ဧရာဝတီတိုင်း – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
နိုင်ငံတကာသတင်း
NMG အကြောင်း
Contact

Home
Tag Archive

Tag: ဧရာဝတီတိုင်း

ရခိုင်-ဧရာဝတီအစပ် တိုက်ပွဲတွင် စစ်အုပ်စုတပ် အထိနာ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ အောက်တိုဘာလ ၆ ရက်။ ရခိုင်ပြည်နှင့် ဧရာဝတီတိုင်းအစပ် သာပေါင်းနှင့် လေးမျက်နှာမြို့နယ်တို့ရှိ ရခိုင်ရိုးမတောင်ခြေတွင် တိုက်ပွဲများ ပြန်လည်ပြင်းထန်နေပြီး စစ်အုပ်စုတပ်ဘက်မှ ထိခိုက်ကျဆုံးမှု များပြားနေကြောင်း ဒေသခံ စစ်ရေးသတင်း အရင်းအမြစ်များက ပြောသည်။ အဆိုပါ တိုက်ပွဲများအတွင်း စစ်အုပ်စုတပ်သည် ကျဆုံးသွားသည့် စစ်သားများ၏ ရုပ်အလောင်းများကို စစ်မြေ ပြင်၌ပင် စွန့်ပစ်ထားခဲ့ရသည်။ ထို့ပြင် သက်တမ်းပြည့်သွားသည့် စစ်မှုထမ်းတပ်သားများကိုလည်း အိမ်မပြန် ခိုင်းဘဲ ရှေ့တန်းတွင် ဆက်လက် တိုက်ခိုက်ခိုင်းနေသည်။ သေဆုံးသွားသည့် စစ်သားများ၏ မိသားစုဝင်များက ရုပ်အလောင်းကို ပြသပေးရန် နှင့် ပြန်လည်ထုတ်ယူနိုင် ရေးအတွက် အနောက်တောင်တိုင်းစစ်ဌာနချုပ် (နတခ) သို့ လိုက်လာကြသော်လည်း စစ်အုပ်စုဘက်မှ ပြသနိုင် ခြင်း မရှိခဲ့ကြောင်း နီးစပ်သူများက ဆိုသည်။ သာပေါင်းမြို့နယ်ရှိ ဆင်ကူးကျေးရွာအုပ်စု ဘုတ်ချောင်းရွာ ရိုးမလမ်းကြောင်းတွင် စစ်အုပ်စု စစ်ကြောင်းအချို့ ရှိနေသလို သဲဖြူကျေးရွာနှင့် လှေကြီးတက်ကျေးရွာ အနီးတစ်ဝိုက်တို့တွင်လည်း တိုက်ပွဲများ ဖြစ်ပွားလျက်ရှိ သည်။ ထို့ပြင် လေးမျက်နှာမြို့နယ်ရှိ ငဝန်ထိပ် အိုင်သဒ္ဒီရွာအနီး၊ ခုံကြီးကျေးရွာအုပ်စု တောင်ဘက်ကျေးရွာများနှင့် အမ်း-ဂွ-ကျောင်းတောင် လမ်းကြောင်းများတွင် တိုက်ပွဲများ ရှိနေပြီး ရိုးမစပ်ကျေးရွာများကို စစ်အုပ်စုတပ်က လက်နက်ကြီးများဖြင့် ပစ်ခတ်၍ စစ်ကြောင်းထိုးလျက် ရှိသည်။ သာပေါင်းဒေသခံ စစ်ရေးသတင်းအရင်းအမြစ် အမျိုးသားတစ်ဦးက “သာပေါင်းကြီး၊ သာပေါင်းလေးဘက် ရခိုင် ရိုးမတောင်ခြေမှာ တိုက်ပွဲပြန်ဖြစ်လာတာ။ စစ်တပ်က တော်တော် သတင်းဆိုးတယ်၊ စစ်မှုထမ်း သက် တမ်းပြည့် သွားတဲ့သူတွေ အိမ်ပြန်မသွားနိုင်တော့ လမ်းဘေးတွေမှာ စကားများနေ၊ စစ်တပ်အရာရှိတွေက ရခိုင်ရိုးမပေါ် ပြန်လွှတ်၊ အလောင်းတွေ မကောက်နိုင်၊ အေအေကတော့ ရွာတွေဘက်ကို အချိန်တစ်ခုပဲ ဆင်း လာတာ။ စနိုက်ဘာတွေနဲ့ ပစ်တာ၊ စစ်တပ်က သေမှာသိတော့ မတိုးချင်ဘူး။ ဗုံးကြဲတာရှိပေမဲ့ သိပ်မထိရောက် သလို ဖြစ်နေတယ်။ ဒေသခံတွေ စစ်ရှောင်တွေပဲ သေတာ၊ အေအေက ဘာမှမဖြစ်ဘူး” ဟု ပြောသည်။ စစ်အုပ်စုတပ်သည် သာပေါင်းမြို့နယ်၊ သစ်ဖြူကျေးရွာအနီးသို့ အောက်တိုဘာ ၁ ရက် ည ၉ နာရီဝန်းကျင်တွင် လေကြောင်းမှ ဗုံးကြဲတိုက်ခိုက်ခဲ့သဖြင့် ရခိုင်စစ်ဘေးရှောင် အမျိုးသမီးတစ်ဦး သေဆုံးကာ တစ်ဦး ဒဏ်ရာရရှိခဲ့ သည်။ လေးမျက်နှာ ဒေသခံ စစ်ရှောင်တစ်ဦးက “လေးမျက်နှာမှာ စစ်တပ်က ရိုးမအစပ်ကို စစ်ကြောင်းထိုးနေလို့ တိုက်ပွဲတွေ ရှိနေတယ်၊ ဘယ်သူမှ ရိုးမပေါ် မသွားရဲတော့ဘူး၊ စစ်ရှောင်ရွာတွေလည်း ပြန်နေဖို့လုပ်လိုက် တိုက် ပွဲဖြစ်လိုက်နဲ့ နေလို့ကို မရဘူး၊ အခုကြားတာ စစ်မှုထမ်းတပ်သားတွေ ပြဿနာမျိုးစုံရှိနေတယ်” ဟု ပြော သည်။ ပုသိမ်မြို့အခြေစိုက် စစ်အုပ်စု၏ အနောက်တောင်တိုင်းစစ်ဌာနချုပ် (နတခ) ကွပ်ကဲမှုအောက်ရှိ တပ်ရင်းများ သည် ရခိုင်နှင့် လေးမျက်နှာ၊ သာပေါင်း စစ်မျက်နှာပြင်များတွင် ဝင်ရောက်တိုက်ခိုက်နေသော်လည်း ရိုးမတောင် ခြေ အထိ စစ်ကြောင်းများ ရောက်ရှိရန် ခက်ခဲလျက်ရှိသည်။ ဓာတ်ပုံ - (ဧရာဝတီ-ရခိုင် နယ်စပ်တစ်နေရာတွင် တွေ့ရသည့် (AA) တပ်ဖွဲ့ဝင်များ။ / AA Info Desk - ပုံဟောင်း)

ရခိုင်-ဧရာဝတီအစပ် တိုက်ပွဲတွင် စစ်အုပ်စုတပ် အထိနာ

ကျဆုံးမှုများနေသည့် စစ်တပ်က ဒဏ်ရာရစစ်သားများကို ညဉ့်နက်အချိန် မီးမှောင်ချကာ ပုသိမ်သို့ သယ်ဆောင် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ စက်တင်ဘာလ ၂၅ ရက်။ ရခိုင်နှင့် ဧရာဝတီအစပ် တိုက်ပွဲများတွင် ထိခိုက်ကျဆုံးမှု များပြားနေသည့် စစ်အုပ်စုတပ်သည် ဒဏ်ရာရစစ်သား များနှင့် ရုပ်အလောင်းများကို ညအချိန် မီးမှောင်ချကာ ပုသိမ်မြို့သို့ နေ့စဉ် သယ်ဆောင်နေကြရသည်။ ဧရာဝတီတိုင်း၊ သာပေါင်းမြို့နယ်၊ ကြက်သွန်ကွင်းကျေးရွာ စစ်ဆေးရေးဂိတ်သို့ ရှေ့တန်းစခန်းများဖြစ်ကြသည့် သဲဖြူ၊ သာပေါင်းလေးနှင့် ကင်မွန်းချဉ် စသည့်နေရာများမှ ထိခိုက်သေဆုံးသူများကို ည ၁၀ နာရီကျော်အချိန်တွင် လာရောက်ပို့ဆောင်လေ့ရှိပြီး၊ အဆိုပါဂိတ်၌ မော်တော်ယာဉ် ပြောင်းလဲကာ ပုသိမ်မြို့သို့ သယ်ဆောင်နေခြင်း ဖြစ်သည်။ အသက် ၅၀ ကျော်အရွယ် ကြက်သွန်ကွင်း ရွာသားတစ်ဦးက “သဲဖြူဘက်ကနေ လူနာနဲ့ သေဆုံးသူတွေ သယ် လာတဲ့ကားတွေ ရောက်မလာခင် မိနစ် ၃၀ လောက်အလိုမှာတင် ရွာကို မီးဖြတ်လိုက်တယ်။ လမ်းပေါ်မှာ လူတွေမရှိအောင်လည်း လုံခြုံရေးတွေ ယူပြီး စောင့်ကြပ်နေတာ” ဟု ပြောသည်။ စစ်ဆေးရေးဂိတ်နှင့် နီးစပ်သူတစ်ဦးကလည်း “လွန်ခဲ့တဲ့ ၅ ရက်လောက်ကတည်းက သဲဖြူဘက်ကနေ ကားနဲ့ သယ်လာတာပါ။ ဒီဂိတ်ကို ရောက်မှ ကားချင်းကပ်ပြောင်းပြီး ပုသိမ်ကို ပို့တာ။ ဒဏ်ရာရလူနာတွေနဲ့ အလောင်း တွေပါတယ်။ ပုံမှန်တော့ မဟုတ်ဘူး၊ တစ်စီးတည်း လာတာ ရှိသလို ၂ စီး - ၃ စီး လာတဲ့နေ့တွေလည်း ရှိတယ်” ဟု ပြောသည်။ လက်ရှိတွင် သာပေါင်းမြို့နယ်အစပ် ကျေးရွာများ၌ အာရက္ခတပ်တော် (AA) နှင့် ပူးပေါင်းတပ်ဖွဲ့များ၏ တိုက်ခိုက် မှုကြောင့် စစ်အုပ်စုတပ်ဘက်မှ ထိခိုက်သေဆုံးသူ များပြားလျက်ရှိသည်။ ပုသိမ်မြို့ရှိ အနောက်တောင်တိုင်းစစ်ဌာနချုပ် (နတခ) အတွင်းရှိ မဆရ (၄) ဆေးတပ်ရင်း၌ ဒဏ်ရာရစစ်သား များဖြင့် ပြည့်နှက်နေပြီး နေ့စဉ် သေဆုံးမှုများလည်း ရှိနေကြောင်း နတခ အတွင်းရှိ စစ်တပ်မိသားစုဝင်များနှင့် နီးစပ်သူများ၏ ပြောပြချက်အရ သိရသည်။ စစ်အုပ်စုတပ်၏ လုံခြုံရေးဂိတ် တပ်ဖွဲ့ဝင်များနှင့် နီးစပ်သူတစ်ဦးက “ကားချင်းကပ်ပြီး ပစ်တင်နေတာ ထင်းတုံး တွေ တင်နေသလား မှတ်ရတယ်။ ရွာကို အမှောင်ကြိုချထားတယ်၊ လူသွားလူလာ မရှိအောင်လည်း ရှင်းထား တာ။ ပုသိမ်က ကားကတော့ ကြိုလာစောင့်နေတာပေါ့” ဟု ပြောသည်။ လွန်ခဲ့သော ၄ ရက်ခန့်က စစ်အုပ်စုတပ်မှ ဗျူဟာမှူးတစ်ဦးနှင့် ဗိုလ်မှူးတစ်ဦး တိုက်ပွဲအတွင်း ကျဆုံးသွားသည် ဟူသော သတင်းများ ထွက်ပေါ်ခဲ့ပြီးနောက် ကြက်သွန်ကွင်း-သဲဖြူ လမ်းပိုင်းတွင် စစ်အုပ်စုတပ်က ကင်းပုန်း များ စိပ်စိပ်ချထားပြီး လမ်းသွားလမ်းလာများကို တင်းကျပ်စွာ စစ်ဆေးလျက်ရှိကြောင်း ခြံစိုက်လုပ်သားတစ်ဦး ၏ ပြောပြချက်အရ သိရသည်။ ထို့ပြင် ရေကြည်မြို့နယ်ရှိ အမြှောက်တပ်ရင်း (အမတ-၃၄၄) အနီး ၁ မိုင်ခန့်အကွာအထိ အာရက္ခတပ်တော် (AA) နှင့် ပူးပေါင်းတပ်များ ရောက်ရှိလာပြီး တိုက်ပွဲများ ဆက်လက်ပြင်းထန်နေသဖြင့် ဒဏ်ရာရရှိသူများနှင့် သေဆုံး စစ်သားများကို စက်ဒေါင့်ကြီးဘက်မှတစ်ဆင့် ပုသိမ်မြို့သို့ ပြန်လည်သယ်ဆောင်နေရကြောင်း ဒေသခံများက ပြောသည်။ ဓာတ်ပုံ - (တိုက်ပွဲအတွင်း သေဆုံးခဲ့သည့် စစ်အုပ်စုတပ်ဖွဲ့ဝင်တစ်ဦး၏ ရုပ်အလောင်းကို တွေ့ရစဉ်။ / AA) #ဧရာဝတီတိုင်း #ရခိုင်

ကျဆုံးမှုများနေသည့် စစ်တပ်က ဒဏ်ရာရစစ်သားများကို ညဉ့်နက်အချိန် မီးမှောင်ချကာ ပုသိမ်သို့ သယ်ဆောင်

စစ်တပ်က ဧရာဝတီတိုင်း ရွှေသောင်ယံတွင် ရေပြင်နှင့် မြေပြင် လှုပ်ရှားမှုများပြားလာ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဩဂုတ်လ ၂၈ ရက်။ ဧရာဝတီတိုင်း၊ ရွှေသောင်ယံမြို့နယ်အတွင်း၌ စစ်တပ်က ရေပြင်နှင့် မြေပြင် စစ်အင်အားများ ဖြည့်တင်း ကာ စစ်ရေးလှုပ်ရှားမှုများ ပိုမိုစိပ်လာကြောင်း ဒေသတွင်း စစ်ရေးသတင်းအရင်းအမြစ်များက ပြောသည်။ ရွှေသောင်ယံ ကမ်းခြေနှင့် တစ်ဆက်တည်းရှိသည့် ဘောမိနှင့် မကျည်းစင်ကျေးရွာတို့ကို အာရက္ခတပ်တော် (AA) က စိုးမိုးထိန်းချုပ်ထားသဖြင့် လက်ရှိတွင် စစ်အုပ်စု စစ်ကြောင်းအချို့က ထိုဒေသများသို့ ချဉ်းကပ်ရန် ပြင်ဆင်နေခြင်းဖြစ်သည်။ ဩဂုတ်လ ၂၆ ရက်နှင့် ၂၇ ရက်များတွင် ရွှေသောင်ယံမြို့ကို ဖြတ်သန်း၍ ရခိုင်-ဧရာဝတီ ကမ်းခြေပတ်လမ်း အတိုင်း စစ်အုပ်စုတပ်၏ စစ်ကားအချို့ သွားလာလှုပ်ရှားခဲ့ပြီး မြို့အတွင်းသို့ ပြန်လည်ဝင်ရောက်လာသည့် စစ်ကားအချို့လည်း ရှိကြောင်း ဒေသခံများက ဆိုသည်။ ပုသိမ်မြို့မှ စစ်ရေးသတင်းအရင်းအမြစ် အမျိုးသားတစ်ဦးက “ရွှေသောင်ယံက စစ်အင်အားဟာ အခုရက်ပိုင်း နည်းနည်းလှုပ်လာတယ်။ ရေရော ကုန်းရော အင်အားဖြည့်ထားတာ” ဟု ပြောသည်။ လက်ရှိတွင် စစ်ရေးအခြေအနေ တင်းမာနေသည့် ပုသိမ်-ရွှေသောင်ယံ လမ်းပိုင်း၊ ကမ်းခြေပတ်လမ်းနှင့် ရေပြင် ချောင်းလက်တက်များ၌ စစ်အုပ်စုတပ်သည် စစ်အင်အား ဖြည့်တင်းပြင်ဆင်လျက်ရှိပြီး ပြည်မြို့နှင့် ရန်ကုန်မြို့တို့မှ စစ်ကားများလည်း ထပ်မံရောက်ရှိနေသည်။ ဒေသတွင်း သတင်းရင်းမြစ် တစ်ဦးက “အသွားအလာ အသယ်အပို့နဲ့ စစ်မှုထမ်းတပ်သားတွေကို မြို့အသွား အလာရှိတယ်။ ဧရာဝတီ-ရခိုင်အစပ် တောတောင်တွေကို စစ်ကြောင်းထိုးနေတာပါ။ ရွှေသောင်ယံကမ်းခြေက စစ်သင်္ဘောတွေဟာ ရေလမ်းအတိုင်း ရခိုင် ဂွမြို့နယ်ရှိ ဂွအငူ၊ ကြွေချိုင်ဘက်က ရေလမ်းအတိုင်း ရခိုင်၊ ဂွ ဘက် ကိုသွားဖို့ လုပ်နေတာ” ဟု ဆက် ပြောသည်။ ဧရာဝတီတိုင်း၊ ပုသိမ်ခရိုင်အတွင်းရှိ ရွှေသောင်ယံကမ်းခြေ၊ ဘောမိနှင့် မကျည်းစင်ကျေးရွာတို့သည် တစ်ကြော တည်း တည်ရှိသော နယ်မြေများ ဖြစ်သည်။ ချောင်းသာကမ်းခြေ၏ မြောက်ဘက်ရှိ အဆိုပါ ဘောမိနှင့် မကျည်းစင်ကျေးရွာတို့ကို အာရက္ခတပ်တော် (AA) က ထိန်းချုပ်ထားပြီး ထိုမှတစ်ဆင့် မြောက်ဘက်သို့ ဆက်လက်သွားပါက ရခိုင်ပြည်နယ်၊ ဂွမြို့နယ်အတွင်းရှိ ဂွအငူ၊ ကြွေချိုင်နှင့် ဂွမြို့တို့သို့ ကုန်းလမ်း၊ ရေလမ်း နှစ်မျိုးစလုံးဖြင့် တစ်ဆက်တည်း ရောက်ရှိနိုင်သည်။ စစ်အုပ်စုတပ်၏ မြေပြင်စစ်ကြောင်းများသည် ဂွမြို့နယ်အတွင်းသို့ ဝင်ရောက်နိုင်ရန် ကုန်းလမ်းနှင့် ရေလမ်းတို့မှ နည်းမျိုးစုံဖြင့် ထိုးဖောက်ရန် ကြိုးပမ်းနေရာမှ လက်ရှိတွင် ကမ်းခြေပတ်လမ်းကို အသုံးပြု၍ စစ်အင်အား အလုံး အရင်းဖြင့် စိစစ်လှုပ်ရှားလာခြင်းဖြစ်သည်။ #ဧရာဝတီတိုင်း #ရွှေသောင်ယံမြို့နယ်

စစ်တပ်က ဧရာဝတီတိုင်း ရွှေသောင်ယံတွင် ရေပြင်နှင့် မြေပြင် လှုပ်ရှားမှုများပြားလာ

ဧရာဝတီနှင့် ရခိုင်အစပ် ဒေသကို စစ်တပ် ထိုးစစ်ဆင်၍ တိုက်ပွဲများ ပြင်းထန်နေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဩဂုတ်လ ၁၈ ရက်။ ဧရာဝတီတိုင်း၊ ရေကြည်မြို့နယ်ရှိ အမြောက်တပ် အမတ (၃၄၄) ဝန်းကျင်နှင့် သာပေါင်းမြို့နယ် စက်ဒေါင့်ကြီး ကျေးရွာဘက်တွင် စစ်အုပ်စုတပ်က ထိုးစစ်ဆင်လာ၍ အာရက္ခတပ်တော် (AA) နှင့် ထိတွေ့တိုက်ပွဲများ ပြင်းထန် လျက်ရှိကြောင်း ဒေသတွင်း စစ်ရေးသတင်းအရင်းအမြစ်များက ပြောသည်။ ဩဂုတ်လ ၁၆ ရက်နေ့တွင် ရေကြည်မြို့နယ်၊ ငါးသိုင်းချောင်း-ဂွ လမ်းပေါ်ရှိ အမြောက်တပ် အမတ (၃၄၄) ပတ်ဝန်းကျင်နှင့် သာပေါင်းမြို့နယ်ရှိ စက်ဒေါင့်ကြီး၊ စက်ဒေါင့်လေး၊ ဘုရားကြီး၊ ကျောက်ချောင်း၊ ညောင်ပင် ဆိပ်၊ ကုလားကုန်း၊ သရက်တော စသည့် ကျေးရွာများအနီး၌ တိုက်ပွဲများ ပြင်းထန်နေခြင်း ဖြစ်သည်။ ဒေသခံ စစ်ရေးသတင်းအရင်းအမြစ် အမျိုးသားတစ်ဦးက “ရေကြည်၊ သာပေါင်းမြို့နယ်တွေကနေ ရခိုင်ဂွမြို့ ကို စစ်တပ်က ထိုးစစ်ဆင်နေတာ ဒီရက်ပိုင်း ရပ်မသွားဘူး။ ဂွမြို့နယ်ထဲကို ဝင်မယ့် သာပေါင်းဘက်လမ်း၊ ရေကြည်ဘက်က ငသိုင်းချောင်းလမ်းတွေကနေ စစ်တပ်ထိုးနေတာ။ အဲဒီအချိန်မှာ အေအေက ဖြတ်တိုက်နေလို့ အကျအဆုံး များပါတယ်။ အေအေက တန်ပြန်တိုက်စစ် ပုံစံနဲ့ တိုက်နေတဲ့ အနေအထားပါ” ဟု ပြောသည်။ AA နှင့် ပူးပေါင်းတပ်ဖွဲ့များသည် အမတ (၃၄၄) ပတ်ဝန်းကျင်နှင့် ကာကင်းစခန်းများကို ဝိုင်းဝန်းပိတ်ဆို့ထားပြီး စစ်အုပ်စုတပ်၏ ထိုးစစ်ကို တန်ပြန်ဟန့်တား တိုက်ခိုက်နေသဖြင့် စစ်အုပ်စုတပ်ဘက်မှ အထိနာကာ သာပေါင်းမြို့နယ် စက်ဒေါင့်ကြီးဘက်တွင် ထိခိုက်သေဆုံးနှင့် ဒဏ်ရာရရှိသူများကို ပုသိမ်တပ်နယ်ဘက်သို့ ပို့ဆောင်နေရကြောင်း ဆိုသည်။ စစ်အုပ်စုတပ်သည် ငါးသိုင်းချောင်း-ဂွ လမ်းပေါ်ရှိ အမှတ် (၃၄၄) အမြောက်တပ်ရင်းကို အခြေပြု၍ ဂွဘက်သို့ စစ်ကြောင်းဖောက်ရန်နှင့် လက်လွှတ်ခဲ့ရသည့် ပွိုင့်ကုန်းများကို ပြန်လည်ရရှိရေး အင်အားအလုံးအရင်းဖြင့် ထိုးစစ်ဆင်နေခြင်း ဖြစ်သည်။ အင်းတိုင်အခြေစိုက် အမှတ် (၆၆) ခြေလျင်တပ်မဌာနချုပ် လက်အောက်ခံတပ်များလည်း သာပေါင်းမြို့နယ် စက်ဒေါင့်ကြီးဆိပ်ကမ်းမှတစ်ဆင့် စစ်အင်အား ၁၀၀ ခန့် ထပ်မံဖြည့်တင်းထားသည်။ ထို့ပြင် ငဝန်မြစ်တစ်ဖက်ကမ်းရှိ ရေကြည်နှင့် သာပေါင်းမြို့နယ်အစပ် ကမ္ဘားကြီးနှင့် ညောင်ပင်သာ ဒေသများ ဘက်သို့လည်း စစ်အုပ်စုတပ်က ပြန်လည်စစ်ကြောင်းထိုးနေပြီး ကမ္ဘားကြီးကျေးရွာတွင် တပ်စွဲကာ ရေကြည် - သာပေါင်း - ဂွ လမ်းကြောင်းတစ်လျှောက် စစ်ရေးလှုပ်ရှားမှုများ ပြုလုပ်လျက်ရှိသည်။ တိုက်ပွဲများအတွင်း စစ်အုပ်စုတပ်က လေကြောင်းနှင့် လက်နက်ကြီး ပစ်ကူများကို ဆက်တိုက်အသုံးပြုနေသဖြင့် အမတ (၃၄၄) ဝန်းကျင်နှင့် ငါးသိုင်းချောင်း-ဂွ လမ်းပိုင်းတွင် စစ်ရေးတင်းမာမှု မြင့်တက်နေပြီး ဒေသခံများ၏ အသွားအလာနှင့် လုံခြုံရေးအတွက် စိုးရိမ်ရသည့် အခြေအနေတွင် ရှိနေသည်။ ဧရာဝတီတိုင်း၊ ရေကြည်မြို့နယ်၊ ပုသိမ်-မုံရွာ လမ်းပိုင်းရှိ ပွိုင့် (၁၀၁) အနီးဝန်းကျင်နှင့် သာပေါင်းမြို့နယ်၊ သာ ပေါင်းကလေးကျေးရွာ အနီးဝန်းကျင်ရှိ AA စစ်ကြောင်းများရှိရာ နေရာများသို့ စစ်အုပ်စုတပ်က အင်အား အလုံး အရင်းဖြင့် ထိုးစစ်ဆင်လာ၍ နေရာ ၅ နေရာထက်မနည်း တိုက်ပွဲများ ဆက်တိုက်ဖြစ်ပွားခဲ့ကြောင်း AA က ဩဂုတ်လ ၁၂ ရက်နေ့တွင် သတင်းထုတ်ပြန်ထားသည်။ ဓါတ်ပုံ - (ပုံဟောင်း - Crd) #ဧရာဝတီတိုင်း #ရေကြည် #သာပေါင်း

ဧရာဝတီနှင့် ရခိုင်အစပ် ဒေသကို စစ်တပ် ထိုးစစ်ဆင်၍ တိုက်ပွဲများ ပြင်းထန်နေ

ဧရာဝတီတိုင်းအတွင်း AA နှင့် တိုက်ပွဲများ ပြန်ဖြစ်ပြီး စစ်တပ် အထိနာ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဩဂုတ်လ ၁၄ ရက်။ ဧရာဝတီတိုင်းအတွင်းရှိ သာပေါင်းနှင့် ရေကြည်မြို့နယ် အစပ်ဒေသများတွင် အာရက္ခတပ်တော် (AA) နှင့် စစ်အုပ်စုတပ်တို့အကြား တိုက်ပွဲများ ဆက်လက် ပြင်းထန်နေပြီး စစ်တပ်ဘက်မှ အထိနာနေသဖြင့် ဒဏ်ရာ ရရှိသူအချို့ကို ကားများဖြင့် သယ်ယူနေရကြောင်း ဒေသတွင်း သတင်းရင်းမြစ်များက ပြောသည်။ ဩဂုတ်လ ၁၀ ရက်နေ့မှ ၁၂ ရက်နေ့အထိ သာပေါင်းမြို့နယ် သဲဖြူကျေးရွာနှင့် ရေကြည်မြို့နယ် ကမ္ဘားကြီး ကျေးရွာ အနောက်ဘက်ရှိ ကြောင်လျှာကျေးရွာ၊ ရွာသစ်ကလေးကျေးရွာတို့တွင် တိုက်ပွဲအချို့ ဖြစ်ပွားခဲ့ပြီး သဲဖြူနှင့် ဘောမိချောင်း ဒေသဘက်၌ တိုက်ပွဲများ အရှိန်ဟုန်မက ပိုမိုပြင်းထန်နေခြင်း ဖြစ်သည်။ ထို့ပြင် သာပေါင်းမြို့နယ် ရခိုင်ရိုးမအစပ် ဘောမိချောင်းဒေသရှိ ဝါးယားကျေးရွာနှင့် ကဇင်းတောကျေးရွာ ဘက်တွင်လည်း တိုက်ပွဲများ ဖြစ်ပွားနေပြီး စစ်အုပ်စုတပ်ဘက်မှ လက်နက်ကြီး ပစ်ခတ်သံများကို ပတ်ဝန်း ကျင်ကျေးရွာများမှ ဆက်တိုက် ကြားနေရသည်။ သာပေါင်းဒေသခံ စစ်ရေးသတင်းရင်းမြစ်တစ်ဦးက “အခုဖြစ်နေတာက ဘောမိချောင်း၊ ဝါးယားရွာနဲ့ ကဇင်း တောရွာဘက်မှာ ဖြစ်နေတာ။ အဲဒီနေရာတွေက ရခိုင်နယ်စပ် ရွှေသောင်ယံ မကျည်းဇင်ကနေ ရခိုင်ပြည်နယ် ဂွမြို့နယ်အထိ တောက်လျှောက် စပ်နေတာ။ တိုက်ပွဲက ရပ်လိုက် တိုက်လိုက်ပါပဲ” ဟု ပြောသည်။ ဧရာဝတီတိုင်းအတွင်းရှိ သဲဖြူ၊ ကင်ပွန်းချဉ်၊ ဝါးယားနှင့် ကဇင်းတော ကျေးရွာများသည် ရခိုင်ရိုးမအစပ် ဘောမိချောင်းတစ်လျှောက်ရှိ ဂွမြို့နယ်နှင့် နယ်နိမိတ်ချင်း ထိစပ်နေသည့် နေရာများဖြစ်ပြီး စစ်အုပ်စုတပ်က အင်အားသုံး စစ်ကြောင်းထိုးလာသဖြင့် AA တပ်ဖွဲ့များနှင့် တိုက်ပွဲဖြစ်ပွားရခြင်း ဖြစ်သည်။ “အမှန်တော့ ဂွကို စစ်ကြောင်းထပ်ထိုးတာ မတန့်ဘဲ ဆက်တိုက် နေတာ စစ်တပ်က။ ဩဂုတ် ၁၁ ရက် ညပိုင်း ကနေ အခု ၁၂ ရက်အထိ တိုက်ပွဲက ရပ်လိုက် တိုက်လိုက်ပါပဲ” ဟု အဆိုပါ သတင်းရင်းမြစ်က ဆက် ပြော သည်။ တိုက်ပွဲဖြစ်ပွားနေသည့် ကဇင်းတောကျေးရွာသည် ကြက်သွန်ကွင်း-သဲဖြူ လမ်းဆုံမှ ၇ မိုင်ခန့် ကွာဝေးပြီး ဝါးယားကျေးရွာနှင့် ၁၁ မိုင်ခွဲခန့်သာ ကွာဝေးသည်။ ဗျူဟာမှူးအဆင့် အုပ်ချုပ်နေသည့် သဲဖြူနှင့် ကင်ပွန်းချဉ် ကုန်းတို့မှ စစ်အုပ်စုတပ်က လက်နက်ကြီးများဖြင့် ဆက်တိုက် ပစ်ကူပေးလျက် ရှိသည်။ လက်ရှိတွင် စစ်အုပ်စုတပ်ဘက်မှ အင်အားအမြောက်အမြား အသုံးပြု၍ စစ်ကြောင်းထိုး နယ်မြေထိန်းချုပ်ရန် ကြိုးပမ်းနေသလို AA ဘက်ကလည်း ရိုးမတောင်ခြေ နယ်မြေများအတွင်း ပြောက်ကျားစစ်ဆင်ရေး စနစ်ဖြင့် ပြန်လည်ခုခံ တိုက်ခိုက်လျက်ရှိသည်။ ဒေသခံ စစ်ရေးလေ့လာသူတစ်ဦးက “ဘာပဲဖြစ်ဖြစ် AA ဘက်ကတော့ ထပ်တိုးလာတာမျိုး သိပ်မရှိဘူး။ စစ်တပ်က စစ်ကြောင်းထိုးရင် ဖြတ်တိုက်တယ်။ ဆုတ်ရင် လိုက်တိုက်ရင်း စခန်းတွေရတယ်။ အခုလည်း ကျွန်တော်တို့ ကြားရသလောက် စစ်တပ်က အကျအဆုံးများပြီး ဆုတ်လာတော့ AA က နောက်ကကပ်ပြီး လိုက်လာတာ။ သဲဖြူရွာ အနီးတစ်ဝိုက်တောင် ရောက်ခဲ့တယ်လို့ သိရတယ်” ဟု ပြောသည်။ တိုက်ပွဲများအတွင်း စစ်အုပ်စုတပ်ဘက်မှ လက်နက်ကြီးများကို အလွန်အကျွံ အသုံးပြု ပစ်ခတ်နေသဖြင့် တိုက်ပွဲနယ်မြေနှင့် နီးစပ်သည့် ကျေးရွာများမှ ဒေသခံပြည်သူ အများအပြားမှာ လုံခြုံရာ ဘေးလွတ်ရာနေရာ များသို့ တိမ်းရှောင်နေကြရသည်။ လက်ရှိအခြေအနေတွင် သာပေါင်းနှင့် ရေကြည်မြို့နယ် နယ်စပ်တောင်တန်း ဒေသများ၌ နှစ်ဖက်စစ်ရေး ဆက် လက် တင်းမာနေဆဲဖြစ်ပြီး ဒေသတွင်း သွားလာရေး လမ်းကြောင်းများကိုလည်း စစ်အုပ်စုတပ်က စစ်ဆေးမှုများ တင်းကျပ်ထားသည်။ စစ်အုပ်စုတပ်သည် သာပေါင်းနှင့် ရေကြည်မြို့နယ်များမှတစ်ဆင့် ရခိုင်ပြည်၊ ဂွမြို့နယ်အစပ်သို့ စစ်အင်အား ဖြန့်ကျက်နိုင်ရန်အတွက် အင်အား ၅၀၀ မှ ၇၀၀ အထိ ပေးပို့ဖြည့်တင်းကာ ထိုးစစ်ဆင်နေခြင်း ဖြစ်သည်။ အဆိုပါဒေသတွင် AA က စစ်အုပ်စုတပ်၏ ပွိုင့်စခန်းကုန်းများနှင့် ကာကင်းစခန်းများကို သိမ်းယူခဲ့ပြီး ရေကြည် မြို့နယ် ရုံးပင်ကျေးရွာနှင့် သာပေါင်းမြို့နယ် သာပေါင်းလေးကျေးရွာတို့တွင် တိုက်ပွဲများ ဖော်ဆောင်ခဲ့ရာ စစ် အုပ်စု တပ်ဖွဲ့ဝင်များ ကစဉ့်ကလျား ထွက်ပြေးခဲ့ရပြီး စစ်အုပ်စုတပ်ဖွဲ့ဝင်များ၏ ရုပ်အလောင်းများနှင့် လက်နက် ခဲယမ်းများကို AA ဘက်မှ သိမ်းဆည်းရမိခဲ့သည်။ ဓါတ်ပုံ - MOI #ဧရာဝတီတိုင်းတိုက်ပွဲ #AA

ဧရာဝတီတိုင်းအတွင်း AA နှင့် တိုက်ပွဲများ ပြန်ဖြစ်ပြီး စစ်တပ် အထိနာ

ရေဘေးဒဏ်ခံနေရသော ဧရာဝတီတွင် စစ်တပ် ဗုံးကြဲ၍ ဂွမှ စစ်ရှောင် ညီအစ်ကို ၂ ဦး သေဆုံး သတင်းနှင့် မီဒီယာ ကွန်ရက် ၂၀၂၆ ခုနှစ်၊ ဩဂုတ်လ ၁၀ ရက်။ ဧရာဝတီတိုင်းအတွင်း ပြည်သူများ ရေဘေးဒဏ်ကို ဆိုးဝါးစွာ ရင်ဆိုင်နေရချိန်တွင် ရေကြည်နှင့် သာပေါင်း မြို့နယ်အစပ်၌ တိုက်ပွဲများ ဆက်လက် ပြင်းထန်နေပြီး စစ်တပ်၏ လေကြောင်းမှ ဗုံးကြဲတိုက်ခိုက်မှုကြောင့် ရခိုင်ပြည်၊ ဂွမြို့နယ်မှ လာရောက် စစ်ဘေးရှောင်နေသည့် ညီအစ်ကို ၂ ဦး သေဆုံးသွားခဲ့ကြောင်း ဒေသတွင်း စစ်ရေး သတင်းအရင်းအမြစ်များက ပြောသည်။ ဖြစ်စဉ်မှာ ရေကြည်-သာပေါင်းအစပ် တောတန်းများ၊ သာပေါင်းမြို့နယ်၊ သာပေါင်းကလေးကျေးရွာ အနီးဝန်း ကျင်နှင့် သဲဖြူကျေးရွာအနီးတို့တွင် အာရက္ခတပ်တော် (AA) နှင့် စစ်တပ်တို့အကြား ဩဂုတ်လ ၅ ရက်နေ့မှ ၉ ရက်နေ့အထိ တိုက်ပွဲများ ပြင်းထန်စွာ ဖြစ်ပွားခဲ့ခြင်းဖြစ်သည်။ အဆိုပါ တိုက်ပွဲများအတွင်း စစ်တပ်၏ လေကြောင်းမှ ဗုံးကြဲတိုက်ခိုက်မှုကြောင့် သာပေါင်းမြို့နယ်၊ သဲဖြူကျေး ရွာတွင် လာရောက် စစ်ဘေးရှောင်နေသည့် ရခိုင်ပြည်၊ ဂွမြို့နယ်မှ အသက် ၃၀ အရွယ် ကိုလှထွေးနှင့် အသက် ၄၀ အရွယ် ကိုငစိုးတို့ ညီအစ်ကို ၂ ဦး သေဆုံးခဲ့ပြီး လူနေအိမ်အချို့လည်း ပျက်စီးခဲ့ရသည်။ ရေကြည်ဒေသခံ စစ်ရေးသတင်းအရင်းအမြစ် အမျိုးသားတစ်ဦးက “၅ ရက်နေ့က စစ်တပ်ဗုံးကြဲတာမှာ သဲဖြူ ရွာမှာနေတဲ့ ရခိုင်က ဂွမြို့စစ်ရှောင် ညီအစ်ကိုနှစ်ယောက်သေပြီး အိမ်တွေလည်း ပျက်စီးတယ်။ နောက်ရက် တွေမှာလည်း ရေကြည်-သာပေါင်းအစပ် တောတန်းတွေမှာ ဗုံးကြဲတာတွေ တိုက်ပွဲဖြစ်တာတွေဆက်တိုက်ပဲ။ ရိုးမအစပ်ရွာတွေကိုလည်း ကြဲနေတာ” ဟု ပြောသည်။ သဲဖြူကျေးရွာသည် သာပေါင်းမြို့နယ်အတွင်း ပါဝင်ပြီး ရေကြည်မြို့နယ်ပိုင် ကမ္ဘားကြီးကျေးရွာနှင့် နီးကပ်စွာ တည်ရှိသည်။ ယခုရက်ပိုင်းအတွင်း အဆိုပါ နေရာများ၌ တိုက်ပွဲများ ဖြစ်ပွားရာတွင် စစ်တပ်ဘက်မှ အထိနာနေသည့်အတွက် လူနေကျေးရွာများကိုပါ လေကြောင်းမှ ဗုံးကြဲတိုက်ခိုက်နေခြင်းဖြစ်သည်။ ထို့ပြင် ဩဂုတ်လဆန်းပိုင်းက သာပေါင်းမြို့နယ်၊ သာပေါင်းကလေးကျေးရွာအနီး တိုက်ပွဲတွင် AA ဘက်က လက်နက်ခဲယမ်းများ သိမ်းဆည်းရရှိခဲ့ပြီးနောက် ယခုရက်ပိုင်းအတွင်း သာပေါင်းကလေးကျေးရွာ အနီးဝန်းကျင် ၌ တိုက်ပွဲအချို့ ဆက်လက်ဖြစ်ပွားနေကာ စစ်တပ်က ရွာအနီးဝန်းကျင်သို့ ဗုံးကြဲတိုက်ခိုက်မှုများ ပြုလုပ်လျက် ရှိသည်။ သာပေါင်းဒေသခံ အမျိုးသားတစ်ဦးက “သာပေါင်းလေး၊ သဲဖြူရွာနားတွေကို စစ်တပ်ကထပ်ကြဲတာတွေ ရှိ သလို လက်နက်ကြီးတွေလဲပစ်ကူနေတယ်၊ အေအေက ကြားဖြတ်တိုက်တော့ ရှေ့တိုးလို့မရဘူး” ဟု ပြောသည်။ စစ်တပ်သည် ရခိုင်ရိုးမ တောင်ခြေတစ်လျှောက်ရှိ အင်္ဂပူ၊ လေးမျက်နှာ၊ ရေကြည်နှင့် သာပေါင်းမြို့နယ်များမှ တစ်ဆင့် ရခိုင်ပြည် တောင်ပိုင်းသို့ စစ်ကြောင်းထိုးရန်နှင့် တန်ပြန်ထိုးစစ်ဆင်ရန် ကြိုးပမ်းလျက်ရှိသည်။ လက်ရှိတွင် ရေကြည်နှင့် သာပေါင်းမြို့နယ်အတွင်းရှိ ရှေ့တန်းစစ်မျက်နှာများသို့ အနောက်လတ်ပိုင်းတိုင်း စစ်ဌာနချုပ် (နတခ) ထံမှတစ်ဆင့် တပ်မ (၆၆) လက်အောက်ခံ ခလရ (၁)၊ ခလရ (၁၁) တပ်ရင်းများ အင်အား ဖြည့်တင်းကာ ထိုးစစ်ဆင်နေခြင်းဖြစ်သည်။ ဧရာဝတီတိုင်းရှိ လေးမျက်နှာ၊ ရေကြည်နှင့် သာပေါင်းမြို့နယ်များအတွင်း စစ်ရေးအရ အရေးပါသည့် စခန်းအချို့ ကို AA က ဆက်တိုက် သိမ်းပိုက်ထားသဖြင့် စစ်တပ်က ရိုးမတောင်ခြေတစ်လျှောက်ရှိ ကျေးရွာများကို လေကြောင်းမှ ဗုံးကြဲတိုက်ခိုက်နေခြင်း ဖြစ်သည်။ အခြားတစ်ဖက်တွင်လည်း စစ်အုပ်စု ဒုတိယခေါင်းဆောင် ဦးညိုစောသည် ဩဂုတ်လ ၅ ရက်နေ့က ပုသိမ်မြို့သို့ သွားရောက်ခဲ့သလို စစ်အုပ်စုခေါင်းဆောင် ဦးမင်းအောင်လှိုင်သည်လည်း ဩဂုတ်လ ၈ ရက်နေ့တွင် ပုသိမ်၊ ဟင်္သာတနှင့် မအူပင်မြို့များသို့ သွားရောက်ကာ ရေဘေးသင့် မြို့နယ်အချို့ကို ရဟတ်ယာဉ်ဖြင့် လိုက်လံကြည့်ရှု ခဲ့သည်။ #ရခိုင်စစ်ရှောင် #IDPs

ရေဘေးဒဏ်ခံနေရသော ဧရာဝတီတွင် စစ်တပ် ဗုံးကြဲ၍ ဂွမှ စစ်ရှောင် ညီအစ်ကို ၂ ဦး သေဆုံး

ဧရာဝတီတိုင်းတွင် ရခိုင်စစ်ဘေးရှောင်များအား ဖမ်းဆီး၍ စစ်မှုထမ်းရန် စုဆောင်းနေ

တိုက်ပွဲပြင်းထန်နေသည့် ဧရာဝတီတိုင်းအတွင်း အရပ်သားများ ပေါ်တာဆွဲခံရ

ဧရာဝတီတိုင်းရှိ ပြည်သူ့စစ်များကို ရှေ့တန်းပို့ရန် စစ်တပ်စီစဉ်

ဗုဒ္ဓဟူးနေ့ည ရုပ်သံသတင်း (၇-၁၀-၂၆)

ဗုဒ္ဓဟူးနေ့ညပိုင်း ရုပ်သံသတင်း(၇-၁၀-၂၆)

ဒီကနေ့ အစီအစဉ်ထဲမှာတော့-

– ကျိုက်ထိုမြို့နယ်မှာ တိုက်ပွဲမဖြစ်ပဲ စစ်အုပ်စုက အရပ်သားရွာတွေကို ဗုံးကြဲလို့ ထောင်နဲ့ချီထွက်ပြေးနေရ

– ရခိုင်-ဧရာဝတီ အစပ်မှာ တိုက်ပွဲ ပြင်းထန်ပြီး စစ်အုပ်စုက အစုအပြုံလိုက် ကျဆုံးနေ

– ကချင်ပြည်က ရွှေကူ-ငအိုး လမ်းပိုင်း သုံးသူတွေကို အရေးယူသွားမယ်လို့ KIAသတိပေး

– အလုပ်သမားတွေ ဆီက အခွန်နဲ့ လွှဲငွေ ရရှိဖို့ ပိုမို တင်းကြပ်သွားမယ်လို့ စစ်အုပ်စုပြော

– စစ်အုပ်စု ခေါင်းဆောင် ၇-၈ ရက်နေ့တွေမှာ မလေးရှားကို သွားမည်

– လာအို ဒုတိယမြို့တော်လေဆိပ် ကိုယ်ပိုင်လေယာဉ်ပေါ်တင်တဲ့ မူးယစ်ဆေးဝါး ကီလို ၅၀၀ ကျော်ဖမ်းမိ

– မက်ဒေါ်နယ်(McDonald’s)ကုမ္ပဏီဟာ AI သုံးစွဲပြီး လွတ်လပ်စွာ ယှဉ်ပြိုင်ခွင့်ကို ချိုးဖောက်တယ်ဆိုပြီး တရားစွဲခံရ

– ပထမဆုံး FIFA အာဆီယံ ဖလားကို အင်ဒိုနီးရှား အသင်း ပင်နယ်တီ အဆုံးအဖြတ်နဲ့ ဆွတ်ခူး…..စတာတွေ တင်ဆက်ထားပါတယ်။

×Close

News

ဟောင်ကောင် ဒီမိုကရေစီရေး လှုပ်ရှားသူ ဂျိုရွာဝေါင်းကို ထောင်ဒဏ် ၁၀ နှစ် ထပ်မံ ချမှတ် — November 6, 2026 7:19 pm
ဂျပန် ဆေးလိပ်ကုမ္ပဏီကို ရုရှား ပြည်သူပိုင်သိမ်း — November 6, 2026 7:18 pm
ပြင်သစ်တွင် ဆန္ဒပြသူ ၅ သိန်းကျော် လမ်းပေါ်ထွက် — November 6, 2026 7:14 pm

Recent Posts

ဟောင်ကောင် ဒီမိုကရေစီရေး လှုပ်ရှားသူ ဂျိုရွာဝေါင်းကို ထောင်ဒဏ် ၁၀ နှစ် ထပ်မံ ချမှတ်
ဂျပန် ဆေးလိပ်ကုမ္ပဏီကို ရုရှား ပြည်သူပိုင်သိမ်း
ပြင်သစ်တွင် ဆန္ဒပြသူ ၅ သိန်းကျော် လမ်းပေါ်ထွက်
ဥရောပတစ်ခွင် လေယာဉ် ၃၀ နီးပါး ဗုံးခြိမ်းခြောက်မှုနှင့် ကြုံတွေ့ရ
စစ်တွေ ရွှေမင်းဂံ ရေတပ်စခန်းကို AA လက်နက်ကြီးဖြင့် ပစ်ခတ်ပြီး တိုက်ပွဲပြင်းထန်နေ

Archives

Archives

×Close