒါပေမဲ့ အခုက သူတို့ ပြန်ထိုးစစ်ဆင်လာတော့ ပင်ဟင်းခါးတို့ စက်တောတို့ကို ကျော်ပြီးထိုးလာတာ” ဟု ပြောသည်။ ဗန်းမောက်မြို့သည် စစ်ကိုင်းတိုင်း အထက်ပိုင်းတွင် တည်ရှိပြီး ကချင်ပြည်နှင့် ကပ်လျှက်တွင် တည်ရှိသည့် မြို့တစ်မြို့ဖြစ်ပြီး ရွှေ၊ သစ် စသည့် သယံဇာတများ ပေါများသည့် ဒေသဖြစ်သည့် အလျောက် နှစ်ဖက်တပ်များ အတွက် အရေးပါသည့် ဒေသတစ်ခုဖြစ်သည်ဟု စစ်ရေးနှင့် နိုင်ငံရေး ကျွမ်းကျင်သူများက ဆိုကြသည်။

ဗန်းမောက်အနီး ကျေးရွာ အချို့ စစ်ကော်မရှင်တပ် ပြန်လည် သိမ်းပိုက်

ဖားကန့်မြို့တွင် ဒရုန်းဗုံးထိမှန်သဖြင့် သားအဖနှစ်ဦးသေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၂၃ ရက်။ ကချင်ပြည်၊ ဖားကန့်မြို့နယ်ထဲက ဆိုင်းတောင် (ဆိပ်မူ)ကျေးရွာ အုပ်စုထဲ စစ်ကော်မရှင်တပ်က ဒရုန်းဖြင့် ဗုံးကြဲခဲ့ရာ သားအဖနှစ်ဦး ထိမှန်သေဆုံးခဲ့သည်။ ကချင်လွတ်လပ်ရေး တပ်မတော် KIA နှင့် ပြည်သူ့ကာကွယ်ရေးတပ်ဖွဲ့ PDF ပူးပေါင်းအဖွဲ့က ထိန်းချုပ်ထားသည့် ဆိုင်းတောင် (ဆိပ်မူ) ကျေးရွာအုပ်စုထဲက ကျောက်သွေးတောင်ကျေးရွာအား စစ်ကော်မရှင်တပ်က ဒရုန်းဖြင့် ဗုံးကြဲခဲ့ခြင်း ဖြစ်သည်။ အဆိုပါ ကျေးရွာအတွင်း နေထိုင်သည့် သားအဖနှစ်ဦးမှာ ဒရုန်းဗုံးထိမှန်သဖြင့် သေဆုံးခဲ့ရသည်ဟု ဒေသခံများ ကပြောသည်။ စစ်ရေး သတင်းအရင်းအမြစ် တစ်ဦးက “ဟုတ်ပါတယ်။ မနေ့ကဘဲ ဒရုန်းနဲ့ချလို့ ပြည်သူနှစ်ယောက် သားအဖ နှစ်ယောက်ပေါ့။ ဒရုန်းဗုံးထိမှန်လို့ သေဆုံးသွားတာ။ လောလောဆယ် စစ်တပ်ဘက်က ဒရုန်းဗုံးသီးချတာတွေက ဆိုင်းတောင်ဘက်တွေမှာ တော်တော်လုပ်နေတာ။ တိုက်ပွဲတော့ဒီ နှစ်ရက် သုံးရက် အတွင်း မရှိဘူး ငြိမ်နေပါ တယ်” ဟု ပြောသည်။ ဖားကန့်ဗျူဟာကုန်းမှ စစ်ကော်မရှင်ပူးပေါင်းတပ်များက စက်တင်ဘာလ ၂၂ ရက်နေ့တွင် ဒရုန်းဖြင့် ဗုံးကြဲချခဲ့ ခြင်း ဖြစ်ကြောင်း ဒေသခံများက ဆိုသည်။ သေဆုံးခဲ့သွားသည့် သားအဖနှစ်ဦးမှာ အသက် ၅၀ ဝန်းကျင်အရွယ် ဦးကျော်စိုး ဆိုသူနှင့် သားဖြစ်သူ မောင်ထူးထူးစံတို့ ဖြစ်သည်ဟု ဒေသခံများက ပြောသည်။ စစ်ကော်မရှင် ပူးပေါင်းတပ်နှင့် တော်လှန်ရေး အင်အားစုများအကြား ပြင်းထန်လာသည့် တိုက်ပွဲကြောင့် ဖားကန့် မြို့နယ်ထဲက ဘေးလွှတ်သည့် နေရာများတွင် တိမ်းရှောင်နေရသည့် ကျေးရွာ ၇ ရွာခန့်မှ ဒေသခံများသည် စက် တင်ဘာလ ၂၀ ရက်နေ့မှ စတင်ကာ မြစ်ကြီးနား၊ မိုးကောင်း၊ မိုးညှင်းစသည့် မြို့နယ်များသို့ ဆက်လက် တိမ်းရှောင်နေကြရသည်။ “ဖားကန့်က လောလောဆယ် စစ်ပွဲတွေကြောင့် စစ်ရှောင်ရွာကတော့ ရွာ ၇ ရွာလောက် ရှိနေပြီ။ ဒီဒေသခံတွေ ကလည်း ဖားကန့်မှာ မလုံခြုံတော့လို့ မိုးညှင်း၊ မြစ်ကြီးနားဘက်တို့ကို ရှောင်နေကြတယ်။ အလံဖြူလေးတွေ ထောင်ပြီး ဆိုင်ကယ်တွေနဲ့ ရွှေ့နေကြတာတွေ့ရတယ်“ ဟု အထက်ပါ စစ်ရေးသတင်းရင်းမြစ်က ဆက် ပြော သည်။ ဖားကန့်မြို့တွင် စစ်ကော်မရှင် ပူးပေါင်းတပ်နှင့် KIA ပူးပေါင်းတပ်တို့အကြားက အပြန်အလှန် ပစ်ခတ်မှုများထဲ အရပ်သား သေဆုံးမှုသည် တစ်နေ့ထက်တစ်နေ့ မြင့်တက်လာနေသည်။ ပြီးခဲ့သည့် စက်တင်ဘာလ ၉ ရက်နေ့တွင်လည်း ထုံးဘိုကျေးရွာရှိ တော်လှန်ရေး အင်အားစုများ၏ အထိုင်ဂိတ် အနီး အမှိုက်ကောက်နေသည့် သားအမိနှစ်ဦး ဒရုန်းဗုံး ထိမှန်ကာ သေဆုံးခဲ့ရသေးသည်။ အာဏာသိမ်းပြီးနောက်ပိုင်း နိုင်ငံတစ်ဝှမ်းတွင် စစ်ကော်မရှင်တပ်၏ လက်ချက်ကြောင့် ဒီမိုကရေစီ အရေး လှုပ်ရှားသူနှင့် အရပ်သား စုစုပေါင်း ၇၂၀၀ ကျော်သေဆုံးခဲ့ရပြီ ဖြစ်ကြောင်း နိုင်ငံရေး အကျဥ်းသားများ ကူညီစောင့်ရှောက်ရေး အသင်း AAPP က စက်တင်ဘာလ ၁၉ ရက်နေ့တွင် ထုတ်ပြန်ထားသည်။ Photo - Tarlin Mg

ဖားကန့်မြို့တွင် ဒရုန်းဗုံးထိမှန်သဖြင့် သားအဖနှစ်ဦးသေဆုံး

လန်ဆယ်တွင် စစ်တပ်၊ ပြည်သူ့ပူးပေါင်းအဖွဲ့နှင့် KIA ကြား တိုက်ပွဲများ ပြင်းထန်နေ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၂၃ ရက်။ ကချင်ပြည်၊ ဆော့လော်မြို့နယ်ထဲက လန်ဆယ်မြို့တွင် စစ်ကော်မရှင်တပ်၊ ပြည်သူ့စစ်ပူးပေါင်းအဖွဲ့နှင့် ကချင် လွတ်လပ်ရေး တပ်မတော် KIA တို့အကြား တိုက်ပွဲများ ပြင်းထန်နေသည်။ စစ်ကော်မရှင်တပ်က လေကြောင်းမှ ဗုံးကြဲတိုက်ခိုက်မှုခဲ့သောကြောင့် ကလေးများ အပါအဝင် အရပ်သားများ ထိမှန်သေဆုံးခဲ့သည်။ မြေပြင်သတင်းအရင်းအမြစ်က“ ၂၂ ရက်နေ့က လေယာဉ်နဲ့ ဗုံးကြဲတဲ့အချိန် သေတာရှိတယ် ဆိုတာ ဟုတ်ပါ တယ်။ ပြောရမယ်ဆိုရင် ဒီ လန်ဆယ်ဘက်ကို ဗုံးကြဲတာ ပြည်သူလူထုတွေကတော့ ကလေးအပါ သုံးယောက် ပေါ့ သေသွားတယ်။ အဆောက်အအုံတွေ ထိပြီး ပျက်စီးကုန်တာလည်းရှိပါတယ်” ဟု ပြောသည်။ KIA နှင့် ပူးပေါင်းအဖွဲ့က သိမ်းပိုက်ထားသော လန်ဆယ်မြို့ကို ပြန်ရရေးအတွက် စစ်တပ်နှင့် ဦးတန်ဂူးတန် ဦးဆောင်သည့် ပြည်သူ့စစ် ပူးပေါင်းအဖွဲ့က စက်တင်ဘာလ ၁၉ ရက်နေ့က စတင်၍ ထိုးစစ်ဆင်လာခြင်း ဖြစ်သည်။ ခေါင်းလန်ဖူးဘက်မှ ထိုးစစ်ဆင်လာခြင်းဖြစ်ပြီး လန်ဆယ်မြို့သို့ မရောက်ခင် လာဟီဆင်ကျေးရွာ အနီးဝန်းကျင် ၌ နှစ်ဖက်ကြား တိုက်ပွဲများ ဖြစ်ပွားခဲ့သည်ဟု မြေပြင်သတင်းအရင်းအမြစ်က ပြောသည်။ စက်တင်ဘာလ ၂၂ ရက်နေ့က လန်ဆယ်မြို့ကို စစ်တပ်က လေကြောင်းမှ ဗုံးကြဲ တိုက်ခိုက်ခဲ့ရာ ကလေးများ အပါအဝင် ပြည်သူ ၃ ဦး ထိမှန် သေဆုံးခဲ့သည်။ စက်တင်ဘာလ ၂၃ ရက်နေ့အထိ နှစ်ဖက်ကြားတိုက်ပွဲများ ဆက်လက်ဖြစ်ပွားနေသည်ဟု မြေပြင် သတင်းအရင်းအမြစ်များက အတည်ပြုပြောဆိုသည်။

လန်ဆယ်တွင် စစ်တပ်၊ ပြည်သူ့ပူးပေါင်းအဖွဲ့နှင့် KIA ကြား တိုက်ပွဲများ ပြင်းထန်နေ

ဖားကန့်တိုက်ပွဲအတွင်း ကလေးအပါအဝင် အရပ်သား ၃ ဦး သေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၄ ရက်။ ကချင်ပြည်၊ ဖားကန့်မြို့နယ်ထဲ စစ်ကော်မရှင်တပ်နှင့် ကချင်လွတ်လပ်ရေး တပ်မတော် KIA ပူးပေါင်းအဖွဲ့တို့ အကြား တိုက်ပွဲများ ဆက်တိုပ်ဖြစ်နေပြီး အရပ်သား ထိမှန်သေဆုံးမှုများ ရှိနေသည်ဟု ဒေသခံများက ပြောသည်။ ဩဂုတ်လဆန်းမှာ ဩဂုတ်လ ၄ ရက်နေ့အထိ တိုက်ပွဲများ ဆက်တိုက် ဖြစ်နေသည်ဟု ဖားကန့်ဒေသခံများက ပြောသည်။ ဩဂုတ်လ ၃ ရက်နေ့နှင့် ၄ ရက်နေ့ နှစ်ရက်တာ တိုက်ပွဲအတွင်း ကလေးတစ်ယောက် အပါအဝင် အရပ်သား ၃ ဦး သေဆုံးခဲ့ပြီး ၁၀ ဦးထက်မနည်း ထိမှန်ဒဏ်ရာ ရခဲ့သည်ဟု ဖားကန့်ဒေသခံများက ပြောသည်။ ဖားကန့်ဒေသခံ အမျိုးသားတစ်ဦးက “ဗျူဟာကုန်းဘက်နေ လက်နက်ကြီးတွေနဲ့ ပစ်တာ။ အဲ့ဒီ လက်နက်ကြီး က မျောက်ဖြူမော်ရွာကို ကျပြီး အရပ်သားနဲ့ ကလေးသုံးနှစ်အရွယ်ကလေး လက်နက်ကြီးကျည် ထိပြီးသေ သွားတာဗျ။ လူကြီးလည်း တစ်ယောက်သေတယ်။ ဒဏ်ရာရတာက ၇ ယောက်ရှိတယ်။ ၃ ရက်နေ့တုန်းက တစ်ယောက် လက်နက်ကြီးထိပြီး သေတယ်။ သုံးယောက်ဒဏ်ရာရတယ်” ဟု ပြောသည်။ ကချင်လွတ်လပ်ရေး တပ်မတော် KIA နှင့် KPDF ပူးပေါင်းတပ်က ရှရော်ခကျေးရွာရှိ ညောင်ပင်ကုန်းနေရာကို ပြန်လည်ရရှိရေး ထိုးစစ်ဆင်နေပြီး နှစ်ဖက်ကြား တိုက်ပွဲများ ဆက်ဖြစ်နေသည်ဟု ဆိုသည်။ လက်နက်ကြီး လက်နက်ငယ် ပစ်ခတ်မှုများ ဆက်တိုက် ရှိနေပြီး စစ်တပ်က ပစ်လိုက်တဲ့ လက်နက်ကြီးကျည် များမှာ အရပ်သား ပြည်သူများ နေထိုင်သည့်ဘက်ကို ကျရောက်ပေါက်ကွဲမှုများ ဆက်တိုက်ဖြစ်နေသည်ဟု ဆိုကြသည်။ ဩဂုတ်လ ၄ ရက်နေ့မှာတော့ မျောက်ဖြူကျေးရွာက အသက် ၃ နှစ်အရွယ် ကလေးတစ်ဦးနှင့် အသက် ၃၅ နှစ်အရွယ် အမျိုးသားတစ်ဦး ထိမှန်သေဆုံးခဲ့ပြီး ဩဂုတ်လ ၃ ရက်နေ့တွင်မူ ရှရော်ခကျေးရွာမှ အမျိုးသား တစ်ဦး ထိမှန်သေဆုံးခဲ့သေးသည်။ အလားတူ ဆန်းကြွယ်ကျေးရွာတွင်လည်း လက်နက်ကြီးကျရောက် ပေါက်ကွဲခဲ့ခြင်းကြောင့် အသက် ၈၀ ကျော်အရွယ် အဘွားတစ်ဦးအပါအဝင် အရပ်သား ၄ ဦး ထိမှန်ဒဏ်ရာ ရခဲ့သည်ဟု ဖားကန့်မြို့ခံများက ပြော သည်။ စစ်ကော်မရှင်တပ်သည် ပြီးခဲ့သည့် ဧပြီလကတည်းက ဖားကန့်ဒေသထဲသို့ အင်အားအလုံးအရင်းဖြင့် စစ်ကြောင်းများ ခွဲကာ ဝင်ရောက်လာပြီး ဖားကန့်မြို့ကို ပြန်လည်ထိန်းချုပ်နိုင်ရေး ကြိုးပမ်းနေခြင်း ဖြစ်သည်။ မြေပြင်ရှိ စစ်ကော်မရှင် စစ်ကြောင်းအား ဖားကန့်ဗျူဟာကုန်းမှ လက်နက်ကြီး ပစ်ကူမှုများအပြင် လေကြောင်း မှပါ ဗုံးကြဲကာ စစ်ကူပေးနေသည်ဟု ဒေသခံများက ပြောသည်။

ဖားကန့်တိုက်ပွဲအတွင်း ကလေးအပါအဝင် အရပ်သား ၃ ဦး သေဆုံး

ဧရာဝတီ အဆန် သင်္ဘောများ ရွှေကူမြို့နယ် ရောက်ရှိ၊ တိုက်ပွဲများ ဖြစ်ပွား သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၂၉ ရက်။ ဧရာဝတီမြစ်ကြောင်းအတိုင်း ဆန်တက်နေသည့် စစ်သင်္ဘော ရေယာဉ်တန်း ကချင်ပြည်၊ ရွှေကူမြို့နယ်ထဲ ရောက်ချိန်တွင် ကချင်လွတ်လပ်ရေးတပ်မတော် KIA ပူးပေါင်းအဖွဲ့နှင့် ထိတွေ့တိုက်ပွဲ ဖြစ်ပွားခဲ့သည်။ အဆိုပါ စစ်ရေယာဉ်တန်းမှာ ရွှေကူမြို့နယ်ထဲ ရောက်ပြီး နောက်နေ့တွင် KIA ပူးပေါင်းတပ်နှင့် ထိတွေ့တိုက်ပွဲ ဖြစ်ပွားခဲ့သည်ဟု စစ်ရေး သတင်းအရင်းအမြစ်များက ပြောသည်။ ကာကွယ်ရေးတပ်ဖွဲ့ဝင် တစ်ဦးက “သူတို့ရွှေကူကနေ အဲ့ဒီပတ်ဝန်းကျင် တစ်ဝိုက်က ရွာတွေကို စစ်ကြောင်း ထွက်တယ်။ ထိတွေ့တိုက်ပွဲ အနည်းငယ် ရှိတယ်ပေါ့နော်။ ရွှေကူ ငဘတ်ဝမှာ သူတို့ စစ်ကြောင်းထွက်လို့ KIA ပူးပေါင်းတပ်ဖွဲ့တွေနဲ့ ထိတွေ့တိုက်ပွဲရှိတယ်” ဟု ပြောသည်။ မန္တလေးမြို့၊ ဂေါဝန်ဆိပ်ကမ်းမှ ဆန်တက်လာသည့် စစ်သင်္ဘောအစီး ၂၀ ကျော်မှ စစ်သင်္ဘော ၁၂ စီးသည် ဇူလိုင် လ ၂၆ ရက်နေ့၊ ညပိုင်းတွင် ရွှေကူမြို့သို့ ရောက်ရှိလာပြီး ဇူလိုင်လ ၂၉ ရက်နေ့အထိ ကျောက်ချထားသည် ဟု ဆိုသည်။ ဇူလိုင် ၂၇ ရက်နေ့တွင် စစ်သင်္ဘောအချို့မှာ အထက်သို့ ဆန်တက်ရန် ကြိုးစားလာပြီး မြေပြင်စစ်ကြောင်းကပါ တစ်ပြိုင်နက်တည်း ရွှေကူမြို့၊ မြစ်ကမ်းဘေးရှိ ကျေးရွာများထဲသို့ စစ်ကြောင်းထိုးလာခြင်းကြောင့် နှစ်ဖက် ထိတွေ့တိုက်ပွဲဖြစ်ပွားခဲ့ကြောင်း ကာကွယ်ရေးတပ်ဖွဲ့ တာဝန်ရှိသူက ပြောသည်။ စစ်ကောင်စီတပ်၏ မြေပြင်စစ်ကြောင်းသည် အင်အား ၄၀ ကျော်ရှိပြီး ငဘတ်ဝကျေးရွာတွင်တိုက်ပွဲဖြစ်ခဲ့သလို ဧရာဝတီမြစ်တစ်ဖက်ကမ်းရေလဲ၊ မိုးစစ်ကျေးရွာများတစ်ဝှိုက်တွင်လည်း စစ်ကြောင်းထိုးလာသည်ဟု ကာကွယ် ရေး တပ်ဖွဲ့ဝင်များကဆိုသည်။ ကသာမြို့မှ စစ်သင်္ဘောများ ဆန်တက်လာချိန် မိုးတားလေးတိုက်နယ်နှင့် ရွှေကူမြို့အကြားတွင် တော်လှန်ရေး အင်အားစုဘက်မှ အဆိုပါ စစ်သင်္ဘောများကို ပစ်ခတ်တိုက်ခိုက်ခဲ့ရာ စစ်သင်္ဘော အသေး တစ်စီး ထိမှန် ပျက်စီး ခဲ့သေးသည်။ ထို့အပြင် စစ်သင်္ဘောပေါ်မှလည်း လက်နက်ကြီးများဖြင့် ပစ်ခတ်ခဲ့ပြီး လေကြောင်းမှ တစ်ဆင့် ဂျက်ဖိုက်တာ၊ Y 12 အမျိုးအစား လေယာဥ်များဖြင့် တိုက်ခိုက်ခဲ့သဖြင့် အရပ်သား ၂ ဦး ထိခိုက်သေဆုံးခဲ့ရသည်။ “ကသာကနေ ထွက်တော့ မိုးတားလေး အထက်ဘက်မှာ သင်္ဘောတွေ ပစ်ခတ်တိုက်ခိုက်ခံရတာတွေ ရှိတာပေါ့။ အဲ့မှာ သင်္ဘောတစ်စီးက တော်တော် ထိခိုက်ပျက်ဆီးသွားတယ်ပေါ့။ ဒါပေမဲ့ အဲ့ဒီသင်္ဘောကို တွဲပြီး ရွှေကူထိ ဆန် သွားတယ်။ မြစ်ကမ်းတစ်လျှောက်လမ်း Y 12 တွေ ဂျက်ဖိုက်တာတွေနဲ့ ဗုံးကြဲတာတွေရှိတယ်။ ထိခိုက် သေဆုံး တာတွေလည်း ရှိခဲ့တယ်။ ရွှေကူမြစ်ကမ်းဘေးက ရွာတွေလည်းသေဆုံးမှု ရှိခဲ့ပါတယ်ဗျ” ဟု အထက် ပါ ကာကွယ်ရေး တပ်ဖွဲ့ဝင်က ဆက်ပြောသည်။ သေဆုံးသူများသည် ကသာမြို့နယ် မြေနုကျေးရွာမှ အမျိုးသားတစ်ဦးနှင့် ရွှေကူမြို့နယ် ဘိုကုန်းကျေးရွာမှ အမျိုးသားတစ်ဦးတို့ ဖြစ်ပြီး ဘုန်းကြီးကျောင်း တစ်ကျောင်း အတွင်းက စေတီ၊ ပုထိုးနှင့် ဆင်းတုတော်များပါ ထိမှန်ပျက်စီးခဲ့ရသည်။ စစ်သင်္ဘောများ စတင်ထွက်ခွာလာသည့် ဇူလိုင် ၁၇ ရက်နေ့တွင်လည်း လမ်းကြောင်းရှင်းသည့် အနေဖြင့် ဝက်လက်မြို့နယ်ထဲက ကျေးရွာ ၃ ရွာ လေကြောင်းမှ တိုက်ခိုက်ခံခဲ့ရသဖြင့် အရပ်သား ၂၂ ဦး သေဆုံးခဲ့ရပြီး ဖြစ်သည်။ ပြီးခဲ့သည့် ဇူလိုင် ၁၇ ရက်နေ့တွင် မန္တလေးမြို့၊ ဂေါဝန်ဆိပ်ကမ်းမှ ထွက်ခွာလာသည့် တိုက်ခိုက်ရေး စစ်သင်္ဘော ၅ စီး အပါအဝင် ရေယာဥ် စုစုပေါင်း ၁၄ စီးကို စဥ့်ကူး၊ မတ္တရာ၊ သပိတ်ကျင်းမြို့အရောက်တွင် ဇူလိုင်လ ၁၉ ရက်နေ့၌ တော်လှန်ရေး အင်အားစုများက တိုက်ခိုက်ခဲ့ရာ တွဲတွန်းသင်္ဘော ရေယာဥ် အမျိုးအစား တစ်စီး နစ်မြုပ် ပျက်စီးသွားပြီး အချို့မှာ မီးလောင်မှုများ ရှိခဲ့သည်။ ဓာတ်ပုံ - လေကြောင်း တိုက်ခိုက်ခံရသဖြင့် ဧရာဝတီမြစ်ဘေးကျေးရွာ တစ်ရွာက မြင်တွေ့ရသည့် ပျက်စီးမှုများ

ဧရာဝတီ အဆန် သင်္ဘောများ ရွှေကူမြို့နယ် ရောက်ရှိ၊ တိုက်ပွဲများ ဖြစ်ပွား

ကုန်စည်များ ပိတ်ဆို့နေသည့်အတွက် ဖားကန့်တွင် ကုန်ဈေးနှုန်းများ ထိုးတက် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ၂၂ ရက်။ တိုက်ပွဲများ ပြင်းထန်နေသည့် ကချင်ပြည်၊ ဖားကန့်မြို့ကို ကုန်စည်အဝင် မရှိတော့သဖြင့် အခြေခံ စားသောက် ကုန်များ အဆမတန် စျေးမြင့်တက်လာသည်ဟု ဒေသခံများက ပြောသည်။ ကြက်သား ၁ ပိဿာ ကျပ်တစ်သိန်း၊ ငါးကြင်း ၁ ပိဿာ ကျပ်ရှစ်သောင်း၊ ကြက်ဥတစ်လုံး ကျပ် တစ်ထောင် စသဖြင့် စျေးနှုန်းများ မြင့်တက်သွားပြီး အချို့ကုန်စည်များမှာ လုံးဝပြတ်လပ်နေသည်ဟု ဒေသခံများက ပြောသည်။ ဒေသခံတစ်ဦးက “ဖားကန့်က ပစ္စည်းမရှိတော့ဘူး။ ဝယ်မရဘူး။ ကြက်သားလည်း ဝယ်မရဘူး ငါးလည်း ဝယ် မရဘူး။ အခြေခံ စားသောက်ကုန်တွေက ပြတ်သွားတာ အောက်ပိုင်းကလာတဲ့ ကုန်စိမ်းတွေလည်း ပြတ်ကုန်ပြီ။ ကွမ်းရွက်တွေလည်း ပြတ်ကုန်ပြီ ကွမ်းယာဆိုင်တွေလည်း ပိတ်ထားတယ်” ဟု ပြောသည်။ ၂၀၁၄ ခုနှစ် သန်းခေါင်စာရင်းအရ လူဦးရေ ၃သိန်းကျော်ရှိသည့် ဖားကန့်မြို့တွင် မြို့တွင်းကြက်နှင့် ငါးမွေးမြူရေး လုပ်ငန်းများသည် လုံလောက်ခြင်း မရှိသည့်အတွက် မြန်မာနိုင်ငံ အလယ်ပိုင်းမှ လာသည့် အသား၊ ငါးနှင့် ကုန်စည်များကို အဓိက အားထားကြရခြင်း ဖြစ်သည်။ ဒေသခံများပြောပြသည့် အခြေခံ စားသောက်ကုန် ဈေးနှုန်းသည် ကြက်ဥတစ်လုံး ကျပ်တစ်ထောင်၊ ခရမ်း ချဥ်သီး တစ်ပိဿာ ၂သောင်းကျပ်၊ အာလူးတစ်ပိဿာ ၈ထောင်ကျပ်၊ ဆန်(ငွေတိုး)တစ်အိတ် ၂သိန်းကျပ် ဝန်းကျင်၊ ကြက်သွန်ဖြူ တစ်ပိဿာ ၁သောင်းခွဲကျပ်နှင့် ကြက်သွန်နီ တစ်ပိဿာ ၅ထောင်ကျပ် ရှိသည်ဟု သိရသည်။ ဖားကန့်မြို့နယ်ထဲတွင် ပြီးခဲ့သည့် မေလနောက်ဆုံးအပတ်ထိ ကြက်သား ၁ ပိဿာ ကျပ် လေးသောင်း၊ ဝက်သား၊ အမဲသား ၁ ပိဿာ ကျပ် ခြောက်သောင်းဝန်းကျင်နှင့် ကြက်ဥတစ်လုံး ၅၀၀ကျပ်ရှိခဲ့ပြီး စစ်ကောင်စီတပ်က စစ်ကြောင်းများ ဝင်ရောက်လာချိန်မှ စ၍ ကုန်ဈေးနှုန်းများ မြင့်တက်လာခြင်း ဖြစ်သည်။ ဖားကန့်မြို့ကို ပြီးခဲ့သည့် မေလနောက်ဆုံးအပတ်မှ စတင်ကာ စစ်ကောင်စီတပ်နှင့် ရှမ်းနီ အမျိုးသား တပ်မတော် SNA ပူးပေါင်းတပ် အင်အား ၆၀၀ ကျော်ဖြင့် စစ်ကြောင်းထိုး ဝင်ရောက်ခဲ့ပြီး ကာမိုင်း - ဖားကန့် လမ်းပိုင်းကို စစ်ကောင်စီတပ်က ထိန်းချုပ်ထားလိုက်သည်။ ထို့နောက် ဇူလိုင်လ ၁၂ ရက်နေ့တွင် စစ်ကောင်စီတပ်က ဖားကန့်မြို့ကို ဝင်ရောက်နိုင်သော အခြား လမ်းကြောင်း ဖြစ်သည့် အင်းတော်ကြီး - ဝှေခါ လမ်းပိုင်းကို ထိန်းချုပ်ဖို့ ကြိုးစားလာသည့် အတွက် အင်းတော်ကြီးဒေသတွင် နှစ်ဖက်တပ်ကြား တိုက်ပွဲများ ပြင်းထန်ခဲ့ပြီး ယနေ့ထိ အဆိုပါလမ်းပိုင်းတွင် စစ်ရေးတင်းမာနေဆဲ ဖြစ်သည်။ အခြားဒေသခံ တစ်ဦးက “အဓိက ကုန်စည် စီးဆင်းရာလမ်းက ဖားကန့်မှာ နှစ်လမ်းပဲ ရှိတာ။ ပွင့်ပွင့်လင်းလင်း ပြောရရင် အင်းတော်ကြီး -ဝှေခါလမ်းက KIA၊ KPDF တွေက ဖိခံနေရတာ။ ဒီလမ်းကြောကို တကယ်က ပိတ်ရ မှာ အစကတော့ တော်လှန် ရေး အင်အားစုတွေက ထိန်းနိုင်တယ်ဆိုပြီး ဖွင့်ထားတာ။ ကာမိုင်း - ဖားကန့် လမ်း ကတော့ စစ်ကောင်စီကို ပေးလိုက်ရပြီလေ။ သူတို့က တစ်ဖက်ကဖွင့် တစ်ဖက်ကမဖွင့် အဲ့လိုနဲ့လမ်းတွေက ပိတ်နေတာ” ဟု ပြောသည်။ စစ်ကောင်စီတပ်သည် မြန်မာနိုင်ငံတစ်ဝှမ်းရှိ ၎င်းတို့ လက်လွှတ်ထားရသည့် မြို့များကို ပြန်လည်ရယူရေး အရှိန်အဟုန်မြင့် ကြိုးစားလာနေပြီး ကချင်ပြည်တွင် ဖားကန့်မြို့နှင့် ဝိုင်းမော်မြို့က နေရာများကို ပြန်လည်ရယူ ကြိုးစားလာနေခြင်း ဖြစ်သည်။ အထူးသဖြင့် စီးပွားရေး၊ စစ်ရေးအပြင် အဘက်ဘက်က အချက်အချာကျသည့် ဖားကန့်မြို့ကို ပြန်လည်ရရှိရေး အတွက် ကြိုးစားလာနေပြီး ကချင်လွတ်လပ်ရေး တပ်မတော် KIA နှင့် ကာကွယ်ရေး ပူးပေါင်းတပ်တို့ကလည်း ၎င်းတို့ သိမ်းပိုက်ထားသည့် ကျေးရွာနှင့် လမ်းပိုင်အချို့ကို လက်လွှတ်လာနေရသည်။  ဓါတ်ပုံ - U Zaw Moe (လုံးခင်းညစျေး)

ကုန်စည်များ ပိတ်ဆို့နေသည့်အတွက် ဖားကန့်တွင် ကုန်ဈေးနှုန်းများ ထိုးတက်

သောကြာနေ့ည ရုပ်သံသတင်း (၁၀-၁၀-၂၅)

ဒီကနေ့ အစီအစဉ်ထဲမှာတော့ … မိုးမိတ်မှာ ဗုံးကြဲတိုက်ခိုက်ခဲ့လို့ ကလေးတွေ အပါအဝင် အရပ်သားတွေ အသက်ဆုံးရှုံးခဲ့ရပါတယ်။ မွန်နဲ့ တနင်္သာရီမှာလည်း အရပ်သားတွေ လေကြောင်းတိုက်ခိုက်မှု ခံရပါတယ်။ ဖားကန့်မှာ စစ်ကော်မရှင်က ဘာကြောင့် ညမထွက်ရ အမိန့်ထုတ်လိုက်တာပါလဲ

ထိုင်းရောက် အလုပ်သမားတွေအတွက် ပန်းရောင်ကတ် ပြုလုပ်ရမယ့် နေရာတွေက ဘယ်နေရာတွေလဲ၊ ဘယ်လိုလုပ်ရမှာလဲ။ ယူကရိန်းတိုက်ပွဲမှာ လောင်စာ အရင်းအမြစ်တွေကို ဘာလို့ အပြန်အလှန် တိုက်ခိုက်နေကြတာလဲ။ ယူကေက အိန္ဒိယ နိုင်ငံကို အပေါ့စား ဒုံးကျည်တွေ ရောင်းပေးလိုက်ပါတယ်။

ကမ္ဘာကျော် မုဒိမ်းမှုတစ်ခုမှာ အယူခံဝင်တဲ့သူကို တရားရုံးက ဘယ်လို အမိန့်ချမှတ်လိုက်သလဲ … စတာတွေတင်ဆက်ထားပါတယ်။