migrant workers – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Tag Archive

Tag: migrant workers

စစ်ဆင်ရေး ရက် ၉၀ အတွင်း မြန်မာလုပ်သားများ အထူးသတိပြုရန် လိုအပ်

မေလ ပထမပတ်အတွင်း ထိုင်းသို့ တရားမဝင် လာရောက်သူ အလုပ်သမား ၁၅၀ ကျော် ဖမ်းခံရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မေလ ၁၁ ရက်။ ထိုင်းနိုင်ငံအတွင်း တရားမဝင် ဝင်ရောက်လာသည့် မြန်မာလုပ်သားများ ဆက်တိုက်ဖမ်းဆီးခံနေရပြီး မေလ ပထမပတ်အတွင်း အယောက် ၁၅၀ ကျော် ဖမ်းဆီးခံခဲ့ရသည်ဟု အလုပ်သမားအရေး ဆောင်ရွက်နေသူများက ပြောသည်။ မြန်မာနိုင်ငံအတွင်းရှိ အလုပ်အကိုင်ရှားပါးမှုနှင့် စစ်မှုထမ်းဥပဒေဆိုင်ရာ စိုးရိမ်မှုများကြောင့် ထိုင်းနိုင်ငံအတွင်း သို့ မှောင်ခိုလမ်းကြောင်းများမှတစ်ဆင့် ဝင်ရောက်လာသည့် မြန်မာလုပ်သား ၁၅၀ ကျော်ကို မေလ ပထမပတ် အတွင်း၌ ထိုင်းအာဏာပိုင်များက ဆက်တိုက်ဖမ်းဆီးခဲ့ကြောင်း အလုပ်သမားအရေး ဆောင်ရွက်သူများက ပြောသည်။ အကြီးမားဆုံး ဖမ်းဆီးရမိမှုမှာ ဖိစ်စုနုလုခ်ခရိုင်အတွင်း ဖြစ်ပွားခဲ့ခြင်းဖြစ်ပြီး မေလ ၇ ရက်နေ့၊ ညပိုင်းတွင် အမှတ် ၁၁ လမ်းမကြီးပေါ်၌ မောင်းနှင်လာသည့် ပစ်ကပ်ကား ၁၀ စီးခန့်ကို စစ်ဆေးရာမှ စတင်ခဲ့ခြင်းဖြစ်သည်။ ထိုစဉ်က အချို့ကားများမှာ မောင်းနှင်ထွက်ပြေးခဲ့သော်လည်း အာဏာပိုင်များက မေလ ၈ ရက်နေ့၊ နံနက်အထိ နီးစပ်ရာတောများအတွင်း လိုက်လံရှာဖွေခဲ့ရာ မြန်မာလုပ်သား ၁၁၀ ကျော်ကို ထပ်မံဖမ်းဆီးရမိခဲ့သည်။ အလုပ်သမားအရေး လိုက်လံဆောင်ရွက်ပေးနေသူ အမျိုးသားတစ်ဦးက “သူတို့ စဝင်လာကတည်းက ကားတန်း အရှည်ကြီးပဲလေ။ ပစ်ကပ်ကားနဲ့ကို လူအပြည့်တင်လာတာဆိုတော့ ဘယ်သူက မစစ်ဘဲနေမလဲ။ တောလမ်းက သွားတာလည်း မဟုတ်ဘူး။ အခုတော့ မိပြီလေ။ ဒီချိန် အောက်လမ်းကလာရင် လမ်းကြောင်း သေချာစုံစမ်းကြ ပါ။ ဖြစ်နိုင်ရင် အပေါ်ကပဲ လာစေချင်တယ်။ ပွဲစားတွေကတော့ ပိုက်ဆံရရင်ပြီးရော နှပ်ချခဲ့မှာပဲ” ဟု ပြောသည်။ ထို့ပြင် မေလ ၆ ရက်နေ့တွင် တာခ့်ခရိုင်၊ တာ့ဆောင်ယန်းမြို့နယ်၌ မြန်မာလုပ်သား ၁၉ ဦး၊ မေလ ၄ ရက်နေ့တွင် အဆိုပါမြို့နယ်အတွင်း၌ပင် ၁၁ ဦးနှင့် မေလ ၃ ရက်နေ့တွင် အယုဒ္ဓယခရိုင် အာရှလမ်းမကြီးပေါ်၌ ၉ ဦး စုစုပေါင်း မြန်မာလုပ်သား ၁၅၀ ကျော်ခန့် ဖမ်းဆီးခံခဲ့ရခြင်း ဖြစ်သည်။ အခြားအလုပ်သမားအရေး ဆောင်ရွက်သူတစ်ဦးကလည်း “ဒီနောက်ပိုင်းတော့ မဲဆောက်ဘက်က တအားဖမ်း တော့ တခြားလမ်းကြောင်း ပြန်ဝင်ကြတယ်။ အဲဒါလည်း မိတာပဲ။ ကျနော်ကတော့ မစွန့်စားစေချင်ဘူး။ မြန်မာငွေ အနည်းဆုံး သိန်း ၄၀ လောက်ကုန်တာလေ။ မိရင်လည်း ပလုံမှာ။ မလုပ်ကြပါနဲ့” ဟု ဖြည့်စွက် ပြောဆိုသည်။ ပွဲစားများ၏ အဆိုအရ တရားမဝင် လမ်းကြောင်းများမှတစ်ဆင့် ဝင်ရောက်ရန် တစ်ဦးလျှင် ထိုင်းဘတ်ငွေ ၂၀,၀၀၀ (မြန်မာငွေ ၂၆ သိန်းကျော်မှ သိန်း ၄၀ ခန့်အထိ) ကုန်ကျစရိတ်ရှိနေကြောင်း သိရသည်။ မွန်ပြည် လူ့အခွင့်ရေးဖောင်ဒေးရှင်း (HURFOM) ၏ အချက်အလက်များအရ ယခုနှစ် ဇန်နဝါရီလမှ မတ်လအထိ သုံးလတာအတွင်း တရားမဝင် မြန်မာလုပ်သား ၉၀၀ နီးပါး ဖမ်းဆီးခံထားရပြီး ဖြစ်သည်။ မြန်မာပြည်တွင်းရှိ စီးပွားရေးကျဆင်းမှု၊ ကုန်ကြမ်းရှားပါးမှုနှင့် ပြည်သူ့စစ်မှုထမ်း ဆင့်ခေါ်စာများကြောင့် ဖမ်းဆီးမှုများပြားနေသော်လည်း ထိုင်းနိုင်ငံဘက်သို့ ထွက်ခွာသူဦးရေမှာ နေ့စဉ်နှင့်အမျှ တိုးများလာနေသည်။ #ရွှေ့ပြောင်းအလုပ်သမား #migrantworker

မေလ ပထမပတ်အတွင်း ထိုင်းသို့ တရားမဝင် လာရောက်သူ အလုပ်သမား ၁၅၀ ကျော် ဖမ်းခံရ

သံရုံးထောက်ခံစာယူရသည့်အတွက် နေရပ်ပြန် ရွှေ့ပြောင်းလုပ်သားများ အခက်ကြုံ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မေလ ၇ ရက်။ ပြည်ပရောက် မြန်မာလုပ်သားများ နေရပ်သို့ ခွင့်ဖြင့်ပြန်လာရာတွင် သက်ဆိုင်ရာသံရုံး၏ ထောက်ခံချက် ပါရှိမှ သာ ပြန်လည် ထွက်ခွာခွင့်ပြုမည်ဆိုသည့် စစ်အုပ်စု၏ ကန့်သတ်ချက်အသစ်သည် အလုပ်သမားများ အပေါ် ဝန်ထုပ်ဝန်ပိုးဖြစ်စေပြီး အဂတိလိုက်စားမှုနှင့် လူကုန်ကူးမှုများကို ပိုမိုအားကောင်းလာစေနိုင်ကြောင်း အလုပ်သမားအရေး ဆောင်ရွက်သူများက ဝေဖန်ထောက်ပြလိုက်သည်။ စစ်အုပ်စု လက်အောက်ခံ အလုပ်သမား ညွှန်ကြားရေး ဦးစီးဌာနသည် ပြီးခဲ့သည့် ဧပြီလ ၂၈ ရက်နေ့တွင် အဆိုပါ ညွှန်ကြားချက်ကို စတင်ထုတ်ပြန်ခဲ့ပြီး၊ မေလ ၁ ရက်နေ့မှ စတင်ကာ မြန်မာနိုင်ငံသို့ ခွင့်ဖြင့်ပြန်လာသည့် အလုပ်သမားများအနေဖြင့် အလုပ်ရှင်၏ ခွင့်ပြုစာအပြင် သက်ဆိုင်ရာနိုင်ငံရှိ မြန်မာသံရုံး၊ အဖွဲ့ရုံး သို့မဟုတ် ကောင်စစ်ဝန်ချုပ်ရုံးတို့၏ စိစစ်ထောက်ခံချက်ကိုပါ တစ်ပါတည်း ယူဆောင်လာရမည် ဖြစ်သည်။ အထူးသဖြင့် ထိုင်းနိုင်ငံရောက် မြန်မာလုပ်သားများအတွက် ဘန်ကောက်မြို့ရှိ အလုပ်သမားသံအရာရှိရုံးတွင် မေလ ၅ ရက်နေ့မှ စတင်ကာ အဆိုပါထောက်ခံစာကို စတင်လျှောက်ထားရမည် ဖြစ်သည်။ ထိုကန့်သတ်ချက်ကြောင့် ရွှေ့ပြောင်းလုပ်သားများ ရင်ဆိုင်ရမည့် စိန်ခေါ်မှုများနှင့်ပတ်သက်၍ ပညာရေးနှင့် ဖွံ့ဖြိုးတိုးတက်ရေးဖောင်ဒေးရှင်း (FED) အမှုဆောင်ဒါရိုက်တာ ဦးထူးချစ်က ယခုကဲ့သို့ သုံးသပ်ပြောသည်။ “အလုပ်ရှင်အများစုက သူတို့အလုပ်သမားတွေကို ခွင့်ပြန်တာတို့ ဘာတို့ဆိုတာ ပေးလေ့ပေးထမျိုးက သိပ် မရှိ ဘူး။ ခဏတဖြုတ်ပဲဆိုတော့ အဲ့ဒါကလည်း အလုပ်ရှင်နဲ့ ပြဿနာရှိနိုင်တယ်။ နောက် သံရုံးမှာ ထောက်ခံစာ ယူရမယ်ဆိုတော့ သူတို့ Online စနစ်ကလည်း ယူရမယ်လို့လည်း မပြောထားဘူး။ ကျနော်တို့ နားလည်တာက သံရုံးမှာ လာယူရမယ်ဆိုတော့ အလုပ်သမားတွေက ဒီဘန်ကောက်မှာချည်းပဲ အလုပ်လုပ်တာ မဟုတ်ဘူးလေ။ ဆိုတော့ အလုပ်သမားတွေ အနေနဲ့ကတော့ ပိုပြီးတော့ ခက်ခဲလာမယ်၊ ကုန်ကျစရိတ်တွေ ပိုများလာမယ်၊ ပွဲစားတွေကို ပိုပြီးတော့ မှီခိုရမယ်လို့ ကျနော်အနေနဲ့ ပြောချင်တယ်။” သံရုံးထောက်ခံစာကြေးအဖြစ် ၁၅၀ ဘတ် ပေးသွင်းရမည်ဟု သတ်မှတ်ထားသော်လည်း ဘဏ်တွင် ချလန် သွင်းရခြင်းနှင့် သံရုံးသို့ လူကိုယ်တိုင်သွားရောက်ရမည်ဖြစ်ခြင်းတို့ကြောင့် နယ်ဝေးရှိ အလုပ်သမားများအတွက် ငွေကြေးနှင့် အချိန်ကုန်ကျမှု ဝန်ထုပ်ဝန်ပိုး ပိုမိုကြီးမားလာစေသည်။ ထို့ပြင် အလုပ်ရှင်ထံမှ ခွင့်ပြုစာတောင်းရမည့် အချက်သည် အလုပ်သမားများ၏ နေရပ်ပြန်ခွင့်ကို အလုပ်ရှင်က စိတ်ကြိုက်ထိန်းချုပ်နိုင်သည့် အခြေအနေ ဖြစ်သွားစေသည်ဟု ဝေဖန်မှုများ ရှိနေသည်။ အလားတူ ယခုလုပ်ရပ်သည် အလုပ်သမားများအပေါ် နည်းလမ်းမျိုးစုံဖြင့် အကြပ်ကိုင်ခြင်းသာဖြစ်ကြောင်း ရခိုင်အလုပ်သမားများ အဖွဲ့ (AWO) ၏ ဒါရိုက်တာ ကိုနိုင်အောင်အောင်က ပြောသည်။ “ရွှေ့ပြောင်းအလုပ်သမား ပြဿနာကို ဖြေရှင်းဖို့ ဥပဒေအရ ကာကွယ်ပေးဖို့တော့ မစဉ်းစားပဲနဲ့ ရွှေ့ပြောင်း အလုပ်သမားတွေဆီက နည်းလမ်းပေါင်းစုံနဲ့ ပိုက်ဆံကလည်းယူသေးတယ် လွတ်လပ်စွာ ခရီးသွားလာခွင့်ကို လည်း ပိတ်ပင်တယ်။ ဒါတွေကို ပြန်ကြည့်မယ်ဆိုလို့ရှိရင်တော့ ရွှေ့ပြောင်း အလုပ်သမားတွေ အနေနဲ့က ရှေ့ဆက်ပိုပြီးတော့ စိုးရိမ်စရာတွေ ပိုများလာတယ်။” ထို့အပြင် “ဒါ‌တွေက ကျနော်တို့ လက်ခံလို့ မရဘူးပေါ့။ ကမ္ဘာမှာလည်း မရှိတဲ့ နည်းလမ်းတွေပေါ့။ သက်သက် အကြပ်ကိုင်တဲ့ နည်းလမ်းဖြစ်တယ်ပေါ့။ အလုပ်သမားတွေ အနေနဲ့လည်း တတ်နိုင်ရင် မပြန်တာတော့ အကောင်းဆုံးပေါ့။ အခြားတစ်ဖက်မှာလည်း ဒီဟာတွေကို ဆက်ပြီးတော့ မလုပ်ဖို့ တိုက်တွန်းရမှာ ကျနော်တို့ တာဝန်ပေါ့နော်” ဟု ကိုနိုင်အောင်အောင်က ဆက်ပြောသည်။ စစ်အုပ်စု၏ အလုပ်သမားညွှန်ကြားရေးဦးစီးဌာနကမူ ယခုကန့်သတ်ချက်သည် အလုပ်သမားသစ်များက ခွင့်ပြန် လုပ်သားအဖြစ် အသွင်ဆောင်ကာ တရားမဝင်ထွက်ခွာခြင်းကို တားဆီးရန်ဖြစ်သည်ဟု အကြောင်းပြထား သည်။ သို့သော် ဦးထူးချစ်ကမူ ယခုကဲ့သို့ တင်းကျပ်မှုများသည် အဂတိလိုက်စားမှုကိုသာ လမ်းဖွင့်ပေးရာရောက် နေကြောင်း ထောက်ပြသည်။ “အခုလိုမျိုး ပြဋ္ဌာန်းချက်တွေက ကျနော်တို့ တရားမဝင် ရွှေ့ပြောင်း အလုပ် သမားတွေ ပိုပြီးတော့ များသွားစေတယ်။ နောက်ပြီးတော့ အစိုးရဝန်ထမ်း အဆင့်ဆင့်တွေကိုလည်း အဂတိ လိုက်စားမှု ပိုမိုလွယ်ကူအောင် ဆောင်ရွက်ပေးနေတဲ့ ပုံစံမျိုး ဖြစ်နေတယ်။ ဒါကြောင့်မို့လို့ အစိုးရအနေနဲ့ အဲ့ဒီ လုပ်ငန်းစဉ်တွေကိုတော့ ပြန်စိစစ်သင့်တယ်လို့ ကျနော့်အနေနဲ့ ပြောချင်ပါတယ်။” လက်ရှိတွင် ခွင့်ပြန်လာသည့် အလုပ်သမားများအနေဖြင့် ခွင့်ကာလ (၁) လထက် ကျော်လွန်နေပါက ပြည်ပ ပြန်ထွက်ရန် အထောက်အထားခိုင်လုံစွာ တင်ပြရမည်ဖြစ်ပြီး၊ သံရုံးထောက်ခံစာ သို့မဟုတ် ခွင့်ပြုစာ လိမ်လည် မှုရှိပါက အမည်မည်းစာရင်း (Blacklist) သွင်းကာ ပြည်ပထွက်ခွာခွင့်ကို ပိတ်ပင်မည်ဟု စစ်အုပ်စု ဘက်က မေလ ၄ ရက်နေ့တွင် ထပ်မံထုတ်ပြန် သတိပေးထားသည်။ မြေပြင်အခြေအနေတွင်မူ လူမှုကွန်ရက်၌ ပျံ့နှံ့နေသည့် သတင်းများအရ ရန်ကုန်လေဆိပ်တွင် ပြည်ပပြန်ထွက် မည့် လုပ်သားအချို့သည် VIP အမြန်လမ်းကြောင်းကြေးအဖြစ် ကျပ်သိန်း ၄၀ ခန့်အထိ ပေးဆောင်နေရသည့် အခက်အခဲများနှင့် ကြုံတွေ့နေရကြောင်း သိရသည်။ ထို့ကြောင့် အစိုးရအနေဖြင့် လုပ်သားများထံမှ အခွန်ကောက်ခံရရှိရန်သာ မဟုတ်ဘဲ ၎င်းတို့၏ ရပိုင်ခွင့်နှင့် ဝန်ဆောင်မှုများကိုပါ စနစ်တကျ တာဝန်ယူ ဆောင်ရွက်ပေးသင့်ကြောင်း အလုပ်သမားအရေး လှုပ်ရှားသူများက အလေးအနက် တိုက်တွန်းထားကြသည်။ #migrantworker #ရွှေ့ပြောင်းအလုပ်သမား #သံရုံးထောက်ခံစာ

သံရုံးထောက်ခံစာယူရသည့်အတွက် နေရပ်ပြန် ရွှေ့ပြောင်းလုပ်သားများ အခက်ကြုံ

ပန်းရောင်ကတ် လုပ်ငန်းစဉ် ရွှေ့ဆိုင်း သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၁၈ ရက်။ ထိုင်းနိုင်ငံတွင် တရားမဝင် ရောက်ရှိနေသော နိုင်ငံခြားသား ရွှေ့ပြောင်းလုပ်သား တရားဝင် မှတ်ပုံတင်ပေးရန် စီစဉ်ထား ပန်းရောင်ကတ်အသစ် လုပ်ပေးမည့် အစီအစဉ် E-Work Permit စနစ်ကို ခေတ္တ ရပ်ဆိုင်းလိုက်သည်။ ထိုင်းနယ်စပ် မတည်ငြိမ်မှုကြောင့် တရားမဝင် ရွှေ့ပြောင်းလုပ်သား ၂ သန်း မှတ်ပုံတင်မည့် အစီအစဉ် ရုတ် တရက် ရပ်ဆိုင်းထားလိုက်ကြောင်း ထိုင်းအလုပ်အကိုင်ရှာဖွေရေး ဦးစီးဌာန (DOE) က အောက်တိုဘာလ ၁၆ ရက်နေ့တွင် တရားဝင် ကြေညာချက် ထုတ်ပြန်လိုက်သည်။ မူလက အောက်တိုဘာလ ၁၅ ရက်နေ့တွင် စတင်ရန် စီစဉ်ထားသည့် ဤအစီအစဉ်သည် တစ်ရက်မပြည့်မီမှာပင် ရပ်တန့်သွားခဲ့ခြင်း ဖြစ်သည်ဟု ထိုင်းသတင်းများက ဖော်ပြထားသည်။ ဤသို့ ရုတ်တရက် ရပ်ဆိုင်းလိုက်ခြင်းကြောင့် မြန်မာ၊ ကမ္ဘောဒီးယား၊ လာအို၊ ဗီယက်နမ် စသည့် နိုင်ငံခြားသား အလုပ်သမား (၂) သန်းနီးပါး၏ မျှော်လင့်ချက်များ ပျက်ပြားသွားခဲ့ရသည်။ DOE ၏ ဖော်ပြချက်အရ အစီအစဉ် ရပ်ဆိုင်းရခြင်း၏ အဓိက အကြောင်းရင်းမှာ လက်ရှိ ထိုင်း-မြန်မာ နယ်စပ် အခြေအနေ မတည်ငြိမ်မှုနှင့် ထိလွယ်ရှလွယ် ဖြစ်နေခြင်းကြောင့် ဖြစ်သည်ဟု ဆိုသည်။ အလားတူ ထိုင်း-ကမ္ဘောဒီးယား နယ်စပ်ဒေသများမှ မတည်ငြိမ်မှုများ သည်လည်း အဆိုပါ ဆုံးဖြတ်ချက် ချမှတ်ရာတွင် အဓိက အကြောင်းအရင်းများထဲမှ တစ်ခုအဖြစ် ပါဝင်နိုင်သည်ဟု ထိုင်းသတင်းများက ဆိုသည်။ နယ်စပ်ဒေသများ၏ ထိလွယ်ရှလွယ် အခြေအနေသည် နိုင်ငံ၏ လုံခြုံရေးနှင့် ရွှေ့ပြောင်းဝင်ရောက်မှုကို စီမံခန့်ခွဲ ရာတွင် ဖိအားဖြစ်စေခဲ့သည်။ DOE က ဤအစီအစဉ် ရပ်ဆိုင်းရခြင်းမှာ ‘လုပ်သားပြဿနာကို ပိုမိုပြည့်စုံအောင် ဖြေရှင်းနိုင်ရန်’ ဟု အကြောင်းပြခဲ့သော်လည်း လေ့လာသူများက မြန်မာနိုင်ငံ နယ်စပ်တိုက်ပွဲများကြောင့် ရွှေ့ပြောင်း အလုပ်သမား များ ထိုင်းနိုင်ငံအတွင်းသို့ အလုံးအရင်းဖြင့် ထပ်မံ ဝင်ရောက်လာနိုင်သည့် အခြေအနေကို ထိန်းချုပ်ရန် ကြိုတင် ကာကွယ်သည့် ဆုံးဖြတ်ချက် ဖြစ်နိုင်သည်။ ထို့အပြင် နည်းပညာပိုင်းဆိုင်ရာ ချို့ယွင်းချက်များ: E-Work Permit စနစ်ကို အွန်လိုင်းမှ စတင်ဖွင့်လှစ်ချိန်တွင် နည်းပညာပိုင်းဆိုင်ရာ အဆင်မပြေမှုများ (Errors) များ ဖြစ်ပေါ်ခဲ့ခြင်းကြောင့် လုပ်ငန်းစဉ်ကို ရပ်နားကာ စနစ်တကျ ပြန်လည်ပြင်ဆင်ရန် ဆုံးဖြတ်ခဲ့ခြင်း ဖြစ်နိုင်သည်။ အဆိုပါ ရုတ်တရက် ရပ်ဆိုင်းမှုကြောင့် မြန်မာအပါအဝင် ရွှေ့ပြောင်းလုပ်သားများစွာသည် စိုးရိမ်ထိတ်လန့်မှု များနှင့် ရင်ဆိုင်ခဲ့ရသည်။ အလုပ်သမားများသည် မျှော်လင့်ချက်များ ပျက်ပြားသွားပြီး တရားမဝင် အခြေအနေတွင် ဆက်လက် ရှိနေရ ခြင်းကြောင့် အချိန်မရွေး ဖမ်းဆီးခံရနိုင်သည့် စိုးရိမ်စိတ်ဖြင့် နေထိုင်အလုပ်လုပ်ကိုင်နေရသည်။ မှတ်ပုံတင်ကြေးနှင့် ဆက်စပ်စရိတ်များအတွက် ကြိုတင်ငွေကြေး စုဆောင်းထားသည့် အလုပ်သမားများသည် ၎င်းတို့၏ စီမံကိန်းများ ရပ်ဆိုင်းသွားခြင်းကြောင့် စိတ်ဓာတ်ပိုင်းဆိုင်ရာ ထိခိုက်မှု နှင့်အတူ ငွေကြေးဆိုင်ရာ အခက်အခဲများပါ ရင်ဆိုင်ကြုံတွေ့နေရကြောင်း သိရသည်။ ထိုင်းအစိုးရက အစီအစဉ် ပြန်လည်စတင်မည့် အချိန်ကို အတိအကျ ထုတ်ပြန်ခြင်း မရှိသေးသည့်အတွက် အလုပ်သမားများနှင့် အလုပ်ရှင်များအနေဖြင့် နောက်ဆက်တွဲ ကြေညာချက်များကို အနီးကပ် စောင့်ကြည့်နေရန် လိုအပ်ဆဲ ဖြစ်သည်။

ပန်းရောင်ကတ် လုပ်ငန်းစဉ် ရွှေ့ဆိုင်း

Pink Card အစီအစဉ်အတွက် စာရင်းသွင်းပုံစံ၊ ဆောင်ရွက်မည့်နေရာနှင့် သတိပြုရန် လမ်းညွှန်ချက်များ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၁၁ ရက်။ ထိုင်းနိုင်ငံရောက် ရွှေ့ပြောင်း အလုပ်သမားများအတွက် Pink Card (ပန်းရောင်ကတ်) ပြုလုပ်ပေးမည့် အထူးအစီအစဉ်ကို ယခုရက်ပိုင်းအတွင်း စတင်တော့မည် ဖြစ်ပါသည်။ ယခင်နေ့က စတင်စာရင်းပေးသွင်းမည့်ရက်နှင့် ကုန်ကျစရိတ်များအကြောင်းကို တင်ပြခဲ့ပြီးနောက်၊ ယနေ့တွင် မည်သို့စာရင်းသွင်းရမည် နှင့် မည်သည့်နေရာများတွင် ဆောင်ရွက်ပေးမည် ဆိုသည့် အရေးကြီး လမ်းညွှန်ချက်များကို ဖော်ပြပေးထားပါသည်။ Pink Card လျှောက်ထားရန် စာရင်းပေးသွင်းနည်း (၂) မျိုး Pink Card လျှောက်ထားလိုသူများသည် အဓိကအားဖြင့် နည်းလမ်းနှစ်မျိုးဖြင့် စတင် စာရင်းပေးသွင်းရမည် ဖြစ်သည်။ ၁။ အလုပ်ရှင်မှ ကိုယ်စားပြု အစုလိုက် စာရင်းသွင်းခြင်း အလုပ်သမားများအနေဖြင့် မိမိတို့၏ အလုပ်ရှင်များမှ တစ်ဆင့် စာရင်းပေးသွင်းခြင်းသည် အလွယ်ကူဆုံးနည်းလမ်း ဖြစ်သည်။ အလုပ်ရှင်များသည် ၎င်းတို့၏ ဝန်ထမ်းများ၊ အလုပ်သမားများကို ကိုယ်စားပြု၍ ထိုင်း အလုပ်သမားဝန်ကြီးဌာန (သို့မဟုတ်) သတ်မှတ်ထားသော ဌာနဆိုင်ရာရုံးများ တွင် စာရင်းပေးသွင်းပေးရမည် ဖြစ်သည်။ ၂။ အွန်လိုင်းမှတစ်ဆင့် စာရင်းကြိုသွင်းခြင်း နောက်တစ်နည်းမှာ အလုပ်သမားများအနေဖြင့် သတ်မှတ်ထား သော အွန်လိုင်း ပလက်ဖောင်း သို့မဟုတ် ဖုန်းနံပါတ်များ မှတစ်ဆင့် မိမိတို့၏ အချက်အလက်များကို တင်ပြကာ စာရင်းကြိုသွင်းခြင်း စနစ် ဖြစ်သည်။ သို့သော် ဤနည်းလမ်းကို အသုံးပြုရာတွင် အလုပ်သမားများအနေဖြင့် နည်းပညာဆိုင်ရာ အခက်အခဲများ (စမတ်ဖုန်းနှင့် အင်တာနက် အသုံးပြုမှု) နှင့် ဘာသာစကား အခက်အခဲ များ ရှိနိုင်သည်ကို သတိပြုသင့်သည်။ Pink Card ဝန်ဆောင်မှု ဆောင်ရွက်ပေးမည့် နေရာများ Pink Card ပြုလုပ်ခြင်း လုပ်ငန်းစဉ်များကို အဓိကအားဖြင့် နေရာနှစ်မျိုးခွဲ၍ ဆောင်ရွက်ပေးသွားမည်သည်။ ၁။ အစိုးရဌာနဆိုင်ရာရုံးများ ထိုင်းနိုင်ငံရှိ လဝကရုံး (လူဝင်မှုကြီးကြပ်ရေးရုံး) သို့မဟုတ် ခရိုင်အုပ်ချုပ်ရေးရုံးများ တွင် သတ်မှတ်ထားသော ရက်များအတွင်း Pink Card လုပ်ငန်းများကို ဆောင်ရွက် ပေးသွားမည် ဖြစ်ပါသည်။ ၂။ One Stop Service (OSS) စင်တာများ အလုပ်သမား အရေအတွက် များပြားသော ပြည်နယ်များတွင်မူ "တစ်နေရာတည်း ဝန်ဆောင်မှုစင်တာ" (OSS) များကို ဖွင့်လှစ်ပေးမည်ဖြစ်သည်။ ဤစင်တာများတွင် Pink Card လျှောက်လွှာတင်သွင်းခြင်း၊ ကျန်းမာရေး စစ်ဆေးခြင်းနှင့် သက်ဆိုင်ရာ စာရွက်စာတမ်းများ ပြုလုပ်ခြင်း တို့ကို အလုပ်သမားများ အချိန်မကုန်ဘဲ အပြီးစီး ဆောင်ရွက်နိုင်ရန် စီစဉ်ထားပါသည်။ အရေးကြီးသည့် သတိပေးချက် Pink Card လုပ်ငန်းစဉ်အတွက် အချိန်ကန့်သတ်ချက် သတ်မှတ်ထားခြင်းကြောင့် အလုပ်သမားများအနေဖြင့် သတ်မှတ်ရက် မကုန်ဆုံးမီ စောစီးစွာ စာရင်းပေးသွင်းရန် အထူးလိုအပ်ပါသည်။

Pink Card အစီအစဉ်အတွက် စာရင်းသွင်းပုံစံ၊ ဆောင်ရွက်မည့်နေရာနှင့် သတိပြုရန် လမ်းညွှန်ချက်များ 

မရေရာလှသေးတဲ့ အလင်းရောင် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၃၀ ရက်။ ပီတာ ရေးသည်။ "ကျနော်တို့ လမ်းပျောက်နေသလိုဖြစ်နေတယ်။ မျှော်လင့်ချက်တွေ ကုန်ဆုံးပြီလားလို့ တစ်ခါတလေ တွေးမိတယ်…” ထိုင်း-မြန်မာနယ်စပ် ကရင်နီဒုက္ခသည်စခန်း (၁) တွင် ဆယ်စုနှစ်နှစ်ခုကျော်ကြာ ရှင်သန်ခဲ့သူ မောဒူ(အမည်လွဲ)၏ ရင်ထဲမှ ထွက်ကျလာသော ပဲ့တင်သံတစ်ခုဖြစ်သည်။ အမှန်တကယ်မှာ ဤအသံသည် သူ့တစ်ဦးတည်း၏ အသံမဟုတ်။ နှစ်ပေါင်း၄၀ကျော်ကြာ မျိုးဆက်တစ်ဆက်ပြီးတစ်ဆက် "ဒုက္ခသည်"ဟူသော ခေါင်းစဉ်အောက်မှ လူသားတစ်သိန်းနီးပါး၏ စုပေါင်းညည်းတွားသံလည်း ဖြစ်သည်။ သို့သော် ဩဂုတ်လ ၂၆ ရက်နေ့တွင် ထိုအမှောင်ဖုံးလွမ်းထားသော နံရံမှ အက်ကြောင်းတစ်ခု ပေါ်ထွက်လာခဲ့သည်။ ထိုင်းအစိုးရက မြန်မာဒုက္ခသည်များအား တရားဝင် အလုပ်လုပ်ကိုင်ခွင့်ပြုမည့် သမိုင်းဝင်ဆုံးဖြတ်ချက်ကို ချမှတ်လိုက်ခြင်းပင် ဖြစ်သည်။ ဤဆုံးဖြတ်ချက်သည် မြန်မာဒုက္ခသည်များကို စခန်းများမှ ထွက်ခွာရန် ခွင့်ပြု၍ တစ်နှစ်ကြာ အလုပ်လုပ်ခွင့်ပြုမည်ဖြစ်ပြီး၊ ထိုင်းနိုင်ငံတွင်း အလုပ်အကိုင်များကို ရှာဖွေနိုင်ရန် အခွင့်အရေး ဖန်တီးပေးမည်ဖြစ်သည်။ မောဒူက "အခုတော့ ရောင်ခြည်သန်းလာပြီပေါ့နော်" ဟု ဆက်ပြောသည်။ ကနဦးအနေဖြင့် ဒုက္ခသည် ၄၂,၀၀၀ ကျော်ကို အလုပ်လုပ်ခွင့်ပြုမည့် ထိုရောင်ခြည်သည် အမှန်တကယ်ပင် မျှော်လင့်ချက်အလင်းရောင်လော၊ သို့တည်းမဟုတ် မှုန်ဝါးဝါး မျှော်လင့်ချက်တစ်ခုမျှသာလောဆိုသည်မှာ မေးခွန်းထုတ်စရာ ဖြစ်လာသည်။ ချောက်ကမ်းပါးစွန်းသို့ တွန်းပို့ခံလိုက်ရသော ဘဝများ ၁၉၈၈ နောက်ပိုင်းမှစတင်ကာ ပြည်တွင်းစစ်မီးကို ရှောင်တိမ်းလာခဲ့ကြသော မြန်မာဒုက္ခသည်များသည် UNHCR, TBC နှင့် IRC ကဲ့သို့သော နိုင်ငံတကာအဖွဲ့အစည်းများ၏ အကူအညီဖြင့် နှစ်ပေါင်း များစွာ ရပ်တည်လာခဲ့ကြသည်။ သို့သော် ၂၀၂၅ ခုနှစ်အစောပိုင်းတွင် အမေရိကန်၏ အကူအညီများ ရပ်ဆိုင်းလိုက်ခြင်းသည် ၎င်းတို့၏ ကမ္ဘာငယ်လေးကို လဲပြိုသွားစေခဲ့သည်။ တစ်ဦးလျှင် စားနပ်ရိက္ခာထောက်ပံ့မှု ဘတ် ၃၀၀ ကျော်မှ ၇၇ ဘတ်သို့ ထိုးကျသွားခြင်းသည် ကိန်းဂဏန်းတစ်ခုမျှသာမဟုတ်။ မိသားစုတစ်စု၏ ထမင်းနပ်မှန်ရေးနှင့် ကလေးတစ်ယောက်၏ အာဟာရနှင့် အသက်ဆက်မှုကို တိုက်ရိုက်ခြိမ်းခြောက်လိုက်ခြင်း ဖြစ်သည်။ ထိုမျှသာမက၊ ဆေးရုံများ ပိတ်သိမ်းခံရပြီး ဒုက္ခသည်များ၏အိမ်မက် တတိယနိုင်ငံသို့ သွားရောက်ခွင့်လမ်းများ ပိတ်ဆို့သွားချိန်တွင် မျှော်လင့်ချက်ဟူသော နောက်ဆုံးတံတိုင်းကြီး ပြိုကျသွားတော့သည်။ ဒုက္ခသည် စခန်းများအတွင်း ကိုယ့်ကိုယ်ကို အဆုံးစီရင်မှုများပင် ရှိလာခဲ့သည်ဟု အနီးကပ်ရှိနေသူများကပြောသည်။ ကရင်နီအမျိုးသမီးအဖွဲ့ (KNWO) ဥက္ကဌ မော်ဖရေးမြာက "အခု စားနပ်ရိက္ခာဖြတ်တောက်တယ်၊ ကျန်းမာရေးတွေလည်း ဖြတ်လိုက်တဲ့ကိစ္စ၊ ပြီးတော့ အိမ်နီးချင်းနိုင်ငံတွေမှာ အလုပ်အကိုင် အခွင့်အလမ်းမရှိဘူး။ အဲလိုရွေးချယ်စရာတွေကို အဖက်ဖက်က ဆုံးရှုံးနေတော့ လူတွေက စိတ်ဒဏ်ရာတွေနဲ့ နောက်ဆုံးမှာ ကိုယ့်ကိုယ်ကိုယ်အဆုံးစီရင်တဲ့ကိစ္စကို ရွေးချယ်လာကြတယ်လို့ ကျွန်မတို့ သုံးသပ်မိပါတယ်" ဟု ကြေကွဲစွာဆိုသည်။ လွန်ခဲ့သည့် ခြောက်လအတွင်း ကရင်နီဒုက္ခသည်စခန်း(၁)တစ်ခုတည်း၌ပင် မိမိကိုယ်ကို အဆုံးစီရင်ရန် ကြိုးပမ်းမှု သုံးကြိမ်အထိ ရှိခဲ့သည်။ တစ်ချိန်က နှစ်အတော်ကြာမှ တစ်ကြိမ်သာ ကြားရခဲလှသော ထိုဖြစ်ရပ်ဆိုးများသည် ယခုအခါ စခန်းတွင်း ဖြစ်ရိုးဖြစ်စဉ်တစ်ခုလို ဖြစ်လာခဲ့သည်။ ထွက်ပေါက်ရှာရန် စခန်းပြင်ပသို့ တရားမဝင်ထွက်ခွာသူများအတွက်မူ ဖမ်းဆီးခံရခြင်း၊ နယ်နှင်ဒဏ်ပေးခံရခြင်းနှင့် ထောင်ဒဏ်ကျခံရခြင်းဟူသော အန္တရာယ်များက အသင့်စောင့်ကြိုနေသည်။ စခန်းပြင်ထွက် အလုပ်ရှာ တစ်နေ့လျင် ဘတ်၁၅၀မှ၂၅၀အထိ ပျမ်းမျှသာ လုပ်အားခ ရရှိကြသော်လည်း “ထဟန်” ခေါ်ထိုင်းရဲများဖမ်းမိလျှင် လုပ်အားခနှင့် အဆမတန်သော ဒဏ်ငွေများ ပေးဆောင်ကြရသည်။ ဤသို့ဖြင့် စခန်းများသည် ရုပ်ပိုင်းဆိုင်ရာသာမက စိတ်ပိုင်းဆိုင်ရာပါ အကျဉ်းထောင်တစ်ခုအဖြစ်သို့ ပြောင်းလဲသွားခဲ့သည်။ တစ်ဖက်အတွက် လုပ်အား၊ တစ်ဖက်အတွက် ဂုဏ်သိက္ခာ ဤနောက်ဆုံးထွက်သက်ကို ဆွဲဆန့်ပေးလိုက်သော ထိုင်းအစိုးရ၏ ဆုံးဖြတ်ချက်သည် လူသားချင်းစာနာမှုသက်သက်ကြောင့် ပေါ်ပေါက်လာခြင်းမဟုတ်။ ၎င်းသည် ထိုင်းနိုင်ငံ၏ လက်တွေ့ကျသော စီးပွားရေးလိုအပ်ချက်နှင့်လည်း တိုက်ရိုက်ဆက်စပ်နေသည်။ လူဦးရေအိုမင်းလာမှုနှင့် မွေးဖွားနှုန်းကျဆင်းမှုကြောင့် ထိုင်းနိုင်ငံသည် စိုက်ပျိုးရေး၊ ဆောက်လုပ်ရေးမှသည် ဝန်ဆောင်မှုကဏ္ဍအထိ အလုပ်သမားပြတ်လပ်မှုကို ပြင်းထန်စွာ ရင်ဆိုင်နေရသည်။ ထို့အပြင် ယခုနှစ်အတွင်း ထိုင်း-ကမ္ဘောဒီးယားနယ်စပ်ပဋိပက္ခကြောင့် ကမ္ဘောဒီးယားအလုပ်သမား ၄ သိန်းကျော် ပြန်လည်ထွက်ခွာသွားခြင်းက ဤပြဿနာကို ပိုမိုဆိုးရွားစေခဲ့သည်။ ထိုင်းစီးပွားရေးရှင်များအသင်း (ECOT) က ဤကွက်လပ်ကို ဖြည့်ဆည်းရန် ဒုက္ခသည်များကို အလုပ်ခန့်အပ်ရေးကို ထောက်ခံခဲ့သည်။ ဤအခြေအနေတွင် ဒုက္ခသည်များသည် ထိုင်းနိုင်ငံအတွက် အသင့်တော်ဆုံး လူ့စွမ်းအားအရင်းအမြစ် ဖြစ်လာသည်။ ကရင်ငြိမ်းချမ်းရေး အထောက်ကူပြု ကွန်ယက် (KPSN) မှ တာဝန်ရှိသူ နော်ချယ်ရီက "ထိုင်း-ကမ္ဘောဒီးယား ကိစ္စဖြစ်ပြီးနောက်ပိုင်း သူတို့ဆီမှာ အလုပ်သမားလိုအပ်ချက် ရှိလာတယ်။ တစ်ဖက်မှာလည်း ဒုက္ခထဲမှာ နေနေရတဲ့ ကျမတို့ လူမျိုးစုတွေက ကိုယ့်ဂုဏ်သိက္ခာနဲ့ ကိုယ် အလုပ်လုပ်တယ်၊ ကိုယ်ဝင်ငွေရှာနိုင်တယ်ဆိုတဲ့ ခံစားချက်ကို ရရှိမှာဖြစ်တဲ့အတွက် နှစ်ဦးနှစ်ဖက် အကျိုးကျေးဇူးရမှာပါ" ဟု သုံးသပ်သည်။ ဤသည်မှာ တစ်ဖက်အတွက် လိုအပ်နေသော လုပ်အားကို ဖြည့်ဆည်းပြီး၊ တစ်ဖက်အတွက် ဆုံးရှုံးနေသော လူ့ဂုဏ်သိက္ခာကို ပြန်လည်တည်ဆောက်ပေးမည့် "Win-Win" ဟု ဆိုရမည့် “ရှဉ့်လည်းလျှောက်သာ ပျားလည်း စွဲသာ” ခြေလှမ်းတစ်ခု ဖြစ်လာခဲ့သည်။ မှုန်ဝါးဝါးအလင်းရောင်အောက်မှ ခယောင်းလမ်းကြမ်း "တရားဝင်အလုပ်လုပ်ကိုင်ခွင့်" အလင်းရောင်သည် လက်တွေ့ဘဝတွင် မှုန်ဝါးနေဆဲဖြစ်သည်။ မူဝါဒကို အတည်ပြုပြီးသော်လည်း လက်တွေ့အကောင်အထည်ဖော်မှုမှာ နှေးကွေးနေသည်။ အုန်းဖျံဒုက္ခသည်စခန်းမှ ဒုတိယဥက္ကဌက “မီဒီယာတွေမှာတော့ အလုပ်လုပ်ခွင့်ပြုမယ်လို့ ကြားနေရပေမယ့် ခုထက်ထိ ဘာအဖွဲ့အစည်းတစ်ခုမှ တရားဝင်လာရောက် လုပ်ဆောင်တာတွေ မရှိသေးပါဘူး။ အောက်တိုဘာလ ၁ ရက်နေ့မှာ စတင်မယ်လို့ ကြားပေမယ့် လက်ရှိအချိန်အထိတော့ ဘာမှပြောင်းလဲမှု မရှိသေးဘူး” ဟု ဆိုသည်။ စာရင်းကောက်ယူသည့် အဆင့်မှလွဲ၍ ထူးခြားမှု ကြီးကြီးမားမား မရှိသေးပေ။ အလားတူ ကရင်နီဒုက္ခသည်စခန်းနှစ်ခုတွင်လည်း ထူးမခြားနားဟု စာရင်းကောက်ယူရာတွင် ကူညီပေးသည့်စေတနာ့ဝန်ထမ်းတစ်ဦးကဆိုသည်။ ထိုင်းနိုင်ငံသားများအတွက် သီးသန့်သတ်မှတ်ထားသော အလုပ်အကိုင်များကို လုပ်ကိုင်ခွင့်ရမည် မဟုတ်သလို၊ ရှုပ်ထွေးသော ဗျူရိုကရေစီယန္တရား၊ ဒုက္ခသည်များ၏ အားနည်းချက်ကို အခွင့်ကောင်းယူမည့် သွေးစုပ်ပွဲစားများ၊ နှင့် "ဒုက္ခသည်" အဖြစ်မှ "အလုပ်သမား" အဖြစ်သို့ ကူးပြောင်းရာတွင် UNHCR ၏ အကာအကွယ်အချို့ ဆုံးရှုံးနိုင်ခြေတို့က အသင့်စောင့်ကြိုနေသည်။ "UNHCR က ဒုက္ခသည်အဖြစ်ကနေ ရုပ်သိမ်းလိုက်မလားဆိုတဲ့အပိုင်းကိုတော့ ကျွန်တော်တို့လည်း အတိအကျ မသိရသေးပါဘူး” ဟု အုန်းဖျံဒုက္ခသည်စခန်းမှ ဒုတိယဥက္ကဌက သူ၏စိုးရိမ်မှုကို ဖွင့်ဟသည်။ ယာယီဖြေရှင်းနည်း သို့မဟုတ် ရေရှည်အဖြေ မည်သို့ပင်ဖြစ်စေ၊ ဤဆုံးဖြတ်ချက်သည် မှန်ကန်သောလမ်းကြောင်းပေါ်မှ ပထမဆုံးခြေလှမ်းဖြစ်သည်။ ၎င်းသည် ထိုင်းနိုင်ငံ၏ လူ့အခွင့်အရေးဆိုင်ရာ ပုံရိပ်ကို မြှင့်တင်ပေးသလို၊ ASEAN ဒေသတွင်း ဒုက္ခသည်မူဝါဒများအတွက် စံနမူနာတစ်ခုလည်း ဖြစ်လာနိုင်သည်။ သို့သော် ဤမျှော်လင့်ချက်ကို လက်တွေ့ဘဝရပ်တည်မှုအဖြစ် ပြောင်းလဲနိုင်ရန်မှာမူ ထိုင်းအစိုးရ၏ တိကျသောလုပ်ငန်းစဉ်များ၊ အရပ်ဘက်အဖွဲ့အစည်းများ၏ စောင့်ကြည့်ကူညီမှုနှင့် ဒုက္ခသည်များ၏ ကြိုးစားအားထုတ်မှုတို့ အပေါ်တွင် မူတည်နေသည်။ ဤသည်မှာ ရေရှည်ဖြေရှင်းချက်တစ်ခုလော၊ သို့မဟုတ် ယာယီဖြေရှင်းနည်းတစ်ခုမျှသာလော။ ဤမေးခွန်း၏ အဖြေသည် မြန်မာပြည်၏ ငြိမ်းချမ်းရေးနှင့် တိုက်ရိုက်ဆက်စပ်နေသည်။ မော်ဖရေးမြာကမူ “ကိုယ့်ရဲ့နိုင်ငံရဲ့ အနေအထားအရက အုပ်ချုပ်သူတွေ မကောင်းတဲ့အခါမှာ တစ်ဖက်နေရာ တစ်ဖက်နယ်စပ်ကို ရှောင်ပြီးတော့မှ ရုန်းကန်ရတာဖြစ်တဲ့အတွက်ကြောင့်မို့လို့ ကိုယ့်ရဲ့ပြည်တွင်းနိုင်ငံရေး မငြိမ်းချမ်းနေသ၍ကတော့ ဒီနိုင်ငံတကာ တခြားနိုင်ငံတွေရဲ့ အကူအညီကိုတော့ ပံ့ပိုးပေးဖို့၊ စောင့်ကြည့်ပေးဖို့၊ ကူညီပေးဖို့ အဲ့ဒါကိုတော့ ထပ်ပြီးတော့ ဒုက္ခသည်ကိုယ်စား တောင်းဆိုချင်တယ်။” ဟု တောင်းဆိုလိုက်သည်။ ထိုတောင်းဆိုသံသည် ဆယ်စုနှစ်များစွာကြာ အမှောင်တိုက်ထဲမှ ထွက်ပေါ်လာသည့် အရေးကြီးဆုံးသော ပဲ့တင်သံတစ်ခုပင် ဖြစ်တော့သည်။

မရေရာလှသေးတဲ့ အလင်းရောင်

တရားမဝင် ရွှေ့ပြောင်းသူများအား အမေရိကန် လဝက ဖမ်းဆီးခွင့် ရသွားပြီ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၉ ရက်။ အမေရိကန်နိုင်ငံ၊ လော့စ်အိန်ဂျလိစ်မြို့တွင် ရွှေ့ပြောင်းသူများအား ဖမ်းဆီးသည့် ကိစ္စအား တားဆီးထားသည့် အမိန့်ကို တရားရုံးချုပ်က ရုတ်သိမ်းလိုက်သည်။ ထို့ကြောင့် အမေရိကန် အစိုးရ အနေဖြင့် လော့စ်အိန်ဂျလိစ်မြို့တွင် တရားမဝင် ရွှေ့ပြောင်းနေထိုင်သူများအား တားမြစ်ရှာဖွေ ဖမ်းဆီးခွင့် ရသွားပြီဖြစ်သည်။ တနည်းဆိုရလျှင် သမ္မတ ဒေါ်နယ် ထရန့်အနေဖြင့် နိုင်ငံအတွင်း တရားမဝင် ဝင်ရောက်သူများကို စံချိန်တင် ပြန်ပို့မှုများ လုပ်ဆောင်မည် ဆိုသော ကတိကို အကောင်အထည် ဖော်ခွင့်ရသွားခြင်းလည်း ဖြစ်သည်။ အဆိုပါ ဆုံးဖြတ်ချက်ကြောင့် အသားအရောင်၊ ဘာသာစကား သို့မဟုတ် အလုပ်အကိုင် အပေါ်အခြေခံပြီး သံသယထား ဖမ်းဆီးစစ်ဆေးမှုများကို လုပ်ဆောင်ခွင့်ရသွားမည် ဖြစ်သည်။ ကန့်သတ်ချက် ရုတ်သိမ်းသည့် တရားရုံး ဆုံးဖြတ်ချက်ကို အိမ်ဖြူတော်က ကြိုဆိုလိုက်သည်။ မကြာသေးမီက တောင်ကိုရီးယားပိုင် ဟွန်ဒိုင်း စက်ရုံကို ဥပဒေ စိုးမိုးရေး အရာရှိများက ဝင်ရောက် စစ်ဆေးခဲ့ရာ တရားမဝင် နေထိုင်နေသည့် တောင်ကိုရီးယား နိုင်ငံသား အယောက် ၃၀၀ ကျော်ကို ဖမ်းဆီးခဲ့သည်။

တရားမဝင် ရွှေ့ပြောင်းသူများအား အမေရိကန် လဝက ဖမ်းဆီးခွင့် ရသွားပြီ

ထိုင်း Canon စက်ရုံ ရွှေ့ပြောင်းမှု အလုပ်သမားများ အလုပ် ဆက်ပေးသွားမည်ဟု ကုမ္ပဏီ ကြေညာ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၉ ရက်။ ထိုင်းနိုင်ငံ Nakhon Ratchasima ခရိုင်ရှိ Canon ကုန်ထုတ် စက်ရုံကို လုပ်ငန်းလျော့ချသည့် အနေဖြင့် ရုံးချုပ်ရှိရာ အယုဒ္ဓယသို့ ပြောင်းရွှေ့မည် ဖြစ်ကြောင်း Canon ကုမ္ပဏီက ကြေညာသည်။ ထုတ်လုပ်မှု လုပ်ငန်းများကို ၂၀၂၅ ခုနှစ် နိုဝင်ဘာလတွင် စတင်ပြောင်းရွှေ့မည် ဖြစ်ပြီး ၂၀၂၆ ခုနှစ် ဇွန်လတွင် အပြီးသတ်မည်ဟု Canon ကုမ္ပဏီက ကြေညာထားသည်။ လုပ်ငန်းလျော့ချ ပြောင်းရွှေ့မည် ဖြစ်သော်လည်း အယုဒ္ဓယရှိ စက်ရုံသို့ ပြောင်းရွှေ့ရန် ဆန္ဒရှိသော အလုပ်သမား များကို ရွှေ့ပြောင်းခွင့် ပေးသွားမည် ဖြစ်ပြီး အလုပ်သမားများကို ဆက်လက်ထားရှိမည်ဟု Canon က ကြေညာ သည်။ ဈေးကွက် အနေအထား ပြောင်းလဲမှုကြောင့် ထိရောက်သည့် လုပ်ငန်း လည်ပတ်မှု ရှိစေရန်အတွက် နှစ်နေရာ ခွဲထားသည့် စက်ရုံများကို တစ်နေရာတည်းတွင် ပြန်လည် စုစည်းမည် ဖြစ်ကြောင်း Canon က ဆိုသည်။ Nakhon Ratchasima ခရိုင်ရှိ Canon စက်ရုံသည် Inkjet ပရင်တာများနှင့် စက္ကူထည့်သွင်းသည့် ပစ္စည်းများကို အဓိက ထား ထုတ်လုပ်သည်။ ထိုင်းနိုင်ငံ အလုပ်သမားရေးဌာနတွင် တရားဝင် မှတ်ပုံတင်ထားသည့် စာရင်းများအရ Nakhon Ratchasima ခရိုင်တွင် မြန်မာ ရွှေ့ပြောင်း အလုပ်သမား သောင်းနှင့် ချီပြီး အလုပ် လုပ်ကိုင်လျက် ရှိသည်။

ထိုင်း Canon စက်ရုံ ရွှေ့ပြောင်းမှု အလုပ်သမားများ အလုပ် ဆက်ပေးသွားမည်ဟု ကုမ္ပဏီ ကြေညာ

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

အလည်ဗီဇာဖြင့် ပြည်ပထွက်မည့်လူငယ်များ လေဆိပ်၌ မှတ်ပုံတင်ထားခဲ့ရ
TNLA ယမ်းသိုလှောင်ရုံ ပေါက်ကွဲမှု သေဆုံးသူမြင့်တက်၊ အရေးပေါ်အကူအညီများ လိုအပ်နေ
ရခိုင်ရှိ AA ထိန်းချုပ်နယ်မြေများကို စစ်တပ် ဗုံးကြဲ၊ စက်တပ်လေထီးများဖြင့် စစ်ပြင်နေ
မိုးဦးကာလ ကရင်နီစစ်ရှောင်စခန်းများတွင် ကူးစက်ရောဂါမျိုးစုံ ဖြစ်ပွားနေ
မြန်မာနိုင်ငံဘက်မှ မြစ်ရေညစ်ညမ်းမှုပြဿနာကို ဖြေရှင်းပေးရန် ထိုင်းမြောက်ပိုင်းဒေသခံများ ငြိမ်းချမ်းစွာ လမ်းလျှောက်ဆန္ဒပြ

Archives

Archives

×Close